ພັກກອມມູນິດຫວຽດນາມ - ເກົ້າສິບປີແຫ່ງການຢຶດໝັ້ນ ແລະ ໝູນໃຊ້ລັດທິມາກ-ເລນິນ ຢ່າງປະດິດສ້າງ
ວກ - ທຸກໆໄຊຊະນະຂອງການປະຕິວັດຫວຽດນາມ ໃນ 90 ປີທີ່ຜ່ານມາ ລ້ວນແຕ່ເລີ່ມຈາກການທີ່ພັກກອມມູນິດຫວຽດນາມ ໄດ້ຢຶດໜັ້ນແລະໝູນໃຊ້ ທິດສະດີປະຕິວັດແລະວິທະຍາສາດຂອງລັດທິມາກ-ເລນິນ ຢ່າງປະດິດສ້າງ ເຂົ້າໃນພຶດຕິກຳແຫ່ງການປະຕິວັດຂອງປະເທດຫວຽດນາມ. ການຢຶດໝັ້ນແລະຄວາມປະດິດສ້າງນັ້ນ ແມ່ນບົນພື້ນຖານວິທະຍາສາດ, ການປະຕິວັດ, ມະນຸດອະລິຍະທຳ, ຄວາມສອດຄ່ອງເໝາະສົມ ກັບເງື່ອນໄຂຂອງຫວຽດນາມ ແລະຍຸສະໄໝ, ແຕ່ເປົ້າໝາຍບໍ່ມີການປ່ຽນແປງ ນັ້ນຄື ການສູ້ຊົນເພື່ອຄວາມເປັນເອກະລາດຂອງຊາດ, ເພື່ອເສລີພາບແລະຄວາມສຸກຂອງປະຊາຊົນ.
1- ຕັ້ງແຕ່ເລີ່ມກໍ່ຕັ້ງຈົນເຖິງປະຈຸບັນ, ພັກກອມມູນິດຫວຽດນາມຖືຢູ່ສະເໝີວ່າ ລັດທິມາກ-ເລນິນແມ່ນພື້ນຖານແນວຄິດ ແລະເປັນເຂັມທິດພາທາງໃຫ້ແກ່ການເຄື່ອນໄຫວປະຕິວັດຂອງຕົນ. ຕໍ່ມາ, ໃນໂຄງການການເມືອງກໍ່ສ້າງປະເທດໃນສະໄໝຂ້າມຜ່ານຂຶ້ນສູ່ລັດທິສັງຄົມນິຍົມ ປີ 1991, ສະບັບປັບປຸງພັດທະນາປີ 2011 ແລະ ບັນດາເອກະສານຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກທີ່ຜ່ານມາມໍ່ນີ້ລ້ວນແຕ່ໄດ້ຢືນຢັນວ່າ: ພັກກອມມູນິດຫວຽດນາມຖືເອົາລັດທິມາກ-ເລນິນ, ແນວຄິດໂຮ່ຈີມິນ ເປັນພື້ນຖານແນວຄິດແລະເຂັມທິດພາທາງ ໃຫ້ແກ່ການເຄື່ອນໄຫວປະຕິວັດຂອງພັກ. ພ້ອມກັນນັ້ນ, ພັກຮຽກຮ້ອງໃຫ້ທົ່ວພັກ ແລະພະນັກງານ ສະມາຊິກພັກທຸກຄົນຕ້ອງ “ຢຶດໝັ້ນລັດທິມາກ-ເລນິນ, ແນວຄິດໂຮ່ຈີມິນ, ໝູນໃຊ້ມັນຢ່າງປະດິດສ້າງ ແລະ ພັດທະນາຢ່າງສອດຄ່ອງເໝາະສົມ ກັບພຶດຕິກຳຂອງຫວຽດນາມ”.
ຕະຫຼອດເກົ້າສິບປີນັບແຕ່ປະຊາຊົນຫວຽດນາມມີພັກກອມມູນິດ, ພາຍໃຕ້ການນຳພາຂອງພັກ, ພາລະກິດການປະຕິວັດຂອງປະຊາຊົນ ໄດ້ຮັບໄຊຊະນະຢ່າງໃຫຍ່ຫຼວງ, ມີຄວາມໝາຍປະຫວັດສາດ ແລະຍຸກສະໄໝ, ໄດ້ປ່ຽນຊີວິດຂອງປະຊາຊົນທຸກຄົນແລະຊະຕາກຳຂອງປະເທດຊາດທັງໝົດ. ຄວາມເປັນຈິງທາງປະຫວັດສາດໄດ້ພິສູດ, ຮາກຖານຂອງໄຊຊະນະທັງໝົດເຫຼົ່ານັ້ນ ແມ່ນມາຈາກພັກກອມມູນິດຫວຽດນາມ ຢຶດໝັ້ນແລະໝູນໃຊ້ທິດສະດີປະຕິວັດແລະວິທະຍາສາດ ຂອງລັດທິມາກ-ເລນິນ ຢ່າງປະດິດສ້າງ ເຂົ້າໃນພຶດຕິກຳການປະຕິວັດຂອງປະເທດ ໃນແຕ່ລະໄລຍະສະເພາະ. ເວົ້າຢ່າງອື່ນ, ທຸກໆໄຊຊະນະຂອງການປະຕິວັດຫວຽດນາມໃນຕະຫຼອດເກົ້າສິບປີທີ່ຜ່ານມາ ລ້ວນແຕ່ເລີ່ມຈາກການລົງເລິກຄົ້ນຄວ້າ, ກຳແໜ້ນທາດແທ້ວິທະຍາສາດແລະປະຕິວັດຂອງລັດທິມາກ-ເລນິນ, ຢຶດໝັ້ນແລະໝູນໃຊ້ມັນຢ່າງປະດິດສ້າງ ເພື່ອເປົ້າໝາຍທີ່ບໍ່ປ່ຽນແປງ ນັ້ນຄື ສູ້ຊົນເພື່ອຄວາມເປັນເອກະລາດແຫ່ງຊາດ, ເພື່ອເສລີພາບແລະຄວາມສຸກຂອງປະຊາຊົນ. ນັ້ນແມ່ນການຢຶດໝັ້ນແລະຄວາມປະດິດສ້າງບົນພື້ນຖານວິທະຍາສາດ, ການປະຕິວັດ, ຄວາມະນຸດສະທຳ, ຄວາມສອດຄ່ອງເໝາະສົມ ກັບເງື່ອນໄຂຫວຽດນາມແລະຍຸກສະໄໝ, ຢຶດໝັ້ນຫຼັກການ, ຫຼັກໝັ້ນປະຕິວັດມາກ-ເລນິນ.
