ສະຫາຍພົນໂທ ຫງວຽນຈີ໊ວິ້ງ, ກຳມະການສູນກາງພັກ, ລັດຖະມົນຕີຊ່ວຍວ່າການກະຊວງປ້ອງກັນປະເທດ
ລາຍງານການເມືອງທີ່ກອງປະຊຸມໃຫຍ່ຄັ້ງທີ XI ຂອງຄະນະບໍລິຫານງານສູນກາງພັກກອມມູນິດຫວຽດນາມໄດ້ກຳນົດວ່າ ການພົວພັນຕ່າງປະເທດດ້ານປ້ອງກັນຊາດ ແມ່ນໜຶ່ງໃນບັນດາໜ້າທີ່ປ້ອງກັນປະເທດ ປ້ອງກັນຄວາມສະຫງົບທີ່ສຳຄັນຂອງປະເທດ(1). ທັດສະນະດັ່ງກ່າວຂອງພັກໃຫ້ເຫັນວ່າ ການພົວພັນຕ່າງປະເທດດ້ານປ້ອງກັນຊາດ ໄດ້ກາຍເປັນພາກສ່ວນໜຶ່ງທີ່ບໍ່ອາດຂາດໄດ້ ຂອງການປ້ອງປັກຮັກສາປະເທດ ເປັນເຄື່ອງມືທີ່ໄດ້ການໄດ້ງານ ເພື່ອປະຕິບັດບັນດາຈຸດໝາຍປົກປັກຮັກສາປະເທດຊາດ ໃນສະໄໝສັນຕິ.
ໃນສິບປີທີ່ຜ່ານມາ ສະພາບການພາຍໃນປະເທດ ສາກົນ ແລະໃນພາກພື້ນ ມີການຜັນປ່ຽນສັບສົນຫຼາຍຢ່າງທີ່ຄາດຄະເນໄດ້ຍາກ. ສະພາບການດັ່ງກ່າວໄດ້ເຮັດໃຫ້ໃນການພົວພັນສາກົນເກີດມີການສັບໄຂວ່ກັນທີ່ສັບສົນທີ່ສຸດ ລະຫວ່າງເປົ້າໝາຍ ແລະ ຄູ່ຮ່ວມຂອງການປ້ອງກັນປະເທດຫວຽດນາມເວົ້າລວມ ຂອງວຽກງານການຕ່າງປະເທດດ້ານປ້ອງກັນຊາດ ເວົ້າໂດຍສະເພາະ. ບັນດາຄວາມຂັດແຍ່ງ ສິ່ງທ້າທາຍໃຫຍ່ເຫຼົ່ານັ້ນ ມັນຮຽກຮ້ອງໃຫ້ການພົວພັນຕ່າງປະເທດດ້ານປ້ອງກັນຊາດ ຕ້ອງໄດ້ກຳນົດທິດຢ່າງຖືກຕ້ອງ ແລະ ມີວິທີການປະຕິບັດຢ່າງມີປະສິດທິຜົນ ຈຶ່ງຈະສຳເລັດໜ້າທີ່ຕ່າງໆ ໃນຍຸດທະສາດປົກປັກຮັກສາປະເທດຊາດໄດ້.
