ບັນດາຜົນສຳເລັດທີ່ພົ້ນເດັ່ນ ຂອງຂະແໜງການເງິນຫວຽດນາມປີ 2016 ແລະ ວິທີແກ້ໄຂໃນປີ 2017 ເພື່ອປະກອບສ່ວນຮັກສາຄວາມໝັ້ນຄົງ ຂອງເສດຖະກິດມະຫາພາກ
ວກ. - ໜ້າທີ່ການເງິນ - ງົບປະມານຂອງລັດ ປີ 2016 ໄດ້ຮັບການຜັນຂະຫຍາຍໃນສະພາບການເສດຖະກິດໂລກບໍ່ມີຄວາມສະດວກ, ເສດຖະກິດພາຍໃນປະເທດກໍ່ເຕີບໂຕບໍ່ໄດ້ຕາມເປົ້າໝາຍທີ່ວາງໄວ້. ແຕ່, ຍ້ອນຄວາມພະຍາຍາມປະຕິບັດບັນດາມະຕິຂອງພັກ, ຂອງສະພາແກ່ງຊາດ, ການຊີ້ນຳໃກ້ຊິດຕິດແທດ, ທັນການຂອງລັດຖະບານ ແລະ ຄວາມມານະພະຍາຍາມສູ້ຊົນຂອງລະບົບການເມືອງທັງໝົດ ແຕ່ສູນກາງຮອດທ້ອງຖິ່ນ, ດັ່ງນັ້ນຂະແໜງການເງິນຈຶ່ງສຳເລັດໜ້າທີ່ການເງິນ - ງົບປະມານປີ 2016 ເປັນຢ່າງດີ. ການທົບທວນບັນດາຜົນສຳເລັດທີ່ຂະແໜງການເງິນບັນລຸໄດ້ ແລະ ວາງວິທີແກ້ໄຂເພື່ອປະກອບສ່ວນຮັກສາຄວາມໝັ້ນຄົງຂອງເສດຖະກິດມະຫາພາກໃນປີ 2017 ແມ່ນວຽກງານທີ່ຈຳເປັນຕ້ອງການ.
ບັນດາຜົນສຳເລັດອັນພື້ນຖານຂອງຂະແໜງການເງິນປີ 2016
ໃນປີ 2016, ກະຊວງການເງິນໄດ້ກໍ່ສ້າງແຜນການ ແລະ ຈັດຕັ້ງປະຕິບັດແຜນການພັດທະນາຂະແໜງການເປັນຢ່າງດີ ໂດຍຕິດແໜ້ນກັບເປົ້າໝາຍ ແລະ ທິດທາງທີ່ໄດ້ກຳນົດໃນບັນດາມະຕິຂອງພັກ ແລະ ຂອງສະພາແຫ່ງຊາດ, ເຊັ່ນ ແຜນການພັດທະນາເສດຖະກິດ - ສັງຄົມ 5 ປີ 2016 - 2020; ບັນດາແຜນນະໂຍບາຍ, ນະໂຍບາຍທີ່ສຳຄັນ ແນໃສ່ສືບຕໍ່ປ່ຽນແປງໃໝ່ຕົວແບບການເຕີບໂຕ, ຍົກສູງຄຸນນະພາບການເຕີບໂຕ, ປະສິດທິພາບຂອງງານ, ກຳລັງແຮງແຂ່ງຂັນຂອງພື້ນຖານເສດຖະກິດ; ບັນດາແຜນນະໂຍບາຍ, ວິທີແກ້ໄຂການຈັດວາງງົບປະມານຂອງລັດຄືນໃໝ່, ການຄຸ້ມຄອງໜີ້ສິນສາທາລະນະ ເພື່ອຮັບປະກັນໃຫ້ລະບົບການເງິນແຫ່ງຊາດມີຄວາມປອດໄພ, ໝັ້ນຄົງ; ແຜນການຈັດວາງຄືນໃໝ່ໂຄງປະກອບເສດຖະກິດໄລຍະ 2016 - 2020; ແຜນການງົບປະມານແຫ່ງຊາດ 5 ປີໄລຍະ 2016 - 2020; ແຜນການພັດທະນາເສດຖະກິດ - ສັງຄົມ ແລະ ຄາດໝາຍງົບປະມານຂອງລັດປີ 2016 ແລະ ບັນດາມະຕິຂອງລັດຖະບານກ່ຽວກັບການປະກາດໃຊ້ ບັນດາໂຄງການເຄື່ອນໄຫວຜັນຂະຫຍາຍປະຕິບັດບັນດາມະຕິຂອງພັກ ແລະ ຂອງສະພາແຫ່ງຊາດ. ດັ່ງນັ້ນ, ບັນດາເປົ້າໝາຍ, ໜ້າທີ່ທີ່ວາງອອກມາສຳລັບຂະແໜງການເງິນໃນປີທີ່ຜ່ານມາ ຈຶ່ງມີຄວາມຫັນປ່ຽນຢ່າງຕັ້ງໜ້າຫຼາຍຢ່າງ ຊຶ່ງສະແດງອອກໃນດ້ານຕ່າງໆດັ່ງລຸ່ມນີ້:
ທີ່ໜຶ່ງ, ລະບົບລະບຽບກົດໝາຍ, ນະໂຍບາຍ ກ່ຽວກັບການເງິນ - ງົບປະມານຂອງລັດ ນັບມື້ນັບໄດ້ຮັບການບູລະນະໃຫ້ສົມບູນ, ປະກອບສ່ວນປົວແປງສິ່ງແວດລ້ອມແຫ່ງການທຸລະກິດ, ພັດທະນາວິສາຫະກິດ, ຍົກສູງຄວາມສາມາດແຂ່ງຂັນຂອງຊາດ ແລະ ປະສິດທິຜົນໃນການລະດົມ, ແຈກຢາຍ, ນຳໃຊ້ແຫຼ່ງພະລັງສັງຄົມເວົ້າລວມ, ແຫຼ່ງງົບປະມານຂອງລັດ ເວົ້າສະເພາະ.
ປີ 2016, ກະຊວງການເງິນເປັນເຈົ້າພາບໃນການກໍ່ສ້າງກົດໝາຍ 3 ສະບັບ, ສ້າງມະຕິຂອງສະພາແຫ່ງຊາດ ແລະ ຄະນະກຳມະການປະຈຳສະພາແຫ່ງຊາດ 5 ສະບັບ, ໃນນັ້ນມີກົດໝາຍວ່າດ້ວຍການປັບປຸງ, ເພີ່ມເຕີນບາງມາດຕາຂອງກົດໝາຍພາສີມູນຄ່າເພີ່ມ, ກົດໝາຍພາສີຊົມໃຊ້ພິເສດ, ກົດໝາຍຄຸ້ມຄອງພາສີ; ກົດໝາຍພາສີສົ່ງສົ່ງອອກ, ພາສີນຳເຂົ້າ; ມະຕິວ່າດ້ວຍການປັບປຸງ, ເພີ່ມເຕີມບາງຂໍ້ຂອງມະຕິສະບັບເລກທີ 55/2010/QH12, ວັນທີ 24-11-2010, ຂອງສະພາແຫ່ງຊາດຊຸດທີ XII “ກ່ຽວກັບການຍົກເວັ້ນ, ຫລຸດຜ່ອນພາສີນຳໃຊ້ທີ່ດິນກະສິກຳ”..., ປະກອບສ່ວນແກ້ໄຂຄວາມຫຍຸ້ງຍາກໃຫ້ປະຊາຊົນ, ວິສາຫະກິດ, ພ້ອມກັນນັ້ນກໍ່ຊ່ວນປະຕິຮູບລະບຽບການບໍລິຫານພາສີອາກອນ, ສຸລະກາກອນ. ພ້ອມກັນນັ້ນ, ກະຊວງການເງິນຍັງເປັນເຈົ້າພາບຈັດຕັ້ງ ແລະ ສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງ ໃນການສ້າງດຳລັດ, ຂໍ້ຕົກລົງຂອງລັດຖະບານ ແລະຂອງນາຍົກລັດຖະມົນຕີ ເປັນຈຳນວນຫຼາຍກ່ວາ 50 ສະບັບ ແລະ ປະກາດໃຊ້ໜັງສືວຽນພາຍໃຕ້ອຳນາດຕື່ມອີກຫຼາຍກວ່າ 300 ສະບັບ.
