ວາລະສານ ກອມມູນິດ

ອົງການທິດສະດີແລະການເມືອງ ຂອງຄະນະບໍລິຫານງານສູນກາງ ພັກກອມມູນິດຫວຽດນາມ

ຈຸດສຸມ

ການຮັບປະກັນຄວາມປອດໄພທາງສັງຄົມ
ໃນເງື່ອນໄຂຂອງການປັບຕົວທີ່ປອດໄພ, ໄຫວພິບ ແລະ
ການຄວບຄຸມການແຜ່ລະບາດຂອງໂຄວິດ-19 ຢ່າງມີປະສິດທິຜົນ

ໂດຍ ດ່າວ ງ້ອກຢູງ

ກຳມະການສູນກາງພັກ, ລັດຖະມົນຕິກະຊວງແຮງງານ-ທະຫານເສຍອົງຄະ ແລະ ສັງຄົມ

08:11, 16-10-2022

ວກ. - ການຮັບປະກັນຄວາມປອດໄພທາງສັງຄົມ ແມ່ນໜ້າທີ່ປະຈຳທີ່ສຳຄັນ,ແມ່ນຄວາມຮັບຜິດຊອບຂອງລະບົບການເມືອງແລະສັງຄົມທັງໝົດ. ໃນໄລຍະກວ່າ 2 ປີແຫ່ງການແຜ່ລະບາດຂອງພະຍາດໂຄວິດ-19 ກໍ່ຄືໃນ “ສະພາບປົກກະຕິໃໝ່”, ກະຊວງແຮງງານ-ທະຫານເສຍອົງຄະແລະສັງຄົມ ໄດ້ແນະນຳໃຫ້ພັກ ແລະ ລັດຖະບານອອກມະຕິສຳຄັນຫຼາຍສະບັບ ທີ່ມີລັກສະນະບຸກທະລຸແລະທັນການ ໃນການຮັບປະກັນຄວາມປອດໄພທາງສັງຄົມ ສໍາລັບຜູ້ຄົນແລະທຸລະກິດຫຼາຍສິບລ້ານຄົນ.

ຕອບສະໜອງຄຳຮຽກຮ້ອງຂອງສະຫາຍເລຂາທິການໃຫຍ່ ຫງວຽນ ຝູຈ້ອງ “ການປົກປັກຮັກສາສຸຂະພາບ ແລະ ຊີວິດຂອງປະຊາຊົນເປັນອັນດັບໜຶ່ງ ແລະ ສຳຄັນທີ່ສຸດ” ແລະ ຕໍ່ໜ້າການຜັນແປຢ່າງສັບສົນແລະຄາດເດົາໄດ້ຍາກ ຂອງການແຜ່ລະບາດຂອງພະຍາດໂຄວິດ-19, ພັກແລະລັດຫວຽດນາມໄດ້ມີການຊີ້ນຳຫຼາຍຢ່າງທີ່ຖືກຕ້ອງ, ທັນການ ແລະ ໄຫວພິບ; ສະພາແຫ່ງຊາດ, ລັດຖະບານ, ນາຍົກລັດຖະມົນຕີ ດ້ວຍທິດນຳ “ທັງເຮັດທັງຖອດຖອນບົດຮຽນ” ໄດ້ປະກາດໃຊ້ແຜນນະໂຍບາຍ, ນະໂຍບາຍ, ວິທີແກ້ໄຂຫຼາຍຢ່າງ ເພື່ອແນໃສ່ປະຕິບັດເປົ້າໝາຍຄູ່ “ທັງປ້ອງກັນແລະຄວບຄຸມພະຍາດ ແລະ ທັງພັດທະນາເສດຖະກິດ-ສັງຄົມ”, ປະກອບສ່ວນແບ່ງປັນແລະແກ້ໄຂຄວາມຫຍຸ້ງຍາກໃນການຜະລິດ ທຸລະກິດ, ສະໜັບສະໜູນຊ່ວຍເຫຼືອວິສາຫະກິດ ຜູ້ຄົນ ຜູ້ອອກແຮງງານ ເຊິ່ງສຸມໃສ່ 3 ກຸ່ມນະໂຍບາຍ: ກຸ່ມນະໂຍບາຍປ້ອງກັນແລະຄວບຄຸມພະຍາດ, ກຸ່ມນະໂຍບາຍຮັບປະກັນຄວາມປອດໄພທາງສັງຄົມ ແລະ ກຸ່ມນະໂຍບາຍສະໜັບສະໜູນການຟື້ນຟູການຜະລິດແລະທຸລະກິດ.

