ສ້າງຮ່າໂນ້ຍໃຫ້ເປັນນະຄອນສ້າງສັນ,
ສູນກາງການບໍລິການຄຸນນະພາບສູງໃນພາກພື້ນ ແລະ ທົ່ວໂລກ
ສູນກາງການບໍລິການຄຸນນະພາບສູງໃນພາກພື້ນ ແລະ ທົ່ວໂລກ
ປົດປ່ອຍແຫຼ່ງຄວາມຄິດສ້າງສັນຈາກປະຫວັດສາດພັນປີ
ປີເກິງຈໍ 1010, ກະສັດ ຫຼີ ຖາຍໂຕ໋ ໄດ້ອອກ “ພະລາຊະດຳລັດຍ້າຍເມືອງຫຼວງ”, ຕົກລົງຍ້າຍເມືອງຫຼວງຂອງດ້າຍຫວຽດ ຈາກຮວາລື ໄປເປັນນະຄອນຫຼວງຖາວອນໃນດິນແດນ “ມັງກອນບິນ”. ນັບແຕ່ນັ້ນມາ, 10 ກວ່າສະຕະວັດໄດ້ຜ່ານໄປ, ທັງລອງ - ຮ່າໂນ້ຍ ຍາມໃດກໍ່ສົມກຽດເປັນດິນແດນແຫ່ງອັດສະລິຍະ, ເປັນສະຖານແຫ່ງການເຕົ້າໂຮມ ການຕົກຜະລຶກ ແລະ ການເປ່ງແສງຮຸ່ງເຮືອງຂອງວັດທະນະທຳແຫ່ງຊາດ, ເປັນສະຖານທີ່ທີ່ຂໍ້ໄດ້ປຽບດ້ານການສ້າງສັນຂອງປະເທດມາເຕົ້າໂຮມກັນ. ຕາມບັນດານັກຄົ້ນຄ້ວາວັດທະນະທຳແລະປະຫວັດສາດ, ທັງລອງເປັນເມືອງສ້າງສັນໃນປະຫວັດສາດ ທີ່ມີກຳລັງ ຊີວິດທີ່ເຂັ້ມແຂງ ແລະ ຍືນຍົງ. ແຫຼ່ງພະລັງດັ່ງກ່າວຍັງໄດ້ດຳເນີນຕໍ່ໄປຜ່ານລາຊະວົງຕ່າງໆ ຈົນເຖິງທຸກມື້ນີ້, ຊາວຮ່າໂນ້ຍສືບຕໍ່ຂຸດຄົ້ນແລະເສີມຂະຫຍາຍຈິດໃຈ ທັງລອງ ໃນກິດຈະການປ່ຽນແປງໃໝ່ປະເທດຢ່າງຮອບດ້ານແລະຄົບຊຸດ.
ປະຕິບັດຍຸດທະສາດການພັດທະນາອຸດສາຫະກຳວັດທະນະທຳຫວຽດນາມ ຮອດປີ 2020, ວິໄສທັດຮອດປີ 2030 ຕາມມະຕິຕົກລົງເລດທີ 1755/QĐ-TTg, ລົງວັນທີ 8 ກັນຍາ 2016, ຂອງນາຍົກລັດຖະມົນຕີ, ໃນນັ້ນ ໄດ້ກຳນົດໃຫ້ຮ່າໂນ້ຍກາຍເປັນສູນກາງສ້າງສັນຂອງປະເທດ, ຄະນະກຳມະການປະຊາຊົນຮ່າໂນ້ຍ ໄດ້ສ້າງບົດລາຍງານ “ຮ່າໂນ້ຍ - ນະຄອນສ້າງສັນ”. ເດືອນກໍລະກົດ 2019, ນະຄອນຮ່າໂນ້ຍໄດ້ຍື່ນສະເໜີຊື່ຜູ້ສະໝັກເຂົ້າຮ່ວມ ເຄືອຂ່າຍນະຄອນສ້າງສັນ ຂອງຢູເນສໂກ, ດ້ວຍໜ້າທີ່ຈຸດສຸມແມ່ນ ນຳຄວາມຄິດສ້າງສັນມາໄວ້ໃນສູນກາງຂອງການພັດທະນາທີ່ຍືນຍົງ, ໂດຍມີວິໄສທັດທີ່ຈະເຮັດໃຫ້ຮ່າໂນ້ຍກາຍເປັນນະຄອນຫຼວງແຫ່ງການສ້າງສັນ ຂອງອາຊີຕາເວັນອອກສ່ຽງໃຕ້. ເດືອນຕຸລາ 2019, ຢູເນສໂກໄດ້ຮັບຮູ້ຮ່າໂນ້ຍ ແລະ ອີກ 65 ຕົວເມືອງທົ່ວໂລກ ເຂົ້າຮ່ວມເຄືອຂ່າຍນະຄອນສ້າງສັນຂອງຢູເນສໂກ ຢ່າງເປັນທາງການ(1).
ການເຂົ້າຮ່ວມເຄືອຂ່າຍນະຄອນສ້າງສັນຂອງຢູເນສໂກ ແມ່ນເຫດການທີ່ມີຄວາມໝາຍພິເສດ, ສ້າງເງື່ອນໄຂອຳນວຍຄວາມສະດວກ ໃຫ້ຮ່າໂນ້ຍໂຄສະນາເຜີຍແຜ່ພາບພົດຂອງຕົນ ກໍຄືເພີ່ມກາລະໂອກາດຮ່ວມມືໃນທຸກຂົງເຂດສ້າງສັນ, ເສີມຂະຫຍາຍກຳລັງແຮງສັງລວ ມຂອງບັນດາຊັບພະຍາກອນທາງເສດຖະກິດແລະການເມືອງ, ໃນນັ້ນຈຸດສຸມແມ່ນ ຊັບພະຍາກອນທາງດ້ານວັດທະນະທຳ ແລະ ການສຶກສາ ເພື່ອເປົ້າໝາຍການພັດທະນານະຄອນຫຼວງຢ່າງຍືນຍົງ.
ເສີມຂະຫຍາຍຊັບພະຍາກອນວັດທະນະທໍາຢ່າງແຂງແຮງ, ຍູ້ແຮງການພັດທະນາເສດຖະກິດ
ຄວບຄູ່ໄປກັບການຊຸກຍູ້ການປ່ຽນແປງໃໝ່ ແລະ ຄວາມຄິດສ້າງສັນ
ຮ່າໂນ້ຍ - “ນະຄອນໃນແມ່ນ້ຳ” - ນະຄອນທີ່ໄດ້ລ້ອມຮອບດ້ວຍແມ່ນ້ຳ 20 ສາຍ. ພາຍຫຼັງການປັບຂອບເຂດຫຼາຍຄັ້ງ, ປະຈຸບັນ, ຮ່າໂນ້ຍມີປະຊາກອນປະມານ 8 ລ້ານຄົນ ດ້ວຍເນື້ອທີ່ທັງໝົດຫຼາຍກວ່າ 3.300 ຕາລາງກິໂລແມັດ. ປະຕິບັດແຜນທົ່ວໄປໃນການກໍ່ສ້າງນະຄອນຫຼວງຮອດປີ 2030 ວິໄສທັດຮອດປີ 2050, ນະຄອນຫຼວງຮ່າໂນ້ຍ ໄດ້ແລະກຳລັງພັດທະນາຕາມຮູບແບບ “ພວງ” ຕົວເມືອງ. ຮ່າໂນ້ຍກຳລັງດຳເນີນການປ່ຽນແປງໃໝ່ ຮູບແບບການເຕີບໂຕ ຢ່າງແຂງແຮງ, ປັບໂຄງສ້າງເສດຖະກິດຄືນໃໝ່ ໂດຍອີງໃສ່ການນຳໃຊ້ວິທະຍາສາດ-ເຕັກໂນໂລຊີ ແລະ ການປ່ຽນແປງໃໝ່ປະດິດສ້າງ, ປົວແປງສະພາບແວດລ້ອມການລົງທຶນທຸລະກິດ ເພື່ອດຶງດູດນັກລົງທຶນ. ຮ່າໂນ້ຍພວມກາຍເປັນຈຸດໝາຍປາຍທາງທີ່ໜ້າດຶງດູດໃຈ ສຳລັບນັກລົງທຶນທັງພາຍໃນແລະຕ່າງປະເທດ, ແລະ ໄດ້ກາຍເປັນໜຶ່ງໃນ 5 ຕົວເມືອງທີ່ຂະຫຍັນຂັນເຄື່ອນທີ່ສຸດຂອງອາຊີ.
