ການພັດທະນະໂຄງສ້າງພື້ນຖານດ້ານຄົມມະນາຄົມ “ໄປກ່ອນກ້າວໜຶ່ງ” ຕາມທິດທາງຄົບຊຸດແລະທັນສະໄໝ
ວກ. - ໂຄງສ້າງພື້ນຖານເວົ້າລວມ ແລະ ໂຄງສ້າງພື້ນຖານດ້ານຄົມມະນາຄົມເວົ້າສະເພາະ ແມ່ນພື້ນຖານວັດຖຸທີ່ມີບົດບາດສຳຄັນພິເສດ ໃຂຂະບວນການພັດທະນາເສດຖະກິດ - ສັງຄົມຂອງປະເທດ. ມີໂຄງສ້າງພື້ນຖານດ້ານຄົມມະນາຄົມທີ່ຄົບຊຸດ, ທັນສະໄໝ, ເຊື່ອມຕໍ່ຕອບສະໜອງຄວາມຕ້ອງການໃນການຂົນສົ່ງສິນຄ້າ, ຜູ້ໂດຍສານ… ເສດຖະກິດຈຶ່ງມີເງື່ອນໄຂເພື່ອເຕີບໂຕຢ່າງໄວວາ, ໝັ້ນຄົງ ແລະຍືນຍົງ. ການພັດທະນາ ໂຄງສ້າງພື້ນຖານດ້ານຄົມມະນາຄົມຕາມທິດນຳ "ໄປກ່ອນກ້າວໜຶ່ງ” ແມ່ນຄວາມຮຽກຮ້ອງຕ້ອງການອັນຮີບດ່ວນຂອງພາກປະຕິບັດ, ທັງແນໃສ່ແກ້ຈຸດປິດຕັນ, ທັງສ້າງເງື່ອນໄຂເພື່ອກ້າວໄວໃນຂະບວນການກໍ່ສ້າງໂຄງສ້າງພື້ນຖານທີ່ຄົບຊຸດຂອງປະເທດ.
ທິດທາງການພັດທະນາໂຄງສ້າງພື້ນຖານດ້ານຄົມມະນາຄົມຢ່າງຄົບຊຸດ, ທັນສະໄໝ ເພື່ອຊຸກຍູ້ການພັດທະນາເສດຖະກິດ-ສັງຄົມ
ເພື່ອປະຕິບັດຂໍ້ຕົກລົງສະບັບເລກທີ 355/QĐ-TTg, ລົງວັນທີ 25 ກຸມພາ 2013, ຂອງນາຍົກລັດຖະມົນຕີ, ກ່ຽວກັບການອະນຸມັດ ສະບັບປັບປຸງ ຍຸດທະສາດການພັດທະນາການຄົມມະນາຄົມຂົນສົ່ງຫວຽດນາມຮອດປີ 2020, ວິໄສທັດຮອດປີ 2030 ແລະແຜນການພັດທະນາຂະແໜງການຄົມມະນາຄົມຂົນສົ່ງ, ໃນເວລາທີ່ຜ່ານມາ, ພັກ ລັດແລະທົ່ວສັງຄົມ ໄດ້ໃຫ້ຄວາມເອົາໃຈໃສ່ຢ່າງໃຫຍ່ຫຼວງແກ່ການລົງທຶນພັດທະນາການຄົມມະນາຄົມຂົນສົ່ງ; ໃນນັ້ນ, ລະບົບໂຄງສ້າງພື້ນຖານດ້ານຄົມມະນາຄົມໄດ້ມີບາດກ້າວພັດທະນາຢ່າງແຂງແຮງ. ຄຸນນະພາບການຂົນສົ່ງນັບມື້ນັບໄດ້ຮັບການຍົກສູງ, ຕອບສະໜອງໄດ້ໂດຍພື້ນຖານ ຄວາມຕ້ອງການພັດທະນາເສດຖະກິດກິດ-ສັງຄົມ, ຮັບປະກັນການປ້ອງກັນຊາດ-ປ້ອງກັນຄວາມສະຫງົບ, ຍົກສູງຊີວິດການເປັນຢູ່ຂອງປະຊາຊົນ, ປະກອບສ່ວນລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ຫຼຸດໄລຍະຫ່າງລະຫວ່າງພາກພື້ນແລະພາກພື້ນ. ບາງກິດຈະການກໍ່ສ້າງຄົມມະນາຄົມທັນສະໄໝເຊັ່ນ: ທາງດ່ວນ, ທ່າເຮືອເດີນທະເລລະຫວ່າງຊາດ, ສະໜາມບິນສາກົນ,... ໄດ້ຮັບການລົງທຶນກໍ່ສ້າງບັນລຸມາດຕະຖານພາກພື້ນແລະສາກົນ, ປະກອບສ່ວນສ້າງພາບພົດໃໝ່ໃຫ້ປະເທດ.
ແຕ່ໃນພາບຕົວຈິງ, ລະບົບໂຄງສ້າງພື້ນຖານດ້ານຄົມມະນາຄົມຍັງມີຂໍ້ບົກພ່ອງຫຼາຍຢ່າງ, ບໍ່ທັນຄົບຊຸດ ທັນສະໄໝ ແລະບໍ່ຕອບສະໜອງໄດ້ກັບຄວາມຕ້ອງການໃນການພັດທະນາເສດຖະກິດ-ສັງຄົມຂອງປະເທດ.
ໃນຍຸດທະສາດການພັດທະນາເສດຖະກິດ-ສັງຄົມປີ 2011-2020 ໄດ້ຮັບການອະນຸມັດຜ່ານ ໂດຍພັກກອມມູນິດຫວຽດນາມ ໄດ້ຂຽນວ່າ: “ໂຄງສ້າງພື້ນຖານຍັງມີຈຸດປິດຕັນທີ່ກີດຂວາງການພັດທະນາ”. ໜຶ່ງໃນທິດທາງການພັດທະນາເສດຖະກິດ-ສັງຄົມ, ການປ່ຽນແປງໃໝ່ຮູບແບບການເຕີບໂຕ, ການຈັດສັນໂຄງສ້າງເສດຖະກິດຄືນໃໝ່ ທີ່ໄດ້ລະບຸໄວ້ໃນຍຸດທະສາດແມ່ນ: “ພັດທະນາໂຄງສ້າງພື້ນຖານຢ່າງໄວວາ, ໂດຍສະເພາະແມ່ນໂຄງສ້າງພື້ນຖານດ້ານຄົມມະນາຄົມ. ການເປັນຮູບເປັນຮ່າງໂດຍພື້ນຖານ ຂອງລະບົບໂຄງສ້າງພື້ນຖານດ້ານຄົມມະນາຄົນ, ດ້ວຍກິດຈະການກໍ່ສ້າງທັນສະໄໝຈຳນວນໜຶ່ງ ແມ່ນຄວາມກ້າວໜ້າທາງຍຸດທະສາດ, ແມ່ນປັດໄຈສຳຄັນທີ່ຊຸກຍູ້ການພັດທະນາເສດຖະກິດ-ສັງຄົມ ແລະການຈັດສັນໂຄງສ້າງເສດຖະກິດຄືນໃໝ່”(1).
