ການເຄື່ອນໄຫວລົງທຶນໂດຍກົງຂອງຕ່າງປະເທດຢູ່ຫວຽດນາມ ພາຍໃຕ້ຜົນກະທົບຂອງສັນຍາການຄ້າເສລີ ຫວຽດນາມ - ສະຫະພາບເອີຣົບ*
ສາຍພົວພັນລະຫວ່າງສັນຍາການຄ້າເສລີຫວຽດນາມ - ສະຫະພາບເອີຣົບ ແລະ ການເຄື່ອນໄຫວລົງທຶນໂດຍກົງຂອງຕ່າງປະເທດຢູ່ຫວຽດນາມ
ສະພາບການລົງທຶນໂດຍກົງຂອງສະຫະພາບເອີຣົບ (ອີຢູ) ຢູ່ຫວຽດນາມ
ປັດຈຸບັນນີ້, ອີຢູ ເປັນໜຶ່ງໃນບັນດາແຫຼ່ງສະໜອງການລົງທຶນໂດຍກົງຂອງຕ່າງປະເທດ (FDI - ແອັຟດີໄອ) ທີ່ສຳຄັນຂອງຫວຽດນາມ. ໃນ 25 ປີທີ່ຜ່ານມາ, ຄິດເຖິງທ້າຍເດືອນທັນວາ 2014, ບັນດານັກລົງທຶນທີ່ມາຈາກ 23 ປະເທດໃນຈຳນວນ 28 ປະເທດສະມາຊິກ ອີຢູ ໄດ້ໃຫ້ຄຳໝັ້ນສັນຍາລົງທຶນເຂົ້າຫວຽດນາມ ດ້ວຍຈຳນວນເງິນ 19,1 ຕື້ໂດລາສະຫະລັດ ໃນໂຄງການທັງໝົດ 1.600 ກວ່າແຫ່ງ (ຕາມຕົວເລກຂອງກົມລົງທຶນຕ່າງປະເທດ, ກະຊວງແຜນການແລະການລົງທຶນ). ກ່ຽວກັບຂົງເຂດລົງທຶນ, ນັກລົງທຶນ ອີຢູ ໄດ້ມີໜ້າຢູ່ເກືອບທຸກຂະແໜງເສດຖະກິດທີ່ສຳຄັນຂອງປະເທດຫວຽດນາມ, ລະອຽດແມ່ນ ໃນ 18 ຂະແໜງຂອງລະບົບ 21 ຂະແໜງການເສດຖະກິດແຫ່ງຊາດ. ຂົງເຂດທີ່ນຳໜ້າແມ່ນອຸດສາຫະກຳປຸງແຕ່ງ ແລະປະດິດເຄື່ອງ, ມີ 549 ໂຄງການລົງທຶນ ດ້ວຍຈຳນວນທຶນຈົດທະບຽນ 6,04 ຕື້ໂດລາສະຫະລັດ (ກວມເອົາ 31,89% ຈຳນວນທຶນທັງໝົດຂອງ ອີຢູ ທີ່ລົງຢູ່ຫວຽດນາມ). ຢືນໃນອັນດັບທີສອງແມ່ນຂົງເຂດຜະລິດ ແຈກຢາຍໄຟຟ້າ, ອາຍແກັດ, ນ້ຳ, ປັດອາກາດ (ມີ 19 ໂຄງການ ດ້ວຍຈຳນວນທຶນຈົດທະບຽນແມ່ນ 3,52 ຕື້ໂດລາສະຫະລັດ). ອັນດັບທີສາມແມ່ນ ຂົງເຂດຂໍ້ມູນຂ່າວສານ ແລະ ໂທລະຄົມມະນາຄົມ (ມີ 169 ໂຄງການ ດ້ວຍຈຳນວນທຶນຈົດທະບຽນແມ່ນ 2,19 ຕື້ໂດລາສະຫະລັດ ). ກ່ຽວກັບບໍລິເວນພື້ນທີ່ລົງທຶນ, ບັນດາປະເທດອີຢູ ໄດ້ມີໂຄງການຢູ່ 52/63 ແຂວງ, ນະຄອນທີ່ມີທຶນ ແອັຟດີໄອ ໃນທົ່ວປະເທດ (ນັບທັງຂົງເຂດຂຸດຄົ້ນນ້ຳມັນ ອາຍແກັດຢູ່ເຂດທະເລ). ນຳໜ້າໃນການດຶງດູດເອົາ ແອັຟດີໄອ ຈາກບັນດາປະເທດ ອີຢູ ແມ່ນນະຄອນຮ່າໂນ້ຍ ດ້ວຍ 361 ໂຄກາງລົງທຶນທີ່ມີມູນຄ່າ 3,08 ຕື້ໂດລາສະຫະລັດ (ກວມເອົາ 16,2% ຈຳນວນທຶນທັງໝົດຂອງບັນດາປະເທດອີຢູ ທີ່ລົງຢູ່ຫວຽດນາມ). ນະຄອນໂຮ່ຈີມິນຢູ່ໃນອັນດັບທີສອງ ເຊິ່ງມີ 570 ໂຄງການ ດ້ວຍຈຳນວນທຶນທີ່ລົງແມ່ນ 2,8 ຕື້ໂດລາສະຫະລັດ (ກວມເອົາ 14,8% ຈຳນວນທຶນທັງໝົດຂອງບັນດາປະເທດອີຢູ ທີ່ລົງຢູ່ຫວຽດນາມ). ບັນດາແຂວງ ບ່າເຣ້ຍ-ຫວຸງເຕົ່າ, ກວ໋າງນິງ, ດົ່ງນາຍ ເປັນທ້ອງຖິ່ນທີ່ດຶງດູດເອົາການລົງທຶນຂອງບັນດາປະເທດອີຢູ ໄດ້ຫຼາຍ, ຕາມລຳດັບທຶນທີ່ໄດ້ລົງແມ່ນ 2,45 ຕື້ໂດລາສະຫະລັດ, 2,2 ຕື້ໂດລາສະຫະລັດ ແລະ 1,8 ຕື້ໂດລາສະຫະລັດ. ກ່ຽວກັບຮູບການລົງທຶນ. ບັນດາປະເທດອີຢູ ລົງທຶນຫຼາຍທີ່ສຸດແມ່ນຕາມຮູບການລົງທຶນ100% ແມ່ນທຶນຕ່າງປະເທດ ເຊິ່ງມີ 1.115 ໂຄງການ ດ້ວຍຈຳນວນທຶນ 7,71 ຕື້ໂດລາສະຫະລັດ (ກວມເອົາ 40,7% ຍອດຈຳນວນທຶນຂອງບັນດາປະເທດອີຢູ ທີ່ລົງຢູ່ຫວຽດນາມ). ຖັດຈາກນັ້ນແມ່ນຮູບການຮ່ວມວິສາຫະກິດ (ມີ 