ໂດຍສະເລ່ຍແລ້ວ, ໃນໄລຍະ 2016-2020, ລວມຍອດຜະລິດຕະພັນພາຍໃນຂອງນະຄອນຫຼວງເພີ່ມຂຶ້ນ 6,67% ຕໍ່ປີ. ໃນສອງປີ 2018-2019, ຮ່າໂນ້ຍນຳໜ້າປະເທດ ໃນການດຶງດູດການລົງທຶນໂດຍກົງຈາກຕ່າງປະເທດ. ຈຳນວນວິສາຫະກິດສ້າງຕັ້ງໃໝ່ເພີ່ມຂຶ້ນຢ່າງຫຼວງຫຼາຍ ທັງດ້ານປະລິມານ ແລະ ທຶນຈົດທະບຽນ. ເຖິງວ່າຈະໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດໂຄວິດ-19ກໍຕາມ, ແຕ່ເສດຖະກິດຂອງຮ່າໂນ້ຍໃນປີ 2021 ຍັງມີການເຕີບໂຕຢູ່; ລວມຍອດຜະລິດຕະພັນພາບໃນຂອງນະຄອນຫຼວງ ເພີ່ມຂຶ້ນ 2,92%; ຮັບປະກັນຄວາມສົມດຸນຂອງງົບປະມານ. ລາຍຮັບງົບປະມານແຫ່ງລັດທັງໝົດໃນຮ່າໂນ້ຍລື່ນກາຍ 12,3% ເມື່ອທຽບກັບຄາດໝາຍທີ່ກຳນົດໂດຍສູນກາງ, ເກີນ 5,3% ຂອງຄາດໝາຍທີ່ກຳນົດໂດຍສະພາປະຊາຊົນນະຄອນ, ຕອບສະໜອງຄວາມຕ້ອງການຂອງການລົງທຶນພັດທະນາ, ລາຍຈ່າຍປະຈຳ ແລະ ໜ້າທີ່ໃຊ້ຈ່າຍຕາມການຄາດຄະເນ, ໂດຍສະເພາະແມ່ນໜ້າທີ່ໃຊ້ຈ່າຍເພື່ອປ້ອງກັນແລະຄວບຄຸມການແຜ່ບະບາດຂອງພະຍາດໂຄວິດ-19, ເພື່ອຄວາມປອດໄພທາງສັງຄົມ... ໃນຊຸມປີທີ່ຜ່ານມາມໍ່ນີ້, ຮ່າໂນ້ຍໄດ້ພັດທະນາບັນດາຂະແໜງອຸດສາຫະກຳວັດທະນະທຳເທື່ອລະກ້າວ ແລະ ພ້ອມກັນກັບນະຄອນໂຮ່ຈີມິນ - ນຳໜ້າທົ່ວປະເທດໃນທິດທາງໃໝ່ນີ້.
ໃນຖານະທີ່ເປັນສະຖານທີ່ພົບປະຂອງຕາເວັນອອກແລະຕາເວັນຕົກ, ຮ່າໂນ້ຍເປັນນະຄອນທີ່ມີຄວາມຫຼາກຫຼາຍ. ດ້ວຍລະບົບມໍລະດົກທີ່ໜາແໜ້ນ (ມີມໍລະດົກ 5.922 ລາຍການ, ໃນນັ້ນ ມໍລະດົກວັດທະນະທໍາໂລກ 1 ແຫ່ງ (ລາຊະວັງທັງລອງ); 3 ມໍລະດົກວັດທະນະທຳບໍ່ມີຕົວຕົນທີ່ເປັນຕົວແທນຂອງວັດທະນະທຳມະນຸດ; 1 ມໍລະດົກສາລະຄະດີໂລກ; ອະນຸສອນສະຖານແຫ່ງຊາດພິເສດ 19 ແຫ່ງ ແລະ ອະນຸສອນສະຖານແຫ່ງຊາດກວ່າພັນແຫ່ງ), ມີໂຄງສ້າງພື້ນຖານທາງວັດທະນະທຳທີ່ອຸດົມສົມບູນ, ເຄືອຂ່າຍບ້ານຫັດຖະກໍາ 1.350 ແຫ່ງທີ່ກະຈາຍຢູ່ຕາມຖະໜົນແລະບ້ານຕ່າງໆ ພ້ອມທັງ 70 ພື້ນທີ່ສ້າງສັນທີ່ມີຫຼາຍສີສັນ, ຮ່າໂນ້ຍໄດ້ແລະກຳລັງກາຍເປັນສະຖານທີ່ບຳລຸງສ້າງ, ເຕົ້າໂຮມ ແລະ ຊຸກຍູ້ການປະດິດສ້າງ. ການອອກແບບສ້າງສັນມີຢູ່ທຸກຖະໜົນຫົນທາງ, ຕັ້ງແຕ່ໂຄງສ້າງພື້ນຖານໃນເມືອງທີ່ມີສະຖາປັດຕະຍະກຳ “ຊັ້ນປະຫວັດສາດ” ຈົນເຖິງໂຄງສ້າງພື້ນຖານທາງວັດທະນະທຳທີ່ຫຼາກຫຼາຍ ແລະ ອຸດົມສົມບູນ, ເຊິ່ງປະກອບສ່ວນສ້າງການເຊື່ອມໂຍງທີ່ກົມກຽວກັນໃນຊີວິດລະຫວ່າງທຳມະຊາດກັບມະນຸດ. ການອອກແບບສ້າງສັນຍັງເປັນປັດໄຈສຳຄັນ ໃນການສ້າງເອກະລັດສະເພາະ ໃຫ້ຮ່າໂນ້ຍຮັກສາປະເພນີ, ກຳນົດປະຈຸບັນ ແລະ ມຸ່ງໄປສູ່ອະນາຄົດ.
