ປະຊາຊົນຫວຽດນາມທັງໝົດຮ່ວມແຮງ ຮ່ວມໃຈກັນ ຜ່ານຜ່າທຸກຄວາມຫຍຸ້ງຍາກ ສິ່ງທ້າທາຍ, ເອົາຊະນະໂລກລະບາດ COVID-19
ວກ - ຄຳແນະນຳຂອງກອງບັນນາທິການ: ວັນທີ 30 ມີນາ 2020, ສະຫາຍ ຫງວຽນຝູຈ້ອງ, ເລຂາທິການໃຫຍ່ຄະນະບໍລິການງານສູນກາງ ພັກກອມມູນິດຫວຽດນາມ, ປະທານປະເທດ ສາທາລະນະລັດສັງຄົມນິຍົມຫວຽດນາມ, ຮຽກຮ້ອງພີ່ນ້ອງຮ່ວມຊາດ, ສະຫາຍ, ນັກຮົບທົ່ວປະເທດ ແລະ ພີ່ນ້ອງຮ່ວມຊາດຫວຽດນາມຢູ່ຕ່າງປະເທດ ຈົ່ງສາມັກຄີເປັນຈິດໜຶ່ງໃຈດຽວ, ເປັນເອກະພາບກັນທາງດ້ານເຈດຈຳນົງ ແລະການກະທຳ, ປະຕິບັດບັນດາແຜນນະໂຍບາຍ, ຂໍ້ກຳນົດຂອງພັກແລະລັດ, ການຊີ້ນຳແລະການບໍລິຫານຂອງລັດຖະບານ, ນາຍົກລັດຖະມົນຕີ ຢ່າງເດັດດ່ຽວແລະມີປະສິດທິຜົນ ເພື່ອຮັບປະກັນໄຊຊະນະຕໍ່ໂລກລະບາດ COVID-19. ວາລະສານກອມມູນິດ ຂໍເປັນກຽດແນະນຳ ຄຳຮຽກຮ້ອງດັ່ງກ່າວຂອງ ເລຂາທິການໃຫຍ່, ປະທານປະເທດ.
ສະຫາຍ ຫງວຽນຝູຈ້ອງ ເລຂາທິການໃຫຍ່, ປະທານປະເທດ ສສ ຫວຽດນາມ _ພາບ: TTXVN
ຮຽນພີ່ນ້ອງຮ່ວມຊາດ, ສະຫາຍ, ນັກຮົບທົ່ວປະເທດ ແລະ ພີ່ນ້ອງຮ່ວມຊາດຫວຽດນາມຢູ່ຕ່າງປະເທດ
ໂລກລະບາດ COVID-19 ສືບຕໍ່ແຜ່ລາມໄປໃນທົ່ວໂລກ, ສົ່ງຜົນກະທົບຢ່າງເລິກເຊິ່ງແລະກວ້າງຂວາງໃນທຸກໆ ດ້ານຂອງຊີວິດເສດຖະກິດ - ສັງຄົມ ຂອງບັນດາປະເທດໃນໂລກ. ມາເຖິງດຽວນີ້, ມີຜູ້ຕິດເຊື້ອກວ່າ 72 ໝື່ນຄົນ, ຄົນເສຍຊີວິດເກືອບ 3,5 ໝື່ນຄົນ ໃນເກືອບ 200 ປະເທດແລະເຂດແດນໃນທົ່ວໂລກ. ສະພາບການແຜ່ລະບາດຍັງມີຄວາມສັບສົນ, ບໍ່ສາມາດຄາດເດົາໄດ້ ແລະ ອາດຈະມີຜົນສະທ້ອນທີ່ຮ້າຍແຮງກວ່າເກົ່າ.
ໃນເວລາທີ່ຜ່ານມາ, ພາຍໃຕ້ການນຳພາຂອງພັກ ແລະການຄຸ້ມຄອງບໍລິຫານຂອງລັດ, ການຊີ້ນຳບໍລິຫານຂອງລັດຖະບານ, ນາຍົກລັດຖະມົນຕີ, ຄະນະຊີ້ນຳແຫ່ງຊາດກ່ຽວກັບການປ້ອງກັນແລະຕ້ານໂລກລະບາດ COVID-19, ບັນດາຂະແໜງການ, ບັນດາຂັ້ນ, ບັນດາທ້ອງຖິ່ນ ແລະ ລະບົບການເມືອງທັງໝົດ ໄດ້ສາມັກຄີ ເປັນເອກະພາບກັນ ໃນການຜັນຂະຫຍາຍຢ່າງເດັດດ່ຽວ ຫຼາຍມາດຕະການທີ່ຄົບຊຸດ, ທັງປ້ອງກັນແລະຈຳກັດການແຜ່ລະບາດຂອງໂລກ, ທັງຮັບປະກັນປະຕິບັດໜ້າທີ່ການພັດທະນາເສດຖະກິດ-ສັງຄົມ; ໃນເບື້ອງຕົ້ນໄດ້ຮັບຜົນດີຫຼາຍຢ່າງ, ສະແດງໃຫ້ເຫັນເຖິງກຳລັງແຮງແຫ່ງຄວາມສາມັກຄີປວງຊົນທັງຊາດ, ຄວາມຕັດສິນໃຈຂອງທົ່ວພັກ, ທົ່ວປວງຊົນ ແລະທົ່ວກອງທັບເຮົາ ໃນການຕໍ່ສູ້ຕ້ານໂລກລະບາດ, ໄດ້ຮັບການຍອມຮັບແລະຕີລາຄາສູງຈາກທົ່ວໂລກ.
