ບົດບາດຊີ້ນຳນຳພາຂອງພັກໃນການເລືອກຕັ້ງ
ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ
ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ
ວກ. - ໃນລະບົບການເມືອງຂອງຫວຽດນາມ, ພັກກອມມູນິດຫວຽດນາມມີຖານະບົດບາດສຳຄັນທີ່ສຸດ. ມາດຕາ 4 ຂອງລັດຖະທຳມະນູນປີ 2013 ໄດ້ກຳນົດວ່າ: “ພັກກອມມູນິດຫວຽດນາມ - ກອງກຳລັງນຳໜ້າຂອງຊົນຊັ້ນກຳມະກອນ, ພ້ອມທັງເປັນກອງກຳລັງນຳໜ້າຂອງປະຊາຊົນຜູ້ອອກແຮງງານ ແລະຂອງຊາດຫວຽດນາມ, ຜູ້ຕາງໜ້າທີ່ຊື່ສັດຕໍ່ຜົນປະໂຫຍດຂອງຊົນຊັ້ນກຳມະກອນ, ຜູ້ອອກແຮງງານ ແລະ ຂອງປະເທດຊາດທັງໝົົດ, ພັກເອົາລັດທິມາກ-ເລນິນ ແລະ ແນວຄິດໂຮ່ຈີມິນ ເປັນພື້ນຖານແນວຄິດ, ເປັນກຳລັງນຳພາລັດແລະສັງຄົມ”(1). ດັ່ງນັ້ນ, ຄວາມຮຽກຮ້ອງຕ້ອງການທີ່ຈຳເປັນໃນປະຈຸບັນນີ້ແມ່ນ ຕ້ອງຮັບປະກັນແລະເພີ່ມທະວີການນຳພາຂອງພັກໃນລະບົບຈັກແຫ່ງລັດເວົ້າລວມແລະໃນບັນດາອົງການທີ່ປະຊາຊົນເລືອກຕັ້ງເວົ້າສະເພາະ.
ການຮັບປະກັນການນຳພາຂອງພັກໃນວຽກງານການເລືອກຕັ້ງສະມາຊິກສະພາແຫ່ງຊາດແລະສະມາຊິກສະພາປະຊາຊົນທຸກຂັ້ນ ແມ່ນຄວາມຈຳເປັນ, ມັນເລີ່ມຈາກຖານະຕຳແໜ່ງຂອງສອງອົງການນີ້ໃນລະບົບຈັກແຫ່ງລັດ. ລັດຖະທຳມະນູນປີ 2013 ໄດ້ກຳນົດ: “ສະພາແຫ່ງຊາດແມ່ນອົງການຕົວແທນສູງສຸດຂອງປະຊາຊົນ, ອົງການອຳນາດລັດສູງສຸດຂອງປະເທດສາທາລະນະລັດສົງຄົມນິຍົມຫວຽດນາມ”; “ສະພາປະຊາຊົນແມ່ນອົງການອຳນາດລັດຢູ່ທ້ອງຖິ່ນ, ຕາງໜ້າໃຫ້ແກ່ເຈດຈຳນົງ, ຄວາມມຸ່ງມາດປາຖະໜາ ແລະສິດເປັນເຂົ້າຂອງຂອງປະຊາຊົນ”(2). ສະພາແຫ່ງຊາດແລະສະພາປະຊາຊົນແມ່ນອົງການທຳອິດທີ່ຖືກສ້າງຕັ້ງຂຶ້ນໃນວາລະໃໝ່່, ເປັນຈຸດເລີ່ມຕົ້ນຂອງການສ້າງຕັ້ງອົງການຈັດຕັ້ງຕ່າງໆຢູ່ໃນກົງຈັກລັດ, ຢູ່ຂັ້ນສູນກາງແມ່ນປະທານປະເທດ, ລັດຖະບານ..., ຢູ່ທ້ອງຖິ່ນແມ່ນຄະນະກໍາມະການປະຊາຊົນ.
ການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະສະພາປະຊາຊົນທຸກຂັ້ນໃນວາລະປີ 2021-2026 ແມ່ນເງື່ອນໄຂເບື້ອງຕົ້ນໃນກາປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກ: “ກໍ່ສ້າງແລະປັບປຸງບູລະນະລັດແຫ່ງອຳນາດກົດໝາຍສັງຄົມນິຍົມທີ່ປອດໃສ, ໝັ້ນຄົງເຂັ້ມແຂງ, ກະທັດລັດ, ເຄື່ອນໄຫວຢ່າງມີປະສິດທິຜົນແລະປະສິດທິພາບ, ເພື່ອການຮັບໃຊ້ປະຊາຊົນ ແລະເພື່ອການພັດທະນາປະເທດ. ເພີ່ມທະວີການເປີດເຜີຍ, ໂປ່ງໃສແລະຄວາມຮັບຜິດຊອບໃນການອະທິບາຍລາຍງານ; ການຄວບຄຸມອຳນາດຕິດກັບການຮັດແໜ້ນລະບຽບວິໄນໃນການເຄື່ອນໄຫວຂອງລັດ ແລະຂອງພະນັກງານ ລັດຖະກອນ ພາລະກອນ. ສືບຕໍ່ຍູ້ແຮງການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ການຟຸມເຟືອຍ, ພະຍາດອາດຍາສິດ, ອາຊະຍາກຳ ແລະຄວາມຊົ່ວຮ້າຍທາງສັງຄົມ”(3).
ເພື່ອຮັບປະກັນບົດບາດການນຳພາຂອງພັກຕໍ່ກົງຈັກລັດ, ກ່ອນອື່ນໝົດຕ້ອງຮັບປະກັນການນຳພາຂອງພັກໃນວຽກງານການເລືອກຕັ້ງຜູ້ແທນປະຊາຊົນ. ລາຍງານສະຫຼຸບຜົນການເລືອກຕັ້ງປີ 2016 ຂອງສະພາເລືອກຕັ້ງແຫ່ງຊາດກໍໄດ້ຢືນຢັນວ່າ: “1 ໃນ 5 ສາເຫດທີ່ເຮັດໃຫ້ການເລືອກຕັ້ງສຳເລັດນັ້ນແມ່ນການນຳພາໃກ້ຊິດຂອງກົມການເມືອງແລະຄະນະພັກຂັ້ນຕ່າງໆ ໃນແຕ່ລະບາດກ້າວການຜັນຂະຫຍາຍ, ກະກຽມການເລືອກຕັ້ງ”(4).
