ຕຳຫຼວດປະຊາຊົນກັບພາລະກິດການສ້າງສາ
ແລະ ປົກປັກຮັກສາປະເທດຊາດໃນໄລຍະໃໝ່
ແລະ ປົກປັກຮັກສາປະເທດຊາດໃນໄລຍະໃໝ່
ວກ. - ພາຍໃຕ້ການນຳພາໂດຍກົງ ເດັດຂາດ ຮອບດ້ານຂອງພັກກອມມູນິດຫວຽດນາມ, ແສງນຳທາງຂອງລັດທິມາກ-ເລນິນ ແລະແນວຄິດໂຮ່ຈີມິນ, ໄດ້ຮັບຄວາມໄວ້ວາງໃຈ ສະໜັບສະໜູນ ແລະຊ່ວຍເຫຼືອ ຈາກປະຊາຊົນ, ນັບຕັ້ງແຕ່ກໍ່ຕັ້ງ, ຕຳຫຼວດປະຊາຊົນຫວຽດນາມໄດ້ມີການປະກອບສ່ວນທີ່ສຳຄັນພິເສດ ເຂົ້າໃນພາລະກິດການສ້າງສາແລະປົກປັກຮັກສາປະເທດຊາດ. ດ້ວຍການເສີມຂະຫຍາຍຜົນທີ່ໄດ້ຮັບ, ໃນເວລາອັນໃກ້ນີ້, ກະຊວງປ້ອງກັນຄວາມສະຫງົບຕັດສິນໃຈທີ່ຈະສ້າງກອງກຳລັງຕຳຫຼວດປະຊາຊົນທີ່ສະອາດ ໝັ້ນຄົງເຂັ້ມແຂງ ເປັນລະບຽບຫຼວງ ຊຳນານໃນວິຊາຊີບ ທັນສະໄໝ, ຕອບສະໜອງຄວາມຕ້ອງການແລະໜ້າທີ່ ໃນສະພາບການໃໝ່ ຕາມຈິດໃຈມະຕິເລກທີ 12-NQ/TW, ລົງວັນທີ 16 ມີນາ 2022, ຂອງກົມການເມືອງສູນກາງພັກສະໄໝທີ XIII.
ການກໍ່ສ້າງກອງກຳລັງຕຳຫຼວດໃຫ້ເປັນກຳລັງຫຼັກແຫຼ່ງ, ເປັນ “ດາບ” ແລະ “ໂລ້” ທີ່ແທ້ຈິງ
ໃນການປົກປ້ອງ, ຮັກສາສັນຕິພາບ ສະຖຽນລະພາບ ແລະ ພັດທະນາປະເທດຊາດ
ປະຫວັດສາດຢືນຢັນວ່າ ໃນໄຊຊະນະອັນຍິ່ງໃຫຍ່ຂອງການປະຕິວັດຊາດປະຊາທິປະໄຕ ປະຊາຊົນ ພາຍໃຕ້ການນຳພາຂອງພັກກອມມູນິດຫວຽດນາມ, ໃນການຕໍ່ສູ້ຕ້ານພວກລ່າເມືອງຂຶ້ນຝະລັ່ງ ແລະຈັກກະພັດອາເມລິກາທັງສອງຄັ້ງນັ້ນ ມີການປະກອບສ່ວນອັນໃຫຍ່ຫຼວງເປັນພິເສດ ຂອງກຳລັງຕຳຫຼວດປະຊາຊົນ ເຊິ່ງກ່າວໂດຍສັງເຂບຄື: ເປັນແກ່ນຫຼັກໃນການປົກປັກຮັກສາ ແລະບຳລຸງສ້າງພາຍໃນພາລະກິດການປະຕິວັດຂອງພັກແລະຊາດ(1). ສົມທົບກັບກອງທັບປະຊາຊົນ ທະຫານລາດ ແລະກອງຫຼອນ ເພື່ອໂຈມຕີສັດຕູໂດຍກົງ ປະກອບສ່ວນເຂົ້າໃນໄຊຊະນະຂອງແນວຮົບການທະຫານ(2).
ພາຍຫຼັງທີ່ປະເທດເປັນເອກະພາບ, ຄຽງຄູ່ກັບຄວາມສະດວກ, ປະເທດກໍ່ຕ້ອງປະເຊີນກັບບັນດາສິ່ງທ້າທາຍໃຫຍ່ຈາກພາຍໃນ(3) ແລະພາຍນອກ(4). ຕໍ່ໜ້າຄວາມຮຽກຮ້ອງຕ້ອງການແລະໜ້າທີ່ທີ່ກຳນົດໄວ້, ກອງກຳລັງຕຳຫຼວດໄດ້ຕັ້ງໜ້າແລະເປັນເຈົ້າການໃນການສ້າງແລະປັບປຸງອຳນາດການປົກຄອງປະຕິວັດ ໃນເຂດປົດປ່ອຍໃໝ່; ການແກ້ບັນຫາເສດເຫຼືອສົງຄາມ, ຍຶດຄອງແລະຄຸ້ມຄອງສັງຄົມ, ປະກອບສ່ວນຮັກສາສະຖຽນລະພາບທາງການເມືອງ, ຄວາມສະຫງົບຮຽບຮ້ອຍ ແລະຄວາມປອດໄພທາງສັງຄົມ. ເຂົ້າຮ່ວມການຕໍ່ສູ້ປົກປັກຮັກສາຊາຍແດນຕາເວັນຕົກສຽງໃຕ້ ແລະ ພາກເໜືອຢ່າງໝັ້ນຄົງ; ປ້ອງກັນແລະຕ້ານການເຄື່ອນໄຫວສອດແນມ, ການບຸກໂຈມຕີ, ການລັກພາຕົວ, ການປຸ້ນຈີ້ ແລະການຈະລາຈົນກໍ່ຄວາມວຸ້ນວາຍ; ປົກປ້ອງປະຊາຊົນ, ອົບພະຍົບອອກຈາກເຂດບຸກໂຈມຕີຂອງສັດຕູ; ຮັບປະກັນຄວາມປອດໄພແລະຄວາມລັບຂອງພື້ນທີ່ສໍາຄັນ, ຂໍ້ມູນຂ່າວສານ ແລະກິດຈະກໍາການທະຫານຂອງພວກເຮົາ. ຕ້ານແຜນການຫຼັງສົງຄາມຂອງສັດຕູ; ທັບມ້າງກົນອຸບາຍ ແລະການເຄື່ອນໄຫວເຊື່ອມໂຍງ ໂຈມຕີບຸກລຸກພາຍໃນ, ຈັບກຸມກຸ່ມສາຍລັບ ໜ່ວຍກອມມານໂດ ແລະທະຫານປະຕິກິລິຍາທີ່ຖືກເນລະເທດຫຼາຍຮ້ອຍກູ່ມຈາກພາຍນອກເພື່ອແຊກຊຶມເຂົ້າມາໃນຫວຽດນາມ; ທໍາລາຍແລະສະຫຼາຍສ່ວນໃຫຍ່ຂອງ FULRO-2(5) ໃນເຂດໄຕງວຽນ... ຄວາມເປັນຈິງໃຫ້ເຫັນວ່າ ພາຍໃຕ້ການນຳພາຂອງພັກ, ກອງກຳລັງຕຳຫຼວດປະຊາຊົນໄດ້ປະຕິບັດເປັນຢ່າງດີ ບົດບາດຫຼັກແຫຼ່ງໃນການຮັກສາສະຖຽນລະພາບທາງການເມືອງ ແລະພາຍໃນສັງຄົມ; ສົມທົບກັບກອງທັບປະຊາຊົນ ປະຕິບັດໜ້າທີ່ການປ້ອງກັນປະເທດ, ການທະຫານ, ປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດ.
