ສືບຕໍ່ຄົ້ນຄ້ວາ, ປະກອບເພີ່ມເຕີມແລະເສີມຂະຫຍາຍທິດສະດີ
ການປ້ອງກັນປະເທດແລະການທະຫານຫວຽດນາມ ໃນເງື່ອນໄຂໃໝ່
ການປ້ອງກັນປະເທດແລະການທະຫານຫວຽດນາມ ໃນເງື່ອນໄຂໃໝ່
ວກ - ການຄົ້ນຄ້ວາ, ສະຫຼຸບພຶດຕິກຳຕົວຈິງ, ເສີມຂະຫຍາຍທິດສະດີການປ້ອງກັນປະເທດແລະການທະຫານຫວຽດນາມໃນເງື່ອນໄຂໃໝ່ ແມ່ນຄວາມຮຽກຮ້ອງຕ້ອງການພາວະວິໄສ ຂອງພາລະກິດປະຕິວັດເວົ້າລວມ, ເວົ້າສະເພາະແມ່ນ ພາລະກິດການປົກປັກຮັກສາປະເທດຊາດຫວຽດນາມ. ເຊື່ອມຊຶມແລະໃກ້ຊິດຕິດແທດກັບແນວທາງການເມືອງຂອງພັກກອມມູນິດຫວຽດນາມ, ກຳແໜ້ນເນື້ອໃນພື້ນຖານ ຫຼັກແຫຼ່ງ ແກ່ນສານ ແລະ ຄວາມຮຽກຮ້ອງຕ້ອງການຂອງໜ້າທີ່ປ້ອງກັນປະເທດແລະການທະຫານໃນເງື່ອນໄຂໃໝ່, ເສີມຂະຫຍາຍບົດບາດຂອງບັນດາອົງການການຈັດຕັ້ງແລະບັນດາກຳລັງ, ເພີ່ມທະວີການນຳພາຂອງພັກກອມມູນິດຫວຽດນາມຕໍ່ວຽກງານຄົ້ນຄວ້າ, ເສີມຂະຫຍາຍທິດສະດີການປ້ອງກັນປະເທດແລະການທະຫານ ແມ່ນບັນດາວິທີການແກ້ໄຂສຳຄັນທີ່ສຸດ ແນໃສ່ເຮັດໃຫ້ລະບົບທິດສະດີການປ້ອງກັນປະເທດແລະການທະຫານຫວຽດນາມ ສົມບູນແບບເທື່ອລະກ້າວ.
ທ່ານ ຫງວຽນຝູຈ້ອງ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດແຫ່ງ ສສ ຫວຽດນາມ, ເລຂາທິການຄະນະພັກການທະຫານສູນກາງແລະບັນດາຜູ້ແທນ ເຂົ້າຢ້ຽມຊົມຫ້ອງວາງສະແດງບັນດາຜະລິດຕະພັນການພິມປ້ອງກັນຊາດ ໃນກອງປະຊຸມໃຫຍ່ຜູ້ແທນອົງຄະນະພັກກອງທັບປະຊາຊົນຫວຽດນາມ ຄັ້ງທີ 11, ອາຍຸການ 2020 - 2025 _ພາບ: TTXVN
ທິດສະດີການປ້ອງກັນປະເທດແລະການທະຫານ ເປັນພາກສ່ວນສຳຄັນທີ່ສຸດໃນແນວທາງການປະຕິວັດ, ໄດ້ພັກກອມມູນິດຫວຽດນາມ ແລະ ປະທານ ໂຮ່ຈີມິນ ເອົາໃຈໃສ່ເປັນພິເສດ. ເມື່ອຍັງມີຊີວິດຢູ່, ປະທານ ໂຮ່ຈີມິນ ຍາມໃດກໍຖືເປັນສຳຄັນ ທິດສະດີ ແລະການຮ່ຳຮຽນທິດສະດີຂອງພະນັກງານ ສະມາຊິກພັກ ນັກຮົບ ແລະ ປະຊາຊົນ. ເພິ່ນມີຄວາມຈັບໃຈຕໍ່ຄຳເວົ້າທີ່ລືຊື່ຂອງ ວ.ອີ. ເລນິນ: “ບໍ່ມີທິດສະດີປະຕິວັດ ຈະບໍ່ມີຂະບວນການປະຕິບັດ”. ຍ້ອນແນວນັ້ນ, ຍາມໃດເພິ່ນກໍຮຽກຮ້ອງໃຫ້ພະນັກງານ ສະມາຊິກພັກທຸກຄົນຕ້ອງຄົ້ນຄ້ວາ, ຮ່ຳຮຽນທິດສະດີ; ບໍ່ໃຫ້ຖືເບົາທິດສະດີ, ຕ້ອງຮູ້ໝູນໃຊ້ທິດສະດີເຂົ້າໃນພຶດຕິກຳຕົວຈິງ. ເພິ່ນເວົ້າວ່າ: “ທິດສະດີຄືກັນກັບ ເຂັມຊີ້ທິດ, ມັນບອກທິດທາງໃຫ້ພວກເຮົາໃນວຽກງານຕົວຈິງ” ແລະ “ບໍ່ເຂົ້າໃຈທິດສະດີ ຈະຄືກັນກັບຄົນຕາບອດໄປໃນຍາມກາງຄືນ”. ໂດຍເຊື່ອມຊຶມຢ່າງເລິກເຊິ່ງ ແລະ ປະຕິບັດທັດສະນະຂອງປະທານ ໂຮ່ຈີມິນ ກ່ຽວກັບບົດບາດນຳໜ້າຂອງທິດສະດີປະຕິວັດຢ່າງເຂັ້ມງວດ, ພັກກອມມູນິດຫວຽດນາມ, ຄະນະພັກການທະຫານສູນກາງ, ກະຊວງປ້ອງກັນປະເທດຫວຽດນາມ ຍາມໃດກໍເອົາໃຈໃສ່, ເບິ່ງແຍງວຽກງານສະຫຼຸບ ພຶດຕິກຳຕົວຈິງ, ຄົ້ນຄ້ວາ, ເສີມຂະຫຍາຍທິດສະດີການປ້ອງກັນປະເທດແລະການທະຫານ ແນໃສ່ສະໜອງພື້ນຖານວິທະຍາສາດ ເພື່ອວາງແຜນນະໂຍບາຍ ແນວທາງຂອງພັກກອມມູນິດ, ນະໂຍບາຍ ກົດໝາຍຂອງລັດຫວຽດນາມ, ສ້າງທ່າແລະກຳລັງໃໝ່ ເພື່ອສ້າງສາແລະປົກປັກຮັກສາປະເທດຊາດຫວຽດນາມ ໃນໄລຍະເຊື່ອມໂຍງສາກົນ.