ສະຫາຍເລຂາທະການໃຫຍ່ ຫງວຽນຝູຈ້ອງ ກ່າວປາໄສຊີ້ນຳທີ່ກອງປະຊຸມອອນໄລທົ່ວປະເທດເພື່ອຜັນຂະຫຍາຍວຽກງານເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ ສະມາຊິກສະພາປະຊາຊົນວາລະປີ 2021-2026 _ພາບ: TTXVN
ເນື້ອໃນ, ຄວາມຮຽກຮ້ອງຕ້ອງການສໍາລັບການນໍາພາຂອງພັກໃນວຽກງານການເລືອກຕັ້ງ
ສະມາຊິກສະພາແຫ່ງຊາດ ແລະສະມາຊິກສະພາປະຊາຊົນທຸກຂັ້ນ
ການນໍາພາຂອງພັກກ່ອນອື່ນໝົົດແມ່ນເພື່ອເລືອກຕັ້ງສະພາແຫ່ງຊາດ, ສະພາປະຊາຊົນທຸກຂັ້ນທີ່ມີລັກສະນະເປັນຕົວແທນ, ຮັບປະກັນໂຄງສ້າງແລະຄຸນນະພາຍຂອງຜູ້ແທນ. ສະມາຊິກສະພາແຫ່ງຊາດແລະສະມາຊິກສະພາປະຊາຊົນຕ້ອງມີຄຸນທຳແລະຄວາມສາມາດພຽງພໍ ເພື່ອຕາງໜ້າປະຊາຊົນໃນການຕັດສິນຕົກລົງບັນດາບັນຫາສຳຄັນຂອງປະເທດ, ຂອງທ້ອງຖິ່ນ. ປະທານໂຮ່ຈີມິນໄດ້ຢືນຢັນວ່າ: “ການເລືອກຕັ້ງທົ່ວໄປແມ່ນໂອກາດໃຫ້ຄົນທັງປະເທດເລືອກຄົນເກ່ງທີ່ມີຄວາມສາມາດແລະຄຸນທໍາມາແບກຮັບວຽກງານຂອງປະເທດ... ອາໄສການເລືອກຕັ້ງທົ່ວໄປ, ປະຊາຊົນທົ່ວປະເທດຈຶ່ງເລືອກຕັ້ງສະພາແຫ່ງຊາດ. ສະພາແຫ່ງຊາດຈະແຕ່ງຕັ້ງລັດຖະບານ. ລັດຖະບານນັ້ນແມ່ນລັດຖະບານຂອງປະຊາຊົນຢ່າງແທ້ຈິງ”(5).
ການນໍາພາຂອງພັກໃນວຽກງານການກະກຽມເລືອກຕັ້ງ ແລະ ບັນດາຂັ້ນຕອນຂອງຂະບວນການເລືອກຕັ້ງ ຕ້ອງປະຕິບັດຕາມຂໍ້ກຳນົດຂອງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ. ການຮັບປະກັນການນໍາພາຂອງພັກຕໍ່ວຽກງານການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ ພ້ອມກັນກັບການປະຕິບັດຕາມຂໍ້ກຳນົດຂອງລັດຖະທຳມະນູນ ແລະ ກົດໝາຍ (6).
ການຮັບປະກັນການນໍາພາຂອງພັກໃນວຽກງານກະກຽມການເລືອກຕັ້ງ
ແຕ້ຕົ້ນປີ 2020, ຄະນະກຳມະການພັກສະພາແຫ່ງຊາດໄດ້ຊີ້ນຳການສ້າງ “ໂຄງການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ ສະມາຊິກສະພາປະຊາຊົນວາລະປີ 2021-2026”. ໂຄງການນີ້ໄດ້ຮັບການລາຍງານຕໍ່ກົມການເມືອງແລະຍື່ນສະເໜີຕໍ່ຄະນະບໍລິຫານງານສູນກາງພັກ ເພື່ອຂໍຄວາມເຫັນ. ຜົນຂອງໂຄງການແມ່ນບົດສະຫຼຸບເລກທີ 174-TB/TW, ລົງວັນທີ 8 ມິຖຸນາ 2020, ຂອງກົມການເມືອງສູນກາງພັກ, “ກ່ຽວກັບທິດທາງການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ ສະມາຊິກສະພາປະຊາຊົນທຸກຂັ້ນວາລະປີ 2021-2026”.
ດ້ວຍການກະກຽມຢ່າງຕັ້ງໜ້າຂອງຄະນະກຳມະການພັກສະພາແຫ່ງຊາດ, ການກະກຽມການເລືອກຕັ້ງທັງໝົດແມ່ນໄດ້ດໍາເນີນໄປໄວກວ່າບັນດາການເລືອກຕັ້ງກ່ອນໜ້ານີ້. ສະພາການເລືອກຕັ້ງແຫ່ງຊາດໄດ້ຮັບການເລືອກຕັ້ງແລະອະນຸມັດ ຈາກສະພາແຫ່ງຊາດໃນກອງປະຊຸມຄັ້ງທີ 9 ຂອງຕົນ ເຊິ່ງໄວກວ່າການເລືອກຕັ້ງຄັ້ງກ່ອນ 1 ວາລະປະຊຸມ. ອົງປະກອບຂອງສະພາການເລືອກຕັ້ງແຫ່ງຊາດ ແມ່ນຖືກກຳນົດສອດຄ່ອງກັບບົດບັນຍັດຂອງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ, ລວມມີຕົວແທນຂອງຄະນະປະຈຳສະພາແຫ່ງຊາດ, ລັດຖະບານ, ຄະນະກຳມະການສູນກາງແນວໂຮມປະເທດຊາດຫວຽດນາມ, ບັນດາກະຊວງ ຂະແໜງການ ແລະ ບາງຄະນະຂອງພັກ. ໃນຈຳນວນສະມາຊິກສະພາເລືອກຕັ້ງແຫ່ງຊາດ 21 ຄົນ, ມີ 6 ຄົນເປັນສະມາຊິກກົມການເມືອງສູນກາງພັກ.