ເພື່ອຜັນຂະຫຍາຍປະຕິບັດຍຸດທະສາດການພັດທະນາເສດຖະກິດ-ສັງຄົມປີ 2011-2020, ກອງປະຊຸມຄັ້ງທີສີ່ຂອງຄະນະບໍລິຫານງານສູນກາງພັກສະໄໝທີ XI ໄດ້ຜ່ານມະຕິເລກທີ 13-NQ/TW, ລົງວັນທີ 16 ມັງກອນ 2012, ກ່ຽວກັບການກໍ່ສ້າງໂຄງສ້າງພື້ນຖານທີ່ຄົບຊຸດ ແນໃສ່ເຮັດໃຫ້ປະເທດເຮົາໂດຍພື້ນຖານກາຍເປັນປະເທດອຸດສາຫະກຳຕາມທິດທັນສະໄໝໃນປີ 2020. ມະຕິໄດ້ກຳນົດເປົ້າໝາຍ: “ສຸມໃສ່ລະດົມຊັບພະຍາກອນທຸກຢ່າງ ເພື່ອລົງທຶນແກ້ໄຂໂດຍພື້ນຖານບັນຫາຂໍ້ປິດຕັນ, ການຄົມມະນາຄົມແອອັດ, ຄວາມຮ້ອນເຄືອງ ແລະ ກໍ່ຕັ້ງເທື່ອລະກ້າວ ລະບົບໂຄງສ້າງພື້ນຖານເສດຖະກິດ, ສັງຄົມທີ່ຄົບຊຸດພໍຄວນ ດ້ວຍກິດຈະການກໍ່ສ້າງທີ່ທັນສະໄໝ”. ໃນນັ້ນ, ການພັດທະນາໂຄງສ້າງພື້ນຖານແມ່ນໜຶ່ງໃນສີ່ຂົງເຂດຈຸດສຸມ, ມີຄວາມຕ້ອງການ: “ຮັບປະກັນການເຊື່ອມຕໍ່ບັນດາສູນເສດຖະກິດໃຫຍ່ນຳກັນ ແລະກັບສູນການຈະລາຈອນປະຕູເມືອງ ໂດຍລະບົບຄົມມະນາຄົມທີ່ຄົບຊຸດ, ຄວາມສາມາດຂົນສົ່ງໄດ້ຮັບການຍົກສູງ, ການຄົມມະນາຄົມສະດວກແລະປອດໄພ”(2).
ເພື່ອສືບຕໍ່ສ້າງແຫຼ່ງພະລັງໃຫ້ແກ່ການລົງທຶນພັດທະນາໂຄງສ້າງພື້ນຖານດ້ານຄົມມະນາຄົມ, ກອງປະຊຸມໃຫຍ່ຜູ້ແຫນທົ່ວປະເທດຄັ້ງທີ XII ຂອງພັກກອມມູນິດຫວຽດນາມ (ເດືອນມັງກອນ 2016) ໄດ້ຢືນຢັນແຜນນະໂຍບາຍສືບຕໍ່ປະຕິບັດຢ່າງມີປະສິດທິຜົນ ສາມການບຸກທະລຸຍຸດທະສາດການພັດທະນາເສດຖະກິດ-ສັງຄົມຮອດປີ 2020, ໃນນັ້ນເອົາໃຈໃສ່: “ຍູ້ແຮງການປະຕິບັດການບຸກທະລຸຍຸດທະສາດກ່ຽວກັບການກໍ່ສ້າງລະບົບໂຄງສ້າງພື້ນຖານທີ່ຄົບຊຸດ ໂດຍມີກິດຈະການກໍ່ສ້າງທີ່ທັນສະໄໝຈຳນວນໜຶ່ງ... ຮັບປະກັນປະສິດທິຜົນສັງລວມແລະຄວາມເປັນລະບົບ, ໂດຍສະເພາະແມ່ນເຄືອຂ່າຍຄົມມະນາຄົມ...”(3). ເພື່ອໃຫ້ມີບາດກ້າວບຸກທະລຸໃນການກໍ່ສ້າງໂຄງສ້າງພື້ນຖານດ້ານຄົມມະນາຄົມ, ມະຕິກອງປະຊຸມໃຫຍ່ໄດ້ຊີ້ແຈ້ງ: “ລວມສູນຊັບພະຍາກອນເພື່ອກໍ່ສ້າງບັນດາກິດຈະກຳໃຫຍ່ທີ່ມີຄວາມສຳຄັນຢ່າງຍິ່ງ, ໂດຍສະເພາະແມ່ນຢູ່ເຂດທີ່ມີຄວາມສາມາດພັດທະນາ ແລະ ແກ້ໄຂບັນຫາປິດຕັນ, ການຈະລາຈອນຕິດຂັດ. ຮັບປະກັນການເຊື່ອມຕໍ່ຢ່າງສະດວກດີ ລະຫວ່າງບັນດາສູນເສດຖະກິດໃຫຍ່, ບັນດາປະຕູການຈະລາຈອນຕາມເສັ້ນທາງທີ່ມີຄວາມຕ້ອງການຂົນສົ່ງຫຼາຍ. ເອົາໃຈໃສ່ລົງທຶນກໍ່ສ້າງໂຄງສ້າງພື້ນຖານດ້ານຄົມມະນາຄົມໃນເຂດທີ່ມີຄວາມຫຍຸ້ງຍາກ”(4).
ບັນດາມະຕິ, ຍຸດທະສາດຂອງພັກທີ່ກ່າວມາເທິງນີ້ ທັງແມ່ນເປົ້າໝາຍ, ທັງແມ່ນການກຳນົດທິດທາງ ໃຫ້ຂະແໜງການຄົມມະນາຄົມຂົນສົ່ງ ຈັດຕັ້ງການພັດທະນາ ໂຄງສ້າງພື້ນຖານດ້ານຄົມມະນາຄົມ.