ໃນສະໄໝແຫ່ງການປ່ຽນແປງໃໝ່ປະເທດ ແລະການເຊື່ອມໂຍງສາກົນຢ່າງຮອບດ້ານ, ພາຍໃຕ້ການນຳພາຂອງພັກ, ປະເທດບັນລຸໄດ້ບັນດາຜົນງານອັນໃຫຍ່ຫຼວງ ໃນດ້ານເສດຖະກິດ ວັດທະນະທຳ ສັງຄົມ, ສະຖຽນລະພາບດ້ານການເມືອງ, ການປ້ອງກັນປະເທດ ແລະຄວາມໝັ້ນຄົງ ມີຄວາມເຂັ້ມແຂງຂຶ້ນເລື້ອຍໆ, ການຕ່າງປະເທດຂະຫຍາຍຕົວ, ນຳເອົາທ່າແລະພະລັງຂອງປະເທດຂຶ້ນສູ່ລະດັບໃໝ່. ແຕ່ຢ່າງໃດກໍ່ຕາມ, ຄວາມທ້າທາຍຕໍ່ພາລະກິດການສ້າງສາ ແລະປົກປັກຮັກສາປະເທດຊາດ, ລວມທັງປັດໄຈດັ້ງເດີມ ແລະບໍ່ແມ່ນແບບດັ້ງເດີມ ຍັງສັບສົນແລະໜັກໜ່ວງຫຼາຍ.
ຈາກສະພາບຕົວຈິງໃນປະເທດ ໂລກ ແລະພາກພື້ນ, ພັກກອມມູນິດຫວຽດນາມກຳນົດບັນດາເປົ້າໝາຍ ປົກປັກຮັກສາປະເທດຊາດ ໃນໄລຍະໃໝ່ຄື: ປົກປັກຮັກສາເອກະລາດ ອຳນາດອະທິປະໄຕ ເອກະພາບ ແລະຜືນແຜ່ນດິນອັນຄົບຖ້ວນຂອງປະເທດຊາດຢ່າງໝັ້ນຄົງ; ປົກປ້ອງພັກ ລັດ ປະຊາຊົນ ແລະລະບອບສັງຄົມນິຍົມ; ປົກປ້ອງພາລະກິດການປ່ຽນແປງໃໝ່ ການຫັນເປັນອຸດສາຫະກຳແລະທັນສະໄໝ; ປົກປ້ອງຜົນປະໂຫຍດຂອງຊາດ-ປະເທດຊາດ; ປົກປັກຮັກສາຄວາມໝັ້ນຄົງທາງດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມ ແລະ ວັດທະນະທໍາຂອງຊາດ; ຮັກສາສະຖຽນລະພາບດ້ານການເມືອງ ແລະ ສະພາບແວດລ້ອມສັນຕິພາບ ເພື່ອກໍ່ສ້າງ ແລະ ພັດທະນາປະເທດຕາມທິດສັງຄົມນິຍົມ.
ຈາກເປົ້າໝາຍປົກປັກຮັກສາປະເທດຊາດໃນໄລຍະໃໝ່, ເຮົາສາມາດສະຫຼຸບໄດ້ວ່າ ມີຄວາມທ້າທາຍສຳຄັນສອງປະການ ໃນການປົກປັກຮັກສາປະເທດຊາດຢູ່ສະເໝີ, ຄື: ຄວາມທ້າທາຍໃນການປົກປ້ອງອະທິປະໄຕ ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດຊາດ; ຄວາມທ້າທາຍໃນການປົກປ້ອງ ແລະຮັກສາສະຖຽນລະພາບທາງການເມືອງແລະສັງຄົມ ແລະການພັດທະນາທີ່ຍືນຍົງຂອງເສດຖະກິດຕະຫຼາດຕາມທິດສັງຄົມນິຍົມ, ຂອງວັດທະນະທຳຫວຽດນາມທີ່ກ້າວໜ້າ ແລະອຸດົມໄປດ້ວຍເອກະລັກປະຈຳຊາດ, ຄັດເລືອກເອົາແກ່ນສານຂອງວັດທະນະທຳຂອງມະນຸດ.
ຍຶດໝັ້ນການນຳພາທີ່ເດັດຂາດ ໂດຍກົງ ແລະຮອບດ້ານຂອງພັກ, ການຄຸ້ມຄອງລວມສູນແລະເປັນເອກະພາບຂອງພັກ; ກຳແໜ້ນແລະຈັດຕັ້ງປະຕິບັດໂຄງການການເມືອງແລະມະຕິຂອງພັກ ກ່ຽວກັບການກໍ່ສ້າງ ແລະປົກປັກຮັກສາປະເທດຊາດ ຢ່າງມີປະສິດທິຜົນ; ພິເສດແມ່ນ ມະຕິກອງປະຊຸມສູນກາງພັກຄັ້ງທີ 8 ສະໄໝທີ IX ແລະມະຕິກອງປະຊຸມສູນກາງພັກຄັ້ງທີ 8 ສະໄໝທີ XI ກ່ຽວກັບ “ຍຸດທະສາດການປົກປັກຮັກສາປະເທດຊາດໃນສະພາບການໃໝ່”, ກອງກຳລັງຕຳຫຼວດປະຊາຊົນໄດ້ເສີມຂະຫຍາຍບົດບາດຫຼັກແຫຼ່ງ ແລະເປັນປະທານໃນການປົກປັກຮັກສາອະທິປະໄຕ, ສະຖຽນລະພາບດ້ານການເມືອງ ສັງຄົມ ແລະ ການພັດທະນາແບບຍືນຍົງ ຂອງພື້ນຖານເສດຖະກິດການຕະຫຼາດຕາມທິດສັງຄົມນິຍົມ; ປະສານສົມທົບກັບກອງທັບປະຊາຊົນ ໃນການປົກປັກຮັກສາອະທິປະໄຕ ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດຊາຢ່າງໝັ້ນຄົງ. ສິ່ງດັ່ງກ່າວສະແດງອອກຜ່ານຂົງເຂດວຽກງານຕົ້ນຕໍດັ່ງຕໍ່ໄປນີ້:
ທີໜຶ່ງ, ໃນຂົງເຂດຄວາມໝັ້ນຄົງແຫ່ງຊາດ, ໄດ້ເປັນເຈົ້າການໃນການກຳ ປະເມີນແລະຄາດຄະເນ ສະພາບການໂລກ ພາກພື້ນ ແລະພາຍໃນປະເທດຢ່າງໃກ້ຊິດ ເພື່ອໃຫ້ຄຳແນະນຳຍຸດທະສາດແກ່ພັກແລະລັດ ກ່ຽວກັບແຜນນະໂຍບາຍ ແລະວິທີການປົກປັກຮັກສາຜົນປະໂຫຍດ ຄວາມໝັ້ນຄົງຂອງຊາດ ແລະຍົກສູງຖານະຕຳແໜ່ງແລະກຽດສັກສີຂອງປະເທດ; ປັບປຸງທັດສະນະ ແນວທາງ ແລະນະໂຍບາຍປົກປັກຮັກສາປະເທດຊາດໃນສະພາບການໃໝ່. ຈັດຕັ້ງວຽກງານປົກປ້ອງຄວາມໝັ້ນຄົງທາງການເມືອງຢ່າງດີ ໂດຍເນັ້ນການປົກປ້ອງບັດບາດ ແລະການນຳພາຂອງພັກ ຕໍ່ລັດແລະສັງຄົມ, ປົກປ້ອງຮາກຖານແນວຄິດຂອງພັກ; ປົກປ້ອງລັດ ປະຊາຊົນ ແລະລະບອບສັງຄົມນິຍົມ; ຄົ້ນເຜີຍແລະກີດກັ້ນກົນອຸບາຍ “ຫັນປ່ຽນໂດຍສັນຕິ”, ການຈະລາຈົນ, ການກໍ່ການຮ້າຍແລະການມ້າງເພທຳລາຍ ໂດຍກອງກຳລັງສັດຕູແລະປະຕິການ ທັນທີ, ບໍ່ໃຫ້ຈັດຕັ້ງອົງການການເມືອງຝ່າຍຄ້ານໃນປະເທດ. ຄວາມໝັ້ນຄົງທາງເສດຖະກິດໄດ້ຮັບການຮັບປະກັນ ດ້ວຍການພັດທະນາທີ່ຍືນຍົງຫຼາຍຂຶ້ນ ຂອງພື້ນຖານເສດຖະກິດຕະຫຼາດຕາມທິດສັງຄົມນິຍົມ; ຄົ້ນເຜີຍ ປ້ອງກັນແລະຈັດການຄວາມສ່ຽງ ແລະໄພຄຸກຄາມຕໍ່ເສດຖະກິດຂອງປະເທດຢ່າງທັນທ່ວງທີ; ແກ້ໄຂບັນຫາທີ່ສັບສົນທີ່ກ່ຽວຂ້ອງກັບຄວາມໝັ້ນຄົງ ແລະຄວາມສະຫງົບຮຽບຮ້ອຍທີ່ເກີດຂຶ້ນໃນຂົງເຂດເສດຖະກິດ. ຄວາມໝັ້ນຄົງທາງວັດທະນະທຳ, ຄວາມໝັ້ນຄົງດ້ານຂໍ້ມູນແລະການສື່ສານ ແລະຄວາມປອດໄພຂອງເຄືອຂ່າຍ ໄດ້ຮັບການເພີ່ມທະວີ; ແກ້ໄຂແລະຈັດການກັບການລະເມີດຂອງອົງການຂ່າວຫຼາຍແຫ່ງຢ່າງເຄັ່ງຄັດ; ສະແດງໃຫ້ເຫັນເຖິງບົດບາດຫົວຫອກໃນການຮັບຮອງອະທິປະໄຕ ແລະຜົນປະໂຫຍດຂອງຊາດໃນໂລກໄຊເບີຣ໌, ປະກອບສ່ວນທີ່ສຳຄັນ ຕໍ່ການປ່ຽນແປງດິຈິຕອນຂອງປະເທດ, ການສ້າງລັດຖະບານດິຈິຕອນ, ເສດຖະກິດດິຈິຕອນ ແລະສັງຄົມດິຈິຕອນ. ຄວາມໝັ້ນຄົງດ້ານສັງຄົມ, ຄວາມປອດໄພແລະຄວາມສະຫງົບຮຽບຮ້ອຍໃນພື້ນທີ່ຍຸດທະສາດ ແລະສາສະໜາ ໄດ້ມີການປ່ຽນແປງທາງບວດຫຼາຍຢ່າງ...
