ພົນເອກ ຫວໍ ງວຽນ ຢ້າບ - ອັດສະລິຍະທາງການທະຫານ, “ອ້າຍໃຫຍ່”
ຂອງກອງທັບປະຊາຊົນຫວຽດນາມ, ຜູ້ນຳທີ່ມີກຽດສັກສີຍິ່ງໃຫຍ່ຂອງພັກ ລັດ
ແລະປະຊາຊົນຫວຽດນາມ, ນັກຮຽນດີເດັ່ນຂອງປະທານໂຮ່ຈີມິນ*
ຂອງກອງທັບປະຊາຊົນຫວຽດນາມ, ຜູ້ນຳທີ່ມີກຽດສັກສີຍິ່ງໃຫຍ່ຂອງພັກ ລັດ
ແລະປະຊາຊົນຫວຽດນາມ, ນັກຮຽນດີເດັ່ນຂອງປະທານໂຮ່ຈີມິນ*
ຄຳນຳຂອງກອງບັນນາທິການ: ວັນທີ 22 ທັນວາປີ 2021, ຄະນະບໍລິຫານງານສູນກາງພັກ, ສະພາແຫ່ງຊາດ, ປະທານປະເທດ, ລັດຖະບານ, ຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ແຂວງກວ໋າງບິ່ງ ໄດ້ຈັດຕັ້ງພິທີສະເຫຼີມສະຫຼອງວັນຄ້າຍວັນເກີດຂອງພົນເອກ ຫວໍ ງວຽນ ຢ້າບ ຄົບຮອບ 110 ປີ (25 ສິງຫາ 1911 – 25 ສິງຫາ 2021) ຂຶ້ນຢ່າງສົມກຽດ. ຕາງໜ້າການນຳພັກແລະລັດ, ສະຫາຍ ຟ້າມມິງຈິ້ງ, ກຳມະການກົມການເມືອງ, ນາຍົກລັດຖະມົນຕີແຫ່ງສາທາລະນະລັດສັງຄົມນິຍົມຫວຽດນາມ ໄດ້ກ່າວສຸນທອນພົດໃນພິທີ. ວາລະສານກອມມູນິດຂໍເປັນກຽດໄດ້ແນະນຳ ຂໍ້ຄວາມເຕັມຂອງສຸນທອນພົດທີ່ສໍາຄັນນີ້.
ໃນບັນຍາກາດອັນສະຫງ່າລາສີຂອງການສະເຫຼີມສະຫຼອງ ວັນສ້າງຕັ້ງກອງທັບປະຊາຊົນຫວຽດນາມວິລະຊົນ ຄົບຮອບ 77 ປີ, ວັນບຸນປ້ອງກັນປະເທດທົ່ວປວງຊົນຄົບຮອບ 32 ປີ ແລະ ກະກຽມຕ້ອນຮັບປີໃໝ່ປີ 2022, ມື້ນີ້, ໃນບ້ານເກີດເມືອງນອນແຂວງກວາງບິ່ງ - ເຂດດິນແດນແຫ່ງອັດສະລິຍະທີ່ມີປະຫວັດສາດອັນຍາວນານ ແລະ ມູນເຊື້ອປະຕິວັດອັນສະຫງ່າງາມ - ພວກເຮົາສະເຫຼີມສະຫຼອງວັນຄ້າຍວັນເກີດຄົບຮອບ 110 ປີຂອງສະຫາຍພົນເອກ ຫວໍ ງວຽນ ຢ້າບ, ອາດີດກຳມະການກົມການເມືອງ, ອາດີດເລຂາທິການຄະນະພັກການທະຫານສູນກາງ, ອາດີດຮອງນາຍົກລັດຖະມົນຕີຜູ້ປະຈຳການລັດຖະບານ, ອາດີດລັດຖະມົນຕີກະຊວງປ້ອງກັນປະເທດ, ຜູ້ບັນຊາການໃຫຍ່ກອງທັບປະຊາຊົນຫວຽດນາມ, ຜູ້ແທນສະພາແຫ່ງຊາດຕັ້ງແຕ່ສະໄໝທີ 1 ຫາສະໄໝທີ 7; ຜູ້ນຳທີ່ມີກຽດສັກສີຍິ່ງໃຫຍ່ຂອງພັກ ລັດ ແລະ ປະຊາຊົນເຮົາ, ນັກຮຽນທີ່ດີເດັ່ນແລະໃກ້ຊິດຂອງປະທານໂຮ່ຈີມິນຜູ້ຍິ່ງໃຫຍ່; ນັກຮົບປະຕິວັດທີ່ຕັ້ງຕໍ່ບໍລິສຸດ; ພົນເອກຄົນທຳອິດຂອງກອງທັບປະຊາຊົນຫວຽດນາມ.
ຕາງໜ້າການນຳພັກແລະລັດ, ຂ້າພະເຈົ້າຂໍສະແດງຄວາມຄຳນັບຊົມເຊີຍອັນອົບອຸ່ນ ແລະ ຂໍຝາກຄວາມຮັກແພງສະໜິດສະໜົມແລະຄຳອວຍພອນໄຊອັນປະເສີດ ມາຍັງບັນດາສະຫາຍການນຳ, ອາດີດການນຳຂອງພັກ ລັດ ແນວໂຮມປະເທດຊາດຫວຽດນາມ, ບັນດານັກປະຕິວັດອາວຸໂສ, ບັນດາແມ່ວິລະຊົນຫວຽດນາມ, ບັນດາວິລະຊົນຂອງກອງກຳລັງປະກອບອາວຸດປະຊາຊົນ, ວິລະຊົນແຮງງານ, ບັນດາຜູ້ແທນ, ແຂກຜູ້ມີກຽດ, ຄອບຄົວຂອງພົນເອກ ຫວໍ ງວຽນ ຢ້າບ ພ້ອມດ້ວຍພີ່ນ້ອງຮ່ວມຊາດ ແລະ ສະຫາຍທັງຫຼາຍ.
ສະຫາຍພົນເອກ ຫວໍ ງວຽນ ຢ້າບ ເກີດວັນທີ 25 ສິງຫາປີ 1911 ຢູ່ທີ່ຕາແສງ ລົກຖວີ, ເມືອງເລ້ຖວີ, ແຂວງກວ໋າງບິ່ງ. ໂດຍເກີດໃນຄອບຄົວຂົງຈື້ ທີ່ອຸດົມໄປດ້ວຍປະເພນີຮັກຊາດ, ຊົນນະບົດທີ່ອຸດົມໄປດ້ວຍປະເພນີທາງປະຫວັດສາດ ວັດທະນະທໍາ ແລະ ການປະຕິວັດ, ໂດຍໄວສະຫາຍໄດ້ມີນ້ຳໃຈຮັກຊາດອັນແຮງກ້າ ແລະ ຄວາມຮັກແພງປະຊາຊົນຢ່າງສຸດຊຶ້ງ. ຕັ້ງແຕ່ອາຍຸຍັງນ້ອຍ, ໂດຍໄດ້ເຫັນກັບຕາສະພາບທີ່ພີ່ນ້ອງຮ່ວມຊາດຖືກກົດຂີ່ຂູດຮີດ ແລະ ການຂົ່ມເຫັງເຕັງເຕັກ ຂອງພວກລ່າເມືອງຂຶ້ນ ແລະ ລູກແຫຼ້ງຕີມມືຂອງພວກເຂົາ, ບໍ່ດົນສະຫາຍໄດ້ຈູດປະກາຍຈິດໃຈປະຕິວັດ ແລະ ເຈດຈຳນົງຕໍ່ສູ້ປົດປ່ອຍຊາດ. ເມື່ອອາຍຸໄດ້ 14 ປີ, ສະຫາຍໄດ້ມີຄວາມຕື່ນຕົວ ແລະ ເຂົ້າຮ່ວມການເຄື່ອນໄຫວປະຕິວັດ.
