ບາງບັນຫາກ່ຽວກັບການຍົກລະດັບການສະຫຼຸບສັງລວມວຽກງານກໍ່ສ້າງ
ແລະປັບປຸງພັກ ໃນສະໄໝກອງປະຊຸມໃຫຍ່ຄັ້ງທີ 12 ເພື່ອເພີ່ມເຕີມ
ແລະພັດທະນາທິດສະດີ ກ່ຽວກັບການກໍ່ສ້າງພັກກອມມູນິດຫວຽດນາມ
ແລະປັບປຸງພັກ ໃນສະໄໝກອງປະຊຸມໃຫຍ່ຄັ້ງທີ 12 ເພື່ອເພີ່ມເຕີມ
ແລະພັດທະນາທິດສະດີ ກ່ຽວກັບການກໍ່ສ້າງພັກກອມມູນິດຫວຽດນາມ
ວກ. - ການສະຫຼຸບສັງລວມແມ່ນໜ້າທີ່ສຳຄັນທີ່ສຸດ ເຊິ່ງບໍ່ພຽງແຕ່ເພື່ອປະເມີນວຽກງານທີ່ໄດ້ເຮັດຢ່າງພາວະວິໄສເທົ່ານັ້ນ, ແຕ່ຍັງຖອດຖອນບົດຮຽນທີ່ມີຄ່າໃນການຊີ້ນຳຕົວຈິງແລະເພີ່ມເຕີມ, ພັດທະນາທິດສະດີ. ຜ່ານກອງປະຊຸມໃຫຍ່ແຕ່ລະຄັ້ງ, ພັກກອມມູນິດຫວຽດນາມໄດ້ພັດທະນາທິດສະດີໃໝ່, ໃນນັ້ນມີທິດສະດີກ່ຽວກັບວຽກງານກໍ່ສ້າງພັກ, ບົນພື້ນຖານຊຸກຍູ້ການສະຫຼຸບສັງລວມພຶດຕິກຳ ແລະການຄົ້ນຄວ້າທິດສະດີ, ເອົາພຶດຕິກຳເພື່ອທົດສອບການຮັບຮູ້ໃໝ່, ປະຕິເສດຄວາມຮັບຮູ້ທີ່ບໍ່ຖືກຕ້ອງ, ລົບລ້າງຄວາມຮັບຮູ້ທີ່ລ້າສະໄໝ ເຊິ່ງການປະຕິບັດໄດ້ລື່ນກາຍແລ້ວ
ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ, ປະທານປະເທດແຫ່ງ ສສ ຫວຽດນາມ ຫງວຽນຝູຈ້ອງ ພົບປະບັນດາຜູ້ແທນທີ່ມາຮ່ວມ ກອງປະຊຸມທົ່ວປະເທດ ເພື່ອສະຫຼຸບສັງລວມວຽກງານກວດກາ, ຕິດຕາມກວດກາ ໃນສະໄໝກອງປະຊຸມໃຫຍ່ຄັ້ງທີ 12 ຂອງພັກ ແລະກຳນົດທິດທາງ, ໜ້າທີ່ໃນສະໄໝທີ 13 ຂອງພັກ _ພາບ: TTXVN
ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ມີໜ້າທີ່ສະຫຼຸບສັງລວມ 35 ປີແຫ່ງການປ່ຽນແປງໃໝ່, ເບິ່ງຄືນຫຼັງ 30 ປີແຫ່ງການຈັດຕັ້ງປະຕິບັດໂຄງການການເມືອງກໍ່ສ້າງປະເທດໃນສະໄໝຂ້າມຜ່ານຂຶ້ນສູ່ລັດທິສັງຄົມນິຍົມ (ປີ 1991), 10 ປີແຫ່ງການປະຕິບັດໂຄງການການເມືອງປີ 2011 (ສະບັບເພີ່ມເຕີມ, ພັດທະນາ), ປະເມີນການປະຕິບັດມະຕິກອງປະຊຸມໃຫຍ່ຄັ້ງທີ 12 ໃນ 5 ປີທີ່ຜ່ານມາ ເພື່ອກຳນົດວິໄສທັດຮອດປີ 2045 (ໃນໂອກາດສະເຫຼີມສະຫຼອງ 100 ປີການສ້າງຕັ້ງປະເທດສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນປະເທດສາທາລະນະລັດສັງຄົມນິຍົມຫວຽດນາມ), ເປົ້າໝາຍການພັດທະນາຮອດປີ 2030 (ສະເຫຼີມສະຫຼອງ 100 ປີການສ້າງຕັ້ງພັກກອມມູນິດຫວຽດນາມ), ເປົ້າໝາຍ, ທິດທາງ ແລະໜ້າທີ່ການພັດທະນາຮອດປີ 2025. ສິ່ງທີ່ສອດຮ້ອຍແລະຊຶມເຂົ້າໄປໃນຄວາມສຳເລັດອັນຍິ່ງໃຫຍ່ ແລະມີຄວາມສຳຄັນທາງປະຫວັດສາດຂອງປະເທດຕະຫຼອດ 35 ປີແຫ່ງການປ່ຽນແປງໃໝ່ ແລະຄວາມສຳເລັດໃນສະໄໝກອງປະຊຸມໃຫຍ່ຄັ້ງທີ 12 ນັ້ນແມ່ນຄວາມສຳເລັດຂອງວຽກງານກໍ່ສ້າງແລະປັບປຸງພັກ.
ຄວາມສຳເລັດທີ່ໂດດເດັ່ນຂອງວຽກງານກໍ່ສ້າງແລະປັບປຸງພັກໃນສະໄໝກອງປະຊຸມໃຫຍ່ຄັ້ງທີ 12 ຕ້ອງໄດ້ຮັບການສະຫຼຸບສັງລວມ ເພື່ອເພີ່ມເຕີມແລະພັດທະນາທິດສະດີ. ການເຮັດວຽກນີ້ໄດ້ດີບໍ່ພຽງແຕ່ອະທິບາຍຕົ້ນເຫດຂອງຄວາມສຳເລັດທັງໝົດເທົ່ານັ້ນ, ແຕ່ຍັງຊີ້ແຈງສາຍພົວພັນລະຫວ່າງວຽກງານກໍ່ສ້າງ, ປັບປຸງພັກ ກັບການພັດທະນາໂດຍລວມ ຂອງທຸກໆດ້ານໃນຊີວິດເສດຖະກິດແລະສັງຄົມຂອງປະເທດ. ມີບັນຫາບາງຢ່າງທີ່ຕ້ອງເນັ້ນເພື່ອຍົກລະດັບການສະຫຼຸບສັງລວມ:
1. ຕີລາຄາຖືກຕ້ອງທີ່ຕັ້ງ “ກຸນແຈ”, ຄວາມສຳຄັນພິເສດ ຂອງວຽກງານກໍ່ສ້າງພັກ
ໃນທຸກດ້ານຂອງວຽກງານປະຕິວັດ ແລະຄວາມສຳເລັດທັງໝົດ ຂອງສະໄໝກອງປະຊຸມໃຫຍ່ຄັ້ງທີ 12
ຈາກການສະຫຼຸບສັງລວມພຶດຕິກຳແລະການຄົ້ນຄວ້າທິດສະດີ, ພັກກອມມູນິດຫວຽດນາມໄດ້ສະຫຼຸບແນວຄວາມຄິດທີ່ຊີ້ນຳຂະບວນການປ່ຽນແປງໃໝ່: ການກໍ່ສ້າງພັກແມ່ນໜ້າທີ່ຫຼັກ, ການພັດທະນາເສດຖະກິດ - ສັງຄົມ ແມ່ນໜ້າທີ່ຈຸດສຸມ, ການພັດທະນາວັດທະນະທຳແມ່ນພື້ນຖານດ້ານຈິດໃຈຂອງສັງຄົມ, ການຮັບປະກັນການປ້ອງກັນຊາດ ແລະຄວາມໝັ້ນຄົງແມ່ນ ແມ່ນວຽກງານທີ່ສຳຄັນ, ເປັນປົກກະຕິ.
ວຽກງານກໍ່ສ້າງພັກຖືກກຳນົດວ່າເປັນໜ້າທີ່ “ກຸນແຈ”, ເພາະວ່າ ມັນມີຕຳແໜ່ງທີ່ສຳຄັນທີ່ສຸດ, ຕັດສິນຄວາມສຳເລັດຫຼືຄວາມລົ້ມເຫຼວຂອງການປະຕິວັດຫວຽດນາມ, ການຢູ່ລອດຂອງລະບອບສັງຄົມນິຍົມ, ຮັບປະກັນການດຳເນີນງານທາງການເມືອງທັງໝົດປະສົບຄວາມສຳເລັດ. ພັກກອມມູນິດຫວຽດນາມແມ່ນພັກກຳອຳນາດການປົກຄອງ, ນຳພາລັດແລະສັງຄົມ, ທຸກໆຜົນສຳເລັດຂອງການປະຕິວັດຫວຽດນາມລ້ວນແຕ່ເກີດຈາກບົດບາດນຳພາຂອງພັກກອມມູນິດຫວຽດນາມ, ຈາກຄວາມພະຍາຍາມເບິ່ງແຍງດູແລວຽກງານກໍ່ສ້າງພັກ, ໂດຍສະເພາະການກຳນົດແນວທາງທີ່ຖືກຕ້ອງ, ຊັດເຈນ ແລະ ການກໍ່ສ້າງຖັນແຖວພະນັກງານທີ່ມີລະດັບ ເພື່ອຈັດຕັ້ງປະຕິບັດແນວທາງໃຫ້ປະສົບຜົນສຳເລັດ. ກົງກັນຂ້າມ, ຄວາມຜິດພາດແລະຂໍ້ບົກຜ່ອງທັງໝົດມີພື້ນຖານມາຈາກການບໍ່ໃສ່ໃຈວຽກງານກໍ່ສ້າງພັກຢ່າງເໝາະສົມ, ໄດ້ເບິ່ງເບົາຫຼືຜ່ອນຄາຍບົດບາດການນຳພາຂອງພັກກອມມູນິດຫວຽດນາມ. ປະສົບການໄດ້ສະແດງໃຫ້ເຫັນວ່າ, ການປະຕິບັດໜ້າທີ່ການເມືອງທີ່ມີຜົນດີແລະມີປະສິດທິຜົນສູງ ຍາມໃດກໍ່ເປັນສັດສ່ວນກັບຄວາມຮັບຮູ້ແລະລະດັບຄວາມເອົາໃຈໃສ່ເຖິງວຽກງານກໍ່ສ້າງພັກ; ເມື່ອໃດແລະບ່ອນໃດທີ່ວຽກງານກໍ່ສ້າງພັກຖືກເບິ່ງຂ້າມ, ໃນບໍ່ຊ້າກໍ່ໄວຈະພົບຂໍ້ຜິດພາດແລະຂໍ້ບົກພ່ອງ, ໃນນັ້ນມີຂໍ້ຜິດພາດ, ຂໍ້ບົກພ່ອງທີ່ບໍ່ມີໂອກາດແກ້ໄຂຫຼືຜ່ານຜ່າ. ຂໍ້ຜິດພາດຂອງອົງການຈັດຕັ້ງ, ບຸກຄົນທີ່ຖືກຄົ້ນພົບແລະຖືກຈັດການແກ້ໄຂໃນເວລາທີ່ຜ່ານມາ ລ້ວນແຕ່ມີສາເຫດທົ່ວໄປ ຍ້ອນການເບິ່ງເບົາວຽກງານກໍ່ສ້າງພັກ, ແຍກອອກຈາກບົດບາດການນຳພາຂອງລວມໝູ່, ລະເມີດຫຼັກການລວມສູນປະຊາທິປະໄຕ.
