ໂອກາດຄຳ ເພື່ອເສີມຂະຫຍາຍ ຖານະບົດບາດຂອງປະເທດ ດ້ວຍນະໂຍບາຍການຕ່າງປະເທດ ທີ່ເປັນເອກະລາດ, ເປັນເຈົ້າຕົນເອງ
ວກ. - ດ້ວຍແນວທາງການຕ່າງປະເທດທີ່ເປັນເອກະລາດ ເປັນເຈົ້າຕົນເອງ, ຖານະບົດບາດໃໝ່ຂອງປະເທດ, ການສະໜັບສະໜູນຈາກປະຊາຄົມໂລກ, ພ້ອມດ້ວຍປະສົບການ ໃນການເປັນປະທານແລະບໍລິຫານ ກົນໄກພະຫຸພາຄີລະດັບພາກພື້ນ ແລະ ສາກົນ, ຫວຽດນາມມີພື້ນຖານພຽງພໍ ເພື່ອເຊື່ອໝັ້ນແລະປະຕິບັດສຳເລັດ ບົດບາດຂອງສະມາຊິກບໍ່ຖາວອນ ຂອງສະພາຄວາມໝັ້ນຄົງແຫ່ງສະຫະປະຊາຊາດ ໃນໄລຍະປີ 2020-2021 ແລະ ປະທານສະພາຄວາມໝັ້ນຄົງແຫ່ງສະຫະປະຊາຊາດ ໃນເດືອນມັງກອນ 2020.
ຕັ້ງແຕ່ວັນທີ 1 ມັງກອນ 2020, ຫວຽດນາມເຂົ້າຮັບຕຳແໜ່ງເປັນສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດຢ່າງເປັນທາງການ ໃນໄລຍະປີ 2020 - 2021, ພ້ອມທັງດຳລົງຕຳແໜ່ງ ເປັນປະທານສະພາຄວາມໝັ້ນຄົງແຫ່ງສະຫະປະຊາຊາດ ໃນເດືອນມັງກອນ 2020. ການຜັນຂະຫຍາຍແນວທາງການຕ່າງປະເທດທີ່ເປັນເອກະລາດ ເປັນເຈົ້າຕົນເອງ, ເປັນເຈົ້າການແລະຕັ້ງໜ້າເຊື່ອມໂຍງສາກົນ, ຍູ້ແຮງແລະຍົກລະດັບການຕ່າງປະເທດພະຫຸພາຄີ, ນີ້ແມ່ນໂອກາດທີ່ລ້ຳຄ່າ ເພື່ອໃຫ້ຫວຽດນາມປະກອບສ່ວນກໍ່ສ້າງແລະມີຄວາມຮັບຜິດຊອບ ເຂົ້າໃນວຽກງານລວມຂອງປະຊາຄົມສາກົນ, ຍົກສູງຖານະບົດບາດຂອງປະເທດ ແລະ ເພີ່ມທະວີການພົວພັນລະຫວ່າງຫວຽດນາມ ກັບບັນດາປະເທດ, ບັນດາຄູ່ຮ່ວມມືທີ່ສຳຄັນ ໃຫ້ເລິກເຊິ່ງກວ່າອີກ.
