ສັນຍາຄູ່ຮ່ວມມືຂ້າມປາຊີຟິກ: ໂອກາດ, ສິ່ງທ້າທາຍ ແລະ ການກະທຳ
ການທີ່ຫວຽດນາມເຊັນສັນຍາຄູ່ຮ່ວມມືຂ້າມປາຊີຟິກນັ້ນ ບໍ່ພຽງແຕ່ເປັນໝາກຜົນຂອງວິວັດການເຈລະຈາຢ່າງທົນທານໜຽວແໜ້ນໃນເວລາ 5 ປີ ດ້ວຍຈິດໃຈທັງຮ່ວມມື, ທັງຕໍ່ສູ້, ຖືເອົາຜົນປະໂຫຍດຂອງປະເທດຊາດເປັນເປົ້າໝາຍສູງສຸດເທົ່ານັ້ນ ຫາກຍັງເປັນຜົນສຳເລັດຂອງວິວັດການປ່ຽນແປງໃໝ່ໃນ 30 ທີ່ຜ່ານມາ, ໃນນັ້ນການເຊື່ອມໂຍງສາກົນເປັນເນື້ອໃນສຳຄັນໜຶ່ງ ເຊິ່ງນັບມື້ນັບໄດ້ຢັ້ງຢືນຢ່າງໜັກແໜ້ນ ແລະ ໄດ້ອະທິບາຍຢ່າງເລິກເຊິ່ງໃນມະຕິຕ່າງໆຂອງພັກ. ນີ້ກໍ່ແມ່ນປະສົບການແຫ່ງການເຊື່ອມໂຍງສາກົນຂອງຫວຽດນາມພາຍຫຼັງທີ່ໄດ້ລົງນາມ ແລະ ປະຕິບັດສັນຍາການຄ້າຫວຽດນາມ - ສະຫະລັດອາເມຣິກາ, ເຂົ້າຮ່ວມເຂດການຄ້າເສລີອາຊຽນ, ບັນດາສັນຍາການຄ້າເສລີລະຫວ່າງອາຊຽນ ກັບບັນດາຄູ່ຮ່ວມມື ແລະ ເຂົ້າຮ່ວມອົງການການຄ້າໂລກ,... ເຊື່ອມໂຍງເສດຖະກິດສາກົນຍັງເປັນເນື້ອໃນທີ່ສຳຄັນໜຶ່ງ ໃນລະບຽບກົດໝາຍເສດຖະກິດຕະຫຼາດກຳນົດທິດສັງຄົມນິຍົມທີ່ຫວຽດນາມພວມກໍ່ສ້າງ.
I- ປະຕິບັດແຜນນະໂຍບາຍຕັ້ງໜ້າ ແລະ ເປັນເຈົ້າການເຊື່ອມໂຍງສາກົນ, ກົມການເມືອງສູນກາງພັກສະໄໝທີ X ແລະ XI ໄດ້ເຫັນດີນຳຄວາມສະເໜີຂອງລັດຖະບານ ກ່ຽວກັບການເຈລະຈາເຂົ້າຮ່ວມສັນຍາການຄ້າເສລີໃໝ່ຈຳນວນໜຶ່ງ. ນີ້ແມ່ນບັນດາສັນຍາທີ່ມີລະດັບຕົກລົງເປີດປະຕູຕະຫຼາດສູງກວ່າ ທຽບກັບຄວາມຕົກລົງໃນອົງການການຄ້າໂລກ ແລະ ໃນບັນດາສັນຍາການຄ້າເສລີທີ່ໄດ້ລົງນາມກ່ອນໜ້ານີ້. ພິເສດ, ສັນຍາຄູ່ຮ່ວມມືຂ້າມປາຊີຟິກ ແລະ ສັນຍາການຄ້າເສລີກັບ ອີຢູ ແມ່ນບັນດາສັນຍາທີ່ຮອບດ້ານ, ຜົນປະໂຫຍດສົມສ່ວນກັນ, ດ້ວຍຂໍ້ກຳນົດເປີດປະຕູຕະຫຼາດຢ່າງກວ້າງຂວາງເລິກເຊິ່ງ ນັບທັງການຄ້າສິນຄ້າ, ການບໍລິການ, ການລົງທຶນ, ການປົກປ້ອງສິດທິໃນຊັບສິນທາງປັນຍາ ແລະ ຂໍ້ຕົກລົງຕ່າງໆກ່ຽວກັບລະບຽບກົດໝາຍຕະຫຼາດ, ວິສາຫະກິດແຫ່ງລັດ, ການຈັດຊື້ພາກລັດ,... ແນໃສ່ສ້າງໃຫ້ມີສິ່ງແວດລ້ອມແຫ່ງການທຸລະກິດທີ່ໂປ່ງໃສ ແລະແຂ່ງຂັນຍຸດຕິມຳ. ສັນຍາເຫຼົ່ານີ້ຍັງກວມດ້ວຍບັນດາເນື້ອໃນທີ່ບໍ່ແມ່ນການຄ້າໂດຍກົງ ແຕ່ພົວພັນກັບການຄ້າ, ຄືສິ່ງແວດລ້ອມ ແລະ ແຮງງານ. ດ້ວຍບັນດາເນື້ອໃນຕົ້ນຕໍເທິງນີ້, ສັນຍາຄູ່ຮ່ວມມືຂ້າມປາຊີຟິກ ພ້ອມກັບສັນຍາການຄ້າເສລີ ຫວຽດນາມ-ອີຢູ ຖືກຖືວ່າເປັນສັນຍາການຄ້າເສລີຮຸ່ນໃໝ່.
ສັນຍາຄູ່ຮ່ວມມືຂ້າມປາຊີຟິກ ເປັນສັນຍາທີ່ເຂົ້າເຖິງຕະຫຼາດຢ່າງຮອບດ້ານ, ຮັບປະກັນການເຄື່ອນຍ້າຍຢ່າງເສລີໃນລະດັບສູງ ຂອງສິນຄ້າ, ການບໍລິການ, ທຶນ ແລະ ເຕັກໂນໂລຊີ ໂດຍຜ່ານການປະຕິບັດຂໍ້ຕົກລົງຍົກເລີກພາສີຂາອອກຂາເຂົ້າ ແລະ ຮົ້ວກີດກັ້ນຕ່າງທີ່ໄຮ້ພາສີ; ສ້າງຕັ້ງສິ່ງແວດລ້ອມແຫ່ງການທຸລະກິດທີ່ສະເໝີພາບ, ບໍ່ຈຳແນກປະພຶດ; ອຳນວຍຄວາມສະດວກໃຫ້ການຄ້າ ແລະການລົງທຶນ, ຜ່ານນັ້ນ ນຳເອົາຜົນປະໂຫຍດມາໃຫ້ການຜະລິດ, ທຸລະກິດ, ຜູ້ອອກແຮງງານ ກໍ່ຄືຜູ້ບໍລິໂພກ.