ຮ່າໂນ້ຍແມ່ນນະຄອນທີ່ມີໂຄງປະກອບປະຊາກອນທອງ (51,7% ຂອງປະຊາກອນໄວໜຸ່ມສາວ) ແລະ ມີວິສາຫະກິດເກືອບ 1.300 ແຫ່ງທີ່ດຳເນີນງານດ້ານການອອກແບບສ້າງສັນ. ນະຄອນຫຼວງຍັງເປັນສະຖານທີ່ທີ່ເຕົ້າໂຮມຜູ້ມີພອນສະຫວັນ ດ້ວຍ 65% ຂອງປັນຍາຊົນ ແລະນັກວິທະຍາສາດໃນປະເທດ; ຫຼາຍກວ່າ 80% ຂອງສູນຄົ້ນຄວ້າ, ສະຖາບັນວິທະຍາສາດ, ມະຫາວິທະຍາໄລ ແລະວິທະຍາໄລ. ຮ່າໂນ້ຍໄດ້ຮັບການຮັບຮູ້ຈາກເພື່ອນມິດສາກົນວ່າ ເປັນນະຄອນທີ່ສະຫງ່າງາມ ມີອາລະຍະທຳ ທັນສະໄໝ ແລະ ມີຫົວຄິດປະດິດສ້າງ, ແມ່ນສະມາຊິກທີ່ແຂງຂັນໃນການເຄື່ອນໄຫວຮ່ວມມືສາກົນ. ຊາວຮ່າໂນ້ຍເປັນທີ່ຮູ້ຈັກສະເໝີວ່າ ມີຄວາມຍືດຫຍຸ່ນ ເປີດອົກເປີດໃຈ ແລະ ພ້ອມທີ່ຈະຮັບເອົາແນວຄິດໃໝ່ໆ. ສິ່ງເຫຼົ່ານີ້ແມ່ນທ່າແຮງແລະແຫຼ່ງກຳລັງສຳຄັນຂອງຮ່າໂນ້ຍ ໃນການເຊື່ອມຕໍ່ສາກົນ ພັດທະນາຂະແໜງການອຸດສາຫະກໍາວັດທະນະທໍາ ແລະ ອຸດສາຫະກໍາສ້າງສັນ.
ໃນຊຸມປີທີ່ຜ່ານມາ, ນະຄອນຫຼວງໄດ້ພະຍາຍາມຊຸກຍູ້ການເຄື່ອນໄຫວຮ່ວມມືສາກົນໃນຂົງເຂດສ້າງສັນ, ພິເສດແມ່ນການຮ່ວມມືກັບບັນດາສະມາຊິກເຄືອຂ່າຍນະຄອນສ້າງສັນຂອງຢູເນສໂກ, ລວມມີ ແບກລິນ, ເຊີອູນ, ໂກເບ, ສິງກະໂປ... ຄຽງຄູ່ກັບການຮັກສາເອກະລັກດັ້ງເດີມ, ຮ່າໂນ້ຍກຳລັງກາຍເປັນ “ສູນບົ່ມເພາະ” ຄວາມຄິດສ້າງສັນທົ່ວປະເທດ ແລະ ໂດຍສະເພາະແມ່ນ ດຶງດູດໄວໜຸ່ມ. ອາດເວົ້າໄດ້ວ່າ ຮ່າໂນ້ຍຍາມໃດກໍ່ຮັບຮູ້ໄດ້ບັນດາຄຸນຄ່າດັ້ງເດີມ ແລະຄຸນຕ່າທັນສະໄໝ ເພື່ອສ້າງພາບລັກສະນະ ແລະໃບໜ້າໃໝ່ໃຫ້ແກ່ຕົນເອງ.
ພາຍຫຼັງກວ່າ 2 ປີແຫ່ງການເຂົ້າຮ່ວມໃນເຄືອຂ່າຍນະຄອນສ້າງສັນຂອງຢູເນສໂກ, ຮ່າໂນ້ຍໄດ້ຜັນຂະຫຍາຍບັນດາວິທີແກ້ໄຂ ແລະ ການປ່ຽນແປງໃໝ່ເທື່ອລະກ້າວ: ຄະນະພັກນະຄອນຮ່າໂນ້ຍໄດ້ພິຈາລະນາແລະຮັບຮອງເອົາມະຕິກ່ຽວກັບ “ການພັດທະນາອຸດສາຫະກຳວັດທະນະທຳໃນນະຄອນຫຼວງ ໄລຍະ 2021-2025, ກຳນົດທິດຮອດປີ 2030, ວິໄສທັດຮອດປີ 2045”, ໃນນັ້ນ, ໄດ້ວາງອອກ 8 ກຸ່ມວຽກງານແລະວິທີແກ້ໄຂຫຼັກ, 42 ວຽກງານແລະວິທີແກ້ໄຂສະເພາະ. ເຖິງວ່າການແຜ່ລະບາດຂອງພະຍາດໂຄວິດ-19 ໄດ້ສົ່ງຜົນກະທົບທາງລົບເຖິງການພັດທະນາເສດຖະກິດ-ສັງຄົມກໍ່ຕາມ, ແຕ່ຮ່າໂນ້ຍຍັງຕັ້ງໜ້າປະຕິບັດຄຳໝັ້ນສັນຍາຂອງຕົນ ໂດຍຜ່ານການເຄື່ອນໄຫວທີ່ຫຼາກຫຼາຍ ເພື່ອໃຫ້ຊຸມຊົນພົວພັນກັນຢ່າງແໜ້ນແຟ້ນ, ຄ່ອຍໆສ້າງພາບພົດຮ່າໂນ້ຍ - ນະຄອນແຫ່ງການສ້າງສັນ. ເພື່ອເສີມຂະຫຍາຍ, ຂຸດຄົ້ນຄວາມສາມາດບົ່ມຊ້ອນແລະທ່າແຮງໃນຂົງເຂດການອອກແບບສ້າງສັນຢ່າງມີປະສິດທິຜົນ, ຮ່າໂນ້ຍໄດ້ຜັນຂະຫຍາຍບັນດາໂຄງການ, ແຜນງານການປ່ຽນແປງໃໝ່ປະດິດສ້າງ, ປະກອບສ່ວນສ້າງໂຄງສ້າງພື້ນຖານທີ່ທັນສະໄໝ, ພັດທະນາບັນດາພື້ນທີ່ການສ້າງສັນ. ຮ້າໂນ້ຍພວມນຳໜ້າປະເທດໃນດ້ານຈຳນວນສະຖານທີ່ສ້າງສັນ, ເປັນຕົວແທນ, ເຊັ່ນ: ພື້ນທີ່ຍ່າງອ້ອມທະເລສາບ ຮ່ວານກ໋ຽມ, ຖະໜົນຄົນຍ່າງ ຈິ້ງ ກົງເຊີນ; ພື້ນທີ່ຈິດຕະກຳຝາຜະນັງ ຟຸ່ງຮືງ, ສະຫະກອນປ່ຽງຜ້າສິລະຫະ (ພາບປະດິດຜ້າ), ໂຄງການສິ່ງທີ່ຍອດຍິ່ງຂອງບ້ານຫັດຖະກຳຫວຽດນາມ, ພື້ນທີ່ສະຖາປັດຕະຍະກຳແລະວັດທະນະທຳ ຂອງຫໍພິພິທະພັນຮ່າໂນ້ຍ... ໃນເວລາທີ່ຜ່ານມາ, ຍ້ອນຜົນກະທົບຈາກການແຜ່ລະບາດຂອງພະຍາດໂຄວິດ-19, ຫຼາຍອົງການຈັດຕັ້ງແລະບຸກຄົນໄດ້ຫັນຂໍ້ມູນ ໂຄງການ ແລະ ການເຄື່ອນໄຫວວັດທະນະທຳ ເປັນດິຈີຕອນ ໂດຍຜ່ານອິນເຕີເນັດ ເຊິ່ງໄດ້ດຶງຕູດຄວາມສົນໃຈແລະການປະຕິສຳພັນ ຂອງສາທາລະນະຊົນຢ່າງຫຼວງຫຼາຍ. ຮ່າໂນ້ຍພວມຕັ້ງໜ້າພະຍາຍາມຂຸດຄົ້ນ ແລະ ຫັນບັນດາແຫຼ່ງຊັບພະຍາກອນວັດທະນະທຳ ເປັນກຳລັງແຮງ, ເປັນກຳລັງໜູນໃຫ້ແກ່ການພັດທະນາຂອງນະຄອນຫຼວງ.