ຫວນຄືນ 35 ປີແຫ່ງການປ່ຽນແປງໃໝ່, ໝາກຜົນໃນການປະຕິບັດບັນດາມະຕິຂອງຄະນະບໍລິຫານງານສູນກາງພັກກອມມູນິດຫວຽດນາມ ກ່ຽວກັບວຽກງານທິດສະດີ ໃນໄລຍະປ່ຽນແປງໃໝ່; ພ້ອມກັບການຄົ້ນຄ້ວາ, ເສີມຂະຫຍາຍທິດສະດີໃນບັນດາຂົງເຂດ ເຊັ່ນ: ເສດຖະກິດ, ວັດທະນະທຳ, ສັງຄົມ, ທິດສະດີກ່ຽວກັບການປ້ອງກັນປະເທດແລະການທະຫານ ກໍໄດ້ຮັບການຄົ້ນຄ້ວາ, ປະກອບເພີ່ມເຕີມ ແລະ ເສີມຂະຫຍາຍບົນ ພື້ນຖານລັດທິມາກ - ເລນິນ, ແນວຄິດ ໂຮ່ຈີມິນ, ສືບທອດແນວຄິດປ້ອງກັນຊາດແລະການທະຫານຂອງຊາດຫວຽດນາມໃນປະຫວັດສາດຢ່າງເປັນປະຈຳ. ຈົນເຖິງປະຈຸບັນ, ລະບົບທິດສະດີພື້ນຖານກ່ຽວກັບການປ້ອງກັນປະເທດແລະການທະຫານ, ພິເສດແມ່ນທິດສະດີກ່ຽວກັບບົດບາດນຳພາຂອງພັກກອມມູນິດຫວຽດນາມ, ການຄຸ້ມຄອງຂອງລັດຫວຽດນາມຕໍ່ກອງທັບ ແລະ ໜ້າທີ່ປ້ອງກັນປະເທດ, ການທະຫານ, ປົກປັກຮັກສາປະເທດຊາດຫວຽດນາມ ໄດ້ຮັບການກໍ່ຮ່າງສ້າງຕົວ. ພ້ອມດຽວກັນນັ້ນ, ລະບົບທິດສະດີກ່ຽວກັບຈຸດໝາຍ, ທັດສະນະ, ໜ້າທີ່, ທິດນຳ, ແບບວິທີ, ກຳລັງ, ກຳລັງແຮງປົກປັກຮັກສາປະເທດຊາດ; ກ່ຽວກັບຄູ່ຮ່ວມມື, ຄູ່ຕໍ່ສູ້; ກ່ຽວກັບການສ້າງທ່າຮົບປ້ອງກັນຊາດທົ່ວປວງຊົນ ຕິດພັນກັບທ່າຮົບຄວາມສະຫງົບປະຊາຊົນ; ກ່ຽວກັບກຳລັງປະກອບອາວຸດສາມປະເພດ ແລະ ການສ້າງກອງທັບປະຊາຊົນຫວຽດນາມປະຕິວັດ, ກຳລັງຫຼວງ, ຊຳນານຮົບ, ທັນສະໄໝເທື່ອລະກ້າວ, ເຫຼົ່າທັບ, ເຫຼົ່າຮົບ, ກຳລັງຈຳນວນໜຶ່ງກ້າວຂຶ້ນສູ່ທັນສະໄໝຢ່າງໂດຍກົງ; ສົມທົບລະຫວ່າງເສດຖະກິດ, ວັດທະນະທຳ, ສັງຄົມ ກັບການປ້ອງກັນປະເທດ, ປ້ອງກັນຄວາມສະຫງົບ ແລະ ການພົວພັນຕ່າງປະເທດ; ກ່ຽວກັບບໍລິເວນປ້ອງກັນຮັກສາ ແລະ ການປ້ອງກັນຮັກສາທາງພົນລະເຮືອນ; ບັນດາບັນຫາກ່ຽວກັບຄວາມໝັ້ນຄົງທີ່ບໍ່ເປັນແບບດັ້ງເດີມ ແລະ ບັນດາຜົນກະທົບ ຜົນສະທ້ອນຂອງມັນ ຕໍ່ໜ້າທີ່ປ້ອງກັນປະເທດແລະການທະຫານ. ໃນມໍ່ໆມານີ້, ຄະນະພັກການທະຫານສູນກາງ, ກະຊວງປ້ອງກັນປະເທດຫວຽດນາມ ໄດ້ເປັນເສນາທິການໃຫ້ແກ່ພັກກອມມູນິດ, ລັດຫວຽດນາມໃນການປະກາດໃຊ້ ແລະ ຜັນຂະຫຍາຍປະຕິບັດຍຸດທະສາດການປ້ອງກັນປະເທດ, ຍຸດທະສາດການທະຫານ, ຍຸດທະສາດການປ້ອງກັນຊາຍແດນແຫ່ງຊາດ, ຍຸດທະສາດການປ້ອງກັນປະເທດໃນໄຊເບີສະເປດ; ຄົ້ນຄ້ວາ, ປັບປຸງ, ປະກອບເພີ່ມເຕີມລະບົບກົດໝາຍວ່າດ້ວຍການປ້ອງກັນປະເທດ, ການທະຫານຢ່າງຄົບຊຸດ ແລະ ທັນການ...
ສ້າງກອງທັບປະຊາຊົນຫວຽດນາມປະຕິວັດ, ກອງທັບຫຼວງ, ຊຳນານຮົບ, ທັນສະໄໝເທື່ອລະກ້າວ _ພາບ: ເອກະສານ
ແຕ່ວ່າ ໃນເມື່ອທຽບກັບຄວາມຮຽກຮ້ອງຕ້ອງການແລະໜ້າທີ່ແລ້ວ, ວຽກງານຄົ້ນຄ້ວາ, ປະກອບເພີ່ມເຕີມ, ເສີມຂະຫຍາຍທິດສະດີ ຍັງມີຂໍ້ຈຳກັດທີ່ແນ່ນອນ. ຄວາມຮັບຮູ້ຂອງພະນັກງານ, ສະມາຊິກພັກ, ປັນຍາຊົນຈຳນວນໜຶ່ງ ກ່ຽວກັບວຽກງານຄົ້ນຄ້ວາ, ເສີມຂະຫຍາຍທິດສະດີ ຍັງບໍ່ທັນຄົບຖ້ວນ, ເລິກເຊິ່ງຢ່າງແທ້ຈິງ. ວຽກງານຄົ້ນຄ້ວາທິດສະດີກ່ຽວກັບບັນຫາໃໝ່ຈຳນວນໜຶ່ງ ຍັງບໍ່ທັນນຳທັນກັບການຜັນແປຂອງສະພາບການ. ການເຊື່ອມຊຶມບັນດາທັດສະນະຂອງພັກກອມມູນິດ, ນະໂຍບາຍ, ກົດໝາຍຂອງລັດຫວຽດນາມ ກ່ຽວກັບການປ້ອງກັນປະເທດແລະການທະຫານໃນທົ່ວພັກກອມມູນິດ, ທົ່ວປວງຊົນ, ທົ່ວກອງທັບຫວຽດນາມ ຍັງມີຂໍ້ຈຳກັດ. ໃນຊຸມປີຕໍ່ໜ້າ, ສະພາບການຂອງໂລກ, ພາກພື້ນສືບຕໍ່ມີການຜັນແປຢ່າງສັບສົນ ແລະ ຄາດຄະເນໄດ້ຍາກ. ສະພາບການເຂດທະເລຕາເວັນອອກບົ່ມຊ້ອນປັດໄຈອາດຈະເກີດການປະທະກັນຢ່າງຫຼວງຫຼາຍ; ການແກ່ງແຍ້ງຍຸດທະສາດລະຫວ່າງບັນດາປະເທດໃຫຍ່ນັບມື້ນັບມີຄວາມດຸເດືອດ; ຄຽງຄູ່ກັນນັ້ນແມ່ນບັນດາປະເພດສົງຄາມໃໝ່ອາດຈະເກີດຂຶ້ນ. ພາຍຫຼັງ 35 ປີແຫ່ງການປ່ຽນແປງໃໝ່, ຫວຽດນາມຍາດໄດ້ບັນດາຜົນງານອັນໃຫຍ່ຫຼວງ, ມີຄວາມໝາຍທາງປະຫວັດສາດ, ບໍ່ທັນມີຍາມໃດທີ່ຫວຽດນາມມີພາລະກິດອັນໃຫຍ່ຫຼວງ, ກໍາລັງບົ່ມຊ້ອນ, ຖານະບົດບາດ ແລະ ອິດທິພົນຄືປະຈຸບັນນີ້. ແຕ່ຫວຽດນາມກໍກຳລັງຢືນຢູ່ຕໍ່ໜ້າຄວາມຫຍຸ້ງຍາກ, ສິ່ງທ້າທາຍຢ່າງຫຼວງຫຼາຍ, ຮຽກຮ້ອງໃຫ້ແກ້ໄຂຜ່ານຜ່າ ເພື່ອພັດທະນາຢ່າງວ່ອງໄວ ແລະ ໝັ້ນຄົງ. ກົນອຸບາຍ ແລະ ການເຄື່ອນໄຫວ “ຫັນປ່ຽນໂດຍສັນຕິ”, “ການຈະລາຈົນໂຄ່ນລົ້ມ” ຂອງບັນດາອິດທິກຳລັງສັດຕູ ໄດ້ມີການປັບປຸງ, ປາກົດມີແບບວິທີ ເລ່ລ່ຽມໃໝ່ ທີ່ແນບນຽນແລະອັນຕະລາຍກ່ວາເກົ່າຢ່າງຫຼວງຫຼາຍ. ໄພອັນຕະລາຍຈາກ “ການຜັນແປເອງ”, “ການຫັນປ່ຽນເອງ” ຢູ່ພາຍໃນ; ບັນດາສິ່ງທ້າທາຍຈາກຄວາມໝັ້ນຄົງທີ່ບໍ່ເປັນແບບດັ້ງເດີມ, ການຂະຫຍາຍຕົວຂອງການປະຕິວັດອຸດສາຫະກຳຄັ້ງທີສີ່ ສືບຕໍ່ສົ່ງຜົນກະທົບຕໍ່ຂົງເຂດປ້ອງກັນປະເທດ, ການທະຫານ, ການປົກປັກຮັກສາປະເທດຊາດຂອງຫວຽດນາມຢ່າງແຂງແຮງ. ສະພາບການດັ່ງກ່າວໄດ້ຕັ້ງຂຶ້ນຄວາມຮຽກຮ້ອງຕ້ອງການໃໝ່ ທີ່ຕ້ອງຍູ້ແຮງການຄົ້ນຄ້ວາ, ສະຫຼຸບພຶດຕິກຳຕົວຈິງ, ປະກອບເພີ່ມເຕີມ, ເສີມຂະຫຍາຍທິດສະດີການປ້ອງກັນປະເທດແລະການທະຫານ ແນໃສ່ກຳນົດທິດໃຫ້ທົ່ວພັກກອມມູນິດ, ທົ່ວປວງຊົນ, ທົ່ວກອງທັບຫວຽດນາມ ປະຕິບັດໜ້າທີ່ການທະຫານ, ປ້ອງກັນຊາດ, ປົກປັກຮັກສາປະເທດຊາດໃນສະພາບການໃໝ່ຢ່າງມີໄຊ.
