ວກ. - ຜູ້ສູງອາຍຸມີບົດບາດສຳຄັນໃນການກໍ່ສ້າງກ້ອນກຳລັງມະຫາ​ສາມັກຄີປວງຊົນທັງຊາດ, ປະກອບສ່ວນທີ່ຍິ່ງໃຫຍ່ເຂົ້າໃນພາລະກິດປະຕິວັດຂອງຊາດ. ໃນ​ສະ​ພາບ​ການ​ຂອງ​ການ​ສູງ​ອາ​ຍຸ​ຢ່າງ​ວ່ອງ​ໄວ​ຂອງ​ປະ​ຊາ​ກອນ​, ຕ້ອງ​ມີ​ຄວາມ​ຮັບ​ຮູ້​ທີ່​ຖືກຕ້ອງ​ກ່ຽວ​ກັບ​ບົດບາດ ​ແລະ ການ​ປະກອບສ່ວນ​ຂອງ​ຜູ້​ສູງອາຍຸ ເຊິ່ງ​ເປັນ​ຜູ້​ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ພັດທະນາ​ສັງຄົມ ແລະ​ເປັນຜູ້​ປະກອບສ່ວນ​ສຳຄັນ​ເຂົ້າ​ໃນ​ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດ​ສັງຄົມ​ນິຍົມ ໃນໄລຍະໃໝ່.

ການເບິ່ງແຍງ​ດູ​ແລ​ຜູ້​ສູງ​ອາ​ຍຸ,​ ປະຕິບັດ​ນະ​ໂຍບາຍ​ຜູ້​ສູງອາຍຸຢ່າງດີ ແລະເສີມຂະຫຍາຍບົດບາດຂອງຜູ້ສູງອາຍຸໃນການກໍ່ສ້າງກ້ອນກຳລັງມະຫາສາມັກຄີປວງຊົນທັງຊາດ ​ແມ່ນໄດ້​ປະກອບສ່ວນ​ເຂົ້າ​ໃນ​ການ​ປະຕິບັດ​ເປົ້າໝາຍໃນການ​ສ້າງ​ສັງຄົມທີ່​ຮັ່ງມີ, ປະ​ເທດ​ຊາດ​ເຂັ້ມ​ແຂງ, ມີປະຊາທິປະ​ໄຕ, ຍຸຕິ​ທຳ ​ແລະ ອາລະຍະທຳ. ຄວາມສາມັກຄີປວງຊົນທັງຊາດແມ່ນມໍລະດົກອັນລ້ຳຄ່າ ເຊິ່ງເປັນມູນເຊື້ອອັນລ້ຳຄ່າທີ່ສຸດຂອງຊາດຫວຽດນາມ ທີ່ສືບທອດກັນມານັບພັນປີ ໃນການສ້າງສາແລະປົກປັກຮັກສາປະເທດ. ນ້ຳໃຈຮັກຊາດ, ຄວາມຮູ້ບຸນຄຸນ, ຄວາມເອື້ອເຟື້ອເຜື່ອແຜ່, ຄວາມສາມັກຄີ ແລະ ຄວາມຮັກແພງສະໜັບສະໜູນເຊິ່ງກັນແລະກັນ ໄດ້​ຊຶມ​ເລິກ​ເຂົ້າ​ໄປ​ໃນ​ຄວາມ​ນຶກ​ຄິດ, ຄວາມ​ຮູ້ສຶກ, ຈິດ​ວິນ​ຍານ​ຂອງ​ທຸກ​ຄົນ, ກາຍ​ເປັນ​ວິຖີ​ຊີວິດ​ ແລະ ເປັນກາວ​ທີ່​ເຊື່ອມໂຍງສະມາຊິກທຸກຄົນ​ໃນ​ຄອບຄົວ​ໃຫຍ່​ຂອງ​ຊາດ​ຫວຽດນາມ. ແນວຄິດມະຫາສາມັກຄີປວງຊົນທັງຊາດມີທີ່ຕັ້ງທີ່ສຳຄັນ, ສະເໝີຕົ້ນສະເໝີປາຍ ແລະ ສອດຫ້ອຍຕະຫຼອດໃນແນວທາງ, ແຜນນະໂຍບາຍຂອງພັກກອມມູນິດຫວຽດນາມ, ນະໂຍບາຍແລະກົດໝາຍຂອງລັດຫວຽດນາມ. ພັກກອມມູນິດຫວຽດນາມກຳນົດສະເໝີວ່າ “ຄວາມສາມັກຄີປວງຊົນທັງຊາດ” ແມ່ນແນວທາງຍຸດທະສາດ, ແມ່ນແຫຼ່ງກຳລັງແຮງ ແລະ ພະລັງຂັບເຄື່ອນຕົ້ນຕໍ ຂອງການປະຕິວັດຫວຽດນາມ, ມີຄວາມໝາຍຕັດສິນຊີ້ຂາດໄຊຊະນະທັງໝົດຂອງການປະຕິວັດ ​ໃນການສ້າງສາ ​ແລະປົກ​ປັກ​ຮັກສາ​ປະ​ເທດ​ຊາດຫວຽດນາມ​ສັງຄົມ​ນິຍົມ​.

​ໃນ​ຕະຫຼອດ​ຊີວິດ​ຂອງ​ຕົນ, ປະທານ​ໂຮ່ຈິ​ມິນ ​ໄດ້​ເອົາ​ໃຈ​ໃສ່​ເປັນ​ພິ​ເສດ​ເຖິງຄວາມ​ສາມັກຄີປວງຊົນທັງຊາດ ​ແລະ ຍາມ​ໃດ​ກໍ​ເສີມ​ຂະຫຍາຍ​ບົດບາດ ​ແລະ ກຳລັງ​ແຮງ​ຂອງ​ຄວາມ​ສາມັກຄີ​ປວງຊົນ​ຊາດ. ໃນແນວຄິດໂຮ່ຈີມິນ, ຄວາມ​ສາມັກຄີ​ປວງຊົນ​ຊາດແມ່ນເນື້ອໃນຫຼັກ ທີ່ນຳມາເຊິ່ງເຄື່ອງໝາຍສຳຄັນຂອງປະທານໂຮ່ຈີມິນ ໃນຂະບວນການນຳພາການປະຕິວດຫວຽດນາມໄປສູ່ຄວາມສຳເລັດ. ຄຳສອນຂອງປະທານໂຮ່ຈີມິນ: “ສາມັກຄີ, ສາມັກຄີ, ມະຫາສາມັກຄີ. ຄວາມ​ສໍາ​ເລັດ​, ຄວາມ​ສໍາ​ເລັດ​, ຄວາມສໍາເລັດອັນຍິ່ງໃຫຍ່" ​ໄດ້​ກາຍ​ເປັນ​ຄຳ​ຂວັນ​ຂອງ​ທົ່ວ​ພັກ, ທົ່ວ​ກອງທັບ, ທົ່ວ​ປວງ​ຊົນ ແລະ​ແທ້​ຈິງ​ແລ້ວ ກຳລັງ​ແຮງ​ແຫ່ງ​ຄວາມ​ສາມັກຄີ​ປວງຊົນທັງ​ຊາດ​ໄດ້​ຮັບ​ການ​ເສີມຂະຫຍາຍ​ສູງ​ສຸດ ​ເພື່ອ​ໃຫ້​ປະຊາຊົນ​ຫວຽດນາມກ້າວໄປສູ່​ໄຊຊະນະ​ໃນ​ໄລຍະ​ປະຫວັດສາດ.