ອາດຈະເຫັນໄດ້ວ່າ, ຮ່າໂນ້ຍໄດ້ແລະກຳລັງສະແດງໃຫ້ເຫັນຢ່າງຈະແຈ້ງເຖິງທັດສະນະ, ຍຸດທະສາດ ແລະ ທິດທາງການພັດທະນາ. ຍຸດທະສາດນີ້ສະແດງໃຫ້ເຫັນວິໄສທັດໃນການສົ່ງເສີມເອກະລັກຂອງນະຄອນຫຼວງ. ນີ້ແມ່ນໜຶ່ງໃນບັນດາໄມ້ງັດໃຫຍ່ແລະ ສຳຄັນ ຊ່ວຍໃຫ້ຮ່າໂນ້ຍປະຕິບັດບັນດາເປົ້າໝາຍ, ໜ້າທີ່ການພັດທະນານະຄອນຫຼວງຢ່າງຍືນຍົງ, ແມ່ນກຳລັງໜູນເພື່ອໃຫ້ຮ່າໂນ້ຍມີການປ່ຽນແປງຍຸດທະສາດໃນຊຸມປີຕໍ່ໄປ, ແລະ ສູ້ຊົນບັນລຸເປົ້າໝາຍການພັດທະນານະຄອນຫຼວງຮ່າໂນ້ຍຮອດປີ 2030 ວິໄສທັດຮອດປີ 2045 ທີ່ກຳນົດໂດຍກອງປະຊຸມໃຫຍ່ຜູ້ແທນຄະນະພັກນະຄອນຮ່າໂນ້ຍຄັ້ງທີ 17 - ຮ່າໂນ້ຍກາຍເປັນນະຄອນທີ່ເຊື່ອມຕໍ່ທົ່ວໂລກ, ພ້ອມກັນນັ້ນ ປະກອບສ່ວນຢ່າງຕັ້ງໜ້າ ເຂົ້າໃນຍຸດທະສາດວັດທະນະທຳການຕ່າງປະເທດແຫ່ງຊາດ ໃນຍຸກໂລກາພິວັດ ແລະ ການເຊື່ອມໂຍງສາກົນຢ່າງເລິກເຊິ່ງ.
ການປະດິດສ້າງ - ປັດໄຈສຳຄັນໃນການພັດທະນາ,
ການປະຕິບັດວິໄສທັດຍຸດທະສາດ, ຍົກສູງຄຸນນະພາບຊີວິດຂອງປະຊາຊົນ
ຈຸດສຸມຂອງຮ່າໂນ້ຍ ແມ່ນວາງຄວາມຄິດປະດິດສ້າງ, ໂດຍສະເພາະຢ່າງຍິ່ງທັດສະນະການອອກແບບ, ເປັນຈຸດໃຈກາງຂອງການພັດທະນານະຄອນແບບຍືນຍົງ, ດ້ວຍວິໄສທັດອັນກວ້າງໄກເພື່ອໃຫ້ຮ່າໂນ້ຍກາຍເປັນນະຄອນສ້າງສັນ ຂອງອາຊີຕາເວັນອອກສ່ຽງໃຕ້. ດ້ວຍຖານະເປັນນະຄອນຫຼວງ, ຮ່າໂນ້ຍມີທ່າໄດ້ປຽບໃນການຕິດຕໍ່ພົວພັນກັບຫຼາຍອົງການແລະ ບຸກຄົນຢູ່ໃນແລະຕ່າງປະເທດ ທີ່ມີຄວາມສາມາດໃນການກຳນົດນະໂຍບາຍ ແລະສ້າງເຄືອຂ່າຍການຮ່ວມມືທີ່ຫຼາກຫຼາຍ ອຸດົມສົມບູນ; ດັ່ງນັ້ນ, ຮ່າໂນ້ຍມີແຜນນະໂຍບາຍເສີມຂະຫຍາຍສຸດຂີດ ປະສິດທິຜົນການພົວພັນມິດຕະພາບ ແລະ ການຮ່ວມມືກັບ 100 ກວ່າຕົວເມືອງ, ນະຄອນຫຼວງຂອງເກືອບ 200 ປະເທດແລະອານາເຂດ, ໂດຍສະເພາະແມ່ນບັນດາສະມາຊິກຂອງເຄືອຂ່າຍນະຄອນສ້າງສັນຂອງຢູເນສໂກ.
ເພື່ອສ້າງແລະຮັກສາເຄື່ອງໝາຍນະຄອນສ້າງສັນໃຫ້ປະສົບຄວາມສຳເລັດ, ຮ່າໂນ້ຍໄດ້ຜັນຂະຫຍາຍ ແຜນປະຕິບັດງານສະເພາະແບບຍຸດທະສາດ, ໃນນັ້ນ ຮ່າໂນ້ຍໄດ້ເຄື່ອນໄຫວຊຸກຍູ້ແລະດຳເນີນການກໍ່ສ້າງສູນອອກແບບສ້າງສັນ, ຕົວເມືອງສະຫຼາດ, ບັນດາໂຄງການຫັນເປັນດີຈີຕອນ... ໜຶ່ງໃນບັນດາໂຄງການສຳຄັນທີ່ນະຄອນຮ່າໂນ້ຍຈະດຳເນີນການຄື ການກໍ່ຕັ້ງສູນອອກແບບສ້າງສັນ ໂດຍມີເປົ້າໝາຍໃນການບົ່ມເພາະຜູ້ມີຄວາມສາມາດ ໃນບັນດາຂົງເຂດທີ່ມີຄວາມກ່ຽວຂ້ອງກັບການອອກແບບສ້າງສັນ ຢູ່ຮ່າໂນ້ຍ. ໃນທີ່ນີ້, ບັນດາໂຄງການສ້າງສັນທີ່ມີທ່າແຮງ, ບັນດາໂຄງການຊຸມຊົນ ຈະໄດ້ຮັບການສະໜັບສະໜູນສູງສຸດສຳລັບການພັດທະນາ. ພິເສດ, ໃນເວລາຕໍ່ໜ້າ, ຮ່າໂນ້ຍຈະໃຫ້ຄວາມສຳຄັນແລະເອົາໃຈໃສ່ ສົ່ງເສີມພິເສດໃຫ້ເດັດນ້ອຍ, ແມ່ຍິງ ແລະ ກຸ່ມຜູ້ດ້ອຍໂອກາດ ເຂົ້າຮ່ວມໃນຂົງເຂດການອອກແບບສ້າງສັນ. ພ້ອມກັນນັ້ນ, ຮ່າໂນ້ຍຈະຜັນຂະຫຍາຍການສ້າງທົດລອງ ບາງຮູບແບບທີ່ມີຄວາມສາມາດບົ່ມຊ້ອນ ມີທ່າແຮງ, ເຊັ່ນ: ຮູບແບບສູນສ້າງສັນເຍົາວະຊົນ, ຍູ້ແຮງການຮ່ວມມືພາກລັດ-ເອກະຊົນຢູ່ເຂດອານແຂງເໜືອ, ເມືອງຮ່ວາຍດຶກ; ກໍ່ຕັ້ງສູນອອກແບບສ້າງສັນແລະແນະນຳຜະລິດຕະພັນຂອງໝູ່ບ້ານຫັດຖະກຳພາກໃຕ້ຮ່າໂນ້ຍ ໃນເມືອງ ຝູຊວຽນ...