ພັກກອມມູນິດຫວຽດນາມມີຄວາມຮັບຮູ້ຢ່າງສັດຈະວິພາບວ່າ, ການຢຶດໝັ້ນແລະຄວາມປະດິດສ້າງໃນເມື່ອໝູນໃຊ້ລັດທິມາກ-ເລນິນ ແມ່ນສອງດ້ານທີ່ເປັນເອກະພາບໃນບັນຫາໜຶ່ງ; ການຢຶດໝັ້ນບໍ່ໄດ້ໝາຍຄວາມວ່າ ຈະເຮັດຕາມແບບເບົ້າ, ກົນຈັກຕາຍຕົວ ແຕ່ຕ້ອງປະດິດສ້າງຢ່າງບໍ່ຢຸດຢັ້ງໃຫ້ສອດຄ່ອງເໝາະສົມກັບກາລະເທສະ. ແລະ, ຄວາມປະດິດສ້າງຕ້ອງບົນພື້ນຖານການຢຶດໝັ້ນບັນດາຫຼັກການພື້ນຖານຂອງມັນເອງ, ຖ້າບໍ່ດັ່ງນັ້ນ ຈະຖືກຕົກໃສ່ຄວາມຜິດພາດຂອງລັດທິຄຳພີຕາຍຕົວ ຫຼືລັດທິສວຍໂອກາດ ລັດທິແກ້. ການຢຶດໝັ້ນແລະຄວາມປະດິດສ້າງໃນເມື່ອໝູນໃຊ້ລັດທິມາກ-ເລນິນ ແມ່ນການພົວພັນສັດຈະວິພາກ ໃນການໝູນໃຊ້ບັນດາກົດເກນທົ່ວໄປ ເຂົ້າໃນເງື່ອນໄຂສະເພາະແລະພິເສດ. ການຢຶດໝັ້ນໃນບັນດາມູນຫຼັກທີ່ຖືກຕ້ອງ ບໍ່ໄດ້ໝາຍຄວາມວ່າບໍ່ມີເຫດຜົນ, ກົນຈັກຕາຍຕົວ, ເລື່ອນລອຍ; ຄວາມປະດິດສ້າງແຕ່ຕ້ອງຮັບປະກັນບັນດາຫຼັກການພື້ນຖານຂອງມັນ ນັ້ນຄື ຮັກສາທາດແທ້ປະຕິວັດ, ວິທະຍາສາດ, ຄວາມສອດຄ່ອງເໝາະສົມ, ລັກສະນະພຶດຕິກຳ, ແມ່ນຄວາມປະດິດສ້າງແບບສັດຈະວິພາບ ເພື່ອໃຫ້ການປະຕິວັດບັນລຸຜົນສຳເລັດ, ເດັດຂາດບໍ່ແມ່ນການດັດແກ້ (ລັດທິແກ້) ຫຼືຫຼົງທິດ, “ປ່ຽນສີ”.
ລັດທິມາກແມ່ນທິດສະດີກ່ຽວກັບການພັດທະນາ, ມັນຖືກນຳໃຊ້, ເພີ່ມເຕີມ ແລະພັດທະນາໃຫ້ແທດເໝາະກັບຄວາມເປັນຈິງ. ທ່ານ ຟ.ອັງແກນ ໄດ້ເວົ້າແຈ້ງວ່າ: “ທິດສະດີຂອງພວກຂ້າພະເຈົ້າແມ່ນທິດສະດີຂອງການພັດທະນາ, ມັນບໍ່ແມ່ນຄຳພີທີ່ເຂົາເຈົ້າຕ້ອງທ່ອງຂຶ້ນໃຈໄດ້ກັບປາກ ແລະເວົ້າລື້ມຄືນແບບກົນຈັກ”(1). ຕໍ່ມາ, ທ່ານ ວ.ອີ.ເລນິນ ໄດ້ຢ້ຳຄືນຄຳຢືນຢັນຂອງ ຟ.ອັງແກນ “ທິດສະດິຂອງພວກຂ້າພະເຈົ້າບໍ່ແມ່ນຄຳພີ ແຕ່ມັນເປັນເຂັມທິດພາທາງໃຫ້ແກ່ການກະທຳ” ແລະກ່າວວ່າ ຖ້າຫາກລືມເລື່ອງນີ້ “ພວກເຮົາຈະເຮັດໃຫ້ລັດທິມາກກາຍເປັນສິ່ງຜິວເຜີນ, ຕ່າງປະຫຼາດ, ຕາຍກະດ້າງ, ຈະປະຖິ້ມວິນຍານຊີວິດຂອງມັນ, ຈະທຳລາຍພື້ນຖານທິດສະດີອັນພື້ນຖານຂອງມັນ - ນັ້ນແມ່ນວິທີສັດຈະວິພາກ”(2). ວ.ອີ. ເລນິນ ກໍໄດ້ຊີ້ແຈງວ່າ: “ຍ້ອນລັດທິມາກບໍ່ແມ່ນຫຼັກຄຳສອນທີ່ແຂງກະດ້າງ, ບໍ່ແມ່ນທິດສະດີທີ່ສົມບູນແບບ, ມີພຽບພ້ອມທຸກຢ່າງ, ບໍ່ຂະຫຍັບຂະຫຍາຍ, ແຕ່ມັນແມ່ນເຂັມຊີ້ທິດທີ່ຊັດເຈນໃຫ້ແກ່ການກະທຳ, ເພາະສະນັ້ນ ມັນບໍ່ອາດຈະບໍ່ສະທ້ອນເຖິງການປ່ຽນແປງທີ່ເຂັ້ມແຂງຂອງສະພາບຊີວິດການເປັນຢູ່ທາງສັງຄົມ”(3). ດັ່ງນັ້ນ, ມັນຕ້ອງໄດ້ໝູນໃຊ້ຢ່າງປະດິດສ້າງເພື່ອການພັດທະນາ. ມີແຕ່ການຢຶດໝັ້ນແລະຄວາມປະດິດສ້າງໃນເມື່ອໝູນໃຊ້ເທົ່ານັ້ນ ຈຶ່ງຮັບປະກັນໃຫ້ລັດທິມາກ-ເລນິນເປັນທິດສະດີທີ່ວິທະຍາສາດ, ປະຕິວັດ, ນຳໜ້າພາທາງ, ຮັບປະກັນໃຫ້ການປະຕິວັດໃນຍຸກປະຈຸບັນ ໄປເຖິງໄຊຊະນະສຸດທ້າຍ. ເພາະສະນັ້ນ, ໃນເສັ້ນທາງການປະຕິວັດເກົ້າສິບປີທີ່ຜ່ານມາ, ພັກກອມມູນິດຫວຽດນາມ ໄດ້ໝູນໃຊ້ລັດທິມາກ-ເລນິນຢ່າງໝັ້ນໜຽວແລະປະດິດສ້າງ, ເພື່ອຄວາມເປັນເອກະລາດແຫ່ງຊາດ, ເພື່ອເສລີພາບແລະຄວາມສຸກຂອງປະຊາຊົນ.
2- ສິ່ງທຳອິດທີ່ພວກເຮົາ ແລະປະຊາຊົນຜູ້ມີຄວາມກ້າວໜ້າ, ຮັກສັນຕິພາບ ແລະເພື່ອນມິດສາກົນ ໄດ້ສັງເກດເຫັນວ່າ ໃນການເດີນທາງເກົ້າປີເພື່ອຄວາມເປັນເອກະລາດແຫ່ງຊາດ, ເພື່ອເສລີພາບແລະຄວາມສຸກຂອງປະຊາຊົນຫວຽດນາມນັ້ນ ພັກກອມມູນິດຫວຽດນາມຍາມໃດກໍ່ຢຶດໝັ້ນລັດທິມາກ-ເລນິນ. ເຫດຜົນຂອງການຢຶດໝັ້ນນັ້ນ, ກ່ອນອື່ນໝົດແມ່ນບົນພື້ນຖານທີ່ຜູ້ນຳຫງວຽນອ໋າຍກວັກ - ປະທານໂຮ່ຈີມິນ ແລະ ພັກກອມມູນິດຫວຽດນາມ ໄດ້ຄ່ອຍໆຮັບຮູ້ຢ່າງເລິກເຊິ່ງວ່າ, ລັດທິມາກ-ເລນິນແມ່ນລະບົບທິດສະດີວິທະຍາສາດແລະປະຕິວັດ, ໄດ້ຮັບການສະຫຼຸບສັງລວມ, ຖອດຖອນຈາກຂະບວນການເຄື່ອນໄຫວທັງໝົດຂອງປະຫວັດສາດມະນຸດ ແລະ ແລະຄວາມເປັນຈິງທາງສັງຄົມໃນໄລຍະເວລາຂອງການພັດທະນາທຶນນິຍົມ, ສືບທອດລະບົບບັນດາຄຸນຄ່າແນວຄິດ ແລະ ຜົນສຳເລັດທາງວິທະຍາສາດທີ່ສຳຄັນທີ່ສຸດ ຂອງມະນຸດຊາດ. ລັດທິມາກ-ເລນິນສະໜອງ ໂລກກະທັດວິທະຍາສາດແລະປະຕິວັດ, ບັນດາກົດເກນກ່ຽວກັບການເຄື່ອນເໜັງແລະພັດທະນາ ຂອງທຳມະຊາດ, ສັງຄົມແລະຈິນຕະນາການຂອງມະນຸດ ໃຫ້ພັກກອມມູນິດຫວຽດນາມ. ໂດຍສະເພາະທາງດ້ານສັງຄົມ, ລັດທິມາກ-ເລນິນໄດ້ຊີ້ໃຫ້ເຫັນກົດເກນການເຄື່ອນເໜັງ ຂອງປະຫວັດສາດມະນຸດ ແລະ ເສັ້ນທາງທີ່ຫຼີກລ້ຽງບໍ່ໄດ້ທີ່ກ້າວສູ່ລັດທິກອມມູນິດ - ຮູບແບບການພັດທະນາສູງຂອງສັງຄົມມະນຸດ - ເຊິ່ງໃນສັງຄົມນັ້ນ ຜູ້ຄົນມີເສລີພາບ, ມີຄວາມສຸກ, ມີເງື່ອນໄຂພຽງພໍທີ່ຈະພັດທະນາແລະປັບປຸງບູລະນະຢ່າງສົມບູນ.
