ວກ. - ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກກອມມູນິດຫວຽດນາມ ປະຊຸມແຕ່ວັນທີ 25 ມັງກອນ 2021 ເຖິງວັນທີ 1 ກຸມພາ 2021, ທີ່ນະຄອນຫຼວງຮ່າໂນ້ຍ ແລະ ໄດ້ລົງຄະແນນສຽງຮັບຮອງເອົາມະຕິຂອງກອງປະຊຸມໃຫຍ່. ວາລະສານກອມມູນິດຂໍເປັນກຽດແນະນຳເນື້ອໃນຄົບຖ້ວນຂອງມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກ:
ສະຫາຍຫງວຽນຝູຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ສສ ຫວຽດນາມ ອ່ານຄຳປາໄສອັດກອງປະຊຸມໃຫຍ່ _ພາບ: TTXVN
ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກກອມມູນິດຫວຽດນາມ ປະຊຸມແຕ່ວັນທີ 25 ມັງກອນ 2021 ເຖິງວັນທີ 1 ກຸມພາ 2021, ທີ່ນະຄອນຫຼວງຮ່າໂນ້ຍ, ພາຍຫຼັງປຶກສາຫາລືບັນດາເອກະສານທີ່ຄະນະບໍລິຫານງານສູນກາງພັກສະໄໝທີ XII ສະເໜີ,
ລົງມະຕິ
I- ຮັບຮອງເອົາເນື້ອໃນພື້ນຖານ ຂອງການປະເມີນຜົນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ແລະ ການປະເມີນທົ່ວໄປ 10 ປີແຫ່ງການຈັດຕັ້ງປະຕິບັດໂຄງການການເມືອງກໍ່ສ້າງປະເທດໃນສະໄໝຂ້າມຜ່ານຂຶ້ນສູ່ລັດທິສັງຄົມນິຍົມປີ 1991 (ສະບັບເພີ່ມເຕີມ, ພັດທະນາປີ 2011), 10 ປີແຫ່ງການປະຕິບັດແຜນຍຸດທະສາດການພັດທະນາເສດຖະກິດ - ສັງຄົມ 2011 - 2020, 30 ປີແຫ່ງການປະຕິປັດໂຄງການການເມືອງປີ 1991, 35 ປີແຫ່ງການປະຕິບັດການປ່ຽນແປງໃໝ່; ກຳນົດທິດທາງການພັດທະນາ ແລະ ທິດທາງ, ໜ້າທີ່ການພັດທະນາປະເທດໃນເວລາທີ່ຈະມາເຖິງ ເຊິ່ງລະບຸໄວ້ໃນເອກະສານຂອງຄະນະບໍລິຫານງານສູນກາງພັກສະໄໝທີ XII ທີ່ຍື່ນສະເໜີຕໍ່ກອງປະຊຸມໃຫຍ່. ລາຍລະອຽດຄື:
1. ຜົນການຈັດຕັ້ງປະຕິບັດມະຕິຂອງກອງປະຊຸມໃຫຍ່ຄັ້ງທີ XII
ໃນໄລຍະກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII, ກຳເອົາຂໍ້ໄດ້ປຽບແລະໂອກາດ, ຜ່ານຜ່າຄວາມຫຍຸ້ງຍາກແລະສິ່ງທ້າທາຍ, ໂດຍສະເພາະຜົນກະທົບທີ່ໜັກໜ່ວງຈາກວິກິດເສດຖະກິດໂລກແລະພາວະຖົດຖອຍທີ່ເກີດຈາກການລະບາດໃຫຍ່ຂອງໂຄວິດ-19; ທົ່ວພັກ, ທົ່ວປວງຊົນ, ທົ່ວກອງທັບໄດ້ສາມັກຄີຮ່ວມແຮງຮ່ວມໃຈກັນ, ພະຍາຍາມສູ້ຊົນ ປະຕິບັດເປົ້າໝາຍແລະໜ້າທີ່ໃຫ້ສຳເລັດ, ບັນລຸຄວາມສຳເລັດທີ່ສຳຄັນແລະຮອບດ້ານພໍຄວນ, ສ້າງຄວາມປະທັບໃຈທີ່ໂດດເດັ່ນຫຼາຍຢ່າງ. ເສດຖະກິດມະຫາພາກມີສະຖຽນລະພາບ, ເງິນເຟີ້ຖືກຄວບຄຸມ, ການເຕີບໂຕຢູ່ໃນລະດັບສູງພໍສົມຄວນ; ທ່າແຮງ, ຂະໜາດ ແລະ ຄວາມສາມາດແຂ່ງຂັນຂອງເສດຖະກິດໄດ້ຮັບການຍົກສູງຂຶ້ນ. ບັນດາຂົງເຂດສັງຄົມ, ສະພາບແວດລ້ອມມີຄວາມກ້າວໜ້າຫຼາຍຢ່າງ. ຊີວິດຂອງປະຊາຊົນໄດ້ຮັບການປັບປຸງດີຂຶ້ນຢ່າງເຫັນໄດ້ຊັດ. ວຽກງານກໍ່ສ້າງ, ປັບປຸງພັກ ແລະ ການກໍ່ສ້າງລະບົບການເມືອງໄດ້ຮັບຄວາມເອົາໃຈໃສ່ເປັນພິເສດ ແລະ ໄດ້ຜັນຂະຫຍາຍຢ່າງຮອບດ້ານ, ຄົບຊຸດ ແລະມີປະສິດທິຜົນ. ວຽກງານກວດກາ, ຕິດຕາມກວດກາ, ປະຕິບັດວິໄນ, ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ການຟຸມເຟືອຍ, ຄວາມຫຍໍ້ທໍ້ ໄດ້ມີການປ່ຽນແປງຢ່າງແຂງແຮງ, ມີການບຸກທະລຸ ແລະ ຕິດແໜ້ນລະຫວ່າງ "ການສ້າງ" ແລະ "ການຕ້ານ", ມີປະສິດທິຜົນ ແລະ ນັບມື້ນັບເຂົ້າສູ່ລວງເລິກ. ລັດແຫ່ງອຳນາດກົດໝາຍສັງຄົມນິຍົມຫວຽດນາມໄດ້ຮັບການປັບປຸງໃຫ້ໝັ້ນຄົງເຂັ້ມແຂງຢ່າງຕໍ່ເນື່ອງ. ວຽກງານການນຳພາຂອງພັກຕໍ່ລັດ, ແນວໂຮງປະເທດຊາດຫວຽດນາມ ແລະ ບັນດາອົງການຈັດຕັ້ງການເມືອງ - ສັງຄົມໄດ້ຮັບການເພີ່ມທະວີ, ຄວາມສຳພັນປະສານງານນັບມື້ນັບແໜ້ນແຟ້ນ, ຄົບຊຸດ. ການເມືອງ - ສັງຄົມມີສະຖຽນລະພາບ; ການປ້ອງກັນປະເທດແລະຄວາມໝັ້ນຄົງແຫ່ງຊາດ ໄດ້ຮັບການປັບປຸງຢ່າງບໍ່ຢຸດຢັ້ງ, ມີຄວາມເດັດດ່ຽວໜຽວແໜ້ນໃນການຮັກສາເອກະລາດແຫ່ງຊາດ, ອຳນາດອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ, ແລະໃນການຮັກສາຜົນປະໂຫຍດຂອງຊາດ ປະເທດຊາດ; ການພົວພັນຕ່າງປະເທດແລະການເຊື່ອມໂຍງສາກົນນັບມື້ນັບກວ້າງຂວາງເລິກເຊິ່ງ ແລະມີປະສິດທິຜົນ; ບົດບາດຖານະແລະກຽດສັກສີຂອງປະເທດຫວຽດນາມໃນເວທີສາກົນໄດ້ຮັບການຍົກສູງຂຶ້ນ. ພິເສດ, ໃນປີ 2020, ການລະບາດໃຫຍ່ຂອງໂຄວິດ-19 ກໍ່ໃຫ້ເກີດຄວາມເສຍຫາຍທາງເສດຖະກິດແລະສັງຄົມຢ່າງຫຼວງຫຼາຍ, ແຕ່ຍ້ອນການເສີມຂະຫຍາຍກຳລັງແຮງແຫ່ງຄວາມສາມັກຄີປວງຊົນທັງຊາດ, ຄວາມດີເດັ່ນຂອງລະບອບສັງຄົມນິຍົມ, ການເຂົ້າຮ່ວມຢ່າງເປັນເອກະພາບແລະເຂັ້ມແຂງ ຂອງລະບົບການເມືອງທັງໝົດ ພາຍໃຕ້ການນຳພາທີ່ຖືກຕ້ອງຂອງພັກ, ຄວາມເຫັນດີເຫັນພ້ອມແລະສະໜັບສະໜູນຂອງປະຊາຊົນ, ປະເທດຂອງພວກເຮົາຈຶ່ງຄ່ອຍໆຄວບຄຸມການລະບາດຂອງໂຄວິດ-19 ໄດ້ຢ່າງມີປະສິດທີຜົນ; ຟື້ນຟູການຜະລິດ ທຸລະກິດ ແລະການເຄື່ອນໄຫວເສດຖະກິດ - ສັງຄົມເທື່ອລະກ້າວ; ເຮັດໃຫ້ຊີວິດຂອງປະຊາຊົນມີຄວາໝັ້ນຄົງ; ປະກອບສ່ວນປັບປຸງ, ເພີ່ມທະວີຄວາມໄວ້ວາງໃຈຂອງປະຊາຊົນຕໍ່ກັບພັກ, ລັດ ແລະລະບອບສັງຄົມນິຍົມ; ຢືນຢັນຄວາມກ້າຫານ, ເຈດຈຳນົງ ແລະມູນເຊື້ອອັນດີງາມຂອງປະຊາຊົນເຮົາ, ຂອງຊາດເຮົາ.