ໃນຊຸມປີທີ່ຜ່ານມາ, ວຽກງານການຕ່າງປະເທດດ້ານປ້ອງກັນຊາດໄດ້ເຊື່ອມຊືມບັນດາທິດນຳ ຫຼັກການຂອງພັກໃນການຮ່ວມມືສາກົນ, ປະຕິບັດຢ່າງສະເໝີຕົ້ນສະເໝີປາຍແຜນນະໂຍບາຍ ທັງເພີ່ມທະວີການຮ່ວມມື ທັງຕໍ່ສູ້ເພື່ອຫັນປ່ຽນເປົ້າໝາຍໃຫ້ເປັນຄູ່ຮ່ວມ; ຊາບຊືມຢ່າງເລິກເຊິ່ງ ແລະ ໝູນໃຊ້ຢ່າງປະດິດສ້າງ ທັດສະນະອັນພື້ນຖານ 6 ປະການຂອງພັກໃນຍຸດທະສາດປົກປັກຮັກສາປະເທດຊາດ ເຂົ້າໃນການເຄື່ອນໄຫວ, ຍາມໃດກໍ່ປະຕິບັດຕາມການນຳພາເດັດຂາດ ໂດຍກົງທາງດ້ານຕ່າງໆ ທຸກດ້ານຂອງພັກ ຕໍ່ພາລະກິດປົກປັກຮັກສາປະເທດຊາດ. ຄຽງຂ້າງນັ້ນ, ວຽກງານການສົນທະນາກ່ຽວກັບການປ້ອງກັນຊາດ ຂັ້ນລັດຖະມົນຕີຊ່ວຍວ່າການປ້ອງກັນປະເທດປະຈຳປີ ລະຫວ່າງຫວຽດນາມ ກັບບັນດາປະເທດມະຫາອຳນາດ ທີ່ໄດ້ຈັດຕັ້ງຂຶ້ນນັ້ນ ກໍ່ຈະສ້າງເງື່ອນໄຂໃຫ້ຫວຽດນາມແລກປ່ຽນບັນດາບັນຫາກ່ຽວກັບຍຸດທະສາດ ເພີ່ມທະວີການຮ່ວມມື ແກ້ໄຂຄວາມຂັດຂ້ອງ, ເຮັດໃຫ້ການພົວພັນລະຫວ່າງປະເທດເຮົາກັບຫຼາຍປະເທດ ນັບມື້ນັບເປັນເຈົ້າການ ໄວ້ວາງໃຈກັນກວ່າເກົ່າ, ແກ້ໄຂໂດຍກົງບັນດາຄວາມຕ້ອງການຮ່ວມມືປ້ອງກັນຊາດ ໃນຂະບວນວິວັດການເຊື່ອມໂຍງເຂົ້າກັບສາກົນຂອງປະເທດ, ປະກອບສ່ວນປົກປັກຮັກສາຄວາມສະຫງົບຊາຍແດນ ແລະ ໃນການຮັບມືກັບບັນດາບັນຫາຄວາມສະຫງົບທີ່ບໍ່ເປັນແບບດັ້ງເດີມ, ຕອບສະໜອງຄວາມຕ້ອງການຂອງຂະບວນວິວັດການເຊື່ອມໂຍງເຂົ້າກັບສາກົນ ຂອງປະເທດໃນຂົງເຂດອື່ນໆ ໃຫ້ໄດ້ນັບມື້ນັບສູງ; ປະກອບສ່ວນອັນສົມກຽດໂດຍກົງເຂົ້າໃນພາລະກິດການຫັນປະເທດເປັນອຸດສາຫະກຳ ທັນສະໄໝ.
ໂດຍປະຕິບັດບັນດາຈຸດໝາຍຂອງຍຸດທະສາດປົກປັກຮັກສາປະເທດຊາດໃນສະພາບການໃໝ່ ທີ່ກອງປະຊຸມສູນກາງພັກຄັ້ງທີ 8 ສະໄໝທີ IX ໄດ້ວາງອອກມາ, ການພົວພັນຕ່າງປະເທດດ້ານປ້ອງກັນຊາດ ໄດ້ຕັ້ງໜ້າເຂົ້າຮ່ວມໃນການປົກປັກຮັກສາອຳນາດອະທິປໄຕ ສິດອະທິປະໄຕ ແລະ ຜົນປະໂຫຍດແຫ່ງຊາດຂອງຫວຽດນາມ. ດ້ານໜຶ່ງ, ການພົວພັນຕ່າງປະເທດດ້ານປ້ອງກັນຊາດ ຕ້ອງເຂົ້າຮ່ວມໃນການກໍ່ສ້າງທ່າສະໜາມຮົບປ້ອງກັນຊາດ ແນໃສ່ຊຸກຍູ້ທ່າອຽງສັນຕິພາບ ສະຖຽນລະພາບໃນພາກພື້ນ, ສ້າງເງື່ອນໄຂເພື່ອແກ້ໄຂບັນດາບັນຫາແກ່ງແຍ້ງກັນ ຂັດຂ້ອງກັນໂດຍສັນຕິວິທີ ບົນພື້ນຖານກົດໝາຍສາກົນ. ດ້ານອື່ນ, ສົມທົບຢ່າງແໜ້ນແຟ້ນລະຫວ່າງການຕໍ່ສູ້ທາງການທູດ ກັບການຕໍ່ສູ້ຢູ່ພື້ນທີ່ຕົວຈິງຂອງບັນດາກຳລັງ ເພື່ອທັບມ້າງກົນອຸບາຍ ຫຼ່ຽມລາຍລ່ວງລ້ຳອຳນາດອະທິປະໄຕ ສິດອະທິປະໄຕ ແລະ ຜົນປະໂຫຍດແຫ່ງຊາດຂອງຫວຽດນາມ. ເພື່ອປົກປັກຮັກສາພັກ ປົກປັກຮັກສາປະຊາຊົນ ແລະ ລະບອບການເມືອງຢູ່ຫວຽດນາມ, ວຽກງານການຕ່າງປະເທດດ້ານປ້ອງກັນຊາດ ໄດ້ປະກອບສ່ວນອັນສຳຄັນເຂົ້າໃນການຕໍ່ສູ້ຕ້ານ “ການຜັນປ່ຽນໂດຍສັນຕິ”, ຕ້ານການຈະລາຈົນໂຄ່ນລົ້ມຂອງບັນດາອິດທິກຳລັງສັດຕູ. ຈາກການເຄື່ອນໄຫວອັນຕັ້ງໜ້າເຫຼົ່ານັ້ນ, ການພົວພັນຕ່າງປະເທດດ້ານປ້ອງກັນຊາດ ໄດ້ປະກອບສ່ວນບອກປັດປະຕິເສດຖ້ອຍທຳນອງຂອງບັນດາອິດທິກຳລັງສັດຕູ ທີ່ໂຄສະນາໃສ່ຮ້າຍປ້າຍສີຕ້ານລະບອບສັງຄົມນິຍົມຢູ່ປະເທດເຮົາ ເຮັດໃຫ້ມັນຕ້ອງເສຍຄວາມສັກສິດໄປໝົດ.
ໃນການຮ່ວມມືກັບບັນດາປະເທດ, ວຽກງານການຕ່າງປະເທດດ້ານປ້ອງກັນຊາດ ໄດ້ເອົາໃຈໃສ່ເປັນປະຈຳເຖິງການຕໍ່ສູ້ຢ່າງມີປະສິດທິຜົນ ຕ້ານກົນອຸບາຍສວຍໃຊ້ການຮ່ວມມືເພື່ອໂຄສະນາເຜີຍແຜ່ແນວຄິດເປັນປໍລະປັກ, ເປັນຕົ້ນແມ່ນກົນອຸບາຍທີ່ຫວັງຫັນກອງທັບເປັນໄຮ້ການເມືອງ ແຍກກອງທັບອອກຈາກການນຳພາເດັດຂາດ ໂດຍກົງທາງດ້ານຕ່າງໆ ທຸກດ້ານຂອງພັກ. ເພາະວ່າ ເມື່ອການພົວພັນຕ່າງປະເທດດ້ານປ້ອງກັນຊາດຍິ່ງຂະຫຍາຍຕົວ, ວຽກງານປົກປັກຮັກສາການເມືອງພາຍໃນບັນດາການເຄື່ອນໄຫວພົວພັນຕ່າງປະເທດດ້ານປ້ອງກັນຊາດ ກໍ່ຍິ່ງໄດ້ຮັບຄວາມເອົາໃຈໃສ່, ປະກອບສ່ວນກີດກັ້ນກົນອຸບາຍ “ຜັນປ່ຽນໂດຍສັນຕິ” ເປັນຕົ້ນແມ່ນເລ່ກົນປຸກກະຕູ້ນ “ການຜັນປ່ຽນດ້ວຍຕົນເອງ” ພາຍໃນກອງທັບ.