ທ່ານຫງວຽນອ໋າຍກວັກເຊື່ອໃນລັດທິມາກ-ເລນິນ, ຄືດັ່ງທີ່ທ່ານກ່າວວ່າ: “ໂຄງການການເມືອງຂອງເລນິນໄດ້ເຮັດໃຫ້ຂ້າພະເຈົ້າຕື້ນຕັນໃຈທີ່ສຸດ, ເບີກບານໃຈທີ່ສຸດ, ຈະແຈ້ງທີ່ສຸດ ແລະກໍເຊື່ອໝັ້ນທີສຸດ! ຂ້າພະເຈົ້າດີໃຈຫຼາຍຈົນເຖິງຂັ້ນຮ້ອງໄຫ້ຍາມໃດກໍ່ບໍ່ຮູ້ເມື່ອ. ນັ່ງຢູ່ໃນຫ້ອງຄົນດຽວແຕ່ຂ້າພະເຈົ້າພັດກ່າວຂຶ້ນດ້ວຍສຽງດັງໆຄືກັບພວມເວົ້າຕໍ່ໜ້າມະຫາຊົນຈຳນວນຫຼວງຫຼາຍ: “ພີ່ນ້ອງຮ່ວມຊາດທີ່ພວມທຸກທໍລະມານທັງຫຼາຍເອີຍ! ນິ້ແຫຼະຄືສິ່ງທີ່ຕ້ອງການສຳລັບພວກເຮົາ, ນີ້ແມ່ນເສັ້ນທາງປົດປ່ອຍພວກເຮົາ!”. ຈາກນັ້ນຕໍ່ມາ ຂ້າພະເຈົ້າເຊື່ອໃນເລນິນໂດຍສົມບູນ ແລະເຊື່ອໃນສາກົນທີສາມ”(4).
ຫງວຽນອ໋າຍກວັກຮູ້ສຶກດີໃຈແລະມີຄວາມສຸກຫຼາຍ ທີ່ທ່ານໄດ້ຊອກເຫັນວິທີການແກ້ບັນຫາ ຊ່ວຍຊີວິດຂອງປະຊາຊົນ ແລະປົດປ່ອຍປະເທດຊາດອອກຈາກແອກປົກຄອງ, ອອກຈາກການກົດຂີ່ຂູດຮີດຂອງພວກລ່າເມືອງຂຶ້ນສັກດິນາ ຢູ່ໃນລັດທິມາກ-ເລນິນ - ຄືເສັ້ນທາງປະຕິວັດກຳມາຊີບ. ຈາກນັ້ນທ່ານເຂົ້າຮ່ວມການກໍ່ຕັ້ງພັກກອມມູນິດຝຣັ່ງ, ກາຍເປັນນັກກອມມູນິດຫວຽດນາມຜູ້ທຳອິດ. ຕໍ່ມາ, ໃນເວລາທີ່ທ່ານໄດ້ກາຍເປັນປະທານປະເທດ, ປະທານພັກແຮງງານຫວຽດນາມ, ປະທານໂຮ່ຈີມິນໄດ້ຢືນຢັນວ່າ: “ສຳລັບພວກເຮົາ, ນັກປະຕິວັດແລະປະຊາຊົນຫວຽດນາມ, ລັດທິມາກ-ເລນິນ ບໍ່ພຽງແຕ່ເປັນ “ປຶ້ມຕຳລາ” ທີ່ສັກສິດ, ບໍ່ພຽງແຕ່ເປັນເຂັມຊີ້ທິດ, ແຕ່ຍັງເປັນດວງອາທິດສ່ອງແສງເຍືອງທາງ ໃຫ້ພວກເຮົາເດີນໄປສູ່ໄຊຊະນະສຸດທ້າຍ, ໄປສູ່ລັດທິສັງຄົມນິຍົມ ແລະລັດທິກອມມູນິດ”(5). ແລະເມື່ອຕອບຄຳຖາມ: ບົດບາດຂອງເລນິນແລະລັດທິເລນິນຕໍ່ສະຫາຍຄືແນວໃດ? ຂອງນັກຂ່າວໜັງສືພິມ L’Humanité (ຝຣັ່ງ) - ຊາກເລີ ຟວກນີໂອ, ວັນທີ 15 ກໍລະກົດ 1969, ປະທານໂຮ່ຈີມິນສືບຕໍ່ຢືນຢັນ: “ສະຫາຍໄດ້ຮູ້ນິທານຂອງພວກຂ້າພະເຈົ້າກ່ຽວກັບ “ແອບຄາຖາ” ບໍ່. ເມື່ອພົບຄວາມຫຍຸ້ງຍາກ, ເພີ່ນກໍ່ຈະໄຂແອບຄາຖາອອກ ແລະກໍ່ຈະຊອກເຫັນວິທີແກ້ໄຂ. ລັດທິເລນິນກໍ່ເກືອບຄືກັບແອບຄາຖາມະຫັດສະຈັນນັ້ນແຫຼະ. ໃນເບື້ອງຕົ້ນ, ກໍ່ຍ້ອນລັດທິຮັກຊາດນັ້ນເອງທີ່ຂ້າພະເຈົ້າເຊື່ອເລນິນ ແລ້ວ, ເປັນແຕ່ລະບາດກ້າວ, ຂ້າພະເຈົ້າຈິ່ງໄປເຖິງການສະຫຼຸບວ່າ ມີພຽງລັດທິສັງຄົມນິຍົມ ແລະລັດທິກອມມູນິດເທົ່ານັ້ນ ຈິ່ງປົດປ່ອຍບັນດາປະຊາຊາດທີ່ຖືກກົດຂີ່ ແລະຊົນຊັ້ນກຳມະກອນໃນທົ່ວໂລກ”(6).