ສັນຍາຄູ່ຮ່ວມມືຂ້າມປາຊີຟິກຈະຊຸກຍູ້ການກໍ່ຮ່າງສ້າງຮູບເປັນຕາໜ່າງການຜະລິດ ແລະ ພວງພະນັງການສະໜອງໃໝ່ໃນຕະຫຼາດ 12 ປະເທດສະມາຊິກ; ສ້າງເງື່ອນໄຂເພື່ອຂະຫຍາຍການຄ້າພາຍໃນກຸ່ມຢ່າງແຮງ; ຍົກສູງປະສິດທິຜົນເສດຖະກິດ, ຊຸກຍູ້ການເຕີບໂຕ, ຊ່ວຍໜູນໃຫ້ເປົ້າໝາຍສ້າງວຽກເຮັດງານທຳ, ເພີ່ມລາຍຮັບລາຍໄດ້ ແລະ ປົວແປງຊີວິດການເປັນຢູ່ຂອງປະຊາຊົນ; ປະກອບສ່ວນແກ້ໄຂບັນດາສິ່ງທ້າທາຍໃນລະບົບເສດຖະກິດປັດຈຸບັນ, ສົ່ງເສີມການປ່ຽນແປງໃໝ່ ການປະດິດສ້າງ, ພັດທະນາເສດຖະກິດດິຈິຕອນ, ກໍ່ສ້າງນະໂຍບາຍແຂ່ງຂັນ ແລະ ຫຼັກການເຄື່ອນໄຫວຂອງວິສາຫະກິດແຫ່ງລັດ ກໍ່ຄືປົກປັກຮັກສາບັນດາສິດທິພື້ນຖານຂອງຜູ້ອອກແຮງງານ ແລະ ປົກປັກຮັກສາສິ່ງແວດລ້ອມ. ສັນຍາຍັງມີບັນດາຂໍ້ກຳນົດຮັບປະກັນໂອກາດເພື່ອໃຫ້ບັນດາປະເທດສະມາຊິກທີ່ມີລະດັບພັດທະນາຕ່າງກັນ ແລະ ວິສາຫະກິຂະໜາດໃຫຍ່ນ້ອຍທຸກວິສາຫະກິດ ລ້ວນແຕ່ໄດ້ຮັບຜົນປະໂຫຍດ; ຊ່ວຍໃຫ້ວິສາຫະກິດຂະໜາດນ້ອຍແລະຂະໜາດກາງຜ່ານຜ່າສິ່ງທ້າທາຍ, ສວຍໃຊ້ໂອກາດເພື່ອພັດທະນາ. ສັນຍາຄູ່ຮ່ວມມືຂ້າມປາຊີຟິກ ກໍ່ປະກອບດ້ວຍບັນດາຂໍ້ກຳນົດກ່ຽວກັບການຊ່ວຍເຫຼືອດ້ານເຕັກນິກ, ຍົກສູງຄວາມສາມາດ ແລະ ຄວາມໄຫວພິບທາງດ້ານການປະຕິບັດ, ສອດຄ່ອງກັບຄວາມແຕກຕ່າງດ້ານລະດັບການພັດທະນາ ເພື່ອໃຫ້ບັນດາຝ່າຍທີ່ກ່ຽວມີຄວາມສາມາດປະຕິບັດຂໍ້ຕົກລົງໄດ້ ແລະ ສວຍໃຊ້ສຸດຂີດຜົນປະໂຫຍດຂອງສັນຍາ; ພ້ອມກັນນັ້ນ, ກໍ່ກຳນົດກົນໄກຕິດຕາມກວດກາການປະຕິບັດ ແລະ ຂໍ້ກຳນົດການແກ້ໄຂ ລົງໂທດຕໍ່ກັບການລະເມີດສັນຍາ.
ສັນຍາຄູ່ຮ່ວມມືຂ້າມປາຊີຟິກ ເຄົາລົບລະບອບການເມືອງຂອງແຕ່ລະປະເທດ; ຮັບຮູ້ຄວາມຕ້ອງການຕ້ອງປະຕິບັດຕາມກົດໝາຍແຫ່ງຊາດ, ສອດຄ່ອງກັບສັນຍາສາກົນ ແລະ ບໍ່ປະກອບດ້ວຍບັນດາເນື້ອໃນທີ່ກ່ຽວພັນເຖິງການປ້ອງກັນປະເທດ ປ້ອງກັນຄວາມສະຫງົບ. ເຂົາເຈົ້າກໍ່ຫວັງວ່າສັນຍາຈະສ້າງຕັ້ງຮາກຖານໃໝ່ໃຫ້ແກ່ການເຊື່ອມໂຍງເສດຖະກິດພູມິພາກ ແລະ ສ້າງໂອກາດໃຫ້ບັນດາປະເທດອື່ນຢູ່ໃນຂອບອາຊີ-ປາຊີຟິກ ເຂົ້າຮ່ວມນຳ.