ການແຜ່ລະບາດໃຫຍ່ຂອງພະຍາດໂຄວິດ-19, ໂດຍສະເພາະການລະບາດຄັ້ງທີ 4 ໄດ້ສົ່ງຜົນກະທົບອັນຮ້າຍແຮງຕໍ່ແຮງງານ, ວຽກເຮັດງານທຳ ແລະ ຄວາມປອດໄພທາງສັງຄົມຂອງປະຊາຊົນ. ຕາມຂໍ້ມູນຂອງກົມໃຫຍ່ສະຖິຕິ, ຄາດວ່າຈຳນວນຜູ້ສູນເສຍວຽກເຮັດງານທຳກວມປະມານ 5% ແລະຄົນທີ່ຕ້ອງຢຸດງານ ຫຼືຢຸດການຜະລິດທຸລະກິດຊົ່ວຄາວແມ່ນ 32%; ເກືອບ 50% ຂອງຄົນມີເວລາເຮັດວຽກຫຼຸດລົງ ຫຼືຖືກບັງຄັບໃຫ້ຢຸດງານສະຫຼັບ; ປະມານ 80% ຂອງຄົນງານມີລາຍໄດ້ຫຼຸດລົງ. ລາຍໄດ້ສະເລ່ຍຕໍ່ເດືອນຂອງຄົນງານໃນໄຕມາດທີສາມປີ 2021 ແມ່ນ 5,2 ລ້ານດົ່ງ, ຫຼຸດລົງ 877 ພັນດົ່ງ ເມື່ອທຽບກັບໄຕມາດທີສອງ ແລະຫຼຸດ 603 ພັນດົ່ງ ເມື່ອທຽບກັບໄລຍະດຽວກັນຂອງປີກາຍ. ນີ້ແມ່ນການຫຼຸດລົງຫຼາຍພໍຄວນ, ເຮັດໃຫ້ກຳລັງຊື້ຂອງຕະຫຼາດອ່ອນແອລົງ ແລະ ສົ່ງຜົນເສຍຕໍ່ຊີວິດຂອງຄົນງານ.

ໃນສະຖານະການດັງກ່າວ, ເພື່ອປະຕິບັດພາລະໜ້າທີ່ທີ່ໄດ້ຮັບມອບໝາຍ, ກ່ອນອື່ນໝົດ, ກະຊວງແຮງງານ-ທະຫານເສຍອົງຄະແລະສັງຄົມ ໄດ້ເປັນເຈົ້າການສະເໜີກັບພັກ, ລັດຖະບານໃຫ້ຜັນຂະຫຍາຍບັນດານະໂຍບາຍສັງຄົມຢ່າງເປັນແບບສະບັບ ພື້ນຖານ ໂດຍສຸມໃສ່ເບິ່ງແຍງດູແລບັນດາຜູ້ທີ່ມີຄຸນງາມຄວາມດີຕໍ່ການປະຕິວັດ, ຜູ້ໄດ້ຮັບການອຸປະຖຳທາງສັງຄົມ, ຜູ້ດ້ອຍໂອກາດ,... ໂດຍສະເພາະ ໃນເວລາທີ່ທົ່ວປະເທດຖືກຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດໂຄວິດ-19. ໃຫ້ຄຳປຶກສາສະເໜີໃຫ້ລັດຖະບານປະກາດໃຊ້ດຳລັດ 2 ສະບັບ ທີ່ກຳນົດເນື້ອໃນລະອຽດຂອງບາງມາດຕາໃນກົດດຳລັດວ່າດ້ວຍການໃຫ້ຄ່າຕອບແທນພິເສດແກ່ຜູ້ທີ່ມີຄຸນງາມຄວາມດີຕໍ່ການປະຕິວັດ (ປີ 2020), ຮັບປະກັນການເບິ່ງແຍງດູແລຜູ້ທີ່ມີຄຸນງາມຄວາມດີຕໍ່ການປະຕິວັດເປັນຢ່າງດີ ທັງທາງດ້າວັດຖຸແລະຈິດໃຈ; ຂະຫຍາຍການປົກຫຸ້ມຂອງນະໂຍບາຍ ແລະ ຍົກສູງມາດຕະຖານການຊ່ວຍເຫຼືອສັງຄົມ ໂດຍຜ່ານການເປັນທີ່ປຶກສາໃຫ້ລັດຖະບານປະກາດໃຊ້ດຳລັດເລກທີ 20/2021/NĐ-CP, ລົງວັນທີ 15 ມີນາ 2021, ກ່ຽວກັບການກຳນົດນະໂຍບາຍການຊ່ວຍເຫຼືອທາງສັງຄົມ ສໍາລັບຜູ້ໄດ້ຮັບການອຸປະຖຳທາງສັງຄົມ, ເພີ່ມມາດຕະຖານການຊ່ວຍເຫຼືອທາງສັງຄົມ ໃຫ້ຜູ້ໄດ້ຮັບການອຸປະຖຳທາງສັງຄົມ ແຕ່ວັນທີ 1 ກໍລະກົດ 2021 ເປັນ 360.000 ດົ່ງ/ເດືອນ, ຂະຫຍາຍໄປໃຫ້ກຸ່ມເປົ້າໝາຍຈຳນວນໜຶ່ງ; ຍື່ນສະເໜີຢ່າງທັນການ ໃຫ້ຄະນະເລຂາທິການສູນກາງພັກ ອອກຄຳສັ່ງເລກທີ 05-CT/TW, ລົງວັນທີ່ 23 ມິຖຸນາ 2021, ວ່າດ້ວຍການເພີ່ມທະວີການນຳພາຂອງພັກ ຕໍ່ວຽກງານການຫຼຸດຜ່ອນຄວາມທຸກຍາກຢ່າງຍືນຍົງຮອດປີ 2030; ໃຫ້ຄຳປຶກສາໃຫ້ລັດຖະບານ ປະກາດໃຊ້ດຳລັດເລກທີ 108/2021/NĐ-CP, ລົງວັນທີ 7 ທັນວາ 2021, ວ່າດ້ວຍການປັບເງິນບໍານານ, ເງິນອຸດໜູນປະກັນສັງຄົມ ແລະ ເງິນອຸດໜູນລາຍເດືອນ (ມີຜົນບັງຄັບໃຊ້ແຕ່ວັນທີ 1 ມັງກອນ 2022), ໂດຍເພີ່ມຂຶ້ນ 7,4% ຂອງເງິນບໍານານ, ເງິນອຸດໜູນປະກັນສັງຄົມ, ເງິນອຸດໜູນລາຍເດືອນ ສໍາລັບຜູ້ໄດ້ຮັບເງິນບໍານານຕໍ່າ, ຜູ້ກະສຽນອາຍຸກ່ອນປີ 1995; ເພື່ອເປີດກວ້າງການຮ່ວມມືສາກົນທາງດ້ານຄວາມປອດໄພທາງສັງຄົມ ແລະ ສະຫວັດດີການສັງຄົມ, ລັດຖະບານໄດ້ລົງນາໃນສັນຍາສອງຝ່າຍລະຫວ່າງຫວຽດນາມ ແລະ ສ.ເກົາຫຼີ ກ່ຽວກັບການປະກັນສັງຄົມກັບລັດຖະບານ ສ.ເກົາຫຼີ. ນີ້ແມ່ນສັນຍາລະດັບລັດຖະບານສະບັບທຳອິດ ກ່ຽວກັບການປະກັນສັງຄົມ ທີ່ຫວຽດນາມໄດ້ລົງນາມກັບຄູ່ຮ່ວມມືຕ່າງປະເທດ, ຮັບປະກັນສິດແລະຜົນປະໂຫຍດທີ່ຖືກຕ້ອງຕາມກົດໝາຍ ສຳລັບຄົນງານຂອງ 2 ປະເທດ.

