ການໝູນໃຊ້ແນວຄິດຂອງໂຮ່ຈີມິນກ່ຽວກັບ “ປະເທດຖືປະຊາຊົນເປັນຮາກ”
ເຂົ້າໃນການສ້າງ “ສະໜາມຮົບໃນໃຈປະຊາຊົນ”, ປັບປຸງການປ້ອງກັນປະເທດ,
ປົກປັກຮັກສາປະເທດຊາດຫວຽດນາມສັງຄົມນິຍົມຢ່າງໝັ້ນຄົງ ໃນໄລຍະໃໝ່
ເຂົ້າໃນການສ້າງ “ສະໜາມຮົບໃນໃຈປະຊາຊົນ”, ປັບປຸງການປ້ອງກັນປະເທດ,
ປົກປັກຮັກສາປະເທດຊາດຫວຽດນາມສັງຄົມນິຍົມຢ່າງໝັ້ນຄົງ ໃນໄລຍະໃໝ່
ຮັບຟັງຄຳສອນຂອງລຸງໂຮ່ _ຮູບແຕ້ມສາລະຄະດີ
ແນວຄິດໂຮ່ຈີມິນ ແລະ ທັດສະນະຂອງພັກກອມມູນິດຫວຽດນາມ
ກ່ຽວກັບ “ປະເທດຖືປະຊາຊົນເປັນຮາກ”
ແນວຄິດ “ປະເທດຖືປະຊາຊົນເປັນຮາກ” ຂອງປະທານໂຮ່ຈີມິນ ສະແດງອອກໃນສອງດ້ານພື້ນຖານດັ່ງນີ້:
ທີໜຶ່ງ, ປະທານໂຮ່ຈີມິນຊີ້ແຈ້ງວ່າ, ການເຄື່ອນໄຫວທັງໝົດຂອງພັກແລະລັດ ຕ້ອງເລີ່ມຈາກຄວາມປາດຖະໜາ ແລະ ຜົນປະໂຫຍດອັນຊອບທຳຂອງປະຊາຊົນ; ຕ້ອງເຄົາລົບແລະປົກປ້ອງຜົນປະໂຫຍດອັນຊອບທຳຂອງປະຊາຊົນ, ເພື່ອຮັບໃຊ້ປະຊາຊົນ. ເພາະສະນັ້ນ, ປະຊາຊົນເປັນເຈົ້າຂອງທີ່ແທ້ຈິງຂອງປະເທດ, ເປັນກໍາລັງແຮງງານພື້ນຖານຂອງສັງຄົມ, ຜູ້ສ້າງປະຫວັດສາດ; ແມ່ນກຳລັງທີ່ກຳນົດຄວາມສຳເລັດຫຼືຄວາມລົ້ມເຫຼວຂອງການປະຕິວັດ; ຖ້າບໍ່ມີມະຫາຊົນກໍ່ບໍ່ມີປະຫວັດສາດໃດໆເລີຍ. ປະທານໂຮ່ຈີມິນຊີ້ແຈ້ງວ່າ: “ການປະຕິວັດແມ່ນພາລະກິດຂອງມະຫາຊົນ, ບໍ່ແມ່ນພາລະກິດຂອງວີລະບຸລຸດຄົນໃດຄົນໜຶ່ງ”(2).
ທີສອງ, ເພື່ອເສີມຂະຫຍາຍຄວາມຮັບຜິດຊອບຂອງປະຊາຊົນໃນພາລະກິດການປະຕິວັດ, ປະທານໂຮ່ຈີມິນໄດ້ຮຽກຮ້ອງໃຫ້ບັນດາອົງການຈັດຕັ້ງພັກ ແລະ ພະນັກງານ ສະມາຊິກພັກທຸກຄົນຕ້ອງໃກ້ຊິດປະຊາຊົນ, ຮັບຟັງຄວາມຄິດເຫັນຂອງປະຊາຊົນ, ເຂົ້າໃຈປະຊາຊົນຢ່າງເລິກເຊິ່ງ ເພື່ອວາງແຜນນະໂຍບາຍ ແລະນະໂຍບາຍທີ່ຖືກຕ້ອງ ຖືກໃຈປະຊາຊົນ ແລະ ຈັດຕັ້ງ ນຳພາ ລະດົມປະຊາຊົນປະຕິບັດ. ເມື່ອໄດ້ກາຍເປັນພັກທີ່ກຳອຳນາດແລ້ວ, ແນວທາງ ແຜນນະໂຍບາຍທັງໝົດຂອງພັກ ຕ້ອງແນໃສ່ຍົກສູງຊີວິດການເປັນຢູ່ຂອງປະຊາຊົນ, ກ່ອນອື່ນໝົດແມ່ນເຮັດໃຫ້ປະຊາຊົນມີອາຫານ, ເຄື່ອງນຸ່ງຫົ່ມ, ທີ່ພັກອາໄສ ແລະ ໄດ້ຮັບການສຶກສາຮຽນຮູ້. ພະນັກງານ ສະມາຊິກພັກຕ້ອງໃກ້ຊິດສະໜິດສະໜົມກັບປະຊາຊົນ, ເຄົາລົບແລະປົກປ້ອງສິດຜົນປະໂຫຍດທີ່ຊອບທຳ ຖືກກົດໝາຍຂອງປະຊາຊົນ, ໂຄສະນາ ປຸກລະດົມ ຂົນຂວາຍປະຊາຊົນປະຕິບັດແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດໃຫ້ສຳເລັດມີໄຊ; ຕ້ອງຖືເອົາການຮັບໃຊ້ປະເທດຊາດ, ຮັບໃຊ້ປະຊາຊົນເປັນຈຸດປະສົງ, ເຫດຜົນຂອງຊີວິດ, ຄວາມປິຕິດີໃຈ ແລະ ຄວາມສຸກຂອງຕົນເອງ. ດ້ວຍວິທີນີ້ເທົ່ານັ້ນ, “ຮາກ” ຈະໝັ້ນຄົງ ເຊິ່ງຈະເຮັດໃຫ້ການປະຕິວັດໄປສູ່ໄຊຊະນະ.
ໃນຂົງເຂດການທະຫານ, ດ້ວຍແນວຄິດ “ປະເທດຖືປະຊາຊົນເປັນຮາກ”, ປະທານໂຮ່ຈີມິນຊີ້ແຈງວ່າ, ກຳລັງທີ່ເຂົ້າຮ່ວມການເຄື່ອນໄຫວທາງດ້ານການທະຫານແມ່ນປະຊາຊົນທັງໝົດ; ເພາະວ່າ, ກຳລັງແຮງຂອງປະຊາຊົນແມ່ນຍິ່ງໃຫຍ່ທີ່ສຸດ, ມີບົດບາດຕັດສິນຊີ້ຂາດໄຊຊະນະ. ຕາມເພິ່ນ, ປະຊາຊົນທຸກຄົນລ້ວນແຕ່ສາມາດເຂົ້າຮ່ວມການເຄື່ອນໄຫວໃນຂົງເຂດການທະຫານ ໂດຍບໍ່ຈຳແນກເພດ, ໄວ; ປະຊາຊົນທຸກຊັ້ນວັນນະໃນສັງຄົມ ລ້ວນແຕ່ເຂົ້າຮ່ວມການຕໍ່ສູ້ຕີສັດຕູດ້ວຍອາວຸດທຸກຊະນິດ ຕັ້ງແຕ່ອາວຸດປະຖົມປະຖານ ຈົນເຖິງອາວຸດທີ່ສັນສະໄໝ, ດ້ວຍວິທີການສູ້ຮົບທັງໝົດ ໃນພື້ນທີ່ຍຸດທະສາດຕ່າງໆ.
