ວກ - ຊັບສິນສາທາລະນະ ໝາຍເຖິງຊັບສິນທີ່ເປັນຂອງປະຊາຊົນທັງໝົດ ແລະ ຄຸ້ມຄອງໂດຍລັດໃນນາມຂອງເຈົ້າຂອງ ແລະ ຄຸ້ມຄອງຢ່າງເປັນເອກະພາບ. ຊັບສິນສາທາລະນະມີບົດບາດສຳຄັນພິເສດ ໃນການພັດທະນາຂອງແຕ່ລະປະເທດ. ຢ່າງໃດກໍຕາມ, ຊັບສິນສາທາລະນະຈະສູນເສຍໄປຢ່າງງ່າຍ ຍ້ອນການກະທຳສໍ້ລາດບັງຫຼວງ ແລະການສະແຫວງຫາຜົນປະໂຫຍດ ຂອງເຈົ້າໜ້າທີ່ທີ່ເສື່ອມໂຊມປ່ຽນທາດແລະທຸຈະລິດ. ດັ່ງນັ້ນ, ວຽກງານການກໍ່ສ້າງຖັນແຖວພະນັກງານ, ລັດຖະກອນ, ພາລະກອນທີ່ໃສສະອາດແລະຊື່ສັດທ່ຽງທຳ ໃນຂົງເຂດການຄຸ້ມຄອງແລະການໃຊ້ຊັບສິນສາທາລະນະ ຈຶ່ງມີຄວາມສຳຄັນທີ່ສຸດ, ປະກອບສ່ວນທີ່ບໍ່ໜ້ອຍເຂົ້າໃນການຕໍ່ສູ້ປ້ອງກັນແລະຕ້ານ ກຸ່ມຜູ້ສະແຫວງຫາຜົນປະໂຫຍດຢູ່ຫວຽດນາມໃນປະຈຸບັນ.

ແນວຄິດໂຮ່ຈີມິນ ແລະ ທັດສະນະ ແນວທາງຂອງພັກ
ກ່ຽວກັບການກໍ່ສ້າງຖັນແຖວພະນັກງານ, ລັດຖະກອນ, ພາລະກອນ
ທີ່ໃສສະອາດ
, ຊື່ສັດທ່ຽງທຳ, ປະຕິເສດ “ກຸ່ມຜູ້ສະແຫວງຫາຜົນປະໂຫຍດ”
ໃນຂົງເຂດການຄຸ້ມຄອງແລະການໃຊ້ຊັບສິນສາທາລະນະ

ໃນ​ໄລ​ຍະ​ຊີ​ວິດ​ຂອງ​ທ່ານ, ປະທານ​ໂຮ່ຈິີມິນ ຍາມ​ໃດ​ກໍ່​ເອົາ​ໃຈ​ໃສ່​ເປັນ​ພິ​ເສດ​ເຖິງ​ວຽກ​ງານ​ກໍ່ສ້າງ​ຖັນ​ແຖວ​ພະນັກງານ, ລັດຖະກອນ, ພາລະກອນ. ເພິ່ນຖືວ່າ ນັ້ນແມ່ນວຽກງານສຳຄັນອັນດັບໜຶ່ງ ໃນການກໍ່ສ້າງພັກ, ກໍ່ສ້າງກົງຈັກການປົກຄອງລັດ. ລະບົບບັນດາທັດສະນະໃນແນວຄິດຂອງໂຮ່ຈີມິນ ກ່ຽວກັບວຽກງານພະນັກງານ ແລະ ການກໍ່ສ້າງຖັນແຖວພະນັກງານ ແມ່ນການສົມທົບຢ່າງແໜ້ນແຟ້ນລະຫວ່າງທິດສະດີຂອງລັດທິມາກ-ເລນິນ ກັບພຶດຕິກຳການປະຕິວັດຫວຽດນາມ, ກາຍເປັນພື້ນຖານທິດສະດີແລະພຶດຕິກຳ ເພື່ອໃຫ້ພັກນຳພາ, ຊີ້ນຳວຽກງານພະນັກງານ, ຕອບສະໜອງຄວາມຕ້ອງການຂອງແຕ່ລະໄລຍະການປະຕິວັດກ່ອນໜ້ານີ້ ແລະ ກິດຈະການປ່ຽນແປງໃໝ່, ພັດທະນາປະເທດໃນປະຈຸບັນ.

ແນວຄິດໂຮ່ຈີມິນກ່ຽວກັບການກໍ່ສ້າງຖັນແຖວພະນັກງານ, ລັດຖະກອນ, ພາລະກອນ ສະແດງອອກໃນດ້ານຕ່າງໆດັງນີ້:

ທີໜຶ່ງ, ຕາມແນວຄິດໂຮ່ຈີມິນ, ພະນັກງານ​ປະຕິວັດ​ຕ້ອງ​ມີ​ຄຸນ​ສົມບັດ ຈະລິຍະທຳ ຄວາມ​ກ້າຫານ​ທາງ​ການ​ເມືອງ ​ແລະ ຄຸນສົມບັດ ຄວາມ​ສາມາດໃນການ​ບໍລິຫານ, ຄວາມ​ສາມາດ​ດ້ານ​ວິຊາ​ຊີບ​ແລະວິຊາ​ສະ​ເພາະ. ໃນນັ້ນ, ເພິ່ນໄດ້ເນັ້ນໜັກເປັນພິເສດເຖິງ ຄຸນສົມບັດ ຈະລິຍະທຳ, ເພາະ “ບໍ່ມີຄຸນທຳ ຈະເກັ່ງປານໃດ ກໍ່ນຳພາປະຊາຊົນບໍ່ໄດ້”(1). ເພິ່ນຊີ້ແຈງວ່າ: “ໃນເມື່ອກ່ອນ, ສິນທຳແມ່ນຈົງຮັກພັກດີຕໍ່ກະສັດ ແລະ ກະຕັນຍູຕໍ່ພໍ່ແມ່ເທົ່ານັ້ນ. ມື້ນີ້, ໃນຍຸກໃໝ່, ສົມບັດສິນກໍ່ຕ້ອງໃໝ່. ຕ້ອງຈົງຮັກພັກດີຕໍ່ປະເທດ. ຕ້ອງກະຕົນຍູຕໍ່ປະຊາຊົນທັງໝົດ ແລະ ຕໍ່ພີ່ນ້ອງຮ່ວມຊາດ(2).  