377 ໂຄງການ ດ້ວຍຈຳນວນທຶນທີ່ລົງແມ່ນ 4,78 ຕື້ໂດລາສະຫະລັດ, ກວມເອົາ 25,2% ຍອດຈຳນວນທຶນຂອງບັນດາປະເທດອີຢູ ທີ່ລົງຢູ່ຫວຽດນາມ). ຮູບການສັນຍາ, ຮ່ວມມືທຸລະກິດມີ 29 ໂຄງການ ດ້ວນຈຳນວນທຶນຈົດທະບຽນ 3,1 ຕື້ໂດລາສະຫະລັດ; ຮູບການສັນຍາ BOT (Build–operate–transfer), BT (Build–transfer), BTO (Build–transfer–operate) ມີພຽງ 4 ໂຄງການ ດ້ວຍຈຳນວນທຶນຈົດທະບຽນ 3,08 ຕື້ໂດລາສະຫະລັດ. ຍັງມີອີກສອງຮູບການຄື ບໍລິສັດຫຸ້ນສ່ວນ ແລະ ບໍລິສັດແມ່-ລູກ (ຕາມກະຊວງແຜນການ ແລະ ການລົງທຶນ)
ຄວາມພົວພັນລະຫວ່າງ ສັນຍາການຄ້າເສລີຫວຽດນາມ - ອີຢູ ກັບສະພາບການລົງທຶນໂດຍກົງຂອງຕ່າງປະເທດຢູ່ຫວຽດນາມ
ທີໜຶ່ງ, ສັນຍາການຄ້າເສລີກັບອີຢູ ແມ່ນສັນຍາແບບໃໝ່, ສັນຍານີ້ຈະມີການກຳນົດຢ່າງລະອຽດຕ່າງໆກ່ຽວກັບເສລີພາບໃນການລົງທຶນ. ດ້ວຍຄວາມບຸລິມະສິດຕ່າງໆທີ່ມີຢູ່ໃນແຜນຍຸດທະສາດດຶງດູດເອົາການລົງທຶນຈາກຕ່າງປະເທດ, ແນ່ນອນວ່າ ສັນຍາຈະມີຄຸນປະໂຫຍດຊຸກຍູ້ການເຄື່ອນໄຫວລົງທຶນຢູ່ຫວຽດນາມ. ຄຽງຄູ່ກັນນັ້ນ, ສັນຍາຍັງມີຂໍ້ມາດຕາຕ່າງໆກ່ຽວກັບການຊ່ວຍໜູນການລົງທຶນ, ເຊັ່ນຊັບສິນທາງປັນຍາ, ບັນຫາສິ່ງແວດລ້ອມ, ບັນຫາການຈັດຊື້ຈັດຈ້າງພາກລັດ, ຄວາມໂປ່ງໃສໃນການລົງທຶນ ຫຼືໃນການລາຍງານໄລ່ລຽງຄ່າໃຊ້ຈ່າຍ... ຂໍ້ກຳນົດເຫຼົ່ານີ້ສ່ວນຫຼາຍແມ່ນເພື່ອແກ້ໄຂຄວາມກັງວົນກ່ຽວກັບສິ່ງແວດລ້ອມແຫ່ງການລົງທຶນຢູ່ຫວຽດນາມ.
ທີສອງ, ການລົງທຶນໂດຍກົງຈາກຝ່າຍອີຢູ ກໍຄືຈາກປະເທດອື່ນເຂົ້າຫວຽດນາມ ຈະເພີ່ມຂຶ້ນຍ້ອນຄຳໝັ້ນສັນຍາກ່ຽວກັບການຫັນເປັນເສລີ. ໃນໄລຍະ 2011 - 2013, ຫວຽດນາມໄດ້ຮັບຜົນປະໂຫຍດຈາກໂຄງການທົ່ວໄປກ່ຽວກັບບຸລິມະສິດພາສີນຳເຂົ້າ (GSP - General Scheme of Preferences ) ດ້ວຍລະດັບຫລຸດຜ່ອນພາສີສະເຫຼ່ຍ 3,5 ຈຸດສ່ວນຮ້ອຍ ຕໍ່ກັບສິນຄ້າປະເພດຕ່າງໆທີ່ກວມປະມານ 25% ຍອດມູນຄ່າສິນຄ້າສົ່ງນອກຂອງຫວຽດນາມເຂົ້າໃນ ອີຢູ. ແຕ່ວ່າ, ຖ້າຫາກເຊັນສັນຍາການຄ້າເສລີກັບເອີຣົບ, ພາສີສົ່ງນອກໄປຍັງອີຢູ ກໍຄືນຳເຂົ້າວັດຖຸອຸປະກອນຈາກອີຢູ ຈະຫລຸດລົງຫຼາຍກວ່າອີກ, ອາດຈະລົງເຖິງ 0% ຕໍ່ກັບສິນຄ້າຫຼາຍປະເພດ. ເປັນອັນວ່າ, ເມື່ອລົງທຶນເຂົ້າຫວຽດນາມ ທັງເອີຣົບ ແລະ ປະເທດອື່ນກໍ່ໄດ້ຮັບຜົນປະໂຫຍດຈາກສັນຍາການຄ້າເສດລີ.
ທີສາມ, ເອີຣົບເປັນພາກພື້ນທີ່ເສດຖະກິດພັດທະນາ ດ້ວຍການກຳນົດມາດຕະຖານຕ່າງໆທາງດ້ານເຕັກນິກ ແລະ ຄຸນນະພາບໃນແຕ່ລະຂອດ, ແຕ່ລະຜະລິດຕະພັນ ຢ່າງຈະແຈ້ງ. ເຂົ້າຮ່ວມສັນຍາການຄ້າເສລີກັບເອີຣົບ, ຫວຽດນາມຕ້ອງປະຕິບັດຄຳໝັ້ນສັນຍາກ່ຽວກັບມາດຕະຖານເຫຼົ່ານັ້ນ. ການຊ່ວຍເຫຼືອທາງດ້ານເຕັກໂນໂລຊີ, ວິທະຍາສາດ, ເຕັກນິກ ແລະ ນະວັດຕະກຳຈາກເອີຣົບ ຈະປະກອບສ່ວນເຮັດໃຫ້ໂຄງສ້າງພື້ນຖານ ແລະ ບັນດາຜະລິດຕະພັນແປຮູບ, ຜະລິດຕະພັນທີ່ຜະລິດຢູ່ຫວຽດນາມມີການປ່ຽນແປງເປັນຢ່າງດີ. ນີ້ເປັນສິ່ງດຶງດູດຈັບໃຈນັກລົງທຶນຕ່າງປະເທດ ໃຫ້ມາລົງທຶນຢູ່ຫວຽດນາມ.