ປະທານ​ໂຮ່ຈິ​ມິນ ຍາມ​ໃດ​ກໍ່​ຢືນຢັນ​ທີ່​ຕັ້ງ ​ແລະ ບົດບາດ​ຂອງ​ຜູ້​ສູງອາຍຸ​ໃນ​ພາລະກິດ​ສ້າງສາ​ກ້ອນກຳລັງມະຫາສາມັກຄີປວງຊົນທັງຊາດ. ຕັ້ງແຕ່ອາຍຸຍັງນ້ອຍ, ເພິ່ນໄດ້ຮັບຮູ້ເຖິງທີ່ຕັ້ງ, ບົດບາດ, ທ່າແຮງ, ຄວາມເຂັ້ມແຂງ, ຄຸນຄ່າທັງທາງດ້ານວັດຖຸ ແລະ ຈິດໃຈຂອງຜູ້ສູງອາຍຸຕໍ່ພາລະກິດປະຕິວັດ, ທັງໃນຍາມສົງຄາມແລະຍາມສະຫງົບ. ໃນປີ 1941, ປະທານໂຮ່ຈີມິນໄດ້ຮຽກໂຮປະຊຸມ ແລະເປັນປະທານກອງປະຊຸມຄັ້ງທີ 8 ຂອງຄະນະບໍລິຫານງານສູນກາງພັກ ເຊິ່ງຈັດຂຶ້ນລະຫວ່າງວັນທີ 10 ເຖິງ 19 ພຶດສະພາ ທີ່ ຂວຍນ້ຳ, ປາກບໍ່ ແຂວງກາວບັ່ງ. ຕາມຄຳສະເໜີຂອງເພິ່ນ, ກອງ​ປະ​ຊຸມ​ໄດ້​ຕັດ​ສິນ​ໃຈ​ສ້າງ​ຕັ້ງ​ແນວ​ໂຮມ​ເອກະລາດແຫ່ງຊາດ​ຫວຽດ​ນາມ (ເອີ້ນ​ວ່າ ຫວຽດ​ມິນ) ເພື່ອເຕົ້າ​ໂຮມ​ປະຊາ​ຊົນ​ທັງ​ຊາດ​ຢ່າງ​ກວ້າງ​ຂວາງ​ເພື່ອ​ຕໍ່ສູ້​ເພື່ອ​ເອກະລາດ ແລະເສລີພາບ. ໜຶ່ງໃນກໍາລັງທໍາອິດທີ່ເພິ່ນຄິດເຖິງແມ່ນ ຜູ້ເຖົ້າຜູ້ແກ່ ທີ່ມີບົດບາດນໍາພາ, ນໍາລູກໆຫຼານໆເຂົ້າຮ່ວມໃນພາລະກິດກູ້ຊາດ ແລະສ້າງປະເທດໃຫ້ຈະເລີນຮຸ່ງເຮືອງ. ປະທານໂຮ່ຈີມິນ ຍາມ​ໃດ​​ກໍ່​ຖື​ວ່າ ​ຜູ້​ສູງອາຍຸແມ່ນ​ກຳລັງ​ສຳຄັນ​ທີ່​ປະກອບສ່ວນ​ເຂົ້າ​ໃນ​ການເພີ່ມທະວີ​ກຳລັງ​ແຮງ ຂອງກ້ອນກຳລັງມະຫາສາມັກຄີປວງຊົນທັງຊາດ, ກໍ່ສ້າງ ​ແລະ ປົກ​ປັກ​ຮັກສາ​ປະ​ເທດ​ຊາດ.

ໃນ “ຄຳຮຽກຮ້ອງໃຫ້ຜູ້ສູງອາຍຸທັງຫຼາຍສາມັກຄີກັນ” (ເດືອນມິຖຸນາ 1941), ປະທານໂຮ່ຈີມິນຂຽນວ່າ: “ເຖິງແມ່ນວ່າຜົມຫງອກ, ຕາ​ມົວ​, ມືສັ່ນ, ຂາເມື່ອຍ; ແຕ່​ຄຳ​ເວົ້າ​ຂອງຜູ້ເຖົ້າຜູ້ແກ່ມີຜົນ​ກະທົບ​ຕໍ່ຄວາມຈະເລີນຂອງ​ລັດ, ການ​ກະທຳ​ຂອງຜູ້ເຖົ້າຜູ້ແກ່​ມີ​ຜົນກະທົບ​ຕໍ່​ການ​ຂ້າ​ສັດຕູ... ສໍາລັບຄອບຄົວ, ສໍາລັບປະເທດຊາດ, ຜູ້ສູງອາຍຸມີຄວາມຮັບຜິດຊອບສໍາຄັນໃນການເປັນຜູ້ອະວຸໂສທີ່ເຄົາລົບ. ຕໍ່​ໝູ່​ບ້ານ ແລະ ຕໍ່​ຍາດຕິພີ່​ນ້ອງ, ຜູ້​ສູງອາຍຸໄດ້ຮັບ​ຄວາມ​ໄວ້ວາງ​ໃຈ​ທີ່​ສຸດ. ຜູ້​ເຖົ້າ​ຮ້ອງ​ຂຶ້ນ​, ປະ​ຊາ​ຊົນກໍ່​ຕອບຮັບ. ຜູ້ເຖົ້າເຮັດ, ປະຊາຊົນເຮັດຕາມ. ຮ້ອງສິ່ງທີ່ຄວນຮ້ອງ, ເຮັດໃນສິ່ງທີ່ຄວນເຮັດ. ຜູ້ທີ່ມີຊັບສິນບໍລິຈາກຊັບສິນ, ຜູ້ທີ່ມີກໍາລັງແຮງກໍ່ອຸທິດເຫື່ອແຮງ, ລວມລົມເປັນພະຍຸ, ຮວບຮວມໄອນ້ຳເປັນເມກ, ປະຊາຊົນເຮົາທົ່ວປະເທດພາກັນລໍຖ້າຜູ້ເຖົ້າຜູ້ແກ່”⁽¹⁾. 

ເພື່ອຂຸດຄົ້ນຄວາມສາມາດບົ່ມຊ້ອນ ແລະ ເສີມຂະຫຍາຍບົດບາດຂອງຜູ້ສູງອາຍຸ, ປະທານໂຮ່ຈີມິນໃຫ້ທັດສະນະວ່າ: ສິ່ງທຳອິດທີ່ຕ້ອງເຮັດຄື ການນຳເອົາຜູ້ເຖົ້າເຂົ້າຮ່ວມໃນອົງການຈັດຕັ້ງໃດໜຶ່ງ - ໃນເວລານັ້ນແມ່ນ “ສະມາຄົມຜູ້ສູງອາຍຸກູ້ຊາດ”. ສະມາຄົມ​ຜູ້​ສູງອາຍຸກູ້​ຊາດ​ໄດ້​ຮັບ​ການ​ຈັດ​ຕັ້ງ​ຢູ່​ບັນດາ​ທ້ອງ​ຖິ່ນ​ໃນ​ທົ່ວ​ປະ​ເທດ, ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ຕໍ່ສູ້​ຕ້ານ​ພວກລ່າເມືອງຂຶ້ນຜູ້​ຮຸກ​ຮານ ແລະ ​ເຮັດ​ສຳເລັດ​ພາລະກິດ​ກອບ​ກູ້ປະເທດ. ເສີມຂະຫຍາຍແນວຄິດຂອງປະທານໂຮ່ຈີມິນ, ພັກ ລັດ ແລະ ປະຊາຊົນເຮົາໃຫ້ຄວາມສຳຄັນກັບວຽກງານການເບິ່ງແຍງດູແລ ແລະ ເສີມຂະຫຍາຍບົດບາດຂອງຜູ້ສູງອາຍຸ. ມະຕິຕົກລົງໝາຍເລກ 772/QĐ-TTg ລົງວັນທີ 26 ພຶດສະພາ 2006 ຂອງນາຍົກລັດຖະມົນຕີກຳນົດໃຫ້ວັນທີ 6 ມິຖຸນາຂອງທຸກປີເປັນ “ວັນ​ປະ​ເພນີ​ຂອງ​ຜູ້​ສູງອາຍຸ​ຫວຽດນາມ”.

ມາດຕາ 3 ລັດຖະທຳມະນູນປີ 2013 ຢືນຢັນເປົ້າໝາຍປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ແລະ ອາລະຍະທຳ, ປະຊາຊົນທຸກຄົນມີຊີວິດທີ່ກິນອີ່ມນຸ່ງອຸ່ນ ມີຄວາມສຸກ ແລະ ມີເງື່ອນໄຂໃນການພັດທະນາຢ່າງຮອບດ້ານ. ຂໍ້ 3 ມາດຕາ 37 ຂອງລັດຖະທຳມະນູນປີ 2013 ກຳນົດໄວ້ຢ່າງຊັດເຈນວ່າ: ຜູ້ສູງອາຍຸໄດ້ຮັບການເຄົາລົບ ການເບິ່ງແຍງດູແລ ແລະສົ່ງເສີມ ຈາກລັດ ຄອບຄົວ ແລະ ສັງຄົມ ໃນການເສີມຂະຫຍາຍບົດບາດໃນພາລະກິດການສ້າງສາ ແລະປົກປັກຮັກສາປະເທດຊາດ. ຈາກ​ພື້ນຖານທາງກົດໝາຍ​ສູງ​ສຸດ​ນີ້, ນະ​ໂຍບາຍສຳລັບ​ຜູ້​ສູງອາຍຸ​ໄດ້​ຖືກ​ກ່າວ​ເຖິງ ​ແລະລະບຸໄວ້ໃນ​ເອກະສານ​ທາງກົດໝາຍ​ທີ່​ກ່ຽວຂ້ອງຫຼາຍສະບັບ, ສ້າງ​ຂອບ​​ກົດໝາຍ​ໃຫ້​ແກ່​ຜູ້ສູງອາຍຸ​ຢູ່​ຫວຽດນາມ, ປະກອບສ່ວນ​ປັບປຸງ​ລະບອບ ​ແລະນະ​ໂຍບາຍການເບິ່ງແຍງດູແລ​ ແລະບຸລິມະສິດຜູ້ສູງອາຍຸ​ຢູ່​ຫວຽດນາມ ໃຫ້ສົມບູນແບບ.