ທີສອງ, ແນວຄິດກ່ຽວກັບວຽກງານພະນັກງານຂອງປະທານໂຮ່ຈີມິນ ໄດ້ກາຍເປັນເຂັມທິດໃຫ້ພັກກອມມູນິດຫວຽດນາມ ໃນວຽກງານກໍ່ສ້າງພັກໃນແຕ່ລະສະໄໝ ແລະ ແຕ່ລະໄລຍະການປະຕິວັດ. ເພິ່ນເນັ້ນໜັກວ່າ: “ພະນັກງານແມ່ນກົກຮາກຂອງທຸກວຽກງານ(3). ດັງນັ້ນ, ຕ້ອງປະເມີນພະນັກງານຢ່າງຖືກຕ້ອງ; ຕ້ອງອົບຮົມສຶກສາ ຝຶກຝົນຫຼໍ່ຫຼອມ ບຳລຸງສ້າງພະນັກງານຢ່າງຮອບດ້ານຕ້ອງນຳໃຊ້ແລະສັບຊ້ອນພະນັກງານຢ່າງຖືກຕ້ອງ; ຕ້ອງຕໍ່ສູ້ຕ້ານປະກົດການຫຍໍ້ທໍ້ໃນວຽກງານພະນັກງານຢ່າງເດັດດ່ຽວ.

ຊາບຊຶມແນວຄິດໂຮ່ຈີມິນແລະຄໍາແນະນໍາຂອງເພິ່ນ, ພັກກອມມູນິດຫວຽດນາມ ​ໃນ​ຂະ​ບວນການ​ນຳພາ​ການ​ປະຕິວັດ ຍາມ​ໃດ​ກໍ່​ເຊີດ​ຊູ​ວຽກ​ງານ​ກໍ່ສ້າງ​ຖັນ​ແຖວ​ພະນັກງານ, ລັດຖະກອນ, ພາລະກອນ ​ກ່ຽວ​ກັບ​ຄຸນສົມບັດ​ປະຕິວັດ, ເອົາໃຈໃສ່ອົບຮົມສຶກສາ, ຝຶກຝົນຫຼໍ່ຫຼອມພະນັກງານ ສະມາຊິກພັກ ໃຫ້ປະຕິບັດການປະຢັດ ຕໍ່ສູ້ກັບການໃຊ້ຈ່າຍຟຸມເຟືອຍ. ຜ່ານກວ່າ 35 ປີແຫ່ງການປະຕິບັດກິດຈະການປ່ຽນແປງໃໝ່ປະເທດ, ພັກໄດ້ອອກມະຕິກ່ຽວກັບວຽກງານພະນັກງານຫຼາຍສະບັບ(4). ມະຕິກອງປະຊຸມໃຫຍ່ຄັ້ງທີ 13 ຂອງພັກໄດ້ກຳນົດໜ້າທີ່ແລະວິທີແກ້ໄຂຕົ້ນຕໍຈຳນວນໜຶ່ງ ເພື່ອປະຕິບັດເນື້ອໃນກໍ່ສ້າງພັກທາງດ້ານພະນັກງານໃຫ້ໄດ້ເປັນຢ່າງດີ.

ຊັບສິນສາທາລະນະແມ່ນ​ຊັບ​ພະ​ຍາ​ກອນວັດຖຸ​ທີ່​ຍິ່ງ​ໃຫຍ່, ມີບົດບາດສຳຄັນພິເສດໃນການພັດທະນາປະເທດ. ປະທານໂຮ່ຈີມິນຢືນຢັນວ່າ: “ຊັບສິນສາທາລະນະແມ່ນຮາກຖານ, ແມ່ນທຶນຮອນເພື່ອຟື້ນຟູ ແລະ ກໍ່ສ້າງເສດຖະກິດລວມ, ເພື່ອເຮັດໃຫ້ປະຊາຊົນຮັ່ງມີ ປະເທດຊາດເຂັ້ມແຂງ, ເພື່ອປັບປຸງຊີວິດຂອງປະຊາຊົນໃຫ້ດີຂຶ້ນ(5)ດັງນັ້ນ, ພະນັກງານ ລັດຖະກອນ ພາລະກອນ ຕ້ອງຍົກສູງຄວາມຮັບຜິດຊອບໃນການຄຸ້ມຄອງ ນຳໃຊ້ຊັບສິນສາທາລະນະ. ແນວຄິດໂຮ່ຈີມິນ, ທັດສະນະຂອງພັກກ່ຽວກັບການກໍ່ສ້າງຖັນແຖວພະນັກງານ ແລະ ຂໍ້ກຳນົດກ່ຽວກັບຄຸນສົມບັດຂອງພະນັກງານ ລັດຖະກອນ ພາລະກອນ ໃນ​ການປະຕິບັດລັດຖະການ​; ຈັນຍາບັນວິຊາຊີບຂອງພະນັກງານລັດທີ່ມີຂໍ້ກໍານົດກ່ຽວກັບ “ຄວາມໃສສະອາດ”, “ຄວາມຊື່ສັດທ່ຽງທຳ”, ປະຕິເສດ “ກຸ່ມຜູ້ສະແຫວງຫາຜົນປະໂຫຍດ” ໃນຂົງເຂດການຄຸ້ມຄອງຊັບສິນສາທະລະນະນັ້ນ ມີຄວາມ​ເຂົ້າ​ໃຈ​ໃນ​ຫຼາຍ​ດ້ານ​:

ທີໜຶ່ງ, ຄວາມໃສສະອາດ, ຄວາມຊື່ສັດທ່ຽງທຳ, ການປະຕິເສດ “ກຸ່ມຜູ້ສະແຫວງຫາຜົນປະໂຫຍດ” ແມ່ນມາດຕະຖານຄຸນນະພາບແລະຈັນຍາບັນ ໃນການປະຕິບັດລັດຖະການແລະວິຊາຊີບ ຂອງພະນັກງານ ລັດຖະກອນ ພາລະກອນ. ສຳລັບພະນັກງານ ລັດຖະກອນ ​ທີ່​ມີ​ອຳນາດ​ແລະຄວາມ​ຮັບຜິດຊອບ​ ໃນ​ຂົງເຂດການ​ຄຸ້ມ​ຄອງແລະການໃຊ້ຊັບສິນສາທາລະນະນັ້ນ ແມ່ນຄວາມຮຽກຮ້ອງຕ້ອງການ, ມາດຕະຖານອັນດັບໜຶ່ງ.