ຜົນສໍາເລັດທີ່ບັນລຸໄດ້ໃນ 5 ປີຜ່ານມາແມ່ນການຫຼອມລວມກຳລັງແຮງສ້າງສັນ ຂອງຂະບວນການສູ້ຊົນຢ່າງຕໍ່ເນື່ອງ ແລະທົນທານໜຽວແໜ້ນຂອງທົ່ວພັກ, ທົ່ວປວງຊົນແລະທົ່ວກອງທັບຂອງພວກເຮົາ ຜ່ານກອງປະຊຸມໃຫຍ່ຫຼາຍຄັ້ງ, ປະກອບສ່ວນເຂົ້າໃນຜົນສໍາເລັດອັນຍິ່ງໃຫຍ່, ມີຄວາມໝາຍປະຫວັດສາດ ຂອງປະເທດເຮົາ ໃນຕະຫຼອດໄລຍະ 35 ປີແຫ່ງການປ່ຽນແປງໃໝ່. ຄວາມສຳເລັດເຫຼົ່ານີ້ເກີດຈາກສາເຫດຫຼາຍປະການ, ແຕ່ສາເຫດລວມແລະສໍາຄັນທີ່ສຸດແມ່ນ ຄວາມສາມັກຄີ ເປັນເອກະພາບ, ການນຳພາ, ຊີ້ນຳຢ່າງຖືກຕ້ອງ ທັນການ ມີປະສິດທິຜົນ ຂອງຄະນະບໍລິຫານງານສູນກາງ, ກົມການເມືອງ, ຄະນະເລຂາທິການສູນກາງ ແລະ ຄະນະພັກທຸກລະດັບ ໃນການຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ XII ຢ່າງຮອບດ້ານ, ຄົບຊຸດ, ແກ້ໄຂຫຼາຍບັນຫາໃໝ່ທີ່ເກີດຂຶ້ນໃນພາກປະຕິບັດຢ່າງທັນການແລະມີປະສິດທິຜົນ; ການຄຸ້ມຄອງແລະບໍລິຫານຢ່າງຂຸ້ນຂ້ຽວຂອງລັດຖະບານແລະອຳນາດການປົກຄອງຂັ້ນຕ່າງໆ; ຄວາມພະຍາຍາມປ່ຽນແປງໃໝ່ເນື້ອໃນແລະແບບວິທີການເຄື່ອນໄຫວຂອງສະພາແຫ່ງຊາດ ແລະສະພາປະຊາຊົນຂັ້ນຕ່າງໆ; ການເຂົ້າຮ່ວມຢ່າງຕັ້ງໜ້າແລະມີປະສິດທິຜົນຂອງແນວໂຮມປະເທດຊາດ ແລະບັນດາອົງການຈັດຕັ້ງການເມືອງ - ສັງຄົມ; ການສົມທົບຢ່າງຄົບຊຸດຂອງລະບົບການເມືອງທັງໝົດ; ຄວາມພະຍາຍາມຂອງຖັນແຖວພະນັກງານ ສະມາຊິກພັກ; ຈິດໃຈອອກແຮງງານຢ່ງຕັ້ງໜ້າ ດຸໝັ່ນ ປະດິດສ້າງ ແລະມີຄວາມຮັບຜິດຊອບ ຂອງຊຸມຊົນທຸລະກິດແລະປະຊາຊົນທຸກຊົນຊັ້ນ; ການສະໜັບສະໜູນຂອງເພື່ອນມິດສາກົນ.
ຄຽງຄູ່ກັບບັນດາຜົນສຳເລັດທີ່ບັນລຸໄດ້ນັ້ນ, ການປັບປຸງບູລະນະລະບຽບກົດໝາຍ, ການປ່ຽນແປງໃໝ່່ຮູບແບບການເຕີບໂຕ, ການປັບໂຄງສ້າງເສດຖະກິດຄືນໃໝ່, ການຫັນເປັນອຸດສາຫະກຳແລະທັນສະໄໝຍັງຊັກຊ້າ, ຍັງບໍ່ທັນມີການປ່ຽນແປງໂດຍພື້ນຖານ; ສະມັດຕະພາບ ຄຸນນະພາບ ປະສິດທິຜົນ ແລະ ແຮງແຂ່ງຂັນຂອງພື້ນຖານເສດຖະກິດຍັງບໍ່ທັນສູງ. ການສຶກສາແລະຝຶກອົບຮົມ, ວິທະຍາສາດແລະເຕັກໂນໂລຊີຍັງບໍ່ທັນກາຍເປັນກຳລັງຂັບເຄື່ອນຫຼັກ ທີ່ຊຸກຍູ້ການພັດທະນາເສດຖະກິດ-ສັງຄົມ. ຂົງເຂດວັດທະນະທຳແລະສັງຄົມ ຍັງບໍ່ທັນມີການບຸກທະລຸຫຼາຍ ແລະ ປະສິດທິຜົນກໍຍັງບໍ່ສູງ; ຊີວິດຂອງປະຊາຊົນພາກສ່ວນໜຶ່ງຍັງພົບຄວາມຫຍຸ້ງຍາກ. ການຄຸ້ມຄອງຊັບພະຍາກອນ, ການປົກປັກຮັກສາສິ່ງແວດລ້ອມ ແລະຄວາມສາມາດໃນການປັບຕົວເຂົ້າກັບການປ່ຽນແປງດິນຟ້າອາກາດ ແມ່ນຍັງບໍ່ພຽງພໍ. ບັນດາຂົງເຂດການປ້ອງກັນປະເທດ ປ້ອງກັນຄວາມໝັ້ນຄົງ ແລະການຕ່າງປະເທດ ຍັງມີຂໍ້ຈຳກັດຈຳນວນໜຶ່ງ. ກຳລັງແຮງແຫ່ງມະຫາສາມັກຄີປວງຊົນທັງຊາດ ແລະປະຊາທິປະໄຕສັງຄົມນິຍົມໃນບາງສະຖານທີ່, ບາງຄັ້ງບໍ່ໄດ້ຮັບຄວາມເອົາໃຈໃສ່ພັດທະນາຢ່າງເຕັມສ່ວນ. ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມຫວຽດນາມໃນບາງດ້ານ ຍັງບໍ່ທັນຕອບສະໜອງໄດ້ກັບຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມ ແລະ ການຄຸ້ມຄອງປະເທດໃນສະພາບການໃໝ່. ວຽກງານກໍ່ສ້າງແລະປັບປຸງພັກຍັງມີຂໍ້ຈຳກັດຈຳນວນໜຶ່ງ.
ສິບປີແຫ່ງການປະຕິບັດໂຄງການການເມືອງ (ສະບັບເພີ່ມເຕີມ, ພັດທະນາປີ 2011) ແລະການປະຕິບັດຍຸດທະສາດການພັດທະນາເສດຖະກິດ - ສັງຄົມ 10 ປີ 2011-2020 ໄດ້ສ້າງຄວາມກ້າວໜ້າທີ່ສຳຄັນທັງໃນດ້ານການຮັບຮູ້ດ້ານທິດສະດີ ແລະການຈັດຕັ້ງປະຕິບັດ, ຢືນຢັນບັນດາຄຸນຄ່າອັນໃຫຍ່ຫຼວງຂອງໂຄງການການເມືອງ, ສືບຕໍ່ຢືນຢັນວ່າ ແນວທາງການປ່ຽນແປງໃໝ່ຂອງພັກເຮົາແມ່ນຖືກຕ້ອງແລະປະດິດສ້າງ. ເສດຖະກິດ ວັດທະນະທຳ ສັງຄົມສືບຕໍ່ພັດທະນາ, ການປ້ອງກັນປະເທດ ປ້ອງກັນຄວາມໝັ້ນຄົງ ແລະການຕ່າງປະເທດ ໄດ້ຮັບການເພີ່ມທະວີ, ຊີວິດທາງດ້ານວັດຖຸແລະຈິດໃຈຂອງປະຊາຊົນ ໄດ້ຮັບການປັບປຸງດີຂຶ້ນຢ່າງຈະແຈ້ງ. ແນວໃດກໍ່ຕາມ, ການພັດທະນາເສດຖະກິດ - ສັງຄົມຍັງບໍ່ທັນສົມກັບທ່າແຮງແລະຄວາມໄດ້ປຽບຂອງປະເທດ ແລະ ຍັງມີຄວາມຫຍຸ້ງຍາກແລະສິ່ງທ້າທາຍຫຼາຍຢ່າງ. ບາງຕົວຊີ້ວັດການພັດທະນາເສດຖະກິດ - ສັງຄົມໃນຍຸດທະສາດການພັດທະນາ ເສດຖະກິດ - ສັງຄົມ 10 ປີ 2011-2020 ແລະ ການສ້າງພື້ນຖານເພື່ອນຳປະເທດເຮົາໂດຍພື້ນຖານກາຍເປັນປະເທດອຸດສາຫະກຳຕາມທິດທັນສະໄໝນັ້ນ ບໍ່ບັນລຸເປົ້າໝາຍທີ່ວາງໄວ້. ກິດຈະກຳປ່ຽນແປງໃໝ່ ແລະ ສະພາບການສາກົນ ສືບຕໍ່ມີຫຼາຍບັນຫາກ່ຽວກັບທິດສະດີແລະພຶດຕິກຳທີ່ຕ້ອງສຸມໃສ່ແກ້ໄຂ ເພື່ອນຳປະເທດພັດທະນາຢ່າງວ່ອງໄວແລະຍືນຍົງກວ່າອີກ ຕາມທິດທາງສັງຄົມນິຍົມ, ໂດຍສະເພາະແມ່ນການຮັບຮູ້ແລະແກ້ໄຂບັນດາສາຍພົວພັນໃຫຍ່ຢ່າງຖືກຕ້ອງ, ມີປະສິດທິຜົນ.