ຕັ້ງແຕ່ເວລາຍັງເປັນນັກຮຽນ, ໂດຍໄດ້ດູດຊຶມແນວຄິດປະຕິວັດຂອງຜູ້ນຳ ຫງວຽນອ໋າຍ ກວັກ, ສະຫາຍໄດ້ເຂົ້າຮ່ວມບັນດາການເຄື່ອນໄຫວແຫ່ຂະບວນປະທ້ວງ ຢູ່ໂຮງຮຽນແຫ່ງຊາດເຫວ້ ຢ່າງແຂງຂັນ. ປີ 1927, ສະຫາຍເຂົ້າຮ່ວມພັກປະຕິວັດເຕິນຫວຽດ - ອົງການຕັ້ງຕົ້ນໜຶ່ງຂອງພັກກອມມູນິດອິນດູຈີນ, ປະຈຸບັນແມ່ນພັກກອມມູນິດຫວຽດນາມ. ປີ 1936, ສະຫາຍເຂົ້າຮ່ວມຂະບວນການປະຊາທິປະໄຕຂອງພັກຢູ່ຮ່າໂນ້ຍ ແລະ ເປັນບັນນາທິການຂອງໜັງສືພິມສະບັບຕ່າງໆຂອງພັກເຊັ່ນ: “ສຽງຂອງພວກເຮົາ”, “ກ້າວຂຶ້ນ”, “ລວບລວມ”, “ເວລາ”, “ຂ່າວ”…; ເຂົ້າຮ່ວມຂະບວນການກອງປະຊຸມໃຫຍ່ອິນດູຈີນ ແລະໄດ້ຮັບເລືອກເປັນປະທານຄະນະກຳມະການຂ່າວຕັງເກ່໋ຍ.
ຕົ້ນຊຸມປີສີ່ສິບຂອງສະຕະວັດທີ 20, ໄດ້ຮັບການແນະນຳ ແລະ ມອບໝາຍໜ້າທີ່ໂດຍຜູ້ນຳ ຫງວຽນ ອ໋າຍ ກວັກ - ໂຮ່ຈີມິນ, ສະຫາຍໄດ້ຕັ້ງໜ້າເຄື່ອນໄຫວປະຕິວັດ,ໃກ້ຊິດຕິດພັນກັບປະຊາຊົນ, ຕິດພັນກັບພື້ນທີ່, ສ້າງພື້ນຖານ, ເປີດຊຸດຮຽນຝຶກຊ້ອມການທະຫານຢູ່ຖານທີ່ໝັ້ນ ກາວ - ບັກ - ລ້າງ. ເດືອນທັນວາປີ 1944, ສະຫາຍໄດ້ຮັບມອບໝາຍຈາກຜູ້ນຳ ໂຮ່ຈີມິນ ໃຫ້ສ້າງຕັ້ງກອງກຳລັງໂຄສະນາປົດປ່ອຍຫວຽດນາມ ເຊິ່ງເປັນອົງການບັນພະບຸລຸດຂອງກອງທັບປະຊາຊົນຫວຽດນາມວິລະຊົນ.
ໃນຖານະຕຳແໜ່ງກຳມະການຄະນະບໍລິຫານງານສູນກາງ, ກຳມະການປະຈຳສູນກາງພັກກອມມູນິດອິນດູຈີນ, ສະມາຊິກຄະນະກຳມະການລຸກຮືຂຶ້ນແຫ່ງຊາດ, ສະມາຊິກຄະນະກຳມະການປົດປ່ອຍຊາດຫວຽດນາມ, ຜູ້ບັນຊາການກອງທັບປົດປ່ອຍຫວຽດນາມ, ສະຫາຍໄດ້ປະກອບສ່ວນສຳຄັນເຂົ້າໃນການຕັດສິນໃຈຍຸດທະສາດຂອງພັກ, ຊີ້ນຳບັນດາກອງກຳລັງປະກອບອາວຸດ ພ້ອມກັບປະຊາຊົນຫວຽດນາມທັງປະເທດ ຍາດເອົາໄຊຊະນະໃນການລຸກຮືຂຶ້ນປະຕິວັດເດືອນສິງຫາປີ 1945, ໃຫ້ກຳເນີດປະເທດສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນປະເທດສາທາລະນະລັດສັງຄົມນິຍົມຫວຽດນາມ.
ໃນ 9 ປີແຫ່ງການຕໍ່ສູ້ອັນຍືດເຍືອຍາວນານຕ້ານພວກລ່າເມືອງຂຶ້ນຝຣັ່ງຜູ້ຮຸກຮານ, ພາຍໃຕ້ການນຳພາຂອງພັກ ແລະ ປະທານໂຮ່ຈີມິນຜູ້ຍິ່ງໃຫຍ່, ສະຫາຍໄດ້ບັນຊາບັ້ນຮົບທີ່ສຳຄັນຫຼາຍຄັ້ງໂດຍກົງ. ໂດຍສະເພາະປີ 1954, ສະຫາຍໄດ້ຮັບຄວາມໄວ້ວາງໃຈຈາກພັກແລະປະທານໂຮ່ຈີມິນ ໃຫ້ບັງຄັບບັນຊາບັນດາກອງພົນໃຫຍ່ຂອງກອງທັບ ແລະ ບັນດາກອງກຳລັງໂດຍກົງ ໃນການໂຈມຕີກຸ່ມປ້ອມທີ່ໝັ້ນດ້ຽນບຽນຝູ, ຕີເອົາຊະນະກອງທັບມືອາຊີບຂອງນັກອານານິຄົມຝຣັ່ງ, ປະກອບສ່ວນພ້ອມກັບທົ່ວພັກ, ທົ່ວປວງຊົນ ແລະ ທົ່ວກອງທັບເຮົາ ຍາດເອົາໄຊຊະນະດ້ຽນບຽນຝູທີ່ “ມີຊື່ສຽງໂດ່ງດັງໃນ 5 ທະວີບ, ສັ່ນສະເທືອນໂລກ”, ບັງຄັບໃຫ້ພວກລ່າເມືອງຂຶ້ນຝຣັ່ງຕ້ອງເຊັນສັນຍາເຊີແນວ ໃນວັນທີ 20 ກໍລະກົດປີ 1954 ກ່ຽວກັບການຢຸດຕິສົງຄາມ, ຟື້ນຟູສັນຕິພາບຢູ່ອິນດູຈີນ.