ຮ່າໂນ້ຍສຸມໃສ່ຄົ້ນຄວ້າວາງແຜນພື້ນທີ່ວັດທະນະທໍາ, ການເຊື່ອມຕໍ່ລະຫວ່າງທ້ອງຖິ່ນເພື່ອລວມເຂົ້າໃນການວາງແຜນທົ່ວໄປ; ຄົ້ນຄວ້າຮູບແບບການຫັນປ່ຽນ ແລະ ປັບປຸງມໍລະດົກວັດທະນະທຳ ໃຫ້ເປັນພື້ນທີ່ວັດທະນະທຳ. ນະຄອນຈະສືບຕໍ່ເສີມຂະຫຍາຍບັນດາພື້ນທີ່ວັດທະນະທຳໃໝ່ ເຊັ່ນການກໍ່ຕັ້ງລະບົບບັນດາພື້ນທີ່ຍ່າງໃໝ່: ເຂດຕົວເມືອງທາງໃຕ້ ຖະໜົນວົງແຫວນ 3 - ບີເຕສໂກ; ພື້ນທີ່ຍ່າງອ້ອມທະເລສາບທ່ຽນກວາງ - ສວນສາທາລະນະຖົງເຍິ້ດ; ພື້ນທີ່ຍ່າງອ້ອມ ວັນໝຽວ - ກວັກຕື໋ຢ້າມ; ພື້ນທີ່ຍ່າງຢູ່ເຂດອານແຂງເໜືອ - ສະແປຼນໂດຣາ; ພື້ນທີ່ຍ່າງຢູ່ເຂດກຳແພງເກົ່າ ເຊີນໄຕ,... ດ້ວຍບັນດາການເຄື່ອນໄຫວວັດທະນະທຳ, ສິລະປະພິເສດ ເພື່ອແນໃສ່ເສີມຂະຫຍາຍຄຸນຄ່າມໍລະດົກ ວັດທະນະທຳຂອງທ້ອງຖິ່ນ ເພື່ອສ້າງການເຄື່ອນໄຫວອອກແບບສ້າງສັນໃນວັດທະນະທຳ, ອາຊີບຫັດຖະກຳຮັບໃຊ້ການທ່ອງທ່ຽວ ການຄ້າ ແລະ ພັດທະນາເສດຖະກິດຂອງທ້ອງຖິ່ນ.
ໃນເວລາທີ່ຈະມາເຖິງ, ນະຄອນຮ່າໂນ້ຍຈະໃຫ້ຄວາມສຳຄັນກັບການກໍ່ຕັ້ງແລະການພັດທະນາຢ່າງແຂງແຮງ ລະບົບເຄືອຂ່າຍນັກອອກແບບສ້າງສັນໄວໜຸ່ມ - ຊັບພະຍາກອນມະນຸດທີ່ອຸດົມສົມບູນ, ທ່າແຮງ ແລະ ມີພ້ອມ ຂອງຮ່າໂນ້ຍ. ເພື່ອສົ່ງເສີມຄວາມຄິດສ້າງສັນຂອງເຍົາວະຊົນ, ຮ່າໂນ້ຍກຳລັງຜັນຂະຫຍາຍຫຼາຍໂຄງການທີ່ສຳຄັນ, ສຸມໃສ່ຊາວໜຸ່ມ ນັກຮຽນ ແລະ ເຍົາວະຊົນ, ເຊັ່ນ: ການສ້າງໂຄງການເພື່ອບົ່ມເພາະ ແລະ ເລັ່ງການເລີ່ມຕົ້ນທຸລະກິດສ້າງສັນ ໃນມະຫາວິທະຍາໄລ ສະຖາບັນການສຶກສາ ແລະ ວິທະຍາໄລຕ່າງໆ; ກໍ່ສ້າງພື້ນຖານທັກສະການເຮັດວຽກ ແລະການເລີ່ມທຸລະກິດ ໃຫ້ນັກຮຽນ ນັກສຶກສາ ແລະ ສະໂມສອນການຫັນປ່ຽນດິຈີຕອນ ໃນມະຫາວິທະຍາໄລ ສະຖາບັນການສຶກສາ ແລະ ວິທະຍາໄລ ໃນນະຄອນ; ສ້າງພື້ນທີ່ເພື່ອໜູນຊ່ວຍຊາວໜຸ່ມນະຄອນຫຼວງໃນດ້ານການເລີ່ມຕົ້ນທຸລະກິດ, ການປ່ຽນແປງໃໝ່ປະດິດສ້າງ ແລະ ການຫັນປ່ຽນດິຈີຕອນ; ຈັດຕັ້ງກິດຈະກຳ ແລະ ການແຂ່ງຂັນລະດັບນະຄອນ ເພື່ອດຶງດູດການເຂົ້າຮ່ວມສາກົນກ່ຽວກັບການເລີ່ມຕົ້ນທຸລະກິດ, ການປ່ຽນແປງໃໝ່ປະດິດສ້າງ ແລະ ການຫັນປ່ຽນດິຈີຕອນ ສຳລັບນັກທຸລະກິດ ຊາວໜຸ່ມ ນັກຮຽນ ແລະ ນັກສຶກສາ... ນີ້ແມ່ນໜຶ່ງໃນບັນດາບາດກ້າວບຸກທະລຸໃໝ່ທີ່ສຳຄັນຂອງຮ່າໂນ້ຍ ເພື່ອສ້າງແລະພັດທະນາ “ນະຄອນສ້າງສັນ”.
ພ້ອມກັນນັ້ນ, ຮ່າໂນ້ຍສືບຕໍ່ເປັນສະມາຊິກທີ່ຕັ້ງໜ້າແລະມີຄວາມຮັບຜິດຊອບ ຂອງບັນດາກອງປະຊຸມ, ເວທີປາໄສເຄືອຂ່າຍໃນອາຊີຕາເວັນອອກສ່ຽງໃຕ້, ອາຊີ ແລະ ທົ່ວໂລກ ຕາມໂຄງການຕ່າງໆຂອງຢູເນສໂກ. ສ້າງບົດລາຍງານການຕິດຕາມກວດກາສະມາຊິກ ຕາມຄວາມຕ້ອງການຂອງຢູເນສໂກໃນໄລຍະ.