ຫັນເບິ່ງຄືນ 35 ປີແຫ່ງການປ່ຽນແປງໃໝ່, 30 ປີແຫ່ງການປະຕິບັດໂຄງການການເມືອງກໍ່ສ້າງປະເທດໃນສະໄໝຂ້າມຜ່ານຂຶ້ນສູ່ລັດທິສັງຄົມນິຍົມ (ໂຄງການການເມືອງປີ 1991), ທິດສະດີກ່ຽວກັບແນວທາງການປ່ຽນແປງໃໝ່, ກ່ຽວກັບລັດທິສັງຄົມນິຍົມ ແລະ ເສັ້ນທາງຂຶ້ນສູ່ສັງຄົມນິຍົມໃນປະເທດເຮົາ ນັບມື້ນັບສົມບູນແບບ ແລະ ໄດ້ຮັບການປະຕິບັດເປັນຈິງເທື່ອລະກ້າວ. ປະເທດໄດ້ບັນລຸຜົນສຳເລັດອັນໃຫຍ່ຫຼວງ, ມີຄວາມໝາຍປະຫວັດສາດ, ມີການພັດທະນາທີ່ເຂັ້ມແຂງແລະຮອບດ້ານຖ້າທຽບໃສ່ຊຸມປີກ່ອນການປ່ຽນແປງໃໝ່. ຂະໜາດແລະລະດັບຂອງພື້ນຖານເສດຖະກິດໄດ້ຮັບການຍົກສູງຂຶ້ນ. ຊີວິດຂອງປະຊາຊົນໄດ້ຮັບການປັບປຸງໃຫ້ດີຂຶ້ນຢ່າງຈະແຈ້ງທັງດ້ານວັດຖຸແລະຈິດໃຈ. ປະເທດຂອງພວກເຮົາບໍ່ເຄີຍມີພາລະກິດອັນໃຫຍ່ໂຕ, ທ່າແຮງ, ຖານະບົດບາດແລະກຽດສັກສີສາກົນຄືທຸກມື້ນີ້. ບັນດາຜົນສຳເລັດຂອງ 35 ປີແຫ່ງການປະຕິບັດພາລະກິດການປ່ຽນແປງໃໝ່, 30 ປີແຫ່ງການປະຕິບັດໂຄງການການເມືອງປີ 1991, ໂດຍສະເພາະ, ໃນ 10 ປີແຫ່ງການປະຕິບັດໂຄງການການເມືອງ (ສະບັບເພີ່ມເຕີມ, ພັດທະນາປີ 2011) ໄດ້ສືບຕໍ່ຢືນຢັນວ່າ ເສັ້ນທາງຂຶ້ນສູ່ລັດທິສັງຄົມນິຍົມຂອງປະເທດເຮົາແມ່ນສອດຄ່ອງກັບພຶດຕິກຳຕົວຈິງຂອງຫວຽດນາມ ແລະ ທ່າອຽງການພັດທະນາຂອງຍຸກສະໄໝ; ການນຳພາທີ່ຖືກຕ້ອງຂອງພັກແມ່ນປັດໄຈອັນດັບໜຶ່ງທີ່ຕັດສິນໄຊຊະນະຂອງການປະຕິວັດຫວຽດນາມ. ໃນສະພາບການໂລກທີ່ມີການປ່ຽນແປງໄວແລະສັບສົນຫຼາຍຢ່າງ, ໂຄງການການເມືອງຂອງພັກສືບຕໍ່ເປັນທຸງແຫ່ງຄວາມຄິດ, ທຸງຂອງການຕໍ່ສູ້, ທຸງທີ່ເຕົ້າໂຮມກຳລັງແຮງຂອງຄວາມສາມັກຄີປວງຊົນທັງຊາດ ເພື່ອສູ້ຊົນໃຫ້ປະເທດຫວຽດນາມທີ່ “ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸດຕິທຳ ແລະ ສີວິໄລ”.
2. ວິໄສທັດແລະທິດທາງການພັດທະນາ
ໃນຊຸມປີຂ້າງໜ້າ, ສະຖານະການໃນໂລກແລະພາຍໃນປະເທດມີທັງຄວາມສະດວກ, ໂອກາດ ແລະຄວາມຫຍຸ້ງຍາກ, ສິ່ງທ້າທາຍທີແຊກຊ້ອນກັນ; ພາໃຫ້ເກີດບັນຫາໃໝ່ແລະຄວາມຮຽກຮ້ອງຕ້ອງການໃໝ່ຫຼາຍຢ່າງທີ່ໜັກໜ່ວງ, ສັບສົນກວ່າສຳລັບພາລະກິດການສ້າງສາແລະປົກປັກຮັກສາປະເທດ; ມັນຮຽກຮ້ອງໃຫ້ທົ່ວພັກ, ທົ່ວປວງຊົນແລະທົ່ວກອງທັບເຮົາຕ້ອງສາມັກຄີເປັນຈິດໜຶ່ງໃຈດຽວ; ສືບຕໍ່ປ່ຽນແປງຈິນຕະນາການຢ່າງແຂງແຮງ; ມີຄວາມຕັດສິນໃຈທາງການເມືອງສູງ; ການຄາດຄະເນສະຖານະການຢ່າງຖືກຕ້ອງແລະທັນເວລາ; ເປັນເຈົ້າການຕອບສະໜອງທຸກສະຖານະການຢ່າງທັນທ່ວງທີ; ພະຍາຍາມຫຼາຍຂຶ້ນເພື່ອສືບຕໍ່ຊຸກຍູ້ການປ່ຽນແປງໃໝ່ຢ່າງຮອບດ້ານແລະຄົບຊຸດ; ເພີ່ມກຳລັງແຮງໃນທຸກດ້ານຂອງປະເທດຢ່າງຕໍ່ເນື່ອງ, ປົກປັກຮັກສາປະເທດຊາດແລະຜົນສຳເລັດດ້ານການພັດທະນາທີ່ບັນລຸໄດ້ຢ່າງໝັ້ນຄົງ; ນຳພາປະເທດກ້າວໄປຂ້າງໜ້າຢ່າງໝັ້ນຄົງ, ພັດທະນາຢ່າງໄວວາແລະຍືນຍົງ; ຕັດສິນໃຈຈັດຕັ້ງປະຕິບັດທັດສະນະ, ເປົ້າໝາຍ, ທິດທາງແລະໜ້າທີ່ຈຸດສຸມດັ່ງຕໍ່ໄປນີ້ໃຫ້ສຳເລັດ:
ທັດສະນະຊີ້ນຳ:
- ຍຶດໝັ້ນແລະໝູນໃຊ້, ພັດທະນາລັດທິມາກ-ເລນິນ, ແນວຄິດໂຮ່ຈີມິນຢ່າງປະດິດສ້າງ; ຍຶດໝັ້ນໃນເປົ້າໝາຍເອກະລາດແຫ່ງຊາດແລະລັດທິສັງຄົມນິຍົມ; ຍຶດໝັ້ນແນວທາງປ່ຽນແປງໃໝ່ຂອງພັກ; ຍຶດໝັ້ນບັນດາຫຼັກການກໍ່ສ້າງພັກເພື່ອສ້າງສາແລະປົກປັກຮັກສາປະເທດຊາດສັງຄົມນິຍົມຢ່າງໝັ້ນແກ່ນ.
- ຮັບປະກັນດີສຸດຜົນປະໂຫຍດຂອງຊາດ-ປະເທດຊາດ ບົນພື້ນຖານບັນດາຫຼັກການພື້ນຖານຂອງກົດບັດສະຫະປະຊາຊາດ ແລະກົດໝາຍສາກົນຄື, ສະເໝີພາບ, ການຮ່ວມມື ແລະ ມີປະໂຫຍດຮ່ວມກັນ. ສືບຕໍ່ພັດທະນາປະເທດຢ່າງໄວແລະຍືນຍົງ; ເຊື່ອມໂຍງຢ່າງແໜ້ນແຟ້ນແລະຜັນຂະຫຍາຍໜ້າທີ່ຕ່າງໆຢ່າງຄົບຊຸດ, ໃນນັ້ນພັດທະນາເສດຖະກິດ - ສັງຄົມແມ່ນສູນກາງ, ກໍ່ສ້າງພັກແມ່ນກຸນແຈ, ພັດທະນາວັດທະນະທຳເປັນພື້ນຖານຈິດໃຈ, ການປ້ອງກັນປະເທດ, ປ້ອງກັນຄວາມໝັ້ນຄົງແມ່ນສໍາຄັນແລະເປັນປະຈຳ.
- ປຸກຕື່ນຢ່າງແຂງແຮງນ້ຳໃຈຮັກຊາດ ແລະ ສ້າງຄວາມເຂັ້ມແຂງດ້ວຍຕົນເອງຂອງຊາດ, ກຳລັງແຮງແຫ່ງມະຫາສາມັກຄີປວງຊັນທັງຊາດ ແລະຄວາມປາດຖະໜາພັດທະນາປະເທດໃຫ້ຈະເລີນຮຸ່ງເຮືອງແລະມີຄວາມສຸກ; ພັດທະນາປະຊາທິປະໄຕສັງຄົມນິຍົມ, ກຳລັງແຮງສັງລວມຂອງລະບົບການເມືອງທັງໝົດ ແລະ ຂອງພື້ນຖານວັດທະນະທຳແລະຜູ້ຄົນຫວຽດນາມ, ເສີມສ້າງຄວາມເຂັ້ມແຂງຂອງປະຊາຊົນ, ຍົກສູງຄຸນນະພາບຂອງຊັບພະຍາກອນມະນຸດ, ມີກົນໄກບຸກທະລຸເພື່ອດຶງດູດແລະນຳໃຊ້ຜູ້ເກັ່ງກ້າສາມາດ, ຊຸກຍູ້ການປ່ຽນແປງໃມ່ປະດິດສ້າງ, ປະຢຸກໃຊ້ວິທະຍາສາດແລະເຕັກໂນໂລຊີຢ່າງແຂງແຮງ, ໂດຍສະເພາະແມ່ນ ບັນດາຜົນສຳເລັດຂອງການປະຕິວັດອຸດສາຫະກຳຄັ້ງທີສີ່, ສ້າງກຳລັງຂັບເຄື່ອນທີ່ແຂງແຮງໃຫ້ແກ່ການພັດທະນາຢ່າງໄວວາແລະຍືນຍົງ.
- ສົມທົບກຳລັງແຮງຂອງຊາດກັບກຳລັງແຮງຂອງຍຸກສະໄໝ; ຍົກສູງເຈດຈຳນົງເອກະລາດ, ເປັນເຈົ້າຕົນເອງ, ເປັນເຈົ້າການ, ຕັ້ງໜ້າເຊື່ອມໂຍງສາກົນແລະຍົກສູງປະສິດທິຜົນຂອງການຮ່ວມມືສາກົນ; ເສີມຂະຫຍາຍກໍາລັງພາຍໃນໃຫ້ໄດ້ຫຼາຍທີ່ສຸດແລະໃຊ້ປະໂຫຍດຈາກກໍາລັງພາຍນອກ, ໃນນັ້ນແຫຼ່ງກຳລັງພາຍໃນ ໂດຍສະເພາະຊັບພະຍາກອນມະນຸດ ມີຄວາມສຳຄັນທີ່ສຸດ.