ຄວາມຮັບຜິດຊອບໃໝ່ ໃນສະພາບການໃໝ່ ທີ່ເຕັມໄປດ້ວຍສິ່ງທ້າທາຍ
ຫວຽດນາມຮັບຜິດຊອບໜ້າທີ່ໃໝ່ ໃນສະພາບການຂອງໂລກແລະພາກພື້ນທີ່ມີການປ່ຽນແປງຢ່າງເລິກເຊິ່ງ. ການປະທະກັນຕ່າງໆທີ່ແກ່ຍາວຢູ່ອາຟຣິກກາ ຍັງບໍ່ມີວິທີແກ້ໄຂທີ່ຖືກຕ້ອງເໝາະສົມ, ຄວາມເຄັ່ງຕຶງມັກຈະທະວີຄວາມຮຸນແຮງຂຶ້ນໃນຕາເວັນອອກກາງ ແລະ ບັນດາ “ຈຸດຮ້ອນ” ອາດຈະລະເບີດເປັນຄວາມສ່ຽງທີ່ອັນຕະລາຍໃນພາກພື້ນ, ນັບທັງໃນອາຊີ-ປາຊີຟິກ. ບັນດາການກະທຳຝ່າຍດຽວ, ອຳນາດບາດໃຫຍ່, ບໍ່ເຄົາລົບກົດໝາຍສາກົນ, ການໃຊ້ອາວຸດແລະນາບຂູ່ຈະໃຊ້ກຳລັງອາວຸດ, ການລະເມີດອຳນາດອະທິປະໄຕ, ຜືນແຜ່ນດິນອັນຄົບຖ້ວນ, ການແຊກແຊງກິກຈະການພາຍໃນຂອງປະເທດອື່ນ... ທ້າທາຍໂດຍກົງຕໍ່ສັນຕິພາບແລະຄວາມໝັ້ນຄົງສາກົນ. ເຖິງວ່າສັນຕິພາບ, ການຮ່ວມມື ແລະການພັດທະນາກໍ່ຍັງແມ່ນທ່າອຽງຕົ້ນຕໍກໍຕາມ, ແຕ່ລັດທິຫຼາຍຝ່າຍ ບັນດາກົນໄກຫຼາຍຝ່າຍໃນໂລກແລະພາກພື້ນ ຍັງປະສົບກັບຄວາມຫຍຸ້ງຍາກຫຼາຍຢ່າງ. ຄວາມຂັດແຍ້ງທາງຍຸດທະສາດລະຫວ່າງບັນດາປະເທດໃຫຍ່ທະວີຄວາມຮຸນແຮງຂຶ້ນ, ນຳໄປສູ່ຜົນສະທ້ອນທີ່ສັບສົນຫຼາຍຢ່າງ, ໂດຍສະເພາະແມ່ນ ທາງດ້ານການເມືອງ, ຄວາມປອດໄພ, ສ່ອງແສງໂດຍກົງທີ່ສະພາຄວາມໝັ້ນຄົງແຫ່ງສະຫະປະຊາຊາດ, ຫຼຸດຜ່ອນປະສິດທິຜົນການເຄື່ອນໄຫວ, ກໍ່ໃຫ້ເກີດການຕິດຂັດໃນບາງບັນຫາ.
ການເຂົ້າຮ່ວມສະພາຄວາມໝັ້ນຄົງແຫ່ງສະຫະປະຊາຊາດ ໃນສະພາບການມີສິ່ງທ້າທາຍຫຼາຍຢ່າງນັ້ນ, ຫວຽດນາມຈະຍຶດໝັ້ນແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ພົວພັນຫຼາຍກ້ຳຫຼາຍຝ່າຍ ຫຼາຍຮູບຫຼາຍແບບ, ພະຍາຍາມຊຸກຍູ້ການສົນທະນາ, ຫຼຸດຜ່ອນຄວາມເຄັ່ງຕຶງແລະການປະເຊີນໜ້າ, ຊອກຫາວິທີແກ້ໄຂທີ່ຍຸດຕິທຳແລະສົມເຫດສົມຜົນ ສຳລັບບັນຫາທີ່ນາບຂູ່ສັນຕິພາບແລະຄວາມໝັ້ນຄົງ ຂອງພາກພື້ນແລະສາກົນ; ຊຸກຍູ້ການເຄົາລົບກົດໝາຍສາກົນ, ກົດບັດສະຫະປະຊາຊາດ, ໂດຍສະເພາະແມ່ນບັນດາຫຼັກການພື້ນຖານກ່ຽວກັບຄວາມສະເໝີພາບດ້ານອຳນາດອະທິປະໄຕລະຫວ່າງປະເທດ, ເຄົາລົບເອກະລາດ ອຳນາດອະທິປະໄຕ ຜືນແຜ່ນດິນອັນຄົບຖ້ວນ ແລະ ລະບອບການເມືອງສັງຄົມຂອງກັນແລະກັນ, ບໍ່ແຊກແຊງກິດຈະການພາຍໃນຂອງປະເທດອື່ນ, ແກ້ໄຂຂໍ້ຂັດແຍ້ງໂດຍສັນຕິວິທີ, ບໍ່ໃຊ້ຫຼືນາບຂູ່ຈະໃຊ້ກຳລັງອາວຸດ. ຫວຽດນາມຈະເຊີດຊູຈິດໃຈ “ຄູ່ຮ່ວມມືເພື່ອສັນຕິພາບທີ່ຍືນຍົງ” ດ້ວຍຫຼາຍເນື້ອຫາທີ່ສຳຄັນ ກ່ຽວກັບການກີດກັ້ນການປະທະກັນ, ການສ້າງສັນຕິພາບ, ການສ້າງສາໃໝ່ຫຼັງການປະທະກັນ, ເພີ່ມທະວີລັດທິຫຼາຍຝ່າຍ, ໂດຍສະເພາະແມ່ນ ສະຫະປະຊາຊາດ ແລະ ບັນດາອົງການຈັດຕັ້ງພາກພື້ນ.