ໂອກາດດຶງດູດແອັຟດີໄອ ຈາກການເຊັນສັນຍາການຄ້າເສລີຫວຽດນາມ - ອີຢູ
ໂອກາດທີ່ມາຈາກພາຍໃນຂອງຫວຽດນາມ
ທີໜຶ່ງ, ຫວຽດນາມມີທີ່ຕັ້ງພູມສາດທີ່ສະດວກດີ ຍ້ອນຢູ່ໃຈກາງອາຊີຕາເວັນອອກສຽງໃຕ້. ການເຂົ້າຮ່ວມໃນປະຊາຄົມເສດຖະກິດອາຊຽນ ທ້າຍປີ 2015 ຈະຊຸກຍູ້ໃຫ້ຫວຽດນາມກາຍເປັນໃຈກາງສົ່ງນອກຂອງພາກພື້ນ. ຫວຽດນາມຈະກາຍເປັນຂົວຕໍ່ທີ່ດີ ໃຫ້ແກ່ບັນດາບໍລິສັດຕ່າງປະເທດ ເຂົ້າມາລົງທຶນໃນຫວຽດນາມ ເພື່ອແຊກຊືມເຂົ້າຕະຫຼາດບັນດາປະເທດອາຊຽນອື່ນ.
ທີສອງ, ຄ່າໃຊ້ຈ່າຍແຮງງານຂອງຫວຽດນາມລາຄາຖືກທີ່ສຸດ, ໂຄງປະກອບຂອງປະຊາກອນພວມຢູ່ໃນໄລຍະ “ໂຄງປະກອບຄຳ”, ກຳລັງແຮງງານອຸດົມສົມບູນ. ຕາມຂໍ້ມູນຂອງກົມສະຖິຕິ, ກຳລັງແຮງງານອາຍຸແຕ່ 15 ປີຂຶ້ນໄປຂອງທົ່ວປະເທດຮອດວັນທີ 1 ມັງກອນ 2015 ປະມານ 54,48 ລ້ານຄົນ, ເພີ່ມ 782 ພັນຄົນທຽບກັບເວລາດຽວກັນຂອງປີ 2014, ໃນນັ້ນ ແຮງງານຜູ້ຊາຍກວມເອົາ 51,3%; ແຮງງານຜູ້ຍິງ 48,7%. ກຳລັງແຮງງານໃນໄວອາຍຸອອກແຮງງານມີປະມານ 47,75 ລ້ານຄົນ, ເພີ່ມ 333,7 ພັນຄົນ, ໃນນັ້ນຜູ້ຊາຍກວມເອົາ 53,7%, ຜູ້ຍິງ 46,3%. ຄ່າໃຊ້ຈ່າຍແຮງງານຢູ່ຫວຽດນາມໃນປັດຈຸບັນຖືກຫຼາຍ ເທົ່າກັບ 50% ຄ່າໃຊ້ຈ່າຍແຮງງານຂອງຈີນ ແລະ ເທົ່າກັບ 40% ຄ່າໃຊ້ຈ່າຍແຮງງານຂອງຟີລິບປີນ ແລະ ຂອງໄທ.
ທີສາມ, ຄວາມບຸລິມະສິດຕ່າງໆ ດ້ານການເງິນ ທີ່ດິນ ພາສີລາຍໄດ້ ໃນກົດໝາຍການລົງທຶນສະບັບປັບປຸງໃໝ່ ທີ່ປະຕິບັດຕໍ່ວິສາຫະກິດຈຳນວນໜຶ່ງຢູ່ຫວຽດນາມນັ້ນ ກໍ່ເປັນສິ່ງຈັບໃຈທີ່ສຸດຕໍ່ການດຶງດູດທຶນ ແອັຟດີໄອ. ປັດຈຸບັນ, ພາສີລາຍໄດ້ວິສາຫະກິດທີ່ເກັບຕໍ່ວິສາຫະກິດ ແອັຟດີໄອ ຍັງເຫຼືອພຽງ 22% ແລະໄດ້ວາງຈຸດໝາຍ 20% ໃນປີ 2016.
ທີສີ່, ຫວຽດນາມຈະເປັນໜຶ່ງໃນບັນດາຕະຫຼາດຈຳໜ່າຍສິນຄ້າທີ່ໃຫຍ່ທີ່ສຸດ ແລະ ຈັບໃຈທີ່ສຸດໃນອະນາຄົດ. ຫວຽດນາມໄດ້ສຳເລັດສິ້ນສຸດການເຊັນສັນຍາຄູ່ຮ່ວມເສດຖະກິດຂ້າມປະຊີຟິກ (TPP) ເຊິ່ງບັນດາສະມາຊິກຂອງ TPP ໄດ້ກວມເອົາຜູ້ບໍລິໂພກສ່ວນຫຼາຍໃນໂລກ. ຄຽງຄູ່ກັນນັ້ນ, ຫວຽດນາມຫາກໍ່ເຊັນສັນຍາການຄ້າເສລີຫຼາຍສະບັບກັບ ສ.ເກົາຫຼີ, ສະຫະພັນເສດຖະກິດອາຊີ-ເອີຣົບ. ເມື່ອສັນຍາເຫຼົ່ານີ້ມີຄວາມສັກສິດ, ຜະລິດຕະພັນທີ່ຜະລິດຢູ່ຫວຽດນາມ ຈະໄດ້ເຂົ້າເຖິງໂດຍເສລີເຂົ້າໃນຫຼາຍຕະຫຼາດສົ່ງນອກທີ່ໃຫຍ່ໃນໂລກ ໂດຍບໍ່ຖືກກີດຂວາງຍ້ອນຮົ້ວພາສີສຸລະກາກອນ ຫຼືໂຄວຕ້າ.
ໂອກາດທີ່ມາຈາກນັກລົງທຶນເອີຣົບ
ທີໜຶ່ງ, ນັບມື້ນັບມີຫຼາຍບໍລິສັດຂອງອີຢູ ເລືອກເອົາຫວຽດນາມ ເປັນສະຖານທີ່ທີ່ດີເລີດເພື່ອລົງທຶນໃນຂົງເຂດການຜະລິດ. ບັນດາບໍລິສັດຂອງຫວຽດນາມເຄີຍຂາດເຂີນທຶນຮອນ ແລະ ເຕັກໂນໂລຊີ ເຊິ່ງເປັນບັນດາປັດໄຈທີ່ບໍລິສັດຂອງເອີຣົບມີພ້ອນຢ່າງຫຼວງຫຼາຍ. ດ້ານອື່ນ, ຄ່າໃຊ້ຈ່າຍແຮງງານຂອງເອີຣົບກໍ່ສູງພໍຄວນ ດັ່ງນັ້ນຈຶ່ງບໍ່ສາມາດແຂ່ງຂັນໄດ້ໃນສະພາບໂລກາພິວັດ. ໂຄງປະກອບຄ່າໃຊ້ຈ່າຍຂອງບັນດາບໍລິສັດຂອງຫວຽດນາມກໍ່ຈັບໃຈພໍຄວນ, ຫວຽດນາມມີທ່າໄດ້ປຽບຕ່າງໆຢ່າງຫຼາກຫຼາຍ, ຄຸນນະພາບແຮງງານດີກວ່າ ແລະ ການປົກປ້ອງຊັບສິນທາງປັນຍາກໍ່ດີກວ່າ ທຽບກັບຫຼາຍປະເທດໃນພາກພື້ນ.