- ເພີ່ມທະວີການກໍ່ສ້າງແລະປັບປຸງພັກ, ເສີມຂະຫຍາຍທາດແທ້ຊົນຊັ້ນກຳມະກອນຂອງພັກ, ຍົກສູງຄວາມສາມາດນຳພາ, ຄວາມສາມາດກຳອຳນາດ ແລະ ກຳລັງແຮງສູ້ຮົບຂອງພັກ; ກໍ່ສ້າງພັກແລະລະບົບການເມືອງໃຫ້ສະອາດປອດໃສແລະໝັ້ນຄົງເຂັ້ມແຂງຮອບດ້ານ, ກໍ່ສ້າງລັດໃຫ້ກະທັດລັດຮັດກຸມແລະເຄື່ອນໄຫວມີປະສິດທິພາບແລະປະສິດທິຜົນ; ຕິດກັບການຫຼຸດຈຳນວນບັນຈຸບຸກຄະລາກອນ, ຍົກສູງຄຸນນະພາບແລະຈັດສັນປັບໂຄງສ້າງຂອງຖັນແຖວພະນັກງານ, ລັດຖະກອນ, ພາລະກອນ; ກໍ່ສ້າງຖັນແຖວພະນັກງານ ສະມາຊິກພັກ, ໂດຍສະເພາະຖັນແຖວພະນັກງານລະດັບຍຸດທະສາດ, ຜູ້ນຳ ທີ່ມີຄຸນສົມບັດຄົບຖ້ວນ ມີຄວາມສາມາດແລະມີຊື່ສຽງ, ທຽບເທົ່າກັບລະດັບໜ້າທີ່ ແລະ ມີຄວາມພົວພັນໃກ້ຊິດກັບປະຊາຊົນ ນັ້ນແມ່ນບັນດາປັດໄຈສຳຄັນທີ່ຕັດສິນຄວາມສຳເລັດຂອງພາລະກິດການສ້າງສາພັດທະນາປະເທດ ແລະປົກປັກຮັກສາປະເທດຊາດ.
ເປົ້າໝາຍລວມ:
ຍົກສູງຄວາມສາມາດນຳພາ, ຄວາມສາມາດກຳອຳນາດ ແລະ ກຳລັງແຮງສູ້ຮັບຂອງພັກ; ກໍ່ສ້າງພັກແລະລະບົບການເມືອງໃຫ້ສະອາດປອດໃສ, ໝັ້ນຄົງເຂັ້ມແຂງຢ່າງຮອບດ້ານ; ປັບປຸງ ເພີ່ມທະວີຄວາມເຊື່ອໝັ້ນຂອງປະຊາຊົນໃນພັກ, ລັດ ແລະລະບອບສັງຄົມນິຍົມ; ປຸກລຸກຄວາມປາດຖະໜາພັດທະນາປະເທດໃຫ້ຈະເລີນຮຸ່ງເຮືອງແລະມີຄວາມສຸກ, ເສີມຂະຫຍາຍເຈດຈຳນົງແລະກຳລັງແຮງແຫ່ງມະຫາສາມັກຄີປວງຊົນທັງຊາດ ສົມທົບກັບກຳລັງແຮງຂອງຍຸກສະໄໝ; ຊຸກຍູ້ການປ່ຽນແປງໃໝ່, ການຫັນເປັນອຸດສາຫະກຳ ທັນສະໄໝ ຢ່າງແຂງແຮງ ຮອບດ້ານແລະຄົບຊຸດ; ກໍ່ສ້າງແລະປົກປັກຮັກສາປະເທດຊາດຢ່າງໝັ້ນຄົງ, ຮັກສາສະພາບແວດລ້ອມທີ່ສະຫງົບແລະໝັ້ນຄົງ; ສູ້ຊົນເພື່ອຮອດກາງສະຕະວັດທີ 21, ປະເທດເຮົາກາຍເປັນປະເທດພັດທະນາແລ້ວ, ຕາມທິດທາງສັງຄົມນິຍົມ.
ເປົ້າໝາຍລາຍລະອຽດ:
- ຮອດປີ 2025, ຄົບຮອບ 50 ປີແຫ່ງການປົກປ່ອຍພາກໃຕ້ຢ່າງສົມບູນແລະການໂຮມປະເທດເປັນເອກະພາບ: ເປັນປະເທດກຳລັງພັດທະນາ, ມີອຸດສາຫະກຳຕາມທິດທັນສະໄໝ, ມີລາຍໄດ້ເກີນກວ່າລະດັບລາຍໄດ້ປານກາງ-ຕໍ່າ.
- ຮອດປີ 2030, ຄົບຮອບ 100 ປີແຫ່ງການສ້າງຕັ້ງພັກ: ເປັນປະເທດກຳລັງພັດທະນາ, ມີອຸດສາຫະກຳທັນສະໄໝ, ມີລາຍໄດ້ປານກາງສູງ.
- ຮອດປີ 2045, ຄົບຮອບ 100 ປີແຫ່ງການສ້າງຕັ້ງປະເທດສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນປະເທດສາທາລະນະລັດສັງຄົມນິຍົມຫວຽດນາມ: ກາຍເປັນປະເທດພັດທະນາແລ້ວ, ມີລາຍໄດ້ສູງ.
ທິດທາງຂອງບັນດາຕົວຊີ້ວັດທີ່ສໍາຄັນກ່ຽວກັບການພັດທະນາເສດຖະກິດ - ສັງຄົມໃນ 5 ປີ ຈາກປີ 2021 ຫາ 2025 ແມ່ນດັ່ງລຸ່ມນີ້:
ດ້ານເສດຖະກິດ: ອັດຕາການເຕີບໂຕເສດຖະກິດ (GDP - ຈີດີພີ) ສະເລ່ຍໃນ 5 ປີແມ່ນປະມານ 6,5 - 7%/ປີ. ຮອດປີ 2025, ຈີດີພີ ຕໍ່ຫົວຄົນແມ່ນປະມານ 4.700 - 5.000 ໂດລາສະຫະລັດ; ການປະກອບສ່ວນຂອງຜະລິດຕະພາບຂອງປັດໄຈລວມ (TFP) ເຂົ້າໃນການເຕີບໂຕແມ່ນປະມານ 45%; ອັດຕາການຂະຫຍາຍຕົວສະເລ່ຍຂອງຜະລິດຕະພາບແຮງງານສັງຄົມສູງກວ່າ 6.5%/ປີ; ອັດຕາການຫັນເປັນຕົວເມືອງປະມານ 45%; ອັດຕາສ່ວນຂອງອຸດສາຫະກໍາປຸງແຕ່ງ ແລະການຜະລິດໃນ ຈີດີພີ ບັນລຸຫຼາຍກວ່າ 25%; ເສດຖະກິດດິຈິຕອນກວມເອົາປະມານ 20% ຂອງຈີດີພີ.
ທາງດ້ານສັງຄົມ: ຮອດປີ 2025, ອັດຕາສ່ວນຂອງແຮງງານກະສິກໍາໃນແຮງງານສັງຄົມທັງໝົດແມ່ນປະມານ 25%; ອັດຕາສ່ວນຂອງແຮງງານທີ່ຜ່ານການຝຶກອົບຮົມແມ່ນ 70%; ອັດຕາການຫວ່າງງານຢູ່ໃນເຂດຕົວເມືອງໃນປີ 2025 ຕ່ຳກວ່າ 4%; ອັດຕາຄວາມທຸກຍາກແບບຫຼາຍດ້ານໄດ້ຮັກສາການຫຼຸດລົງ 1-1.5% ຕໍ່ປີ; ມີທ່ານໝໍ 10 ຄົນແລະຕຽງໂຮງໝໍ 30 ຕຽງຕໍ່ປະຊາກອນໜຶ່ງໝື່ນຄົນ; ອັດຕາການເຂົ້າຮ່ວມປະກັນສຸຂະພາບເຖິງ 95% ຂອງປະຊາກອນ; ອາຍຸຍືນສະເລ່ຍປະມານ 74,5 ປີ; ອັດຕາຕາແສງບັນລຸມາດຕະຖານຊົນນະບົດໃໝ່ຢ່າງໜ້ອຍແມ່ນ 80%, ໃນນັ້ນຢ່າງໜ້ອຍສຸດ 10% ບັນລຸມາດຕະຖານຊົນນະບົດໃໝ່ແບບຢ່າງ.
ທາງດ້ານສະພາບແວດລ້ອມ: ຮອດປີ 2025, ອັດຕາການນຳໃຊ້ນ້ຳສະອາດແລະນ້ຳຖືກອະນາໄມຂອງປະຊາກອນໃນຕົວເມືອງແມ່ນ 95 - 100%, ປະຊາກອນໃນເຂດຊົນນະບົດແມ່ນ 93 - 95%; ອັດຕາການເກັບແລະບຳບັດຂີ້ເຫຍື້ອໃນຊີວິດປະຈຳວັນໃນຕົວເມືອງຮັບປະກັນມາດຕະຖານແລະລະບຽບການເຖິງ 90%; ອັດຕາສ່ວນອຸດສາຫະກຳແລະເຂດປຸງແຕ່ງສົ່ງອອກ ທີ່ມີລະບົບບຳບັບນ້ຳເສຍແບບລວມສູນທີ່ໄດ້ມາດຕະຖານດ້ານສິ່ງແວດລ້ອມແມ່ນ 92%; ອັດຕາສະຖານປະກອບການທີ່ມີມົນລະພິດສິ່ງແວດລ້ອມຮ້າຍແຮງ ທີ່ໄດ້ຮັບການຈັດການແກ້ໄຂເຖິງ 100%; ຮັກສາອັດຕາປົກຫຸ້ມຂອງປ່າໄມ້ໃຫ້ຢູ່ໃນລະດັບ 42%.
ທິດທາງການພັດທະນາປະເທດໃນໄລຍະປີ 2021 - 2030:
(1) ສືບຕໍ່ປ່ຽນແປງໃໝ່ຈິນຕະນາການຢ່າງແຂງແຮງ, ສ້າງແລະປັບປຸງບູລະນະລະບຽບກົດໝາຍທີ່ສົມບູນຄົບຊຸດ ເພື່ອພັດທະນາເສດຖະກິດ ການເມືອງ ວັດທະນະທຳ ສັງຄົມ ສະພາບແວດລ້ອມແລະອື່ນໆ ຢ່າງຍືນຍົງ, ແກ້ໄຂຄວາມຫຍຸ້ງຍາກ ສິ່ງຄົງຄ້າງຢ່າງທັນການ; ປຸກຕື່ນທ່າແຮງແລະຊັບພະຍາກອນທັງໝົດ, ສ້າງກຳລັງຂັບເຄື່ອນໃໝ່່ໃຫ້ແກ່ການພັດທະນາປະເທດຢ່າງໄວແລະຍືນຍົງ.