ໃນເງື່ອນໄຂລະດັບການພັດທະນະເສດຖະກິດຍັງຕ່ຳ ແລະ ຍັງມີຄວາມຫຍຸ້ງຍາກຫຼາຍຢ່າງນັ້ນ ການເປັນເຈົ້າການຕົກລົງເຂົ້າຮ່ວມບັນດາສັນຍາການຄ້າເສລີຮຸ່ນໃໝ່, ພິເສດແມ່ນສັນຍາຄູ່ຮ່ວມມືຂ້າມປາຊີຟິກ ດ້ວຍຈິດໃຈກຽມພ້ອມແຂ່ງຂັນ, ຕັ້ງໜ້າຜ່ານຜ່າສິ່ງທ້າທາຍ, ຍາດແຍ່ງໂອກາດເພື່ອບືນຕົວຂຶ້ນພັດທະນາຢ່າງໄວ ແລະ ໝັ້ນທ່ຽງ, ສະແດງເຖິງຄວາມເດັດດ່ຽວສະຫຼຽວສະຫຼາດດ້ານການເມືອງ, ຈິນຕະນາການຫຼັກແຫຼມ ແລະ ສາຍຕາຍຸກສະໄໝຂອງພັກ ແລະ ລັດ. ນີ້ຍັງເປັນການຢັ້ງຢືນຄວາມເຊື່ອໝັ້ນຕໍ່ເຈດຈຳນົງ, ຄວາມສາມາດ ແລະ ກຳລັງແຮງຂອງຄົນຫວຽດນາມ, ຂອງຊາດຫວຽດນາມ.
II- ສັນຍາຄູ່ຮ່ວມມືຂ້າມປາຊີຟິກ ພ້ອມກັບສັນຍາການຄ້າເສລີຫວຽດນາມ-ອີຢູ ຈະນຳເອົາໂອກາດອັນສະດວກດີມາໃຫ້ຫວຽດນາມ ແຕ່ຫວຽດນາມກໍ່ຕ້ອງປະເຊີນໜ້າກັບຄວາມຫຍຸ້ງຍາກ ສິ່ງທ້າທາຍບໍ່ໜ້ອຍ.
ບັນດາສັນຍານີ້ຈະສ້າງກຳລັງແຮງໃໝ່ໃຫ້ແກ່ການພັດທະນາເສດຖະກິດ - ສັງຄົມ, ພິເສດແມ່ນໃນການດຶງດູດການລົງທຶນ ແລະ ຊຸກຍູ້ການສົ່ງອອກ ກັບບັນດາລະບົບເສດຖະກິດໃຫຍ່ໃນໂລກ, ໃນນັ້ນມີ ອີຢູ 28 ປະເທດທີ່ມີ ຈີດີພີ ກວ່າ 18 ພັນຕື້ໂດລາສະຫະລັດ ແລະ ສັນຍາຄູ່ຮ່ວມມືຂ້າມປາຊີຟິກ ເຊິ່ງປັດຈຸບັນມີ 12 ປະເທດສະມາຊິກ ດ້ວຍຈຳນວນຈີດີພີ ກວ່າ 20 ພັນຕື້ໂດລາສະຫະລັດ. ນີ້ແມ່ນບັນດາພູມິພາກທີ່ມີເຕັກໂນໂລຊີກົກເຄົ້າ, ເປັນຕະຫຼາດສົ່ງອອກ ແລະ ແຫຼ່ງດຶງດູດເງິນລົງທຶນໃຫຍ່ທີ່ສຸດຂອງຫວຽດນາມ ໃນຫຼາຍປີທີ່ຜ່ານມາ. ຖ້າຫາກຄິດເຖິງຜົນກາທົບສະທ້ອນຂອງບັນດາສັນຍານີ້ ກັບບັນດາສັນຍາການຄ້າເສລີທີ່ໄດ້ລົງນາມ ຫຼືກຳລັງເຈລະຈາ ແມ່ນຍັງມີໂອກາດຫຼາຍກວ່າອີກ ຍ້ອນຫວຽດນາມຈະມີການພົວພັນການຄ້າເສລີກັບ 55 ປະເທດ, ໃນນັ້ນມີ 15 ປະເທດຢູ່ໃນກຸ່ມ ຈີ 20.
ການສົ່ງອອກ ແລະ ການລົງທຶນມີບົດບາດຕັດສິນຕໍ່ການເຕີບໂຕເສດຖະກິດ, ສ້າງວຽກເຮັດງານທຳ, ຍົກສູງຊີວິດການເປັນຢູ່ຂອງປະຊາຊົນ, ເປັນຕົ້ນແມ່ນໃນເງື່ອນໄຂລາຍຮັບສະເຫຼ່ຍຕໍ່ຫົວຄົນ ແລະ ການຊົມໃຊ້ບໍລິໂພກພາຍໃນຂອງຫວຽດນາມຍັງຕ່ຳ. ເພີ່ມມາດຕາຖ່ວງສົ່ງອອກ-ນຳເຂົ້າກັບບັນດາຕະຫຼາດເຫຼົ່ານີ້ກໍ່ຈະເຮັດໃຫ້ຄວາມພົວພັນການຄ້າກັບປະເທດເຫຼົ່ານີ້ມີຄວາມສົມດຸນ. ຂໍ້ຜູກພັນຕ່າງໆໃນບັນດາສັນຍາເປັນບັນດາຂອບ, ມາດຕະຖານເພື່ອປະກອບສ່ວນປັບປຸງບູລະນະລະບຽບກົດໝາຍເສດຖະກິດຕະຫຼາດທັນສະໄໝ ແລະ ຊຸກຍູ້ການຈັດວາງໂຄງປະກອບເສດຖະກິດຄືນໃໝ່, ຫັນປ່ຽນຕົວແບບເຕີບໂຕເສດຖະກິດ. ເຂົ້າຮ່ວມສັນຍາເຫຼົ່ານີ້ຍັງເປັນບາດກ້າວໃໝ່ໜຶ່ງໃນການປະຕິບັດແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ພົວພັນຫຼາຍກ້ຳຫຼາຍຝ່າຍຫຼາຍຮູບແບບ, ຍົກສູງບົດບາດຖານະຂອງຫວຽດນາມໃນເວທີໂລກ, ເປັນຕົ້ນແມ່ນຢູ່ພູມິພາກທີ່ພວມເກີດການແກ່ງແຍ້ງຍຸດທະສາດທີ່ນັບມື້ນັບເຄັ່ງຮ້ອນແຫ່ງນີ້.