ໂດຍມີຄວາມຮູ້ແຈ້ງເຖິງທີ່ຕັ້ງ “ກຸນແຈ”, ຄວາມສຳຄັນພິເສດຂອງວຽກງານກໍ່ສ້າງ ປັບປຸງພັກຕໍ່ພາລະກິກການປ່ຽນແປງໃໝ່ທັງໝົດ, ໃນສະໄໝກອງປະຊຸມໃຫຍ່ຄັ້ງທີ 12, ຄະນະບໍລິຫານງານສູນກາງ, ກົມການເມືອງ, ຄະນະເລຂາທິການສູນກາງພັກກອມມູນິດຫວຽດນາມ, ຄະນະພັກທຸກຂັ້ນ ໄດ້ສຸມໃສ່ນຳພາ ຊີ້ນຳການກໍ່ສ້າງ ປັບປຸງພັກຢ່າງຮອດດ້ານ, ມີຈຸດໜັກໃຈກາງ, ມຸ່ງເນັ້ນເຂົ້າທີ່ຂັ້ນຕອນສຳຄັນທີ່ຮັບປະກັນແລະເພີ່ມທະວີບົດບາດການນຳພາຂອງພັກ. ເບິ່ງຄືນສະໄໝກອງປະຊຸມໃຫຍ່ຄັ້ງທີ 12 ທີ່ຜ່ານມາໃຫ້ເຫັນວ່າ, ການຍູ້ແຮງການກໍ່ສ້າງປັບປຸງພັກໄດ້ຊຸກຍູ້ການພັດທະນາຂອງຂົງເຂດອື່ນ, ໄດ້ຮັບການຕິດຕາມ, ຄວາມຄາດຫວັງ ແລະຄວາມໄວ້ວາງໃຈ ຂອງພະນັກງານ ສະມາຊິກພັກ ແລະປະຊາຊົນ. ພິເສດ, ການກຳນົດກົນໄກການເຮັດວຽກປະຈຳເດືອນຂອງຜູ້ນຳທີ່ສຳຄັນ ແລະ ການປ່ຽນແປງໃໝ່ວິທີການນຳພາແລະແບບແຜນວິທີເຮັດວຽກຂອງຄະນະບໍລິຫານງານສູນກາງ, ກົມການເມືອງ, ຄະນະເລຂາທິການສູນກາງພັກກອມມູນິດຫວຽດນາມ ແລະຄະນະພັກທຸກຂັ້ນ,... ໄດ້ຍົກສູງໂດຍກົງ ຄວາມສາມາດນຳພາ ແລະຄວາມສາມາດກຳອຳນາດການປົກຄອງ ຂອງພັກກອມມູນິດຫວຽດນາມ. ອາໃສສິ່ງດັ່ງກ່າວນັ້ນ ບັນດາການຕັດສິນໃຈທາງການເມືອງຂອງພັກກອມມູນິດຫວຽດນາມ ໄດ້ຮັບການຫັນເປັນນິຕິກຳຢ່າງທັນການ, ຄົບຖ້ວນ ແລະ ຍົກສູງປະສິດທິຜົນໃນການຈັດຕັ້ງປະຕິບົດ; ຮັບປະກັນການນຳພາເດັດຂາດ, ໂດຍກົງໃນທຸກດ້ານ ຂອງພັກກອມມູນິດຫວຽດນາມ ຕໍ່ກຳລັງປະກອບອາວຸດ; ເພີ່ມທະວີແລະຍົກສູງປະສິດທິຜົນການນຳພາໃນວຽກງານການຕ່າງປະເທດ, ການເຊື່ອມໂຍງເຂົ້າກັບສາກົນ, ການພັດທະນາເສດຖະກິດ, ວັດທະນະທຳແລະສັງຄົມ. ຈຸດເດັ່ນທີ່ສຳຄັນຂອງໄລຍະນີ້ແມ່ນ ຄວາມສາມັກຄີເປັນເອກະພາບພາຍໃນພັກ, ຖືເອົາຄວາມສາມັກຄີໃນຄະນະບໍລິຫານງານສູນກາງ, ກົມການເມືອງ, ຄະນະເລຂາທິການ ແລະ ຄະນະພັກທຸກຂັ້ນເປັນແກນກາງ, ກ່ອນອື່ນໝົດແມ່ນຄວາມເປັນແບບຢ່າງຂອງຫົວໜ້າ, ເພື່ອເປັນພື້ນຖານປັບປຸງສາຍພົວພັນໃກ້ຊິດສະໜິດແໜ້ນລະຫວ່າງປະຊາຊົນກັບພັກແລະລັດ, ເພີ່ມທະວີກຸ່ມກ້ອນມະຫາສາມັກຄີປວງຊົນທັງຊາດ.
ຄວາມເປັນ “ກຸນແຈ” ຂອງວຽກງານກໍ່ສ້າງພັກໃນໄລຍະນີ້ ຍັງສະແດງອອກໃນຄວາມສາມາດບຸກທະລຸແລະການເປີດທາງ ຂອງວຽກງານນີ້ ເພື່ອແກ້ໄຂບັນຫາທີ່ຫຍຸ້ງຍາກ, ສັບສົນ, ອ່ອນໄຫວ. ວຽກງານພະນັກງານໄດ້ຮັບການປ່ຽນແປງໃໝ່, ຖັນແຖວພະນັກງານໄດ້ຮັບການເບິ່ງແຍງແລະກໍ່ສ້າງເປັນຢ່າງດີ, ໂດຍສະເພາະແມ່ນພະນັກງານລະດັບຍຸດທະສາດ, ເຮັດໃຫ້ຕຳແໜ່ງ “ກຸນແຈຂອງກຸນແຈ” ຂອງວຽກງານພະນັກງານໄດ້ຮັບການຢືນຢັນຢ່າງເຕັມສ່ວນແລະຊັດເຈນກວ່າອີກ, ມີບົດບາດຕັດສິນໄຊຊະນະໃນການຈັດຕັ້ງປະຕິບັດວຽກງານຂອງທຸກຂັ້ນ, ທຸກສາຂາ, ສຳນັກງານອົງການແລະໜ່ວຍງານທຸກຂັ້ນ. ວຽກງານກວດກາ, ຕິດຕາມກວດກາຂອງພັກໄດ້ຮັບການຍູ້ແຮງ ກໍໄດ້ຊຸກຍູ້ການປ່ຽນແປງໃໝ່, ຍົກສູງຄວາມຄົບຊຸດຂອງວຽກງານກວດການ, ກວດກາ, ກວດບັນຊີ, ສືບສວນ, ຮ້ອງຟ້ອງ, ພິພາກສາ ເພື່ອຮັດແໜ້ນລະບຽບວິໄນແລະກົດໝາຍ. ການປະຕິບັດຂໍ້ກຳນົດກ່ຽວກັບການເປັນຕົວຢ່າງ, ການຕໍ່ສູ້ຕ້ານຄວາມຫຍໍ້ທໍ້, ອາດຍາສິດ, ສໍ້ລາດບັງຫຼວງ ໄດ້ສົ່ງເສີມຄວາມຊື່ສັດໃນການບໍລິການສາທາລະນະ, ຄວາມຊື່ສັດທາງທຸລະກິດ, ເພີ່ມທະວີຄວາມໄວ້ວາງໃຈຂອງປະຊາຊົນໃນພັກກອມມູນິດຫວຽດນາມ, ລັດຫວຽດນາມ ແລະລະບອບສັງຄົມນິຍົມ. ການຕ້ານການສໍ້ລາດບັງຫຼວງຢ່າງບໍ່ມີເຂດຫ້າມ, ບໍ່ມີຂໍ້ຍົກເວັ້ນ ໄດ້ສ້າງສະພາບແວດລ້ອມທີ່ດີ ໃຫ້ກັບວິສາຫະກິດທີ່ແທ້ຈິງ ໃນການລົງທຶນແລະທຳການທຸລະກິດດ້ວຍຄວາມອຸ່ນໃຈ, ເຕືອນແລະກີດຂວາງ “ກຸ່ມຜົນປະໂຫຍດ” ທີ່ສະແຫວງຫາປະໂຫຍດຈາກນະໂຍບາຍແລະໄດ້ປຽບ ໃນການເຂົ້າເຖິງຊັບພະຍາກອນການພັດທະນາ, ເຮັດໃຫ້ເກີດຄວາມບໍ່ຍຸດຕິທຳໃນການຈັດສັນຊັບພະຍາກອນສັງຄົມ.