ປະທານສະພາຄວາມໝັ້ນຄົງແຫ່ງສະຫະປະຊາຊາດ: ຄວາມຮັບຜິດຊອບສູງໃນອົງການທີ່ສຳຄັນທີ່ສຸດ ສຳລັບສັນຕິພາບແລະຄວາມໝັ້ນຄົງສາກົນ
ສະພາຄວາມໝັ້ນຄົງໄດ້ຮັບໜ້າທີ່ຫຼັກຂອງກົດບັດສະຫະປະຊາຊາດ ໃນການຮັກສາສັນຕິພາບແລະຄວາມໝັ້ນຄົງສາກົນ, ຍັງແມ່ນອົງການດຽວຂອງສະຫະປະຊາຊາດທີ່ສາມາດຕັດສິນຕົກລົງຂໍ້ຜູກມັດກັບປະເທດສະມາຊິກ 193 ປະເທດ. ໃນ 75 ປີທີ່ຜ່ານມາ, ເຖິງວ່າຈະມີຂໍ້ຈຳກັດດ້ານປະສິດທິຜົນ, ປະຊາທິປະໄຕ ແລະຄວາມໂປ່ງໃສໃນການດຳເນີນງານກໍ່ຕາມ, ແຕ່ສະພາຄວາມໝັ້ນຄົງແຫ່ງສະຫະປະຊາຊາດ ກໍໄດ້ມີສ່ວນປະກອບທີ່ສຳຄັນ ຊ່ວຍໃຫ້ມະນຸດຊາດບໍ່ຕົກໃສ່ສົງຄາມໂລກຄັ້ງໃໝ່, ມີອິດທິພົນນັບມື້ນັບກວ້າງຂວາງແລະເລິກເຊິ່ງຕໍ່ຊີວິດການເມືອງແລະຄວາມໝັ້ນຄົງສາກົນ, ແມ່ນກົນໄກທີ່ໄດ້ຮັບຄວາມເອົາໃຈໃສ່ທີ່ສຸດຈາກທຸກປະເທດ, ລວມທັງບັນດາປະເທດໃຫຍ່.