(2) ປັບປຸງບູລະນະລະບຽບກົດໝາຍທີ່ຮອບດ້ານແລະຄົບຊຸດເພື່ອພັດທະນາພື້ນຖານເສດຖະກິດຕະຫຼາດກຳນົດທິດສັງຄົມນິຍົມ, ສ້າງສະພາບແວດລ້ອມທີ່ສະດວກດີເພື່ອລະດົມ ຈັດແບ່ງແລະນຳໃຊ້ ແຫຼ່ງຊັບພະຍາກອນຕ່າງໆຢ່າງມີປະສິດທິຜົນ, ຊຸກຍູ້ການລົງທຶນ ຜະລິດ ທະລຸກິດ. ຮັບປະກັນສະຖຽນລະພາບຂອງເສດຖະກິດມະຫາພາກ, ປ່ຽນແປງໃໝ່ຮູບແບບການເຕີບໂຕຢ່າງແຂງແຮງ, ປັບໂຄງສ້າງເສດຖະກິດຄືນໃໝ່, ຍູ້ແຮງການຫັນປະເທດເປັນອຸດສາຫະກຳ ທັນສະໄໝ; ສຸມໃສ່ການກໍ່ສ້າງໂຄງສ້າງພື້ນຖານ ແລະ ພັດທະນາເສດຖະກິດຕົວເມືອງ; ພັດທະນາເສດຖະກິດຊົນນະບົດ ຕິດກັບການກໍ່ສ້າງຊົນນະບົດໃໝ່; ໃຫ້ບຸລິມະສິດແຫຼ່ງພະລັງເພື່ອພັດທະນາພື້ນຖານໂຄງລ່າງຊົນນະບົດໃນເຂດພູດອຍ, ເຂດຊົນເຜົ່າສ່ວນນ້ອຍ; ຍູ້ແຮງການປ່ຽນດິຈິຕອນແຫ່ງຊາດ, ພັດທະນາເສດຖະກິດດິຈິຕອນບົນພື້ນຖານວິທະຍາສາດແລະເຕັກໂນໂລຊີ, ການປ່ຽນແປງໃໝ່ປະດິດສ້າງ; ຍົກສູງປະສິດທິພາບ ຄຸນນະພາບ ປະສິດທິຜົນ ແລະ ຄວາມສາມາດແຂ່ງຂັນ ຂອງພື້ນຖານເສດຖະກິດ, ເຊື່ອມໂຍງຕະຫຼາດພາຍໃນປະເທດກັບຕະຫຼາດໂລກຢ່າງກົມກຽວແລະມີປະສິດທິຜົນ.
(3) ສ້າງການບຸກທະລຸໃນການປ່ຽນແປງໃໝ່ການສຶກສາແລະຝຶກອົບຮົມໂດຍພື້ນຖານແລະຮອບດ້ານ, ພັດທະນາແຫຼ່ງບຸກຄະລາກອນຄຸນນະພາບສູງ, ດຶງດູດແລະນຳໃຊ້ຜູ້ທີ່ມີຄວາມເກັ່ງກ້າສາມາດເປັນຢ່າງດີ. ຊຸກຍູ້ການຄົ້ນຄວ້າ ມອບໂອນ ນຳໃຊ້ຜົນສຳເລັດຂອງການປະຕິວັດອຸດສາຫະກຳຄັ້ງທີສີ່ຢ່າງແຂງແຮງ ເຂົ້າໃນທຸກຂົງເຂດຂອງຊີວິດສັງຄົມ, ເອົາໃຈໃສ່ບາງຂະແໜງການ, ຂົງເຂດຈຸດໜັກທີ່ມີທ່າແຮງ ມີຄວາມສາມາດບົ່ມຊ້ອນ ເພື່ອເປັນແຮງຂັບເຄື່ອນໃຫ້ການເຕີບໂຕຕາມຈິດໃຈແຫ່ງການໄລ່ຕາມ, ກ້າວໜ້າ ແລະ ລື່ນກາຍໃນບາງຂົງເຂດເມື່ອທຽບກັບພາກພື້ນແລະໂລກ.
(4) ການພັດທະນາມະນຸດຢ່າງຮອບດ້ານ ແລະ ການກໍ່ສ້າງພື້ນຖານວັດທະນະທຳຫວຽດນາມທີ່ກ້າວໜ້າແລະເຕັມໄປດ້ວຍເອກະລັກຂອງຊາດ ເພື່ອໃຫ້ວັດທະນະທຳກາຍເປັນກຳລັງແຮງພາບໃນອັນແທ້ຈິງ, ເປັນແຮງຂັບເຄື່ອນໃຫ້ແກ່ການພັດທະນາແລະປົກປັກຮັກສາປະເທດຊາດ. ເພີ່ມການລົງທຶນໃຫ້ແກ່ການພັດທະນາພາລະກິດວັດທະນະທຳ. ກໍ່ສ້າງ, ພັດທະນາ, ສ້າງສະພາບແວດລ້ອມ ແລະເງື່ອນໄຂສັງຄົມທີ່ເອື້ອອຳນວຍທີ່ສຸດ ເພື່ອປຸກລຸກມູນເຊື້ອຮັກຊາດ, ຄວາມພາກພູມໃຈແຫ່ງຊາດ, ຄວາມເຊື່ອ ຄວາມປາດຖະໜາທີ່ຈະພັດທະນາປະເທດໃຫ້ຈະເລີນຮຸ່ງເຮືອງແລະມີຄວາມສຸກ; ຄວາມເກັ່ງກ້າສາມາດ ສະຕິປັນຍາ ແລະຄຸນສົມບັດຂອງຄົນຫວຽດນາມແມ່ນສູນກາງ, ເປົ້າໝາຍ ແລະ ກຳລັງຂັບເຄື່ອນການພັດທະນາທີ່ສຳຄັນທີ່ສຸດຂອງປະເທດ.
(5) ຄຸ້ມຄອງການພັດທະນາສັງຄົມຢ່າງເຂັ້ມງວດແລະມີປະສິດທິພາບ, ຮັບປະກັນຄວາມປອດໄພສັງຄົມ, ຄວາມໝັ້ນຄົງຂອງມະນຸດ; ປະຕິບັດຄວາມກ້າວໜ້າແລະຄວາມຍຸດຕິທຳທາງສັງຄົມ; ສ້າງສະພາບແວດລ້ອມທາງວັດທະນະທຳແລະຈັນຍາບັນທາງສັງຄົມທີ່ສົດໃສ, ມີອາລະຍະທຳ; ເອົາໃຈໃສ່ຍົກສູງຄຸນນະພາບຂອງການບໍລິການສາທາລະນະສຸກ, ຄຸນນະພາບຂອງປະຊາກອນ, ເຊື່ອມຕໍ່ປະຊາກອນກັບການພັດທະນາ; ເອົາໃຈໃສ່ເຖິງປະຊາຊົນທຸກຄົນ, ຮັບປະກັນນະໂຍບາຍແຮງງານ, ວຽກເຮັດງານທຳ, ລາຍໄດ້, ປະຕິບັດສະວັດດີການສັງຄົມ, ຄວາມປອດໄພສັງຄົມໃຫ້ໄດ້ເປັນຢ່າງດີ. ສືບຕໍ່ປັບປຸງຊີວິດທາງດ້ານວັດຖຸແລະຈິດໃຈຂອງປະຊາຊົນຢ່າງຮອບດ້ານ.
(6) ເປັນເຈົ້າການປັບຕົວເຂົ້າກັບການປ່ຽນແປງສະພາບອາກາດຢ່າງຈິງຈັງແລະມີປະສິດທິພາບ, ປ້ອງກັນ ຕ້ານ ແລະ ຫຼຸດຜ່ອນຜົນກະທົບຂອງໄພທຳມະຊາດ, ໂລກລະບາດ, ຄຸ້ມຄອງ ຂຸດຄົ້ນ ນຳໃຊ້ຊັບພະຍາກອນທຳມະຊາດຢ່າງສົມເຫດສົມຜົນ ປະຫຍັດ ມີປະສິດທິຜົນ ແລະຍືນຍົງ; ຖືເອົາການປົກປ້ອງສະພາບແວດລ້ອມການດຳລົງຊີວິດແລະສຸຂະພາບຂອງປະຊາຊົນ ເປັນເປົ້າໝາສູງສຸດ; ກຳຈັດໂຄງການທີ່ກໍ່ໃຫ້ເກີດມົນລະພິດສິ່ງແວດລ້ອມຢ່າງເດັດຂາດ, ຮັບປະກັນຄຸນນະພາບຂອງສະພາບແວດລ້ອມການດຳລົງຊີວິດ, ປົກປັກຮັກສາຄວາມຫຼາກຫຼາຍທາງຊີວະພາບ ແລະລະບົບນິເວດ; ກໍ່ສ້າງພື້ນຖານເສດຖະກິດສີຂຽວ, ເສດຖະກິດໝູນວຽນທີ່ເປັນມິດກັບສິ່ງແວດລ້ອມ.
(7) ເດັດດ່ຽວໜຽວແໜ້ນໃນການປົກປັກຮັກສາເອກະລາດ, ອຳນາດອະທິປະໄຕ, ເອກະພາບ ແລະຜືນແຜ່ນດິນອັນຄົບຖ້ວນ ຂອງປະເທດໄວ້ຢ່າງໝັ້ນຄົງ; ປົກປັກຮັກສາພັກ ລັດ ປະຊາຊົນ ແລະ ລະບອບສັງຄົມນິຍົມ. ຮັກສາຄວາມໝັ້ນຄົມທາງການເມືອງ, ຮັບປະກັນຄວາມເປັນລະບຽບຮຽບຮ້ອຍແລະຄວາມປອດໄພຂອງສັງຄົມ, ຄວາມໝັ້ນຄົງຂອງມະນຸດ, ຄວາມໝັ້ນຄົງທາງເສດຖະກິດ, ຄວາມໝັ້ນຄົງຂອງເຄືອຂ່າຍ, ສ້າງສັງຄົມທີ່ເປັນລະບຽບຮຽບຮ້ອຍແລະມີລະບຽບວິໄນ. ເປັນເຈົ້າການໃນການປ້ອງກັນຄວາມສ່ຽງຂອງສົງຄາມແລະການປະທະກັນ ຕັ້ງແຕ່ຫົວທີ, ຈາກໄລຍະໄກ; ການກວດຫາປັດໃຈທີ່ບໍ່ດີກ່ອນທີ່ມັນຈະເກີດຂຶ້ນ ແລະຈັດການແກ້ໄຂມັນຢ່າງທັນການ, ໂດຍສະເພາະປັດໄຈສ່ຽງຂອງການກາຍພັນ; ຍູ້ແຮງການຕໍ່ສູ້ເພື່ອທັບມ້າງທຸກກົນອຸບາຍແລະການເຄື່ອນໄຫວມ້າງເພທຳລາຍ ຂອງບັນດາອິດທິທຳລັງສັດຕູ.