ໃນວັນສ້າງຕັ້ງ (ປີ 1930), ພັກໄດ້ກຳນົດວ່າ ລັດທິມາກ-ເລນິນ ເປັນ “ລັດທິຫຼັກ” ເຊິ່ງໃນນັ້ນມີເປົ້າໝາຍຕົ້ນຕໍແມ່ນ ປົດປ່ອຍຊາດຕາມເສັ້ນທາງການປະຕິວັດກຳມາຊີບ. ເອົາໃຈໃສ່ໃນການກໍ່ສ້າງກຳລັງ, ຝຶກຝົນຫຼໍ່ຫຼອມກຳລັງ, ເມື່ອມີໂອກາດ, ພັກກອມມູນິດຫວຽດນາມໄດ້ປຸກລະດົມການລຸກຮືຂຶ້ນຍາດອຳນາດການປົກຄອງມາມືປະຊາຊົນ, ສ້າງຕັ້ງລັດຂອງກຳມະກອນຊາວນາໃນທົ່ວປະເທດຫວຽດນາມ. ໄຊຊະນະອັນຍິ່ງໃຫຍ່ຂອງການປະຕິວັດເດືອສິງຫາປີ 1945 ຍ້ອນປັດໄຈຫຼາຍຢ່າງ, ໃນນັ້ນ ປັດໄຈທີ່ສຳຄັນແລະມີຄວາມໝາຍຕັດສິນຊີ້ຂາດແມ່ນ ການນຳພາທີ່ຖືກຕ້ອງ, ສະຫຼາດສ່ອງໃສ, ຄ່ອງແຄ່ວຂອງພັກ; ແມ່ນການໝູນໃຊ້ແລະພັດທະນາລັດທິມາກ-ເລນິນໃນເງື່ອນໄຂສະເພາະຂອງປະເທດເຮົາ ຢ່າງຖືກຕ້ອງ, ເປັນເອກະລາດ, ເປັນເຈົ້າຕົນເອງ ແລະປະດິດສ້າງ, ນັ້ນແມ່ນການດຳເນີນການປະຕິວັດປົດປ່ອຍຊາດ ຕາມເສັ້ນທາງການປະຕິວັດກຳມາຊີບຢູ່ປະເທດຫົວເມືອງຂຶ້ນທີ່ມີກະສິກຳຫຼ້າຫຼັງ. ໃນປີທຳອິດຫຼັງຈາກການປະຕິວັດເດືອນສິງຫາ, ສະຖານະການສັບສົນຍ້ອນຂ້າເສິກແລະສັດຕູ, ໄພອຶດຫີວ, ໄພໂງ່ຈ້າ, ອຳນາດການປົກຄອງອ່ອນນ້ອຍ... ສະຖານະການປະຕິວັດຄືກັບ “ພັນປອນທີ່ຫ້ອຍລົງຈາກຜົມ", ອີກເທື່ອໜຶ່ງ ຄວາມຢຶດໝັ້ນໃນລັດທິມາກ-ເລນິນສະແດງອອກຢູ່ທີ່ການນຳພາຂອງພັກ, ກ່ຽວກັບການເສີມຂະຫຍາຍກຳລັງແຮງສັງລວມຂອງມະຫາຊົນ, ກ່ຽວກັບການກໍ່ສ້າງກຸ່ມກ້ອນມະຫາສາມັກຄີປວງຊົນທັງຊາດ, ກ່ຽວກັບສິລະປະຍຸດສົງຄາມປະຊາຊົນ, ກ່ຽວກັບຄວາມສະຫຼາດຄ່ອງແຄ່ວໃນການຜັນແຍກສັດຕູ, ເລືອກສັດຕູ... ເພື່ອສືບຕໍ່ດຳເນີການປະຕິວັດຊາດ, ປະຊາທິປະໄຕ. ການຕໍ່ສູ້ຂອງປະຊາຊົນຫວຽດນາມທີ່ຕ້ານພວກລ່າເມືອງຂຶ້ນຝຣັ່ງທີ່ກັບມາຮຸກຮາກອີກຄັ້ງນັ້ນ ບໍ່ຕ່າງຫຍັງກັບ “ຕັກແຕນຊົນຊ້າງ”, ແຕ່ພາຍໃຕ້ການນຳພາຂອງພັກ, ດ້ວຍການຕໍ່ສູ້ທົນທານໝັ້ນໜຽວ, ດ້ວຍສົງຄາມປະຊາຊົນທີ່ເດັດດ່ຽວ, ຮອບດ້ານ, ຍາວນານ ຕາມມໍລະດົກຂອງລັດທິມາກ-ເລນິນ, ພວກເຮົາໄດ້ຮັບໄຊຊະນະອັນຍິ່ງໃຫຍ່ໃນດຽນບຽນຟູທີ່ “ສ້າງພວງມາໄລດອກໄມ້ສີແດງ, ສ້າງໜ້າປະຫວັດສາດອັນຮຸ່ງເຮືອງເຫຼືອງເຫຼື້ອມ”.
ຈັກກະພາດອາເມລິກາຕັ້ງໃຈຮຸກຮານປະເທດເຮົາ, ແບ່ງແຍກປະເທດເຮົາເປັນສອງ. ອີກເທື່ອໜຶ່ງ, ຄວາມປາຖະໜາໃນເອກະລາດ, ອິດສະລະພາບແລະຄວາມສຸກຂອງປະຊາຊົນແລະຂອງຊາດຫວຽດນາມທັງໝົດ ໄດ້ຮັບການສົ່ງເສີມໂດຍມູມຫຼັກທິດສະດີກ່ຽວກັບການປະຕິວັດຢ່າງບໍ່ຢຸດບໍ່ຢັ້ງ, ກ່ຽວກັບການແກ້ໄຂພ້ອມກັນທັງພາລະກິດປົດປ່ອຍຊາດ ແລະການປະຕິວັດສັງຄົມນິຍົມ ໃນຂອບເຂດທົ່ວປະເທດ ຂອງລັດທິມາກ-ເລນິນ ເຊິ່ງໄດ້ສືບຕໍ່ຊີ້ນຳປະຊາຊົນຫວຽດນາມ ໃຫ້ເດີນທາງບົນເສັ້ນທາງຂອງການປະຕິວັດກຳມາຊີບ ໃນຄວາມເຫັນດີເຫັນພ້ອມແລະຊ່ວຍເຫຼືອຂອງມະນຸດຊາດທີ່ກ້າວໜ້າ. ໄຊຊະນະຂອງການຕໍ່ສູ້ຕ້ານຈັກກະພັດອາເມລິກາຜູ້ຮຸກຮານ ເລີ່ມຈາກຫຼາຍປັດໄຈ, ໃນນັ້ນປັດໄຈທີ່ຕັດສິນທີ່ສຸດແມ່ນການນຳພາທີ່ຖືກຕ້ອງ, ປະດິດສ້າງຂອງພັກກອມມູນິດຫວຽດນາມ, ທັງຢຶດໝັ້ນລັດທິມາກ-ເລນິນ, ທັງເສີມຂະຫຍາຍສິລະປະການທະຫານທີ່ເປັນເອກະລັກຂອງຫວຽດນາມ.
ປະເທດຊາດເປັນເອກະລາດແລະເປັນເອກະພາບ, ກ້າວຂຶ້ນສັງຄົມນິຍົມ ແມ່ນຄວາມມຸ່ງໝັ້ນ, ຄວາມປາຖະໜາຂອງປະຊາຊົນຫວຽດນາມທັງຊາດ. ການກໍ່ສ້າງລັດຂອງປະຊາຊົນ, ໂດຍປະຊາຊົນແລະເພື່ອປະຊາຊົນ ແມ່ນຕາມມູນຫຼັກທິດສະດີທີ່ພື້ນຖານຂອງລັດທິມາກ-ເລນິນ. ແຕ່, ການທີ່ພວກເຮົາຮັກສາກົນໄກລວມສູນອາດຍາສິດ, ເກື້ອກູນອຸດໜູນໄວ້ດົນເກີນໄປ ທ່າມກາງການປິດລ້ອມ, ຂວ້ຳບາດ, ຕ້ານຢັນຂອງບັນດາອິດທິກຳລັງສັດຕູ, ເຊິ່ງໄດ້ເຮັດໃຫ້ວິກິດການທາງເສດຖະກິດໃນທົ່ວປະເທດຮ້າຍແຮງກວ່າອີກ. ຄວາມເປັນຈິງຄັ້ງນີ້ຮຽກຮ້ອງໃຫ້ພັກກອມມູນິດຫວຽດນາມຕ້ອງປະດິດສ້າງ, ລະດົມສະຕິປັນຍາແລະກຳລັງວັງຊາຂອງປະຊາຊົນທຸກຄົນໃນປະເທດ, ຍາດແຍ່ງເອົາການພົວພັນຮ່ວມມືທາງດ້ານເສດຖະກິດຂອງປະຊາຄົມໂລກ ເພື່ອສ້າງສາພັດທະນາປະເທດ. “ປ່ຽນແປງໃໝ່ແຕ່ບໍ່ປ່ຽນສີ”. ພັດທະນາເສດຖະກິດຕະຫຼາດກຳນົດທິດສັງຄົມນິຍົມເພື່ອເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸດຕິທຳແລະສີວິໄລ”. ນັ້ນແມ່ນບາດກ້າວທີ່ເໝາະສົມໃນສະໄໝຂ້າມຜ່ານຂຶ້ນສູ່ລັດທິສັງຄົມນິຍົມ ທີ່ລັດທິມາກ-ເລນິນໄດ້ຊີ້ອອກມາ.