ແນວຄິດ “ປະເທດຖືປະຊາຊົນເປັນຮາກ” ຂອງປະທານໂຮ່ຈີມິນມີຄຸນຄ່າໃຫຍ່ຫຼວງທາງດ້ານທິດສະດີ ແລະ ພຶດຕິກຳຕົວຈິງ, ປະກອບສ່ວນເຮັດໃຫ້ຄັງສາງທິດສະດີຂອງລັດທະມາກ-ເລນິນ ກ່ຽວກັບບົດບາດຂອງມະຫາຊົນໃນປະຫວັດສາດ ອຸດົມສົມບູນຂຶ້ນຕື່ມ. ພ້ອມກັນນັ້ນ, ແນວຄິດດັ່ງກ່າວຂອງເພິ່ນ ຍັງເປັນພື້ນຖານທີ່ສຳຄັນ ເພື່ອໃຫ້ພັກກອມມູນິດຫວຽດນາມ ວາງແນວທາງການປະຕິວັດທີ່ຖືກຕ້ອງ ໂດຍຖືເອົາສິດແລະຜົນປະໂຫຍດທີ່ຖືກກົດໝາຍ ຊອບທຳຂອງປະຊາຊົນ, ຂອງປະເທດຊາດ ເປັນເປົ້າໝາຍຂອງການສູ້ຊົນ; ດຳເນີນການຈັດຕັ້ງ, ສຶກສາອົບຮົມ, ຝຶກຝົນຫຼໍ່ຫຼອມພັກ ເຮັດໃຫ້ພັກສະອາດປອດໃສ ແລະ ໝັ້ນຄົງເຂັ້ມແຂງ, ເປັນພັກທີ່ແທ້ຈິງຂອງຊົນຊັ້ນກຳມະກອນ, ຂອງປະຊາຊົນຜູ້ອອກແຮງງານ ແລະ ຂອງຊາດຫວຽດນາມ. ອາໃສສິ່ງດັ່ງກ່າວນັ້ນ, ພັກກອມມູນິດຫວຽດນາມ ແລະ ປະທານໂຮ່ຈີມິນ ຍາມໃດກໍ່ໄດ້ຮັບຄວາມໄວ້ເນື້ອເຊື່ອໃຈ, ຄວາມເຫັນອົກເຫັນໃຈ ແລະ ການສະໜັບສະໜູນຂອງທົ່ວພັກ, ທົ່ວປວງຊົນ ແລະ ກອງທັບ, ຍາດໄດ້ໄຊຊະນະອັນສະຫງ່າລາສີໃນປະຫວັດສາດ, ປົດປ່ອຍຊາດ, ທ້ອນໂຮມປະເທດຊາດເປັນເອກະພາບ, ປະຕິບັດພາລະກິດສ້າງສາ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມຢ່າງໝັ້ນຄົງ.
ພຶດຕິກຳຕົວຈິງໃນປະຫວັດສາດຂອງຊາດຫວຽດນາມ ສະແດງໃຫ້ເຫັນວ່າ, ຄວາມຈະເລີນຮຸ່ງເຮືອງ ຫຼືຄວາມຕົກຕ່ຳຂອງປະເທດ, ປະເທດຈະເຂັ້ມແຂງ ຫຼືອ່ອນແອລົງ, ຈະສາມາດປົກປັກຮັກສາເອກະລາດ ອະທິປະໄຕ ແລະ ຜົນປະໂຫຍດຂອງຊາດໄດ້ຢ່າງໝັ້ນຄົງຫຼືບໍ່ນັ້ນ ແມ່ນຂຶ້ນຢູ່ກັບ “ຫົວໃຈຂອງປະຊາຊົນ”, ຂຶ້ນກັບການສ້າງ “ສະໜາມຮົບໃນໃຈຂອງປະຊາຊົນ”. ໃນຍຸກສະໄໝໂຮ່ຈີມິນ, ແນວຄິດ “ປະເທດຖືປະຊາຊົນເປັນຮາກ” ຂອງເພິ່ນເປັນຮາກເຫງົ້າ, ເປັນພື້ນຖານ, ຮາກຖານສຳລັບການກໍ່ຮ່າງສ້າງຕົວຂອງແນວທາງສົງຄາມປະຊາຊົນທົ່ວປວງຊົນ, ຮອບດ້ານ, ເປັນເອກະລັກ ແລະ ປະດິດສ້າງ, ປະກອບສ່ວນສຳຄັນ ເຂົ້າໃນການເສີມຂະຫຍາຍກຳລັງແຮງສັງລວມ ເພື່ອເອົາຊະນະສັດຕູຜູ້ຮຸກຮານທັງໝົດ. ຈາກພຶດຕິກຳຕົວຈິງນັ້ນ, ພັກກອມມູນິດຫວຽດນາມກຳນົດການສ້າງ “ສະໜາມຮົບໃນໃຈປະຊາຊົນ” ເປັນພື້ນຖານເພື່ອເສີມຂະຫຍາຍກຳລັງແຮງຂອງທົ່ວປະເທດ ໃນການປະຕິບັດສອງໜ້າທີ່ຍຸດທະສາດຄື: ການສ້າງສາ ແລະ ການປົກປັກຮັກສາປະເທດຊາດ. ໃນກອງປະຊຸມໃຫຍ່ຄັ້ງທີ 10 ຂອງພັກ, ເປັນຄັ້ງທຳອິດທີ່ຄຳວ່າ “ທ່າສະໜາມຮົບໃນໃຈປະຊາຊົນ” ຖືກບັນທຶກໄວ້ໃນເອກະສານຂອງກອງປະຊຸມໃຫຍ່, ນັ້ນຄື: “ການສ້າງ “ທ່າສະໜາມຮົບໃນໃຈປະຊາຊົນ” ເພື່ອເປັນຮາກຖານໃນການເສີມຂະຫຍາຍກຳລັງແຮງສັງລວມຂອງປວງຊົນທັງຊາດ”(3). ໂດຍສືບທອດທັດສະນະດັ່ງກ່າວ, ກອງປະຊຸມໃຫຍ່ຄັ້ງທີ 11, ກອງປະຊຸມໃຫຍ່ຄັ້ງທີ 12 ແລະ ກອງປະຊຸມໃຫຍ່ຄັ້ງທີ 13 ຂອງພັກສືບຕໍ່ຢືນຢັນ: “ກໍ່ສ້າງ “ທ່າສະໜາມຮົບໃນໃຈປະຊາຊົນ”, ທ່າສະໜາມຮົບປ້ອງກັນປະເທດທົ່ວປວງຊົນ ແລະ ທ່າສະໜາມຮົບປ້ອງກັນຄວາມໝັ້ນຄົງປະຊາຊົນ ທີ່ໝັ້ນຄົງ ເພື່ອເປັນຮາກຖານສຳລັບພາລະກິດປົກປັກຮັກສາປະເທດຊາດ”(4).