ໃນຊຸມປີທີ່ຜ່ານມາ, ວຽກງານການຕ່າງປະເທດດ້ານປ້ອງກັນຊາດ ໄດ້ປະກອບສ່ວນອັນສຳຄັນເຂົ້າໃນການປະຕິບັດໜ້າທີ່ ຮັກສາສະຖຽນລະພາບດ້ານການເມືອງ - ສັງຄົມ ແລະ ປັບປຸງຄວາມເຊື່ອຖືໄວ້ວາງໃຈຂອງປະຊາຊົນ ຂອງທົ່ວກອງທັບຕໍ່ພັກ-ລັດ ເຊິ່ງມະຕິກອງປະຊຸມສູນກັງພັກຄັ້ງທີ 8 ສະໄໝທີ IX ວ່າດ້ວຍຍຸດທະສາດປົກປັກຮັກສາປະເທດຊາດໃນສະພາບການໃໝ່ ໄດ້ວາງອອກມາ. ອາໃສສິ່ງດັ່ງກ່າວນັ້ນ ຄວາມເຊື່ອຖືໄວ້ວາງໃຈຂອງປະຊາຊົນ ຕໍ່ການນຳພາ ແນວທາງ ນະໂຍບາຍການປ້ອງກັນປະເທດຂອງພັກ-ລັດ, ຕໍ່ຄວາມສາມາດປ້ອງກັນປະເທດ ແລະ ກຳລັງແຮງສູ້ຮົບຂອງກອງທັບ ຈຶ່ງໄດ້ຮັບການປັບປຸງ ແລະ ຍົກສູງຂຶ້ນ. ບັນດາປັດໃຈເຫຼົ່ານີ້ ເປັນພື້ນຖານເພື່ອຮັກສາສະຖຽນລະພາບດ້ານການເມືອງຂອງປະເທດ, ກໍ່ສ້າງຄວາມສາມັກຄີປວງຊົນພາຍໃຕ້ການນຳພາຂອງພັກກອມມູນິດຫວຽດນາມ.
ໂດຍປະຕິບັດແຜນນະໂຍບາຍທີ່ວ່າ ອອກແຮງເສີມຂະຫຍາຍກຳລັງແຮງພາຍໃນ ພ້ອມກັນນັ້ນກໍຍາດແຍ່ງໃຫ້ໄດ້ຫຼາຍທີ່ສຸດ ແລະ ຂຸດຄົ້ນຄວາມສະດວກດີທຸກຢ່າງຈາກພາຍນອກ ເພື່ອເພີ່ມທະວີກຳລັງແຮງປ້ອງກັນຊາດ ຕາມຈິດໃຈຂອງມະຕິກອງປະຊຸມສູນກາງພັກ ຄັ້ງທີ 8 ສະໄໝທີ IX, ການພົວພັນຕ່າງປະເທດດ້ານປ້ອງກັນຊາດ ໄດ້ຕັ້ງໜ້າປະກອບສ່ວນເຂົ້າໃນການກໍ່ສ້າງກອງທັບປະຊາຊົນປະຕິວັດ, ລະບຽບຫຼວງ, ຍອດຍ້ຽມ, ທັນສະໄໝເປັນແຕ່ລະກ້າວ ທັງທາງດ້ານກຳລັງຄົນ ແລະ ພື້ນຖານວັດຖຸ. ການຮ່ວມມືດ້ານການປ້ອງກັນຊາດ ໃນການກໍ່ສ້າງ ແລະ ອົບລົມຝຶດແອບລະຫວ່າງກອງທັບຫວຽດນາມ ກັບບັນດາຄູ່ຮ່ວມຕ່າງປະເທດ ໄດ້ຮັບການເພີ່ມທະວີໃນຫຼາຍດ້ານ. ພະນັກງານກອງທັບຫຼາຍຄົນທີ່ໄດ້ຮັບການກໍ່ສ້າງຢູ່ໂຮງຮຽນການທະຫານຕ່າງປະເທດ ໄດ້ກາຍເປັນພະນັກງານຫຼັກແຫຼ່ງໃນກອງທັບ, ເປັນຕົ້ນແມ່ນຢູ່ບັນດາກົມກອງທີ່ນຳໃຊ້ອາວຸດເຕັກໂນໂລຊີສູງ. ການເຄື່ອນໄຫວພຶດຕິກຳຢ່າງຟົດຟື້ນ ຫຼາຍຮູບຫຼາຍແບບ ອຸດົມສົມບູນ ດ້ວຍການທົບສອບທີ່ຫຍຸ້ງຍາກເຄັ່ງຮ້ອນ ຂອງວຽກງານການຕ່າງປະເທດດ້ານປ້ອງກັນຊາດ ກໍ່ໄດ້ຝຶກຝົນຫຼໍ່ຫຼອມໃຫ້ກອງທັບຫວຽດນາມ ມີຖັນແຖວພະນັກງານທີ່ມີຄວາມຮັບຮູ້ເຂົ້າໃຈຫຼາຍກວ່າອີກ ກ່ຽວກັບສົງຄາມທັນສະໄໝ ນັບທັງດ້ານຍຸດທະສາດ ຍຸດທະການ ແລະ ຍຸດທະວິທີ. ນີ້ແມ່ນພື້ນຖານອັນສຳຄັນເພື່ອໃຫ້ຫວຽດນາມຮ່ຳຮຽນເກັບກຳເອົາສິ່ງຍອດແຍຕ່າງໆ ໃນສິນລະປະຍຸດການທະຫານຂອງໂລກ, ແນໃສ່ຫັນພື້ນຖານການປ້ອງກັນຊາດພາຍໃນປະເທດເປັນທັນສະໄໝ. ຮ່ວມມືດ້ານອຸດສາຫະກຳປ້ອງກັນຊາດ ແລະ ການຄ້າປ້ອງກັນຊາດ ກໍ່ໄດ້ອາໃສສິ່ງດັ່ງກ່າວເພື່ອບັນລຸບາດກ້າວຂະຫຍາຍຕົວທີ່ຕັ້ງໜ້າຕ່າງໆ. ການຫັນການພົວພັນການຄ້າປ້ອງກັນຊາດເປັນຫຼາຍຮູບຫຼາຍແບບ ກໍ່ໄດ້ຍົກສູງຄວາມສາມາດເລືອກເຝັ້ນເອົາອາວຸດຍຸດໂທປະກອນຂອງຕ່າງປະເທດ ເພື່ອຕອບສະໜອງໄດ້ກັບຄວາມຕ້ອງການຫັນກອງທັບເປັນທັນສະໄໝ.
ຜ່ານສິບປີແຫ່ງການປະຕິບັດທິດທາງຕ່າງໆ ກ່ຽວກັບວຽກງານການຕ່າງປະເທດ ທີ່ໄດ້ກຳນົດໄວ້ໃນມະຕິກອງປະຊຸມສູນກາງພັກຄັ້ງທີ 8 ສະໄໝທີ IX ວ່າດ້ວຍຍຸດທະສາດປົກປັກຮັກສາປະເທດຊາດ ໃນສະພາບການໃໝ່, ການພົວພັນຕ່າງປະເທດດ້ານປ້ອງກັນຊາດ ໄດ້ມີການຂະຫຍາຍຕົວຢ່າງໃຫຍ່ຫຼວງ. ການພົວພັນປ້ອງກັນປະເທດບໍ່ພຽງແຕ່ໄດ້ຮັບການເປີດກວ້າງເທົ່ານັ້ນ ຫາກຍັງພັດທະນາເຂົ້າສູ່ລວງເລິກ. ມາເຖິງປັດຈຸບັນ, ຫວຽດນາມໄດ້ມີການພົວພັນປ້ອງກັນປະເທດກັບ 80 ປະເທດ, ຕັ້ງອົງການທູດທະຫານຢູ່ 31 ປະເທດ, ແລະ 45 ປະເທດໄດ້ຕັ້ງອົງການທູດທະຫານຢູ່ຫວຽດນາມ.
