ເສີມຂະຫຍາຍນ້ຳໃຈແຫ່ງໄຊຊະນະ ໃນວັນທີ 30 ເດືອນເມສາປີ 1975 ເຂົ້າໃນພາລະກິດການສ້າງສາ ແລະປົກປັກຮັກສາ ປະເທດຊາດ ໃນໄລຍະໃໝ່
ວກ. - ກ່ອນໜ້ານີ້ 45 ປີ, ໃນເວລາ 11 ໂມງ 30 ນາທີ ວັນທີ 30 ເດືອນເມສາປີ 1975, ທຸງຂອງກອງທັບປົດປ່ອຍ ໄດ້ປິວສະບັດຢູ່ເທິງຫຼັງຄາຂອງ ທຳນຽບເອກະລາດ, ເປັນຂີດໝາຍອັນຮູ່ງເຮືອງເຫຼືອງເຫຼື້ອມ ໃນປະຫວັດສາດແຫ່ງການຕໍ່ຕ້ານການຮຸກຮານຈາກຕ່າງປະເທດ ຂອງຊາດຫວຽດນາມ ແລະ ປະສົບຄວາມສຳເລັດມີໄຊ ໃນການຕໍ່ຕ້ານອາເມລິກາ ເພື່ອກູ້ຊາດຂອງປະຊາຊົນຫວຽດນາມ. ໄຊຊະນະໃນວັນທີ 30 ເດືອນເມສາປີ 1975 ແມ່ນມະຫາກາບກອນອະມະຕະ ຂອງສົງຄາມປະຊາຊົນຫວຽດນາມ ໃນສະໄໝໂຮ່ຈີມິນ; ແມ່ນໄຊຊະນະອັນຍິ່ງໃຫຍ່ ຂອງພາລະກິດການຕໍ່ສູ້ປົດປ່ອຍຊາດໃນສະຕະວັດ XX ໂດຍພັກແລະລຸງໂຮ່ ເປັນຜູ້ນຳພາ, ສືບຕໍ່ຂຽນໜ້າປະຫວັດສາດອັນສະຫງ່າອົງອາດ ໃນການຕໍ່ສູ້ສ້າງສາ ແລະ ປົກປັກຮັກສາປະເທດຊາດຫວຽດນາມ ໂດຍຜ່ານປະຫວັດສາດຫຼາຍພັນປີ.
ລົດຕັງຂອງກອງທັບປົດປ່ອຍເຂົ້າສູ່ທຳນຽບເອກະລາດ, ໃນຕອນທ່ຽງວັນທີ 30 ເດືອນເມສາປີ 1975, ສຳເລັດສິ້ນສຸດການຕໍ່ສູ້ຕ້ານອາເມລິກາ ເພື່ອກູ້ຊາດ, ປົດປ່ອຍພາກໃຕ້ ໂຮມປະເທດເປັນເອກະພາບຢ່າງສົມບູນ _ ພາບ: TTXVN.
ພາຍຫຼັງໄຊຊະນະຂອງບັ້ນຮົບດ້ຽນບຽນຝູ, ສັນຍາເຊີແນວໄດ້ຮັບການລົງນາມ, ປະເທດຫວຽດນາມຖືກຕັດແບ່ງຊົ່ວຄາວເປັນສອງພາກ: ພາກເໜືອທີ່ທັງພະຍາຍາມກໍ່ສ້າງສັງຄົມນິຍົມ, ທັງສຸມກຳລັງແຮງ ເພື່ອເຮັດຫຼ້ອນໜ້າທີ່ຂອງແນວຫຼັງໃຫຍ່ຕໍ່ແນວໜ້າໃຫຍ່; ພາກໃຕ້, ຈັກກະພັດອາເມລິກາມາແທນພວກລ່າເມືອງຂຶ້ນຝຣັ່ງ, ປະຕິບັດກົນອຸບາຍອັນເລິກແລບແນບນຽນໃນການຮຸກຮານ, ສ້າງຕັ້ງອຳນາດການປົກຄອງທີ່ເປັນລູກແຫຼ້ງຕີນມື, ອອກແຮງປາບປາມ ເຂັ່ນຂ້າປະຊາຊົນແລະກຳລັງຕໍ່ຕ້ານ, ບັງຄັບໃຊ້ລະບອບປົກຄອງຂອງລັດທິລ່າເມືອງຂຶ້ນແບບໃໝ່. ດ້ວຍຈິດໃຈ "ບໍ່ມີສິ່ງໃດທີ່ລ້ຳຄ່າກວ່າເອກະລາດແລະເສລີພາບ", “ພາກໃຕ້ - ພາກເໜືອເປັນເຮືອນຫຼັງດຽວ”, ພາກໃຕ້ເປັນເລືອດຂອງເລືອດຫວຽດນາມ ເປັນເນື້ອຂອງເນື້ອຫວຽດນາມ, ປະຊາຊົນຫວຽດນາມທັງຊາດໄດ້ມີຄວາມເດັດດ່ຽວໜຽວແໜ້ນ, ອົດທົນຜ່ານຜ່າທຸກຄວາມຫຍຸ້ງຍາກ, ຄວາມເສຍສະຫຼະ, ຕໍ່ສູ້ຕ້ານຈັກກະພັດອາເມລິກາຜູ້ຮຸກຮານຢ່າງຍຶດເຍື້ອຍາວນານເປັນເວລາ 21 ປີ. ພາຍໃຕ້ການນຳພາຂອງພັກກອມມູນິດຫວຽດນາມ ແລະ ລຸງໂຮ່ຜູ້ເຄົາລົບຮັກ, ແນວຫຼັງໃຫຍ່ພາກເໜືອ ແລະ ແນວໜ້າໃຫຍ່ພາກໃຕ້ ໄດ້ກໍ່ສ້າງກອງທັບການເມືອງຂອງມະຫາຊົນ ແລະ ກອງກຳລັງປະກອບອາວຸດປະຊາຊົນ ທີ່ນັບມື້ນັບເຂັ້ມແຂງ. ບົນພື້ນຖານນັ້ນ, ພວກເຮົາໄດ້ປະສົມປະສານ ການຕໍ່ສູ້ທາງ ການທະຫານ ກັບການຕໍ່ສູ້ທາງການເມືອງ ແລະການທູດ; ປະສົມປະສານລະວ່າງການລຸກຮືຂຶ້ນຂອງມວນຊົນ ແລະ ສົງຄາມປະຕິວັດ, ລະຫວ່າງການລຸກຮືຂຶ້ນ ແລະ ການບຸກໂຈມຕີ; ຕີສັດຕູໃນທັງສາມເຂດຍຸດທະສາດແມ່ນ ເຂດພູຜາປ່າດົງ, ຊົນນະບົດ, ທົ່ງພຽງ ແລະ ຕົວເມືອງ, ບຸກຕີສັດຕູທັງສາມດ້ານ ການທະຫານ, ການເມືອງ ແລະ ການຂົນຂວາຍທະຫານສັດຕູ. ດ້ວຍເຫດນັ້ນ, ຫວຽດນາມໄດ້ຕີເອົາຊະນະບັນດາຍຸດທະສາດສົງຄາມຂອງຈັກກະພັດອາເມລິກາ ເທື່ອລະກ້າວຄື: “ສົງຄາມຝ່າຍດຽວ” (ແຕ່ປີ 1954 ຫາ 1960), “ສົງຄາມພິເສດ” (ແຕ່ປີ 1961 ຫາ 1965), “ສົງຄາມພາກສ່ວນ” ຢູ່ພາກໃຕ້ ແລະ ສົງຄາມທຳລາຍດ້ວຍທະຫານອາກາດ, ທະຫານເຮືອຄັ້ງທີໜຶ່ງຢູ່ພາກເໜືອ (ແຕ່ປີ 1965 ຫາ 1968). ເສີມຂະຫຍາຍນ້ຳໃຈສາມັກຄີສູ້ຮົບຕ້ານສັດຕູຮ່ວມກັນຂອງສາມປະເທດໃນອີນດູຈີນ (ຫວຽດນາມ, ລາວ, ກຳປູເຈຍ), ກອງທັບ ແລະ ປະຊາຊົນຫວຽດນາມ ໄດ້ສູ້ຮົບຢ່າງອົງອາດກ້າຫານ, ທັບມ້າງຍຸດທະສາດ “ຫັນສົງຄາມເປັນຂອງຫວຽດນາມ” ແລະ ສົງຄາມທຳລາຍດ້ວຍທະຫານອາກາດ, ທະຫານເຮືອຄັ້ງທີສອງໃນພາກເໜືອຂອງຈັກກະພັດອາເມລິກາ (ແຕ່ປີ 1969 ຫາ 1973), ສ້າງເປັນທ່າແຮງໃນກອງປະຊຸມ ປາຣີ ກ່ຽວກັບຫວຽດນາມ ແລະຊຸກຍູ້ການລົງນາມໃນ “ສັນຍາ ປາຣີ ວ່າດ້ວຍຢຸດຕິສົງຄາມ, ສ້າງສັນຕິພາບຄືນໃໝ່ຢູ່ ຫວຽດນາມ” (ໃນວັນທີ 27 ເດືອນມັງກອນປີ 1973). ພິເສດ, ແຕ່ທ້າຍປີ 1973 ເຖິງວັນທີ 30 ເດືອນເມສາປີ 1975, ກອງທັບແລະປະຊາຊົນຫວຽດນາມ ໄດ້ຍາດເອົາກາລະໂອກາດຍຸດທະສາດ, ສ້າງທ່າ ແລະ ກຳລັງແຮງດີກວ່າຝ່າຍກົງກັນຂ້າມ, ດຳເນີນການບຸກໂຈມຕີ ແລະ ລຸກຮືຂຶ້ນຄັ້ງໃຫຍ່ໃນລະດູບານໃໝ່ປີ 1975, ເຮັດໃຫ້ກອງທັບແລະອຳນາດການປົກຄອງໄຊ່ງ່ອນແຕກສະຫຼາຍໂດຍສິ້ນເຊິງ, ໄດ້ຮັບໄຊຊະນະຢ່າງສົມບູນໃນສົງຄາມຕໍ່ຕ້ານອາເມລິກາ ເພື່ອກູ້ຊາດ, ປົດປ່ອຍພາກໃຕ້ແລະໂຮມປະເທດເປັນເອກະພາບໂດຍສົມບູນ.