ປະທານສະພາຄວາມໝັ້ນຄົງແຫ່ງສະຫະປະຊາຊາດ - ຕຳແໜ່ງທີ່ມີການໝູນວຽນເປັນລາຍເດືອນລະຫວ່າງປະເທດສະມາຊິກສະພາ 15 ປະເທດ - ມີໜ້າທີ່ຮັບຜິດຊອບໃນການສ້າງແລະອະນຸມັດວາລະປະຈຳເດືອນຂອງສະພາຄວາມໝັ້ນຄົງແຫ່ງສະຫະປະຊາຊາດ, ເປັນປະທານແລະດຳເນີນກອງປະຊຸມ, ຜ່ານເອກະສານຂອງສະພາຄວາມໝັ້ນຄົງແຫ່ງສະຫະປະຊາຊາດ, ເຮັດໜ້າທີ່ເປັນ “ອະນຸຍາໂຕຕຸລາການ” ເພື່ອຈັດການກັບພາວະແຊກຊ້ອນທີ່ເກີດຂຶ້ນ ແລະ ຄວາມແຕກຕ່າງລະຫວ່າງສະມາຊິກສະພາ ໄດ້ຢ່າງໜ້າພໍໃຈ, ຕາງໜ້າສະພາຄວາມໝັ້ນຄົງແຫ່ງສະຫະປະຊາຊາດ ໃນການພົວພັນກັບຜູ້ນຳຂອງອົງການສຳຄັນຂອງສະຫະປະຊາຊາດ, ກໍ່ຄືກັບບັນດາປະເທດສະມາຊິກຂອງສະຫະປະຊາຊາດ, ສຳນັກຂ່າວແລະສື່ມວນຊົນສາກົນ...
ດ້ວຍບົດບາດທີ່ສຳຄັນນັ້ນ, ບັນດາປະເທດສະມາຊິກບໍ່ຖາວອນບໍ່ມີສິດພິເສດຄືກັນກັບສະມາຊິກຖາວອນ - ມີວາລະການດຳລົງຕຳແໜ່ງພຽງສອງປີແລະບໍ່ມີສິດລົງຄະແນນຄ້ານ ດັ່ງນັ້ນຈຶ່ງໄດ້ໃຫ້ຄວາມສຳຄັນກັບໜ້າທີ່ຂອງເດືອນປະທານຢູ່ສະເໝີ. ຜ່ານນັ້ນ, ບໍ່ພຽງແຕ່ສະແດງໃຫ້ເຫັນຄວາມສາມາດໃນການເປັນປະທານແລະຄຸ້ມຄອງວຽກງານ ຂອງສະພາຄວາມໝັ້ນຄົງແຫ່ງສະຫະປະຊາຊາດເທົ່ານັ້ນ, ແຕ່ຍັງໄດ້ຊຸກຍູ້ບັນດາບັນຫາບຸລິມະສິດຂອງຕົນ, ສ້າງເຄື່ອງໝາຍແລະປະກອບສ່ວນຕົວຈິງ ໃຫ້ແກ່ການເຄື່ອນໄຫວຂອງສະພາຄວາມໝັ້ນຄົງແຫ່ງສະຫະປະຊາຊາດ, ເຖິງວ່າວຽກນີ້ກໍປະສົບກັບສິ່ງທ້າທາຍບໍ່ໜ້ອຍ ໃນສະພາບການດ້ານການເມືອງ - ຄວາມໝັ້ນຄົງໃນບາງພາກພື້ນທີ່ຍັງມີການຜັນປ່ຽນຢ່າງສັບສົນ.
ພະຍາຍາມສົ່ງເສີມຄວາມເອົາໃຈໃສ່ ແລະຜົນປະໂຫຍດສ່ວນລວມ ຂອງປະຊາຄົມສາກົນ, ສ້າງເຄື່ອງໝາຍຊື່ສຽງໃຫ້ກັບຫວຽດນາມ ໃນເດືອນທຳອິດທີ່ເຂົ້າຮ່ວມສະພາຄວາມໝັ້ນຄົງ
ສຳລັບຫວຽດນາມ, ການດຳລົງຕຳແໜ່ງປະທານສະພາຄວາມໝັ້ນຄົງແຫ່ງສະຫະປະຊາຊາດໃນເດືອນທຳອິດເຂົ້າຮ່ວມສະພາ ແມ່ນການບັງເອີນທີ່ມີຄວາມໝາຍພິເສດ, ຊ່ວຍຕັ້ງພື້ນຖານແລະສ້າງທ່ວງທ່າທີ່ສະດວກດີ ໃຫ້ພວກເຮົາເຂົ້າຮ່ວມໃນສະພາຄວາມໝັ້ນຄົງໃນໄລຍະປີ 2020-2021.