ຄວາມເປັນຈິງຂ້າງເທິງໄດ້ຊ່ວຍໃຫ້ພັກກອມມູນິດຫວຽດນາມ ມີບົດຮຽນລ້ຳຄ່າກ່ຽວກັບວຽກງານກໍ່ສ້າງພັກ, ໂດຍສະເພາະແມ່ນ ຕ້ອງມີຄວາມຮັບຮູ້ຢ່າງຖືກຕ້ອງແລະວາງຕຳແໜ່ງ “ກຸນແຈ” ຂອງວຽກງານກໍ່ສ້າງພັກ ໃນພາລະກິດການປ່ຽນແປງໃໝ່ທັງໝົດ ໃຫ້ຖືກທີ່. ຍິ່ງຊຸກຍູ້ການປ່ຽນແປງໃໝ່ຢ່າງຄົບຊຸດ ຮອບດ້ານ, ຍິ່ງຕ້ອງເອົາໃຈໃສ່ຢ່າງແທ້ຈິງເຖິງວຽກງານກໍ່ສ້າງພັກ ດ້ວຍຄວາມເອົາໃຈໃສ່ຈາກສູນກາງຈົນເຖິງແຕ່ລະໜ່ວຍພັກ, ຈາກຫົວໜ້າພັກເຖິງສະມາຊິກພັກແຕ່ລະຄົນ. ການກໍ່ສ້າງພັກກອມມູນິດຫວຽດນາມໃຫ້ມີຄວາມສະອາດປອດໃສ, ໝັ້ນຄົງເຂັ້ມແຂງ ແມ່ນພື້ນຖານເພື່ອປະຕິບັດໜ້າທີ່ທາງການເມືອງທັງໝົດໃຫ້ສຳເລັດ; ຕ້ອງໃຫ້ຄວາມສຳຄັນທີ່ສຸດ ຕໍ່ວຽກງານກໍ່ສ້າງພັກ, ບໍ່ໄດ້ລະເລີຍ ເບິ່ງເບົາວຽກງານນີ້ພຽງນາທີດຽວ.
2- ຊີ້ແຈງຄວາມເປັນຈຸດສຸມ, ໃຈກາງ ໃນຂະນະດຳເນີນການກໍ່ສ້າງພັກຢ່າງຮອບດ້ານ
ກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ ໃນເມື່ອກຳນົດບັນດາໜ້າທີ່ສະເພາະ, ຮອບດ້ານ(1) ຂອງວຽກງານກໍ່ສ້າງພັກ ໄດ້ຊີ້ໃຫ້ເຫັນແຈ້ງບັນດາໜ້າທີ່ຈຸດສຸມຄື: ກີດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ, ບັນດາປະກົດການ “ການປ່ຽນແປນຕົນເອງ”, “ການຫັນປ່ຽນຕົນເອງ” ພາຍໃນ; ສຸມໃສ່ການກໍ່ສ້າງຖັນແຖວພະນັກງານ, ໂດຍສະເພາະ ພະນັກງານລະດັບຍຸດທະສາດ, ໃຫ້ມີຄວາມສາມາດ, ຄຸນສົມບັດເໝາະສົມແລະມິີຊື່ສຽງ, ທຽບເທົ່າກັບລະດັບໜ້າທີ່; ກໍ່ສ້າງການຈັດຕັ້ງກົງຈັດຂອງລະບົບການເມືອງທັງໝົດ ໃຫ້ມີຄວາມກະທັດລັດ,ເຄື່ອນໄຫວຢ່າງມີປະສິດທິພາບແລະປະສິດທິຜົນ; ຍູ້ແຮງການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ອາດຍາສິດ, ໃຊ້ຈ່າຍຟຸມເຟືອຍ (2).
ລັກສະນະຮອບດ້ານຮຽກຮ້ອງໃຫ້ວຽກງານກໍ່ສ້າງພັກຕ້ອງກວມເອົາທຸກດ້ານ, ບໍ່ສາມາດເນັ້ນດ້ານນີ້ເກີນໄປແລະເບິ່ງເບົາດ້ານອື່ນ. ຍ້ອນວ່າ, ແຕ່ລະດ້ານຂອງວຽກງານກໍ່ສ້າງພັກມີບົດບາດແລະຖານະຂອງຕົນເອງ, ມີສາຍພົວພັນສັດຈະວິພາກກັບອີກດ້ານໜຶ່ງ, ແລະມີຄວາມເຂັ້ມແຂງເພື່ອຍົກສູງປະສິດທິພາບໂດຍລວມ, ພ້ອມກັນສົມທົບກຳລັງເພື່ອຍົກສູງປະສິດທິຜົນໂດຍລວມ. ຖ້າດ້ານໜຶ່ງ, ຂັ້ນຕອນໜຶ່ງບໍ່ໄດ້ຮັບຄວາມເອົາໃຈໃສ່ ຈະເປັນການກີດກັ້ນອີກດ້ານ ຂັ້ນຕອນອື່ນໆ ແລະສົ່ງຜົນກະທົບຕໍ່ຜົນໄດ້ຮັບລວມ. ຍິ່ງກວ່ານັ້ນ, ຕ້ອງບົນພື້ນຖານການກໍ່ສ້າງພັກຢ່າງຮອບດ້ານ ຈຶ່ງຄົ້ນພົບດ້ານຕົ້ນຕໍແລະສາຍພົວພັນທາດແທ້ ເພື່ອລວມສູນການຊີ້ນຳ ນຳພາ ແລະໃຫ້ບຸລິມະສິດແຫຼ່ງພະລັງເພື່ອແກ້ໄຂ. ລັກສະນະຮອບດ້ານແຕກຕ່າງຈາກທີວະນິຍົມ, ເຖິງວ່າຈະກວມເອົາທຸກດ້ານ,ແຕ່ມັນເປັນພຽງແຕ່ການປະສົມປະສານແບບບັງຄັບ ກົນຈັກຂອງພວກມັນ ໂດຍບໍ່ຊີ້ໃຫ້ເຫັນດ້ານຕົ້ນຕໍ, ບໍ່ສາມາດສຸມໃສ່ບັນດາບັນຫາທີ່ມີລັກສະນະທາດແທ້. ລັກສະນະຮອບດ້ານກໍ່ກົງກັນຂ້າມກັບລັກສະນະດ້ານດຽວ, ເຫັນພຽງດ້ານໃດໜຶ່ງ, ເຖິງວ່ານັ້ນແມ່ນດ້ານສຳຮອງ, ບໍ່ອະນຸຍາດໃຫ້ກຳນົດທຸກດ້ານຂອງສາຍພົວພັນແຜ່ຫຼາຍທົ່ວໄປ, ດັ່ງນັ້ນເມື່ອແກ້ໄຂໂດຍລວມ ແລະການຈັດການໃນພາກປະຕິບັດມັກຈະຕົກໃສ່ຄວາມຜິດພາດອັດຕະວິໄສ, ບໍ່ໄດ້ຮັບຜົນທີ່ຕ້ອງການ.