ຕາງໜ້າພັກແລະລັດ, ຂ້າພະເຈົ້າຊົມເຊີຍແລະຍ້ອງຍໍຢ່າງສຸດໃຈ ຕໍ່ການມີສ່ວນຮ່ວມ ຂອງບັນດາຄະນະພັກ, ການຈັດຕັ້ງພັກ, ອຳນາດການປົດຄອງ ຕັ້ງແຕ່ຂັ້ນສູນກາງຮອດຂັ້ນຮາກຖານ; ຍ້ອງຍໍຊົມເຊີຍຄວາມມານະພະຍາຍາມຢ່າງບໍ່ຮູ້ອິດເມື່ອຍ ຂອງຂະແໜງການສາທາລະນະສຸກ, ກຳລັງທະຫານ, ຕຳຫຼວດ ແລະ ບັນດາຄະນະ, ກະຊວງ, ຂະແໜງການສູນກາງ; ການເຂົ້າຮ່ວມຢ່າງທັນການ, ຕັ້ງໜ້າຂອງແນວໂຮມແຫ່ງຊາດ, ບັນດາອົງຄະນະມະຫາຊົນ, ຊຸມຊົນທຸລະກິດ, ບັນດາສຳນັກຂ່າວແລະໜັງສືພິມ. ໂດຍສະເພາະຢ່າງຍິ່ງ ຂ້າພະເຈົ້າຂໍຂອບໃຈພີ່ນ້ອງຮ່ວມຊາດ, ສະຫາຍ, ນັກຮົບທົ່ວປະເທດ ແລະພີ່ນ້ອງຮ່ວມຊາດຢູ່ຕ່າງປະເທດ ທີ່ໄດ້ເຊື່ອໝັ້ນ, ສະໜັບ ສະໜູນ ແລະຕອບສະໜອງຕໍ່ວຽກງານການປ້ອງກັນແລະຄວບຄຸມໂລກລະບາດ ຢ່າງກະຕືລືລົ້ນ.
ໃນປະຈຸບັນ, ພວກເຮົາກຳລັງຢູ່ໃນຊ່ວງເວລາທີ່ຄວາມສ່ຽງຂອງການຕິດເຊື້ອໃນຊຸມຊົນ ກຳລັງເພີ່ມຂຶ້ນ, ລະບົບການເມືອງທັງໝົດ ຕ້ອງລວມສູມສຸດຂີດ ເພື່ອສືບຕໍ່ເປັນເຈົ້າການໃນການກິດກັ້ນ ແລະ ຄວບຄຸມໂລກລະບາດຢ່າງມີປະສິດທິຜົນ; ບໍ່ຫວາດຫວັ່ນເກີນໄປ ແຕ່ກໍ່ບໍ່ເປັນອັດຕະວິໄສ ລະເຫຼີງຢ່າງແນ່ນອນ; ຕ້ອງກຳແໜ້ນສະພາບການ, ຄາດຄະເນຄວາມເປັນໄປໄດ້ທີ່ຮ້າຍແຮງທີ່ສຸດ, ກຳນົດມາດຕະການທີ່ມີປະສິດທິຜົນຢ່າງທັນການ ເພື່ອຄວບຄຸມ ແລະກີດກັ້ນ ການແຜ່ກະຈາຍ ຂອງການຕິດເຊື້ອ ໂຄໂຣນາໄວຣັດ ໃຫ້ຈົນໄດ້. ແຕ່ລະສຳນັກງານອົງການ ການຈັດຕັ້ງ, ແຕ່ລະທ້ອງຖິ່ນ ຕ້ອງກຳແໜ້ນການຊີ້ນຳຂອງຂັ້ນເທິງ, ເປັນເຈົ້າການ ແລະປະສານສົມທົບຢ່າງແໜ້ນແຟ້ນກວ່າອີກ ເພື່ອປະຕິບັດວຽກງານຕ່າງໆ ໃນການປ້ອງກັນແລະຕ້ານໂລກລະບາດ; ບຸລິມະສິດແຫຼ່ງພະລັງ, ເວລາ ແລະຄວາມພະຍາຍາມສຳລັບວຽກງານທີ່ສຳຄັນນີ້.
