ປັບປຸງຍົກສູງປະສິດທິຜົນວຽກງານການຕ່າງປະເທດຂອງສະພາແຫ່ງຊາດ
ໃນສະພາບການໃໝ່
ໃນສະພາບການໃໝ່
ກ່າວຄຳເຫັນທີ່ວາລະໄຂກອງປະຊຸມສະໄໝສາມັນເທື່ອທີ 1 ຂອງສະພາແຫ່ງຊາດຊຸດທີ XV, ທ່ານເລຂາທິການໃຫຍ່ ຫງວຽນຝູຈ້ອງ ຊີ້ແຈ້ງວ່າ ການເຄື່ອນໄຫວວຽກງານການຕ່າງປະເທດຂອງສະພາແຫ່ງຊາດນັບມື້ນັບໄດ້ຮັບການຊຸກຍູ້ ແລະ ເປີດກວ້າງ ທັງສອງຝ່າຍ ແລະ ຫຼາຍຝ່າຍ, ໂດຍນຳການທູດຂອງສະພາແຫ່ງຊາດສູ່ລວງເລິກ, ປະກອບສ່ວນເຮັດໃຫ້ປະຊາຊົນໂລກ ແລະ ເພື່ອນມິດສາກົນ ເຂົ້າໃຈນັບມື້ນັບຈະແຈ້ງກ່ຽວກັບປະເທດ ປະຊາຊົນ ແລະ ວັດທະນະທຳຂອງຫວຽດນາມ; ຍາດແຍ່ງເອົາຄວາມເຫັນອົກເຫັນໃຈ ແລະການສະໜັບສະໜູນຂອງປະຊາຊົນໂລກ ແລະເພື່ອນມິດສາກົນ;ເສີມຂະຫຍາຍບົດບາດແລະທີ່ຕັ້ງ ຂອງຫວຽດນາມເວົ້າລວມ ແລະ ຂອງສະພາແຫ່ງຊາດຫວຽດນາມເວົ້າສະເພາະ ໃນເວທີສາກົນ. ຕີລາຄາການພົວພັນດ້ານການທູດຫວຽດນາມເວົ້າລວມ ແລະ ການຕ່າງປະເທດຂອງສະພາແຫ່ງຊາດເວົ້າສະເພາະ, ໃນປຶ້ມ “ກໍ່ສ້າງ ແລະ ພັດທະນາພື້ນຖານການຕ່າງປະເທດ ແລະ ການທູດຫວຽດນາມ ຢ່າງຮອບດ້ານ ທັນສະໄໝ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ທ່ານເລຂາທິການໃຫຍ່ ຫງວຽນຝູຈ້ອງ ເນັ້ນໜັກວ່າ ບັນດາຊ່ອງທາງການຕ່າງປະເທດຂອງພັກ ການທູດຂອງລັດ ການຕ່າງປະເທດຂອງສະພາແຫ່ງຊາດ ແລະ ການຕ່າງປະເທດຂອງປະຊາຊົນ ລ້ວນມີຄວາມຈະເລີນຮຸ່ງເຮືອງຫຼາຍຂຶ້ນ(2).
ການເຄື່ອນໄຫວວຽກງານການຕ່າງປະເທດຂອງສະພາແຫ່ງຊາດ ເຊິ່ງມີຄຸນລັກສະນະທັງຂອງລັດ ແລະປະຊາຊົນທີ່ເລິກເຊິ່ງ, ໄດ້ຮັບການຜັນຂະຫຍາຍຜ່ານການປະຕິບັດບັນດາໜ້າທີ່ພື້ນຖານ ຂອງສະພາແຫ່ງຊາດຄື ການນິຕິບັນຍັດ, ການຕິດຕາມກວດກາສູງສຸດຕໍ່ການເຄື່ອນໄຫວຂອງລັດ ແລະ ການຕັດສິນຕົກລົງບັນຫາສໍາຄັນຂອງປະເທດ, ໃນນັ້ນ ມີການຕັດສິນຕົກລົງກ່ຽວກັບນະໂຍບາຍການຕ່າງປະເທດຂັ້ນພື້ນຖານ, ການໃຫ້ສັດຕະຍາບັນ, ການຕັດສິນໃຈເຂົ້າຮ່ວມຫຼືຍຸຕິ ສັນຍາສາກົນທີ່ກ່ຽວຂ້ອງເຖິງສົງຄາມ, ສັນຕິພາບ, ອະທິປະໄຕຂອງຊາດ, ການເປັນສະມາຊິກຂອງສາທາລະນະລັດສັງຄົມຫວຽດນາມ ໃນອົງການສາກົນ ແລະພາກພື້ນທີ່ສຳຄັນ, ບັນດາສົນທິສັນຍາສາກົນກ່ຽວກັບສິດທິມະນຸດ, ສິດແລະພັນທະພື້ນຖານຂອງພົນລະເມືອງ ແລະ ສົນທິສັນຍາສາກົນອື່ນໆ ທີ່ຂັດຕໍ່ກົດໝາຍ ແລະມະຕິຂອງສະພາແຫ່ງຊາດ.
