ເບິ່ງຄືນຫຼັງ 10 ປີແຫ່ງການປະຕິບັດຍຸດທະສາດ
ການພັດທະນາເສດຖະກິດ-ສັງຄົມ 2011-2020:
ຜົນໄດ້ຮັບ, ບົດຮຽນທີ່ຖອດຖອນໄດ້ ແລະ ທິດທາງໃນອະນາຄົດ
ການພັດທະນາເສດຖະກິດ-ສັງຄົມ 2011-2020:
ຜົນໄດ້ຮັບ, ບົດຮຽນທີ່ຖອດຖອນໄດ້ ແລະ ທິດທາງໃນອະນາຄົດ
ວກ. - ເບິ່ງຄືນຫຼັງ 10 ປີແຫ່ງການປະຕິບັດຍຸດທະສາດການພັດທະນາ ເສດຖະກິດ-ສັງຄົມ 2011-2020, ເຖິງວ່າຈະມີຂໍ້ຈຳກັດ, ຂໍ້ບົກຜ່ອງ, ຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງກໍ່ຕາມ, ແຕ່ດ້ວຍຄວາມພະຍາຍາມທີ່ຍິ່ງໃຫຍ່ແລະຄວາມຕັດສິນໃຈສູງ ຂອງພັກກອມມູນິດຫວຽດນາມ, ປະຊາຊົນຫວຽດນາມ, ໄດ້ບັນລຸຜົນສຳເລັດທີ່ສຳຄັນຫຼາຍຢ່າງ, ສະແດງໃຫ້ເຫັນເຖິງຜົນງານຂອງການປະດິດສ້າງເກືອບ 35 ປີແຫ່ງການປ່ຽນແປງໃໝ່ ດ້ວຍຄວາມກ້າວໜ້າຢ່າງກະໂດດຂັ້ນໃນຫຼາຍຂົງເຂດ; ບໍ່ມີເວລາໃດທີ່ປະເທດຫວຽດນາມມີພາລະກິດ, ທ່າແຮງ, ຖານະຕຳແໜ່ງ ແລະກຽດສັກສີສາກົນຄືທຸກວັນນີ້. ການຮັບຮູ້ແລະການປະເມີນຢ່າງເລິກເຊິ່ງ ກ່ຽວກັບການຈັດຕັ້ງປະຕິບັດຍຸດທະສາດ ແລະການຖອດຖອນບົດຮຽນປະສົບການທີ່ມີຄຸນຄ່າ, ແມ່ນພື້ນຖານໃຫ້ແກ່ການສ້າງຍຸດທະສາດການພັດທະນາປະເທດຮອດປີ 2030 ແລະວິໄສທັດຮອດປີ 2045 ດ້ວຍຄວາມປາດຖະໜາບືນຕົວຂຶ້ນຢ່າງແຂງແຮງ, ໃຊ້ໂອກາດໃຫ້ເກີດປະໂຫຍດສູງສຸດ ແລະຫຼຸດຊ່ອງຫວ່າງການພັດທະນກັບບັນດາປະເທດໃນພາກພື້ນແລະທົ່ວໂລກ.
ກຳມະການກົມການເມືອງ, ນາຍົກລັດຖະມັນຕີ ຫງວຽນຊວັນຝຸກ ກວດກາວຽກງານແກ້ໄຂ ຜົນກະທົບຈາກໄພນ້ຳຖ້ວມ, ຢ້ຽມຢາມແລະແບ່ງປັນຄວາມຫຍຸ້ງຍາກ, ການສູນເສຍ ກັບປະຊາຊົນບ້ານດົ່ງຕື, ຕາແສງຮ່ຽນນິງ, ເມືອງກວ໋າງນິງ, ແຂວງກວ໋າງບິ່ງ, ວັນທີ 24 ຕຸລາ 2020 _ ພາບ: TTXVN
I
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກກອມມູນິດຫວຽດນາມ ໄດ້ຮັບຮອງຜ່ານຍຸດທະສາດການພັດທະນາເສດຖະກິດ-ສັງຄົມ 2011 - 2020, ໃນນັ້ນສິ່ງທີ່ເດັ່ນແມ່ນ ທັດສະນະການພັດທະນາຢ່າງໄວແລະຍືນຍົງ, ການເຕີບໂຕເສດຖະກິດສົມທົບຢ່າງກົມກຽວ ກັບການພັດທະນາວັດທະນະທຳ, ສ້າງຄວາມກ້າວໜ້າແລະຄວາມຍຸດຕິທຳທາງສັງຄົມ, ຍົກສູງຄຸນນະພາບຊີວິດຂອງປະຊາຊົນຢ່າງຕໍ່ເນື່ອງ, ໃຫ້ຄວາມສຳຄັນກັບການປົກປ້ອງແລະປົວແປງສິ່ງແວດລ້ອມໃຫ້ດີຂຶ້ນ, ເປັນເຈົ້າການໃນການຮັບມືກັບການປ່ຽນແປງສະພາບອາກາດ; ສຸມໃສ່ການປະຕິບັດສາມການບຸກທະລຸຍຸດທະສາດ ແລະບັນດາທິດທາງຫຼັກ ໃນການພັດທະນາເສດຖະກິດ-ສັງຄົມ, ຈັດວາງໂຄງສ້າງເສດຖະກິດຄືນໃໝ່ ຕິດກັບການປ່ຽນແປງໃໝ່ຮູບແບບການເຕີບໂຕ ແລະຍົກສູງປະສິດທິພາບ, ປະສິດທິຜົນຂອງການຄຸ້ມຄອງລັດໃນຂົງເຂດຕ່າງໆ.
ເບິ່ງຄືນຫຼັງເກືອບ 10 ປີແຫ່ງການປະຕິບັດຍຸດທະສາດ, ພວກເຮົາເຫັນສະຖານະການໂລກແລະພາກພື້ນ ມີການຜັນຜວນ ປ່ຽນແປງທີ່ສັບສົນຫຼາຍກວ່າທີ່ຄາດໄວ້ກ່ອນກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມ. ເສດຖະກິດໂລກໄດ້ ຟື້ນຕົວຊ້າລົງ ຫຼັງຈາກວິກິດການການເງິນ ແລະສະພາວະເສດຖະກິດໂລກຊຸດໂຊມໃນປີ 2007 - 2008; ຄວາມສ່ຽງໃນຕະຫຼາດການເງິນ ແລະເງິນຕາສາກົນເພີ່ມຂຶ້ນ; ທ່າອ່ຽງຂອງລັດທິປົກປ້ອງການຄ້າ ແລະການແຂ່ງຂັນທາງຍຸດທະສາດ ລະຫວ່າງບັນດາປະເທດ, ຄູ່ຮ່ວມມືສຳຄັນ ແມ່ນມີຄວາມຮຸນແຮງຂຶ້ນ. ໃນຂະນະນັ້ນ, ວິທະຍາສາດແລະເຕັກໂນໂລຊີຂະຫຍາຍຕົວໄວທີ່ສຸດ ພ້ອມກັນກັບການປະຕິວັດອຸດສາຫະກຳຄັ້ງທີສີ່ ໄດ້ສົ່ງຜົນກະທົບຢ່າງເລິກເຊິ່ງໃນຫຼາຍໆດ້ານ ຕໍ່ປະເທດຕ່າງໆໃນທົ່ວໂລກ. ພິເສດ, ແຕ່ຕົ້ນປີ 2020, ປີສຸດທ້າຍຂອງໄລຍະຍຸດທະສາດ, ການລະບາດຂອງໄວຣັດໂຄວິດ-19 ເກີດຂຶ້ນແລະລະບາດໜັກ ສົ່ງຜົນກະທົບຢ່າງໃຫຍ່ຫຼວງຕໍ່ທຸກຂົງເຂດໃນທົ່ວໂລກ, ນຳໄປສູ່ພາວະຖົດຖອຍທາງເສດຖະກິດທີ່ຮຸນແຮງທີ່ສຸດ ນັບຕັ້ງແຕ່ວິກິດຄັ້ງໃຫຍ່ໃນປີ 1929 - 1933, ເຊິ່ງມີຫຼາຍປະເທດທີ່ເປັນຄູ່ຮ່ວມມືໃຫຍ່ຂອງຫວຽດນາມ.
ໃນສະພາບການນັ້ນ ແລະຕໍ່ໜ້າບັນດາຂໍ້ຈຳກັດ, ຂໍ້ຫຍຸ້ງຍາກໃນທົ່ວປະເທດ, ພັກແລະລັດຫວຽດນາມ ໄດ້ຕິດຕາມສະພາບການແລະຂໍ້ກຳນົດຕົວຈິງຢ່າງໃກ້ຊິດ, ນຳ ພາ, ຊີ້ນຳ, ບໍລິຫານຢ່າງກົງໄປກົງມາ, ວ່ອງໄວ ແລະມີປະສິດທິຜົນໃນທຸກຂົງເຂດ ດ້ວຍຄວາມຕັດສິນໃຈສູງ; ພະຍາຍາມໃຫ້ໄດ້ຮັບໝາກຜົນສູງສຸດຕາມເປົ້າໝາຍ ແລະໜ້າທີ່ທີ່ໄດ້ວາງໄວ້. ໃນໄລຍະເວລາຍຸດທະສາດ, ພາຍໃຕ້ການຳພາທີ່ສະຫຼາດແລະຖືກຕ້ອງຂອງພັກ, ການຄຸ້ມຄອງທີ່ມີປະສິດທິຜົນຂອງລັດ, ການຊີ້ນຳແລະຄຸ້ມຄອງຢ່າງເຂັ້ມງວດຂອງລັດຖະບານ, ຂອງທຸກຂັ້ນແລະທຸກຂະແໜງການ ຕັ້ງແຕ່ສູນກາງລົງຮອດທ້ອງຖິ່ນ, ທົ່ວປວງຊົນແລະທົ່ວກອງທັບໃນທົ່ວປະເທດ ໄດ້ຮ່ວມແຮງຮ່ວມໃຈສາມັກຄີ,ຕັ້ງໜ້າພະຍາຍາມ, ຜ່ານຜ່າຄວາມຫຍຸ້ງຍາກແລະສິ່ງທ້າທາຍ, ປະຕິບັດເປົ້າໝາຍ ໜ້າທີ່ ວິທີແກ້ໄຂທີ່ໄດ້ວາງໄວ້ຢ່າງຄົບຊຸດແລະມີປະສິດທິຜົນ ແລະ ປະສົບຄວາມສຳເລັດທີ່ສຳຄັນແລະຄົບຖ້ວນພໍສົມຄວນໃນຫຼາຍຂົງເຂດ; ໂດຍສະເພາະແຕ່ຕົ້ນປີ 2020 ຈົນເຖິງດຽວນີ້, ພວກເຮົາໄດ້ປະຕິບັດ“ເປົ້າໝາຍຄູ່”: ທັງປ້ອງກັນແລະປາບການລະບາດຂອງໄວຣັດໂຄວິດ-19 ດ້ວຍຈິດໃຈ “ການຕໍ່ສູ້ກັບການລະບາດແມ່ນຄ້າຍຄືກັບການຕໍ່ສູ້ກັບສັດຕູ”, ທັງສຸມໃສ່ການຟື້ນຟູແລະພັດທະນາເສດຖະກິດ-ສັງຄົມ, ຮັບປະກັນຄວາມປອດໄພສັງຄົມ ແລະຊີວິດການເປັນຢູ່ຂອງປະຊາຊົນ. ຜົນສຳເລັດເຫຼົ່ານີ້ເກີດຈາກການສຸມໃສ່ພັດທະນາບັນດາປັດໄຈພື້ນຖານເສດຖະກິດ-ສັງຄົມ ໃນໄລຍະຈັດຕັ້ງຍຸດທະສາດ, ໂດຍສະເພາະໃນໄລຍະ 2016-2020.
ເສດຖະກິດມະຫາພາກມີຄວາມໝັ້ນທ່ຽງກວ່າເກົ່າ, ອັດຕາເງິນເຟີ້ຖືກຄວບຄຸມໃນລະດັບຕໍ່າ, ການເຕີບໂຕທາງເສດຖະກິດດີພໍຄວນ ຕິດກັບຄຸນນະພາບຂອງການເຕີບໂຕ ແລະການດຸ່ນດ່ຽງທີ່ສຳຄັນຂອງເສດຖະກິດໄດ້ຮັບການປັບປຸງດີຂຶ້ນ. ເຖິງວ່າໄດ້ຖືກຜົນກະທົບຢ່າງໜັກຈາກການແຜ່ລະບາດຂອງໄວຣັດໂຄວິດ-19 ໃນປີ 2020 ກໍ່ຕາມ, ແຕ່ ການເຕີບໂຕຂອງ ຈີດີພີ ຄາດວ່າຈະບັນລຸ 5,9% ຕໍ່ປີ ໃນໄລຍະເວລາຍຸດທະສາດທັງ ໝົດ, ຢູ່ໃນກຸ່ມປະເທດທີ່ມີການເຕີບໂຕສູງໃນພາກພື້ນແລະໃນໂລກ; ໃນນັ້ນໄລຍະປີ 2011 - 2015 ການເຕີບໂຕສະເລ່ຍບັນລຸ 5,9% ຕໍ່ປີ; ໄລຍະປີ 2016 - 2019 ບັນລຸ 6,8% ຕໍ່ປີ ແລະປີ 2020 ປະມານຫຼາຍກວ່າ 2%, ສູ້ຊົນບັນລຸປະມານ 3%. ຈີດີພີ ສະເລ່ຍຕໍ່ຫົວຄົນເພີ່ມຂຶ້ນຈາກ 1.331 ໂດລາສະຫະລັດໃນປີ 2010 ເປັນປະມານ 2.750 ໂດລາສະຫະລັດໃນປີ 2020. ບໍ່ພຽງແຕ່ປະລິມານເທົ່ານັ້ນ, ຄຸນນະພາບການເຕີບໂຕກໍ່ໄດ້ຮັບການປັບປຸງ, ສະມັດຕະພາບຂອງງານໄດ້ຮັບການຍົກຂຶ້ນຢ່າງຈະແຈ້ງ. ການປະກອບສ່ວນຂອງສະມັດຕະພາບປັດໄຈສັງລວມ (TFP) ບັນລຸປະມານ 39%, ລື່ນຄາດໝາຍຍຸດທະສາດທີ່ວາງໄວ້ (35%); ສະມັດຕະພາບຂອງງານໃນໄລຍະປີ 2016 - 2020 ເພີ່ມຂຶ້ນສະເລ່ຍ 5,8% ຕໍ່ປີ. ເສດຖະກິດມະຫາພາກມີຄວາມໝັ້ນທ່ຽງກວ່າເກົ່າ; ດັດຊະນີລາຄາຜູ້ບໍລິໂພກ (CPI) ຫຼຸດລົງຈາກ 18,6% ໃນປີ 2011 ລົງຕ່ຳກ່ວາ 4% ໃນໄລຍະປີ 2016 - 2020. ບັນດາການດຸ່ນດ່ຽງທີ່ໃຫຍ່ ກ່ຽວກັບງົບປະມານແຫ່ງລັດ, ການຄ້າ, ການລົງທຶນ, ພະລັງງານ, ຄວາມໝັ້ນຄົງດ້ານສະບຽງອາຫານ ສືບຕໍ່ໄດ້ຮັບການຮັບປະກັນແລະປັບປຸງ. ມູນຄ່າການສົ່ງອອກແລະນຳເຂົ້າທັງ ໝົດເພີ່ມຂຶ້ນຢ່າງໄວວາ; ດຸນການຄ້າແລະດຸນການຊຳລະເງິນລະຫວ່າງປະເທດໄດ້ຮັບການປັບປຸງດີຂຶ້ນຢ່າງຈະແຈ້ງ; ການສຳຮອງເງິນຕາຕ່າງປະເທດເພີ່ມສູງຂຶ້ນກວ່າເວລາໃດໝົດ. ການລະດົມບັນດາແຫຼ່ງກຳລັງເພື່ອການລົງທຶນພັດທະນາໄດ້ຮັບການຍູ້ແຮງ; ການລົງທຶນໃນຂົງເຂດນອກພາກລັດເພີ່ມຂຶ້ນຢ່າງໄວ; ຄຸນນະພາບແລະປະສິດທິຜົນການລົງທຶນໄດ້ຮັບການຍົກສູງຂຶ້ນ. ຍອດເງິນລົງທຶນພັດທະນາສັງຄົມເພີ່ມຂຶ້ນສະເລ່ຍ 10,6% ຕໍ່ປີ; ໄດ້ດຶງດູດໂຄງການລົງທຶນໂດຍກົງຈາກຕ່າງປະເທດຂະໜາດໃຫຍ່ແລະເຕັກໂນໂລຢີສູງຈຳນວນຫຼາຍ.