ລະບອບສັງຄົມນິຍົມຢູ່ສະຫະພາບໂຊວຽດແລະເອີຣົບຕາເວັນອອກຖືກພັງທະລາຍລົງ, ບັນດາອິດທິກຳລັງສັດຕູ ໄດ້ເພີ່ມທະວີການຕໍ່ຕ້ານພັກກອມມູນິດຫວຽດນາມ, ທຳລາຍລະບອບສັງຄົມນິຍົມ, ປະຕິເສດ, ໃສ່ຮ້າຍປ້າຍສີລັດທິມາກ-ເລນິນ. ໃນຊຸມປີແຫ່ງການປ່ຽນແປງໃໝ່, ຄຽງຄູ່ກັບບັນດາຜົນງານອັນໃຫຍ່ຫຼວງແລະມີຄວາມໝາຍປະຫວັດສາດໃນດ້ານຕ່າງໆນັ້ນ, ກໍ່ຍັງມີບັນຫາໃໝ່ແລະຄວາມຂັດແຍ້ງໃໝ່ເກີດຂຶ້ນທີ່ກ່ຽວຂ້ອງກັບທິດສະດີ, ເຊິ່ງຫຼາຍບັນຫາຍັງບໍ່ທັນໄດ້ຮັບການຄົ້ນຄວ້າຢ່າງຮອບຄອບເລິກເຊິ່ງ ເພື່ອທຳຄວາມກະຈ່າງແຈ້ງກ່ຽວກັບທາດແທ້ຂອງມັນ, ບໍ່ໄດ້ອະທິບາຍຢ່າງມີວິທະຍາສາດແລະໜ້າເຊື່ອຖື, ມີຫຼາຍບັນຫາຖືກປະປ່ອຍລະຫວ່າງການຄົ້ນຄວ້າ ບໍ່ມີການສະຫຼຸບ, ໄດ້ພາໃຫ້ເກີດຄວາມຂັດຂ້ອງ ຄ້າງຄາໃນຄວາມຮັບຮູ້, ແນວຄິດ; ສະຖານະການຂອງການເວົ້າແລະການເຮັດ, ການເວົ້າແລະການຄິດ ຍັງບໍ່ທັນເປັນເອກະພາບ. ໃນຂະນະນັ້ນ ສະພາບການໂລກມີການປ່ຽນແປງຢ່າງໄວວາ, ສັບສົນ, ຄາດການຍາກ... ທັງໝົດສົ່ງຜົນກະທົບໃສ່ພວກພະນັກງານ ສະມາຊິກພັກ ທີ່ຂາດການຝຶກຝົນຫຼໍ່ຫຼອມ, ຂາດຄວາມານະພະຍາຍາມ, ຫຼັກໝັ້ນການເມືອງບໍ່ໜັກແໜ້ນ, ເຮັດໃຫ້ພວກນີ້ກາຍເປັນຜູ້ທີ່ຖືກເສື່ອມໂຊມທາງດ້ານການເມືອງແນວຄິດ, ສູນເສຍອຸດົມການສັງຄົມນິຍົມ ແລະ ປະຕິເສດເສັ້ມທາງກ້າວຂຶ້ນສູ່ລັດທິສັງຄົມນິຍົມຂອງຫວຽດນາມ, ປະຕິເສດບົດບາດຂອງລັດທິມາກ-ເລນິນ.
ຕໍ່ໜ້າສະພາບການດັ່ງກ່າວ, ອີກເທື່ອໜຶ່ງ, ພັກກອມມູນິດຫວຽດນາມໄດ້ຢືນຢູ່ໃນທັດສະນະພາວະວິໄສແລະວິທະຍາສາດ ເພື່ອໝູນໃຊ້ແລະພັດທະນາລັດທິມາກ-ເລນິນໃນເງື່ອນໄຂໃໝ່. ສືບຕໍ່ຢຶດໝັ້ນລັດທິມາກ-ເລນິນ, ພັກກອມມູນິດຫວຽດນາມໄດ້ຍູ້ແຮງກິດຈະກຳປ່ຽນແປງໃໝ່ໃຫ້ເຂົ້າສູ່ງລວງເລິກ, ຕິດກັບການພັດທະນາເສດຖະກິດຕະຫຼາດກຳນົດທິດສັງຄົມນິຍົມ ແລະເຊື່ອມໂຍງສາກົນ, ຍົກສູງຊີວິດການເປັນຢູ່ດ້ານວັດຖຸແລະຈິດໃຈຂອງປະຊົນຢ່າງບໍ່ຢຸດຢັ້ງ...
ເພື່ອໃຫ້ປະເທດຊາດພັດທະນາຢ່າງຍືນຍົງ, ໃນບັນດາກອງປະຊຸມໃຫຍ່ຂອງພັກ, ໂດຍສະເພາະໃນສະໄໝທີ່ຜ່ານມາ, ພັກກອມມູນິດຫວຽດນາມໄດ້ກຳນົດວ່າ ການພັດທະນາເສດຖະກິດແມ່ນຈຸດໜັກໃຈການ, ການກໍ່ສ້າງພັກແມ່ນກຸນແຈສຳຄັນ, ການກໍ່ສ້າງວັດທະນະທຳແມ່ນພື້ນຖານຈິດໃຈຂອງສັງຄົມ. ການພັດທະນາດ້ວຍສາມເສົາຄ້ຳ: ເສດຖະກິດ, ການກໍ່ສ້າງພັກ ແລະ ວັດທະນະທຳ ແມ່ນທັດສະນະທີ່ເປັນເອກະພາບໃນມູນຫຼັກທິດສະດີຂອງລັດທິມາກ-ເລນິນກ່ຽວກັບການປະຕິວັດກຳມາຊີບ ທີ່ພັກສືບຕໍ່ໝູນໃຊ້ຢ່າງໝັ້ນໜຽວ.
3- ການທີ່ພັກກອມມູນິດຫວຽດນາມໄດ້ໝູນໃຊ້ລັດທິມາກ-ເລນິນຢ່າງປະດິດສ້າງ ເຂົ້າໃນພາລະກີດການປະຕິວັດຂອງປະເທດຕົນ ໃນການເດີນທາງເກົ້າສິບປີນັ້ນ ແມ່ນຍ້ອນສາມສາເຫດດັ່ງນີ້: ທີໜຶ່ງ, ລັດທິມາກ-ເລນິນເອງແມ່ນລະບົບທິດສະດີທີ່ເປີດກວ້າງແລະພັດທະນາ, ມັນຍັງບໍ່ທັນຄົບຖ້ວນເທົ່າທີ່ຄວນ ແລະບັນດາຜູ້ກໍ່ຕັ້ງມັນກໍ່ໄດ້ຍອມຮັບແລ້ວ. ທີສອງ, ຈຳເປັນຕ້ອງເພີ່ມອົງປະກອບຕາເວັນອອກ, ອົງປະກອບຂອງຫວຽດນາມເຮັດໃຫ້ມັນສອດຄ່ອງເໝົາະສົມ ຄືດັ່ງທີ່ທ່ານຫງວຽນອ໋າຍກວັກ - ໂຮ່ຈີມິນໄດ້ກຳນົດ. ທີສາມ, ຊີວິດຈິງກໍ່ຄືພຶດຕິກຳແຫ່ງການປະຕິວັດແມ່ນການເຄື່ອນເໜັງ. ການເຄື່ອນເໜັງແມ່ນເດັດຖານ. ບາງຂໍ້ຄິດທິດສະດີຂອງລັດທິມາກ-ເລນິນໄດ້ຖືກຜ່ານພົ້ນໂດຍຍຸກສະໄໝ, ຈຳເປັນຕ້ອງໄດ້ຮັບການເພີ່ມເຕີມແລະປະດິດສ້າງໃນເວລາໝູນໃຊ້ມັນ.