ການຜັນຂະຫຍາຍປະຕິບັດແຜນນະໂຍບາຍທົ່ວໄປທີ່ຜູ້ນຳພັກແລະລັດວາງອອກ, ໃນຖານະປະທານສະພາຄວາມໝັ້ນຄົງແຫ່ງສະຫະປະຊາຊາດ, ຫວຽດນາມພະຍາຍາມປະຕິບັດເປັນຢ່າງດີ ບົດບາດໃນການເປັນປະທານແລະດຳເນີນກິດຈະກຳຂອງສະພາຄວາມໝັ້ນຄົງແຫ່ງສະຫະປະຊາຊາດ, ຊຸກຍູ້ການຊອກຫາວິທີແກ້ໄຂ ສຳລັບບັນຫາຕ່າງໆໃນວາລະກອງປະຊຸມ ຂອງສະພາຄວາມໝັ້ນຄົງແຫ່ງສະຫະປະຊາຊາດ ທີ່ສອດຄ່ອງກັບຄວາມສົນໃຈ, ຄວາມປາດຖະໜາ ແລະ ຜົນປະໂຫຍດທີ່ຊອບດ້ວຍກົດໝາຍ ຂອງບັນດາຝ່າຍທີ່ກ່ຽວຂ້ອງ, ສ້າງພື້ນຖານເພື່ອເພີ່ມທະວີການຮ່ວມມືກັບປະເທດອື່ນໆ. ຫວຽດນາມມີບົດບາດຕັ້ງໜ້າ, ເປັນເຈົ້າການ, ມີຄວາມຮັບຜິດຊອບ, ຈັດການປະຕິບັດວຽກງານຢ່າງມີຫຼັກການ, ພາວະວິໄສ, ໂປ່ງໃສ, ເຄົາລົບກົດບັດສະຫະປະຊາຊາດ ແລະຂັ້ນຕອນການເຮັດວຽກຂອງສະພາຄວາມໝັ້ນຄົງແຫ່ງສະຫະປະຊາຊາດ, ນຳໃຊ້ຄຳເຫັນແນະນຳ ຂອງກອງເລຂາທິການແຫ່ງສະຫະປະຊາຊາດ ຢ່າງມີປະສິດທິຜົນ; ພ້ອມກັນນັ້ນ, ພະຍາຍາມທີ່ຈະປະສົມກົມກຽວທັດສະນະຂອງຝ່າຍຕ່າງໆເມື່ອມີຄວາມແຕກຕ່າງ, ສູ້ຊົນສ້າງຄວາມເຫັນດີເຫັນພ້ອມ. ໃນຖານະຕົວແທນຂອງສະພາຄວາມໝັ້ນຄົງແຫ່ງສະຫະປະຊາຊາດ ໃນການພົວພັນກັບພາຍນອກ, ຫວຽດນາມພະຍາຍາມສະໜອງຂໍ້ມູນຂ່າວສານ ແລະທາບທາມຄວາມເຫັນກວ້າງຂວາງ ກັບບັນດາປະເທດສະມາຊິກສະຫະປະຊາຊາດ ທີ່ຢູ່ນອກສະພາຄວາມໝັ້ນຄົງ, ພິເສດແມ່ນບັນດາປະເທດອາຊີ, ອາຊຽນ ແລະ ໃຫ້ຄວາມສຳຄັນກັບການພົວພັນກັບສື່ມວນຊົນ ເພື່ອຍົກສູງລະດັບປະຊາທິປະໄຕ ແລະຄວາມໂປ່ງໃສ ໃນການເຄື່ອນໄຫວຂອງສະພາຄວາມໝັ້ນຄົງແຫ່ງສະຫະປະຊາຊາດ, ສືບຕໍ່ການປະກອບສ່ວນສຳຄັນຂອງຫວຽດນາມທີ່ໄດ້ຮັບການຍອມຮັບຈາກສາກົນ ກ່ຽວກັບການປະຕິຮູບວິທີເຮັດວຽກຂອງສະພາຄວາມໝັ້ນຄົງແຫ່ງສະຫະປະຊາຊາດ ໃນໄລຍະປີ 2008-2009.