“ທ່າສະໜາມຮົບໃນໃຈປະຊາຊົນ” ແທ້ຈິງແລ້ວແມ່ນສະພາວະທາງການເມືອງ, ຈິດໃຈຂອງປະຊາຊົນ ເຊິ່ງສະແດງອອກດ້ວຍນ້ຳໃຈຮັກຊາດ, ຄວາມເອກອ້າງທະນົງໃຈ, ຄວາມພາກພູມໃຈໃນຊາດ, ຄວາມເຊື່ອໝັ້ນຂອງປະຊາຊົນຕໍ່ລະບອບການປົກຄອງ, ການນຳພາຂອງພັກ, ການຄຸ້ມຄອງບໍລິຫານຂອງອຳນາດການປົກຄອງທຸກຂັ້ນ. ສະພາວະການນັ້ນໄດ້ຮັບການກໍ່ສ້າງຢ່າງໜັກແໜ້ນ, ກາຍເປັນ “ທ່າສະໜາມຮົບ”, ພ້ອມແລ້ວທີ່ຈະລະດົມ, ນຳໃຊ້ ແລະ ສ້າງເປັນກຳລັງແຮງສັງລວມ ເພື່ອປະຕິບັດໜ້າທີ່ກໍ່ສ້າງ ແລະ ປົກປັກຮັກສາປະເທດຊາດຢ່າງສຳເລັດມີໄຊ. ການສ້າງ “ທ່າສະໜາມຮົບໃນໃຈປະຊາຊົນ” ແມ່ນການປະຕິບັບຢ່າງຄົບຊຸດທຸກມາດຕະການທາງດ້ານການເມືອງ ເສດຖະກິດ ວັດທະນະທຳ ສັງຄົມ ການປ້ອງກັນປະເທດ ແລະ ປ້ອງກັນຄວາມໝັ້ນຄົງ, ເຮັດໃຫ້ປະຊາຊົນອິ່ມໜຳ, ປະຊາຊົນສະຫງົບສຸກ, ປະຊາຊົນເຊື່ອໝັ້ນແລະຮັກພັກ ລັດ ແລະ ລະບອບສັງຄົມນິຍົມ. ນີ້ແມ່ນການພັດທະນາຈິນຕະນາການທິດສະດີຂອງພັກ ກ່ຽວກັບ “ຈິດໃຈປະຊາຊົນ”, “ປະເທດຖືປະຊາຊົນເປັນຮາກ”, ແມ່ນທັດສະນະ ແຜນນະໂຍບາຍທີ່ຖືກຕ້ອງ, ເໝາະສົມກັບປະຊາຊົນ. ການພັດທະນານັ້ນໄດ້ປຸກຕື່ນ, ເຕົ້າໂຮມ, ລວບລວມ ແລະ ເສີມຂະຫຍາຍກຳລັງແຮງ, ຄວາມສາມາດບົ່ມຊ້ອນຂອງແຕ່ລະປັດໄຈ ເພື່ອສ້າງ “ທ່າສະໜາມຮົບໃນໃຈປະຊາຊົນ”; ແມ່ນໜຶ່ງໃນເຂັດລັບແຫ່ງຄວາມສຳເລັດຂອງການປະຕິວັດຫວຽດນາມ.
ຢ່າງໃດກໍ່ຕາມ, ຍ້ອນເຫດຜົນຫຼາຍປະການ, ຕົ້ນຕໍແມ່ນສາເຫດອັດຕະວິໄສ, ການກໍ່ສ້າງ “ທ່າສະໜາມຮົບໃນໃຈປະຊາຊົນ” ຍັງມີຂໍ້ຈຳກັດ; “ນະໂຍບາຍຈຳນວນໜຶ່ງ ຍັງບໍ່ທັນຕອບສະໜອງໄດ້ຄວາມປາດຖະໜາ ແລະ ຜົນປະໂຫຍດຂອງປະຊາຊົນ, ຄວາມວິຕົກກັງວົນອັນຮີບດ່ວນຫຼາຍຢ່າງ ຍັງບໍ່ທັນໄດ້ຮັບການແກ້ໄຂ; ສິດເປັນເຈົ້າຂອງຂອງປະຊາຊົນໃນຫຼາຍບ່ອນ ໄດ້ຖືກລະເມີດ”(5). ສະພາບການຊຸດໂຊມດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ, ການສໍ້ລາດບັງຫຼວງ, ຄວາມຟຸມເຟືອຍ ແລະ ຄວາມຫຍໍ້ທໍ້ຂອງພະນັກງານ, ສະມາຊິກພັກ ແລະ ລັດຖະກອນຈຳນວນໜຶ່ງ ຍັງບໍ່ທັນໄດ້ຮັບການແກ້ໄຂຢ່າງມີປະສິດທິຜົນ, ເຮັດໃຫ້ກຳລັງການຕໍ່ສູ້ຂອງພັກ ແລະ ຄວາມໄວ້ວາງໃຈຂອງປະຊາຊົນຕໍ່ພັກແລະລັດ ຫຼຸດລົງ. ກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ ແລະ ປະຊາທິປະໄຕສັງຄົມນິຍົມໃນບາງບ່ອນ, ບາງຄັ້ງ ບໍ່ໄດ້ຮັບຄວາມເອົາໃຈໃສ່ ແລະ ສົ່ງເສີມຢ່າງເຕັມທີ,... ຂໍ້ຈຳກັດເຫຼົ່ານັ້ນເຮັດໃຫ້ “ຈິດໃຈປະຊາຊົນ” ຫຼືເວົ້າອີກຢ່າງໜຶ່ງ, ຄວາມຄິດ ແລະ ອາລົມຈິດຂອງຄົນສ່ວນໜຶ່ງ ມີຄວາມອຸກອັ່ງ, ກໍ່ໃຫ້ເກີດຜົນກະທົບດ້ານລົບຕໍ່ຄວາມເຫັນດີເຫັນພ້ອມຂອງສັງຄົມ, ຫຼຸດຜ່ອນກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ.
ສືບຕໍ່ກໍ່ສ້າງ “ທ່າສະໜາມຮົບໃຂໃຈປະຊາຊົນ”, ປັບປຸງການປ້ອງກັນປະເທດ,
ປົກປັກຮັກສາປະເທດຊາດຫວຽດນາມສັງຄົມນິຍົມຢ່າງໝັ້ນຄົງ ໃນໄລຍະໃໝ່
ໃນຊຸມປີທີ່ຈະມາເຖິງນີ້, ສະພາບການໃນພາກພື້ນແລະໃນໂລກ ຈະມີການປ່ຽນແປງຢ່າງໄວວາ, ສັບສົນ ແລະ ຄາດເດົາຍາກ. ທະເລຕາເວັນອອກ ແລະ ເຂດທະເລຕາເວັນຕົກສຽງໃຕ້ຂອງປະເທດ ປະເຊີນກັບຄວາມທ້າທາຍທີ່ໃຫຍ່ໂຕ, ມີປັດໄຈທີ່ອາດຈະກໍ່ໃຫ້ເກີດຄວາມບໍ່ໝັ້ນຄົງ.