ພ້ອມກັນກັບບັນດາໂອກາດອັນສະດວກດີ, ບັນດາສັນຍາເຫຼົ່ານີ້ກໍ່ພາໃຫ້ເກີດມີຄວາມຫຍຸ້ງຍາກ, ສິ່ງທ້າທາຍບໍ່ໜ້ອຍ. ນັ້ນຄື, ການແຂ່ງຂັນຈະເກີດຂຶ້ນຢ່າງດຸເດືອດ ຢູ່ຕະຫຼາດລະຫວ່າງປະເທດທີ່ເຂົ້າຮ່ວມສັນຍາ ແລະ ຢູ່ກະໂຕຕະຫຼາດພາຍໃນປະເທດ ໃນທັງສາມລະດັບ: ຜະລິດຕະພັນ, ວິສາຫະກິດ ແລະ ລະດັບຊາດ - ພິເສດແມ່ນ ແຂ່ງຂັນທາງດ້ານຄຸນນະພາບລະບຽບກົດໝາຍ ແລະ ສິ່ງແວດລ້ອມແຫ່ງການທຸລະກິດ. ຕໍ່ໜ້າແຮງໜີບຂອງການແຂ່ງຂັນ, ວິສາຫະກິດຈຳນວນໜຶ່ງພາຍຫຼັງໄລຍະການຫັນປ່ຽນ, ຈັດວາງໂຄງປະກອບຄືນໃໝ່ ຖ້າຫາກບືນຕົວຂຶ້ນບໍ່ໄດ້ ກໍ່ອາດຈະຕ້ອງຍຸບເລີກ ຫຼືລົ້ມລະລາຍ, ຜູ້ອອກແຮງງານພາກສ່ວນໜຶ່ງຈະບໍ່ມີວຽກເຮັດງານມຳ; ຂົງເຂດກະສິກຳ ແລະ ຊາວກະສິກອນຖືກເສຍປຽບ ເສຍຫາຍງ່າຍ; ຄວາມແຕກໂຕນຮັ່ງມີທຸກຍາກຈະຍະອອກແຕກຕ່າງກັນກວ່າອີກ ຖ້າຫາກພວກເຮົາປະຕິບັດຍຸດທະສາດພັດທະນາໄວ ໝັ້ນຄົງ ແລະ ຮັບປະກັນໃຫ້ປະຊາຊົນທຸກຄົນໄດ້ຊົມໃຊ້ໝາກຜົນຂອງການເຕີບໂຕ ບໍ່ສຳເລັດຜົນ. ສິ່ງທ້າທາຍໃນການປະຕິບັດກໍ່ຫຼາຍ, ນັບແຕ່ການປັບປຸງບູລະນະລະບົບກົດໝາຍ ເຖິງການບຳລຸງສ້າງແຫຼ່ງບຸກຄະລາກອນ, ຍົກສູງລະດັບຄວາມສາມາດຂອງພະນັກງານ, ລັດຖະກອນ, ຜູ້ຊ່ຽວຊານດ້ານເຕັກນິກ ແລະ ກົດໝາຍ. ເນື້ອໃນກ່ຽວກັບແຮງງານ - ກຳມະບານ ກໍ່ມີສິ່ງທ້າທາຍ ແລະ ຄວາມຮຽກຮ້ອງຕ້ອງການໃໝ່ ໃນການເຄື່ອນໄຫວຂອງ ສະຫະພັນໃຫຍ່ແຮງງານຫວຽດນາມ ແລະ ລະບົບການເມືອງທັງໝົດຂອງປະເທດເຮົາ.
ຕ້ອງຮັບຮູ້ຢ່າງເລິກເຊິ່ງວ່າ, ໂອກາດແລະຄວາມສະດວກ ບໍ່ອາດຫັນປ່ຽນດ້ວຍຕົນເອງເປັນກຳລັງແຮງເສດຖະກິດ, ເປັນຜົນປະໂຫຍດ ແລະ ຄວາມສາມາດແຂ່ງຂັນໃນຕະຫຼາດໄດ້ ຫາກຕ້ອງຜ່ານຄວາມມານະພະຍາຍາມ ແລະ ການເຄື່ອນໄຫວມຸ່ງໃສ່ເປົ້າໝາຍ ຂອງບັນດາເຈົ້າພາບ - ລັດ, ປະຊາຊົນ ແລະ ວິສາຫະກິດ. ສິ່ງທ້າທາຍ, ຄວາມຫຍຸ້ງຍາກຈະເປັນແຮງໜີບທີ່ແຮງພໍຄວນ ແຕ່ຜົນກະທົບຂອງມັນເຖິງລະດັບໃດນັ້ນ ແມ່ນຂຶ້ນກັບຄວາມສາມາດຮັບມືຂອງແຕ່ລະເຈົ້າພາບ. ຖ້າຫາກສວຍໃຊ້ໂອກາດ ຄວາມສະດວກໄດ້ດີ ກໍ່ຈະຍູ້ຖອຍຄວາມຫຍຸ້ງຍາກ ສິ່ງທ້າທາຍໄດ້ ແລະ ສ້າງໂອກາດ ຄວາມສະດວກໃໝ່ທີ່ໃຫຍ່ກວ່າ; ກົງຂ້າມ ສິ່ງທ້າທາຍ ຄວາມຫຍຸ້ງຍາກຈະບັງບຽດ, ເຈົ້າພາບຈະຖືກເສຍຫາຍ ແລະ ແກ້ໄຂຍາກທີ່ສຸດ. ສິ່ງທີ່ຄວນເນັ້ນໜັກແມ່ນ, ໃນບັນດາສັນຍາການຄ້າເສລີ, ໂອກາດຍາມໃດກໍ່ໄປຄຽງຄູ່ກັບສິ່ງທ້າທາຍ ແລະ ໃນສິ່ງທ້າທາຍຍາມໃດກໍ່ມີໂອກາດຊ້ອນແຝງຢູ່ນຳ - ນີ້ກໍ່ແມ່ນສັດຈະວິພາກຂອງວິວັດການພັດທະນາ.