ທີສອງ, ສັນຍາການຄ້າເສລີຫວຽດນາມ - ອີຢູ ກໍ່ຈະຊຸກຍູ້ໃຫ້ເງິນທຶນ ແອັຟດີໄອ ຂອງອີຢູໄຫຼເຂົ້າໃນບັນດາຂົງເຂດບໍລິການຄຸນນະພາບສູງ ເຊິ່ງເສດຖະກິດຫວຽດນາມຕ້ອງການທີ່ສຸດ, ເຊັ່ນ ການເງິນ-ທະນາຄານ-ປະກັນໄພ, ພະລັງງານ, ໂທລະຄົມມະນາຄົມ, ທ່າກຳປັ່ນທະເລ ແລະ ຂົນສົ່ງທາງທະເລ.
ທີສາມ, ໃນເວລາທີ່ທະນາຄານຫວຽດນາມຈຳນວນໜຶ່ງພວນພົບຄວາມຫຍຸ້ງຍາກຍ້ອນບັນຫາພາຍໃນ, ເຊັ່ນຈັດວາງໂຄງປະກອບຄືນໃໝ່, ໜີ້ສິນຄຸມເຄືອ,... ບັນດາທະນາຄານຕ່າງປະເທດທີ່ໄດ້ຮັບການຊ່ວຍໜູນຈາກບັນດາກຸ່ມການເງິນຍັກໃຫຍ່ໃນໂລກ ຊ້ຳພັດພວນຫາວິທີແຊກຊຶນ ແລະ ເປີດກວ້າງສ່ວນແບ່ງການຕະຫຼາດຢູ່ຫວຽດນາມ. ທະນາຄານຕ່າງປະເທດຈະມີທ່າໄດ້ປຽບກວ່າທຽບກັບທະນາຄານໃນປະເທດ, ຖ້າຫາກສັນຍາການຄ້າເສລີກັບອີຢູມີຄວາມສັກສິດ ໄດ້ຮັບການປະຕິບັດເປັນທາງການ ຕາມຄຳໝັ້ນສັນຍາເປີດປະຕູແລະໃຫ້ບຸລິມະສິດ ກໍເປັນອັນແນ່ນອນວ່າ ການທະນາຄານຈະເປັນຂົງເຂດດຶງດູດເງິນລົງທຶນຢ່າງແຂງແຮງຈາກນັກລົງທຶນເອີຣົບ.
ໂອກາດທີ່ມາຈາກບັນດາປະເທດນອກເອີຣົບ
ທີໜຶ່ງ, ສັນຍາການຄ້າເສລີກັບອີຢູ ບໍ່ພຽງແຕ່ເຮັດໃຫ້ທ່າອຽງລົງທຶນເຂົ້າຫວຽດນາມ ຂອງບັນດາບໍລິສັດອີຢູ ເພີ່ມຂຶ້ນເທົ່ານັ້ນ ຫາກຍັງຊຸກຍູ້ການດຶງດູດເອົາແຫຼ່ງລົງທຶນຕ່າງໆຈາກບັນດາປະເທດຢູ່ນອກເອີຣົບອີກນຳ. ສັນຍາການຄ້າເສລີຫວຽດນາມ - ອີຢູ ສ້າງສິ່ງແວດລ້ອມແຫ່ງການລົງທຶນທີ່ປອດໂປ່ງ, ສະດວກດີກວ່າ ໂດຍຜ່ານຂໍ້ກຳນົດກ່ຽວກັບການລົງທຶນ ແລະ ພາສີສຸລະກາກອນ. ບັນດາປະເທດທີ່ບໍ່ມີສັນຍາການຄ້າເສລີກັບອີຢູ ຈະມີທ່າອຽງລົງທຶນເຂົ້າຫວຽດນາມ ເພື່ອອາດຈະໄດ້ຮັບຜົນປະໂຫຍດຈາກສັນຍານີ້.
ທີສອງ, ຕະຫຼາດເອີຣົບເປັນຕະຫຼາດທີ່ໃຫຍ່ໂຕ ແລະ ຈັບໃຈທີ່ສຸດ. ນີ້ກໍແມ່ນຕະຫຼາດທີ່ມີຂໍ້ກຳນົດທີ່ເຄັ່ງຄັດຕ່າງໆທາງດ້ານການຄ້າ (ເຊັ່ນ ກົດລະບຽບຕົ້ນກຳເນີດ, ບັນດາກົດລະບຽບເຕັກນິກ,...). ສັນຍາການຄ້າເສລີຫວຽດນາມ - ອີຢູ ຈະເປີດປະຕູໜຶ່ງໃຫ້ແກ່ບັນດາວິສາຫະກິດທີ່ຜະລິດຢູ່ຫວຽດນາມ, ນັບທັງວິສາຫະກິດໃນປະເທດແລະຕ່າງປະເທດ ລ້ວນແຕ່ສາມາດເຂົ້າເຖິງຕະຫຼາດນີ້ຢ່າງງ່າຍດາຍ.
ທີສາມ, ສັນຍາການຄ້າເສລີຫວຽດນາມ - ອີຢູ ຊ່ວຍໃຫ້ວິສາຫະກິດຢູ່ຫວຽດນາມ ນຳເຂົ້າເຕັກໂນໂລຊີ, ວັດຖຸອຸປະກອນຄຸນະພາບສູງຈາກອີຢູ ດ້ວຍລາຄາທີ່ຖືກກວ່າ. ອັນນີ້ຈະປະກອບສ່ວນຍົກສູງສະມັດຕະພາບຂອງງານ, ຍົກສູງຄຸນນະພາບ ແລະ ຫລຸດຜ່ອນລາຄາສຳເລັດຮູບຂອງສິນຄ້າທີ່ຜະລິດຢູ່ຫວຽດນາມ. ນີ້ແມ່ນກຳລັງຊຸກດັນໃຫ້ແກ່ບັນດາວິສາຫະກິດ ແອັຟດີໄອ ທີ່ລົງທຶນຢູ່ຫວຽດນາມ ເພື່ອຈະໄດ້ຮັບຜົນປະໂຫຍດຈາກຄວາມບຸລິມະສິດນີ້ຂອງອີຢູ.
ທີສີ່, ເມື່ອເຊັນສັນຍາການຄ້າເສລີຫວຽດນາມ - ອີຢູ, ຫວຽດນາມກໍ່ໄດ້ກຳນົດທິດຢ່າງຈະແຈ້ງໃນການດຶງດູດເອົາເງິນທຶນຈາກພາຍນອກ ໃຫ້ລົງເຂົ້າໃນບັນດາຂະແໜງການຍຸດທະສາດ ເຊັ່ນອຸດສາຫະກຳສະໜັບສະໜູນ. ດ້ວຍຄຳໝັ້ນສັນຍາກ່ຽວກັບການຄ້າສິນຄ້າ ພ້ອມດ້ວຍການກຳນົດກ່ຽວກັບກົດລະບຽບຕົ້ນກຳເນີດ ແລະ ບັນດາກົດລະບຽບເຕັກນີກ, ສັນຍາການຄ້າເສລີຫວຽດນາມ - ອີຢູ ຈະຊຸກຍູ້ໃຫ້ນັກລົງທຶນເອີຣົບ ລົງທຶນແບບລວງເລິກເຂົ້າໃນຕະຫຼາດຫວຽດນາມ ເພື່ອໄດ້ຮັບຜົນປະໂຫຍດຍ້ອນອັດຕາພາສີບຸລິມະສິດຂອງສັນຍາການຄ້າເສລີ.