ໄຊຊະນະໃນວັນທີ 30 ເດືອນເມສາປີ 1975 ໄດ້ເຂົ້າສູ່ປະຫວັດສາດຂອງຊາດຕະຫຼອດກາລະນານ, ຢືນຢັນຄວາມໝາຍອັນຍິ່ງໃຫຍ່, ສະແດງເຈດຈຳນົງເອກະລາດ ເປັນເຈົ້າຕົນເອງ, ອີງໃສ່ຕົນເອງສ້າງຄວາມເຂັ້ມແຂງດ້ວຍຕົນເອງ ແລະ ຄວາມປາດຖະໜາຂອງທົ່ວທັງຊາດເພື່ອສັນຕິພາບ, ຂີດໝາຍບາດລ້ຽວທີ່ຕັດສິນການນຳຫວຽດນາມເຂົ້າສູ່ຍຸກແຫ່ງເອກະລາດ, ເອກະພາບ ແລະ ທົ່ວປະເທດກ້າວເຂົ້າສູ່ການກໍ່ສ້າງສັງຄົມນິຍົມ. ສຳລັບໂລກ, ນັ້ນແມ່ນໄຊຊະນະທີ່ສຳຄັນຂອງກຳລັງປະຕິວັດ, ປະກອບສ່ວນເຂົ້າໃນການຊຸກຍູ້ຢ່າງແຂງແຮງການຕໍ່ສູ້ຂອງປະຊາຊົນໂລກ ເພື່ອເອກະລາດແຫ່ງຊາດ, ສັນຕິພາບ, ປະຊາທິປະໄຕ ແລະ ຄວາມກ້າວໜ້າທາງສັງຄົມ; ປຸກລະດົມແລະໃຫ້ກຳລັງໃຈ ປະຊາຊົນບັນດາປະເທດທີ່ກຳລັງຕໍ່ສູ້ ເພື່ອປົດແອກຈາກການເປັນທາດຂອງລັດທິຈັກກະພັດນິຍົມ, ເລີ່ມຕົ້ນລົ້ມການສະຫຼາຍຂອງລັດທິລ່າເມືອງຂຶ້ນແບບໃໝ່ໃນທົ່ວໂລກ. ໄຊຊະນະອັນຍິ່ງໃຫຍ່ຂອງການຕໍ່ສູ້ກູ້ຊາດ ຕ້ານອາເມລິການ ໄດ້ນຳເອົາບົດຮຽນອັນລ້ຳຄ່າຫຼາຍຢ່າງມາໃຫ້ຊາດຫວຽດນາມ ເຊິ່ງແມ່ນບົດຮຽນທີ່ມີຄວາມໝາຍສຳຄັນທີ່ສຸດ ສຳລັບວັນນີ້ແລະຄົນລຸ້ນຫຼັງ. ໄຊຊະນະນັ້ນແມ່ນຜົນມາຈາກຫຼາຍປັດໄຈ, ໃນນັ້ນ ກຳລັງແຮງມະຫາສາມັກຄີປວງຊົນທັງຊາດແມ່ນປັດໄຈພື້ນຖານ ສຳຄັນທີ່ສຸດ. ແຫຼ່ງກຳເນີດຂອງປັດໄຈເຫຼົ່ານີ້ແມ່ນ ການນຳພາທີ່ເກັ່ງກ້າສາມາດ ສະຫຼາດສ່ອງໃສຂອງພັກກອມມູນິດ ຫວຽດນາມ ດ້ວຍແນວທາງການເມືອງ ການທະຫານທີ່ເປັນເອກະລາດ, ເປັນເຈົ້າຕົນເອງ, ຖືກຕ້ອງ ແລະ ປະດິດສ້າງ. ອີງໃສ່ກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ, ພັກໄດ້ຕັດສິນຕົກລົງຢ່າງສະຫຼາດສ່ອງໃສແລະຖືກຕ້ອງ, ບົນພື້ນຖານການວິເຄາະແລະປະເມີນຢ່າງຖືກຕ້ອງ ສະພາບການໂລກ, ພາຍໃນປະເທດ ແລະ ການຊັ່ງຊາກຳລັງ ລະຫວ່າງເຮົາກັບສັດຕູ ເພື່ອກຳນົດໂອກາດທາງປະຫວັດສາດຢ່າງຖືກຕ້ອງ, ຕັດສິນໃຈຍຸດທະສາດໃນການເປີດບັ້ນບຸກໂຈມຕີແລະລຸກຮືຂຶ້ນຄັ້ງໃຫຍ່ ໃນລະດູບານໃໝ່ປີ 1975, ໄດ້ຕີເອົາຊະນະກອງທັບຂອງອຳນາດການປົກຄອງໄຊ່ງ່ອນຢ່າງສົມບູນ ແລະ ຍາດເອົາໄຊຊະນະສົມບູນໃນເວລາສັ້ນທີ່ສຸດ. ການຕັດສິນຕົກລົງທີ່ມີລັກສະນະປະຫວັດສາດນັ້ນ ໄດ້ສະແດງໃຫ້ເຫັນເຖິງຄວາມສາມາດທາງຍຸດທະສາດ, ຄວາມສະຫຼາດສ່ອງໃສ ແລະຫົວຄິດປະດິດສ້າງອັນລ້ຳເລີດ ຂອງກົມການເມືອງ, ສູນກາງພັກ, ຄະນະພັກການທະຫານສູນກາງ ແລະ ກອງບັນຊາການສູງສຸດ. ແນວທາງ, ແຜນນະໂຍບາຍຂອງພັກ ສະທ້ອນໃຫ້ເຫັນເຖິງເຈດຈຳນົງ ແລະ ຄວາມປາດຖະໜາໃນຄວາມເປັນອິດສະລະພາບ, ເສລີພາບຂອງປະຊາຊົນທັງປະເທດ, ແມ່ນຄັນທຸງເພື່ອການເຕົ້າໂຮມແລະສາມັກຄີປະຊາຊົນທຸກຊັ້ນວັນນະ, ສ້າງບາດລ້ຽວທີ່ມີລັກສະນະປະຫວັດສາດ ເພື່ອໃຫ້ປະຊາຊົນຫວຽດນາມຍາດເອົາໄຊຊະນະສຸດທ້າຍ, ປົດປ່ອຍປະເທດແລະໂຮມປະເທດເປັນເອກະພາບ.
