ກໍ່ສ້າງຖັນແຖວພະນັກງານຂະແໜງການຈັດຕັ້ງກໍ່ສ້າງພັກ
ເພື່ອຕອບສະໜອງຄວາມຕ້ອງການພັດທະນາຂອງປະເທດ
ໃນສະພາບການປະຕິວັດອຸດສາຫະກຳຄັ້ງທີີ່ສີ່
ເພື່ອຕອບສະໜອງຄວາມຕ້ອງການພັດທະນາຂອງປະເທດ
ໃນສະພາບການປະຕິວັດອຸດສາຫະກຳຄັ້ງທີີ່ສີ່
ສະຫາຍ ເຈືອງ ທິ ມາຍ, ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງ (ຜູ້ຢືນທີສອງຈາກຊ້າຍ) ເຂົ້າຮ່ວມ ວັນບຸນມະຫາສາມັກຄີປວງຊົນທັງຊາດ ຮ່ວມກັບຊາວເຜົ່າບານາ ທີ່ບ້ານເວົາ, ຕາແສງຈືອ້າ, ນະຄອນປະເລິຍກູ, ແຂວງຢາລາຍ _ພາບ: TTXVN
ຄວາມສຳຄັນຂອງການກໍ່ສ້າງຖັນແຖວພະນັກງານຂະແໜງການຈັດຕັ້ງກໍ່ສ້າງພັກ
ຕັ້ງແຕ່ເລີ່ມຕົ້ນ, ພັກກອມມູນິດຫວຽດນາມ ໄດ້ເອົາໃຈໃສ່ທີ່ສຸດເຖິງການສ້າງຖັນແຖວພະນັກງານທີ່ເຮັດວຽກງານການຈັດຕັ້ງແລະພະນັກງານ ເພື່ອຕອບສະໜອງຄວາມຕ້ອງການຂອງການປະຕິວັດ. ໃນບັນດາເອກະສານທີ່ສຳຄັນກ່ຽວກັບວຽກງານຈັດຕັ້ງພະນັກງານ, ພັກຍາມໃດກໍ່ເນັ້ນໜັກເຖິງບົດບາດ, ໜ້າທີ່ຂອງຖັນແຖວພະນັກງານຂະແໜງການຈັດຕັ້ງກໍ່ສ້າງພັກ. ມະຕິກອງປະຊຸມສູນກາງພັກຄັ້ງທີ 3 ສະໄໝທີ 8 “ວ່າດ້ວຍຍຸດທະສາດພະນັກງານໃນສະໄໝແຫ່ງການຍູ້ແຮງ ການຫັນປະເທດເປັນອຸດສາຫະກຳ ແລະ ທັນສະໄໝ” ລະບຸວ່າ, ໜຶ່ງໃນບັນດາໜ້າທີ່ຈຸດໜັກໃຈກາງແມ່ນ ປ່ຽນແປງໃໝ່ ແລະປັບປຸງການຈັກຕັ້ງກົງຈັກ ທີ່ເຮັດວຽກງານພະນັກງານ: “ບັນດາຄະນະພັກ, ການຈັດຕັ້ງພັກ ແລະ ພະນັກງານທີ່ເປັນຫົວໜ້າເອງ ຕ້ອງເອົາໃຈໃສ່ເບິ່ງແຍງດູແລ, ປ່ຽນແປງໃໝ່ ການຈັດຕັ້ງ ແລະ ຖັນແຖວພະນັກງານທີ່ເຮັດວຽກງານພະນັກງານ”, “ຍົກສູງຄຸນນະທາດ, ລະດັບຄວາມຮູ້ ແລະ ຄວາມສາມາດ ຂອງຖັນແຖວທີ່ເຮັດວຽກງານພະນັກງານ. ມີນະໂຍບາຍຝຶກອົບຮົມ, ບຳລຸງສ້າງ, ຄັດເລືອກຜູ້ທີ່ມີຈິດໃຈເຫັນແກ່ສ່ວນລວມ, ຊື່ສັດ, ໂປ່ງໃສ, ມີປະສົບການໃນການເຮັດວຽກຂອງພະນັກງານ”. ສະຫຼຸບ 10 ປີແຫ່ງການປະຕິບັດມະຕິກອງປະຊຸມສູນກາງພັກຄັ້ງທີ 3 ສະໄໝທີ 8, ກອງປະຊຸມສູນກາງພັກຄັ້ງທີ 9 ສະໄໝທີ 10 ໄດ້ປະກາດໃຊ້ບົດສະຫຼຸບເລກທີ 37-KL/TW, ລົງວັນທີ 2 ກຸມພາ 2009, “ວ່າດ້ວຍການສືບຕໍ່ຍູ້ແຮງການປະຕິບັດຍຸດທະສາດພະນັກງານ ແຕ່ນີ້ເຖິງປີ 2020”; ໃນນັ້ນ, ເນັ້ນໜັກໜ້າທີ່ “ຍູ້ແຮງການຄົ້ນຄວ້າວິທະຍາສາດ, ກໍ່ສ້າງອົງການແລະບຸກຄະລາກອນທີ່ເຮັດວຽກງານການຈັດຕັ້ງແລະພະນັກງານ”, “ເພີ່ມທະວີການອົບຮົມສຶກສາສະຕິຮູ້ສຶກໃນຄວາມຮັບຜິດຊອບ, ຄວາມສາມາດ ແລະ ຄຸນທາດ ຄຸນສົມບັດຂອງຖັນແຖວພະນັກງານທີ່ເຮັດວຽກງານການຈັດຕັ້ງແລະພະນັກງານ”.