ສະມາຄົມຜູ້ສູງອາຍຸຫວຽດນາມແມ່ນສະມາຊິກຂອງຄະນະກຳມະການສູນກາງແນວໂຮມປະເທດຊາດຫວຽດນາມ. ສະມາຄົມໄດ້ປ່ຽນແປງໃໝ່ວິທີການນຳພາ, ເຕົ້າໂຮມ ແລະ ພັດທະນາສະມາຊິກຢ່າງຕໍ່ເນື່ອງ; ເຂົ້າຮ່ວມການກໍ່ສ້າງພັກ, ກໍ່ສ້າງອຳນາດການປົກຄອງ ໂດຍສະເພາະໃນລະດັບຮາກຖານ; ຕັ້ງໜ້າຕອບສະໜອງວັນມະຫາສາມັກຄີປວງຊົນທັງຊາດ; ເຂົ້າຮ່ວມ, ສະເໜີການສ້າງ ແລະປັບປຸງສະຖາບັນເພື່ອປ້ອງກັນແລະຕ້ານການສໍ້ລາດບັງຫຼວງ ຄວາມຫຍໍ້ທໍ້ ແລະ ເຂົ້າຮ່ວມການວິພາກວິຈານສັງຄົມ. ການຜັນຂະຫຍາຍຂະບວນການແຂ່ງຂັນກັນຮັກຂຊາດ “ອາຍຸສູງ - ແບບຢ່າງທີ່ສົດໃສ” ໄດ້ປຸກລະດົມກຳລັງໃຈໃຫ້ຜູ້ສູງອາຍຸຢູ່ຮາກຖານນັບໝື່ນຄົນ ເຂົ້າຮ່ວມວຽກງານຂອງພັກ, ອຳນາດການປົກຄອງ ແລະ ອົງການຈັດຕັ້ງທາງສັງຄົມ ເຊິ່ງປະກອບສ່ວນສຳຄັນເຂົ້າໃນການກໍ່ສ້າງລະບົບການເມືອງຢູ່ຮາກຖານໃຫ້ເຂັ້ມແຂງ. ໃນນັ້ນ, ​ຜູ້​ສູງອາຍຸ​ຍາມ​ໃດ​ກໍ່​ຕັ້ງໜ້າ​ເຂົ້າ​ຮ່ວມ​ການ​ປະກອບ​ຄຳ​ເຫັນ​ຢ່າງ​ກະຕືລືລົ້ນ, ຊື່​ສັດ, ກົງ​ໄປ​ກົງ​ມາ ແລະມີຄວາມ​ຮັບຜິດຊອບ​ສູງ ​ໃນ​ການ​ກໍ່ສ້າງ​ພັກ, ກໍ່ສ້າງ​ລະບົບ​ການ​ເມືອງ, ຮັບປະກັນ​ຄວາມ​ໝັ້ນຄົງ​ດ້ານ​ການ​ເມືອງ, ຄວາມ​ເປັນ​ສະຫງົບ​ຮຽບຮ້ອຍ ແລະ ຄວາມ​ປອດ​ໄພ​ທາງສັງຄົມຢູ່ຮາກຖານ.

ຜູ້ສູງອາຍຸໃນຫວຽດນາມແມ່ນຊັບສິນອັນມີຄ່າຂອງຊາດ, ແມ່ນກຳລັງສຳຄັນຂອງປະເທດ, ແມ່ນເສົາຫຼັກຂອງຄອບຄົວ ແລະສັງຄົມຫວຽດນາມ. ຜູ້ສູງອາຍຸຈາກ 54 ຊົນເຜົ່າໃນທົ່ວປະເທດຫວຽດນາມ ບໍ່ພຽງແຕ່ເປັນຄົນຂະຫຍັນຂັນແຂງ, ມີຫົວຄິດປະດິດສ້າງ, ປະກອບສ່ວນກໍ່ສ້າງລະບົບຄຸນຄ່າຂອງຊາດ, ລະບົບຄຸນຄ່າວັດທະນະທໍາ, ລະບົບຄຸນຄ່າຄອບຄົວ ແລະ ມາດຕະຖານມະນຸດຂອງຫວຽດນາມເທົ່ານັ້ນ ແຕ່ຍັງເປັນພະຍານແຫ່ງປະຫວັດສາດອີກນຳ. ຫຼາຍຄົນມີສ່ວນຮ່ວມໂດຍກົງໃນການສ້າງປະຫວັດສາດຂອງປະເທດ ພາຍໃຕ້ການນຳພາຂອງພັກ ເຊິ່ງສົມຄວນ​ກັບຄຳທອງຄຳ 18 ຄຳ​ ​ທີ່​ຄະນະ​ບໍລິຫານ​ງານ​ສູນ​ກາງ​ພັກ​​ມອບ​ໃຫ້​ແກ່​ຜູ້​ສູງອາຍຸ​ຢູ່​ຫວຽດນາມ: “ອາຍຸສູງຂຶ້ນ ມານະຈິດຍິ່ງສູງ, ​ເປັນຕົວຢ່າງ​ທີ່ສົດໃສເພື່ອ​ພາລະກິດ​ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດ”.

ຈາກ “ມູນເຊື້ອການປະຊຸມຢຽນໂຮ່ງ” ເຖິງບັນດາຂະບວນການ, ຕົ້ນແບບທີ່ໂດດເດັ່ນ “ຜູ້ສູງອາຍຸທີ່ເປັນແບບຢ່າງ”, “ອາຍຸສູງ - ແບບຢ່າງທີ່ສົດໃສ”, “ຜູ້ສູງອາຍຸເຂົ້າຮ່ວມໃນການກໍ່ສ້າງຊົນນະບົດໃໝ່”, “ຜູ້​ສູງອາຍຸ​ເຂົ້າ​ຮ່ວມ​ການ​ສ້າງ​ສາຍ​ພົວ​ພັນ​ຄອບ​ຄົວ​ທີ່​ປາສະຈາກຜູ້​ລະ​ເມີດ​ກົດ​ຫມາຍ ​ແລະ​ຄວາມ​ຊົ່ວ​ຮ້າຍທາງ​ສັງ​ຄົມ”, “ປູ່ຍ່າຕາຍາຍ ແລະ ພໍ່ແມ່ທີ່ເປັນແບບຢ່າງ, ລູກໆຫຼານໆມີຄຸນທຳ”, “ຜູ້ສູງອາຍຸເຂົ້າຮ່ວມຂະບວນການປະຊາຊົນທຸກຄົນປົກປ້ອງຄວາມໝັ້ນຄົງຂອງປະເທດຊາດ”, “ຜູ້ສູງອາຍຸເຮັດທຸລະກິດດີ”, ບັນດາຂະບວນການເຄື່ອນໄຫວແລະຕົວແບບທີ່ຟົດຟື້ນນັ້ນ ໄດ້ຢືນຢັນເຖິງບົດບາດແລະທີ່ຕັ້ງທີ່ສຳຄັນ ຂອງຜູ້ສູງອາຍຸໃນກິດຈະກຳເຕົ້າໂຮມກຳລັງ ແລະ ເຜີຍແຜ່ນະໂຍບາຍຄວາມສາມັກຄີປວງຊົນທັງຊາດ, ສ້າງກຳລັງແຮງສັງລວມ, ປະກອບສ່ວນສ້າງສາ ແລະພັດທະນາປະເທດ ໃຫ້ນັບມື້ນັບຮັ່ງມີ ສວຍງາມ ແລະ ຈະເລີນກ້າວໜ້າ⁽²⁾.