(8) ສືບຕໍ່ປະຕິບັດແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ການພົວພັນທີ່ຫຼາກຫຼາຍ ຫຼາຍທິດຫຼາຍຝ່າຍ; ເປັນເຈົ້າການແລະຕັ້ງໜ້າເຊື່ອມໂຍງສາກົນຢ່າງຮອບດ້ານ, ກວ້າງຂວາງເລິກເຊິ່ງ ແລະມີປະສິດທິຜົນ; ຮັກສາສະພາບແວດລ້ອມທີ່ສະຫງົບແລະໝັ້ນຄົງ, ປັບປຸງບົດບາດທີ່ຕັ້ງແລະກຽດສັກສີສາກົນຂອງຫວຽດນາມຢ່າງຕໍ່ເນື່ອງ.
(9) ປະຕິບັດແລະເສີມຂະຫຍາຍປະຊາທິປະໄຕສັງຄົມນິຍົມ, ສິດເປັນເຈົ້າຂອງແລະບົດບາດປົກຄອງຕົນເອງຂອງປະຊາຊົນຢ່າງກວ້າງຂວາງ; ເສີມຂະຫຍາຍ ກຳລັງແຮງແຫ່ງມະຫາສາມັກຄີປວງຊົນທັງຊາດ; ປັບປຸງ ຍົກສູງຄວາມເຊື່ອໝັ້ນຂອງປະຊາຊົນ, ເພີ່ມທະວີຄວາມເຫັນດີເຫັນພ້ອມຂອງສັງຄົມ; ສືບຕໍ່ປ່ຽນແປງໃໝ່ການຈັດຕັ້ງ ເນື້ອໃນ ແລະ ແບບວິທີການເຄື່ອນໄຫວຂອງແນວໂຮມປະເທດຊາດຫວຽດນາມ ແລະບັນດາການຈັດຕັ້ງການເມືອງ - ສັງຄົມ.
(10) ກໍ່ສ້າງແລະປັບປຸງບູລະນະລັດແຫ່ງອຳນາດກົດໝາຍສັງຄົມນິຍົມທີ່ສະອາດປອດໃສ, ໝັ້ນຄົງເຂັ້ມແຂງ, ກະທັດລັດເບົາບາງ, ເຄື່ອນໄຫວມີປະສິດທິພາບແລະປະສິດທິຜົນ, ເພື່ອຮັບໃຊ້ປະຊາຊົນ ແລະ ເພື່ອການພັດທະນາຂອງປະເທດ. ເພີ່ມທະວີຄວາມເປີດເຜີຍ ໂປ່ງໃສ ຄວາມຮັບຜິດຊອບບັນຍາຍລາຍງານ; ການຄວບຄຸມອຳນາດຕິດກັບການຮັດແໜ້ນລະບຽບວິໄນໃນການເຄື່ອນໄຫວຂອງລັດ ແລະຂອງພະນັກງານ ລັດຖະກອນ ພາລະກອນ. ສືບຕໍ່ຍູ້ແຮງການຕໍ່ສູ້ເພື່ອປ້ອງກັນແລະຕ້ານການສໍ້ລາດບັງຫຼວງ, ການຟຸມເຟືອຍ, ພະຍາດອາດຍາສິດ, ອາດຊະຍາກຳ ແລະ ຄວາມຊົ່ວຮ້າຍທາງສັງຄົມ.
(11) ສືບຕໍ່ກໍ່ສ້າງແລະປັບປຸງພັກຢ່າງຮອບດ້ານ; ເພີ່ມທະວີທາດແທ້ຊົນຊັ້ນກຳມະກອນຂອງພັກ; ປ່ຽນແປງໃໝ່ແບບວິທີການນຳພາ, ຍົກສູງຄວາມສາມາດໃນການນຳພາແລະກຳອຳນາດຂອງພັກ; ກໍ່ສ້າງລະບົບການເມືອງທີ່ສະອາດປອດໃສ, ໝັ້ນຄົງເຂັ້ມແຂງ, ກະທັດລັດເບົາບາງ, ເຄື່ອນໄຫວມີປະສິດທິພາບແລະປະສິດທິຜົນ; ກໍ່ສ້າງຖັນແຖວພະນັກງານ ສະມາຊິກພັກ ລັດຖະກອນ ແລະພາລະກອນ, ໂດຍສະເພາະພະລັກງານລະດັບຍຸດທະສາດ, ຜູ້ເປັນຫົວໜ້າທີ່ມີຄຸນສົມບັດ ຄວາມສາມາດແລະກຽດສັກສີພຽງພໍ, ທຽບເທົ່າລະດັບໜ້າທີ່; ເຮັດວຽກງານແນວຄິດທິດສະດີເປັນຢ່າງດີ; ເອົາໃຈໃສ່ວຽກງານປົກປັກຮັກສາພັກ, ປົກປ້ອງການເມືອງພາຍໃນ; ເພີ່ມທະວີວຽກງານກວດກາ, ຕິດຕາມກວດກາ, ລະບຽບວິໄນ, ວຽກງານຕໍ່ສູ້ເພື່ອປ້ອງກັນແລະຕ້ານການສໍ້ລາດບັງຫຼວງ, ແລະວຽກງານຂົນຂວາຍປະຊາຊົນຂອງພັກ.
(12) ສືບຕໍ່ກຳແໜ້ນ ແລະ ຈັດການແກ້ໄຂບັນດາສາຍພົວພັນໃຫຍ່ເປັນຢ່າງດີ: ຄວາມສໍາພັນລະຫວ່າງສະຖຽນລະພາບ ການປ່ຽນແປງໃໝ່ ແລະ ການພັດທະນາ; ລະຫວ່າງການປ່ຽນແປງໃໝ່ເສດຖະກິດ ແລະ ການປ່ຽນແປງໃໝ່ການເມືອງ; ລະຫວ່າງການປະຕິບັດຕາມກົດເກນຂອງຕະຫຼາດ ແລະ ການຮັບປະກັນທິດທາງສັງຄົມນິຍົມ; ລະຫວ່າງການພັດທະນາກຳລັງການຜະລິດ ແລະ ການກໍ່ສ້າງ, ປັບປຸງບູລະນະການພົວພັນການຜະລິດສັງຄົມນິຍົມເທື່ອລະກ້າວ; ລະຫວ່າງລັດ ຕະຫຼາດ ແລະ ສັງຄົມ; ລະຫວ່າງການເຕີບໂຕເສດຖະກິດ ແລະ ການພັດທະນາວັດທະນະທຳ, ປະຕິບັດຄວາມກ້າວໜ້າ ຄວາມຍຸດຕິທຳທາງສັງຄົມ, ປົກປ້ອງສະພາບແວດລ້ອມ; ລະຫວ່າງການກໍ່ສ້າງປະເທດຊາດ ແລະ ການປົກປັກຮັກສາປະເທດຊາດຫວຽດນາມສັງຄົມນິຍົມ; ລະຫວ່າງຄວາມເປັນເອກະລາດ ເປັນເຈົ້າຕົນເອງ ແລະ ການເຊື່ອມໂຍງສາກົນ; ລະຫວ່າງພັກນຳພາ, ລັດຄຸ້ມຄອງ ແລະ ປະຊາຊົນເປັນເຈົ້າຂອງ; ລະຫວ່າງການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍ, ຮັບປະກັນລະບຽບວິໄນສັງຄົມ. ໃນການຮັບຮູ້ແລະແກ້ໄຂບັນດາສາຍພົວພັນໃຫຍ່, ຕ້ອງເອົາໃຈໃສ່ຫຼາຍກວ່າອີກເພື່ອຮັບປະກັນການກຳນົດທິດສັງຄົມນິຍົມ; ກໍ່ສ້າງແລະປັບປຸງບູລະນະການພົວພັນການຜະລິດທີ່ກ້າວໜ້າແລະເໝາະສົມ; ພັດທະນາວັດທະນະທຳ, ປະຕິບັດຄວາມກ້າວໜ້າແລະຍຸດຕິທຳທາງສັງຄົມ, ປົກປ້ອງສະພາບແວດລ້ອມ; ປົກປັກຮັກສາປະເທດຊາດສັງຄົທນິຍົມ; ຮັກສາຄວາມເປັນເອກະລາດ, ເປັນເຈົ້າຕົນເອງ ແລະ ເສີມຂະຫຍາຍສິດເປັນເຈົ້າຂອງຂອງປະຊາຊົນ.
ບັນດາຜູ້ແທນລົງຄະແນນສຽງຮັບຮອງເອົາມະຕິກອງປະຊຸມໃຫຍ່ຄັ້ງທີ XIII ຂອງພັກ _ພາບ: TTXVN
ໜ້າທີ່ສຳຄັນໃນວາລະກອງປະຊຸມໃຫຍ່ຄັ້ງທີ XIII:
(1) ສືບຕໍ່ຍູ້ແຮງການກໍ່ສ້າງແລະປັບປຸງພັກ, ກໍ່ສ້າງລັດແຫ່ງອຳນາດກົດໝາຍສັງຄົມນິຍົມ ແລະ ລະບົບການເມືອງ ໃຫ້ມີຄວາມຮອບດ້ານ, ສາອາດປອດໃສ ໝັ້ນຄົງເຂັ້ມແຂງ. ປ່ຽນແປງໃໝ່ແບບວິທີການນຳພາແລະກຳອຳນາດຂອງພັກ. ການກໍ່ສ້າງໂຄງປະກອບການຈັດຕັ້ງຂອງລະບົບການເມືອງທີ່ກະທັດລັດ, ເຄື່ອນໄຫວມີປະສິດທິພາບ ແລະປະສິດທິຜົນ. ສືບຕໍ່ຍູ້ແຮງການຕໍ່ສູ້ເພື່ອປ້ອງກັນແລະຕ້ານພະຍາດອາດຍາສິດ, ການສໍ້ລາດບັງຫຼວງ, ການຟຸມເຟືອຍ, ຄວາມຫຍໍ້ທໍ້, “ຜົນປະໂຫຍດໝູ່ພວກ”, ບັນດາປະກົດການ “ການຫັນປ່ຽນເອງ”, “ການປ່ຽນແປງເອງ” ຢູ່ພາຍໃນ. ກໍ່ສ້າງຖັນແຖວສະມາຊິກພັກ ແລະພະນັກງານທຸກລະດັບ, ໂດຍສະເພາະພະນັກງານລະດັບຍຸດທະສາດ, ຜູ້ເປັນຫົວໜ້າ ໃຫ້ມີຄຸນສົມບັດ ຄວາມສາມາດ ກຽດສັກສີພຽງພໍ ແລະ ທຽບເທົ່າລະດັບໜ້າທີ່. ປັບປຸງວາມໄວ້ເນື້ອເຊື່ອໃຈ ແລະຄວາມຜູກພັນຂອງປະຊາຊົນຕໍ່ກັບພັກ, ລັດ ແລະ ລະບອບສັງຄົມນິຍົມ.