ພະນັກງານທີ່ເຮັດວຽກງານການຈັດຕັ້ງ ພະນັກງານ ຕ້ອງຕອບສະໜອງມາດຕະຖານທົ່ວໄປຕາມກຳນົດຂອງພັກ; ພ້ອມກັນນັ້ນ, ຕ້ອງມີຄຸນນະພາບຕາມຄວາມຕ້ອງການສະເພາະ ຂອງຂະແໜງການຈັດຕັ້ງກໍ່ສ້າງພັກ. ສະຫາຍເລຂາທິການໃຫຍ່ ຫງວຽນຝູຈ້ອງ ເຄີຍເນັ້ນໜັກວ່າ ການກໍ່ສ້າງແລະປັບປຸງພັກເວົ້າລວມ, ວຽກງານການຈັດຕັ້ງພະນັກງານເວົ້າສະເພາະ ແມ່ນວຽກງານການຈັດຕັ້ງກໍ່ສ້າງຜູ້ຄົນ, ແມ່ນວຽກງານທີ່ກ່ຽວຂ້ອງກັບຜູ້ຄົນ, ດັ່ງນັ້ນ ຈຶ່ງເປັນເລື່ອງງ່າຍທີ່ຈະແຕະຕ້ອງເຖິງກຽດສັກສີ, ຜົນປະໂຫຍດ ແລະ ຄວາມສໍາພັນຂອງຄົນ, ເຊິ່ງຮຽກຮ້ອງໃຫ້ພະນັກງານທີ່ເຮັດວຽກງານນີ້ແຕ່ລະຄົນ ຕ້ອງວິຈານຕົນເອງ, ວິເຄາະ ແລະ ແຍກຂໍ້ດີຂໍ້ເສຍຂອງຕົນເອງ ຢ່າງເປັນປະຈຳ, ທັງຕ້ອງສະແດງຄວາມຄິດເຫັນ ແລະ ປະເມີນຄົນອື່ນ. ດັ່ງນັ້ນ, ພະນັກງານທີ່ເຮັດວຽກງານການຈັດຕັ້ງພະນັກງານ ຕ້ອງມີຄວາມຕື່ນຕົວ, ຈິງໃຈ, ທ່ຽງທຳ, ພາວະວິໄສ, ຖ້າບໍ່ດັ່ງນັ້ນ ຈະຕົກເປັນອັດຕະວິໄສ ເຈດຈຳນົງນິຍົມໄດ້ງ່າຍ, ມັກເຫັນແຕ່ຈຸດດີແລະຈຸດແຂງຂອງຕົນເອງຫຼາຍກວ່າຄົນອື່ນ ແລະ ເຫັນແຕ່ຈຸດອ່ອນແລະຂໍ້ຂາດຕົກບົກພ່ອງຂອງຄົນອື່ນຫຼາຍກວ່າຕົນເອງ.
ສຳລັບພະນັກງານຂະແໜງການຈັດຕັ້ງກໍ່ສ້າງພັກຕ້ອງມີມາດຕະຖານສູງ, ຕ້ອງເປັນຄົນທີ່ສັດຊື່, ທ່ຽງທຳ ແລະ ມີຄວາມຍຸດຕິທຳ. ຄວາມສາມາດຂອງພະນັກງານເຮັດວຽກງານການຈັດຕັ້ງ ແມ່ນຄວາມສາມາດໃນການເຂົ້າໃຈຜູ້ຄົນ; ດັ່ງນັ້ນ ຈຶ່ງບໍ່ສາມາດປ່ອຍໃຫ້ຜູ້ທີ່ເຕັມໄປດ້ວຍອາລົມ, ຈົ່ງຈຽມ, ມີການກະທຳຄົບຄິດ, ຮັບສິນບົນ ມາເຮັດວຽກງານການຈັດຕັ້ງ. ພະນັກງານອົງການຈັດຕັ້ງຕ້ອງມີຄວາມທ່ຽງທຳຢ່າງແທ້ຈິງ, ຖ້າ “ຮັກວ່າດີ, ກຽດຊັງວ່າບໍ່ດີ” ກໍ່ບໍ່ສາມາດເຮັດວຽກງານການຈັດຕັ້ງໄດ້. ຜູ້ເຮັດວຽກງານພະນັກງານຕ້ອງໃກ້ຊິດ, ປະເມີນພະນັກງານພາຍໃຕ້ການຄຸ້ມຄອງແຕ່ລະຄົນຢ່າງຖືກຕ້ອງ; ເຂົ້າໃຈຢ່າງຈະແຈ້ງກ່ຽວກັບຂະບວນການ, ຜົນຂອງການປະຕິບັດໜ້າທີ່, ຂໍ້ດີ, ຂໍ້ເສຍ ແລະ ແງ່ຫວັງຂອງພະນັກງານ ເພື່ອສະເໜີແລະແນະນຳນະໂຍບາຍກ່ຽວກັບການຝຶກອົບຮົມ ບຳລຸງສ້າງ, ການໝູນວຽນ ແລະ ການຈັດວາງໃຫ້ສອດຄ່ອງ; ຫຼີກລ້ຽງສະພາບການຄຸ້ມຄອງຢ່າງຜິວເຜີນ, ພຽງແຕ່ປະເມີນພະນັກງານຕາມບັນທຶກ ຜ່ານລາຍງານທົ່ວໄປເທົ່ານັ້ນ, ບໍ່ກຳແໜ້ນຄຸນນະພາບ ແລະ ຄວາມສາມາດຂອງພະນັກງານ ຜ່ານການປະຕິບັດໜ້າທີ່ການເມືອງຂອງພັກ ແລະ ລັດ. ຄຽງຄູ່ກັບຄວາມຮຽກຮ້ອງຕ້ອງຍຶດຕິດກັບຄວາມເປັນຈິງ, ພະນັກງານຂະແໜງການຈັດຕັ້ງກໍ່ສ້າງພັກ ຕ້ອງຕັ້ງໜ້າຄົ້ນຄວ້າທິດສະດີ ບົນພື້ນຖານລັດທິມາກ-ເລນິນ ແລະ ແນວຄິດຂອງໂຮ່ຈີມິນ, ໂດຍສະເພາະທິດສະດີກ່ຽວກັບວຽກງານການຈັດຕັ້ງກໍ່ສ້າງພັກ, ບັນດາເອກະສານຂອງພັກ ແລະ ກົດໝາຍທີ່ກ່ຽວຂ້ອງ; ແນໃສ່ເພີ່ມເຕີມ ແລະປັບປຸງວິທີການເຮັດວຽກທີ່ຖືກຕ້ອງ, ວິທະຍາສາດ ແລະ ປະຊາທິປະໄຕ, ຫຼີກລ້ຽງການຕົກຢູ່ໃນອັດຕະວິໄສ, ເຈດຈຳນົງນິຍົມ, ການບັງຄັບ, ຄວາມເປັນດ້ານດຽວ; ພ້ອມກັນນັ້ນ, ຕ້ອງຕັ້ງໜ້າ, ເປັນເຈົ້າການໃນການຄົ້ນຄວ້າບັນດາບັນຫາກ່ຽວກັບວິທະຍາສາດການຈັດຕັ້ງ, ການຄຸ້ມຄອງບຸກຄະລາກອນ, ວິທະຍາສາດການນຳພາ, ຈິດຕະວິທະຍາ,... ເພື່ອເຂົ້າໃຈກ່ຽວກັບວຽກງານການຈັດຕັ້ງພະນັກງານ ຢ່າງເລິກເຊິ່ງ, ຮອບດ້ານ ແລະ ມີວິທີແກ້ໄຂວຽກງານນີ້ຢ່າງຖືກຕ້ອງ. ພະນັກງານເຮັດວຽກງານການຈັດຕັ້ງພະນັກງານຕ້ອງແມ່ນຜູ້ທີ່ມີຄຸນສົມບັດ ບຸກຄະລິກກະພາບທີ່ດີ, ມີຄວາມຊື່ສັດ, ພາວະວິໄສ, ທ່ຽງຕົງ, ມີຄວາມຮັບຜິດຊອບ; ມີລະດັບ, ຄວາມສາມາດ, ວິທີການພິຈາລະນາ ຕີລາຄາຜູ້ຄົນທີ່ຖືກຕ້ອງ.
ການກໍ່ສ້າງຖັນແຖວພະນັກງານຂະແໜງການຈັດຕັ້ງກໍ່ສ້າງພັກໃນສະພາບການໃໝ່ -
ຄວາມຮຽກຮ້ອງຕ້ອງການ ແລະ ວິທີແກ້ໄຂທີ່ສຳຄັນຈຳນວນໜຶ່ງ
ເຖິງເດືອນຕຸລາ 2022, ມີພະນັກງານ 1.677 ຄົນທີ່ກຳລັງເຮັດວຽກໃນຄະນະຈັດຕັ້ງຂອງຄະນະພັກຂັ້ນແຂວງ, ນະຄອນທີ່ຂຶ້ນສັງກັດສູນກາງ; ມີພະນັກງານ 4.672 ຄົນທີ່ກຳລັງເຮັດວຽກໃນຄະນະຈັດຕັ້ງຂອງຄະນະພັກຂັ້ນເມືອງ. ອັດຕາສ່ວນແມ່ຍິງທີ່ກຳລັງເຮັດວຽກໃນຄະນະຈັດຕັ້ງຂອງຄະນະພັກຂັ້ນແຂວງແມ່ນ 37%, ໃນຂັ້ນເມືອງແມ່ນ 42%; ອັດຕາສ່ວນພະນັກງານທີ່ເປັນຊົນເຜົ່າສ່ວນໜ້ອຍ ໃນຄະນະຈັດຕັ້ງຂອງຄະນະພັກຂັ້ນແຂວງ ໃນທົ່ວປະເທດ ແມ່ນ 7%, ໃນຂັ້ນເມືອງແມ່ນ 11%. ພະນັກງານທີ່ເຮັດວຽກໃນຄະນະຈັດຕັ້ງຂອງຄະນະພັກຂັ້ນແຂວງແລະຂັ້ນເມືອງ ຕົ້ນຕໍແມ່ນໄດ້ຮັບການຝຶກອົບຮົມຈາກສາຂາວິຊາການຄື: ເສດຖະກິດ, ການເງິນ (26%, 22%), ວິທະຍາສາດສັງຄົມ (20%, 21%), ກົດໝາຍ, ວຽກງານພາຍໃນ (17%, 19%), ການກໍ່ສ້າງພັກ ແລະ ອຳນາດການປົກຄອງລັດ (12%, 11%), ສ່ວນທີ່ເຫຼືອແມ່ນມາຈາກວິຊາສະເພາະອື່ນໆ. ຈຳນວນພະນັກງານທີ່ເຮັດວຽກໃນຄະນະຈັດຕັ້ງຂອງຄະນະພັກແຂງທີ່ມີເວລາເຮັດວຽກໃນຂະແໜງການຈັດຕັ້ງກໍ່ສ້າງພັກ ແຕ່ 10 ປີຂຶ້ນໄປກວມ 54%, ຢູ່ຄະນະຈັດຕັ້ງຂອງຄະນະພັກເມືອງແມ່ນ 24%. ໃນຊຸມປີທີ່ຜ່ານມາ, ຖັນແຖວພະນັກງານທີ່ເຮັດວຽກງານການຈັດຕັ້ງຂອງພັກ ໄດ້ປະຕິບັດບົດບາດທີ່ປຶກສາກ່ຽວກັບວຽກງານກໍ່ສ້າງພັກ ແລະ ວຽກງານພະນັກງານເປັນຢ່າງດີ, ປະກອບສ່ວນສຳຄັນ ເຂົ້າໃນບັນດາຜົນງານອັນໃຫຍ່ຫຼວງທາງປະຫວັດສາດ ໃນການກໍ່ສ້າງພັກ ແລະ ພັດທະນາປະເທດຊາດ.
ຢ່າງໃດກໍຕາມ, ຖັນແຖວພະນັກງານທີ່ປຶກສາກ່ຽວກັບການຈັດຕັ້ງກໍ່ສ້າງພັກ ຍັງບໍ່ທັນສະໝ່ຳສະເໝີ, ພາກສ່ວນໜຶ່ງຍັງຖືກຈຳກັດທາງດ້ານຄຸນສົມບັດ ແລະ ຄວາມສາມາດ, ຂາດບົດຮຽນປະສົບການ, ບໍ່ທັນຕອບສະໜອງໄດ້ກັບຄວາມຕ້ອງການ ແລະ ໜ້າທີ່ໃນສະພາບການໃໝ່, ວິທີການປະຕິບັດວຽກງານຍັງສັບສົນງຸ່ມງ່າມ, ບໍ່ວິທະຍາສາດ, ປະສິດທິຜົນຕ່ຳ. ມະຕິຂອງກອງປະຊຸມສູນກາງພັກຄັ້ງທີ 7 ສະໄໝທີ 12 ສະບັບເລກທີ 26-NQ/TW, ລົງວັນທີ 19 ພຶດສະພາ 2018 “ວ່າດ້ວຍການສຸມໃສ່ການກໍ່ສ້າງຖັນແຖວພະນັກງານທຸກລະດັບ, ໂດຍສະເພາະລະດັບຍຸດທະສາດ, ມີຄຸນສົມບັດ, ຄວາມສາມາດ ແລະ ຊື່ສຽງຢ່າງພຽງພໍ, ທຽບເທົ່າກັບໜ້າທີ່” ໄດ້ຊີ້ອອກຢ່າງກົງໄປກົງມາວ່າ, ວຽກງານກໍ່ສ້າງຖັນແຖວປະຕິບັດວຽກງານການຈັດຕັ້ງແລະພະນັກງານ ຍັງບໍ່ທັນສົມກັບຄວາມຮຽກຮ້ອງຕ້ອງການແລະໜ້າທີ່; ຄຸນນະພາບ, ຄວາມສາມາດ ແລະ ຊື່ສຽງຂອງພະນັກງານທີ່ເຮັດວຽກງານການຈັດຕັ້ງຫຼາຍຄົນ ຍັງບໍ່ທັນໄດ້ຕາມຄວາມຕ້ອງການ; ການກໍ່ສ້າງຖັນແຖວພະນັກງານນີ້ຍັງບໍ່ທັນໄດ້ຮັບຄວາມເອົາໃຈໃສ່ຢ່າງພຽງພໍ...