ສະພາບການລົງທຶນໃນການພັດທະນາລະບົບໂຄງສ້າງພື້ນຖານດ້ານຄົມມະນາຄົມ
ອີງຕາມບັນດາທັດສະນະ, ທິດທາງຊີ້ນຳຂອງພັກກອມມູນິດຫວຽດນາມ ກ່ຽວກັບການພັດທະນາໂຄງສ້າງພື້ນຖານດ້ານຄົມມະນາຄົມຢ່າງຄົບຊຸດແລະທັນສະໄໝ, ນາຍົກລັດຖະມົນຕີໄດ້ປະກາດໃຊ້ ຂໍ້ຕົກລົງສະບັບເລກທີ 355/QĐ-TTg ແລະປັບປຸງແຜນການພັດທະນາການຄົມມະນາຄົມຂົນສົ່ງຂອງ 5 ຂະແໜງການສະເພາະ: ທາງບົກ, ທາງລົດໄຟ, ທາງນ້ຳພາຍໃນປະເທດ, ການບິນ ແລະ ການເດີນເຮືອທາງທະເລ. ໃນນັ້ນ, ແຜນການກໍ່ສ້າງບັນດາກິດຈະການຄົມມະນາຄົມທີ່ທັນສະໄໝ, ເຊື່ອມຕໍ່ຢ່າງຄົບຊຸດລວມມີ: 1- ເຄືອຂ່າຍທາງດ່ວນແຫ່ງຊາດ ເພື່ອເຊື່ອມຕໍ່ກັບບັນດາສູນກາງເສດຖະກິດພາກເໜືອ - ພາກໃຕ້, ບັນດາດ່ານຊາຍແດນ, ບັນດາສະໜາມບິນ ທ່າກຳປັ່ນສາກົນ, ບັນດາຖະໜົນວົງແຫວນໃນຕົວເມືອງ ທີ່ມີຄວາມຕ້ອງການຂົນສົ່ງຫຼາຍ, ດ້ວຍລວງຍາວທັງໝົດ 6.411 ກມ; 2- ເສັນທາງລົດໄຟຄວາມໄວສູງເໜືອ-ໃຕ້ ແລະ ລະບົບທາງລົດໄຟໃນຕົວເມືອງຢູ່ຮ່າໂນ້ຍ, ນະຄອນໂຮ່ຈີມິນ; 3- ບັນດາທ່າກຳປັ່ນທະເລຢູ່ພາກເໜືອ - ພາກກາງ - ພາກໃຕ້ (ທ່າກຳປັ່ນແລັກຮວ້ຽນ, ທ່າກຳປັ່ນເວິນຟອງ ແລະທ່າກຳປັ່ນກ້າຍແມັບ - ທີ້ຫວາຍ); 4- ແຜນກຳນົດເຄືອຂ່າຍສາຍການບິນຕາມຮູບວີ ທີ່ມີຄວາມຖີ່ໃນການເຄື່ອນໄຫວສູງ, ມີສະຖານີທີ່ທັນສະໄໝຢູ່ 2 ສົ້ນຄື ຮ່າໂນ້ຍແລະນະຄອນໂຮ່ຈີມິນ; 5- ການຄຸ້ມຄອງການຈະລາຈອນໃນຕົວເມືອງທາງວິທະຍາສາດ ໂດຍນຳໃຊ້ເຕັກໂນໂລຊີທີ່ທັນສະໄໝ ຜ່ານລະບົບກ້ອງຖ່າຍຮູບ, ການຈະລາຈອນທີ່ສະຫຼາດ (ITS).
ຄຽງຂ້າງການລົງທຶນກໍ່ສ້າງໂຄງການຈຳນວນໜຶ່ງ ເພື່ອຮັບປະກັນຄວາມປອດໄພທາງສັງຄົມ, ລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ພາຍຫຼັງເຈັດປີແຫ່ງການຜັນຂະຫຍາຍປະຕິບັດບັນດາມະຕິ, ຍຸດທະສາດ, ແຜນການ, ລະບົບໂຄງສ້າງພື້ນຖານດ້ານຄົມມະນາຄົມໄດ້ບັນລຸຜົນງານທີ່ສຳຄັນຫຼາຍຢ່າງ, ຫຼາຍກິດຈະການຄົມມະນາຄົມຂະໜາດໃຫຍ່, ທັນສະໄໝ ໄດ້ແລະພວມໄດ້ຮັບການລົງທຶນກໍ່ສ້າງ, ປະກອບສ່ວນສ້າງພາບພົດໃໝ່ໃຫ້ປະເທດ, ສ້າງການເຊື່ອມຕໍ່ລະຫວ່າງບັນດາເຂດ, ພາກພື້ນພາຍໃນປະເທດ ແລະກັບຕ່າງປະເທດ.
ກ່ຽວກັບທາງບົກ, ມີເສັ້ນທາງດ່ວນ 1.041 ກມ ໄດ້ຖືກນຳໃຊ້ແລ້ວ, ກຳລັງລົງທຶນກໍ່ສ້າງກວ່າ 160 ກມ, ສືບຕໍ່ຜັນຂະຫຍາຍຂັ້ນຕອນຕ່າງໆເພື່ອລົງທຶນກໍ່ສ້າງເສັ້ນທາງດ່ວນເໜືອ-ໃຕ້ຕື່ມອີກ 654 ກມ (ຕາມມະຕິເລກທີ 52/2017/QH14, ລົງວັນທີ 22 ພະຈິກ 2017, ຂອງສະພາແຫ່ງຊາດ); ທາງດ່ວນ 40 ກມ ຈາກເມືອງລ້າງເຊີນ - ປະຕູຊາຍແດນ ມິດຕະພາບ (ດົ່ງດັງ); ທາງດ່ວນ 92 ກມ ຈາກເມືອງເວິນໂດ່ນ - ມ້ອງກ໋າຍ. ກ່ຽວກັບສາຍການບິນ, ໄດ້ມີການພັດທະນາຢ່າງກ້າວກະໂດດ ທັງດ້ານຂະໜາດແລະຄຸນນະພາບການບໍລິການ, ຕອບສະໜອງຄວາມຕ້ອງການການຂົນສົ່ງທາງອາກາດທີ່ເຕີບໂຕຢ່າງໄວວາໃນໄລຍະທີ່ຜ່ານມາ ດ້ວຍອັດຕາການເຕີບໂຕສະເລ່ຍ 16% - 18% ຕໍ່ປີ, ໄດ້ລົງທຶນຍົກລະດັບສະໜາມບິນໂນ້ຍບ່າຍ, ເຕິນເຊີນເຍິດ, ດ່ານັ້ງ ແລະ ກໍ່ສ້າງໃໝ່ສະໜາມບິນຝູກວັກ, ສະໜາມບິນເວິນໂດ່ນ, ຍົກຄວາມສາມາດຂົນສົ່ງທັງໝົດຂອງເຄືອຂ່າຍສະໜາມບິນໃຫ້ບໍລິການຜູ້ໂດຍສານປະມານ 90 ລ້ານຄົນຕໍ່ປີ, ເພີ່ມຂຶ້ນ 2,5 ເທົ່າເມື່ອທຽບກັບປີ 2011. ບົດລາຍງານການສຶກສາຄວາມເປັນໄປໄດ້ຂອງໂຄງການສະໜາມ ບິນສາກົນລອງແທ່ງໄລຍະ 1 ໄດ້ຮັບການອະນຸມັດຈາກສະພາແຫ່ງຊາດຫວຽດນາມ.
ສຳເລັດການລົງທຶນກໍ່ສ້າງທ່າເຮືອປະຕູສາກົນກ້າຍແມັບ - ທີ້ຫວາຍ, ແລັກຮວ້ຽນ ສາມາດຮັບເຮືອບັນທຸກຂະໜາດໃຫຍ່ຈາກ 130.000 ໂຕນຫາ 200.000 ໂຕນ (DWT) ເຂົ້າທຽບທ່າ ແລະ ໄປສູ່ຝັ່ງທິດຕາເວັນຕົກຂອງສະຫະລັດອາເມລິກາ, ການາດາ ແລະທະວີບເອີຣົບ; ບັນດາທ່າກຳປັ່ນຜູ້ໂດຍສານຢູ່ຝູກວັກ, ຮ້າລອງ ມີຄວາມສາມາດຮັບເອົາກຳປັ່ນຜູ້ໂດຍສານຂະໜາດໃຫຍ່ທີ່ສຸດໃນໂລກ; ປະຕິບັດການສ້ອມແປງຍົກລະດັບທ່າກຳປັ່ນຢູ່ບໍລິເວນ ງີເຊີນ, ດ່ານັ້ງ, ກວີເຍິນ, ແຂງຮວ່າ, ເກິ່ນເທີ, ຍົກຄວາມສາມາດຂົນສົ່ງຂອງທ່າກຳປັ່ນຈາກ 420 ລ້ານໂຕນ (ປີ 2011) ຂຶ້ນປະມານ 580 ລ້ານໂຕນຕໍ່ປີ. ບັນດາສາຍທາງນ້ຳພາຍໃນປະເທດໄດ້ຮັບການລົງທຶນຍົກລະດັບ, ໃນນັ້ນ: ຢູ່ເຂດທົ່ງພຽງແມ່ນ້ຳຂອງມີສາຍທາງນ້ຳ 1.082 ກມ, ເຂດທົ່ງພຽງພາກເໜືອມີ 462 ກມ ທີ່ໄດ້ຮັບການລົງທຶນສ້ອມແປງ, ຍົກຄວາມສາມາດຂົນສົ່ງຂຶ້ນສູງ.