ວຽກງານກໍ່ສ້າງ, ປັບປຸງພັກໃນໄລຍະກອງປະຊຸມໃຫຍ່ຄັ້ງທີ 12 ໄດ້ສະແດງເຖິງຄວາມຮອບດ້ານແລະສຸມໃສ່ບັນດາໜ້າທີ່ຈຸດໜັກໃຈກາງ ດ້ວຍຄວາມຕັດສິນໃຈການເມືອງສູງ, ຄວາມມານະພະຍາຍາມຢ່າງໃຫຍ່ຫຼວງ ແລະການປະຕິບັດຢ່າງເດັດຂາດ. ໜ້າທີ່ຈຸດໜັກໃຈກາງຂອງວຽກງານກໍ່ສ້າງແລະປັບປຸງພັກ ໄດ້ສຸມໃສ່ການແກ້ໄຂບັນຫາທັງພື້ນຖານ ທັງຮີບດ່ວນ ແລະບັນລຸໄດ້ໝາກຜົນທີ່ຈະແຈ້ງ, ສ້າງເງື່ອນໄຂເພື່ອປູທາງ, ບາດກ້າວບຸກທະລຸ ສຳລັບຂົງເຂດອື່ນໆ. ການປັບປຸງແລະເພີ່ມທະວີຄວາມສາມັກຄີເປັນເອກະພາບພາຍໃນ, ຍົກສູງຄວາມກ້າຫານທາງການເມືອງ, ປ່ຽນແປງໃໝ່ແບບວິທີການນຳພາຂອງພັກກອມມູນິດຫວຽດນາມ,... ແມ່ນພື້ນຖານເພື່ອຍົກສູງຄວາມສາມາດນຳພາຮອບດ້ານຂອງພັກ, ໂດຍສະເພາະແມ່ນ ການຈັດການກັບບັນດາບັນຫາຫຍຸ້ງຍາກສັບສົນກ່ຽວກັບການຕ່າງປະເທດແລະວຽກງານພາຍໃນ. ການກີດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ແບບແຜນດຳລົງຊີວິດ ຕິດກັບການຮ່ຳຮຽນແລະປະຕິບັດຕາມແນວຄິດ, ຄຸນສົມບັດສິນທຳ ແລະແບບແຜນໂຮ່ຈີມິນ, ປະຕິບັດການຕິຊົມຕົນເອງແລະຕິຊົມ ມີຜົນຕໍ່ການແກ້ໄຂປະກົດການຜິດເຂວໃນການຮັບຮູ້, ຫຼົງລະເຫຼີງໃນວິຖີຊີວິດ, ເສື່ອມໂຊມທາງສິນທຳ ໃນສ່ວນໜຶ່ງຂອງພະນັກງານ ສະມາຊິກພັກ. ວຽກງານກໍ່ສ້າງພັກທາງດ້ານຄຸນສົມບັດສິນທຳໃນໄລຍະກອງປະຊຸມໃຫຍ່ຄັ້ງທີ 12 ຖືກຖືວ່າເປັນການເພີ່ມເຕີມພັດທະນາຂໍ້ຄິດທິດສະດີທີ່ວ່າ “ພັກເຮົາແມ່ນຄຸນສົມບັດ, ແມ່ນອາລະຍະທຳ” ຂອງປະທານໂຮ່ຈີມິນ, ໄດ້ສົມທົບຢ່າງກົມກຽວກັບການເພີ່ມທະວີປະສິດທິພາບຂອງລະບຽບວິໄນຂອງພັກ ແລະປະສິດທິພາບຂອງກົດໝາຍຂອງລັດ ເພື່ອສ້າງປະສິດທິພາບໂດຍລວມ ໃນການສຶກສາແລະຝຶກອົບຮົມພະນັກງານ ສະມາຊິກພັກ. ການກີດກັ້ນແລະຍູ້ຖອຍປະກົດການ “ການປ່ຽນແປງຕົນເອງ”, “ການຫັນປ່ຽນຕົນເອງ” ພາຍໃນ ແລະການຕໍ່ສູ້ປະຕິເສດບັນດາທັດສະນະທີ່ຜິດພາດ ເປັນປໍລະປັກ ຕາມມະຕິເລກທີ 35-NQ/TW, ວັນທີ 22 ຕຸລາ 2018, ຂອງກົມການເມືອງສູນກາງ, “ກ່ຽວກັບການເພີ່ມທະວີການປົກປັກຮັກສາພື້ນຖານແນວຄິດຂອງພັກ, ຕໍ່ສູ້ປະຕິເສດບັນດາທັດສະນະທີ່ຜິດພາດ, ເປັນປໍລະປັກໃນສະພາບການໃໝ່”, ໄດ້ຮັບການຜັນຂະຫຍາຍຢ່າງຮີບເຮັ່ງ ປະກອບສ່ວນປົກປັກຮັກສາພື້ນຖານແນວຄິດແລະແນວທາງ ຂອງພັກກອມມູນິດຫວຽດນາມ, ສ້າງຄວາມເປັນເອກະພາບທາງດ້ານແນວຄິດໃນທົ່ວພັກກອມມູນິດຫວຽດນາມ. ການປ່ຽນແປງໃໝ່ແລະປັບປຸງວຽກງານການຈັດຕັ້ງແລະພະນັກງານ ມີຄຸນປະໂຫຍດໃນການຟື້ນຟູລະບຽບວິໄນ, ເອົາຊະນະສະຖານະການ “ວິ້ງເຕັ້ນຫານຕຳແໜ່ງ, ວິ້ງເຕັ້ນຫາອຳນາດ” ໄດ້ຢ່າງມີປະສິດທິພາບ, ການຈັດກົງຈັກໃຫ້ກະທັດລັດແລະການຫຼຸດຜ່ອນຈຳນວນພະນັກງານ ໄດ້ສ້າງສະພາບແວດລ້ອມທີ່ດີໃຫ້ພະນັກງານສູ້ຊົນ, ອຸທິດ, ພັດທະນາ, ຫຼຸດຜ່ອນຂອດລະຫວ່າງກາງທີ່ເປັນຜົນກະທົບຕໍ່ການຊີ້ນຳ ນຳພາແລະການຄຸ້ມຄອງລວມສູນເປັນເອກະພາບ, ປະກອບສ່ວນຍົກສູງປະສິດທິພາບ, ປະສິດທິຜົນການເຄື່ອນໄຫວຂອງລະບົບການເມືອງທັງໝົດ. ຖັນແຖວພະນັກງານລະດັບຍຸດທະສາດໄດ້ຮັບຄວາມເອົາໃຈໃສ່ເປັນພິເສດ ແລະໄດ້ຮັບການຝຶກອົບຮົມຢ່າງດີ, ສ້າງການຫັນປ່ຽນຢ່າງຈະແຈ້ງ, ເຮັດໃຫ້ຂອດ “ກຸນແຈ” ຂອງໜ້າທີ່ຫຼັກແຫຼ່ງຄືການກໍ່ສ້າງພັກ ໄດ້ຮັບການຍົກລະດັບໃຫ້ສູງຂຶ້ນ ແລະໄດ້ຮັບການຢືນຢັນຢ່າງຈະແຈ້ງ. ວຽກງານກວດກາ, ກວດການ, ຕິດຕາມກວດກາ, ກວດບັນຊີ, ສືບສວນ, ຮ້ອງຟ້ອງ, ພິພາກສາຄະດີ, ການຈັດການຄະດີສໍ້ລາດບັງຫຼວງ, ການໃຊ້ຈ່າຍຟຸມເຟືອຍ ໄດ້ຮັບການຊີ້ນຳຢ່າງເຂັ້ມງວດ, ແໜ້ນແຟ້ນ, ຄົບຊຸດ, ມີປະສິດທິຜົນ, ເຮັດໃຫ້ລະບຽບວິໄນຂອງພັກກອມມູນິດຫວຽດນາມ, ຫຼັກການອຳນາດກົດໝາຍສັງຄົມນິຍົມໄດ້ຮັບການເພີ່ມທະວີ ແລະມີຜົນສັກສິດຕົວຈິງ. ວຽກງານການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ໄດ້ຮັບການດຳເນີນດ້ວຍຄວາມຕັດສິນໃຈການເມືອງສູງທີ່ສຸດ ແລະປະສົບຄວາມສຳເລັດທີ່ສຳຄັນທີ່ສຸດ, ດ້ວຍເຄື່ອງໝາຍທີ່ໂດດເດັ່ນຫຼາຍຢ່າງ, ປະກອບສ່ວນກໍ່ສ້າງພັກກອມມູນິດ ແລະລະບົບການເມືອງໃຫ້ສະອາດປອດໃສ, ໝັ້ນຄົງເຂັ້ມແຂງ, ມີການກ່າວເຕື່ອນແລະບັງຄັບໃຊ້ສຳລັບຜູ້ທີ່ບໍ່ເອົາໃຈໃສ່ຕໍ່ລະບຽບວິໄນແລະກົດລະບຽບຂອງປະເທດ, ປະກອບສ່ວນປັບປຸງແລະຍົກສູງຄວາມເຊື່ອໝັ້ນຂອງປະຊາຊົນຕໍ່ພັກແລະລະບອບສັງຄົມນິຍົມ.
ຄວາມຈິງທີ່ກ່າວມາຂ້າງເທິງນັ້ນ ໄດ້ເຕືອນໃຫ້ຊາວກອມມູນິດວຽດນາມວ່າ, ບໍ່ວ່າເວລາໃດແລະຢູ່ບ່ອນໃດກໍ່ຕ້ອງເອົາໃຈໃສ່ການກໍ່ສ້າງພັກຢ່າງຮອບດ້ານ, ມີວິທີເຮັດທີ່ຖືກຕ້ອງ, ແບບແຜນ, ວິທະຍາສາດ, ດຳເນີນການຢ່າງມີຈຸດໜັກໃຈກາງ ດ້ວຍບາດກ້າວແລະເສັ້ນທາງທີ່ເໝາະສົມ. ຕ້ອງກີດກັ້ນລັດທິທີວະນິຍົມ, ຕີລວາດກວາດພຽງທຸກບັນຫາ, ຈັດວາງຢ່າງສັບສົນປົນເປ, ບໍ່ກຳນົດແຈ້ງເນື້ອໃນຕົ້ນຕໍ, ໜ້າທີ່ຈຸດໜັກໃຈກາງ, ການບຸກທະລຸ, ເຮັດໃຫ້ແຫຼ່ງຊັບພະຍາກອນຖືກກະຈັດກະຈາຍ ແລະ ດຳເນີນງານຢ່າງບໍ່ມີປະສິດທິຜົນ. ພ້ອມກັນນັ້ນ, ຕ້ອງຕ້ານພະຍາດດ້ານດຽວໃນວຽກງານກໍ່ສ້າງພັກ, ການເບິ່ງແລະຈັດການແກ້ໄຂພຽງດ້ານໜຶ່ງ, ສ່ວນໜຶ່ງ, ແມ່ນແຕ່ສ່ວນໜ້ອຍ, ບໍ່ກະທົບຖືກກັບເນື້ອແທ້ຂອງບັນຫາ, ຕົກໃສ່ລັດທິຮູບການ ແລະ ດັ່ງນັ້ນ ຈຶ່ງບໍ່ໃຫ້ຜົນຕາມທີ່ຕ້ອງການ.
3- ການສະຫຼຸບສັງລວມບັນດາສາຍພົວພັນໃຫຍ່
ທີ່ສະທ້ອນເຖິງບັນດາບັນຫາທີ່ມີລັກສະນະກົດເກນ ຂອງວຽກງານກໍ່ສ້າງພັກ
ຈາກຄວາມເປັນຈິງຂອງວຽກງານກໍ່ສ້າງພັກໃນໄລຍະທີ່ຜ່ານມາມໍ່ນີ້, ໂດຍສະເພາະແມ່ນໄລຍະກອງປະຊຸມໃຫຍ່ຄັ້ງທີ 12, ຕ້ອງການລົງເລິກບັນດາສາຍພົວພັນໃຫຍ່ທີ່ສະທ້ອນເຖິງບັນດາບັນຫາທີ່ມີລັກສະນະກົດເກນຂອງວຽກງານກໍ່ສ້າງພັກ, ຢ່າງໜ້ອຍແມ່ນບັນດາສາຍພົວພັນລຸ່ມນີ້:
ທີໜຶ່ງ, ລະຫວ່າງການຢຶດໝັ້ນຫຼັກໝັ້ນ, ຢຶດໝັ້ນບັນດາບັນຫາທີ່ມີລັກສະນະຫຼັກການ ກັບການປ່ຽນແປງໃໝ່.