ໃນຂະນະນັ້ນ, ກອງປະຊຸມໃຫຍ່ຄັ້ງທີ 13 ຂອງພັກໄດ້ກຳນົດຄວາມຕ້ອງການພັດທະນາປະເທດໄລຍະຈະມາເຖິງ ດ້ວຍເປົ້າໝາຍທົ່ວໄປຄື: “ຍົກສູງຄວາມສາມາດນຳພາ, ຄວາມສາມາດກຳອຳນາດການປົກຄອງ ແລະ ກຳລັງແຮງສູ້ຮົບຂອງພັກ; ກໍ່ສ້າງພັກແລະລະບົບການເມືອງໃຫ້ປອດໃສ ແລະ ໝັ້ນຄົງເຂັ້ມແຂງຮອບດ້ານ; ປັບປຸງຄວາມເຊື່ອໝັ້ນຂອງປະຊາຊົນຕໍ່ພັກ, ລັດ ແລະ ລະບອບສັງຄົມນິຍົມ; ປຸກຕື່ນຄວາມປາຖະໜາທີ່ຈະພັດທະນາປະເທດໃຫ້ຈະເລີນຮຸ່ງເຮືອງແລະຜາສຸກ, ເສີມຂະຫຍາຍເຈດຈຳນົງແລະກຳລັງແຮງແຫ່ງມະຫາສາມັກຄີປວງຊົນທັງຊາດ ສົມທົບກັບກຳລັງແຮງຂອງຍຸກສະໄໝ; ຊຸກຍູ້ການປ່ຽນແປງໃໝ່, ການຫັນເປັນອຸດສາຫະກຳ ແລະ ທັນສະໄໝ ຢ່າງຮອບດ້ານ, ຄົບຊຸດ; ກໍ່ສ້າງແລະປົກປັກຮັກສາປະເທດຊາດ, ຮັກສາສະພາບແວດລ້ອມສັນຕິພາບ, ສະຖຽນລະພາບ; ສູ້ຊົນເຖິງກາງສະຕະວັດທີ 21, ປະເທດເຮົາກາຍເປັນປະເທດພັດທະນາແລ້ວ, ຕາມທິດທາງສັງຄົມນິຍົມ”(2).
ເພື່ອບັນລຸເປົ້າໝາຍຂ້າງເທິງ, ຄວາມຮຽກຮ້ອງຕ້ອງການແລະໜ້າທີ່ສຳຄັນທີ່ສຸດແມ່ນ ສືບຕໍ່ກໍ່ສ້າງລະບົບກົງຈັກການເມືອງທີ່ປອດໃສ ແລະ ໝັ້ນຄົງເຂັ້ມແຂງ, ສຸມໃສ່ສ້າງຖັນແຖວພະນັກງານທຸກຂັ້ນ, ພິເສດແມ່ນພະນັກງານລະດັບຍຸດທະສາດ ທີ່ມີຄຸນສົມບັດ, ຄວາມສາມາດ ແລະ ກຽດສັກສີ, ທຽບເທົ່າກັບໜ້າທີ່ວຽກງານ. ຄຽງຄູ່ກັນນັ້ນ, ການປະຕິວັດອຸດສາຫະກຳຄັ້ງທີສີ່ພວມເປີດໂອກາດຫຼາຍຢ່າງ, ພ້ອມກັນນັ້ນ ຍັງກໍ່ໃຫ້ເກີດຄວາມທ້າທາຍຫຼາຍປະການສຳລັບແຕ່ລະປະເທດ, ອົງການ ແລະ ບຸກຄົນ. ເຖິງຢ່າງນັ້ນກໍຕາມ, ລະດັບການເຂົ້າຮ່ວມຂອງຫວຽດນາມໃນການປະຕິວັດອຸດສາຫະກຳຄັ້ງທີສີ່ ຍັງຕ່ຳ. ດັ່ງນັ້ນ, ຄວາມເປັນເຈົ້າການແລະຕັ້ງໜ້າ ໃນການເຂົ້າຮ່ວມການປະຕິວັດອຸດສາຫະກຳຄັ້ງທີ່ສີ່ ເປັນຄວາມຕ້ອງການທີ່ຂາດບໍ່ໄດ້ ແລະ ພາວະວິໄສ; ແມ່ນໜ້າທີ່ທີ່ມີຄວາມໝາຍຍຸດທະສາດພິເສດ, ທັງຮີບດ່ວນ ທັງຍາວນານ ຂອງລະບົບການເມືອງ ແລະ ທົ່ວສັງຄົມ, ໃນນັ້ນມີອົງການຈັດຕັ້ງພະນັກງານຂອງພັກ. ການປະຕິວັດອຸດສາຫະກຳຄັ້ງທີ່ສີ່ ຈະສົ່ງຜົນກະທົບແລະຜົນສະທ້ອນ ເຖິງວຽກງານການຈັດວາງສັບຊ້ອນ ແລະ ການໃຊ້ບຸກຄະລາກອນ ຂອງຂະແໜງການຈັດຕັ້ງກໍ່ສ້າງພັກ, ກະທົບເຖິງການກໍ່ສ້າງ ແລະ ພັດທະນາໂຄງສ້າງພື້ນຖານທາງເຕັກນິກ, ການນໍາໃຊ້ຜົນສໍາເລັດທາງວິທະຍາສາດແລະເຕັກໂນໂລຊີທີ່ກ້າວໜ້າ ທັນສະໄໝ ເຂົ້າໃນວຽກງານການຄຸ້ມຄອງອົງການຈັດຕັ້ງ ພະນັກງານ ສະມາຊິກພັກ, ຮັກສາຄວາມປອດໄພຂອງຂໍ້ມູນ, ໃຊ້ປະໂຫຍດແລະຂຸດຄົ້ນຂໍ້ມູນ, ປະກອບສ່ວນເຂົ້າໃນການປະຕິຮູການບໍລິຫານ, ປັບປຸງກົງຈັດ, ຫຼຸດການບັນຈຸພະນັກງານ, ຍົກສູງປະສິດທິພາບ ແລະ ປະສິດທິຜົນ ຂອງອົງການຈັດຕັ້ງພະນັກງານທຸກລະດັບ.