ທ່ານປະທານໂຮ່ຈີມິນໄດ້ຄົ້ນຄວ້າລັດທິມາກຢ່າງເລິກເຊິ່ງ ແລະຕັ້ງຂໍ້ສັງເກດວ່າ: “ພິຈາລະນາລັດທິມາກຄືນໃໝ່ທາງດ້ານພື້ນຖານປະຫວັດສາດຂອງມັນ, ປັບປຸງມັນດ້ວຍຊາດພັນວິທະຍາຕາເວັນອອກ”(7), ເພື່ອໃຫ້ທິດສະດີດັ່ງກ່າວສອດຄ່ອງເໝາະສົມ ແລະຕອບສະໜອງຄວາມຕ້ອງການເຄື່ອນໄຫວຂອງພຶດຕິກຳປະຕິວັດ ໃນບັນດາສະພາບການແລະເງື່ອນໄຂສະເພາະ. ເປັນເອກະພາບກັບທັດສະນະດັ່ງກ່າວ, ໃນເກົ້າສິບປີແຫ່ງການນຳພາການປະຕິວັດ, ຄຽງຂ້າງກັບການຢຶດໝັ້ນລັດທິມາກ-ເລນິນ, ປະທານໂຮ່ຈີມິນແລະພັກກອມມູນິດຫວຽດນາມ ໄດ້ປະດິດສ້າງຢ່າງບໍ່ຢຸດຢັ້ງ ເພື່ອແກ້ໄຂບັນຫາຕ່າງໆທີ່ພຶດຕິກຳປະຕິວັດວາງອອກມາ, ປະກອບສ່ວນໃຫ້ໄຊຊະນະອັນໃຫຍ່ຫຼວງຂອງການປະຕິວັດຫວຽດນາມ, ພ້ອມກັນນັ້ນກໍ່ເພີ່ມເຕີມ ເຮັດໃຫ້ລັດທິມາກ-ເລນິນນັບມື້ນັບສົມບູນກ່ຽວກັບບາງບັນຫາຕົ້ນຕໍດັ່ງນີ້:
ນັ້ນແມ່ນການໝູນໃຊ້ທິດສະດີກ່ຽວກັບການປະຕິວັດກຳມາຊີບ ຂອງລັດທິມາກ-ເລນິນ ຢ່າງປະດິດສ້າງ ເຂົ້າໃນການປະຕິວັດປົດປ່ອຍຊາດຢູ່ຫວຽດນາມ. ໂດຍໄດ້ເຫັນກັບຕາ ສະພາບການຂອງລັດທິທຶນນິຍົມແຂ່ງຂັນເສລີ, ທ່ານ ກ.ມາກ ໃຫ້ທັດສະນະວ່າ, ການປະຕິວັດກຳມາຊີບຈະລະເບີດຂຶ້ນແລະຍາດໄດ້ໄຊຊະນະໃນບັນດາປະເທດທຶນນິຍົມທີ່ພັດທະນາ. ມາຮອດສະໄໝຂອງ ວ.ອີ.ເລນິນ, ລັດທິທຶນນິຍົມໄດ້ກ້າວເຂົ້າສູ່ໄລຍະຈັກກະພັດນິຍົມ, ເລນິນ ໄດ້ຢືນຢັນວ່າ, ການປະຕິວັດກຳມາຊີບອາດຈະລະເບີດຂຶ້ນແລະໄດ້ຮັບໄຊຊະນະໃນປະເທດຈຳນວນໜຶ່ງ, ແມ່ນແຕ່ປະເທດດຽວຂອງລັດທິຈັກກະພັດນິຍົມ (ຕ່ອງໂສ້ທີ່ອ່ອນໃນສາຍໂສ້ຈັກກະພັດນິຍົມ). ດ້ວຍຄວາມເຂົ້າໃຈກ່ຽວກັບປະຊາຊົນແລະສະພາບການຂອງປະເທດຂອງຕົນເອງ ຢູ່ໃນເງື່ອນໄຂຂອງຍຸກສະໄໝ, ທ່ານໂຮ່ຈີມິນໄດ້ປະດິດສ້າງ, ໃຫ້ທັດສະນະວ່າ, ຢາກກູ້ຊາດແລະປົດປ່ອຍປະຊາຊົນແມ່ນບໍມີເສັ້ນທາງອື່ນໃດນອກເໜືອຈາກເສັ້ນທາງປະຕິວັດກຳມາຊີບ. ທ່ານປະທານໂຮ່ຈີມິນແລະພັກກອມມູນິດຫວຽດນາມ ໄດ້ຕັ້ງການປະຕິວັດປົດປ່ອຍຊາດຫວຽດນາມ ຢູ່ໃນວົງໂຄຈອນຂອງການປະຕິວັດກຳມາຊີບໂລກ, ແຕ່ທ່ານກໍ່ໄດ້ກຳນົດວ່າ, ໃນຫຼາຍເງື່ອນໄຂສະເພາະ, ການປະຕິວັດຢູ່ຫົວເມືອງຂຶ້ນສາມາດປະສົບຜົນສຳເລັດກ່ອນການປະຕິວັດຢູ່ປະເທດລ່າເມືອງຂຶ້ນ. ເປັນອັນຈະແຈ້ງວ່າ, ປະທານໂຮ່ຈີມິນແລະພັກກອມມູນິດຫວຽດນາມໄດ້ມີຄວາມປະດິດສ້າງ, ກຳນົດແຈ້ງ ຄວາມເປັນເອກະລາດຂອງການປະຕິວັດຢູ່ຫົວເມືອງຂຶ້ນ ທຽບກັບການປະຕິວັດຢູ່ປະເທດລ່າເມືອງຂຶ້ນ ແລະ ພັກປະຕິວັດຢູ່ຫົວເມືອງຂຶ້ນຕ້ອງມີຄວາມເປັນເຈົ້າການຢ່າງກວ້າງຂວາງ, ມີຄວາມຮັບຜິດຊອບແຫ່ງຊາດແລະສາກົນສູງກວ່າແຕ່ກ່ອນ. ນັ້ນແມ່ນການປະດິດສ້າງທາງດ້ານຍຸດທະສາດຂອງພັກກ່ຽວກັບເສັ້ນທາງຂອງການປະຕິວັດຫວຽດນາມ.
ນັ້ນແມ່ນການປະດິດສ້າງທິດສະດີກ່ຽວກັບການກຳເນີດຂອງພັກກອມມູນິດຢູ່ປະເທດກະສິກຳຫຼ້າຫຼັງ. ໃນນິພົນຄວາມຮູ້ທົ່ວໄປກ່ຽວກັບການເມືອງ (ປີ 1953), ປະທານໂຮ່ຈີມິນໄດ້ກ່າວໂດຍສັງເຂບກ່ຽວກັບການສ້າງຕັ້ງພັກກອມມູນິດຫວຽດນາມ: ພັກສົມທົບຂະບວນການປະຕິວັດຫວຽດນາມກັບລັດທິມາກ-ເລນິນ. ປີ 1960, ທ່ານຂຽນວ່າ: ລັດທິມາກ-ເລນິນສົມທົບກັບຂະບວນການກຳມະກອນ ແລະ ຂະບວນການຮັກຊາດໄດ້ພາໄປສູ່ການສ້າງຕັ້ງພັກໃນຕົ້ນປີ 1930. ໃນຂະນະທີ່ຢືນຢັນກົດເກນທົ່ວໄປຂອງການກຳເນີດຂອງພັກການເມືອງແຫ່ງຊົນຊັ້ນກຳມາຊີບນັ້ນ, ທ່ານໄດ້ຕີລາຄາສູງຂະບວນການຮັກຊາດຫວຽດນາມ, ຖືວ່ານັ້ນແມ່ນປັດໄຈທີ່ສຳຄັນ ພ້ອມກັບສອງປັດໄຈທີ່ລັດທິມາກ-ເລນິນໄດ້ເວົ້າມາ ແມ່ນເງື່ອນໄຂເພື່ອສ້າງຕັ້ງພັກກອມມູນິດຫວຽດນາມຂຶ້ນ. ຂໍ້ຄິດທິດສະດີດັ່ງກ່າວແມ່ນໄດ້ຢຶດໝັ້ນລັດທິມາກ-ເລນິນກ່ຽວກັບການກຳເນີດພັກກອມມູນິດ (ພັກກອມມູນິດ = ລັດທິມາກ-ເລນິນ + ຂະບວນການກຳມະກອນ), ແລະໄດ້ປະດິດສ້າງໃຫ້ມັນສອດຄ່ອງເໝາະສົມກັບ ສະພາບການຂອງປະເທດເມືອງຂຶ້ນເຄິ່ງສັກດິນາ, ມີມູນເຊື້ອຮັກຊາດແຕ່ມີຈຳນວນກຳມະກອນໜ້ອຍ. ຍິ່ງກວ່ານັ້ນ, ຫງວຽນອ໋າຍກວັກຍັງໄດ້ຂົນຂວາຍ ເພື່ອໃຫ້ພັກກອມມູນິດຫວຽດນາມ ເປັນພາກສ່ວນໜຶ່ງທີ່ເປັນເອກະລາດຂອງກອມມູນິດສາກົນ ໂດຍບໍ່ຕ້ອງຜ່ານໄລຍະພາຍໃຕ້ພັກກອມມູນິດຝຣັ່ງ ຄືກັບບັນດາອົງການກອມມູນິດອື່ນໆໃນອາຟຣິກກາຝຣັ່ງມາກ່ອນ.