ຜົນສຳເລັດຂອງການກໍ່ສ້າງພັກໃນໄລຍະດັ່ງກ່າວ ມີເຫດຜົນພື້ນຖານເລີ່ມຈາກການຈັດການຢ່າງຖືກຕ້ອງ ກັບສາຍພົວພັນລະຫວ່າງ ການຢຶດໝັ້ນແລະການປ່ຽນແປງໃໝ່. ພັກກອມມູນິດຫວຽດນາມຢືນຢັນແນວທາງການປ່ຽນແປງໃໝ່ຢ່າງຮອບດ້ານ ຄົບຊຸດ, ບົນພື້ນຖານຢຶດໝັ້ນລັດທິມາກ-ເລນິນ, ແນວຄິດໂຮ່ຈີມິນ, ຢຶດໝັ້ນເປົ້າໝາຍເອກະລາດແຫ່ງຊາດ ຕິດແໜ້ນກັບລັດທະສັງຄົມນິຍົມ, ຕັ້ງໝັ້ນບັນດາຫຼັກການການປ່ຽນແປງໃໝ່. ການຢຶດໝັ້ນແມ່ນການຮັກສາຫຼັກໝັ້ນ ຫຼັກການໄວ້ໃຫ້ໝັ້ນຄົງ, ບໍ່ເອນອ່ຽງ ບໍ່ສັ່ນຄອນໃນທຸກສະພາບການ, ຮັບຮອງວ່າການປ່ຽນແປງໃໝ່ໄດ້ດຳເນີນໄປໃນທິດທາງທີ່ຖືກຕ້ອງ ດ້ວຍບາດກ້າວ ເສັ້ນທາງທີ່ເໝາະສົມແລະໜັກແໜ້ນ. ການຢຶດໝັ້ນໃນຫຼັກໝັ້ນ, ຫຼັກການບໍ່ພຽງແຕ່ບໍ່ກຳຈັດ, ແຕ່ກົງກັນຂ້າມ ໄດ້ສົ່ງເສີມການຊອກຫາປ່ຽນແປງໃໝ່ສະເໝີ. ການຊອກຫາປ່ຽນແປງໃໝ່ໃນທຸກໆຂົງເຂດ ແລະ ຢູ່ບ່ອນໃດກໍ່ຕ້ອງຢຶດໝັ້ນໃນຫຼັກການ, ຢຶດມັ້ນໃນບັນດາບັນຫາທີ່ມີລັກສະນະຫຼັກການ ເພື່ອມີພື້ນຖານແນວຄິດທີ່ໜັກແໜ້ນ, ມີທິດທາງທີ່ຖືກຕ້ອງແລະຕ້ອງສູ້ຊົນ ເພື່ອເປົ້າໝາຍທີ່ດີນັ້ນ. ດັ່ງນັ້ນ, ການຢຶດໝັ້ນໃນຫຼັກໝັ້ນ ຫຼັກການນັ້ນ ຕ້ອງຕິດແໜ້ນກັບການຕ້ານການອະນຸລັກນິຍົມ ຕ້ານການຫຼ້າຊ້າ; ການຊອກຫາປ່ຽນແປງໃໝ່ຕ້ອງໄປຄຽງຄູ່ກັບການຕໍ່ສູ້ກັບການສວຍໂອກາດທາງການເມືອງໃນທຸກສີສັນ.
ທີສອງ, ລະຫວ່າງການລວມສູນແລະປະຊາທິປະໄຕ, ຍິ່ງເສີມຂະຫຍາຍປະຊາທິປະໄຕຢ່າງກວ້າງຂວາງ ຍິ່ງຕ້ອງລວມສູນເປັນເອກະພາບ.
ໃນໄລຍະກອງປະຊຸມໃຫຍ່ຄັ້ງທີ 12, ພັກກອມມູນິດຫວຽດນາມໄດ້ມີບາດກ້າວທີ່ສຳຄັນໃນການຫັນຫຼັກການລວມສູນປະຊາທິປະໄຕເປັນຂໍ້ກຳນົດທີ່ລະອຽດ, ໂດຍສະເພາະແມ່ນ ໃນບັນຫາສຳຄັນຈຳນວນໜຶ່ງ ເຊັ່ນ: ການນຳພາລວມໝູ່ແລະບຸກຄົນຮັບຜິດຊອບ, ການນຳພາລວມສູນເປັນເອກະພາບຂອງຄະນະກຳມະການສູນກາງ ແລະການເສີມຂະຫຍາຍບົດບາດເປັນເຈົ້າການ, ຕັ້ງໜ້າ ຂອງຄະນະພັກ, ອົງການຈັດຕັ້ງພັກທຸກຂັ້ນ,... ຄວາມສໍາເລັດໃນການແກ້ໄຂບັນຫາທີ່ຫຍຸ້ງຍາກ, ສັບສົນ, ອ່ອນໄຫວເຊັ່ນ: ຕ້ານການສໍ້ລາດບັງຫຼວງ, ຮັດແໜ້ນລະບຽບວິໄນ, ຕ້ານການວິ້ງເຕັ້ນຫາຕຳແໜ່ງ ຫາອຳນາດ, ເພີ່ມທະວີປະສິດທິຜົນການກວດກາ, ຕິດຕາມກວດກາ, ການປະຕິບັດວິໄນຂອງພັກ,... ລ້ວນແຕ່ເລີ່ມຈາກການນຳພາ ຊີ້ນຳຢ່າງລວມສູນເປັນເອກະພາບຂອງຄະນະກຳມະການສູນກາງ ດ້ວຍຄວາມຕັດສິນໃຈດ້ານການເມືອງສູງ, ຄວາມພະຍາຍາມທີ່ຍິ່ງໃຫຍ່, ການກະທຳຢ່າງເດັດດ່ຽວ ເພື່ອສ້າງການຜັນປ່ຽນຕໍ່ຄະນະພັກແລະອົງການຈັດຕັ້ງພັກທຸກຂັ້ນ; ຈາກການຮັບປະກັນບົດບາດນຳພາຂອງລວມໜູ່ ຕິດກັບການຍົກສູງຄວາມຮັບຜິດຊອບສ່ວນບຸກຄົນຂອງຫົວໜ້າ. ຜ່ານການສົ່ງເສີມປະຊາທິປະໄຕນັ້ນເອງ ເຮັດໃຫ້ຄວາມຕັ້ງໜ້າ, ບົດບາດ ແລະຄວາມຮັບຜິດຊອບຂອງສະມາຊິກພັກ ໃນທຸກດ້ານຂອງວຽກງານກໍ່ສ້າງພັກໄດ້ຮັບການຍົກສູງຂຶ້ນ; ການລວມສູນທີ່ເພີ່ມຂຶ້ນຊ່ວຍໃຫ້ຮັບປະກັນຄວາມເປັນເອກະພາບລະຫວ່າງແນວຄິດແລະການກະທຳ, ຮັດແໜ້ນລະບຽບວິໄນ, ລະດົມ ແຈກຢາຍ ແລະນຳໃຊ້ແຫຼ່ງພະລັງຢ່າງມີປະສິດທິຜົນ. ຄວາມເປັນຈິງດັ່ງກ່າວໄດ້ຢືນຢັນ, ລວມສູນແລະປະຊາທິປະໄຕແມ່ນສອງດ້ານຂອງບັນຫາໜຶ່ງ, ມີຄວາມພົວພັນສັດຈະວິພາກ, ບໍ່ສາມາດເວົ້າເກີນຈິງດ້ານໜຶ່ງແລະເບິ່ງຂ້າມອີກດ້ານໜຶ່ງ. ການລວມສູນບໍ່ໄດ້ກົງກັນຂ້າມກັບປະຊາທິປະໄຕ, ແຕ່ພຽງແຕ່ກົງກັນຂ້າມກັບ ການກະແຈກກະຈາຍ, ການເຮັດຕາມລຳພັງໃຈ, ອະນາທິປະໄຕ; ປະຊາທິປະໄຕບໍ່ກົງກັນຂ້າມກັບການລວມສູນ, ແຕ່ພຽງແຕ່ກົງກັນຂ້າມກັບການຕັດສິນຊີ້ຂາດ, ອຳນາດຜະເດັດຂາດ. ຍິ່ງສົ່ງເສີມປະຊາທິປະໄຕໃນວົງກວ້າງ ຍິ່ງຕ້ອງເພີ່ມທະວີການລວມສູນເປັນເອກະພາບ. ການລວມສູນເປັນເອກະພາບໃນການນຳພາ ຊີ້ນຳຮັບປະກັນການສົ່ງເສີມປະຊາທິປະໄຕທີ່ແທ້ຈິງ, ບໍ່ຕົກໃສ່ປະຊາທິປະໄຕແບບຮູບນອກ ຫຼືຕາມລຳພັງໃຈ, ໄຮ້ການຈັດຕັ້ງ, ປະຊາທິປະໄຕສຸດຂົ້ວ.
ທີສາມ, ລະຫວ່າງການເພີ່ມທະວີບົດບາດນຳພາລວມໝູ່ ກັບການສົ່ງເສີມຄວາມຮັບຜິດຊອບສ່ວນບຸກຄົນ, ໂດຍສະເພາະແມ່ນຄວາມຮັບຜິດຊອບໃນການເປັນແບບຢ່າງ.