ປະຈຸບັນ, ກະຊວງຄົມມະນາຄົມຂົນສົ່ງກຳລັງປະສານງານກັບຄະນະກຳມະການປະຊາຊົນຮ່າໂນ້ຍ, ຄະນະກຳມະການປະຊາຊົນນະຄອນໂຮ່ຈີມິນ ເພື່ອສຸມໃສ່ປະຕິບັດ 5 ໂຄງການທາງລົດໄຟໃນຕົວເມືອງ; ໄດ້ຜັນຂະຫຍາຍບັນດາໂຄງການປັບປຸງຂົວທີ່ອ່ອນແອ, ລະບົບສັນຍານຂ່າວສານ, ເພີ່ມເຕີມສ້ອມແປງອຸໂມງທາງລົດໄຟ ແລະວຽກງານພື້ນຖານໂຄງລ່າງທີ່ຈຳເປັນອື່ນໆ, ຜ່ານສິ່ງດັ່ງກ່າວ ໄດ້ປັບປຸງລະດັບຄວາມປອດໄພ, ເຮັດໃຫ້ເວລາເດີນທາງຂອງລົດໄຟໃນເສັ້ນທາງລົດໄຟເໜືອ-ໃຕ້ສັ້ນລົງ; ກຳລັງສຸມໃສ່ປະຕິບັດບັນດາໂຄງການທາງລົດໄຟທີ່ສຳຄັນ, ຮີບດ່ວນ ເພື່ອແນໃສ່ຍົກສູງຄວາມສາມາດໃຊ້ປະໂຫຍດ ແລະຄວາມປອດໄພຂອງລົດໄຟບົນທາງລົດໄຟເໜືອ-ໃຕ້ ແລະສຳເລັດການສຶກສາຄວາມເປັນໄປໄດ້ລ່ວງໜ້າສຳລັບທາງລົດໄຟຄວາມໄວສູງເໜືອ-ໃຕ້ ເພື່ອສົ່ງໃຫ້ສະພາແຫ່ງຊາດຮັບຮອງໃນປີ 2020.
ການຄົມມະນາຄົມໃນເມືອງໄດ້ຮັບການສ້ອມແປງ, ຍົກລະດັບ ແລະຂະຫຍາຍເທື່ອລະກ້າວ, ພິເສດແມ່ນຢູ່ບັນດາຕົວເມືອງໃຫຍ່, ປະກອບສ່ວນຈຳກັດຄວາມແອອັດຂອງຜູ້ໂດຍສານ, ພາຫະນະ ແລະສິນຄ້າ. ສຸມການລົງທຶນໃສ່ບັນດາເສັ້ນທາງລັດສະໝີ, ຖະໜົນວົງແຫວນ, ຈຸດຕັດແຍກທີ່ແຍກສຳຄັນ ແລະທາງຫຼີກລ່ຽງຕົວເມືອງ, ໃຫ້ບຸລິມະສິດແກ່ຖະໜົນວົງແຫວນຢູ່ຮ່າໂນ້ຍແລະນະຄອນໂຮ່ຈີມິນ, ບັນດາກິດຈະການກໍ່ສ້າງຈຸດສຸມໃນແຕ່ລະພື້ນທີ່ (ບັນດາຂົວໃຫຍ່ເຊັ່ນ: ເຍິດເຕີນ, ຫວິງທິ້ງ, ກາວແລ້ງ, ວ່າມກົ໋ງ, ນຳກັນ, ໂກ໋ຈຽນ, ໝິເລີ້ຍ, ກ້າຍຕັດ, ອານຫຶ້ວ, ແຣັກສອຍ...); ປະສານງານກັບຄະນະກຳມະການປະຊາຊົນຮ່າໂນ້ຍ, ຄະນະກຳມະການປະຊາຊົນນະຄອນໂຮ່ຈີມິນ ເພື່ອສຸມໃສ່ຜັນຂະຫາຍການກໍ່ສ້າງທາງລົດໄຟໃນຕົວເມືອງ. ຄຸນນະພາບຂອງການຮັບໃຊ້ແລະບໍລິການຂົນສົ່ງກໍ່ໄດ້ຮັບການປັບປຸງ ແລະຍົກສູງຂຶ້ນເລື້ອຍໆ, ຮັບປະກັນຮັບໃຊ້ຄວາມຕ້ອງການດ້ານການທ່ອງທ່ຽວຂອງປະຊາຊົນໄດ້ດີຍິ່ງຂຶ້ນ; ຊຸກຍູ້ການພັດທະນາການຜະລິດ ທຸລະກິດ; ປະກອບສ່ວນຄວບຄຸມເງິນເຟີ້, ເຮັດໃຫ້ເສດຖະກິດມະຫາພາກມີສະຖຽນລະພາບ, ຮັບປະກັນຄວາມປອດໄພທາງສັງຄົມ, ຜ່ານສິ່ງດັ່ງກ່າວຍົກສູງຄວາມສາມາດແຂ່ງຂັນຂອງພື້ນຖານເສດຖະກິດ.
ເພື່ອປະຕິບັດມະຕິຕ່າງໆຂອງພັກ ແລະລັດຖະບານ, ກະຊວງຄົມມະນາຄົມຂົນສົ່ງໄດ້ຜັນຂະຫຍາຍປະຕິບັດໂຄງການຕ່າງໆຢ່າງທັນການ ດັ່ງນັ້ນລະບົບໂຄງສ້າງພື້ນຖານດ້ານຄົມມະນາຄົມຂອງປະເທດຈຶ່ງມີການປ່ຽນແປງຢ່າງຈະແຈ້ງທີ່ສຸດ, ຄວາມສາມາດຂອງລະບົບໂຄງສ້ານພື້ນຖານດ້ານຄົມມະນາຄົມໄດ້ຮັບການຍົກສູງຂຶ້ນຫຼາຍພໍຄວນ. ຕາມບົດລາຍງານຄວາມສາມາດໃນການແຂ່ງຂັນທົ່ວໂລກ ທີ່ຖືກເຜີຍແຜ່ໂດຍ ເວທີປາໄສເສດຖະກິດໂລກ (WEF) ໃນໄລຍະການປະເມີນສົກປີ 2017-2018, ຄວາມສາມາດແລະຄຸນນະພາບຂອງໂຄງສ້າງພື້ນຖານຂອງຫວຽດນາມໄດ້ເພີ່ມຂຶ້ນຢ່າງຕໍ່ເນື່ອງ, ຈາກອັນດັບທີ 95 ໃນ 144 ປະເທດ (ປີ 2011) ຂຶ້ນເປັນ 79 ໃນ 137 ປະເທດ (ປີ 2016), ໃນນັ້ນ, ດັດຊະນີກ່ຽວກັບຄຸນນະພາບຂອງໂຄງສ້າງພື້ນຖານທາງບົກຢູ່ໃນອັນດັບ 92 (ເພີ່ມຂຶ້ນ 28 ຂັ້ນ), ທ່າກຳປັ່ນທະເລຢູ່ໃນອັນດັບທີ 82 (ເພີ່ມຂຶ້ນ 31 ຂັ້ນ). ດັດຊະນີຄວາມສາມາດແຫ່ງຊາດດ້ານໂລຈິສະຕິກ (LPI) ຂອງຫວຽດນາມປີ 2018 ຢູ່ອັນດັບທີ 39 ໃນ 160 ປະເທດ, ເພີ່ມຂຶ້ນ 25 ຂັ້ນເມື່ອທຽບກັບປີ 2016 (ປີ 2011, ຫວຽດນາມຖືດຈັດໃນອັນດັບທີ 53 ໃນ 155 ປະເທດ). ໃນພາກພື້ນຂອງສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ), ຫວຽດນາມຢູ່ໃນອັນດັບທີ 3, ຖັດຈາກສິງກະໂປ (ອັນດັບທີ 7) ແລະໄທ (ອັນດັບທີ 32). ບັນດາດັດຊະນີການປະເມີນ LPI ທັງໝົດໃນປີ 2018 ໄດ້ເພີ່ມຂຶ້ນຢ່າງແຮງ, ໃນນັ້ນ, ເພີ່ມຂຶ້ນສູງສຸດແມ່ນຄຸນນະພາບບໍລິການ (ອັນດັບທີ 33, ເພີ່ມຂຶ້ນ 29 ຂັ້ນ) ແລະຄວາມສາມາດໃນການຕິດຕາມທີ່ມາຂອງສິນຄ້າ (ອັນດັບທີ 34, ເພີ່ມຂຶ້ນ 41 ຂັ້ນ).