ການປັບໂຄງສ້າງເສດຖະກິດຕິດກັບການປ່ຽນແປງໃໝ່ຮູບແບບການເຕີບໂຕ ໄດ້ຮັບການຈັດຕັ້ງຊີ້ນຳປະຕິບັດຢ່າງລວມສູນ ແລະບັນລຸໝາກຜົນໃນທາງບວກ. ການປັບໂຄງສ້າງສະຖາບັນສິນເຊື່ອຕິດກັບການແກ້ໄຂໜີ້ເສຍ ໄດ້ຜັນຂະຫຍາຍຢ່າງຄົບຊຸດ, ມີປະສິດທິຜົນກວ່າເກົ່າ, ຮັບປະກັນຄວາມໝັ້ນຄົງ ປອດໄພຂອງລະບົບ. ການປັບໂຄງສ້າງລັດວິສາຫະກິດ ໄດ້ຮັບການຍູ້ແຮງແລະແທດຈິງກວ່າເກົ່າ; ສຸມໃສ່ການຫັນເປັນຫຸ້ນສ່ວນ, ການຖອນທຶນ ແລະ ການຍົກສູງປະສິດທິຜົນການເຄື່ອນໄຫວ ຂອງລັດວິສາຫະກິດ. ຈຳນວນລັດວິສາຫະກິດຫຼຸດລົງ, ເຕົ້າໂຮມໃນຂະແໜງການແລະຂົງເຂດທີ່ ສຳຄັນ. ພາກເສດຖະກິດທີ່ບໍ່ແມ່ນຂອງລັດມີອັດຕາການເຕີບໂຕທີ່ດີ, ປະກອບສ່ວນທີ່ສຳຄັນ ໃນການລະດົມບັນດາແຫຼ່ງພະລັງສັງຄົມ, ປັບໂຄງປະກອບເສດຖະກິດ, ສ້າງວຽກເຮັດງານທຳ ແລະເພີ່ມລາຍໄດ້ໃຫ້ຜູ້ອອກແຮງງານ. ໂຄງສ້າງເສດຖະກິດຕາມຂະແໜງການແລະພາຍໃນຂະແໜງການ ມີການປ່ຽນແປງຢ່າງດີ. ສ່ວນແບ່ງຂອງຂະແໜງກະສິກຳໃນ ຈີດີພີ ຫຼຸດລົງຈາກ 18,9% ໃນປີ 2010 ລົງມາເປັນ 14,8% ໃນປີ 2020. ສຸມໃສ່ພັດທະນາກະສິກຳຕາມທິດການຜະລິດສິນຄ້າຂະໜາດໃຫຍ່, ທັນສະໄໝ, ມີຄຸນຄ່າເພີ່ມສູງ ແລະຍືນຍົງ; ພັດທະນາການເຊື່ອມໂຍງການຜະລິດຕາມຕ່ອງໂສ້ມູນຄ່າ ແລະສ້າງເຄື່ອງໝາຍການຄ້າ ຂອງຜະລິດຕະພັນກະສິກຳທີ່ສຳຄັນຈຳນວນໜຶ່ງ. ໂຮງງານຫຼາຍແຫ່ງປຸງແຕ່ງຜະລິດຕະພັນກະສິກຳແລະອາຫານດ້ວຍເຕັກໂນໂລຊີທີ່ທັນສະໄໝ ໄດ້ດຳເນີນການແລ້ວ. ບັນດາຮູບການເສດຖະກິດສະຫະກອນ ແລະວິສາຫະກິດກະສິກຳເພີ່ມຂຶ້ນຢ່າງໄວ ດ້ວຍສະຫະກອນກະເສດທີ່ມີປະສິດທິພາບປະມານ 15.000ແຫ່ງ ແລະວິສາຫະກິດເກືອບ 12.000 ແຫ່ງ ທີ່ກ່ຽວຂ້ອງໂດຍກົງກັບການຜະລິດທາງການກະເສດ. ອັດຕາສ່ວນຂອງການປຸງແຕ່ງ, ການປະດິດ ແລະການນຳໃຊ້ເຕັກໂນໂລຊີສູງ ໃນບັນດາຂະແໜງການແລະຂົງເຂດ ໄດ້ເພີ່ມຂຶ້ນຢ່າງຕໍ່ເນື່ອງ; ອັດຕາສ່ວນຂອງສິນຄ້າສົ່ງອອກທີ່ປຸງແຕ່ງ ໃນມູນຄ່າການສົ່ງອອກສິນຄ້າທັງໝົດ ເພີ່ມຂຶ້ນຈາກ 65% ໃນປີ 2011 ມາເປັນ 85% ໃນປີ 2020. ບາງຂະແໜງການຂົງເຂດບໍລິການທີ່ນຳໃຊ້ເຕັກໂນໂລຊີສູງ ໄດ້ຮັບການຍູ້ແຮງ ແລະພັດທະນາຢ່າງໄວເຊັ່ນ ເຕັກໂນໂລຊີຂໍ້ມູນຂ່າວສານ, ການສື່ສານ, ການຄ້າເອເລັກໂຕຣນິກ, ການເງິນ ທະນາຄານ, ການປະກັນໄພ, ຕະຫຼາດຫຼັກຊັບ, ສາທາລະນະສຸກ, ການບິນ... ຂະແໜງການທ່ອງທ່ຽວມີຄວາມກ້າວໜ້າຢ່າງເດັ່ນຊັດ ແລະບັນລຸຜົນງານທີ່ສຳຄັນ; ຈຳນວນນັກທ່ອງທ່ຽວຕ່າງປະເທດເພີ່ມຂຶ້ນຈາກ 5 ລ້ານຄົນໃນປີ 2010 ຂຶ້ນເປັນ 18 ລ້ານຄົນປີ 2019.
ບັນດາການບຸກທະລຸຍຸດທະສາດໄດ້ຮັບການການຊີ້ນຳລວມສູນ ເພື່ອປະຕິບັດ ແລະບັນລຸຜົນສຳເລັດຫຼາຍຢ່າງ, ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ. ລະບຽບກົດໝາຍເສດຖະກິດຕະຫຼາດກຳນົດທິດສັງຄົມນິຍົມ ໄດ້ຮັບການປັບປຸງໃຫ້ສົມບຸນເທື່ອລະກ້າວ ຕາມທິດທັນສະໄໝ ຄົບຊຸດ ແລະເຊື່ອມໂຍງ ເຊິ່ງຈຸດໜັກໃຈກາງແມ່ນ ສ້າງສະພາບແວດລ້ອມການແຂ່ງຂັນທີ່ສະເໝີພາບ ໂປ່ງໃສ ແລະສະດວກສະບາຍ. ມີການຈັດຕັ້ງລະບົບກົດໝາຍເສດຖະກິດທີ່ຂ້ອນຂ້າງສົມບຸນ, ຮັບປະກັນຄວາມເປັນເອກະພາບ ຄົບຊຸດ ໂປ່ງໃສ, ສ້າງພື້ນຖານດ້ານກົດໝາຍໃຫ້ບັນດາວິສາຫະກິດຂອງທຸກຮູບແບບກຳມະສິດ ດຳເນີນທຸລະກິດ. ການພັດທະນາຊັບພະຍາກອນມະນຸດໄດ້ຮັບການສົ່ງເສີມ, ໂດຍສະເພາະແມ່ນບຸກຄະລາກອນຄຸນນະພາບສູງ, ເຊື່ອມຕໍ່ຢ່າງແໜ້ນແຟ້ນກັບຄວາມຕ້ອງການຂອງຕະຫຼາດ; ອັດຕາສ່ວນແຮງງານທີ່ໄດ້ຮັບການຝຶກອົບຮົມເພີ່ມຂຶ້ນຈາກ 40% ປີ 2010 ຂຶ້ນເປັນປະມານ 64,5% ປີ 2020. ວິທະຍາສາດແລະເຕັກໂນໂລຊີໄດ້ຮັບການປະຢຸກໃຊ້ຢ່າງກວ້າງຂວາງໃນຫຼາຍຂົງເຂດ; ລະບົບນິເວດການເລີ່ມທຸລະກິດປະດິດສ້າງແຫ່ງຊາດ ຂະຫຍາຍຕົວຢ່າງແຂງແຮງ; ດັດຊະນີນະວັດຕະກຳລະດັບໂລກ (GII) ຂອງຫວຽດນາມໄດ້ຮັບການປັບປຸງຢ່າງຕໍ່ເນື່ອງ, ປີ 2020 ຢູ່ທີ 42/131 ປະເທດແລະເຂດແຄ້ວນ, ນຳໜ້າກຸ່ມ 29 ປະເທດທີ່ມີລາຍໄດ້ປານກາງຕ່ຳ. ຄວາມສາມາດຂອງລະບົບໂຄງສ້າງພື້ນຖານດ້ານການຂົນສົ່ງ, ພະລັງງານ, ເຕັກໂນໂລຊີຂໍ້ມູນຂ່າວສານ, ໂທລະຄົມມະນາຄົມ, ການຊົນລະປະທານ, ຕົວເມືອງ, ການຄ້າພານິດ... ໄດ້ຮັບການຍົກສູງຂຶ້ນພໍຄວນ. ຫຼາຍກິດຈຳກຳໂຄງການສຳຄັນ ທີ່ມີແຮງແຜ່ກະຈາຍສູງ, ມີລະດັບຍຸດທະສາດ ທາງດ້ານການຂົນສົ່ງ ແລະພະລັງງານ ໄດ້ຮັບການລົງທຶນ ກໍ່ສ້າງ ສຳເລັດ ແລະ ເປີດນຳໃຊ້. ເລິ່ມກໍ່ຕັ້ງຂໍ້ມູນທາງດ່ວນ (Information superhighway), ລະບົບຖານຂໍ້ມູນຂະໜາດໃຫຍ່ (Large database information system). ພວກເຮົາກໍ່ໄດ້ລົງທຶນກໍ່ສ້າງຫຼາຍກິດຈະກຳໂຄງສ້າງພື້ນຖານສັງຄົມ; ໃນນັ້ນ ໄດ້ສ້າງໃໝ່ ປັບປຸງ ແລະຍົກລະດັບ ໂຮງໝໍທຸກລະດັບ 766 ແຫ່ງ, ຫ້ອງກວດພະຍາດປະຈຳເຂດ 114 ແຫ່ງ, ສຸກສາລາຕາແສງຫຼາຍກວ່າ 2.000 ແຫ່ງ ແລະໂຮງໝໍສູນກາງຈຳນວນໜຶ່ງ; ໄດ້ສຳເລັດການເຊື່ອມຕໍ່ສະຖານທີ່ກວດແລະປິ່ນປົວພະຍາດອອນໄລ 1.200 ແຫ່ງໃນທຸກເຂດ ພາກຂອງປະເທດ.
ການພັດທະນາເສດຖະກິດເຂດ, ເສດຖະກິດທະເລ, ຕົວເມືອງ ແລະ ການກໍ່ສ້າງຊົນນະບົດໃໝ່ ໄດ້ມີຄວາມຄືບໜ້າ, ໃຊ້ປະໂຫຍດຈາກທ່າແຮງ ແລະຂໍ້ໄດ້ປຽບຂອງແຕ່ລະທ້ອງຖິ່ນ, ແຕ່ລະເຂດ ແລະພາກພື້ນ ໄດ້ດີຂຶ້ນ. ບັນດາເຂດເສດຖະກິດຈຸດໜັກໃຈກາງ ແລະ ຕົວເມືອງໃຫຍ່ ສືບຕໍ່ເສີມຂະຫຍາຍບົດບາດນຳພາ ໃນການພັດທະນາເສດຖະກິດ-ສັງຄົມ, ດຶງດູດການລົງທຶນແລະການປະກອບສ່ວນຢ່າງໃຫຍ່ຫຼວງ ໃຫ້ແກ່ການເຕີບໂຕເສດຖະກິດ, ການສົ່ງອອກ, ລາຍຮັບງົບປະມານແຫ່ງລັດ... ຄວາມສາມາດບົ່ມຊ້ອນແລະຂໍ້ໄດ້ປຽບຂອງທະເລ ໄດ້ຮັບການສົ່ງເສີມ, ຫຼາຍທ້ອງຖິ່ນທີ່ມີທະເລ ໄດ້ພັດທະນາຢ່າງຂະຫຍັນຂັນແຂງ ຕາມຈິດໃຈມະຕິເລກທີ 36-NQ/TW, ວັນທີ 22 ຕຸລາ 2018, ຂອງກອງປະຊຸມສູນກາງພັກຄັ້ງທີ 8 ສະໄໝທີ XII, ກ່ຽວກັບ “ຍຸດທະສາດການພັດທະນາເສດຖະກິດທະເລຫວຽດນາມ ແບບຍືນຍົງຮອດປີ 2030, ວິໄສທັດຮອດປີ 2045”. ລະບົບຕົວເມືອງເພີ່ມຂຶ້ນຢ່າງໄວວາທາງດ້ານຈຳນວນ ແລະຂະໜາກ, ກໍ່ຕັ້ງເຄືອຂ່າຍຕົວເມືອງຂຶ້ນເທື່ອລະກ້າວ, ປະກອບສ່ວນສ້າງກຳລັງແຮງຊຸກຍູ້ການເຕີບໂຕຂອງເສດຖະກິດ; ອັດຕາສ່ວນການຫັນເປັນຕົວເມືອງເພີ່ມຂຶ້ນຈາກ 30,5% ປີ 2010 ຂຶ້ນເປັນ 40% ປີ 2020, ເກີນເປົ້າໝາຍທີ່ວາງໄວ້. ການກໍ່ສ້າງຊົນນະບົດໃໝ່ປະສົບຜົນສຳເລັດທີ່ສຳຄັນຫຼາຍຢ່າງ; ໂຄງສ້າງພື້ນຖານທາງເສດຖະກິດແລະສັງຄົມໃນຊົນນະບົດ ໄດ້ຮັບການປັບປຸງຢ່າງຈະແຈ້ງ; ສະຖາບັນທາງວັດທະນະທຳໄດ້ຮັບການປັບປຸງແລະເສີມຂະຫຍາຍປະສິດທິຜົນ; ໂຄງການກໍ່ສ້າງຊົນນະບົດໃໝ່ສຳເລັດສົມບູນກ່ອນກຳນົດເກືອບ 2 ປີ; ຄາດວ່າຮອດທ້າຍປີ 2020 ປະມານ 63% ຂອງຈຳນວນຕາແສງ ໄດ້ບັນລຸມາດຕະຖານຊົນນະບົດໃໝ່, ເກີນເປົ້າໝາຍທີ່ຕັ້ງໄວ້ (50%).
ການພັດທະນາວັດທະນະທຳ, ສ້າງຄົນຫວຽດນາມ ໄດ້ບັນລຸຜົນສຳເລັດທີ່ດີ; ຄວາມປອດໄພທາງສັງຄົມໄດ້ຮັບປະກັນ; ຊີວິດການເປັນຢູ່ດ້ານວັດຖຸແລະຈິດໃຈຂອງປະຊາຊົນ ໄດ້ຮັບການປັບປຸງຢ່າງບໍ່ຢຸດຢັ້ງ. ຫວຽດນາມໄດ້ດຳເນີນນະໂຍບາຍຢ່າງດີຕໍ່ຜູ້ທີ່ມີຄຸນງາມຄວາມດີ, ການອຸປະຖຳສັງຄົມ, ການສ້າງວຽກເຮັດງານທຳ, ການຫຼຸດຜ່ອນຄວາມທຸກຍາກຢ່າງຍືນຍົງ; ອັດຕາສ່ວນຜູ້ເຂົ້າຮ່ວມການປະກັນສັງຄົມ, ປະກັນສຸຂະພາບ, ປະກັນການຫວ່າງງານ ເພີ່ມຂຶ້ນຢ່າງໄວ; ອັດຕາສ່ວນຄອບຄົວທຸກຍາກຫຼຸດລົງຕ່ຳກວ່າ 3% ໃນປີ 2020. ບັນດາຂົງເຂດການສຶກສາ, ສາທາລະນະສຸກ ບັນລຸຜົນງານທີ່ສຳຄັນຫຼາຍຢ່າງ, ໃນນັ້ນມີການຮັບປະກັນໂຄງການ ການສອນແລະຮຽນອອນໄລ ແລະ ໄດ້ປະຕິບັດເປັນຢ່າງດີວຽກງານກວດແລະປົວພະຍາດໃນສະພາບການແຜ່ລະບາດຂອງພະຍາດ. ຄຸນຄ່າວັດທະນະທຳດັ້ງເດີມທີ່ດີງາມຂອງຊາດ ໄດ້ຮັບການເຊີດຊູແລະສົ່ງເສີມ; ໃນການປ້ອງກັນແລະປາບການລະບາດຂອງໄວຣັດໂຄວິດ-19 ໄດ້ເກີດມີຄຸນຄ່າດ້ານສິນທຳໃນສັງຄົມແລະມີຫຼາຍຕົວຢ່າງກ່ຽວກັບວຽກດີຄົນເດັ່ນ ທີ່ໄດ້ຮັບການສົ່ງເສີມ. ບັນດາຂົງເຂດວຽກງານຊົນຊາດ, ສາສະໜາ, ເບິ່ງແຍງດູແລຄົນສູງອາຍຸ, ແມ່ຍິງ, ເດັກນ້ອຍ, ການກິລາກາຍະບໍລິຫາ, ວຽກງານຂໍ້ມູນຂ່າວສານແລະການສື່ສານ ໄດ້ຮັບຄວາມເອົາໃຈໃສ່. ໂຄງສ້າງພື້ນຖານທີ່ຈຳເປັນ, ໂດຍສະເພາະຢູ່ເມືອງທີ່ທຸກຍາກ ຢູ່ເຂດຊົນເຜົ່າສ່ວນນ້ອຍ ໄດ້ຮັບການເພີ່ມທະວີ. ດັດຊະນີການພັດທະນາມະນຸດ (HDI) ຂອງຫວຽດນາມ ໄດ້ຮັບການປັບປຸງຢ່າງຕໍ່ເນື່ອງ, ຢູ່ໃນກຸ່ມປະເທດທີ່ມີການພັດທະນາມະນຸດສະເຫຼ່ຍສູງໃນໂລກ. ຫວຽດນາມໄດ້ປະຕິບັດສຳເລັດຫຼາຍເປົ້າໝາຍການພັດທະນາສະຫັດສະວັດກ່ອນກຳນົດ, ຖືວ່າເປັນຈຸດທີ່ສົດໃສ ໃນຂົງເຂດການຫຼຸດຜ່ອນຄວາມທຸກຍາກ, ການຮັກສາສຸຂະພາບ, ການສຶກສາ, ແລະ ພວມສືບຕໍ່ຜັນຂະຫຍາຍແຜນການປະຕິບັດງານແຫ່ງຊາດເພື່ອການພັດທະນາແບບຍືນຍົງ ຕາມວາລະແຫ່ງສະຫະປະຊາຊາດ 2030.