ທີຫ້າ, ສັນຍາການຄ້າເສລີຫວຽດນາມ - ອີຢູ ເປີດປະຕູໃຫ້ເກ່ບັນດາຂະແໜງບໍລິການຄຸນນະພາບສູງທີ່ມາຈາກເອີຣົບ, ເຊັ່ນປະກັນໄພ, ທະນາຄານ, ໂທລະຄົມມະນາຄົມ, logistics... ສົມທົບກັບການແຂ່ງຂັນໂປ່ງໃສ ແລະ ຄ່າແຮງງານຕ່ຳ ຈະເຮັດໃຫ້ການບໍລິການຂະຫຍາຍຕົວຢ່າງກວ້າງຂວາງ, ລາຄາການຜະລິດຕ່ຳ. ນີ້ຖືກຖືຄືວ່າເປັນກຳລັງໝູນໃຫ້ແກ່ການຜະລິດ, ສ້າງເປັນພວງພະນັງການສະໜອງທີ່ເຂົ້າແກັບເຂົ້າເກຍທາງດ້ານເງິນທຶນ ແລະ ຜະລິດຕະພັນ. ບັນດາການບໍລິການຊ່ວຍໜູນການຜະລິດທີ່ໄດ້ຮັບການປັບປູງນີ້ ກໍເປັນທ່າໄດ້ປຽບໜຶ່ງເພື່ອດຶງດູດ ແອັຟດີໄອ ຈາກບັນດາປະເທດທີ່ບໍ່ເຂົ້າຮ່ວມໃນສັນຍາການຄ້າເສລີຫວຽດນາມ - ອີຢູ.
ຄວາມທ້າທາຍຕ່າງໆຕໍ່ກັບການດຶງດູດ ແອັຟດີໄອ ເມື່ອເຊັນສັນຍາການຄ້າເສລີຫວຽດນາມ - ອີຢູ
ທີໜຶ່ງ, ກ່ຽວກັບຄວາມສາມາດແຂ່ງຂັນ, ຕາມລາຍງານຂອງເວທີປາໄສເສດຖະກິດໂລກ (WEF) ປີ 2014 ດັດຊະນີຄວາມສາມາດແຂ່ງຂັນຂອງຫວຽດນາມ ຢູ່ອັນດັບທີ 68 ໃນຈຳນວນ 144 ປະເທດ, ດັດຊະນີຄວາມລະອຽດແນບນຽນແຫ່ງການເຄື່ອນໄຫວຂອງວິສາຫະກິດ ຢູ່ອັນດັບທີ 106, ດັດຊະນີເຕັກໂນໂລຊີ ຢູ່ອັນດັບທີ 99, ລະດັບການຂະຫຍາຍຕົວຂອງຕະຫຼາດການເງິນ ຢູ່ອັນດັບທີ 90, ການສຶກສາກໍ່ສ້າງ ຢູ່ອັນດັບທີ 96 ແລະພິເສດແມ່ນ ລະບຽບກົດໝາຍຍັງຄົງຖືກຈັດໃນອັນດັບທີ 92. ສະພາບດັ່ງກ່ວາໄດ້ສົ່ງຜົນກະທົບທາງລົບຫຼາຍຢ່າງໃຫ້ແກ່ຫວຽດນາມໃນການດຶງດູດເງິນທຶນ ແອັຟດີໄອ, ພິເສດແມ່ນສຳລັບຄູ່ຮ່ວມມືທີ່ມີຄວາມເຄັ່ງຄັດຄື ອີຢູ.
ທີສອງ, ສິ່ງແວດລ້ອມແຫ່ງການທຸລະກິດມີຄວາມຈັບໃຈໜ້ອຍ. ຕາມລາຍງານກ່ຽວກັບສິ່ງແວດລ້ອມແຫ່ງການທຸລະກິດປີ 2015 ຂອງທະນາຄານໂລກ, ໄດ້ຈັດລະດັບສິ່ງແວດລ້ອມແຫ່ງການທຸລະກິດຂອງຫວຽດນາມ ຢູ່ໃນອັນດັບທີ 78 ໃນຈຳນວນ 189 ປະເທດ. ແຕ່ວ່າ, ດັດຊະນີອື່ນໆຍັງຢູ່ໃນອັນດັບຕ່ຳທີ່ສຸດ, ເຊັ່ນ ການຊຳລະພາສີ (ຢູ່ອັນດັບທີ 173, ຍ້ອນການຊຳລະພາສີແຕ່ລະປີຕ້ອງເຮັດ 32 ຄັ້ງ, ເສຍເວລາ 872 ຊົ່ວໂມງ); ຕິດຕັ້ງໄຟຟ້າ (ຢູ່ອັນດັບທີ 135, ຍ້ອນຕ້ອງຜ່ານລະບຽບການ 6 ຂັ້ນຕອນ, ເສຍເວລາ 115 ວັນ); ເລີ່ມຕົ້ນການທຸລະກິດ (ຢູ່ອັນດັບທີ 125, ຍ້ອນຕ້ອງຜ່ານລະບຽບການ 10 ຂັ້ນຕອນທີ່ຕ່າງກັນ, ເສຍເວລາ 34 ວັນ); ການປົກປ້ອງນັກລົງທຶນທີ່ເປັນຄົນຊົນເຜົ່າສ່ວນນ້ອຍ (ຢູ່ອັນດັບທີ 117); ແກ້ໄຂສະພາບການລົ້ມລະລາຍ (ຢູ່ອັນດັບທີ 104). ບາງຂະແໜງການ, ທ້ອງຖິ່ນຍັງບໍ່ທັນຮັບຮູ້ໄດ້ວ່າ ການປົວແປງສິ່ງແວດລ້ອມແຫ່ງການລົງທຶນທຸລະກິດ ແລະ ການຍົກສູງຄວາມສາມາດແຂ່ງຂັນດ້ວຍຕົນເອງ ແມ່ນໜ້າທີ່ຮີບດ່ວນ. ທຽບກັບສິ່ງແວດລ້ອມແຫ່ງການທຸລະກິດຂອງບັນດາປະເທດໃນພາກພື້ນ, ເຊັ່ນ ສິງກະໂປ (ຢູ່ອັນດັບທີ 1), ມາເລເຊຍ (ຢູ່ອັນດັບທີ 18), ໄທ (ຢູ່ອັນດັບທີ 26), ສິ່ງແວດລ້ອມແຫ່ງການທຸລະກິດຂອງຫວຽດນາມຍັງບໍ່ທັນມີຄວາມຈັບໃຈຕໍ່ນັກລົງທຶນ.