ທີສອງ, ໃຫ້ຄຳປຶກສາໃຫ້ລັດຖະບານ, ນາຍົກລັດຖະມົນຕີ ອອກແຜນນະໂຍບາຍແລະນະໂຍບາຍຫຼາຍສະບັບ, ລວມທັງນະໂຍບາຍທີ່ບໍ່ເຄີຍມີມາກ່ອນ, ເຊັ່ນ: ມະຕິເລກທີ 68/NQ-CP, ລົງວັນທີ 1 ກໍລະກົດ 2021 ວ່າດ້ວຍນະໂຍບາຍໜູນຊ່ວຍຜູ້ອອກແຮງງານແລະຜູ້ຈ້າງງານທີ່ປະສົບຄວາມຫຍຸ້ງຍາກຍ້ອນການແຜ່ລະບາດຂອງພະຍາດໂຄວິດ-19 ແລະ ມະຕິເລກທີ 116/NQ-CP, ລົງວັຍທີ 24 ກັນຍາ 2021 ວ່າດ້ວຍນະໂຍບາຍໃຊ້ກອງທຶນປະກັນການຫວ່າງງານ ເພື່ອໜູນຊ່ວຍຜູ້ອອກແຮງງານແລະຜູ້ຈ້າງງານທີ່ຖືກຜົນກະທົບຈາກການແຜ່ລະບາດຂອງພະຍາດໂຄວິດ-19; ດຳເນີນຫຼາຍມາດຕະການແກ້ໄຂ, ອອກຊຸດໜູນຊ່ວຍທັນການຫຼາຍຢ່າງ ໃຫ້ແກ່ປະຊາຊົນ, ຜູ້ອອກແຮງງານ, ຜູ້ຈ້າງງານ, ຊ່ວຍໃຫ້ພວກເຂົາຜ່ານຜ່າຄວາມຫຍຸ້ງຍາກ, ແກ້ໄຂຜົນຮ້າຍຈາກການແຜ່ລະບາດຂອງພະຍາດ. ອາດຈະຢືນຢັນໄດ້ວ່າ, ບັນດານະໂຍບາຍໜູນຊ່ວຍປະຊາຊົນແລະວິສາຫະກິດທີ່ຖືກຜົນກະທົບຈາກການແຜ່ລະບາດຂອງພະຍາດໂຄວິດ-19, ໂດຍສະເພາະແມ່ນ ມະຕິເລກທີ 68/NQ-CP ແລະ ຂໍ້ຕັດສິນຕົກລົງເລກທີ 23/2021/QĐ-TTg ວ່າດ້ວຍການໜູນຊ່ວຍຜູ້ອອກແຮງງານ ແລະຜູ້ຈ້າງງານ ທີ່ປະສົບກັບຄວາມຫຍຸ້ງຍາກຍ້ອນພະຍາດໂຄວິດ-19 ທີ່ໄດ້ຮັບການຜັນຂະຫຍາຍໃນທິດທາງທີ່ຖືກຕ້ອງ, ແທດຈິງ, ສູ່ກຸ່ມເປົ້າໝາຍທີ່ຖືກຕ້ອງ. ມະຕິສອງສະບັບໄດ້ຮັບການຜັນຂະຫຍາຍດ້ວຍຂັ້ນຕອນທີ່ເປີດກວ້າງ, ໂດຍຫຼຸດຂັ້ນຕອນລົງ 2/3, ຫຼຸດເວລາລົງ 2/3 ເມື່ອທຽບກັບນະໂຍບາຍທີ່ອອກກ່ອນໜ້ານີ້.