ວຽກງານຄຸ້ມຄອງຊັບພະຍາກອນທຳມະຊາດ, ປົກປັກຮັກສາສິ່ງແວດລ້ອມ, ຮັບມືກັບການປ່ຽນແປງສະພາບອາກາດ ແລະ ການປ້ອງກັນ ຕ້ານໄພທຳມະຊາດ ໄດ້ຮັບຄວາມເອົາໃຈໃສ່ຫຼາຍກວ່າແຕ່ກ່ອນ. ຫວຽດນາມທັງປັບປຸງບູລະນະ, ທັງສຸມໃສ່ຜັນຂະຫຍາຍເປັນຢ່າງດີ ບັນດາກົນໄກ, ນະໂຍບາຍ, ກົດໝາຍ ກ່ຽວກັບຊັບພະຍາກອນທຳມະຊາດ, ສິ່ງແວດລ້ອມ. ບັນດາແຫຼ່ງຊັບພະຍາກອນໄດ້ຮັບການຄຸ້ມຄອງຢ່າງແໜ້ນແຟ້ນເທື່ອລະກ້າວ, ການຂຸດຄົ້ນແລະນຳໃຊ້ຊັບພະຍາກອນທຳມະຊາດ ມີປະສິດທິຜົນກວ່າເກົ່າ, ໂດຍສະເພາະແມ່ນທີ່ດິນແລະແຮ່ທາດ. ການປະເມີນຜົນກະທົບສິ່ງແວດລ້ອມແລະການປ້ອງກັນ ການຄວບຄຸມ ແລະການແກ້ໄຂມົນລະພິດ, ການປ້ອງກັນຄວາມເສື່ອມໂຊມແລະການປັບປຸງຄຸນນະພາບສິ່ງແວດລ້ອມ ມີຄວາມຄືບໜ້າ. ການອະນຸລັກທຳມະຊາດ, ຊີວະນາໆພັນ, ການປົກປັກຮັກສາ ແລະພັດທະນາປ່າໄມ້ ໄດ້ຮັບຄວາມເອົາໃຈໃສ່. ຄວາມສາມາດແລະຄຸນນະພາບຂອງການພະຍາກອນອາກາດ ແລະການເຕືອນໄພພິບັດ ໄດ້ຮັບການປັບປຸງ. ໃຫ້ບຸລິມະສິດການຈັດສັນທຶນຈາກງົບປະມານຂອງລັດ, ການລະດົມບັນດາແຫຼ່ງພະລັງສັງຄົມ ແລະສຸມໃສ່ການປະຕິບັດມາດຕະການຕ່າງໆ ເພື່ອປ້ອງກັນແລະຕ້ານໄພທຳມະຊາດ, ພາຍຸນ້ຳຖ້ວມ, ໄພແຫ້ງແຫຼ້ງ, ການແຊກຊຶມຂອງນ້ຳເຄັມ, ການຮັບມືກັບການປ່ຽນແປງສະພາບອາກາດ, ໂດຍສະເພາະໃນເຂດທີ່ໄດ້ຮັບຜົນກະທົບໜັກເຊັ່ນ: ເຂດພູດອຍພາກເໜືອ, ຝັ່ງທະເລພາກກາງ, ເຂດເນີນສູງພາກກາງ ແລະເຂດທົ່ງພຽງແມ່ນ້ຳຂອງ.
ການປະຕິຮູບດ້ານການປົກຄອງໄດ້ຮັບການເຊີດຊູ; ປະສິດທິພາບແລະປະສິດທິຜົນຂອງການຄຸ້ມຄອງລັດ ໄດ້ຮັບການຍົກສູງຂຶ້ນ. ສຸມໃສ່ປັບປຸງການຈັດຕັ້ງກົງຈັກ, ຫຼຸດຜ່ອນການບັນຈຸບຸກຄະລາກອນ ຕິດກັບການປະຕິຮູບລະບຽບການບໍລິຫານ, ໃນນັ້ນ ໄດ້ຫຼຸດຜ່ອນຫຼືຫຼຸດຄວາມສັບສົນລົງປະມານ 63% ຂອງເງື່ອນໄຂທາງທຸລະກິດ, 68% ຂອງບັນຊີລາຍຊື່ສິນຄ້າ ສຳລັບການກວດກາພິເສດໃນສົກປີ 2016 - 2020. ເພີ່ມທະວີການນຳໃຊ້ເຕັກໂນໂລຊີຂໍ້ມູນຂ່າວສານ ໃນບັນດາອົງການຂອງພັກແລະລັດ; ຍູ້ແຮງການສ້າງລັດຖະບານເອເລັກໂຕຣນິກ, ມຸ່ງໄປສູ່ລັດຖະບານດິຈິຕອນ, ພື້ນຖານເສດຖະກິດດິຈິຕອນ. ເປີດນຳໃຊ້ປະຕູບໍລິການສາທາລະນະອອນໄລແຫ່ງຊາດ. ສະພາບແວດລ້ອມການລົງທຶນທຸລະກິດ ໄດ້ຮັບການປັບປຸງໃຫ້ດີກວ່າ ປອດໂປ່ງກວ່າແຕ່ກ່ອນ, ປະກອບສ່ວນຫຼຸດຜ່ອນຄ່າໃຊ້ຈ່າຍ, ສ້າງຄວາມສະດວກເພື່ອສະໜັບສະໜູນ, ຮັບໃຊ້ປະຊາຊົນແລະວິສາຫະກິດ. ການຈັດອັນດັບສະພາບແວດລ້ອມແຫ່ງການດຳເນີນທຸລະກິດທົ່ວໂລກຂອງຫວຽດນາມ ໄດ້ຮັບການປັບປຸງດີຂຶ້ນ, ເພີ່ມຂຶ້ນຈາກອັນດັບ 88/183 ປະເທດແລະເຂດແຄວ້ນໃນປີ 2010 ມາເປັນອັນດັບ 70/190 ປະເທດແລະເຂດແຄວ້ນໃນປີ 2019. ວຽກງານການກວດກາ, ຕິດຕາມກວດກາ, ແກ້ໄຂການຮ້ອງທຸກ ຮ້ອງຟ້ອງ, ການປ້ອງກັນແລະຕ້ານການສໍ້ລາດບັງຫຼວງ ຕ້ານການໃຊ້ຈ່າຍຟຸມເຟືອຍ ໄດ້ຮັບການຍູ້ແຮງ. ຫວຽດນາມໄດ້ຄົ້ນພົບ, ແກ້ໄຂ ແລະຈັດການກັບການລະເມີດຫຼາຍຢ່າງ, ເກັບກູ້ເງິນແລະຊັບສິນເປັນຈຳນວນຫຼວງຫຼາຍມາໃຫ້ລັດ; ຈັດການລົງໂທດຢ່າງເຄັ່ງຄັດ ແລະເຜີຍແຜ່ຜົນການຈັດການຄະດີທຸຈະລິດແລະການສໍ້ລາດບັງຫຼວງທີ່ຮ້າຍແຮງຫຼາຍໆຄະດີ, ປະກອບສ່ວນປັບປຸງຄວາມໄວ້ວາງໃຈຂອງປະຊາຊົນ.
ທຸກຂັ້ນແລະທຸກຂະແໜງການໄດ້ປະຕິບັດນະໂຍບາຍການສົມທົບພັດທະນາເສດຖະກິດ-ສັງຄົມຢ່າງໃກ້ຊິດ ກັບການຮັບປະກັນການປ້ອງກັນຊາດແລະປ້ອງກັນຄວາມສະຫງົບ, ຍູ້ແຮງການພົວພັນທາງການທູດ ແລະການເຊື່ອມໂຍງສາກົນ. ປົກປັກຮັກສາເອກະລາດ, ອະທິປະໄຕ, ເອກະພາບແລະຜືນແຜ່ນດິນອັນຄົບຖ້ວນຂອງປະເທດຊາດໄວ້ຢ່າງໝັ້ນຄົງ; ຮັກສາສະຖຽນລະພາບທາງດ້ານການເມືອງ, ສະພາບແວດລ້ອມທີ່ສະຫງົບສຸກ, ຄວາມເປັນລະບຽບຮຽບຮ້ອຍແລະຄວາມປອດໄພທາງສັງຄົມ ເພື່ອສ້າງສາແລະພັດທະນາປະເທດຊາດ. ພື້ນຖານການປ້ອງກັນຊາດທົ່ວປວງຊົນ, ທ່າປ້ອງກັນຊາດທົ່ວປວງຊົນ, ທ່າປ້ອງກັນຄວາມໝັ້ນຄົງປະຊາຊົນ ນັບມື້ນັບແໜ້ນແຟ້ນຍິ່ງຂຶ້ນ; ກຳລັງແຮງສັງລວມຂອງບັນດາກຳລັງປະກອບອາວຸດໄດ້ຮັບການຍົກສູງຂຶ້ນ; ອຸດສາຫະກຳປ້ອງກັນປະເທດ, ປ້ອງກັນຄວາມໝັ້ນຄົງໄດ້ຂະຫຍາຍຕົວເທື່ອລະກ້າວ ຕາມທິດທັນສະໄໝແລະໃຊ້ໄດ້ໃນສອງເປົ້າໝາຍ. ເພື່ອສົມທົບກັບຂະແໜງສາທາລະນະສຸກ ແລະທ້ອງຖິ່ນຕ່າງໆ, ກຳລັງທະຫານແລະຕຳຫຼວດໄດ້ພ້ອມກັບທົ່ວປະເທດ ໃນການປ້ອງກັນ ຄວບຄຸມ ແລະສະກັດກັ້ນການລະບາດຂອງໄວຣັດໂຄວິດ-19. ການພົວພັນຕ່າງປະເທດແລະການເຊື່ອມໂຍງສາກົນ ໄດ້ຮັບການຜັນຂະຫຍາຍຢ່າງຕັ້ງໜ້າ ຮອບດ້ານ ຄົບຊຸດ ແລະປະສົບຄວາມສຳເລັດທີ່ສຳຄັນ. ການພົວພັນກັບບັນດາຄູ່ຮ່ວມມືໄດ້ຮັບການເປີດກວ້າງ, ເຂົ້າສູ່ລວງເລິກ ແທດຈິງ ແລະມີປະສິດທິຜົນ ກວ່າເກົ່າ, ໃນນັ້ນມີ 17 ຄູ່ຮ່ວມມືຍຸດທະສາດ ແລະ 13 ຄູ່ຮ່ວມມືຮອບດ້ານ; ໄດ້ລົງນາມແລະຜັນຂະຫຍາຍສັນຍາການຄ້າເສລີ (FTA) ຫຼາຍສະບັບຢ່າງມີປະສິດທິຜົນ, ໃນນັ້ນມີ ສັນຍາຄູ່ຮ່ວມມືຮອບດ້ານແລະກ້າວໝ້າຂ້າມປາຊີຟິກ (CPTPP) ແລະ ສັນຍາການຄ້າເສລີຫວຽດນາມ - ສະຫະພາບເອີຣົບ (EVFTA), ປະກອບສ່ວນທີ່ສຳຄັນ ເຂົ້າໃນການເປີດກວ້າງຄວາມຫຼາກຫຼາຍທາງຕະຫຼາດ ແລະດຶງດູດແຫຼ່ງພະລັງຕ່າງໆ ໃຫ້ແກ່ການພັດທະນາປະເທດ. ຫວຽດນາມໄດ້ປະສົບຜົນສຳເລັດ ໃນການດຳລົງຕຳແໜ່ງທີ່ສຳຄັນຫຼາຍຕຳແໜ່ງ ໃນບັນດາເວທີປາໄສແລະອົງການຈັດຕັ້ງສາກົນເຊັ່ນ: ປະທານອາຊຽນ, ປະທານສະຫະພັນສະມາຊິກສະພາແຫ່ງອາຊຽນ (AIPA), ສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ...; ພ້ອມກັນນັ້ນ ກໍ່ປະຕິບັດວຽກງານຂໍ້ມູນຂ່າວສານກັບຕ່າງປະເທດ ແລະການປົກປ້ອງພົນລະເມືອງເປັນຢ່າງດີ; ເປັນເຈົ້າການໃນການສະໜັບສະໜູນແລະຮ່ວມມືສາກົນ ໃນການປ້ອງກັນແລະປາບການລະບາດຂອງໄວຣັດໂຄວິດ-19. ຊື່ສຽງແລະຖານະບົດບາດຂອງຫວຽດນາມໃນເວທີສາກົນ ສືບຕໍ່ໄດ້ຮັບການຢັ້ງຢືນແລະຍົກສູງ.
II
ຄຽງຄູ່ກັບຜົນທີ່ໄດ້ຮັບນັ້ນ, ຫວຽດນາມກໍ່ຍອມຮັບຢ່າງເປີດເຜີຍວ່າ ຂະບວນການປະຕິບັດຍຸດທະສາດການພັດທະນາເສດຖະກິດແລະສັງຄົມ 2011-2020 ຍັງມີຂໍ້ຈຳກັດ, ຂໍ້ບົກພ່ອງ ແລະມີຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ. ອັດຕາການເຕີບໂຕທາງເສດຖະກິດ ບໍ່ບັນລຸໄດ້ຄາດໝາຍທີ່ວາງໄວ້ ຍ້ອນປີ 2020 ພື້ນຖານເສດຖະກິດຖືກຜົນກະທົບຈາກການແຜ່ລະບາດຂອງໄວຣັດໂຄວິດ-19; ຄວາມຕ້ານທານຂອງພື້ນຖານເສດຖະກິດ ບໍ່ຄ່ອຍເຂັ້ມແຂງ. ຄຸນນະພາບການເຕີບໂຕໄດ້ຮັບການປັບປຸງຢ່າງຊັກຊ້າ, ທ່າແຮງແລະຂໍ້ໄດ້ປຽບໃນການພັດທະນາ ຍັງບໍ່ໄດ້ຮັບການໃຊ້ປະໂຫຍດຢ່າງເຕັມທີ່. ການສ້າງໂຄງປະກອບຄືນໃໝ່ຂອງບາງຂະແໜງການແລະຂົງເຂດ ຍັງບໍ່ທັນໄດ້ຕາມຄວາມຕ້ອງການ; ປະສິດທິຜົນການເຄື່ອນໄຫວແລະລະດັບຄວາມພ້ອມໃນການເຊື່ອມໂຍງຂອງວິສາຫະກິດຫຼາຍແຫ່ງ ຍັງຢູ່ໃນລະດັບຕໍ່າ; ຂະໜາດຂອງເສດຖະກິດລວມໝູ່, ສະຫະກອນຍັງນ້ອຍ, ຄວາມສາມາດບໍ່ສູງ. ການປະຕິບັດຂໍ້ບຸກທະລຸຍຸດທະສາດຍັງຊ້າ; ການສ້າງຮາກຖານໃຫ້ຫວຽດນາມໂດຍພື້ນຖານຈະກາຍເປັນປະເທດອຸດສາຫະກຳທີ່ທັນສະໄໝ ພາຍໃນປີ 2020 ຍັງບໍ່ທັນບັນລຸເປົ້າໝາຍທີ່ວາງໄວ້. ກົນໄກ, ນະໂຍບາຍ, ຂໍ້ກຳນົດກົດໝາຍຈຳນວນໜຶ່ງ ຍັງທັບຊ້ອນກັນ, ບໍ່ໝັກແໝ້ນ, ບໍ່ໝັ້ນຄົງ; ການບັງຄັບໃຊ້ກົດໝາຍບໍ່ເຂັ້ມງວດ. ວຽກງານປະຕິຮູບການບໍລິຫານໃນບາງຂົງເຂດ ຍັງບໍ່ທັນສຳເລັດຜົນເທື່ອ; ຍັງມີການຖິ້ມໃຫ້ຜູ້ອື່ນຮັບພາລະ. ຄຸນນະພາບຂອງຊັບພະຍາກອນມະນຸດ, ໂດຍສະເພາະ ບຸກຄະລາກອນຄຸນນະພາບສູງ ຍັງບໍ່ທັນຕອບສະໜອງໄດ້ກັບຄວາມຕ້ອງການຂອງການພັດທະນາ. ລະດັບວິທະຍາສາດແລະເຕັກໂນໂລຊີ ໂດຍທົ່ວໄປຍັງຫ່າງໄກຈາກກຸ່ມປະເທດນຳໜ້າໃນພາກພື້ນແລະໃນໂລກ. ຄວາມສາມາດຮັບເອົາ ແລະ ປ່ຽນແປງໃໝ່ວິທະຍາສາດເຕັກໂນໂລຊີ, ປ່ຽນແປງໃໝ່ປະດິດສ້າງ ຍັງຖືກຈຳກັດ. ລະບົບໂຄງສ້າງພື້ນຖານຍັງບໍ່ມີຄວາມຄົບຊຸດ, ທັນສະໄໝ; ໂຄງການສຳຄັນບາງໂຄງການຫຼ້າຊ້າກວ່າ ກຳນົດ. ຂາດກົນໄກ, ນະໂຍບາຍທີ່ເໝາະສົມເພື່ອພັດທະນາເສດຖະກິດຕາມພາກພື້ນ ເສດຖະກິດທະເລຢ່າງແຂງແຮງແລະປະສານການເຊື່ອມໂຍງພາກພື້ນຢ່າງມີປະສິດທິຜົນ. ຄຸນນະພາບການພັດທະນາຕົວເມືອງບໍ່ທັນສູງ, ລະບົບໂຄງສ້າງພື້ນຖານຂາດຄວາມຄົບຊຸດ, ການຄຸ້ມຄອງການພັດທະນາຕົວເມືອງຍັງມີຂໍ້ບົກພ່ອງ.
ການປະຕິບັດບັນດາເປົ້າໝາຍການພັດທະນາວັດທະນະທຳ ສັງຄົມ ແລະຜູ້ຄົນຍັງມີຂໍ້ຈຳກັດບາງປະການ. ສະພາບແວດລ້ອມທາງວັດທະນະທຳໃນບາງສະຖານທີ່ຍັງສັບສົນ, ໂດຍມີປະກົດການຫຍໍ້ທໍ້, ມີຄວາມເສື່ອມໂຊມໃນສິນທຳແລະວິຖີຊີວິດ. ຄຸນນະພາບຂອງບໍລິການທາງການແພດ ໂດຍສະເພາະໃນຂັ້ນຮາກຖານແມ່ນຍັງຕໍ່າ. ຜົນຂອງການຫຼຸດຜ່ອນຄວາມທຸກຍາກຫຼາຍມິຕິຍັງບໍ່ທັນໝັ້ນຄົງ, ຄວາມສ່ຽງທີ່ຈະກັບມາສູ່ຄວາມທຸກຍາກຍັງສູງ. ຊ່ອງຫວ່າງການພັດທະນາລະຫວ່າງເຂດ, ພາກພື້ນຍັງມີຫຼາຍ; ອັດຕາສ່ວນຄອບຄົວທຸກຍາກ ແລະໃກ້ຈະທຸກຍາດ ຢູ່ເຂດຫ່າງໄກສອກຫຼີກ, ເຂດຊົນເຜົ່າສ່ວນນ້ອຍ ຍັງສູງ. ຄວາມຊົ່ວຮ້າຍສັງຄົມມີຄວາມສັບສົນໃນບາງສະຖານທີ່. ການຄຸ້ມຄອງຊັບພະຍາກອນ, ການປົກປ້ອງສິ່ງແວດລ້ອມ ແລະ ການຮັບມືກັບການປ່ຽນແປງສະພາບອາກາດຍັງມີຂໍ້ບົກພ່ອງ; ການຂຸດຄົ້ນຊັບພະຍາກອນທຳມະຊາດໃນບາງບ່ອນ ຍັງບໍ່ທັນຍືນຍົງແລະປະສິດທິຜົນກໍ່ບໍ່ສູງ; ຄຸນນະພາບຂອງສິ່ງແວດລ້ອມໃນຫຼາຍສະຖານທີ່ໄດ້ຊຸດໂຊມລົງ; ມົນລະພິດທາງອາກາດໃນຫຼາຍເມືອງໃຫຍ່ກຳລັງເພີ່ມຂຶ້ນ.