ພິເສດ, ກະຊວງການເງິນໄດ້ສະເໜີໃຫ້ຄະນະກຳມະການພັກລັດຖະບານ ເພື່ອສະເໜີໃຫ້ກົມການເມືອງສູນກາງພັກ ປະກາດໃຊ້ມະຕິສະບັບເລກທີ 07-NQ/TW, ວັນທີ 18-11-2016, ຂອງກົມການເມືອງ, “ກ່ຽວກັບແຜນນະໂຍບາຍ, ວິທີແກ້ໄຂການຈັດວາງງັບປະມານຂອງລັດຄືນໃໝ່, ຄຸ້ມຄອງໜີ້ສິນສາທາລະນະ ເພື່ອຮັບປະກັນໃຫ້ລະບົບການເງິນແຫ່ງຊາດມີຄວາມປອດໄພ, ໝັ້ນຄົງ”. ມະຕິສະບັບນີ້ມີຄວາມໝາຍສຳຄັນທີ່ສຸດ ໃນສະພາບທີ່ຊຸມປີຜ່ານມາມໍ່ນີ້ ງົບປະມານຂອງລັດມີຄວາມຫຍຸ້ງຍາກຫຼາຍຢ່າງ, ຮຽກຮ້ອງໃຫ້ຕ້ອງຈັດວາງຄືນໃໝ່ ງົບປະມານຂອງລັດ ແລະ ໜີ້ສິນສາທາລະນະ ຢ່າງເປັນພື້ນຖານແລະຮອບດ້ານ.
ທີສອງ, ນະໂຍບາຍງົບປະມານປະຈຳປີໄດ້ຮັບການດັດສົມຢ່າງເປັນເຈົ້າການ, ແໜ້ນແຟ້ນ, ປະຢັດ; ກົດໝາຍ, ລະບຽບວິໄນການເງິນໄດ້ຮັບການເພີ່ມທະວີ; ປະຕິບັດການຈັດວາງຄືນໃໝ່ໂຄງປະກອບການລົງທຶນພາກລັດໄດ້ຮັບຜົນດີ.
ບົນພື້ນຖານການຮັບຮູ້, ຕີລາຄາຄວາມຫຍຸ້ງຍາກ, ສິ່ງທ້າທາຍຕ່າງໆທີ່ເກີດມາຍ້ອນລາຄານ້ຳມັນຕົກຕ່ຳ ແລະ ບັນດາປັດໄຈທີ່ບໍ່ສະດວກໃນການເຂົ້າຮ່ວມບັນດາສັນຍາການຄ້າເສລີ (FTA), ຕັ້ງແຕ່ຕົ້ນປີ, ກະຊວງການເງິນໄດ້ເປັນເຈົ້າການ ໃນການວາງແຜນການດຳເນີນງານງົບປະມານຂອງລັດ; ສະເໜີໃຫ້ລັດຖະບານປະກາດໃຊ້ຄຳສັ່ງເລກທີ 22/CT-TTg, ວັນທີ 3-6-2016, “ກ່ຽວກັບການເພີ່ມທະວີການຊີ້ນຳ ແລະ ບໍລິຫານໜ້າທີ່ການເງິນ - ງົບປະມານຂອງລັດປີ 2016”, ໃນນັ້ນ ຮຽກຮ້ອງໃຫ້ຕ້ອງສູ້ຊົນສຳເລັດໜ້າທີ່ເກັບລາຍຮັບງົບປະມານໄດ້ເກີນລະດັບຄາດໝາຍ; ຄຸ້ມຄອງການໃຊ້ຈ່າຍຢ່າງແໜ້ນແຟ້ນ, ປະຢັດ, ມີປະສິດທິຜົນ; ຮັບປະກັນຄວາມສົມດຸນຂອງງົບປະມານຂອງຂັ້ນຕ່າງໆ, ຮັກສາການຂາດດຸນງົບປະມານຂອງລັດໃນລະດັບຄາດໝາຍທີ່ສະພາແຫ່ງຊາດໄດ້ຕົດລົງ.
ໃນການບໍລິຫານງານ, ກະຊວງການເງິນໄດ້ກວດຄືນ, ສະເໜີໃຫ້ຂັ້ນທີ່ມີອຳນາດ ເພື່ອແກ້ໄຂ, ປັບປຸງເພີ່ມເຕີມ, ປະກາດໃຊ້ນະໂຍບາຍກ່ຽວກັບການເງິນ, ພາສີອາກອນ, ຄ່າທຳນຽມໃໝ່ ທີ່ສອດຄ່ອງກັບສະພາບການຕົວຈິງ ແລະ ຄຳໝັ້ນສັນຍາເຊື່ອມໂຍງສາກົນ. ຊີ້ນຳວຽກງານເກັບພາສີ ແລະ ຕໍ່ສູ້ຢ່າງເດັດດ່ຽວຕ້ານການຫຼີກລ່ຽງພາສີ ຕາມຈິດໃຈເກັບພາສີຢ່າງຖືກຕ້ອງ, ເຕັມສ່ວນ ແລະທັນເວລາ; ຕາມນັ້ນ ອົງການພາສີໄດ້ດຳເນີນການກວດສອບ, ກວດກາເກືອບ 82.000 ວິສາຫະກິດ, ໄດ້ເກັບເງິນເຂົ້າງົບປະມານຂອງລັດ ເປັນຈຳນວນ 14.500 ຕື້ດົ່ງ; ເກັບເງິນຄ້າງຊຳລະພາສີໄດ້ຫຼາຍກ່ວາ 42.000 ຕື້ດົ່ງ. ອົງການສຸລະກາກອນໄດ້ດຳເນີນການກວດກາພາຍຫຼັງການຜ່ານດ່ານເກືອບ 9.300 ຄັ້ງ, ຜ່ານນັ້ນ ໄດ້ເພີ່ມລາຍຮັບງົບປະມານຂຶ້ນຕື່ມອີກ 3.300 ຕື້ດົ່ງ; ຈັບກຸມ ແລະ ແກ້ໄຂການຄ້າເຖື່ອນເກືອບ 15.400 ກໍລະນີ, ເກັບລາຍຮັບໃຫ້ງົບປະມານໄດ້ 166 ຕື້ດົ່ງ. ອາໃສການເຄື່ອນໄຫວເຫຼົ່ານັ້ນ, ຮອດວັນທີ 31-12-2016, ລາຍຮັບງົບປະມານຂອງລັດບັນລຸປະມານ 1.094.000 ຕື້ດົ່ງ, ຫຼາຍກວ່າແຜນການ 79.600 ຕື້ດົ່ງ, ເພີ່ມ 7,8% ທຽບກັບຄາດໝາຍແຜນການ. ການດຸນດ່ຽງງົບປະມານໄດ້ຮັບການຮັບປະກັນ.