ທີສອງ, ໃນດ້ານຄວາມສະຫງົບຮຽບຮ້ອຍ, ຄວາມປອດໄພທາງສັງຄົມ, ການຕໍ່ສູ້ປ້ອງກັນແລະຕ້ານອາຊະຍາກຳ, ໄດ້ມີການຜັນຂະຫຍາຍຢ່າງດຸເດືອດດ້ວຍການໃຊ້ມາດຕະການຫຼາຍຢ່າງພ້ອມກັນ ເພື່ອຫຼຸດອາຊະຍາກຳ; ຈັດການກັບບັນຫາອາຊະຍາກຳທີ່ຊັບຊ້ອນ ແລະການລະເມີດກົດໝາຍ ຢ່າງທັນທ່ວງທີແລະທົ່ວເຖິງ, ໂດຍສະເພາະກັບອາຊະຍາກຳອັນຕະລາຍ, ອາຊະຍາກຳທີ່ມີການຈັດຕັ້ງ ແລະອາຊະຍາກຳຂ້າມຊາດ (ອາຊະຍາກຳຢາເສບຕິດ, ອາຊະຍາກຳໃຊ້ເຕັກໂນໂລຊີສູງ...), ສ້າງສັງຄົມທີ່ນັບມື້ນັບເປັນລະບຽບຮຽບຮ້ອຍ ມີລະບຽບວິໄນ ໝັ້ນຄົງ ປອດໄພ ແລະສົດໃສຂຶ້ນເລື້ອຍໆ. ຄຽງຄູ່ກັນນັ້ນ, ກອງກຳລັງຕຳຫຼວດໄດ້ປະຈັນບານນຳໜ້າໃນການປ້ອງກັນ, ຮັບມື ແລະແກ້ໄຂບັນຫາທ້າທາຍດ້ານຄວາມໝັ້ນຄົງທີ່ບໍ່ເປັນແບບດັ້ງເດີມ ແລະປະຕິບັດຕາມພັນທະກໍລະນີລະຫວ່າງປະເທດ. ສິ່ງໂດດເດັ່ນແມ່ນ ກອງກຳລັງຕຳຫຼວດຍາມໃດກໍຢູ່ໃນສະຖານທີ່ທີ່ຫຍຸ້ງຍາກລຳບາກ ແລະອັນຕະລາຍ ເພື່ອຜັນຂະຫຍາຍການເຄື່ອນໄຫວການປ້ອງກັນແລະຄວບຄຸມໄພພິບັດທາງທຳມະຊາດ; ຄວບຄຸມແລະກິດກັ້ນການແຜ່ລະບາດຂອງພະຍາດໂຄວິດ-19; ເຂົ້າຮ່ວມການຄົ້ນຫາ, ກູ້ໄພກູ້ຊີບໃນປະເທດ; ສະໜັບສະໜູນກອງກຳລັງກູ້ໄພສາກົນ (ເຊັ່ນ ແຜ່ນດິນໄຫວໃນຕວັກກີ) ແລະສົ່ງພະນັກງານເຂົ້າຮ່ວມກອງກຳລັງຮັກສາສັນຕິພາບຂອງສະຫະປະຊາຊາດ...
ທີສາມ, ການສ້າງແລະປັບປຸງຄວາມໝັ້ນຄົງປະຊາຊົນ ແລະທ່າສະໜາມຮົບຄວາມໝັ້ນຄົງປະຊາຊົນ ຢ່າງໜັກແໜ້ນ ຕິດພັນກັບພື້ນຖານການປ້ອງກັນປະເທດທົ່ວປວງຊົນ ແລະທ່າສະໜາມຮົບປ້ອງກັນປະເທດທົ່ວແວງຊົນ, ປະກອບສ່ວນປະຕິບັດວຽກງານປ້ອງກັນປະເທດໃຫ້ປະສົບຜົນສຳເລັດ. ຕໍ່ໜ້າການຜັນແປທີ່ສັບສົນໃນໂລກ ໃນພາກພື້ນ ແລະ ພາຍໃນປະເທດ, ຕຳຫຼວດປະຊາຊົນ ແລະ ກອງທັບປະຊາຊົນ ໄດ້ສົມທົບກັນຢ່າງແໜ້ນແຟ້ນ ເພື່ອໃຫ້ຄຳແນະນຳແກ່ພັກແລະລັດ ໃນການປະຕິບັດໜ້າທີ່ປ້ອງກັນປະເທດແລະຄວາມໝັ້ນຄົງ, ປະສົມປະສານການປ້ອງກັນປະເທດ ແລະຄວາມໝັ້ນຄົງເຂົ້າກັບເສດຖະກິດ ວັດທະນະທຳ ສັງຄົມແລະການຕ່າງປະເທດ; ສົມທົບກັນກຳແໜ້ນສະພາບການ ເພື່ອເປັນເຈົ້າການໃນການຈັດການກັບທະຖານະການຢ່າງມີປະສິດທິຜົນ, ແກ້ໄຂຄວາມທ້າທາຍ, ຮັກສາທ່າເປັນເຈົ້າການຍຸດທະສາດ, ບໍ່ປະໃຫ້ຕົກໃນທ່າຮັບ ເຫດບັງເອີນໃນການປົກປັກຮັກສາປະເທດຊາກ. ຕາມພາລະບົດບາດແລະໜ້າທີ່ຂອງຕົນ, ກອງກຳລັງຕຳຫຼວດປະຊາຊົນໄດ້ເອົາໃຈໃສ່ການກໍ່ສ້າງທ່າສະໜາມຮົບຄວາມໝັ້ນຄົງປະຊາຊົນ ເຊື່ອມຕໍ່ຢ່າງແໜ້ນແຟ້ນກັບ ທ່າສະໜາມຮົບປ້ອງກັນປະເທດທົ່ວປວງຊົນ, ຕາມທິດທາງທີ່ສະໝ່ຳສະເໝີ ຕໍ່ເນືອງ ທົ່ວປວງຊົນ ແລະຮອບດ້ານ ບົນພື້ນຖານຂອງ “ທ່າສະໜາມຫົວໃນປະຊາຊົນ” ແລະ ໄດ້ຮັບການປັບປຸງແລະປ່ຽນແປງໃໝ່ຢ່າງບໍ່ຢຸດຢັ້ງ ແລະເຂົ້າສູ່ລວງເລິກ ເພື່ອຫຼອມລວມຄວາມຮັກຊາດ, ຈິດໃຈສາມັກຄີປວງຊົນທັງຊາດ, ຄວາມໄວ້ວາງໃຈທາງການເມືອງ ແລະຄວາມຮູ້ສຶກຮັບຜິດຊອບພົນລະເມືອງຂອງປະຊາຊົນ ຕໍ່ການນຳພາຂອງພັກ, ການຄຸ້ມຄອງແລະບໍລິຫານຂອງລັດ; ລະດົມກຳລັງແຮງທາງດ້ານຈິດໃຈແລະວັດຖຸ ຂອງລະບົບການເມືອງທັງໝົດ ແລະປະຊາຊົນທັງປວງ ເພື່ອປະຕິບັດໜ້າທີ່ປົກປັກຮັກສາປະເທດຊາດ; ຊຸກຍູ້ການພັດທະນາເສດຖະກິດ-ສັງຄົມຂອງປະເທດ ແລະການຕ່າງປະເທດຊອງຊາດ.