ການປະດິດສ້າງດັ່ງກ່າວແມ່ນຖືກຕ້ອງ, ສອດຄ່ອງເໝາະສົມກັບການປະຕິວັດຫວຽດນາມ, ມັນມີຄວາມໝາຍສຳຄັນສຳລັບຂະບວນການປະຕິວັດຫວຽດນາມ, ແຕ່ຍັງມີຄວາມໝາຍສາກົນອັນໃຫຍ່ຫຼວງ, ໂດຍສະເພາະສຳລັບບັນດາປະເທດທີ່ມີສະຖານະການຄ້າຍກັບຫວຽດນາມ.
ນັ້ນແມ່ນການປະດິດສ້າງໃນການໝູນໃຊ້ທິດສະດີກ່ຽວກັບການປະຕິວັດຢ່າງບໍ່ຢຸດຢັ້ງຂອງລັດທິມາກ-ເລນິນ ເພື່ອວາງແນວທາງຂອງການປະຕິວັດຫວຽດນາມ. ໂຄງການການເມືອງ ປີ 1930 ຂອງພັກໄດ້ກຳນົດ: ດຳເນີນການປະຕິວັດນາຍທຶນແຫ່ງສິດອຳນາດປະຊາຊົນ ແລະການປະຕິວັດທີ່ດິນ ເພື່ອໄປສູ່ສັງຄົມກອມມູນິດ.
ຄືແນວນັ້ນແມ່ນ ພັກກຳນົດປະຕິບັດສອງໜ້າທີ່ໄປພ້ອມກັນ: ຂັບໄລ່ຈັກກະພັດຝຣັ່ງຜູ້ຮຸກຮານເພື່ອຍາດເອົາເອກະລາດແຫ່ງຊາດ, ໂຄ່ນລົ້ມພວກສັກດິນາລູກມືຂອງຝຣັ່ງລົງ, ນຳເອົາດິນນາມາໃຫ້ຊາວນາ ຢູ່ປະເທດກະສິກຳຫຼ້າຫຼັງ, ຫົວເມືອງຂຶ້ນ, ແຕ່ຫຼັງຈາກນັ້ນ ຈະກ້າວທັນທີຂຶ້ນສູ່ລັດທິສັງຄົມນິຍົມ, ໝາຍຄວາມວ່າກ້າວເຂົ້າສູ່ໄລຍະຕົ້ນຂອງຮູບຖານເສດຖະກິດ-ສັງຄົມກອມມູນິດນິຍົມ.
ນັ້ນແມ່ນການປະດິດສ້າງ ໃນການໝູນໃຊ້ແນວຄິດພັນທະພາບກຳມະກອນ-ຊາວນາ ຂອງລັດທິມາກ-ເລນິນເຂົ້າໃນພຶດຕິກຳຂອງການປະຕິວັດຫວຽດນາມ. ມີບົດຮຽນກ່ຽວກັບຄວາມຫຼົ້ມເຫຼວຂອງກອມມູນປາຣີ ຍ້ອນວ່າການປະຕິບັດພັນທະພາບກຳມະກອນ-ຊາວນາບໍ່ດີ, ດັ່ງນັ້ນແຕ່ປີ 1927, ໃນນິພົນເສັ້ນທາງປະຕິວັດ ຂອງທ່ານຫງວຽນອ໋າຍກວັກ ແລະໃນໂຄງການການເມືອງ ປີ 930 ຂອງພັກລ້ວນແຕ່ໄດ້ຢືນຢັນ: ກຳມະກອນ - ຊາວນາແມ່ນກົກຮາກຂອງການປະຕິວັດ, ປັນຍາຊົນ, ນັກຮຽນແມ່ນເພື່ອນມິດຂອງການປະຕິວັດ. ທຸກໆໄຊຊະນະຂອງການປະຕິວັດຂອງປະເທດເຮົາໃນເສັ້ນທາງ 90 ປີທີ່ຜ່ານມາແມ່ນການປະດິດສ້າງຂອງພັກກອມມູນິດຫວຽດນາມ ໃນການປະຕິບັດສຳພັນທະພາບກຳມະກອນ - ຊາວນາ - ປັນຍາຊົນ, ປັດໄຈທີ່ມີບົດບາດຕັດສິນຊີ້ຂາດ.
ນັ້ນແມ່ນການປະດິດສ້າງໃນການໝູນໃຊ້ທິດສະດີກ່ຽວກັບໂອກາດແລະສະຖານະການປະຕິວັດ ຂອງລັດທິມາກ-ເລນິນ ເຂົ້າໃນຕອນໂຄ້ງປະຫວັດສາດ, ບາດລ້ຽວຂອງການປະຕິວັດຫວຽດນາມ. ລັດທິມາກ-ເລນິນພຽງແຕ່ຢືນຢັນມູນຫຼັກທົ່ວໄປກ່ຽວກັບສະຖານະການປະຕິວັດ, ນັ້ນແມ່ນ: ເມື່ອຊົນຊັ້ນປົກຄອງບໍ່ສາມາດຄອບງຳຄືແຕ່ກ່ອນອີກ, ຊົນຊັ້ນຖືກປົກຄອງບໍ່ສາມາດທົນຕໍ່ການຄອບງຳທີ່ເຄີຍມີໄດ້ອີກຕໍ່ໄປ, ຄົນຊັ້ນກາງໄດ້ຫັນມາຢືນຂ້າງຄຽງກັບຊົນຊັ້ນຖືກປົກຄອງ, ເຊິ່ງຢູ່ຫວຽດນາມ, ເມື່ອຍີ່ປຸ່ນຍອມຈຳນົນພັນທະມິດ (ວັນທີ 15 ສິງຫາ 1945), ວັນທີ 16 ສິງຫາ 1945, ກອງປະຊຸມໃຫຍ່ປະຊາຊົນແຫ່ງຊາດໄດ້ໂຮມປະຊຸມ ເພື່ອຮັບຮອງເອົາມະຕິຕົກລົງລຸກຮືຂຶ້ນທົ່ວປະເທດຂອງພັກກອມມູນິດອິນດູຈີນ, ສ້າງຕັ້ງຄະນະກຳມະການແຫ່ງຊາດເພື່ອການປົດປ່ອຍ, ຝາກຈົດໝາຍຮຽກຮ້ອງພີ່ນ້ອງຮ່ວມຊາດທົ່ວປະເທດ: “ເວລາຕັດສິນຊະຕາກຳຂອງຊາດຫວຽດນາມໄດ້ມາເຖິງແລ້ວ. ພີ່ນ້ອງຮ່ວມຊາດໃນທົ່ວປະເທດຈົ່ງລຸກຮືຂຶ້ນ ເອົາກຳລັງຂອງພວກເຮົາເພື່ອປົດປ່ອຍພວກເຮົາ”. “ໃນເວລານີ້ໂອກາດທີ່ດີໄດ້ມາເຖິງແລ້ວ, ເຖິງວ່າຈະເສຍສະລະຫຼາຍເທົ່າໃດ, ເຖິງວ່າຈະຕ້ອງຈູດທັງສາຍພູຫຼວງ ພວກເຮົາກໍ່ຕ້ອງຕໍ່ສູ້ຢ່າງເດັດດ່ຽວເພື່ອຍາດເອົາເອກະລາດແຫ່ງຊາດ”.