ກະຊວງການເງິນໄດ້ປະຕິບັດການຈ່າຍເງິນງົບປະມານຂອງລັດຢ່າງແໜ້ນແຟ້ນ. ບັນດາກະຊວງ, ຂະແໜງການ ແລະ ທ້ອງຖິ່ນໄດ້ຈັດຕັ້ງຜັນຂະຫຍາຍບັນດາວິທີແກ້ໄຂທີ່ວາງອອກຢ່າງເຂັ້ມງວດ, ໃຊ້ຈ່າຍພາຍໃນລະດັບຄາດໝາຍງົບປະມານທີ່ໄດ້ຮັບມອບໝາຍ, ຖືກຕ້ອງຕາມລະບອບ, ອັດຕາ, ລະດັບໃຊ້ຈ່າຍທີ່ໄດ້ກຳນົດ; ຕ້ານການຟຸ່ມເຟືອຍ, ຕົກເຮ່ຍເສຍຫາຍ, ສໍ້ລາດບັງຫຼວງ. ອົງການທາງການເງິນໄດ້ເພີ່ມທະວີວຽກງານກວດສອບ, ກວດກາການນຳໃຊ້ງົບປະມານຢູ່ກະຊວງ, ທ້ອງຖິ່ນຈຳນວນໜຶ່ງ; ໂຄງການລົງທຶນຈຳນວນໜຶ່ງທີ່ໃຊ້ທຶນງົບປະມານຂອງລັດ; ເພີ່ມທະວີວຽກງານກວດກາການໃຊ້ຈ່າຍຂອງຄັງແຫ່ງລັດ. ອາໃສສິ່ງດັ່ງກ່າວນັ້ນ, ລະບຽບວິໄນການເງິນໄດ້ຮັບການເພີ່ມທະວີ, ປະສິດທິຜົນໃນການນຳໃຊ້ງົບປະມານຂອງລັດມີຄວາມກ້າວໜ້າ. ບັນດາໜ້າທີ່ທີ່ສຳຄັນ, ຮີບດ່ວນ ໄດ້ຮັບການປະຕິບັດຢ່າງທັນການ ຄົບຖ້ວນ, ຄວາມດຸນດ່ຽງຂອງງົບປະມານສູນກາງ ແລະ ງົບປະມານຂອງທ້ອງຖິ່ນຂັ້ນຕ່າງໆ ກໍ່ໄດ້ຮັບປະກັນໂດຍພື້ນຖານ. ການຂາດດຸນງົບປະມານຂອງລັດໄດ້ຮັບການຄວບຄຸມໃນຂອບເຂດຄາດໝາຍແຜນງົບປະມານທີ່ສະພາແຫ່ງຊາດໄດ້ຮັບຮອງ. ພິເສດ, ເພື່ອປະຕິບັດມະຕິຕົດລົງສະບັບທີ 32/2015/QĐ-TTg, ວັນທີ 4-8-2015, ຂອງນາຍົກລັດຖະມົນຕີ, ວ່າດ້ວຍ “ຂໍ້ກຳນົດກ່ຽວກັບອັດຕາ ແລະ ລະບອບການຄຸ້ມຄອງ, ນຳໃຊ້ລົດໂອໂຕ ໃນອົງການຈັດຕັ້ງລັດ, ໜ່ວຍທຸລະກິດຂອງລັດ, ບໍລິສັດສະມາຊິກໜຶ່ງດຽວຮັບຜິດຊອບຈຳກັດ ທີ່ລັດຖະບານຖືຫຸ້ນ 100%”, ກະຊວງການເງິນໄດ້ນຳໜ້າໃນການປະກາດໃຊ້ຂໍ້ຕົກລົງສະບັບທີ 1997/QĐ-BTC, ວັນທີ 16-9-2016, ວ່າດ້ວຍ “ຂໍ້ກຳນົດກ່ຽວກັບລະບອບມອບເໝົາຄ່າໃຊ້ຈ່າຍໃນການນຳໃຊ້ລົດໂອໂຕ” ເພື່ອຮັບສົ່ງພະນັກງານຈາກບ້ານໄປຍັງທີ່ເຮັດວຽກແຕ່ວັນທີ 1-10-2016 ສຳລັບພະນັກງານຂັ້ນຮອງລັດຖະມົນຕີ ແລະ ພະນັກງານການນຳທີ່ມີອັດຕາອຸດໜູນຕຳແໜ່ງໃນກະຊວງການເງິນ. ຂໍ້ກຳນົດນີ້ມີຈຸດມຸ່ງໝາຍເພື່ອການບໍລິຫານທີ່ທັນສະໄໝ, ປະຢັດຄ່າໃຊ້ຈ່າຍໃນການບໍລິຫານ (ນ້ຳມັນ, ຂັບລົດ, ການບຳລຸງຮັກສາ ແລະ ການປ່ຽນລົດໃໝ່...), ພ້ອນນັ້ນ ກໍ່ລົດການຈະລາຈອນຂອງຍານພາຫະນະ. ບົນພື້ນຖານນັ້ນ, ໃນປີ 2017 ຈະເປີດກວ້າງການປະຕິບັດການມອບເໝົາຍານພາຫະນະໄປປະຕິບັດງານຢູ່ພາຍໃນຕົວເມືອງ ສຳລັບພະນັກງານທີ່ມີອັດຕານຳໃຊ້ລົດໂອໂຕໄປເຮັກວຽກ.
ກ່ຽວກັບບັນຫາການຈັດວາງຄືນໃໝ່ໂຄງການລົງທຶນພາກລັດ, ກະຊວງການເງິນໄດ້ເປັນເຈົ້າການເຂົ້າຮ່ວມກັບບັນດາກະຊວງ, ຂະແໜງການ ກ່ຽວກັບແຜນການລົງທຶນພາກລັດໄລຍະກາງ ຕິດກັບແຜນການການເງິນ - ງົບປະມາດຂອງລັດ ໄລຍະ 2016 - 2020; ມີຄວາມສະເໜີຕໍ່ລັດຖະບານກ່ຽວກັບວິທີແກ້ໄຂຄວາມຫຍຸ້ງຍາກ, ສິ່ງຄົງຄ້າງໃນການປະຕິບັດກົດໝາຍລົງທຶນພາກລັດ, ກົດໝາຍກໍ່ສ້າງ; ສົມທົບກັບບັນດາກະຊວງ, ຂະແໜງການ, ທ້ອງຖິ່ນ ໃນການຜັນຂະຫຍາຍປະຕິບັດບັນດາໜ້າທີ່, ວິທີແກ້ ທີ່ໄດ້ວາງອອກມາໃນມະຕິສະບັບເລກທີ 60/NQ-CP, ວັນທີ 8-7-2016, ຂອງລັດຖະບານ, “ກ່ຽວກັບບັນດາໜ້າທີ່, ວິທີແກ້ໄຂຕົ້ນຕໍ ເພື່ອຍູ້ແຮງການປະຕິບັດ ແລະ ການເບີກຈ່າຍແຜນການລົງທຶນພາກລັດໃນປີ 2015”. ພ້ອມກັນນັ້ນ, ເພີ່ມທະວີການກວດສອບ, ກວດກາ, ຄວບຄຸມການໃຊ້ຈ່າຍ, ຮັບປະກັນປະສິດທິຜົນຂອງການນຳໃຊ້ແຫຼ່ງທຶນຈາກງົບປະມານຂອງລັດ, ທຶນຈາກພັນທະບັດລັດຖະບານ, ທຶນຊ່ວຍເຫຼືອພັດທະນາເປັນທາງການ (ODA) ແລະ ສິນເຊື່ອເພື່ອການລົງທຶນຂອງລັດ.
ກ່ຽວກັບກົນໄກເປັນເຈົ້າຕົນເອງສຳລັບໜ່ວຍທຸລະກິດຂອງລັດ, ກະຊວງການເງິນໄດ້ສະເໜີໃຫ້ລັດຖະບານປະກາດໃຊ້ດຳລັດສະບັບເລກທີ 141/2016/NĐ-CP, ວັນທີ 10-10-2016, ວ່າດ້ວຍ “ຂໍ້ກຳນົດກ່ຽວກັບກົນໄກເປັນເຈົ້າຕົນເອງ ຂອງໜ່ວຍທຸລະກິດຂອງລັດ ໃນຂົງເຂດເສດຖະກິດ ແລະ ຂົງເຂດອື່ນ”; ຊຸກຍູ້ບັນດາກະຊວງ, ຂະແໜງການ, ທ້ອງຖິ່ນ ໃຫ້ຜັນຂະຫຍາຍບັນດາໜ້າທີ່ທີ່ໄດ້ຮັບມອບໝາຍ ຕາມດຳລັດສະບັບເລກທີ 16/2015/NĐ-CP, ວັນທີ 14-2-2015, ຂອງລັດຖະບານ, ວ່າດ້ວຍ “ຂໍ້ກຳນົດກ່ຽວກັບກົນໄກເປັນເຈົ້າຕົນເອງ ຂອງໜ່ວຍທຸລະກິດຂອງລັດ”, ແລະ ມະຕິຕົກລົງສະບັບເລກທີ 695/2015/QĐ-TTg, ວັນທີ 21-5-2015, ຂອງນາຍົກລັດຖະມົນຕີ, ວ່າດ້ວຍ “ປະກາດໃຊ້ແຜນການຜັນຂະຫຍາຍປະຕິບັດດຳລັດສະບັບເລກທີ 16/2015/NĐ-CP, ວັນທີ 14-2-2015, ຂອງລັດຖະບານ ...”. ພ້ອມກັນນັ້ນ, ສືບຕໍ່ສົມທົບກັບບັນດາກະຊວງ, ຂະແໜງການ, ທ້ອງຖິ່ນ ໃນການກໍ່ສ້າງ ແລະ ຄວບຄຸມ ບັນທັດຖານເສດຖະກິດ - ເຕັກນິກ ສຳລັບການບໍລິການສາທາລະນະ; ຜັນຂະຫຍາຍການທົດລອງມອບສິດເປັນເຈົ້າຕົນເອງຮອບດ້ານ ໃຫ້ມະຫາວິທະຍາໄລບາງແຫ່ງ; ທົດລອງຫັນເປັນຫຸ້ນສ່ວນຕໍ່ໜ່ວຍທຸລະກິດຂອງລັດບາງແຫ່ງ; ຍູ້ແຮງການຫັນເປັນສັງຄົມ; ປະກອບສ່ວນສ້າງເງື່ອນໄຂດີສຸດເພື່ອໃຫ້ຫົວໜ່ວຍຕ່າງໆສາມາດເສີມຂະຫຍາຍລັກສະນະເປັນເຈົ້າການ, ເປັນເຈົ້າຕົນເອງ ໃນວຽກງານການເງິນ, ວຽກງານບຸກຄະລາກອນ ແລະ ໃນການເຄື່ອນໄຫຍຂອງຕົນ, ພ້ອມກັນນັ້ນ ລັດກໍ່ໄດ້ສ້າງເງື່ອນໄຂອຳນວຍຄວາມສະດວກໃຫ້ແກ່ການຈັດວາງຄືນໃໝ່ໂຄງສ້າງງົບປະມານຂອງລັດ, ສະຫງວນຊັບພະຍາກອນໃຫ້ຂົງເຂດບຸລິມະສິດ.