ມາດຕະຖານບຸກຄະລາກອນສະມາຊິກສະພາແຫ່ງຊາດເຕັມເວລາຢູ່ສູນກາງແລະທ້ອງຖິ່ນ, ບຸກຄະລາກອນສະມາຊິກສະພາປະຊາຊົນເຕັມເວລາໃນສາມລະດັບຄືແຂວງ, ເມືອງ, ຕາແສງ ໄດ້ລະບຸໄວ້ໃນບົດສະຫຼຸບເລກທີ 174-TB/TW ຂອງກົມການເມືອງ ແລະ ຫຼັງຈາກນັ້ນ, ຄະນະຈັດຕັ້ງສູນກາງໄດ້ມີເອກະສານແນະນໍາ ສະເພາະຢ່າງລະອຽດ(7). ນີ້ແມ່ນພື້ນຖານສຳຄັນ ເພື່ອຄັດເລືອກສະມາຊິກສະພາແຫ່ງຊາດແລະສະມາຊິກສະພາປະຊາຊົນເຕັມເວລາທີ່ເປັນກຳລັງຫຼັກແຫຼ່ງຂອງສະພາແຫ່ງຊາດແລະສະພາປະຊາຊົນທຸກຂັ້ນ.
ພ້ອມກັນນັ້ນ, ບັນດາເອກະສານຊີ້ນຳການເລືອກຕັ້ງກໍໄດ້ຮັບການຄົ້ນຄວ້າແລະພັດທະນາຢ່າງລະອຽດຖີ່ຖ້ວນໂດຍໜ່ວຍງານຕ່າງໆ, ໂດຍມີການສະຫຼຸບຂໍ້ດີ, ຂໍ້ເສຍໃນການຊີ້ນຳການເລືອກຕັ້ງຄັ້ງກ່ອນໜ້ານີ້ ແລະ ເພີ່ມຈຸດໃໝ່ໃຫ້ເໝາະສົມກັບການປະຕິບັດໃນປະຈຸບັນ.
ກຳມະການກົມການເມືອງ, ປະທານສະພາແຫ່ງຊາດ ເວືອງດິ່ງເຫວ້ ກວດກາວຽກງານເລືອກຕັ້ງຢູ່ເຂດລົງຄະແນນສຽງເລກທີ 5, ບ້ານນາມຕື໋, ຕາແສງກ້ຽນທ້ຽດ (ນະຄອນຮາຍຟ່ອງ) _ພາບ: TTXVN
ການອອກຄຳສັ່ງແລະຄຳແນະນຳການເລືອກຕັ້ງ
ເພື່ອຊີ້ນໍາການເລືອກຕັ້ງ, ກົມການເມືອງໄດ້ອອກຄຳສັ່ງເລກທີ 45-CT/TW, ລົງວັນທີ 20 ມິຖຸນາ 2020, “ກ່ຽວກັບການນໍາພາການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ ວາລະປີ 2021-2026” ດ້ວຍ 7 ເນື້ອໃນ, ໃນນັ້ນສຸມໃສ່ວຽກງານບຸກຄະລາກອນ, ປັບປຸງບູລະນະເອກະສານແນະນໍາການເລືອກຕັ້ງ, ວຽກງານໂຄສະນາ, ການຮັບປະກັນຄວາມໝັ້ນຄົງທາງການເມືອງ, ຄວາມເປັນລະບຽບຮຽບຮ້ອຍ ແລະຄວາມປອດໄພທາງສັງຄົມ. ຄຳສັ່ງເລກທີ 45-CT/TW ຂອງກົມການເມືອງມອບຄວາມຮັບຜິດຊອບໃຫ້ຄະນະພັກແຕ່ລະຂັ້ນຢູ່ສູນກາງແລະທ້ອງຖິ່ນ. ຕາມນັ້ນ, ບັນດາຄະນະພັກແຂວງ, ນະຄອນໄດ້ຈັດຕັ້ງຄະນະຊີ້ນຳ ເພື່ອນຳພາຢ່າງຮອບດ້ານຕໍ່ວຽກງານການເລືອກຕັ້ງ, ເຮັດວຽກງານການແນະນໍາຜູ້ສະໝັກໃນທ້ອງຖິ່ນຢ່າງດີ, ຊີ້ນຳການແກ້ໄຂຢ່າງທັນການ ບັນດາບັນຫາທີ່ເກີດຂຶ້ນໃນຂະບວນການກະກຽມ ແລະການຈັດຕັ້ງເລືອກຕັ້ງສະມາຊິກສະພາແຫ່ງຊາດ, ການເລືອກຕັ້ງສະມາຊິກສະພາປະຊາຊົນຂັ້ນຕ່າງໆໃນທ້ອງຖິ່ນ.