ເພາະສະນັ້ນ, ເອກະສານກອງປະຊຸມໃຫຍ່ຄັ້ງທີ 13 ຂອງພັກລະບຸວ່າ ຕ້ອງສຸມໃສ່ກໍ່ສ້າງຖັນແຖວພະນັກງານຂະແໜງການຈັດຕັ້ງກໍ່ສ້າງພັກທີ່ “ສາມັກຄີ, ຈົງຮັກພັກດີ, ຊື່ສັດ, ບໍລິສຸດ, ເປັນແບບຢ່າງ, ຊ່ຽວຊານຊຳນວນ, ເປັນມືອາຊີບ”, ໂດຍສະເພາະພະນັກງານທີ່ປຶກສາລະດັບຍຸດທະສາດ ແລະ ຜູ້ຊ່ຽວຊານຊັ້ນນໍາ ເພື່ອຕອບສະໜອງຄວາມຮຽກຮ້ອງຕ້ອງການ ແລະ ໜ້າທີ່ໃນໄລຍະພັດທະນາໃໝ່. ໃຫ້ຄວາມສຳຄັນກັບການຄັດເລືອກ ແລະ ຈັດວາງຫົວໜ້າອົງການທີ່ປຶກສາທີ່ເໝາະສົມ ເພື່ອໃຫ້ຄຳແນະນຳແລະຊ່ວຍເຫຼືອຄະນະພັກທຸກຂັ້ນ(3). ນີ້ແມ່ນໜ້າທີ່ທີສຳຄັນ ແຕ່ກໍ່ເຕັມໄປດ້ວຍຄວາມຫຍຸ້ງຍາກ, ຮຽກຮ້ອງໃຫ້ບັນດາຄະນະພັກ ແລະອົງການຈັດຕັ້ງພັກ ຕ້ອງສຸມໃສ່ການນຳພາຊີ້ນຳ ແລະ ເດັດຂາດໃນການຈັດຕັ້ງປະຕິບັດ ເພື່ອກໍ່ສ້າງຖັນແຖວພະນັກງານຂະແໜງການຈັດຕັ້ງກໍ່ສ້າງພັກ ໃຫ້ນັບມື້ນັບປອດໃສ ແລະ ໝັ້ນຄົງເຂັ້ມແຂງ. ບັນດາຄະນະພັກຕ້ອງມີມາດຕະຖານສະເພາະ, ມີແຜນການ ແລະ ວິທີການພື້ນຖານ ເພື່ອສ້າງຖັນແຖວພະນັກງານທີ່ເຮັດວຽກງານການຈັດຕັ້ງພະນັກງານ ຕອບສະໜອງຄວາມຕ້ອງການ ແລະ ໜ້າທີ່ ໃນສະຖານະການໃໝ່, ລະອຽດຄື:
ທີໜຶ່ງ, ສ້າງ ແລະ ປັບປຸງຕຳແໜ່ງງານ ແລະ ມາດຕະຖານຂອງພະນັກງານໃນຂະແໜງຈັດຕັ້ງກໍ່ສ້າງພັກ.
ນີ້ແມ່ນເນື້ອໃນສຳຄັນທຳອິດ ຂອງວຽກງານກໍ່ສ້າງຖັນແຖວພະນັກງານ ໃນຂະແໜງການຈັດຕັ້ງກໍ່ສ້າງພັກ, ໂດຍຕິດກັບການກໍ່ສ້າງແລະປັບປຸງບັນດາອົງການທີ່ປຶກສາກ່ຽວກັບການຈັດຕັ້ງ ພະນັກງານຂອງພັກ. ເພື່ອໃຫ້ລະບົບການຈັດຕັ້ງກົງຈັກຂອງພັກມີຄວາມກະທັດລັດ ແລະ ເຄື່ອນໄຫວມີປະສິດທິພາບ ແລະ ຜະສິດທິຜົນນັ້ນ, ກ່ອນອື່ນໝົດ ບັນດາອົງການທີ່ປຶກສາກ່ຽວກັບວຽກງານການຈັດຕັ້ງພະນັກງານຂອງພັກ ຕ້ອງມີຄວາມສາມາດ ແລະ ປະຕິບັດພາລະບົດບາດ ໜ້າທີ່ທີ່ໄດ້ຮັບມອບໝາຍເປັນຢ່າງດີ. ຢາກໄດ້ຄືແນວນັ້ນ, ບັນດາອົງການທີ່ເຮັດວຽກງານການຈັດຕັ້ງພະນັກງານຂອງພັກເອງ ຕ້ອງມີຄວາມກະທັດລັດ, ໄດ້ຮັບການຈັດຕັ້ງຢ່າງມີວິທະຍາສາດ, ແໜ້ນແຟ້ນ, ຄົບຊຸດ ແລະ ເປັນເອກະພາບ. ເພື່ອຕອບສະໜອງຄວາມຕ້ອງການເຫຼົ່ານັ້ນ, ການກໍ່ສ້າງແລະປັບປຸງບູລະນະຕໍາແໜ່ງງານໃນອົງການທີ່ປຶກສາກ່ຽວກັບວຽກງານການຈັດຕັ້ງພະນັກງານ ມີຄວາມສໍາຄັນທີ່ສຸດ. ນີ້ແມ່ນພື້ນຖານທຳອິດເພື່ອກຳນົດຂະໜາດ, ຮູບແບບ ແລະ ໂຄງສ້າງການຈັດຕັ້ງ ຂອງອົງການທີ່ປຶກສາ ກ່ຽວກັບວຽກງານການຈັດຕັ້ງພະນັກງານຂອງພັກ ໃນຂັ້ນຕ່າງໆ ແລະ ເປັນພື້ນຖານທຳອິດ ເພື່ອກຳນົດຈຳນວນ, ຄວາມຕ້ອງການມາດຕະຖານຄຸນສົມບັດ ຂອງຖັນແຖວພະນັກງານ ໃນຂະແໜງການຈັດຕັ້ງກໍ່ສ້າງພັກ. ການກໍ່ສ້າງແລະປັບປຸງບູລະນະຕຳແໜ່ງງານ ແລະ ມາດຕະຖານພະນັກງານ, ດ້ານໜຶ່ງ, ເພື່ອຍົກສູງຄຸນນະພາບຂອງຖັນແຖວພະນັກງານໃນຂະແໜງການຈັດຕັ້ງກໍ່ສ້າງພັກ ແລະ ປະສິດທິຜົນຂອງວຽກງານພະນັກງານ, ເປັນພື້ນຖານເພື່ອດຳເນີນການຈັດວາງສັບຊ້ອນພາກສ່ວນຕ່າງໆໃນອົງການ ຢ່າງມີວິທະຍາສາດຫຼາຍຂຶ້ນ; ອີກດ້ານໜຶ່ງ, ປະກອບສ່ວນຍົກສູງຄຸນນະພາບ ແລະ ສ້າງຄວາມສະດວກໃຫ້ແກ່ການຄຸ້ມຄອງ ຝຶກອົບຮົມ ແລະ ບຳລຸງສ້າງພະນັກງານ, ການຮັບສະໝັກພະນັກງານ ຈົນເຖິງການປະເມີນ ແລະ ການປະຕິບັດນະໂຍບາຍສໍາລັບພະນັກງານ.