ໄຊຊະນະໃນວັນທີ 30 ເດືອນເມສາປີ 1975 ແມ່ນມາຈາກນ້ຳໃຈແຫ່ງຄວາມປາດຖະໜາໃນເອກະລາດ, ເສລີພາບ, ສັນຕິພາບ, ເອກະພາບຂອງປວງຊົນທັງຊາດ ທີ່ມີທັງຄວາມໝາຍປະຫວັດສາດ ມີທັງຄວາມໝາຍຍຸກສະໄໝ; ເຊິ່ງສະແດງຢ່າງຈະແຈ້ງເຖິງຄວາມກ້າຫານ, ສະຕິປັນຍາ ແລະ ເຈດຈຳນົງຂອງ “ເຊື້ອສາຍລາກໂຮ່ງ”, ບໍ່ຍອມຈຳນົນຕໍ່ສັດຕູຜູ້ຮຸກຮານ. ພ້ອມກັນນັ້ນ, ໄດ້ຢືນຢັນສັດຈະທຳໜຶ່ງວ່າ: ໃນຍຸກສະໄໝປະຈຸບັນ, ເມື່ອບັນດາກຳລັງປະຕິວັດໂລກກຳລັງຢູ່ໃນທ່າບຸກໂຈມຕີ, ປະເທດໜຶ່ງທີ່ດິນແດນບໍ່ກ້ວາງ ຄົນບໍ່ຫຼາຍ, ແຕ່ມີຄວາມສາມັກຄີຢ່າງແໜ້ນແຟ້ນ ແລະຕໍ່ສູ້ຢ່າງເດັດດ່ຽວພາຍໃຕ້ການນຳພາຂອງພັກມາກຊິດທີ່ແທ້ຈິງ, ມີແນວທາງແລະວິທີການປະຕິວັດທີ່ຖືກຕ້ອງ, ຍົກສູງຄັນທຸງເອກະລາດແຫ່ງຊາດ ແລະ ສັງຄົມນິຍົມ, ໄດ້ຮັບຄວາມເຫັນດີເຫັນພ້ອມ, ສະໜັບສະໜູນແລະຊ່ວຍເຫຼືອ ຂອງບັນດາປະເທດສັງຄົມນິຍົມ, ບັນດາກຳລັງປະຕິວັດ ແລະ ປະຊາຊົນຜູ້ກ້າວໜ້າຢູ່ໃນໂລກ ຈະມີຄວາມສາມາດເອົາຊະນະກອງກຳລັງຈັກກະພັດຜູ້ຮຸກຮານຢ່າງແນ່ນອນ, ເຖິງວ່ານັ້ນຈຳແມ່ນຈັກກະພັດທີ່ເຂັ້ມແຂງທີ່ສຸດ.
*
* *
ເພີ່ມທະວີການນຳພາຂອງພັກຕໍ່ກອງທັບ, ສຸມໃສ່ການກໍ່ສ້າງກອງທັບປະຊາຊົນຫວຽດນາມ ເປັນກອງທັບປະຕິວັດ, ກອງກຳລັງຫຼວງ, ຍອດຢ້ຽມ, ທັນສະໄໝ (ຢູ່ໃນພາບ: ທ່ານຫງວຽນຝູຈ້ອງ ເລຂາທິການໃຫຍ່ ມາຢ້ຽມຢາມພະນັກງານ ນັກຮົບ ໃນເຮືອຮົບເລກທີ 012 ຫຼີຖາຍໂຕ໋, ກອງພົນນ້ອຍທະຫານເຮືອ 162, ປີ 2016) _ແຫຼ່ງ: baohaiquanvietnam.vn
ໃນປະຈຸບັນ, ພາລະກິດການປ່ຽນແປງໃໝ່, ກໍ່ສ້າງ ແລະ ປົກປັກຮັກສາປະເທດຊາດຂອງປະຊາຊົນຫວຽດນາມ ພາຍໃຕ້ການນຳພາຂອງພັກ ທີ່ກຳລັງຢືນຕໍ່ໜ້າກາລະໂອກາດ, ຄວາມສະດວກຫຼາຍຢ່າງ ແຕ່ກໍ່ຍັງມີຄວາມຫຍຸ້ງຍາກ ແລະສິ່ງທ້າທາຍບໍ່ໜ້ອຍ. ສະພາບການໂລກແລະພາກພື້ນທີ່ມີຄວາມຜັນປ່ຽນຫຼາຍຢ່າງຄື: ທະເລຕາເວັນອອກຍາມໃດກໍ່ມີຄວາມສາມາດຜັນແປທີ່ສັບສົນ, ມີຄວາມສ່ຽງທີ່ອັນຕະລາຍ ບໍ່ມີຄວາມສະຫງົບ; ບັນດາປະເທດໃຫຍ່ສືບຕໍ່ເພີ່ມທະວີການແຊກແຊງ, ແຂ່ງຂັນກັນສ້າງອິດທິພົນຂອງຕົນ ດ້ວຍລະດັບ ຂະໜາດທີ່ແຕກຕ່າງກັນຢູ່ໃນພາກພື້ນ; ສົງຄາມພາກສ່ວນ, ການປະທະກັນດ້ວຍອາວຸດ, ການປະທະກັນດ້ານຊົນເຜົ່າ ສາສະໜາ, ການກໍ່ການຮ້າຍຍັງເກີດຂຶ້ນຢູ່, ກໍ່ຄວາມວຸ້ນວາຍ ບໍ່ສະຫງົບຢູ່ພາກພື້ນ ແລະ ໃນໂລກ. ບັນດາສິ່ງທ້າທາຍດ້ານຄວາມສະຫງົບທີ່ບໍ່ແມ່ນແບບດັ້ງເດີມເຊັ່ນ ຄວາມປອດໄພດ້ານເຄືອຂ່າຍ, ຄວາມປອດໄພດ້ານແຫຼ່ງນ້ຳ, ຄວາມປອດໄພດ້ານສະບຽງອາຫານ, ມົນລະພິດຕໍ່ສິ່ງແວດລ້ອມ ແລະ ຄວາມເສື່ອມໂຊມ ການປ່ຽນແປງສະພາບອາກາດ, ໄພທຳມະຊາດ, ໂລກລະບາດ, ການຄ້າຂາຍຢາເສບຕິດ, ການຍ້າຍທີ່ຢູ່ອາໄສຜິດກົດໝາຍ, ອາດຊະຍາກຳຂ້າມຊາດ,...ແມ່ນສິ່ງທ້າທາຍ ຂອງບັນດາປະເທດຢູ່ໃນໂລກ. ບັນດາອິດທິກຳລັງສັດຕູສືບຕໍ່ເພີ່ມທະວິການທຳລາຍພັກແລະລັດ, ປະຕິບັດການ “ຫັນປ່ຽນໂດຍສັນຕິ”, ຊຸກຍູ້ “ການຜັນປ່ຽນຕົນເອງ”, “ການປ່ຽນແປງຕົນເອງ”ຢູ່ພາຍໃນ, ຮຽກຮ້ອງໃຫ້ມີ “ການຍົກເລີກການເມືອງ”ໃນກອງທັບ, ດ້ວຍບັນດາວິທີການ ເລ່ກົນທີ່ນັບມື້ນັບມີຄວາມແນບນຽນ, ເລິກແລບ...
ສະພາບການທີ່ກ່າວມາຂ້າງເທິງ ຮຽກຮ້ອງໃຫ້ມີການເພີ່ມທະວີຄວາມສາມັກຄີ, ເສີມຂະຫຍາຍກຳລັງແຮງສັງລວມຂອງທົ່ວພັກ, ທົ່ວປວງຊົນ, ທົ່ວກອງທັບ ໃນພາລະກິດການສ້າງສາ ແລະປົກປັກຮັກສາປະເທດຊາດ, ພິເສດແມ່ນໝູນໃຊ້ຢ່າງມີປະສິດທິຜົນ ບົດຮຽນຂອງໄຊຊະນະໃນວັນທີ 30 ເດືອນເມສາປີ 1975; ສວຍໃຊ້ແລະຍາດແຍ່ງໂອກາດເພື່ອກໍ່ສ້າງ, ພັດທະນາປະເທດຕາມທິດທັນສະໄໝ. ສືບຕໍ່ເຊື່ອມຊືມແລະປະຕິບັດແນວທາງການປ່ຽນແປງໃໝ່ຂອງພັກຢ່າງເຂັ້ມງວດແລະມີປະສິດທິຜົນ: ພັດທະນາເສດຖະກິດແມ່ນໜ້າທີ່ຈຸດສຸມໃຈກາງ, ກໍ່ສ້າງພັກແມ່ນຂໍກະແຈ, ພັດທະນາວັດທະນະທຳແມ່ນພື້ນຖານຈິດໃຈຂອງສັງຄົມ; ເພີ່ມທະວີການປ້ອງກັນປະເທດ, ປ້ອງກັນຄວາມສະຫງົບແມ່ນໜ້າທີ່ສຳຄັນເປັນປະຈຳ; ປະສານປະສົມຢ່າງແໜ້ນແຟ້ນລະຫວ່າງພັດທະນາເສດຖະກິດ, ວັນທະນະທຳ, ສັງຄົມ ກັບການເພີ່ມທະວີການປ້ອງກັນປະເທດ, ປ້ອງກັນຄວາມສະຫງົບ, ການພົວພັນຕ່າງປະເທດ. ໃນນັ້ນ, ສຸມໃສ່ປະຕິບັດບາງໜ້າທີ່, ມາດຕະການລຸ່ມນີ້ໃຫ້ໄດ້ເປັນຢ່າງດີ:
ທີໜຶ່ງ, ຍຶດໝັ້ນເປົ້າໝາຍເອກະລາດແຫ່ງຊາດ ແລະ ສັງຄົມນິຍົມ, ຜັນຂະຫຍາຍປະຕິບັດແຜນນະໂຍບາຍ, ແນວທາງຂອງພັກ ຢ່າງເຂັ້ມງວດ ແລະ ມີປະສິທິຜົນ.
