ການນຳ ຫວຽດນາມ - ລາວ ໃຫ້ຄຳໝັ້ນສັນຍາປົວແປງສິ່ງແວດລ້ອມ ແຫ່ງການລົງທຶນໃຫ້ສະດວກດີຍິ່ງຂຶ້ນ
ວກ. ອອນໄລ - ທີ່ກອງປະຊຸມຮ່ວມມືລົງທຶນ ຫວຽດນາມ - ລາວ ປີ 2016 ຢູ່ນະຄອນດ່າໜັງ ແຕ່ວັນທີ 26 ຫາ 27 ມີນາ 2016, ຜູ້ຕາງໜ້າທັງສອງປະເທດ ຫວຽດນາມ - ລາວ ໄດ້ໃຫ້ຄຳໝັ້ນສັນຍາຈະປົວແປງສິ່ງແວດລ້ອມແຫ່ງການລົງທຶນ, ແກ້ໄຂຂໍ້ຄົງຄ້າງທາງດ້ານກົນໄກ, ລະບຽບການລົງທຶນ ແນໃສ່ເຮັດໃຫ້ຫວຽດນາມ - ລາວ ການເປັນສະຖານທີ່ລົງທຶນສອງຝ່າຍ ພ້ອມທັງເປັນສະຖານທີ່ໃຫ້ນັກທຸລະກິດທົ່ວໂລກມາລົງທຶນຢ່າງມີປະສິດທິຜົນ.
ໃນສອງວັນ ຄືວັນທີ 26 ແລະ 27 ມີນາ 2016 ທີ່ນະຄອນດ່າໜັງ ຫວຽດນາມ, ກະຊວງແຜນການແລະການລົງທຶນ ຫວຽດນາມ ແລະ ລາວ ໄດ້ປະສານສົມທົບກັບກະຊວງ, ຂະແໜງການທີ່ກ່ຽວຂ້ອງຂອງສອງປະເທດ ແລະ ສະຫະພັນບັນດານັກລົງທຶນຫວຽດນາມ ທີ່ລົງທຶນຢູ່ລາວ (AVIL) ໄດ້ຈັດຕັ້ງກອງປະຊຸມຮ່ວມມືລົງທຶນ ຫວຽດນາມ - ລາວ ປີ 2016 ຂຶ້ນ ເຊິ່ງໄດ້ດຶງດູດຜູ້ແທນທີ່ເຂົ້າຮ່ວມເປັນຈຳນວນ 500 ຄົນ ທີ່ຕາງໜ້າໃຫ້ແກ່ຫຼາຍຮ້ອຍວິສາຫະກິດ ມາຈາກທັງສອງປະເທດ. ໃຫ້ກຽດເຂົ້າຮ່ວມກອງປະຊຸມ ມີທ່ານ ຫງວຽນຊວນຝຸກ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ສສ. ຫວຽດນາມ ປະທານຄະນະກຳມະການຮ່ວມມືລະຫວ່າງລັດຖະບານ ຫວຽດນາມ - ລາວ ແລະ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ສປປ. ລາວ ປະທານຄະນະກຳມະການຮ່ວມມືລະຫ່າງລັດຖະບານ ລາວ - ຫວຽດນາມ ແລະ ເປັນປະທານຮ່ວມກັນ.