ທີສອງ, ຄວາມໃສສະອາດ, ຄວາມຊື່ສັດທ່ຽງທຳ, ການປະຕິເສດ “ກຸ່ມຜູ້ສະແຫວງຫາຜົນປະໂຫຍດ” ແມ່ນຄວາມເປັນເອກະພາບທາງມາດຕະຖານ ລະຫວ່າງຄວາມຮັບຮູ້ ແລະ ພຶດຕິກຳ ຂອງພະນັກງານ ລັດຖະກອນ ພາລະກອນໂດຍທົ່ວໄປ, ຂອງພະນັງງານ ລັດຖະກອນ ​ທີ່​ມີ​ອຳນາດ​ແລະຄວາມ​ຮັບຜິດຊອບ ​ໃນ​ຂົງເຂດການ​ຄຸ້ມ​ຄອງ ແລະ ການໃຊ້ຊັບສິນສາທາລະນະໂດຍສະເພາະ.

ທີສາມ, ຄວາມໃສສະອາດ, ຄວາມຊື່ສັດທ່ຽງທຳ, ການປະຕິເສດ “ກຸ່ມຜູ້ສະແຫວງຫາຜົນປະໂຫຍດ” ແມ່ນການຫັນເປັນຮູບປະທຳຕາມແນວຄິດໂຮ່ຈີມິນ. ໃນບົດນິພົນ ຊີວິດໃໝ່ປະທານໂຮ່ຈີມິນ ກ່າວເຖິງຄຸນທຳ 4 ປະການ ຂອງພະນັກງານປະຕິວັດ, ໃນນັ້ນ ເພິ່ນໄດ້ເນັ້ນໜັກ: “ຊື່ສັດສຸຈະລິດ - ຜູ້ຄົນໃນສຳນັກງານ, ຕັ້ງແຕ່ໝູ່ບ້ານຈົນເຖິງລັດຖະບານກາງ, ລ້ວນແຕ່ງ່າຍ​ທີ່​ຈະ​​ຫາ​ໂອ​ກາດ​ຮັ່ງ​ມີ, ຫຼື​ລັກໂລບ​ເງິນ​ຂອງລັດ​ຖະ​ບານ, ຫຼື​ຂູດຮີດ​ປະ​ຊາ​ຊົນ. ເມື່ອ​ຖືກ​ເປີດ​ເຜີຍ​ແລະ​ຖືກ​ລົງ​ໂທດ, ມັນ​ຈະ​ສູນ​ເສຍ​ກຽດ​ຕິຍົດ​ທັງ​ໝົດ, ແລະ​ຊັບ​ສິນ​ທີ່​ບໍ່​ຍຸດ​ຕິ​ທຳ​ກໍ​ບໍ່​ໄດ້​ຊົມໃຊ້. ດັງນັ້ນ, ຄົນໃນສຳນັກງານຕ້ອງຖືເອົາຄຳວ່າຊື່ສັດສຸຈະລິດ ເປັນອັນດັບໜຶ່ງທ່ຽງທຳ - ຕົນເອງເປັນພະນັກງານເຮັດວຽກງານລັດຖະການ ຕ້ອງມີຄວາມຍຸຕິທຳ ແລະມີຄຸນທຳ. ຫ້າມໃຊ້ຂອງສາທາລະນະເພື່ອຈຸດປະສົງສ່ວນຕົວ. ຫ້າມໃຊ້ເອກະຊົນເພື່ອເຮັດວຽກງານຂອງລັດ. ທຸກ​ສິ່ງ​ທຸກ​ຢ່າງ​ຕ້ອງ​ຍຸຕິ​ທຳ​ແລະ​ຊອບ​ທຳ, ບໍ່​ແມ່ນ​ເພື່ອ​ຜົນປະໂຫຍດ, ຄວາມ​ໂປດ​ປານ​ສ່ວນ​ຕົວ ຫຼືຄວາມ​ກຽດ​ຊັງ​, ຄວາມ​ຄຽດ​ແຄ້ນສ່ວນຕົວ. ຂ້ອຍມີສິດທີ່ຈະໃຊ້ຄົນ ຂ້ອຍຈຶງຕ້ອງໃຊ້ຄົນເກັ່ງ ທີ່ສາມາດເຮັດສິ່ງຕ່າງໆໄດ້. ຢ່າລາກຄອບຄົວ ໝູ່ເພື່ອນຂອງຕົນ ເຂົ້າໄປໃນຕໍາແໜ່ງນີ້ຫຼືຕຳແໜ່ງນັ້ນ. ຢ່າຢ້ານທີ່ຈະເສຍຕຳແໜ່ງເພື່ອທັບຖົມຄົນທີ່ເກັ່ງກວ່າຕົນ. ຕ້ອງຈົງຮັກພັກດີຕໍ່ລັດຖະບານ, ຕໍ່ພີ່ນ້ອງຮ່ວມຊາດ. ຢ່າທຳທ່າເປັນພະນັກງານປະຕິວັດ(6).

ສືບຕໍ່ການກໍ່ສ້າງ, ຝຶກອົບຮົມ, ບຳລຸງສ້າງຖັນແຖວພະນັກງານ ລັດຖະກອນ
ພາລະກອນ ໃນຂົງເຂດການຄຸ້ມຄອງແລະການໃຊ້ຊັບສິນສາທາລະນະ
ທີ່ໃສສະອາດແລະຊື່ສັດທ່ຽງທຳ
, ຕອບສະໜອງຄວາມຕ້ອງການຂອງການຕໍ່ສູ້
ປ້ອງກັນແລະຕ້ານ “ກຸ່ມຜູ້ສະແຫວງຫາຜົນປະໂຫຍດ” ຢູ່ຫວຽດນາມໃນປະຈຸບັນ

ທີໜຶ່ງ, ກວດຄືນ, ດັດແກ້, ເພີ່ມເຕີມຂໍ້ກຳນົດຂອງກົດໝາຍກ່ຽວກັບການຄຸ້ມຄອງແລະການໃຊ້ຊັບສິນສາທາລະນະ ເພື່ອປະຕິບັດເປົ້າໝາຍ ບໍ່​ມີ​ການ​ສໍ້​ລາດ​ບັງ​ຫຼວງ” ເທື່ອລະກ້າວ, ການ​ຕໍ່​ສູ້​ປ້ອງກັນແລະຕ້ານ “ກຸ່ມ​ຜູ້ສະ​ແຫວ​ງຫາຜົນປະໂຫຍດ” ​ໄດ້​ຮັບ​ຜົນສຳ​ເລັດ. ຕາມນັ້ນ, ບັນດາ​ເນື້ອ​ໃນ​ຂອງ​ກົດໝາຍ​ກ່ຽວ​ກັບ​ການ​ຄຸ້ມ​ຄອງ, ການໃຊ້ປະໂຫຍດ​ແລະ ການ​ນຳ​ໃຊ້​ຊັບ​ສິນ​ໂຄງສ້າງພື້ນຖານ​​ບາງ​ປະ​ເພດ ​ເຊັ່ນ: ໂຄງສ້າງພື້ນຖານ​ນ້ຳ​ສະອາດ ​ເຂດ​ຕົວ​ເມືອງ ການ​ຄ້າ ຂໍ້​ມູນ​ຂ່າວສານ ສາທາລະນະ​ສຸກ ກິລາ ການທ່ອງທ່ຽວ ວັດທະນະທຳ... ຄວນ​ໄດ້​ຮັບ​ການ​ກວດກາ​ຄືນໂດຍ​ບັນດາ​ກະຊວງ ຂະແໜງການທີ່ກ່ຽວຂ້ອງ.