ໃນການກຳນົດທິດຄົ້ນຄ້ວາ ເສີມຂະຫຍາຍທິດສະດີ ຈົນເຖິງ ປີ 2030 ກົມການເມືອງຄະນະບໍລິຫານງານສູນກາງພັກກອມມູນິດຫວຽດນາມ ໄດ້ກຳນົດວ່າ: ລົງເລິກການຄົ້ນຄ້ວາກ່ຽວກັບທາດແທ້, ຈຸດພິເສດຂອງລັດທິທຶນນິຍົມທັນສະໄໝ, ຊີ້ແຈ້ງລັກສະນະ, ຈຸດພິເສດໃໝ່ຂອງສະໄໝຂ້າມຜ່ານ ຈາກລັດທິທຶນນິຍົມຂຶ້ນສູ່ສັງຄົມນິຍົມ ໃນຂອບເຂດທົ່ວໂລກ; ສະພາບການຂອງໂລກແລະພາກພື້ນ, ສະຖານະພາບແລະການພົວພັນລະຫວ່າງບັນດາປະເທດໃຫຍ່, ບັນດາປະເທດບ້ານໃກ້ເຮືອນຄຽງ ແລະ ຄວາມສຳພັນລະຫວ່າງບັນດາກຳລັງໃນໂລກ, ບັນດາການຜັນແປດ້ານການເມືອງ, ເສດຖະກິດ, ການປ້ອງກັນປະເທດ, ປ້ອງກັນຄວາມສະຫງົບໃນພາກພື້ນ ແລະ ໃນໂລກ; ຄວາມໝັ້ນຄົງທາງທະເລໃນພາກພື້ນແລະໃນໂລກ; ບັນດາບັນຫາກ່ຽວກັບປະຊາທິປະໄຕ, ສິດທິມະນຸດ, ຊົນຊາດ ແລະ ສາສະໜາ. ຍ້ອນແນວນັ້ນ, ຕ້ອງເພີ່ມທະວີການຄົ້ນຄ້ວາຄາດຄະເນສະພາບການ; ເປີດກ້ວາງແລະລົງເລິກໃນການຄົ້ນຄ້ວາບັນດາກະແສແນວຄິດ, ທິດສະດີໃໝ່ ບົນພື້ນຖານທັດສະນະພາວະວິໄສ, ສັດຈະວິພາກ ແລະ ຮັບເອົາບັນດາຄຸນຄ່າທີ່ກ້າວໜ້າ; ຕໍ່ສູ້ຕ້ານຄືນລັດທິຄຳພີ, ລັດທິແກ້, ລັດທິສວຍໂອກາດ ແລະ ບັນດາກະແສແນວຄິດປໍລະປັກໃນທຸກຮູບການ. ໃນນັ້ນ, ຕ້ອງຊີ້ແຈ້ງສາຍພົວພັນລະຫວ່າງສອງໜ້າທີ່ຍຸດທະສາດຄື ການສ້າງສາ ແລະ ການປົກປັກຮັກສາ ປະເທດຊາດຫວຽດນາມສັງຄົມນິຍົມ; ສົມທົບລະຫວ່າງເສດຖະກິດ, ວັດທະນະທຳ ກັບການປ້ອງກັນປະເທດ ປ້ອງກັນຄວາມສະຫງົບ ແລະ ການພົວພັນຕ່າງປະເທດ; ສ້າງທ່າຮົບປ້ອງກັນຊາດທົ່ວປວງຊົນ ຕິດພັນກັບທ່າຮົບຄວາມສະຫງົບປະຊາຊົນ; ຄວາມເປັນເອກະລາດແຫ່ງຊາດ ຕິດພັນກັບສັງຄົມນິຍົມ ແລະ ເຊື່ອມໂຍງສາກົນ; ບັນດາສິ່ງທ້າທາຍຈາກຄວາມໝັ້ນຄົງແບບດັ້ງເດີມ ແລະ ບໍ່ເປັນແບບດັ້ງເດີມ. ຄາດຄະເນບັນດາທ່າອ່ຽງໃຫຍ່ຂອງພາກພື້ນ ແລະ ຂອງໂລກ, ໂອກາດ, ຂໍ້ສະດວກກໍຄືສິ່ງທ້າທາຍທີ່ກະທົບເຖິງພາລະກິດການສ້າງສາ ແລະ ປົກປັກຮັກສາປະເທດຊາດເວົ້າລວມ, ເວົ້າສະເພາະແມ່ນໜ້າທີ່ປ້ອງກັນປະເທດແລະການທະຫານຂອງຫວຽດນາມ; ບັນຫາບົດບາດນຳພາຂອງພັກກອມມູນິດ ແລະ ການຄຸ້ມຄອງຂອງລັດຫວຽດນາມ ຕໍ່ການປ້ອງກັນປະເທດແລະການທະຫານ. ເພື່ອປະຕິບັດທິດທາງເຫຼົ່ານີ້, ຕອບສະໜອງຄວາມຮຽກຮ້ອງຕ້ອງການຂອງພາລະກິດການສ້າງກອງທັບປະຊາຊົນຫວຽດນາມ, ປັບປຸງການປ້ອງກັນຊາດແລະປົກປັກຮັກສາປະເທດຊາດຫວຽດນາມໃນເງື່ອນໄຂໃໝ່, ວຽກງານສະຫຼຸບພຶດຕິກຳຕົວຈິງ, ຄົ້ນຄ້ວາ, ປະກອບເພີ່ມເຕີມ, ເສີມຂະຫຍາຍທິດສະດີກ່ຽວກັບການປ້ອງກັນປະເທດແລະການທະຫານ ຕ້ອງເອົາໃຈໃສ່ປະຕິບັດໜ້າທີ່, ວິທີການແກ້ໄຂຈຳນວນໜຶ່ງ ໃຫ້ໄດ້ເປັນຢ່າງດີ, ດັ່ງນີ້:
ໜຶ່ງແມ່ນ, ໃກ້ຊິດຕິດແທດກັບແນວທາງ ແຜນນະໂຍບາຍຂອງພັກກອມມູນິດ, ນະໂຍບາຍ ກົດໝາຍຂອງລັດຫວຽດນາມ ເພື່ອສະຫຼຸບພຶດຕິກຳຕົວຈິງ, ຄົ້ນຄ້ວາແລະເສີມຂະຫຍາຍທິດສະດີກ່ຽວກັບການປ້ອງກັນປະເທດແລະການທະຫານ ໃນເງື່ອນໄຂໃໝ່.
ນີ້ແມ່ນບັນຫາພື້ນຖານທີ່ສຸດ, ແມ່ນເນື້ອໃນຕົ້ນຕໍຂອງວຽກງານສະຫຼຸບພຶດຕິກຳຕົວຈິງ, ຄົ້ນຄ້ວາ, ເສີມຂະຫຍາຍທິດສະດີ, ຮັບປະກັນໃຫ້ແກ່ແນວທາງປ້ອງກັນປະເທດແລະການທະຫານ ໄປຖືກຕາມການກຳນົດທິດຂອງພັກກອມມູນິດ. ແນວທາງການທະຫານຫວຽດນາມ ແມ່ນພາກສ່ວນໜຶ່ງທີ່ສຳຄັນໃນແນວທາງການເມືອງ ແລະ ຂຶ້ນກັບແນວທາງການເມືອງຂອງພັກກອມມູນິດຫວຽດນາມ, ເປັນພື້ນຖານທາງດ້ານທິດສະດີ ເພື່ອປະຕິບັດຈຸດໝາຍ, ໜ້າທີ່ການເມືອງຂອງພັກກອມມູນິດຫວຽດນາມ ໃນແຕ່ລະໄລຍະປະຕິວັດຢ່າງມີໄຊ. ສະນັ້ນ, ໃກ້ຊິດຕິດແທດກັບແນວທາງການເມືອງຂອງພັກກອມມູນິດຫວຽດນາມ, ຂອງຄະນະພັກການທະຫານສູນກາງ, ກະຊວງປ້ອງກັນປະເທດ ເພື່ອວາງແຜນນະໂຍບາຍ, ແນວທາງ, ປະກອບເພີ່ມເຕີມ, ເສີມຂະຫຍາຍທິດສະດີການປ້ອງກັນປະເທດແລະການທະຫານຫວຽດນາມ ໃນເງື່ຶອນໄຂໃໝ່ແມ່ນບັນຫາທີ່ມີລັກສະນະ ເປັນຫຼັກການໃນຄວາມຮັບຮູ້ ແລະ ການເຄື່ອນໄຫວຂອງທຸກອົງການຈັດຕັ້ງແລະບຸກຄົນ ໃນເມື່ອປະຕິບັດໜ້າທີ່ດັ່ງກ່າວ.