ໃນໄລຍະ 2011 - 2015, ລວມຍອດມູນຄ່າການຄ້າລະຫວ່າງສອງປະເທດໄດ້ຮັບການປົວແປງ ຍ້ອນການເຄື່ອນໄຫວສົ່ງເສີມການຄ້າໄດ້ຍູ້ແຮງ, ສັນຍາ ຂໍ້ຕົກລົງ ນະໂຍບາຍຊ່ວຍເຫຼືອວິສາຫະກິດຫຼາຍສະບັບໄດ້ຜັນຂະຫຍາຍ, ສ້າງຂອບກົດໝາຍ, ອຳນວຍຄວາມສະດວກໃຫ້ນັກລົງທຶນປະຕິບັດແຜນການທຸລະກິດຂອງຕົນ. ໂຄງການໃຫຍ່ຈຳນວນໜຶ່ງຂອງວິສາຫະກິດຫວຽດນາມ ໄດ້ສຳເລັດການກໍ່ສ້າງ ເປີດນຳໃຊ້ແລະຂຸດຄົ້ນ ເຊິ່ງມີຜົນກະທົບຊຸກຍູ້ພັດທະນາເສດຖະກິດ, ສ້າງພື້ນຖານເພື່ອສ້າງຕັ້ງບັນດາຂະແໜງອຸດສາຫະກຳຂອງລາວໃນອະນາຄົດ ຄື ຂຸດຄົ້ນແລະປຸງແຕ່ງຢາງພາລາ, ຜະລິດນ້ຳຕານ, ຝຸ່ນຊີວະພາບ, ເຂື່ອນໄຟຟ້າ, ຂຸດຄົ້ນແລະປຸງແຕ່ງແຮ່ທາດ... ບັນດາໂຄງການເຫຼົ່ານີ້ ທັງໄດ້ສ້າງວຽກເຮັດງານທຳໃຫ້ປະຊາຊົນລາວ ປະມານ 4 ໝື່ນຄົນ, ຊ່ວຍຍົກສູງຄວາມສາມາດຂອງແຮງງານ, ສ້າງລາຍຮັບ, ປົວແປງຊີວິດການເປັນຢູ່ໃຫ້ປະຊາຊົນ, ປັບປຸງແຫຼ່ງລາຍຮັບໃຫ້ແກ່ງົບປະມານຂອງປະເທດລາວ.
ເຖິງວ່າ ຂະໜາດການຄ້າສອງຝ່າຍມີຄວາມເຕີບໂຕກໍຕາມ ແຕ່ຍັງບໍ່ສົມຄູ່ກັບຄວາມສາມາດບົ່ມຊ້ອນ ແລະ ສາຍພົວພັນດ້ານການຄ້າທີ່ມີແຕ່ດົນນານ ລະຫວ່າງສອງປະເທດ. ລະອຽດຄື, ໃນໄລຍະ 2011 – 2015, ລວມຍອດມູນຄ່າການຄ້າສອງສົ້ນ ຫວຽດນາມ - ລາວ ໄດ້ບັນລຸລະດັບເຕີບໂຕສະເລ່ຍ 20% ຕໍ່ປີ. ໃນປີ 2015, ລວມຍອດມູນຄ່າການຄ້າສອງສົ້ນລະຫວ່າງສອງປະເທດບັນລຸໄດ້ພຽງ 1,12 ຕື້ໂດລາສະຫະລັດເທົ່ານັ້ນ, ຕ່ຳກວ່າເປົ້າໝາຍທີ່ວາງອອກແມ່ນ 2 ຕື້ໂດລາສະຫະລັດ.
ເພື່ອສ້າງກະແສຟອງລົງທຶນຂອງວິສາຫະກິດຫວຽດນາມ ແລະ ລາວໃນເວລາຕໍ່ໜ້າ, ຜູ້ຕາງໜ້າຂອງ AVIL ກໍ່ຄືວິສາຫະກິດຫຼາຍແຫ່ງ ໄດ້ໃຫ້ຄຳສັງເກດວ່າ ຍັງຂາດນະໂຍບາຍຊ່ວຍເຫຼືອ, ເອື້ອເຟື້ອໃຫ້ແກ່ນັກລົງທຶນ. ຄຽງຄູ່ກັນນັ້ນ, ຂະບວນວິວັດການໃຫ້ໃບອານຸຍາດລົງທຶນ ຍັງເສຍເວລາຫຼາຍ, ກົນໄກ ນະໂຍບາຍ ລະບຽບການໃຫ້ອານຸຍາດລົງທຶນເຂົ້າປະເທດລາວ ຍັງບໍ່ເປັນເອກະພາບ ຄົບຊຸດ ລະຫວ່າງສູນກາງແລະທ້ອງຖີ່ນ, ເປັນຕົ້ນແມ່ນໃນຂົງເຂດທີ່ດິນ, ແຮງງານ, ວັດຖຸອຸປະກອນ, ເຄື່ອງຈັກເຄື່ອງປະກອບ ເຊິ່ງໄດ້ເຮັດໃຫ້ວິສາຫະກິດພົບຄວາມຫຍຸ້ງຍາກຫຼາຍຢ່າງ ໃນຂະບວນວິວັດແຫ່ງການຜັນຂະຫຍາຍປະຕິບັດໂຄງການ.