ທີສອງ, ໃຫ້ຄວາມສຳຄັນກັບການສຶກສາ ແລະ ຝຶກອົບຮົມທາງດ້ານທິດສະດີການເມືອງ, ວິຊາສະເພາະ, ວິຊາອາຊີບ, ຈັນຍາບັນວິຊາຊີບ ສຳລັບພະນັກງານໃນຂະແໜງການຈັດຕັ້ງກໍ່ສ້າງພັກ.
ການໃຫ້ຄວາມສຳຄັນກັບການສຶກສາ ແລະ ຝຶກອົບຮົມທາງດ້ານທິດສະດີການເມືອງ, ວິຊາສະເພາະ, ວິຊາອາຊີບ, ຈັນຍາບັນວິຊາຊີບ ສຳລັບພະນັກງານໃນຂະແໜງການຈັດຕັ້ງກໍ່ສ້າງພັກ ແມ່ນເພື່ອຊ່ວຍໃຫ້ຖັນແຖວພະນັກງານນີ້ ມີຫຼັກໝັ້ນ ຄວາມກ້າຫານທາງການເມືອງທີ່ໜັກແໜ້ນ, ມີວິຊາຊີບແລະຄວາມຊ່ຽວຊານ ເພື່ອຕອບສະໜອງເງື່ອນໄຂຂອງການປະຕິວັດອຸດສາຫະກຳຄັ້ງທີສີ່ໃນປະຈຸບັນໃຫ້ດີຂຶ້ນ. ປະທານໂຮ່ຈີມິນເຄີຍຢືນຢັນວ່າ: “ເພື່ອໃຫ້ພະນັກງານແລະສະມາຊິກພັກທຸກຄົນສົມກັບເປັນນັກຮົບປະຕິວັດ, ພັກຂອງພວກເຮົາຕ້ອງອອກແຮງເພີ່ມທະວີການສຶກສາອົບຮົມທົ່ວພັກ ກ່ຽວກັບອຸດົມການກອມມູນິດ, ກ່ຽວກັບແນວທາງ ແລະ ນະໂຍບາຍຂອງພັກ, ກ່ຽວກັບໜ້າທີ່ ແລະ ຄຸນສົມບັດສິນທຳຂອງສະມາຊິກພັກ”(4).
ເພື່ອເຮັດເນື້ອໃນຂ້າງເທິງນີ້ໄດ້ດີ, ຈຳເປັນຕ້ອງສືບຕໍ່ຍົກສູງຄວາມຮັບຮູ້ຂອງບັນດາຄະນະພັກ ແລະ ອົງການຈັດຕັ້ງພັກ ກ່ຽວກັບບົດບາດທີ່ຕັ້ງ, ຄວາມໝາຍ ແລະ ຄວາມສຳຄັນ ຂອງວຽກງານການສຶກສາ ແລະ ຝຶກອົບຮົມທາງດ້ານທິດສະດີການເມືອງ, ວິຊາສະເພາະ, ວິຊາອາຊີບ, ຈັນຍາບັນວິຊາຊີບ ສຳລັບພະນັກງານໃນຂະແໜງການຈັດຕັ້ງກໍ່ສ້າງພັກ. ເປັນເຈົ້າການໃນການສ້າງແລະປັບປຸງບູລະນະກົດລະບຽບ, ລະບຽບການ, ລະບອບການຮ່ຳຮຽນທິດສະດີການເມືອງ, ວິຊາສະເພາະ, ວິຊາອາຊີບ, ຈັນຍາບັນວິຊາຊີບ; ພ້ອມກັນນັ້ນ, ສືບຕໍ່ປ່ຽນແປງໃໝ່ ແລະ ຍົກສູງຄຸນນະພາບ ແລະ ປະສິດທິຜົນຂອງໂຄງການການສຶກສາ ແລະ ຝຶກອົບຮົມທາງດ້ານທິດສະດີການເມືອງ, ວິຊາສະເພາະ, ວິຊາອາຊີບ, ຈັນຍາບັນວິຊາຊີບ ສຳລັບພະນັກງານໃນຂະແໜງການຈັດຕັ້ງກໍ່ສ້າງພັກ. ເພີ່ມທະວີວຽກງານການຄຸ້ມຄອງ ເພື່ອຮັບປະກັນຄຸນນະພາບຂອງການສຶກສາ ແລະ ຝຶກອົບຮົມທາງດ້ານທິດສະດີການເມືອງ, ວິຊາສະເພາະ, ວິຊາອາຊີບ, ຈັນຍາບັນວິຊາຊີບ; ຮັດແໜ້ນລະບຽບວິໄນໃນການສຶກສາອົບຮົມ, ປຸກຕື່ນຈິດໃຈໄຝ່ຮຽນຮູ້ ແລະ ການຮຽນຮູ້ດ້ວຍຕົນເອງ, ໂດຍສະເພາະແມ່ນ ທິດສະດີການເມືອງ ແລະ ວິຊາສະເພາະການຈັດຕັ້ງກໍ່ສ້າງພັກ ໃຫ້ແກ່ພະນັກງານທີ່ປຶກສາກ່ຽວກັບວຽກງານການຈັດຕັ້ງພະນັກງານ.