ຜົນທີ່ໄດ້ຮັບຄື, ໃນເວລາພຽງສອງສາມເດືອນ, ພາຍໃຕ້ເງື່ອນໄຂທີ່ຫຍຸ້ງຍາກລຳບາກ, ໃນສະພາບການທ້ອງຖິ່ນປະຕິບັດການເວັ້ນໄລຍະຫ່າງທາງສັງຄົມ ແລະ ເພີ່ມທະວີການເວັ້ນໄລຍະຫ່າງທາງສັງຄົມ, ການປະຕິບັດມະຕິເລກທີ 68/NQ-CP ແລະ ມະຕິເລກທີ 116/NQ-CP ໄດ້ນຳມາເຊິ່ງປະສິດທິຜົນຕົວຈິງ, ໄດ້ຮັບຄວາມເຫັນດີຢ່າງສູງຈາກປະຊາຊົນ, ຜູ້ອອກແຮງງສນ ແລະ ຜູ້ຈ້າງງານ. ນີ້ແມ່ນນະໂຍບາຍທີ່ເປັນມະນຸດອາລະຍະທຳ, ສະແດງຄວາມຫ່ວງໄຍແລະການສະໜັບສະໜູນປະຊາຊົນແລະຜູ້ອອກແຮງງານ ຂອງພັກແລະລັດ, ການຮ່ວມແຮງຮ່ວມໃຈກັນຂອງປະຊາຊົນ ເພື່ອຜ່ານຜ່າຄວາມຫຍຸ້ງຍາກ.

ຈາກບັນດານະໂຍບາຍນີ້ແລະການຮ່ວມແຮງຮ່ວມໃຈກັນຂອງປະຊາຊົນໃນທົ່ວປະເທດ, ປະຊາຊົນແລະຜູ້ອອກແຮງງານສ່ວນຫຼາຍ ໄດ້ເປັນເຈົ້າການຜ່ານຜ່າຄວາມຫຍຸ້ງຍາກແລະບືນຕົວຂຶ້ນ, ວິສາຫະກິດສ່ວນໃຫຍ່ໄດ້ແບ່ງປັນກັບຜູ້ອອກແຮງງານ ແລະ ຮ່ວມມືກັນເພື່ອເອົາຊະນະໂລກລະບາດ.

ບັນດານະໂຍບາຍບໍ່ພຽງແຕ່ມຸ່ງເປົ້າໄປທີ່ຜູ້ອອກແຮງງານເທົ່ານັ້ນ ແຕ່ຍັງລວມເຖິງຜູ້ທີ່ດ້ອຍໂອກາດ ເຊັ່ນ: ຜູ້ເຖົ້າ, ເດັກກຳພ້າ, ຄົນພິການ,... ແລະໄດ້ຮັບການຜັນຂະຫຍາຍປະຕິບັດຢ່າງຕັ້ງໜ້າ, ວ່ອງໄວ ແລະ ງ່າຍໃນການເຂົ້າເຖິງປະຊາຊົນ.

ຄຽງຂ້າງນັ້ນ, ຈາກມະຕິເລກທີ 68/NQ-CP, ຫຼາຍແຂວງ, ນະຄອນໄດ້ຜັນຂະຫຍາຍ ແລະ ສ້າງຮູບແບບການໜູນຊ່ວຍປະຊາຊົນທີ່ຫຼາກຫຼາຍ ເຊັ່ນ ຖົງນິລະໄພ, ຖົງອາຫານໃຫ້ແຕ່ລະຄົວເຮືອນໃນພື້ນທີ່ດຳເນີນການເວັ້ນໄລຍະຫ່າງທາງສັງຄົມ ເພື່ອໃຫ້ປະຊາຊົນມີຄວາມສະຫງົບປອດໄພ ໃນການປ້ອງກັນແລະຕ້ານການແຜ່ລະບາດຂອງພະຍາດ. ໃນປີ 2021 ພຽງປີດຽວ, ຜ່ານການປະຕິບັດມະຕິເລກທີ 68/NQ-CP ແລະມະຕິເລກທີ 116/NQ-CP, ສູນກາງແລະທ້ອງຖິ່ນໄດ້ໃຊ້ງົບປະມານທັງໝົດ 74.106 ຕື້ດົ່ງ ເພື່ອປະຕິບັດນະໂຍບາຍ, ໜູນຊ່ວຍຜູ້ຈ້າງງານຈຳນວນ 741.930 ຄົນ (ມູນຄ່າ 13.033 ຕື້ດົ່ງ), ໜູນຊວຍຜູ້ອອກແຮງງານແລະກຸ່ມເປົ້າໝາຍອື່ນ 43.780.000 ຄົນ (ມູນຄ່າ 61.073 ຕື້ດົ່ງ). ໃນນັ້ນ, ປະຕິບັດມະຕິເລກທີ 68/NQ-CP (ເສີມດ້ວນມະຕິເລກທີ 126/NQ-CP, ລົງວັນທີ 8 ຕຸລາ 2021 ປັບປຸງເພີ່ມເຕີມມະຕິເລກທີ 68/NQ-CP ລົງວັນທີ 1 ກໍລະກົດ 2021, ຂອງລັດຖະບານ ວ່າດ້ວຍບາງນະໂຍບາຍໜູນຊ່ວຍຊາວຜູ້ອອກແຮງງານ ແລະ ຜູ້ຈ້າງງານທີ່ປະສົບກັບຄວາມຫຍຸ້ງຍາກຍ້ອນການແຜ່ລະບາດຂອງພະຍາດໂຄວິດ-19) ແລະ ຂໍ້ຕັດສິນຕົກລົງເລກທີ່ 23/2021/QĐ-TTg (ເສີມດ້ວຍຂໍ້ຕັດສິນຕົກລົງເລກທີ່ 33/2021/QĐ-TTg, ລົງວັນທີ 6 ພະຈິດ 2021, ຂອງນາຍົກລັດຖະມົນຕີ: ປັບປຸງເພີ່ມເຕີມບາງມາດຕາຂອງຂໍ້ຕັດສິນຕົກລົງເລກທີ່ 23/2021/QĐ-TTg, ລົງວັນທີ 7 ກໍລະກົດ 2021, ຂອງນາຍົກລັດຖະມົນຕີ ກຳນົດກ່ຽວກັບການປະຕິບັດນະໂຍບາຍຈຳນວນໜຶ່ງ ເພື່ອໜູນຊ່ວຍຜູ້ອອກແຮງງານແລະຜູ້ຈ້າງງານທີ່ປະສົບກັບຄວາມຫຍຸ້ງຍາກຍ້ອນການແຜ່ລະບາດຂອງພະຍາດໂຄວິດ-19), ທົ່ວປະເທດມີຜູ້ຈ້າງງານ 378.330 ຄົນ, ຜູ້ອອກແຮງງານແລະກຸ່ມເປົ້າໝາຍອື່ນຫຼາຍກວ່າ 30.900.000 ຄົນ ໄດ້ຮັບການໜູນຊ່ວຍຈາກງົບປະມານເປັນເງິນ 35.991 ຕື້ດົ່ງ. ປະຕິບັດມະຕິເລກທີ 116/NQ-CP ແລະ ຂໍ້ຕັດສິນຕົກລົງເລກທີ່ 28/2021/QĐ-TTg, ວັນທີ 1 ຕຸລາ 2021, ຂອງນາຍົກລັດຖະມົນຕີ: ກຳນົດກ່ຽວກັບການປະຕິບັດນະໂຍບາຍໃຊ້ກອງທຶນປະກັນການຫວ່າງງານ ເພື່ອໜູນຊ່ວຍຜູ້ອອກແຮງງານ ແລະ ຜູ້ຈ້າງງານທີ່ຖືກຜົນກະທົບຈາກການແຜ່ລະບາດຂອງພະຍາດໂຄວິດ-19, ມີຜູ້ຈ້າງງານ 363.600 ຄົນ ແລະ ຜູ້ອອກແຮງງານ 12.860.000 ຄົນ ທີ່ໄດ້ຮັບເງິນໜູນຊ່ວຍເກືອບ 38.115 ຕື້ດົ່ງ ຈາກກອງທຶນປະກັນການຫວ່າງງານ.