ນອກຈາກນັ້ນ, ເພື່ອສ້າງນະຄອນຮ່າໂນ້ຍໃຫ້ກາຍເປັນສູນກາງການບໍລິການຄຸນນະພາບສູງ ຂອງພາກພື້ນແລະທົ່ວໂລກ, ຮ່າໂນ້ຍຕ້ອງເອົາໃຈໃສ່ພັດທະນາການບໍລິການຄຸນນະພາບສູງ ແລະ ສືບຕໍ່ປັບໂຄງສ້າງການຄ້າ, ການບໍລິການຄືນໃໝ່. ຕາມນັ້ນ, ຍູ້ແຮງການພັດທະນາຂະແໜງການບໍລິການ, ປະກອບສ່ວນຍົກອັດຕາສ່ວນຂອງຂະແໜງການບໍລິການໃນລວມຍອດຜະລິດຕະພັນພາຍໃນ ຂຶ້ນປະມານ 65% - 65,5% ໃນປີ 2025 ດ້ວຍອັດຕາການເຕີບໂຕສະເລ່ຍ 8% - 8,5% ຕໍ່ປີ. ພັດທະນາບັນດາຮູບແບບບໍລິການທີ່ມີຄຸນຄ່າເພີ່ມສູງ, ໂດຍສະເພາະ ບັນດາການບໍລິການຕົວເມືອງ, ບໍລິການຂັ້ນສູງເຊັ່ນ: ການເງິນ, ທະນາຄານ, ປະກັນໄພ, ການບໍລິການໃຫ້ຄໍາປຶກສາ, ບໍລິການທາງການແພດຄຸນນະພາບສູງ,... ເພື່ອສ້າງຄວາມຕ້ອງການຕະຫຼາດປະເພດອື່ນໆ ເພື່ອການພັດທະນາ. ພັດທະນາການຄ້າເອເລັກໂຕຣນິກ, ເປີດຄວາມຫຼາກຫຼາຍຂອງຮູບການການຊຳລະ ບົນພື້ນຖານດິຈີຕອນ, ສ້າງປະຖົມປັດໄຈໃຫ້ແກ່ການພັດທະນາເສດຖະກິດດິຈີຕອນ, ເຊັ່ນ: ນຳໃຊ້ການບໍລິການ internet-banking, mobile-banking, ກະເປົ໋າເອເລັກໂຕຣນິກ, ບັດເງິນ,... ເພື່ອຕອບສະໜອງຄວາມຕ້ອງການທີ່ຫຼາກຫຼາຍຂອງລູກຄ້າ, ໂດຍສະເພາະການໃຊ້ປະໂຫຍດຈາກເວັບໄຊຕ໌/ແອບອີຄອມເມີຣ໌ຊຫຼາຍກວ່າ 11.000 ແຫ່ງໃນຮ່າໂນ້ຍ.
ສ້າງການຄ້າຮູບແບບໃໝ່ໃນພື້ນທີ່ (ສູນການຄ້າ Outlet; ລະບົບຕ່ອງໂສ້ຂອງຮ້ານສະດວກຊື້ທີ່ມີທຸລະກໍາອັດຕະໂນມັດໂດຍບໍ່ມີຜູ້ຂາຍ; ລະບົບຕູ້ຂາຍເຄື່ອງ,...) ຄຽງຄູ່ກັບການພັດທະນາການຄ້າແບບດັ້ງເດີມ, ລະບົບຊຸເປີຣ໌ມາຣ໌ເກັດ, ຕະຫຼາດຊຸມຊົນ. ສ້າງແລະຍົກສູງຄວາມສາມາດຂອງເຄືອຂ່າຍບໍລິການຂົນສົ່ງ, ສຸມໃສ່ຍູ້ແຮງໂຄງການພັດທະນາໂຄງສ້າງພື້ນຖານການຂົນສົ່ງທີ່ສຳຄັນ ເພື່ອອຳນວຍຄວາມສະດວກ ໃຫ້ແກ່ການພັດທະນາການຄ້າ ແລະ ເພີ່ມລາຍຮັບເຂົ້າງົບປະມານ. ປ່ຽນແປງໃໝ່ແບບວິທີ, ປ່ຽນແປງນິໄສ ແລະ ພຶດຕິກໍາທາງການຄ້າ ໄປສູ່ອາລະຍະທໍາແລະທັນສະໄໝ. ສຸມໃສ່ການດຶງດູດບໍລິສັດຂ້າມຊາດຂະໜາດໃຫຍ່ ທີ່ມີເຕັກໂນໂລຊີຂັ້ນສູງ ການຄຸ້ມຄອງທີ່ທັນສະໄໝ, ການເຊື່ອມໂຍງຕ່ອງໂສ້ການສະໜອງທົ່ວໂລກ, ຮັບປະກັນຄວາມຕ້ອງການດ້ານສິ່ງແວດລ້ອມ; ສູ້ຊົນກໍ່ສ້າງຮອດປີ 2025 ນະຄອນຮ່າໂນ້ຍກາຍເປັນສູນກາງການຄ້າ ແລະ ເສດຖະກິດທີ່ສຳຄັນຂອງທັງປະເທດ ແລະ ອາຊີຕາເວັນອອກສ່ຽງໃຕ້.
ສືບຕໍ່ຍົກສູງຄວາມສາມາດແລະຄຸນນະພາບການເຊື່ອມໂຍງເຂົ້າກັບສາກົນ; ເປັນເຈົ້າການໃນການກຳກາລະໂອກາດ, ໂດຍສະເພາະແມ່ນ ໂອກາດຈາກບັນດາສັນຍາເສລີ CPTPP, EVFTA, EVIPA,... ເພື່ອຮັບໃຊ້ການພັດທະນານະຄອນຫຼວງ. ເສີມຂະຫຍາຍການພົວພັນທີ່ໄດ້ຮັບການສ້າງຕັ້ງຂຶ້ນແລ້ວ ແລະ ຕັ້ງໜ້າຂະຫຍາຍການຮ່ວມມືກັບບັນດານະຄອນຫຼວງ, ນະຄອນທີ່ມີທ່າແຮງ; ໃຫ້ຄວາມສຳຄັນກັບການຮ່ວມມືສາກົນທາງດ້ານ ວິທະຍາສາດແລະເຕັກໂນໂລຊີ, ສົ່ງເສີມການລົງທຶນ ການຄ້າ, ສົ່ງເສີມການທ່ອງທ່ຽວ, ເພື່ອຊຸກຍູ້ການສົ່ງອອກສິນຄ້າແລະບໍລິການ, ດຶງດູດການລົງທຶນຈາກຕ່າງປະເທດ ແລະ ການສະໜັບສະໜູນຈາກສາກົນ.