ນອກຈາກເນື້ອໃນກ່ຽວກັບລະດັບວິຊາສະເພາະ, ທິດສະດີການເມືອງ ແລະ ວິຊາສະເພາະການຈັດຕັ້ງແລ້ວ, ເນື້ອໃນທີ່ສຳຄັນອີກຢ່າງໜຶ່ງ ໃນການຝຶກອົບຮົມ ແລະ ບຳລຸງສ້າງພະນັກງານທີ່ເຮັດວຽກງານການຈັດຕັ້ງນັ້ນ ແມ່ນການຝຶກທັກສະ, ການຖອດຖອນບົດຮຽນໃນການປະເມີນແລະຈົດຈຳບຸກຄົນ, ທັກສະ ວິທີການ ແລະ ປະສົບການໃນການຈັດການກັບສະຖານະການທີ່ກ່ຽວຂ້ອງກັບວຽກງານການຈັດຕັ້ງ, ພະນັກງານ ສະມາຊິກພັກ ແລະ ການປົກປ້ອງການເມືອງພາຍໃນ. ການຈັດຕັ້ງກໍ່ສ້າງພັກແມ່ນຂົງເຂດພິເສດ, ດັ່ງນັ້ນ, ຈຶງຕ້ອງມີຄວາມຮູ້, ທັກສະ, ປະສົບການ ແລະ ຄວາມສາມາດພິເສດ; ນັ້ນແມ່ນຄວາມສາມາດໃນການຮູ້ຈັກ “ເບິ່ງຄົນ”, ຫາຄົນ, ການຮັບຮູ້ ປະເມີນ ໃຊ້ ແລະ ສົ່ງເສີມຄວາມສາມາດຂອງພະນັກງານ. ໃນບົດຄວາມ “ບາງບັນຫາທີ່ຕ້ອງໄດ້ເອົາໃຈໃສ່ເປັນພິເສດ ໃນວຽກງານການກະກຽມບຸກຄະລາກອນ ສຳລັບກອງປະຊຸມໃຫຍ່ຄັ້ງທີ 13 ຂອງພັກ”, ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ໃຫ້ຄຳເຕືອນທີ່ເລິກເຊິ່ງ ແລະ ກຳນົດຄວາມຕ້ອງການສູງທີ່ສຸດ ສຳລັບບັນດາສະຫາຍໃນຄະນະອະນຸກຳມະການບຸກຄະລາກອນວ່າ, ພະນັກງານທີ່ເຮັດວຽກງານການຈັດຕັ້ງຕ້ອງ “ເຊື່ອຖືໄດ້ແທ້ໆ, ຈົງຮັກພັກດີຢ່າງແທ້ຈິງ, ຊື່ສັດບໍລິສຸດ, ໂປ່ງໃສ, ທ່ຽງທຳ, ພາວະວິໄສ, ໂດຍສະເພາະແມ່ນມີສະຕິສ່ອງໃສ, ສຸຂຸມຫຼັກແຫຼມ.
ທີສາມ, ປ່ຽນແປງໃໝ່ວຽກງານການປະເມີນ, ການຈັດວາງ, ການແຕ່ງຕັ້ງ ແລະ ການໃຊ້ພະນັກງານໃນຂະແໜງການຈັດຕັ້ງກໍ່ສ້າງພັກ.
ການປະຕິບັດເປັນຢ່າງດີເນື້ອໃນນີ້ ແມ່ນເງື່ອນໄຂເພື່ອໃຫ້ພະນັກງານຂະແໜງການກໍ່ສ້າງພັກເສີມຂະຫຍາຍຄວາມສາມາດ, ຍົກສູງຄຸນນະພາບ ແລະ ປະສິດທິຜົນການເຄື່ອນໄຫວຂອງອົງການ; ປະກອບສ່ວນກີດກັ້ນແລະແກ້ໄຂ ສະພາບການເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ ແລະ ວິຖີຊີວິດ. ເມື່ອຍັງມີຊີວິດຢູ່, ປະທານໂຮ່ຈີມິນໄດ້ຊີ້ແຈ້ງວ່າ: “ກ່ອນທີ່ຈະແຕ່ງຕັ້ງພະນັກງານ, ຕ້ອງທົບທວນ ປະເມີນຢ່າງຈະແຈ້ງ. ບໍ່ພຽງແຕ່ປະເມີນຜົນວຽກງານຂອງເຂົາ, ແຕ່ຍັງຕ້ອງພິຈາລະນາວິຖີຂີວິດຂອງເຂົາ. ບໍ່ພຽງແຕ່ພິຈາລະນາການຂຽນແລະຄຳເວົ້າຂອງເຂົາ, ແຕ່ຍັງຕ້ອງພິຈາລະນາວ່າການກະທຳຂອງເຂົາຖືກຕ້ອງຕາມຄຳເວົ້າແລະຂໍ້ຂຽນຂອງເຂົາຫຼືບໍ່”(5). ເພື່ອເຕີບໃຫຍ່ແລະມີບົດຮຽນປະສົບການ ໃນວຽກງານກນຈັດຕັ້ງພະນັກງານນັ້ນ, ຮຽກຮ້ອງໃຫ້ພະນັກງານຂອງຂະແໜງການຈັດຕັ້ງກໍ່ສ້າງພັກເອງ ຕ້ອງໄດ້ຮັບການຜັດປ່ຽນໝູນວຽນ ແລະ ສຳຜັດກັບສະພາບແວດລ້ອມການເຮັດວຽກທີ່ແຕກຕ່າງກັນ. ການຜັດປ່ຽນພະນັກງານຂອງຂະແໜງການຈັດຕັ້ງກໍ່ສ້າງພັກ ຈະຊ່ວຍໃຫ້ພະນັກງານມີສະພາບແວດລ້ອມຕົວຈິງ ເພື່ອຝຶກຝົນຫຼໍ່ຫຼອມ, ສູ້ຊົນ ແລະ ເຕີບໃຫຍ່ຂຶ້ນ. ຜ່ານການຜັດປ່ຽນ, ພະນັກງານສາມາດ “ເຂົ້າໃຈແຈ້ງ” ສະພາບການ, ເຫັນໄດ້ວ່າ ແຜນນະໂຍບາຍ ແນວທາງຂອງພັກ ແລະ ນະໂຍບາຍກົດໝາຍຂອງລັດ ໄດ້ສອດຄ່ອງເໝາະສົມກັບພຶດຕິກຳຕົວຈິງຫຼືບໍ່, ຕ້ອງແກ້ໄຂ, ເພີ່ມເຕີມໃນຂັ້ນຕອນໃດ, ເນື້ອໃນໃດ? ການຜັດປ່ຽນພະນັກງານຈະປະກອບສ່ວນເຂົ້າໃນການແກ້ໄຂສະຖານະການທີ່ພະນັກງານຂັ້ນເທິງ “ພຽງແຕ່ຮູ້ວິທີການເບິ່ງຈາກເທິງລົງ”, ສ່ວນພະນັກງານທ້ອງຖິ່ນ “ພຽງແຕ່ຮູ້ວິທີການເບິ່ງຈາກລຸ່ມຂຶ້ນ”. ນັ້ນກໍ່ແມ່ນຫຼັກຖານເພື່ອຈັດວາງສັບຊ້ອນ ແລະ ນຳໃຊ້ພະນັກງານຂອງຂະແໜງການຈັດຕັ້ງກໍ່ສ້າງພັກ ຕາມແຜນການ ແລະ ມີປະສິດທິຜົນ.