ບັນດາຜູ້ແທນກໍ່ໄດ້ສະເໜີໃຫ້ລັດຖະບານທັງສອງປະເທດ ຍູ້ແຮງຄວາມເປັນເອກະພາບທາງດ້ານສັນຍາ ກົນໄກ ນະໂຍບາຍ ກ່ຽວກັບການຮ່ວມມືເສດຖະກິດລະຫວ່າງສອງຝ່າຍ, ກ່ຽວກັບວິທີສະຖິຕິ, ອອກໃບອານຸຍາດໃຫ້ແກ່ໂຄງການ; ພ້ອມທັງຍູ້ແຮງການຮ່ວມມືພັດທະນາໂຄງສ້າງພື້ນຖານ ການຄົມມະນາຄົມຜ່ານດ່ານຊາຍແດນ, ກໍ່ຄືໃຫ້ຄວາມເອື້ອເຟື້ອດ້ານອັດຕາດອກເບ້ຍ, ພາສີວັດຖຸດິບ, ຄ່າຜ່ານທາງ... ໃຫ້ແກ່ວິສາຫະກິດ.
ໂດຍຮັບຮູ້ຄຳສະເໜີຂອງວິສາຫະກິດສອງຝ່າຍ, ທ່ານຮອງນາຍົກລັດຖະມົນຕີ ຫງວຽນຊວນຝຸກ ແລະ ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໄດ້ໃຫ້ຄຳໝັ້ນສັນຍາວ່າ ຈະພ້ອມກັນຊອກຫາທິດທາງປົວແປງສິ່ງແວດລ້ອມການລົງທຶນ, ຍົກສູງຄວາມສາມາດແຂ່ງຂັນ, ແລະໄດ້ຮຽກຮ້ອງບັນດາກະຊວງ, ຂະແໜງການ ແຕ່ສູງກາງຈົນຮອດທ້ອງຖິ່ນຂອງສອງປະເທດ ຈົ່ງບູລະນະກົນໄກ ລະບຽບກົດໝາຍຄືນໃໝ່, ແກ້ໄຂບັນດາຂໍ້ຄົງຄ້າງທີ່ວິສາຫະກິດໄດ້ສະເໜີມາ. ຮອງນາຍົກລັດຖະມົນຕີທັງສອງທ່ານ ກໍໄດ້ສະແດງຄວາມຫວັງວ່າ AVIL ຈະເປັນຫົວຂອດປະສານສົມທົບ ເພື່ອປົວແປງສິ່ງແວດລ້ອມການລົງທຶນ, ຊຸກຍູ້ການພັດທະນາການຄ້າ, ຮ່ວມມືສອງຝ່າຍ ເພື່ອໃຫ້ຫວຽດນາມ - ລາວ ບໍ່ພຽງແຕ່ເປັນສະຖານທີ່ລົງທຶນສອງຝ່າຍເທົ່ານັ້ນ ຫາກຍັງເປັນສະຖານທີ່ດຶງດູດການລົງທຶນ ທຳການທຸລະກິດວິສາຫະກິດຂອງນັກລົງທຶນໃນໂລກ.
ຮອງນາຍົກລັດຖະມົນຕີທັງສອງທ່ານກໍໄດ້ເຫັນດີເປັນເອກະພາບກັນວ່າ ຈະຍູ້ແຮງການເຊື່ອມຕໍ່ບະບົບຄົມມະນາຄົມລະຫວ່າງສອງປະເທດ, ຂະຫຍາຍຮູບແບບ “ປະຕູດຽວ, ຢຸດເທື່ອໜຶ່ງ” ທີ່ດ່ານຊາຍແດນລະຫວ່າງສອງປະເທດ... ແນໃສ່ຕອບສະໜອງຄວາມຮຽກຮ້ອງຕ້ອງການແລກປ່ຽນເສດຖະກິດລະຫວ່າງສອງປະເທດ.