ປະສິດທິພາບແລະປະສິດທິຜົນຂອງການຄຸ້ມຄອງລັດໃນບາງຂົງເຂດ ໄດ້ຮັບການປັບປຸງຢ່າງຫຼ້າຊ້າ. ການຈັດວາງແລະປັບປຸງກົງຈັກ ແລະການຫຼຸດຈຳນວນບຸກຄະລາກອນ ຍັງມີຄວາມຫຍຸ້ງຍາກ, ສິ່ງທີ່ຄ້າງຄາ ແລະ ຄວາມບໍ່ສອດຄ່ອງຈຳນວນໜຶ່ງ. ຄວາມສາມາດ, ຄຸນນະພາບ ແລະສະຕິວິໄນ ຂອງພະນັກງານ, ລັດຖະກອນ ແລະພາລະກອນສ່ວນໜຶ່ງ ຍັງບໍ່ທັນຕອບສະໜອງໄດ້ກັບຄວາມຕ້ອງການ. ກົນໄກແບ່ງຂັ້ນຄຸ້ມຄອງເສດຖະກິດ-ສັງຄົມໃນປະຈຸບັນ ບໍ່ແທດເໝາະ, ໂດຍສະເພາະກ່ຽວກັບງົບປະມານຂອງລັດ, ການລົງທືນ, ການຄຸ້ມຄອງຊັບພະຍາກອນ, ເຂດຕົວເມືອງ, ຊັບສິນສາທາລະນະ... ການປະຕິບັດກົນໄກເປັນເຈົ້າຕົນເອງຂອງໜ່ວຍບໍລິການສາທາລະນະຍັງຊ້າ. ການເຄື່ອນໄຫວກວດກາ, ຕິດຕາມກວດກາ, ກວດສອບຢູ່ບາງແຫ່ງ ຍັງທັບຊ້ອນກັນ; ການຕິດຕາມກວດກາ, ການວິຈານສັງຄົມ ໃນການສ້າງແລະບັງຄັບໃຊ້ກົດໝາຍ, ນະໂຍບາຍມີປະສິດທິຜົນຕ່ຳ. ການສໍ້ລາດບັງຫຼວງ, ການໃຊ້ຈ່າຍຟຸມເຟືອຍຢູ່ບາງບ່ອນຍັງຮ້າຍແຮງຫຼາຍ.
ການເຊື່ອມໂຍງລະຫວ່າງການພັດທະນາເສດຖະກິດ-ສັງຄົມ ກັບການປ້ອງກັນປະເທດແລະການຮັບປະກັນຄວາມໝັ້ນຄົງ ໃນບາງຄັ້ງ, ບາງແຫ່ງ ອາດຈະບໍ່ແໜ້ນແຟ້ນ, ບໍ່ມີປະສິດທິຜົນ. ສະພາບການຮັກສາຄວາມປອດໄພແລະຄວາມສະຫງົບຮຽບຮ້ອຍໃນບາງຂົງເຂດ, ບາງພື້ນທີ່ ບໍ່ໝັ້ນຄົງແທ້ເທື່ອ; ການຈັດການກັບສະຖານະການສັບສົນທີ່ເກີດຂຶ້ນໃນບາງພື້ນທີ່ບາງຄັ້ງ ຍັງງຸ່ມງ່າມ. ຍັງມີອຸບັດຕິເຫດຈະລາຈອນ, ໄຟໄໝ້ ແລະການລະເບີດທີ່ຮ້າຍແຮງຫຼາຍຄັ້ງ. ວຽກງານການຮັບປະກັນຄວາມປອດໄພດ້ານຂໍ້ມູນ, ຄວາມປອດໄພຂອງເຄືອຂ່າຍ ແມ່ນຍັງບໍ່ພຽງພໍ ແລະມີຄວາມຫຍຸ້ງຍາກ. ການພົວພັນການຕ່າງປະເທດຍັງມີຂໍ້ຈຳກັດ, ຍັງບໍ່ທັນຂຸດຄົ້ນແລະເສີມຂະຫຍາຍ ການພົວພັນທີ່ເຊື່ອມໂຍງແລະໝັ້ນຄົງທາງຜົນປະໂຫຍດ ກັບຄູ່ຮ່ວມມືທີ່ສຳຄັນ ຢ່າງມີປະສິດທິຜົນ. ການປະຕິບັດບັນດາຂໍ້ຕົກລົງ, ຄຳໝັ້ນສັນຍາສາກົນ ແລະສັນຍາການຄ້າເສລີ ບໍ່ມີປະສິດທິຜົນ; ຄວາມສາມາດເຊື່ອມໂຍງສາກົນຂອງວິສາຫະກິດເຖິງວ່າໄດ້ຮັບການຍົກສູງຂຶ້ນກ້າວໜຶ່ງ ແຕ່ຍັງມີຂໍ້ຈຳກັດແລະອ່ອນແອຢູ່.
ບັນດາຂໍ້ຈຳກັດ, ຂໍ້ບົກພ່ອງ, ຄວາມຫຍຸ້ງຍາກທີ່ກ່າວມາຂ້າງເທິງ ມີສາເຫດພາວະວິໄສແລະອັດຕະວິໄສຫຼາຍຢ່າງ, ໃນນັ້ນສາເຫດຕົ້ນຕໍ່ແມ່ນອັດຕະວິໄສ. ການກຳນົດນະໂຍບາຍໃນການສ້າງແລະປັບປຸງບູລະນະ ລະບຽບກົດໝາຍເສດຖະກິດຕະຫຼາດກຳນົດທິດສັງຄົມນິຍົມ ບາງຄັ້ງບາງແຫ່ງບໍ່ໄດ້ເລິກເຊິ່ງ ບໍ່ເປັນເອກະພາບ, ຍັງບໍ່ທັນຕອບສະໜອງໄດ້ກັບຄວາມຮຽກຮ້ອງຕ້ອງການຂອງການເຊື່ອມໂຍງເຂົ້າກັບສະພາບຂອງການໂລກາພິວັດ ແລະການແຂ່ງຂັນສາກົນທີ່ຮຸນແຮງໃນປະຈຸບັນ. ຂໍ້ບົກພ່ອງບາງປະການໃນກົນໄກ ນະໂຍບາຍແລະກົດໝາຍ ຍັງບໍ່ໄດ້ຮັບການປັບປຸງຢ່າງທັນການ. ຄວາມເຄົາລົບກົດໝາຍ, ລະບຽບວິໄນໃນຫຼາຍໆແຫ່ງບໍ່ເຂັ້ມງວດ. ແບບວິທີການຄຸ້ມຄອງແລະປະເມີນພະນັກງານຍັງບໍ່ພຽງພໍ, ບໍ່ມີກົນໄກທີ່ເໝາະສົມແລະມີປະສິດທິຜົນ ເພື່ອຈັດການກັບກໍລະນີລະເມີດກົດໝາຍແລະບໍ່ສຳເລັດໜ້າທີ່. ວຽກງານການກວດກາ, ຕິດຕາມກວດກາ ແລະຊຸກຍູ້ການປະຕິບັດໜ້າທີ່ການງານໃນບາງອົງການ, ໜ່ວຍງານຍັງບໍ່ເຂັ້ມງວດ. ແບບວິທີການນຳພາຄຸ້ມຄອງເສດຖະກິດ-ສັງຄົມຢູ່ຫຼາຍແຫ່ງ, ຫຼາຍຂົງເຂດບໍ່ເໝາະສົມແທ້ໆ, ປະສິດທິພາບແລະປະສິດທິຜົນບໍ່ສູງ. ການຈັດຕັ້ງປະຕິບັດບັນດາກົນໄກ, ນະໂຍບາຍ, ວິທີແກ້ໄຂໃນບາງຂົງເຂດ ຍັງບໍ່ທັນຄົບຊຸດ, ເຂັ້ມງວດ. ການປະສານງານພາຍໃນ ແລະລະຫວ່າງບັນດາຂັ້ນ ຂະແໜງການ, ລະຫວ່າງບັນດາອົງການຄຸ້ມຄອງລັດ ໃນຫຼາຍກໍລະນີຍັງຂາດຄວາມເຂັ້ມງວດ, ປະສິດທິຜົນບໍ່ສູງ; ຍັງມີສະພາບການຖິ້ມວຽກ ຫຼີກລ່ຽງຄວາມຮັບຜິດຊອບ.
ຜ່ານພຶດຕິກຳ 10 ປີແຫ່ງການປະຕິບັດຍຸດທະສາດການພັດທະນາເສດຖະກິດ-ສັງຄົມ 2011 - 2020, ພວກເຮົາສາມາດຖອດຖອນບົດຮຽນທີ່ສຳຄັນຈຳນວນໜຶ່ງດັ່ງນີ້:
ທີໜຶ່ງ, ຈຳເປັນຕ້ອງຮັບປະກັນສາຍພົວພັນທີ່ສົມເຫດສົມຜົນ ແລະກົມກຽວລະຫວ່າງການເຕີບໂຕແລະສະຖຽນລະພາບ ໃນການພັດທະນາເສດຖະກິດ-ສັງຄົມ. ພວກເຮົາຕ້ອງສົ່ງເສີມການເຕີບໂຕຢ່າງແຂງແຮງ ບົນພື້ນຖານຮັກສາສະຖຽນລະພາບມະຫາພາກ ແລະເອົາຊະນະຄວາມສ່ຽງທີ່ຈະຖືກຖອຍຫຼັງ. ແກ້ໄຂການພົວພັນລະຫວ່າງການເຕີບໂຕຢ່າງໄວວາ ແລະການພັດທະນາແບບຍືນຍົງ; ລະຫວ່າງເສດຖະກິດຕະຫຼາດແລະການກຳນົດທິດສັງຄົມນິຍົມ; ລະຫວ່າງເອກະລາດ ການເປັນເຈົ້າຕົນເອງ ແລະການເຊື່ອມໂຍງສາກົນ...
ທີສອງ, ຕ້ອງໃຫ້ຄວາມສຳຄັນຢ່າງແທ້ຈິງຕໍ່ການພັດທະນາວັດທະນະທຳ, ສັງຄົມ ແລະຜູ້ຄົນ, ຮັບປະກັນຄວາມເໝາະສົມກັບການພັດທະນາເສດຖະກິດ, ເອົາໃຈໃສ່ຍົກສູງຄຸນນະພາບຊີວິດຂອງປະຊາຊົນ. ຕ້ອງຖືວ່າ ການສຶກສາ ຝຶກອົບຮົມ, ວິທະຍາສາດ-ເຕັກໂນໂລຊີ ແລະການປ່ຽນແປງໃໝ່ປະດິດສ້າງ ແມ່ນຮາກຖານສຳຄັນ ແລະແມ່ນກຳລັງຜັດດັນຕົ້ນຕໍ່ ສຳລັບການພັດທະນາປະເທດ. ສຸມໃສ່ເສີມຂະຫຍາຍຄຸນຄ່າວັດທະນະທຳ, ພູມປັນຍາ ແລະກຳລັງແຮງປະດິດສ້າງຂອງຄົນຫວຽດນາມ. ຈາກຄວາມເປັນຈິງແຫ່ງການປ້ອງກັນແລະປາບການລະບາດຂອງໄວຣັດໂຄວິດ-19 ໃຫ້ເຫັນວ່າ, ຖ້າຢາກປະສົບຜົນສຳເລັດ ແມ່ນຕ້ອງປຸກຈິດໃຈສາມັກຄີ, ນ້ຳໃຈເມດຕາ, ກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ ຂອງປະຊາຊົນທົ່ວປະເທດ ຂອງຊຸມຊົນວິສາຫະກິດ, ຮ່ວມແຮງຮ່ວມໃຈກັນປະຕິບັດ, ຮັບປະກັນຄວາມປອດໄພທາງສັງຄົມ, ກໍ່ສ້າງ ແລະເສີມຂະຫຍາຍທ່າສະໜາມໃນໃຈຂອງປະຊາຊົນ, ຄວາມໝັ້ນຄົງປະຊາຊົນ, ການປ້ອງກັນປະເທດທົ່ວປວງຊົນ ແລະບັນດາຄຸນຄ່າວັດທະນະທຳ ຂອງປະເທດຊາດຫວຽດນາມ ຂອງພວກເຮົາ.
ທີສາມ, ຕ້ອງເອົາໃຈໃສ່ເຖິງຜົນປະໂຫຍດຂອງຊາດກ່ອນ, ສອດຄ່ອງກັບການປະຕິບັດສາກົນ ແລະທ່າອຽງຂອງຍຸກສະໄໝ; ໃນການນຳພາ, ຄຸ້ມຄອງ, ຊີ້ນຳ, ບໍລິຫານ ຕ້ອງກຳແໜ້ນແຜນນະໂຍບາຍ, ແນວທາງຂອງພັກ, ສະແດງອອກໃຫ້ເຫັນເຖິງຄວາມກ້າຫານ, ພູມປັນຍາ, ຄວາມຂະຫຍັນຂັນເຄື່ອນ, ຄວາມປະດິດສ້າງ ດ້ວຍຄວາມຕັດສິນໃຈການເມືອງສູງ ແລະການປະຕິບັດຢ່າງເດັດຂາດ. ສະຖາບັນທາງກົດໝາຍຈຳເປັນຕ້ອງໄດ້ຮັບການກໍ່ສ້າງຢ່າງຄົບຖ້ວນ ຄົບຊຸດ ດ້ວຍຈິນຕະນາການໃໝ່, ສອດຄ່ອງກັບຄວາມເປັນຈິງ ແລະ ການຈັດຕັ້ງປະຕິບັດຢ່າງເຂັ້ມງວດແລະມີປະສິດທິຜົນ. ດຳເນີນການປ່ຽນແປງໃໝ່ຢ່າງບໍ່ຢຸດຢັ້ງ, ໃນນັ້ນຕ້ອງປ່ຽນແປງໃໝ່ການບໍລິຫານປະເທດຕາມທິດທັນສະໄໝ, ໂດຍສະເພາະ ການຄຸ້ມຄອງການພັດທະນາ ແລະການຄຸ້ມຄອງສັງຄົມ. ສຸມໃສ່ປະຕິຮູບການຈັດຕັ້ງກົງຈັກບໍລິຫານລັດ ໃຫ້ມີຄວາມກະທັດລັດ ມີປະສິດທິພາບແລະປະສິດທິຜົນ; ເອົາຜົນການບໍລິການຮັບໃຊ້ ແລະຄວາມເພິ່ງພໍໃຈ ຂອງປະຊາຊົນແລະວິສາຫະກິດ ເປັນມາດຖານການປະເມີນຜົນ. ເສີມຂະຫຍາຍບົດບາດເປັນເຈົ້າຂອງ, ຈິດໃຈຮັບຜິດຊອບ, ກຳລັງແຮງປະດິດສ້າງແລະຊັບພະຍາກອນທັງໝົດຂອງປະຊາຊົນ.
ທີສີ່, ຕ້ອງປະຕິບັດວຽກງານການພະຍາກອນ ວິເຄາະ ແລະປະເມີນຜົນໃຫ້ດີ ແລະ ພິນິດໄສສະພາບການໂລກແລະພາກພື້ນຢ່າງຖືກຕ້ອງ, ຄົບຖ້ວນ ແລະທັນການ,ໂດຍສະເພາະ ບັນດາການປ່ຽນແປງໃຫຍ່ທີ່ສົ່ງຜົນສະທ້ອນໂດຍກົງ ເຖິງຫວຽດນາມ ເພື່ອມີການຕັດສິນນະໂຍບາຍ ແລະການກະທຳຢ່າງວ່ອງໄວ ເດັດຂາດ ເໝາະສົມ; ຈັດການເປັນຢ່າງດີກັບການພົວພັນລະຫວ່າງການເປັນເຈົ້າການເຊື່ອມໂຍງສາກົນທີ່ກົມກຽວ ກັບການປ່ຽນແປງໃໝ່ໃນປະເທດ, ເສີມຂະຫຍາຍສຸດຂີດ ແລະປະສົມປະສານບັນດາແຫຼ່ງພະລັງ ໃນປະເທດແລະຕ່າງປະເທດ ຢ່າງແໜ້ນແຟ້ນແລະມີປະສິດທິຜົນ, ໃນນັ້ນແຫຼ່ງພະລັງພາຍໃນປະເທດເປັນສິ່ງຕັດສິນຊີ້ຂາດ.
ທີຫ້າ, ຕ້ອງຮັກສາສະຖຽນລະພາບດ້ານການເມືອງແລະຄວາມໝັ້ນຄົງຂອງປະເທດ, ຮັບປະກັນຄວາມປອດໄພ ຄວາມເປັນລະບຽບຮຽບຮ້ອຍທາງສັງຄົມ, ປົກປັກຮັກສາເອກະລາດ ອຳນາດອະທິປະໄຕຂອງຊາດໄວ້ຢ່າງໝັ້ນຄົງ, ຮັກສາສະພາບແວດລ້ອມສັນຕິພາບ ສະຖຽນລະພາບ, ສ້າງເງື່ອນໄຂອຳນວຍຄວາມສະດວກໃຫ້ປະເທດພັດທະນາຢ່າງວ່ອງໄວແລະຍືນຍົງ, ແລະສ້າງພື້ນຖານເສດຖະກິດທີ່ເປັນເອກະລາດ ເປັນເຈົ້າຕົນເອງ, ມີຄວາມສາມາດປັບຕົວ ແລະທົນທານ ຮັບມືກັບການກະທົບຈາກພາຍນອກ.