ທີສາມ, ຕັ້ງໜ້າຜັນຂະຫຍາຍວຽກງານລະດົມທຶນ; ເພີ່ມທະວີການຄວບຄຸມໜີ້ສິນສາທາລະນະຢ່າງແໜ້ນແຟ້ນ, ຍົກສູງປະສິດທິຜົນຂອງການນຳໃຊ້ທຶນເງິນກູ້.
ກ່ຽວກັບວຽກງານລະດົມທຶນ, ບົນພື້ນຖານແຜນການກູ້ຢືມ ແລະ ການຊຳລະໜີ້ ໃນປີ 2016 ທີ່ນາຍົກລັດຖະມົນຕີອະນຸມັດ, ກະຊວງການເງິນໄດ້ເປັນເຈົ້າການ, ຕັ້ງໜ້າຜັນຂະຫຍາຍບັນດາມາດຕະການລະດົມທຶນ. ການອອກພັນທະບັດລັດຖະບານໃນຕະຫຼາດຫຼັກຊັບໄດ້ເກືອບ 300.000 ຕື້ດົ່ງ, ລະດົມເງິນ 55.000 ຕື້ດົ່ງຈາກອົງການປະກັນໄພສັງຄົມຫວຽດນາມ, ການເບີກຈ່າຍເງິນກູ້ ODA ແລະ ເງິນກູ້ພິເສດ ໄດ້ປະມານ 1,9 ຕື້ໂດລາສະຫະລັດ, ຮັບປະກັນແຫຼ່ງເງິນທີ່ຕອບສະໜອງຢ່າງທັນການໃຫ້ແກ່ໜ້າທີ່ຈ່າຍງົບປະມານຕາມຄາດໝາຍ ແລະ ລົງທຶນເຂົ້າໃນບັນດາໂຄງການ, ແຜນງານ.
ກ່ຽວກັບການຄວບຄຸມໜີ້ສິນສາທາລະນະ ແລະ ໜີ້ຂອງຊາດ, ຮັບປະກັນການຊຳລະໜີ້ຢ່າງຄົບຖ້ວນ, ທັນເວລາ, ພາຍໃນການຄາດໝາຍຂອງແຜນງົບປະມານ. ຕິດຕາມ, ຕີລາຄາຢ່າງເປັນປະຈຳ ກ່ຽວກັບລະດັບຄວາມປອດໄພຂອງໜີ້ສິນສາທາລະນະ ແລະ ໜີ້ສິນຂອງລັດຖະບານ. ເພີ່ມທະວີການຄວບຄຸມ, ຕິດຕາມກວດກາໜີ້ສິນທີ່ລັດຖະບານຄ້ຳປະກັນ ກໍ່ຄືໜີ້ສິນຂອງອຳນາດການປົກຄອງທ້ອງຖິ່ນ. ຮັບປະກັນຮອດທ້າຍປີ 2016, ໜີ້ສິນສາທາລະນະ, ໜີ້ສິນຂອງລັດຖະບານ ຢູ່ພາຍໃນຂອບເຂດທີ່ໄດ້ຮັບອະນຸຍາດ.
ພິເສດ, ການຈັດວາງຄືນໃໝ່ໂຄງປະກອບໜີ້ສິນພາຍໃນປະເທດ ໄດ້ຮັບການຍູ້ແຮງ, ສຸມໃສ່ການອອກພັນທະບັດລັດຖະບານ, ຕາມນັ້ນ ກຳນົດເວລາອອກພັນທະບັດແຕ່ 5 ປີຂຶ້ນໄປ ກວມເຖິງ 91% ຂອງຍອດມູນຄ່າພັນທະບັດລັດຖະບານ ລື່ນກາຍລະດັບຄາດໝາຍທີ່ວາງໄວ້ (ຕາມມະຕິຂອງສະພາແຫ່ງຊາດ, ຕ່ຳສຸດແມ່ນ 70%); ກຳນົດເວລາສະເຫຼ່ຍຂອງພັນທະບັດແມ່ນ 8,71 ປີ (ສູງກວ່າ 1,82 ປີ ທຽບກັບປີ 2015), ຍົກກຳນົດເວລາສະເຫຼ່ຍຂອງບັນຊີລາຍຊື່ພັນທະບັດລັດຖະບານທ້າຍປີ 2016 ຂຶ້ນເປັນ 5,71 ປີ, ຍາວກວ່າທົບ 3 ເທົ່າທຽບກັບປີ 2011 ແລະ 2 ເທົ່າທຽບກັບປີ 2013; ອັດຕາດອກເບ້ຍພັນທະບັດສະເຫຼ່ຍປີ 2016 ແມ່ນ 6,49% ຕໍ່ປີ, ຫລຸດລົງຢ່າງແຮງທຽບກັບປີກ່ອນໜ້າ. ພ້ອມກັນນັ້ນ, ປະຕິບັດຢ່າງສຳເລັດຜົນ ການປ່ຽນພັນທະບັດລັດຖະບານທີ່ກຳນົດເວລາຍັງເຫຼືອບໍ່ເຖິງ 5 ປີ ເພື່ອຈັດວາງຄືນໃໝ່ບັນຊີລາຍຊື່ໜີ້ສິນ.
ທີສີ່, ຕະຫຼາດການເງິນ ແລະ ບໍລິການການເງິນຂະຫຍາຍຕົວຢ່າງໝັ້ນຄົງ; ຂະບວນວິວັດການຈັດວາງຄືນໃໝ່ຕະຫຼາດຫຼັກຊັບ, ປະກັນໄພ ແລະ ການຈັດວາງ, ປ່ຽນແປງໃໝ່, ຫັນເປັນຫຸ້ນສ່ວນຕໍ່ວິສາຫະກິດແຫ່ງລັດ ສືບຕໍ່ໄດ້ປະຕິບັດຢ່າງຄົບຊຸດ.
ກ່ຽວກັບຕະຫຼາດຫຼັກຊັບ, ກະຊວງການເງິນໄດ້ສຸມໃສ່ຜັນຂະຫຍາຍບັນດາວິທີແກ້ໄຂປົວແປງການຊຳລະເງິນສຳລັບຕະຫຼາດ, ຕັ້ງໜ້າຄົ້ນຄວ້າບັນດານະວັດຕະກຳໃໝ່, ພິເສດແມ່ນບູລະນະຂອບກົດໝາຍ, ໂຄງສ້າງພື້ນຖານເຕັກໂນໂລຊີ ເພື່ອຮັບປະກັນການຜັນຂະຫຍາຍ ຕະຫຼາດຫຼັກຊັບອະນຸພັນ ແລະ ໜັງສືສະແດງສິດທິທີ່ມີການຄ້ຳປະກັນ ໃນປີ 2017. ຄິດໄລ່ຮອດທ້າຍປີ 2016, ຂະໜາດຂອງຕະຫຼາດຫຼັກຊັບເພີ່ມຂຶ້ນປະມານ 54% ທຽບກັບປີ 2015 ແລະບັນລຸອັດຕາ 43,3% ຂອງ GDP; ຕະຫຼາດຫຼັກຊັບໜີ້ຄົງຄ້າງບັນລຸ 35,2% ຂອງ GDP; ສະພາບການຊຳລະເງິນໄດ້ຮັບການປົວແປງ.
ສຳລັບຕະຫຼາດປະກັນໄພ, ລະບົບບັນດາເອກະສານກົດໝາຍກໍ່ສືບຕໍ່ໄດ້ຮັບການປັບປຸງບູລະນະ ເພື່ອສ້າງກອບກົດໝາຍເປັນແຕ່ລະກ້າວ ທີ່ອຳນວຍຄວາມສະດວກໃຫ້ແກ່ການພັດທະນາຕະຫຼາດຢ່າງສົດໃສ ແລະ ໝັ້ນຄົງ, ຕອບສະໜອງບັນດາຄຳໝັ້ນສັນຍາກ່ຽວກັບການເຊື່ອມໂຍງສາກົນ; ເພີ່ມທະວີຄວາມສາມາດໃນການຄຸ້ມຄອງ ແລະ ການເຄື່ອນໄຫວຂອງວິສາຫະກິດ, ເປີດກວ້າງບັນດາຜະລິດຕະພັນປະກັນໄພ ແລະ ບໍລິການ. ເພີ່ມທະວີວຽກງານຕິດຕາມກວດກາ, ຍົກສູງຄວາມສາມາດດ້ານການເງິນຂອງບັນດາວິສາຫະກິດປະກັນໄພ. ຄາດຄະເນລາຍຮັບເບ້ຍປະກັນໄພທັງໝົດເພີ່ມຂຶ້ນ 22,7% ທຽບກັບປີ 2015; ລົງທຶນຄືນໃໝ່ເຂົ້າໃນພື້ນຖານເສດຖະກິດ 186.570 ຕື້ດົ່ງ, ເພີ່ມຂຶ້ນ 16,5%; ການຊຳລະເງິນຜົນປະໂຫຍດການປະກັນໄພເປັນຈຳນວນ 25.870 ຕື້ດົ່ງ.