ເຖິງວ່າແຫຼ່ງກຳລັງບໍ່ທັນຫຼາຍກໍ່ຕາມ, ແຕ່ກໍ່ໄດ້ຕອບສະໜອງຄວາມຕ້ອງການອັນຮີບດ່ວນຂອງວຽກງານຮັບປະກັນຄວາມປອດໄພທາງສັງຄົມ, ໜູນຊ່ວຍເສດຖະກິດ, ພິເສດແມ່ນ ບັນດາສູນກາງ, ບັນດາພື້ນທີ່ສຳຄັນ ໃຫ້ຜ່ານຜ່າຄວາມຫຍຸ້ງຍາກ. ໝາກຜົນທີ່ບັນລຸໄດ້ນັ້ນ ແມ່ນຍ້ອນການເຂົ້າຮ່ວມຢ່າງແຂງຂັນ, ຄວາມຕັດສິນໃຈສູງສຸດ ຂອງທົ່ວລະບົບການເມືອງ, ປະຊາຊົນທົ່ວປະເທດ ແລະ ກຳລັງແຖວໜ້າໃນການຕ້ານພະຍາດລະບາດ ເຊິ່ງໄດ້ເສີມຂະຫຍາຍນ້ຳໃຈສາມັກຄີ, ຄວາມຮ່ວມແຮງຮ່ວມໃຈກັນ, ລະດົມທຸກແຫຼ່ງກຳລັງ ເພື່ອຄວບຄຸມການແຜ່ລະບາດຂອງພະຍາດ, ປົກປັກຮັກສາສຸຂະພາບ, ເບິ່ງແຍງດູແລແລະຮັກສາຊີວິດການເປັນຢູ່ ຂອງປະຊາຊົນໃຫ້ໝັ້ນຄົງ, ຄວາມພະຍາຍາມຮັກສາການຜະລິດແລະທຸລະກິດ. ພ້ອມກັນນັ້ນແມ່ນຄວາມພະຍາຍາມອັນພົ້ນເດັ່ນຂອງທຸກຂັ້ນ ທຸກຂະແໜງການ, ປະຊາຄົມວິສາຫະກິດ ແລະ ປະຊາຊົນໃນທົ່ວປະເທດ, ເພື່ອໃຫ້ຕະຫຼາດແຮງງານຟື້ນຕົວຢ່າງໄວວາໃນຊຸມເດືອນສຸດທ້າຍຂອງປີ 2021 ແລະ ເລີ່ມສ້າງ “ແຮງກະໂດດ” ທີ່ເຂັ້ມແຂງສໍາລັບໄລຍະຕໍ່ໄປ.