ການເຄື່ອນໄຫວວຽກງານການຕ່າງປະເທດຂອງສະພາແຫ່ງຊາດໄດ້ຮັບການຜັນຂະຫຍາຍຢ່າງຮອບດ້ານ ເປັນເຈົ້າການ ແລະ ຕັ້ງໜ້າໃນທຸກຂົງເຂດການເຄື່ອນໄຫວ, ໃນນັ້ນ ສຸມໃສ່ຍົກສູງຄຸນນະພາບການຕັດສິນຕົກລົງນະໂຍບາຍພື້ນຖານຂອງລັດໃນເລື່ອງການຕ່າງປະເທດ; ສືບຕໍ່ເພີ່ມທະວີການເຄື່ອນໄຫວການຕ່າງປະເທດ ຂອງສະພາແຫ່ງຊາດ ຕິດພັນກັບການເຄື່ອນໄຫວການຕ່າງປະເທດຂອງພັກ, ການທູດຂອງລັດ ແລະການຕ່າງປະເທດຂອງປະຊາຊົນ; ສ້າງບັນດາໂຄງການທີ່ມີລັກສະນະຍຸດທະສາດ, ໄລຍະຍາວ ແລະ ແຜນການປະຈຳປີ ກ່ຽວກັບການທູດຂອງສະພາແຫ່ງຊາດ; ຊຸກຍູ້ແລະກະຊັບການຮ່ວມມືສອງຝ່າຍ ກັບສະພາແຫ່ງຊາດ/ລັດຖະສະພາ ຂອງປະເທດແລະຄູ່ຮ່ວມມືທີ່ສຳຄັນ; ຍົກລະດັບການຕ່າງປະເທດທະວິພາຄີ, ເປັນເຈົ້າການໃນການເຂົ້າຮ່ວມ ແລະເສີມຂະຫຍາຍບົດບາດຂອງສະພາແຫ່ງຊາດຫວຽດນາມ ໃນກົນໄກລະຫວ່າງລັດຖະສະພາລະດັບພາກພື້ນແລະສາກົນ ທີ່ເປັນຫຼັກແລ່ງແລະສຳຄັນທາງຍຸດທະສາດ ບົນພື້ນຖານທີ່ສອດຄ່ອງກັບຄວາມຕ້ອງການ ຄວາມສາມາດ ແລະ ເງື່ອນໄຂໃນທາງປະຕິບັດສະເພາະ; ເພີ່ມທະວີການປະສານງານ ແລະຍູ້ແຮງວຽກງານການຄົ້ນຄວ້າ, ການພະຍາກອນ, ການໃຫ້ຄຳແນະນຳຍຸດທະສາດໃນຂົງເຂດການຕ່າງປະເທດ; ຍູ້ແຮງວຽກງານຂໍ້ມູນຂ່າວສານການຕ່າງປະເທດ ເພື່ອສະທ້ອນນະໂຍບາຍ ແລະແນວທາງການຕ່າງປະເທດ ຂອງພັກແລະລັດ ໂດຍທັນທີ; ຖ່າຍທອດຂໍ້ມູນກ່ຽວກັບການເຄື່ອນໄຫວຂອງສະພາແຫ່ງຊາດ ໃຫ້ແກ່ສາທາລະນະຊົນ ແລະເພື່ອນມິດສາກົນ.
ໃນວຽກງານການສ້າງກົດໝາຍ, ສະພາແຫ່ງຊາດສືບຕໍ່ໃຫ້ບຸລິມະສິດກັບການສ້າງແລະປັບປຸງກອບກົດໝາຍໃຫ້ສົມບູນ ເພື່ອຜັນຂະຫຍາຍກິດຈະກຳການຕ່າງປະເທດຢ່າງມີປະສິດທິຜົນ. ຕາມນັ້ນ, ຕັ້ງແຕ່ຕົ້ນສະໄໝສະພາແຫ່ງຊາດຊຸດທີ XV ເຖິງສິ້ນສຸດກອງປະຊຸມສະໄໝສາມັນຄັ້ງທີ 6 (ເດືອນພະຈິກ 2023) ສະພາແຫ່ງຊາດໄດ້ຜ່ານກົດໝາຍແລ້ວ 30 ສະບັບ, ໃນນັ້ນມີ ການປຶກສາຫາລື ສະແດງຄວາມຄິດເຫັນ ແລະ ພິຈາລະນາຜ່ານກົດໝາຍສຳຄັນຫຼາຍສະບັບ ທີ່ກ່ຽວຂ້ອງໂດຍກົງແລະທາງອ້ອມ ເຖິງການພົວພັນຕ່າງປະເທດ ແລະການເຊື່ອມໂຍງເຂົ້າກັບສາກົນ ເພື່ອພັດທະນາເສດຖະກິດ. ພ້ອມກັນນັ້ນ ສະພາແຫ່ງຊາດໃຫ້ຄວາມສົນໃຈກັບການເຮັດໃຫ້ເປັນກົດໝາຍພາຍໃນ, ທົບທວນ ແກ້ໄຂ ແລະ ເສີມກົດລະບຽບທາງກົດໝາຍທີ່ກ່ຽວຂ້ອງ ເພື່ອຮັບປະກັນວ່າ ກົດໝາຍລະບົບກົດໝາຍຂອງຊາດ ສອດຄ່ອງກັບສົນທິສັນຍາສາກົນ, ໂດຍສະເພາະແມ່ນ ບັນດາສັນຍາການຄ້າເສລີຮຸ່ນໃໝ່ທີ່ຫວຽດນາມເປັນສະມາຊິກ ເຊັ່ນ ກົດໝາຍແກ້ໄຂແລະເພີ່ມເຕີມບາງມາດຕາຂອງກົດໝາຍຊັບສິນທາງປັນຍາ; ກົດໝາຍທຸລະກິດປະກັນໄພ; ກົດໝາຍວ່າດ້ວຍຮູບເງົາ; ກົດໝາຍວ່າດ້ວຍການເຂົ້າອອກຂອງພົນລະເມືອງຫວຽດນາມ; ກົດໝາຍວ່າດ້ວຍການເຂົ້າອອກ ການຜ່ານແດນ ແລະ ການຢູ່ອາໄສ ຂອງຄົນຕ່າງປະເທດໃນຫວຽດນາມ; ກົດໝາຍວ່າດ້ວຍການປ້ອງກັນ ແລະ ຕ້ານການຟອກເງິນ; ກົດໝາຍວ່າດ້ວຍໂທລະຄົມມະນາຄົມ; ກົດໝາຍວ່າດ້ວຍທຸລະກຳທາງເອເລັກໂຕຣນິກ; ກົດໝາຍວ່າດ້ວຍສະຖາບັນສິນເຊື່ອ; ກົດໝາຍວ່າດ້ວຍທີ່ດິນ; ກົດໝາຍວ່າດ້ວຍທີ່ຢູ່ອາໄສ...