ເຖິງວ່າໄດ້ຮັບຜົນສຳເລັດທີ່ສຳຄັນຫຼາຍຢ່າງໃນການພັດທະນາໂຄງສ້າງພື້ນຖານດ້ານຄົມມະນາຄົມຕາມທິດຄົບຊຸດແລະທັນສະໄໝກໍ່ຕາມ, ແຕ່ລະບົບໂຄງສ້າງພື້ນຖານດ້ານຄົມມະນາຄົມຫວຽດນາມຍັງມີຈຸດປິດຕັນຕໍ່ຄວາມຕ້ອງການພັດທະນາ ເພື່ອກ້າວໄປເຖິງເປົ້າໝາຍການຫັນປະເທດເປັນອຸດສາຫະກຳ ທັນສະໄໝ: ລະບົບທາງດ່ວນຫາກໍ່ໄດ້ຮັບການສ້າງຂຶ້ນ, ຍັງບໍ່ທັນບັນລຸເປົ້າໝາຍເຖິງປີ 2020 ຈະມີທາງດ່ວນ 2.000 ກມ ເຂົ້ານຳໃຊ້; ລະບົບທາງລົດໄຟຫຼ້າຫຼັງ, ຍັງບໍ່ທັນລົງທຶນສ້າງທາງລົດໄຟຄວາມໄວສູງ, ສຳລັບທາງລົດໄຟໃນຕົວເມືອງແມ່ນຫາກໍ່ໄດ້ລົງທຶນກໍ່ສ້າງບາງສາຍ; ລະບົບທ່າກຳປັ່ນທະເລບໍ່ໄດ້ໃຊ້ປະໂຫຍດຈາກການອອກແບບຂອງມັນຢ່າງເຕັມສ່ວນ; ສະໜາມບິນບາງແຫ່ງປະສົບບັນຫາການບັນທຸກເກີນຄວາມສາມາດ... ດັ່ງນັ້ນ, ລະບົບໂຄງສ້າງພື້ນຖານດ້ານຄົມມະນາຄົມແບບຄົບຊຸດແລະທັນສະໄໝຍັງບໍ່ທັນໄດ້ສ້າງຕັ້ງຂຶ້ນ, ໂດຍສະເພາະເມື່ອປຽບທຽບກັບມາດຕະຖານສາກົນ (ເຄືອຂ່າຍທາງດ່ວນ, ທາງລົດໄຟຄວາມໄວສູງ, ສະໜາມບິນ, ທ່າກຳປັ່ນທະເລທີ່ສຳຄັນ).
ໜຶ່ງໃນບັນດາສາເຫດຕົ້ນຕໍ່ແມ່ນ ຄວາມຫຍຸ້ງຍາກທາງດ້ານແຫຼ່ງພະລັງ, ເຮັດໃຫ້ວຽກງານການລົງທຶນພັດທະນາໂຄງສ້າງພື້ນຖານດ້ານຄົມມະນາຄົມ ຖືກຊັກຊ້າເມື່ອທຽບກັບຄວາມຮຽກຮ້ອງຕ້ອງການ, ລະບົບໂຄງສ້າງພື້ນຖານດ້ານຄົມມະນາຄົມທີ່ມີຢູ່ ກໍ່ບໍ່ມີເງື່ອນໄຂສຳລັບການສ້ອມແປງແລະບຳລຸງຮັກສາຢ່າງທັນການແລະພຽງພໍ ເຊິ່ງຈຳກັດຄວາມສາມາດໃນການຂຸດຄົ້ນ. ຕາມແຜນການງົບປະມານຂອງລັດສົກປີ 2016 ເຖິງ 2020, ກະຊວງການຄົມມະນາຄົມຂົນສົ່ງໄດ້ຮັບການຈັດແບ່ງງົບປະມານ ເຊິ່ງພຽງແຕ່ຕອບສະໜອງໄດ້ຫຼາຍກວ່າ 30% ຂອງຄວາມຕ້ອງການດ້ານການລົງທຶນ ແລະການພັດທະນາ ກໍ່ຄືວຽກງານຮັກສາໂຄງສ້າງພື້ນຖານດ້ານຄົມມະນາຄົມທີ່ມີຢູ່, ໃນຂະນະທີ່ການຮຽກຮ້ອງໃຫ້ເອກະຊົນລົງທຶນຍັງມີຄວາມຫຍຸ້ງຍາກ ຍ້ອນການລົງທຶນກໍ່ສ້າງໂຄງສ້າງພື້ນຖານດ້ານຄົມມະນາຄົມມີຄວາມສ່ຽງຫຼາຍ, ລະບົບເອກະສານທາງກົດໝາຍຍັງບໍ່ທັນຄົບຊຸດ. ນີ້ແມ່ນອຸປະສັກທີ່ໃຫຍ່ທີ່ສຸດໃນການປະຕິບັດບັນດາເປົ້າໝາຍ, ໜ້າທີ່ການພັດທະນາໂຄງສ້າງພື້ນຖານດ້ານຄົມມະນາຄົມທີ່ຄົບຊຸດແລະທັນສະໄໝ, “ໄປກ່ອນກ້າວໜຶ່ງ” ໃນການສ້າງປະຖົມປັດໄຈເພື່ອພັດທະນາປະເທດຮອດປີ 2030.