ໃກ້ຊິດຕິດແທດກັບໜ້າທີ່ຈຸດສຸມຂອງການປະຕິວັດຫວຽດນາມ ແມ່ນສ້າງສຳເລັດສັງຄົມນິຍົມ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມຢ່າງໝັ້ນ ຄົງ, ປະຕິບັດຈຸດໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ສະເໝີພາບ, ສີວິໄລ”; ພ້ອມດຽວກັນນັ້ນ, ກໍາແໜ້ນມະຕິຂອງພັກກອມມູນິດກ່ຽວກັບວຽກງານທິດສະດີ, ບັນດາມະຕິ ຍຸດທະສາດຂອງພັກກອມມູນິດ, ນະໂຍບາຍ ກົດໝາຍຂອງລັດຫວຽດນາມ ກ່ຽວກັບການປ້ອງກັນປະເທດແລະການທະຫານ ແລະ ໝາກຜົນໃນການປະຕິບັດໜ້າທີ່ ເພື່ອສະຫຼຸບ ຕີລາຄາ ກວດພົບບັນດາບັນຫາທີ່ຍັງຄົງຄ້າງ, ບໍ່ເໝາະສົມ, ຖອດຖອນບົດຮຽນປະສົບການ, ສັງລວມທິດສະດີໃໝ່. ຮ່າງບົດລາຍງານການເມືອງກອງປະຊຸມໃຫຍ່ຂອງພັກກອມມູນິດຫວຽດນາມ ຄັ້ງທີ 13 ໄດ້ກຳນົດທິດນຳວ່າ: “ສາມັກຄີ - ປະຊາທິປະໄຕ - ມີລະບຽບວິໄນ - ມີຫົວຄິດປະ ດິດສ້າງ - ພັດທະນາ”; ຫົວຂໍ້ກອງປະຊຸມໃຫຍ່ໄດ້ວາງເນື້ອໃນໃໝ່ອອກຄື: ເສີມຂະ ຫຍາຍເຈດຈຳນົງ, ຄວາມໃຝ່ຝັນອັນແຮງກ້າ, ກຳລັງແຮງມະຫາສາມັກຄີທົ່ວປວງຊົນ, ຍູ້ແຮງການປ່ຽນແປງໃໝ່ຢ່າງມີຫົວຄິດປະດິດສ້າງ; ສູ້ຊົນເພື່ອເຖິງກາງສະຕະວັດທີ 21 ຫວຽດນາມກາຍເປັນປະເທດພັດທະນາຕາມທິດສັງຄົມນິຍົມ. ຍ້ອນແນວນັ້ນ, ຕ້ອງເຊື່ອມຊຶມບັນດາບັນຫາໃໝ່ດັ່ງກ່າວ ໃນການຄົ້ນຄ້ວາ, ປະກອບເພີ່ມເຕີມ, ເສີມ ຂະຫຍາຍທິດສະດີການປ້ອງກັນປະເທດ, ການທະຫານ, ປົກປັກຮັກສາປະເທດຊາດ; ແກ້ໄຂຜ່ານຜ່າຄວາມຫຼ້າຫຼັງທາງທິດສະດີຢ່າງເດັດດ່ຽວ.
ສອງແມ່ນ, ກຳແໜ້ນເນື້ອໃນພື້ນຖານ ຫຼັກແຫຼ່ງແກ່ນສານ ແລະ ຄວາມຮຽກ ຮ້ອງຕ້ອງການເປັນປະຈຳ ສຳຄັນຕົ້ນຕໍ ຂອງໜ້າທີ່ປ້ອງກັນປະເທດແລະການທະຫານຫວຽດນາມໃນເງື່ອນໄຂໃໝ່ ເພື່ອຄົ້ນຄ້ວາ, ປະກອບເພີ່ມເຕີມ ແລະ ເສີມຂະຫຍາຍທິດສະດີ.
ນີ້ແມ່ນວິທີການແກ້ໄຂສຳຄັນທີ່ສຸດ, ຮັບປະກັນໃຫ້ແກ່ວຽກງານຄົ້ນຄ້ວາ, ເສີມຂະຫຍາຍທິດສະດີ ເພື່ອໄປຖືກຕາມຈຸດສຸມ ຈຸດໃຈກາງ, ຖືກຕາມຈຸດໝາຍ, ທັດສະນະ, ໜ້າທີ່ປ້ອງກັນປະເທດການທະຫານ, ປົກປັກຮັກສາປະເທດຊາດໃນເງື່ອນໄຂໃໝ່. ພ້ອມດຽວກັນນັ້ນ, ໃກ້ຊິດຕິດແທດກັບການພັດທະນາຂອງສະພາບການ, ໜ້າທີ່ປະຕິວັດ, ພິເສດແມ່ນການພັດທະນາເສດຖະກິດ, ວັດທະນະທຳ, ສັງຄົມຂອງຫວຽດນາມ, ບັນດາການຜັນແປຂອງຍຸກສະໄໝ ເພື່ອຄົ້ນຄ້ວາ, ປະກອບເພີ່ມເຕີມ, ເສີມຂະຫຍາຍທິດສະດີການປ້ອງກັນປະເທດແລະການທະຫານຫວຽດນາມ. ຍ້ອນແນວນັ້ນ, ຕ້ອງອີງໃສ່ຫຼັກການປົກປັກຮັກສາປະເທດຊາດສັງຄົມນິຍົມແມ່ນຮອບດ້ານ, ຄົບຊຸດຢ່າງແນ່ນອນ, ລວມທັງການປົກປັກຮັກສາບັນດາປັດໄຈພູມີປະເທດ ການເມືອງ, ສັງຄົມ ແລະ ລະບົບເຄືອຂ່າຍອິນເຕີເນັດ, ໃນນັ້ນ, ການປົກປ້ອງຜົນປະໂຫຍດຂອງປະເທດ, ຊົນຊາດແມ່ນສູງສຸດ.
ບົນພື້ນຖານບັນດາທັດສະນະຂອງພັກກອມມູນິດຫວຽດນາມ ກ່ຽວກັບການປ້ອງກັນປະເທດ, ການທະຫານ, ປົກປັກຮັກສາປະເທດຊາດທີ່ໄດ້ກຳນົດ, ຕ້ອງເອົາໃຈໃສ່ການລົງທຶນໃນການຄົ້ນຄ້ວາ ເພື່ອຊີ້ແຈ້ງຄື: ທັດສະນະກ່ຽວກັບການປ້ອງກັນຊາດທົ່ວປວງຊົນ, ສົງຄາມປະຊາຊົນ, ສ້າງສາແລະປົກປັກຮັກສາປະເທດຊາດສັງຄົມນິຍົມ ໃນສະພາບການໃໝ່; ຖືການພັດທະນາເສດຖະກິດເປັນຈຸດໃຈກາງ, ການກໍ່ສ້າງພັກກອມມູນິດເປັນຫຼັກແຫຼ່ງ, ວັດທະນະທຳເປັນພື້ນຖານດ້ານຈິດໃຈຂອງສັງຄົມ, ປັບປຸງການປ້ອງກັນປະເທດ, ປ້ອງກັນຄວາມສະຫງົບ ເປັນໜ້າທີ່ສຳຄັນເປັນຢ່າງຍິ່ງ ແລະ ເປັນປະຈຳ. ໃຫ້ຄວາມສຳຄັນກັບການຄົ້ນຄ້ວາ ເພື່ອຊີ້ແຈ້ງທັດສະນະໃໝ່ຈຳນວນໜຶ່ງກ່ຽວກັບການປົກປັກຮັກສາປະເທດຊາດ “ແຕ່ຫົວທີ, ຈາກທາງໄກ”; “ຢຶດໝັ້ນ, ອົດທົນ” ໃນການຕໍ່ສູ້ປົກປັກຮັກສາເອກະລາດ, ອຳນາດອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດຢ່າງໝັ້ນຄົງ; ສ້າງ “ການຈັດວາງກຳລັງດ້ວຍຈິດໃຈປະຊາຊົນ” ຢ່າງໝັ້ນຄົງ; ສົມທົບລະຫວ່າງເສດຖະກິດ, ວັດທະນະທຳ, ສັງຄົມ, ການພົວພັນຕ່າງປະເທດ ກັບການປ້ອງກັນປະເທດ, ປ້ອງກັນຄວາມສະຫງົບ ແລະ ລະຫວ່າງການປ້ອງກັນປະເທດ, ປ້ອງກັນຄວາມສະຫງົບ ກັບເສດຖະກິດ, ວັດທະນະທຳ, ສັງຄົມ, ການພົວພັນຕ່າງປະເທດ ຢ່າງແໜ້ນແຟ້ນ; ເພີ່ມທະວີການຄຸ້ມຄອງຂອງລັດຫວຽດນາມ ກ່ຽວກັບປ້ອງກັນປະເທດ; ຍົກສູງຄຸນນະພາບການຄາດຄະເນຍຸດທະສາດ; ທັດສະນະສັດຈະວິພາກ ກ່ຽວກັບຄູ່ຮ່ວມມື, ຄູ່ຕໍ່ສູ້. ຄຽງຄູ່ກັນນັ້ນ, ແມ່ນທັດສະນະກ່ຽວກັບການສ້າງຍຸດທະສາດການປ້ອງກັນປະເທດ ດ້ວຍກໍາລັງປ້ອງກັນຊາດເປັນກຸນແຈ, ກຳລັງແຮງດ້ານການທະຫານແມ່ນລັກສະນະສະເພາະ, ໂດຍກົງ ແມ່ນກໍາລັງແຮງສູ້ຮົບຂອງກອງທັບປະຊາຊົນຫວຽດນາມ; ສ້າງສະພາບແວດລ້ອມສັນຕິພາບ ເພື່ອສ້າງສາແລະພັດທະນາປະເທດຫວຽດນາມ. ນັ້ນແມ່ນບັນດາບັນຫາທີ່ມີເນື້ອໃນໃໝ່ຢ່າງຫຼວງຫຼາຍ ເຊິ່ງວຽກງານທິດສະດີຕ້ອງສຸມໃສ່ຄົ້ນຄ້ວາ, ຫັນເປັນລະອຽດ, ຊີ້ແຈ້ງໃນເງື່ອນໄຂ, ສະພາບການໃໝ່, ພິເສດແມ່ນໃນເງື່ອນໄຂ, ສະພາບການຖືກຜົນກະທົບຈາກການປະຕິວັດອຸດສາຫະກຳຄັ້ງທີສີ່, ເສດຖະກິດດິຈິຕອນ, ລັດຖະບານເອເລັກໂຕຣນິກ, ສະພາບແວດລ້ອມເຄືອຂ່າຍ, ສະພາບແວດລ້ອມອາວະກາດ ແລະອື່ນໆ.