ການປະຕິບັດມະຕິຂອງສະພາແຫ່ງຊາດໃນຂົງເຂດການຕ່າງປະເທດ, ສະພາແຫ່ງຊາດໄດ້ຍູ້ແຮງການຕິດຕາມກວດກາ ການຜັນຂະຫຍາຍນະໂຍບາຍແລະກົດໝາຍ ວ່າດ້ວຍການຕ່າງປະເທດ ແລະການເຊື່ອມໂຍງສາກົນ; ປະສານງານກັບສະພາແຫ່ງຊາດຂອງບາງປະເທດ ເພື່ອຜັນຂະຫຍາຍກົນໄກການຕິດຕາມແລະສຳຫຼວດ ເຊັ່ນ ການຈັດຕັ້ງຄະນະກຳມະການຄວາມຮ່ວມມືລະຫວ່າງລັດຖະສະພາ ກັບສະພາດູມາແຫ່ງລັດລັດເຊຍ (ຈັດກອງປະຊຸມໃນປີ 2020 ແລະປີ 2023) ເພື່ອທົບທວນການປະຕິບັດຂໍ້ຕົກລົງລະຫວ່າງສອງປະເທດ, ຜ່ານນັ້ນ ຊຸກຍູ້ແລະສະໜັບສະໜູນການພົວພັນຮ່ວມມືລະຫວ່າງສອງປະເທດ ເພື່ອໃຫ້ບັນລຸຜົນສູງສຸດ; ຈັດຕັ້ງຄະນະສຳຫຼວດພາກສະໜາມຮ່ວມກັນໃນເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ຮ່ວມກັບສະພາແຫ່ງຊາດລາວ ແລະ ສະພາແຫ່ງຊາດກຳປູເຈຍ (ປີ 2023). ພ້ອມກັນນັ້ນ, ທຸກປີ, ສະພາແຫ່ງຊາດຈະພິຈາລະນາລາຍງານຂອງລັດຖະບານກ່ຽວກັບສະພາບການໂລກ ແລະວຽກງານການຕ່າງປະເທດຂອງພັກແລະລັດ ເພື່ອປະເມີນແລະເຈາະເລິກການປະເມີນຂອງລັດຖະບານກ່ຽວກັບສະຖານະການໂລກແລະພາກພື້ນ, ຜົນຂອງວຽກງານການຕ່າງປະເທດຂອງພັກແລະລັດ, ໂດຍເນັ້ນບົດບາດແລະປະສິດທິຜົນ ຂອງການເຄື່ອນໄຫວການຕ່າງປະເທດຂອງສະພາແຫ່ງຊາດ ໃນວຽກງານການຕ່າງປະເທດໂດຍລວມຂອງປະເທດ.
ການປະຕິບັດໜ້າທີ່ຕັດສິນບັນຫາສຳຄັນໃນຂົງເຂດການຕ່າງປະເທດ, ສະພາແຫ່ງຊາດໄດ້ໃຫ້ສັດຕະຍາບັນ ແລະ ຕັດສິນໃຈເຂົ້າຮ່ວມບັນດາສົນທິສັນຍາສຳຄັນກ່ຽວກັບອະທິປະໄຕຂອງຊາດ, ຊາຍແດນ, ອານາເຂດ ແລະ ຖານະເປັນສະມາຊິກຂອງຫວຽດນາມ ໃນບັນດາອົງການສາກົນ, ສິດທິມະນຸດ, ສິດແລະພັນທະພື້ນຖານ ຂອງພົນລະເມືອງ, ປະກອບສ່ວນທີ່ສຳຄັນໃນການເຊື່ອມໂຍງເຂົ້າກັບສາກົນ ແລະການຄຸ້ມຄອງການຕ່າງປະເທດຂອງປະເທດ, ຫັນຄຳໝັ້ນສັນຍາສາກົນເປັນກົດໝາຍພາຍໃນ. ພິເສດ, ສະພາແຫ່ງຊາດສຸມໃສ່ການພິຈາລະນາ ປຶກສາຫາລື ແລະ ອະນຸມັດ ສັນຍາການຄ້າເສລີຮຸ່ນໃໝ່ທີ່ມີອັດຕາສູງ ເຊັ່ນ ສັນຍາຄູ່ຮ່ວມມືຮອບດ້ານແລະກ້າວໜ້າຂ້ານປາຊີຟິກ (CPTPP), ສັນຍາການຄ້າເສລີສະຫະພາບເອີຮົບ - ຫວຽດນາມ (EVFTA), ສັນຍາປົກປ້ອງການລົງທຶນ ຫວຽດນາມ - ສະຫະພາບເອີຮົບ (EVIPA)…; ຢືນຢັນຄວາມຮັບຜິດຊອບ ແລະຄວາມຕັດສິນໃຈ ຂອງຫວຽດນາມ ໃນການເຊື່ອມໂຍງສາກົນ, ໂດຍສະເພາະ ການເຊື່ອມໂຍງເສດຖະກິດສາກົນ, ຊ່ວຍສ້າງຄວາມຫຼາກຫຼາຍໃຫ້ກັບຕະຫຼາດຂອງຫວຽດນາມ, ສ້າງແຮງຜັກດັນໃນການເຊື່ອມໂຍງເສດຖະກິດສາກົນ ແລະການຟື້ນຟູເສດຖະກິດໃນປະເທດ ພາຍຫຼັງການແຜ່ລະບາດຂອງພະຍາດໂຄວິດ-19.
ຜັນຂະຫຍາຍການເຄື່ອນໄຫວການທູດຂອງສະພາແຫ່ງຊາດ, ສະພາແຫ່ງຊາດໄດ້ສ້າງເຄື່ອງໝາຍທີ່ໂດດເດັ່ນໄວ້ຫຼາຍປະການ ໂດຍມີຄວາມເປັນເຈົ້າການ ຄວາມຕັ້ງໜ້າ ແລະ ຄວາມຍືດຫຍຸ່ນ ໃນການປັບຕົວໃຫ້ເຂົ້າກັບທຸກເງື່ອນໄຂ ແລະສະຖານະການ. ເມື່ອເລີ່ມຕົ້ນສະໄໝສະພາແຫ່ງຊາດຊຸດທີ XV, ປະເຊີນກັບຄວາມທ້າທາຍທີ່ບໍ່ເຄີຍເກີດຂຶ້ນມາກ່ອນ ຈາກການແຜ່ລະບາດຂອງພະຍາດໂຄວິດ-19, ການເຄື່ອນໄຫວການຕ່າງປະເທດຂອງສະພາແຫ່ງຊາດຍັງຄົງດຳເນີນຢູ່ຢ່າງສະໝ່ຳສະເໝີ ແລະ ດຳເນີນໄປຢ່າງມີຊີວິດຊີວາຫຼາຍ ທັງໃນລະດັບທະວິພາຄີແລະພະຫຸພາຄີ. ຖ້າເປົ້າໝາຍຕົ້ນຕໍຂອງການຕ່າງປະເທດໃນປີ 2021 ແມ່ນການທູດດ້ານວັກແຊງ, ວຽກງານການຕ່າງປະເທດຈຸດສຸມໃນປີ 2022 ແລະປີ 2023 ແມ່ນໜູນຊ່ວຍການຟື້ນຟູ ແລະການພັດທະນາເສດຖະກິດ-ສັງຄົມຂອງປະເທດ. ການແກ້ໄຂບັນຫາຄວາມສຳພັນທາງເສດຖະກິດກັບຄູ່ຮ່ວມຕ້ອງຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ, ສອດຄ່ອງກັບຜົນປະໂຫຍດທີ່ຖືກກົດໝາຍແລະຊອບທຳຂອງຄູ່ຮ່ວມມື ແລະ ປົກປ້ອງຜົນປະໂຫຍດທີ່ຊອບດ້ວຍກົດໝາຍຂອງລັດ ວິສາຫະກິດ ແລະ ປະຊາຊົນ, ຍູ້ແຮງການທູດທາງເສດຖະກິດ ເພື່ອຮັບໃຊ້ການພັດທະນາ, ໃຫ້ຜູ້ຄົນແລະວິສາຫະກິດເປັນສູນກາງ, ເສີມຂະຫຍາຍປະສິດທິຜົນຂອງຊ່ອງທາງການທູດຂອງສະພາແຫ່ງຊາດ, ຍູ້ແຮງຂະບວນການຂອງປະເທດຕ່າງໆທີ່ໃຫ້ສັດຕະຍາບັນສັນຍາການຄ້າແລະການລົງທຶນ, ເປີດໂອກາດທີ່ດີໃຫ້ວິສາຫະກິດເຂົ້າເຖິງແລະຄອບງຳຕະຫຼາດລະຫວ່າງປະເທດ.