ບັນດາກະຊວງ, ອົງການທຽບເທົ່າກະຊວງ ແລະ ອົງການສູນກາງອື່ນ ຈຳເປັນຕ້ອງກວດຄືນ ບັນດາເອກະສານທາງກົດໝາຍປະຈຸບັນ ທີ່ກ່ຽວຂ້ອງກັບຂົງເຂດການຄຸ້ມຄອງສະເພາະກ່ຽວກັບການຂຸດຄົ້ນແລະນຳໃຊ້ຊັບສິນສາທາລະນະພາຍໃຕ້ການຄຸ້ມຄອງຂອງຕົນ. ສ້າງ​ພື້ນຖານ​ນິຕິ​ກຳ​ທີ່​ຄົບ​ຊຸດ, ສອດຄ່ອງ ​ແລະ ​ເປັນ​ເອກະ​ພາບ​ໃນ​ການ​ຄຸ້ມ​ຄອງ, ຂຸດ​ຄົ້ນ ​ແລະ ນຳ​ໃຊ້​ຊັບ​ສິນ​ສາທາລະນະ ​ເພື່ອໃຫ້​ບັນລຸ​ເປົ້າ​ໝາຍ “ບໍ່​ມີ​ການ​ສໍ້​ລາດ​ບັງ​ຫຼວງ”, ຕໍ່ສູ້ປ້ອງກັນແລະຕ້ານປະກົດການຂອງ “ການສະແຫວງຫາຜົນປະໂຫຍດ” ໃຫ້ໄດ້ຮັບຜົນ. ພ້ອມກັນກັບບັນດາເນື້ອໃນຂ້າງເທິງ, ໃນເວລາທີ່ຈະມາເຖິງ, ມີຄວາມຈຳເປັນຕ້ອງສຶກສາ ແລະສະເໜີເພີ່ມເຕີມ ລະບຽບການກ່ຽວກັບມາດຕະຖານປະຕິບັດງານຂອງພະນັກງານ, ລັດຖະກອນ ທີ່ໄດ້ຮັບມອບໝາຍອຳນາດໜ້າທີ່ ແລະ ຄວາມຮັບຜິດຊອບ ໃນການຄຸ້ມຄອງ ແລະນຳໃຊ້ຊັບສິນສາທາລະນະ ຕາມທິດທາງຂອງການຖືເອົາ “ຄວາມໃສສະອາດ”, “ຄວາມຊື່ສັດທ່ຽງທຳ”, ການປະຕິເສດ “ຜົນປະໂຫຍດກຸ່ມ” ເປັນມາດຕະຖານຄຸນສົມບັດແລະຈັນຍາບັນອັນດັບໜຶ່ງ.

ທ່ານ ຟ້າມ ມິງຈີ້ງ ກຳມະການກົມການເມືອງ, ນາຍົກລັດຖະມົນຕີ ໄປກວດກາການເຄື່ອນໄຫວຂອງ ໂຮງງານຝຸ່ນໄນໂຕຣເຈນ ນິງບິ່ງ ສັງກັດ ບໍລິສັດສະມາຊິກຜູ້ດຽວຮັບຜິດຊອບຈຳກັດ ຝຸ່ນໄນໂຕຣເຈນ ນິງບິ່ງ, ໃນສວນອຸດສາຫະກຳ ແຂ້ງຝູ, ເມືອງອຽນແຂ້ງ, ແຂວງນິງບິ່ງ _ພາບ: TTXVN

ທີສອງ, ປ່ຽນແປງໃໝ່, ກະຈາຍຮູບການແລະວິທີການໂຄສະນາ ເພື່ອຍົກສູງຄວາມຮັບຮູ້ຂອງຖັນແຖວພະນັກງານ ລັດຖະກອນ ພາລະກອນເວົ້າລວມ ໃນການປະຕິບັດການປະຢັດ, ຕ້ານການໃຊ້ຈ່າຍຟຸມເຟືອຍແລະຄວາມຫຍໍ້ທໍ້. ຜ່ານວຽກງານການໂຄສະນາ, ສ້າງການຫັນປ່ຽນຢ່າງແຂງແຮງ ໃນຄວາມຮັບຮູ້ແລະການກະທຳ ຂອງຖັນແຖວພະນັກງານ ລັດຖະກອນ ພາລະກອນ ໃນຂົງເຂດການຄຸ້ມຄອງແລະການໃຊ້ຊັບສິນສາທາລະນະ. ຕາມນັ້ນ, ຮັບປະກັນວ່າ ບໍ່ມີການລະເມີດກົດລະບຽບວ່າດ້ວຍການກະທໍາທີ່ຕ້ອງຫ້າມ ໃນການຄຸ້ມຄອງແລະການນໍາໃຊ້ຊັບສິນສາທາລະນະ. ໃຊ້ຮູບແບບການໂຄສະນາທີ່ຫຼາກຫຼາຍ ເຊັ່ນ: ການໂຄສະນາຊວນເຊື່ອດ້ວຍປາກ; ການເຜີຍແຜ່ກົດລະບຽບກ່ຽວກັບການປະຢັດ, ການຕ້ານການໃຊ້ຈ່າຍຟຸມເຟືອຍ, ການຄຸ້ມຄອງແລະນຳໃຊ້ຊັບສິນສາທາລະນະ; ລະບົບວິທະຍຸ ໂທລະທັດ ສື່ສິ່ງພິມ; ການຮຽບຮຽງແລະພິມຈຳໜ່າຍເອກະສານແລະປຶ້ມ; ຈັດ​ຕັ້ງ​ການ​ແຂ່ງ​ຂັນປະກວດຄວາມ​ຮູ້​ກ່ຽວ​ກັບ​ກົດ​ໝາຍ​ວ່າ​ດ້ວຍ​ການປະຢັດ, ຕ້ານການ​ສໍ້​ລາດ​ບັງ​ຫຼວງ ຕ້ານການໃຊ້ຈ່າຍຟຸມເຟືອຍ, ການ​ຄຸ້ມ​ຄອງແລະນຳ​ໃຊ້​ຊັບ​ສິນ​ສາ​ທາ​ລະ​ນະ; ໃຫ້ຄໍາແນະນໍາທາງກົດຫມາຍ, ການຊ່ວຍເຫຼືອທາງດ້ານກົດຫມາຍ; ການເຄື່ອນໄຫວທາງດ້ານວັດທະນະທຳ ສິລະປະ; ການແກ້ໄຂ ຈັດການກັບການລະເມີດກົດຂໍ້ບັງຄັບ; ສ້າງ​ຕູ້​ປຶ້ມ​ກົດໝາຍໃນສຳນັກງານ, ​ອົງການ, ໜ່ວຍງານອາຊີບ; ຈັດກິດຈະກໍາສະໂມສອນກົດໝາຍ. ຈາກນັ້ນ, ສ້າງ​ການ​ປ່ຽນ​ແປງ​ທີ່ເປັນຮູບປະທຳຢ່າງ​ແທ້​ຈິງ​ ຈາກ​ຄວາມ​ຮັບ​ຮູ້​​ສູ່​ການ​ກະທຳ​ ຂອງ​ຖັນແຖວພະນັກງານ ລັດຖະກອນ ພາລະກອນໂດຍ​ທົ່ວ​ໄປ ​ແລະ ພະນັກງານ ລັດຖະກອນ​ ພາລະກອນ ໃນ​ຂົງ​ເຂດ​ການຄຸ້ມ​ຄອງ ​ແລະ ນຳ​ໃຊ້​ຊັບ​ສິນ​ສາທາລະນະໂດຍ​ສະ​ເພາະ.   