ກ່ຽວກັບທິດນຳໃນການປະຕິບັດໜ້າທີ່ປ້ອງກັນຊາດ, ການທະຫານ, ປົກປັກ ຮັກສາປະເທດຊາດ, ຕ້ອງຄົ້ນຄ້ວາ, ເຮັດໃຫ້ບັນດາເນື້ອໃນຈະແຈ້ງກ່ວາເກົ່າຄື: ຢຶດ ໝັ້ນ, ຕັ້ງໝັ້ນໃນຫຼັກການຍຸດທະສາດ, ສົມທົບກັບການໝູນໃຊ້ຍຸດໂທບາຍ “ຖືເອົາຫຼັກ ການເປັນພື້ນ ເພື່ອໝູນໃຊ້ຢ່າງໄຫວພິບ” ເພື່ອປົກປັກຮັກສາປະເທດຊາດ; ເພີ່ມທະວີວຽກງານບໍລິຫານພາຍໃນ, ຖືການສຶກສາ, ຊວນເຊື່ອ, ສະກັດກັ້ນເປັນຫຼັກ, ໄປຄຽງຄູ່ກັບການຮັກສາລະບຽບວິໄນ, ລະບຽບກົດໝາຍຢ່າງເຂັ້ມງວດ, ແກ້ໄຂບັນດາການກະທຳລະເມີດກົດໝາຍຢ່າງເຂັ້ມງວດ; ຄຸ້ມຄອງຄູ່ຕໍ່ສູ້ທີ່ຕ້ານແລະທຳລາຍພາຍໃນປະເທດຢ່າງແໜ້ນແຟ້ນ, ສະກັດກັ້ນ, ແກ້ໄຂບັນດາເຈົ້າອຸບາຍ, ຜູ້ນຳໜ້າຢ່າງທັນການ; ສຶກສາ, ຊວນເຊື່ອບັນດາຜູ້ຫຼົງເຊື່ອ; ໝູນໃຊ້ ແລະເສີມຂະຫຍາຍແນວຄິດ ໂຮ່ຈີມິນ ກ່ຽວກັບ “ຖືຄົນເປັນສຳຄັນ ອາວຸດເປັນປັດໄຈສຳຮອງ” ຢ່າງມີຫົວຄິດປະດິດສ້າງ, ຖືການສ້າງຄົນເປັນຈຸດສຸມ ໃຈກາງຂອງວຽກງານປ້ອງກັນຊາດ; ສ້າງແຫຼ່ງບຸກຄະລາກອນທີ່ມີຄຸນນະພາບສູງ, ພ້ອມດຽວກັນນັ້ນ, ຖືເປັນສຳຄັນການພັດທະນາອາວຸດ, ເຄື່ອງປະກອບ, ຍຸດໂທປະກອບການທະຫານທີ່ທັນສະໄໝແລະອື່ນໆ.
ກ່ຽວກັບແບບວິທີສ້າງກຳລັງແຮງສັງລວມ ເພື່ອປົກປັກຮັກສາປະເທດຊາດ, ຕ້ອງຄົ້ນຄ້ວາ, ເຮັດໃຫ້ບັນດາບັນຫາເລິກເຊິ່ງກ່ວາເກົ່າຄື: ຖືເອົາການປົກປັກຮັກສາຕິດພັນກັບການສ້າງ, ຖືການສ້າງເປັນແບບວິທີທີ່ມີປະສິດທິຜົນ, ເປັນວິທີປົກປັກຮັກສາທີ່ດີທີ່ສຸດ, ມີປະສິດທິຜົນສູງສຸດ; ຮັກສາສະພາບ “ພາຍໃນປອງດອງກັນ, ພາຍນອກມີຄວາມສະຫງົບ”, “ຕັ້ງໝັ້ນ, ໃກ້ຊິດປະຊາຊົນ”, ຕໍ່ສູ້ປົກປ້ອງປະຊາຊົນ; ສົມທົບລະ ຫວ່າງການຕໍ່ສູ້ທີ່ບໍ່ປະກອບອາວຸດ ກັບການຕໍ່ສູ້ປະກອບອາວຸດ, ການຕໍ່ສູ້ການທະຫານກັບການຕໍ່ສູ້ດ້ານການເມືອງ, ການຕ່າງປະເທດ, ເສດຖະກິດ, ວັດທະນະທຳ; ບໍ່ໃຫ້ຕ່າງປະເທດສວຍໃຊ້ຕົກລົງນຳກັນ ເພື່ອກໍ່ຜົນເສຍຫາຍຕໍ່ເອກະລາດ, ອະທິປະໄຕ, ຜົນປະໂຫຍດຂອງປະເທດ ປະຊາຊາດຫວຽດນາມ; “ບ້ານຮັກສາບ້ານ, ຕາແສງຮັກ ສາຕາແສງ, ເມືອງຮັກສາເມືອງ, ແຂວງຮັກສາແຂວງ”. ເພື່ອສະກັດກັ້ນສົງຄາມ, ຕ້ອງໄດ້ກະກຽມໃຫ້ແກ່ການສົງຄາມໃຫ້ດີທີ່ສຸດ; ເມື່ອເກີດສົງຄາມຕ້ອງເປັນເຈົ້າການ ໃນການເປີດກ້ວາງເທສະ, ຈຳກັດຂອບເຂດສະໜາມຮົບ, ຫຼຸດເວລາ, ກຽມພ້ອມໃນການຕໍ່ສູ້ຢ່າງຍາວນານ, ຮັບປະກັນຍາດເອົາໄຊຊະນະຢ່າງແນ່ນອນ.
ບົນພື້ນຖານບັນດາເນື້ອໃນທີ່ມີຄວາມຈະແຈ້ງແລ້ວ, ຕ້ອງຄົ້ນຄ້ວາ, ສະເໜີ ບັນດາແຜນການໃນເງື່ອນໄຂໃໝ່ຢ່າງເໝາະສົມ ເຊັ່ນ: ສົງຄາມທີ່ນຳໃຊ້ອາວຸດເຕັກໂນໂລຊີສູງ, ຮູບແບບສົງຄາມໃໝ່, ພິເສດແມ່ນຕ້ອງຊີ້ແຈ້ງເນື້ອໃນ, ວິທີການແກ້ໄຂຮັກ ສາສະພາບ “ພາຍໃນປອງດອງກັນ, ພາຍນອກມີຄວາມສະຫງົບ”; ຕໍ່ສູ້ດ້ວຍບັນດາ ມາດຕະການທີ່ບໍ່ນຳໃຊ້ອາວຸດ; ຍຸດທະສາດສ້າງແຫຼ່ງບຸກຄະລາກອນມີຄຸນນະພາບສູງໃນຂົງເຂດການປ້ອງກັນປະເທດແລະການທະຫານ; ແຜນນະໂຍບາຍ, ມາດຕະການຜັນປ່ຽນຄູ່ຕໍ່ສູ້ເປັນຄູ່ຮ່ວມມື.