ເພື່ອປະຕິບັດວຽກງານແລະວິທີແກ້ໄຂທີ່ກອງປະຊຸມໃຫຍ່ຄັ້ງທີ 12 ວາງອອກມາ, ພັກກອມມູນິດຫວຽດນາມ ໄດ້ມີຄວາມພະຍາຍາມຫຼາຍຢ່າງ ໃນການຫັນຫຼັກການນຳພາລວມໝູ່ບຸກຄົນຮັບຜິດຊອບ ເປັນນິຕິກຳ ເຊິ່ງໄດ້ສະແດງອອກຢ່າງຈະແຈ້ງທີ່ສຸດໃນກົດລະບຽບການເລືອກຕັ້ງໃນພັກ, ຂະບວນການຈັດວຽກງານພະນັກງານ 5 ຂັ້ນຕອນ, ລະບຽບການເຮັດວຽກຂອງຄະນະພັກທຸກຂັ້ນ,... ຕິດແໜ້ນກັບການປັບປຸງບູລະນະລະບອບການການປະເມີນພະນັກງານ, ທົບທວນຄວາມຮັບຜິດຊອບສ່ວນລວມແລະສ່ວນບຸກຄົນ, ການຕິຊົມຕົນເອງແລະຕິຊົມ, ເອົາຄະແນນສຽງໄວ້ວາງໃຈ. ຄະນະບໍລິຫານງານສູນກາງ, ກົມການເມືອງ, ຄະນະເລຂາທິການສູນກາງພັກກອມມູນິດຫວຽດນາມ ໄດ້ນຳໜ້າໃນການປ່ຽນແປງໃໝ່ແບບວິທີການນຳພາແລະແບບແຜນເຮັດວຽກ ເພື່ອເສີມຂະຫຍາຍປະສິດທິຜົນຂອງບົດບາດນຳພາລວມໝູ່, ພ້ອມກັນນັ້ນກໍຍົກສູງຄວາມຮັບຜິດຊອບສ່ວນບຸກຄົນຂອງຫົວໜ້າ. ນີ້ກໍແມ່ນຄັ້ງທຳອິດທີ່ປະກາດໃຊ້ກົດລະບຽບການເຮັດວຽກຕົວຢ່າງຂອງຄະນະບໍລິຫານງານພັກແຂວງ, ນະຄອນສັງກັດສູນກາງ, ກຳນົດຢ່າງຈະແຈ້ງສິດອຳນາດ ແລະຄວາມຮັບຜິດຊອບຂອງລວມໝູ່ແລະບຸກຄົນ ໃນການນຳພາ ຊີ້ນຳ. ບັນດາການປ່ຽນແປງໃໝ່ທີ່ສຳຄັນນັ້ນ ບໍ່ພຽງແຕ່ມີຄວາມໝາຍໃນການເສີມຂະຫຍາຍບົດບາດການນຳພາຂອງລວມໝູ່, ການຄວບຄຸມອຳນາດສ່ວນບຸກຄົນ, ຈຳກັດການໃຊ້ອຳນາດໃນທາງທີ່ຜິດເທົ່ານັ້ນ, ແຕ່ຍັງຍົກສູງຄວາມຮັບຜິດຊອບສ່ວນບຸກຄົນໃນການເຂົ້າຮ່ວມກັນລວມໝູ່ ເພື່ອສົນທະນາແລະຕັດສິນໃຈກ່ຽວກັບນະໂຍບາຍ, ໂດຍສະເພາະແມ່ນ ຄວາມຮັບຜິດຊອບໃນການຈັດຕັ້ງປະຕິບັດມະຕິ. ບາງຄະດີລະເມີດກົດໝາຍໃນໄລຍະກ່ອນໜ້າທີ້ ໄດ້ຖືກຄົ້ນພົບແລະຖືກປະຕິບັດວິໄນໃນເວລາທີ່ຜ່ານມາ ລ້ວນແຕ່ມີຂໍ້ບົກພ່ອງພື້ນຖານຄື ການປ່ອຍປະລະເລີຍບົດບາດການນຳພາລວມໝູ່ ແລະ ຫົວໜ້າຫຼາຍຄົນໄດ້ລະເມີດຫຼັກການ, ລະເມີດລະບຽບການເຮັດວຽກ, ສວຍໃຊ້ອຳນາດໃນເມື່ອຕັດສິນນະໂຍບາຍ, ສ້າງຄວາມເສຍຫາຍຢ່າງໃຫຍ່ຫຼວງຕໍ່ປະເທດ. ດັ່ງນັ້ນ, ການຈັດການຢ່າງກົມກຽວລະຫວ່າງ ການເພີ່ມທະວີບົດບາດນຳພາລວມໝູ່ ແລະການຍົກສູງຄວາມຮັບຜິດຊອບສ່ວນບຸກຄົນ ແມ່ນບົດຮຽນທີ່ດີທີ່ຖອດຖອນໄດ້ຈາກໄລຍະທີ່ຜ່ານມາ. ຖ້າພວກເຮົາເບິ່ງເບົາບົດບາດນຳພາລວມໝູ່, ພວກເຮົາຈະບໍ່ພຽງແຕ່ບໍ່ສົ່ງເສີມສະຕິປັນຍາສ່ວນລວມຢ່າງເຕັມທີເທົ່ານັ້ນ, ແຕ່ຍັງເຮັດໃຫ້ກົນໄກການຄວບຄຸມອຳນາດສ່ວນລວມຕໍ່ບຸກຄົນອ່ອນແອລົງອີກດ້ວຍ. ກົງກັນຂ້າມ, ຖ້າເນັ້ນສະເພາະການນຳພາລວມໝູ່ ແຕ່ບໍ່ຄຳນຶງເຖິງຄວາມຮັບຜິດຊອບສ່ວນບຸກຄົນຜູ້ນຳ ຈະສ້າງສະພາບແວດລ້ອມທີ່ສົ່ງເສີມຄວາມຄິດທີ່ເພິ່ງພາ, ເອື່ອຍອີງໃສ່ລວມໝູ່, ບໍ່ຮູ້ທີ່ຢູ່ສ່ວນຕົວໃນເວລາມອບໝາຍວຽກງານ ແລະ ປະເມີນຜົນການປະຕິບັດງານ, ບໍ່ສາມາດລະບຸຕົວຜູ້ຮັບຜິດຊອບໄດ້ ເມື່ອມີຂໍ້ບົກພ່ອງຫຼືຂໍ້ຜິດພາດ.
ທີສີ່, ລະຫວ່າງການປັບປຸງແລະເພີ່ມທະວີຄວາມສາມັກຄີເປັນເອກະພາບພາຍໃນພັກກອມມູນິດ ກັບການຍູ້ແຮງການຕິຊົມຕົນເອງແລະຕິຊົມ, ຕໍ່ສູ້ກັນຄວາມຜິດ, ປົກປ້ອງຄວາມຖືກຕ້ອງ.
ຄວາມສາມັກຄີເປັນເອກະພາບແມ່ນມູນເຊື້ອທີ່ລ້ຳຄ່າທີ່ສຸດ ແລະເປັນຫຼັກການພື້ນຖານໃນການຈັດຕັ້ງແລະເຄື່ອນໄຫວຂອງພັກກອມມູນິດຫວຽດນາມ. ເມື່ອມີຄວາມສາມັກຄີເປັນເອກະພາບ, ຜູ້ຄົນນັບລ້ານກໍ່ເປັນໜຶ່ງດຽວ, ເນື້ອແທ້ແມ່ນຄວາມເປັນເອກະພາບທາງດ້ານຜົນປະໂຫຍດລວມ, ຄວາມເປັນເອກະພາບລະຫວ່າງແນວຄິດແລະການກະທຳ, ສ້າງເປັນກຳລັງແຮງອັນຍິ່ງໃຫຍ່ທີ່ພາໃຫ້ເກີດໄຊຊະນະທຸກຢ່າງ. ໃນໄລຍະກອງປະຊຸມໃຫຍ່ຄັ້ງທີ 12 ຂອງພັກ, ຄວາມສາມັກຄີເປັນເອກະພາບສະແດງອອກກ່ອນອື່ນໝົດ ໃນບັນດາຜູ້ນຳທີ່ສຳຄັນ, ກຳມະການກົມການເມືອງ, ກຳມະການຄະນະເລຂາທິການ, ກຳມະການຄະນະບໍລິຫານງານສູນກາງ ແລະ ຄະນະພັກທຸກຂັ້ນ, ໂດຍສະເພາະແມ່ນຄວາມເປັນແບບຢ່າງຂອງຫົວໜ້າ. ນີ້ແມ່ນພື້ນຖານເພື່ອຕັດສິນຕົກລົງ ແລະຈັດຕັ້ງປະຕິບັດໜ້າທີ່ວຽກງານທຸກຢ່າງໃຫ້ປະສົບຜົນສຳເລັດ, ນັບທັງບັນດາໜ້າທີ່ທີ່ຫຍຸ້ງຍາກ, ສັບສົນ. ຄວາມເປັນຈິງໃຫ້ເຫັນວ່າ, ເພື່ອໃຫ້ມີຄວາມສາມັກຄີຢ່າງແທ້ຈິງ, ຕ້ອງປະຕິບັດການຕິຊົມຕົນເອງແລະຕິຊົມຢ່າງເຂັ້ມງວດ, ເດັດດ່ຽວຕໍ່ສູ້ກັບຄວາມຜິດ, ປົກປ້ອງສິ່ງທີ່ຖືກຕ້ອງ, ສ້າງໝູ່ຄະນະທີ່ເປັນເອກະພາບ ອີງໃສ່ຄວາມຮັບຜິດຊອບຕໍ່ຜົນປະໂຫຍດລວມ. ການຕິຊົມຕົນເອງແລະຕິຊົມ ບໍ່ເຮັດໃຫ້ຄວາມສາມັກຄີຫຼົມເຫຼວ, ແຕ່ກົງຂ້າມ ມັນຊ່ວຍໃຫ້ແຕ່ລະໝູ່ຄະນະແລະແຕ່ລະບຸກຄົນ ກ້າປະເຊີນກັບຂໍ້ບົກຜ່ອງຂອງຕົນເອງຢູ່ສະເໝີ, ກ້າຫານພໍທີ່ຈະສະແດງທັດສະນະຂອງຕົນ ຕໍ່ກັບຂໍ້ບົກຜ່ອງຂອງສະຫາຍ, ຈາກນັ້ນຊ່ວຍກັນແກ້ໄຂແລະເອົາຊະນະ. ໃນບໍ່ວ່າເວລາໃດແລະຢູ່ບ່ອນໃດ, ໃນທຸກວຽກງານການປະຕິວັດຂອງພັກກອມມູນິດ ຍາມໃດກໍ່ມີຜູ້ນຳໜ້າ, ຜູ້ປາງກາງນິຍົມ ແລະຜູ້ກ້າວໜ້າຊ້າ. ການຕິຊົມຕົນເອງແລະຕິຊົມ, ຕໍ່ສູ້ກັບຄວາມຜິດ, ປົກປ້ອງຄວາມຖືກຕ້ອງ, ເຮັດໃຫ້ຜູ້ນຳໜ້າໄດ້ຮັບຄວາມຢືນຢັນ, ມີອິດທິພົນຫຼາຍຂຶ້ນ, ດຶງດູດບັນດາຜູ້ປານກາງນິຍົມ ແລະ ຊຸກຍູ້ໃຫ້ຜູ້ກ້າວໜ້າຊ້າມີການປ່ຽນແປງໄວ, ດ້ວຍເຫດນັ້ນ ຄວາມຕັ້ງໜ້າ, ຄວາມກ້າວໜ້າຈຶ່ງເພີ່ມຂຶ້ນ ແລະກວມເອົາສ່ວນຫຼາຍ - ເປັນພື້ນຖານໃຫ້ແກ່ຄວາມສາມັກຄີ, ຄວາມເປັນເອກະພາບທາງດ້ານເຈດຈຳນົງແລະການກະທຳ.