(2) ສຸມໃສ່ການຄວບຄຸມການລະບາດຂອງໂຄວິດ-19, ດຳເນີນການສັກຢາກັນພະຍາດໃຫ້ຊຸມຊົນຈຳນວນຫຼາຍດ້ວຍວັກຊີນໂຄວິດ-19; ຟື້ນຟູ, ພັດທະນາເສດຖະກິດ - ສັງຄົມ, ປ່ຽນແປງໃໝ່ຮູບແບບການເຕີບໂຕຢ່າງແຂງແຮງ, ປັບໂຄງສ້າງເສດຖະກິດ, ກໍ່ສ້າງແລະປັບປຸງບູລະນະລະບຽບກົດໝາຍການພັດທະນາທີ່ສອດຄ່ອງກັບພື້ນຖານເສດຖະກິດຕະຫຼາດຢ່າງຄົບຖ້ວນ ທັນສະໄໝ ແລະເຊື່ອມໂຍງ; ພັດທະນາຢ່າງຄົບຊຸດ ແລະ ສ້າງການເຊື່ອມໂຍງລະຫວ່າງບັນດາເຂດ, ພາກພື້ນ, ບັນດາພາກສ່ວນເສດຖະກິດ, ບັນດາຮູບແບບການຜະລິດ ທຸລະກິດ; ມີນະໂຍບາຍສະໜັບສະໜູນວິສາຫະກິດໃນກະສິກຳຢ່າງມີປະສິດທິຜົນ; ຍູ້ແຮງການຄົ້ນຄວ້າ ມອບໂອນ ນຳໃຊ້ຄວາມກ້າວໜ້າທາງວິທະຍາສາດ ເຕັກໂນໂລຊີ ແລະຂອງການປ່ຽນແປງໃໝ່ປະດິດສ້າງ, ໂດຍສະເພາະແມ່ນບັນດາຜົນສຳເລັດຂອງການປະຕິວັດອຸດສາຫະກຳຄັ້ງທີສີ່, ປະຕິບັດການປ່ຽນດິຈິຕອງແຫ່ງຊາດ, ພັດທະນາເສດຖະກິດດິຈິຕອງ, ຍົກສູງປະສິດທິພາບ ຄຸນນະພາບ ປະສິດທິຜົນ ແລະຄວາມສາມາດແຂ່ງຂັນຂອງພື້ນຖານເສດຖະກິດ; ລະດົມ ຈັດແບ່ງ ແລະນຳໃຊ້ແຫຼ່ງພະລັງຕ່າງໆຢ່າງມີປະສິດທິຜົນ, ສ້າງກຳລັງຂັບເຄື່ອນເພື່ອພັດທະນາເສດຖະກິດຢ່າງໄວແລະຍືນຍົງ; ປັບປຸງລະບົບກົດໝາຍໃຫ້ສົມບູນ, ໂດຍສະເພາະແມ່ນກົດໝາຍວ່າດ້ວຍການປົກປ້ອງຊັບສິນທາງປັນຍາ ແລະການແກ້ໄຂຂໍ້ຂັດແຍ່ງທາງແພ່ງ, ການເອົາຊະນະອຸປະສັກຂັດຂວາງການພັດທະນາປະເທດ.
(3) ຮັກສາຄວາມເປັນເອກະລາດ ເປັນເຈົ້າຕົນເອງຢ່າງໝັ້ນຄົງ, ສືບຕໍ່ຍົກສູງຄຸນນະພາບແລະປະສິດທິຜົນ ຂອງວຽກງານການຕ່າງປະເທດແລະການເຊື່ອມໂຍງເຂົ້າກັບສາກົນ; ເພີ່ມທະວີທ່າແຮງດ້ານການປ້ອງກັນປະເທດແລະຄວາມັ້ນຄົງ, ກໍ່ສ້າງກອງທັບປະຊາຊົນ, ຕຳຫຼວດປະຊາຊົນ ໃຫ້ເປັນກຳລັງປະຕິວັດ ກຳລັງຫຼວງ ຊຳນານຮົບ ເປັນທັນສະໄໝເທື່ອລະກ້າວ, ພາກສ່ວນໜຶ່ງກ້າວໂດຍກົງຂຶ້ນເປັນທັນສະໄໝ, ສ້າງປະຖົມປັດໄຈອັນໜັກແໜ້ນ ເພື່ອສູ້ຊົນຮອດປີ 2030 ສ້າງກອງທັບປະຊາຊົນ, ຕຳຫຼວດປະຊາຊົນ ທີ່ປະຕິວັດ, ກຳລັງຫຼວງ ຊຳນານຮົບ ແລະ ທັນສະໄໝ; ເດັດດ່ຽວ, ໝັ້ນໜຽວໃນການປົກປັກຮັກສາຄວາມເປັນເອກະລາດ, ອຳນາດອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນ, ເຂດທະເລໝູ່ເກາະ, ເຂດຟ້າຂອງປະເທດໄວ້ຢ່າງໝັ້ນຄົມ; ຮັກສາສະພາບແວດລ້ອມສັນຕິພາບ ສະຖຽນລະພາບເພື່ອພັດທະນາປະເທດ.
(4) ປຸກຕື່ນຄວາມປາດຖະໜາພັດທະນາປະເທດໃຫ້ຈະເລີນຮຸ່ງເຮືອງແລະມີຄວາມສຸກ; ເສີມຂະຫຍາຍຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມໃນພາລະກິດການສ້າງສາແລະປົກປັກຮັກສາປະເທດຊາດ ແລະການເຊື່ອມໂຍງເຂົ້າກັບສາກົນ; ມີນະໂຍບາຍສະເພາະເພື່ອພັດທະນາວັດທະນະທຳຂອງຄົນຊົນເຜົ່າສ່ວນນ້ອຍ; ປະຕິບັດເປັນຢ່າງດີນະໂຍບາຍສັງຄົມ, ຮັບປະກັນຄວາມປອດໄພທາງສັງຄົມ, ຄວາມໝັ້ນຄົງຂອງມະນຸດ, ສ້າງການຫັນປ່ຽນຢ່າງແຂງແຮງໃນການຄຸ້ມຄອງການພັດທະນາສັງຄົມ, ປະຕິບັດຄວາມກ້າວໜ້າແລະຄວາມຍຸດຕິທຳທາງສັງຄົມ, ຍົກສູງຄຸນນະພາບຊີວິດ ແລະ ດັດຊະນີຄວາມສຸກຂອງຄົນຫວຽດນາມ.
(5) ປັບປຸງລະບົບກົດໝາຍ ກົນໄກ ນະໂຍບາຍໃຫ້ສົມບູນຄົບຊຸດ ເພື່ອເສີມຂະຫຍາຍປະຊາທິປະໄຕສັງຄົມນິຍົມ ແລະສິດເປັນເຈົ້າຂອງຂອງປະຊາຊົນຢ່າງແຂງແຮງ; ພ້ອມກັນນັ້ນ ກໍ່ສ້າງລັດແຫ່ງອຳນາດກົດໝາຍສັງຄົມນິຍົມທີ່ສະອາດປອດໃສ ໝັ້ນຄົງເຂັ້ມແຂງ; ດຳເນີນການປະຕິຮູບຕຸລາການ, ເພີ່ມທະວີລະບຽບກົດໝາຍ, ຮັບປະກັນລະບຽບວິໄນສັງຄົມ, ກອ່ນອື່ນໝົດແມ່ນ ການເປັນແບບຢ່າງປະຕິບັດຕາມກົດໝາຍ, ການປະຕິບັດປະຊາທິປະໄຕສັງຄົມນິຍົມ ຂອງຄະນະພັກ, ອົງການຈັດຕັ້ງພັກ, ອຳນາດການປົກຄອງ, ແນວໂຮມປະເທດຊາດຫວຽດນາມ ແລະ ອົງການຈັດຕັ້ງການເມືອງສັງຄົມທຸກຂັ້ນ, ຂອງພະນັກງານ ສະມາຊິກພັກ.
(6) ຄຸ້ມຄອງຢ່າງແໜ້ນແຟ້ນ, ນຳໃຊ້ທີ່ດິນ ຊັບພະຍາກອນຢ່າງສົມເຫດສົມຜົນແລະມີປະສິດທິຜົນ; ປົກປັກຮັກສາແລະປັບປຸງສິ່ງແວດລ້ອມ; ເປັນເຈົ້າການແລະຕັ້ງໜ້າໃນການຜັນຂະຫຍາຍວິທີແກ້ໄຂປັບຕົວກັບການປ່ຽນແປງສະພາບພູມອາກາດ ແລະໄພທຳມະຊາດທີ່ຮຸນແຮງ.
ບັນດາການບຸກທະລຸຍຸດທະສາດ:
(1) ປັບປຸງບູລະນະລະບຽບກົດໝາຍການພັດທະນາ, ກ່ອນອື່ນແມ່ນລະບຽບກົດໝາຍການພັດທະນາເສດຖະກິດຕະຫຼາດກຳນົດທິດສັງຄົມນິຍົມ. ປ່ຽນແປງໃໝ່ການບໍລິຫານປົກຄອງແຫ່ງຊາດຕາມທິດທັນສະໄໝ, ແຂ່ງຂັນ ມີປະສິດທິຜົນ. ສຸມໃສ່ປັບປຸງບູລະນະ ແລະ ຈັດຕັ້ງປະຕິບັດເປັນຢ່າງດີ ລະບົບກົດໝາຍ ກົນໄກ ນະໂຍບາຍ, ສ້າງສະພາບແວດລ້ອມການລົງທຶນທຸລະກິດທີ່ເອື້ອອຳນວຍ, ສົດໃສ ແລະ ຍຸດຕິທຳ ໃຫ້ກັບທຸກພາກສ່ວນເສດຖະກິດ, ຊຸກຍູ້ການປ່ຽນແປງໃໝ່ປະດິດສ້າງ; ລະດົມ ຄຸ້ມຄອງ ແລະ ນຳໃຊ້ຊັບພະຍາກອນທັງໝົດ ເພື່ອການພັດທະນາຢ່າງມີປະສິດທິຜົນ, ໂດຍສະເພາະແມ່ນທີ່ດິນ, ການເງິນ, ການຮ່ວມມືພາກລັດ-ເອກະຊົນ; ຍູ້ແຮງການແບ່ງຂັ້ນ, ການກະຈາຍອຳນາດທີ່ສົມເຫດສົມຜົນແລະມີປະສິດທິຜົນ, ພ້ອມກັນນັ້ນ ເພີ່ມທະວີການກວດກາ, ຕິດຕາມກວດກາ, ຄວບຄຸມອຳນາດດ້ວຍລະບົບກົດໝາຍ.