ນີ້ແມ່ນເງື່ອນໄຂທີ່ຕ້ອງມີກ່ອນ ແລະ ເປັນກຳລັງໜູນ ເພື່ອປະຕິບັດພາລະກິດການກໍ່ສ້າງ ແລະປົກປັກຮັກສາປະເທດຊາດໃນສະພາບການໃໝ່ ໃຫ້ສຳເລັດມີໄຊ. ເພື່ອປະຕິບັດເປົ້າໝາຍດັ່ງກ່າວ, ພວກເຮົາຕ້ອງສືບຕໍ່ເຊື່ອມຊຶມ ແລະປະຕິບັດຢ່າງເຂັ້ມງວດ ມະຕິເລກທີ 35-NQ/TW, ສະບັບລົງວັນທີ 22 ເດືອນຕຸລາປີ 2018, ຂອງກົມການເມືອງ, ວ່າດ້ວຍ “ເພີ່ມທະວີການປົກປັກຮັກສາພື້ນຖານແນວຄິດຂອງພັກ, ຕໍ່ສູ້ປະຕິເສດບັນດາທັດສະນະທີ່ຜິດພາດ ເປັນສັດຕູ ໃນສະພາບການໃໝ່"; ຄຳສັ່ງເລກທີ 35/CT-TW, ສະບັບລົງວັນທີ 30 ເດືອນພຶດສະພາປີ 2019, ຂອງກົມການເມືອງ, “ກ່ຽວກັບການຈັດກອງປະຊຸມໃຫຍ່ອົງຄະນະພັກຂັ້ນຕ່າງໆ ກ້າວເຖິງການຈັດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ່ XIII ຂອງພັກກອມມູນິດ ຫວຽດນາມ”..., ຖືເອົານີ້ແມ່ນພື້ນຖານທີ່ສຳຄັນ ເພື່ອໃຫ້ພັກວາງກຳນົດແຜນນະໂຍບາຍ, ແນວທາງການນຳພາ ໂດຍຜ່ານບັນດາໄລຍະການປະຕິວັດ ແນໃສ່ພາໃຫ້ປະເທດກ້າວເດີນໃນເສັ້ນທາງທີ່ໄດ້ຄັດເລືອກຢ່າງໜັກແໜ້ນ. ຕ້ອງມີຄວາມຮັບຮູ້ຢ່າງຄົບຖ້ວນ ແລະ ການປົກປັກຮັກສາພື້ນຖານແນວຄິດຂອງພັກ ແມ່ນປົກປັກຮັກສາພັກ, ປົກປັກຮັກສາໂຄງການການເມືອງ ແລະແນວທາງການນຳພາຂອງພັກ; ປ້ອງກັນປະຊາຊົນ, ລັດແຫ່ງອຳນາດກົດໝາຍສັງຄົມນິຍົມ; ປົກປັກຮັກສາພາລະກິດການປ່ຽນແປງໃໝ່, ການຫັນປະເທດເປັນອຸດສາຫະກຳ ທັນສະໄໝ ແລະ ເຊື່ອມໂຍງສາກົນ; ປົກປັກຮັກສາຜົນປະໂຫຍດຂອງຊາດ ຂອງປະເທດ; ຮັກສາສະພາບແວດລ້ອມແຫ່ງສັນຕິພາບ ສະຖຽມລະພາບ ເພື່ອສ້າງສາແລະພັດທະນາປະເທດ. ພ້ອມດຽວກັນນັ້ນ, ຕ້ອງເພີ່ມທະວິຄວາມສາມັກຄີ ເປັນເອກະພາບພາຍໃນພັກ, ພາຍໃນປະຊາຊົນບົນພື້ນຖານເປົ້າໝາຍ ແລະໜ້າທີ່ຂອງການປະຕິວັດ; ສຸມໃສ່ຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ XII ຂອງພັກ ແລະ ບັນດາມະຕິ ຄຳສັ່ງຂອງຄະນະບໍລິຫານງານສູນກາງພັກ, ກົມການເມືອງ, ຄະນະເລຂາທິການ ໃຫ້ສຳເລັດມີໄຊ. ຍູ້ແຮງວຽກງານກໍ່ສ້າງ ປັບປຸງພັກ ຕາມຈິດໃຈມະຕິກອງປະຊຸມສູນກາງພັກຄັ້ງທີ 4 ສະໄໝ XII ຕິດພັນກັບການປະຕິບັດຄຳສັ່ງເລກທີ 05-CT/TW, ສະບັບລົງວັນທີ 15 ເດືອນພຶດສະພາປີ 2016, ຂອງກົມການເມືອງ, “ວ່າດ້ວຍ ການຍູ້ແຮງການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ແບບແຜນດຳລົງຊີວິດຂອງປະທານໂຮ່ຈິມິນ”
ສະເພາະໜ້າ, ຕ້ອງສຸມໃສ່ຊີ້ນຳ ນຳພາການຈັດຕັ້ງກອງປະຊຸມໃຫຍ່ອົງຄະນະພັກຂັ້ນຕ່າງໆ, ກ້າວເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກໃຫ້ສຳເລັດຜົນ, ສ້າງບັ້ນດຳເນີນຊີວິດການເມືອງ, ຂະບວນການເຄື່ອນໄຫວປະຕິວັດ ທີ່ກວ້າງຂວາງເລິກເຊິ່ງໃນທົ່ວລະບົບການເມືອງ ພາຍໃຕ້ການນຳພາຂອງພັກ. ໃນຂະບວນການປະຕິບັດ, ຕ້ອງຍຶດໝັ້ນເປົ້າໝາຍ ແລະຫຼັກການຍຸດທະສາດ; ມີຄວາມໄຫວພິບ ແລະອອ່ນໂນນທາງດ້ານຍຸດໂທບາຍ; ທັງຮ່ວມມື, ທັງຕໍ່ສູ້; ຕໍ່ສູ້ຢ່າງເດັດດ່ຽວແລະໝັ້ນໜຽວ, ຖືເອົາການປົກປັກຮັກສາເອກະລາດ, ອຳນາດອະທິປະໄຕ, ເອກະພາບ ແລະ ຜຶນແຜ່ນດິນອັນຄົບຖ້ວນ, ປົກປັກຮັກສາຜົນປະໂຫຍດຂອງຂອງຊາດຂອງປະເທດ ເປັນເປົ້າໝາຍສຸງສຸດ; ຮັກສາສັນຕິພາບ ສະຖຽມລະພາບເພື່ອກໍ່ສ້າງແລະພັດທະນາປະເທດໃຫ້ມີຄວາມຮັ່ງມີເຂັ້ມແຂງ, ມີປະຊາທິປະໄຕ, ຍຸຕິທຳ ແລະສີວິໄລ. ພ້ອມກັນນັ້ນ, ເປັນເຈົ້າການໃນການຕໍ່ສູ້ ເພື່ອເອົາຊະນະທຸກໆກົນອຸບາຍ ລາຍລ່ຽມມ້າງເພທຳລາຍຂອງບັນດາອິດທິກຳລັງສັດຕູ; ເດັດດ່ຽວຕໍ່ສູ້ກັບບັນດາປະກົດການອາດຍາສິດ, ສໍ້ລາດບັງຫຼວງ, ຊຸດໂຊມເສື່ອມເສຍ, ຄວາມຫຍໍ້ທໍ້, ໄພສັງຄົມ..., ຮັບປະກັນສະຖຽມລະພາບ ແລະການພັດທະນາຂອງປະເທດ ໃນສະພາບການເຊື່ອມໂຍງສາກົນ ທີ່ນັບມື້ນັບເລິກເຊິ່ງກວ້າງຂວາງ. ຍູ້ແຮງວຽກງານກໍ່ສ້າງ ແລະປັບປຸງພັກ; ຍົກສູງຄວາມສາມາດນຳພາ ແລະກຳລັງແຮງສູ້ຮົບ ຂອງບັນດາອົງການຈັດຕັ້ງຂອງພັກ; ກໍ່ສ້າງຖັນແຖວພະນັກງານຂັ້ນຍຸດທະສາດທີ່ຕອບສະໜອງໄດ້ກັບຄວາມຮຽກຮ້ອງຕ້ອງການແລະໜ້າທີ່ ໃນສະພາບການໃໝ່. ຜ່ານນັ້ນ, ເຕົ້າໂຮມກຳລັງ, ສ້າງກຳລັງໜູນທາງການເມືອງ ແລະຈິດໃຈ, ເສີມຂະຫຍາຍສະຕິປັນຍາ, ກຳລັງແຮງຂອງທົ່ວປວງຊົນ ເພື່ອປະຕິບັດພາລະກິດການກໍ່ສ້າງ ແລະປົກປັກຮັກສາປະເທດຊາດ ຢ່າງສຳເລັດມີໄຊ.
ທີສອງ, ປະສານປະສົມຢ່າງແໜ້ນແຟ້ນ ການພັດທະນາເສດຖະກິດ - ສັງຄົມ ກັບປັບປຸງການປ້ອງກັນຊາດ - ປ້ອງກັນຄວາມສະຫງົບ, ສ້າງທ່າແຮງແລະພື້ນຖານວັດຖຸ ເພື່ອກໍ່ສ້າງ ແລະປົກປັກຮັກສາປະເທດຊາດ.