ຮັກສາແລະພັດທະນາເຄື່ອງໝາຍ “ນະຄອນສ້າງສັນ”,
ປະກອບສ່ວນພັດທະນາເຂດນະຄອນຫຼວງຢ່າງຍືນຍົງ
ເພື່ອຮັກສາແລະພັດທະນາເຄື່ອງໝາຍ “ນະຄອນສ້າງສັນ” ໃນຂົງເຂດການອອກແບບ, ປະກອບສ່ວນພັດທະນານະຄອນຫຼວງຢ່າງຍືນຍົງ, ຮ່າໂນ້ຍສືບຕໍ່ປະຕິບັດຫຼາຍມາດຕະການແກ້ໄຂທີ່ຄົບຊຸດ, ຄື:
ທີໜຶ່ງ, ຍູ້ແຮງວຽກງານສື່ຂ່າວ ໂຄສະນາການ ຜ່ານສື່ມວນຊົນ ປະກອບສ່ວນຍົກສູງຄວາມຮັບຮູ້ ແລະ ຄວາມຮັບຜິດຊອບຂອງທຸກຂັ້ນ ຂະແໜງການ ວິສາຫະກິດ ແລະ ປະຊາຊົນຂອງນະຄອນຫຼວງ ກ່ຽວກັບການພັດທະນາເຄື່ອງໝາຍ “ນະຄອນສ້າງສັນ”, ມີຄວາມຮັບຮູ້ຢ່າງຈະແຈ້ງກ່ຽວກັບ ບົດບາດແລະຄວາມໝາຍ ຂອງການປະດິດສ້າງ, ການພັດທະນາພື້ນທີ່ສ້າງສັນ, ຂະແໜງອຸດສາຫະກໍາວັດທະນະທໍາ ທີ່ມີຕໍ່ການພັດທະນານະຄອນຫຼວງ ບົນພື້ນຖານການຫັນປ່ຽນ “ແຫຼ່ງຊັບພະຍາກອນວັດທະນະທຳ” ໃຫ້ເປັນຊັບພະຍາກອນພາຍໃນ, “ພະລັງນຸ້ມນວນ” ທີ່ປະກອບສ່ວນພັດທະນານະຄອນຫຼວງຢ່າງຍືນຍົງ. ຈາກນັ້ນ, ນໍາເອົາຄວາມຄິດສ້າງສັນເຂົ້າໃນທຸກຍຸດທະສາດ, ແຜນແມ່ບົດ, ແຜນງານ, ແຜນປະຕິບັດການ ຂອງທຸກຂັ້ນ ທຸກຂະແໜງການ. ເສີມຂະຫຍາຍການອົບຮົມສຶກສາມູນເຊື້ອຢູ່ໃນໂຮງຮຽນ, ປະກອບສ່ວນຍົກສູງຄວາມຮັບຮູ້ໃຫ້ລຸ້ນໜຸ່ມ ກ່ຽວກັບເຄື່ອງໝາຍ “ນະຄອນສ້າງສັນ” ໂດຍຢູເນສໂກ ມອບໃຫ້ນະຄອນຫຼວງຮ່າໂນ້ຍ ແລະ ສ້າງຄວາມຮູ້ສຶກສະອອນໃຈ ຄວາມຮັກແພງຮ່າໂນ້ຍ, ປຸກຕື່ນເຈດຈຳນົງ ຄວາມມຸ່ງມາດປາຖະໜາຢາກບືນຕົວຂຶ້ນ ເພື່ອໃຫ້ຊາວຮ່າໂນ້ຍແຕ່ລະຄົນ ສືບຕໍ່ເສີມຂະຫຍາຍຫົວຄິດປະດິດສ້າງໃນທຸກຂົງເຂດ, ໃຫ້ຄວາມຄິດສ້າງສັນກາຍເປັນວັດຖຸ ແລະ ແຮງຊຸກຍູ້ການພັດທະນານະຄອນຫຼວງໃນຊຸມປີຕໍ່ໜ້າ, ປະກອບສ່ວນຍົກສູງຖານະບົດບາດ ແລະ ພາບພົດຂອງນະຄອນຫຼວງ ໃນສາຍຕາຂອງເພື່ອນມິດສາກົນ.
ທີສອງ, ສືບຕໍ່ກໍ່ສ້າງ, ເພີ່ມເຕີມ ແລະ ປັບປຸງບູລະນະກົນໄກ ນະໂຍບາຍການພັດທະນາບັນດາພື້ນທີ່ສ້າງສັນເວົ້າສະເພາະ, ອຸດສາຫະກຳສ້າງສັນເວົ້າລວມ ເພື່ອປັບປຸງເງື່ອນໄຂການທຸລະກິດຜະລິດຕະພັນວັດທະນະທໍາແລະການບໍລິການ, ຍົກສູງປະສິດທິຜົນ ການບັງຄັບໃຊ້ສິດຊັບສິນທາງປັນຍາແລະສິດທີ່ກ່ຽວຂ້ອງ, ຊຸກຍູ້ການແຂ່ງຂັນຢ່າງຍຸດຕິທຳໃນຕະຫຼາດ; ມີກົນໄກ ນະໂຍບາຍທີ່ເໝາະສົມ, ສ້າງສະພາບແວດລ້ອມທີ່ອຳນວຍຄວາມສະດວກ ໃຫ້ອົງການຈັດຕັ້ງ ວິສາຫະກິດ ແລະ ບຸກຄົນ ເຂົ້າຮ່ວມໃນບັນດາຂົງເຂດອຸດສາຫະກຳສ້າງສັນ, ອຸດສາຫະກຳວັດທະນະທຳ ເພື່ອການພັດທະນາ, ໂດຍສະເພາະແມ່ນ ນະໂຍບາຍບຸລິມະສິດດ້ານພາສີ, ເງິນກູ້, ການເຊົ່າທີ່ດິນ, ການຫັນເປັນສັງຄົມ, ການລົງທຶນ... ນອກຈາກນັ້ນ, ຕ້ອງຈັດສັນເງິນລົງທຶນສາທາລະນະຢ່າງເໝາະສົມ ເພື່ອສ້າງໂຄງສ້າງພື້ນຖານຂອງບັນດາຂະແໜງການສິລະປະວັດທະນະທຳ ເພື່ອເປັນພື້ນຖານໃຫ້ອຸດສາຫະກຳສ້າງສັນມີໂອກາດພັດທະນາ. ກ່ຽວກັບເລື່ອງນີ້, ຮ່າໂນ້ຍໄດ້ອອກມະຕິສະເພາະ - ມະຕິກ່ຽວກັບ “ການພັດທະນາອຸດສາຫະກຳວັດທະນະທຳຢູ່ນະຄອນຫຼວງໃນໄລຍະ 2021-2025, ກຳນົດທິດຮອດປີ 2030, ວິໄສທັດຮອດປີ 2045”.
ທີສາມ, ຍົກສູງປະສິດທິພາຍ, ປະສິດທິຜົນ ການຄຸ້ມຄອງລັດ ກ່ຽວກັບມໍລິດົກວັດທະນະທຳ. ເພີ່ມທະວີການອົບຮົມສຶກສາກ່ຽວກັບມໍລະດົກວັດທະນະທຳ ແລະ ກົດໝາຍວ່າດ້ວຍມໍລະດົກວັດທະນະທຳ. ເອົາໃຈໃສ່ອົບຮົມສຶກສາຊາວໜຸ່ມ, ຜັນຂະຫຍາຍ ຄຳຂວັນ “ມໍລະດົກຢູ່ໃນມືຂອງຄົນຮຸ່ນໃໝ່” ຂອງຢູເນສໂກ ຢ່າງມີປະສິດທິຜົນ. ຄົ້ນຄວ້າແລະນຳໃຊ້ ຜົນຂອງການຄົ້ນຄວ້າ ກ່ຽວກັບການອະນຸລັກຮັກສາມໍລະດົກ, ເອົາໃຈໃສ່ເຖິງບັນດາມາດຕະການອະນຸລັກມໍລະດົກທີ່ມີຊີວິດຊີວາ, ການອະນຸລັກຕິດພັນກັບປະຊາຄົມທ້ອງຖິ່ນ ແລະ ປະສົມກົມກຽວກັບເປົ້າໝາຍການພັດທະນາເສດຖະກິດ. ຍູ້ແຮງບັນດາມາດຕະການລະດົມຊັບພະຍາກອນສັງຄົມ ເພື່ອອະນຸລັກແລະເສີມຂະຫຍາຍ ຄຸນຄ່າມໍລະດົກວັດທະນະທຳ. ການເສີມຂະຫຍາຍບັນດາຄຸນຄ່າມໍລະດົກວັດທະນະທຳ ເປັນພື້ນຖານເພື່ອສ້າງແຮງບັນດານໃຈໃນການສ້າງສັນ ໃຫ້ກັບຂົງເຂດສ້າງສັນອື່ນໆ ເຊັ່ນ: ການອອກແບບຈິດຕະກຳ, ແຟຊັ່ນ, ບັນດາຜະລິດຕະພັນວັດທະນະທຳ... ພິເສດແມ່ນ ເພີ່ມທະວີການແລກປ່ຽນ, ຮ່ວມມື ແລະ ແລກປ່ຽນບົດຮຽນໃນການຄຸ້ມຄອງມໍລະດົກກັບບັນດາປະເທດໃນໂລກ..