III- ໃນສະພາບການໂລກາພິວັດ ແລະ ເຊື່ອມໂຍງສາກົນນັບມື້ນັບກວ້າງຂວາງເລິກເຊິ່ງ, ດ້ວຍການກໍ່ຕັ້ງປະຊາຄົມເສດຖະກິດອາຊຽນ, ການເຂົ້າຮ່ວມບັນດາສັນຍາການຄ້າເສລີ, ເປັນຕົ້ນແມ່ນ ບັນດາສັນຍາການຄ້າເສລີຮຸ່ນໃໝ່ - ສັນຍາຄູ່ຮ່ວມມືຂ້າມປາຊີຟິກ ແລະ ສັນຍາການຄ້າເສລີກັບ ອີຢູ; ແລະໃນເງື່ອນໄຂເຕັກໂນໂລຊີສື່ສານ, ອິນເຕີເນັດຂະຫຍາຍຕົວແບບກ້າວກະໂດດ, ບັນດາການແລກປ່ຽນຂ້າມຊາຍແດນນັບມື້ນັບກວມເອົາມາດຕາຖ່ວງສູງໃນການຄ້າ ການບໍລິການຂອງໂລກ; ດ້ວຍຄວາມກ້າວໜ້າໃນການຂົນສົ່ງຕໍ່ເນື່ອງຫຼາຍຮູບແບບ ແລະ ການບໍລິການໂລຈິສະຕິກ, ເກືອບຄືວ່າ ເສັ້ນຂີດຂັ້ນລະຫວ່າງຕະຫຼາດພາຍໃນປະເທດ ແລະ ຕະຫຼາດພາຍນອກ ຖືກລຶບລ້າງ. ຜົນທີ່ຕາມມາຄື, ບັນດາຕົວແບບຫັນເປັນອຸດສາຫະກຳປ່ຽນແທນການນຳເຂົ້າ ຫຼືຫັນສູ່ການສົ່ງອອກ ບໍ່ມີຄວາມໝາຍດັ້ງເດີມຂອງມັນອີກ. ຫຼາຍປະເທດໄດ້ຫັນມາສູ່ຕົວແບບຂະຫຍາຍອຸດສາຫະກຳອີງໃສ່ກຳລັງແຮງແຂ່ງຂັນ, ຂຸດຄົ້ນ ແລະ ສ້າງທ່າດີປຽບທຽບ, ຫັນທ່າດີປຽບທຽບເປັນທ່າດີໃນການແຂ່ງຂັນ, ເຂົ້າຮ່ວມໃນຕາໜ່າງການຜະລິດ ແລະ ພວງພະນັງຄຸນຄ່າທົ່ວໂລກ; ພ້ອມກັນນັ້ນ ກໍ່ສູ້ຊົນເພື່ອກຳເອົາບັນດາຂອດທີ່ມີຄຸນຄ່າເພີ່ມສູງ ໃນພວງພະນັງຄຸນຄ່ານັ້ນ.
ເພື່ອສວຍໃຊ້ໂອກາດ ຄວາມສະດວກ ແລະ ຜ່ານຜ່າຄວາມຫຍຸ້ງຍາກ ສິ່ງທ້າທາຍ, ຄວາມຮຽກຮ້ອງຕ້ອງການອັນຮີບດ່ວນປັດຈຸບັນແມ່ນ ຕ້ອງຍົກສູງຄວາມສາມາດແຂ່ງຂັນຂອງລະບົບເສດຖະກິດທັງໝົດ. ໃນນັ້ນ, ຕ້ອງກຳນົດແຈ້ງບົດບາດ ແລະ ການກະທຳຂອງບັນດາເຈົ້າພາບໃນການປະຕິບັດໜ້າທີ່ທີ່ມີຄວາມໝາຍຕັດສິນນີ້.
ວິສາຫະກິດເປັນເຈົ້າພາບຕັດສິນກຳລັງແຂ່ງຂັນລະດັບຈຸນລະພາກ, ສ່ອງແສງກຳລັງແຮງ ແລະ ຄວາມສາມາດແຂ່ງຂັນຂອງເສດຖະກິດແຫ່ງຊາດ. ວິສາຫະກິດຕ້ອງກ້າແຂ່ງຂັນ ແລະ ຕ້ອງເປັນເຈົ້າການ ປະດິດສ້າງໃນການປະຕິບັດວິທີແກ້ຕ່າງໆຢ່າງຄົບຊຸດ ຂຸ້ນຂ້ຽວ ເພື່ອຍົກສູງກຳລັງແຂ່ງຂັນຂອງສິນຄ້າ ການບໍລິການທີ່ຕົນປ້ອນໃຫ້ຕະຫຼາດ, ດ້ວຍຈິນຕະນາການບໍ່ຢຸດຢູ່ທີ່ຕະຫຼາດພາຍໃນປະເທດ ຫາກຍັງຕ້ອງຂະຫຍາຍອອກສູ່ຕະຫຼາດພູມິພາກ ແລະ ຕະຫຼາດໂລກ. ເຖິງຢ່ານັ້ນກໍຕາມ, ວິສາຫະກິດກໍ່ບໍ່ອາດຕັດສິນທຸກສິ່ງທຸກຢ່າງດ້ວຍຕົນເອງໄດ້. ວິສາຫະກິດຕ້ອງເຄື່ອນໄຫວໃນກອບລະບຽບກົດໝາຍ ແລະ ສິ່ງແວດລ້ອນແຫ່ງການທຸລະກິດທີ່ແນ່ນອນ.
ການຄົ້ນຄວ້າ ແລະ ສະພາບຄວາມເປັນຈິງຢູ່ຫຼາຍປະເທດລ້ວນແຕ່ຢັ້ງຢືນວ່າ, ລະບຽບກົດໝາຍຄຸ້ມຄອງບໍລິຫານປະເທດ ເປັນປັດໃຈຕັດສິນຕົ້ນຕໍເຖິງກຳລັງແຂ່ງຂັນມະຫາພາກ ແລະ ການພັດທະນາຂອງເສດຖະກິດແຫ່ງຊາດ. ຂະຫຍາຍຕົວໄວແລະໝັ້ນທ່ຽງ ຫຼືຊັກຊ້າຖອຍຫຼັງ ຕົ້ນຕໍແມ່ນຍ້ອນຄຸນນະພາບຂອງລະບຽບກົດໝາຍ. ລະບຽບກົດໝາຍດີ, ຮັບປະກັນລັດແຫ່ງອຳນາດກົດໝາຍ, ສິດປະຊາທິປະໄຕຂອງປະຊາຊົນ ແລະ ສອດຄ່ອງກັບເສດຖະກິດຕະຫຼາດທັນສະໄໝ ຈະລະດົມຂຸດຄົ້ນໄດ້ກຳລັງແຮງສັງລວມ ແລະ ບັນດາແຫຼ່ງພະລັງ ໃຫ້ແກ່ການພັດທະນາ. ດັ່ງນັ້ນ, ລະບຽບກົດໝາຍມີບົດບາດຕັດສິນຕໍ່ປະສິດທິຜົນ ແລະ ຄວາມສາມາດແຂ່ງຂັນຂອງວິສາຫະກິດ.
