ການກໍ່ສ້າງພັກແລະລະບົບການເມືອງຢູ່ຫວຽດນາມ ໃນສະພາບການໃໝ່
ວກ.ອອນໄລ - ໃນຂະບວນການນຳພາການປະຕິວັດ, ພັກກອມມູນິດຫວຽດນາມຍາມໃດກໍ່ເອົາໃຈໃສ່ການກໍ່ສ້າງພັກໃຫ້ສະອາດປອດໃສແລະໝັ້ນຄົງເຂັ້ມແຂງ. ນັບແຕ່ເມື່ອຍາດໄດ້ອຳນາດການປົກຄອງເປັນຕົ້ນມາ, ພັກກອມມູນິດຫວຽດນາມແມ່ນສ່ວນປະກອບຂອງລະບົບການເມືອງ ແລະເປັນແກນນຳຂອງລະບົບນັ້ນ. ດັ່ງນັ້ນ, “ພັກກອມມູນິດຫວຽດນາມ - ກອງນຳໜ້າຂອງຊົນຊັ້ນກຳມະກອນ, ພ້ອມທັງເປັນກອງນຳໜ້າຂອງປະຊາຊົນຜູ້ອອກແຮງງານແລະຂອງຊາດຫວຽດນາມ,… ແມ່ນກຳລັງນຳພາລັດແລະສັງຄົມ”(1). ການກໍ່ສ້າງພັກໃຫ້ສະອາດປອດໃສແລະໝັ້ນຄົມເຂັ້ມແຂງມີຄວາມສຳຄັນຊີ້ຂາດຕໍ່ລັກສະນະ, ເປົ້າໝາຍ, ໜ້າທີ່, ປະສິດທິຜົນ ຂອງການກໍ່ສ້າງລະບົບການເມືອງ. ໃນທາງກັບ, ປະສິດທິພາບແລະປະສິດທິຜົນແຫ່ງການເຄື່ອນໄຫວຂອງບັນດາອົງການສະມາຊິກໃນລະບົບການເມືອງນັ້ນ ແມ່ນສິ່ງວັດແທກຄວາມສາມາດນຳພາ, ອິດທິພົນ, ຖານະບົດບາດ, ຕຳແໜ່ງກຳອຳນາດຂອງພັກ.
ເມື່ອກ້າວເຂົ້າສູ່ໄລຍະແຫ່ງການປ່ຽນແປງໃໝ່, ພັກກອມມູນິດຫວຽດນາມກຳນົດແຈ້ງ: ການກໍ່ສ້າງພັກແມ່ນໜ້າທີ່ສຳຄັນ, ມີຄວາມໝາຍຕັດສິນໃນການຮັບປະກັນຄວາມສຳເລັດຂອງພາລະກິດການປ່ຽນແປງໃໝ່. ການກໍ່ສ້າງພັກແລະລະບົບການເມືອງແມ່ນເພື່ອຍົກສູງຄວາມສາມາດນຳພາແລະກຳອຳນາດຂອງພັກ, ເພີ່ມທະວີປະສິດທິພາບແລະປະສິດທິຜົນການເຄື່ອນໄຫວຂອງລະບົບການເມືອງ, ເສີມຂະຫຍາຍປະຊາທິປະໄຕສັງຄົມນິຍົມ, ຮັບປະກັນຄວາມຄົບຊຸດແລະຄວາມສອດຄ່ອງລະຫວ່າງການປ່ຽນແປງໃໝ່ເສດຖະກິດແລະການປ່ຽນແປງໃໝ່ການເມືອງ.
ບົນພື້ນຖານຕັ້ງໝັ້ນໃນຫຼັກການກ່ຽວກັບການຈັດຕັ້ງແລະການເຄື່ອນໄຫວຂອງພັກກອມມູນິດ, ວຽກງານກໍ່ສ້າງພັກໄດ້ດຳເນີນໃນທຸກດ້ານການເມືອງ, ແນວຄິດ, ການຈັດຕັ້ງ, ຄຸນສົມບັດສິນທຳ ແລະ ໄດ້ມີການຫັນປ່ຽນຢ່າງແຂງແຮງ. ການກໍ່ສ້າງພັກທາງດ້ານການເມືອງໄດ້ຊ່ວຍຮັກສາແລະຕັ້ງໝັ້ນໃນເປົ້າໝາຍແລະອຸດົມຄະຕິການປະຕິວັດ; ຕັ້ງໝັ້ນໃນບັນດາຫຼັກການພື້ນຖານ; ເພີ່ມທະວີຄວາມກ້າຫານທາງການເມືອງ; ຍົກສູງຄຸນນະພາບຂອງແນວທາງ, ນະໂຍບາຍ. ວຽກງານແນວຄິດທິດສະດີໄດ້ຮັບການເພີ່ມທະວີ ເຊິ່ງໄດ້ສ້າງຄວາມເປັນເອກະພາບໃນພັກແລະຄວາມເຫັນດີເຫັນພ້ອມໃນສັງຄົມຕໍ່ບັນດາບັນຫາໃຫຍ່ຂອງປະເທດ, ຂອງພາລະກິດການປ່ຽນແປງໃໝ່; ການຕໍ່ສູ້ຜາບແພ້ທຸກກົນອຸບາຍ “ຫັນປ່ຽນໂດຍສັນຕິ” ຂອງບັນດາອິດທິກຳລັງສັດຕູ; ການຊອກຫາ, ເພີ່ມເຕີມແລະພັດທະນາທິດສະດີກ່ຽວກັບລັດທິສັງຄົມນິຍົມ ແລະເສັ້ນທາງຂຶ້ນສູ່ລັດທິສັງຄົມນິຍົມຢູ່ຫວຽດນາມ. ການຈັດຕັ້ງພັກແລະລະບົບການເມືອງໄດ້ມີການປ່ຽນແປງໃໝ່ຕ່າງໆທີ່ສຳຄັນ, ນັບແຕ່ສະຖາບັນ, ການຈັດຕັ້ງກົງຈັກ, ກົນໄກດຳເນີນງານ ຈົນເຖິງການຍົກສູງປະສິດທິພາບແລະປະສິດທິຜົນຂອງການເຄື່ອນໄຫວ, ການກໍ່ສ້າງຖັນແຖວພະນັກງານຂັ້ນຕ່າງໆ, ໂດຍສະເພາະແມ່ນພະນັກງານຂັ້ນຍຸດທະສາດ; ການແກ້ໄຂປັບປຸງວິທີການແລະແບບແຜນການເຮັດວຽກ; ການຮັດແໜ້ນລະບຽບວິໄນ, ການຄວບຄຸມອຳນາດ, ການປ້ອງກັນແລະຕ້ານການສໍ້ລາດບັງຫຼວງ. ຄວາມໄວ້ວາງໃຈຂອງປະຊາຊົນຕໍ່ບົດບາດນຳພາຂອງພັກແລະຕໍ່ການຄຸ້ມຄອງຂອງລັດໄດ້ຮັບການຍົກສູງຂຶ້ນ. ການອົບຮົມສຶກສາ ຝຶກຝົນຫຼໍ່ຫຼອມຄຸນສົມບັດປະຕິວັດໄດ້ຮັບຄວາມເອົາໄຈໃສ່ເປັນພິເສດແລະມີຄຸນປະໂຫຍດທີ່ສຳຄັນໃນການຕໍ່ສູ້ເພື່ອກີດກັ້ນແລະຍູ້ຖອຍສະພາບຄວາມເສື່ອມໂຊມທາງດ້ານແນວຄິດການເມືອງ ຄຸນສົມບັດ ແບບແຜນດຳລົງຊີວິດ, ແລະ ມີຄຸນປະໂຫຍດໃນການເສີມຂະຫຍາຍບົດບາດນຳໜ້າເປັນແບບຢ່າງຂອງສະມາຊິກພັກ. ຜ່ານພຶດຕິກຳແຫ່ງການກໍ່ສ້າງພັກແລະລະບົບການເມືອງ, ພື້ນຖາປະຊາທິປະໄຕສັງຄົມນິຍົມນັບມື້ນັບໄດ້ຮັບການປັບປຸງ; ສິດທິມະນຸດ, ສິດທິພົນລະເມືອງໄດ້ຮັບປະກັນດີກວ່າເກົ່າ; ການຈັດຕັ້ງກົງຈັກ, ກົນໄກດຳເນີນງານຂອງລະບົບການເມືອງໄດ້ຮັບການປ່ຽນແປງໃໝ່, ປັບປຸງບູລະນະແລະຍົກສູງປະສິດທິຜົນເທື່ອລະກ້າວ.
ການກໍ່ສ້າງພັກໃຫ້ສະອາດປອດໃສແລະໝັ້ນຄົງເຂັ້ມແຂງແມ່ນປັດໄຈຕັດສິນຊີ້ຂາດໃນການສ້າງໄຊຊະນະທີ່ຍິ່ງໃຫຍ່ແລະມີຄວາມໝາຍປະຫວັດສາດຂອງຂະບວນການປ່ຽນແປງໃໝ່ຢູ່ຫວຽດນາມໃນກວ່າ 3 ທົດສະວັດທີ່ຜ່ານມາ. ຜ່ານການກໍ່ສ້າງພັກແລະລະບົບການເມືອງ, ພັກກອມມູນິດຫວຽດນາມມີຄວາມເຕີບໃຫຍ່ໃນການນຳພາພາລະກິດການປ່ຽນແປງໃໝ່, ນັບມືນັບຍົກສູງບົດບາດ, ຕຳແໜ່ງກຳອຳນາດແລະຄວາມສາມາດນຳພາ, ເພີ່ມທະວີຄວາມສຳພັນໃກ້ຊິດສະໜິດແໜ້ນກັບປະຊາຊົນ, ປຸກຕື່ນຄວາມສາມາດປະດິດສ້າງ, ເສິມຂະຫຍາຍບົດບາດຂອງປະຊາຊົນໃນການເຂົ້າຮ່ວມການກໍ່ສ້າງພັກແລະຄຸ້ມຄອງລັດ ຄຸ້ມຄອງສັງຄົມ.
ແຕ່ວ່າ, ວຽກງານກໍ່ສ້າງພັກແລະລະບົບການເມືອງໃນເວລາທີ່ຜ່ານມາກໍ່ມີຂໍ້ຈຳກັດທີ່ແນ່ນອນຈຳນວນໜຶ່ງ. ຄວາມສາມາດໃນການຄາດຄະເນ, ກຳນົດທິດທາງນະໂຍບາຍ, ການຫັນເປັນນິຕິກຳ ຫັນເປັນອັນລະອຽດສະເພາະເພື່ອຈັດຕັ້ງປະຕິບັດນັ້ນ ຍັງແມ່ນຂອດທີ່ອ່ອນຢູ່ ແລະຍັງຫ່າງຈາກຄວາມຕ້ອງການຂອງຄວາມເປັນຈິງ. ການຄຸ້ມຄອງແລະອົບຮົມສຶກສາສະມາຊິກພັກຍັງບໍ່ທັນໄດ້ຮັບຄວາມເອົາໃຈໃສ່ຢ່າງພຽງພໍ, ປະສິດທິຜົນບໍ່ສູງ. ຄຸນນະພາບໃນການດຳເນີນຊີວິດຂອງພັກ, ລັກສະນະຕໍ່ສູ້ໃນການຕິຊົມຕົນເອງແລະຕິຊົມແມ່ນຍັງອ່ອນແອ, ການປະຕິບັດຄວາມຮັບຜິດຊອບເປັນແບບຢ່າງຂອງສະມາຊິກພັກຢູ່ຫຼາຍບ່ອນບໍ່ເປັນລະບຽບແບບແຜນ, ຍັງບໍ່ທັນກາຍເປັນສະຕິຕື່ນຕົວ. ການປ່ຽນແປງໃໝ່ແບບວິທີການນຳພາ, ກຳອຳນາດຂອງພັກຍັງບໍ່ທັນບັນລຸປະສິດທິຜົນສູງ; ການກຳນົດບົດບາດນຳພາລວມໝູ່ແລະບຸກຄົນຮັບຜິດຊອບນັ້ນ ຍັງມີບາງຈຸດທີ່ບໍ່ຈະແຈ້ງ; ການປະຕິບັດການຄວບຄຸມອຳນາດແມ່ນບໍ່ດີ. ກົນໄກ “ພັກນຳພາ, ລັດຄຸ້ມຄອງ, ປະຊາຊົນເປັນເຈົ້າຂອງ” ຖືກຊັກຊ້າໃນການຫັນເປັນນິຕິກຳແບບຄົບຊຸດ. ການຄຸ້ມຄອງເສດຖະກິດ-ສັງຄົມຍັງມີຂໍ້ບົກພ້ອງຫຼາຍ, ມີຫຼາຍເລື່ອງຫຼາຍກໍລະນີຖືກແກ່ຍາວ, ຊ້າໃນການຈັດການແກ້ໄຂ ເຊິ່ງກໍ່ໃຫ້ເກີດຄວາມຮ້ອນເຄືອງ ຄວາມລຳຄານໃຈໃນໝູ່ປະຊາຊົນ...