ສຳລັບຫວຽດນາມ, ຫຼັງຈາກການປ່ຽນແປງໃໝ່ກວ່າ 35 ປີ, ທ່າແລະພະລັງ, ກຳລັງແຮງສັງລວມຂອງປະເທດຊາດ, ກຽດສັກສີສາກົນ, ຄວາມໄວ້ເນື້ອເຊື່ອໃຈຂອງປະຊາຊົນຕໍ່ພັກ ແລະ ລະບອບສັງຄົມນິຍົມ ນັບມື້ນັບໄດ້ຮັບການປັບປຸງ, ສ້າງເງື່ອນໄຂສຳຄັນໃຫ້ແກ່ການກໍ່ສ້າງ ແລະ ປົກປັກຮັກສາປະເທດຊາດຢ່າງໝັ້ນຄົງ. ແຕ່, ປະເທດຍັງປະສົບກັບຄວາມຫຍຸ້ງຍາກແລະສິ່ງທ້າທາຍຫຼາຍຢ່າງ. ຄວາມຮຽກຮ້ອງຕ້ອງການອັນຮີບດ່ວນໃນປະຈຸບັນແມ່ນ ຕ້ອງຊາບຊຶມແລະໝູນໃຊ້ແນວຄິດໂຮ່ຈີມິນກ່ຽວກັບ “ປະເທດຖືປະຊາຊົນເປັນຮາກ” ຢ່າງປະດິດສ້າງ ເຂົ້າໃນການສ້າງແລະເສີມຂະຫຍາຍຢ່າງແຂງແຮງ “ທ່າສະໜາມຮົບໃນໃຈປະຊາຊົນ”, ປັບປຸງການປ້ອງກັນປະເທດ, ປະກອບສ່ວນສ້າງສາ ແລະ ປົກປັກຮັກສາປະເທດຊາມຫວຽດນາມສັງຄົມນິຍົມຢ່າງໝັ້ນຄົງ; ໂດຍສະເພາະດັງນີ້:
ທີໜຶ່ງ, ຊາບຊຶນແນວຄິດ “ປະເທດຖືປະຊາຊົນເປັນຮາກ”, ຍົກສູງຄວາມຮັບຮູ້ ແລະ ການໝູນໃຊ້ແນວຄິດ “ປະເທດຖືປະຊາຊົນເປັນຮາກ” ຂອງປະທານໂຮ່ຈີມິນ ຢ່າງປະດິດສ້າງ ເຂົ້າໃນການສ້າງ “ທ່າສະໜາມຮົບໃນໃຈປະຊາຊົນ” ທີ່ໝັ້ນຄົງໃນແຕ່ລະພື້ນທີ່ ແລະ ໃນທົ່ວປະເທດ.
ທັດສະນະ “ປະເທດຖືປະຊາຊົນເປັນຮາກ” ຂອງພັກ ແລະ ຂອງປະທານໂຮ່ຈີມິນ ຕ້ອງໄດ້ຮັບການຊາບຊຶມຢ່າງເລິກເຊິ່ງຕໍ່ໄປ. ຍົກສູງຄວາມຮັບຮູ້ກ່ຽວກັບບົດບາດສຳຄັນພິເສດຂອງປະຊາຊົນ - ຜູ້ສ້າງປະຫວັດສາດ, ປັດໄຈຕັດສິນຊີ້ຂາດຄວາມສຳເລັດຂອງພາລະກິດສ້າງສາ ແລະ ປົກປັກຮັກສາປະເທດຊາດ. ຍູ້ແຮງການສື່ສານ, ແນະນຳ, ອະທິບາຍຢ່າງຈະແຈ້ງກ່ຽວກັບແນວທາງ, ແຜນນະໂຍບາຍ ແລະ ນະໂຍບາຍການປ້ອງກັນປະເທດຂອງພັກແລະລັດ, ໂດຍສະເພາະແມ່ນ ແນວທາງສ້າງການປ້ອງກັນປະເທດທົ່ວປວງຊົນ, ແນວທາງດຳເນີນສົງຄາມປະຊາຊົນ, ປົກປັກຮັກສາປະເທດຊາດໃນເງື່ອນໄຂໃໝ່; ຫັນເປັນຈິງເຖິງຄວາມຄິດໃໝ່ໃນການປະຕິບັດໜ້າທີ່ປົກປັກຮັກສາປະເທດຊາດ “ຕັ້ງແຕ່ຕົ້ນແລະຈາກໄລຍະໄກ” ຕາມມະຕິຂອງກອງປະຊຸມໃຫຍ່ຄັ້ງທີ 13 ຂອງພັກ. ຮັກສາແລະເພີ່ມຄວາມເຊື່ອໝັ້ນຂອງປະຊາຊົນຕໍ່ພັກ, ລັດ ແລະ ລະບອບສັງຄົມນິຍົມ. ນີ້ແມ່ນບັນຫາແກ່ນຫຼັກທີ່ສຸດເພື່ອສ້າງ “ທ່າສະໜາມຮົບໃນໃຈປະຊາຊົນ”, ປັບປຸງການປ້ອງກັນປະເທດ, ປະກອບສ່ວນປະຕິບັດສອງໜ້າທີ່ຍຸດທະສາດຄື ສ້າງສາແລະ ປົກປັກຮັກສາປະເທດຊາດຫວຽດນາມສັງຄົມນິຍົມ ໃຫ້ສຳເລັດມີໄຊ ໃນໄລຍະໃໝ່.
ທີສອງ, ກໍ່ສ້າງ, ປັບປຸງພັກໃຫ້ປອດໃສ ແລະ ໝັ້ນຄົງເຂັ້ມແຂງ ທາງດ້ານການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງ ແລະ ພະນັກງານ; ມີແນວທາງການປະຕິວັດ, ແນວທາງການທະຫານ, ການປ້ອງກັນປະເທດທີ່ຖືກຕ້ອງ.
ສືບຕໍ່ຍູ້ແຮງວຽກງານການກໍ່ສ້າງ ແລະ ປັບປຸງພັກທາງດ້ານການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງ ແລະ ພະນັກງານ. ສືບຕໍ່ຄົ້ນຄວ້າຊາບຊຶມ ແລະ ປະຕິບັດເປັນຢ່າງດີ ຂໍ້ສະຫຼຸບ, ມະຕິຂອງສູນກາງພັກກ່ຽວກັບການກໍ່ສ້າງແລະປັບປຸງພັກ(6), ປະຕິບັດຢ່າງເຂັ້ມງວດ ຂໍ້ກຳນົດຕ່າງໆກ່ຽວກັບຄວາມຮັບຜິດຊອບໃນການເປັນແບບຢ່າງ, ຂໍ້ກຳນົດກ່ຽວກັບສິ່ງທີ່ສະມາຊິກພັກບໍ່ໄດ້ຮັບອະນຸຍາດໃຫ້ເຮັດ; ສຸມໃສ່ການກໍ່ສ້າງຖັນແຖວພະນັກງານ ສະມາຊິກພັກທຸກຂັ້ນ, ໂດຍສະເພາະແມ່ນ ຂັ້ນຍຸດທະສາດ ທີ່ມີຄຸນສົມບັດ ຄວາມສາມາດຄົບຖ້ວນ ແລະ ທຽບເທົ່າກັບລະດັບຂອງໜ້າທີ່; ເພີ່ມທະວີວຽກງານກວດກາ ແລະ ຕິດຕາມກວດກາ, ຍູ້ແຮງການຕໍ່ສູ້ເພື່ອປ້ອງກັນແລະຕ້ານການສໍ້ລາດບັງຫຼວງ, ຕ້ານຄວາມຫຍໍ້ທໍ້; ປັບປຸງຄວາມເຊື່ອໝັ້ນຂອງປະຊາຊົນຕໍ່ພັກ, ລັດ ແລະ ລະບອບສັງຄົມນິຍົມ.