ທີສີ່, ການສ້າງ ປັບປຸງ ແລະເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີປວງຊົາທັງຊາດ ໃນພາລະກິດການສ້າງສາແລະປົກປັກຮັກສາປະເທດຊາດ; ເຮັດໜ້າທີ່ຂົນຂວາຍຄົນຫວຽດນາມໃນຕ່າງປະເທດໃຫ້ດີ. ໂດຍຮັບຮູ້ຢ່າງຈະແຈ້ງເຖິງບົດບາດແລະພາລະກຳປະຫວັດສາດຂອງມວນຊົນ ໃນການສ້າງສາແລະປົກປັກຮັກສາປະເທດຊາດ, ກອງກຳລັງຕຳຫຼວດປະຊາຊົນໄດ້ປະສານສົມທົບຢ່າງແໜ້ນແຟ້ນ ກັບບັນດາຄະນະ, ຂະແໜງການ ແລະອົງຄະນະມະຫາຊົນ ໃນການສ້າງ ປັບປຸງ ແລະພັດທະນາຂະບວນການທົ່ວປວງຊົນປົກປ້ອງຄວາມໝັ້ນຄົງຂອງປະເທດຊາດ ມີທັງກວ້າງແລະເລິກ. ດ້ວຍວິທີການໃໝ່ແລະປະດິດສ້າງຫຼາຍຢ່າງ, ຂະບວນການນີ້ຈຶງດຶງດູດປະຊາຊົນຈຳນວນຫຼາຍໃຫ້ເຂົ້າຮ່ວມ, ບໍ່ພຽງແຕ່ປັບປຸງຍົກສູງປະສິດທິພາບຂອງວຽກງານການຕໍ່ສູ້ປ້ອງກັນແລະຕ້ານອາຊະຍາກຳ ແລະສ້າງສັງຄົມທີ່ເປັນລະບຽບຮຽບຮ້ອຍ, ມີລະບຽບວິໄນ ໝັ້ນຄົງ ປອດໄພ ສົດໃສ ແລະອາລະຍະທຳ, ແຕ່ຍັງເປັນຂະບວນການຫຼັກແຫຼ່ງ ໃນຂະບວນການປະຕິວັດຂອງມະຫາຊົນໃນພື້ນທີ່ຮາກຖານ.
ທີຫ້າ, ວຽກງານການຕ່າງປະເທດຂອງຕຳຫຼວດປະຊາຊົນ ຮັບໃຊ້ຢ່າງມີປະສິດທິຜົນໃຫ້ແກ່ວຽກງານປົກປັກຮັກສາຄວາມໝັ້ນຄົງຂອງຊາດ, ຄວາມເປັນລະບຽບຮຽບຮ້ອຍແລະຄວມປອດໄພທາງສັງຄົມ ແລະກໍ່ສ້າງຕຳຫຼວດປະຊາຊົນ, ກ້າວໄປໜ້າປູທາງ ແລະຮັບໃຊ້ການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດຂອງປະຊາຊົນ. ຮັບຮູ້ໄດ້ຢ່າງຈະແຈ້ງວ່າ ຄວາມທ້າທາຍທີ່ນາບຂູ່ອະທິປະໄຕ ສະຖຽນລະພາບດ້ານການເມືອງ ສັງຄົມ ແລະ ການພັດທະນາແບບຍືນຍົງຂອງພື້ນຖານເສດຖະກິດການຕະຫຼາດຕາມທິດສັງຄົມນິຍົມນັ້ນ ລ້ວນແຕ່ແມ່ນຍ້ອນບັນດາປັດໄຈພາຍນອກ ຈາກສະພາບການໂລກ ພາກພື້ນ ແລະ ສະພາບການພາຍໃນປະເທດ. ຕາມນັ້ນ, ພ້ອມກັນກັບການເພີ່ມທະວີການເຄື່ອນໄຫວປ້ອງກັນ ຕ້ານ ແລະ ຂະຈັດສາເຫດແລະເງື່ອນໄຂພາຍໃນ, ກອງກຳລັງຕຳຫຼວດປະຊາຊົນໄດ້ເປັນເຈົ້າການ ໃນການຮ່ວມມືສາກົນ ກັບບັນດາຄູ່ຮ່ວມມືທີ່ກ່ຽວຂ້ອງປະເທດ ດິນແດນ ແລະອົງການສາກົນ ໃນຮູບແບບຕ່າງໆ ແລະບາດກ້າວທີ່ເໝາະສົມ. ຜ່ານນັ້ນ ແກ້ບັນຫາຄວາມສ່ຽງ ແລະຄວາມທ້າທາຍຫຼາຍປະການ ຕໍ່ຄວາມໝັ້ນຄົງຂອງຊາດຈາກພາຍນອກ, ຍາດແຍ້ງເອົາຄວາມເຫັນດີເຫັນພ້ອມຂອງເພື່ອນມິດສາກົນ, ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ. ກອງກຳລັງຕຳຫຼວດປະຊາຊົນຜ່ານການຕ່າງປະເທດຮ່ວມມືສາກົນ ໄດ້ຊ່ວຍໃຫ້ເພື່ອນມິດສາກົນເຂົ້າໃຈ ແລະ ເພີ່ມທະວີຄວາມໄວ້ເນື້ອເຊື່ອໃຈຕໍ່ຫວຽດນາມ, ຈາກນັ້ນຊຸກຍູ້ການເຊື່ອມໂຍງສາກົນຂອງປະເທດ, ການຕ່າງປະເທດຂອງພັກ, ການທູດຂອງລັດ ແລະການຕ່າງປະເທດປະຊາຊົນ.
ບາງທິດທາງພັດທະນາການກໍ່ສ້າງກຳລັງຕຳຫຼວດປະຊາຊົນທີ່ສະອາດ ໝັ້ນຄົງເຂັ້ມແຂງ
ເປັນລະບຽບຫຼວງ ຊ່ຽວຊານທາງວິຊາຊີບ ແລະ ທັນສະໄໝຢ່າງແທ້ຈິງ
ໃນຊຸມປີຕໍ່ໜ້າ, ຄາດຄະເນວ່າ ສະຖານະການໂລກ ແລະ ພາກພື້ນຈະສືບຕໍ່ພັດທະນາຢ່າງສັບສົນ, ດ້ວຍບັນດາປັດໄຈທີ່ສະດວກໃໝ່ປະກົດຂຶ້ນ ພ້ອມທັງຄວາມທ້າທາຍທີ່ຄາດເດົາບໍ່ໄດ້ຕໍ່ຄວາມໝັ້ນຄົງຂອງຫວຽດນາມ ແລະຜົນປະໂຫຍດຂອງຊາດ ທັງໃນທິດທາງພາຍໃນແລະພາຍນອກ.
ສະຖານະການແລະສະພາບການໃໝ່ພາໃຫ້ເກີດຄວາມຕ້ອງການໃໝ່, ຮຽກຮ້ອງໃຫ້ກຳລັງຕຳຫຼວດປະຊາຊົນ ຕ້ອງເຂົ້າໃຈຢ່າງເລິກເຊິ່ງກ່ວາອີກເຖິງພາລະກິດ ບົດບາດ ແລະຄວາມຮັບຜິດຊອບຕໍ່ໜ້າພັກ ແລະ ປະຊາຊົນ ໃນການປົກປັກຮັກສາປະເທດຊາດສັງຄົມນິຍົມຫວຽດນາມ.