ເພື່ອສ້າງໃຫ້ມີລະບຽບກົດໝາຍດີ ມີຄຸນະພາບສູງ, ຕ້ອງກຳນົດຢ່າງຖືກຕ້ອງສາຍພົວພັນລະຫວ່າງລັດ, ຕະຫຼາດ, ວິສາຫະກິດ ແລະ ສັງຄົມ. ລັດຕ້ອງປະຕິບັດພາລະບົດບາດສະຖາປະນາ ພັດທະນາໃຫ້ໄດ້ເປັນຢ່າງດີ, ເປັນຕົ້ນແມ່ນ ຮັກສາໃຫ້ເສດຖະກິດມະຫາພາກມີສະຖຽນລະພາບ; ກໍ່ສ້າງລະບົບກົດໝາຍ, ນະໂຍບາຍ, ແຜນຍຸດທະສາດ, ແຜນແມ່ບົດ ແລະ ຈັດຕັ້ງກົງຈັກຄຸ້ມຄອງ ເພື່ອສ້າງສິ່ງແວດລ້ອມແຫ່ງການທຸລະກິດທີ່ລຸລ່ວງ ໂປ່ງໃສ, ຮັບປະກັນສິດເສລີພາບໃນການທຸລະກິດ ແລະ ແຂ່ງຂັນຢ່າງຍຸຕິທຳ; ນຳໃຊ້ແຫຼ່ງພະລັງຂອງພັກ, ບັນດານະໂຍບາຍ ແລະ ເຄື່ອງມືດັດສົມ ເພື່ອພັດທະນາວັດທະນະທຳ, ປະຕິບັດຄວາມກ້າວໜ້າ ແລະ ຍຸຕິທຳທາງສັງຄົມ, ຮັບປະກັນສະວັດດີການສັງຄົມ, ຍົກສູງສະວັດດີການສັງຄົມແລະຊີວິດຄວາມເປັນຢູ່ຂອງປະຊາຊົນ; ປົກປັກຮັກສາສິ່ງແວດລ້ອມ; ຮັບປະກັນບັນດາການບໍລິການທີ່ຈຳເປັນ, ພັດທະນາລະບົບໂຄງສ້າງພື້ນຖານເສດຖະກິດ - ສັງຄົມ, ກໍ່ສ້າງແຫຼ່ງບຸກຄະລາກອນ ແລະ ເພີ່ມທະວີກຳລັງປ້ອງກັນປະເທດ, ຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ ແລະຄວາມປອດໄພທາງສັງຄົມ.
ຕະຫຼາດເປັນຜູ້ຕັດສິນຕົກລົງການລະດົມ ແຈກຢາຍ ແລະ ນຳໃຊ້ແຫຼ່ງພະລັງຢ່າງມີປະສິທິຜົນ. ວິສາຫະກິດຕັດສິນດ້ວຍຕົນເອງການທຸລະກິດໃນບັນດາຂົງເຂດທີ່ກົດໝາຍບໍ່ຫ້າມ, ພ້ອມກັນນັ້ນ ກໍ່ຕ້ອງເຊີດຊູຄວາມຮັບຜິດຊອບສັງຄົມ ແລະ ວັດທະນະທຳທຸລະກິດ. ສັງຄົມ - ໂດຍຜ່ານປະຊາຊົນ ແລະ ບັນດາອົງການຈັດຕັ້ງ, ບັນດາສະມາຄົມອາຊີບທີ່ຕາງໜ້າໃຫ້ແກ່ຕົນ ແລະ ບັນດາຜູ້ຊ່ຽວຊານ, ບັນດານັກຄົ້ນຄວ້າເອກະລາດ ປະກອບສ່ວນກໍ່ສ້າງ, ວິຈານ ແລະ ຕິດຕາມກວດກາ ການປະຕິບັດນະໂຍບາຍ ເພື່ອແນໃສ່ຈຳກັດຂໍ້ບົກພ່ອງຕ່າງໆຂອງຕະຫຼາດ ແລະ ຂອງລັດ.
ບົນພື້ນຖານຮັບຮູ້ບັນດາສາຍພົວພັນເທິງນີ້ຢ່າງຖືກຕ້ອງ, ຫວຽດນາມຕ້ອງຮີບສືບຕໍ່ປັບປຸງບູລະນະລະບຽບກົດໝາຍ, ລະບົບກົດໝາຍ ຕອບສະໜອງຄວາມຕ້ອງການຂອງເສດຖະກິດຕະຫຼາດທັນສະໄໝ, ເຊື່ອມໂຍງສາກົນ ແລະ ຂໍ້ຕົກລົງໃນສັນຍາການຄ້າເສລີຕ່າງໆ, ເປັນຕົ້ນແມ່ນ ບັນດາສັນຍາການຄ້າເສລີຮຸ່ນໃໝ່ ດ້ວຍຈິດໃຈປ່ຽນແປງໃໝ່ຮອບດ້ານ ຄົບຊຸດ ທັງເສດຖະກິດແລະສັງຄົມ. ສຸມຄວາມມານະພະຍາຍາມທຸກຢ່າງເພື່ອກໍ່ສ້າງ ປັບປຸງບູລະນະລັດແຫ່ງອຳນາດກົດໝາຍ ຂອງປະຊາຊົນ ໂດຍປະຊາຊົນ ເພື່ອປະຊາຊົນ ແລະ ນັບຖືກົດໝາຍ. ພົນລະເມືອງໄດ້ເຮັດສິ່ງຕ່າງໆທີ່ກົດໝາຍບໍ່ຫ້າມ. ພະນັກງານ ຂ້າລັດຖະການພຽງແຕ່ໄດ້ເຮັດ ແລະ ຕ້ອງເຮັດວຽກຕ່າງໆ ຕາມການກຳນົດຂອງກົດໝາຍ.