ໃນຈິດໃຈນັ້ນ, ຫວຽດນາມໄດ້ເປັນເຈົ້າການ, ຕັ້ງໜ້າທົບທວນແລະປຶກສາຫາລືກັບກອງເລຂາທິການແຫ່ງສະຫະປະຊາຊາດ ເພື່ອພັດທະນາແຜນງານປະຈຳເດືອນ ຂອງສະພາຄວາມໝັ້ນຄົງແຫ່ງສະຫະປະຊາຊາດ ຢ່າງສົມເຫດສົມຜົນ, ສົມດຸນ, ກ່ຽວກັບທຸກບັນຫາເຊັ່ນ ບັນຫາເປັນໄລຍະ, ບັນຫາເຖິງກຳນົດເວລາດຳເນີນການ, ບັນດາບັນຫາສຳຮອງ, ກໍຄືບັນດາບັນຫາບຸລິມະສິດຂອງຫວຽດນາມ ເຊິ່ງໄດ້ຮັບການສະໜັບສະໜູນແລະຮັບຮອງຢ່າງເປັນເອກະສັນ ຈາກບັນດາປະເທດສະມາຊິກສະພາ ໃນວັນເຮັດວຽກທຳອິດຂອງຫວຽດນາມ ທີ່ສະພາຄວາມໝັ້ນຄົງແຫ່ງສະຫະປະຊາຊາດ. ຫວຽດນາມເປັນເຈົ້າພາບຈັດກອງປະຊຸມ 30 ຄັ້ງ, ປຶກສາຫາລືແລະຕົກລົງກ່ຽວກັບການເຄື່ອນໄຫວຂອງຄະນະຮັກສາສັນຕິພາບ ແລະ ຄະນະການເມືອງຂອງສະຫະປະຊາຊາດ ຢູ່ບັນດາປະເທດເຊັ່ນ: ໄຊປຣັດ, ເຢເມນ, ລິບີ..., ສະຖານະການຕາເວັນອອກກາງ, ຊີຣີ, ໂກໂລມບີ, ສາທາລະນະລັດອາຟຣິກາກາງ, ອາຟຣິກາຕາເວັນຕົກ..., ກອງປະຊຸມຕາມປົກກະຕິຂອງສະພາຄວາມໝັ້ນຄົງແຫ່ງສະຫະປະຊາຊາດ ກັບເລຂາທິການໃຫຍ່ສະຫະປະຊາຊາດ ແລະການເຄື່ອນໄຫວອື່ນໆອີກຫຼາຍຢ່າງ.
ພິເສດ, ໃນຖານະເປັນປະທານສະພາ, ຫວຽດນາມຈັດຕັ້ງ 2 ເຫດການສຳຄັນດ້ວຍ 2 ຫົວຂໍ້ບຸລິມະສິດແມ່ນ ເພີ່ມທະວີການປະຕິບັດຕາມກົດບັດສະຫະປະຊາຊາດ ແລະ ຊຸກຍູ້ການຮ່ວມມືລະຫວ່າງສະຫະປະຊາຊາດ/ສະພາຄວາມໝັ້ນຄົງແຫ່ງສະຫະປະຊາຊາດ ກັບອາຊຽນ.