ການເຄື່ອນໄຫວການຕ່າງປະເທດສອງຝ່າຍ ຂອງສະພາແຫ່ງຊາດດຳເນີນໄປຢ່າງແຂງຂັນ ແລະມີປະສິດທິຜົນ, ໂດຍເນັ້ນໜັກທີ່ການພົວພັນກັບປະທດເພື່ອນບ້ານ; ລົງເລິກ ແລະ ຮັດແໜ້ນການພົວພັນກັບບັນດາປະເທດຄູ່ຮ່ວມມືຍຸດທະສາດ; ຊຸກຍູ້ການພົວພັນກັບຄູ່ຮ່ວມມື ແລະ ເພື່ອນມິດທີ່ເປັນມູນເຊື້ອ; ເພີ່ມຄວາມໄວ້ວາງໃຈກັບຄູ່ຮ່ວມງານອື່ນໆ. ໂດຍສະເພາະ, ຜ່ານການເຄື່ອນໄຫວວຽກງານການຕ່າງປະເທດຂອງບັນດາການນຳສະພາແຫ່ງຊາດ ນັບແຕ່ຕົ້ນອາຍຸການມາຮອດປະຈຸບັນ, ໃນນັ້ນ ມີການຢ້ຽມຢາມຢ່າງເປັນທາງການທີ່ປະເທດໂອຕຣິກ, ແບນຊິກ ແລະ ສະຫະພາບເອີຣົບ (EU)/ ສະພາເອີຣົບ (EP), ແຟງລັງ; ສ.ເກົາຫຼີ, ອິນເດຍ; ລາວ; ຮົງກາລີ, ອັງກິດ; ກູບາ, ອາກຊັງຕີນ, ອູຣູກວາຍ; ອິນໂດເນເຊຍ, ອີຣ່ານ; ບັງກລາເທດ ແລະ ບູນກາຣີ; ລາວ ແລະ ໄທ; ແອັດສະປາຍ, ປອກຕູຍການ ແລະ ແບນຊິກ, ສະພາເອີຣົບ; ກຽດກິດສະຖານ ແລະ ກາຊັກສະຖານ; ສ.ເກົາຫຼີ; ຊີລີ ແລະ ເມັກຊິກ. ພ້ອມກັນນັ້ນ, ບັນດາການເຄື່ອນໄຫວແລກປ່ຽນຄະນະຜູ້ແມນ, ກາພົບປະລະດັບຄະນະກຳມະການ, ກຸ່ມສະມາຊິກສະພາແຫ່ງຊາດທີ່ເປັນມິດ, ສະມາຊິກສະພາແຫ່ງຊາດຍິງ ແລະ ຜູ້ແທນສະພາແຫ່ງຊາດໜຸ່ມ ກໍ່ເກີດຂຶ້ນຢ່າງຟົດຟື້ນ. ສາມາດເຫັນໄດ້ວ່າ, ການເຄື່ອນໄຫວການຕ່າງປະເທດຂອງສະພາແຫ່ງຊາດ ໄດ້ດຳເນີນໄປໂດຍມີເນື້ອໃນກວມລວມຫຼາຍດ້ານ ທີ່ກ່ຽວຂ້ອງກັບພາລະບົດບາດແລະໜ້າທີ່ ຂອງສະພາແຫ່ງຊາດ; ມີຫຼາຍຮູບແບບທີ່ອຸດົມສົມບູນ, ປະສົມປະສານໂດຍກົງກັບອອນໄລ, ທະວິພາຄີປະສົມປະສານກັບພະຫຸພາຄີ; ມີຫຼາຍອັດຕະພາບແລະຄູ່ຮ່ວມທີ່ຫຼາກຫຼາຍ ບໍ່ພຽງແຕ່ລະຫວ່າງອົງການນິຕິບັນຍັດເທົ່ານັ້ນ ແຕ່ຍັງລວມທັງອົງການບໍລິຫານ ຕຸລາການ ແລະທ້ອງຖິ່ນອີກນຳ; ຕາມທິດທາງຂອງການຂະຫຍາຍ ແລະຊຸກຍູ້ການພົວພັນຮ່ວມມືທາງສະພາແຫ່ງຊາດ ໃນທາງເລິກ ໝັ້ນຄົງ ແລະຍືນຍົງ ກັບປະເທດອື່ນໆ, ໃຫ້ບຸລິມະສິດກັບຄູ່ຮ່ວມມືທີ່ມີການພົວພັນພິເສດ, ຄູ່ຮ່ວມມືຍຸດທະສາດ ແລະປະເທດເພື່ອນມິດດັ້ງເດີມ, ລວມທັງການຮ່ວມມືທາງສະພາແຫ່ງຊາດ ກັບຫຼາຍປະເທດທີ່ສຳຄັນ ເຊັ່ນ ຈີນ, ລາວ, ກຳປູເຈຍ, ລັດເຊຍ, ສະຫະລັດອາເມລິກາ, ຍີ່ປຸ່ນ, ອິນເດຍ, ສ.ເກົາຫຼີ, ກູບາ, ຝຣັ່ງ... ໄດ້ຮັບການປະເມີນວ່າເປັນຈຸດສະຫວ່າງ, ຕົ້ນແບບໃນການພົວພັນທະວິພາຄີ; ປະກອບສ່ວນສຳຄັນໃນການປົກປ້ອງແລະສົ່ງເສີມຜົນປະໂຫຍດຫຼັກຂອງຫວຽດນາມ; ເສີມຂະຫຍາຍບົດບາດຂອງສະພາແຫ່ງຊາດໃນການປັບປຸງສະຖາບັນໃຫ້ສົມບູນແບບ, ການຫັນຄຳໝັ້ນສັນຍາສາກົດເປັນຮູບປະທຳ, ປະກອບສ່ວນປະຕິບັດແນວທາງການຕ່າງປະເທດຂອງພັກຢ່າງສຳເລັດຜົນ ແລະ ສະໜັບສະໜູນການພັດທະນາເສດຖະກິດ-ສັງຄົມຂອງປະເທດ.