ກ່ຽວກັບການຈັດວາງຄືນໃໝ່ໂຄງປະກອບຂອງລັດວິສາຫະກິດ, ສືບຕໍ່ກໍ່ສ້າງ, ປັບປຸງບູລະນະບັນດາແຜນການ ແລະ ນະໂຍບາຍກ່ຽວກັບການຈັດວາງ, ປ່ຽນແປງໃໝ່ການຄຸ້ມຄອງ ແລະ ຍົກສູງປະສິດທິຜົນການເຄື່ອນໄຫວຂອງລັດວິສາຫະກິດ. ພ້ອມກັນນັ້ນ, ຕັ້ງໜ້າປະສານສົມທົບ, ຊຸກຍູ້ບັນດາກຸ່ມເສດຖະກິດ, ສະຫະບໍລິສັດແຫ່ງລັດ ໃນການປະຕິບັດແຜນການ, ນະໂຍບາຍນັ້ນຢ່າງຮີບດ່ວນ. ປີ 2016, ອົງການທີ່ມີອຳນາດໄດ້ຮັບຮອງຜ່ານ ແຜນການຫັນເປັນຫຸ້ນສ່ວນຂອງ 56 ວິສາຫະກິດ ຊຶ່ງມີຍອດມູນຄ່າຕົວຈິງ 34.000 ຕື້ດົ່ງ (ໃນນັ້ນ ທຶນຂອງລັດແມ່ນ 24.390 ຕື້ດົ່ງ). ບັນດາຫົວໜ່ວຍ (ປະກອບດ້ວຍບັນດາກຸ່ມບໍລິສັດ, ບໍລິສັດໃຫຍ່ ແລະ ບໍລິສັດໃຫຍ່ລົງທຶນແລະທຸລະກິດທຶນຂອງລັດ (SCIC) ໄດ້ຖອນທຶນຫຼາຍກວ່າ 5.100 ຕື້ດົ່ງ, ເກັບເອົາເງິນ 18.830 ຕື້ດົ່ງມອບໃຫ້ງົບປະມານຂອງລັດ.
ທີຫ້າ, ສືບຕໍ່ຍູ້ແຮງການປະຕິຮູບລະບຽບການບໍລິຫານ, ປົວແປງສິ່ງແວດລ້ອມແຫ່ງການທຸລະກິດ,ປະກອບສ່ວນຍົກສູງຄວາມສາມາດແຂ່ງຂັນຂອງຊາດ; ພ້ອມກັນນັ້ນ ເພີ່ມທະວິການຄຸ້ມຄອງຕະຫຼາດ, ລາຄາ, ຄວບຄຸມອັດຕາເງິນເຟີ້.
ກະຊວງການເງິນໄດ້ປະກາດໃຊ້ໂຄງການປະຕິບັດງານ ເພື່ອປະຕິບັດມະຕິສະບັບເລກທີ 19-2016/NQ-CP, ວັນທີ 28-4-2016, ຂອງລັດຖະບານ, “ກ່ຽວກັບບັນດາໜ້າທີ່, ວິທີແກ້ໄຂຕົ້ນຕໍ ໃນການປົວແປງສິ່ງແວດລ້ອມແຫ່ງການທຸລະກິດ, ຍົກສູງຄວາມສາມາດແຂ່ຂັນຂອງຊາດ ໃນສອງປີ 2016 - 2017, ກຳນົດທິດຮອດປີ 2020” ຊຶ່ງມີ 73 ວິທີແກ້ໄຂທີ່ລະອຽດ ແລະ ໄດ້ກຳນົດຢ່າງລະອຽດເປັນ 118 ຜະລິດຕະພັນສົ້ນອອກ (ຈຸດໜັກແມ່ນໃນຂົງເຂດພາສີອາກອນ, ສຸລະກາກອນ). ຜົນສຳເລັດຄື, ໃນປີ 2016 ໄດ້ສຳເລັດ 75 ໃນ 118 ໜ້າທີ (ສຳເລັດແຜນການ 100%). ໃນນັ້ນ, ໄດ້ສະເໜີໃຫ້ລັດຖະບານປະກາດໃຊ້ ມະຕິກ່ຽວກັບແຜນການຫລຸດຜ່ອນຄວາມຊັບຊ້ອນຂອງຂັ້ນຕອນການບໍລິຫານ, ໜັງສືພົນລະເມືອງ ທີ່ຂຶ້ນກັບພາລະໜ້າທີ່ຄຸ້ມຄອງຂອງກະຊວງການເງິນ; ປະກາດໃຊ້ມະຕິຕົກລົງ 16 ສະບັບ ເພື່ອເຮັດໃຫ້ 908 ຂັ້ນຕອນການບໍລິຫານເປັນມາຕະຖານ ແລະ ອັບເດດຢ່າງຄົບຖ້ວນເຂົ້າໃນຖານຂໍ້ມູນແຫ່ງຊາດກ່ຽວກັບຂັ້ນຕອນການບໍລິຫານ; ປະຕິບັດການຕີລາຄາກ່ຽວກັບການກະທົບຂອງ 128 ຂັ້ນຕອນການບໍລິຫານ ຢູ່ໃນຮ່າງເອກະສານທາງກົດໝາຍ 31 ສະບັບ. ດ້ວຍຄວາມມານະພະຍາຍາມ ແລະ ຄວາມຕັດສິນໃຈສູງໃນການຜັນຂະຫຍາຍບັນດາໜ້າທີ່ປະຕິຮູບການບໍລິຫານ, ຮອດທ້າຍປີ 2016 ໄດ້ຫລຸດຜ່ອນ 22,1% ຈຳນວນຂັ້ນຕອນການບໍລິຫານ, ບັນລຸລື່ນກາຍລະດັບຄາດໝາຍທີ່ວາງໄວ້ (ຫລຸດຜ່ອນຢ່າງໜ້ອຍແມ່ນ 10%), ພ້ອມກັນນັ້ນ ໃນຊຸມປີທີ່ຜ່ານມາ ກະຊວງການເງິນໄດ້ຮັກສາຕຳແໜ່ງທີ 2 ໃນການຈັດອັນດັບກ່ຽວກັບການປະຕິຮູບລະບຽບການບໍລິຫານຂອງ 19 ກະຊວງ, ຂະແໜງການ.
ລະບົບການລາຍງານໄລ່ລຽງພາສີອອນໄລ ສືບຕໍ່ໄດ້ເປີດກວ້າງ (ເກືອບ 564.500 ວິສາຫະກິດໄດ້ລົງທະບຽນລາຍງານໄລ່ລຽງພາສີອອນໄລ, ກວມ 99,6% ຈຳນວນວິສາຫະກິດທີ່ກຳລັງເຄື່ອນໄຫວ); ຫຼາຍກວ່າ 547.000 ວິສາຫະກິດໄດ້ລົງທະບຽນນຳໃຊ້ການບໍລິການຂອງອົງການພາສີອາກອນ; ໄດ້ສຳເລັດການອະນຸຍາດໃຫ້ລະຫັດພາສີໂດຍອັດຕະໂນມັດ; ຜັນຂະຫຍາຍການທົດລອງການຄືນພາສີເອເລັກໂຕຣນິກ ໃນ 5 ກົມພາສີທ້ອງຖິ່ນ.
ພິທີການສຸລະກາກອນເອເລັກໂຕຣນິກໄດ້ຮັບການປະຕິບັດໂດຍພື້ນຖານຢູ່ໝົດທຸກກົມສຸນລະກາກອນ, ບັນດາຂັ້ນຕອນພິທີການສຸລະກາກອນໄດ້ຮັບການອັດຕະໂນມັດໃນລະດັບຊາດ; ໄດ້ສະໜອງ 181 ການບໍລິການສາມາລະນະອອນໄລ (ໃນນັ້ນ ລະດັບ 3 ແລະ 4 ມີ 119 ການບໍລິການ) ທີ່ກ່ຽວພັນເຖິງຂັ້ນຕອນພິທີການບໍລິຫານສຸລະກາກອນ; ເຊື່ອມຕໍ່ປະຕິບັດ 36 ຂັ້ນຕອນການບໍລິຫານຜ່ານກົນໄກ “ປະຕູດຽວແຫ່ງຊາດ” ກັບ 10 ໃນ 14 ກະຊວງ, ປະກອບສ່ວນຫລຸດຜ່ອນຄ່າໃຊ້ຈ່າຍ ແລະ ເວລາ ໃຫ້ວິສາຫະກິດ.