ໂດຍຕິດຕາມການປ່ຽນແປງຂອງຕະຫຼາດແຮງງນຢ່າງໃກ້ຊິດ, ຂະແໜງການແຮງງານ, ທະຫານເສຍອົງຄະແລະສັງຄົມ ໄດ້ສຸມໃສ່ໃຫ້ຄຳປຶກສາ, ກ່າວເຕືອນ ແລະສະເໜີໃຫ້ປະຕິບັດມາດຕະການຕ່າງໆຢ່າງທັນການ ເພື່ອຜ່ານຜ່າສະພາບການແຕກຫັກຂອງຕ່ອງໂສ້ການສະໜອງແຮງງານພາກສ່ວນ, ຮັກສາສະຖຽນລະພາບຂອງຕະຫຼາດແຮງງານ; ຕັ້ງໜ້າແລະເປັນເຈົ້າການໃນການຄົ້ນຄວ້າ ສະເໜີຕໍ່ສູນກາງພັກ, ສະພາແຫ່ງຊາດ ແລະລັດຖະບານ ກ່ຽວກັບບັນດາມາດຕະການຟື້ນຟູ ແລະ ບັນດານະໂຍບາຍຮັບປະກັນຄວາມປອດໄພທາງສັງຄົມ ຕໍ່ໜ້າຜົນກະທົບຈາກການແຜ່ລະບາດຂອງພະຍາດໂຄວິດ-19. ໃນໂຄງການຟື້ນຟູແລະພັດທະນາຕະຫຼາດແຮງງານ ໄປຄຽງຄູ່ກັບການຮັບປະກັນຄວາມປອດໄພທາງສັງຄົມນັ້ນ, ກະຊວງແຮງງານ-ທະຫານເສຍອົງຄະແລະສັງຄົມ ໄດ້ລາຍງານຕໍ່ລັດຖະບານ ແລະ ສະເໜີໂຄງການທີ່ມີສອງໄລຍະ: ໄລຍະການຟື້ນຟູ ແລະ ໄລຍະການພັດທະນາ ໂດຍມີກົນໄກແລະນະໂຍບາຍທີ່ຄົບຊຸດ, ຮຸນແຮງ ແລະ ເຂັ້ມແຂງພຽງພໍ. ໃນນັ້ນ, ສຸມໃສ່ 7 ກຸ່ມນະໂຍບາຍ: ການຊ່ວຍເຫຼືອດ້ານເງິນສົດໃຫ້ແກ່ຄົນງານບາງກຸ່ມ ເພື່ອຮັກສາຄົນງານ ແລະ ດຶງດູດຄົນງານໃຫ້ກັບມາເຮັດວຽກ; ຊ່ວຍໃຫ້ຄົວເຮືອນທຸລະກິດ ແລະຜູ້ອອກແຮງງານ ໄດ້ຮັບເງິນກູ້ບຸລິມະສິດ; ເຊື່ອມໂຍງການສະໜອງ - ຄວາມຕ້ອງການດ້ານແຮງງານ; ຊ່ວຍໜູນການຝຶກອົບຮົມ ແລະ ການຝຶກອົບຮົມຄືນໃໝ່; ລົງທຶນໃນສິ່ງອຳນວຍຄວາມສະດວກເພື່ອເບິ່ງແຍງຜູ້ອ່ອນແອ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດ; ດຳເນີນການປ່ຽນແປງດິຈິຕອນໃນຂົງເຂດແຮງງານໂດຍເຊື່ອມໂຍງກັບຖານຂໍ້ມູນແຫ່ງຊາດກ່ຽວກັບພົນລະເມືອງ; ພັດທະນາເຮືອນຢູ່ສັງຄົມໃຫ້ແກ່ຄົນງານທຸກຍາກ, ຄົນງານອົບພະຍົບ.

ຜ່ານການແຜ່ລະບາດຂອງພະຍາດໂຄວິດ-19, ໄດ້ໃຫ້ຄວາມເຂົ້າໃຈຢ່າງຈະແຈ້ງກວ່າ ກ່ຽວກັບບົດບາດສຳຄັນຂອງລະບົບປະກັນສັງຄົມ ໃນການຮັກສາຄວາມປອດໄພຂອງປະຊາຊົນໃນສະພາບການຜັນຜວນທາງເສດຖະກິດ - ສັງຄົມ, ການກະກຽມຊັບພະຍາກອນ ເພື່ອຮັບປະກັນການບໍລິການສັງຄົມຂັ້ນພື້ນຖານ ເພື່ອຫຼີກລ່ຽງຄວາມສ່ຽງ ແລະ ສ້າງໂອກາດທີ່ເທົ່າທຽມກັນ ໃຫ້ແກ່ປະຊາຊົນທັງໝົດ. ປີ 2022, ກະຊວງແຮງງານ-ທະຫານເສຍອົງຄະແລະສັງຄົມ ໄດ້ແລະພວມສຸມໃສ່ປະຕິບັດວິທີແກ້ໄຂທີ່ສໍາຄັນຈໍານວນໜຶ່ງດັ່ງຕໍ່ໄປນີ້:

ທີໜຶ່ງ, ກວດຄືນ, ປັບປຸງບູລະນະລະບົບກົດໝາຍ, ກົນໄກ, ນະໂຍບາຍຮັບປະກັນຄວາມປອດໄພທາງສັງຄົມ ໂດຍສຸມໃສ່ສາມເນື້ອໃນ: ທັກສະແຮງງານ, ວຽກ ວຽກງານທີ່ເໝາະສົມ ແລະ ຄວາມປອດໄພທາງສັງຄົມທີ່ຍືນຍົງ ດ້ວຍສອງເສົາຄ້ຳພື້ນຖານຄື ການປະກັນສັງຄົມ ແລະ ການປະກັນສຸຂະພາບ. ຄົ້ນຄວ້າການກໍ່ສ້າງເຄືອຂ່າຍຄວາມປອດໄພທາງສັງຄົມຕາມທິດຂະຫຍາຍຂອບເຂດ ແລະ ເປົ້າໝາຍຜູ້ໄດ້ຮັບປະກັນ ໃນທັງ 3 ຂອດຄື: ການປ້ອງກັນ, ການບັນເທົາ ແລະ ການແກ້ໄຂຄວາມສ່ຽງ; ດ້ວຍທັດສະນະ ທັງສະໜັບສະໜູນ, ທັງສົ່ງເສີມຄວາມຕັ້ງໜ້າພະຍາຍາມຂອງຜູ້ໄດ້ຮັບການປະກັນ, ຜ່ານພົ້ນການເອື່ອຍອີງ, ສອດຄ່ອງເໝາະສົມ, ເຂົ້າໃກ້ກັບມາດຕະຖານສາກົນ.