ມີຂໍ້ຕົກລົງສາກົນຫຼາຍສະບັບໃໝ່/ສະບັບລົງນາມໃໝ່ ລະຫວ່າງສະພາແຫ່ງຊາດຫວຽດນາມ ແລະລັດຖະສະພາປະເທດອື່ນໆ. ພິເສດ, ສັນຍາຮ່ວມມືທີ່ລົງນາມພ້ອມກັນກັບທັງສະພາສູງ ແລະສະພາຜູ້ແທນລາຊະດອນ ຂອງຫຼາຍປະເທດ (ເຊັ່ນ: ໂອສະຕຣາລີ, ອູຣູກວາຍຕາເວັນອອກ, ແບນຊິກ) ຖືເປັນພື້ນຖານສຳຄັນໃນການສືບຕໍ່ສົ່ງເສີມການຮ່ວມມືທີ່ມີປະສິດທິຜົນແລະແທດຈິງ ລະຫວ່າງສະພາແຫ່ງຊາດ ແລະ ໜ່ວຍງານຂອງສະພາແຫ່ງຊາດຫວຽດນາມ ກັບລັດຖະສະພາ /ສະພາແຫ່ງຊາດຂອງປະເທດອື່ນ; ພ້ອມກັນນັ້ນ, ຊຸກຍູ້ເພີ່ມທະວີການແລກປ່ຽນແລະການຮ່ວມມື ໃນບັນດາເວທີປາໄສລັດຖະສະພາພາກພື້ນ ແລະໂລກ. ການທູດແບບລັດຖະສະພາກໍ່ໄດ້ຊຸກຍູ້ການທູດທາງເສດຖະກິດຕາມເຈດຕະນາລົມຂອງຄຳສັ່ງໝາຍເລກ 15-CT/TW ລົງວັນທີ 10 ສິງຫາ 2022 ຂອງຄະນະເລຂາທິການສູນກາງ “ວ່າດ້ວຍການທູດທາງເສດຖະກິດ ເພື່ອຮັບໃຊ້ການພັດທະນາປະເທດເຖິງປີ 2030”, ປະກອບສ່ວນຊຸກຍູ້ການເຕີບໂຕທາງການຄ້າ ແລະດຶງດູດການລົງທຶນຈາກຕ່າງປະເທດ, ສະແດງໃຫ້ເຫັນຜ່ານເວທີປາໄສກ່ຽວກັບກົດໝາຍແລະນະໂຍບາຍສົ່ງເສີມການຄ້າ ແລະການລົງທຶນ ໃນໂອກາດທີ່ປະທານສະພາແຫ່ງຊາດຫວຽດນາມຢ້ຽມຢາມຕ່າງປະເທດຢ່າງເປັນທາງການ.
ການເຄື່ອນໄຫວການທູດແບບລັດຖະສະພາພະຫຸພາຄີ ຂອງສະພາແຫ່ງຊາດໄດ້ຮັບການຜັນຂະຫຍາຍຢ່າງຕັ້ງໜ້າ. ພາຍໃນກອບກົນໄກການຮ່ວມມືລັດຖະສະພາພະຫຸພາຄີ ເຊັ່ນ ສະຫະພາບລັດຖະສະພາລະຫວ່າງປະເທດ (IPU), ສະມັດຊາລັດຖະສະພາອາຊຽນ (AIPA), ເວທີປາໄສລັດຖະສະພາອາຊີ-ປາຊີຟິກ (APPF), ສະຫະພາບລັດຖະສະພາປະເທດໃຊ້ພາສາຝຣັ່ງ (APF), ກອງປະຊຸມຄູ່ຮ່ວມມືລັດຖະສະພາອາຊີ-ເອີຣົບ (ASEP), ສະພາແຫ່ງຊາດຫວຽດນາມໄດ້ເຂົ້າຮ່ວມຢ່າງຕັ້ງໜ້າແລະມີຄວາມຮັບຜິດຊອບ, ມີສ່ວນຮ່ວມໃນຄວາມຄິດລິເລີ່ມ ທີ່ເປັນເຈົ້າການແລະສຳຄັນຫຼາຍຢ່າງ, ສ້າງການປ່ຽນແປງທີ່ສຳຄັນໃນການເຄື່ອນໄຫວຂອງອົງການເຫຼົ່ານີ້, ຍົກລະດັບຫວຽດນາມຈາກ “ການເຂົ້າຮ່ວມຢ່າງຕັ້ງໜ້າ” ເປັນ “ການມີສ່ວນຮ່ວມຢ່າງແຂງຂັນໃນການສ້າງ ແລະການກຳນົດກົດທົ່ວໄປຂອງເກມ”, ປະກອບສ່ວນໃນການປົກປ້ອງແລະສົ່ງເສີມຜົນປະໂຫຍດຍຸດທະສາດດ້ານຄວາມໝັ້ນຄົງ ແລະການພັດທະນາຂອງຫວຽດນາມ ຢ່າງມີປະສິດທິຜົນ. ການເຂົ້າຮ່ວມຢ່າງຕັ້ງໜ້າ ໃນບັນດາເວທີປາໄສລັດຖະສະພາ ຄວບຄູ່ໄປກັບບັນດາເວທີປາໄສສາກົນຂອງລັດຖະບານ ເຊັ່ນ IPU - ສະຫະປະຊາຊາດ, AIPA - ອາຊຽນ, APPF - APEC, APF - OIF ສະແດງໃຫ້ເຫັນຢ່າງຈະແຈ້ງເຖິງການຮ່ວມເດີນທາງຂອງສະພາແຫ່ງຊາດຫວຽດນາມ ໃນບັນດາບັນຫາລະດັບພາກພື້ນແລະລະດັບໂລກ.