ທີສາມ, ປ່ຽນແປງໃໝ່, ຍົກສູງຄຸນນະພາບຂອງວຽກງານປະເມີນຜົນ, ໂດຍຖືເອົາຜົນການຄຸ້ມຄອງຕົວຈິງ ແລະ ປະສິດທິຜົນການນຳໃຊ້ຊັບສິນສາທາລະນະ ເປັນມາດຖານວັດແທກ ຫຼັກເກນ ແລະ ມາດຕະຖານ ເພື່ອ​ປະ​ເມີນ​ພາລະຜູກພັນຂອງ​ຂອງພະ​ນັກ​ງານ​ ລັດຖະກອນ ​ທີ່​ໄດ້​ຮັບ​ມອບ​ໝາຍ​​ອຳ​ນາດໜ້າທີ່ແລະຄວາມ​ຮັບ​ຜິດ​ຊອບ​ ໃນ​ການ​ຄຸ້ມ​ຄອງ ແລະນຳ​ໃຊ້​ຊັບ​ສິນ​ສາ​ທາ​ລະ​ນະ. ການປະເມີນພະນັກງານໂດຍທົ່ວໄປມີບົດບາດສໍາຄັນ ເຊິ່ງເປັນຂັ້ນຕອນທໍາອິດທີ່ຊີ້ຂາດໃນວຽກງານພະນັກງານ. ການປະເມີນຖືກຕ້ອງຈະເປັນພື້ນຖານທີ່ດີສຳລັບການວາງແຜນ, ການຝຶກອົບຮົມ, ການບຳລຸງສ້າງ, ການຜັດປ່ຽນຍົກຍ້າຍ, ການເລື່ອນຊັ້ນຕຳແໜ່ງ ແລະ ການແຕ່ງຕັ້ງພະນັກງານ. ການປະຕິບັດນະໂຍບາຍພະນັກງານທີ່ດີ ຈະຊ່ວຍ​ເສີມ​ຂະ​ຫຍາຍ​ຈຸດ​ແຂງ ​ແລະ ​ແກ້​ໄຂ​ຈຸດ​ອ່ອນ​ຂອງ​ພະ​ນັກ​ງານ ລັດຖະກອນ ພາ​ລະກອນ.

ຕ້ອງຍົກສູງຄວາມສາມາດຂອງບັນດາ​ອົງການ​ທີ່​ປຶກສາກ່ຽວກັບວຽກງານພະນັກງານ, ຍົກສູງຄຸນນະພາບຂອງຖັນແຖວພະນັກງານທີ່ເຮັດວຽກງານພະນັກງານ, ​ໂດຍ​ສະ​ເພາະການສ້າງ​ວິທີ​ການ​ວັດ​ແລະປະ​ເມີນ​ພະນັກງານ ​ຕາມ​ທິດ​ໂປ່​ງ​ໃສ ຕໍ່ເນື່ອງ ​ຫຼາຍມິຕິ, ຖືເອົາ​ຜົນ​ການ​ຄຸ້ມ​ຄອງ​ຕົວ​ຈິງ ແລະ ປະສິດທິ​ຜົນ​ການ​ນຳ​ໃຊ້​ຊັບ​ສິນ​ສາທາລະນະ ​ເປັນຕົວວັດ, ​ມາດຖານ​ໃນການ​ປະ​ເມີນ​ຜົນ. ຜ່ານນັ້ນ, ສ້າງການປ່ຽນແປງດ້ານຄຸນນະພາບໃນຖັນແຖວພະນັກງານ ລັດຖະກອນ ພາລະກອນທີ່ເຮັດວຽກໃນຂົງເຂດຄຸ້ມຄອງຊັບສິນສາທາລະນະ