ນັບຕັ້ງແຕ່ກໍ່ຕັ້ງ, ສູນກາງສະມາຄົມຜູ້ສູງອາຍຸຫວຽດນາມໄດ້ນຳພາແລະຊີ້ນຳສະມາຄົມຜູ້ສູງອາຍຸໃນທຸກຂັ້ນ ເພື່ອພັດທະນາໃຫ້ເຂັ້ມແຂງຂຶ້ນເລື້ອຍໆ ໂດຍເຕົ້າໂຮມຜູ້ສູງອາຍຸຈຳນວນຫຼາຍໃຫ້ເຂົ້າຮ່ວມ; ເສີມຂະຫຍາຍບົດບາດຂອງຕົນໃນຖານະອົງການສັງຄົມ, ເປັນຕົວແທນຂອງຄວາມປາຖະໜາ, ສິດທິແລະຜົນປະໂຫຍດທີ່ຊອບດ້ວຍກົດໝາຍ ຂອງຜູ້ສູງອາຍຸ, ເປັນສະມາຊິກຂອງແນວໂຮມປະເທດຊາດຫວຽດນາມ ແລະ ເປັນບ່ອນອີງທີ່ເຊື່ອຖືໄດ້ຂອງພັກກອມມູນິດຫວຽດນາມ ແລະ ລັດຫວຽດນາມ. ສູນກາງສະມາຄົມຜູ້ສູງອາຍຸຫວຽດນາມໄດ້ປະຕິບັດເປັນຢ່າງດີວຽກງານກໍ່ສ້າງອົງການສະມາຄົມທີ່ເຂັ້ມແຂງ; ປະຕິບັດ​ວຽກ​ງານ​ເບິ່ງ​ແຍງ​ດູ​ແລ​ແລະ​ເສີມ​ຂະຫຍາຍ​ບົດບາດຂອງ​ຜູ້ສູງອາຍຸໄດ້ເປັນຢ່າງດີ; ໃຫ້ຄຳປຶກສາ ປະກອບຄວາມຄິດເຫັນ, ສ້າງ​ນະ​ໂຍບາຍ ​ແລະ ກົດໝາຍ; ປະຕິບັດ​ວຽກ​ງານ​ການ​ຕ່າງປະ​ເທດ​, ດຳ​ເນີນ​ການ​ຄົ້ນ​ຄ້ວາ​ວິທະຍາສາດ, ສະຫຼຸບ ​ແລະ ຍ້ອງຍໍ​ບັນດາ​ຕົວ​ຢ່າງ​ທີ່​ກ້າວໜ້າໄດ້ເປັນ​ຢ່າງ​ດີ. ກິດຈະກຳທີ່ເປັນປະໂຫຍດແລະມີປະສິດທິຜົນ ຂອງສະມາຄົມຜູ້ສູງອາຍຸທຸກຂັ້ນ ໄດ້ຮັບການຜັນຂະຫຍາຍແລະສົ່ງເສີມ, ໂດຍສະເພາະ ການເບິ່ງແຍງດູແລ ແລະເສີມຂະຫຍາຍບົດບາດຂອງຜູ້ສູງອາຍຸ ໃນການພັດທະນາເສດຖະກິດ-ສັງຄົມ ດ້ວຍໂຄງການສະເພາະທາງ ແລະແທດຈິງຫຼາຍໂຄງການ; ພິເສດແມ່ນ, ສູນກາງສະມາຄົມຜູ້ສູງອາຍຸຫວຽດນາມ ແລະສະມາຄົມທຸກຂັ້ນ ໄດ້ເສີມຂະຫຍາຍບົດບາດນຳໜ້າເປັນແບບຢ່າງ ແລະເປັນເຈົ້າການພ້ອມກັບອົງການຂອງລັດຖະບານ ແລະອົງການຂອງອຳນາດການປົກຄອງທຸກຂັ້ນ ເພື່ອມີສ່ວນຮ່ວມຢ່າງແຂງຂັນ ແລະມີປະສິດທິພາບ ໃນການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ໃນເວລາທີ່ຜ່ານມາ⁽³⁾.

ປະຈຸບັນ, ຫວຽດນາມມີຜູ້ສູງອາຍຸເກືອບ 17 ລ້ານຄົນ, ກວມເອົາເກືອບ 17% ຂອງປະຊາກອນທັງໝົດ, ໃນນັ້ນ ຜູ້ທີ່ມີອາຍຸ 80 ປີຂຶ້ນໄປ 2.612.260 ຄົນ. ​ໃນ​ສະພາບ​ການ​ປະຊາກອນ​ຫວຽດນາມ​ທີ່​ມີ​ອາຍຸ​ສູງ​ຂຶ້ນ​ຢ່າງ​ວ່ອງ​ໄວ, ອັດຕາ​ສ່ວນ​ຜູ້​ເຖົ້າ​ຈະ​ສືບ​ຕໍ່​ເພີ່ມ​ຂຶ້ນ​ຢ່າງ​ວ່ອງ​ໄວ ທັງໃນດ້ານ​ຈຳນວນ​ແລະອັດຕາ​ສ່ວນ. ຕາມລາຍງານຂອງຄະນະກຳມະການຜູ້ສູງອາຍຸແຫ່ງຊາດຫວຽດນາມ: ເຖິງປີ 2030, ອັດຕາສ່ວນຂອງປະຊາກອນທີ່ມີອາຍຸກວ່າ 60 ປີຈະເພີ່ມຂຶ້ນເປັນ 20% ແລະພາຍໃນປີ 2050 ຈະເພີ່ມຂຶ້ນຫຼາຍກວ່າ 30%. ອັດຕາສ່ວນຂອງຜູ້ສູງອາຍຸທີ່ມີອາຍຸກວ່າ 80 ປີກໍ່ຈະເພີ່ມຂຶ້ນເຊັ່ນກັນ ແລະເຖິງປີ 2050 ຈະມີອັດຕາສ່ວນກວ່າ 6% ຂອງປະຊາກອນທັງໝົດ. ສິ່ງ​ດັ່ງກ່າວ​ເປັນຄວາມ​ທ້າ​ທາຍ​ໃຫຍ່​ໃນ​ດ້ານ​ປະກັນ​ສັງຄົມ, ການເບິ່ງແຍງ​ດູ​ແລ, ການປົກ​ປັກ​ຮັກສາ ​ແລະ ​ເສີມ​ຂະຫຍາຍ​ບົດບາດ​ຂອງ​ຜູ້​ສູງອາຍຸ.