ເບິ່ງຄືນຫຼັງ 10 ປີແຫ່ງການປະຕິບັດຍຸດທະສາດການພັດທະນາ 2011-2020, ໃນສະພາບການທີ່ມີຄວາມຫຍຸ້ງຍາກ ສິ່ງທ້າທາຍຫຼາຍຢ່າງ, ໂດຍສະເພາະແມ່ນການກະທົບທີ່ຮ້າຍແຮງ ຈາກການແຜ່ລະບາດຂອງໄວຣັດໂຄວິດ-19 ໃນປີ 2020, ເຖິງວ່າ ຍັງມີຂໍ້ບົກພ່ອງ ຂໍ້ຈຳກັດກໍ່ຕາມ, ແຕ່ເບິ່ງລວມແລ້ວ ຫວຽດນາມບັນລຸໄດ້ຈຸດ ໝາຍລວມ ແລະ ຫຼາຍຄາດໝາຍ, ໜ້າທີ່ສຳຄັນທີ່ວາງໄວ້. ເສດຖະກິດມະຫາພາກມີສະຖຽນລະພາບຫຼາຍກວ່າເກົ່າ; ເສດຖະກິດຮັກສາທ່າເຕີບໂຕທີ່ດີ; ຊີວິດຂອງປະຊາຊົນໄດ້ຮັບການປັບປຸງ; ບັນດາຂົງເຂດວັດທະນະທຳ ສັງຄົມ ສິ່ງແວດລ້ອມ ການປ້ອງກັນປະເທດ ປ້ອງກັນຄວາມໝັ້ນຄົງ ແລະ ການຕ່າງປະເທດ ບັນລຸຜົນສຳເລັດທີ່ສຳຄັນຫຼາຍຢ່າງ. ຜົນສຳເລັດນີ້ສະແດງໃຫ້ເຫັນຄວາມພະຍາຍາມອັນໃຫຍ່ຫລວງ ຂອງພັກກອມມູນິດຫວຽດນາມ, ປະຊາຊົນຫວຽດນາມພາຍໃຕ້ການນຳພາ ຊີ້ນຳທີ່ຖືກຕ້ອງ ໃກ້ຊິດ ເດັດດ່ຽວ ຂອງຜູ້ນຳຂອງພັກ ລັດ, ຂອງບັນດາຂັ້ນ ຂະແໜງການ ແລະ ຄວາມເຫັນດີເຫັນພ້ອມ, ຄວາມສາມັກຄີ ຮ່ວມແຮງຮ່ວມໃຈ ແລະຄວາມຕັດສິນໃຈສູງ ຂອງລະບົບການເມືອງ, ຊຸມຊົນທຸລະກິດ ແລະປະຊາຊົນທົ່ວປະເທດ; ປະກອບສ່ວນປັບປຸງຄວາມໄວ້ວາງໃຈ ແລະສ້າງບັນຍາກາດເບີກບານມ່ວນຊື່ນໃນທົ່ວສັງຄົມ. ປະເທດຫວຽດນາມບໍ່ເຄີຍມີໂອກາດພາລະກິດ, ກຳລັງຄວາມສາມາດທີ່ບົ່ມຊ້ອນ, ຖານະຕຳແໜ່ງ ແລະກຽດສັກສີສາກົນຄືປະຈຸບັນ, ດັ່ງທີ່ເລຂາທິການໃຫຍ່, ປະທານປະເທດສາທາລະນະລັດສັງຄົມນິຍົມຫວຽດນາມ ຫງວຽນຝູຈ້ອງ ໃຫ້ຄວາມເຫັນ.
ສຳລັບສ່ວນທີ່ເຫຼືອຂອງປີ 2020 ເຊິ່ງເປັນປີສຸດທ້າຍຂອງວາລະ, ບັນດາຂັ້ນ ບັນດາຂະແໜງການພ້ອມກັບປະຊາຊົນທົ່ວປະເທດ ຕ້ອງສືບຕໍ່ເປັນເຈົ້າການໃນການປ່ຽນແປງໃໝ່ວິທີການເຮັດວຽກ, ຍົກສູງຄວາມສາມາດ, ຍາດແຍ່ງໂອກາດ, ລົງມືກະທຳຢ່າງເດັດຂາດ, ເສີມຂະຫຍາຍຈິດໃຈສາມັກຄີ, ສະແດງອອກເຖິງຄວາມກ້າຫານແລະພູມປັນຍາຫວຽດນາມ, ຜັນຂະຫຍາຍບັນດາໜ້າທີ່ ວິທີການປະຕິບັດ “ເປົ້າໝາຍຄູ່” ທີ່ໄດ້ວາງໄວ້ຢ່າງຄົບຊຸດແລະມີປະສິດທິຜົນ ຕາມບັນດາມະຕິ ການຊີ້ນຳຂອງພັກກອມມູນິດຫວຽດນາມ, ສະພາແຫ່ງຊາດຫວຽດນາມ, ລັດຖະບານຫວຽດນາມ, ນາຍົກລັດຖະມົນຕີແຫ່ງ ສສ ຫວຽດນາມ. ສຸມໃສ່ແກ້ໄຂຄວາມຫຍຸ້ງຍາກໃຫ້ແກ່ການຜະລິດແລະທຸລະກິດ, ຍູ້ແຮງການເບີກຈ່າຍເງິນລົງທຶນພາກລັດ, ກະຕູ້ນຄວາມຕ້ອງການການບໍລິໂພກທີ່ເໝາະສົມ, ສົ່ງເສີມການສົ່ງອອກບົນພື້ນຖານຂອງການຮັກສາສະຖຽນລະພາບເສດຖະກິດມະຫາພາກ, ຄວບຄຸມໄພເງິນເຟີ້, ຮັບປະກັນຄວາມດຸ່ນດ່ຽງທີ່ດີຂອງພື້ນຖານເສດຖະກິດ. ພ້ອມກັນນັ້ນ, ຫວຽດນາມຈະບໍ່ເປັນອັດຕະວິໄສຢ່າງເດັດຂາດ, ຈະດຳນີນມາດຕະການຢ່າງເຄັ່ງຄັດແລະມີປະສິດທິຜົນ ໃນການປ້ອງກັນແລະປາບການລະບາດຂອງໄວຣັດໂຄວິດ-19 ແລະບັນດານະໂຍບາຍສະໜັບສະໜູນວິສາຫະກິດ, ຜູ້ອອກແຮງງານ ແລະປະຊາຊົນທີ່ປະສົບຄວາມຫຍຸ້ງຍາກ; ສູ້ຊົນຢ່າງແຮງເພື່ອບັນລຸເປົ້າໝາຍ ແລະໜ້າທີ່ການພັດທະນາເສດຖະກິດ-ສັງຄົມປີ 2020 ແລະ ຍຸດທະສາດການພັດທະນາເສດຖະກິດ-ສັງຄົມ 2011 - 2020, ສ້າງຜົນງານຕົວຈິງເພື່ອຊົມເຊີຍກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 13 ຂອງພັກກອມມູນິດຫວຽດນາມ.
III
ໃນໄລຍະເວລາຕໍ່ໄປ, ສັນຕິພາບ ການຮ່ວມມື ການເຊື່ອມໂຍງ ແລະການພັດທະນາ ຍັງຄົງແມ່ນທ່າອຽງທີ່ສຳຄັນໃນໂລກ ແຕ່ກໍ່ປະເຊີນໜ້າກັບອຸປະສັກແລະຄວາມຫຍຸ້ງຍາກຫຼາຍຢ່າງ; ການແຂ່ງຂັນຍຸດທະສາດລະຫວ່າງບັນດາປະເທດ, ບັນດາຄູ່ຮ່ວມມືໃຫຍ່ໃນທົ່ວໂລກ ແລະໃນພາກພື້ນທີ່ສັບສົນແລະຮຸນແຮງຫຼາຍ. ໂລກາພິວັດແລະການເຊື່ອມໂຍງລະຫວ່າງປະເທດ ສືບຕໍ່ມີຄວາມຄືບໜ້າ ແຕ່ກໍ່ປະສົບອຸປະສັກແລະສິ່ງທ້າທາຍຫຼາຍຢ່າງ; ການດັດປັບນະໂຍບາຍແລະການພົວພັນຕ່າງປະເທດຂອງບັນດາປະເທດໃຫຍ່ໃນພາກພື້ນແລະໃນໂລກນັ້ນ ຄາດເດົາບໍ່ໄດ້. ພິເສດ, ຄາດວ່າການແຜ່ລະບາດຂອງໄວຣັດໂຄວິດ-19 ຈະສືບຕໍ່ສັບສົນແລະຍາກທີ່ຈະຄວບຄຸມໄດ້, ສົ່ງຜົນກະທົບຢ່າງຮຸນແຮງໃນຫຼາຍຂົງເຂດ, ເຮັດໃຫ້ເສດຖະກິດໂລກທົດຖອຍຢ່າງຮ້າຍແຮງ ແລະມີທ່າອຽງວ່າຈະແກ່ຍາວໄປສູ່ຊຸມປີຕົ້ນຂອງຍຸກຍຸດທະສາດໃໝ່ ເຊິ່ງນຳໄປສູ່ການປ່ຽນແປງຢ່າງເລິກເຊິ່ງໃນລະບຽບແລະໂຄງສ້າງເສດຖະກິດ, ແບບວິທີການການບໍລິຫານໂລກ, ວິທີການເຄື່ອນໄຫວເສດຖະກິດ ແລະການຈັດຕັ້ງຊີວິດສັງຄົມໃນໂລກ. ການພັດທະນາເສດຖະກິດດິຈິຕອນ, ເສດຖະກິດໝູນວຽນ, ການເຕີບໂຕສີຂຽວ ບົນພື້ນຖານວິທະຍາສາດ ເຕັກໂນໂລຊີ, ການປ່ຽນແປງໃໝ່ປະດິດສ້າງ ແລະການປະຕິວັດອຸດສາຫະກຳຄັ້ງທີສີ່ນັ້ນ ກຳລັງເກີດຂຶ້ນຢ່າງໄວວາທີ່ສຸດ ແລະສົ່ງຜົນກະທົບຢ່າງກວ້າງຂວາງເລິກເຊິ່ງ, ຫຼາຍດ້ານໃນຂອບເຂດທົ່ວໂລກ, ກຳລັງກາຍເປັນຮູບແບບການພັດທະນາທີ່ໄດ້ຮັບການຄັດເລືອກຈາກຫຼາຍປະເທດ.
ຢູ່ໃນປະເທດ, ພາຍຫຼັງເກືອບ 35 ປີແຫ່ງການປ່ຽນແປງໃໝ່, ຫວຽດນາມບັນລຸຜົນສຳເລັດທີ່ໃຫຍ່ຫຼວງ ມີຄວາມໝາຍປະຫວັດສາດ. ທ່າແລະກຳລັງຂອງພວກເຮົາໄດ້ເຕີບໃຫຍ່ເຂັ້ມແຂງຂຶ້ນຫຼາຍທີ່ສຸດ; ຂະໜາດ, ກຳລັງແຮງ ແລະຄວາມສາມາດແຂ່ງຂັນຂອງພື້ນຖານເສດຖະກິດໄດ້ຖືກຍົກສູງຂຶ້ນ; ການເຕີບໂຕຂອງເສດຖະກິດຂ້ອນຂ້າງດີ, ຮາກຖານມະຫາພາກພື້ນຖານມີສະຖຽນລະພາບ; ຊີວິດທຸກດ້ານຂອງປະຊາຊົນໄດ້ຮັບການຍົກສູງເລື້ອຍໆ; ຄວາມໄວ້ວາງໃຈຂອງຊຸມຊົນວິສາຫະກິດແລະສັງຄົມເພີ່ມຂຶ້ນ. ເຖິງຢ່າງໃດກໍ່ຕາມ, ພື້ນຖານເສດຖະກິດຍັງມີຂໍ້ຈຳກັດ, ມີຄວາມສ່ຽງຢູ່ບາງຢ່າງ ແລະມີຄວາມສ່ຽງທີ່ຈະຕົກຢູ່ເບື້ອງຫຼັງ; ລະດັບວິທະຍາສາດເຕັກໂນໂລຊີ, ສະມັດຕະພາບ, ຄຸນນະພາບ, ປະສິດທິຜົນ ແລະຄວາມສາມາດແຂ່ງຂັນ ຍັງບໍ່ທັນສູງ; ການເປີດກວ້າງຂອງພື້ນຖານເສດຖະກິດຢູ່ໃນລະດັບສູງ ໃນຂະນະທີ່ຄວາມສາມາດໃນການຕ້ານທານແລະປັບຕົວຮັບຜົນກະທົບພາຍນອກຍັງອ່ອນແອ; ຄວາມສາມາດໃນການເຂົ້າເຖິງເສດຖະກິດດິຈິຕອນແລະສັງຄົມດິຈິຕອນຍັງມີຈຳກັດ. ການລະບາດຂອງໄວຣັດໂຄວິດ-19 ຍັງມີຄວາມສ່ຽງທີ່ຈະກັບມາໃນບາງທ້ອງຖິ່ນ ແລະມີຜົນກະທົບຢ່າງແຮງ ຕໍ່ສະຖານະການເສດຖະກິດ-ສັງຄົມຂອງປະເທດ. ບັນດາປັດໄຈຂອງຄວາມໝັ້ນຄົງທີ່ບໍ່ເປັນແບບດັ້ງເດີມ, ໄພທຳມະຊາດ, ໂລກລະບາດ, ການປ່ຽນແປງສະພາບອາກາດ ອາດຈະມີການຜັນປ່ຽນທີ່ຄາດເດົາບໍ່ໄດ້, ສົ່ງຜົນກະທົບທີ່ຮ້າຍແຮງຕໍ່ການຜະລິດແລະຊີວິດ. ໃນຂະນະນັ້ນ, ໜ້າທີ່ປົກປ້ອງເອກະລາດ, ອຳນາດອະທິປະໄຕ, ຮັບປະກັນຄວາມໝັ້ນຄົງຂອງຊາດ ສືບຕໍ່ປະສົບກັບຄວາມຫຍຸ້ງຍາກແລະສິ່ງທ້າທາຍຫຼາຍຢ່າງ.
ໃນສະພາບການນັ້ນ, ພວກເຮົາຕ້ອງມີຈິດໃຈ ເຈດຈຳນົງ ຄວາມຕັດສິນໃຈສູງ, ມີສັດທາແລະຄວາມປາດຖະໜາທີ່ຈະບືນຕົວຂຶ້ນຢ່າງແຂງແຮງ, ກຳນົດຢ່າງຈະແຈ້ງບັນດາເປົ້າໝາຍຍຸດທະສາດ ໃນການພັດທະນາປະເທດຊາດ ທີ່ມີລະດັບຍຸກສະໄໝ, ມີແຜນນະໂຍບາຍທິດທາງທີ່ຖືກຕ້ອງ ແລະວິທີການແກ້ໄຂທີ່ບຸກທະລຸ ເພື່ອນຳໃຊ້ກາລະໄອກາດທີ່ດີ, ຜ່ານຜ່າຄວາມຫຍຸ້ງຍາກແລະສິ່ງທ້າທາຍ, ພາປະເທດກ້າວໄປຂ້າງໜ້າຢ່າງໜັກແໜ້ນ, ຮັດແຄບຊ່ອງຫວ່າງການພັດທະນາກັບພາກພື້ນແລະໂລກ. ຮອດປີ 2030, ທີ່ສະເຫຼີມສະຫຼອງວັນສ້າງຕັ້ງພັກກອມມູນິດຫວຽດນາມຄົບຮອບ 100 ປີ, ສູ້ຊົນໃຫ້ຫວຽດນາມກາຍເປັນປະເທດກຳລັງພັດທະນາ ທີ່ມີອຸດສະຫະກຳທັນສະໄໝ, ມີລາຍໄດ້ປານກາງສູງ; ມີສະຖາບັນທາງການບໍລິຫານທີ່ທັນສະໄໝ, ສາມາດແຂ່ງຂັນ, ມີປະສິດທິພາບ ແລະປະສິດຕິຜົນ; ເສດຖະກິດຂະຫຍາຍຕົວຢ່າງຂະຫຍັນຂັນເຄື່ອນໄວວາ ແລະຍືນຍົງ, ເປັນເອກະລາດ ເປັນເຈົ້າຕົນເອງ ບົນພື້ນຖານວິທະຍາສາດ ເຕັກໂນໂລຊີ, ການປ່ຽນແປງໃໝ່ປະດິດສ້າງ ຕິດກັບການຍົກສູງປະສິດທິຜົນຂອງການເຄື່ອນໄຫວພົວພັນຕ່າງປະເທດແລະເຊື່ອມໂຍງສາກົນ; ເສີມຂະຫຍາຍຄວາມຄິດສ້າງສັນ, ເຈດຈຳນົງແລະຄວາມປາດຖະໜາໃນການພັດທະນາ, ກຳລັງແຮງຂອງທັງຊາດ, ກໍ່ສ້າງສັງຄົມປະຊາທິປະໄຕ ຍຸດຕິທຳ ອາລະຍະທຳ ມີລະບຽບວິໄນ ຄວາມປອດໄພ, ຮັບປະກັນໃຫ້ຊີວິດຂອງປະຊາຊົນມີຄວາມສຸກ; ຍົກສູງລະດັບຊີວິດການເປັນຢູ່ຂອງປະຊາຊົນໃນທຸກໆດ້ານ; ປົກປັກຮັກສາປະເທດຊາດຢ່າງໝັ້ນຄົງ, ສະພາບແວດລ້ອມທີ່ສະຫງົບສຸກແລະໝັ້ນຄົງ ເພື່ອການພັດທະນາປະເທດຊາດ; ຍົກສູງບົດບາດຖານະແລະກຽດສັກສີຂອງຫວຽດນາມໃນເວທີສາກົນ. ຮອດປີ 2045, ທີ່ສະເຫຼີມສະຫຼອງວັນສ້າງຕັ້ງປະເທດສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນປະເທດສາທາລະນະລັດສັງຄົມນິຍົມຫວຽດນາມ ຄົບຮອບ 100 ປີ, ສູ້ຊົນໃຫ້ຫວຽດນາມກາຍເປັນປະເທດທີ່ພັດທະນາ ມີລາຍໄດ້ສູງ.