ທີສາມ, ບັນຫາແຮງງານ ແລະ ການຄຸ້ມຄອງ. ຍ້ອນຈຸດເລີ່ມຕົ້ນຕ່ຳ, ໂຄງປະກອບເສຖະກິດຕົ້ນຕໍແມ່ນອຽງໄປທາງກະສິກຳ, ດັ່ງນັ້ນ, ອັດຕາສ່ວນແຮງງານທີ່ເຂົ້າຮ່ວມຕະຫຼາດແຮງງານເປັນທາງການກໍ່ຍັງຕ່ຳ, ບັນລຸປະມານ 30%. ຄຸນນະພາບ ແລະ ໂຄງປະກອບແຮງງານຍັງຕ່ຳ ບໍ່ໄດ້ຕາມຄວາມຕ້ອງການຂອງການພັດທະນາ ແລະ ການເຊື່ອມໂຍງສາກົນ. ປະມານ 45% ຈຳນວນແຮງງານໃນກະສິກຳ ຍັງບໍ່ໄດ້ຜ່ານການຝຶກອົບຮົມວິຊາຊີບ. ຄຸນະພາບຂອງແຫຼ່ງກຳລັງຄົນຂອງປະເທດຫວຽດນາມຍັງຕ່ຳ ແລະເປັນ “ຂອດປຶກຕັນ” ທີ່ກີດຂວາງການພັດທະນາ. ທະນາຄານໂລກໄດ້ປະເນີນວ່າ ຫວຽດນາມພວມຂາດເຂີນແຮງງານຊຳນານອາຊີບ, ກຳມະກອນເຕັກນິກຂັ້ນສູງ. ຖ້າຫາກຄິດໄລ່ຕາມຕາຕະລາງຄະແນນ 10 ກໍ່ປະເມີນຄຸນນະພາບກຳລັງຄົນຂອງຫວຽດນາມ ໄດ້ຄະແນນ 3,79, ຢູ່ອັນດັບທີ 11 ໃນຈຳນວນ 12 ປະເທດອາຊີທີ່ເຂົ້າຮ່ວມການຈັດອັນດັບຂອງທະນາຄານໂລກ, ໃນເວລານັ້ນ ສ.ເກົ່ຫຼີ ໄດ້ຄະແນນ 6,91; ອິນເດຍ ໄດ້ຄະແນນ 5,76; ມາເລເຊຍ ໄດ້ຄະແນນ 5,59... ດັ່ງນັ້ນ, ສະມັດຕະພາບແຮງງານຂອງຫວຽດນາມ ຈຶ່ງຖືກຈັດໃນປະເພດຕ່ຳທີ່ສຸດໃນພູມິພາກອາຊີ-ປາຊີຟິກ (ຕ່ຳກວ່າສິງກະໂປ 15 ເທົ່າ, ຕ່ຳກວ່າຍີ່ປຸ່ນ 11 ເທົ່າ ແລະ ຕ່ຳກວ່າ ສ.ເກົາຫຼີ 10 ເທົ່າ).
ທີສີ່, ລະບົບສື່ຂ່າວຕະຫຼາດແຮງງານຂອງຫວຽດນາມປັດຈຸບັນຍັງອ່ອນນ້ອຍແລະຖືກຈຳກັດ, ເຊັ່ນຖືກຕັດແບ່ງລະຫວ່າງບັນດາເຂດ ພາກ; ຄວາມສາມາດກວມລວມ, ເກັບກຳ ແລະ ສະໜອງຂ່າວສານຍັງບໍ່ຕອບສະໜອງໄດ້ກັບຄວາມຕ້ອງການຂອງບັນດາຄູ່ຮ່ວມໃນຕະຫຼາດແຮງງານ, ພິເສດແມ່ນຜູ້ເປັນເຈົ້າຂອງນຳໃຊ້ແຮງງານ ແລະ ຜູ້ອອກແຮງງານ. ນອກຈາກນັ້ນ, ຍັງບໍ່ມີຕົວແບບຄາດຄະເນຕະຫຼາດແຮງງານທີ່ເຊື່ອຖືໄດ້ແລະສອດຄ່ອງ, ຂາດຖັນແຖວພະນັກງານ, ຜູ້ຊ່ຽວຊານທີ່ເຮັດວຽກງານສະຖິຕິ, ວິໄຈໄຈ້ແຍກ, ຄາດຄະເນ.
ທີຫ້າ, ຍັງມີສິ່ງກີດຂວາງການດຶງດູດເງິນລົງທຶນເຂົ້າໃນບາງຂົງເຂດຈຸດໜັກ: 1- ຕໍ່ກັບຂະແໜງການກະສິກຳ, ນີ້ແມ່ນຂະແໜງການທີ່ຫວຽດນາມມີທ່າດີປຽບທຽບ, ແຕ່ວ່າການດຶງດູດ ແອັຟດີໄອ ເຂົ້າໃນກະສິກຳຍັງຖືກຈຳກັດທີ່ສຸດ. ສາເຫດແມ່ນຍ້ອນທາດແທ້ໃນຕົວຂອງຂະແໜງກະສິກຳ ແລະ ກໍຍ້ອນນະໂຍບາຍກະສິກຳຂອງລັດ ຍັງມີຄວາມຂາດຕົກບົກພ່ອງ. ສິ່ງທີ່ນັກລົງທຶນຄິດລະແວງທີ່ສຸດຄື ອັດຕາກຳໄລຂອງຄະແໜງນີ້ຍັງຕ່ຳ ຍ້ອນຍັງບໍ່ທັນຍູ້ແຮງອຸດສາຫະກຳປຸງແຕ່ງອາຫານ, ໃນເວລານັ້ນ ການເກັບທຶນຄືນກໍ່ຖືກແກ່ຍາວຫຼາຍປີ. ນອກຈາກນັ້ນ, ຄວາມສ່ຽງຕ່າງໆຍ້ອນໄພທຳມະຊາດ, ນ້ຳຖ້ວມ, ແຫ້ງແລ້ງ ພ້ອມກັບຄວາມສ່ຽງຕະຫຼາດ ແລະ ການບໍລິການປະກັນໄພໃນກະສິກຳທີ່ຍັງບໍ່ທັນຂະຫຍາຍຕົວ ກໍ່ເປັນບັນຫາກີດຂວາງການດຶງດູດການລົງທຶນເຂົ້າໃນຂະແໜງການນີ້. 