ມະຕິໝາຍເລກ 23-NQ/TW ລົງວັນທີ 12 ມີນາ 2003 ຂອງກອງປະຊຸມສູນກາງພັກຄັ້ງທີ 7 ສະໄໝທີ IX “ວ່າດ້ວຍການເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດເພື່ອໃຫ້ປະຊາຊົນຮັ່ງມີ ປະເທດຊາດເຂັ້ມແຂງ, ສັງຄົມທີ່ຍຸຕິທຳ ມີປະຊາທິປະໄຕ ແລະ ອາລະຍະທຳ” ​ໄດ້​ຊີ້​ອອກ​ຢ່າງ​ຈະ​ແຈ້ງ​ກ່ຽວ​ກັບ​ທິດ​ທາງ​ນະ​ໂຍບາຍ​ສຳລັບ​ຜູ້​ສູງ​ອາຍຸ: “... ສ້າງນະໂຍບາຍການດູແລສຸຂະພາບ, ໃຫ້ຄວາມສຳຄັນກັບຜູ້ສູງອາຍຸຫຼາຍຂຶ້ນ ທັງດ້ານສຸຂະພາບ, ການຊົມໃຊ້ວັດທະນະທຳ, ຄວາມຕ້ອງການຂໍ້ມູນ ແລະ ເສີມຂະຫຍາຍຄວາມສາມາດເຂົ້າຮ່ວມຊີວິດທາງການເມືອງຂອງປະເທດ ແລະການເຄື່ອນໄຫວທາງສັງຄົມ, ເປັນຕົວຢ່າງທີ່ດີ, ອົບຮົມສຶກສາ​ອຸດົມຄະຕິ ​ແລະ ມູນເຊື້ອ​ປະຕິວັດ​ໃຫ້​ແກ່ຄົນ​ລຸ້ນໃໝ່. ປະຕິບັດນະໂຍບາຍຕອບແທນບຸນຄຸນ ແລະດູແລຜູ້ມີຄຸນງາມຄວາມດີຕໍ່ການປະຕິວັດຢ່າງດີ. ສ້າງໂຄງການປະຕິບັດງານລະດັບຊາດກ່ຽວກັບຜູ້ສູງອາຍຸ. ເສີມຂະຫຍາຍບົດບາດຂອງສະມາຄົມຜູ້ສູງອາຍຸຫວຽດນາມ”. ມະຕິໝາຍເລດ 43-NQ/TW ລົງວັນທີ 24 ພະຈິກ 2023 ຂອງກອງປະຊຸມສູນກາງພັກຄັ້ງທີ 8 ສະໄໝທີ XIII “ວ່າດ້ວຍການສືບຕໍ່ເສີມຂະຫຍາຍມູນເຊື້ອ ແລະ ກຳລັງແຮງແຫ່ງມະຫາສາມັກຄີປວງຊົນທັງຊາດ, ສ້າງປະເທດເຮົາໃຫ້ນັບມື້ນັບຈະເລີນຮຸ່ງເຮືອງແລະມີຄວາມສຸກ” ກຳນົດໜ້າທີ່ແລະວິທີແກ້ໄຂ: “ເສີມຂະຫຍາຍຊື່ສຽງ ແລະ ບົດຮຽນປະສົບການຂອງຜູ້ສູງອາຍຸ ໃນສັງຄົມ, ຊຸມຊົນ ແລະ ຄອບຄົວ. ເຄົາລົບ, ປົກປ້ອງ, ເບິ່ງແຍງດູແລ, ມີກົນໄກແລະນະໂຍບາຍໃນການລະດົມຊັບພະຍາກອນ ເພື່ອເບິ່ງແຍງດູແລ ແລະເສີມຂະຫຍາຍບົດບາດຂອງຜູ້ສູງອາຍຸ; ສົ່ງເສີມໃຫ້ຜູ້ສູງອາຍຸເຂົ້າຮ່ວມໃນການເຄື່ອນໄຫວເສດຖະກິດ-ສັງຄົມ. ສ້າງສະພາບແວດລ້ອມທີ່ເປັນມິດກັບຜູ້ສູງອາຍຸ; ມີນະໂຍບາຍສະໜັບສະໜູນແລະຊ່ວຍເຫຼືອຜູ້ສູງອາຍຸທີ່​ປະສົບ​ຄວາມ​ຫຍຸ້ງ​ຍາກ, ໂດດ​ດ່ຽວ ​ແລະ​ບໍ່​ມີ​ໃຜ​ທີ່​ຈະ​ເພິ່ງ​ອາ​ໄສ”.         

ໃນເວລາທີ່ຈະມາເຖິງ, ເພື່ອເສີມຂະຫຍາຍບົດບາດຂອງຜູ້ສູງອາຍຸໃນການສ້າງກ້ອນກຳລັງມະຫາສາມັກຄີປວງຊົນທັງຊາດ ແລະສ້າງແຮງຈູງໃຈທາງຈິດໃຈ ເພື່ອໃຫ້ບັນລຸເຖິງຄວາມປາຖະໜາໃນການພັດທະນາປະເທດໃຫ້ຈະເລີນຮຸ່ງເຮືອງ, ບາງບັນຫາທີ່ຕ້ອງເອົາໃຈໃສ່ແມ່ນ:

ທີໜຶ່ງ, ຊຸກຍູ້ການໂຄສະນາຊວນເຊື່ອເພື່ອຍົກສູງຄວາມຮັບຮູ້ ແລະຄວາມຮັບຜິດຊອບຂອງຄະນະພັກ, ອຳນາດການປົກຄອງ, ອົງການຈັດຕັ້ງການເມືອງ-ສັງຄົມ ແລະ ປະຊາຊົນທຸກຊັ້ນວັນນະ ກ່ຽວກັບບົດບາດຂອງສະມາຄົມຜູ້ສູງອາຍຸ ແລະ ຜູ້ສູງອາຍຸໃນໄລຍະປະຈຸບັນ. ຊາບຊຶມ ແລະ ເຜີຍແຜ່ແນວຄິດຂອງປະທານໂຮ່ຈີມິນ, ແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດກ່ຽວກັບຜູ້ສູງອາຍຸຢ່າງຖີ່ຖ້ວນ; ປຸກລະດົມ ແລະ ເສີມຂະຫຍາຍມູນເຊື້ອອັນດີງາມ ແລະ ກຳລັງແຮງອັນໃຫຍ່ຫຼວງຂອງຜູ້ເຖົ້າຊາວຫວຽດນາມລຸ້ນຕໍ່ລຸ້ນ; ໂຄສະນາເຜີຍແຜ່ແລະອົບຮົມສຶກສາຄວາມຮູ້ສຶກເຄົາລົບ ແລະ ຄວາມຮູ້ບຸນຄຸນຕໍ່ຄຸນງາມຄວາມດີ ແລະ ການປະກອບສ່ວນຂອງຜູ້ສູງອາຍຸຕໍ່ປະເທດ, ໂດຍສະເພາະແມ່ນ ໃນການຜັນຂະຫຍາຍປະຕິບັດຂະບວນການຂົນຂວາຍຕົວຈິງແລະມີປະສິດຕິຜົນ ເຊັ່ນຂະບວນການຂົນຂວາຍປະຊາຊົນທັງໝົດສ້າງຊີວິດວັດທະນະທຳໃນພື້ນທີ່ທີ່ຢູ່ອາໄສ, ຜູ້ສູງອາຍຸເຂົ້າຮ່ວມໃນການປົກປ້ອງສິ່ງແວດລ້ອມ, ວຽກງານສົ່ງເສີມການສຶກສາ ແລະຄວາມສາມາດພິເສດ; ຖ່າຍທອດຄວາມຮູ້, ທັກສະ, ປະສົບການ ແລະ ການອົບຮົມສຶກສາຄຸນສົມບັດສິນທຳໃຫ້ຄົນລຸ້ນຕໍ່ໄປ,… ແລະ ໃນການປະຕິບັດໜ້າທີ່ທາງການເມືອງຂອງທ້ອງຖິ່ນແລະປະເທດ. 

ຍົກສູງຄວາມຮັບຮູ້ຂອງຄະນະພັກ, ອຳນາດການປົກຄອງ ແລະ ສັງຄົມທັງໝົດ ກ່ຽວກັບການປົກປ້ອງສິດທິແລະຜົນປະໂຫຍດທີ່ຊອບດ້ວຍກົດໝາຍຂອງຜູ້ສູງອາຍຸ. ສືບຕໍ່ປະຕິບັດເປັນຢ່າງດີ ຕາມຈິດໃຈເນື້ອໃນຂອງລັດຖະທຳມະນູນປີ 2013, ໄດຍສະເພາະໃນຂໍ້ 3, ມາດຕາ 37 ກຳນົດວ່າ: “ຜູ້​ສູງ​ອາຍຸ​​ໄດ້​ຮັບ​ຄວາມ​ເຄົາລົບ, ​ເບິ່ງແຍງດູແລ ແລະສົ່ງເສີມ​ຈາກ​ລັດ, ຄອບຄົວ ​ແລະ ສັງຄົມ​ ໃນ​ພາລະກິດການ​ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດ”. ລັດ ສັງຄົມ ແລະ ຄອບຄົວສ້າງເງື່ອນໄຂສົ່ງເສີມພູມປັນຍາ, ປະສົບການທີ່ລ້ຳຄ່າ ແລະ ຄຸນສົມບັດທີ່ດີຂອງຜູ້ສູງອາຍຸ.