ຫຼັງຈາກທີ່ພາກເໜືອຫວຽດນາມໄດ້ຮັບການປົດປ່ອຍ, ສະຫາຍໄດ້ພ້ອມກັບສູນກາງພັກນຳພາທົ່ວປວງຊົນ, ທົ່ວກອງທັບ ປະຕິບັດ 2 ວຽກງານຍຸດທະສາດໄປພ້ອມໆກັນຄື: ກໍ່ສ້າງ, ປົກປັກຮັກສາພາກເໜືອສັງຄົມນິຍົມ ແລະ ຍູ້ແຮງການປະຕິວັດຊາດ ປະຊາທິປະໄຕຢູ່ພາກໃຕ້; ຕີເອົາຊະນະເປັນລຳດັບ ບັນດາຍຸດທະສາດສົງຄາມຂອງຈັກກະພັດອາເມລິການຜູ້ຮຸກຮານ, ໄດ້ຮັບໄຊຊະນະອັນສະຫງ່າລາສີ ດ້ວຍຈຸດສູງຄື ບັ້ນຮົບໂຮ່ຈີມິນອັນເປັນປະຫວັດສາດໃນປີ 1975, ປົດປ່ອຍພາກໃຕ້ຢ່າງສົມບູນ, ເຕົ້າໂຮມດິນແດນປະເທດເຂົ້າເປັນປຶກແຜ່ນດຽວກັນ, ນຳທັງປະເທດກ້າວຂຶ້ນສູ່ລັດທິສັງຄົມນິຍົມ.
ປະເທດມີສັນຕິພາບແລະເປັນເອກະພາບ, ໃນຖານະຕໍາແໜ່ງເປັນເລຂາຄະນະພັກການທະຫານສູນກາງ (ຮອດປີ 1977), ລັດຖະມົນຕີກະຊວງປ້ອງກັນປະເທດ (ຮອດປີ 1980), ຮອງນາຍົກລັດຖະມົນຕີປະຈຳລັດຖະບານ (ຕັ້ງແຕ່ເດືອນມັງກອນປີ 1980 ຮອດເດືອນເມສາປີ 1981), ຮອງປະທານຄະນະລັດຖະມົນຕີ (ຕັ້ງແຕ່ເດືອນພຶດສະພາປີ 1981 ຮອດເດືອນທັນວາປີ 1986), ສະຫາຍໄດ້ພ້ອມກັບຄະນະນຳຂອງພັກ ລັດ ແລະ ກອງທັບ ນຳພາທົ່ວປວງຊົນ ແລະ ທົ່ວກອງທັບ ປະຕິບັດສອງໜ້າທີ່ຍຸດທະສາດກໍ່ສ້າງແລະ ປົກປັກຮັກສາປະເທດຊາດສັງຄົມນິຍົມ, ດຳເນີນຂະບວນການປ່ຽນແປງໃໝ່ປະເທດຊາດ.
ສະຫາຍເປັນກຳມະການຄະນະບໍລິຫານງານສູນກາງພັກຊຸດທີ 2, 3, 4, 5 ແລະ 6; ເປັນກຳມະການກົມການເມືອງສູນກາງພັກຊຸດທີ 2, 3 ແລະ 4; ເປັນຜູ້ແທນສະພາແຫ່ງຊາດຕັ້ງແຕ່ສະໄໝທີ່ 1 ເຖິງສະໄໝທີ 7. ສະຫາຍຍັງເປັນປະທານກິຕິມະສັກຂອງສະມາຄົມນັກຮົບເກົ່າຫວຽດນາມ; ປະທານກິຕິມະສັກຂອງບັນດາສະມາຄົມເຊັ່ນ: ສະມາຄົມປະຫວັດສາດຫວຽດນາມ, ສະມາຄົມສົ່ງເສີມການສຶກສາຫວຽດນາມ, ສະມາຄົມອາດີດຄູຫວຽດນາມ... ສະຫາຍໄດ້ຮັບລາງວັນຫຼຽນໄຊດາວຄຳ, ຫຼຽນໄຊໂຮ່ຈີມິນສອງຫຼຽນ, ຫຼຽນກາອາຍຸພັກ 70 ປີ ແລະ ລາງວັນອັນສູງສົ່ງອື່ນໆອີກຫຼາຍຢ່າງຂອງຫວຽດນາມ ແລະ ສາກົນ.
ສະຫາຍກຳມະການກົມການເມືອງ, ນາຍົກລັດຖະມົນຕີ ຟ້າມມິງຈິ້ງ ຢ້ຽມຊົມການວາງສະແດງຮູບພາບກ່ຽວກັບຊີວິດແລະພາລະກິດຂອງພົນເອກ ຫວໍ ງວຽນ ຢ້າບ _ພາບ: VGP
ສະຫາຍ ຫວໍ ງວຽນ ຢ້າບ ເປັນພົນເອກ, ຜູ້ບັງຄັບບັນຊາການໃຫຍ່ທຳອິດຂອງກອງທັບປະຊາຊົນຫວຽດນາມ. ສະຫາຍໄດ້ຮັບໜ້າທີ່ຮັບຜິດຊອບທີ່ສຳຄັນຍິ່ງໃຫຍ່ເມື່ອອາຍຸ 37 ປີ; ແຕ່ດ້ວຍເຈດຈຳນົງແລະມານະຈິດພິເສດ ແລະ ຄວາມພະຍາຍາມຢ່າງບໍ່ຢຸດຢັ້ງ, ສະຫາຍໄດ້ເຮັດສຳເລັດໜ້າທີ່ຢ່າງດີເດັ່ນ, ສົມກຽດກັບຄວາມໄວ້ເນື້ອເຊື່ອໃຈຂອງພັກ, ປະທານໂຮ່ຈີມິນຜູ້ຍິ່ງໃຫຍ່ ແລະ ປະຊາຊົນຫວຽດນາມຜູ້ພິລະອາດຫານ. ໃນເວລາ 30 ປີດຳລົງຕຳຜູ້ບັງຄັບບັນຊາການໃຫຍ່ກອງທັບ, ເລຂາທິການຄະນະພັກການທະຫານສູນກາງ, ສະຫາຍໄດ້ເປັນນັກການທະຫານທີ່ດີເດັ່ນ, ຜູ້ນຳທີ່ມີຊື່ສຽງທີສຸດຂອງພັກ ລັດ ແລະປະຊາຊົນຫວຽດນາມ; ໄດ້ຮັບຄວາມຮັກແພງ, ເຄົາລົບ ແລະ ນັບຖືຈາກພະນັກງານ ທະຫານ ແລະຖືກຖືເປັນ “ອ້າຍໃຫຍ່” ຂອງກອງທັບປະຊາຊົນຫວຽດນາມ. ໃນບັນດາບາດລ້ຽວຂອງການປະຕິວັດຫວຽດນາມ ພາຍຫຼັງການປະຕິວັດເດືອນສິງຫາປີ 1945 ແລະ ບັນດາບັ້ນຮົບການທະຫານ ໃນສົງຄາມຕໍ່ຕ້ານພວກລ່າເມືອງຂຶ້ນຝຣັ່ງ ແລະ ພວກຈັກກະພັດອາເມລິກາ; ພາຍໃຕ້ຄັນທຸງຊະນະເລີດຂອງພັກແລະປະທານໂຮຈີມິນຜູ້ຍິ່ງໃຫຍ່, ພົນເອກ ຫວໍ ງວຽນ ຢ້າບ ໄດ້ປະກອບສ່ວນເຂົ້າໃນການຍາດເອົາບັນດາໄຊຊະນະທີ່ຍິ່ງໃຫຍ່, ຜະສົມຜະສານເຂົ້າໃນກະແສປະຫວັດສາດອັນສະຫງ່າລາສີຂອງຊາດ; ກາຍເປັນນາຍພົນໃນຕຳນານ, ອັດສະລິຍະທາງການທະຫານ... ແລະ ໄດ້ຮັບການຊົມເຊີຍແລະເຄົາລົບນັບຖືຈາກປະມຸກແຫ່ງລັດ, ນັກການເມືອງ, ນັກວິຊາການ, ນັກປະຫວັດສາດ, ນັກຂ່າວ, ນັກຂຽນ ແລະ ຜູ້ຄົນຫຼວງຫຼາຍໃນທົ່ວໂລກ.