ທີໜຶ່ງ, ກ່ຽວກັບຄວາມຮັບຮູ້, ຕ້ອງເຫັນແຈ້ງວ່າ ໃນຊຸມປີທີ່ຈະມາເຖິງນີ້ ພາລະກິດການສ້າງສາແລະປົກປັກຮັກສາປະເທດຊາດຈະມີຄວາມສະດວກຫຼາຍຢ່າງ ແຕ່ກໍ່ມີຄວາມຫຍຸ້ງຍາກແລະສິ່ງທ້າທາຍບໍ່ໜ້ອຍ. ໃນນັ້ນ, ຄວາມທ້າທາຍທີ່ໃຫຍ່ທີ່ສຸດຍັງຄົງແມ່ນ ການປົກປ້ອງອະທິປະໄຕ ແລະຜືນແຜ່ນດິນອັນຄົບຖ້ວນຂອງປະເທດຊາດຢ່າງໝັ້ນຄົງ ແລະການປົກປ້ອງອະທິປະໄຕ ສະຖຽນລະພາບທາງການເມືອງແລະສັງຄົມ, ການພັດທະນາແບບຍືນຍົງຂອງພື້ຖານເສດຖະກິດຕະຫຼາດຕາມທິດສັງຄົມນິຍົມ ຢ່າງໝັ້ນຄົງ. ບັນດາຄວາມທ້າທາຍຂ້າງເທິງ ຮຽກຮ້ອງໃຫ້ຄະນະພັກ, ຜູ້ນຳແລະຜູ້ບັນຊາການຕຳຫຼວດໜ່ວຍແລະທ້ອງຖິ່ນ ແລະ ນາຍຕຳຫຼວດແລະຕຳຫຼວດປະຊາຊົນ ໃນກອງກຳລັງຕຳຫຼວດທັງໝົດ ຕ້ອງເຊີດຊູມູນເຊື້ອວິລະຊົນອັນສະຫງ່າງາມຂອງຕຳຫຼວດປະຊາຊົນ, ເສີມຂະຫຍາຍບັນດາບົດຮຽນອັນລ້ຳຄ່າທີ່ຖອດຖອນມາໄດ້, ຍຶດໝັ້ນໜ້າທີ່ການເມືອງເພື່ອເສີມຂະຫຍາຍ ແລະປະຕິບັດໃຫ້ດີກວ່າອີກ ໜ້າທີ່ເປັນແກ່ນສານໃນການປົກປ້ອງບົດບາດແລະການນຳພາຂອງພັກຕໍ່ລັດແລະສັງຄົມ, ປົກປ້ອງຮາກຖານແນວຄິດຂອງພັກ; ປົກປ້ອງລັດແລະລະບອບສັງຄົມນິຍົມ, ປົກປ້ອງປະຊາຊົນ, ປົກປ້ອງກຸ່ມກ້ອນມະຫາສາມັກຄີປວງຊົນທົງຊາດ; ປົກປ້ອງການພັດທະນາແບບຍືນຍົງຂອງເສດຖະກິດປະເທດ, ປົກປ້ອງວັທະນະທຳແລະຜູ້ຄົນຫວຽດນາມທີ່ມີເອກະລັກວັດທະນະທຳປະຈຳຊາດ, ເລືອກຮັບເອົາແກ່ນສານວັດທະນະທຳຂອງມະນຸດຂາດ; ປົກປ້ອງແນວທາງການຕ່າງປະເທດທີ່ເປັນເອກະລາດ ເປັນເຈົ້າຕົນເອງຂອງປະເທດ. ພ້ອມກັນນັ້ນ, ປະສານສົມທົບຢ່າງແໜ້ນແຟ້ນກັບກອງທັບປະຊາຊົນ ໃນການປະຕິບັດບັນດາໜ້າທີ່ປ້ອງກັນປະເທດ ການທະຫານ ຕ້ານສົງຄາມຮຸກຮານຢ່າງສຳເລັດມີໄຊ ແລະມີປະສິດທິພາບ.
ທີສອງ, ສືບຕໍ່ຊາບຊຶມຢ່າງເລິກເຊິ່ງກວ່າອີກເຖິງທັດສະນະທີ່ວ່າ “ຄົນກ່ອນອາວຸດຕາມຫຼັງ”, ສຸມໃສ່ຜັນຂະຫຍາຍການປະຕິບັດມະຕິເລກທີ 12-NQ/TW, ລົງວັນທີ 16 ມີນາ 2022, ຂອງກົມການເມືອງສູນກາງພັກ ແລະ ແຜນການສະບັບເລກທີ 118/KH-ĐUCA, ລົງວັນທີ 25 ພຶດສະພາ 2022, ຂອງຄະນະພັກປ້ອງກັນຄວາມສະຫງົບສູນກາງ ວ່າດ້ວຍການຍູ້ແຮງການກໍ່ສ້າງກອງກຳລັງຕຳຫຼວດປະຊາຊົນທີ່ສະອາດ ໝັ້ນຄົງເຂັ້ມແຂງ ເປັນລະບຽບຫຼວງ ຊຳນານໃນວິຊາຊີບ ທັນສະໄໝຢ່າງແທ້ຈິງ, ຕອບສະໜອງໄດ້ກັບຄວາມຕ້ອງການ ແລະໜ້າທີ່ໃນສະພາບການໃໝ່. ນີ້ກໍ່ແມ່ນໜ້າທີ່ການເມືອງທີ່ສຳຄັນພິເສດສຳລັບກອງກຳລັງຕຳຫຼວດທັງໝົດ. ເອົາໃຈໃສ່ກໍ່ສ້າງເພື່ອໃຫ້ພະນັກງານ ນັກຮົບແຕ່ຄົນ, ແຕ່ລະຄະນະພັກ ກົມກອງ ແລະ ກອງກໍາລັງຕຳຫຼວດປະຊາຊົນທັງໝົດ ມີຄວາມສະອາດ ເຂັ້ມແຂງທາງດ້ານການເມືອງ, ແນວຄິດ ຄຸນສົມບັດສິນທຳ, ການຈັດຕັ້ງແລະພະນັກງານຢ່າງແທ້ຈິງ, ເກັ່ງທາງດ້ານວິຊາຊີບ, ມີແບບແຜນວິທີວຽກງານຕາມແບບປະກອບອາວຸດຢ່າງແທ້ຈິງ, ເປັນມືອາຊີບ, ທັນສະໄຫມ, ເປັນເຈົ້າທາງວິທະຍາສາດແລະເຕັກໂນໂລຢີ, ຕອບສະໜອງຄວາມຕ້ອງການເຮັດວຽກໃນສະພາບແວດລ້ອມແລະສະຖານະການທີ່ແຕກຕ່າງກັນ. ໃນການປະຕິບັດງານແລະການສູ້ຮົບ ຕ້ອງຢູ່ພາຍໃຕ້ການນຳພາເດັດຂາດ ໂດຍກົງ ຮອບດ້ານຂອງພັກ, ການຄຸ້ມຄອງລວມສູນເປັນເອກະພາບຂອງລັດ, ຮັກສາບົດບາດຫຼັກແຫຼ່ງ, ກອງກຳລັງປະກອບອາວຸດທີ່ເຊື່ອຖືໄດ້ຂອງພັກແລະປະຊາຊົນ. ຜູ້ນຳຜູ້ບັນຊາການຕຳຫຼວກທຸກຂັ້ນ, ໂດຍສະເພາະຫົວໜ້າ ຕ້ອງເຊີດຊູຄວາມນຳໜ້າເປັນແບບຢ່າງ, ກ້າຄິດ ກ້າເຮັດ ແລະກ້າຮັບຜິດຊອບ; ພະນັກງານ ນັກຮົບຕຳຫຼວດປະຊາຊົນທຸກຄົນ ຕ້ອງເປັນສັນຍາລັກຂອງຄວາມຈົງຮັກພັກດີ ແລະຄວາມເສຍສະຫຼະເພື່ອພັກ ເພື່ອປະເທດຊາດ ເພື່ອປະຊາຊົນ, “ບ່ອນໃດທີ່ຕ້ອງການ ກໍ່ມີຕໍາຫຼວດຢູ່ທີ່ນັ້ນ. ບ່ອນໃດຫຍຸ້ງຍາກ ກໍ່ມີຕໍາຫຼວດ”; ຕ້ອງຮັບໃຊ້ປະຊາຊົນຢ່າງແທ້ຈິງ.