ນັ້ນແມ່ນການປະດິດສ້າງໃນການໝູນໃຊ້ທັດສະນະກ່ຽວກັບບົດບາດຂອງມວນຊົນ ຂອງລັດທິມາກ-ເລນິນ ເຂົ້າໃນເສັ້ນທາງເກົ້າສິບປີແຫ່ງການປະຕິວັດປົດປ່ອຍຊາດແລະສ້າງສາປະເທດຊາດຢູ່ຫວຽດນາມ ພາຍໃຕ້ຄັນທຸງຂອງພັກ. ລັດທິມາກ-ເລນິນຢືນຢັນວ່າ, ປະຊາຊົນແມ່ນຜູ້ສ້າງປະຫວັດສາດ; ແມ່ນກຳລັງຜະລິດວັດຖຸສິ່ງຂອງແລະຜະລິດບັນດາຄຸນຄ່າຈິດໃຈ, ແມ່ນກຳລັງທີ່ແຂງແຮງຂອງບັນດາການປະຕິວັດທາງສັງຄົມ; ບໍ່ມີເວລາໃດທີ່ມະຫາຊົນສະແດງໃຫ້ເຫັນວ່າເປັນຜູ້ປະດິດສ້າງລະບຽບສັງຄົມໃໝ່ຢ່າງຫ້າວຫັນຄືຍຸກປະຕິວັດ; ຍ້ອນກຳລັງແຮງຂອງປະຊາຊົນ, ໄລຍະປະຕິວັດຈຶ່ງມີຄວາມຄິດສ້າງສັນທາງປະຫວັດສາດທີ່ກວ້າງຂວາງກວ່າເກົ່າ, ອຸດົມສົມບຸນກວ່າເກົ່າ, ຕື່ນຕົວສະໝັກໃຈກວ່າເກົ່າ, ມີແຜນການກວ່າເກົ່າ, ກ້າຫານກວ່າແລະຈະແຈ້ງກວ່າເກົ່າ... ປະທານໂຮ່ຈີມິນແລະພັກກອມມູນິດຫວຽດນາມໄດ້ຮັບຮູ້ຢ່າງເລິກເຊິ່ງວ່າ, ມະຫາຊົນແມ່ນຜູ້ປະດິດສ້າງ, ກຳມະກອນແລະຊາວນາແມ່ນຜູ້ປະດິດສ້າງ. ແຕ່ປະຊາຊົນບໍ່ພຽງແຕ່ປະດິດສ້າງວັດຖຸສິ່ງຂອງອອກມາເທົ່ານັ້ນ, ປະຊາຊົນຍັງເປັນນັກຂຽນ. “ການຝຶກຊ້ອມສາມຄັ້ງ” ໃນ 15 ປີ (1930 - 1945) ເຊິ່ງຈຸດສູງສຸດແມ່ນການລຸກຮືຂຶ້ນຍາດອຳນາດການປົກຄອງປະສົບຜົນສຳເລັດ - ການປະຕິວັດເດືອນສິງຫາປີ 1945 - ນັ້ນແມ່ນພະລັງທີ່ຍິ່ງໃຫຍ່ຂອງມະຫາຊົນ. ການແກ້ໄຂຜ່ານຜ່າ “ສະຖານະການ ພັນປອນທີ່ຫ້ອຍລົງຈາກຜົມ" ຂອງປະເທດໃນປີທຳອິດພາຍຫຼັງການປະຕິວັດເດືອນສິງຫາ; ຈາກນັ້ນດຳເນີນສົງຄາມຕໍ່ຕ້ານຢ່າງຮອບດ້ານໃນເວລາເກົ້າປີ, ເອົາຊະນະການຮຸກຮານຂອງພວກລ່າເມືອງຂຶ້ນແບບເກົ່າ; ໄຊຊະນະອັນໃຫຍ່ຫຼວງໃນລະດູບານໃໝ່ປີ 1975, ສິ້ນສຸດ 21 ປີແຫ່ງການຕໍ່ຕ້ານລັດທິລ່າເມືອງຂຶ້ນແບບໃໝ່ທີ່ໂຫດຮ້າຍແລະຫົວໂປ່ທີ່ສຸດໃນປະຫວັດສາດຂອງມະນຸດ. ແລະ, ຜົນສຳເລັດອັນໃຫຍ່ຫຼວງ ທີ່ມີຄວາມໝາຍຍຸກສະໄໝຂອງພາລະກິດການປ່ຽນແປງໃໝ່ໃນ 34 ທີ່ຜ່ານມາ ເຊິ່ງລ້ວນແຕ່ເປັນຜົນງານແຫ່ງການປະດິດສ້າງອັນຍິ່ງໃຫຍ່ຂອງປະຊາຊົນ - ຜູ້ທີ່ສ້າງປະຫວັດສາດພາຍໃຕ້ການນຳພາຂອງພັກກອມມູນິດຫວຽດນາມ... ປະທານໂຮ່ຈີມິນແລະພັກກອມມູນິດຫວຽດນາມຮັບຮູ້ຢ່າງສັດຈະວິພາກວ່າ, ການຢຶດໝັ້ນແລະໝູນໃຊ້ລັດທິມາກ-ເລນິນຢ່າງປະດິດສ້າງແມ່ນສອງດ້ານໃນຄວາມເປັນເອກະພາບ. ການຢຶດໝັ້ນບັນດາມູນຫຼັກທິດສະດີທີ່ຖືກຕ້ອງ, ການປະດິດສ້າງໃຫ້ສອດຄ່ອງເໝາະສົມກັບພຶດຕິກຳ ແລະໃຫ້ມີປະສິດທິຜົນກວ່າ. ການຢຶດໝັ້ນແລະໝູນໃຊ້ລັດທິມາກ-ເລນິນຢ່າງປະດິດສ້າງ ແມ່ນພື້ນຖານຂອງໄຊຊະນະທັງໝົດຂອງການປະຕິວັດຫວຽດນາມໃນເສັ້ນທາງ 90 ປີພາຍໃຕ້ຄັນທຸງຂອງພັກກອມມູນິດຫວຽດນາມ ເພື່ອຄວາມເປັນເອກະລາດຂອງປະເທດຊາດ, ເພື່ອເສລີພາບແລະຄວາມສຸກຂອງປະຊາຊົນ./.
------------------------------
(1) ກ.ມາກ ແລະ ຟ.ອັງແກນ: ນິພົນຄົບຊຸດ, ສພຈ. ການເມືອງແຫ່ງຊາດ, ຮ້າໂນ້ຍ, 1999, ເຫຼັ້ມ 36, ໜ້າ 796.
(2), (3) ວ.ອີ.ເລນິນ: ນິພົນຄົບຊຸດ, ສພຈ. ກ້າວໜ້າ, ມົດສະກູ, 1980, ເຫຼັ້ມ 20, ໜ້າ 99.
(4), (5) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດສື້ເຖິດ, ຮ້າໂນ້ຍ, 2011, ເຫຼັ້ມ 12, ໜ້າ 562, 563.
(6) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 15, ໜ້າ 588.
(7) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, 2011, ເຫຼັ້ມ 1, ໜ້າ 510.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 933 (ເດືອນມັງກອນ 2020)