ຕາມຄຳສັ່ງເລກທີ 45-CT/TW ຂອງກົມການເມືອງ, ບັນດາອົງການຂອງພັກໄດ້ອອກເອກະສານຫຼາຍສະບັບ ເພື່ອແນະນຳການເລືອກຕັ້ງ, ລະອຽດຄື: ຄະນະກຳມະການກວດກາສູນກາງ ໄດ້ອອກຄຳແນະນຳເລກທີ 13-HD/UBKTTW, ວັນທີ 2 ທັນວາ 2020, “ວ່າດ້ວຍການແກ້ໄຂການກ່າວປະນາມ, ການຮ້ອງທຸກກ່ຽວກັບການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ ສະມາຊິກສະພາປະຊາຊົນທຸກຂັ້ນວາລະປີ 2021-2026 ຂອງຄະນະພັກ, ອົງການຈັດຕັ້ງພັກ, ຄະນະກຳມະການກວດກາຂັ້ນຕ່າງໆ”; ຄະນະຈັດຕັ້ງສູນກາງ ໄດ້ອອກຄຳແນະນຳເລກທີ 36-HD/BTCTW, ວັນທີ 20 ມັງກອນ 2021, “ວ່າດ້ວຍວຽກງານບຸກຄະລາກອນສະມາຊິກສະພາແຫ່ງຊາດຊຸດທີ 15 ແລະ ສະມາຊິກສະພາປະຊາຊົນທຸກຂັ້ນວາລະປີ 2021-2026”; ຄະນະໂຄສະນາອົບຮົມໄດ້ອອກຄຳແນະນຳເລກທີ 169-HD/BTGTW, ວັນທີ 22 ມັງກອນ 2021, ວ່າດ້ວຍ “ການໂຄສະນາການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ ສະມາຊິກສະພາປະຊາຊົນທຸກຂັ້ນວາລະປີ 2021-2026”; ຄະນະປະຈຳຂອງຄະນະພັກແຂວງ, ຄະນະພັກນະຄອນທີ່ຂຶ້ນກັບສູນກາງລ້ວນແຕ່ໄດ້ອອກຄຳສັ່ງກ່ຽວກັບການນຳພາ, ຊີ້ນຳການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ ສະມາຊິກສະພາປະຊາຊົນທຸກຂັ້ນວາລະປີ 2021-2026.
ການນໍາພາຂອງພັກໃນວຽກງາບຸກຄະລາກອນ
ວຽກງານບຸກຄະລາກອນໄດ້ຮັບການຊີ້ນຳປະຕິບັດເປັນຢ່າງດີ, ເພື່ອຮັບປະກັນເສີມຂະຫຍາຍປະຊາທິປະໄຕ ແລະ ການນຳພາລວມສູນ, ເປັນເອກະພາບຂອງພັກໃນວຽກງານພະນັກງານ. ພັກນຳພາການແນະນຳພະນັກງານ, ສະມາຊິກພັກໃນສຳນັກງານ, ອົງການຈັດຕັ້ງ, ໜ່ວຍງານ ເພື່ອເປັນຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ແລະສະພາປະຊາຊົນທຸກຂັ້ນ. ຜູ້ທີ່ໄດ້ຮັບການແນະນຳທັງໝົດ ແມ່ນໄດ້ຕາມມາດຕະຖານແລະເງື່ອນໄຂ ຕາມທີ່ພັກ, ລັດ ແລະກົດໝາຍໄດ້ກຳນົດໄວ້; ພ້ອມກັນນັ້ນ ເປັນຜູ້ທີ່ດີເດັ່ນທາງດ້ານຄຸນນະພາບ, ຄຸນທຳແລະຄວາມສາມາດ, ມີທັດສະນະ ຫຼັກໝັ້ນການເມືອງທີ່ໜັກແໜ້ນ, ມີເງື່ອນໄຂເພື່ອປະຕິບັດໜ້າທີ່ເຂົ້າຮ່ວມເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ.
ອັດຕາສ່ວນສະມາຊິກສະພາແຫ່ງຊາດແລະສະມາຊິກສະພາປະຊາຊົນທີ່ເປັນແມ່ຍິງແລະຄົນຊົນເຜົ່າສ່ວນນ້ອຍ ໄດ້ຮັບຄວາມເອົາໃຈໃສ່ຢ່າງເປັນປະຈຳ ຂອງພັກແລະລັດ. ປີ 2006, ສະພາແຫ່ງຊາດໄດ້ອະນຸມັດຜ່ານກົດໝາຍວ່າດ້ວຍຄວາມສະເໝີພາບທາງເພດ, ກຳນົດອັດຕາສ່ວນຂອງຜູ້ແທນຍິງໃນສະພາແຫ່ງຊາດແລະສະພາປະຊາຊົນໃຫ້ເໝາະສົມກັບເປົ້າໝາຍແຫ່ງຊາດກ່ຽວກັບຄວາມສະເໝີພາບທາງເພດ (8). ວັນທີ 27 ເມສາ 2007, ກົມການເມືອງອອກມະຕິເລກທີ 11-NQ/TW, “ກ່ຽວກັບວຽກງານແມ່ຍິງໃນສະໄໝແຫ່ງການຍູ້ແຮງການຫັນປະເທດເປັນອຸດສາຫະກຳທັນສະໄໝ”, ຕັ້ງເປົ້າໝາຍສູ້ຊົນຮອດປີ 2020, ອັດຕາສ່ວນຂອງຜູ້ແທນຍິງໃນສະພາແຫ່ງຊາດແລະສະພາປະຊາຊົນທຸກຂັ້ນຢູ່ທີ່ 35% ເຖິງ 40%; ວັນທີ 20 ມັງກອນ 2018, ຄະນະເລຂາທິການສູນກາງພັກອອກຄຳສັ່ງເລກທີ 21-CT/TW, “ວ່າດ້ວຍການສືບຕໍ່ຍູ້ແຮງວຽກງານແມ່ຍິງໃນສະພາບການໃໝ່”.