ຈາກສະພາບຄວາມເປັນຈິງແລະຜົນສຳເລັດຂອງວຽກງານກໍ່ສ້າງພັກແລະລະບົບການເມືອງໃນເວລາທີ່ຜ່ານມາ, ສາມາດຖອດຖອນໄດ້ ບົດຮຽນຈຳນວນໜຶ່ງ ດັ່ງຕໍ່ໄປນນີ້:
ທີ່ໜຶ່ງ, ການກໍ່ສ້າງພັກແລະລະບົບການເມືອງຕ້ອງບົນພື້ນຖານການຕັ້ງໝັ້ນໃນລັດທິມາກ-ເລນິນແລະແນວຄິດໂຮ່ຈີມິນ, ຕັ້ງໝັ້ນໃນເປົ້າໝາຍເອກະລາດແຫ່ງຊາດແລະລັດທິສັງຄົມນິຍົມ, ເສີມຂະຫຍາຍປະຊາທິປະໄຕສັງຄົມນິຍົມ. ການກໍ່ສ້າງພັກແລະລະບົບການເມືອງແມ່ນບັນຫາພື້ນຖານທີ່ສຸດຂອງການປ່ຽນແປງໃໝ່ການເມືອງ, ມັນກ່ຽວຂ້ອງກັບການຢູ່ລອດຂອງລະບອບການເມືອງ, ຕ້ອງບົນພື້ນຖານຢຶດໝັ້ນບັນຫາຫຼັກການເພື່ອໝູນໃຊ້ແລະປ່ຽນແປງໃໝ່ປະດິດສ້າງ. ການຢຶດໝັ້ນຫຼັກການ, ຫຼັກໝັ້ນແນວຄິດຕ້ອງໄປຄຽງຄູ່ກັບການຕໍ່ສູ້ຕ້ານແນວຄິດຮັກສາເດີມ, ຄວາມຫຼ້າຊ້າ; ການປ່ຽນແປງໃໝ່ປະດິດສ້າງຕ້ອງຕິດແໜ້ນກັບການຕ້ານການສວຍໂອກາດທາງການເມືອງ.
ທີສອງ, ແກ້ໄຂຢ່າງຖືກຕ້ອງສາຍພົວພັນລະຫວ່າງຄວາມໝັ້ນຄົງ, ການປ່ຽນແປງໃໝ່ແລະການພັດທະນາ, ລະຫວ່າງການປ່ຽນແປງໃໝ່ທາງດ້ານການເມືອງແລະການປ່ຽນແປງໃໝ່ທາງດ້ານເສດຖະກິດ. ການກໍ່ສ້າງພັກແລະລະບົບການເມືອງແມ່ນເນື້ອໃນຫຼັກແຫຼ່ງຂອງການປ່ຽນແປງໃໝ່ທາງດ້ານການເມືອງ, ກ່ຽວຂ້ອງໂດຍກົງກັບການຮັກສາສະຖຽນລະພາບທາງການເມືອງ-ສັງຄົມ, ສົ່ງຜົນກະທົບເຖິງທຸກດ້ານຂອງຊີວິດສັງຄົມ, ຕັດສິນຊີ້ຂາດອະນາຄົດຂອງພາລະກິດການປະຕິວັດ. ດັ່ງນັ້ນ, ການກໍ່ສ້າງພັກແລະລະບົບການເມືອງຕ້ອງໄດ້ດຳເນີນຢ່າງມີລະບຽບແບບແຜນແລະລະມັດລະວັງ, ຫຼີກລ້ຽງຄວາມຮ້ອນຮົນ ອັດຕະວິໄສ, ແຕ່ເມື່ອມີຫຼັກຖານໜັກແໜ້ນແມ່ນຕ້ອງມີຄວາມຕັດສິນໃຈສູງ, ມີຄວາມມານະພະຍາຍາມຫຼາຍແລະມີການກະທຳຢ່າງເດັດດ່ຽວ.
ທີສາມ, ປະສານສົມທົບລະຫວ່າງ “ສ້າງ” ແລະ “ຕ້ານ”, “ສ້າງ” ແມ່ນໜ້າທີ່ເປັນປະຈຳ, ພື້ນຖານແລະຍາວນານ, “ຕ້ານ” ແມ່ນໜ້າທີ່ສຳຄັນແລະຮີບດ່ວນ. “ສ້າງ” ແມ່ນໜ້າທີ່ເປັນປະຈຳ, ພື້ນຖານແລະຍາວນານ, ແມ່ນເລີ່ມຈາກຄວາມຕ້ອງການປັບປຸງບູລະນະລະບອບປະຊາທິປະໄຕສັງຄົມນິຍົມຢ່າງບໍ່ຢຸດຢັ້ງ, ຮັບປະກັນໃຫ້ພັກສົມກຽດກັບບົດບາດນຳພາ ແລະຄວາມຮັບຜິດຊອບກຳອຳນາດລັດທີ່ແມ່ນຂອງປະຊາຊົນ, ໂດຍປະຊາຊົນ ແລະເພື່ອປະຊາຊົນຢ່າງແທ້ຈິງ. “ຕ້ານ” ແມ່ນໜ້າທີ່ສຳຄັນແລະຮີບດ່ວນ, ເພາະວ່າ, ຕໍ່ໜ້າຫຼ່ຽມລາຍກົນອຸບາຍ “ຫັນປ່ຽນໂດຍສັນຕິ” ຂອງບັນດາອິດທິກຳລັງສັດຕູ ແລະ ສະພາບການເສື່ອມໂຊມທາງດ້ານແນວຄິດການເມືອງ ຄຸນສົມບັດສິນທຳ ແບບແຜນດຳລົງຊີວິດ, ປະກົດການ “ປ່ຽນແປງດ້ວຍຕົນເອງ”, “ຜັນປ່ຽນດ້ວຍຕົນເອງ” ຢູ່ພາຍໃນນັ້ນ, ຕ້ອງມີວິທີແກ້ໄຂທີ່ແຂງກ້າເດັດດ່ຽວ ເພື່ອກີດກັ້ນແລະຍູ້ຖອຍມັນ, ສ້າງສະພາບແວດລ້ອມໃຫ້ແກ່ການພັດທະນາຢ່າງຍືນຍົງ. ເຖິງວ່າຈະ "ສ້າງ" ຫຼື “ຕ້ານ” ກໍ່ຕ້ອງດຳເນີນຢ່າງຮອບຄອບ, ມີແບບແຜນ, ໜັກແໜ້ນ, ບໍ່ປ່ອຍໃຫ້ກຳລັງສັດຕູສວຍໂອກາດເພື່ອທຳລາຍ, ກໍ່ໃຫ້ເກີດຄວາມບໍ່ສະຫງົບທາງການເມືອງ.