ປະທານຄະນະກຳມາທິການການຕ່າງປະເທດ 3 ທ່ານ ຂອງສະພາແຫ່ງຊາດ ກຳປູເຈຍ - ລາວ - ຫວຽດນາມ ລົງນາມບົດບັນທຶກການເຮັດວຽກ ທີ່ກອງປະຊຸມປຶກສາຫາລື _ພາບ: TTXVN
ຈຸດເດັ່ນສຳຄັນທີ່ສະແດງໃຫ້ເຫັນເຖິງຄວາມເປັນເຈົ້າການ, ຄວາມຕັ້ງໜ້າ ແລະ ຄວາມຮັບຜິດຊອບ ຂອງສະພາແຫ່ງຊາດຫວຽດນາມ ໃນເວລາທີ່ຜ່ານມາມໍ່ນີ້ແມ່ນ ການເປັນເຈົ້າພາບແລະຈັດຕັ້ງກອງປະຊຸມໃຫຍ່ IPU ຄັ້ງທີ 132 (2015) ທີ່ປະສົບຄວາມສຳເລັດ ດ້ວຍການຮັບຮອງເອົາຖະແຫຼງການຮ່າໂນ້ຍ ກ່ຽວກັບ “ການຫັນຄຳເວົ້າເປັນການກະທຳ, ບົດບາດຂອງລັດຖະສະພາໃນເປົ້າໝາຍການພັດທະນາແບບຍືນຍົງ”, ກອງປະຊຸມ APPF 26 ພ້ອມການຮັບຮອງເອົາຖະແຫຼງການຮ່າໂນ້ຍ ກ່ຽວກັບ “ວິໄສທັດໃໝ່ສຳລັບການພົວພັນຄູ່ຮ່ວມມືລັດຖະສະພາ ອາຊີ-ປາຊີຟິກ”. ກອງປະຊຸມວິຊາການລະດັບພາກພື້ນອາຊີ-ປາຊີຟິກ ວ່າດ້ວຍການປ່ຽນແປງສະພາບອາກາດ ແລະເປົ້າໝາຍການພັດທະນາທີ່ຍືນຍົງ (ປີ 2017), ກອງປະຊຸມທົ່ວປະເທດກ່ຽວກັບການຍົກສູງບົດບາດຂອງສະພາແຫ່ງຊາດໃນເເປົ້າໝາຍການພັດທະນາທີ່ຍືນຍົງ (ປີ 2018). ໂດຍສະເພາະ ໃນປີ 2019, ສະພາແຫ່ງຊາດຫວຽດນາມເຂົ້າຮັບຕຳແໜ່ງປະທານ AIPA ໄດ້ສຳເລັດ ແລະ ແລະໄດ້ຈັດຕັ້ງກອງປະຊຸມໃຫຍ່ສະມັດຊາ AIPA ຄັ້ງທີ 41 ແລະ ກອງປະຊຸມທີ່ກ່ຽວຂ້ອງຢ່າງສຳເລັດຜົນ. ໃນປີ 2023, ສະພາແຫ່ງຊາດຫວຽດນາມເປັນເຈົ້າພາບກອງປະຊຸມກຸ່ມທີ່ປຶກສາ AIPA ຄັ້ງທີ 14 ໃນຫົວຂໍ້ “ການສົ່ງເສີມການປ່ຽນແປງໃໝ່ປະດິດສ້າງ, ການຖ່າຍທອດ, ການປະຍຸກໃຊ້ ແລະ ການພັດທະນາວິທະຍາສາດແລະເຕັກໂນໂລຊີ ເພື່ອຮັບໃຊ້ການເຕີບໂຕແລະການພັດທະນາແບບຍືນຍົງ”, ກອງປະຊຸມສະມາຊິກລັດຖະສະພາໜຸ່ມທົ່ວໂລກຄັ້ງທີ 9 ຂອງ IPU (ເດືອນກັນຍາ 2023) ພາຍໃຕ້ຫົວຂໍ້ “ບົດບາດຂອງເຍົາວະຊົນໃນການສົ່ງເສີມການປະຕິບັດບັນດາເປົ້າໝາຍການພັດທະນາທີ່ຍືນຍົງ, ຜ່ານການປ່ຽນແປງດິຈິຕອນ ແລະການປ່ຽນແປງໃໝ່ປະດິດສ້າງ”. ເປັນຄັ້ງທຳອິດທີ່ກອງປະຊຸມສະມາຊິກລັດຖະສະພາໜຸ່ມທົ່ວໂລກ ໄດ້ຮັບຮອງເອົາຖະແຫຼງການຫຼັງກອງປະຊຸມ 8 ຄັ້ງ, ເຊິ່ງເປັນຄຳຮຽກຮ້ອງທາງດ້ານການເມືອງລະດັບສູງ ແລະ ຄວາມມຸ່ງໝັ້ນອັນໜັກແໜ້ນຂອງບັນດາສະມາຊິກລັດຖະສະພາໜຸ່ມ ໃນການສົ່ງເສີມບົດບາດຂອງຊາວໜຸ່ມໃນການປະຕິບັດບັນດາເປົ້າໝາຍການພັດທະນາແບບຍືນຍົງ ຂອງສະຫະປະຊາຊາດ (SDGs). ຄວາມສຳເລັດຂອງກອງປະຊຸມກໍ່ໄດ້ປະກອບສ່ວນຢືນຢັນການເຂົ້າຮ່ວມຂອງຫວຽດນາມໃນ IPU ຢ່າງແຂງຂັນ ມີຄວາມຮັບຜິດຊອບ ແລະ ເປັນເຈົ້າການ; ພ້ອມກັນນັ້ນ, ຍັງສະແດງໃຫ້ເຫັນເຖິງຄວາມເອົາໃຈໃສ່ເປັນພິເສດ ຂອງຫວຽດນາມຕໍ່ຊາວໜຸ່ມ ແລະບັນຫາທົ່ວໂລກຂອງຊາວໜຸ່ມໃນປະຈຸບັນ; ສົ່ງເສີມຜົນປະໂຫຍດຂອງຫວຽດນາມຜ່ານຊ່ອງທາງລັດຖະສະພາ, ຕອບສະໜອງຄວາມຕ້ອງການພັດທະນາແລະທ່າອ່ຽງການພັດທະນາໃນໄລຍະໃໝ່, ໃນນັ້ນມີການປ່ຽນແປງທາງດິຈິຕອນ, ການປ່ຽນແປງໃໝ່ປະດິດສ້າງ ແລະການພັດທະນາແບບຍືນຍົງ. ກອງປະຊຸມຄັ້ງນີ້ຍັງເປັນໂອກາດໃນການສົ່ງເສີມ ແລະໂຄສະນາເຜີຍແຜ່ຢ່າງກວ້າງຂວາງ ເຖິງເພື່ອນມິດສາກົນກ່ຽວກັບປະເພນີວັດທະນະທຳ, ປະເທດ, ປະຊາຊົນ, ນະໂຍບາຍການຕ່າງປະເທດ ແລະ ບັນດາຜົນງານໃນການພັດທະນາເສດຖະກິດ-ສັງຄົມຂອງຫວຽດນາມ; ພ້ອມກັນນັ້ນ ຍັງເປັນໂອກາດໃນການເພີ່ມທະວີການພົວພັນທາງການທູດ ລະຫວ່າງຫວຽດນາມກັບບັນດາຄູ່ຮ່ວມທີ່ສຳຄັນ, ໂດຍສະເພາະ ສະມາຊິກລັດຖະສະພາ ແລະຜູ້ນຳຮຸ່ນໃໝ່ຂອງປະເທດຕ່າງໆ; ໃຊ້ປະໂຫຍດຈາກການສະໜັບສະໜູນຂອງສະຫະພາບລັດຖະສະພາລະຫວ່າງປະເທດ ແລະ ລັດຖະສະພາສະມາຊິກ ເພື່ອພາລະກິດການກໍ່ສ້າງ ປົກປັກຮັກສາ ແລະ ພັດທະນາປະເທດຫວຽດນາມ.