ພັກກຳນົດແນວທາງການປະຕິວັດທີ່ຖືກຕ້ອງ ວິທະຍາສາດ ແລະ ເໝາະສົມນັ້ນ ເປັນໜຶ່ງໃນບັນຫາພື້ນຖານທີ່ສຸດ ເພື່ອໃຫ້ພັກຂອງພວກເຮົາເຕົ້າໂຮມ ຮຽກຮ້ອງປະຊາຊົນ, ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ ໃນການປະຕິບັດທຸກໜ້າທີ່ວຽກງານປະຕິວັດ. ແນວທາງປະຕິວັດຂອງພັກຕ້ອງເລີ່ມຈາກພຶດຕິກຳຕົວຈິງຂອງປະເທດ, ເຄົາລົບກົດເກນພາວະວິໄສ. ພະນັກງານ ສະມາຊິກພັກທຸກຄົນ ແລະ ທົ່ວພັກ ຕ້ອງຍົກສູງລະດັບທິດສະດີ ແລະ ສະຕິປັນຍາ ຢ່າງຕໍ່ເນື່ອງ; ຍົກສູງຄວາມສາມາດໃນການຄາດຄະເນ; ຮູ້ຮັບຟັງຄວາມຄິດເຫັນ ແລະ ຄວາມປາດຖະໜາຂອງປະຊາຊົນ, ປະຕິບັດເພື່ອຜົນປະໂຫຍດອັນຊອບທຳ ຖືກກົດໝາຍ ຂອງປະຊາຊົນ ຢ່າງສະເໝີຕົ້ນສະເໝີປາຍ, ສົມທົບກັບການດູດຊຶມ ແລະ ຮຽນຮູ້ບົດຮຽນຈາກໂລກ ເພື່ອສ້າງແຜນນະໂຍບາຍແລະແນວທາງ ໃນການພັດທະນາປະເທດໃຫ້ຈະເລີນຮຸ່ງເຮືອງ ແລະ ມີຄວາມສຸກ.
ພັກວາງແນວທາງການທະຫານທີ່ຖືກຕ້ອງ ປະດິດສ້າງ, ເປັນພື້ນຖານໃຫ້ແກ່ການປຸກຕື່ນ, ລະດົມ ແລະ ເສີມຂະຫຍາຍ ກຳລັງແຮງຂອງທົ່ວປວງຊົນ, ຂຸດຄົ້ນກຳລັງແຮງຂອງຄວາມສາມັກຄີສາກົນ ເພື່ອປັບປຸງການປ້ອງກັນປະເທດ ແລະ ປົກປັກຮັກສາປະເທດຊາດ. ແນວທາງດັງກ່າວສະທ້ອນໃຫ້ເຫັນຢ່າງຈະແຈ້ງເຖິງແນວຄິດ “ປະເທດຖືປະຊາຊົນເປັນຮາກ” ຂອງປະທານໂຮ່ຈີມິນ. ນັ້ນແມ່ນແນວທາງກໍ່ສ້າງລະບົບການປ້ອງກັນປະເທດທົ່ວປວງຊົນ, ແນວທາງສົງຄາມປະຊາຊົນ; ກຳລັງແຮງຂອງການປ້ອງກັນປະເທດ ເພື່ອປົກປັກຮັກສາປະເທດຊາດ ແມ່ນກຳລັງແຮງຂອງທົ່ວປວງຊົນ; ກອງກຳລັງປ້ອງກັນປະເທດເປັນກອງກຳລັງຂອງທົ່ວປວງຊົນ, ໃນນັ້ນ ກອງກຳລັງປະກອບອາວຸດປະຊາຊົນເປັນແກນຫຼັກ. ແນວທາງດັງກ່າວແມ່ນການຮັບເອົາແລະການພັດທະນາສິລະປະການທະຫານຫວຽດນາມ, ທິດສະດີການທະຫານຂອງລັດທິມາກ-ເລນິນ, ສິ່ງຍອດຍິ່ງຂອງການທະຫານໂລກ, ສອດຄ່ອງກັບສະພາບຕົວຈິງຂອງຫວຽດນາມ.
ທີສາມ, ຊຸກຍູ້ການພັດທະນາເສດຖະກິດ ວັດທະນະທຳ ແລະ ສັງຄົມ; ປັບປຸງຊີວິດທາງດ້ານວັດຖຸ ແລະ ຈິດໃຈຂອງປະຊາຊົນຢ່າງບໍ່ຢຸດຢັ້ງ.
ໂດຍຊາບຊຶມທັດສະນະທີ່ວ່າ ການພັດທະນາເສດຖະກິດ - ສັງຄົມເປັນໃຈກາງ, ຕ້ອງສືບຕໍ່ປ່ຽນໃໝ່ຢ່າງແຂງແຮງ ແລະ ປະຕິບັດຮູບແບບການເຕີບໂຕຢ່າງມີປະສິດທິຜົນ, ປັບໂຄງປະກອບເສດຖະກິດຄືນໃໝ່, ຍູ້ແຮງການຫັນເປັນອຸດສາຫະກຳ ແລະ ທັນສະໄໝ ບົນພື້ນຖານວິທະຍາສາດ ແລະ ເຕັກໂນໂລຢີ, ການປ່ຽນແປງໃໝ່ປະດິດສ້າງ ແລະ ຊັບພະຍາກອນມະນຸດຄຸນນະພາບສູງ; ປັບປຸງແລະບູລະນະລະບອບລະບຽບການພັດທະນາເສດຖະກິດຕະຫຼາດຕາມທິດສັງຄົມນິຍົມ. ຍົກສູງປະສິດທິພາບ ແລະ ປະສິດທິຜົນການຄຸ້ມຄອງບໍລິຫານຂອງລັດ; ແກ້ໄຂສາຍພົວພັນລະຫວ່າງລັດ, ຕະຫຼາດ ແລະ ສັງຄົມ; ສາຍພົວພັນລະຫວ່າງລັດ, ວິສາຫະກິດ ແລະ ປະຊາຊົນ ໃຫ້ດີຂຶ້ນ. ການແກ້ໄຂຜ່ານຜ່າຈຸດອຸດຕັນທີ່ເປັນອຸປະສັກຕໍ່ການພັດທະນາຂອງປະເທດ, ໂດຍສະເພາະໃນດ້ານລະບອບລະບຽບການແລະນະໂຍບາຍ. ເອົາໃຈໃສ່ຊຸກຍູ້ການພັດທະນາການຜະລິດ, ສ້າງວຽກເຮັດງານທຳ, ຍົກລະດັບລາຍຮັບ ແລະ ມາດຕະຖານການຄອງຊີບ ເພື່ອໃຫ້ປະຊາຊົນມີຄວາມໝັ້ນຄົງໃນການດຳລົງຊີວິດ ໃນແຕ່ລະເຂດ ແລະ ແຕ່ລະພື້ນທີ່, ໂດຍສະເພາະ ໃນເຂດຫ່າງໄກສອກຫຼີກ, ເຂດຊາຍແດນ, ໝູ່ເກາະ ແລະ ເຂດທີ່ປະສົບກັບຄວາມທຸກຍາກຮ້າຍແຮງ. ສືບຕໍ່ມີແຜນນະໂຍບາຍ, ກົນໄກ, ນະໂຍບາຍທີ່ເໝາະສົມ, ເອົາໃຈໃສ່ເປັນພິເສດເຖິງເຂດທີ່ປະສົບກັບຄວາມຫຍຸ້ງຍາກ ແລະ ເຂດຊົນເຜົ່າສ່ວນນ້ອຍ ດ້ວຍການຜັນຂະຫຍາຍປະຕິບັດໂຄງການ, ແຜນການເສດຖະກິດ-ສັງຄົມ ຕິດກັບການປ້ອງກັນປະເທດ-ປ້ອງກັນຄວາມໝັ້ນຄົງ. ຍູ້ແຮງການນຳໃຊ້ບັນດາຜົນງານດ້ານວິທະຍາສາດ ແລະ ເຕັກໂນໂລຢີທີ່ກ້າວໜ້າ ຂອງການປະຕິວັດອຸດສາຫະກຳທີ 4 ເຂົ້າໃນການເຄື່ອນໄຫວຜະລິດ ແລະ ທຸລະກິດ; ປະຕິບັດນະໂຍບາຍສັງຄົມຢ່າງດີ, ຮັບປະກັນຄວາມປອດໄພທາງສັງຄົມ ແລະ ສະຫວັດດີການສັງຄົມ, ຄວາມໝັ້ນຄົງຂອງມະນຸດ, ປະຕິບັດຄວາມກ້າວໜ້າທາງສັງຄົມ ແລະ ຄວາມຍຸຕິທຳ; ຍົກສູງຄຸນນະພາບຊີວິດ ແລະຄວາມສຸກຂອງປະຊາຊົນ.