ທີສີ່, ໄປຄຽງຄູ່ກັບການຮັກສາແລະເພີ່ມທະວີບົດບາດການນຳພາຂອງພັກ ຕ້ອງເຄົາລົບແລະເສີມຂະຫຍາຍຢ່າງເຕັມສ່ວນຄວາມຕັ້ງໜ້າຂອງບັນດາອົງການຈັດຕັ້ງສະມາຊິກໃນລະບົບການເມືອງ. ການຮັກສາແລະເພີ່ມທະວີບົດບາດການນຳພາຂອງພັກແມ່ນບັນຫາທີ່ມີລັກສະນະຫຼັກການ, ແມ່ນປັດໄຈຕັດສິນຊີ້ຂາດທີ່ຮັບປະກັນຄວາມສຳເລັດຂອງການກໍ່ສ້າງພັກແລະລະບົບການເມືອງ. ພັກແມ່ນແກນນຳບັນດາອົງການຈັດຕັ້ງສະມາຊິກໃນລະບົບການເມືອງ, ແຕ່ພັກບໍ່ອຸ້ມວຽກເຮັດຕາງໃຫ້ອົງການອື່ນ, ເຊິ່ງພັກຕ້ອງເອົາໃຈໃສ່ເຖິງການເສີມຂະຫຍາຍບົດບາດເປັນເຈົ້າການຕັ້ງໜ້າໃນການຄຸ້ມຄອງ, ຈັດການບໍລິຫານຂອງລັດ ແລະ ການຕິດຕາມກວດກາ, ການວິຈານສັງຄົມຂອງແນວໂຮມປະເທດຊາດຫວຽດນາມ ແລະບັນດາອົງການຈັດຕັ້ງການເມືອງ-ສັງຄົມ.
ທີຫ້າ, ລະດົມ, ດຶງດູດແລະເສີມຂະຫຍາຍບົດບາດຂອງປະຊາຊົນໃນການເຂົ້າຮ່ວມການກໍ່ສ້າງພັກແລະລະບົບການເມືອງ, ຕ້ອງ “ນຳເອົາການເມືອງເຂົ້າໃນໝູ່ປະຊາຊົນ”(2). ການປະຕິວັດແມ່ນພາລະກິດຂອງປະຊາຊົນ, ໂດຍປະຊາຊົນແລະເພື່ອປະຊາຊົນ. ການກໍ່ສ້າງພັກແລະລະບົບການເມືອງ ບໍ່ແມ່ນວຽກງານສ່ວນຕົວຂອງພະນັກງານ ສະມາຊິກພັກ, ແຕ່ຕ້ອງລະດົມແລະດຶງດູດປະຊາຊົນເຂົ້າຮ່ວມດ້ວຍກົນໄກ, ຮູບແບບທີ່ສອດຄ່ອງ, ນັບແຕ່ການປະກອບສ່ວນສະຕິປັນຍາຈົນເຖິງຊັບສິນ, ນັບແຕ່ການເຂົ້າຮ່ວມການຄຸ້ມຄອງລັດຈົນເຖິງການກວດກາແລະຕິດຕາມກວດກາ. ມີຫຼາຍວິທີຮູບແບບເສີມຂະຫຍາຍສິດເປັນເຈົ້າຂອງຂອງປະຊາຊົນ, ໃນນັ້ນຕ້ອງເອົາໃຈໃສ່ເປັນພິເສດເຖິງບົດບາດຂອງແນວໂຮມປະເທດຊາດຫວຽດນາມ ແລະ ບັນດາອົງການຈັດຕັ້ງການເມືອງ-ສັງຄົມ.
ຜົນສຳເລັດທີ່ບັນລຸໄດ້ໃນເວລາທີ່ຜ່ານມາໄດ້ເພີ່ມທະວີບົດບາດນຳພາແລະຍົກສູງອິດທິພົນຂອງພັກຕໍ່ໜ້າປະຊາຊົນ, ສ້າງພື້ນຖານແລະປະຖົມປັດໄຈເພື່ອຍູ້ແຮງການກໍ່ສ້າງພັກໃນເວລາຕໍ່ໜ້າ. ແຕ່ສະພາບການໂລກພວມປ່ຽນແປງຢ່າງໄວວາ, ສັບສົນ, ຄາດເດົາຍາກ. ສະພາບການໃນທະເລຕາເວັນອອກມີຄວາມສັບສົນຍິ່ງຂຶ້ນ. ຄວາມຂັດແຍ້ງລະຫວ່າງບັນດາປະເທດໃຫຍ່ໃນພາກພື້ອາຊີ-ປາຊີຟິກ, ການປະທະກັນທາງການຄ້າ, ການເຄື່ອນໄຫວປົກປ້ອງການຄ້າ, ລັດທິປະຊາລາດນິຍົມ, ກົນອຸບາຍ “ຫັນປ່ຽນໂດຍສັນຕິ” ຂອງບັນດາອິດທິກຳລັງສັດຕູ ແລະ ສິ່ງທ້າທາຍຕ່າງໆຈາກຄວາມໝັ້ນຄົງທີ່ບໍ່ເປັນແບບດັ້ງເດີມ ໄດ້ມີຄວາມຮຸນແຮງເພີ່ມຂຶ້ນເລື່ອຍໆ. ຄຸນນະພາບຂອງລະບຽບກົດໝາຍ, ນະໂຍບາຍ, ຊັບພະຍາກອນມະນຸດ ຍັງມີຊ່ອງວ່າງຈາກຄວາມຕ້ອງການຂອງຄວາມເປັນຈິງ. ບັນດາປະກົດການຫຍໍ້ທໍ້, ອາດຍາສິດ, ສໍ້ລາດບັງຫຼວງ, “ຜົນປະໂຫຍດໝູ່ພວກ”, ຄວາມເສື່ອມໂຊມທາງດ້ານແນວຄິດການເມືອງ ຄຸນສົມບັດສິນທຳ ແບບແຜນດຳລົງຊີວັດ, “ການປ່ຽນແປງດ້ວຍຕົນເອງ”, “ການຜັນປ່ຽນດ້ວຍຕົນເອງ” ໃນພະນັກງານສະມາຊິກພັກ,... ແມ່ນສິ່ງທ້າທາຍຕໍ່ກິດຈະການກໍ່ສ້າງພັກແລະລະບົບການເມືອງໃຫ້ສະອາດປອດໃສແລະໝັ້ນຄົງເຂັ້ມແຂງ.