ທີສອງ, ສະໜັບສະໜູນການຟື້ນຟູແລະການພັດທະນາຕະຫຼາດແຮງງານ, ຮັກສາກຳລັງຄົນງານ, ໂດຍສະເພາະແມ່ນໃນເຂດອຸດສາຫະກຳ, ເຂດປຸງແຕ່ງສິນຄ້າສົ່ງອອກ ແລະ ບັນດາສູນການເຕີບໂຕ, ເພີ່ມທະວີມາດຕະການຕ່າງໆ ເພື່ອຮັກສາຄົນງານທີ່ກຳລັງເຮັດວຽກ, ບໍ່ໃຫ້ມີການຂາດຕອນໃນຕ່ອງໂສ້ສະໜອງແຮງງານໃຫ້ແກ່ການຜະລິດ ແລະ ທຸລະກິດຂອງວິສາຫະກິດ; ສະໜັບສະໜູນໃຫ້ຄົນງານກູ້ຢືມເງິນເພື່ອສ້າງວຽກເຮັດງານທຳ ຈາກກອງທຶນຈັດຫາງານແຫ່ງຊາດ. ນີ້ແມ່ນໜຶ່ງໃນບັນດາໜ້າທີ່ບຸລິມະສິດອັນດັບໜຶ່ງ ເພື່ອຟື້ນຟູເສດຖະກິດໃນໄລຍະທີ່ຈະມາເຖິງ.

ທີ່ສາມ, ສ້າງແລະຜັນຂະຫຍາຍປະຕິບັດບັນດາໂຄງການເປົ້າໝາຍແຫ່ງຊາດໄລຍະປີ 2021-2025 ຢ່າງຄົບຊຸດແລະມີປະສິດທິຜົນ, ໂດຍສະເພາະແມ່ນໂຄງການເປົ້າໝາຍແຫ່ງຊາດເພື່ອການຫຼຸດຜ່ອນຄວາມທຸກຍາກແບບຍືນຍົງ ໄລຍະປີ 2021-2025 ຕາມທິດທາງຮອບດ້ານແລະຫຼາກຫຼາຍມິຕິ; ຮັບປະກັນຊັບພະຍາກອນ, ປະຕິບັດນະໂຍບາຍຫຼຸດຜ່ອນຄວາມທຸກຍາກແບບຍືນຍົງຢ່າງເຕັມສ່ວນ ດ້ວຍຄຳຂວັນ “ທົ່ວປະເທດຮ່ວມມືຮ່ວມແຮງກັນເພື່ອຄົນທຸກຍາກ, ບໍ່ປະໃຫ້ໃຜຢູ່ເບື້ອງຫຼັງ”.

ທີສີ່, ປະຕິບັດບັນດາເນື້ອໃນການປະຕິຮູບນະໂຍບາຍປະກັນສັງຄົມຢ່າງຄົບຊຸດ, ປັບປຸງບູລະນະນະໂຍບາຍປະກັນການຫວ່າງງານ ມຸ່ງໄປສູ່ຄວາມເປັນເຈົ້າການໃນການປ້ອງກັນແລະຫຼີກລ່ຽງການຫວ່າງງານ, ຮັບປະກັນວຽກເຮັດງານທຳຕາມຈິດໃຈຂອງມະຕິເລກທີ 28-NQ/TW, ລົງວັນທີ 23 ພຶດສະພາ 2018 ວ່າດ້ວຍການປະຕິຮູບນະໂຍບາຍປະກັນສັງຄົມ; ສະເໜີໃຫ້ລັດຖະບານແກ້ໄຂປັບປຸງກົດໝາຍວ່າດ້ວຍການປະກັນສັງຄົມ, ຂະຫຍາຍ ແລະ ພັດທະນາຜູ້ເຂົ້າຮ່ວມປະກັນສັງຄົມ (ລວມທັງບັງຄັບແລະສະໝັກໃຈ), ຮັບປະກັນເທື່ອລະກ້າວຄວາມປອດໄພທາງສັງຄົມ ຈາກຜົນກະທົບທາງລົບ ແລະ ຄວາມສ່ຽງຂອງຕະຫຼາດແຮງງານ; ຍູ້ແຮງການນຳໃຊ້ເຕັກໂນໂລຊີຂໍ້ມູນຂ່າວສານ, ປະຕິຮູບຂັ້ນຕອນການບໍລິຫານໃນການແກ້ໄຂລະບອບປະກັນສັງຄົມ, ປະກັນການຫວ່າງງານ.