ທີສາມ, ກອງກຳລັງຕຳຫຼວດປະຊາຊົນຕ້ອງໃຫ້ຄວາມສຳຄັນເປັນພິເສດເຖິງການເຊື່ອມໂຍງລະຫວ່າງການປະຕິບັດງານ, ການສູ້ຮົບ ກັບການເອົາໃຈໃສ່ກໍ່ສ້າງກຸ່ມກ້ອນມະຫາສາມັກຄີປວງຊົນທັງຊາດ ແລະ ຈັດຕັ້ງປະຕິບັດວຽກງານຂົນຂວາຍປະຊາຊົນ ແລະຂະບວນການປວງຊົນປົກປ້ອງຄວາມໝັ້ນຄົງຂອງປະເທດຊາດຢ່າງມີປະສິດທິພາບ. ນີ້ແມ່ນຄວາມຮຽກຮ້ອງຕ້ອງການທີ່ຮີບດ່ວນທີ່ສຸດ ຈາກພຶດຕິກຳຕົວຈິງ. ການສ້າງແລະປັບປຸງກຸ່ມກ້ອນມະຫາສາມັກຄີປວງຊົນທັງຊາດ ຄວນໄດ້ຮັບຖືວ່າແມ່ນວຽກງານສຳຄັນພິເສດໃນການສ້າງສາ ແລະປົກປັກຮັກສາປະເທດຊາດ ໃນທຸກວັນນີ້. ຖ້າຫາກບໍ່ເອົາໃຈໃສ່ ແລະບໍ່ປະຕິບັດວຽກງານນີ້ຢ່າງມີປະສິດທິຜົນ ມັນຈະສ້າງຄວາມທ້າທາຍໃຫຍ່ຫຼວງຕໍ່ພາລະກິດປົກປັກຮັກສາປະເທດຊາດ, ຕໍ່ຄວາມປອດໄພຂອງລະບອບ, ປະເທດຊາດ ແລະ ປະຊາຊົນ. ຄວາມເຫັນດີເຫັນພ້ອມ ຄວາມສາມັກຄີ, ຄວາມໃກ້ຊິດສິໜິດສະໜົມຂອງປະຊາຊົນ, ຄວາມໄວ້ວາງໃຈຂອງປະຊາຊົນຕໍ່ພັກ ລັດ ແລະລະບອບສັງຄົມນິຍົມ ຈະເປັນອາວຸດທີ່ມີປະສິດທິພາບທີ່ສຸດ ໃນການຕໍ່ສູ້ຕ້ານບັນດາກຳລັງສັດຕູແລະປະຕິການຢູ່ພາຍໃນ ແລະ ຕ່າງປະເທດຂອງການປະຕິວັດຫວຽດນາມ ໃນສະພາບການປະຈຸບັນ.
ທີສີ່, ເຊື່ອມໂຍງເປົ້າໝາຍປົກປປັກຮັກສາປະເທດຊາດຕາມພາລະໜ້າທີ່ຂອງກອງກຳລັງຕຳຫຼວດປະຊາຊົນ ແລະກອງທັບປະຊາຊົນ; ປະສົມປະສານກັບເປົ້າໝາຍການພັດທະນາເສດຖະກິດ ສັງຄົມ ການຕ່າງປະເທດ, ສ້າງຄວາມເປັນເອກະພາບສູງ ໃນຄວາມຮັບຮູ້ ແລະການຈັດຕັ້ງປະຕິບັດໜ້າທີ່ປົກປັກຮັກສາປະເທດຊາດ, ໃຫ້ຄວາມສຳຄັນກັບການຮັກສາພາຍໃນໃຫ້ໝັ້ນຄົງເປັນຫຼັກ. “ຕຳຫຼວດແລະກອງທັບແມ່ນສອງແຂນຂອງປະຊາຊົນ, ຂອງພັກ, ຂອງລັດຖະບານ ແລະ ຂອງຜະເດັດການກຳມາຊີບ”(6); “ເມື່ອມີສົງຄາມ, ກອງທັບສູ້ຮົບ, ເມື່ອມີສັນຕິພາບກໍ່ຝຶກຫັດການທະຫານ. ສ່ວນຕຳຫຼວດກໍ່ຕ້ອງຕໍ່ສູ້ກັບສັດຕູຢ່າງບໍ່ຢຸດຢັ້ງ, ໃນເວລາສົງຄາມກໍມີວຽກງານ, ໃນຍາມສັນຕິກໍ່ມີວຽກງານຫຼາຍກວ່າ”(7).
ໃນປະຈຸບັນ, ເມື່ອປະເທດມີສັນຕິພາບແລະເປັນເອກະພາບ, ເປົ້າໝາຍສູງສຸດຂອງການປົກປັກຮັກສາປະເທດຊາດແມ່ນປົກປັກຮັກສາເອກະລາດ ອະທິປະໄຕ ເອກະພາບ ແລະຜືນແຜ່ນດິນອັນຄົບຖ້ວນຂອງປະເທດຊາດ; ປົກປ້ອງພັກ ລັດ ປະຊາຊົນ ແລະລະບອບສັງຄົມນິຍົມ; ປົດປ້ອງພາລະກິດການປ່ຽນແປງໃໝ່, ການຫັນເປັນອຸດສາຫພກຳ ທັນສະໄໝ; ປົກປ້ອງຜົນປະໂຫຍດຂອງຊາດ-ປະເທດຊາດ; ປົກປ້ອງຄວາມໝັ້ນຄົງທາງການເມືອງ, ຄວາມເປັນລະບຽບຮຽບຮ້ອຍ ແລະຄວາມປອດໄພທາງສັງຄົມ ແລະວັດທະນະທຳຂອງຊາດ; ຮັກສາຄວາມໝັ້ນຄົງທາງການເມືອງ ແລະສະພາບແວດລ້ອມສັນຕິພາບ ເພື່ອສ້າງສາແລະພັດທະນາປະເທດຕາມທິດທາງສັງຄົມນິຍົມ. ໃນສະພາບການໃໝ່, ໄພຂົ່ມຂູ່ ແລະ ຄວາມທ້າທາຍຕໍ່ຄວາມໝັ້ນຄົງ ແລະຜົນປະໂຫຍດແຫ່ງຊາດນັບມື້ນັບປະກົດຂຶ້ນ, ມີຄວາມຫຼາກຫຼາຍ ແລະ ກ່ຽວພັນກັນຢ່າງຊັບຊ້ອນ. ໜ້າທີ່ປົກປັກຮັກສາປະເທດຊາດບໍ່ພຽງແຕ່ຮັດແຄບໃນຂົງເຂດການທະຫານ ການປ້ອງກັນປະເທດ, ຄວາມໝັ້ນຄົງ ຄວາມເປັນລະບຽບຮຽບຮ້ອຍເທົ່ານັ້ນ, ແຕ່ໄດ້ຂະຫຍາຍອອກ ແລະປະຕິບັດຢ່າງຄົບຊຸດ ເປັນເອກະພາບໃນທຸກຂົງເຂດ. ເພາະສະນັ້ນ, ກອງປະຊຸມໃຫຍ່ຄັ້ງທີ XIII ຂອງພັກຈຶງໄດ້ເນັ້ນໜັກວ່າ “ປະສານສົມທົບຢ່າງແໜ້ນແຟ້ນແລະມິປະສິດທິພາບ ລະຫວ່າງເສດຖະກິດ ວັດທະນະທຳ ສັງຄົມ ການຕ່າງປະເທດ ກັບການປ້ອງກັນປະເທດ ຄວາມໝັ້ນຄົງ ແລະ ລະຫວ່າງການປ້ອງກັນປະເທດ ຄວາມໝັ້ນຄົງ ກັບເສດຖະກິດ ວັດທະນະທຳ ສັງຄົມ ການຕ່າງປະເທດ”(8); ໃນນັ້ນ “ການພັດທະນາເສດຖະກິດ-ສັງຄົມເປັນຈຸດໜັກໃຈກາງ; ການກໍ່ສ້າງພັັກເປັນກຸນແຈ; ການພັດທະນາວັດທະນະທຳເປັນຮາກຖານທາງຈິດໃຈ; ການຮັບປະກັນການປ້ອງກັນປະເທດ ແລະຄວາມໝັ້ນຄົມແມ່ນສຳຄັນເປັນຢ່າງຍິ່ງແລະເປັນປະຈຳ”(9) ເພື່ອເສີມຂະຫຍາຍສຸດຂີດກຳລັງແຮງສັງລວມໃນການປົກປັກຮັກສາປະເທດຊາດ. ຊາບຊຶມບັນດາທັດສະນະດັ່ງກ່າວເທິງນີ້ ກອງກຳລັງຕຳຫຼວດປະຊາຊົນຕ້ມມີຄວາມຕັດສິນໃຈ, ຕັ້ງໜ້າ ແລະເປັນເຈົ້າການກວ່າອີກ ເພື່ອບັນລຸຄວາມສຳເລັດໃນການປະຕິບັດໜ້າທີ່ນຳໜ້າ ເປັນແກນກາງໃນການປ່ຽນແປງດິຈິຕອນແຫ່ງຊາດ, ການສ້າງລັດຖະບານດິຈິຕອນ ສັງຄົມດິຈິຕອນ ພົນລະເມືອງດິຈິຕອນ ທີ່ຮັບໃຊ້ໂດຍກົງໃຫ້ແກ່ການພັດທະນາຂອງປະເທດ.