ບັນດາໂອກາດແລະສິ່ງທ້າທາຍທີ່ກ່າວມາເຖິງນີ້ຮຽກຮ້ອງໃຫ້ພັກກອມມູນິດຫວຽດນາມຕ້ອງເອົາໃຈໃສ່ເປັນພິເສດເຖິງການເພີ່ມທະວີວຽກງານກໍ່ສ້າງພັກແລະລະບົບການເມືອງໃຫ້ທຽບເທົ່າກັບລະດັບໜ້າທີ່ໃນໄລຍະໃໝ່. ໃນນັ້ນ, ຕ້ອງສຸມໃສ່ບັນດາທິດທາງໃຫຍ່ດັ່ງຕໍ່ໄປນີ້:
ທີໜຶ່ງ, ສືບຕໍ່ການກໍ່ສ້າງພັກໃຫ້ເຂັ້ມແຂງທາງດ້ານການເມືອງ. ບົນພື້ນຖານກຳແໜ້ນທາດແທ້ວິທະຍາສາດແລະປະຕິວັດຂອງລັດທິມາກ-ເລນິນ, ແນວຄິດໂຮ່ຈີມິນ, ຕັ້ງໝັ້ນໃນເປົ້າໝາຍເອກະລາດແຫ່ງຊາດແລະລັດທິສັງຄົມນິຍົມ, ຕິດແໜ້ນກັບພາກພຶດຕິກຳເພື່ອວາງແນວທາງການເມືອງທີ່ຖືກຕ້ອງແລະສະຫຼາດສ່ອງໃສ. ແນວທາງການເມືອງຕ້ອງເປັນການທ້ອນໂຮມສະຕິປັນຍາຂອງທົ່ວພັກ, ທົ່ວປວງຊົນ; ແມ່ນໝາກຜົນຂອງການສະຫຼຸບສັງລວມພຶດຕິກຳແລະການຄົ້ນຄວ້າທິດສະດີ, ຮັບປະກັນຄວາມເປັນເອກະພາບລະຫວ່າງທິດສະດີແລະພຶດຕິກຳ; ສ່ອງແສງເຈດຈຳນົງແລະຄວາມປາຖະໜາຂອງປະຊາຊົນ. ຄວາມຖືກຕ້ອງ, ປະດິດສ້າງຂອງແນວທາງໃນໄລຍະໃໝ່ສະແດງອອກຢູ່ໃນການປຸກຕື່ນແລະເສີມຂະຫຍາຍກຳລັງແຮງຂອງປວງຊົນທັງຊາດ, ສ້າງການບຸກທະລຸເພື່ອເຮັດໃຫ້ປະເທດຊາດພັດທະນາຢ່າງໄວວາແລະຍືນຍົງ, ປົກປັກຮັກສາປະເທດຊາດຫວຽດນາມສັງຄົມນິຍົມຢ່າງໝັ້ນຄົງ, ຍົກສູງຊີວິດດ້ານວັດຖຸແລະຈິດໃຈຂອງປະຊາຊົນ. ການຕັ້ງໝັ້ນໃນເປົ້າໝາຍແລະອຸດົມຄະຕິຂອງພັກຕ້ອງຕິດແໜ້ນກັບການຝຶກຝົນຫຼໍ່ຫຼອມຄວາມກ້າແກ່ນການເມືອງ, ຫຼັກໝັ້ນຊົນຊັ້ນ, ຫຼໍ່ລ້ຽງຄວາມມຸ່ງໝັ້ມບືນຕົວຂຶ້ນ, ເມື່ອມີຄວາມສະດວກບໍ່ອັດຕະວິໄສ, ເມື່ອປະສົບຄວາມຫຍຸ້ງຍາກບໍ່ຫວັ່ນໄຫວ, ເປັນແບບຢ່າງນຳໜ້າຢ່າງແທ້ຈິງ, ສົມກຽດກັບບົດບາດນຳພາແລະຄວາມຮັບຜິດຊອບກຳອຳນາດການປົກຄອງ.
ທີສອງ, ປ່ຽນແປງໃໝ່ວຽກງານແນວຄິດທິດສະດີຢ່າງແຂງແຮງ. ສືບຕໍ່ປ່ຽນແປງໃໝ່ເນື້ອໃນແລະແບບວິທີການເຮັດວຽກດ້ານແນວຄິດຮັບປະກັນວິທະຍາສາດ, ແທດຈິງ, ທັນການ ແລະມີປະສິດທິຜົນ; ຍົກສູງລັກສະນະການຕໍ່ສູ້, ລັກສະນະຊວນເຊື່ອໃນການໂຄສະນາເຜີຍແຜ່ແລະສຶກສາອົບຮົມລັດທິມາກ - ເລນິນ, ແນວຄິດໂຮ່ຈີມິນ, ໂຄງການການເມືອງ, ແນວທາງຂອງພັກ, ນະໂຍບາຍ ກົດໝາຍຂອງລັດ. ເອົາໃຈໃສ່ເປັນສຳຄັນເຖິງການເອົາແບບຢ່າງ “ວຽກດີ ຄົນເດັ່ນ” ເພື່ອໂຄສະນະເຜີນແຜ່, ສຶກສາອົບຮົມ, ສ້າງຜົນກະທົບໃນທາງບວກ, ປ້ອງກັນແລະແກ້ໄຂສະຖານະການເສື່ອມໂຊມທາງດ້ານແນວຄິດການເມືອງ ຄຸນສົມບັດສິນທຳ ແບບແຜນດຳລົງຊີວິດ, ປະກົດການ “ປ່ຽນແປງດ້ວຍຕົນເອງ”, “ຜັນປ່ຽນດ້ວຍຕົນເອງ”. ຮັບປະກັນຄວາມໝັ້ນຄົງ, ຄວາມປອດໄພຂອງເຄືອຂ່າຍ, ປ້ອງກັນຂ່າວປອມ ຂ່າວຮ້າຍຢ່າງທັນການ. ເພີ່ມທະວີການປົກປັກຮັກສາພື້ນຖານແນວຄິດຂອງພັກ, ຕໍ່ສູ້ຕ້ານທັດສະນະທີ່ບໍ່ຖືກຕ້ອງ ຕ້ານຄວາມຄິດປໍລະປັກແລະການສວຍໂອກາດທາງການເມືອງ, ເອົາຊະນະກົນອຸບາຍ “ຫັນປ່ຽນໂດຍສັນຕິ” ຂອງບັນດາອິດທິກຳລັງສັດຕູ. ປ່ຽນແປງໃໝ່ຈິນຕະນາການທິດສະດີ, ສືບຕໍ່ທຳຄວາມກະຈ່າງແຈ້ງບັນດາບັນຫາທິດສະດີ-ພຶດຕິກຳທີ່ເກີດຂຶ້ນໃນຂະບວນວິວັດການປ່ຽນແປງໃໝ່ແລະເຊື່ອມໂຍງສາກົນ, ແກ້ໄຂຜ່ານຜ່າໂດຍໄວຂໍ້ບົກພ່ອງຈຳນວນໜຶ່ງຂອງວຽກງານສະຫຼຸບສັງລວມພຶດຕິກຳ, ຄົ້ນຄວ້າທິດສະດີ ເພື່ອສະໜອງຫຼັກຖານວິທະຍາສາດໃຫ້ແກ່ການສ້າງສາພັດທະນາປະເທດໃນໄລຍະໃໝ່.