ທີຫ້າ, ລະຫວ່າງການຮັດແໜ້ນລະບຽບວິໄນ ກັບການສົ່ງເສີມຈິດໃຈຂະຫຍັນຂັນເຄື່ອນ, ຄວາມຄິດສ້າງສັນ, ກ້າຄິດ ກ້າເຮັດ ກ້າບຸກທະລຸ ເພື່ອຜົນປະໂຫຍດລວມ.
ພັກກອມມູນິດຫວຽດນາມແມ່ນພັກປະຕິວັດ, ກຳລັງແຮງຂອງພັກອີງໃສ່ລະບຽບວິໄນທີ່ເຂັ້ມງວດ ແລະສົ່ງເສີມການຊອກຫາ, ການປ່ຽນແປງໃໝ່, ຄວາມຂະຫຍັນຂັນເຄື່ອນ ປະດິດສ້າງຢ່າງຕໍ່ເນື່ອງ. ຕໍ່ໜ້າສະພາວະເສື່ອມໂຊມແລະການສະແດງອອກຂອງ “ການປ່ຽນແປງຕົນເອງ”, “ການຫັນປ່ຽນຕົນເອງ” ພາຍໃນໄດ້ສົ່ງຜົນສະທ້ອນເຖິງກຽດສັກສີ, ຄວາມສາມາດໃນການນຳພາແລະກຳລັງສູ້ຮົບຂອງພັກກອມມູນິດຫວຽດນາມ, ຂົ່ມຂູ່ຕໍ່ຄວາມເປັນຢູ່ຂອງລະບອບການປົກຄອງນັ້ນ, ການຮັດແໜ້ນລະບຽບວິໄນແມ່ນຄວາມຮຽກຮ້ອງຕ້ອງການອັນຮີບດ່ວນ ໃນວຽກງານກໍ່ສ້າງພັກແລະປັບປຸງພັກ. ການຮັດແໜ້ນລະບຽບວິໄນໄດ້ດຳເນີນການຢ່າງຮອບດ້ານ ຄົບຊຸດ, ສຸມໃສ່ບັນດາຈຸດສຳຄັນເຊັ່ນ: ມີລະບຽບວິໄນໃນການເວົ້າແລະຂຽນຢ່າງຖືກຕ້ອງຕາມໂຄງການການເມືອງ ແລະແນວທາງຂອງພັກກອມມູນິດຫວຽດນາມ; ຕ້ານການ “ວິ້ງເຕັ້ນຫານຕຳແໜ່ງ, ວິ້ງເຕັ້ນຫາອຳນາດ”; ຄົ້ນພົບແລະຈັດການແກ້ໄຂກັບບັນດາກໍລະນີລະເມີດຫຼັກການ; ການຕ້ານການສໍ້ລາດບັງຫຼວງບໍ່ມີເຂດຫວງຫ້າມ, ບໍ່ມີຂໍ້ຍົກເວັ້ນ... ໃນເມື່ອພັກກອມມູນິດຫວຽດນາມຮັດແໜ້ນລະບຽບວິໄນນັ້ນ ໃນທີ່ໃດທີ່ໜຶ່ງໄດ້ອີງໃສ່ຂໍ້ອ້າງວ່າສະຖາບັນຍັງບໍ່ທັນຄົບຖ້ວນ, ການບຸກທະລຸບໍ່ມີກົນໄກການປ້ອງກັນ, ເພື່ອຫຼີກລ້ຽງຄວາມຮັບຜິດຊອບ, ເຮັດວຽກຢ່າງພໍປະມານ, ທຳລາຍການປ່ຽນແປງໃໝ່ແລະຄວາມຄິດສ້າງສັນ, ກໍ່ໃຫ້ເກີດຄວາມຢຸດສະງັກຊັກຊ້າ. ດັ່ງນັ້ນ, ການຮັດແໜ້ນລະບຽບວິໄນ ແລະການສົ່ງເສີມຄວາມຂະຫຍັນຂັນເຄື່ອນ, ຄວາມຄິດສ້າງສັນ, ກ້າຄິດ ກ້າເຮັດ ກ້າບຸກທະລຸ ເພື່ອຜົນປະໂຫຍດລວມ ແມ່ນສອງດ້ານຂອງບັນຫາໜຶ່ງທີ່ຕ້ອງໄດ້ຮັບຮູ້ແລະຈັດການແກ້ໄຂຢ່າງລະອຽດ. ການຮັດແໜ້ນລະບຽບວິໄນບໍ່ແມ່ນການຈຳກັດພື້ນທີ່ເພື່ອຄົ້ນຫາສິ່ງໃໝ່, ກົດໜ່ວງຄວາມຄິດສ້າງສັນ, ແຕ່ແມ່ນການສ້າງສະພາບແວດລ້ອມທີ່ສົດໃສ ສຳລັບການຄົ້ນຫາປ່ຽນແປງໃໝ່, ຈິດໃຈກ້າຄິດ ກ້າເຮັດ ກ້າບຸກທະລູທີ່ເກີດຂຶ້ນຢ່າງຖືກຕ້ອງ. ຄວາມຂະຫຍັນຂັນເຄື່ອນ, ການປະດິດສ້າງ, ການບຸກທະລຸ ເພື່ອຜົນປະໂຫຍດລວມ ຍາມໃດກໍ່ຕ້ອງການລະບຽບວິໄນ; ບໍ່ພຽງແຕ່ເພື່ອສົ່ງເສີມສິ່ງໃໝ່, ປົກປ້ອງຄວາມຖືກຕ້ອງ, ປົກປ້ອງຜູ້ປະດິດສ້າງ ດ້ວຍເຈດຕະນາບໍລິສຸດ, ເພື່ອຜົນປະໂຫຍດລວມ; ແຕ່ຍັງຊີ້ໃຫ້ເຫັນຄວາມຜິດ, ຈັດການກັບກັບຜູ້ທີ່ຝ່າຝືນຫຼັກການ, ການສວຍໃຊ້ຊ່ອງຫວ່າງຂອງກົນໄກເພື່ອຫາກຳໄລ. ບໍ່ອະນຸຍາດໃຫ້ຊ່ອນຕົວໃນເງົາຂອງ “ການປ່ຽນແປງໃໝ່”, “ການບຸກທະລູ” ເພື່ອຜົນປະໂຫຍດສ່ວນຕົວທີ່ລະເມີດຫຼັກການ, ລະເມີດລະບຽບວິໄນ ກົດໝາຍຂອງປະເທດ, ເມື່ອຖືກລົງໂທດ ເຂົາກໍແກ້ຕົວຄືທີ່ເຄີຍເຫັນໃນຫຼາຍໆກໍລະນີໃນເວລາທີ່ຜ່ານມາ. ປະຫວັດສາດພັກກອມມູນິດຫວຽດນາມ ໃນໄລຍະຕົ້ນການປ່ຽນແປງໃໝ່ ໃຫ້ເຫັນວ່າ, ຜູ້ນຳລະດັບສູງຫຼາຍທ່ານ ໄດ້ກ້າຫານຝ່າຟັນກົນໄກການອຸດໜູນ ໃນເງື່ອນໄຂທີ່ສະຖາບັນປົກປ້ອງກົນໄກນັ້ນຍັງມີຢູ່, ແຕ່ເມື່ອຄວາມຄິດປ່ຽນແປງໃໝ່ນັ້ນເລີ່ມຈາກສິ່ງຊຸກຍູ້ທີ່ບໍລິສຸດ, ເພື່ອພາລະກິດປະຕິວັດຂອງພັກກອມມູນິດຫວຽດນາມ, ເພື່ອຜົນປະໂຫຍດຂອງຊາດ-ປະຊາຊາດ, ຂອງປະຊາຊົນຫວຽດນາມ, ຈາກນັ້ນສາມາດຂົນຂວາຍຊວນເຊື່ອໝູ່ຄະນະໄດ້, ໄດ້ຮັບການອະນຸມັດແລະການປົກປ້ອງຈາກອົງການຈັດຕັ້ງ ເພື່ອຜັນຂະຫຍາຍປະຕິບັດ ແລະນຳເອົາປະສິດທິຜົນຕົວຈິງມາໃຫ້.
ທີຫົກ, ສາຍພົວພັນລະຫວ່າງການກໍ່ສ້າງພັກ ແລະການປັບປຸງພັກ.