ໃນຊ່ວງໄລຍະເວລາຍຸດທະສາດ 10 ປີຂ້າງໜ້າ, ພວກເຮົາຕ້ອງສືບຕໍ່ປະຕິບັດ ບັນດາການບຸກທະລຸຍຸດທະສາດຢ່າງມີປະສິດທິຜົນ ດ້ວຍເນື້ອໃນໃໝ່, ເລິກເຊິ່ງ ແລະ ລະອຽດກວ່າ, ສອດຄ່ອງກັບສະພາບການ ແລະຄວາມຕ້ອງກັນພັດທະນາປະເທດໃນໄລຍະໃໝ່. ສືບຕໍ່ປັບປຸງບູລະນະແລະຍົກສູງຄຸນນະພາບຂອງສະຖາບັນທາງເສດຖະກິດຕະຫຼາດກຳນົດທິດສັງຄົມນິຍົມ, ຮັບປະກັນຄວາມຄົບຊຸດ ທັນສະໄໝ ແລະເຊື່ອມໂຍງສາກົນ. ປ່ຽນແປງໃໝ່ການບໍລິຫານຄຸ້ມຄອງປະເທດ; ກໍ່ສ້າງກົງຈັກແຫ່ງລັດທີ່ກະທັດລັດ ມີປະສິດທິພາບແລະປະສິດທິຜົນ; ຍູ້ແຮງການແບ່ງຂັ້ນ, ແບ່ງສິດອຳນາດ ເພື່ອຮັບປະກັນການຄຸ້ມຄອງເປັນເອກະພາບ, ເສີມຂະຫຍາຍຄວາມເປັນເຈົ້າການ ປະດິດສ້າງແລະຄວາມຮັບຜິດຊອບຂອງບັນດາຂັ້ນ, ບັນດາຂະແໜງການ. ຍູ້ແຮງການພັດທະນາຊັບພະຍາກອນມະນຸດ ແລະ ວິທະຍາສາດ-ເຕັກໂນໂລຊີ, ປ່ຽນແປງໃໝ່ປະດິດສ້າງ ແລະສຸມໃສ່ການປ່ຽນດິຈິຕອນ ເພື່ອສ້າງການບຸກທະລຸທາງດ້ານສະມັດຕະພາບ ຄຸນນະພາບ ປະສິດທິຜົນ ແລະຄວາມສາມາດແຂ່ງຂັນ. ເອົາໃຈໃສ່ເຖິງການຝຶກອົບຮົມຊັບພະຍາກອນບຸກຄົນຄຸນນະພາບສູງ, ການຄົ້ນຫາແລະສົ່ງເສີມຜູ້ມີຄວາມສາມາດ; ມີນະໂຍບາຍທີ່ໂດດເດັ່ນເພື່ອດຶງດູດແລະໃຊ້ຜູ້ມີຄວາມສາມາດ, ຊ່ຽວຊານຢູ່ໃນແລະຕ່າງປະເທດ. ສ້າງກົນໄກ ນະໂຍບາຍສະເພາະແລະໂດດເດັ່ນເພື່ອຊຸກຍູ້ການປະຢຸກໃຊ້ແລະມອບໂອນເຕັກໂນໂລຊີ; ຍົກສູງຄວາມສາມາດຄົ້ນຄວ້າແລະເປັນເຈົ້າເຕັກໂນໂລຊີໃໝ່ບາງປະເພດ, ສ້າງກຳລັງການຜະລິດໃໝ່ທີ່ມີຄວາມເປັນເຈົ້າຕົນເອງ ແລະຄວາມສາມາດໃນການປັບຕົວທົນຕໍ່ຄວາມຜັນຜວນທີ່ຮຸນແຮງຈາກພາຍນອກໄດ້ຢ່າງມີປະສິດທິຜົນ. ຂະຫຍາຍລະບົບການປ່ຽນແປງໃໝ່ປະດິດສ້າງແຫ່ງຊາດ, ລະບົບນິເວດການເລີ່ມທຸລະກິດປະດິດສ້າງ. ສົ່ງເສີມຄຸນຄ່າວັດທະນະ ທຳແລະກຳລັງແຮງຂອງຄົນຫວຽດນາມ; ປຸກລະດົມຢ່າງແຮງຄວາມປາດຖະໜາພັດທະນາ, ຄວາມພາກພູມໃຈຂອງຊາດ, ຄວາມຮັກຊາດ, ຄວາມທະນົງໃຈ, ເຈດຈຳນົງສ້າງຕົນເອງໃຫ້ເຂັ້ມແຂງ ແລະຄວາມເມດຕາ, ຄວາມສາມັກຄີແລະຄວາມເຫັນດີເຫັນພ້ອມທາງສັງຄົມ; ສົ່ງເສີມຈິດສຳນຶກ, ຄວາມຮັບຜິດຊອບ, ຈັນຍາບັນສັງຄົມ, ດຳລົງຊີວິດແລະເຮັດວຽກຕາມກົດ ໝາຍ. ສືບຕໍ່ປັບປຸງບູລະນະລະບົບໂຄງສ້າງພື້ນຖານເສດຖະກິດ, ສັງຄົມທີ່ຄົບຊຸດ ແລະທັນສະໄໝ; ໃຫ້ບຸລິມະສິດການພັດທະນາໂຄງສ້າງພື້ນຖານທີ່ສຳຄັນໃນດ້ານການຈະລາຈອນ ພະລັງງານ ເຕັກໂນໂລຊີຂໍ້ມູນຂ່າວສານ ຕົວເມືອງໃຫຍ່, ໂຄງສ້າງພື້ນຖານເພື່ອຮັບມືກັບການປ່ຽນແປງສະພາບອາກາດ. ຂະຫຍາຍໂຄງສ້າງພື້ນຖານດິຈິຕອນຢ່າງແຂງແຮງ, ການກໍ່ສ້າງແລະພັດທະນາ, ເຊື່ອມໂຍງໂຄງສ້າງພື້ນຖານຂໍ້ມູນແຫ່ງຊາດ, ເຂດ, ທ້ອງຖິ່ນຢ່າງຄົບຊຸດ.
ເພື່ອປະຕິບັດບັນດາເປົ້າໝາຍ ທິດທາງ ແລະການບຸກທະລຸຍຸດທະສາດທີ່ກ່າວມາຂ້າງເທິງ, ພວກເຮົາຕ້ອງການສືບຕໍ່ປ່ຽນແປງໃໝ່ຢ່າງແຂງແຮງ ຈິນຕະນາການການພັດທະນາ, ປ່ຽນແປງໃໝ່ແບບວິທີການນຳພາຄຸ້ມຄອງ, ການບໍລິຫານຊີ້ນຳ ແລະການປົກຄອງປະເທດທີ່ເໝາະສົມ, ສຸມໃສ່ການປະຕິບັດແຜນນະໂຍບາ ແນວທາງ ໜ້າທີ່ແລະວິທີແກ້ໄຂໃນຂົງເຂດຕ່າງໆ ຢ່າງຄົບຊຸດແລະມີປະສິດທິຜົນ ຕາມບັນດາມະຕິຂອງພັກກອມມູນິດຫວຽດນາມ, ສະພາແຫ່ງຊາດຫວຽດນາມ, ລັດຖະບານຫວຽດນາມ; ໃນນັ້ນ ຄວນເອົາໃຈໃສ່ເນື້ອໃນທີ່ສຳຄັນຈຳນວນໜຶ່ງດັ່ງຕໍ່ໄປນີ້:
1- ສຸມໃສ່ປັບປຸງບູລະນະ ແລະ ຍົກສູງຄຸນນະພາບຂອງສະຖາບັນທາງເສດຖະກິດຕະຫຼາດກຳນົດທິດສັງຄົມນິຍົມ, ແກ້ໄຂການພົວພັນລະຫວ່າງລັດ ຕະຫຼາດ ແລະສັງຄົມ ໃຫ້ດີຂຶ້ນ. ກໍ່ສ້າງບັນດາກົນໄກ ນະໂຍບາຍ ຂໍ້ກຳນົດກົດໝາຍ ທີ່ສົມບູນ ຄົບຊຸດທັນສະໄໝ, ເຊື່ອມໂຍງ, ຄວາມໝັ້ນຄົງ, ສະເພາະ, ໂປ່ງໃສ ໂດຍຕິດກັບການເພີ່ມທະວີປະສິດທິພາບແລະປະສິດທິຜົນ ຂອງການບັງຄັບໃຊ້ກົດໝາຍ. ພັດທະນາຕະຫຼາດປັດໄຈການຜະລິດຢ່າງຄົບຖ້ວນແລະຄົບຊຸດ, ໂດຍສະເພາະຕະຫຼາດສິດທິການໃຊ້ທີ່ດິນ ແລະຕະຫຼາດວິທະຍາສາດ ເຕັກໂນໂລຊີ. ປ່ຽນແປງໃໝ່ຢ່າງແຂງແຮງກົນໄກການແບ່ງຂັ້ນ, ແບ່ງສິດອຳນາດ, ມອບອຳນາດ, ໂດຍສະເພາະແມ່ນກ່ຽວກັບການຈັດແບ່ງແຫຼ່ງພະລັງ, ງົບປະມານຂອງລັດ ແລະບັນດາຂົງເຂດເສດຖະກິດ-ສັງຄົມທີ່ສຳຄັນອື່ນ ເພື່ອຕອບສະໜອງຄວາມຕ້ອງການພັດທະນາ; ຍົກສູງປະສິດທິຜົນການປະສົມປະສານໃນວຽກງານການນຳພາ ຊີ້ນຳ ແລະ ການບໍລິຫານງານ ຂອງບັນດາຂັ້ນແລະຂະແໜງການ. ປະຕິບັດການປ່ຽນດິຈິຕອນແຫ່ງຊາດຢ່າງຮອບດ້ານ, ພັດທະນາເສດຖະກິດດິຈິຕອນ, ສ້າງສັງຄົມດິຈິຕອນ. ຍູ້ແຮງການປະຢຸກໃຊ້ເຕັກໂນໂລຊີຂໍ້ມູນຂ່າວສານ, ການປ່ຽນດິຈິຕອນໃນບັນດາອົງການຂອງພັກ ລັດ ແນວໂຮມປະເທດຊາດ ບັນດາອົງການຈັດຕັ້ງການເມືອງ-ສັງຄົມ. ຍູ້ແຮງການກໍ່ສ້າງລັດຖະບານເອເລັດໂຕຣນິກ, ລັດຖະບານດິຈິຕອນ ແລະການປະຕິຮູບຂັ້ນຕອນການບໍລິຫານ, ກຳຈັດສິ່ງກີດຈວາງ, ປັບປຸງແລະຍົກສູງຄຸນນະພາບຂອງສະພາບແວດລ້ອມທາງທຸລະກິດ, ຮັບປະກັນການແຂ່ງຂັນທີ່ເປັນທຳ ສະເໝີພາບ ແລະໂປ່ງໃສ. ສູ້ຊົນຮອດປີ 2030 ສະພາບແວດລ້ອມທາງມຸລະກິດຂອງຫວຽດນາມຈະໄດ້ຈັດໃນອັນດັບ 30 ປະເທດທີ່ນຳໜ້າໂລກ.
2- ພັດທະນາວິທະຍາສາດ ເຕັກໂນໂລຊີແລະການປ່ຽນແປງໃໝ່ປະດິດສ້າງຢ່າງແຂງແຮງ, ສ້າງບາດກ້າວບຸກທະລຸໃນການຍົກສູງສະມັດຕະພາບການຜະລິດ, ຄຸນນະພາບ, ປະສິດທິຜົນແລະຄວາມສາມາດແຂ່ງຂັນຂອງເສດຖະກິດ. ຍູ້ແຮງການປະຢຸກໃຊ້ແລະພັດທະນາເຕັກໂນໂລຊີໃໝ່, ໃຫ້ບຸລິມະສິດເຕັກໂນໂລຊີດິຈິຕອນ, ເຊື່ອມຕໍ່ 5G ແລະຫຼັງ 5G, ປັນຍາປະດິດ...; ຖືເອົາວິສາຫະກິດເປັນໃຈກາງໃນການພັດທະນາ, ນຳໃຊ້ວິທະຍາສາດ, ເຕັກໂນໂລຊີ ແລະປ່ຽນແປງໃໝ່ປະດິດສ້າງ; ຊຸກຍູ້ການຂະຫຍາຍເສດຖະກິດດິຈິຕອນ, ສັງຄົມດິຈິຕອນ, ບັນດາຮູບແບບແລະວິທີການທຸລະກິດໃໝ່ຢ່າງແຂງແຮງ. ກຳນົດເປົ້າໝາຍ, ເລກຄາດໝາຍ, ໂຄງການປະຕິບັດການພັດທະນາ, ນຳໃຊ້ວິທະຍາສາດ-ເຕັກໂນໂລຊີ ແລະການປ່ຽນແປງໃໝ່ປະດິດສ້າງ ໃນການເຄື່ອນໄຫວທຸກດ້ານ ຂອງທຸກຂັ້ນ, ທຸກຂະແໜງການແລະທ້ອງຖິ່ນ. ພັດທະນາແລະປັບປຸງປະສິດທິຜົນການດຳເນີນງານ ຂອງລະບົບການປ່ຽນແປງໃໝ່ປະດິດສ້າງແຫ່ງຊາດ, ລະບົບນິເວດການເລີ່ມຕົ້ນທຸລະກິດປ່ຽນແປງໃໝ່ປະດິດສ້າງ ແລະຕະຫຼາດວິທະຍາສາດ ເຕັກໂນໂລຊີ. ຍູ້ແຮງການເຊື່ອມໂຍງແລະຮ່ວມມືສາກົນ ທາງດ້ານວິທະຍາສາດ ເຕັກໂນໂລຊີ, ພັດທະນາເຄືອຂ່າຍການເຊື່ອມໂຍງຜູ້ມີພອນສະຫວັນຊາວຫວຽດນາມ. ສູ້ຊົນຮອດປີ 2030, ອັດຕາວິສາຫະກິດທີ່ມີການເຄື່ອນໄຫວປ່ຽນແປງໃໝ່ປະດິດສ້າງບັນລຸ 40%.
3- ສ້າງການຫັນປ່ຽນທີ່ພື້ນຖານແລະແຂງແຮງໃນຄຸນນະພາບແລະປະສິດທິຜົນ ຂອງການສຶກສາແລະການຝຶກອົບຮົມ, ການພັດທະນາບຸກຄະລາກອນຢ່າງແຂງແຮງ, ໂດຍສະເພາະແມ່ນບຸກຄະລາກອນຄຸນນະພາບສູງ, ຕອບສະໜອງຄວາມຕ້ອງການພັດທະນາເສດຖະກິດ-ສັງຄົມ, ການປະຕິວັດອຸດສາຫະກຳຄັ້ງທີສີ່ ແລະການເຊື່ອມໂຍງສາກົນ. ກໍ່ສ້າງຄົນຫວຽດນາມໃຫ້ພັດທະນາຢ່າງຮອບດ້ານ, ມີສຸຂະພາບທີ່ດີ, ມີຄວາມສາມາດ ຄຸນສົມບັດ, ມີຄວາມຮັບຜິດຊອບສູງຕໍ່ຕົນເອງ, ຄອບຄົວ, ສັງຄົມ ແລະປະເທດຊາດ. ເອົາໃຈໃສ່ການຝຶກອົບຮົມຄືນໃໝ່ແລະການຝຶກອົບຮົມ ກຳລັງຄົນງານຢ່າງເປັນປົກກະຕິ ໂດຍເຊື່ອມໂຍງກັບການປ່ຽນໃໝ່ລະບອບການຮັບສະໝັກ, ການໃຊ້ງານແລະສັນຫາບຸກຄະລາກອນທີ່ມີຄວາມສາມາດ. ຈັດລະບົບໂຮງຮຽນຄືນໃໝ່; ເປີດການສຶກສາ ການຝຶກອົບຮົມທີ່ຫຼາກຫຼາຍປະເພດ; ພັດທະນາຢ່າງກົມກຽວລະຫວ່າງການສຶກສາພາກລັດແລະນອກພາກລັດ, ລະຫວ່າງບັນດາເຂດ ພາກພື້ນ, ໃຫ້ບຸລິມະສິດແກ່ເຂດທີ່ມີຄວາມຫຍຸ້ງຍາກພິເສດ, ເຂດຊົນເຜົ່າສ່ວນນ້ອຍ, ເຂດຊາຍແດນ ເກາະທະເລ ທີ່ຫ່າງໄກສອກຫຼີກ ແລະບັນດາເປົ້າໝາຍນະໂຍບາຍ. ສູ້ຊົນຮອດປີ 2030, ການສຶກສາຂອງຫວຽດນາມບັນລຸລະດັບກ້າວໜ້າໃນພາກພື້ນ.