ເພື່ອພັດທະນາໂຄງສ້າງພື້ນຖານດ້ານຄົມມະນາຄົມ “ໄປກ່ອນກ້າວໜຶ່ງ” ຕາມທິດຄົບຊຸດແລະທັນສະໄໝ
ວິທະຍາສາດ-ເຕັກໂນໂລຊີໃນໂລກກຳລັງຂະຫຍາຍຕົວຢ່າງໄວ, ໂດຍສະເພາະແມ່ນເຕັກໂນໂລຊີປະຢຸກ, ເຕັກໂນໂລຊີພະລັງງານ, ຊອບແວປະຢຸກ...ແລະໄດ້ສົ່ງຜົນກະທົບບໍ່ໜ້ອຍເຖິງແບບວິທີການຄຸ້ມຄອງ, ທ່າອຽງລົງທຶນໃສ່ໂຄງສ້າງພື້ນຖານດ້ານຄົມມະນາຄົມໃນໂລກເວົ້າລວມ ແລະໃນຫວຽດນາມເວົ້າສະເພາະ. ຫວຽດນາມໄດ້ເຂົ້າຮ່ວມໃນຫຼາຍສັນຍາການຄ້າເສລີສອງຝ່າຍແລະຫຼາຍຝ່າຍ ແລະ ເຊື່ອມໂຍງເຂົ້າກັບສາກົນຢ່າງກວ້າງຂວາງເລິກເຊິ່ງ ຈະກະທົບຢ່າງແຮງເຖິງທິດທາງການພັດທະນາໂຄງສ້າງພື້ນຖານດ້ານຄົມມະນາຄົມ. ອີງໃສ່ບັນດາມະຕິຂອງສະພາແຫ່ງຊາດ, ລັດຖະບານ, ບົນພື້ນຖານຂອງການຈັດສັນກອງທຶນການລົງທຶນພາກລັດໄລຍະປານກາງ, ຂະແໜງການຄົມມະນາຄົມຂົນສົ່ງກຳນົດວ່າ ໃນໄລຍະເຖິງປີ 2030 ຕ້ອງລົງທຶນພັດທະນາໂຄງສ້າງພື້ນຖານດ້ານຄົມມະນາຄົມ ຕາມທິດຄົບຊຸດແລະທັນສະໄໝ ເພື່ອສ້າງກຳລັງຊຸກດັນການພັດທະນາຊາດ ດ້ວຍເປົ້າໝາຍຮອດປີ 2030 ຫວຽດນາມກາຍເປັນປະເທດອຸດສາຫະກຳຕາມທິດທັນສະໄໝ, ມີພື້ນຖານເສດຖະກິດທີ່ຂະຫຍັນຂັນເຄື່ອນ, ພັດທະນາຢ່າງໄວວາແລະຍືນຍົງ; ຍູ້ແຮງການປະຕິບັດບັນດາຂອດບຸກທະລຸໃນຍຸດທະສາດການພັດທະນາເສດຖະກິດ-ສັງຄົມ.
ຂະແໜງການຄົມມະນາຄົມຂົນສົ່ງ ຕ້ອງຕອບສະໜອງຄວາມຕ້ອງການຂົນສົ່ງດ້ວຍປະລິມານການຂົນສົ່ງທັງໝົດປະມານ 2,500 ຕື້ໂຕນ.ກມ (ທຽບເທົ່າກັບສິນຄ້າ 4,3 ຕື້ໂຕນ); ຂົນສົ່ງຜູ້ໂດຍສານ 667 ຕື້ຄົນ.ກມ (ທຽບເທົ່າກັບ 14 ຕື້ເທື່ອຄົນ); ອັດຕາການເຕີບໂຕສະເລ່ຍຕໍ່ປີຂອງປະລິມານການຂົນສົ່ງສິນຄ້າໄລຍະປີ 2021-2030 ແມ່ນ 6,7%, ຜູ້ໂດຍສານແມ່ນ 8,2%. ຍົກສູງຄຸນນະພາບການຂົນສົ່ງ ດ້ວຍລາຄາທີ່ເໝາະສົມ; ຄວບຄຸມແລະກ້າວເຖິງການຫຼຸດຜ່ອນອຸບັດຕິເຫດຈະລາຈອນ, ຈຳກັດມົນລະພິດສິ່ງແວດລ້ອມ; ເພີ່ມທະວີການນຳໃຊ້ເຕັກໂນໂລຊີທັນສະໄໝ ໃນການຄຸ້ມຄອງແລະຂຸດຄົ້ນ.
ກ່ຽວກັບການພັດທະນາໂຄງສ້າງພື້ນຖານ
ທີໜຶ່ງ, ສູ້ຊົນຮອດປີ 2030, ຫລາຍກວ່າ 80% ຂອງບັນດາແຂວງ/ນະຄອນໃນທົ່ວປະເທດມີທາງດ່ວນຜ່ານ ຫຼືເຊື່ອມຕໍ່ກັບສູນການບໍລິຫານ ແລະ ມີທາງດ່ວນປະມານ 3.500 ກມ - 4.000 ກມ, ໃນນັ້ນ, ໃຫ້ບຸລິມະສິດການລົງທຶນໃນການດຳເນິນງານຂອງທາງດ່ວນເໜືອ-ໃຕ້ ຈາກລ້າງເຊີນເຖິງກ່າເມົາ, ຖະໜົນທີ່ມີຄວາມໄວສູງໃນແລວທາງຂົນສົ່ງຫຼັກ, ຖະໜົນທີ່ມີຄວາມໄວສູງເຊື່ອມຕໍ່ກັບນະຄອນຫຼວງຮ່າໂນ້ຍ, ນະຄອນໂຮ່ຈີມິນ ແລະບັນດາຕົວເມືອງໃຫຍ່, ທາງດ່ວນວົງແຫວນຮອບຕົວເມືອງໃຫຍ່; ລະບົບຖະໜົນຂອງຫວຽດນາມທີ່ຄົບຊຸດທາງດ້ານມາດຕະຖານເຕັກນິກ, ເຊື່ອມຕໍ່ຢ່າງສະດວກກັບລະບົບຖະໜົນຂອງອາຊຽນ, ອະນຸພາກພື້ນແມ່ນ້ຳຂອງເປີດກວ້າງ ແລະ ຂ້ານອາຊີ.
ທີສອງ, ຜັນຂະຫຍາຍການກໍ່ສ້າງບາງພາກສ່ວນໃນເສັ້ນທາງລົດໄຟຄວາມໄວສູງເໜືອ-ໃຕ້, ໃນນັ້ນ, ບຸລິມະສິດການກໍ່ສ້າງເສັ້ນທາງຮ່າໂນ້ຍ - ວິງ ແລະເສັ້ນທາງນະຄອນໂຮ່ຈີມິນ - ຍາຈາງ; ພັດທະນາຢ່າງໄວເຄືອຂ່າຍທາງລົດໄຟໃນຕົວເມືອງ ເພື່ອເປັນແກນກາງໃນການພັດທະນາການຂົນສົ່ງຜູ້ໂດຍສານສາທາລະນະໃນຕົວເມືອງໃຫຍ່: ຮ່າໂນ້ຍ, ນະຄອນໂຮ່ຈີມິນ; ພ້ອມກັນນັ້ນ, ພັດທະນາໂຄງສ້າງພື້ນຖານດ້ານຄົມມະນາຄົມຢ່າງຄົບຊຸດ ພ້ອມພາຫະນະການຂົນສົ່ງ, ອຸປະກອນຄຸ້ມຄອງ ແລະປະຕິບັດການທີ່ທັນສິໄໝ ແລະ ເຊື່ອມໂຍງກັບບັນດາສູນແຈກຢາຍຈຳໜ່າຍສິນຄ້າ, ທ່າກຳປັ່ນທະເລໃຫຍ່, ທ່າເຮືອແຫ້ງ ICD.