ສືບທອດບັນດາຜົນງານອັນຍິ່ງໃຫຍ່ຂອງການປະຕິວັດ, ຂອງໄຊຊະນະໃນວັນທີ 30 ເດືອນເມສາປີ 1975, ມື້ນີ້, ໜ້າທີ່ຈຸດໜັກໃຈກາງແລະສອດຮ້ອຍຕະຫຼອດຂອງທົ່ວພັກ, ທົ່ວປວງຊົນ, ທົ່ວກອງທັບເຮົາແມ່ນ ຕັ້ງໜ້າເອົາໃຈໃສ່ເບິ່ງແຍງການພັດທະນາເສດຖະກິດ - ສັງຄົມ, ຍົກສູງຊີວິດການເປັນຢູ່ຂອງປະຊາຊົນ, ໂດຍສະເພາະແມ່ນຢູ່ເຂດຊາຍແດນ, ເຂດຫ່າງໄກສອກຫຼີກ. ນັ້ນແມ່ນຄວາມມຸ້ງມາດປາດຖະໜາອັນຖືກຕ້ອງຂອງທົ່ວປວງຊົນທັງຊາດ ເຊິ່ງມີຄວາມສັກສິດແລະແຮງກ້າ ຄືດັ່ງເຈດຈຳນົງເພື່ອເອກະລາດແລະເອກະພາບ ຂອງປະເທດຊາດໃນຊຸມປີຂອງສົງຄາມ. ປີ 2019, ເຖິງວ່າຕ້ອງປະເຊີນໜ້າກັບຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງ, ແຕ່ພັກ, ລັດ ແລະ ປະຊາຊົນຫວຽດນາມ ໄດ້ມີຄວາມມານະພະຍາຍາມສູ້ຊົນ, ຍາດເອົາບັນດາຜົນງານອັນພົ້ນເດັ່ນ, ເປັນຂີດໝາຍການພັດທະນາຢ່າງຮອບດ້ານຂອງປະເທດໃນທຸກຂົງເຂດ. ແຕ່ວ່າ, ປີ 2020, ຫວຽດນາມກໍ່ໄດ້ປະເຊີນໜ້າກັບຄວາມຫຍຸ້ງຍາກແລະສິ່ງທ້າທາຍຫຼາຍປະການເຊັ່ນ ໄພແຫ້ງແລ້ງ, ການລຸກລ້ຳຂອງນ້ຳເຄັມ, ໂລກອະຫິວາໝູອາຟຣີກາ ຍັງບໍ່ໄດ້ຮັບການແກ້ໄຂຢ່າງຂາດຂັ້ນ; ໂດຍສະເພາະ, ການຕິດເຊື້ອລະບົບຫາຍໃຈຍ້ອນໄວຣັສ ໂຄໂຣນາສາຍພັນໃໝ່ (COVID-19) ທີ່ຜັນແປຢ່າງສັບສົນແລະແຜ່ລະບາດເປັນວົງກວ້າງຢູ່ໃນໂລກ.
ບົນພື້ນຖານບັນດາຜົນງານທີ່ບັນລຸໄດ້ໃນປີ 2019, ທົ່ວພັກ, ທົ່ວປວງຊົນ ແລະ ທົ່ວກອງທັບ ສືບຕໍ່ສວຍໃຊ້ໂອກາດດີທັງໝົດ, ຜ່ານຜ່າຄວາມຫຍຸ້ງຍາກ ສິ່ງທ້າທາຍ, ເປັນເຈົ້າການ ຕັ້ງໜ້າ ຂະຫຍັນຂັນເຄື່ອນ ແລະມີຫົວຄິດປະດິດສ້າງ ເພື່ອບັນລຸໄດ້ຜົນສຳເລັດສັງລວມສູງກວ່າເກົ່າ. ສືບຕໍ່ຮັກສາສະຖຽນລະພາບຂອງເສດຖະກິດມະຫາພາກ, ຄວບຄຸມໄພເງິນເຟີ້, ຍົກສູງປະສິດທິພາບ, ຄຸນນະພາບ, ປະສິດທິຜົນ, ລັກສະນະເປັນເຈົ້າຕົນເອງ ແລະ ຄວາມສາມາດໃນການແຂ່ງຂັນ ຂອງພື້ນຖານເສດຖະກິດ. ຜັນຂະຫຍາຍຢ່າງຄົບຊຸດແລະເປັນເອກະພາບ ການກໍ່ສ້າງພັດທະນາເສດຖະກິດທີ່ເປັນເອກະລາດ ເປັນເຈົ້າຕົນເອງ, ໂດຍຕິດກັບການກໍ່ສ້າງພື້ນຖານການປ້ອງກັນຊາດທົ່ວປວງຊົນ, ທ່າສະໜາມຮົບປ້ອງກັນປະເທດທົ່ວປວງຊົນ ແລະ ທ່າສະໜາມຮົບປ້ອງກັນຄວາມສະຫງົບປະຊາຊົນ, ໃນນັ້ນເອົາໃຈໃສ່ເຖິງການວາງແຜນ, ອອກແບບ ກໍ່ສ້າງບັນດາໂຄງການທີ່ມີ “ຄຸນປະໂຫຍດຫຼາຍຢ່າງ”, ບັນດາໂຄງການ “ໃຕ້ດິນ” ທາງດ້ານຄົມມະນາຄົມ, ຊົນລະປະທານ ແລະ ໂຄງການໃນຕົວເມືອງ, ໂດຍສະເພາະແມ່ນໃນພື້ນທີ່ທີ່ສຳຄັນ; ຈັດຕັ້ງປະຕິບັດບັນດາໂຄງການ, ແຜນການພັດທະນາເສດຖະກິດທະເລ ແລະ ເຂດຊາຍຝັ່ງທະເລ ເຊິ່ງຕິດພັນກັບຮັບປະກັນການປ້ອງກັນຊາດ, ປ້ອງກັນຄວາມສະຫງົບ; ມີນະໂຍບາຍຊ່ວຍເຫຼືອ ແລະປົກປ້ອງຊາວປະມົງທີ່ຫາປາຢູ່ໄກຟັ່ງທະເລ ໂດຍຕິດກັບການປົກປັກຮັກສາອຳນາດອະທິປະໄຕໃນເຂດແດນ, ທະເລໝູ່ເກາະ ຂອງປະເທດ. ສືບຕໍ່ປະຕິບັດເປັນຢ່າງດີ ແຜນການກໍ່ສ້າງແລະພັດທະນາ ບັນດາເຂດເສດຖະກິດ-ປ້ອງກັນຊາດເຖິງປີ 2025, ກຳນົດທິດເຖິງປີ 2030, ຮັບປະກັນຄວາມສອດຄ່ອງກັບຍຸດທະສາດ ແລະໂຄງການກ່ຽວກັບການປ້ອງກັນຊາດ, ປ້ອງກັນຄວາມສະຫງົບ ແລະ ແຜນການນຳໃຊ້ທີ່ດິນເພື່ອການປ້ອງກັນຊາດ; ພ້ອມກັນນັ້ນ, ສືບຕໍ່ເພີ່ມເຕີມແລະປັບປຸງບູລະນະກົນໄກ, ນະໂຍບາຍບຸລິມະສິດ ສຳລັບບັນດາກົມກອງ, ວິສາຫະກິດການທະຫານ ທີ່ປະຕິບັດໜ້າທີ່ສົມທົບການປ້ອງກັນຊາດ, ປ້ອງກັນຄວາມສະຫງົບ ກັບເສດຖະກິດ ໃນເຂດຍຸດທະສາດ, ເຂດທີ່ປະສົບຄວາມຫຍຸ້ງຍາກ, ເຂດຊາຍແດນ ແລະເກາະທະເລ, ປະກອບສ່ວນສ້າງຖານທີ່ໝັ້ນອັນໜັກແໜ້ນ ເພື່ອປົກປັກຮັກສາປະເທດຊາດ ຕັ້ງແຕ່ຕົ້ນ, ແຕ່ໄກ.
ທີສາມ, ເສີມຂະຫຍາຍກຳລັງແຮງຂອງຊາດ, ປະສົມກັບກຳລັງແຮງຂອງຍຸກສະໄໝ ໃນພາລະກິດການສ້າງສາ ແລະປົກປັກຮັກສາປະເທດຊາດ.