4- ຍູ້ແຮງການຫັນເປັນອຸດສາຫະກຳ ທັນສະໄມ ແລະ ປັບໂຄງສ້າງພື້ນຖານເສດຖະກິດ ຕິດກັບການປ່ຽນແປງໃໝ່ຮູບແບບການເຕີບໂຕຢ່າງເປັນຮູບປະທຳແລະມີປະສິດທິຜົນ, ຊຸກຍູ້ການພັດທະນາຢ່າວ່ອງໄວຍືນຍົງ ບົນພື້ນຖານຮັກສາສະຖຽນລະພາບຂອງເສດຖະກິດມະຫາພາກ. ສ້າງແຜນສຳນົດແລະແຜນການພັດທະນາປະເທດ, ບັນດາເຂດ, ບັນດາຂະແໜງການ ຂົງເຂດທີ່ເໝາະສົມກັບຄວາມເປັນຈິງຂອງປະເທດ ເພື່ອຍົກສູງຄວາມເປັນເຈົ້າຕົນເອງ, ຄວາມສາມາດປັບຕົວແລະຄວາມຕ້ານທານຂອງພື້ນຖານເສດຖະກິດ; ໃນນັ້ນ ສຸມໃສ່ບັນດາວິທີແກ້ໄຂດ້ານນະໂຍບາຍ ເພື່ອເອົາຊະນະຜົນກະທົບຈາກການລະບາດຂອງໄວຣັດໂຄວິດ-19, ຟື້ນຟູເສດຖະກິດຢ່າງໄວວາ, ໃຊ້ປະໂຫຍດຈາກໂອກາດໃໝ່ໆ ເພື່ອການພັດທະນາປະເທດຢ່າງມີປະສິດທິຜົນ. ຊຸກຍູ້ຢ່າງແຂງແຮງເພື່ອພັດທະນາເສດຖະກິດດິຈິຕອນ, ສັງຄົນດິຈິຕອນ, ການຜະລິດທີ່ສະຫຼາດ, ບັນດາຮູບແບບການຜະລິດ ທຸລະກິດໃໝ່, ເສດຖະກິດແບ່ງປັນ, ເສດຖະກິດໝູນວຽນ, ການຄ້າເອເລັກໂຕຣນິກ... ການປະສານສົມທົບກັນຢ່າງແໜ້ນແຟ້ນ ຄົບຊຸດ ແລະມີປະສິດທິຜົນລະຫວ່າງນະໂຍບາຍການຄັງ ການເງິນ ການຄ້າ ການລົງທຶນ ແລະບັນດານະໂຍບາຍອື່ນ ເພື່ອຄວບຄຸມອັດຕາເງິນເຟີ້ ສະຖຽນລະພາບເສດຖະກິດມະຫາພາກ, ຮັບປະກັນບັນດາດຸ່ນດ່ຽງທີ່ສຳຄັນຂອງພື້ນຖານເສດຖະກິດ, ໂດຍສະເພາະແມ່ນງົບປະມານຂອງລັດ ການລົງທຶນ ການຄ້າ ພະລັງງານ ຄວາມໝັ້ນຄົງດ້ານສະບຽງອາຫານ; ພ້ອມກັນນັ້ນ, ສ້າງເງື່ອນໄຂອຳນວຍຄວາມສະດວກ ເພື່ອຊຸກຍູ້ການພັດທະນາເສດຖະກິດ-ສັງຄົມ. ພັດທະນາຕະຫຼາດພາຍໃນປະເທດຢ່າງແຂງແຮງ, ສົ່ງເສີມການບໍລິໂພກພາຍໃນ, ສ້າງເຄື່ອງໝາຍການຄ້າແຫ່ງຊາດ; ພ້ອມກັນນັ້ນ, ໃຊ້ປະໂຫຍດຈາກສັນຍາການຄ້າເສລີຢ່າງມີປະສິດທິຜົນ, ເປີດກວ້າງແລະຂະຫຍາຍຄວາມຫຼາກຫຼາຍຂອງຕະຫຼາດສົ່ງອອກແລະນຳເຂົ້າ ໂດຍບໍ່ຕ້ອງເພິ່ງພາຕະຫຼາດດຽວຫຼາຍເກີນໄປ; ເພີ່ມທະວີການປ້ອງກັນແລະຕ້ານການລັກລອບຄ້າຂາຍ ແລະການສໍ້ໂກງທາງການຄ້າ, ມີການປົກປ້ອງທີ່ເໝາະສົມສຳລັບການຜະລິດແລະການບໍລິໂພກພາຍໃນປະເທດ. ໃຫ້ຄວາມສຳຄັນແກ່ການສ້າງພື້ນຖານການເງິນແຫ່ງຊາດທີ່ມີປະສິດທິຜົນ ປອດໄພ ແລະຍືນຍົງ; ພັດທະນາຕະຫຼາດການເງິນແລະເງິນຕາຢ່າງແຂງແຮງ; ການເປີດເຜີຍແລະຄວາມໂປ່ງໃສໃນການຄຸ້ມຄອງແລະການນຳໃຊ້ຊັບສິນສາທາລະນະ ທີ່ດິນ ແລະຊັບພະຍາກອນທຳມະຊາດ. ສືບຕໍ່ປັບແລະຍົງສູງປະສິດທິຜົນການລົງທຶນສາທາລະນະ, ລະບົບບັນດາອົງການຈັດຕັ້ງສິນເຊື່ອແລະລັດວິສາຫະກິດ. ຂະຫຍາຍເສດຖະກິດເອກະຊົນຢ່າງແຂງແຮງທາງດ້ານປະລິມານແລະຄຸນນະພາບ, ຮັບປະກັນປະສິດທິຜົນ ຄວາມຍືນຍົງ ແລະກາຍເປັນແຮງຜັດດັນສຳຄັນໃນການພັດທະນາເສດຖະກິດຢ່າງແທ້ຈິງ. ປ່ຽນແປງໃໝ່ແລະຍົກສູງປະສິດທິຜົນການເຄື່ອນໄຫວຂອງບັນດາການຈັດຕັ້ງເສດຖະກິດລວມໝູ່, ສະຫະກອນ. ຍົກສູງປະສິດທິຜົນຂອງການຮ່ວມມືລົງທຶນກັບຕ່າງປະເທດ, ຄັດເລືອກ, ໃຫ້ບຸລິມະສິດການດຶງດູດບັນດາໂຄງການທີ່ມີເຕັກໂນໂລຊີສູງ, ເປັນມິດກັບສິ່ງແວດລ້ອມ, ເຊື່ອມໂຍງກັບບັນດາວິສາຫະກິດພາຍໃນປະເທດ, ສ້າງບັນດາຕ່ອງໂສ້ການສະໜອງ ແລະຕ່ອງໂສ້ຄຸນຄ່າ. ສົ່ງເສີມແບບວິທີການຮ່ວມມືພາກລັດແລະເອກະຊົນ (PPP), ລະດົມຊັບພະຍາກອນສັງຄົມເພື່ອລົງທຶນພັດທະນາໂຄງສ້າງພື້ນຖານ ແລະສະໜອງບໍລິການສາທາລະນະ.
ຍູ້ແຮງການພັດທະນາບາງຂະແໜງການ ຂົງເຂດເສດຖະກິດສຳຄັນ ທີ່ມີຄວາມສາມາດບົ່ມຊ້ອນ ມີທ່າໄດ້ປຽບແລະພື້ນທີ່ໃຫຍ່ ເພື່ອເປັນກຳລັງໜູນໃຫ້ແກ່ການເຕີບໂຕ ດ້ວຍຈິດໃຈແຫ່ງການໄລ່ຕາມ ກ້າວໜ້າ ແລະເໜືອກວ່າໃນບາງຂົງເຂດ ເມື່ອທຽບກັບພາກພື້ນແລະໂລກ. ຍູ້ແຮງການປັບໂຄງສ້າງກະສິກຳ, ພັດທະນາກະສິກຳສິນຄ້າລວມສູນຂະໜາດໃຫຍ່, ນຳໃຊ້ເຕັກໂນໂລຊີສູງ, ຮັບປະກັນຄວາມໝັ້ນຄົງດ້ານສະບຽງອາຫານ. ດຳເນີນການປ່ຽນໂຄງສ້າງຂອງພືດແລະສັດໃຫ້ເໝາະສົມ ມີປະສິດທິຜົນ, ເພີ່ມທະວີຄວາມສາມາດຕ້ານທານແລະການປັບຕົວເຂົ້າກັບການປ່ຽນແປງສະພາບອາກາດ ໃນແຕ່ລະເຂດແລະແຕ່ລະທ້ອງຖິ່ນ. ເຊື່ອມໂຍງຢ່າງແໜ້ນແຟ້ນລະຫວ່າງກະສິກຳ ກັບອຸດສາຫະກຳປຸງແຕ່ງ, ຕະຫຼາດ, ການສົ່ງອອກ ແລະເຂົ້າຮ່ວມຕ່ອງໂສ້ຄຸນຄ່າພາກພື້ນແລະໂລກ. ດຶງດູດການລົງທຶນ, ພັດທະນາວິສາຫະກິດກະສິກຳຢ່າງແຂງແຮງ; ສະໜັບສະໜູນແລະສົ່ງເສີມການພັດທະນາເສດຖະກິດຟາມ ສະຫະກອນກະສິກຳ ແລະໜ່ວຍຮ່ວມມື. ສ້າງອຸດສາຫະກຳປ້ອງກັນປະເທດທີ່ເຂັ້ມແຂງ, ພັດທະນາຢ່າງກົມກຽວທັງລວງກວ້າງແລະລວງເລິກ, ຖືການພັດທະນາຕາມລວງເລິກເປັນສຳ, ສ້າງການບຸກທະລຸໃນການຍົກສູງສະມັດຕະພາບ, ຄຸນນະພາບ, ຄວາມສາມາແຂ່ງຂັນຂອງຜະລິດຕະພັນ. ຍູ້ແຮງການປ່ຽນດິຈິຕອນ, ເພີ່ມຄວາມສາມາດເຊື່ອມຕໍ່, ເຂົ້າເຖິງຂໍ້ມູນຂ່າວສາມ. ໃຫ້ບຸລິມະສິດພັດທະນາບາງຂະແໜງການອຸດສາຫະກຳປາຍຫອກ, ເຕັກໂນໂລຊີໃໝ່, ເຕັກໂນໂລຊີສູງ, ອຸດສາຫະກຳການປ້ອງກັນປະເທດ ປ້ອງກັນຄວາມໝັ້ນຄົງທີ່ໃຊ້ໄດ້ທັງດ້າພົນລະເຮືອນ. ສຸມໃສ່ພັດທະນາອຸດສະຫະກຳສະໜັບສະໜູນ, ເຂດແລະກຸ່ມອຸດສາຫະກຳ ຢ່າງມີປະສິດທິຜົນ. ຍູ້ແຮງການຈັດວາງຄືນໃໝ່ບັນດາຂະແໜງບໍລິການ ອີງບົນພື້ນຖານອຸດສາຫະກຳທີ່ທັນສະໄໝແລະເຕັກໂນໂລຊີດິຈິຕອນ, ພັດທະນາບໍລິການແບບໃໝ່, ສ້າງລະບົບນິເວດບໍລິການ, ໂດຍສະເພາະໃນຂົງເຂດການເງິນ ທະນາຄານ ປະກັນໄພ ກົດໝາຍ ສາທາລະນະສຸກ ການສຶກສາຝຶກອົບຮົມ, ໂທລະຄົມມະນາຄົມ ແລະເຕັກໂນໂລຊີຂໍ້ມູນຂ່າວສານ, ໂລຈິສະຕິກແລະການຂົນສົ່ງ, ການແຈກຢາຍ... ພັດທະນາຢ່າງແຂງແຮງແລະຍົກສູງຄຸນນະພາບຂອງການບໍລິການທ່ອງທ່ຽວ, ຮັບປະກັນຄວາມເປັນມືອາຊີບ ທັນສະໄໝ ຍືນຍົງ ແລະເຊື່ອມໂຍງສາກົນ.
5- ສຸມໃສ່ພັດທະນາໂຄງສ້າງພື້ນຖານ, ເສດຖະກິດຕາມເຂດ, ເສດຖະກິດທະເລ, ຖືເອົາຕົວເມືອງເປັນກຳລັງໜູນເພື່ອພັດທະນາເສດຖະກິດຕາມເຂດ ແລະຍູ້ແຮງການກໍ່ສ້າງຊົນນະບົດໃໝ່. ສືບຕໍ່ລົງທຶນພັດທະນາຢ່າງຄົບຊຸດ ບັນດາໂຄງການໂຄງສ້າງພື້ນຖານທີ່ສຳຄັນຂອງປະເທດ, ໂດຍສະເພາະກ່ຽວກັບການຄົມມະນາຄົມ, ພະລັງງານ ແລະໂຄງສ້າງພື້ນຖານດິຈິຕອນ, ເພີ່ມທະວີການເຊື່ອມໂຍງກັບພາກພື້ນແລະໂລກ. ຮອດປີ 2030, ສູ້ຊົນໃຫ້ທົ່ວປະເທດມີທາງດ່ວນປະມານ 5.000 ກມ., ໃນນັ້ນຮອດປີ 2025 ສຳເລັດເສັ້ນທາງດ່ວນເໜືອ - ໃຕ້ໃນທິດຕາເວັນອອກ. ເພີ່ມທະວີຄວາມສາມາດຂອງລະບົບໂຄງສ້າງພື້ນຖານຊົນລະປະທານ, ຮັບມືກັບການປ່ຽນແປງສະພາບອາກາດ, ໂດຍສະເພາະແມ່ນຢູ່ເຂດທົ່ງພຽງແມ່ນ້ຳຂອງ ແລະການຕ້ານນ້ຳຖ້ວມຢູ່ນະຄອນໂຮ່ຈີມິນ. ສຸມໃສ່ການສ້າງແຜນການພາກພື້ນທີ່ມີລັກສະນະບຸກທະລຸ ໃນທິດທາງການເຊື່ອມໂຍງແລະຫຼາຍຂະແໜງການ, ສ້າງເປັນຕ່ອງໂສ້ຄຸນຄ່າ ແລະມີກົນໄກ ນະໂຍບາຍສະເພາະ ເພື່ອຊຸກຍູ້ການພັດທະນາເຂດ, ເຊື່ອມໂຍງເຂດ ແລະມີກົນໄກປະສານງານທີ່ເຂັ້ມແຂງພຽງພໍ ສຳລັບການພັດທະນາພາກພື້ນ. ການພັດທະນາເສດຖະກິດທະເລຢ່າງຍືນຍົງ; ຄວບຄຸມການຂຸດຄົ້ນຊັບພະຍາກອນທະເລຢ່າງເຂັ້ມງວດ, ຟື້ນຟູລະບົບນິເວດທະເລຕິດກັບການຮັບປະກັນການປ້ອງກັນປະເທດ, ຮັກສາຄວາມໝັ້ນຄົງ ແລະຍົກສູງຊີວິດຂອງປະຊາຊົນຢູ່ເຂດທະເລ ໝູ່ເກາະ. ຍູ້ແຮງການສ້າງຕົວເມືອງ, ຍົກສູງຄຸນນະພາບຂອງຕົວເມືອງ, ພັດທະນາການວາງຜັງເມືອງດ້ວຍວິໄສທັດໄລຍະຍາວ, ສ້າງເຄືອຂ່າຍຕົວເມືອງອັດສະລິຍະຈຳນວນໜຶ່ງ. ສືບຕໍ່ປະຕິບັດຢ່າງມີປະສິດທິຜົນ ໂຄງການກໍ່ສ້າງຊົນນະບົດໃໝ່ ຕາມທິດຕິດກັບການຫັນເປັນຕົວເມືອງ, ແທ້ຈິງ, ເຂົ້າສູ່ລວງເລິກ ມີປະສິດທິຜົນ ແລະຍືນຍົງ. ສູ້ຊົນຮອດປີ 2030 ມີ 90% ຈຳນວນຕາແສງບັນລຸມາດຕະຖານຊົນນະບົດໃໝ່, 40% ຈຳນວນເມືອງສຳເລັດການກໍ່ສ້າງຊົນນະບົດໃໝ່.
6- ເອົາໃຈໃສ່ພັດທະນາວັດທະນະທຳ ສັງຄົມ, ສ້າງຄວາມກ້າວໜ້າແລະຄວາມຍຸຕິທຳທາງສັງຄົມ; ຍົກສູງຊີວິດການເປັນຢູ່ທາງດ້ານວັດຖຸແລະຈິດໃຈຂອງປະຊາຊົນຢ່າງບໍ່ຢຸດຢັ້ງ. ສ້າງສະພາບແວດລ້ອມວັດທະນະທຳທີ່ສົມບູນແບບ ທັງໃນຄອບຄົວ ໂຮງຮຽນ ໃນຊຸມຊົນທີ່ຢູ່ອາໄສ, ໃນສຳນັກງານອົງການຂອງພັກ ລັດ ອົງຄະນະມະຫາຊົນ ວິສາຫະກິດ, ເພື່ອໃຫ້ວັດທະນະທຳເປັນກຳລັງຜັດດັນທີ່ແທ້ຈິງ, ສ້າງບາດກ້າວບຸກທະລຸໃນການພັດທະນາເສດຖະກິດ ສັງຄົມ ແລະການເຊື່ອມໂຍງສາກົນ. ປຸກຕື່ນນ້ຳໃຈຮັກຊາດ, ເຈດຈຳນົງສ້າງຄວາມເຂັ້ມແຂງດ້ວຍຕົນເອງ, ຄວາມທະນົງໃຈແຫ່ງຊາດ, ຄວາມສາມັກຄີຊຸມຊົນ ແລະຄວາມປາດຖະໜາບືນຕົວຂຶ້ນຂອງຄົນຫວຽດນາມ. ສູ້ຊົນໃຫ້ ສຳເລັດໂດຍໄວ ເປົ້າໝາຍພາຍໃຕ້ວາລະ 2030 ເພື່ອການພັດທະນາແບບຍືນຍົງ. ປະຕິບັດເປັນຢ່າງດີ ບັນດານະໂຍບາຍຕໍ່ຜູ້ມີຄຸນງາມຄວາມດີ, ການອຸປະຖຳສັງຄົມ, ຮັບປະກັນຄວາມປອດໄພທາງສັງຄົມ, ປະກັນໄພສັງຄົມ, ປະກັນສຸຂະພາບ, ປະກັນການຫວ່າງງານ ແລະວິທີແກ້ບັນຫາການຫຼຸດຜ່ອນຄວາມທຸກຍາກໃນຫຼາຍມິຕິ ຍືນຍົງ ແລະປົກຫຸ້ມ, ໂດຍສະເພາະແມ່ນຢູ່ເຂດຊົນເຜົ່າສ່ວນນ້ອຍ ແລະເຂດທີ່ມີຄວາມຫຍຸ້ງຍາກ ໂດຍຕິດກັບການຜັນຂະຫຍາຍຢ່າງມີປະສິດທິຜົນ ໂຄງການເປົ້າໝາຍແຫ່ງຊາດເພື່ອພັດທະນາເສດຖະກິດ-ສັງຄົມໃນເຂດຊົນເຜົ່າສ່ວນນ້ອຍ ແລະເຂດພູດອຍໃນໄລຍະປີ 2021 - 2030. ໃຫ້ຄວາມສຳຄັນເຖິງໜ້າທີ່ປົກປ້ອງ ເບິ່ງແຍງດູແລສຸຂະພາບຂອງປະຊາຊົນ; ຍົກສູງຄຸນນະພາບຂອງການກວດແລະປົວພະຍາດ; ຄົ້ນພົບໄວ, ປ້ອງກັນ ຕ້ານ ແລະກີດກັ້ນໂລກລະບາດຢ່າງມີປະສິດທິຜົນ, ບໍ່ໃຫ້ໂລກລະບາດເກີດຂຶ້ນ; ຮັບມືຢ່າງທັນການຕໍ່ບັນຫາສຸກເສີນ, ເຫດການສິ່ງແວດລ້ອມ ແລະຮັບປະກັນຄວາມປອດໄພທາງການແພດ. ພັດທະນາຕະຫຼາດແຮງງານຢ່າງຄົບຊຸດ ມີປະສິດທິຜົນ, ປັບປຸງຄຸນນະພາບຂອງລະບົບຂໍ້ມູນຂ່າວສານດ້ານການຕະຫຼາດ; ປະຕິບັດການປະຕິຮູບໂດຍລວມ ກ່ຽວກັບເງິນເດືອນແລະນະໂຍບາຍປະກັນສັງຄົມ ຕາມຈິດໃຈມະຕິສູນກາງພັກ. ສືບຕໍ່ປະຕິບັດເປັນຢ່າງດີ ບັນດານະໂຍບາຍກ່ຽວກັບຊົນເຜົ່າ, ສາສະໜາ, ການເບິ່ງແຍງຜູ້ສູງອາຍຸ, ພັດທະນາຊາວໜຸ່ມ, ຄວາມສະເໝີພາບທາງເພດ, ເພື່ອຄວາມກ້າວໜ້າຂອງແມ່ຍິງ, ດູແລແລະປົກປ້ອງເດັດນ້ອຍ, ເພີ່ມທະວີການປ້ອງກັນແລະຕໍ່ສູ້ກັບຄວາມຊົ່ວຮ້າຍທາງສັງຄົມ.