ເອົາໃຈໃສ່ເຖິງການກໍ່ສ້າງວັດທະນະທຳຫວຽດນາມທີ່ກ້າວໜ້າ, ເຂັ້ມຂົ້ນໄປດ້ວຍເອກະລັກປະຈຳຊາດ, ພັດທະນາຢ່າງຮອບດ້ານ, ເປັນເອກະພາບໃນຄວາມຫຼາກຫຼາຍ, ເຊື່ອມຊຶມຈິດໃຈມະນຸດສະຍະທຳ ປະຊາທິປະໄຕ ແລະ ກ້າວໜ້າຢ່າງເລິກເຊິ່ງ; ເຮັດໃຫ້ວັດທະນະທຳເຊື່ອມຕິດແໜ້ນແຟ້ນ ແລະ ຊຶມເລິກເຂົ້າໄປໃນຊີວິດສັງຄົມທັງໝົດ, ເສີມຂະຫຍາຍບັນດາຄຸນຄ່າທີ່ດີງາມຂອງຊາດ ທັງດູດຊຶມແກ່ນສານວັດທະນະທຳຂອງມະນຸດຊາດ ເພື່ອໃຫ້ວັດທະນະທຳເປັນຮາກຖານທາງຈິດໃຈທີ່ແທ້ຈິງ, ແຫຼ່ງພະລັງພາຍໃນ ແລະ ແຮງຜັກດັນສຳລັບການພັດທະນາເສດຖະກິດ-ສັງຄົມ, ເພີ່ມທະວີການປ້ອງກັນປະເທດ, ປ້ອງກັນຄວາມໝັ້ນຄົງ ແລະ ການເຊື່ອມໂຍງສາກົນຢ່າງກວ້າງຂວາງ. ດ້ວຍທັດສະນະທີ່ວ່າ ປະຊາຊົນເປັນສູນກາງ, ອັດຕະພາບ, ຊັບພະຍາກອນຕົ້ນຕໍ່ ແລະ ເປົ້າໝາຍຂອງການພັດທະນາ, ພັກແລະລັດສືບຕໍ່ປັບປຸງບູລະນະແຜນນະໂຍບາຍ ແລະ ນະໂຍບາຍໃນການກໍ່ສ້າງ ແລະ ພັດທະນາຜູ້ຄົນຫວຽດນາມຢ່າງຮອບດ້ານ, ເຊື່ອມໂຍງຢ່າງແໜ້ນແຟ້ນແລະກົມກຽວ ລະຫວ່າງຄຸນຄ່າດັ້ງເດີມ ແລະ ຄຸນຄ່າສະໄໝໃໝ່; ຜ່ານນັ້ນ, ເສີມຂະຫຍາຍຄຸນຄ່າວັດທະນະທຳ ແລະ ກຳລັງແຮງຂອງຄົນຫວຽດນາມໃນພາລະກິດການສ້າງສາ ແລະ ປົກປັກຮັກສາປະເທດຊາດ.
ທີສີ່, ເອົາໃຈໃສ່ກໍ່ສ້າງກຸ່ມກ້ອນມະຫາສາມັກຄີປວງຊົນທັງຊາດ, ເສີມຂະຫຍາຍປະຊາທິປະໄຕສັງຄົມນິຍົມ.
ປະຕິບັດເປັນຢ່າງດີ ແຜນນະໂຍບາຍເພີ່ມທະວີກຸ່ມກ້ອນມະຫາສາມັກຄີປວງຊົນທັງຊາດ ບົນພື້ນຖານພັນທະພາບຊົນຊັ້ນກຳມະກອນ ກັບຊົນຊັ້ນຊາວນາ ແລະ ຖັນແຖວປັນຍາຊົນ ພາຍໃຕ້ການນຳພາຂອງພັກກອມມູນິດຫວຽດນາມ; ຖືເອົາເປົ້າໝາຍກໍ່ສ້າງປະເທດຫວຽດນາມສັນຕິພາບ ເອກະລາດ ເອກະພາບ ຜືນແຜ່ນດິນອັນຄົບຖ້ວນ, “ປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ແລະ ສີວິໄລ” ເປັນຈຸດຄ້າຍຄືກັນ; ເຄົາລົບຄວາມແຕກຕ່າງທີ່ບໍ່ຂັດກັບຜົນປະໂຫຍດລວມ ຂອງຊາດ-ປະເທດຊາດ; ເຊີດຊູຈິດໃຈຊາດ, ມູນເຊື້ອຮັກຊາດ, ມະນຸດສະທຳ ແລະ ຄວາມອະນຸໂລມ ເອື້ອເຟື້ອເຜື່ອແຜ່ ເພື່ອເຕົ້າໂຮມ ແລະ ສາມັກຄີຊາວຫວຽດນາມທຸກຄົນ ທັງຢູ່ພາຍໃນ ແລະ ຕ່າງປະເທດ.
ປະຕິບັດນະໂຍບາຍສະເໝີພາບ, ສາມັກຄີ, ເຄົາລົບ ແລະ ຊ່ວຍເຫຼືອເຊິ່ງກັນແລະກັນ ລະຫວ່າງບັນດາເຜົ່າ, ສ້າງເງື່ອນໄຂທັງໝົດ ເພື່ອໃຫ້ບັນດາຊົນເຜົ່າໃນຄອບຄົວຊາດຫວຽດນາມທີ່ຍິ່ງໃຫຍ່ ມີການພັດທະນາຮ່ວມກັນ; ອະນຸລັກຮັກ ແລະ ເສີມຂະຫຍາຍເອກະລັກວັດທະນະທຳ, ພາສາ ແລະ ຮີດຄອງປະເພນີອັນດີງາມ ຂອງບັນດາເຜົ່າ. ເຄົາລົບ ແລະ ຮັບປະກັນສິດເສລີພາບຂອງປະຊາຊົນ ໃນການເຊື່ອແລະນັບຖືສາສະໜາ ແລະ ການບໍ່ເຊື່ອແລະບໍ່ຖືສາສະໜາ ຕາມກົດໝາຍ. ຮັບປະກັນຄວາມຍຸຕິທຳທາງສັງຄົມ, ເບິ່ງແຍງຜົນປະໂຫຍດແທດຈິງ ຊອບທຳຂອງບັນດາຊົນຊັ້ນ, ບັນດາຊັ້ນວັນນະປະຊາຊົນ, ສົມທົບຢ່າງກົມກຽວ ຜົນປະໂຫຍດສ່ວນຕົວ, ຜົນປະໂຫຍດລວມໝູ່ ແລະ ຜົນປະໂຫຍດສົງຄົມ. ເບິ່ງແຍງດູແລການສ້າງແນວໂຮມປະເທດຊາດຫວຽດນາມ ແລະ ບັນດາອົງການຈັດຕັ້ງການເມືອງ - ສັງຄົມ ໃຫ້ໝັ້ນຄົງເຂັ້ມແຂງ ແລະ ມີສ່ວນຮ່ວມຫຼັກໃນການເຕົ້າໂຮມ, ຂົນຂວາຍປະຊາຊົນ. ພ້ອມກັນນັ້ນ, ຕໍ່ສູ້ຢ່າງເດັດດ່ຽວ ຕ້ານເລ່ຫຼ່ຽມ ກົນອຸບາຍຂອງບັນດາອິດທິກຳລັງສັດຕູ ທີ່ຫວັງແບ່ງແຍກປະຊາຊົນ, ແບ່ງແຍກພັກແລະປະຊາຊົນ, ແບ່ງແຍກປະຊາຊົນຫວຽດນາມອອກຈາກປະຊາຊົນຂອງປະເທດອື່ນ, ຫວັງບ່ອນທຳລາຍກຸ່ມກ້ອນມະຫາສາມັກຄີປວງຊົນທັງຊາດຫວຽດນາມ.