ໃຫ້ຄວາມສຳຄັນກັບການພັດທະນາສິລະປະການສູ້ຮົບທາງທະເລ ໝູ່ເກາະ, ການສູ້ຮົບທາງເອເລັກໂຕຣນິກ... ໃນສະໄໝການປະຕິວັດອຸດສາຫະກຳຄັ້ງທີສີ່ (ໃນພາບ: ເວລາຝຶກຊ້ອມທີ່ສູນສຳລອງເຮືອຮົບລູກສອນໄຟ ຂອງກອງທັບເຮືອປະຊາຊົນຫວຽດນາມ) _ພາບ: ເອກະສານ
ກ່ຽວກັບທິດສະດີການສ້າງລະບົບການປ້ອງກັນປະເທດທົ່ວປວງຊົນ, ກອງທັບປະຊາຊົນ, ສົງຄາມປະຊາຊົນໃນສະພາບການໃໝ່, ຄຽງຄູ່ກັບບັນດາບັນຫາພື້ນຖານກ່ຽວກັບກຳລັງບົ່ມຊ້ອນ, ກຳລັງແຮງ, ການຈັດວາງກຳລັງ, ຕ້ອງສຸມໃສ່ການຊີ້ແຈ້ງທິດສະດີກ່ຽວກັບບໍລິເວນປ້ອງກັນຮັກສາເຂດທະຫານ, ສ້າງກອງທັບທີ່ທັນສະໄໝ, ຊຳນານຮົບ, ກະທັດລັດ, ເຂັ້ມແຂງ. ຄົ້ນຄ້ວາ, ຊີ້ແຈ້ງສາຍພົວພັນລະຫວ່າງການສ້າງທ່າປ້ອງກັນປະເທດທົ່ວປວງຊົນ ຕິດກັບທ່າຄວາມໝັ້ນຄົງປະຊາຊົນ ແລະ “ທ່າສະໜາມຮົບຕາມຈິດໃຈປະຊາຊົນ”, ໂດຍສະເພາະທ່າປ້ອງກັນຊາດໃນເຂດທະເລ,ໝູ່ເກາະແລະພື້ນທີ່ຍຸດທະສາດທີ່ສຳຄັນ; ຈັດການແກ້ໄຂບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມ ແລະ ການປ້ອງກັນພົນລະເຮືອນ; ກົນໄກປະສານງານລະຫວ່າງບັນດາພາກສ່ວນໃນກຳລັງປະກອບອາວຸດ; ວຽກງານສຶກສາການປ້ອງກັນຊາດ ແລະ ປ້ອງກັນຄວາມສະຫງົບ, ສ້າງໂຮງຮຽນອັດສະລິຍະ, ເຂົ້າເຖິງການປະຕິວັດອຸດສາຫະກຳຄັ້ງທີສີ່ ເພື່ອສະເໜີແຜນການ, ຍຸດທະສາດການພັດທະນາອຸດສາຫະກຳປ້ອງກັນປະເທດຂອງຫວຽດນາມທີ່ເປັນເອກະລາດ, ເປັນເຈົ້າການ, ເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ທັນສະໄໝ, ມີສອງຄຸນປະໂຫຍດ, ກາຍເປັນປາຍແຫຼມຂອງອຸດສາຫະກຳແຫ່ງຊາດ; ສືບຕໍ່ປະກອບເພີ່ມເຕີມ, ຊີ້ແຈ້ງການສົມທົບລະຫວ່າງການພັດທະນາເສດຖະກິດທະເລ ກັບການປົກປັກຮັກສາອະທິປະໄຕໃນເຂດທະເລ, ໝູ່ເກາະ; ພັດທະນາເສດຖະກິດດິຈິຕອນ ຕິດພັນກັບການປົກປັກຮັກສາປະເທດຊາດ ໃນລະບົບເຄືອຂ່າຍອິນເຕີເນັດ, ພັດທະນາເສດຖະກິດສີຂຽວຕິດພັນກັບການປົກປັກຮັກສາສິ່ງແວດລ້ອມ, ພັດທະນາເສດຖະກິດພົວພັນຕ່າງປະເທດ ຕິດພັນກັບການປົກປັກຮັກສາປະເທດຊາດແຕ່ຫົວທີ, ຈາກທາງໄກ ແລະອື່ນໆ.
ກ່ຽວກັບສິລະປະການທະຫານ, ນອກຈາກການຫັນເປັນລະອຽດ, ຊີ້ແຈ້ງບັນດາເນື້ອໃນທີ່ມີຢູ່, ຕ້ອງສືບຕໍ່ຄົ້ນຄ້ວາ, ປະກອບເພີ່ມເຕີມ, ເສີມຂະຫຍາຍທິດສະດີກ່ຽວ ກັບສົງຄາມປະຊາຊົນໃນເງື່ອນໄຂໃໝ່, ການສູ້ຮົບຍຸດທະສາດ, ຄາດຄະເນບັນດາຮູບຖານສົງຄາມໃໝ່ ແລະ ແຜນນະໂຍບາຍຮັບມືຂອງຫວຽດນາມ. ຕ້ອງເສີມຂະຫຍາຍທິດສະດີກ່ຽວກັບຍຸດທະສາດ, ຍຸດທະນາການ ແລະ ຍຸດທະວິທີ; ກ່ຽວກັບບັນດາສະພາບແວດລ້ອມສູ້ຮົບ ທັງທາງບົກ, ທາງອາກາດ, ທາງທະເລ, ໃນລະບົບເຄືອຂ່າຍອິນເຕີເນັດ ແລະທັງທາງອາວະກາດ ຢ່າງຄົບຊຸດແລະຮອບດ້ານ. ຖືເປັນສຳຄັນການເສີມຂະຫຍາຍສິລະປະການສູ້ຮົບທາງທະເລ, ໝູ່ເກາະ, ສູ້ຮົບທາງດ້ານເອເຫຼັກໂຕຣນິກ ແລະອື່ນໆ. ຄົ້ນຄ້ວາ, ຄາດຄະເນສະພາບການກ່ຽວກັບການສູ້ຮົບທາງອາວະກາດສະໄໝການປະຕິວັດອຸດສາຫະກຳຄັ້ງທີ່ສີ່, ອິນເຕີເນັດ 5G, 6G ແລະ ອື່ນໆ.
ກ່ຽວກັບການຕໍ່ສູ້ປ້ອງກັນປະເທດ, ຕ້ອງຄົ້ນຄ້ວາ, ຊີ້ແຈ້ງເນື້ອໃນ, ແບບວິທີ, ກົນໄກຈັດຕັ້ງປະຕິບັດຂອງບັນດາກຳລັງໃນການແກ້ໄຂແຕ່ລະກໍລະນີປ້ອງກັນປະເທດ, ຍາດແຍ່ງຜົນປະໂຫຍດ, ບັນດາຂໍ້ຂັດແຍ່ງ, ບໍ່ໂລ່ງລອຍກັນ, ພິເສດແມ່ນ ກ່ຽວກັບອະທິປະໄຕໃນຜືນແຜ່ນດິນ, ຊາຍແດນ, ທະເລ, ໝູ່ເກາະ; ບັນດາການເຄື່ອນໄຫວສະກັດກັ້ນ, ຕ້ານກົນອຸບາຍ, ເລ່ລ່ຽມ “ການຫັນປ່ຽນໂດຍສັນຕິ”, “ການຈະລາຈົນໂຄ່ນລົ້ມ” ແລະ ຕໍ່ສູ້ສະກັດກັ້ນ, ຕີຖອຍການເສື່ອມຖອຍດ້ານແນວຄິດການເມືອງ, ຄຸນສົມບັດ, ແບບແຜນການດຳລົງຊີວິດ, ບັນດາປາກົດການ “ການຜັນແປເອງ”, “ການຫັນປ່ຽນເອງ” ຢູ່ພາຍໃນ, “ຫັນເປັນການໄຮ້ລັກສະນະການເມືອງ” ຕໍ່ກອງທັບປະຊາຊົນຫວຽດນາມ.
ກ່ຽວກັບການພົວພັນຕ່າງປະເທດທາງດ້ານການປ້ອງກັນປະເທດ, ບົນພື້ນຖານການເຊື່ອມຊຶມແນວທາງພົວພັນຕ່າງປະເທດຂອງພັກກອມມູນິດຫວຽດນາມ, ຕ້ອງສືບຕໍ່ຊີ້ແຈ້ງທິດສະດີລວມ ກ່ຽວກັບການຕໍ່ສູ້ໃນແນວຮົບການຕ່າງປະເທດ, ຖືເປັນສຳຄັນການພົວພັນຕ່າງປະເທດດ້ານປ້ອງກັນຊາດ (ກຳລັງບົ່ມຊ້ອນໃນການພົວພັນຕ່າງປະການ) ປົກປັກຮັກສາປະເທດຊາດແຕ່ຫົວທີ, ຈາກທາງໄກ; ເນື້ອໃນແລະວິທີການແກ້ໄຂລະດັບຊາດ ກ່ຽວກັບການສ້າງຄວາມເຊື່ອໝັ້ນຍຸດທະສາດ, ສ້າງພະນັກງານທະຫານໃຫ້ເປັນພົນລະເມືອງໂລກ, ກຳລັງຮັກສາສັນຕິພາບແຫ່ງສະຫະປະຊາຊາດໃນເງື່ອນໄຂໃໝ່ແລະອື່ນໆ.