ທີ່ສີ່, ຮັບປະກັນການປະຕິບັດບັນດາຫຼັກການຄຸ້ມຄອງ ນຳໃຊ້ຊັບສິນສາທາລະນະຢ່າງເຂັ້ມງວດ ໂດຍສົມທົບກັບການເພີ່ມທະວີການກວດກາ ກວດສອບ ກວດບັນຊີ ແລະ ຈັດການລົງໂທດຢ່າງເຄັ່ງຄັດ ຕໍ່ການລະເມີດຂອງພະນັກງານ ລັດຖະກອນ ພາລະກອນທີ່ມີສິດອຳນາດ, ມີຄວາມຮັບຜິດຊອບໃນການຄຸ້ມຄອງ, ນຳໃຊ້ຊັບສິນສາທາລະນະ. ກົດໝາຍວ່າດ້ວຍການຄຸ້ມຄອງແລະນຳໃຊ້ຊັບສິນສາທາລະນະປີ 2017 ໄດ້ກຳນົດບັນດາຫຼັກການຄຸ້ມຄອງ, ນຳໃຊ້ຊັບສິນສາທາລະນະ; ຢ່າງໃດກໍ່ຕາມ, ຈາກຄວາມຈິງຂອງການລະເມີດໃນເວລາທີ່ຜ່ານມາສະແດງໃຫ້ເຫັນວ່າ, ຫຼາຍອົງການ, ອົງການຈັດຕັ້ງ, ໜ່ວຍງານ ແລະ ບຸກຄົນ ບໍ່ໄດ້ປະຕິບັດຕາມຫຼັກການໃນການຄຸ້ມຄອງແລະນຳໃຊ້ຊັບສິນສາທາລະນະຢ່າງເຄັ່ງຄັດ ໂດຍມີປະກົດການຫຍໍ້ທໍ້ຕ່າງໆເຊັ່ນ: ບໍ່ມີສະຖິຕິ, ເຮັດບັນຊີບໍ່ຄົບຖ້ວນທັງດ້ານລາຍການແລະມູນຄ່າ; ການ​ບັນ​ທຶກ​ທີ່​ບໍ່​ຖືກ​ຕ້ອງ​, ຂໍ້​ມູນ​ບໍ່​ເໝາະ​ສົມ​ກັບ​ຄຸນ​ສົມ​ບັດ​ແລະ​ລັກ​ສະ​ນະ​ຂອງ​ຊັບ​ສິນ​; ໃຊ້ຊັບສິນຜິດກັບຈຸດປະສົງ, ສິ້ນເປືອງ, ບໍ່ມີປະສິດທິຜົນ; ຂາດການເປີດເຜີຍ, ໂປ່ງໃສ, ຜິດກົດໝາຍ; ປ່ອຍປະລະເຫຼີງການກວດກາ ກວດສອບ ກວດບັນຊີ. ດັງນັ້ນ, ໃນເວລາທີ່ຈະມາເຖິງ, ເພື່ອຮັບປະກັນການຄຸ້ມຄອງແລະນຳໃຊ້ຊັບສິນສາທາລະນະ” ມີປະສິດທິຜົນ, ການຕໍ່ສູ້ປ້ອງກັນແລະຕ້ານ “ກຸ່ມຜູ້ສະແຫວງຫາຜົນປະໂຫຍດ” ມີປະສິດທິພາບ, ດ້ານໜຶ່ງ, ພະນັກງານ ລັດຖະກອນ ພາລະກອນທີ່ໄດ້ຮັບມອບໝາຍອຳນາດໜ້າທີແລະຄວາມຮັບຜິດຊອບ ຕ້ອງປະຕິບັດບັນດາຫຼັກການໃນການຄຸ້ມຄອງແລະນຳໃຊ້ຊັບສິນສາທາລະນະຢ່າງເຂັ້ມງວດ; ດ້ານອື່ນ, ເພີ່ມທະວີການກວດກາ ກວດສອບ ກວດບັນຊີ, ຈັດການກັບການກະທຳສໍ້ລາດບັງຫຼວງ ນັບທັງໃນຮູບແບບຕ່າງໆເຊັ່ນ “ກຸ່ມຜູ້ສະແຫວງຫາຜົນປະໂຫຍດ”, “ກຸ່ມຜົນປະໂຫຍດສ່ວນຕົວ” ຢ່າງເດັດດ່ຽວ ໄວວາ ເຄັ່ງຄັດ ແລະ ບໍ່ມີຂອບເຂດຫ້າມ.    

ທີຫ້າ, ຍົກສູງບົດບາດນຳພາຂອງພັກໃນການຍູ້ແຮງການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ. ກອງປະຊຸມໃຫຍ່ຄັ້ງທີ 13 ຂອງພັກໄດ້ວາງແຜນນະໂຍບາຍ ແລະ ວິທີແກ້ໄຂທີ່ເດັດດ່ຽວ ເພື່ອປ້ອງກັນແລະຕ້ານ​ການ​ສໍ້​ລາດ​ບັງ​ຫຼວງ, ຕ້ານຄວາມຫຍໍ້ທໍ້: “ຜັນຂະຫຍາຍຢ່າງຄົບຊຸດແລະມີປະສິດທິຜົນ ຂໍ້ກຳນົດຂອງກົດໝາຍກ່ຽວກັບການປ້ອງກັນແລະຕ້ານການສໍ້ລາດບັງຫຼວງ. ຍົກ​ສູງ​ປະ​ສິດ​ທິ​ພາບ​ການເກັບຄືນ​ຊັບ​ສິນ​ທີ່​ສໍ້​ລາດ​ບັງ​ຫຼວງ​, ຮັບປະກັນການປະຕິບັດຕາມກົດໝາຍ. ປະຕິບັດ​ການ​ຕໍ່ສູ້​ປ້ອງກັນແລະຕ້ານ​ການ​ສໍ້​ລາດ​ບັງ​ຫຼວງ​ຢ່າງຮຸນແຮງ ເຄັ່ງຄັດ ​ແລະ ມີ​ປະສິດທິ​ຜົນ(7).