ທີສອງ, ຈັດຕັ້ງປະຕິບັດແນວທາງແລະແຜນນະໂຍບາຍຂອງພັກ, ນະໂຍບາຍແລະກົດໝາຍຂອງລັດ ກ່ຽວກັບສະມາຄົນຜູ້ສູງອາຍຸຫວຽດນາມ ແລະ ຜູ້ສູງອາຍຸຊາວຫວຽດນາມ. ມີນະໂຍບາຍທີ່ເໝາະສົມ ເພື່ອສ້າງເງື່ອນໄຂໃຫ້ຜູ້ສູງອາຍຸໄດ້ເສີມຂະຫຍາຍສະຕິປັນຍາ ແລະ ປະສົບການຊີວິດ, ຊ່ວຍເຫຼືອຄອບຄົວ, ຊຸມຊົນ ແລະສັງຄົມ, ເສີມຂະຫຍາຍບົດບາດຂອງຕົນໃນການສ້າງສາ ແລະປົກປັກຮັກສາປະເທດຊາດ. ສ້າງໂອກາດໃນການເຮັດວຽກ ແລະ ພັດທະນາທັກສະສຳລັບຜູ້ສູງອາຍຸ, ຮັບປະກັນຄວາມໝັ້ນຄົງດ້ານລາຍໄດ້ ຄຽງຄູ່ກັບບັນດານະໂຍບາຍການຊ່ວຍເຫຼືອທາງສັງຄົມ ນະໂຍບາຍບຳນານ ແລະສະຫວັດດີການໂດຍລວມ ສຳລັບຜູ້ສູງອາຍຸ. ບັນດານະໂຍບາຍທີ່ກ່ຽວຂ້ອງກັບຜູ້ສູງອາຍຸມີຄວາມເຊື່ອມໂຍງຢ່າງໃກ້ຊິດກັບການກຳຈັດຄວາມທຸກຍາກຫຼາຍມິຕິ. ກໍາຈັດ "ພື້ນທີ່ສີຂາວ" ຂອງຜູ້ສູງອາຍຸຈາກຄອບຄົວທຸກຍາກທີ່ບໍ່ມີປະກັນໄພສຸຂະພາບ. ຄ່ອຍໆຫຼຸດການສະໜັບສະໜູນໂດຍກົງ, ຫັນມາໜູນຊ່ວຍຜູ້ສູງອາຍຸໃນການພັດທະນາການຜະລິດ ທຸລະກິດ ແລະ ການພັດທະນາເສດຖະກິດ ແລະ ຄ່ອຍໆປະສົມປະສານການໜູນຊ່ວຍໂດຍກົງ ແລະການສະໜັບສະໜູນຜ່ານນະໂຍບາຍປະກັນໄພ ສຳລັບຜູ້ສູງອາຍຸທີ່ປະສົບກັບຄວາມຫຍຸ້ງຍາກ. ​ເອົາ​ໃຈ​ໃສ່​ເຖິງ​ນະ​ໂຍບາຍ​ສຸຂະພາບ, ​ຍົກສູງຄຸນ​ນະພາ​ບ ​ແລະປັບປຸງລະບົບເບິ່ງແຍງດູແລ​ສຸຂະ​ພາບ​ຜູ້​ອາຍຸ​ສູງໃຫ້ສົມບູນແບບ ​ແລະ ສະໜັບສະໜູນໃຫ້​ຜູ້ສູງອາຍຸ​ມີຊີວິດທີ່ມີ​ສຸຂະພາບດີ ແລະກະຕືລືລົ້ນ. ນະໂຍບາຍກ່ຽວກັບການສູງໄວຂອງປະຊາກອນກວມເອົາບັນຫາທາງເພດ ໂດຍຄຳນຶງເຖິງຄວາມຕ້ອງການສະເພາະຂອງແມ່ຍິງແລະຜູ້ຊາຍສູງອາຍຸ. ພ້ອມ​ທັງ​ສ້າງ​ລະບົບ​ໜູນ​ຊ່ວຍ​ສັງຄົມ​ ໂດຍ​ຜ່ານ​ການ​ເຄື່ອນ​ໄຫວ​ວຽກ​ງານ​ສັງຄົມ, ລະດົມ​ການ​ເຂົ້າ​ຮ່ວມ​ຂອງ​ຄອບຄົວ, ຊຸມ​ຊົນ ແລະ ບັນດາ​ອົງການ​ຈັດ​ຕັ້ງ​ສັງຄົມ. ພ້ອມ​ກັນ​ນັ້ນ, ​ສ້າງ​ເງື່ອນ​ໄຂ​ໃຫ້​ຜູ້​ສູງອາຍຸ​ເຂົ້າ​ຮ່ວມໃນການ​ເຄື່ອນ​ໄຫວ​ວັດທະນະທຳ, ສິລະ​ປະ ​ແລະ ກິລາ.

ທີສາມ, ສະມາຄົມ​ຜູ້ສູງອາຍຸທຸກ​ຂັ້ນ​ເປັນເຈົ້າການໃນການສ້າງ​ໂຄງການ​ເຄື່ອນ​ໄຫວ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ: “ເສີມຂະຫຍາຍສະຕິປັນຍາ, ປະສົບການຊີວິດ, ແຮງງານ ແລະການຮຽນຮູ້ຂອງຜູ້ສູງອາຍຸໃນສັງຄົມ, ຊຸມຊົນແລະຄອບຄົວ... ເຄົາລົບ, ປົກປ້ອງ ແລະເບິ່ງແຍງດູແລຜູ້ສູງອາຍຸ”⁽⁴⁾; ບົນພື້ນຖານນັ້ນ, ເສີມຂະຫຍາຍບົດບາດຂອງຜູ້ສູງອາຍຸຢ່າງເໝາະສົມ; ສົ່ງເສີມໃຫ້ຜູ້ສູງອາຍຸເຂົ້າຮ່ວມໃນການເຄື່ອນໄຫວເສດຖະກິດ-ສັງຄົມ. ເຂົ້າໃຈຄວາມຄິດ, ຊີວິດ ແລະ ຄວາມປາຖະໜາຂອງຜູ້ສູງອາຍຸ, ໂດຍສະເພາະ ຜູ້ສູງອາຍຸໃນສະພາບທີ່ຫຍຸ້ງຍາກ ຢ່າງທັນທ່ວງທີ; ປະສານ​ສົມທົບ​ກັນ​ປ້ອງກັນ, ສະກັດ​ກັ້ນ ​ແລະ ປ້ອງ​ກັນ​ບໍ່​ໃຫ້​ເກີດເຫດ​ການ​ລ່ວງ​ລະ​ເມີດ ​ແລະ​ຄວາມ​ຮຸນ​ແຮງ​ຕໍ່​ຜູ້​ສູງອາຍຸ.

ທີສີ່, ບັນດາ​ຄະນະ​ພັກ, ອຳນາດ​ການ​ປົກຄອງ, ແນວ​ໂຮມ​ປະ​ເທດ​ຊາດ ​ແລະ ອົງຄະນະມະຫາຊົນ​ທຸກ​ຂັ້ນ ຊາບຊຶມ​ຢ່າງ​ເລິກ​ເຊິ່ງ ​ແລະ ​ຜັນ​ຂະຫຍາຍ​ປະຕິບັດຢ່າງ​ມີ​ປະສິດທິ​ພາບ ຕາມຂໍ້​ສະ​ຫຼຸບໝາຍເລກ 58-KL/TW ລົງວັນທີ 23 ມິຖຸນາ 2023 ຂອງຄະນະເລຂາທິການສູນກາງພັກ “ກ່ຽວກັບການຈັດຕັ້ງແລະການເຄື່ອນໄຫວຂອງສະມາຄົມຜູ້ສູງອາຍຸຫວຽດນາມ”. ສະມາຄົມຜູ້ສູງອາຍຸທຸກຂັ້ນຈະປັບປຸງຍົກສູງຄຸນນະພາບວຽກງານການຈັດຕັ້ງ, ພະນັກງານ ແລະ ການພັດທະນາສະມາຊິກ. ເປັນເຈົ້າການໃນການໃຫ້ຄຳແນະນຳແກ່ຄະນະພັກ ແລະອຳນາດການປົກຄອງທ້ອງຖິ່ນ ໃນ​ການ​ປັບປຸງການ​ຈັດ​ຕັ້ງ​ແລະ​ພະ​ນັກ​ງານສະມາຄົມ​; ຄົ້ນຄວ້າແລະສະເໜີນະໂຍບາຍແລະລະບອບລະບຽບສຳລັບພະນັກງານສະມາຄົມທຸກຂັ້ນ. ປັບປຸງ ແລະ ຍົກສູງຄຸນນະພາບແລະປະສິດທິພາບການເຄື່ອນໄຫວຂອງສະມາຄົມຂັ້ນຮາກຖານ; ປ່ຽນແປງໃໝ່ເນື້ອໃນກິດຈະກໍາເພື່ອຕອບສະໜອງຄວາມຕ້ອງການ ແລະຄວາມປາຖະໜາທີ່ຖືກຕ້ອງຕາມກົດໝາຍ ຂອງສະມາຊິກແລະຜູ້ສູງອາຍຸ; ດຶງ​ດູດ​ຜູ້ສູງອາຍຸໃຫ້ເຂົ້າ​ຮ່ວມນັບມື້ນັບຫຼາຍ ໃນ​ການຈັດຕັ້ງ​ສະມາຄົມ ​ແລະ ການ​ເຄື່ອນ​ໄຫວ​ທີ່​ສະມາຄົມ​ຈັດ​ຂຶ້ນ, ​ເສີມຂະຫຍາຍ​ກຳລັງແຮງແຫ່ງມະຫາ​ສາມັກຄີປວງຊົນທັງຊາດ.