ທີສາມ, ສືບຕໍ່ຄົ້ນຄວ້າການລົງທຶນໃນບ່ອນທີ່ຍັງເຫຼືອ ຂອງທ່າເຮືອປະຕູສາກົນ ແລັກຮວ້ຽນ, ລະດົມເງິນລົງທຶນໃສ່ທ່າກຳປັ່ນສາກົນເວິນຟອງ, ສືບຕໍ່ຍົກສູງປະສິດທິຜົນຂອງເຂດທ່າກຳປັ່ນສາກົນ ກ້າຍແມັບ - ທີ້ຫວາຍ; ສືບຕໍ່ລົງທຶນໃສ່ສາຍນ້ຳ ທີ້ຫວາຍ; ເພື່ອຮັບປະກັນວ່າ ກຳປັ່ນ 200.000 ໂຕນ ສາມາດດຳເນີນງານຕະຫຼອດ 24/24 ຊົ່ວໂມງ; ສະຫງວນພື້ນທີ່ດິນທີ່ເໝາະສົມຢູ່ຫຼັງທ່າເຮືອ ເພື່ອສ້າງສູນແຈກຈ່າຍ, ຂົນສົ່ງຍົກຍ້າຍສິນຄ້າ, ບໍລິການທ່າເຮືອ, ເຊື່ອມຕໍ່ຢ່າງສະດວກດີ ກັບເຄືອຂ່າຍການຄົມມະນາຄົມຊາດ, ປະກອບສ້າງເຄືອຂ່າຍໂຄງສ້າງພື້ນຖານດ້ານຄົມມະນາຄົມໂລຈິສະຕິກທີ່ທັນສະໄໝແລະມີປະສິດທິຜົນ ທຽບເທົ່າກັບບັນດາປະເທດໃນພາກພື້ນ.
ທີສາມ, ປັບປຸງເຄືອຂ່າຍສະໜາມບິນໃນທົ່ວປະເທດ ດ້ວຍຂະໜາດທີ່ທັນສະໄໝ; ສຳເລັດການເປີດກວ້າງບັນດາສະໜາມບິນສາກົນ ໂນ້ຍບ່າຍ ແລະ ເຕິນເຊີນເຍິດ ຕາມແຜນການ; ລົງທຶນກໍ່ສ້າງສະໜາມບິນສາກົນ ລອງແທັ່ງ (ໄລຍະທີ 1) ມີບົດບາດແລະຂະໜາດໃຫຍ່ເທົ່າກັບບັນດາສະໜາມບິນສາກົນໃນພາກພື້ນ. ລົງທຶນໃສ່ລະບົບການຄຸ້ມຄອງການບິນທີ່ທັນສະໄໝ, ຮັບປະກັນການຄຸ້ມຄອງສື່ສານ, ການນຳທາງ ແລະອຸປະກອນເຝົ້າລະວັງ ຕາມຄວາມຮຽກຮ້ອງຕ້ອງການຂອງໜ້າທີ່ ໃນເຂດຄຸ້ມຄອງການບິນ FIR ຂອງຫວຽດນາມ.
ທີຫ້າ, ສືບຕໍ່ເຂົ້າໃນລະດັບເຕັກນິກ, ຮັບປະກັນການດຳເນີນງານທາງເຮືອໃນເວລາ 24/24 ຊົ່ວໂມງ ຕາມສາຍທາງນ້ຳຕົ້ນຕໍພາຍໃນປະເທດ. ສືບຕໍ່ລະດົມເງິນລົງທຶນກໍ່ສ້າງສາຍທາງນ້ຳທີ່ມີຄວາມຕ້ອງການຂົນສົ່ງຫຼາຍ; ໂຄງການພັດທະນາສາຍທາງນ້ຳ ແລະແລວທາງໂລຈິສະຕິກທາງພາກໃຕ້. ການໃຊ້ເຄື່ອງຈັກໃນການຂົນຖ່າຍສິນຄ້າຢູ່ທ່າກຳປັ່ນທະເລ, ທ່າເຮືອພາຍໃນທີ່ທັນສະໄໝແລະມີປະສິດທິຜົນ.
ທີຫົກ, ພັດທະນາການຄົມມະນາຄົມໃນຕົວເມືອງຕາມທັດສະນະມຸ່ງໄປສູ່ຄວາມສີວິໄລແລະທັນສະໄໝ. ກໍ່ສ້າງເທື່ອລະກ້າວເສັ້ນທາງການຂົນສົ່ງຜູ້ໂດຍສານຈຳນວນຫຼາຍໃນຕົວເມືອງຊັ້ນ I. ສືບຕໍ່ລົງທຶນພັດທະນາເຄືອຂ່າຍທາງລົດໄຟໃນຕົວເມືອງ ຢູ່ເມືອງຫຼວງຮ່າໂນ້ຍ ແລະ ນະຄອນໂຮ່ຈີມິນ ເພື່ອຮັບປະກັນອັດຕາການຂົນສົ່ງຜູ້ໂດຍສານສາທາລະນະບັນລຸ 40% - 45%.
ຂະແໜງການຄົມມະນາຄົມກຳນົດໜ້າທີ່ການພັດທະນາ ໃນເວລາຈະເຖິງແມ່ນໜັກໜ່ວງທີ່ສຸດ. ເພື່ອປະຕິບັດໜ້າທີ່ທີ່ໄດ້ວາງອອກມາປະສົບຄວາມສຳເລັດ ແລະສືບຕໍ່ຍູ້ແຮງການພັດທະນາໂຄງສ້າງພື້ນຖານດ້ານຄົມມະນາຄົມ, ປະກອບສ່ວນປະຕິບັດ 3 ການບຸກທະລຸຍຸດທະສາດ, ຊຸກຍູ້ການພັດທະນາເສດຖະກິດ-ສັງຄົມ ແລະ ຈັດວາງໂຄງສ້າງເສດຖະກິດຄືນໃໝ່, ຂະແໜງການຄົມມະນາຄົມຂົນສົ່ງຈະສຸມໃສ່ປະຕິບັດບັນດາໜ້າທີ່ດັ່ງລຸ່ມນີ້:
ທີໜຶ່ງ, ສະເໜີສະພາແຫ່ງຊາດແລະລັດຖະບານເພີ່ມທະວີການລົງທຶນເຂົ້າໃນໂຄງສ້າງພື້ນຖານດ້ານຄົມມະນາຄົມ ດ້ວຍງົບປະມານຂອງລັດ, ໂດຍສະເພາະແມ່ນບຸລິມະສິດການລົງທຶນເຂົ້າໃນບັນດາກິດຈະການຄົມມະນາຄົມຈຸດໜັກ. ສືບຕໍ່ປັບປຸງບູລະນະກົນໄກ, ນະໂຍບາຍ ເພື່ອແນໃສ່ດຶງດູດເງິນລົງທຶນ ຈາກທຸກພາກສ່ວນເສດຖະກິດ ທີ່ເຂົ້າຮ່ວມໃນການລົງທຶນພັດທະນາໂຄງສ້າງພື້ນຖານດ້ານຄົມມະນາຄົມ. ຍູ້ແຮງການຂົນຂວາຍຜູ້ບໍລິຈາກ ເພື່ອສືບຕໍ່ສະໜອງທຶນຊ່ວຍເຫຼືອການພັດທະນາຢ່າງເປັນທາງການ (ODA) ເພື່ອພັດທະນາໂຄງສ້າງພື້ນຖານດ້ານຄົມມະນາຄົມ, ໂດຍສະເພາະແມ່ນບັນດາກິດຈະການຂະໜາດໃຫຍ່, ມີແຮງແຜ່ກະຈ່າຍ, ສ້າງການບຸກທະລຸຢ່າງແຮງ.