ທີສີ່, ຍູ້ແຮງການສ້າງແລະພັດທະນາ “ນະຄອນສ້າງສັນ”, ປະກອບສ່ວນຊຸກຍູ້ການກໍ່ສ້າງ “ນະຄອນສະຫຼາດ”, ໃນນັ້ນ ເພີ່ມອັດຕາສ່ວນຂອງການບໍລິການສາລະນະອອນໄລນ໌, ສຸມໃສ່ການພັດທະນາວິທະຍາສາດແລະເຕັກໂນໂລຊີ, ຜັນຂະຫຍາຍໂຄງການຄົ້ນຄວ້າວິທະຍາສາດຈຸດສຸມຂອງນະຄອນຮ່າໂນ້ຍ. ປະຕິບັດການວາງແຜນໂຄງສ້າງພື້ນຖານດ້ານເຕັກນິກໂທລະຄົມມະນາຄົມແບບພາສຊີ ຢ່າງມີປະສິດທິຜົນ ເຖິງປີ 2020, ວິໄສທັດຮອດປີ 2030. ປັບປຸງບູລະນະແລະຜັນຂະຫຍາຍຢ່າງຄົບຊຸດ ບັນດາວິທີປະຍຸກໃຊ້ການຫັນເປັນດິຈີຕອນ ແລະ ການພັດທະນາເຕັກໂນໂລຊີຂໍ້ມູນຂ່າວສານ; ອັບເດດ, ໃຊ້ປະໂຫຍດ ແລະ ແບ່ງປັນບັນດາຖານຂໍ້ມູນຫຼັກ. ດຳເນີນການທົດລອງແລະເປີດກວ້າງການປະຍຸກໃຊ້ເຕັກໂນໂລຊີຂໍ້ມູນຂ່າວສານ, ລະບົບຂໍ້ມູນຂ່າວສານໃນສາຂາສະເພາະ ແລະ ບັນດາການປະຍຸກນະຄອນສະຫຼາດ.
ທີຫ້າ, ຍູ້ແຮງການຮ່ວມມື ແລະ ພົວພັນແລກປ່ຽນຢູ່ໃນປະເທດແລະສາກົນຢ່າງຮອບດ້ານ. ດ້ານໜຶ່ງ, ຕັ້ງໜ້າສະໜັບສະໜູນແລະຊຸກຍູ້ໃຫ້ນະຄອນອື່ນໆຂອງຫວຽດນາມ ເຂົ້າຮ່ວມໃນເຄືອຂ່າຍນະຄອນສ້າງສັນຂອງຢູເນສໂກ; ອີດດ້ານໜຶ່ງ, ເພີ່ມທະວີການສ້າງໂຄງການແລກປ່ຽນ, ເຊື່ອມໂຍງກັບບັນດານະຄອນສ້າງສັນໃນພາກພື້ນແລະທົ່ວໂລກ. ຕັ້ງໜ້າແລກປ່ຽນ, ຊຸກຍູ້ການອອກແບບ ແລະ ການປ່ຽນແປງໃໝ່ປະດິດສ້າງໃນພາກພື້ນອາຊີຕາເວັນອອກສ່ຽງໃຕ້; ເປັນເຈົ້າການໃນການເຂົ້າຮ່ວມຢ່າງຕັ້ງໜ້າ ແລະມີຄວາມຮັບຜິດຊອບ ໃນກິດຈະກຳຕ່າງໆ ຂອງລະບົບເຄືອຂ່າຍນະຄອນສ້າງສັນຂອງຢູເນສໂກ.
ທັງລອງ - ຮ່າໂນ້ຍແມ່ນຈຸດເຊື່ອມຕໍ່ລະຫວ່າງມູນເຊື້ອແລະຄວາມທັນສະໄໝ, ອະດີດ ແລະ ອະນາຄົດ, ລະຫວ່າງວັດທະນະທຳທີ່ອຸດົມສົມບູນ ແລະ ກະແສຄວາມຄິດສ້າງສັນທີ່ບໍ່ສິ້ນສຸດ. ສືບຕໍ່ມູນເຊື້ອອາລະຍະທຳ, ວິລະຊົນ, ສັນຕິພາບ ແລະ ມິດຕະພາບ; ເສີມຂະຫຍາຍຄວາມສາມາດບົ່ມຊ້ອນ, ແຫຼ່ງພະລັງສ້າງສັນທີ່ໄດ້ຫຼໍ່ຫຼອມມາກວ່າພັນປີ ແລະ ປຸກຕື່ນເຈດຈຳນົງ, ຄວາມມຸ່ງມາດປາຖະໜາຢາກບືນຕົວຂຶ້ນ, ຮ່າໂນ້ຍຈະປະຕິບັດວິໄສທັດຍຸດທະສາດໃຫ້ເປັນຈິງເທື່ອລະກ້າວ, ສົມຄວນເປັນນະຄອນຫຼວງ, ຫົວໃຈຂອງປະເທດ, ບົດບາດນຳໜ້າ, ທີ່ຕັ້ງເປັນສູນກາງການເມືອງ ການບໍລິຫານ ຂອງປະເທດ, ສູນກາງວັດທະນະທຳ, ວິທະຍາສາດ, ການສຶກສາ, ເສດຖະກິດ ແລະ ການຄ້າສາກົນທີ່ສຳຄັນ./.
--------------------
(1) ເຄືອຂ່າຍນະຄອນສ້າງສັນຂອງຢູເນສໂກເກີດຂຶ້ນແຕ່ປີ 2004, ໂດຍມີເປົ້າໝາຍຊຸກຍູ້ການຮ່ວມມືສາກົນ ລະຫວ່າງບັນດານະຄອນທີ່ມີກຽດ ດ້ວຍຈຸດປະສົງສົ່ງເສີມແຫຼ່ງກຳລັງວັດທະນະທຳ ແລະ ຄວາມປະດິດສ້າງວັດທະນະທຳ ເພື່ອເປັນພື້ນຖານຂອງຂະບວນການພັດທະນາຕົວເມືອງຢ່າງຍືນຍົງ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 987 (ເດືອນເມສາ 2022)