ຮຽນພີ່ນ້ອງຮ່ວມຊາດ, ສະຫາຍ, ນັກຮົບທົ່ປະເທດ ແລະ ພີ່ນ້ອງຮ່ວມຊາດຫວຽດນາມຢູ່ຕ່າງປະເທດ
ປະຊາຊົນຫວຽດນາມມີມູນເຊື້ອຮັກຊາດແລະມະນຸດສະທຳ. ແຕ່ລະຄັ້ງທີ່ປະເທດຊາດປະສົບຄວາມຫຍຸ້ງຍາກ, ມູນເຊື້ອດັ່ງກ່າວໄດ້ຮັບການທະວີຄູນຫຼາຍຍິ່ງຂຶ້ນ. ໃນເວລາທີ່ຜ່ານມາ, ປະຊາຊົນເຮົາທັງໝົດໄດ້ຮ່ວມແຮງຮ່ວມໃຈກັນ ພ້ອມກັນກັບພັກແລະລັດ ໃນການກີດກັ້ນແລະຄວບຄຸມໂລກລະບາດ ຢ່າງມີປະສິດທິຜົນໃນເບື້ອງຕົ້ນ. ໃນເວລາທີ່ຈະມາເຖິງ, ພວກເຮົາອາດຈະປະເຊີນກັບຄວາມຫຍຸ້ງຍາກຫຼາຍຂຶ້ນຫຼາຍເທົ່າ, ຮຽກຮ້ອງໃຫ້ມີຄວາມພະຍາຍາມ ແລະຄວາມຕັດສິນໃຈຫຼາຍຍິ່ງຂຶ້ນ.
ໃນການຕໍ່ສູ້ປ້ອງກັນແລະຕ້ານໂລກລະບາດໃນຊ່ວງເວລາທີ່ສຳຄັນທີ່ສຸດນີ້, ມາດຕະການປ້ອງກັນແລະຕ້ານໂລກ ລະບາດ ຈະສົ່ງຜົນກະທົບຕໍ່ການເຄື່ອນໄຫວຂອງອົງການຈັດຕັ້ງແລະບຸກຄົນຈຳນວນໜຶ່ງ ກໍ່ຄືກະທົບຕໍ່ຊີວິດປະຈຳວັນຂອງປະຊາຊົນເຮົາຢ່າງແນ່ນອນ. ດ້ວຍຈິດໃຈຖືສຸຂະພາບແລະຊີວິດຂອງມະນຸດເປັນອັນດັບໜຶ່ງ, ຂ້າພະເຈົ້າຮຽກຮ້ອງພີ່ນ້ອງຮ່ວມຊາດ, ສະຫາຍ ແລະ ນັກຮົບໃນທົ່ວປະເທດ, ພີ່ນ້ອງຮ່ວມຊາດເຮົາຢູ່ຕ່າງປະເທດທັງໝົດ ຈົ່ງສາມັກຄີເປັນຈິດໜຶ່ງໃຈດຽວກັນ, ເປັນເອກະພາບທາງດ້ານເຈດຈຳນົງແລະການກະທຳ, ປະຕິບັດບັນດາແຜນນະໂຍບາຍ, ຂໍ້ກຳນົດຂອງພັກແລະລັດ, ການຊີ້ນຳແລະການບໍລິຫານຂອງລັດຖະບານ, ນາຍົກລັດຖະມົນຕີ ຢ່າງເດັດດ່ຽວແລະມີປະສິດທິຜົນ. ປະຊາຊົນແຕ່ລະຄົນເປັນນັກຮົບໃນສະໜາມຮົບປ້ອງກັນແລະຕ້ານໂລກລະບາດ.
ໂດຍເປັນສະມາຊິກທີ່ຕັ້ງໜ້າແລະມີຄວາມຮັບຜິດຊອບຂອງປະຊາຄົມໂລກ, ຫວຽດນາມສະແດງຄວາມເປັນຫ່ວງເປັນໄຍ, ແບ່ງປັນ, ເຫັນອົກເຫັນໃຈຢ່າງເລິກເຊິ່ງ ແລະກຳລັງພະຍາຍາມຢ່າງເຕັມທີ່ທີ່ຈະຮ່ວມມື ແລະປະສານງານໃນທັນທີ ກັບບັນດາປະເທດ, ໂດຍສະເພາະ ບັນດາປະເທດທີ່ຖືກຜົນກະທົບຢ່າງໜັກ ຈາກການແຜ່ລະບາດຂອງ COVID-19. ຂ້າພະເຈົ້າເຫັນວ່າ, ໃນສະພາບການປະຈຸບັນ, ຄວາມສາມັກຄີແລະການປະສານການດຳເນີນງານທົ່ວໂລກ ແມ່ນພື້ນຖານເພື່ອຮັບປະກັນຢ່າງແນ່ນອນຂອງໄຊຊະນະສຸດທ້າຍຂອງໂລກຕໍ່ໂລກລະບາດນີ້.
ປະຊາຊົນຫວຽດນາມເຮົາທັງໝົດ ຈົ່ງຮ່ວມແຮງຮ່ວມໃຈກັນ ຜ່ານຜ່າທຸກຄວາມຫຍຸ້ງຍາກ ສິ່ງທ້າທາຍ ເພື່ອເອົາຊະນະໂລກລະບາດ COVID-19!
----------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 939 (ເດືອນເມສາ 2020)