ທັດສະນະ ແຜນນະໂຍບາຍຂອງພັກ ໃນກອງປະຊຸມໃຫຍ່ຄັ້ງທີ 13 ໄດ້ມີການພັດທະນາໃໝ່ ໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ໂດຍມີມາດຕະການຫຼາຍຢ່າງເຊັ່ນ ການປັບປຸງກົດໝາຍ ນະໂຍບາຍໃຫ້ສົມບູນ, ການສະແດງຊັບສິນ ລາຍໄດ້, ເດັດດ່ຽວ ໜຽວແໜ້ນ ແລະ ຍົກສູງປະສິດທິຜົນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ​ໂດຍ​ສະ​ເພາະ​ແມ່ນ ​ເນັ້ນ​ໜັກ​ເຖິງ​ການ​ປ້ອງກັນ​ການ​ສໍ້​ລາດ​ບັງ​ຫຼວງ:ເລັ່ງລັດ​ສ້າງ​ກົນ​ໄກ​ປ້ອງ​ກັນ, ກົນໄກກ່າວເຕືອນ ເພື່ອຄວບຄຸມ​ການ​ສໍ້​ລາດ​ບັງ​ຫຼວງ. ປະຕິບັດຕາມຂໍ້ກໍານົດຂອງກົດໝາຍວ່າດ້ວຍການປະຕິບັດການປະຢັດ, ຕ້ານການໃຊ້ຈ່າຍຟຸມເຟືອຍຢ່າງເຄັ່ງຄັດ. ສືບຕໍ່ປະຕິບັດຢ່າງເຄັ່ງຄັດແລະມີປະສິດທິຜົນ ຂໍ້ກຳນົດກ່ຽວກັບການສະແດງຊັບສິນລາຍໄດ້ ແລະ ການກວດກາການສະແດງຊັບສິນລາຍໄດ້ ຂອງພະນັກງານ ລັດຖະກອນ ພາລະກອນ, ໂດຍສະເພາະແມ່ນ ຜູ້ນໍາທຸກລະດັບ(8). ເສີມຂະຫຍາຍກຳລັງແຮງສັງລວມ ຂອງບັນດາອົງການຈັດຕັ້ງການເມືອງ-ສັງຄົມ, ບັນດາອົງການສັງຄົມ, ບັນດາອົງການສື່ສິ່ງພິມ, ບັນດາວິສາຫະກິດ ແລະ ປະຊາຊົນ ທີ່ເຂົ້າຮ່ວມໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ. ພັກໄດ້ເນັ້ນໜັກວ່າ, ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງແມ່ນພາລະກິດຂອງປະຊາຊົນທັງໝົດ: “ຍົກສູງບົດບາດ, ເສີມຂະຫຍາຍຄວາມຕັ້ງໜ້າ, ຄວາມເປັນເຈົ້າການ ແລະ ການປະສົມປະສານຂອງແນວໂຮມປະເທດຊາດ, ອົງການຈັດຕັ້ງການເມືອງ-ສັງຄົມ, ປະຊາຊົນ, ວິສາຫະກິດ, ສື່ສິ່ງພິມ ໃນການຄົ້ນເຜີຍ, ຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ປະຕິບັດການປະຢັດ, ຕ້ານການໃຊ້ຈ່າຍຟຸມເຟືອຍ(9). ຕາມນັ້ນ, ພ້ອມກັນກັບການຍົກສູງບົດບາດນຳພາຂອງພັກໃນການຍູ້ແຮງການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງນັ້ນ, ຈຳເປັນຕ້ອງປັບປຸງກົດໝາຍວ່າດ້ວຍການປ້ອງກັນແລະຕ້ານການສໍ້ລາດບັງຫຼວງໃຫ້ສົມບູນ. ສືບຕໍ່ປັບປຸງບູລະນະກົນໄກຄວບຄຸມອຳນາດລັດ ເພື່ອຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຕ້ານ ກຸ່ມຜົນປະໂຫຍດສ່ວນຕົວ” ໃນການຄຸ້ມຄອງແລະນຳໃຊ້ຊັບສິນສາທາລະນະຢ່າງມີປະສິດທິຜົນ; ກໍ່ສ້າງ​ອົງການ​ສະ​ເພາະ​ກິດປ້ອງກັນແລະ​ຕ້ານ​ການ​ສໍ້​ລາດ​ບັງ​ຫຼວງ​ທຸກ​ຂັ້ນ ເພື່ອສືບສວນແລະຈັດການກັບການກະທຳສໍ້ລາດບັງຫຼວງທີ່ສະແດງອອກໃນຮູບການທີ່ແຕກຕ່າງກັນ ລວມທັງ “ກຸ່ມຜູ້ສະແຫວງຫາຜົນປະໂຫຍດ”, “ກຸ່ມຜົນປະໂຫຍດສ່ວນຕົວ”. 

ທີຫົກ, ເສີມຂະຫຍາຍບົດບາດຊີ້ນຳນຳພາຂອງຄະນະພັກຮາກຖານ, ໂດຍສະເພາະແມ່ນຫົວໜ້າ ແລະ ກຳລັງແຮງສັງລວມຂອງບັນດາອົງການຈັດຕັ້ງການເມືອງ-ສັງຄົມ, ຂອງອົງການ ການຈັດຕັ້ງ ໜ່ວຍງານ ໃນການຄຸ້ມຄອງແລະນຳໃຊ້ຊັບສິນສາທາລະນະ. ຄະນະພັກຮາກຖານແມ່ນແກນນໍາທາງການເມືອງ ທີ່ມີບົດບາດສຳຄັນ, ຕັດສິນຊີ້ຂາດການຈັດຕັ້ງປະຕິບັດ​ທຸກແຜນນະໂຍບາຍ ​ແນວທາງ​ຂອງ​ພັກ, ນະ​ໂຍບາຍ​ແລະກົດໝາຍ​ຂອງ​ລັດ ​ໃຫ້​ສຳ​ເລັດ​ຜົນ. ຕາມນັ້ນ, ເພື່ອເສີມຂະຫຍາຍບົດບາດຊີ້ນຳນຳພາຂອງຄະນະພັກຮາກຖານ ຮຽກ​ຮ້ອງ​ໃຫ້​ມີ​ການ​ປະ​ຕິ​ບັດ​ຢ່າງ​ເຂັ້ມ​ແຂງ, ເປັນ​ປົກ​ກະ​ຕິ ​ແລະ ​ມີ​ປະ​ສິດ​ທິ​ຜົນ ວຽກງານຊີ້​ນໍາ​ນໍາ​ພາ​ການ​ຈັດ​ຕັ້ງຮ່ຳ​ຮຽນ, ຊາບຊຶມ ​ແລະ ​ປຶກ​ສາ​ຫາ​ລື​ການ​ສ້າງ​ແຜນ​​ປະ​ຕິ​ບັດການ; ຊີ້​ນໍານໍາ​ພາອຳນາດການປົກຄອງ, ບັນດາອົງກາຈັດຕັ້ງການເມືອງ-ສັງຄົມ ເຮັດໃຫ້ແຜນປະຕິບັດການເປັນຈິງແລະເປັນຮູບປະທຳ ໃຫ້ພະນັກງານ ລັດຖະກອນ ພາລະກອນມີຄວາມໃສສະອາດ, ຊື່ສັດທ່ຽງທຳ, ປະຕິເສດ “ກຸ່ມຜູ້ສະແຫວງຫາຜົນປະໂຫຍດ” ໃຫ້ກາຍເປັນຂະບວນການແຂ່ງຂັນຮັກຊາດໃນທຸກສຳນັກງານ ອົງການ ໜ່ວຍງານ. ໃນການຊີ້​ນໍານໍາ​ພານັ້ນ, ບັນດາ​ສະຫາຍ​ເລຂາທິການ​, ກຳມະການຄະນະບໍລິຫານງານ, ຫົວໜ້າ ​ຕ້ອງ​ປະຕິບັດ​ໜ້າ​ທີ່​ຮັບຜິດຊອບໃນການ​ເປັນ​ແບບຢ່າງ, ​ເວົ້າພ້ອມກັບການເຮັດ​ວຽກ ​ໃນ​ການ​ຮ່ຳຮຽນ, ປະຕິບັດ​ຕາມແນວຄິດ, ຄຸນສົມບັດ​ສິນ​ທຳ​ ແລະ ແບບແຜນຂອງ​ປະທານ​ໂຮ່ຈີມິນ.