ກ່ຽວກັບວັດທະນະທຳການທະຫານ, ຕ້ອງຄົ້ນຄ້ວາ, ຊີ້ແຈ້ງຄື: ເສີມຂະຫຍາຍຄຸນຄ່າວັດທະນະທຳການທະຫານໃນເງື່ອນໄຂໃໝ່; ບັນດາຄຸນຄ່າ, ບັນທັດຖານ “ທະ ຫານລຸງໂຮ່” ສະໄໝການປະຕິວັດອຸດສາຫະກຳຄັ້ງທີສີ່ ບົນພື້ນຖານວັດທະນະທຳການ ຕໍ່ສູ້ຕ້ານສັດຕູ, ປົກປັກຮັກສາປະເທດຊາດຂອງຊາດຫວຽດນາມ. ສືບຕໍ່ຫັນເປັນລະອຽດ, ນຳເອົາຄຸນຄ່າດ້ານແນວຄິດ, ຄຸນສົມບັດ, ແບບແຜນ ໂຮ່ຈີມິນ ກາຍເປັນປັດໄຈເປັນເຈົ້າພາທາງ ໃນການດຳລົງຊີວິດດ້ານຈິດໃຈຂອງພະນັກງານ, ນັກຮົບກອງທັບ ແລະບັນດາກຳລັງປະກອບອາວຸດ; ເສີມຂະຫຍາຍຄຸນຄ່າ, ກຳລັງແຮງຂອງນ້ຳໃຈ ຮັກຊາດ, ຈິດໃຈເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ ເຂົ້າໃນການສ້າງສາ ແລະປົກປັກຮັກສາປະເທດຊາດ.
ກ່ຽວກັບບົດບາດນຳພາຂອງພັກກອມມູນິດ ແລະ ການຄຸ້ມຄອງຂອງລັດຫວຽດ ນາມຕໍ່ຂົງເຂດປ້ອງກັນປະເທດແລະການທະຫານ, ຕ້ອງສືບຕໍ່ຄົ້ນຄ້ວາ, ປະກອບເພີ່ມເຕີມ, ເສີມຂະຫຍາຍທິດສະດີກ່ຽວກັບບົດບາດນຳພາໂດຍກົງໃນທຸກດ້ານ ຂອງພັກກອມມູນິດ ຕໍ່ກອງທັບປະຊາຊົນຫວຽດນາມ ຢ່າງເດັດຂາດ; ການຄຸ້ມຄອງລວມສູນ, ເປັນເອກະພາບຂອງລັດຫວຽດນາມ ຕໍ່ໜ້າທີ່ປ້ອງກັນປະເທດ, ປ້ອງກັນຄວາມສະຫງົບໃນເງື່ອນໄຂໃໝ່; ວຽກງານວາງແຜນ, ປະກາດໃຊ້ ແລະ ຜັນຂະຫຍາຍປະຕິບັດ, ກວດກາ, ຕີລາຄາ, ສະຫຼຸບພຶດຕິກຳຕົວຈິງ, ປະກອບເພີ່ມເຕີມ, ເຮັດໃຫ້ແນວທາງປ້ອງກັນປະເທດແລະການທະຫານ, ລະບົບບັນດາຍຸດທະສາດ, ບັນດານະໂຍບາຍກ່ຽວກັບການປ້ອງກັນປະເທດ, ການທະຫານໃນເງື່ອນໄຂໃໝ່ ສົມບູນແບບ. ຕ້ອງຄົ້ນຄ້ວາ, ຊີ້ແຈ້ງກົນໄກ, ຫຼັກການ, ອຳນາດຕັດສິນ, ຂອບເຂດຄວາມຮັບຜິດຊອບຂອງພັກກອມມູນິດ, ລັດ ແລະ ລະບົບຄະນະພັກ, ການຈັດຕັ້ງພັກ, ອໍານາດການປົກຄອງທຸກຂັ້ນ ໃນການສ້າງແລະປະຕິບັດແນວທາງ, ທິດສະດີ, ຍຸດທະສາດ ແລະ ນະໂຍບາຍ, ກົດໝາຍກ່ຽວກັບການປ້ອງກັນປະເທດ, ການທະຫານ, ປົກປັກຮັກສາປະເທດຊາດໃນເງື່ອນໄຂໃໝ່.
ສາມແມ່ນ, ເສີມຂະຫຍາຍບົດບາດຂອງບັນດາການຈັດຕັ້ງ, ບັນດາກຳລັງໃນການສະຫຼຸບພຶດຕິກຳຕົວຈິງ, ຄົ້ນຄ້ວາ, ເສີມຂະຫຍາຍທິດສະດີການປ້ອງກັນປະເທດ, ການທະຫານຫວຽດນາມ.
ເພື່ອຄົ້ນຄ້ວາ, ປະກອບເພີ່ມເຕີມ, ເສີມຂະຫຍາຍທິດສະດີກ່ຽວກັບການປ້ອງກັນປະເທດແລະການທະຫານ, ຕ້ອງຍູ້ແຮງການສະຫຼຸບພຶດຕິກຳຕົວຈິງ ແລະ ເສີມຂະຫຍາຍບົດບາດຂອງລະບົບການຈັດຕັ້ງ, ກຳລັງໃນທົ່ວປະເທດ, ແມ່ນບັນດາອົງການຂອງພັກກອມມູນິດ, ລັດຫວຽດນາມ, ຄະນະພັກການທະຫານສູນກາງ, ກະຊວງປ້ອງກັນປະເທດ, ບັນດາອົງການຍຸດທະສາດ, ບັນດາສູນຄົ້ນຄ້ວາ, ບັນດາສະຖາບັນການສຶກສາພາຍໃນ ແລະ ນອກກອງທັບຢ່າງໂດຍກົງ. ນີ້ແມ່ນບັນດາອົງການ, ກຳລັງທີ່ມີພາລະບົດບາດ, ໜ້າທີ່ຈັດຕັ້ງການສະຫຼຸບພຶດຕິກຳຕົວຈິງ, ຄົ້ນຄ້ວາ, ເສີມຂະຫຍາຍທິດສະດີກ່ຽວກັບແຕ່ລະຂົງເຂດປ້ອງກັນປະເທດແລະການທະຫານພາຍໃຕ້ການຊີ້ນຳໂດຍກົງຂອງກົມການເມືອງ, ຄະນະເລຂາທິການສູນກາງພັກກອມມູນິດຫວຽດນາມ, ຄະນະໂຄສະນາອົບຮົມສູນກາງ, ສະພາທິດສະດີສູນກາງ ແລະອື່ນໆ. ໃນກອງທັບແມ່ນ: ສະຖາບັນຍຸດທະສາດປ້ອງກັນປະເທດ, ສະຖາບັນວິທະຍາສາດສັງຄົມມະນຸດສາດການທະຫານ, ສະຖາບັນປະຫວັດສາດການທະຫານຫວຽດນາມ, ວິທະຍາຄານປ້ອງກັນປະເທດ; ບັນດາອົງການທີ່ກ່ຽວຂ້ອງຂອງກະຊວງປ້ອງກັນປະເທດ, ສະຖາບັນ, ໂຮງຮຽນຈຳນວນໜຶ່ງ. ບັນດາການຈັດຕັ້ງ, ກຳລັງດັ່ງກ່າວ ຈະຕັດສິນຄຸນນະພາບ, ປະສິດທິຜົນວຽກງານຄົ້ນຄ້ວາ, ເສີມຂະຫຍາຍທິດສະດີການປ້ອງກັນປະເທດແລະການທະຫານຢ່າງໂດຍກົງ. ສະນັ້ນ, ຕ້ອງເສີມຂະຫຍາຍບົດບາດຂອງບັນດາການຈັດຕັ້ງ, ກຳລັງດັ່ງກ່າວໃຫ້ເປັນຢ່າງດີ ກໍຄືລັກສະນະຂະຫຍັນຂັນເຂື່ອນ, ມີຫົວຄິດປະດິດສ້າງ ຂອງຖັນແຖວພະນັກງານວິທະຍາສາດ, ທິດສະດີ, ບັນດາຊ່ຽວຊານຫົວຈັກຫຼັກແຫຼ່ງ; ຍົກສູງລະດັບການຄົ້ນຄ້ວາ, ສະຫຼຸບພຶດຕິກຳຕົວຈິງ, ຄວາມສາມາດໃນການວິໄຈ, ຄາດຄະເນ, ເປັນເສນາທິການ, ສະເໜີ, ສັງລວມທິດສະດີໃໝ່ ແລະອື່ນໆ.