7- ການຄຸ້ມຄອງແລະນຳໃຊ້ຊັບພະຍາກອນຢ່າງມີປະສິດທິຜົນ; ເພີ່ມທະວີການປົກປ້ອງສິ່ງແວດລ້ອມ, ຮັບມືກັບການປ່ຽນແປງສະພາບອາກາດ ແລະປ້ອງກັນ ຕ້ານໄພທຳມະຊາດ. ສືບຕໍ່ປັບປຸງບູລະນະແລະປະຕິບັດຢ່າງມີປະສິດທິຜົນ ບັນດາກົນໄກ ນະໂຍບາຍ ຂໍ້ກຳນົດກົດໝາຍ ກ່ຽວກັບການຄຸ້ມຄອງຊັບພະຍາກອນທຳມະຊາດ ແລະການປົກປ້ອງສິ່ງແວດລ້ອມ. ແກ້ໄຂຢ່າງກົມກຽວ ສາຍພົວພັນລະຫວ່າງການພັດທະນາເສດຖະກິດ-ສັງຄົງ ກັບການປົກປ້ອງສະພາບແວດລ້ອມ; ປະຕິບັດຢ່າງເຂັ້ມງວດ ວິທີແກ້ໄຂເພື່ອປ້ອງກັນແລະຕ້ານມົນລະພິດສິ່ງແວດລ້ອມ. ຍູ້ແຮງການຮ່ວມມືສາກົນ ແລະນຳໃຊ້ຊັບພະຍາກອນນ້ຳຢ່າງປະຢັດ ມີປະສິດທິຜົນແລະຍືນຍົງ. ຍົກສູງຄວາມຕ້ານທານແລະການປັບຕົວຕໍ່ການປ່ຽນແປງສະພາບອາກາດ ຂອງລະບົບໂຄງສ້າງພື້ນຖານແລະຂອງພື້ນຖານເສດຖະກິດ; ຫຼຸດຜ່ອນຄວາມສ່ຽງ ແລະຄວາມເສຍຫາຍທີ່ເກີດຈາກການປ່ຽນແປງດິນຟ້າອາກາດ, ສະພາບອາກາດຜິດປົກກະຕິ, ໄພທຳມະຊາດ, ລົມພະຍຸ, ນ້ຳຖ້ວມ, ໄພແຫ້ງແລ້ງ, ການບຸກລຸກຂອງນ້ຳເຄັມ...ໃນບັນດາສະຖານທີ່ສຳຄັນ, ໂດຍສະເພາະໃນເຂດພູດອຍພາກເໜືອ, ພາກກາງ, ໄຕງວຽນ ແລະເຂດທົ່ງພຽງແມ່ນ້ຳຂອງ. ສູ້ຊົນຮອດປີ 2030, ຈະບັນລຸໂດຍພື້ນຖານບັນດາເປົ້າໝາຍການພັດທະນາແບບຍືນຍົງ (SDG) ກ່ຽວກັບຊັບພະຍາກອນມະນຸດ, ສິ່ງແວດລ້ອມແລະການຮັບມືກັບການປ່ຽນແປງສະພາບອາກາດ.
8- ສືບຕໍ່ປັບປຸງການປ້ອງກັນປະເທດແລະປ້ອງກັນຄວາມໝັ້ນຄົງ, ຍົກສູງປະສິດທິຜົນຂອງວຽກງານການຕ່າງປະເທດ, ການເຊື່ອມໂຍງສາກົນ, ສ້າງສິ່ງແວດລ້ອມສັນຕິພາບ ສະຖຽນລະພາບ ແລະອຳນວຍຄວາມສະດວກໃຫ້ແກ່ການພັດທະນາປະເທດ. ຕັ້ງໝັ້ນແລະເດັດດ່ຽວຕໍ່ສູ້ປົກປ້ອງເອກະລາດ ອຳນາດອະທິປະໄຕ ເອກະພາບ ແລະຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ. ສືບຕໍ່ກໍ່ສ້າງທ່າສະໜາມປ້ອງກັນປະເທດທົ່ວປວງຊົນ, ທ່າສະໜາມປ້ອງກັນຄວາມໝັ້ນຄົງປະຊາຊົນຢ່າງໝັ້ນຄົງ ແລະ ການກໍ່ສ້າງກອງທັບປະຊາຊົນ, ກຳລັງຕຳຫຼວດປະຊາຊົນປະຕິວັດທີ່ເປັນລະບຽບຫຼວງ ມີຄວາມສາມາດສູ້ຮົບເກັ່ງ ແລະທັນສະໄໝເທື່ອລະກ້າວ. ສົມທົບຢ່າງແໜ້ນແຟ້ນລະຫວ່າງ ການພັດທະນາເສດຖະກິດ ວັດທະນະທຳ ສັງຄົມ ກັບການປັບປຸງ ເພີ່ມທະວີການປ້ອງກັນປະເທດ, ປ້ອງກັນຄວາມໝັ້ນຄົງ ໃນແຕ່ລະເຂດ, ໃນບັນດາພື້ນທີ່ຍຸດທະສາດ, ຊາຍແດນ, ທະເລໝູ່ເກາະ, ເຂດເສດຖະກິດທີ່ສຳຄັນ. ເປັນເຈົ້າການໃນການປ້ອງກັນແລະກີດກັ້ນປະກົດການ “ຫັນປ່ຽນຕົນເອງ”, “ປ່ຽນແປງຕົນເອງ” ຢູ່ພາຍໃນ; ຕໍ່ສູ້ຢ່າງທັນການແລະປາບປາມອາດຊະຍາກຳທຸກປະເພດຢ່າງມີປະສິດຕິຜົນ; ຫຼຸດຜ່ອນອຸບັດຕິເຫດຈາລະຈອນ, ໄຟໄໝ້ແລະການລະເບີດ. ຍູ້ແຮງແລະຍົກສູງປະສິດທິຜົນຂອງວຽກງານການຕ່າງປະເທດ ຕິດກັບການເປັນເຈົ້າການແລະຕັ້ງໜ້າເຊື່ອມໂຍງສາກົນ. ຍູ້ແຮງແລະຍົກສູງລະດັບການຕ່າງປະເທດພະຫຸພາຄີ ໂດຍສົມທົບຢ່າງແໜ້ນແຟ້ນກັບການຕ່າງປະເທດທະວິພາຄີ, ເສີມຂະຫຍາຍບົດບາດຂອງຕົນໃນອາຊຽນ, ສະຫະປະຊາຊາດ ແລະບັນດາຂອບການຮ່ວມມືພາກພື້ນ, ສາກົນ. ນຳໃຊ້ໂອກາດທີ່ດີຈາກການເຊື່ອມໂຍງ, ໂດຍສະເພາະແມ່ນບັນດາສັນຍາການຄ້າເສລີທີ່ໄດ້ເຊັນ; ໃຫ້ຄວາມສຳຄັນແກ່ການຍົກສູງຄວາມສາມາດເຊື່ອມໂຍງ, ການແກ້ໄຂຂໍ້ຂັດແຍ່ງດ້ານການຄ້າ ແລະການລົງທຶນລະຫວ່າງປະເທດ. ເຮັດເປັນຢ່າງດີ ການປົກປ້ອງພົນລະເມືອງ ແລະຊາວຫວຽດນາມຢູ່ຕ່າງປະເທດ; ເພີ່ມທະວີວຽກງານຂໍ້ມູນຂ່າວສານຕ່າງປະເທດ; ຍົກສູງກຽດສັກສີແລະບົດບາດທີ່ຕັ້ງຂອງຫວຽດນາມໃນເວທີໂລກຢ່າງບໍ່ຢຸດຢັ້ງ.
9- ສືບຕໍ່ສ້າງແລະປັບປຸງບູລະນະລັດແຫ່ງອຳນາດກົດໝາຍສັງຄົມນິຍົມ; ຍູ້ແຮງການປະຕິຮູບການບໍລິຫານ; ເພີ່ມທະວີການປ້ອງກັນແລະຕ້ານການສໍ້ລາດບັງຫຼວງ, ປະຕິບັດການປະຢັດ, ຕ້ານການໃຊ້ຈ່າຍຟຸມເຟືອຍ. ປັບປຸງບູລະນະຢ່າງຕໍ່ເນື່ອງຄວບຄູ່ໄປກັບການຍົກສູງປະສິດທິພາບແລະປະສິດທິຜົນ ຂອງການບັງຄັບໃຊ້ກົດໝາຍ ໃນທິດທາງຂອງຄວາມເປັນເອກະພາບ ຄົບຊຸດ ໂປ່ງໃສ ສະຖຽງລະພາບ ຄ່າໃຊ້ຈ່າຍໃນການປະຕິບັດຕາມຕໍ່າ, ມີຄວາມສາມາດໃນການແຂ່ງຂັນໃນພາກພື້ນແລະສາກົນ. ສຸມໃສ່ການກໍ່ສ້າງພື້ນຖານການບໍລິຫານລັດທີ່ປອດໃສ ເຂັ້ມແຂງ ເປັນເອກະພາບ ທະລຸລົ່ງ ມີປະສິດທິພາບແລະປະສິດທິຜົນ. ກໍ່ສ້າງຖັນແຖວພະນັກງານ ພາລະກອນ ລັດຖະກອນ ທີ່ມີຫົວໃຈ ວິໄສທັດ, ມີຄຸນນະພາບດີ ແລະມີຄຸນວຸດທິວິຊາຊີບສູງ, ປະຕິບັດໜ້າທີ່ທີ່ໄດ້ຮັບມອບໝາຍເປັນຢ່າງດີ. ເປີດກວ້າງປະຊາທິປະໄຕ ໄປຄຽງຄູ່ກັບການເພີ່ມທະວີລະບຽບວິໄນ; ເພີ່ມທະວີການປົກປ້ອງລະບອບສັງຄົມນິຍົມ, ຜົນປະໂຫຍດຂອງລັດ, ສິດແລະຜົນປະໂຫຍດອັນຊອບທຳ ຖືກກົດໝາຍຂອງບັນດາສຳນັກງານ ອົງການຈັດຕັ້ງ ແລະບຸກຄົນ. ສືບຕໍ່ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຕ້ານການໃຊ້ຈ່າຍຟຸມເຟືອຍ ແລະ ປະຕິບັດການປະຢັດ ຢ່າງເດັດດ່ຽວ ໝັ້ນໜຽວ ແລະມີປະສິດທີຜົນ. ຍົກສູງປະສິດທິຜົນຂອງວຽກງານການຕິດຕາມກວດກາ, ກວດກາ, ກວດສອອບ, ແກ້ໄຂການຮ້ອງທຸກ ຮ້ອງຟ້ອງຂອງພົນລະເມືອງ; ບໍ່ເຮັດໃຫ້ການພົວພັນທາງເສດຖະກິດ ການບໍລິຫານແລະພົນລະເຮືອນ ກາຍເປັນອາຊະຍາກຳ. ສົ່ງເສີມບົດບາດຂອງການຕິດຕາມກວດກາ, ການວິຈານສັງຄົມ, ຮູບແບບການປົກຄອງຕົນເອງຂອງຊຸມຊົນ ແລະວິທີການໄກ່ເກ່ຍຂັ້ນຮາກຖານ. ເອົາໃຈໃສ່ເຮັດວຽກງານການສື່ສານຂໍ້ມູນ ແລະການຂົນຂວາຍປະຊາຊົນ ໃຫ້ໄດ້ເປັນຢ່າງດີ, ເສີມຂະຫຍາຍບົດບາດຂອງແນວໂຮມປະເທດຊາດຫວຽດນາມ, ຂອງບັນດາອົງການຈັດຕັ້ງການເມືອງ-ສັງຄົມ ແລະອົງຄະນະມະຫາຊົນ, ປະກອບສ່ວນສ້າງສັນທາມະຕິທາງສັງຄົມ ໃນການປະຕິບັດບັນດາແຜນນະໂຍບາຍ, ແນວທາງ ນະໂຍບາຍ ກົດໝາຍ ຂອງພັກກອມມູນິດຫວຽດນາມ ແລະລັດຫວຽດນາມສັງຄົມນິຍົມ.
***
ຫວຽດນາມກຳລັງປະເຊີນໜ້າກັບກາລະໂອກາດແລະເງື່ອນໄຂອັນສະດວກໃໝ່, ແຕ່ກໍ່ເຕັມໄປດ້ວຍຄວາມຫຍຸ້ງຍາກແລະສິ່ງທ້າທາຍ, ມັນຮຽກຮ້ອງໃຫ້ພັກກອມມູນິດຫວຽດນາມແລະປະຊາຊົນຫວຽດນາມ ຕ້ອງສືບຕໍ່ປ່ຽນແປງໃໝ່ຢ່າງແຂງແຮງ, ຍຸ້ແຮງການປັບປຸງບູລະນະລະບຽບກົດໝາຍເສດຖະກິດຕະຫຼາດກຳນົດທິດສັງຄົມນິຍົມ; ເພີ່ມທະວີການປະຢຸກໃຊ້ຄວາມກ້າວໜ້າທາງວິທະຍາສາດ ເຕັກໂນໂລຊີ ແລະການປ່ຽນແປງໃໝ່ປະດິດສ້າງ; ປະຕິບັດການປ່ຽນດິຈິຕອນຢ່າງຈິງຈັງ, ກໍ່ສ້າງພື້ນຖານເສດຖະກິດດິຈິຕອນ, ສັງຄົມດິຈິຕອນ; ສຸມໃສ່ຍົກສູງຄວາມສາມາດ, ສວຍໃຊ້ໂອກາດ, ປ່ຽນທິດທາງ ແລະການຈັດຕັ້ງການເຄື່ອນໄຫວເສດຖະກິດ-ສັງຄົມຄືນໃໝ່; ເອົາຊະນະຢ່າງໄວແລະແກ້ໄຂຜ່ານຜ່າຜົນກະທົບຈາກການລະບາດຂອງໄວຣັດໂຄວິດ-19, ຟື້ນຟູເສດຖະກິດແລະພັດທະນາເສດຖະກິດຢ່າງໄວວາແລະຍືນຍົງ. ດ້ວຍຄວາມເຊື່ອໝັ້ນແລະຄວາມປາດຖະໜາທີ່ຈະບືນຕົວຂຶ້ນຢ່າງແຂງແຮງຂອງປວງຊົນທັງຊາດ; ດ້ວຍເຈດຈຳນົງ, ຄວາມຕັດສິນໃຈສູງ ແລະຄວາມຕັ້ງໜ້າພະຍາຍາມຂອງທັງລະບົບການເມືອງ, ທຸກຂັ້ນ ທຸກຂະແໜງການ, ຊຸມຊົນວິສາຫະກິດແລະປະຊາຊົນທົ່ວປະເທດ, ຫວຽດນາມຈະບັນລຸເປົ້າໝາຍຍຸດທະສາດຮອດປີ 2030 ແລະວິໄສທັດຮອດປີ 2045 ຢ່າງແນ່ນອນ, ເຮັດໃຫ້ຫວຽດນາມກາຍເປັນປະເທດທີ່ພັດທະນາ ມີລາຍໄດ້ສູງ, ມຸ່ງສູ່ການສະເຫຼີມສະຫຼອງການສ້າງຕັ້ງປະເທດສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນປະເທດສາທາລະນະລັດສັງຄົມນິຍົມຫວຽດນາມ ຄົບຮອບ 100 ປີ; ຫຼຸດຊ່ອງຫວ່າງໃນການພັດທະນາກັບພາກພື້ນແລະໂລກ; ກ້າວຢ່າງໜັກແໜ້ນບົນເສັ້ນທາງການປ່ຽນແປງໃໝ່ ເຊື່ອມໂຍງແລະພັດທະນາ; ປະສົບຄວາມສຳເລັດໃນການປະຕິບັດເປົ້າໝາຍ ປພຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳແລະສິວິໄລ ທີ່ພັກ, ລັດແລະປະຊາຊົນຫວຽດນາມໄດ້ເລືອກໄວ້./.
--------------------------
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 953 (ເດືອນພະຈິກ 2020)