ກ່ຽວກັບວຽກງານຄວບຄຸມລາຄາ, ກະຊວງການເງິນໄດ້ເປັນເຈົ້າການສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງໃນການຄຸ້ມຄອງ, ບໍລິຫານຈັດການສຳລັບສິນຄ້າທີ່ສຳຄັນຄື ນ້ຳມັນ; ດັດສົມລາຄາການບໍລິຫານສາທາລະນະ (ນ້ຳມັນ, ນ້ຳນົມ, ບໍລິການການສຶກສາ, ບໍລິການສາທາລະນະສຸກ, ຄ່າຂົນສົ່ງ...) ຕາມກົນໄກຕະຫຼາດທີ່ມີການຄຸ້ມຄອງຂອງລັດ, ສອດຄ່ອງກັບເປົ້າໝາຍຄວບຄຸມອັດຕາເງິນເຟີ້ປີ 2016. ເພີ່ມທະວີວຽກງານກວດສອບ ກວດກາການປະຕິບັດກົດໝາຍກ່ຽວກັບລາຄາ. ຕິດຕາມກວດກາຢ່າງແໜ້ນແຟ້ນຕໍ່ການເຄື່ອນໄຫວລົງທະບຽນ, ລາຍງານໄລ່ລຽງລາຄາຂອງວິສາຫະກິດ..., ອາໃສສິ່ງດັ່ງກ່າວນັ້ນຈຶ່ງໄດ້ປະກອບສ່ວນຫລຸດຜ່ອນຄວາມກົດດັນຕໍ່ອັດຕາເງິນເຟີ້ໃນປີ 2016.
ທີຫົກ, ວຽກງານຮ່ວມມືສາກົນ ແລະ ການພົວພັນການເງິນກັບຕ່າງປະເທດ ສືບຕໍ່ໄດ້ເພີ່ມທະວີ.
ກະຊວງການເງິນໄດ້ແລະພວມຕັ້ງໜ້າ, ເປັນເຈົ້າການເຂົ້າຮ່ວມການເຄື່ອນໄຫວຮ່ວມມືດ້ານການເງິນໃນພາກພື້ນ ແລະ ສາກົນ ເຊັ່ນ ASEAN, ASEM, APEC... ເປັນເຈົ້າການສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງ ເພື່ອສຳເລັດຂະບວນວິວັດການເຊັນສັນຍາຄູ່ຮ່ວມມືຂ້າມປາຊີຟິກ (TPP), ສຳເລັດສິ້ນສຸດການເຈລະຈາສັນຍາການຄ້າເສລີຫວຽດນາມ - ສະຫະພາບເອີຣົບ; ເຂົ້າຮ່ວມການເຈລະຈາກ່ຽວກັບເນື້ອໃນພາສີສິນຄ້າເຂົ້າອອກ ແລະ ບໍລິການການເງິນ ຢູ່ໃນບັນດາສັນຍາການຄ້າເສລີ (ເຊັ່ນ RCEP, ອາຊຽນ - ຮ່ອງກົງ, ຫວຽດນາມ - ອິດສະຣາແອນ ແລະ ຫວຽດນາມ - ກູບາ). ໃນປີ 2016, ກະຊວງການເງິນໄດ້ສະເໜີໃຫ້ລັດຖະບານປະກາດໃຊ້ດຳລັດ 10 ສະບັບ ກ່ຽວກັບຕາຕະລາງອັດຕາພາສີສິນຄ້າເຂົ້າອອກພິເສດໄລຍະປີ 2016 - 2018/2019 ເພື່ອຜັນຂະຫຍາຍປະຕິບັດຄຳໝັ້ນສັນຍາກ່ຽວກັບການລົດພາສີສິນຄ້າເຂົ້າອອກຂອງຫວຽດນາມ; ເຈລະຈາເຊັນສັນຍາ 34 ສະບັບກ່ຽວກັບການກູ້ຢືມເງິນ ODA ແລະ ກູ້ຢືມເງິນພິເສດ ທີ່ມີຍອດມູນຄ່າ 5,2 ຕື້ໂດລາສະຫະລັດ, ຫຼາຍກວ່າທົບ 1,5 ເທົ່າທຽບກັບປີ 2015. ອາດຈະເວົ້າໄດ້ວ່າ, ປີ 2016 ເປັນ “ປີຫົວລ້ຽວຫົວຕໍ່” ຂອງຫວຽດນາມເມື່ອບັນດາສັນຍາການຄ້າເສລີພື້ນຖານໄດ້ຮັບການປະຕິບັດ, ພ້ອມນັ້ນກໍ່ສຳເລັດສິ້ນສຸດການເຈລະຈາສັນຍາການຄ້າເສລີຮຸ້ນໃໝ່.
ນອກນັ້ນ, ໃນຂອບເຂດພາລະໜ້າທີ່ຂອງຕົນ, ກະຊວງການເງິນໄດ້ອອກຄຳສັ່ງເລກທີ 02/CT-BTC, ວັນທີ 24-12-2015, ກ່ຽວກັບການເຊື່ອມໂຍງໃນຂົງເຂດການເງິນ, ໃນນັ້ນມີໜ້າທີ່ຕີລາຄາຜົນກະທົບຂອງບັນດາສັນຍາການຄ້າເສລີ ເຖິງລາຍຮັບງົບປະມານຂອງລັດ ເພື່ອຈະເປັນເຈົ້າການໃນການປະຕິບັດງົບປະມານຂອງລັດ.
ວິທີແກ້ໄຂຈຳນວນໜຶ່ງ ເພື່ອແນໃສ່ຮັກສາຄວາມໝັ້ນຄົງຂອງເສດຖະກິດມະຫາພາກ ໃນປີ 2017
ປີ 2017, ຄາດຄະເນວ່າ ສະພາບການສືບຕໍ່ມີການຫັນປ່ຽນຢ່າງຕັ້ງໜ້າ, ເສດຖະກິດມະຫາພາກມີຄວາມໝັ້ນຄົງ ດ້ວຍລະດັບເຕີບໂຕປະມານ 6,7%, ຍອດມູນຄ່າຂາອອກເພີ່ມຂຶ້ນປະມານ 6% - 7%, ລະດັບເພີ່ມລາຄາຄ່າຄອງຊີບປະມານ 4%, ຍອດຈຳນວນທຶນລົງທຶນພັດທະນາທົ່ວສັງຄົມກວມປະມານ 31,5%. ແຕ່, ໃນປີ 2017 ຍັງມີຫຼາຍປັດໄຈທີ່ສົ່ງຜົນກະທົບບໍ່ດີ ເຖິງການພັດທະນາເສດຖະກິດເວົ້າລວມ ແລະ ການເຄື່ອນໄຫວການເງິນ-ທະນາຄານຂອງລັດເວົ້າສະເພາະ, ເຊັ່ນ ການກະທົບທີ່ບໍ່ດີຂອງການເຊື່ອມໂຍງສາກົນ, ການຄ່ອງຕົວຂອງວິສາຫະກິດຍັງຊ້າ, ຂະບວນວິວັດການຈັດວາງຄືນໃໝ່ໂຄງປະກອບເສດຖະກິດຍັງມີຄວາມຫຍຸ້ງຍາກ, ເສຍຄ່າໃຊ້ຈ່າຍຫຼາຍ; ການຜັນປ່ຽນຢ່າງສັບສົນ, ຜິດປົກກະຕິ ຂອງສະພາບດິນຟ້າອາກາດ, ໄພທຳມະຊາດ, ໂລກລະບາດ; ການປ່ຽນແປງທີ່ຄາດເດົາຍາກຂອງຕະຫຼາດການເງິນ, ເງິນຕາ, ການຄ້າໂລກ. ເພື່ອປະກອບສ່ວນຮັກສາຄວາມໝັ້ນຄົງຂອງເສດຖະກິດມະຫາພາກ, ຮັບປະກັນການເຕີບໂຕເສດຖະກິດຢ່າງໄວແລະໝັ້ນຄົງ, ຂະແໜງການເງິນຈະບຸລິມະສິດສຸມໃສ່ປະຕິບັດວິທີແກ້ໄຂຈຳນວນໜຶ່ງດັ່ງນີ້:
ທີໜຶ່ງ, ຍູ້ແຮງການບູລະນະລະບຽບກົດໝາຍການເງິນ ແລະ ກົນໄກການເງິນ, ຮັບປະກັນຄວາມຄົບຊຸດ, ເປີດເຜີຍ, ໂປ່ງໃສ, ເປັນປົກກະຕິ ແລະ ສອດຄ່ອງກັບຄວາມຕ້ອງການຕົວຈິງທີ່ວາງອອກມາ ໃນຂະບວນວິວັດການພັດທະນາເສດຖະກິດ-ສັງຄົມ ຂອງປະເທດ ແລະ ການເຊື່ອມໂຍງສາກົນ. ຈັດຕັ້ງຜັນຂະຫຍາຍການປະຕິບັດເປັນຢ່າງດີ ກົດໝາຍງົບປະມານແຫ່ງລັດປີ 2015, ບັນດາກົດໝາຍກ່ຽວກັບພາສີອາກອນ, ມະຕິສະບັບເລກທີ 07-NQ/TW, ວັນທີ 18-11-2016, ຂອງກົມການເມືອງສູນກາງພັກ, “ກ່ຽວກັບແຜນນະໂຍບາຍ, ວິທີແກ້ໄຂການຈັດວາງຄືນໃໝ່ໂຄງປະກອບງົບປະມານຂອງລັດ, ຄວບຄຸມໜີ້ສິນສາທາລະນະ ເພື່ອຮັບປະກັນໃຫ້ພື້ນຖານການເງິນແຫ່ງຊາດມີຄວາມປອດໄພ, ໝັ້ນຄົງ” ແລະ ບັນດາມະຕິຂອງສະພາແຫ່ງຊາດ ກ່ຽວກັບແຜນການຈັດວາງຄືນໃໝ່ໂຄງປະກອບພື້ນຖານເສດຖະກິດ ໄລຍະປີ 2016 - 2020; ແຜນການການເງິນ 5 ປີແຫ່ງຊາດ ໄລຍະປີ 2016 - 2020; ແຜນການລົງທຶນພາກລັດໄລຍະກາງ ປີ 2016 - 2020 ເພື່ອແນໃສ່ລະດົມ, ແຈກຢາຍ, ນຳໃຊ້ແຫຼ່ງຊັບພະຍາກອນຕ່າງໆຢ່າງມີປະສິດທິຜົນ, ລວມທັງຊັບພະຍາກອນງົບປະມານຂອງລັດ.