2- ຕໍ່ກັບຂະແໜງການອຸດສະຫະກຳສະໜັບສະໜູນ, ປັດຈຸບັນນີ້ ຈຳນວນວິສາຫະກິດທີ່ກຳລັງເຄື່ອນໄຫວໃນຂົງເຂດອຸດສາຫະກຳສະໜັບສະໜູນ ຍັງຈຳກັດ, ຕົ້ນຕໍແມ່ນວິສາຫະກິດຂະໜາດນ້ອຍແລະຂະໜາດກາງ. ຄຸນນະພາບຂອງຜະລິດຕະພັນອຸດສາຫະກຳສະໜັບສະໜູນຕ່ຳທີ່ສຸດ ແລະ ບໍ່ໝັ້ນທ່ຽງ. ຍ້ອນແຫຼ່ງພະລັງດ້ານເຕັກໂນໂລຊີແລະເງິນທຶນບໍ່ຄົບຖ້ວນ ດັ່ງນັ້ນຜະລິດຕະພັບກະສິກຳສ່ວນຫຼາຍບໍ່ຕອບສະໜອງໄດ້ກັບຄວາມຕ້ອງການດ້ານເຕັກນິກຂອງວິສາຫະກິດປຸງແຕ່ງ. ຍ້ອນເຫດນັ້ນເອງທີ່ພາໃຫ້ບັນດາວິສາຫະກິດ ແອັຟດີໄອ ຍັງຄິດລະແວງຕໍ່ກັບບັນດາຜູ້ລຳລຽງສະໜອງຂອງຫວຽດນາມ. ຍິ່ງກວ່ານັ້ນອີກ, ອັດຕາສ່ວນນຳໃຊ້ວັດຖຸອຸປະກອນພາຍໃນຂອງບັນດາຂະແໜງອຸດສາຫະກຳຫວຽດນາມ ກໍຍັງຕ່ຳທີ່ສຸດ. ນັບທັງບັນດາຂະແໜງການທີ່ຖືກຖືວ່າເປັນປາຍແຫຼມຂອງຫວຽດນາມ ເຊັ່ນສິ່ງທໍຕັດຫຍິບ, ເກີບເຄື່ອງໜັງ, ເຄື່ອງເອເລັກໂຕຣນິກ..., ກໍລ້ວນແຕ່ຕ້ອງນຳເຂົ້າວັດຖຸດິບຈາກຕ່າງປະເທດ. ເພາະສະນັ້ນ, ວິສາຫະກິດຕ້ອງຖືກຂຶ້ນກັບແຫຼ່ງວັດຖຸດິບນຳເຂົ້າ, ຫລຸດຜ່ອນຄວາມເປັນເຈົ້າການໃນການຜະລິດ ທຸລະກິດ. ຄຸນຄ່າເພີ່ມຂອງວິສາຫະກິດຫວຽດນາມຍັງຕ່ຳທີ່ສຸດ ທຽບກັບບັນດາປະເທດທີ່ມີຂະແໜງອຸດສະຫະກຳສະໜັບສະໜູນທີ່ຂະຫຍາຍຕົວ.
ຄວາມຄາດຄະເນ ແລະ ຂໍ້ສະເໜີແນະ ຈຳນວນໜຶ່ງ
ຄວາມຄາດຄະເນ
ທີໜຶ່ງ, ສັນຍາການຄ້າເສລີຫວຽດນາມ - ອີຢູ ແມ່ນສັນຍາການຄ້າເສລີຮອບດ້ານ. ພິຈາລະນາທາງດ້ານຂະໜາດ ແລະ ລະດັບ ກໍ່ຈະເຫັນໄດ້ວ່າສັນຍາການຄ້າເສລີຫວຽດນາມ - ອີຢູ ໄປໄກກວ່າຕັ້ງຫຼາຍທຽບກັບສັນຍາອົງການການຄ້າໂລກ ເຊິ່ງບໍ່ພຽງແຕ່ກວມລວມໃນບັນດາຂົງເຂດດັ້ງເດີມເຊັ່ນ ການຄ້າ ການບໍລິການເທົ່ານັ້ນ ຫາກຍັງກວມທັງຂົງເຂດການລົງທຶນ ກຳມະສິດຊັບສິນທາງປັນຍາ ການຈັດຊື້ຈັດຈ້າງພາກລັດ ແລະ ນະໂຍບາຍການແຂ່ງຂັນ ອີກດ້ວຍ. ດັ່ງນັ້ນ, ໃນການເຊັນສັນຍາການຄ້າເສລີຫວຽດນາມ - ອີຢູ, ຫວຽດນາມຕ້ອງແນໃສ່ເປົ້າໝາຍຊຸກຍູ້ການສົ່ງນອກ, ດຶງດູດການລົງທຶນເພື່ອສວຍໄຊ້ວິວັດການເປີດເສລີພາບໃນພູມິພາກ, ພ້ອມກັນນັ້ນກໍກຳແໜ້ນທ່າອຽງຫັນເປັນເສລີພາບທີ່ພວມສະແດງອອກຢ່າງແຂງແຮງຢູ່ໃນໂລກ.
ທີສອງ, ສັນຍາການຄ້າເສລີຫວຽດນາມ - ອີຢູ ຈະເປັນ “ການກະຕຸກຊຸກຍູ້” ທີ່ສຳຄັນຕໍ່ກັບການສົ່ງນອກຂອງຫວຽດນາມ, ພິເສດແມ່ນບັນດາຜະລິດຕະພັນທີ່ຫວຽດນາມມີທ່າແຮງ, ເຊັ່ນສິ່ງທໍຕັດຫຍິບ, ເຄື່ອງໄມ້, ຜະລິດຕະພັນກະສິກຳ. ດ້ວຍຜູ້ບໍລິໂພກ 500 ລ້ານຄົນ ແລະ ຈີດີພີ ຫຼາຍກວ່າ 17.000 ຕື້ໂດລາສະຫະລັດ, ອີຢູ ເປັນຕະຫຼາດໃນຝັນ. ເຊັນສັນຍາການຄ້າເສລີກັບອີຢູ, ພາສີສິນຄ້ານຳເຂົ້າອີຢູຈະຫລຸດລົງ, ສິນຄ້າສົ່ງນອກຂອງຫວຽດນາມຈະມີໂອກາດດີ ເພື່ອເຂົ້າເຖິງຕະຫຼາດນີ້ ແລະ ເພີ່ມສ່ວນແບ່ງໃນຕະຫຼາດນີ້. ກອບສັນຍາການຄ້າເສລີຫວຽດນາມ - ອີຢູ ອະນຸຍາດໃຫ້ຍຸບເລີກພາສີຜ່ານດ່ານຕໍ່ກັບ 90 ກວ່າລາຍຊື່ພາສີ. ຕາມການປະເມີນຂອງຫ້ອງການກາຄ້າຢູຣົບປະຈຳຫວຽດນາມ (EuroCham), ເມື່ອສັນຍາການຄ້າເສລີຫວຽດນາມ - ອີຢູ ມີຄວາມສັກສິດ ມັນອາດຈະຊ່ວຍໃຫ້ ຈີດີພີ ຂອງຫວຽດນາມ ເພີ່ມຂຶ້ນຕື່ມອີກປະມານ 10% - 15%; ຊ່ວຍໃຫ້ການສົ່ງນອກຂອງຫວຽດນາມ ໄປທີ່ ອີຢູ ເພີ່ມຂຶ້ນຕື່ມອີກ 30% - 40% ແລະ ການນຳເຂົ້າຈາກ ອີຢູ ມາຍັງຫວຽດນາມ ເພີ່ມຂຶ້ນຕື່ມອີກ 20% - 25%.