ເຫດການສຳຄັນແມ່ນ ກອງປະຊຸມສົນທະນາເປີດກວ້າງໃນລະດັບລັດຖະມົນຕີ ໃນວັນທີ 9 ມັງກອນ 2020 ດ້ວຍຫົວຂໍ້ “ສະເຫຼີມສະຫຼອງວັນສ້າງຕັ້ງສະຫະປະຊາຊາດຄົບຮອບ 75 ປີ: ເພີ່ມທະວີການປະຕິບັດຕາມກົດບັດສະຫະປະຊາຊາດ ເພື່ອຮັກສາສັນຕິພາບແລະຄວາມໝັ້ນຄົງສາກົນ”. ນີ້ແມ່ນການເຄື່ອນໄຫວທີ່ມີຄວາມໝາຍພິເສດ ເພື່ອກຳນົດຫົວຂໍ້ກວມລວມສຳລັບການເຄື່ອນໄຫວຂອງ ສະພາຄວາມໝັ້ນຄົງແຫ່ງສະຫະປະຊາຊາດ ໃນປີ 2020 - ປີສະເຫຼີມສະຫຼອງການສະຖາປະນາແລະການພັດທະນາສະຫະປະຊາຊາດ ຄົບຮອບ 75 ປີ. ດ້ວຍເຫດການນີ້, ຫວຽດນາມຕັດສິນໃຈຢືນຢັນຄວາມສຳຄັນ ຂອງການປະຕິບັດຕາມ ຫຼັກການແລະຈຸດປະສົງຂອງກົດບັດສະຫະປະຊາຊາດ, ກົດໝາຍສາກົນ, ໂດຍສະເພາະແມ່ນ ບັນດາຫຼັກການພື້ນຖານກ່ຽວກັບຄວາມສະເໝີພາບທາງດ້ານອຳນາດອະທິປະໄຕ, ເຄົາລົບເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນ, ບໍ່ໃຊ້ກຳລັງອາວຸດ ແລະນາບຂູ່ຈະໃຊ້ກຳລັງອາວຸດ, ການແກ້ໄຂຂໍ້ຂັດແຍ້ງໂດຍສັນຕິວິທີ... ພິເສດແມ່ນ ໃນສະພາບການທີ່ເຕັມໄປດ້ວຍສິ່ງທ້າທາຍໃນປະຈຸບັນ.
ເຫດການທີ່ສອງແມ່ນ ກອງປະຊຸມກ່ຽວກັບຫົວຂໍ້ “ການຮ່ວມມືລະຫວ່າງສະຫະປະຊາຊາດ ກັບບັນດາອົງການຈັດຕັ້ງພາກພື້ນແລະອະນຸພາກພື້ນ ໃນການຮັກສາສັນຕິພາບ ແລະຄວາມໝັ້ນຄົງສາກົນ: ບົດບາດຂອງ ອາຊຽນ”. ຕາມນັ້ນ, ອາຊຽນ ເປັນຄັ້ງທຳອິດທີ່ຈະແບ່ງປັນໃນສະພາຄວາມໝັ້ນຄົງແຫ່ງສະຫະປະຊາຊາດ ກ່ຽວກັບບັນດາທິດທາງ, ຄວາມພະຍາຍາມ ແລະ ພຶດຕິກຳພາກພື້ນ ໃນການກີດກັ້ນບໍ່ໃຫ້ເກີດການປະທະກັນ, ການແກ້ໄຂບັນດາບັນຫາພາກພື້ນ, ການກໍ່ສ້າງປະຊາຄົມ, ຜ່ານນັ້ນ ຢືນຢັນບົດບາດເປັນໃຈກາງ ແລະ ການປະກອບສ່ວນທີ່ສຳຄັນຂອງ ອາຊຽນ, ສ້າງພື້ນຖານໃຫ້ແກ່ກົນໄກການແລກປ່ຽນເປັນປະຈຳ ກ່ຽວກັບສັນຕິພາບແລະຄວາມໝັ້ນຄົງຂອງພາກພື້ນ ລະຫວ່າງສະຫະປະຊາຊາດ/ສະພາຄວາມໝັ້ນຄົງແຫ່ງສະຫະປະຊາຊາດ ກັບອາຊຽນ. ນີ້ແມ່ນບັນຫາທີ່ມີລັກສະນະສົດໆຮ້ອນໆ, ມີຄວາມໝາຍການເມືອງ, ແມ່ນຄວາມສົນໃຈ ແລະຜົນປະໂຫຍດ ຂອງຫວຽດນາມ ແລະ ອາຊຽນ, ພ້ອມກັນນັ້ນ ກໍໄດ້ຮັບຄວາມເອົາໃຈໃສ່ຈາກຫຼາຍປະເທດ. ເຫດການດັ່ງກ່າວ ຍັງຢັ້ງຢືນບົດບາດຂອງຫວຽດນາມ ໃນຖານະທີ່ເປັນສະມາຊິກບໍ່ຖາວອນ ຂອງສະພາຄວາມໝັ້ນຄົງແຫ່ງສະຫະປະຊາຊາດ ແລະ ປະທານອາຊຽນໃນປີ 2020, ສອງກົນໄກທົ່ວໂລກ ແລະ ພາກພື້ນທີ່ມີຄວາມໝາຍສຳຄັນຕໍ່ຫວຽດນາມ.