ປັດໄຈສຳຄັນໃນໄຊຊະນະວັນທີ 30 ເດືອນເມສາປີ 1975 ແມ່ນກຳລັງແຮງສັງລວມຂອງກຸ່ມກ້ອນມະຫາສາມັກຄີປວງຊົນທັງຊາດ, ກຳລັງແຮງຂອງທົ່ວປວງຊົນ. ໃນຕະຫຼອດຂະບວນວິວັດການນຳພາການປະຕິວັດ, ພັກກອມມູນິດຫວຽດນາມ ແລະປະທານ ໂຮ່ຈິມິນ ຍາມໃດກໍ່ໃຫ້ຄວາມເອົາໃຈໃສ່ເປັນພິເສດ, ເສີມຂະຫຍາຍກຳລັງແຮງຂອງຊາດ ແລະຖືວ່ານີ້ແມ່ນແຜນນະໂຍບາຍທີ່ສອດຮ້ອຍຕະຫຼອດ ແລະສະເໝີຕົ້ນສະເໝີປາຍ, ສ້າງເປັນກຳລັງແຮງພາຍໃນເພື່ອເອົາໄຊຊະນະ. ດັ່ງນັ້ນ, ພວກເຮົາຕ້ອງຍູ້ແຮງການສຶກສາອົບຮົມດ້ານການເມືອງ, ແນວຄິດ, ຮັກສາຈິດໃຈເອກະລາດ, ເປັນເຈົ້າຕົ້ນເອງ, ນ້ຳໃຈຮັກຊາດ, ຄວາມເອກອ້າງທະນົງໃຈ ແລະກຽດສັກສີຂອງຊາດ, ເສີມຂະຫຍາຍກຳລັງແຮງພາຍໃນ, ນຳໃຊ້ສຸດຂີດບັນດາແຫຼ່ງພະລັງພາຍໃນແລະຕ່າງປະເທດ; ຈັດການແກ້ໄຂບັນດາໜ້າທີ່ພາຍໃນ ແລະການຕ່າງປະເທດຢ່າງກົມກຽວ. ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ ໃນສະໄໝປະຈຸບັນ ແມ່ນສືບທອດໝູນເຊື້ອອັນລ້ຳຄ່າຂອງຊາດ ຄືທີ່ລຸງໂຮ່ເຄີຍຢືນຢັນວ່າ: “ສາມັກຄີ, ສາມັກຄີ, ມະຫາສາມັກຄີ. ສຳເລັດຜົນ, ສຳເລັດຜົນ, ສຳເລັດຜົນຢ່າງໃຫຍ່ຫຼວງ”. ບົນຈິດໃຈດັ່ງກ່າວ, ພວກເຮົາຕ້ອງມີການເປີດກວ້າງປະຊາທິປະໄຕ, ຮັບຟັງຄວາມຄິດເຫັນ, ຄວາມປາດຖະໜາຂອງປະຊາຊົນຢ່າງຈິງໃຈ, ສ້າງຄວາມສາມັກຄີ ເປັນເອກະພາບສູງ ລະຫວ່າງພັກ, ລັດ ແລະ ປະຊາຊົນ, ເຮັດໃຫ້ປະຊາຊົນຍາມໃດກໍ່ມີຄວາມສະໜິດຕິດພັນກັບພັກ, ກັບອຳນາດການປົກຄອງ, ກັບກອງທັບປະຊາຊົນ. ການປັບປຸງແລະເພີ່ມທະວີກຸ່ມກ້ອນມະຫາສະມັກຄີໃນປະຈຸບັນ ຕ້ອງຕິດກັບການຮັບປະກັນຜົນປະໂຫຍດ ແລະຄວາມເອົາໃຈໃສ່ເຖິງ ຄວາມປາດຖະໜາທີ່ຊອບທຳຂອງປະຊາຊົນ; ເສີມຂະຫຍາຍສິດຂອງປະຊາຊົນໃນການເປັນເຈົ້າຂອງປະເທດ, ຮັບປະກັນວ່າ ປະຊາຊົນເປັນເຈົ້າຂອງຢ່າງແທ້ຈິງ, ເປັນເຈົ້າຂອງຕາມທີ່ໄດ້ກຳນົດໄວ້ໃນລັດຖະທຳມະນູນ.
ໃນສະພາບການເຊື່ອມໂຍງສາກົນທີ່ນັບມື້ນັບກວ້າງຂວາງເລິກເຊິ່ງ, ກຳລັງແຮງຂອງປະເທດຊາດຕ້ອງຕິດພັນຢ່າງແໜ້ນແຟ້ນ ກັບກຳລັງແຮງຂອງຍຸກສະໄໝ. ດັ່ງນັ້ນ, ຕ້ອງສຸມໃສ່ວຽກງານເຊື່ອມຊຶມແລະປະຕິບັດແນວທາງພົວພັນຕ່າງປະເທດຂອງພັກ ຢ່າງສະເໝີຕົ້ນສະເໝີປາຍ ດ້ວຍທິດນຳ ການພົວພັນຕ່າງປະເທດແບບຫຼາຍກ້ຳຫຼາຍຝ່າຍ ຫຼາຍຮູບຫຼາຍແບບ, ເປັນເຈົ້າການແລະຕັ້ງໜ້າເຊື່ອມໂຍງສາກົນຢ່າງກວ້າງຂວາງເລິກເຊິ່ງ, ມຸ່ງໄປສູ່ການຍູ້ແຮງ ຍົກລະດັບການພົວພັນຕ່າງປະເທດແບບຫຼາຍຝ່າຍແລະສອງຝ່າຍ; ເປັນເພື່ອນແລະເປັນຄູ່ຮ່ວມທີ່ໄວ້ວາງໃຈໄດ້, ເປັນສະມາຊິກທີ່ມີຄວາມຮັບຜິດຊອບ ຂອງວົງຄະນາຍາດສາກົນ. ຜ່ານນັ້ນ, ໝູນໃຊ້ບັນດາແຫຼ່ງກຳລັງໃຫ້ໄດ້ຫຼາຍທີ່ສຸດ, ຍາດແຍ່ງຄວາມເຫັນດີເຫັນພ້ອມ ແລະສະໜັບສະໜູນຂອງວົງຄະນາຍາດສາກົນ, ສ້າງສະພາບແວດລ້ອມສັນຕິພາບແລະເງື່ອນໄຂທີ່ສະດວກດີເພື່ອສ້າງສາແລະປົກປັກຮັກສາປະເທດຊາດ. ປະຕິບັດແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ຫຼາຍກ້ຳຫຼາຍຝ່າຍ ຫຼາຍຮູບຫຼາຍແບບ, ຮັກສາສະພາບແວດລ້ອມສັນຕິພາບ ສະຖຽມລະພາບເພື່ອການພັດທະນາ; ປົກປັກຮັກສາເອກະລາດ, ອຳນາດອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ, ຍົກສູງຖານະຂອງປະເທດ, ປະກອບສ່ວນອັນຕັ້ງໜ້າເຂົ້າໃນການຕໍ່ສູ້ ເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມ ຢູ່ໃນໂລກ. ໃນນັ້ນ, ການພົວພັນຕ່າງປະເທດດ້ານການປ້ອງກັນຊາດ ຖືກລະບຸວ່າເປັນຊ່ອງທາງສຳຄັນ ໃນວຽກງານການຕ່າງປະເທດຂອງພັກແລະລັດ, ໂດຍສະເພາະແມ່ນ ໃນເງື່ອນໄຂທີ່ຫວຽດນາມເປັນສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ໄລຍະປີ 2020-2021 ແລະ ເປັນປະທານສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ) ປີ 2020.
ທີສີ່, ສຸມໃສ່ກໍ່ສ້າງພື້ນຖານການປ້ອງກັນຊາດທົ່ວປວງຊົນ, ທ່າສະໜາມຮົບປ້ອງກັນຊາດທົ່ວປວງຊົນ ຕິດແໜ້ນກັບທ່າສະໜາມຮົບປ້ອງກັນຄວາມສະຫງົບທົ່ວປວງຊົນທີ່ເຂັ້ມແຂງ, ສ້າງພື້ນຖານປົກປັກຮັກສາປະເທດຊາດ “ຕັ້ງແຕ່ຕົ້ນ, ແຕ່ທາງໄກ” ຢ່າງໝັ້ນຄົງ.