ເພື່ອປະຕິບັດການນຳພາຂອງພັກ ແລະ ປະຕິບັດຂໍ້ກຳນົດຂອງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ, ຄະນະກຳມະການພັກສະພາແຫ່ງຊາດ ໄດ້ນຳພາຄະນະປະຈຳສະພາແຫ່ງຊາດ ໃນການວາງແຜນໂຄງສ້າງແລະອົງປະກອບຂອງຜູ້ສະໝັັກຮັບເລືອກຕັ້ງສະພາແຫ່ງຊາດ ເພື່ອຮັບປະກັນວ່າ ຈຳນວນຜູ້ຍິງທີ່ຖືກສະເໜີຊື່ເຂົ້າເປັນສະມາຊິກສະພາແຫ່ງຊາດ ແລະຮັບສະໝັກເລືອກຕັ້ງເປັນສະມາຊິກສະພາປະຊາຊົນທຸກຂັ້ນ ຈະບັນລຸໄດ້ຢ່າງໜ້ອຍ 35% ຂອງຈຳນວນຜູ້ສະໝັກທັງໝົົດ ໃນບັນຊີລາຍຊື່ຜູ້ສະໝັກຢ່າງເປັນທາງການ. ຄະນະກຳມະການພັກສະພາແຫ່ງຊາດ ໄດ້ນຳພາຄະນະປະຈຳສະພາແຫ່ງຊາດ ໃນການຄາດຄະເນແນະນຳຄົນຊົນເຜົ່າສ່ວນໜ້ອຍລົງສະໝັກຮັບເລືອກຕັ້ງສະພາແຫ່ງຊາດ ແລະປະກາດໃຊ້ຄຳແນະນຳ ເພື່ອຮັບປະກັນອັດຕາສ່ວນທີ່ເໝາະສົມ ໃນບັນຊີລາຍຊື່ຜູ້ຮັບສະໝັກຮັບເລືອກຕັ້ງສະພາປະຊາຊົນທີ່ເປັນຄົນຊົນເຜົ່າສ່ວນນ້ອຍ, ສອດຄ່ອງກັບລັກສະນະ ແລະ ໂຄງປະກອບປະຊາກອນ ຂອງແຕ່ລະທ້ອງຖິ່ນ. ເອົາໃຈໃສ່ກັບຊົນເຜົ່າສ່ວນນ້ອຍ ເຊິ່ງໃນຫຼາຍສະໄໝຂອງສະພາປະຊາຊົນທີ່ຍັງບໍ່ໄດ້ເຂົ້າຮ່ວມກິດຈະກໍາ ຂອງສະພາປະຊາຊົນ (9).
ຖອດຖອນບົດຮຽນຈາກການເລືອກຕັ້ງກ່ອນໜ້ານີ້, ປະຫວັດຜູ້ສະໝັກຮັບເລືອກຕັ້ງສະພາແຫ່ງຊາດໄດ້ຖືກທົບທວນຄືນຢ່າງລະມັດລະວັງ ໂດຍສະພາການເລືອກຕັ້ງແຫ່ງຊາດ ເພື່ອຮັບປະກັນມາດຕະຖານຕາມທີ່ໄດ້ກໍານົດໄວ້ໃນກົດໝາຍວ່າດ້ວຍການເລືອກຕັ້ງສະພາແຫ່ງຊາດ, ຮັບປະກັນລະບຽບການປົກປ້ອງຄວາມໝັ້ນຄົງທາງການເມືອງພາຍໃນ. ເດັດຂາດບໍ່ລວມຢູ່ໃນບັນຊີລາຍຊື່ຜູ້ສະໝັກທີ່ບໍ່ມີຄຸນສົມບັດ, ຜູ້ທີ່ສວຍໂອກາດທາງການເມືອງ, ຜູ້ທີ່ມີຄວາມທະເຍີທະຍານໃນອໍານາດ, ມີແນວຄິດພາກສ່ວນ ອະນຸລັກນິຍົມ ຢຸດສະງັກຊັກຊ້າ; ຜູ້ທີ່ຖືກກວດກາຫຼືກວດສອບສັນຍານຂອງການລະເມີດ; ຫົວໜ້າສຳນັກງານ ອົງການ ການຈັດຕັ້ງ ໜ່ວຍງານ ທີ່ຍອມໃຫ້ມີການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ, ຄວາມແຕກແຍກ; ຜູ້ທີ່ລະເມີດກົດລະບຽດເລກທີ 126-QĐ/TW, ລົງວັນທີ 28 ກຸມພາ 2018, ຂອງກົມການເມືອງ, ວ່າດ້ວຍ “ບາງບັນຫາການປົກປ້ອງການເມືອງພາຍໃນພັກ” ຫຼືມີບັນຫາທາງການເມືອງທີ່ຍັງບໍ່ທັນສະຫຼຸບ. ເດັດຂາດບໍ່ປ່ອຍໃຫ້ຄົນທີ່ບໍ່ສົມຄວນ, ຜູ້ທີ່ວິ້ງເຕັ້ນເພື່ອຕຳແໜ່ງ, ວິ້ງເຕັ້ນເພື່ອສິດອຳນາດ ເຂົ້າຮ່ວມສະພາແຫ່ງຊາດ. ຄະນະກຳມະການເລືອກຕັ້ງສະພາປະຊາຊົນທຸກຂັ້ນ ກໍຕ້ອງຊາບຊຶມແລະປະຕິບັດຄວາມຕ້ອງການຢ່າງເຂັ້ມງວດ ກ່ຽວກັບການສະເໜີຊື່ຜູ້ສະໝັກສະພາປະຊາຊົນທີ່ມີຄຸນສົມບັດເໝາະສົມ.