ປະຕິບັດເປັນຢ່າງດີກົດລະບຽບປະຊາທິປະໄຕຢູ່ຮາກຖານ, ທິດນຳທີ່ວ່າ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ, ປະຊາຊົນຕິດຕາມ, ປະຊາຊົນຊົມໃຊ້”; ກົນໄກພັກນຳພາ, ລັດຄຸ້ມຄອງ, ແນວໂຮມປະເທດຊາດຫວຽດນາມ ແລະ ບັນດາອົງການຈັດຕັ້ງການເມືອງ-ສັງຄົມ ເປັນຫຼັກ ເພື່ອໃຫ້ປະຊາຊົນເປັນເຈົ້າຂອງ. ຈັດການຢ່າງທັນທ່ວງທີແລະເຄັ່ງຄັດ ກັບອົງການແລະບຸກຄົນທີ່ສວຍໃຊ້ລະບອບປະຊາທິປະໄຕ, ກໍ່ຄວາມວຸ່ນວາຍພາຍໃນ, ທຳລາຍສະຖຽນລະພາບທາງການເມືອງ-ສັງຄົມ ຫຼື ລະເມີດລະບອບປະຊາທິປະໄຕ, ທຳລາຍສິດທິຄວາມເປັນເຈົ້າຂອງຂອງປະຊາຊົນ.
ທີຫ້າ, ກໍ່ສ້າງລະບົບການປ້ອງກັນປະເທດທົ່ວປວງຊົນທີ່ໝັ້ນຄົງ, ທ່າສະໜາມຮົບປ້ອງກັນປະເທດທົ່ວປວງຊົນ ເຊື່ອມໂຍງກັບທ່າສະໜາມຮົບປ້ອງກັນຄວາມສະຫງົບທົ່ວປວງຊົນທີ່ໝັ້ນຄົງ; ກໍ່ສ້າງກອງກຳລັງປະກອບອາວຸດປະຊາຊົນທີ່ປະຕິວັດ, ເປັນລະບຽບຫຼວງ, ຊຳນານການຮົບ ແລະ ທັນສະໄໝເທື່ອລະກ້າວ, ເປັນຫຼັກແຫຼ່ງແກ່ນສານໃຫ້ປະຊາຊົນທັງມວນໃນພາລະກິດການປົກປັກຮັກສາປະເທດຊາດ.
ໃຫ້ຄວາມສຳຄັນກັບການອົບຮົມສຶກສານ້ຳໃຈຮັກຊາດ, ຮັກບ້ານເກີດເມືອງນອນ, ຮັກປະເທດຊາດ ແລະ ລະບອບສັງຄົມນິຍົມ; ສິດ, ຄວາມຮັບຜິດຊອບ ແລະ ພັນທະຂອງພົນລະເມືອງຕໍ່ພາລະກິດສ້າງສາ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ; ແນວທາງ ທັດສະນະຂອງພັກ, ນະໂຍບາຍ ກົດໝາຍຂອງລັດ ກ່ຽວກັບການປ້ອງກັນປະເທດ ແລະ ຄວາມໝັ້ນຄົງ; ລະບຸຢ່າງຊັດເຈນກ່ຽວກັບກົນອຸບາຍແລະເລ່ຫຼ່ຽມຂອງກອງກຳລັງສັດຕູ, ກ່ຽວກັບຄູ່ຮ່ວມມືແລະເປົ້າໝາຍຂອງການປະຕິວັດຫວຽດນາມ ແລະອື່ນໆ ເພື່ອໃຫ້ປະຊາຊົນ ແລະ ທຸກອົງການມີຄວາມຮັບຜິດຊອບ ແລະ ພັນທະເຂົ້າຮ່ວມໃນການກໍ່ສ້າງລະບົບປ້ອງກັນປະເທດທົ່ວປວງຊົນ.
ເພີ່ມທະວີການນຳພາເດັດຂາດ, ໂດຍກົງໃນທຸກດ້ານຂອງພັກ; ການຄຸ້ມຄອງຂອງລັດຕໍ່ກອງທັບປະຊາຊົນຫວຽດນາມ ແລະ ລະບົບການປ້ອງກັນປະເທດທົ່ວປວງຊົນ.
ເອົາໃຈໃສ່ເສີມຂະຫຍາຍບົດບາດຂອງກຸ່ມກ້ອນມະຫາສາມັກຄີປວງຊົນທັງຊາດ, ຖືວ່ານັ້ນເປັນພື້ນຖານ, ປັດໄຈຫຼັກທີ່ສ້າງກຳລັງແຮງອັນຊະນະເລີດຂອງລະບົບການປ້ອງກັນປະເທດທົ່ວປວງຊົນ, ຂອງສົງຄາມປະຊາຊົນຫວຽດນາມ. ເຊື່ອມໂຍງການກໍ່ສ້າງລະບົບການປ້ອງກັນປະເທດທົ່ວປວງຊົນທີ່ໝັ້ນຄົງເຂັ້ມແຂງ ກັບການກໍ່ສ້າງລະບົບການປ້ອງກັນຄວາມໝັ້ນຄົງປະຊາຊົນ ແລະ ເຊື່ອມໂຍງການກໍ່ສ້າງທ່າສະໜາມຮົບປ້ອງກັນປະເທດທົ່ວປວງຊົນທີ່ເຂັ້ມແຂງ ກັບການສ້າງທ່າສະໜາມຮົບປ້ອງກັນຄວາມໝັ້ນຄົງປະຊາຊົນ.