ສືບຕໍ່ປະຕິຮູບ ຮັບປະກັນຄວາມສອດຄ່ອງ ຄົບຊຸດລະຫວ່າງກົດໝາຍ, ການຈັດຕັ້ງກົງຈັກ ແລະ ຖັນແຖວພະນັກງານ ຂ້າລັດຖະການ. ການຈັດຕັ້ງຊ້ຳຊ້ອນ ໄຂວ່ຂ້າມກັນຈະເປັນການຟຸມເຟືອຍແຫຼ່ງພະລັງ ແລະ ຂັດຂວາງການພັດທະນາ. ຕ້ອງກ້າປ່ຽນແປງໃໝ່, ຜ່ານຜ່າແຮງເຊື່ອຍແລະແນວຄິດອະນຸຮັກນິຍົມ ເພື່ອປັບປຸງບູລະນະລະບົບການຈັດຕັ້ງນຳພາຄຸ້ມຄອງ, ຍົກສູງຄວາມສາມາດຄຸ້ມຄອງບໍລິຫານລັດ, ຕອບສະໜອງຄວາມຮຽກຮ້ອງຕ້ອງການກໍ່ສ້າງ ແລະ ປົກປັກຮັກສາປະເທດຊາດໃນໄລຍະແຫ່ງການພັດທະນາໃໝ່.
ຕັ້ງການປົວແປງສິ່ງແວດລ້ອມແຫ່ງການທຸລະກິດຢູ່ໃນຄວາມຮຽກຮ້ອງຕ້ອງການປະຕິຮູບລະບຽບກົດໝາຍ. ລະບຽບກົດໝາຍສ້າງໃຫ້ມີຂອບເຂດ ຂີດຂັ້ນໃຫ້ແກ່ການປົວແປງສິ່ງແວດລ້ອມແຫ່ງການທຸລະກິດ. ບໍ່ອາດມີສິ່ງແວດລ້ອມແຫ່ງການທຸລະກິດທີ່ດີໄດ້ ຖ້າຫາກບໍ່ມີລະບຽບກົດໝາຍທີ່ສອງຄ່ອງເໝາະສົມ. ຄວາມກ້າວໜ້າໃນການປະຕິຮູບລະບຽບກົດໝາຍ ຕ້ອງໄດ້ຫັນເປັນການປົວແປງສິ່ງແວດລ້ອມແຫ່ງການທຸລະກິດ. ປະຕິບັດສິ່ງດັ່ງກ່າວບໍ່ພຽງແຕ່ພົວພັນເຖິງການຈັດຕັ້ງກົງຈັກເທົ່ານັ້ນ ຫາກຍັງຕິດແໜ້ນກັບຄຸນນະພາບຂອງຖັນແຖວພະນັກງານ ຂ້າລັດຖະການ. ຕ້ອງສຸມໃສ່ກໍ່ສ້າງໃຫ້ຖັນແຖວພະນັກງານ ຂ້າລັດຖະການມີຄຸນທາດແລະຄວາມສາມາດ, ຮັບໃຊ້ປະຊາຊົນຢ່າງສຸດອົກສຸດໃຈ. ເອົາໃຈໃສ່ເປັນພິເສດເຖິງການກໍ່ສ້າງຖັນແຖວພະນັກງານຄຸ້ມຄອງ, ນັກຄຸ້ມຄອງບໍລິຫານວິສາຫະກິດ ທີ່ສາມາດຕອບສະໜອງໄດ້ກັບຄວາມຕ້ອງການເຊື່ອມໂຍງສາກົນ, ການແຂ່ງຂັນ ແລະ ພັດທະນາ.
ບົນພື້ນຖານປ່ຽນແປງໃໝ່ລະບຽບກົດໝາຍຄຸ້ມຄອງບໍລິຫານລັດໃຫ້ສອດຄ່ອງເໝາະສົມ ຈຶ່ງສາມາດຍົກສູງຄຸນນະພາບ, ປະສິດທິຜົນຂອງວິວັດການຈັດວາງໂຄງປະກອບຄືນໃໝ່, ຫັນປ່ຽນຕົວແບບເຕີບໂຕເສດຖະກິດ, ຍູ້ແຮງການນຳໃຊ້ວິທະຍາສາດ - ເຕັກໂນໂລຊີ, ເພີ່ມສະມັດຕະພາບຂອງງານ, ຍົກສູງຄວາມສາມາດແຂ່ງຂັນຂອງຜະລິດຕະພັນ, ວິສາຫະກິດ ແລະ ຂອງເສດຖະກິດແຫ່ງຊາດ. ແລະພຽງແຕ່ບົນພື້ນຖານປ່ຽນແປງໃໝ່ລະບຽບກົດໝາຍໃຫ້ສອດຄ່ອງເໝາະສົມ ຈຶ່ງສ້າງເງື່ອນໄຂໃຫ້ແກ່ການສະສົມ, ເຕົ້າໂຮມດິນນາ, ສ້າງເຂດຜະລິດສິນຄ້າຂະໜາດໃຫຍ່ ແລະ ພື້ນຖານກະສິກຳສະອາດ ທີ່ມີຄຸນຄ່າເພີ່ມສູງ, ເປັນແຫຼ່ງສະໜອງທີ່ເປັນປົກກະຕິ ເພື່ອເພີ່ມສ່ວນແບ່ງການຕະຫຼາດໃນຕະຫຼາດໂລກ. ຖ້າບໍ່ໄດ້ຄືແນວນັ້ນກໍ່ຈະບໍ່ສວຍໃຊ້ໄດ້ໂອກາດອັນສະດວກ ໂດຍສັນຍາຄູ່ຮ່ວມມືຂ້າມປາຊີຟິກ, ສັນຍາການຄ້າເສລີກັບອີຢູ ແລະ ບັນດາສັນຍາການຄ້າເສລີໃໝ່ນຳມາໃຫ້.
ສັນຍາຄູ່ຮ່ວມມືຂ້າມປາຊີຟິກ ກໍ່ຄືສັນຍາການຄ້າເສລີກັບອີຢູ ຮຽກຮ້ອງໃຫ້ວິສາຫະກິດແຫ່ງລັດຕ້ອງເປີດເຜີຍ ໂປ່ງໃສໃນການເຄື່ອນໄຫວ ແລະ ແຂ່ງຂັນຢ່າງຍຸດຕິມຳ ກັບບັນດາວິສາຫະກິດທີ່ຂຶ້ນກັບບັນດາພາກສ່ວນເສດຖະກິດອື່ນ. ຕ້ອງຍູ້ແຮງວິວັດການຈັດວາງໂຄງປະກອບຄືນໃໝ່, ຍົກສູງປະສິດທິຜົນຂອງວິສາຫະກິດແຫ່ງລັດ, ພ້ອມກັນນັ້ນ ສົ່ງເສີມການພັດທະນາວິສາຫະກິດຫວຽດນາມ, ພິເສດແມ່ນວິສາຫະກິດເອກະຊົນ ເປັນກຳລັງໝຸນຍົກສູງຄວາມສາມາດແຂ່ງຂັນ ແລະ ລັກສະນະເປັນເຈົ້າຕົນເອງຂອງເສດຖະກິດແຫ່ງຊາດ.