ດ້ວຍແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ຖານະບົດບາດໃໝ່ຂອງປະເທດ, ການສະໜັບສະໜູນຂອງປະຊາຄົມສາກົນ, ພ້ອມກັບປະສົບການໃນການເປັນປະທານແລະບໍລິຫານກົນໄກພະຫຸພາຄີລະດັບພາກພື້ນແລະສາກົນ, ພະຍາຍາມກະກຽມຢ່າງຮອບຄອບ, ປະສານງານຢ່າງແໜ້ນແຟ້ນ ແລະ ມີປະສິດທິຜົນລະຫວ່າງກະຊວງ ຂະແໜງການ, ລະຫວ່າງໃນປະເທດແລະຕ່າງປະເທດ, ຫວຽດນາມມີເຫດຜົນພຽງພໍທີ່ຈະຢືນຢັນວ່າ ຫວຽດນາມໄດ້ສຳເລັດເປັນຢ່າງດີ ບົດບາດເປັນປະທານສະພາຄວາມໝັ້ນຄົງແຫ່ງສະຫະປະຊາຊາດ ໃນເດືອນມັງກອນ 2020, ບັນລຸໝາກຜົນເບື້ອງຕົ້ນທີ່ສຳຄັນ, ສ້າງແຮງຜັດດັນໃຫ້ການປະຕິບັດໜ້າທີ່ສະມາຊິກບໍ່ຖາວອນ ຂອງສະພາຄວາມໝັ້ນຄົງແຫ່ງສະຫະປະຊາຊາດ ປະສົບຄວາມສຳເລັດ. ດັ່ງທີ່ເລຂາທິການໃຫຍ່, ປະທານປະເທດ ຫວຽນຝູຈ້ອງ ໄດ້ເນັ້ນໜັກໃນສານຂອງທ່ານໃນໂອກາດທີ່ຫວຽດນາມເຂົ້າຮັບຕຳແໜ່ງເປັນປະທານອາຊຽນ ປີ 2020 ແລະ ສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດໃນໄລຍະປີ 2020-2021, ຫວຽດນາມຕັດສິນໃຈປະຕິບັດສຳເລັດໜ້າທີ່ຮັບຜິດຊອບ, ກຽດອັນສະຫງ່າ ແລະ ກໍ່ແມ່ນສິ່ງທ້າທາຍທີ່ໃຫຍ່ນີ້, ປະກອບສ່ວນຕົວຈິງເຂົ້າໃນການຮັກສາສັນຕິພາບ, ສະຖຽນລະພາບສາກົນແລະພາກພື້ນ, ຮັກສາສະພາບແວດລ້ອມສັນຕິພາບ ສະຖຽນລະພາບ ໃຫ້ແກ່ການພັດທະນາປະເທດ, ຜັນຂະຫຍາຍຢ່າງມີປະສິດທິຜົນ ຄຳສັ່ງເລກທີ 25-CT/TW, ວັນທີ 8 ສິງຫາ 2018, ຂອງຄະນະເລຂາທິການສູນກາງ, ກ່ຽວກັບການຍູ້ແຮງ ແລະຍົກສູງລະດັບການຕ່າງປະເທດຫຼາຍຝ່າຍ ຮອດປີ 2030, ປະກອບສ່ວນປະຕິບັດແນວທາງການຕ່າງປະເທດ ຂອງກອງປະຊຸມໃຫຍ່ຄັ້ງທີ XII ຂອງພັກຢ່າງສຳເລັດມີໄຊ, ໄປສູ່ກອງປະຊຸມໃຫຍ່ຄັ້ງທີ XIII ຂອງພັກ./.
----------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 938 (ເດືອນມີນາ 2020)