ພົນເອກ ຫວໍ ງວຽນ ຢ້າບ ເປັນຜູ້ທີ່ມີຄຸນງາມຄວາມດີ, ມີສ່ວນຮ່ວມອັນໃຫຍ່ຫຼວງໃນການກໍ່ສ້າງກອງທັບປະຊາຊົນຫວຽດນາມທີ່ເຂັ້ມແຂງແຮງກ້າ, ເປັນແບບຫຼວງ, ຊຳນານໃນການຮົບ ແລະ ນັບມື້ນັບທັນສະໄໝ. ຈາກກອງກຳລັງໂຄສະນາປົດປ່ອຍຫວຽດນາມ - ກອງກຳລັງທໍາອິດທີ່ມີທະຫານພຽງແຕ່ 34 ຄົນ ພ້ອມດ້ວຍປືນເຫຼັກຍາວ ແລະ ປືນແກັບສາມສິບກະບອກ - ຄ່ອຍໆຂະຫຍາຍຕົວເປັນກອງພັນໃຫຍ່ ກອງພົນໃຫຍ່ທີ່ສູ້ຮົບເກັ່ງ, ຕໍ່ສູ້ຢ່າງເດັດດ່ຽວໜຽວແໜ້ນ ແລະ ເອົາຊະນະສັດຕູຜູ້ຮຸກຮານ. ໄຊຊະນະດ້ຽນບຽນຝູ ແມ່ນການພິສູດທີ່ມີຊີວິດຊີວາ ເຖິງການເຕີບໃຫຍ່ເຂັ້ມແຂງ ຂອງກອງທັບປະຊາຊົນຫວຽດນາມ ພາຍໃຕ້ການນຳພາທີ່ສະຫຼາດສ່ອງໃສຂອງພັກ, ລຸງໂຮ່ທີ່ເຄົາລົບຮັກ ແລະ ການບັນຊາຢ່າງສະຫຼາດຄ່ອງແຄ່ວຂອງພົນເອກ. ເປັນຄັ້ງທຳອິດໃນໂລກທີ່ກອງທັບຂອງປະເທດເມືອງຂຶ້ນຂະໜາດນ້ອຍທີ່ຫຼ້າຫຼັງ ໄດ້ຜາບແພ້ກອງທັບມືອາຊີບຂອງປະເທດຈັກກະພັດລ່າເມືອງຂຶ້ນທີ່ມີອຳນາດ.
ໃນສົງຄາມຕໍ່ຕ້ານອາເມລິກາ ເພື່ອກອບກູ້ປະເທດ, ໃນຖານະຕຳແໜ່ງຜູ້ບັງຄັບບັນຊາການໃຫຍ່, ພົນເອກ ຫວໍ ງວຽນ ຢ້າບ ເປັນຜູ້ທີ່ມີຄຸນງາມຄວາມດີຫຼາຍຢ່າງ ໃນການກໍ່ສ້າງກອງທັບປະຊາຊົນໃຫ້ເປັນກອງກຳລັງຫຼວງ ທັນສະໄໝ, ກໍ່ສ້າງບັນດາກອງທັບປ້ອງກັນອາກາດ - ກອງທັບອາກາດ, ກອງທັບເຮືອ, ເຫຼົ່າທັບພິເສດ, ກໍ່ສ້າງເສັ້ມທາງພູຫຼວງ - ເສັ້ນທາງໂຮ່ຈີມິນເທິງບົດ ແລະ ເສັ້ນທາງໂຮ່ຈີມິນຢູ່ທະເລ ເພື່ອລຳລຽງຊ່ວຍເຫຼືອຢ່າງທັນການໃຫ້ແກ່ແນວໜ້າໃຫຍ່ພາກໃຕ້ຫວຽດນາມ. ພິເສດແມ່ນ, ໃນຂັ້ນຕອນສຸດທ້າຍຂອງສົງຄາມຕໍ່ຕ້ານອາເມລິກາເພື່ອກູ້ຊາດ, ສະຫາຍໄດ້ສະເໜີໃຫ້ສ້າງຕັ້ງບັນດາກອງພົນໃຫຍ່ຫຼັກຢ່າງຮີບດ່ວນ (ກອງພົນໃຫຍ່ທີ 1, 2, 3 ແລະ 4) ເພື່ອສ້າງກຳລັງແຮງສັງລວມ, ຕອບສະໜອງຄວາມຕ້ອງການສູ້ຮົບແບບປະສານສົມທົບບັນດາເຫຼົ່າທັບ, ເຫຼົ່າພົນ ໃນການປະຕິບັດການສູ້ຮົບຂະໜາດໃຫຍ່. ການບຸກໂຈມຕີຂະໜາດໃຫຍ່ ແລະ ລຸກຮືຂຶ້ນທົ່ວໄປ ໃນລະດູບານໃໝ່ປີ 1975 ດ້ວຍຈຸດສູງຄືບັ້ນຮົບໂຮ່ຈີມິນອັນເປັນປະຫວັດສາດ ໄດ້ພິສູດວ່າ ຄຳສະເໜີດັ່ງກ່າວຂອງສະຫາຍແມ່ນການປະດິດສ້າງ ທັນການ ແລະ ຊັດເຈນ, ສອດຄ່ອງກັບສະພາບການ ແລະ ເງື່ອນໄຂປະຫວັດສາດເວລານັ້ນ.
ພົນເອກ ຫວໍ ງວຽນ ຢ້າບ ເປັນຜູ້ບັນຊາການທະຫານທີ່ມີຄວາມສາມາດທາງຍຸດທະສາດທີ່ໂດດເດັ່ນ, ເປັນຄູອາຈານທາງດ້ານຍຸດທະສາດ ແລະ ສິລະປະການທະຫານ,ໂດຍສະເພາະແມ່ນ ແນວທາງສົງຄາມປະຊາຊົນ. ໃນບັນດາບັ້ນຮົບໃຫຍ່ທີ່ມີຄວາມສໍາຄັນທີ່ຕັດສິນ, ສະຫາຍໄດ້ສະແດງໃຫ້ເຫັນສະເໝີເຖິງຄວາມຕັດສິນໃຈ, ສ້ຽມແຫຼມ ແລະ ມີຈິນຕະນາການການທະຫານພິເສດ. ພາຍໃຕ້ການນຳພາຂອງກົມການເມືອງສູນກາງພັກ ນຳໜ້າໂດຍປະທານໂຮ່ຈີມິນ, ສະຫາຍໄດ້ຊີ້ນຳສົງຄາມປະຊາຊົນທີ່ມະຫັດສະຈັນຂອງຊາດຫວຽດນາມໂດຍກົງ ບັນລຸຈຸດສູງສຸດຂອງສິລະປະການທະຫານ. ແນວທາງທີ່ດີເດັ່ນຂອງສົງຄາມທົ່ວປວງຊົນ, ຮອບດ້ານ, ການຕໍ່ຕ້ານໃນໄລຍະຍາວ ໄດ້ຜາບແພ້ ແລະ ເຮັດໃຫ້ແນວທາງສົງຄາມທັງໝົດ, ໂຈມຕີໄວ, ໄຊຊະນະໄວ ແລະ ບັນດາຍຸດທະສາດອື່ນໆຂອງບັນດາຈັກກະພັດທີ່ມີອຳນາດທີ່ສຸດໃນສະຕະວັດທີ 20 ປະລາໄຊລົງ. ຄວາມຮູ້ ແລະ ຄວາມສາມາດດ້ານການທະຫານຂອງສະຫາຍ ລ້ວນແຕ່ເປັນການສຶກສາຄົ້ນຄວ້າດ້ວຍຕົນເອງ ຈາກປະຫວັດສາດການຕໍ່ສູ້ຕ້ານການຮຸກຮານຈາກຕ່າງປະເທດ ຂອງປະຊາຊົນຫວຽດນາມ ແລະ ປະຫວັດສາດການທະຫານຂອງໂລກ; ການຝຶກຝົນຫຼໍ່ຫຼອມດ້ວຍຕົນເອງ, ການຖອກຖອນບົດຮຽນປະສົບການ ຜ່ານການສູ້ຮົບຕົວຈິງຂອງກອງທັບຂອງພວກເຮົາ, ໄດ້ຮັບການຍົກຍ້ອງ ແລະ ເຄົາລົບນັບຖືຈາກໂລກໃນຖານະເປັນນາຍພົນຜູ້ໜຶ່ງທີ່ມີຊື່ສຽງໃນປະຫວັດສາດຂອງມະນຸດຊາດ.