ທີຫ້າ, ບັນດາກົມກອງຕຳຫຼວດແລະທ້ອງຖິ່ນ, ໂດຍສະເພາະແມ່ນອົງການເສນາທິການແລະຄົ້ນຄ້ວາຍຸດທະສາດ ຕ້ອງສຸມໃສ່ປະຕິບັດໜ້າທີ່ເປັນຢ່າງດີ ໂດຍສະຫຼຸບ 10 ປີແຫ່ງການຜັນຂະຫຍາຍມະຕິເລກທີ 28-NQ/TW ຂອງກອງປະຊຸມສູນກາງພັກຄັ້ງທີ 8 ສະໄໝທີ XI, ກ່ຽວກັບ “ຍຸດທະສາດການປົກປັກຮັກສາປະເທດຊາດ ໃນສະຖານະການໃຫມ່”.
ໜ້າທີ່ປົກປັກຮັກສາປະເທດຊາດແມ່ນຂອງລະບົບການເມືອງທັງໝົດ ແລະຂອງປະຊາຊົນທັງໝົດ, ໂດຍແກນຫຼັກແມ່ນຕຳຫຼວດແລະກອງທັບ. ລັດຖະທຳມະນູນແລະເອກະສານຍຸດທະສາດຂອງພັກ ແລະກົດໝາຍຂອງລັດ ໄດ້ສະແດງໃຫ້ເຫັນແຈ້ງແລະກຳນົດຢ່າງຊັດເຈນເຖິງພາລະບັດບາດ ແລະໜ້າທີ່ຂອງທັງສອງກອງກຳລັງນີ້. ໃນນັ້ນ, ກອງທັບປະຊາຊົນແມ່ນກຳລັງແກນກາງຂອງກຳລັງປະກອບອາວຸດປະຊາຊົນ ໃນການປະຕິບັດໜ້າທີ່ປ້ອງກັນປະເທດ; ຍົກສູງຄວາມສາມາດປ້ອງກັນ ສູ້ຮົບ ແລະກຽມພ້ອມສູ້ຮົບ, ຈັດການກັບສະຖານະການປ້ອງກັນປະເທດໄດ້ສຳເລັດ ແລະເອົາຊະນະສົງຄາມຮຸກຮານທຸກຮູບແບບ(10). ສ່ວນຕຳຫຼວດປະຊາຊົນແມ່ນກຳລັງແກນກາງຂອງກຳລັງປະກອບອາວຸດປະຊາຊົນ ໃນການປະຕິບັດໜ້າທີ່ປົກປ້ອງຄວາມໝັ້ນຄົງແຫ່ງຊາດ, ຮັບປະກັນຄວາມເປັນລະບຽບຮຽບຮ້ອຍແລະຄວາມປອດໄພທາງສັງຄົມ, ຕໍ່ສູ້ປ້ອງກັນແລະຕ້ານອາຊະຍາກຳ ແລະການລະເມີດກົດໝາຍວ່າດ້ວຍຄວາມໝັ້ນຄົງຂອງຊາດ, ຄວາມເປັນລະບຽບຮຽບຮ້ອຍແລະຄວາມປອດໄພທາງສັງຄົມ(11). ການປັບປຸງຄວາມຮັບຮູ້ ທິດສະດິ ແລະລະບົບເອກະສານທາງກົດໝາຍ ຈະປະກອບສ່ວນກຳນົດພາລະບົດບາດ ໜ້າທີ່ ແລະພາລະກິດຂອງແຕ່ລະກອງກຳລັງໄດ້ຊັດເຈນກວ່າອີກ ເພື່ອໃຫ້ສາມາດຈັດການແບ່ງງານແລະມອບໝາຍທີ່ເໝາະສົມກັບການປະຕິບັດໜ້າທີ່ ເພື່ອເສີມຂະຫຍາຍສຸດຂີດກຳລັງແຮງແລະພະລັງຂອງແຕ່ລະກອງກຳລັງ ໃນການປົກປັກຮັກສາປະເທດຊາດ.
ທີຫົກ, ສືບຕໍ່ຊຸກຍູ້ວຽກງານການຕ່າງປະເທດຂອງກຳລັງຕຳຫຼວດປະຊາຊົນ; ຍົກສູງຄຸນນະພາບແລະປະສິດທິຜົນ ຂອງກິດຈະກຳການຕ່າງປະເທດ ຂອງກອງກຳລັງຕຳຫຼວດ, ໃຫ້ເຂົ້າສູ່ເນື້ອແທ້ ລວງເລິກໃນກົນໄກພະຫຸພາຄີລະດັບໂລກ ພາກພື້ນ ແລະທະວິພາຄີ. ຂະຫຍາຍການເຄື່ອນໄຫວໂຄສະນາການຕ່າງປະເທດ ເພື່ອຊ່ວຍໃຫ້ເພື່ອນມິດຕ່າງປະເທດເຂົ້າໃຈແນວທາງແລະແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດຫວຽດນາມ ແລະ ຍົກສູງຄວາມສາມາດແລະລະດັບຂອງຕຳຫຼວດປະຊາຊົນ./.
---------------------------
(1) ກອງກຳລັງຕຳຫຼສດປະຊາຊົນໄດ້ປົກປ້ອງບົດບາດແລະການນຳພາຂອງພັກແລະລັດ, ຂະບວນການປະຕິວັດຂອງມະຫາຊົນ; ປົກປ້ອງຄວາມໝັ້ນຄົງ ຄວາມປອດໄພ, ປ້ອງກັນແລະຕ້ານຢ່າງມີປະສິດທິພາບ ຕໍ່ປະກົດການຫຍໍ້ທໍ້, ການແຊກຊຶມຂອງສັດຕູທີ່ມ້າງເພທຳລາຍພາຍໃນ; ປົກປ້ອງຄວາມລັບທາງທະຫານ ການປ້ອງກັນປະເທດ, ຖານທີ່ໝັ້ນການປະຕິວັດ ເຂດເສລີ, ປົກປ້ອງບັນດາຄະນະຜູ້ແທນເຈລະຈາຂອງລັດຖະບານຂອງເຮົາຢູ່ນະຄອນເຊີແນວ (ປີ 1954), ປາຣີ (ແຕ່ປີ 1968 ເຖິງປີ 1973).
(2) ບໍ່ພຽງແຕ່ປະຕິບັດໜ້າທີ່ປົກປັກຮັກສາສະຖຽນລະພາບພາຍໃນປະເທດເທົ່ານັ້ນ, ໃນການປະຕິວັດຊາດ ປະຊາທິປະໄຕ ປະຊາຊົນ, ກອງກຳລັງຕຳຫຼວດຍັງໄດ້ຕໍ່ສູ້ໂດຍກົງກັບພວກປະຕິການ, ນັກສືບສອດແນມ ແລະໜ່ວຍກອມມານໂດທຸກປະເພດ, ໄດ້ລົງໂທດພວກກໍ່ການຮ້າຍທີ່ໜີ້ເລືອດຈຳນວຍຫຼາຍຕໍ່ການປະຕິວັດແລະປະຊາຊົນ, ລົງໂທດພວກທະຫານຫຸ່ນ ອຳນາດການປົກຄອງຫຸ່ນ ແລະ ສັດຕູຜູ້ຮຸກຮານ.