ໃນ 10 ປີ (2003 - 2012) ຈຳນວນເອກະສານຕົກລົງລະຫວ່າງຊາດ ທີ່ຫວຽດນາມເຊັນກັນກັບບັນດາປະເທດ ໄດ້ເພີ່ມຂຶ້ນທົບ 4 ເທົ່າທຽບກັບໄລຍະແຕ່ປີ 1945 ຮອດປີ 2002. ພວກເຮົາໄດ້ເອົາໃຈໃສ່ເປັນສຳຄັນເຖິງການຂະຫຍາຍບັນດາສາຍພົວພັນປ້ອງກັນຊາດ ທີ່ມີລັກສະນະຍຸດທະສາດ. ອິງບົນພື້ນຖານນ້ຳໃຈມິດຕະພາບອັນເປັນມູນເຊື້ອ, ເຄົາລົບເອກະລາດ ອຳນາດອະທິປະໄຕຂອງກັນແລະກັນ, ຮ່ວມມືກັນຕອບສະໜອງຄວາມຕ້ອງການປົກປັກຮັກສາຄວາມສະຫງົບ ຂອງແຕ່ລະປະເທດ, ການພົວພັນປ້ອງກັບຊາດລະຫວ່າງຫວຽດນາມ ກັບລາວ ແລະ ກຳປູເຈຍ ໄດ້ແລະພວມໄດ້ປ່ຽນແປງໃໝ່ ດ້ວຍຫຼາຍຂົງເຂດຮ່ວມມືທີ່ເຂົ້າສູ່ລວງເລິກ. ການພົວພັນປ້ອງກັບຊາດລະຫວ່າງຫວຽດນາມ ກັບບັນດາປະເທດສະມາຊິກອື່ນຂອງອາຊຽນ ກໍ່ໄດ້ຍູ້ແຮງດ້ວຍຫຼາຍຂົງເຂດຮ່ວມມືທີ່ມີປະສິດທິຜົນ. ການພົວພັນກັບບັນດາປະເທດມະຫາອຳນາດ ແລະ ໃຈກາງໃຫຍ່ ບົນຫຼັກການສະເໝີພາບ ຕ່າງຝ່າຍຕ່າງມີຜົນປະໂຫຍດ ບໍ່ແຊກແຊງເຂົ້າວຽກງາຍພາຍໃນຂອງກັນ ໄດ້ສ້າງໃຫ້ມີທ່າສັບໄຂວ່ກັນດ້ານຜົນປະໂຫຍດລະຫວ່າງປະເທດ. ການພົວພັນປ້ອງກັນຊາດກັບຈີນ ໄດ້ຮັບການພັດທະນາ ອິງບົນການພົວພັນຄູ່ຮ່ວມຍຸດທະສາດຮອບດ້ານ ລະຫວ່າງສອງປະເທດ ແລະ ພວມສ້າງຕັ້ງເປັນແຕ່ລະກ້າວບັນດາກົນໄກຮ່ວມມືປົກປັກຮັກສາຄວາມສະຫງົບລວມ ຢູ່ຊາຍແດນເທິງບົກ ກໍ່ຄືເທິງທະເລ. ການພົວພັນປ້ອງກັນຊາດກັບບັນດາຄູ່ຮ່ວມໃຫຍ່ ເຊັ່ນຣັດເຊຍ ອີນເດຍ ອາເມລິກາ ສະຫະພາບເອີຣົບ…ສືບຕໍ່ໄດ້ເປີດກວ້າງ, ຕອບສະໜອງຄວາມຕ້ອງການຮ່ວມມືດ້ານການປ້ອງກັນຊາດຂອງປະເທດ. ພວກເຮົາສືບຕໍ່ໜ່ວງໜ່ຽວຮັກສາ ແລະ ຂະຫຍາຍການຮ່ວມມືດ້ານປ້ອງກັນຊາດ ກັບບັນດາເພື່ອນມິດທີ່ເປັນມູນເຊື້ອ ບັນດາປະເທດເອກະລາດແຫ່ງຊາດ ບັນດາປະເທດກຳລັງພັດທະນາ.