ທີສາມ, ປ່ຽນແປງໃໝ່ວຽກງານການຈັດຕັ້ງແລະວຽກງານພະນັກງານ. ສືບຕໍ່ປັບປຸງແລະສັບຊ້ອນກົງຈັກການຈັດຕັ້ງຂອງພັກ ແລະລະບົບການເມືອງຕາມທິດກະທັດລັດເບົາບາງ, ເຄື່ອນໄຫວຢ່າງມີປະສິດທິພາບແລະປະສິດທິຜົນ. ກວດຄືນ, ປັບປຸງເພີ່ມເຕີມ, ບູລະນະພາລະບົດບາດ, ໜ້າທີ່, ສິດຂອບເຂດ, ຄວາມຮັບຜິດຊອບ, ສາຍພົວພັນການງານຂອງຄະນະພັກ, ອຳນາດການປົກຄອງຂັ້ນຕ່າງໆ, ຮັບປະກັນສາຍພົວພັນ “ພັກນຳພາ, ລັດຄຸ້ມຄອງ, ປະຊາຊົນເປັນເຈົ້າຂອງ”; ກຳນົດແຈ້ງສິດຂອບເຂດ, ແກ້ໄຂຜ່ານຜ່າສະພາບການພັກອຸ້ມວຽກເຮັດຕາງໃຫ້ລັດ ຫຼືປ່ອຍປະລະຫຼວມໃນການນຳພາ. ກໍ່ສ້າງຖັນແຖວພະນັກງານຂັ້ນຕ່າງໆ, ໂດຍສະເພາະພະນັກງານນຳພາຂັ້ນຍຸດທະສາດ ໃຫ້ມີຄຸນສົມບັດ, ຄວາມສາມາດແລະກຽດສັກສີຢ່າງພຽງພໍ, ທຽບເທົ່າກັບໜ້າທີ່. ຍົກສູງຄວາມສາມາດນຳພາແລະກຳລັງແຮງສູ້ຮົບຂອງອົງການຈັດຕັ້ງພັກ, ເຮັດວຽກງານສະມາຊິກພັກແລະການປົກປ້ອງການເມືອງພາຍໃນໃຫ້ໄດ້ເປັນຢ່າງດີ. ປັບປຸງຂໍ້ກຳນົດກົດລະບຽບໃຫ້ສົມບູນ, ກຳນົດແຈ້ງບົດບາດນຳພາລວມໝູ່ແລະຄວາມຮັບຜິດຊອບສ່ວນບຸກຄົນ, ໂດຍສະເພາະຄວາມຮັບຜິດຊອບຂອງຫົວໜ້າຄະນະພັກ, ຫົວໜ້າສຳນັກງານອົງການຈັດຕັ້ງ. ກັ່ນກອງ, ປ່ຽນແທນບັນດາກໍລະນີທີ່ເສື່ອມໂຊມປ່ຽນທາດ, ບໍ່ສຳເລັດໜ້າທີ່, ລະເມີດລະບຽບວິໄນຂອງພັກແລະກົດໝາຍຂອງລັດ.
ທີສີ່, ເພີ່ມທະວີການຝຶກຝົນຫຼໍ່ຫຼອມຄຸນສົມບັດປະຕິວັດ, ຕ້ານລັດທິເອກະຊົນ, ສວຍໂອກາດນິຍົມ, ອັດຖະປະໂຫຍດ, “ຜົນປະໂຫຍດໝູ່ພວກ”. ເອົາໃຈໃສ່ເປັນສຳຄັນເຖິງການກໍ່ສ້າງພັກທາງດ້ານຄຸນສົມບັດສິນທຳເພື່ອໃຫ້ພັກເປັນ “ຈະລິຍະທຳແລະອາລະຍະທຳ”. ປູກຈິດສຳນຶກໃນການຫຼໍ່ຫຼອມຄຸນສົມບັດປະຕິວັດຕະຫຼອດຊີວິດ; ປັບປຸງຄວາມຕ້ານທານກັບການລໍ້ລວງທຸກຢ່າງ; ມີຄວາມເປັນເອກະພາບລະຫວ່າງແນວຄິດແລະການກະທຳ, ລະຫວ່າງການເວົ້າແລະການເຮັດ; ຮັກສາສະຕິໃນການ "ການກວດກາຕົນເອງ", “ການແກ້ໄຂຕົນເອງ" ບົນພື້ນຖານຍູ້ແຮງການຕິຊົມຕົນເອງແລະຕິຊົມ, ຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ. ປັບປຸງລະບອບການປະຕິບັດຄຸນສົມບັດປະຕິວັດຢ່າງຕື່ນຕົວແລະເປັນລະບຽບຮຽບຮ້ອຍ. ປະຕິບັດຂໍ້ກຳນົດກ່ຽວກັບການເປັນແບບຢ່າງຢ່າງເຂັ້ມງວດ; ພະນັກງານມີຕຳແໜ່ງຍິ່ງສູງ, ຍິ່ງຕ້ອງເປັນແບບຢ່າງ, ກ່ອນອື່ນໝົດແມ່ນກຳມະການກົມການເມືອງ, ກຳມະການຄະນະເລຂາທິການ, ກຳມະການຄະນະບໍລິຫານງານສູນກາງພັກ. ຕັ້ງໜ້າຕໍ່ສູ້ຕ້ານລັດທິເອກະຊົນ, ພະຍາດສວຍໂອກາດ ອັດຖະປະໂຫຍດສ່ວນຕົວ, “ຜົນປະໂຫຍດໝູ່ພວກ”. ຈັດການກັບການລະເມີດມາດຕະຖານທາງຈະລິຍະທຳຂອງສະມາຊິກພັກຢ່າງເຂັ້ມງວດ, ພ້ອມກັນກັບການຍ້ອງຍໍຊົມເຊີຍບັນດາແບບຢ່າງຄຸນສົມບັດ ເພື່ອສ້າງຜົນສະທ້ອນແຜ່ກະຈາຍໃນພັກແລະສັງຄົມ.