ສະຫາຍ ຫວໍ ງວຽນ ຢ້າບ ເປັນນາຍພົນທີ່ມີຄວາມເກັ່ງກ້າສາມາດ, ເປັນຜູ້ນໍາທາງທະຫານທີ່ລະມັດລະວັງ, ປຽບທຽບຊັ່ງຊາກຳລັງຂອງທັງສອງຝ່າຍສະເໝີ, ເປັນເຈົ້າການບັງຄັບໃຫ້ຄູ່ຕໍ່ສູ້ຕ້ອງຕໍ່ສູ້ໃນແບບຂອງພວກເຮົາ, ນໍາໄປສູ່ການປະລາໄຊຢ່າງສົມບູນຂອງພວກເຂົາ. ສິ່ງເປັນແບບຢ່າງຄື ການຕັດສິນໃຈປ່ຽນທິດນຳການສູ້ຮົບຈາກ “ຕີໄວ, ແກ້ໄຂໄວ” ເປັນ “ຕີຢ່າງໜັກແໜ້ນ, ບຸກຢ່າງໜັກແໜ້ນ” ໃນບັ້ນຮົບດ້ຽນບຽນຝູ - ການຕັດສິນໃຈທີ່ຍາກທີ່ສຸດໃນຊີວິດນໍາທາງທະຫານຂອງພົນເອກ ແຕ່ແມ່ນການຕັດສິນໃຈທີ່ຖືກຕ້ອງ, ປະກອບສ່ວນຫຼຸດຜ່ອນການເສຍສະຫຼະເລືອດເນື້ອຂອງທະຫານ ແລະ ປະຊາຊົນຂອງພວກເຮົາ. ພົນເອກກໍແມ່ນຜູ້ອະນຸມັດຂໍ້ສະເໜີຈັດຕັ້ງປີກກອງທັບຕາເວັນອອກ ແລະ ອອກຄຳສັ່ງ “ໄວ, ໄວກວ່າອີກ; ກ້າຫານ, ກ້າຫານກວ່າອີກ”, ສົ່ງກອງທັບທັງໝົດບຸກໄປຂ້າງໜ້າ, ໂຈມຕີຖານທີ່ໝັ້ນສຸດທ້າຍຂອງສັດຕູຢ່າງດຸເດືອດ ໃນບັ້ນຮົບໂຮ່ຈີມິນທີ່ເປັນປະຫວັດສາດ, ນຳສົງຄາມຕໍ່ຕ້ານອາເມລິກາເພື່ອກູ້ຊາດໄປສູ່ໄຊຊະນະສົມບູນ.
ພົນເອກ ຫວໍ ງວຽນ ຢ້າບ ມີຄຸນງາມຄວາມດີອັນຍິ່ງໃຫຍ່ໃນການສ້າງແລະພັດທະນາທິດສະດີການທະຫານຫວຽດນາມໃນສະໄໝໂຮ່ຈີມິນ, ນັ້ນແມ່ນແນວທາງສົງຄາມປະຊາຊົນ, ເອົາຊະນະຄວາມໂຫດຮ້າຍດ້ວຍຄວາມເປັນທໍາ, ສືບທອດ ແລະ ເສີມຂະຫຍາຍບັນດາບົດຮຽນປະຫວັດສາດອັນລ້ຳຄ່າຂອງບັນພະບຸລຸດໃນການຕ້ານຜູ້ຮຸກຮານຂອງຕ່າງປະເທດໃນຍຸກໃໝ່. ສະຫາຍໄດ້ເອົາໃຈໃສ່ທີ່ສຸດເຖິງການກໍ່ສ້າງອົງການຈັດຕັ້ງພັກຢູ່ໃນກອງກຳລັງປະກອບອາວຸດໃຫ້ “ສະອາດປອດໃສ, ໝັ້ນຄົງເຂັ້ມແຂງ”; ເອົາໃຈໃສ່ ເບິ່ງແຍງດູແລການກໍ່ສ້າງຄວາມກ້າຫານທາງການເມືອງ, ຄວາມກ້າຫານໃນການສູ້ຮົບ, ຍຸດທະວິທີການທະຫານ, ຄວາມສາມາດໃນການສູ້ຮົບ; ອົບຮົມສຶກສາ, ບຳລຸງສ້າງຄຸນນະພາບ “ທະຫານຂອງລຸງໂຮ່” ໃຫ້ແກ່ພະນັກງານ, ນັກຮົບກອງທັບປະຊາຊົນຫວຽດນາມ.
ພົນເອກ ຫວໍ ງວຽນ ຢ້າບ ແມ່ນນັກຮຽນທີ່ດີເດັ່ນແລະໃກ້ຊິດຂອງປະທານໂຮ່ຈີມິນ. ໂດຍໄດ້ດຳລົງຊີວິດ ແລະ ເຮັດວຽກຢູ່ຄຽງຂ້າງປະທານໂຮ່ຈີມິນ, ໄດ້ຮັບການສຶກສາ ແລະ ການຝຶກຝົນຫຼໍ່ຫຼອມຈາກເພິ່ນ, ສະຫາຍ ຫວໍ ງວຽນ ຢ້າບ ໄດ້ພະຍາຍາມສູ້ຊົນ, ຮ່ຳຮຽນແນວຄິດ, ຄຸນສົມບັດ, ແບບແຜນ, ວິຖີຊີວິດ, ຝຶກຝົນຫຼໍ່ຫຼອມ, ເວົ້າແລະເຮັດຕາມແບບຢ່າງຂອງລຸງໂຮ່ຜູ້ຍິ່ງໃຫຍ່. ສະຫາຍເປັນຄົນກຸ່ມທຳອິດທີ່ຄົ້ນຄວ້າແລະຂຽນ ກ່ຽວກັບແນວຄິດ, ຄຸນສົມບັດ ແລະ ແບບແຜນຂອງໂຮ່ຈີມິນ ຢ່າງເປັນພື້ນຖານ, ຮອບດ້ານ, ມີລະບົບ ແລະ ມີສ່ວນປະກອບທີ່ສຳຄັນໃນການຄົ້ນຄວ້າ, ໝູນໃຊ້ແນວຄິດໂຮ່ຈີມິນ ເຂົ້າໃນພຶດຕິກຳປະຕິວັດຫວຽດນາມ. ໃນບັນດາຂົງເຂດເຊັ່ນ: ການສຶກສາແລະກໍ່ສ້າງ, ວິທະຍາສາດແລະເຕັກນິກ, ຂ່າວສານ, ການທູດ, ວັດທະນະທຳ, ປະຫວດສາດ…, ສະຫາຍລ້ວນແຕ່ມີສ່ວນປະກອບທີ່ສຳຄັນ, ເປັນຄົນທີ່ມີຄວາມສາມາດ ມີຄຸນສົມບັດສິນທຳທີ່ສົມບູນແບບ, ມີທັງຄວາມຮູ້ວັດທະນະທຳ ແລະ ສິນລະປະການຕໍ່ສູ້ທີ່ຄວບຄູ່.