ເດືອນທັນວາ 2023, ກອງປະຊຸມສຸດຍອດສະພາແຫ່ງຊາດຄັ້ງທຳອິດຂອງ 3 ປະເທດ ກຳປູເຈຍ-ລາວ-ຫວຽດນາມ ຈັດຂຶ້ນທີ່ປະເທດລາວ ໂດຍມີຫົວຂໍ້ຫຼັກ “ການເພີ່ມທະວີບົດບາດຂອງສະພາແຫ່ງຊາດໃນການຊຸກຍູ້ການຮ່ວມມືຢ່າງຮອບດ້ານ ລະຫວ່າງ ກຳປູເຈຍ, ລາວ, ຫວຽດນາມ”. ການຈັດຕັ້ງກົນໄກການປະຊຸມສຸດຍອດສະພາແຫ່ງຊາດ 3 ປະເທດ ຖືເປັນກ້າວສຳຄັນໃນການບັນລຸຜົນສຳເລັດໃນການປະຊຸມລະດັບສູງ ຂອງຫົວໜ້າທັງສາມພັກ ກຳປູເຈຍ-ລາວ-ຫວຽດນາມ ໃນເດືອນກັນຍາ 2021. ກອງປະຊຸມສຸດຍອດສະພາແຫ່ງຊາດ 3 ປະເທດຄັ້ງທຳອິດທີ່ຈັດຂຶ້ນໃນປະເທດລາວ ຖືເປັນເຫດການສຳຄັນໃນປະຫວັດສາດຂອງການຮ່ວມມື ລະຫວ່າງສະພາແຫ່ງຊາດກຳປູເຈຍ-ລາວ-ຫວຽດນາມ, ເຊິ່ງຂີດໝາຍການຍົກລະດັບການຮ່ວມມືລະຫວ່າງອົງການນິຕິບັນຍັດຂອງສາມປະເທດສູ່ລະດັບສູງສຸດ. ນີ້ກໍ່ແມ່ນຂີດໝາຍສຳເລັດການສ້າງກົນໄກການຮ່ວມມືໃນລະດັບສູງສຸດລະຫວ່າງ 3 ປະເທດໃນທັງ 3 ຊ່ອງທາງຂອງພັກ, ນິຕິບັນຍັດ ແລະ ບໍລິຫານ, ດັ່ງທີ່ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ເນັ້ນໜັກວ່າ ຄືກັບຄຽງສາມຂາທີ່ແຂງແຮງ, ປະກອບສ່ວນປັບປຸງແລະເພີ່ມທະວີການພົວພັນທີ່ເປັນມູນເຊື້ອ, ຄວາມສາມັກຄີພິເສດ, ຄວາມຜູກພັນ ແລະຊ່ວຍເຫຼືອເຊິ່ງກັນແລະກັນລະຫວ່າງສາມພັກ, ລັດ ແລະ ປະຊາຊົນສາມປະເທດ. ສິ່ງດັ່ງກ່າວຍັງຢັ້ງຢືນຄວາມຕັດສິນໃຈຂອງສາມອົງການນິຕິບັນຍັດ ໃນການເພີ່ມທະວີການຮ່ວມມື ແລະການພົວພັນຮ່ວມມືລັດຖະສະພາຂອງ 3 ປະເທດໃຫ້ເລິກເຊິ່ງກວ່າອີກ, ປະກອບສ່ວນນຳຜົນປະໂຫຍດຕົວຈິງມາສູ່ປະຊາຊົນຂອງແຕ່ລະປະເທດ.
ຄຽງຄູ່ກັນນັ້ນ, ໃນເວທີປາໄສຂອງສະຫະພາບລັດຖະສະພາປະເທດໃຊ້ພາສາຝຣັ່ງ (APF), ສະພາແຫ່ງຊາດຫວຽດນາມເຄີຍດຳລົງຕຳແໜ່ງຮອງປະທານຂອງ APF (ໃນວາລະປີ 2007-2009, 2009-2011 ແລະ 2019-2021). ການເຂົ້າຮ່ວມໃນກົນໄກການນຳຂອງອົງການລະຫວ່າງລັດຖະສະພາໃນພາກພື້ນ ເຊັ່ນ ຄະນະບໍລິຫານຂອງ APPF ແລະ APF ສະແດງໃຫ້ເຫັນເຖິງຄວາມໄວ້ວາງໃຈ ແລະການສະໜັບສະໜູນຂອງສະພາແຫ່ງຊາດຂອງປະເທດຕ່າງໆ ຕໍ່ສະພາແຫ່ງຊາດຫວຽດນາມ, ຢືນຢັນບົດບາດຂອງສະພາແຫ່ງຊາດໃນການພົວພັນສາກົນ, ເປີດກວ້າງການພົວພັນຕ່າງປະເທດ ແລະ ເຊື່ອມໂຍງເຂົ້າກັບສາກົນ.