ທີຫ້າ, ເສີມຂະຫຍາຍຢ່າງແຂງແຮງ ບົດບາດຂອງຜູ້ສູງອາຍຸ ໃນການເຂົ້າຮ່ວມການກໍ່ສ້າງພັກ ແລະອຳນາດການປົກຄອງ, ຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ແລະຄວາມຫຍໍ້ທໍ້, ປະກອບສ່ວນພັດທະນາເສດຖະກິດ-ສັງຄົມ, ຮັບປະກັນຄວາມໝັ້ນຄົງທາງການເມືອງ, ຄວາມສະຫງົບຮຽບຮ້ອຍ ແລະຄວາມປອດໄພທາງສັງຄົມ. ປັບປຸງຍົກສູງຄຸນນະພາບ ແລະປະສິດທິຜົນຂອງໂຄງການປະສານງານລະຫວ່າງສະມາຄົມຜູ້ສູງອາຍຸຫວຽດນາມ ແລະ ກະຊວງ ຂະແໜງການ ແນວໂຮມປະເທດຊາດຫວຽດນາມ ບັນດາອົງຄະນະປະຊາຊົນ ບັນດາທ້ອງຖິ່ນ, ປະກອບສ່ວນເສີມຂະຫຍາຍສະຕິປັນຍາ ແລະປະສົບການຂອງຜູ້ສູງອາຍຸ ໃຫ້ມີສ່ວນຮ່ວມໃນການສ້າງກ້ອນກຳລັງມະຫາສາມັກຄີປວງຊົນທັງຊາດ, ພັດທະນາເສດຖະກິດ-ສັງຄົມ, ຮັກສາຄວາມໝັ້ນຄົງທາງການເມືອງ, ຄວາມສະຫງົບຮຽບຮ້ອຍ ແລະຄວາມປອດໄພທາງສັງຄົມ.

ທີຫົກ, ຍູ້​ແຮງ​ການ​ໃຫ້​ສັງຄົມດູແລຜູ້ສູງອາຍຸ ແລະ ການກະຈາຍເນື້ອໃນ ວິທີ ​ແລະ ປະ​ເພດຂອງ​ການ​ດູ​ແລ​ຜູ້​ສູງອາຍຸ; ເສີມຂະຫຍາຍບົດບາດຫຼັກຂອງສະມາຄົມໃນຂະບວນການ “ປະຊາຊົນທຸກຄົນເບິ່ງແຍງດູແລ ແລະ ເສີມຂະຫຍາຍບົດບາດຂອງຜູ້ສູງອາຍຸ”, ສູ້​ຊົນ​ໃຫ້​ຜູ້​ສູງອາຍຸ​ດຳລົງ​ຊີວິດ​ຢ່າງ​ມີ​ຄວາມ​ສຸກ, ​ສຸຂະພາບ​ເຂັ້ມ​ແຂງ ແລະ ມີ​ຄວາມ​ຜາ​ສຸກ​ໃນ​ຄອບຄົວ ແລະສັງຄົມ, ເສີມສ້າງ​ຄວາມເຊື່ອໝັ້ນຕໍ່​ພັກ ລັດ ​ແລະ ລະບອບ, ປະກອບສ່ວນ​ສືບ​ຕໍ່​ເສີມ​ຂະຫຍາຍ​ກຳລັງ​ແຮງແຫ່ງ​ມະຫາ​ສາມັກຄີ​​ປວງ​ຊົນ​ທັງ​ຊາດ ​ເພື່ອ​ເປົ້າໝາຍ “ປະຊາຊົນ​ຮັ່ງມີ, ປະ​ເທດຊາດເຂັ້ມ​ແຂງ, ມີປະຊາທິປະ​ໄຕ, ຍຸຕິ​ທຳ ​ແລະ ອາລະຍະທຳ”.

ໃນ​ສະ​ພາບ​ການ​ຂອງ​ປະ​ຊາ​ກອນ​ສູງໄວ​ຢ່າງ​ວ່ອງ​ໄວ​ຢູ່​ຫວຽດ​ນາມ​ໃນ​ປັດ​ຈຸ​ບັນ, ພວກເຮົາຕ້ອງເອົາໃຈໃສ່ບາງເນື້ອໃນຕໍ່ໄປນີ້:

ທີໜຶ່ງ, ​ສູນກາງຄວນ​ສະ​ຫຼຸບສັງລວມ ​ຄຳ​ສັ່ງ​ເລກທີ 59/CT-TW, ລົງ​ວັນ​ທີ 27 ກັນຍາ 1995, ຂອງ​ຄະນະ​ເລຂາທິການ​ສູນ​ກາງ​ພັກ​ສະໄໝ​ທີ VII, “ກ່ຽວກັບ​ການເບິ່ງແຍງ​ດູ​ແລ​ຜູ້ສູງອາຍຸ” ໂດຍໄວ ແລະ ອອກຄຳສັ່ງໃໝ່ ກ່ຽວ​ກັບ​ການ​ປົກ​ປັກ​ຮັກສາແລະ​ເບິ່ງ​ແຍງ​ດູ​ແລ ແລະເສີມຂະຫຍາຍບົດບາດຂອງຜູ້ສູງອາຍຸ ໃນສະຖານະການໃໝ່.

ທີສອງ, ສະພາແຫ່ງຊາດແກ້ໄຂແລະເພີ່ມເຕີມກົດໝາຍວ່າດ້ວຍຜູ້ສູງອາຍຸ; ລັດ​ຖະ​ບານ​ຈະ​ອອກ​ຍຸດ​ທະ​ສາດ​ແຫ່ງ​ຊາດ​ກ່ຽວ​ກັບ​ຜູ້​ສູງ​ອາ​ຍຸ​ຮອດ​ປີ 2030 ໂດຍ​ມີ​ວິ​ໄສ​ທັດ​ຮອດ​ປີ 2045 ໂດຍໄວ.

ທີສາມ, ບັນດາ​ອົງການ​ສື່​ມວນ​ຊົນຍູ້ແຮງການ​ໂຄສະນາ​ເຜີຍ​ແຜ່​ກ່ຽວ​ກັບ​ບົດບາດ​ຂອງ​ຜູ້​ສູງອາຍຸ ​ແລະ ສະມາຄົມ​ຜູ້​ສູງ​ອາຍຸ​ຫວຽດນາມ; ຄະນະພັກແລະອຳນາດການປົກຄອງທ້ອງຖິ່ນທຸກຂັ້ນ ຕ້ອງຍົກສູງຄວາມຮັບຮູ້ກ່ຽວກັບທີ່ຕັ້ງ ບົດບາດ ແລະ ການປະກອບສ່ວນຂອງຜູ້ສູງອາຍຸ ແລະ ສະມາຄົມຜູ້ສູງອາຍຸ ໃນພາລະກິດການສ້າງສາ ແລະ ປົກປັກຮັກສາປະເທດຊາດຫວຽດນາມສັງຄົມນິຍົົມ./.

----------------------------

(1) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 3, ໜ້າ 233.