ທີຫ້າ, ເພີ່ມທະວີການຄວບຄຸມອຳນາດ, ສົ່ງເສີມການມີລະບຽບວິໄນ, ຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ. ສ້າງການຫັນປ່ຽນຢ່າງແຂງແຮງໃນວຽກງານກວດກາ, ຕິດຕາມກວດກາ ແລະການປະຕິບັດລະບຽບວິໄນຂອງພັກ. ປັບປຸງຂໍ້ກຳນົດ ກົດໝາຍຮັບປະກັນຄວາມຄົບຊຸດລະຫວ່າງການກວດກາ, ຕິດຕາມກວດກາ, ລະບຽບວິໄນຂອງພັກ ກັບການກວດກາ, ກວດການ, ກວດສອບ ກວດບັນຊີຂອງລັດ ແລະ ການຕິດຕາມກວດກາຂອງສັງຄົມ. ສົມທົບລະຫວ່າງການປ້ອງກັນແລະການຈັດການກັບການລະເມີດວິໄນ. ປັບປຸງບູລະນະກົນໄກຄວບຄຸມອຳນາດສຳລັບຫົວໜ້າຄະນະພັກ, ຫົວໜ້າສຳນັກງານອົງການ, ກົມກອງ ໃນການປະຕິດບັດພາລະໜ້າທີ່, ຄວາມຮັບຜິດຊອບທີ່ໄດ້ຮັບມອບໝາຍ ແລະ ການຮັກສາຄຸນສົມບັດສິນທຳ ແບບແຜນດຳລົງຊີວິດ. ປ່ຽນແປງໃໝ່, ປັບປຸງການຈັດຕັ້ງກັງຈັກຂອງອົງການກວດກາ, ຕິດຕາມກວດກາ, ກວດສອບ, ກວດບັນຊີ, ສືບສວນ, ສອບສວນ, ພິຈາລະນາຄະດີ ໃຫ້ມີສິດອຳນາດພຽງພໍເພື່ອປົກປ້ອງກົດໝາຍ, ຮັກສາລະບຽບວິໄນໄວ້ຢ່າງໝັ້ນຄົມ. ຕໍ່ສູ້ຢ່າງເດັດດ່ຽວເພື່ອປ້ອງກັນແລະຕ້ານການສໍ້ລາດບັງຫຼວງ ການໃຊ້ຈ່າຍຟຸມເຟືອ ດ້ວການບູລະນະກົນໄກປ້ອງກັນ, ກີດກັ້ນແລະບົດລົງໂທດທີ່ເຂັ້ມງວດ ເພື່ອໃຫ້ພະນັກງານບໍ່ສາມາດສໍ້ລາດບັງຫຼວງ, ບໍ່ກ້າສໍ້ລາດບັງຫຼວງ ແລະ ບໍ່ຕ້ອງການສໍ້ລາດບັງຫຼວງ. ຍົກສູງຄວາມຮັບຜິດຊອງຂອງຜູ້ເປັນຫົວໜ້າຄະນະພັກ, ອຳນາດການປົກຄອງ, ສຳນັກງານອົງການ, ກົມກອງ ໃນການຕໍ່ສູ້ເພື່ອປ້ອງກັນແລະຕ້ານການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ.
ທີຫົກ, ສືບຕໍ່ປ່ຽນແປງໃໝ່ແລະບູລະນະລະບົບການເມືອງຕິດກັບການປ່ຽນແປງໃໝ່ແບບວິທີການນຳພາຂອງພັກ. ສຸມໃສ່ການຄົ້ນຄວ້າ, ປັບປຸງຮູບແບບໂດຍລວມ ຂອງລະບົບການເມືອງ. ກວດຄືນແລະປັບປຸງບູລະນະກົງຈັກຂອງລະບົບການເມືອງຕາມທິດກະທັດລັດເບົາບາງ, ແກ້ໄຂສະພາບການຊ້ຳຊ້ອນກັນທາງດ້ານພາລະບົດບາດ ໜ້າທີ່. ປ່ຽນແປງໃໝ່ແບບວິທີການນຳພາຂອງພັກຕໍ່ລັດຢ່າງແຂງແຮງ, ເພີ່ມທະວີຄວາມສາມາດກຳອຳນາດ, ບໍ່ປ່ອຍປະລະເຫຼີງການນຳພາ, ບໍ່ອຸ້ມວຽກເຮັດຕາງ, ເຄົາລົບບົດບາດເປັນເຈົ້າການຂອງລັດໃນການຄຸ້ມຄອງບໍລິຫານ, ປະຕິບັດຕາມກົດໝາຍ. ກໍ່ສ້າງແລະປັບປຸງລັດແຫ່ງອຳນາດກົດໝາຍສັງຄົມນິຍົມ, ຮັບປະກັນຄວາມຄົບຊຸດລະຫວ່າງຂົງເຂດນິຕິບັນຍັດ, ການບໍລິຫານ ແລະຕຸລາການ, ອຳນາດການປົກຄອງສູງການແລະອຳນາດການປົກຄອງທ້ອງຖິ່ນ; ເຊີດຊູພາລະກິດຮັບໃຊ້ປະຊາຊົນ; ຊີ້ແຈ້ງການພົວພັນລະຫວ່າງລັດ, ຕະຫຼາດແລະສັງຄົມ. ປັບປຸງການຈັດຕັ້ງກົງຈັກຂອງສະພາແຫ່ງຊາດ, ຍົກສູງຄວາມເປັນມືອາຊີບ, ຄຸນນະພາບການເຄື່ອນໄຫວສ້າງກົດໝາຍ, ການຕິດຕາມກວດກາສູງສຸດ ແລະ ການຕັດສິນຕົກລົງບັນດາບັນຫາທີ່ສຳຄັນຂອງປະເທດ. ຍູ້ແຮງການປະຕິຮູບການບໍລິຫານ, ກໍ່ສ້າງລະບົບການບໍລິຫານທີ່ຊື່ສັດ, ຂະຫຍັນຂັນເຄື່ອນ, ຮັບໃຊ້ປະຊາຊົນແລະວິສາຫະກິດ. ປ່ຽນແປງໃໝ່ແບບວິທີການນຳພາຂອງພັກຕໍ່ແນວໂຮມປະເທດຊາດຫວຽດນາມ ແລະບັນດາອົງການຈັດຕັ້ງການເມືອງ-ສັງຄົມ, ເຄົາລົບຫຼັກການຂອງການເຈລະຈາແບບປະຊາທິປະໄຕໃນການເຄື່ອນໄຫວຂອງແນວໂຮມປະເທດຊາດຫວຽດນາມ ຕິດກັບການປັບປຸງການຈັດຕັ້ງກົງຈັກໃຫ້ກະທັດລັດເບົາບາງ, ຍົກສູງປະສິດທິຜົນໃນການເຕົ້າໂຮມ ຂົນຂວາຍແລະສາມັກຄີປະຊາຊົນ, ປະຕິບັດການຕິດຕາມກວດກາແລະວິຈານສັງຄົມ.