ທີຫ້າ, ເພີ່ມທະວີປະສິດທິຜົນຂອງບັນດານະໂຍບາຍຄວາມປອດໄພທາງສັງຄົມທີ່ມີຢູ່, ພະຍາຍາມມຸ່ງໄປສູ່ລະບົບຄວາມປອດໄພທາງສັງຄົມທີ່ຕອບສະໜອງກັບການກະທົບໃນວົງກວ້າງ: ສ້າງໂຄງເລື່ອງ, ແຜນການຮັບປະກັນຄວາມປອດໄພທາງສັງຄົມສຳລັບປະຊາຊົນ, ຄອບຄົວທຸກຍາກ, ຜູ້ອ່ອແອດ້ອຍໂອກາດໃນພື້ນທີ່ ໃຫ້ສອດຄ່ອງກັບສະພາບການປະຕິບັດການປ້ອງກັນແລະຕ້ານການແຜ່ລະບາດຂອງພະຍາດໂຄວິດ-19. ສືບຕໍ່ປັບປຸງບູລະນະກົນໄກ, ນະໂຍບາຍປະກັນຄວາມປອດໄພ ແນໃສ່ຂະຫຍາຍການເຂົ້າຮ່ວມຂອງທຸກພາກສ່ວນທີ່ກ່ຽວຂ້ອງ ເພື່ອສະໜອງການບໍລິການປະກັນໄພທີ່ມີຄຸນນະພາບທີ່ດີກວ່າແລະຫຼາຍກວ່າເກົ່າ, ສ້າງເງື່ອນໄຂອຳນວຍຄວາມສະດວກໃຫ້ປະຊາຊົນທຸກຄົນຍົກສູງຄວາມຮັບຜິດຊອບ, ຍົກສູງຄວາມສາມາດ ແລະ ເຂົ້າຮ່ວມຢ່າງເໝາະສົມໃນການຮັບປະກັນຄວາມປອດໄພທາງສັງຄົມ ແລະ ສະຫວັດດີການສັງຄົມ.

ທີຫົກ, ເພີ່ມທະວີການນຳໃຊ້ເຕັກໂນໂລຊີຂໍ້ມູນຂ່າວສານ, ດຳເນີນການປ່ຽນແປງດິຈິຕອນຢ່າງແທ້ຈິງ ແລະເປັນພື້ນຖານ ເພື່ອຄຸ້ມຄອງບັນດາຂົງເຂດທີ່ກະຊວງເປັນຜູ້ຮັບຜິດຊອບ; ເພີ່ມທະວີວຽກງານກວດກາແລະກວດສອບ, ສ້າງສະພາບແວດລ້ອມທີ່ດີເພື່ອການພັດທະນາ, ສຸມໃສ່ການປົກປ້ອງແມ່ຍິງ, ເດັກນ້ອຍ ແລະ ຜູ້ດ້ອຍໂອກາດ ຈາກຄວາມສ່ຽງ./.

-----------------------------------

ບົດນີ້ໄດ້ລົງພິມໃນວາລະສານກອມມູນິດ ສະບັບທີ 991 (ເດືອນມິຖຸນາ 2022)

ບົດຄວາມຫົວຂໍ້ດຽວກັນ

ເພື່ອໃຫ້ອາຊີອາຄະເນເປັນພາກພື້ນ ແຫ່ງສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາ (12/12/2012)

ແຕ່ “ດັດແປງວິທີເຮັດວຽກ” ເຖິງ “ບັນຫາຮີບດ່ວນຈຳນວນໜຶ່ງ ກ່ຽວກັບການກໍ່ສ້າງພັກ ໃນປັດຈຸບັນ” (22/01/2013)

ກໍ່ສ້າງພື້ນຖານການປ້ອງກັນປະເທດ ທົ່ວປວງຊົນ ໃຫ້ໝັ້ນຄົງເຂັ້ມແຂງ ເພື່ອປົກປັກຮັກສາປະເທດຊາດຫວຽດນາມ ສັງຄົມນິຍົມຢ່າງໝັ້ນແກ່ນ (20/02/2013)

ເພີ່ມທະວີບົດບາດຕິດຕາມກວດກາ ສູງສຸດ ຂອງສະພາແຫ່ງຊາດ ເພື່ອຕອບສະໜອງ ຄວາມຕ້ອງການ ກໍ່ສ້າງລັດອຳນາດກົດໝາຍ ສັງຄົມນິຍົມ ຕາມຈິດໃຈມະຕິຕົກລົງ ຂອງກອງປະຊຸມໃຫຍ່ ຄັ້ງທີ XI ຂອງພັກ* (12/07/2013)

ເພື່ອໃຫ້ອາຊີອາຄະເນເປັນພາກພື້ນ ແຫ່ງສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາ (12/12/2012)

ແຕ່ “ດັດແປງວິທີເຮັດວຽກ” ເຖິງ “ບັນຫາຮີບດ່ວນຈຳນວນໜຶ່ງ ກ່ຽວກັບການກໍ່ສ້າງພັກ ໃນປັດຈຸບັນ” (22/01/2013)

ວຽກງານຊາວໜຸ່ມເປັນບັນຫາເປັນຕາຍ ຂອງຊາດ, ເປັນໜຶ່ງໃນປັດໄຈຕັດສິນ ຊະນະ ຫຼື ປະລາໄຊ ຂອງການປະຕິວັດ (21/03/2013)

ເພີ່ມທະວີການນຳພາຂອງພັກ ຕໍ່ກັບວຽກງານຂົນຂວາຍມະຫາຊົນ ໃນສະພາບການໃໝ່ (23/05/2013)

ໜັງສືພິມຕ້ອງປະຕິບັດໜ້າທີ່ການເມືອງ ຂອງຕົນໃຫ້ດີ ເພື່ອສົມກຽດກັບ ຄວາມໄວ້ວາງໃຈ ຂອງພັກ ລັດ ແລະ ປະຊາຊົນ* (25/06/2013)