ໃນໄລຍະກອງປະຊຸມໃຫຍ່ຄັ້ງທີ 12 ຂອງພັກ, ການກໍ່ສ້າງແລະປັບປຸງພັກໄດ້ດຳເນີນພ້ອມກັນແລະແຊກຊ້ອນກັນ. ຈຸດໜັກຂອງການປັບປຸງພັກແມ່ນສຸມໃສ່ບັນດາບັນຫາທີ່ສຳຄັນແລະຮີບດ່ວນເຊັ່ນ: ການກີດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ແບບແຜນດຳລົງຊີວິດ, ບັນດາປະກົດການຂອງ”ການປ່ຽນແປງຕົນເອງ”, “ການຫັນປ່ຽນຕົນເອງ” ພາຍໃນ; ການຮັດແໜ້ນລະບຽບວິໄນ, ການຄວບຄຸມອຳນາດໃນວຽກງານພະນັກງານ, ການຕໍ່ສູ້ຕ້ານ “ການວິ້ງເຕັ້ນຫາຕຳແໜ່ງ, ການວິ້ງເຕັ້ນຫາອຳນາດ”; ຈັດວາງສັບຊ້ອນການຈັດຕັ້ງກົງຈັກຄືນໃໝ່ ເຮັດໃຫ້ມັນກະທັດລັດເບົາບາງ; ຍູ້ແຮງການຕິຊົມຕົນເອງແລະຕິຊົມ ຕິດກັບການປະຕິບັດຄວາມຮັບຜິດຊອບໃນການເປັນແບບຢ່າງ, ມີຕຳແໜ່ງຍິ່ງສູງ ຍິ່ງຕ້ອງເປັນແບບຢ່າງ; ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ອາດຍາສິດ, ໃຊ້ຈ່າຍຟຸມເຟືອຍ. ການສົມທົບຢ່າງກົມກຽວລະຫວ່າງການກໍ່ສ້າງແລະການປັບປຸງພັກ ໄດ້ນຳມາເຊິ່ງຜົນສຳເລັດທີ່ສຳຄັນໃນວຽກງານກໍ່ສ້າງພັກ, ໂດຍສະເພາະແມ່ນການບຸກທະລຸເຂົ້າໃນບັນດາບັນຫາທີ່ ຫຍຸ້ງຍາກ, ສັບສົນ, ອ່ອນໄຫວ ທີ່ໄດ້ປະຕິບັດໃນໄລຍະກ່ອນໜ້ານີ້ດ້ວຍຜົນໄດ້ຮັບໜ້ອຍ.
ປະສົບການສະແດງໃຫ້ເຫັນວ່າ, ວຽກງານກໍ່ສ້າງພັກຍາມໃດກໍ່ຖືກຖືວ່າເປັນວຽກພື້ນຖານແລະເປັນປະຈຳ; ການປັບປຸງພັກມີຄວາມຈຳເປັນຢ່າງຮີບດ່ວນ ເມື່ອມີສະຖານະການພິເສດເຊິ່ງຕ້ອງການວິທີແກ້ໄຂພິເສດ. ການປັບປຸງພັກບໍ່ມີຈຸດປະສົງໃນຕົວມັນເອງ ແຕ່ມີຈຸດປະສົງກໍ່ສ້າງພັກໃຫ້ສະອາດປອດໃສແລະໝັ້ນຄົງເຂັ້ມແຂງ. ເມື່ອມີຄວາມສະດວກ, ຕ້ອງປັບປຸງພັກເພື່ອຫຼີກລ່ຽງແນວຄິດອັດຕະວິໄສ, ຄວາມພຶງພໍໃຈ, ການນອນຫຼັບໄປກັບພວງມາໄລແຫ່ງໄຊຊະນະ, ຄືທີ່ສະຫາຍເລຂາທິການໃຫຍ່ຄະນະບໍລິຫານງານສູນກາງ ພກ ຫວຽດນາມ, ປະທານປະເທດແຫ່ງ ສສ ຫວຽດນາມ ຫງວຽນຝູຈ້ອງ ເຄີຍໄດ້ຕັກເຕືອນ. ເມື່ອປະສົບຄວາມຫຍຸ້ງຍາກ, ຍິ່ງຕ້ອງປັບປຸງພັກ ເພື່ອກະຕຸ້ນແນວຄິດຈິດໃຈ, ປັບປຸງຖັນແຖວ, ຮັດແໜ້ນລະບຽບວິໄນ, ນຳການປະຕິວັກຜ່ານຜ່າຄວາມຫຍຸ້ງຍາກ ແລະກ້າວໄປຂ້າງໜ້າຢ່າງໜັກແໜ້ນ. ການກໍ່ສ້າງ, ປັບປຸງພັກ ຕ້ອງປະຕິບັດຕາມຫຼັກການ, ໃກ້ຊິດຕິດແທດກັບພຶດຕິກຳ, ມີວິທີການທີ່ເປັນລະບົບແລະເປັນວິທະຍາສາດ, ຫຼີກລ່ຽງບໍ່ໃຫ້ເກີດຄວາມວຸ້ນວາຍໃນການຈັດຕັ້ງ ຫຼືສ້າງຊ່ອງຫວ່າງໃຫ້ບຸກຄົນພາຍນອກສວຍໃຊ້ເພື່ອແບ່ງແຍກພາຍໃນແລະຕໍ່ຕ້ານລະບອບການປົກຄອງ.
***
ສືບຕໍ່ແຫຼ່ງວຽກງານກໍ່ສ້າງແລະປັບປຸງພັກ ໃນບັນດາໄລຍະທີ່ຜ່ານມາ ຕາມທັດສະນະຂອງການສືບທອດແລະການພັດທະນາ, ວຽກງານກໍ່ສ້າງແລະປັບປຸງພັກໃນໄລຍະກອງປະຊຸມໃຫຍ່ຄັ້ງທີ 12 ໄດ້ດຳເນີນການຢ່າງຮອບດ້ານ, ມີຈຸດໜັກໃຈກາງ ແລະບັນລຸຜົນໄດ້ຮັບທີ່ສຳຄັນແລະໂດດເດັ່ນ ດ້ວຍເຄື່ອງໝາຍທີ່ຈະແຈ້ງ. ຜົນໄດ້ຮັບທີ່ໂດດເດັ່ນແລະຮອຍປະທັບທີ່ຊັດເຈນນັ້ນ ບໍ່ພຽງແຕ່ຍ້ອນຄວາມຕັດສິນໃຈດ້ານການເມືອງສູງແລະແຜນນະໂຍບາຍຖືກຕ້ອງເທົ່ານັ້ນ, ແຕ່ຍັງຍ້ອນວິທີການເຮັດຢ່າງມີລະບຽບ, ສະແດງໃຫ້ເຫັນເຖິງວິທະຍາສາດແລະສິນລະປະແຫ່ງການນຳພາ ຂອງພັກກອມມູນິດ. ຍົກລະດັບການສະຫຼຸບສັງລວມວຽກງານກໍ່ສ້າງ, ດັດແປງພັກໃນໄລຍະກອງປະຊຸມໃຫຍ່ຄັ້ງທີ 12 ຈະຊ່ວຍໃຫ້ຖອດຖອນບົດຮຽນທີ່ລ້ຳຄ່າ ເພື່ອຊີ້ນຳພຶດຕິກຳ ແລະເພີ່ມເຕີມ, ພັດທະນາທິດສະດີກ່ຽວກັບການກໍ່ສ້າງພັກໃນສະໄໝໃໝ່./.
-----------------------------
(1) ບັນດາໜ້າທີ່ທີ່ຮອບດ້ານຂອງວຽກງານກໍ່ສ້າງພັກແມ່ນ: ເອົາໃຈໃສ່ກໍ່ສ້າງພັກກອມມູນິດທາງດ້ານການເມືອງ; ການປ່ຽນແປງໃໝ່ວຽກງານແນວຄິດ, ທິດສະດີ; ເພີ່ມທະວີການຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ, ຕ້ານລັດທິເອກະຊົນ, ການສວຍໂອກາດ, ລັດທິປະຕິບັດນິຍົມ; ສືບຕໍ່ການປ່ຽນແປງໃໝ່, ປັບປຸງການຈັດຕັ້ງກົງຈັກຂອງພັກກອມມູນິດ ແລະລະບົບການເມືອງ; ປັບປຸງການຈັດຕັ້ງ, ຍົກສູງຄຸນນະພາບ, ປະສິດທິຜົນການເຄື່ອນໄຫວຂອງບັນດາອົງການຈັດຕັ້ງຮາກຖານຂອງພັກ ແລະຍົກສູງຄຸນນະພາບສະມາຊິກພັກ; ການປ່ຽນແປງໃໝ່ວຽກງານພະນັກງານຢ່າງແຂງແຮງ, ໃຫ້ຄວາມສຳຄັນກັບວຽກງານປົກປ້ອງການເມືອງພາຍໃນ; ການປ່ຽນແປງໃໝ່, ຍົກສູງປະສິດທິພາບ, ປະສິດທິຜົນວຽກງານກວດກາ, ຕິດຕາມກວດກາ ແລະວິໄນຂອງພັກ; ສືບຕໍ່ການປ່ຽນແປງໃໝ່ແລະຍົກສູງປະສິດທິຜົນຂອງວຽກງານຂົນຂວາຍປະຊາຊົນ, ເພີ່ມທະວີຄວາມພົວພັນສະໜິດແໜ້ນລະຫວ່າງພັກກອມມູນິດກັບປະຊາຊົນຫວຽດນາມ; ຍູ້ແຮງການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ; ການປ່ຽນແປງໃໝ່ແບບວິທີການນຳພາຂອງພັກກອມມູນິດຫວຽດນາມ.
(2) ພັກກອມມູນິດຫວຽດນາມ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12, ຫ້ອງການສູນກາງພັກ, ຮ່າໂນ້ຍ, 2016, tໜ້າ 217.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 955 (ເດືອນທັນວາ 2020)