ການສະເໜີຊື່ຜູ້ສະໝັກຮັບເລືອກຕັ້ງຕ້ອງຮັບປະກັນລະຫວ່າງມາດຕະຖານແລະໂຄງສ້າງ; ຕາມນັ້ນ, ສູ້ຊົນທີ່ຈະແນະນຳ ຄັດເລືອກ ແລະເລືອກຕັ້ງໄດ້ ສະມາຊິກສະພາແຫ່ງຊາດແລະສະມາຊິກສະພາປະຊາຊົນທີ່ເປັນຕົວແທນຢ່າງແທ້ຈິງ ແລະ ສົມກຽດເປັນຜູ້ຕາງໜ້າໃຫ້ແກ່ເຈດຈຳນົງ, ຄວາມປາຖະໜາ ແລະສິດເປັນເຈົ້າຂອງຂອງປະຊາຊົນ; ຮັບປະກັນວ່າໄດ້ຕາມມາດຖານ, ປະລິມານພຽງພໍ, ໂຄງສ້າງມີຄວາມສົມເຫດສົມຜົນ, ໂດຍເນັ້ນທີ່ມາດຕະຖານແລະຄຸນນະພາບ, ບໍ່ແມ່ນຍ້ອນໂຄງສ້າງ ຈະຫຼຸດມາດຕະຖານລົງ. ກອງປະຊຸມປຶກສາຫາລືຄັ້ງທີສອງກະກຽມບັນຊີລາຍຊື່ເບື້ອງຕົ້ນຂອງຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ, ຜູ້ສະໝັກຮັບເລືອກຕັ້ງຫຼາຍຄົນມີລະດັບມະຫາວິທະຍາໄລແລະລະດັບເໜືອມະຫາວິທະຍາໄລ (ໃນນັ້ນ 59,36% ມີລະດັບເໜືອມະຫະວິທະຍາໄລ).
ການຄັດເລືອກຜູ້ສະໝັັກຮັບເລືອກຕັ້ງ ເຂົ້າເປັນສະມາຊິກສະພາແຫ່ງຊາດເຕັມເວລາ ໄດ້ຮັບການຕີລາຄາສູງຈາກພັກ ແລະ ວາງມາດຕະຖານສູງເຊັ່ນ: ມີວຸດທິການສຶກສາລະດັບມະຫາວິທະຍາໄລຂຶ້ນໄປ, ມີສຸຂະພາບ ແລະອາຍຸຕາມລະບຽບການ. ຜູ້ສະໝັກຮັບເລືອກຕັ້ງເຂົ້າເປັນສະມາຊິກສະພາແຫ່ງຊາດເຕັມເວລາ ຢູ່ບັນດາໜ່ວຍງານຂອງສະພາແຫ່ງຊາດ ແລະຄະນະປະຈຳສະພາແຫ່ງຊາດເວົ້າລວມ ຕ້ອງຜ່ານແລະເຮັດສໍາເລັດໜ້າທີ່ເປັນຢ່າງດີ ໃນຕໍາແໜ່ງຫົວໜ້າກົມແລະທຽບເທົ່າ, ຕໍາແໜ່ງຫົວໜ້າພະແນກ, ຂະແໜງການແລະທຽບເທົ່າຂຶ້ນໄປ; ໄດ້ວາງແຜນທີ່ຈະເຮັດວຽກເປັນສະມາຊິກສະພາແຫ່ງຊາດເຕັມເວລາ ຫຼືວາງແຜນທີ່ຈະດຳລົງຕຳແໜ່ງຮອງລັດຖະມົນຕີແລະທຽບເທົ່າຂຶ້ນໄປ. ຖ້າເປັນພະນັກງານຢູ່ໃນກຳລັງປະກອບອາວຸດ ແມ່ນຕ້ອງຜ່ານແລະເຮັດສໍາເລັດໜ້າທີ່ເປັນຢ່າງດີ ໃນຕຳແໜ່ງຫົວໜ້າກົມແລະທຽບເທົ່າ, ຜູ້ບັນຊາການກອງບັນຊາການທະຫານແຂວງ, ຜູ້ບັນຊາການທະຫານຊາຍແດນແຂວງ, ຜູ້ອໍານວຍການຕໍາຫຼວດແຂວງແລະທຽບເທົ່າຂຶ້ນໄປ ຫຼືມີຍົດພັນເອກຂຶ້ນໄປ. ສຳລັບບາງຂົງເຂດຈຳເປັນຕ້ອງຈັດໂຄງສ້າງຜູ້ແທນສະພາແຫ່ງຊາດ, ແຕ່ບໍ່ມີບຸກຄະລາກອນລະດັບຫົວໜ້າກົມແລະທຽບເທົ່າທີ່ມີຄຸນສົມບັດຕາມຄວາມຕ້ອງການ, ຄະນະກຳມະການພັກສະພາແຫ່ງຊາດຈະປະສານສົມທົບກັບບັນດາອົງການທີ່ມີສິດອຳນາດ ເພື່ອພິຈາລະນາແລະຕັດສິນກໍລະນີຮອງຫົວໜ້າກົມແຕ່ລະກໍລະນີໂດຍສະເພາະ, ຮັບປະກັນຄວາມຖືກຕ້ອງຕາມລະບຽບການ.
ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດເຕັມເວລາ ເພື່ອເຮັດ ໜ້າທີ່ເປັນຮອງຫົວໜ້າຄະນະຜູ້ແທນສະພາແຫ່ງຊາດທ້ອງຖິ່ນ ຈະຕ້ອງເປັນກຳມະການຄະນະບໍລິຫານງານພັກແຂວງ ແລະ ດຳລົງຕຳແໜ່ງເປັນຫົວໜ້າພະແນກຫຼືທຽບເທົ່າຂຶ້ນໄປ, ຫຼືໄດ້ວາງແຜນໃຫ້ຮັບຕຳແໜ່ງໃດໜຶ່ງດັ່ງຕໍ່ໄປນີ້: ກຳມະການຄະນະປະຈຳພັກແຂວງ, ຮອງປະທານສະພາປະຊາຊົນແຂວງ, ຮອງປະທານຄະນະກຳມະການປະຊາຊົນແຂວງ, ນະຄອນ ທີ່ຂຶ້ນກັບສູນກາງຫຼືທຽບເທົ່າຂຶ້ນໄປ.