ທີສອງ, ສືບຕໍ່ປະຕິບັດນະໂຍບາຍຕ່າງໆເພື່ອແກ້ໃຂຄວາມຫຍຸ້ງຍາກໃຫ້ການຜະລິດ, ທຸລະກິດ, ດຶງດູດການລົງທຶນ, ພ້ອມກັນນັ້ນກໍ່ສຸມໃສ່ຍົກສູງຄຸນນະພາບຂອງວຽກງານການຄຸ້ມຄອງ, ຮັບປະກັນເກັບເອົາບ້ວງເງິນທີ່ເກີດຂຶ້ນພາຍໃຕ້ການກຳນົດ ໄດ້ຢ່າຖືກຕ້ອງ, ທັນເວລາ ແລະ ເຕັມສ່ວນ. ຈຳກັດສຸດຂີດການອອກນະໂຍບາຍໃໝ່ເມື່ອຍັງບໍ່ທັນມີແຫຼ່ງພະລັງເພື່ອຮັບປະກັນ. ເພີ່ມທະວີການຕໍ່ສູ້ຕ້ານການສູນເສຍລາຍໄດ້, ການຫຼີກລ່ຽງພາສີ, ການລັກລອບນຳເຂົ້າສົ່ງອອກ, ການກຳນົດລາຄາໂອນ, ການສໍ້ໂກງການຄ້າ... ຕິດຕາມ, ຕີລາຄາການກະທົບຂອງບັນດາສັນຍາການຄ້າເສລີທີ່ມີຕໍ່ລາຍຮັບງົບປະມານຂອງລັດ ເພື່ອມີມາດຕະການແກ້ໄຂ.
ທີສາມ, ສືບຕໍ່ປະຕິບັດລະບຽບວິໄນການເງິນ ງົບປະມານຢ່າງເຂັ້ມງວດ; ປະຕິບັດລາຍຈ່າຍງົບປະມານຂອງລັດຢ່າງແໜ້ນແຟ້ນ, ປະຢັດ, ມີປະສິດທິຜົນ, ຕາມການໄລ່ລຽງລ່ວງໜ້າທີ່ໄດ້ຮັບມອບໝາຍ. ເພີ່ມທະວີວຽກງານຄຸ້ມຄອງ, ກວດກາ, ຕິດຕາມກວດກາການລົງທຶນ; ຍົກສູງປະສິດທິຜົນຂອງການລົງທຶນພາກລັດ, ຕ້ານການຕົກເຮ່ຍເສຍຫາຍ, ຟຸ່ມເຟືອຍ, ສໍ້ລາດບັງຫຼວງ; ບໍ່ປະໃຫ້ເກີດມີໜີ້ຄ້າງໃໝ່ໃນການກໍ່ສ້າງພື້ນຖານ. ສະເໜີໃຫ້ນາຍົກລັດຖະມົນຕີປັບປຸງແກ້ໄຂມະຕິຕົກລົງສະບັບເລກທີ 32/2015/QĐ-TTg, ວັນທີ 4-8-2015, ຕາມທິດ ສືບຕໍ່ຫລຸດຜ່ອນຈຳນວນລົດໂອໂຕຂອງລັດ, ສູ້ຊົນຮອດປີ 2020 ຫລຸດຜ່ອນ 30% - 50% ຈຳນວນລົດໂອໂຕຮັບໃຊ້ວຽກງານລວມ ທີ່ພວມສະໜອງໃຫ້ບັນດາກະຊວງ, ຂະແໜງການ, ທ້ອງຖິ່ນ; ກຳນົດເປົ້າໝາຍ, ເວລາປະຕິບັດລະບອບມອບເໝົາຄ່າໃຊ້ຈ່າຍໃນການນຳໃຊ້ລົດໂອໂຕສຳລັບຕຳແໜ່ງຮອງລັດຖະມົນຕີ ແລະ ທຽບເທົ່າ, ລົດໂອໂຕຮັບໃຊ້ວຽກງານລວມ ແນໃສ່ປະຢັດຄ່າໃຊ້ຈ່າຍໃຫ້ແກ່ງົບປະມານຂອງລັດ. ພ້ອມກັນນັ້ນ, ສົມທົບກັບບັນດາກະຊວງ, ຂະແໜງການ, ທ້ອງຖິ່ນໃນການບູລະນະກົດໝາຍວ່າດ້ວຍການຄຸ້ມຄອງ, ນຳໃຊ້ຊັບສິນສາທາລະນະ, ແລ້ວສະເໜີໃຫ້ສະພາແຫ່ງຊາດຮັບຮອງຜ່ານ ແນໃສ່ຍົກສູງປະສິດທິຜົນຂອງການຄຸ້ມຄອງ ແລະ ນຳໃຊ້ຊັບສິນຂອງລັດ.
ທີສີ່, ຄຸ້ມຄອງຢ່າງແໜ້ນແຟ້ນຕໍ່ຕົວຊີ້ວັດໜີ້ສິນສາທາລະນະ ແລະ ການຂາດດຸນງົບປະມານ. ກຳກັບຂັບເຄື່ອນງົບປະມານຂັ້ນຕ່າງໆຢ່າງເປັນເຈົ້າການ, ຕັ້ງໜ້າ, ຄວບຄຸມການຂາດດຸນງົບປະມານສູນກາງ ແລະ ທ້ອງຖິ່ນໃຫ້ຢູ່ໃນຂອບເຂດທີ່ສະພາແຫ່ງຊາດໄດ້ຕົກລົງ; ສູ້ຊົນເພີ່ມລາຍຮັບ, ປະຢັດລາຍຈ່າຍ, ເພື່ອຫລຸດຜ່ອນການຂາດດຸນງົບປະມານຂອງລັດ. ປະຕິບັດວິທີແກ້ຕ່າງໆຢ່າງຄົບຊຸດ ເພື່ອຈັດວາງໜີ້ສິນສາທາລະນະຄືນໃໝ່; ເພີ່ມທະວີການຄຸ້ມຄອງໜີ້ສິນ ແລະ ໃຫ້ຄວາມສຳຄັນແກ່ວຽກງານຄຸ້ມຄອງຄວາມສ່ຽງ; ລັດຖະບານຈະຈຳກັດການຄ້ຳປະກັນການກູ້ຢືມເງິນໃໝ່; ຍູ້ແຮງການກວດສອບ, ກວດກາ ແນໃສ່ເພີ່ມທະວີລະບຽບວິໄນ ໃນການນຳໃຊ້ເງິນກູ້ຢືມ, ຮັບປະກັນປະສິດທິຜົນຂອງການລົງທຶນ ແລະ ຮັບປະກັນໃຫ້ໜີ້ສິນສາທາລະນະ, ໜີ້ສິນຂອງລັດຖະບານ, ໜີ້ສິນພາຍນອກ ຢູ່ໃນລະດັບທີ່ໄດ້ຮັບອະນຸຍາດ.