ສຸມໃສ່ການກໍ່ສ້າງກອງທັບປະຊາຊົນທີ່ປະຕິວັດ, ເປັນລະບຽບຫຼວງ, ຊຳນານການຮົບ ແລະ ທັນສະໄໝເທື່ອລະກ້າວ; ບາງເຫຼົ່າທັບ, ເຫຼົ່າພົນ, ກອງກຳລັງຈະກ້າວຂຶ້ນທັນສະໄໝໂດຍກົງ. ຮອດປີ 2025, ໂດຍພື້ນຖານແລ້ວກໍ່ສ້າງກອງທັບຊັ້ນຍອດ, ກະທັດລັດ, ເຂັ້ມແຂງ, ສ້າງປະຖົມປັດໄຈທີ່ໝັ້ນຄົງ, ສູ້ຊົນທີ່ຈະສ້າງກອງທັບປະຊາຊົນທີ່ປະຕິວັດ, ເປັນລະບຽບຫຼວງ, ຊຳນານການຮົບ ແລະ ທັນສະໄໝພາຍໃນປີ 2030; ກອງທັບທີ່ໝັ້ນຄົງເຂັ້ມແຂງທາງການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງ ແລະ ພະນັກງານ; ເປັນຫຼັກແຫຼ່ງແກ່່ນສານທີ່ແທ້ຈິງໃນວຽກງານການທະຫານ, ການປ້ອງກັນປະເທດ, ການປົກປັກຮັກສາປະເທດຊາດ. ພະນັກງານແລະນັກຮົບຂອງກອງກຳລັງປະກອບອາວຸດປະຊາຊົນຕ້ອງມີທັດສະນະມະຫາຊົນທີ່ຖືກຕ້ອງ; ຍົກສູງຄວາມຮັບຮູ້ແລະຄວາມຮັບຜິດຊອບຢ່າງເປັນປະຈຳ, ປະຕິບັດວຽກງານຂົນຂວາຍມະຫາຊົນ ແລະ ໂຄສະນາເຜີຍແຜ່ສະເພາະເປັນຢ່າງດີ ເພື່ອລະດົມສູງສຸດ “ຄວາມສາມາດຂອງປະຊາຊົນ, ກຳລັງຂອງປະຊາຊົນ, ສິ່ງຂອງຂອງປະຊາຊົນ ເພື່ອປະໂຫຍດຂອງປະຊາຊົນ”(7); ພ້ອມກັນນັ້ນ, ຍາມໃດກໍ່ໃກ້ຊິດສະໜິດສະໜົມກັບປະຊາຊົນ, ເພື່ອປະຊາຊົນຕໍ່ສູ້, ເພື່ອປະຊາຊົນຮັບໃຊ້.
ແນວຄິດໂຮ່ຈີມິນກ່ຽວກັບ “ປະເທດຖືປະາຊົນເປັນຮາກ” ແມ່ນສັດຈະທຳ ເຊິ່ງເພິ່ນໄດ້ສະຫຼຸບຖອດຖອນມາຈາກຄວາມເປັນຈິງແຫ່ງການເຄື່ອນໄຫວປະຕິວັດ; ບົນພຶ້ນຖານດູດຊຶມລັດທິມາກ-ເລນິນ, ມູນເຊື້ອປະເພນີ, ແກ່ນສານຂອງວັດທະນະທຳຂອງຊາດ ແລະ ມະນຸດຊາດ; ເປັນພື້ນຖານທີ່ສຳຄັນເພື່ອໃຫ້ພັກ ແລະ ປະທານໂຮ່ຈີມິນ ວາງແນວທາງການປະຕິວັດທີ່ຖືກຕ້ອງ; ສ້າງຖັນແຖວພະນັກງານ ສະມາຊິກພັກທີ່ໃກ້ຊິດສະໜິດສະໜົມກັບປະຊາຊົນ, ເພື່ອປະຊາຊົນຮັບໃຊ້; ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດໃນພາລະກິດການປະຕິວັດ. ໃນປະຈຸບັນ, ຕໍ່ໜ້າຄວາມຕ້ອງການຂອງໜ້າທີ່ການສ້າງສາ ແລະ ປົກປັກຮັກສາປະເທດຊາດຢ່າງໝັ້ນຄົງໃນໄລຍະໃໝ່, ຮຽກຮອ້ງໃຫ້ພັກກອມມູນິດຫວຽດນາມ ແລະ ພະນັກງານສະມາຊິກພັກທັງໝົດ ຕ້ອງຊາບຊຶມຢ່າງເລິກເຊິ່ງ ແລະ ໝູນໃຊ້ແນວຄິດຂອງປະທານໂຮ່ຈີມິນ ຢ່າງປະດິດສ້າງ ເຂົ້າໃນການສ້າງ “ທ່າສະໜາມຮົບໃນໃຈປະຊາຊົນ”, ປັບປຸງການປ້ອງກັນປະເທດ, ກໍ່ຄືໃນບັນດາຂົງເຂດ ແລະ ໜ້າທີ່ການປະຕິວັດ; ສືບຕໍ່ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຍາດ, ພາຍໃຕ້ການນຳພາຂອງພັກ, ປະກອບສ່ວນເຂົ້າໃນການກໍ່ສ້າງສັງຄົມນິຍົມຢ່າງສຳເລັດຜົນ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມໃນໄລຍະໃໝ່ຢ່າງໝັ້ນຄົງ./.
---------------------------
(1) ໂຮຈີມິນ: ນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິດ, ຮ່າໂນ້ຍ, 2011, ເຫຼັ້ມ 5, ໜ້າ 501.
(2) ໂຮຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 12, ໜ້າ 672.
(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10, ສພຈ ການເມືອງແຫ່ງຊາດ, ຮ່າໂນ້ຍ, 2006, ໜ້າ 109.
(4)ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິດ, ຮ່າໂນ້ຍ, 2021, ເຫຼັ້ມ 1, ໜ້າ 49.
(5) ເອກະສານກອງປະຊຸມຄັ້ງທີ 7 ຄະນະບໍລິຫານງານສູນກາງພັກ ສະໄໝທີ 11, ຫ້ອງການສູນກາງພັກ, ຮ່າໂນ້ຍ, 2013, ໜ້າ 38.
(6) ບົດສະຫຼຸບສະບັບເລກທີ 01-KL/TW, ລົງວັນທີ 18 ພຶດສະພາ 2021, ຂອງກົມການເມືອງສູນກາງ, “ວ່າດ້ວຍການສືບຕໍ່ປະຕິບັດຄຳສັ່ງເລກທີ 05-CT/TW ອອກວັນທີ 15 ພຶດສະພາ 2016 ຂອງກົມການເມືອງສູນກາງສະໄໝທີ 12 “ວ່າດ້ວນການຍູ້ແຮງການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດສິນທຳ, ແບບແຜນໂຮ່ຈີມິນ””; ບົດສະຫຼຸບສະບັບເລກທີ 21-KL/TW, ລົງວັນທີ 25 ຕຸລາ 2021, ຂອງຄະນະບໍລິຫານງານສູນກາງ, “ວ່າດ້ວຍການຍູ້ແຮງການກໍ່ສ້າງແລະປັບປຸງພັກ ແລະ ລະບົບການເມືອງ; ເດັດດ່ຽວກີດກັ້ນ, ຍູ້ຖອຍ, ຈັດການຢ່າງເຂັ້ມງວດກັບພະນັກງານ ສະມາຊິກພັກທີ່ຖືກເຊື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ, ມີປະກົດການ “ຫັນປ່ຽນຕົນເອງ”, “ປ່ຽນແປງຕົນເອງ””; ມະຕິສະບັບເລກທີ 21-NQ/TW, ລົງວັນທີ 16 ມິຖຸນາ 2022, ຂອງກອງປະຊຸມສູນກາງຄັ້ງທີ 5 ສະໄໝທີ 13, “ວ່າດ້ວຍການເພີ່ມທະວີການປັບປຸງອົງການຈັດຕັ້ງຮາກຖານພັກ ແລະ ຍົກສູງຄຸນນະພາບຂອງຖັນແຖວສະມາຊິກພັກໃນໄລຍະໃໝ່”.
(7) ໂຮຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 81.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1005 (ເດືອນມັງກອນ 2023)