(2) ພັດທະນາຊັບພະຍາກອນມະນຸດ, ໂດຍສະເພາະແມ່ນ ຊັບພະຍາກອນມະນຸດທີ່ມີຄຸນນະພາບສູງ; ບຸລິມະສິດການພັດທະນາຊັບພະຍາກອນມະນຸດໃຫ້ແກ່ວຽກງານນຳພາ ຄຸ້ມຄອງ ແລະ ບັນດາຂົງເຂດຫຼັກ, ບົນພື້ນຖານຍົກສູງ, ສ້າງການຫັນປ່ຽນທີ່ແຂງແຮງ ຮອບດ້ານ ພື້ນຖານ ກ່ຽວກັບຄຸນນະພາບຂອງການສຶກສາແລະການຝຶກອົບຮົມ ໂດຍຕິດກັບກົນໄກໃນການຮັບສະໝັກ, ນຳໃຊ້, ໃຫ້ຄ່າຕອບແທນທີ່ດີຕໍ່ຜູ້ທີ່ເກັ່ງກ້າສາມາດ, ຍູ້ແຮງການຄົ້ນຄວ້າ, ມອບໂອນ, ປະຢຸກໃຊ້ ແລະ ພັດທະນາວິທະຍາສາດ-ເຕັກໂນໂລຊີ ແລະນະວັດຕະກຳສ້າງສັນ; ສົ່ງເສີມຄວາມປາດຖະໜາພັດທະນາປະເທດໃຫ້ຈະເລີນຮຸ່ງເຮືອງແລະມີຄວາມສຸກ, ເສີມຂະຫຍາຍຄຸນຄ່າວັດທະນະທຳ, ກຳລັງແຮງຂອງຄົນຫວຽດນາມ, ນ້ຳໃຈສາມັກຄີ, ຄວາມເອກອ້າງທະນົງໃຈແຫ່ງຊາດ ໃນພາລະກິດການສ້າງສາແລະປົກປັກຮັກສາປະເທດຊາດ.
(3) ກໍ່ສ້າງລະບົບໂຄງສ້າງພື້ນຖານທີ່ຄົບຊຸດແລະທັນສະໄໝທັງດ້ານເສດຖະກິດແລະສັງຄົມ; ບຸລິມະສິດການພັດທະນາໂຄງການຈຸດສຸມແຫ່ງຊາດຈຳນວນໜຶ່ງທາງດ້ານຄົມມະນາຄົມ ທີ່ຄ່ອງຕົວກັບການປ່ຽນແປງສະພາບອາກາດ; ເອົາໃຈໃສ່ເປັນສຳຄັນເຖິງການພັດທະນາໂຄງສ້າງພື້ນຖານຂໍ້ມູນຂ່າວສານແລະໂທລະຄົມມະນະຄົມ, ສ້າງພື້ນຖານໃຫ້ແກ່ການປ່ຽນດິຈິຕອນແຫ່ງຊາດ, ການພັດທະນາເສດຖະກິດດິຈິຕອນ, ສັງຄົມດິຈິຕອນເທື່ອລະກ້າວ.
II- ຮັບຮອງເອົາບົດລາຍງານການເມືອງ, ຍຸດທະສາດການພັດທະນາເສດຖະກິດ - ສັງຄົມ 10 ປີແຕ່ປີ 2021-2030, ທິດທາງ, ໜ້າທີ່ການພັດທະນາເສດຖະກິດ - ສັງຄົມ 5 ປີ 2021-2025. ມອບໃຫ້ຄະນະບໍລິຫານງານສູນກາງພັກສະໄໝທີ XIII, ອີງຕາມບົດລາຍງານອະທິບາຍ ຂອງຄະນະປະທານກອງປະຊຸມໃຫຍ່, ຜົນການລົງຄະແນນສຽງ ເພື່ອປັບປຸງໃຫ້ສຳເລັດ ແລະ ປະກາດໃຊ້ຢ່າງເປັນທາງການ.
III- ຮັບຮອງເອົາບົດລາຍງານສະຫຼຸບວຽກງານກໍ່ສ້າງພັກ ແລະການປະຕິບັດກົດລະບຽບພັກ ຂອງຄະນະບໍລິຫານງານສູນກາງພັກສະໄໝທີ XII; ຕົກລົງທີ່ຈະບໍ່ແກ້ໄຂເພີ່ມເຕີມກົດລະບຽບພັກສະບັບປະຈຸບັນ. ມອບໃຫ້ຄະນະບໍລິຫານງານສູນກາງພັກສະໄໝທີ XIII, ຊີ້ນຳການຄົ້ນຄວ້າ, ຮັບເອົາ ເພື່ອດັດປັບຜ່ານຂໍ້ກຳນົດ, ຄໍາແນະນໍາສູນກາງ; ເພີ່ມທະວີການກວດກາ, ຕິດຕາມກວດກາ, ຮັບປະກັນການປະຕິບັດກົດລະບຽບພັກຢ່າງເຂັ້ມງວດ, ເປັນເອກະພາບໃນທົ່ວພັກ.
IV- ຮັບຮອງເອົາບົດລາຍງານກ່ຽວກັບການສຳຫຼວດການນຳພາ, ຊີ້ນຳຂອງຄະນະບໍລິຫານງານສູນກາງພັກສະໄໝທີ XII ທີ່ສະເໜີຕໍ່ກອງປະຊຸມໃຫຍ່ຄັ້ງທີ XIII. ມອບໃຫ້ຄະນະບໍລິຫານງານສູນກາງພັກສະໄໝທີ XIII ຮັບເອົາຄວາມຄິດເຫັນ ຂອງກອງປະຊຸມໃຫຍ່, ເສີມຂະຫຍາຍຈຸດດີ, ແກ້ໄຂຂໍ້ບົກຜ່ອງ, ຍົກສູງຄຸນນະພາບ ແລະປະສິດທິຜົນຂອງການນຳພາ ຊີ້ນຳໃນໄລຍະຕໍ່ໄປ.
V- ກອງປະຊຸມໃຫຍ່ເຫັນດີໃຫ້ສະຫາຍຫງວຽນຝູຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກສະໄໝທີ XII ໄດ້ເລືອກຕັ້ງຄະນະບໍລິຫານສູນກາງພັກແລະກົມການເມືອງສະໄໝທີ XIII ອີກຄັ້ງ, ເພື່ອຮັບການເລືອກຕັ້ງເປັນເລຂາທິການໃຫຍ່ຄະນະບໍລິຫານງານສູນກາງພັກສະໄໝທີ XIII.
VI- ຮັບຮອງເອົາຜົນການເລືອກຕັ້ງຄະນະບໍລິຫານງານສູນກາງພັກສະໄໝທີ XIII ປະກອບດ້ວຍ 200 ສະຫາຍ, ໃນນັ້ນກຳມະການສົມບູນ 180 ສະຫາຍ ແລະ ກຳມະການສໍາຮອງ 20 ສະຫາຍ.
VII- ຄະນະບໍລິຫານງານສູນກາງພັກສະໄໝທີ XIII ແລະ ບັນດາຄະນະບໍລິຫານງານພັກແລະການຈັດຕັ້ງພັກທຸກຂັ້ນ ນຳພາແລະຊີ້ນຳການຜັນຂະຫຍາຍ ແລະ ຈັດຕັ້ງປະຕິບັດແນວທາງແລະບັນດາແຜນນະໂຍບາຍທີ່ກຳນົດໄວ້ໃນເອກະສານກອງປະຊຸມໃຫຍ່ຄັ້ງທີ XIII ໃຫ້ສຳເລັດມີໄຊ.
ກອງປະຊຸມໃຫຍ່ຮຽກຮ້ອງທົ່ວພັກ, ທົ່ວປວງຊົນ, ທົ່ວກອງທັບ, ພີ່ນ້ອງຮ່ວມຊາດໃນປະເທດແລະຢູ່ຕ່າງປະເທດ ຈົ່ງເສີມຂະຫຍາຍຢ່າງແຂງແຮງ ນ້ຳໃຈຮັກຊາດ, ຈິດໃຈຊາດ, ປະຊາທິປະໄຕສັງຄົມນິຍົມ, ກຳລັງແຮງແຫ່ງມະຫາສາມັກຄີປວງຊົນທັງຊາດ, ຄຸນຄ່າວັດທະທຳ, ຄວາມປາດຖະໜາພັດທະນາປະເທດ, ກຳລັງແຮງຂອງຄົນຫວຽດນາມ, ບົດບາດຂອງວິທະຍາສາດ-ເຕັກໂນໂລຊີ ຂອງການປ່ຽນແປງໃໝ່ປະດິດສ້າງ, ປະຕິບັດມະຕິກອງປະຊຸມໃຫຍ່ໃຫ້ສຳເລັດມີໄຊ ເພື່ອໃຫ້ປະເທດເຮົາພັດທະນາຢ່າງໄວວາແລະຍືນຍົງກວ່າອີກ, ສ້າງຜົນງານການພັດທະນາມະຫັດສະຈັນໃໝ່ ເພື່ອໃຫ້ປະເທດຫວຽດນາມຈະເລີນຮຸ່ງເຮືອງແລະມີຄວາມສຸກ, ພ້ອມກັນກ້າວໄປຂ້າງໜ້າ, ຄຽງບ່າຄຽງໄຫຼ່ກັບບັນດາປະເທດມະຫາສຳນາດໃນຫ້າທະວີບ, ປະສົບຜົນສຳເລັດໃນການປະຕິບັດຄວາມປາດຖະໜາຂອງປະທານໂຮ່ຈີມິນຜູ້ຍິ່ງໃຫຍ່ ແລະ ຄວາມປາດຖະໜາຂອງປະຊາຊາດເຮົາທັງໝົດ./.
-----------------------------
- ແຫຼ່ງ ວາລະສານກອມມູນິດ ສະບັບທີ 959 (ເດືອນກຸມພາ 2021)