ສະຫາຍພົນເອກມັກຈະສ່ອງປະກາຍດ້ວຍຄຸນສົມບັກບຸກຄະລິກກະພາບອັນສູງສົ່ງ, ເປັນແບບຢ່າງຂອງຄຸນສົມບັດສິນທຳປະຕິວັດ ດຸໝັ່ນ, ປະຢັດ, ຊື່ສັດ, ທ່ຽງທຳ, ເຫັນແກ່ສ່ວນລວມ ບໍ່ເຫັນແກ່ສ່ວນຕົວ; ເປັນແບບຢ່າງກ່ຽວກັບຄວາມຊື່ສັດ, ຄວາມລຽບງ່າຍ, ຄວາມອະນຸໂລມ, ຄວາມເມດຕາ, ຄວາມຖ່ອມຕົນ, ຄວາມຢາກຮູ້, ຄວາມສາມັກຄີ, ການດໍາລົງຊີວິດທີ່ມີຄວາມໝາຍ, ຄວາມຮັກແພງສຸດໃຈຕໍ່ສະຫາຍແລະເພື່ອນຮ່ວມຊາດ; ກ່ຽວກັບຄວາມຮັບຜິດຊອບສູງ, ແບບແຜນການເຮັດວຽກວິທະຍາສາດ, ມີຫຼັກການ ແຕ່ມີຄວາມຍືດຫຍຸ່ນທີ່ສຸດ, ຍາມໃດກໍເຊີດຊູບົດບາດຂອງໝູ່ຄະນະ, ປະຕິບັດຕາມການຈັດຕັ້ງ; ຍາມໃດກໍ່ເອົາໃຈໃສ່ເຖິງພຶດຕິກຳຕົວຈິງ, ເຊື່ອໝັ້ນໃນກຳລັງຂອງມະຫາຊົນ, ມີຄວາມໃກ້ຊິດສະໜິດສະໜົມກັບປະຊາຊົນ; ສູ້ຊົນສ້າງສາມະຫາສາມັກຄີປະເທດຊາດຢ່າງບໍ່ຢຸດຢັ້ງ, ນຳໃຊ້ສະຕິປັນຍາ ແລະ ກຳລັງທັງໝົດຂອງຕົນ ເພື່ອສຳເລັດທຸກໜ້າທີ່ທີ່ພັກ, ປະຊາຊົນ ແລະ ກອງທັບໄດ້ມອບໝາຍໃຫ້.
ຜ່ານການເຄື່ອນໄຫວປະຕິວັດອັນອຸດົມສົມບູນກວ່າ 80 ປີ, ຊີວິດຂອງພົນເອກ ຫວໍ ງວຽນ ຢ້າບ ຕິດແໜ້ນກັບພາລະກິດການຕໍ່ສູ້ປົດປ່ອຍຊາດ, ກໍ່ສ້າງແລະປົກປັກຮັກສາປະເທດຊາດ. ສະຫາຍໄດ້ຍົກຕົວຢ່າງອັນສະຫງ່າລາສີ ຂອງນັກຮົບປະຕິວັດທີ່ເດັດດ່ຽວໜຽວແໜ້ນ, ຈົງຮັກພັກດີຢ່າງແທ້ຈິງ, ຕະຫຼອດຊີວິດອຸທິດເພື່ອຊາດ, ສຸດອົກສຸດໃຈສູ້ຊົນເພື່ອເປົ້າໝາຍແລະອຸດົມຄະຕິຂອງພັກ. ໂດຍບໍ່ຄຳນຶງເຖິງຄວາມສະດວກຫຼືຄວາມຫຍຸ້ງຍາກຂອງການປະຕິວັດ, ສະຫາຍຍາມໃດກໍ່ມີຄວາມໄວ້ເນື້ອເຊື່ອໃຈ, ເຊື່ອໝັ້ນ ແລະ ຈົງຮັກພັກດີຕໍ່ພັກ ແລະ ປະຊາຊົນຕະຫຼອດໄປ, ດັ່ງທີ່ເພິ່ນເຄີຍກ່າວໃນເມື່ອຍັງມີຊີວິດວ່າ:“ຂ້າພະເຈົ້າມີຊີວິດຢູ່ວັນໃດ ແມ່ນເພື່ອປະເທດໃນວັນນັ້ນ”. ສະຫາຍຍາມໃດກໍຈົດຈຳ, ປະຕິບັດຕາມແບບຢ່າງ ແລະ ເປັນແບບຢ່າງໃນການປະຕິບັດຄຳສັ່ງຂອງປະທານ ໂຮ່ຈີມິນ ຄື: ເຮັດການປະຕິວັດຕ້ອງ “ຖືເອົາວຽກງານສ່ວນລວມເປັນສຳຄັນ” ເຊິ່ງຖືເປັນຄະຕິປະຈຳໃຈ ແລະສູ້ຊົນຕະຫຼອດຊີວິດ. ນີ້ກໍແມ່ນບົດຮຽນທີ່ເລິກເຊິ່ງທີ່ສຸດສຳລັບປະຊາຊົນຫວຽດນາມທຸກຄົນ.
ການສະເຫຼີມສະຫຼອງວັນຄ້າຍວັນເກີດຄັ້ງທີ 110 ຂອງພົນເອກ ຫວໍ ງວຽນ ຢ້າບ ໃນວັນນີ້ກົງກັບໂອກາດສະເຫຼີມສະຫຼອງ 77 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມວິລະຊົນ ແລະ 32 ປີແຫ່ງວັນປ້ອງກັນປະເທດຊາດທົ່ວປວງຊົນ. ພາຍໃຕ້ການນຳພາເດັດຖານ ໂດຍກົງໃນທຸກດ້ານຂອງພັກກອມມູນິດຫວຽດນາມ, ໃນຕະຫຼອດ 77 ປີທີ່ຜ່ານມາ, ກອງທັບປະຊາຊົນຫວຽດນາມໄດ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ, ກາຍເປັນກອງທັບທີ່ສູ້ຮົບຊະນະເລີດຂອງປະເທດຊາດວິລະຊົນ, ເອົາຊະນະພວກຈັກກະພັດທີ່ມີອໍານາດແລະລູກແຫຼ້ງຕີນມືຂອງມັນ ແລະ ບັນລຸຜົນສຳເລັດໃນການປະຕິບັດພາລະກິດສາກົນອັນສູງສົ່ງ.