ຄະນະກຳມະການພັກສະພາແຫ່ງຊາດຊີ້ນຳນຳພາການຈັດຕັ້ງປະຕິບັດຢ່າງເຂັ້ມງວດ ຂໍ້ກຳນົດຂອງອົງການທີ່ມີສິດອຳນາດ ກ່ຽວກັບສະມາຊິກສະພາແຫ່ງຊາດເຕັມເວລາ, ໃນນັ້ນມີຂໍ້ກຳນົດກ່ຽວກັບຕຳແໜ່ງ, ອາຍຸ; ມີການປະເມີນຜົນຢ່າງພາວະວິໄສ, ລະມັດລະວັງກ່ຽວກັບຄວາມອາດສາມາດ, ລະດັບຄວາມຮູ້, ຊື່ສຽງແລະຄວາມສາມາດໃນການເຮັດໜ້າທີ່ຂອງສະມາຊິກສະພາແຫ່ງຊາດເຕັມເວລາ.
ຂະບວນການປຶກສາຫາລືຄັ້ງທີໜຶ່ງແລະຄັ້ງທີສອງ ກ່ຽວກັບໂຄງສ້າງ, ປະລິມານ ແລະບັນຊີລາຍຊື່ ຜູ້ສະໝັກຮັບເລືອກຕັ້ງເບື້ອງຕົ້ນສຳລັບສະພາແຫ່ງຊາດແລະສະພາປະຊາຊົນທຸກຂັ້ນ ໄດ້ດຳເນີນການຢ່າງເປີດເຜີຍແລະເປັນປະຊາທິປະໄຕ, ຖືກຕ້ອງຕາມຂໍ້ກຳນົດຂອງກົດໝາຍ ແລະມະຕິຮ່ວມສະບັບເລກທີ 09/2021/NQLT-UBTVQH14-CP-ĐCTUBTWMTTQVN, ວັນທີ 15 ມັງກອນ 2021, ຂອງຄະນະປະຈຳສະພາແຫ່ງຊາດ, ລັດຖະບານ, ຄະນະປະທານຄະນະກຳມະການສູນກາງແນວໂຮມປະເທດຊາດຫວຽດນາມ, ວ່າດ້ວຍ “ບົດແນະນໍາກ່ຽວກັບຂັ້ນຕອນການປຶກສາຫາລືແລະແນະນໍາຜູ້ສະໝັັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ 15, ສະມາຊິກສະພາປະຊາຊົນທຸກຂັ້ນວາລະປີ 2021-2026”; ພ້ອມກັນນັ້ນ, ຮັບປະກັນການນຳພາຂອງພັກໃນວຽກງານບຸກຄະລາກອນ.
ການນຳພາໃນການສ້າງຕັ້ງອົງການຮັບຜິດຊອບການເລືອກຕັ້ງ
ອົງການຮັບຜິດຊອບການເລືອກຕັ້ງ, ຕັ້ງແຕ່ສະພາການເລືອຕັ້ງແຫ່ງຊາດຢູ່ສູນກາງ ຈົນເຖິງໜ່ວຍເລືອກຕັ້ງ - ອົງການຮັບຜິດຊອບການເລືອກຕັ້ງຢູ່ຂັ້ນຮາກຖານ ມີບົດບາດສໍາຄັນໃນຄວາມສໍາເລັດຂອງການເລືອກຕັ້ງ. ມີຄະນະກຳມະການເລືອກຕັ້ງເກືອບ 12.000 ຄະນະ, ມີຄະນະກຳມະການເລືອກຕັ້ງລະດັບແຂວງ, ເມືອງ, ຕາແສງ ເກືອບ 90.000 ຄະນະ, ແລະ ໜ່ວຍເລືອກຕັ້ງປະມານ 90.000 ໜ່ວຍ. ໃນທົ່ວປະເທດ, ມີຫຼາຍກວ່າ 1 ລ້ານຄົນເຂົ້າຮ່ວມໃນອົງການຮັບຜິດຊອບການເງືອກຕັ້ງ, ນີ້ບໍ່ແມ່ນວຽກງານມືອາຊີບເປັນປະຈຳ ແຕ່ແມ່ນວຽກທີ່ໄດ້ເຮັດທຸກໆ 5 ປີ, ຫຼາຍຄົນໃນໜ່ວຍເລືອກຕັ້ງມີອາຍຸສູງ, ກວ່າ 60 ປີ, ບໍ່ແມ່ນພະນັກງານລັດຖະກອນຂອງລັດ.
ດັ່ງນັ້ນ, ການຄັດເລືອກບຸກຄະລາກອນເຂົ້າຮ່ວມໃນອົງການຮັບຜິດຊອບການເລືອກຕັ້ງແມ່ນໄດ້ເຮັດຢ່າງຈິງຈັງແລະລະອຽດ; ຄັດເລືອກຜູ້ມີຄຸນທາດການເມືອງ ມີຄຸນສົມບັດດີ, ໄດ້ຮັບຄວາມໄວ້ວາງໃຈຂອງປະຊາຊົນ, ມີຄວາມຮູ້ດ້ານກົດໝາຍ ແລະປະສົບການໃນການດໍາເນີນວຽກງານການເລືອກຕັ້ງ.
ເພື່ອຮັບປະກັນການນຳພາຂອງພັກຕໍ່ວຽກງານຊີ້ນຳນຳພາການເລືອກຕັ້ງຢູ່ໃນສະພາການເລືອກຕັ້ງແຫ່ງຊາດ, ໃນກອງປະຊຸມຄັ້ງທີ 11, ສະພາແຫ່ງຊາດຊຸດທີ 14 ໄດ້ດຳເນີນການເລືອກຕັ້ງເພີ່ມເຕີມ, ປ່ຽນແທນປະທານ, ຮອງປະທານ, ກຳມະການສະພາເລືອກຕັ້ງແຫ່ງຊາດບໍ່ເຂົ້າຮ່ວມໃນຄະນະບໍລິຫານງານສູນກາງພັກສະໄໝທີ 13.
ສະມາຊິກຂອງອົງການຮັບຜິດຊອບການເລືອກຕັ້ງ, ພິເສດແມ່ນສະມາຊິກໜ່ວຍເລືອກຕັ້ງ ລ້ວນແຕ່ໄດ້ຮັບການຝຶກອົບຮົມໃຫ້ກຳແໜ້ນຂໍ້ກຳນົດກົດໝາຍ, ກຳແໜ້ນວິຊາຊີບການເລືອກຕັ້ງ ເພື່ອຫຼີກລ້ຽງຂໍ້ຜິດພາດ ແລະ ປະຕິບັດຕາມຂໍ້ກຳນົກກົດໝາຍຢ່າງເຄັ່ງຄັດ.