ດ້ວຍການກຽມເນື້ອໃນຢ່າງຮອບຄອບແລະຖີ່ຖ້ວນ, ການເຂົ້າຮ່ວມຢ່າງແຂງຂັນແລະມີຄວາມຮັບຜິດຊອບ, ເປັນເຈົ້າການໃນການສະເໜີຄວາມຄິດລິເລິ່ມ ແລະຂໍ້ສະເໜີແນະທີ່ສ້າງສັນ, ການເຂົ້າຮ່ວມຂອງສະພາແຫ່ງຊາດຫວຽດນາມໃນບັນດາເວທີປາໄສລະຫວ່າງສະພາແຫ່ງຊາດລະດັບພາກພື້ນ ແລະສາກົນ, ປະກອບສ່ວນສຳຄັນໃນການສົ່ງເສີມປະສິດທິຜົນຂອງເວທີປາໄສເຫຼົ່ານີ້ ແລະ ໄດ້ຮັບການຍົກຍ່ອງຢ່າງສູງ ຈາກສະພາແຫ່ງຊາດຂອງປະເທດອື່ນໆ. ການເຂົ້າຮ່ວມຂອງຄະນະຜູ້ແທນຫວຽດນາມ ໄດ້ຮັບປະກັນການປະຕິບັດບັນດາຂໍ້ກຳນົດດ້ານການເມືອງທີ່ສະເໜີດ້ວຍຄຳຂວັນທີ່ແທດຈິງ ແລະ ມີປະສິດທິຜົນ, ຮັບປະກັນຜົນປະໂຫຍດຂອງຊາດ, ຮັກສາຫຼັກໝັ້ນ ແລະຫຼັກການຂອງຫວຽດນາມ, ພ້ອມກັນນັ້ນ ກໍ່ມີຄວາມຍືດຫຍຸ່ນ ສອດຄ່ອງກັບຜົນປະໂຫຍດຮ່ວມກັນຂອງພາກພື້ນ, ຜ່ານນັ້ນໄດ້ຮັບການສະໜັບສະໜູນຢ່າງສູງຈາກປະເທດຕ່າງໆ. ການເຄື່ອນໄຫວການທູດລັດຖະສະພາພະຫຸພາຄີ ຂອງສະພາແຫ່ງຊາດຫວຽດນາມ ໄດ້ປະກອບສ່ວນຢືນຢັນບາດກ້າວໃໝ່ທີ່ສຳຄັນ ໃນການທູດຂອງສະພາແຫ່ງຊາດຫວຽດນາມ ແລະຂະບວນການປະຕິບັດແຜນນະໂຍບາຍການເຊື່ອມໂຍງຢ່າງເປັນເຈົ້າການເຂົ້າກັບພາກພື້ນຂອງຫວຽດນາມ, ຕັ້ງໜ້າປະກອບສ່ວນປະຕິບັດບັນດານະໂຍບາຍ ແລະແນວທາງການຕ່າງປະເທດຂອງພັກ ແລະ ລັດ ໃຫ້ປະສົບຜົນສຳເລັດ, ຍົກສູງທີ່ຕັ້ງຂອງຫວຽດນາມ ໃນເວທີສາກົນ.
ດ້ວຍຈິດໃຈແຫ່ງຄວາມຮັບຜິດຊອບ, ຄວາມເປັນເຈົ້າການ, ຄວາມເດັດດ່ຽວ, ການຊີ້ນຳບໍລິຫານ ແລະ ການເຂົ້າຮ່ວມໂດຍກົງຂອງທ່ານປະທານສະພາແຫ່ງຊາດ, ບັນດາຮອງປະທານສະພາແຫ່ງຊາດ ແລະ ສະມາຊິກຄະນະປະຈຳສະພາແຫ່ງຊາດ; ຄວາມເປັນເອກະພາບໃນການຄຸ້ມຄອງກິດຈະກຳການຕ່າງປະເທດໂດຍມີບົດບາດເປັນສູນກາງ ຂອງຄະນະກຳມະການການຕ່າງປະເທດ, ການເຄື່ອນໄຫວການຕ່າງປະເທດຂອງສະພາຫ່ງຊາດໄດ້ຮັບການຜັນຂະຫຍາຍຢ່າງຮອບດ້ານ ສອດຄ່ອງກັນ ແລະສະໝ່ຳສະເໝີ; ເສີມຂະຫຍາຍລັກສະນະສະເພາະ ແລະ “ກຳລັງອ່ອນ” ຂອງການທູດລັດຖະສະພາ, ສົມທົບກັນຢ່າງແໜ້ນແຟ້ນກັບການທູດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ, ບັນລຸໝາກຜົນທີ່ສຳຄັນຫຼາຍຢ່າງ ເຊິ່ງມີສ່ວນໃນການຖ່າຍທອດຂໍ້ຄວາມທີ່ເຂັ້ມແຂງກ່ຽວກັບພາບພົດຂອງສະພາແຫ່ງຊາດຫວຽດນາມ ທີ່ມີຫົວຄິດປະດິດສ້າງ, ຂະຫຍັນຂັນເຄື່ອນ ແລະ ມຸ່ງເນັ້ນການປະຕິບັດ, ເພີ່ມທະວີຄວາມເຂົ້າໃຈຂອງນັກການເມືອງ ແລະ ປະຊາຊົນປະເທດຕ່າງໆ, ສ້າງເຄື່ອງໝາຍຫວຽດນາມ; ປະກອບສ່ວນເຂົ້າໃນຜົນສຳເລັດລວມ ຂອງວຽກງານການຕ່າງປະເທດຂອງພັກ ແລະ ລັດ; ຢືນຢັນຕຳແໜ່ງທີ່ຕັ້ງຂອງການທູດລັດຖະສະພາໃນພື້ນຖານການທູດຮອບດ້ານ ແລະ ທັນສະໄໝຂອງປະເທດ, ກໍ່ຄືການທູດລັດຖະສະພາໃນພາກພື້ນ ແລະໃນໂລກ./.
-----------------------
(1), (2) ເບິ່ງ: ຫງວຽນຝູຈ້ອງ: ການກໍ່ສ້າງແລະພັດທະນາການຕ່າງປະເທດແລະການທູດຫວຽດນາມທີ່ຮອບດ້ານ ທັນສະໄໝ ແລະເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ສພຈ. ການເມືອງແຫ່ງຊາດ ສື້ເຖິ້ດ, ຮ່າໄນ້ຍ, 2023, ໜ້າ 158, 31
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1032 (ເດືອນກຸມພາ 2024)