ກອງທັບປະຊາຊົນຫວຽດນາມໃນປະຈຸບັນມີບັນດາກອງທັບ, ເຫຼົ່າທັບ, ເຫຼົ່າພົນ, ກອງກຳລັງພາກສ່ວນຢ່າງຄົບຊຸດ ແລະ ອາວຸດ, ອຸປະກອນເຕັກນິກທີ່ນັບມື້ນັບທັນສະໄໝ; ໄດ້ຮັບການຝຶກອົບຮົມເປັນຢ່າງດີທາງດ້ານຍຸດທະວິທີ, ການສູ້ຮົບໃນສະໜາມຮົບ ແລະ ຄວາມຊ່ຽວຊານດ້ານເຕັກນິກ; ສືບທອດສິລະປະການທະຫານທີ່ເປັນເອກະລັກ; ມີກຳລັງແຮງສັງລວມ, ມີລະດັບແລະຄວາມສາມາດກຽມພ້ອມສູ້ຮົບສູງ; ພ້ອມກັບທົ່ວພັກ, ທົ່ວປວງຊົນປົກປັກຮັກສາເອກະລາດ, ອຳນາດອະທິປະໄຕ, ຜືນແຜ່ນດິນອັນຄົບຖ້ວນ, ເຂດທ້ອງຟ້າ, ເຂດທະເລ, ເຂດເກາະ ທີ່ສັກສິດແລະສູງສົ່ງ ຂອງປະເທດຊາດ ໄວ້ຢ່າງໝັ້ນຄົງ. ພ້ອມກັນນັ້ນ, ບັນດາສະຫາຍໄດ້ບັນລຸຜົນສຳເລັດທີ່ໂດດເດັ່ນຫຼາຍຢ່າງ ໃນການປະຕິບັດໜ້າທີ່ຝຶກອົບຮົມ, ກຽມພ້ອມສູ້ຮົບ, ປ້ອງກັນແລະຕ້ານພະຍາດລະບາດ, ໄພທຳມະຊາດ, ກູ້ໄພ ກູ້ຊີບ, ປົກປ້ອງຊີວິດ ແລະ ຊັບສິນຂອງປະຊາຊົນ; ໃນການອອກແຮງງານ, ການຜະລິດ, ພັດທະນາເສດຖະກິດ, ວັດທະນະທຳ, ສັງຄົມ. ນັ້ນແມ່ນບັນດາໝາກຜົນສຳຄັນໃນວຽກງານການຕ່າງປະເທດດ້ານປ້ອງກັນຊາດ, ພິເສດແມ່ນການເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ, ໄດ້ປະກອບສ່ວນຢ່າງຕັ້ງໜ້າເຂົ້າໃນການຮັກສາສັນຕິພາບ ແລະ ສະຖຽນລະພາບໃນໂລກ ແລະ ພາກພື້ນ. ຕາງໜ້າການນໍາພັກແລະລັດ, ຂ້າພະເຈົ້າຮັບຮູ້ ແລະ ຊົມເຊີຍຢ່າງສຸດອົກສຸດໃຈ ຕໍ່ບັນດາວິລະກຳ ແລະ ຜົນງານຂອງພະນັກງານແລະນັກຮົບກອງທັບປະຊາຊົນຫວຽດນາມຜູ້ພິລະອາດຫານ.
ບັນດາວິລະກຳອັນເລີດລ້ຳໃນການສູ້ຮົບຂອງກອງທັບຂອງພວກເຮົາ ໃນເສັ້ນທາງອັນສະຫງ່າລາສີ 77 ປີທີ່ຜ່ານມາ ແມ່ນໝາກຜົນແຫ່ງການສຶກສາ ແລະ ການຝຶກອົບຮົມຂອງພັກກອມມູນິດຫວຽດນາມ ແລະ ປະທານ ໂຮ່ຈີມິນ ຜູ້ຍິ່ງໃຫຍ່; ການປົກປັກຮັກສາ, ການດູແລ ແລະ ການລ້ຽງດູຂອງປະຊາຊົນ, ການຊ່ວຍເຫຼືອອັນປະເສີດຂອງເພື່ອນມິດສາກົນ; ໃນນັ້ນມີການປະກອບສ່ວນອັນໃຫຍ່ຫຼວງຂອງພົນເອກ ຫວໍ ງວຽນ ຢ້າບ. ນັ້ນແມ່ນຄວາມມານະພະຍາຍາມ ເຫື່ອແຮງ ແລະ ເລືອດເນື້ອຂອງບັນດາພະນັກງານ, ນັກຮົບລຸ້ນຕ່າງໆ ທີ່ໄດ້ຄົ້ນຄິດປະດິດສ້າງ, ກ້າຫານ, ເດັດດ່ຽວ, ພ້ອມແລ້ວທີ່ຈະຕໍ່ສູ້ ແລະ ເສຍສະຫຼະເພື່ອເອກະລາດ, ເສລີພາບຂອງປະເທດຊາດ, ເພື່ອຄວາມສຸກຂອງປະຊາຊົນ. ບັນດາວິລະກຳດັ່ງກ່າວໄດ້ແຕ້ມແຕ່ງຄັນທຸງແຫ່ງຄວາມຕັດສິນໃຈສູ້ຮົບ ຕັດສິນໃຈເອົາຊະນະຂອງກອງທັບປະຊາຊົນຫວຽດນາມວິລະຊົນ, ສ້າງມູນເຊື້ອອັນສະຫງ່າງາມ, ສົມກຽດກັບຄຳຍ້ອງຍໍຂອງປະທານໂຮ່ຈີມິນທີວ່າ: “ກອງທັບຂອງພວກເຮົາຈົງຮັກພັກດີຕໍ່ພັກ, ກະຕັນຍູຕໍ່ປະຊາຊົນ, ພ້ອມແລ້ວທີ່ຈະສູ້ຮົບ ເສຍສະຫຼະເພື່ອເອກະລາດ ອິດສະຫຼະພາບຂອງປະເທດຊາດ, ເພື່ອລັດທິສັງຄົມນິຍົມ. ໜ້າທີ່ໃດກໍສາມາດເຮັດສຳເລັດ, ຄວາມຫຍຸ້ງຍາກໃດໆກໍສາມາດຜ່ານຜ່າ ແລະ ສາມາດເອົາຊະນະສັດຕູທຸກໂຕ”.