(2) ຫຼັງຈາກ 20 ປີແຫ່ງການປະຕິບັດມະຕິໝາຍເລກ 23-NQ/TW ລົງວັນທີ 12 ມີນາ2003, ກອງປະຊຸມຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ IX “ກ່ຽວກັບການເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດ ເພື່ອປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມມີຍຸຕິທຳ ປະຊາທິປະໄຕ ແລະ ອາລະຍະທຳ”, ໃນປະຈຸບັນ ປະເທດມີຜູ້ສູງອາຍຸຫຼາຍກວ່າ 12,5 ລ້ານຄົນ, ຜູ້ສູງອາຍຸກຳລັງເຂົ້າຮ່ວມການອອກແຮງງານ ແລະການຜະລິດໂດຍກົງ ຫຼາຍກວ່າ 6,5 ລ້ານຄົນ, ໃນນັ້ນ ຜູ້ສູງອາຍຸ 400.000 ຄົນ ໄດ້ຮັບການຍົກຍ່ອງເປັນຜູ້ເຮັດເສດຖະກິດດີ; ຜູ້ສູງອາຍຸໄດ້ປະກອບສ່ວນແຮງງານຫຼາຍກວ່າ 11 ລ້ານວັນງານ, ບໍລິຈາກເງິນເກືອບ 3.500 ຕື້ດົ່ງ ແລະ ບໍລິຈາກທີ່ດິນ 25 ລ້ານຕາລາງແມັດ ເພື່ອກໍ່ສ້າງເສັ້ນທາງ, ລຳຄອງ, ເຮືອນວັດທະນະທໍາ, ໂຮງຮຽນ ແລະ ສະຖານທີ່ພະຍາບານ... ປະກອບສ່ວນກໍ່ສ້າງຊົນນະບົດໃໝ່; 64% ຂອງສະມາຊິກສົ່ງເສີມການສຶກສາ ແມ່ນຜູ້ສູງອາຍຸ; ຜູ້ສູງອາຍຸ 660.000 ຄົນມີສ່ວນຮ່ວມໃນວຽກງານຂອງພັກ, ອຳນາດການປົກຄອງ, ແນວໂຮມ, ອົງຄະນະມະຫາຊົນ ແລະກຸ່ມປອງດອງໃນລະດັບຮາກຖານ; ຜູ້ສູງອາຍຸຫຼາຍກວ່າ 300.000 ຄົນ ເຂົ້າຮ່ວມໃນກຸ່ມຮັກສາຄວາມໝັ້ນຄົງປະຊາຊົນ, ປ້ອງກັນແລະຕ້ານອາຊະຍາກຳ, ຮັກສາຄວາມສະຫງົບຮຽບຮ້ອຍຢູ່ຮາກຖານ, ສະໜອງແຫຼ່ງຂໍ້ມູນອັນມີຄ່າ 200.000 ແຫຼ່ງໃຫ້ກັບກອງກຳລັງຕຳຫຼວດ ແລະ ຊ່ວຍເຫຼືອຜູ້ຄົນ 90.000 ຄົນກັບຄືນສູ່ຊຸມຊົນ. ຜູ້ສູງອາຍຸຮວມກັນແກ້ໄຂບັນຫາຂໍ້ຂັດແຍ່ງແລະຂໍ້ຮ້ອງຮຽນຂອງປະຊາຊົນນັບໝື່ນຢ່າງມີປະສິດທິພາບ. ທົ່ວ​ປະ​ເທດ​ມີ​ສະ​ໂມ​ສອນ​ຜູ້​ອາຍຸ​ສູງຂັ້ນຮາກຖານ 77.000 ແຫ່ງ ດ້ວຍ​ຫຼາຍ​ປະ​ເພດ​ການ​ເຄື່ອນ​ໄຫວ​ວັດທະນະທຳ, ສິລະ​ປະ, ກິລາ​ກາຍະ​ກຳ, ​ໄດ້​ດຶງ​ດູດ​ຜູ້​ອາຍຸ​ສູງ​ກ່ວາ 2,5 ລ້ານ​ຄົນ​ເຂົ້າ​ຮ່ວມ. ໂດຍສະເພາະ, ສະມາຄົມຜູ້ສູງອາຍຸໄດ້ຈັດຕັ້ງສະໂມສອນຊ່ວຍເຫຼືອຕົນເອງລະຫວ່າງລຸ້ນຈຳນວນ 5.500 ແຫ່ງ ດຶງດູດຜູ້ສູງອາຍຸກວ່າ 275.000 ຄົນເຂົ້າຮ່ວມ. ຮູບແບບສະໂມສອນຊ່ວຍເຫຼືອຕົນເອງລະຫວ່າງລຸ້ນ ໄດ້ຮັບການຍົກຍ່ອງຢ່າງສູງຈາກອົງການແລະຊຸມຊົນ ທັງໃນປະເທດແລະຕ່າງປະເທດ ແລະ ໄດ້ຮັບລາງວັນຊະນະເລີດ “ຄວາມຄິດລິເລີ່ມເພື່ອການສູງໄວຢ່າງມີສຸຂະພາບດີໃນອາຊີ”

(3) ສະມາຄົມຜູ້ສູງອາຍຸທຸກຂັ້ນໄດ້ລະດົມອົງການ, ບຸກຄົນ ແລະວິສາຫະກິດຕ່າງໆ ເພື່ອສະໜັບສະໜູນຂອງຂວັນນັບໝື່ນອັນ, ສ້າງ​ເຮືອນ​ສາມັກຄີ​ໃໝ່​ນັບ​ພັນ​ຫຼັງ, ​ສ້າງເຮືອນ​ກຸສົນ ແລະ ​ເບິ່ງ​ແຍງ​ດູ​ແລ​ຜູ້​ມີ​ຄຸນງາມຄວາມດີ​ຕໍ່​ປະ​ເທດ. ທຸກປີ, ຜ່ານ​ເດືອນ​ແຫ່ງ​ການ​ເຄື່ອນ​ໄຫວ​ເພື່ອ​ຜູ້​ສູງ​ອາຍຸ​ຫວຽດນາມ, ສະມາຄົມ​ໄດ້​ລະດົມ​​ແຫຼ່ງກຳລັງ​ຂອງ​ສັງຄົມ​ເພື່ອຮ່ວມມືກັນໃນການ​ເບິ່ງ​ແຍງ​ດູ​ແລ​ຜູ້ສູງອາຍຸ​​ທີ່​ປະສົບ​ກັບ​ຄວາມ​ຫຍຸ້ງຍາກ, ຜູ້​ສູງອາຍຸ​ຈາກ​ຄອບຄົວທີ່​ທຸກ​ຍາກ, ຄອບຄົວ​ໃກ້​ຈະ​ທຸກ​ຍາກ, ຜູ້​ສູງອາຍຸ​ເປັນຄົນຊົນເຜົ່າສ່ວນໜ້ອຍ ຢູ່ເຂດປະສົບກັບຄວາມຫຍຸ້ງຍາກ, ປະກອບສ່ວນຫຼຸດຜ່ອນຄວາມແຕກໂຕນລະຫວ່າງຄົນຮັ່ງມີ ແລະ ຜູ້ທຸກຍາກ, ຄວາມບໍ່ສະເໝີພາບທາງສັງຄົມ, ສ້າງຄວາມເຫັນດີເຫັນພ້ອມຂອງສັງຄົມ, ເພີ່ມທະວີຄວາມໄວ້ເນື້ອເຊື່ອໃຈຂອງປະຊາຊົນຕໍ່ການນໍາພາຂອງພັກ. ປະຕິບັດແນວທາງ, ນະໂຍບາຍຂອງພັກ ແລະ ລັດຂອງພວກເຮົາ, ເປັນເວລາຫຼາຍປີມານີ້, ຜູ້ສູງອາຍຸໄດ້ຮັບການເບິ່ງແຍງດູແລທີ່ດີຂຶ້ນເລື້ອຍໆ; ທຸກປີໄດ້ຈັດຕັ້ງພິທີການຂໍພອນແລະສະເຫຼີມສະຫຼອງໃຫ້ກັບຜູ້ສູງອາຍຸຫຼາຍກວ່າ 1,1 ລ້ານຄົນ; ຜູ້ສູງອາຍຸກວ່າ 3 ລ້ານຄົນໄດ້ສ້າງບັນທຶກການກວດສຸຂະພາບ, ຜູ້ສູງອາຍຸ 4 ລ້ານ​ຄົນ​​ໄດ້​ຮັບ​ການ​ກວດ​ສຸ​ຂະ​ພາບ​ເປັນປະຈຳ; ຜູ້ສູງອາຍຸຫຼາຍກວ່າ 95% ມີບັດປະກັນສຸຂະພາບ (ຫຼາຍທ້ອງຖິ່ນໄດ້ສະໜັບສະໜູນຜູ້ສູງອາຍຸ 100%)   

(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 170.

* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1035 (ເດືອນເມສາ 2024)