ໃນພາລະກິດການຕໍ່ສູ້ປົດປ່ອຍປະເທດຊາດ ແລະ ປົກປັກຮັກສາປະເທດຊາດ, ພາຍໃຕ້ການນຳພາຂອງພັກນັ້ນ, ພື້ນຖານການເມືອງ - ຈິດໃຈ, ເຈດຈຳນົງຕັດສີນໃຈສູ້ຮົບ ເດັດຂາດມີໄຊ, ກຳລັງແຮງຂອງພື້ນຖານການປ້ອງກັນຊາດທົ່ວປວງຊົນ, ທ່າສະໜາມຮົບປ້ອງກັນຊາດທົ່ວປວງຊົນ ໄດ້ຮັບການເສີມຂະຫຍາຍຂຶ້ນເຖິງລະດັບສູງໃໝ່. ເພື່ອປົກປັກຮັກສາຄວາມເປັນເອກະລາດ, ອຳນາດອະທິປະໄຕ, ເອກະພາບ ແລະ ຜຶນແຜ່ນດິນອັນຄົບຖ້ວນຂອງຊາດໃຫ້ໝັ້ນຄົງໃນສະພາບການໃໝ່, ມັນຮຽກຮ້ອງໃຫ້ພວກເຮົາ ຕ້ອງການສືບຕໍ່ເຊື່ອມຊຶມແຜນນະໂຍບາຍ, ແນວທາງການປ້ອງກັນຊາດ, ການທະຫານຂອງພັກ, ເປັນຕົ້ນແມ່ນ ມະຕິກອງປະຊຸມຄັ້ງທີ 8 ສະໄໝທີ XI ກ່ຽວກັບ “ຍຸດທະສາດການປົກປັກຮັກສາປະເທດຊາດໃນສະພາບການໃໝ່”, ບັນດາມະຕິ, ຂໍ້ຕົກລົງຂອງກົມການເມືອງສູນກາງພັກຊຸດທີ XII ກ່ຽວກັບການປ້ອງກັນຊາດ, ປ້ອງກັນຄວາມສະຫງົບ; ປັບປຸງແລະເພີ່ມທະວີຄວາມສາມາດບົ່ມຊ້ອນ, ກຳລັງແຮງການປ້ອງກັນຊາດຢ່າງບໍ່ຢຸດຢັ້ງ ຕາມທິດເຂັ້ມແຂງຮອບດ້ານ, ມີຄວາມໝັ້ນຄົງຍາວນານ, ນັບມື້ນັບທັນສະໄໝ. ໃນນັ້ນ, ຖືເປັນສຳຄັນພິເສດ ການກໍ່ສ້າງພື້ນຖານປ້ອງກັນຊາດທົ່ວປວງຊົນໃຫ້ເຂັ້ມແຂງ, ກໍ່ສ້າງທ່າສະໜາມຮົບປ້ອງກັນຊາດທົ່ວປວງຊົນ ທີ່ຕິດແໜ້ນກັບການກໍ່ສ້າງພື້ນຖານການປ້ອງກັນຄວາມສະຫງົບທົ່ວປວງຊົນ, ທ່າສະໜາມຮົບປ້ອງກັນຄວາມສະຫງົບທົ່ວປວງຊົນ, “ທ່າສະໜາມຮົບໃນຈິດໃຈປະຊາຊົນ” ໃຫ້ໝັ້ນຄົງ, ໂດຍສະເພາະແມ່ນຢູ່ບັນດາເຂດຍຸດທະສາດ, ເຂດຊາຍແດນ, ທະເລ, ໝູ່ເກາະ. ນີ້ແມ່ນໜ້າທີ່ສຳຄັນ ເປັນປົກກະຕິ, ແມ່ນຄວາມຮັບຜິດຊອບຂອງລະບົບການເມືອງທັງໝົດ, ຂອງທົ່ວພັກ, ທົ່ວປວງຊົນ, ທົ່ວກອງທັບ.
ບັນດາຂັ້ນ, ຂະແໜງການ, ທ້ອງຖິ່ນຕ່າງໆ ສືບຕໍ່ເຊື່ອມຊຶມແລະປະຕິບັດ ແຜນນະໂຍບາຍຍຸດທະສາດຂອງພັກ ກ່ຽວກັບການກໍ່ສ້າງເຂດປ້ອງກັນຮັກສາໃຫ້ໄດ້ເປັນຢ່າງດີ ເຊິ່ງແກນຫຼັກແມ່ນ ການກໍ່ສ້າງ “ທ່າສະໜາມຮົບໃນຈິດໃຈປະຊາຊົນ” ໃຫ້ໝັ້ນໝັ້ນຄົງຈາກຮາກຖານ, ສ້າງພື້ນຖານເພື່ອກໍ່ສ້າງການປ້ອງກັນຊາດທົ່ວປວງຊົນ ແລະ ພື້ນຖານການປ້ອງກັນຄວາມສະຫງົບທົ່ວປວງຊົນຢ່າງເຂັ້ມແຂງ; ປ້ອງກັນແລະຈັດການສະຖານະການດ້ານການປ້ອງກັນຊາດ, ປ້ອງກັນຄວາມໝັ້ນຄົງຢ່າງມີປະສິດທິຜົນ; ຜາບແພ້ທຸກກົນອຸບາຍ ການເຄື່ອນໄຫວຕ້ານທຳລາຍຂອງບັນດາອິດທິກຳລັງສັດຕູ, ພວກບໍລະປັກ; ບໍ່ໃຫ້ຕົກໃນທ່າຮັບ ບໍ່ຖືກບັງເອີນໃນທຸກກໍລະນີ. ຍູ້ແຮງການປະສານປະສົມການພັດທະນາເສດຖະກິດ-ສັງຄົມ ກັບເພີ່ມທະວີການປ້ອງກັນຊາດ, ປ້ອງກັນຄວາມສະຫງົບ, ການພົວພັນຕ່າງປະເທດ; ເຊື່ອມຕິດຢ່າງແໜ້ນແຟ້ນ ການປະຕິບັດບັນດາຍຸດທະສາດ, ແຜນການພັດທະນາເສດຖະກິດ-ສັງຄົມ ກັບການປັບປຸງການປ້ອງກັນຊາດ, ປ້ອງກັນຄວາມສະຫງົບ, ການພົວພັນຕ່າງປະເທດ. ເປີດກວ້າງແລະເພີ່ມທະວີການຮ່ວມມືສາກົນ, ຍາດແຍ່ງໂອກາດການເຊື່ອມໂຍງ ເພື່ອແກ້ໄຂບັນຫາສຳຄັນຕ່າງໆຢ່າງມີປະສິດທິຜົນເຊັ່ນ ຄວາມໝັ້ນຄົງຊາຍແດນ, ທະເລແລະເກາະ, ຄວາມໝັ້ນຄົງແລະຄວາມປອດໄພໃນໂລກໄຊເບີຣ໌..., ເພື່ອປະກອບສ່ວນເຂົ້າໃນການປົກປັກຮັກສາປະເທດຊາດຕັ້ງແຕ່ຕົ້ນ, ແຕ່ທາງໄກໃຫ້ໝັ້ນຄົງ.
ທີຫ້າ, ກໍ່ສ້າງກອງທັບປະຊາຊົນໃຫ້ເປັນກອງທັບປະຕິວັດ, ລະບຽບຫຼວງ, ຍອດຍ້ຽມ ແລະ ທັນສະໄໝເທື່ອລະກ້າວ, ສົມກັບກຳລັງການເມືອງທີ່ຈົງຮັກພັກດີຢ່າງເດັດຂາດ, ເຄື່ອງມືຄວາມຮຸນແຮງທີ່ແຫຼມຄົມ ແລະ ເຊື່ອຖືໄດ້ຂອງພັກ.