ທົບທວນຄືນຊີວິດ, ພາລະກິດປະຕິວັດ ແລະ ຄຸນງາມຄວາມດີອັນໃຫຍ່ຫຼວງ, ດີເດັ່ນເປັນພິເສດ ຂອງສະຫາຍພົນເອກ ຫວໍ ງວຽນ ຢ້າບ, ພວກເຮົາຍິ່ງເອກອ້າງທະນົງໃຈໃນພັກກອມມູນິດຫວຽດນາມທີ່ສະຫງ່າລາສີ, ເອກອ້າງທະນົງໃຈໃນຊາດຫວຽດນາມຜູ້ກ້າຫານ, ເອກອ້າງທະນົງໃນປະທານໂຮ່ຈີມິນຜູ້ຍິ່ງໃຫຍ່, ເອກອ້າງທະນົງໃນກອງທັບປະຊາຊົນຫວຽດນາມຜູ້ກ້າຫານ ທີ່ໄດ້ອົບຮົມສຶກສາ, ຝຶກຝົນຫຼໍ່ຫຼອມ ບຳລຸງສ້າງ ນັກຮົບປະຕິວັດທີ່ກ້າແກ່ນຕັ້ງຕໍ່ບໍລິສຸດ, ນາຍພົນທີ່ເກັ່ງກ້າສາມາດແລະມີຄຸນນະທຳ, ລູກຮັກທີ່ດີເລີດຂອງປະເທດແລະບ້ານເກີດເມືອງນອນກວ໋າງບິ່ງ, ຜູ້ທີ່ໄດ້ອຸທິດທັງຊີວິດເພື່ອພາລະກິດປະຕິວັດອັນສະຫງ່າລາສີຂອງພັກ ແລະ ປະຊາຊົນຫວຽດນາມ. ບຸກຄົນ, ບຸກຄະລິກກະພາບ ແລະ ການປະກອບສ່ວນອັນຍິ່ງໃຫຍ່ ຂອງສະຫາຍພົນເອກ ທີ່ມີຕໍ່ພາລະກິດປະຕິວັດຢູ່ຫວຽດນາມ ແລະ ໃນໂລກ ຈະໄດ້ຮັບການຈົດຈໍາໄວ້ຕະຫຼອດໄປໃນປະຫວັດສາດອັນສະຫງ່າລາສີຂອງປະເທດຊາດຂອງພວກເຮົາ ແລະ ປະຫວັດສາດຂອງຂະບວນການປະຕິວັດໂລກ.
ສຶກສາ ແລະ ປະຕິບັດຕາມແບບຢ່າງຂອງພົນເອກ ຫວໍ ງວຽນ ຢ້າບ ແລະ ບັນພະບຸລຸດຂອງຊາດ, ພວກເຮົາປະຕິຍານຕະຫຼອດການວ່າ ຈະເດີນຕາມເສັ້ນທາງທີ່ພັກ, ລຸງໂຮ່ທີ່ເຄົາລົບຮັກ ແລະ ປະຊາຊົນເຮົາໄດ້ເລືອກໄວ້; ສືບຕໍ່ຢ່າງດີເດັ່ນພາລະກິດປະຕິວັດອັນສະຫງ່າລາສີ - ເຊິ່ງເປັນມໍລະດົກອັນລ້ຳຄ່າ ທີ່ບັນພະບຸລຸດແລະຄົນລຸ້ນພໍ່ຂອງພວກເຮົາ ໄດ້ແລກປ່ຽນດ້ວຍກະດູກເລືອດຈຶ່ງຍາດມາໄດ້; ອອກແຮງກໍ່ສ້າງປະເທດໃຫ້ນັບມື້ນັບຈະເລີນພັດທະນາ ສວຍງາມ, ມີອາລະຍະທຳ ແລະ ປົກປັກຮັກສາປະເທດຊາດທີ່ຮັກແພງ; ເພື່ອຮັກສາບັນດາຜົນສຳເລັດຂອງຂະບວນການປ່ຽນແປງໃໝ່ປະເທດ ຄືທີ່ສະຫາຍເລຂາທິການໃຫຍ່ ຫງວຽນ ຝູ ຈ້ອງ ໄດ້ຢືນຢັນວ່າ: “ປະເທດເຮົາບໍ່ເຄີຍມີພາລະກິດ, ທ່າແຮງ, ບົດບາດຕຳແໜ່ງ ແລະ ກຽດສັກສີສາກົນຄືທຸກວັນນີ້”.
ເສີມຂະຫຍາຍມູນເຊື້ອອັນສະຫງ່າງາມຂອງກອງທັບວິລະຊົນ, ຄຸນສົມບັດອັນສູງສົ່ງຂອງ “ທະຫານຂອງລຸງໂຮ່”, ຕາມແບບຢ່າງຂອງພົນເອກ ຫວໍ ງວຽນ ຢ້າບ - “ອ້າຍໃຫຍ່” ຂອງກອງທັບປະຊາຊົນຫວຽດນາມ, ພະນັກງານແລະນັກຮົບທົ່ວກອງທັບຕ້ອງຈົງຮັກພັກດີຕໍ່ປະເທດຊາດ, ພັກ, ລັດ, ປະຊາຊົນ ແລະ ລະບອບສັງຄົມນິຍົມ; ເສີມຂະຫຍາຍລັດທິວິລະຊົນປະຕິວັດ, ທາດແທ້ອັນດີງາມ ແລະ ມູນເຊື້ອອັນສະຫງ່າງາມ ຢ່າງບໍ່ຢຸດຢັ້ງ, ຕັດສິນໃຈປະຕິບັດໜ້າທີ່ຂອງກອງທັບສູ້ຮົບ, ກອງທັບປະຕິບັດງານ, ກອງທັບອອກແຮງງານ, ກອງທັບຜະລິດ; ຕະຫຼອດໄປແມ່ນກຳລັງການເມືອງພິເສດ, ແມ່ນກຳລັງຕໍ່ສູ້ທີ່ຈົງຮັກພັກດີ, ເປັນກຳລັງຫຼັກແຫຼ່ງພ້ອມກັບທົ່ວປວງຊົນປົກປັກຮັກສາປະເທດຊາດສັງຄົມນິຍົມຢ່າງໝັ້ນຄົງ.
ໃນໂອກາດອັນສະຫງ່າລາສີນີ້, ຕາງໜ້າການນຳພັກແລະລັດ, ຂ້າພະເຈົ້າຂໍສະເໜີໃຫ້ທຸກຂັ້ນ, ຂະແໜງການແລະທຸກທ້ອງຖິ່ນ ແລະ ຂໍໃຫ້ພະນັກງານ ນັກຮົບທົ່ວກອງທັບ ເສີມຂະຫຍາຍນ້ຳໃຈສາມັກຄີ, ຮ່ວມແຮງຮ່ວມໃຈກັນ, ລະດົມການເຂົ້າຮ່ວມຂອງທົ່ວລະບົບການເມືອງ, ປະຊາຄົມວິສາປະກິດ ແລະ ປະຊາຊົນໃນທົ່ວປະເທດ ແລະ ຊຸມຊົນຊາວຫວຽດນາມຢູ່ຕ່າງປະເທດ ສືບຕໍ່ເສີມຂະຫຍາຍນ້ຳໃຈຮັກຊາດ, ເຈດຈຳນົງເປັນເຈົ້າຕົນເອງ ສ້າງຄວາມເຂັ້ມແຂງດ້ວຍຕົນເອງ, ສ້າງກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ ແລະ ຄວາມປາດຖະໜາທີ່ຈະບືນຕົວຂຶ້ນ, ຄວາມພະຍາຍາມຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍຂ້າງໜ້າ, ຕັດສິນໃຈສູ້ຊົນປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກໃຫ້ສຳເລັດຜົນ; ສືບຕໍ່ຍູ້ແຮງຂະບວນການປ່ຽນແປງໃໝ່ຢ່າງຮອບດ້ານ ຄົບຊຸດ, ເຮັດໃຫ້ປະເທດຊາດພັດທະນາຢ່າງວ່ອງໄວແລະຍືນຍົງ, ຕັດສິນໃຈສ້າງສາປະເທດຫວຽດນາມສັງຄົມນິຍົມໃຫ້ສຳເລັດຜົນ, ເພື່ອເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸຕິທຳ ແລະ ອາລະຍະທຳ”./.
----------------------
* ຫົວຂໍ້ຂອງບົດນີ້ແຕ່ງໂດຍວາລະສານກອມມູນິດ
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 980 (ເດືອນທັນວາ 2021)