ທີສອງ, ກວດຄືນ, ເຮັດໃຫ້ງ່າຍດາຍແລະຮັດກຸມ, ຫຍໍ້ສັ້ນຂັ້ນຕອນການລົງທຶນກໍ່ສ້າງ...ເພື່ອຜັນຂະຫຍາຍຢ່າງໄວ ໂຄງການລົງທຶນພັດທະນາໂຄງສ້າງພື້ນຖານດ້ານຄົມມະນາຄົມ ພາຍຫຼັງທີ່ໄດ້ຮັບການອະນຸມັດໂດຍສະພາແຫ່ງຊາດແລະລັດຖະບານຫວຽດນາມ. ດັດແປງ, ເພີ່ມເຕີມຂໍ້ກຳນົດຕ່າງໆ ກ່ຽວກັບນະໂຍບາຍສະໜັບສະໜູນການເງິນ, ພາສີ, ລາຄາ, ຄ່າທຳນຽມ, ຄ່າໃຊ້ຈ່າຍ, ການໂອນກຳມະສິດ ເພື່ອເພີ່ມລັກສະນະການຄ້າຂອງໂຄງການຄົມມະນາຄົມ ແລະ ຄວາມຮັບຜິດຊອບປະກອບສ່ວນຂອງຜູ້ໃຊ້ການຄົມມະນາຄົມ, ຮັບປະກັນຜົນປະໂຫຍດທີ່ເພິ່ງພໍໃຈຂອງນັກລົງທຶນ. ມີກົນໄກໃນການຂຸດຄົ້ນຊັບພະຍາກອນຊັບສິນສາທາລະນະຢ່າງມີປະສິດທິຜົນ ເພື່ອສ້າງທຶນລົງທຶນພັດທະນາໂຄງສ້າງພື້ນຖານດ້ານຄົມມະນາຄົມ.
ທີສາມ, ຄົ້ນຄວ້າປັບປຸງບູລະນະກົນໄກ, ນະໂຍບາຍກ່ຽວກັບພາສີ, ຄ່າທຳນຽມ, ສະໜັບສະໜູນການເງິນຕາມທິດສ້າງເງື່ອນໄຂອຳນວຍຄວາມສະດວກໃຫ້ແກ່ການຂົນສົ່ງຜູ້ໂດຍສານສາທາລະນະ, ການຂົນສົ່ງຫຼາຍຮູບແບບ, ພິເສດແມ່ນບັນດາຂໍ້ກຳນົດທີ່ກ່ຽວຂ້ອງເຖິງການເກັບ, ການຄຸ້ມຄອງ ແລະ ການນຳໃຊ້ຄ່າຜ່ານທາງ, ຄ່າຈອດລົດ, ເງິນອຸດໜູນລົດເມ.
ທີສີ່, ປັບປຸງລະບົບແຜນກຳນົດຂະແໜງການແຫ່ງຊາດ ແລະແຜນກຳນົດເຕັກນິກສະເພາະຂະແໜງການໃຫ້ສົມບູບແບບໂດຍໄວ ເພື່ອເປັນພື້ນຖານໃຫ້ແກ່ການຄຸ້ມຄອງ, ຊີ້ນຳວຽກງານການລົງທຶນພັດທະນາ, ຮັບປະກັນປະສິດທິຜົນການລົງທຶນ, ພັດທະນາຢ່າງສົມດຸນແລະກົມກຽວໂດຍລວມລະຫວ່າງບັນດາຂົງເຂດ. ຕາມນັ້ນ, ຕ້ອງການຄົ້ນຄວ້າເພື່ອເພີ່ມເຕີມ, ດັດແປງຍົກສູງຄຸນນະພາບ ແລະ ມີວິໄສທັດໄລຍະຍາວ ສຳລັບການວາງແຜນໂຄງສ້າງພື້ນຖານດ້ານຄົມມະນາຄົມ, ຮັບປະກັນຄວາມສອດຄ່ອງກັບບັນດາແຜນການຂະແໜງການແຫ່ງຊາດ ຕາມກົດໝາຍການວາງແຜນທີ່ອອກໃໝ່.
ທີຫ້າ, ຄົ້ນຄວ້າເພື່ອເພີ່ມເຕີມ, ປັບປຸງບູລະນະກົດໝາຍທີ່ດິນ ແລະ ປະຕິບັດຢ່າງເຂັ້ມງວດບັນດານະໂຍບາຍ, ກົດໝາຍກ່ຽວກັບທີ່ດິນ ສຳລັບການພັດທະນາໂຄງສ້າງພື້ນຖານດ້ານຄົມມະນາຄົມ. ພ້ອມກັນນັ້ນ, ປ່ຽນແປງໃໝ່ນະໂຍບາຍພາສີການນຳໃຊ້ທີ່ດິນ ແລະຂໍ້ກຳນົດຕ່າງໆ ກ່ຽວກັບການສະໜັບສະໜູນລາຄາ, ການຊົດເຊີນການເກັບກູ້ພື້ນດິນ, ຮັບປະກັນຄວາມຍຸດຕິທຳ ແລະຄວາມຍືດຫຍຸ່ນຕາມມູນຄ່າຕະຫຼາດ.
ດ້ວຍຄວາມເອົາໃຈໃສ່ແລະຊີ້ນຳຢ່າງໃກ້ຊິດຂອງພັກແລະລັດຫວຽດນາມ, ການປະສານງານຢ່າງແໜ້ນແຟ້ນຂອງບັນດາກະຊວງ, ຂະແໜງການແລະທ້ອງຖິ່ນ, ຂະແໜງການຄົມມະນາຄົມຂົນສົ່ງຈະຕັ້ງໜ້າພະຍາຍາມ ສູ້ຊົນເພື່ອສຳເລັດໜ້າທີ່ພັດທະນາລະບົບໂຄງສ້າງພື້ນຖານດ້ານຄົມມະນາຄົມ ທີ່ຄົບຊຸດແລະທັນສະໄໝ, ສ້າງຕັ້ງໄດ້ໂຄງສ້າງການຂົນສົ່ງທີ່ສົມເຫດສົມຜົນ, ປະຢັດ, ມີປະສິດທິຜົນ ແລະມືອາຊີບກວ່າທຽບກັບປະຈຸບັນ, ປະກອບສ່ວນປະຕິບັດສຳເລັດເປົ້າໝາຍສູ້ຊົນ ຫັນປະເທດຫວຽດນາມໄດຍພື້ນຖານໃຫ້ກາຍເປັນປະເທດອຸດສາຫະກຳຕາມທິດທັນສະໄໝ ໃນໄລຍະຈະມາເຖິງ./.
_____________________
* ບົດນີ້ໄດ້ລົງພິມໃນວາລະສານກອມມູນິດສະບັບທີ 941 (ເດືອນພຶດສະພາ 2020)