(3) ໃນປະເທດ, ໂຄງສ້າງພື້ນຖານສ່ວນໃຫຍ່ຂອງເຮົາຖືກສັດຕູທຳລາຍຢ່າງໜັກໜ່ວງ (ສະເພາະພາກເໜືອ, ນະຄອນ ຕົວເມືອງເກືອບທັງໝົດ, ໃນນັ້ນ 12 ຕົວເມືອງ ແລະ 51 ຕົວເມືອງນ້ອຍຖືກທຳລາຍຢ່າງສິ້ນເຊີງຈາກສົງຄາມ; ສວນອຸດສາຫະກຳ, ທາງລົດໄຟ, ຂົວ, ລະບົບທ່າເຮືອ, ເສັ້ນທາງເດີນທະເລ, ເສັ້ນທາງແມ່ນ້ຳ ແລະສາງສິນຄ້າທັງໝົດຖືກຖິ້ມລະເບີດຍິງທຳລາຍ, ຫຼາຍພື້ນທີ່ຖືກໂຈມຕີທຳລາຍແບບລ້າງຜານ; ໂຮງໝໍ 10 ແຫ່ງຖືກທຳລາຍກວາດພຽງ...). ພາວະເສດຖະກິດຕົກ່ຳ, ວິກິດການເສດຖະກິດ, ໄພເງິນເຟີ້ຮ້າຍແຮງເນື່ອງຈາກ “ຄວາມຜິດພາດຫຼາຍໃນການກໍານົດເປົ້າໝາຍແລະຂັ້ນຕອນໃນການກໍ່ສ້າງພື້ນຖານວັດຖຸ-ເຕັກນິກ, ການດັດສ້າງສັງຄົມນິຍົມ ແລະການຄຸ້ມຄອງເສດຖະກິດ”, ຜົນກະທົບທາງລົບຂອງກົນໄກລວມສູນ ເກື້ອກູນທີ່ມີມາຫຼາຍປີ ເຊິ່ງເປັນປັດໄຈທີ່ເຮັດໃຫ້ເກີດຄວາມຊັກຊ້າໃນການພັດທະນາການຜະລິດ ແລະວິກິດການສັງຄົມທີ່ເລິກເຊິ່ງ. ຢູ່ພາກໃຕ້, ພວກທະຫານຫຸ່ນແລະອຳນາດການປົກຄອງຫຸ່ນທີ່ຍັງຄັດຄ້ານຕ້ານຄືນ, ພ້ອມດ້ວຍເສດເຫຼືອ ຄວາມຊົ່ວຮ້າຍທາງສັງຄົມ ແລະອາຊະຍາກຳທີ່ລະບອບເກົ່າປະໄວ້ ໄດ້ສ້າງຄວາມທ້າທາຍທີ່ຮ້າຍແຮງ ຕໍ່ຄວາມໝັ້ນຄົງແລະຄວາມສະຫງົບຮຽບຮ້ອຍ.
(4) ໂດຍບໍ່ຮັບຄວາມເປັນຈິງທາງປະຫວັດສາດຂອງຄວາມປະລາໄຊໃນຫວຽດນາມ, ຈັດກະພັດອາເມລິກາ ໄດ້ຂຸ້ນຂ້ຽວໃນການປະຕິບັດແຜນການຫຼັງສົງຄາມ, ປິດລ້ອມຂວ້ຳບາດຢ່າງຮອບດ້ານ ໂດຍຫວັງວ່າຈະຜັກດັນປະເທດເຮົາເຂົ້າສູ່ພາວະວິກິດ; ຕິດຕັ້ງນັກສືບສອດແນມໃນປະເທດ ສົມທົບກັບການຝຶກທະຫານແລະໜ່ວຍກອມມານໂດໃນຕ່າງປະເທດ ແລ້ວສົ່ງກັບປະເທດເພື່ອກໍ່ວິນາດສະກຳ; ສະໜັບສະໜູນບັນດາອິດທິກຳລັງປະຕິການ ແລະຝ່າຍຄ້ານໃນປະເທດຍຸຍົງໃຫ້ປະຊາຊົນອົບພະຍົບ, ຈະລາຈົນ ແລະເດີນຂະບວນປະທ້ວງກໍ່ຄວາມວຸ່ຍວາຍທາງສັງຄົມ. ພ້ອມກັນນັ້ນ, ຍັງໄດ້ເກີດສົງຄາມຮຸກຮານສອງຄັ້ງຢູ່ຊາຍແດນຕາເວັນຕົກສຽງໃຕ້ ແລະ ຊາຍແດນພາກເໜືອຂອງປະເທດ, ເຮັດໃຫ້ເກີດການສູນເສຍຢ່າງໜັກທາງດ້ານຊີວິດມະນຸດ, ໂຄງສ້າງພື້ນຖານ, ເສດຖະກິດ, ການເມືອງ, ການຕ່າງປະເທດ,...
(5) FULRO ແມ່ນຕົວຫຍໍ້ຂອງແນວຮ່ວມການຕໍ່ສູ້ຂອງບັນດາເຜົ່າທີ່ຖືກກົດຂີ່ (Front Uni de Lutte des Races Opprimées). ຈຸດປະສົງຂອງຂະບວນການເມື່ອກໍ່ຕັ້ງ (ປີ 1958) ແມ່ນການຕໍ່ສູ້ເພື່ອຮັກສາເອກະລັກທາງວັດມະນະມຳຂອງຊາດ ແລະປົກປ້ອງສິດຜົນປະໂຫຍດຂອງຊົນເຜົ່າສ່ວນນ້ອຍໃນເຂດພູພຽງພາກກາງ - ໄຕງວຽນ; ຖືກອຳນາດການປົກຄອງ ໂງດິ່ງຢ້ຽມ ດັບມອບເມື່ອປີ 1959 (FULRO-1). ໃນໄລຍະທ້າຍຂອງການຕໍ່ສູ້ກູ້ຊາດຕ້ານຈັກກະພັດອາເມລະກາ, CIA ໄດ້ຟື້ນຟູແລະໃຊ້ FULRO ໃນແຜນການຫຼັງສົງຄາມ, ເອີ້ນວ່າ FULRO-2, ເຄື່ອນໄຫວແຕ່ປີ 1964 ເຖິງປີ 1992 ແລະຖືກພວກເຮົາລົບລ້າງ.
(6) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່ໂນ້ຍ, 2011, ເຫຼັ້ມ 12, ໜ້າ 153
(7) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 10, ໜ້າ 258
(8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່ໂນ້ຍ, 2021, ເຫຼັ້ມ 1, ໜ້າ 157
(9) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 324
(10) ມາດຕາ 66 ລັດຖະທຳມະນູນປີ 2013; ມາດຕາ 25 ກົດໝາຍວ່າດ້ວຍການປ້ອງກັນປະເທດປີ 2018; ມະຕິເລກທີ 28-NQ/TW, ລົງວັນທີ 25 ຕຸລາ 2013, ຂອງກອງປະຊຸມສູນກາງພັກຄັ້ງທີ 8 ສະໄໝ XI, ວ່າດ້ວຍ “ຍຸດທະສາດການປົກປັກຮັກສາປະເທດຊາດໃນສະພາບການໃໝ່”
(11) ມາດຕາ 67 ລັດຖະທຳມະນູນປີ 2013; ມາດຕາ 26 ກົດໝາຍວ່າດ້ວຍການປ້ອງກັນປະເທດປີ 2018; ມາດຕາ 3 ກົດໝາຍວ່າດ້ວຍກອງກຳລັງຕຳຫຼວດປະຊາຊົນປີ 2018; ມະຕິເລກທີ 28-NQ/TW, ລົງວັນທີ 25 ຕຸລາ 2013, ຂອງກອງປະຂຸມສູນກາງພັກຄັ້ງທີ 8 ສະໄໝທີ XI, ວ່າດ້ວຍ “ຍຸດທະສາດການປົກປັກຮັກສາປະເທດຊາດໃນສະພາບການໃໝ່”
- ບົດນີ້ໄດ້ລົງພິມໃນວາລະສານກອມມູນິດ ສະບັນທີ 1020 (ເດືອນສິງຫາ 2023)