ທາງດ້ານລັດຖະບານລາວ, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໃຫ້ຮູ້ວ່າ ລັດຖະບານລາວຈະທົບທວນບັນດາລຳດັບດຳເນີນງານ, ລະບຽບການ ແນໃສ່ຍູ້ແຮງການປະຕິຮູບການບໍລິຫານ. ພ້ອມທັງເນັ້ນວ່າ ຖ້າບໍ່ປະຕິຮູບການບໍລິຫານຢ່າງໄວວາ ຈະເປັນການຂັດຂວາງເສັ້ນທາງເຊື່ອມໂຍງກັບບັນດາປະເທດຢູ່ໃນພາກພື້ນອາຊຽນ ແລະ ສາກົນ. ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ກໍ່ໄດ້ຄາດຫວັງວ່າ ວິສາຫະກິດຂອງສອງປະເທດ ຈະປະສານສົມທົບກັນລົງທຶນເຂົ້າໃນບັນດາໂຄງການທີ່ນຳເອົາຜົນປະໂຫຍດຢ່າງແທ້ຈິງມາໃຫ້ປະຊາຊົນຄື ດ້ານສາທາລະນະສຸກ, ການສຶກສາ ແລະ ກໍ່ສ້າງ, ໂຄງສ້າງພື້ນຖານ, ຄົມມະນະຄົມ... ເພາະວ່າ ແຕ່ລະໂຄງການນີ້ຈະເປັນຂົວຕໍ່ແຫ່ງໜຶ່ງຂອງໄມຕີຈິດມິດຕະພາບທີ່ໝັ້ນຄົງ ລະຫວ່າງສອງປະເທດຫວຽດນາມ - ລາວ.
ໂດຍມີທັດສະນະອັນດຽວກັນກັບຮອງນາຍົກລັດຖະມົນຕີລາວ, ຮອງນາຍົກລັດຖະມົນຕີຫວຽດນາມ ທ່ານຫງວຽນຊວນຝຸກ ເນັ້ນວ່າ ການຊຸກຍູ້ພັດທະນາການຄ້າສອງຝ່າຍຈະປະກອບສ່ວນອັນສຳຄັນເຂົ້າໃນການປັບປຸງ ແລະ ຂະຫຍາຍສາຍພົວພັນພິເສດຫວຽດນາມ - ລາວ; ຮຽກຮ້ອງບັນດາວິສາຫະກິດຢູ່ລາວ ຈົ່ງມີບາດກ້າວບຸກທະລຸໃນການລົງທຶນເຂົ້າຫວຽດນາມ, ປະກອບສ່ວນຍູ້ແຮງລວມຍອດມູນຄ່າການຄ້າຂາອອກຂາເຂົ້າ ລະຫວ່າງສອງປະເທດເພື່ອນບ້ານໃກ້ຄຽງ. ພ້ອມກັນນັ້ນ, ທ່ານຮອງນາຍົກລັດຖະມົນຕີ ຫງວຽນຊວນຝຸກ ໄດ້ຮັບຮູ້ແລະຂອບອົກຂອບໃຈບັນດາທ້ອງຖິ່ນ ກະຊວງ ຂະແໜງການຂອງລາວ ທີ່ໄດ້ໃຫ້ການຊ່ວຍເຫຼືອແກ່ວິສາຫະກິດຫວຽດນາມ. ແຕ່, ຢູ່ບາງສະຖານທີ່ ບາງແຫ່ງ ຍັງມີບັນຫາທີ່ກໍ່ຄວາມຫຍຸ້ງຍາກ ແລະກີດຂວາງການເຄື່ອນໄຫວຂອງວິສາຫະກິດ. ທ່ານຮອງນາຍົກລັດຖະມົນຕີກໍ່ໄດ້ສະເໜີໃຫ້ລັດຖະບານລາວ ຊ່ວຍແກ້ໄຂຄວາມຫຍຸ້ງຍາກຂອງວິສາຫະກິດຫວຽດນາມ.
ໃນເວລາຕໍ່ໜ້າ, ລັດຖະບານທັງສອງປະເທດພ້ອມກັບບັນດາກະຊວງ, ຂະແໜງການຕ່າງໆ ຈະສຸມໃສ່ຜັນຂະຫຍາຍປະຕິບັດການຮ່ວມມືສອງຝ່າຍໄລຍະ 2015 - 2020, ໃນນັ້ນ, ຈະມີຂໍ້ກຳນົດທິດລົງທຶນໂຄງການໃໝ່, ວາງຍຸດທະສາດດຶງດູດການລົງທຶນລະຫວ່າງຫວຽດນາມ ແລະ ລາວ, ເລືອກຕັ້ງຈຸດສຸມລົງທຶນເພື່ອເສີມຂະຫຍາຍທ່າແຮງດຶງດູດແຫຼ່ງກຳລັງ. ພິເສດ, ເອົາໃຈໃສ່ບັນດາໂຄງການຍຸດທະສາດກ່ຽວກັບຄົມມະນາຄົນ, ເສດຖະກິດ, ການຄ້າ, ການປ້ອງກັນຊາດ - ປ້ອງກັນຄວາມສະຫງົບ./.
ສັງລວມໂດຍ ບກ.