-------------------------
(1), (2) ລັດຖະທຳມະນູນຂອງສາທາລະນະລັດສັງຄົມນິຍົມຫວຽດນາມ, ສພຈ ການເມືອງແຫ່ງຊາດ ສື້ເຖິດ, ຮ່າໂນ້ຍ, 2014, ໜ້າ 9, 32, 60.
(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິດ, ຮ່າໂນ້ຍ, 2021, ເຫຼັ້ມ 2, ໜ້າ 332.
(4) ບົດລາຍງານສະບັບເລກທີ 695/BC-HĐBCQG, ວັນທີ 19 ກໍລະກົດ 2016, ຂອງສະພາການເລືອກຕັ້ງແຫ່ງຊາດ, “ສະຫຼຸບການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນວາລະປີ 2016-2021” ຍື່ນຕໍ່ສະພາແຫ່ງຊາດຊຸດທີ 14 ໃນກອງປະຊຸມຄັ້ງທໍາອິດ
(5) ໂຮ່ຈີມິນ: ນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິດ, ຮ່າໂນ້ຍ, 2011, ເຫຼັ້ມ 4, ໜ້າ 153.
(6) ລັດຖະທຳມະນູນຂອງສາທາລະນະລັດສັງຄົມນິຍົມຫວຽດນາມ, ປຶ້ມທີ່ໄດ້ແນະນຳ, ໜ້າ 10.
(7) ຄຳແນະນຳເລກທີ 36-HD/BTCTW, ວັນທີ 20 ມັງກອນ 2021, ຂອງຄະນະຈັດຕັ້ງສູນກາງ, “ວ່າດ້ວຍວຽກງານບຸກຄະລາກອນສະມາຊິກສະພາແຫ່ງຊາດຊຸດທີ 15 ແລະ ສະມາຊິກສະພາປະຊາຊົນທຸກຂັ້ນວາລະປີ 2021-2026”; ຈົດໝາຍທາງການເລກທີ 35-CV/BTCTW, ວັນທີ 24 ກຸມພາ 2021, ຂອງຄະນະຈັດຕັ້ງສູນກາງ “ວ່າດ້ວຍວຽກງານບຸກຄະລາກອນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ”
(8) ຈຸດ ກ ຂໍ້ 5 ມາດຕາ 11, ກົດໝາຍວ່າດ້ວຍຄວາມສະເໝີພາບທາງເພດ.
(9) ມະຕິເລກທີ 1187/NQ-UBTVQH14, ວັນທີ 11 ມັງກອນ 2021, ຂອງຄະນະປະຈຳສະພາແຫ່ງຊາດ, “ແນະນໍາການກໍານົດຄວາມຄາດຫວັງກ່ຽວກັບໂຄງສ້າງ, ອົງປະກອບ ແລະ ການແຈກຢາຍຈຳນວນຄົນທີ່ຖືກສະເໜີຊື່ເຂົ້າຮັບເລືອກຕັ້ງເປັນສະມາຊິກສະພາປະຊາຊົນທຸກຂັ້ນວາລະປີ 2021-2026”.
(10) ໃນການເລືອກຕັ້ງປີ 2016, ມີຜູ້ໄດ້ຮັບເລືອກເປັນສະມາຊິກສະພາແຫ່ງຊາດ 2 ຄົນ ແຕ່ບໍ່ໄດ້ຮັບຮອງສະຖານະ; ມີຜູ້ໄດ້ຮັບເລືອກເປັນສະມາຊິກສະພາປະຊາຊົນ 1 ຄົນ ແຕ່ບໍ່ໄດ້ຮັບຮອງສະຖານະ ຍ້ອນໄດ້ລົງສະໝັກຮັບເລືອກຕັ້ງສະພາປະຊາຊົນທັງ 3 ລະດັບ, ລະເມີດ ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ.
(11) ຕາມບົດລາຍງານສະບັບເລກທີ 695/BC-HĐBCQG, ວັນທີ 19 ກໍລະກົດ 2016, ຂອງສະພາການເລືອກຕັ້ງແຫ່ງຊາດ, “ສະຫຼຸບການເລືອກຕັ້ງສະມາຊິກສະພາແຫ່ງຊາກຊຸດທີ 14 ແລະ ສະມາຊິກສະພາປະຊາຊົນທຸກຂັ້ນວາລະປີ 2016-2021”, ໜ່ວຍການເລືອກຕັ້ງເລກທີ 2, ຕາແສງອານເຊີນ, ເມືອງກຽນຫາຍ, ແຂວງກຽນຢາງ ຕ້ອງຍົກເລີກຜົນການເລືອກຕັ້ງ ເນື່ອງຈາກການລະເມີດກົດໝາຍຢ່າງຮ້າຍແຮງ ແລະ ຕ້ອງໄດ້ຈັດການເລືອກຕັ້ງຄືນໃໝ່ໃນວັນອາທິດ, ວັນທີ 5 ມິຖຸນາ 2015. ໜ່ວຍການເລືອກຕັ້ງເລກທີ 3, ຕາແສງເຕິນຕ້ຽນ, ເມືອງດົ່ງຝູ່, ແຂວງບິ່ງເຝື້ອກ ຕ້ອງຍົກເລີກຜົນການເລືອກຕັ້ງສະມາຊິກສະພາປະຊາຊົນຕາແສງ ເນື່ອງຈາກການພິມນາມສະກູນຂອງຜູ້ສະໝັກຮັບເລືອກເປັນສະມາຊິກສະພາປະຊາຊົນຂັ້ນຕາແສງໃນບັດຄະແນນສຽງຜິດ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 964 (ເດືອນເມສາ 2021)