ສືບທອດມູນເຊື້ອ, ບົດຮຽນຂອງໄຊຊະຊະໃນວັນທີ 30 ເດືອນເມສາປີ 1975, ໃນພາລະກິດການສ້າງສາແລະປົກປັກຮັກສາປະເທດຊາດໃນປະຈຸບັນ, ຕ້ອງຮັກສາແລະເພີ່ມທະວີການນຳພາຂອງພັກຕໍ່ກອງທັບ, ສຸມໃສ່ກໍ່ສ້າງກອງທັບປະຊາຊົນທີ່ປະຕິວັດ, ລະບຽບຫຼວງ, ຍອດຍ້ຽມ ແລະທັນສະໄໝເທື່ອລະກ້າວ, ບຸລິມະສິດການຫັນບາງເຫຼົ່າທັບ, ເຫຼົ່າຮົບ, ກຳລັງ ເປັນທັນສະໄໝ; ສືບຕໍ່ເສີມຂະຫຍາຍທາດແທ້ປະຕິວັດ, ມູນເຊື້ອ “ທະຫານຂອງລຸງໂຮ່”, ຕັ້ງໜ້າພະຍາຍາມແກ້ໄຂຄວາມຫຍຸ້ງຍາກ, ປະຕິບັດໃຫ້ດີພາລະໜ້າທີ່ “ກອງທະຫານສູ້ຮົບ, ກອງທະຫານເຮັດວຽກ, ກອງທະຫານອອກແຮງງານຜະລິດ”; ສະແດງອອກຢ່າງຈະແຈ້ງເຖິງພາລະບົດບາດຫຼັກແຫຼ່ງໃນການປົກປັກຮັກສາປະເທດຊາດ, ປ້ອງກັນພັກ, ລັດ, ປະຊາຊົນ ແລະລະບອບສັງຄົມນິຍົມ. ທົ່ວກອງທັບສຸມໃສ່ການກໍ່ສ້າງໃຫ້ມີຄວາມເຂັ້ມແຂງຮອບດ້ານ, ນຳເອົາການກໍ່ສ້າງທາງດ້ານການເມືອງເປັນພື້ນຖານ, ປະຕິບັດຄຳສັ່ງແລະລະບອບກຽມພ້ອມສູ້ຮົບ ຢ່າງເຂັ້ມງວດ; ເຮັດວຽກງານຄົ້ນຄ້ວາ, ຄາດຄະເນຍຸດທະສາດ, ເສນາທິການໃຫ້ໄດ້ເປັນຢ່າງດີເພື່ອຊ່ວຍໃຫ້ພັກແລະລັດ ວາງແຜນກຳນົດກ່ຽວກັບແນວທາງ, ກົດໝາຍກ່ຽວກັບການທະຫານ, ການປ້ອງກັນຊາດ; ເປັນເຈົ້າການໃນການກໍ່ສ້າງ, ຜັນຂະຫຍາຍບັນດາແຜນງານ, ແຜນການກຽມພ້ອມສູ້ຮົບ ແລະ ຕໍ່ສູ້, ປ້ອງກັນ, ຈັດການແກ້ໄຂຢ່າງຖືກຕ້ອງ, ວ່ອງໄວ, ມີປະສິດທິຜົນ ໃນການປ້ອງກັນຊາດ, ປ້ອງກັນຄວາມສະຫງົບ, ປົກປັກຮັກສາອຳນາດອຳທິປະໄຕ ແລະ ຜົນປະໂຫຍດຂອງປະເທດຊາດແລະຂອງຊາດຢ່າງແໜ້ນແຟ້ນ, ບໍ່ໃຫ້ຕົກໃສ່ໃນທ່າຮັບ ບໍ່ຖືກບັງເອີນ. ເອົາໃຈໃສ່ເຖິງການປັບປຸງບູລະນະ ການບັນຈຸແລະການຈັດຕັ້ງກຳລັງ ຕາມທິດທາງ “ຄ່ອງຕົວດີ, ກະທັດຮັດ, ແຂງແຮງ"; ຍູ້ແຮງການກໍ່ສ້າງເປັນລະບຽບຫຼວງ, ຝຶກຝົນລະບຽບວິໄນ, ສະພາບແວດລ້ອມທາງວັດທະນະທຳ, ປະຕິບັດຕາມກົດໝາຍຂອງລັດຢ່າງເຂັ້ມງວດ; ເປັນແບບຢ່າງ, ເປັນຜູ້ນຳໜ້າ ໃນການປະຕິບັດແຜນນະໂຍບາຍ ແນວທາງຂອງພັກ ແລະ ນະໂຍບາຍ ກົດໝາຍຂອງລັດ; ຕໍ່ສູ້ກັບທັດສະນະທີ່ຜິດພາດ ເປັນປໍລະປັກ, ປົກປັກຮັກສາພື້ນຖານແນວຄິດຂອງພັກ ແລະລະບອບສັງຄົມນິຍົມ. ເຂົ້າຮ່ວມການພັດທະນາເສດຖະກິດ-ສັງຄົມຢ່າງຕັ້ງໜ້າ ແລະມີປະສິດທິຜົນ, ຊ່ວຍເຫຼືອປະຊາຊົນກໍ່ສ້າງຊົນນະບົດໃໝ່, ໂດຍສະເພາະແມ່ນລົບລ້າງຄວາມອຶດຫິວ ຫຼຸດຜ່ອນຄວາມທຸກຍາກ, ຕອບແທນບຸນຄຸນ, ກໍ່ສ້າງພື້ນຖານການເມືອງ, ຊີວິດວັດທະນະທຳໃໝ່, ເປັນຕົ້ນແມ່ນໃນບັນດາເຂດຍຸດທະສາດ, ເຂດຫ່າງໄກສອກຫຼີກ, ເຂດຊາຍແດນ, ທະເລແລະເກາະ; ເປັນກຳລັງປະຈັນບານ, ຫຼັກແຫຼ່ງ ໃນການປ້ອງກັນ, ຕ້ານ ແລະແກ້ໄຂຜົນສະທ້ອນຈາກໄພທຳມະຊາດ, ກູ້ໄພ ກູ້ຊີບ, ປ້ອງກັນແລະຕໍ່ສູ້ກັບໂລກລະບາດ... ນາຍແລະພົນທະຫານຍາມໃດກໍ່ມີໜ້າຢູ່ສະຖານທີ່ສຳຄັນ, ຫຍຸ້ງຍາກແລະເປັນອັນຕະລາຍ, ເພື່ອປົກປັກຮັກສາຊີວິດແລະຊັບສິນຂອງປະຊາຊົນ ແລະ ປະຕິບັດໜ້າທີ່ຂົນຂວາຍມະຫາຊົນ..., ປະກອບສ່ວນເຂົ້າໃນການຮັດແໜ້ນ ຄວາມສາມັກຄີ, ໃກ້ຊິດຕິດແທດ ລະຫວ່າງກອງທັບແລະປະຊາຊົນ, ກໍ່ສ້າງ “ທ່າສະໜາມຮົບໃນຈິດໃຈປະຊາຊົນ” ໃຫ້ໝັ້ນຄົງ, ປັບປຸງຄວາມເຊື່ອໝັ້ນຂອງປະຊາຊົນຕໍ່ພັກ, ລັດ ແລະ ລະບອບສັງຄົມນິຍົມ. ພ້ອມກັນນັ້ນ, ຕ້ອງຍູ້ແຮງການພັດທະນາອຸດສາຫະກຳການປ້ອງກັນປະເທດ, ອາວຸດຍຸດໂທປະກອນ ແລະ ພາຫະນະການທະຫານທີ່ທັນສະໄໝ ເພື່ອສ້າງຄວາມເຂັ້ມແຂງພ້ອມທີ່ຈະຈັດການກັບສົງຄາມການຮຸກຮາຍທຸກຮູບແບບ. ປະຕິບັດເປັນຢ່າງດີ ວຽກງານເຊື່ອມໂຍງສາກົນ ແລະ ການຕ່າງປະເທດດ້ານປ້ອງກັນປະເທດ, ເຂົ້າຮ່ວມການເຄືຶ່ອນໄຫວຮັກສາສັນຕິພາບຂອງອົງການສະຫະປະຊາຊາດ, ເພື່ອປະກອບສ່ວນເຂົ້າໃນການຍົກສູງຖານະບົດບາດຂອງປະເທດ ຫວຍດນາມ ໃນການຮັກຄວາມສັນຕິພາບ ແລະ ກອງທັບປະຊາຊົນຫວຽດນາມຜູ້ອົງອາດກ້າຫານ ໃນເວທີສາກົນ.
ການສະເຫຼີມສະຫຼອງວັນປົດປ່ອຍພາກໃຕ້ຢ່າງສົມບູນແລະໂຮມປະເທດຫວຽດນາມເປັນເອກະພາບ ຄົບຮອບ 45 ປີ ເປັນໂອກາດເພື່ອໃຫ້ພວກເຮົາທົບທວນ ແລະມີຄວາມພາກພູມໃຈຕໍ່ປະຫວັດສາດອັນສະຫງ່າລາສີ, ມູນເຊື້ອອັນພິລະອາດຫານ ຂອງກອງທັບປະຊາຊົນຜູ້ອົງອາດກ້າຫານ, ຂອງປະເທດຊາດຫວຽດນາມວິລະຊົນ; ພ້ອມທັງ, ມີຄວາມຮັບຮູ້ຢ່າງເລິກເຊິ່ງກວ່າອີກ ກ່ຽວກັບຄວາມໝາຍແລະຄຸນຄ່າທາງດ້ານປະຫວັດສາດ ຂອງໄຊຊະນະອັນຍິ່ງໃຫຍ່ນີ້, ກ່ຽວກັບບຸນຄຸນຂອງພັກຜູ້ສະຫງ່າອົງອາດ, ລຸງໂຮ່ງຜູ້ຍິ່ງໃຫຍ່, ປະຊາຊົນວິລະຊົນ ແລະ ຄວາມເສຍສະຫຼະອັນໃຫຍ່ຫຼວງ ຂອງບັນດາວິລະຊົນນັກຮົບຜູ້ເສຍຊີວິດເພື່ອຊາດ. ເສີມຂະຫຍາຍຈິດໃຈແລະບັນຍາກາດອັນສະຫງ່າຜ່າເຜີຍ ຂອງໄຊຊະນະໃນວັນທີ 30 ເດືອນເມສາປີ 1975, ທົ່ວພັກ, ທົ່ວປວງຊົນ ແລະ ທົ່ວກອງທັບຫວຽດນາມ ສືບຕໍ່ສາມັກຄີກັນ, ພະຍາຍາມສູ້ຊົນ, ປະຕິບັດພາລະກິດການປ່ຽນແປງໃໝ່ໃຫ້ສຳເລັດມີໄຊ, ກໍ່ສ້າງປະເທດຫວຽດນາມນັນມື້ນັບຮັ່ງມີເຂັ້ມແຂງ, “ໃຫຍ່ໂຕໂອ້ຖົງກວ່າ, ສວຍງາມກວ່າອີກ”, ດັ່ງທີ່ ປະທານໂຮ່ຈີມິນ ຜູ້ເຄົາລົບຮັກ ເຄີຍປາດຖະໜາ./.
---------------------
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 940 (ເດືອນເມສາ 2020)