ສືບຕໍ່ເຊື່ອມຊຶມ, ປະຕິບັດບັນດາໜ້າທີ່ ທີ່ກົມການເມືອງຄະນະບໍລິຫານງານສູນກາງພັກກອມມູນິດຫວຽດນາມ ໄດ້ຂຽນໄວ້ໃນບັນດາມະຕິກ່ຽວກັບວຽກງານທິດສະດີຢ່າງມີປະສິດທິຜົນ; ສຸມໃສ່ການປ່ຽນແປງໃໝ່ວຽກງານກໍ່ສ້າງພະນັກງານທິດສະດີໂດຍພື້ນຖານ, ຕັ້ງແຕ່ການຂຶ້ນແຜນກຳນົດຈົນເຖິງຫຼັກສູດ, ເນື້ອໃນ, ວິທີຄັດເລືອກ, ມາດ ຕະຖານຕີລາຄາຄຸນນະພາບ ແລະ ນຳໃຊ້ພະນັກງານວິທະຍາສາດ. ກໍ່ຮ່າງສ້າງຕົວຖັນແຖວຊ່ຽວຊານຫົວຈັກຫຼັກແຫຼ່ງ ແລະ ຖັນແຖວພະນັກງານສືບທອດທີ່ມີຈຳນວນຢ່າງພຽງພໍ, ມີຄຸນນະພາບເປັນຢ່າງດີ, ມີໂຄງປະກອບຢ່າງສອດຄ່ອງ, ຕອບສະໜອງ ຄວາມຮຽກຮ້ອງຕ້ອງການ, ໜ້າທີ່ໃນສະເພາະໜ້າ ແລະ ຍາວນານ. ມີກົນໄກ, ນະໂຍບາຍສົ່ງເສີມ, ເກື້ອກູນໄດ້ເໝາະສົມຕາມຄວນ, ຮັບປະກັນການດຳລົງຊີວິດດ້ານວັດຖຸ ແລະ ຈິດໃຈໃຫ້ແກ່ບັນດານັກວິທະຍາສາດ ແນໃສ່ດຶງດູດຜູ້ເກັ່ງກ້າເຂົ້າຮ່ວມ, ປະກອບສ່ວນໃຫ້ແກ່ຂົງເຂດດັ່ງກ່າວ.
ຍູ້ແຮງການຄົ້ນຄ້ວາ, ສະຫຼຸບພຶດຕິກຳຕົວຈິງ, ປະກອບເພີ່ມເຕີມ, ເສີມຂະຫຍາຍທິດສະດີການປ້ອງກັນປະເທດແລະການທະຫານຫວຽດນາມ ແນໃສ່ກຳນົດທິດໃຫ້ທົ່ວພັກ, ທົ່ວປວງຊົນ, ທົ່ວກອງທັບປະຕິບັດໜ້າທີ່ການທະຫານ, ປ້ອງກັນຊາດ, ປົກປັກຮັກສາປະເທດຊາດໃນສະພາບການໃໝ່ຢ່າງມີໄຊ _ພາບ: ເອກະສານ
ສີ່ແມ່ນ, ເພີ່ມທະວີການນຳພາຂອງພັກກອມມູນິດ, ຂອງຄະນະພັກການທະຫານສູນກາງ ຕໍ່ວຽກງານຄົ້ນຄ້ວາ, ເສີມຂະຫຍາຍທິດສະດີການປ້ອງກັນປະເທດແລະການທະຫານຫວຽດນາມ ໃນເງື່ອນໄຂໃໝ່.
ຄະນະບໍລິຫານງານສູນກາງ, ກົມການເມືອງ, ຄະນະເລຂາທິການສູນກາງພັກກອມມູນິດຫວຽດນາມ, ໂດຍກົງແມ່ນຄະນະພັກການທະຫານສູນກາງຕ້ອງກຳນົດທັດສະນະ, ຈຸດໝາຍ, ທິດທາງ, ໜ້າທີ່ຄົ້ນຄ້ວາ, ເສີມຂະຫຍາຍທິດສະດີການປ້ອງກັນປະເທດແລະການທະຫານ ໃນໄລຍະໃໝ່; ນໍາພາກ່ຽວກັບຂັ້ນຕອນ, ບັນດາຂອດ, ບັນດາບາດກ້າວໃນການຄົ້ນຄ້ວາ, ປະກອບເພີ່ມເຕີມ, ເສີມຂະຫຍາຍທິດສະດີຢ່າງແໜ້ນແຟ້ນ; ກຳນົດທິດການສ້າງບັນດາການຈັດຕັ້ງ, ອົງການຄົ້ນຄ້ວາ, ພັດທະນາຖັນແຖວພະນັກງານທິດສະດີທີ່ມີຄຸນນະພາບສູງ; ສ້າງກົນໄກ, ນະໂຍບາຍສົ່ງເສີມຄວາມສາມາດແລະການປ່ຽນແປງໃໝ່ປະດິດສ້າງ; ຄັດເລືອກ, ມອບໜ້າທີ່ປະຕິບັດບັນດາແຜນງານ, ຫົວຂໍ້ຄົ້ນຄ້ວາ, ພິເສດແມ່ນຢູ່ຂັ້ນຍຸດທະສາດ ແລະ ບັນດາບັນຫາໃໝ່ທີ່ລະອຽດອ່ອນ, ສັບສົນ; ລະດົມບັນດາແຫຼ່ງກຳລັງທີ່ຈຳເປັນ ແລະ ເປີດກ້ວາງປະຊາທິປະໄຕ, ສ້າງເງື່ອນໄຂຈຳເປັນໃຫ້ແກ່ການເຄື່ອນໄຫວຄົ້ນຄ້ວາ, ເສີມຂະຫຍາຍທິດສະດີ. ຈັດຕັ້ງ, ດຶງດູດພະນັກງານວິທະຍາສາດແລະບັນດາອົງການວິທະຍາສາດ ເຂົ້າຮ່ວມຂະບວນວິວັດການວາງແຜນແນວທາງ, ຍຸດທະສາດຂອງພັກກອມມູນິດ ແລະນະໂຍບາຍ, ກົດໝາຍຂອງລັດຫວຽດນາມ, ຄະນະພັກການທະຫານສູນກາງ, ກະຊວງປ້ອງກັນປະເທດ ກ່ຽວກັບຂົງເຂດປ້ອງກັນປະເທດແລະການທະຫານ ໃນເງື່ອນໄຂໃໝ່ຢ່າງຕັ້ງໜ້າ ແລະ ສອດຄ່ອງ.
ບັນດາອົງການນຳພາຂອງພັກກອມມູນິດຫວຽດນາມ, ຄະນະພັກ, ການຈັດຕັ້ງ ພັກ, ບັນດາອົງການຄົ້ນຄ້ວາທິດສະດີ ຕ້ອງມີຄວາມເອົາໃຈໃສ່ໃນການນຳພາວຽກງານທິດສະດີ, ສະຫຼຸບພຶດຕິກຳຕົວຈິງຢ່າງຮອບດ້ານ. ມີມະຕິນຳພາຢ່າງໃກ້ຊິດ ແລະ ຖືກ ຕ້ອງ, ມີການແບ່ງງານໃນການຈັດຕັ້ງປະຕິບັດວິທະຍາສາດ, ເສີມຂະຫຍາຍບົດບາດຂອງເລຂາຄະນະພັກ, ຜູ້ບັນຊາ, ສ້າງບັນຍາກາດທີ່ມີປະຊາທິປະໄຕ, ສະພາບແວດລ້ອມການເຮັດວຽກທີ່ສະດວກ, ສ້າງເງື່ອນໄຂໃຫ້ແກ່ຖັນແຖວພະນັກງານເສີມຂະ ຫຍາຍຄວາມສາມາດ, ພູມປັນຍາ, ຄວາມສາມາດປະດິດສ້າງໃນການປະຕິບັດຫົວຂໍ້, ແຜນງານ, ໂຄງການຄົ້ນຄ້ວາ, ໃກ້ຊິດຕິດແທດກັບພຶດຕິກຳຕົວຈິງ, ຍົກສູງຄວາມສາ ມາດໃນການກວດພົບ, ມີຄວາມກ້້າກັ່ນໃນການເປັນເສນາທິຫານ, ສະເໜີບັນດາບັນ ຫາໃໝ່ ເພື່ອປະກອບເພີ່ມເຕີມ, ເສີມຂະຫຍາຍທິດສະດີການປ້ອງກັນປະເທດແລະການທະຫານຫວຽດນາມ, ຕອບສະໜອງຄວາມຮຽກຮ້ອງຕ້ອງການແລະໜ້າທີ່ທີ່ວາງໄວ້ຢ່າງຕັ້ງໜ້າ./.
-----------------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບເລກທີ 957 (ເດືອນມັງກອນ 2021)