ທີສາມ, ເມື່ອສັນຍາການຄ້າເສລີຫວຽດນາມ - ອີຢູ ມີຄວາມສັກສິດ, ດ້ວຍມາດຕະຖານທີ່ຄາດກະຈະສູງພໍຄວນກ່ຽວກັບຄວາມໂປ່ງໃສ ແລະ ການອຳນວນຄວາມສະດວກ, ແນ່ນອນວ່າ ສິ່ງແວດລ້ອມແຫ່ງການທຸລະກິກຢູ່ຫວຽດນາມ ຈະໄດ້ຮັບການປັບປຸງຕາມທິດສະດວກດີ ເປີດໂປ່ງ ແລະ ທະລຸລົ່ງຍິ່ງຂຶ້ນ, ຈາກນັ້ນ ຈະຊຸກຍູ້ການທຸລະກິດ ແລະ ການເຄື່ອນໄຫວລົງທຶນໂດຍກົງຈາກເອີຣົບ ແລະ ປະເທດອື່ນເຂົ້າມາໃນຫວຽດນາມ. ພ້ອມກັບຂະໜາດ ແລະ ຄວາມສາມາດລົງທຶນຂອງເອີຣົບ, ຫວຽດນາມຍັງມີໂອກາດກາຍເປັນຂົວຕໍ່ ເຊື່ອມຈອດການເຄື່ອນໄຫວຕ່າງໆທາງດ້ານການຄ້າແລະການລົງທຶນຂອງເອີຣົບຢູ່ພູມິພາກ ອາຊຽນ. ສິ່ງດັ່ງກ່າວຈະຊ່ວຍໜູນຢ່າງຕັ້ງໜ້າໃຫ້ແກ່ວິວັດການຈັດວາງໂຄງປະກອບເສດຖະກິດຄືນໃໝ່ ແລະ ຫັນປ່ຽນຕົວແບບເຕີບໂຕຂອງຫວຽດນາມ.
ທີສີ່, ການເຂົ້າຮ່ວມສັນຍາການຄ້າເສລີກັບອີຢູ ຈະຊ່ວຍໃຫ້ຫວຽດນາມປະຕິບັດແຜນນະໂຍບາຍຫັນຄວາມພົວພັນເສດຖະກິດ-ການຄ້າເປັນຫຼາຍຮູບແບບ, ພິເສດແມ່ນ ຫັນຕະຫຼາດສົ່ງນອກເປັນຫຼາຍຮູບແບບ, ຫຼີກລ່ຽງການຖືກຂຶ້ນຕໍ່ເກີນຄວນກັບຕະຫຼາດທີ່ລະອຽດໜຶ່ງ. ຕາມກະຊວງອຸດສາຫະກຳການຄ້າ, ປີ 2014, 70% ມູນຄ່າການນຳເຂົ້າຂອງຫວຽດນາມ ແມ່ນມາຈາກອາຊີຕາເວັນອອກ ແລະ 50% ມູນຄ່າການສົ່ງນອກແມ່ນເຂົ້າໃນຕະຫຼາດແຫ່ງນີ້. ສະເພາະການສົ່ງນອກຂອງຫວຽດນາມ ໄປຍັງປະເທດຈີນກໍໄດ້ກວມເອົາ 26% ຍອດມູນຄ່າການສົ່ງນອກຂອງຫວຽດນາມ, ໃນເວລານັ້ນ ການນຳເຂົ້າຈາກຕະຫຼາດນີ້ແມ່ນສູງກວ່າ, ກວມເອົາ 29% ຍອດມູນຄ່າການສົ່ງນອກ. ສັນຍາການຄ້າເສລີຫວຽດນາມ - ອີຢູ, ຄ້າຍຄືກັນກັບສັນຍາຄູ່ຮ່ວມເສດຖະກິດຂ້າມປາຊີຟິກ, ຈະຊ່ວຍໃຫ້ຫວຽດນາມ ມີໂຄງປະກອບຕະຫຼາດສົ່ງນອກນຳເຂົ້າທີ່ສົມສ່ວນກວ່າອີກ.
ທີຫ້າ, ສັນຍາການຄ້າເສລີຫວຽດນາມ - ອີຢູ ຈະສ້າງກົນໄກບຸລິມະສິດເປັນປະຈຳໃຫ້ແກ່ສິນຄ້າຂອງຫວຽດນາມ ໂດຍບໍ່ຕ້ອງຂຶ້ນກັບໂຄງການທົ່ວໄປກ່ຽວກັບບຸລິມະສິດພາສີນຳເຂົ້າ (GSP) ຂອງອີຢູອີກ. ປັດຈຸບັນ, ອີຢູຍັງປະຕິບັດການພິຈາລະນາຕາມລາຍຄາບ ແລະ ອາດຈະຍຸບເລີກການບຸລິມະສິດພາສີນຳເຂົ້າ ຕາມບັນທັດຖານສະເພາຂອງອີຢູ ເຊິ່ງຫວຽດນາມແຊກແຊງເຂົ້າບໍ່ໄດ້. ສັນຍາການຄ້າເສລີຫວຽດນາມ - ອີຢູ ກໍ່ຈະຊ່ວຍຊຸກຍູ້ໃຫ້ອີຢູ ຮັບຮອງຫວຽດນາມເປັນລະບົບເສດຖະກິດຕະຫຼາດທີ່ຄົບຖ້ວນ ໂດຍໄວ, ຊ່ວຍໃຫ້ສິນຄ້າສົ່ງນອກຂອງຫວຽດນາມບໍ່ຕ້ອງຍອມຕໍ່ການຈຳແນກປະພຶດໃນຄະດີຕ້ານການຂາຍທອດຕະຫຼາດ ແລະ ຕ້ານການອຸດໜູນການຄ້າ ທີ່ອີຢູເປັນຜູ້ຟ້ອງ.
ທີຫົກ, ສັນຍາການຄ້າເສລີຫວຽດນາມ - ອີຢູ ຈະຊ່ວຍຊຸກຍູ້ແຫຼ່ງເງິນລົງທຶນຄຸນນະພາບສູງຂອງອີຢູ ເຂົ້າຫວຽດນາມ. ດ້ວຍຂະໜາດ ແລະ ຄວາມສາມາດບົ່ມຊ້ອນຂອງອີຢູ, ຫວຽດນາມມີໂອກາດດຶງດູດເອົາການລົງທຶນຂອງອີຢູຢ່າງແຂງແຮງ ແລະ ອາດຈະກາຍເປັນຂົວຕໍ່ ເຊື່ອມຈອດການເຄື່ອນໄຫວຕ່າງໆ ທາງດ້ານການຄ້າ-ການລົງທຶນຂອງອີຢູ ຢູ່ພາກພື້ນອາຊຽນ. ຜົນກະທົບນີ້ຈະໄດ້ຮັບການປະສານຢ່າງແຂງແຮງເມື່ອປະຊາຄົມອາຊຽນໄດ້ສ້າງຕັ້ງຂຶ້ນ./.
ໂດຍ ດຣ. ຫງວຽນກວັກຕ໋ວານ
ຮອງຫົວໜ້າຫ້ອງການຄະນະເສດຖະກິດສູນກາງ
-----------------------------------
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 877 (ເດືອນພະຈິກ - 2015)