ທີເຈັດ, ເສີມຂະຫຍາຍບົດບາດຂອງປະຊາຊົນໃນການເຂົ້າຮ່ວມໃນການກໍ່ສ້າງພັກແລະລະບົບການເມືອງ, ເພີ່ມທະວີສາຍພົວພັນທີ່ສະໜິດແໜ້ນລະຫວ່າງພັກແລະລັດ ກັບປະຊາຊົນ. ຊາບຊຶມຢ່າງເລິກເຊິ່ງເຖິງທັດສະນະຂອງປະທານໂຮ່ຈີມິນທີ່ວ່າ: ການປະຕິວັດແມ່ນພາລະກິດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ; “ສິ່ງທີ່ມີປະໂຫຍດຕໍ່ປະຊາຊົນ, ພວກເຮົາຕ້ອງເຮັດຈົນສຸດຄວາມສາມາດ. ສິ່ງທີ່ເປັນອັນຕະລາຍຕໍ່ປະຊາຊົນ, ພວກເຮົາຕ້ອງພະຍາຍາມຫຼີກລ້ຽງ”; “ການນຳພາໃນວຽກງານຕົວຈິງທຸກຢ່າງຂອງພັກ, ແມ່ນຕ້ອງເກີດມາຈາກມະຫາຊົນ, ກັບຄືນສູ່ມະຫາຊົນ”(3). ປ່ຽນແປງໃໝ່ເນື້ອໃນແລະແບບວິທີການໂຄສະນາ ຂົນຂວາຍປະຊາຊົນຕາມທິດທາງແທດຈິງ, ຖືເອົາຄວາມຕ້ອງການແລະຜົນປະໂຫຍດອັນຊອບທຳຂອງປະຊາຊົນເປັນກຳລັງໜູນທີ່ສຳຄັນຂອງວຽກງານການຂົນຂວາຍແລະເຕົ້າໂຮມປະຊາຊົນ; ຫັນລົງສູ່ຮາກຖານ, ເອົາໃຈໃສ່ບັນດາປັດໄຈໃໝ່, ບັນດາວິທີເຮັດທີ່ປະດິດສ້າງ, ມີຜົນສະທ້ອນແຜ່ກະຈາຍຂະຫຍາຍກວ້າງ. ຍົກສູງຄວາມຮັບຜິດຊອງຂອງລະບົບການເມືອງທັງໝົດຕໍ່ວຽກງານຂົນຂວາຍປະຊາຊົນ, ສຸມໃສ່ເຮັດວຽກງານຂົນຂວາຍປະຊາຊົນຂອງອຳນາດການປົກຄອງໃຫ້ໄດ້ເປັນຢ່າງດີ, ເຊິ່ງຈຸດໜັກແມ່ນປັບປຸງກົນໄກ, ນະໂຍບາຍຕອບສະໜອງຄວາມຕ້ອງການແລະຄວາມປາຖະໜາອັນຊອບທຳ ຖືກກົດໝາຍຂອງປະຊາຊົນ, ປັບປຸງທ່າທີ່ແບບແຜນຮັບໃຊ້ປະຊາຊົນຂອງພະນັກງານ ລັດຖະກອນ, ແກ້ໄຂການພົວພັນຜົນປະໂຫຍດຢ່າງກົມກຽວ. ຍົກສູງປະສິດທິຜົນຂອງວຽກງານຕິດຕໍ່ກັບຜູ້ມີສິດເລືອກຕັ້ງ, ການຕິດຕາມກວດກາ, ການຕ້ອນຮັບປະຊາຊົນ, ການສົນທະນາ, ການແກ້ໄຂຄຳຮ້ອງທຸກ, ກ່າວປະນາມແລະຄຳຮ້ອງຟ້ອງຂອງປະຊາຊົນ. ຕໍ່ສູ້ຢ່າງແຂງແຮງກັບການສະແດງອອກຂອງຄວາມເພີກເສີຍ, ຄວາມບໍ່ຮູ້ສຶກເຫັນໃຈ, ຄວາມຈອງຫອງອ້າງຕຳແໜ່ງ, ການກໍ່ກວນຕໍ່ປະຊາຊົນ. ຕັ້ງໜ້າປ່ຽນແປງໃໝ່ເນື້ອໃນແລະແບບວິທີການເຄື່ອນໄຫວຂອງແນວໂຮມປະເທດຊາດຫວຽດນາມ ແລະ ບັນດາອົງການຈັດຕັ້ງການເມືອງ-ສັງຄົມ ຮັບປະກັນການເຄື່ອນໄຫວມີຈຸດໜັກໃຈກາງ, ແທດຈິງ, ມີປະສິດທິຜົນ ເພື່ອປົກປ້ອງສິດຜົນປະໂຫຍດອັນຊອບທຳ, ຖືກກົດໝາຍຂອງປະຊາຊົນ./.
-------------
(1) ລັດຖະທຳມະນູນປະເທດສາທາລະນະລັດສັງຄົມນິຍົມຫວຽດນາມ, ສພຈ. ແຮງງານ, ຮ່າໂນ້ຍ, 2014, ໜ້າ 12.
(2) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ, ຮ່າໂນ້ຍ, 1995, ເຫຼັ້ມ 5, ໜ້າ 698.
(3) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິດ, ຮ່າໂນ້ຍ, 2011, ເຫຼັ້ມ 5, ໜ້າ 330.
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 930 (ເດືອນພະຈິກ 2019)