ເພື່ອຮັບປະກັນຄວາມສຳເລັດໃນການເຊື່ອມໂຍງສາກົນ ແລະ ປະຕິບັດຢ່າງມີປະສິດທິຜົນບັນດາສັນຍາການຄ້າເສລີ, ພິເສດແມ່ນສັນຍາຄູ່ຮ່ວມມືຂ້າມປາຊີຟິກ ແລະ ສັນຍາການຄ້າເສລີຫວຽດນາມ - ອີຢູ, ກ່ອນອື່ນໝົດ ຕ້ອງມີມະຕິຂອງພັກ, ຂອງສະພາແຫ່ງຊາດ ແລະ ໂຄງການປະຕິບັດງານອັນລະອຽດຂອງລັດຖະບານ, ຂອງບັນດາຂະແໜງການ ຂັ້ນຕ່າງໆ ແລະ ຂອງປະຊາຄົມວິສາຫະກິດ. ຕ້ອງເຮັດເປັນຢ່າງດີວຽກງານໂຄສະນາຖະແຫຼງຂ່າວ, ສ້າງຄວາມເຫັນດີເຫັນພ້ອມທາງດ້ານຄວາມຮັບຮູ້, ຄວາມເປັນເອກະພາບໃນການກະທຳ, ມານະພະຍາຍາມຍົກສູງຄວາມສາມາດແຂ່ງຂັນ, ພາໃຫ້ເສດຖະກິດຫວຽດນາມພັດທະນາຢ່າງໄວ ແລະ ໝັ້ນທ່ຽງ.
ພວກເຮົາພວມມີຊີວິດຢູ່ໃນຍຸກສະໄໝແຫ່ງການເຄື່ອນເໜັງ ແລະ ພັດທະນາຢ່າງໄວທີ່ສຸດ, ໂລກພວມກ້າວເຂົ້າສູ່ກະແສຟອງອຸດສາຫະກຳຄັ້ງທີສີ່, ວິວັດການຫັນເປັນອຸສາຫະກຳນັບມື້ນັບໄດ້ຫຍໍ້ສັ້ນ. ຖ້າຫາກມີຄວາມຕັດສິນໃຈສູງ ແລະ ມີເຈດຈຳນົງບືນຕົວຂຶ້ນຢ່າງແຂງແຮງ, ມີຈິດໃຈປະດິດສ້າງ ແລະ ແຜນຍຸດທະສາດການເຕີບໂຕທີ່ຖືກຕ້ອງ, ປະເທດກຳລັງພັດທະນາກໍ່ອາດຈະແລ່ນທັນ ແລະ ລື່ນກາຍປະເທດທີ່ມີລະດັບພັດທະນາສູງກວ່າ ແລະ ວິສາຫະກິດໃໝ່, ວິສາຫະກິດຂະໜາດນ້ອຍກໍ່ອາດຈະກາຍເປັນວິສາຫະກິດຂະໜາດໃຫຍ່ໂດຍໄວ.
ເຂົ້າຮ່ວມບັນດາສັນຍາການຄ້າເສລີເຫຼົ່ານີ້, ຫວຽດນາມຍັງມີໂອກາດເພື່ອຍົກສູງປະສິດທິຜົນເສດຖະກິດໂດຍອາໄສການເພີ່ມຂະໜາດການຜະລິດ, ອຳນວຍເງື່ອນໄຂສ້າງຕັ້ງວິສາຫະກິດໃຫຍ່ ພ້ອມກັນກັບທ່າອຽງຫັນວິສາຫະກິດເປັນເອກະເທດ. ນີ້ກໍ່ແມ່ນໂອກາດເພື່ອຫຼໍ່ລ້ຽງຈິດໃຈປ່ຽນແປງໃໝ່ ປະດິສ້າງ, ສົ່ງເສີມຂະບວນການເລີ່ມຕົ້ນການຜະລິດຂອງປະຊາຊົນທຸກຄົນ ແລະ ຍົກລະດັບການພັດທະນາຂອງເສດຖະກິດແຫ່ງຊາດ.
ທົ່ວພັກ, ທົ່ວປວງຊົນ, ທົ່ວກອງທັບ ແລະ ປະຊາຄົມວິສາຫະກິດຫວຽດນາມ ຈົ່ງເຊີດຊູຄວາມເອກອ້າງທະນົງໃຈແຫ່ງຊາດ, ຮ່ວມແຮງຮ່ວມໃຈ, ເປັນເຈົ້າການຂຸດຄົ້ນ ແລະ ເສີມຂະຫຍາຍໂອກາດ ຄວາມສະດວກ, ພະຍາຍາມຜ່ານຜ່າຄວາມຫຍຸ້ງຍາກ ສິ່ງທ້າທາຍ ໃນການເຊື່ອມໂຍງສາກົນ, ເພີ່ມທະວີກຳລັງແຮງສັງລວມຂອງຊາດ, ປົກປັກຮັກສາເອກະລາດ ອະທິປະໄຕ ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ, ສູ້ຊົນກໍ່ສ້າງປະເທດຫວຽດນາມສັງຄົມນິຍົມທີ່ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ ຍຸດຕິມທຳ ສີວິໄລ, ກ້າວເດີນພ້ອມກັນກັບຍຸກສະໄໝ, ຄຽງບ່າຄຽງໄຫຼ່ກັບບັນດາປະເທດມະຫາອຳນາດໃນຫ້າທະວີບ ດັ່ງທີ່ທ່ານປະທານໂຮ່ຈີມິນທີ່ເຄົາລົບຮັກເຄີຍມຸ່ງຫວັງ./.
ໂດຍ ຫງວຽນເຕິນຢຸງ
ອະດີດນາຍົກລັດຖະມົນຕີ ແຫ່ງ ສສ.ຫວຽດນາມ