ທີຫ້າ, ສຸມໃສ່ຍູ້ແຮງການປະຕິບັດກົນໄກເປັນເຈົ້າຕົນເອງ, ຮັບຜິດຊອບດ້ວຍຕົນເອງສຳລັບບັນດາອົງການຂອງລັດ, ໜ່ວຍທຸລະກິດສາທາລະນະ ແລະ ຫັນການບໍລິການສາທາລະນະເປັນສັງຄົມ, ກ້າວໄປເຖິງການຄິດໄລ່ຄ່າໃຊ້ຈ່າຍຢ່າງຖືກຕ້ອງ, ເຕັມສ່ວນ ແລະ ດັດສົມລາຄາຄ່າບໍລິການສາທາລະນະຕາມກົນໄກຕະຫຼາດ ແຕ່ຮັບປະກັນຄວາມໝັ້ນຄົງຂອງເສດຖະກິດມະຫາພາກ, ມີກົນໄກຊ່ວຍເຫຼືອເປົ້າໝາຍນະໂຍບາຍ. ປະຕິບັດການຫັນເປັນຫຸ້ນສ່ວນຕໍ່ບັນດາໜ່ວຍທຸລະກິດພາກລັດ ທີ່ມີເງື່ອນໄຂຄົບຖ້ວນ, ຜ່ານສິ່ງດັ່ງກ່າວເພື່ອຍົກສູງປະສິດທິຜົນໃນການເຄື່ອນໄຫວຂອງບັນດາໜ່ວຍທຸລະກິດສະທາລະນະ, ຍົກສູງຄວາມສາມາດແຂ່ງຂັນ ແລະ ສົ່ງເສີມການເຂົ້າຮ່ວມຂອງຂົງເຂດເອກະຊົນເຂົ້າໃນການສະໜອງການບໍລິການສາທາລະນະ. ພ້ອມກັນນັ້ນ, ສືບຕໍ່ພັດທະນາບັນດາປະເພດຕະຫຼາດການເງິນ, ບໍລິການການເງິນຢ່າງຄົບຊຸດຕາມທິດທັນສະໄໝ. ຍູ້ແຮງການຈັດວາງຄືນໃໝ່ ແລະ ຍົກສູງປະສິດທິຜົນໃນເຄື່ອນໄຫວຂອງວິສາຫະກິດຂອງລັດ, ຮັບປະກັນໃຫ້ຂະບວນວິວັດການຈັດວາງຄືນໃໝ່ຂົງເຂດລັດວິສາຫະກິດເຂົ້າສູ່ເນື້ອແທ້ຕົວຈິງ.
ທີຫົກ, ຍູ້ແຮງວຽກງານປະຕິຮູບການບໍລິຫານ, ຜ່ານນັ້ນສືບຕໍ່ປົວແປງສິ່ງແວດລ້ອມແຫ່ງການລົງທຶນ ແລະ ທຸລະກິດຢ່າງແຂງແຮງ, ສ້າງເງື່ອນໄຂອຳນວຍຄວາມສະດວກເພື່ອພັດທະນາບັນດາວິສາຫະກິດສັງກັດທຸກພາກສ່ວນເສດຖະກິດ. ຕາມນັ້ນ, ສືບຕໍ່ກວດຄືນ, ປັບປຸງ, ບູລະນະລະບົບກົດໝາຍການເງິນ ແລະ ປະຕິບັດບັນດານະໂຍບາຍເກື້ອກູນ, ສົ່ງເສີມ ເພື່ອຊ່ວຍເຫຼືອວິສາຫະກິດຂະຫຍາຍຕົວ. ໃນນັ້ນ, ສຸມໃສ່ການແກ້ໄຂສິ່ງກີດຂວາງແລະອຸປະສັກ ກ່ຽວກັບນະໂຍບາຍພາສີ, ສຸລະກາກອນ, ລະບອບການບັນຊີ, ການກວດສອບບັນຊີ, ຂັ້ນຕອນການບໍລິຫານ ໃນຂົງເຂດການເງິນ, ພິເສດແມ່ນບັນດານະໂຍບາຍສຳລັບວິສາຫະກິດຂະໜາດນ້ອຍແລະຂະໜາດກາງ; ນະໂຍບາຍສຳລັບການພັດທະນາອຸດສາຫະກຳສະໜັບສະໜູນ ແລະ ສຳລັບຂົງເຂດຊົນນະບົດ, ກະສິກຳ.
ທີເຈັດ, ເພີ່ມທະວີວຽກງານຄຸ້ມຄອງລາຄາ, ຕະຫຼາດ. ສືບຕໍ່ປະຕິບັດຫຼັກການຄຸ້ມຄອງລາຄາຕາມກົນໄກຕະຫຼາດ, ສອດຄ່ອງກັບເປົ້າໝາຍຄວບຄຸມອັດຕາເງິນເຟີ້, ຍູ້ແຮງການປະຕິບັດແຜນງານລາຄາຕະຫຼາດທີ່ມີການດັດປັບຂອງລັດ ສຳລັບບັນດາສິນຄ້າທີ່ສຳຄັນ, ຈຳເປັນເຊັ່ນ ນ້ຳມັນ, ອາຍແກັດ, ໄຟຟ້າ, ບໍລິການສາທາລະນະ, ທີ່ດິນ ແລະ ຊັບພະຍາກອນທີ່ສຳຄັນ; ພ້ອມກັນນັ້ນ ມີວິທີແກ້ໄຂຊ່ວຍເຫຼືອທີ່ເໝາະສົມໃຫ້ແກ່ບັນດາເປົ້າໝາຍນະໂຍບາຍ (ຜູ້ທຸກຍາກ, ຄົນຊົນເຜົ່າສ່ວນນ້ອຍ...).
ທີແປດ, ສົມທົບບັນດານະໂຍບາຍງົບປະມານ, ນະໂຍບາຍການເງິນ ເພື່ອຄວບຄຸມອັດຕາເງິນເຟີ້, ຮັກສາຄວາມໝັ້ນຄົງຂອງເສດຖະກິດມະຫາພາກ, ສູ້ຊົນເພີ່ມຄວາມເຕີບໂຕຂອງ GDP ໃຫ້ບັນລຸລະດັບຄາດໝາຍແຜນການທີ່ໄດ້ວາງໄວ້; ຊຸກຍູ້ ແລະ ເພີ່ມທະວີຄວາມໂປ່ງໃສດ້ານການສື່ສານທີ່ກ່ຽວພັນເຖິງການເງິນ-ງົບປະມານຂອງລັດຕາມກຳໜົດ. ເພີ່ມທະວີວຽກງານໂຄສະນາເຜີຍແຜ່ເອກະສານ, ນະໂຍບາຍ, ລະບອບໃໝ່ທີ່ກ່ຽວພັນເຖິງຂົງເຂດການເງິນ, ເພີ່ມທະວີການສົນທະນາ, ຊ່ວຍໜູນ, ໃຫ້ຄຳປືກສາທາງດ້ານກົດໝາຍ ໃຫ້ວິສາຫະກິດ, ປະຊາຊົນ ແນໃສ່ສ້າງຄວາມເຫັນດີເຫັນພ້ອມ, ປະສິດທິຜົນໃນການຈັດຕັ້ງປະຕິບັດບັນດາໜ້າທີ່ການເງິນ-ງົບປະມານຂອງລັດ. ພ້ອມກັນນັ້ນ, ສືບຕໍ່ປັບປຸງບູລະນະກົງຈັກຂອງຂະແໜງການການເງິນ, ຍົກສູງຄຸນນະພາບຂອງຖັນແຖວພະນັກງານ, ຂ້າລັດຖະການ, ລັດຖະກອນ; ຮັບປະກັນຫລຸດຜ່ອນການບັນຈຸບຸກຄະລາກອນ ຖືກຕ້ອງຕາມແຜນນະໂຍບາຍຂອງພັກ ແລະ ລັດ. ກໍ່ສ້າງກົງຈັກຂອງຂະແໜງການການເງິນໃຫ້ມີຄວາມປອດໃສ, ໝັ້ນຄົງເຂັ້ມແຂງ, ຊື່ສັດສຸດຈະລິດ, ມີປະສິດທິຜົນ, ເວົ້າໄປຄຽງຄູ່ກັບເຮັດ; ເວົ້າຄຳປະຕິເສດການສໍ້ລາດບັງຫຼວງ, ຫຍໍ້ທໍ້ ຟຸ່ມເຟືອຍ./.
ໂດຍ ດິງຕ໋ຽນຢຸ໊ງ,
ກຳມະການສູນກາງພັກ, ລັດຖະມົນຕີກະຊວງການເງິນ
--------------------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 893 (ເດືອນມີນາ 2017)