ທີສີ່, ສ້າງແບບແຜນ, ວິທີການ, ຮູບແບບການເຮັດວຽກເປັນມືອາຊີບ ແລະ ມີວິທະຍາສາດ ໃຫ້ຖັນແຖວພະນັກງານທີ່ເຮັດວຽກງານການຈັດຕັ້ງກໍ່ສ້າງພັກ.
ວຽກງານຂອງຂະແໜງການຈັດຕັ້ງກໍ່ສ້າງພັກ ແມ່ນວິທະຍາສາດ ແລະ ສິລະປະໃນການອອກແບບຮູບແບບການຈັດຕັ້ງກົງຈັກ ແລະ ກໍ່ສ້າງແລະນຳໃຊ້ຖັນແຖວພະນັກງານ ສະມາຊິກພັກຂອງພັກ. ນັ້ນກໍ່ແມ່ນຂະແໜງການທີ່ສ້າງແລະປະຕິບັດ ບັນດາຂໍ້ກຳນົດ, ກົດລະບຽບ, ຫຼັກການ, ລະບອບ, ນະໂຍບາຍສຳລັບຜູ້ຄົນ, ແມ່ນການປະພຶດລະຫວ່າງຄົນຕໍ່ຄົນ - ພະນັກງານ, ສະມາຊິກພັກຂອງພັກ; ດັ່ງນັ້ນ, ຮຽກຮ້ອງໃຫ້ຖັນແຖວພະນັກງານທີ່ເຮັດວຽກງານການຈັດຕັ້ງ ບໍ່ພຽງແຕ່ເປັນຜູ້ທີ່ມີຄຸນສົມບັດທາງການເມືອງ, ມີຈະລິຍະທຳ,ຄຸນນະພາບ, ຄວາມສາມາດ, ແຕ່ຍັງມີແບບແຜນ, ວິທີການ, ຮູບແບບການເຮັດວຽກ, ມີຄວາມຮັບຜິດຊອບ, ວິທະຍາສາດ, ຄວາມຊື່ສັດ, ຄວາມຍຸຕິທຳ, ຄວາມທ່ຽງທຳ. ເພື່ອປະຕິບັດເນື້ອໃນ ແລະ ໜ້າທີ່ນີ້, ຈຳເປັນຕ້ອງເປັນເອກະພາບດ້ານການຮັບຮູ້ໃນທົ່ວພັກ ແລະ ລະບົບການເມືອງທັງໝົດ ກ່ຽວກັບຄວາມຕ້ອງການອັນຮີບດ່ວນທີ່ຈະຕ້ອງປ່ຽນແປງໃໝ່ແລະ ແກ້ໄຂປັບປຸງແບບແຜນ, ວິທີການເຮັດວຽກ ຂອງຖັນແຖວພະນັກງານເວົ້າລວມ ແລະ ຖັນແຖວພະນັກງານທີ່ເຮັດວຽກງານການຈັດຕັ້ງກໍ່ສ້າງພັກເວົ້າສະເພາະ; ຕ້ອງຖືວ່າ ວຽກງານນີ້ບໍ່ພຽງແຕ່ເຮັດໃຫ້ບຸກຄະລິກກະພາບຂອງແຕ່ລະຄົນສົມບູນແບບເທົ່ານັ້ນ, ແຕ່ຍັງເປັນການແກ້ໄຂຂັ້ນພື້ນຖານ ເພື່ອສ້າງອົງການຈັດຕັ້ງທີ່ເຂັ້ມແຂງ. ສືບຕໍ່ປັບປຸງບູລະນະລະບົບສະຖາບັນ, ລະບຽບການ ແລະ ມາດຕະຖານກ່ຽວກັບແບບແຜນ, ວິທີການເຮັດວຽກຂອງພະນັກງານໃນຂະແໜງການຈັດຕັ້ງກໍ່ສ້າງພັກ ເພື່ອເປັນພື້ນຖານໃນການປະເມີນ ຕິດຕາມກວດກາ ແລະ ຄຸ້ມຄອງພະນັກງານ. ການນຳໃຊ້ຄວາມສຳເລັດທາງວິທະຍາສາດແລະເຕັກໂນໂລຊີສະໄໝໃໝ່ທີ່ດີຂຶ້ນ ໃນການນຳພາ ແລະ ຄຸ້ມຄອງ, ໂດຍສະເພາະແມ່ນການນຳໃຊ້ເຕັກໂນໂລຊີຂໍ້ມູນຂ່າວສານ ເພື່ອເຮັດໃຫ້ທັດສະນະຄະຕິແລະພຶດຕິກຳຂອງຂອງພະນັກງານໂປ່ງໃສເມື່ອປະຕິບັດຂະບວນການແກ້ໄຂວຽກງານ, ຈາກນັ້ນຜູ້ຄົນຈຶ່ງຈະມີເງື່ອນໄຂຕິດຕາມກວດກາສະເພາະ./.
---------------------
(1) ໂຮ່ຈີມິນ: ນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 5, ໜ້າ 309.
(2) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 35-36.
(3) ເບິ່ງ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 2, ໜ້າ 245.
(4) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 15, ໜ້າ 547.
(5) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 321.
- ປຶ້ມນີ້ໄດ້ລົງພິມໃນວາລະສານກອມມູນິດ ສະບັບທີ 1003 (ເດືອນທັນວາ 2022)