ທີເຈັດ, ຜັນຂະຫຍາຍບາງກິດຈະກຳການຄົ້ນຄວ້າ, ເພີ່ມເຕີມຫຼັກຖານວິທະຍາສາດເພື່ອຮັບໃຊ້​ວຽກ​ງານ​ສ້າງ​ກົດໝາຍ, ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ທີ່ສະແດງອອກຂອງ “ກຸ່ມຜູ້ສະແຫວງຫາຜົນປະໂຫຍດ”, “ກຸ່ມຜົນປະໂຫຍດສ່ວນຕົວ”. ໃນຄວາງເປັນຈິງ, ຂໍ້ກໍານົດທາງກົດໝາຍໃນປະຈຸບັນຊີ້ໃຫ້ເຫັນວ່າ, ຄຽງຄູ່ກັບແນວຄວາມຄິດທີ່ກ່າວມາຂ້າງເທິງນັ້ນ, ຍັງມີຫຼາຍແນວຄວາມຄິດ ແລະ ຄໍາສັບອື່ນໆທີ່ໃຊ້ທົ່ວໄປໃນເອກະສານຂອງພັກ, ລັດ ແລະ ຊີວິດສັງຄົມ. ແຕ່ວ່າ, ໃນແງ່ຂອງກົດໝາຍ, ບໍ່ມີບັນທັດຖານອະທິບາຍສໍາລັບຂໍ້ກໍານົດເຫຼົ່ານີ້, ດັ່ງນັ້ນຈຶງບໍ່ມີການສ້າງຄວາມເຂົ້າໃຈຮ່ວມກັນ ແລະ ຂາດພື້ນຖານທີ່ເປັນເອກະພາບໃນແງ່ຂອງການຮັບຮູ້ເນື້ອໃນຂອງຄວາມຄິດແລະຄຳສັບ ເພື່ອ​ປ່ຽນ​ເປັນຂໍ້ກຳນົດ​ກົດ​ໝາຍທີ່ຄວບຄຸມພຶດຕິກຳຂອງພະນັກງານ ລັດຖະກອນ ພາລະກອນ ​ໃນ​ການ​ປະຕິບັດ​ໜ້າ​ທີ່​​ຄຸ້ມ​ຄອງ​ແລະນຳ​ໃຊ້​ຊັບສິນສາທາລະນະ. ຈາກນັ້ນນຳໄປສູ່ການກຳນົດພື້ນຖານທາງກົດໝາຍໃນການຈັດການກັບພະນັກງານ ລັດຖະກອນ ພາລະກອນເມື່ອມີການລະເມີດ, ບໍ່ຄ່ອຍມີປະສິດທິຜົນ.    

ການຄຸ້ມຄອງແລະນຳໃຊ້ຊັບສິນສາທາລະນະຢ່າງມີປະສິດທິຜົນ ຕິດກັບການປ້ອງກັນແລະຕໍ່ສູ້ຕ້ານ “ກຸ່ມຜູ້ສະແຫວງຫາຜົນປະໂຫຍດບໍ່​ພຽງ​ແຕ່​ນຳ​ມາ​ເຊິ່ງຜົນ​ປະ​ໂຫຍ​ດ​ໃຫ້​ແກ່​ປະ​ເທດ​ຊາດ ​ແລະ ປະຊາຊົນ​ເທົ່າ​ນັ້ນ, ແຕ່​ຍັງ​ປະກອບສ່ວນ​ເພີ່ມ​ທະວີ​ຄວາມເຊື່ອໝັ້ນຂອງ​ສັງຄົມ​ແລະປະຊາຊົນໃນ​ພັກແລະລັດ, ສ້າງກຳລັງແຮງສັງລວມເພື່ອໃຫ້ບັນລຸເປົ້າໝາຍ: ຮອດປີ 2045, ສະເຫຼີມສະຫຼອງ 100 ປີແຫ່ງວັນສ້າງຕັ້ງ ສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນ ສາທາລະນະລັດສັງຄົມນິຍົມຫວຽດນາມ: ຫວຽດນາມກາຍເປັນປະເທດທີ່ພັດທະນາແລ້ວແລະມີລາຍໄດ້ສູງ(10) ຕາມ​ມະຕິ​ຂອງ​ກອງ​ປະຊຸມ​ໃຫຍ່​ຄັ້ງ​ທີ 13 ຂອງ​ພັກ./.

--------------

(1) ໂຮ່ຈີມິນນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 5, ໜ້າ 292.

(2) ໂຮ່ຈີມິນນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 4, ໜ້າ 170.

(3) ໂຮ່ຈີມິນນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 390.

(4) ມະຕິກອງປະຊຸມສູນກາງພັກຄັ້ງທີ 3 ສະໄໝທີ 8, ວັນທີ 18 ມິຖຸນາ 1997, “ວ່າດ້ວຍຍຸດທະສາດພະນັກງານໃນສະໄໝການຍູ້ແຮງການຫັນປະເທດເປັນອຸດສາຫະກຳ ທັນສະໄໝ”. ມະຕິກອງປະຊຸມສູນກາງພັກຄັ້ງທີ 4 ສະໄໝທີ 12, ວັນທີ 30 ຕຸລາ 2016, “ວ່າດ້ວຍການເພີ່ມທະວີການກໍ່ສ້າງແລະປັບປຸງພັກ; ສະກັດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ, ບັນດາປະກົດການຂອງການ “ປ່ຽນແປງຕົນເອງ”, ຫັນປ່ຽນຕົນເອງ” ຢູ່ພາຍໃນ”; ມະຕິກອງປະຊຸມສູນກາງພັກຄັ້ງທີ 7 ສະໄໝທີ 12, ວັນທີ 19 ພຶດສະພາ 2018, “ວ່າດ້ວຍການສຸມໃສ່ກໍ່ສ້າງຖັນແຖວພະນັກງານທຸກລະດັບ, ​ໂດຍ​ສະ​ເພາະ​ລະດັບ​ຍຸດ​ທະ​ສາດ ທີ່ມີ​ຄຸນ​ນະພາ​ບ, ມີ​ຄວາມ​ສາມາດ ​ແລະ ມີ​ຊື່​ສຽງ​ ທຽບເທົ່າ​ກັບ​ໜ້າທີ່”.

(5) ໂຮ່ຈີມິນນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 9, ໜ້າ 297.

(6) ໂຮ່ຈີມິນນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 123.

(7), (8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ່ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 2, ໜ້າ 145, 146.

(9), (10) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ່ 13, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 146, 327.

- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 995 (ເດືອນສິງຫາ 2022)