ໃນສິບປີທີ່ຜ່ານມາ, ການຮ່ວມມືປ້ອງກັນຊາດແບບຜະຫຸພາຄີຂອງຫວຽດນາມ ໄດ້ມີບາດກ້າວຂະຫຍາຍຕົວກະໂດດຂັ້ນທາງດ້ານຄຸນນະພາບ. ຫວຽດນາມໄດ້ນຳສະເໜີຂໍ້ຄິດປະດິດສ້າງໃໝ່ ເພື່ອຊຸກຍູ້ການຮ່ວມມືປ້ອງກັບຊາດໃນພາກພື້ນ ຕາມທິດແທດເໝາະຕົວຈິງ ແລະ ມີປະສິດທິຜົນ. ພວກເຮົາໄດ້ຈັດຕັ້ງກອງປະຊຸມຕຳຫຼວດທະເລອາຊຽນຄັ້ງທຳອີດຢ່າງສຳເລັດຜົນ; ໄດ້ຕັ້ງໜ້າ ເປັນເຈົ້າການໃນການເຄື່ອນໄຫວ ຂອງປະທານຮ່ວມ ໜ່ວຍນັກຊ່ຽວຊານກ່ຽວກັບການຊ່ວຍໜູນມະນຸດສະທຳ ແລະ ຊ່ວຍກູ້ໄພພິບັດ ໃນກົນໄກ ກອງປະຊຸມລັດຖະມົນຕີວ່າການກະຊວງປ້ອງກັນປະເທດ ບັນດາປະເທດອາຊຽນເປີດກວ້າງ (ADMM+). ຂໍ້ສະເໜີຂອງຫວຽດນາມໃຫ້ຈັດຕັ້ງໜ່ວຍນັກຊ່ຽວຊານກ່ຽວກັບການກະທຳມະນຸດສະທຳດ້ານລູກລະເບີດ ໄດ້ສ້າງໃຫ້ມີຂົງເຂດການຮ່ວມມືໃໝ່ໃນກົນໄກ ADMM+. ຂໍ້ສະເໜີນີ້ໄດ້ຊຸກຍູ້ການຮ່ວມມືປ້ອງກັນຊາດຢູ່ໃນພາກພື້ນ, ປະກອບສ່ວນແທດຈິງເຂົ້າໃນການແກ້ໄຂຜົນຮ້າຍອັນໜັກໜ່ວງຂອງສົງຄາມຢູ່ປະເທດເຮົາ ກໍ່ຄືຢູ່ຫຼາຍປະເທດໃນພາກພື້ນ. ຫວຽດນາມກໍ່ໄດ້ກຽມພ້ອມເງື່ອນໄຂອັນຈຳເປັນທຸກຢ່າງ ເພື່ອອາດຈະເຂົ້າຮ່ວມການເຄື່ອນໄຫວຮັກສາສັນຕິພາບ ຂອງສະຫະປະຊາຊາດ ໃນອະນາຄົດໃກ້ນີ້.
ໃນສິບປີທີ່ຜ່ານມາ, ການພົວພັນຕ່າງປະເທດດ້ານປ້ອງກັນຊາດ ໄດ້ບັນລຸຜົນສຳເລັດອັນໃຫຍ່ຫຼວງຫຼາຍຢ່າງ ໃນການປະຕິບັດບັນດາຈຸດໝາຍ ທິດນຳ ແລະ ມາດຕະການ ຂອງຍຸດທະສາດປົກປັກຮັກສາປະເທດຊາດ. ຜົນສຳເລັດເຫຼົ່ານີ້ຢັ້ງຢືນລັກສະນະຖືກຕ້ອງ ປະດິດສ້າງ ຂອງມະຕິກອງປະຊຸມສູນກາງພັກ ຄັ້ງທີ 8 ສະໄໝທີ IX ວ່າດ້ວຍຍຸດທະສາດປົກປັກຮັກສາປະເທດຊາດ ໃນສະພາບການໃໝ່./.
ຂຽນໂດຍ: ພົນໂທ ຫງວຽນຈີ໊ວິ້ງ
ກຳມະການສູນກາງພັກ, ລັດຖະມົນຕີຊ່ວຍວ່າການກະຊວງປ້ອງກັນປະເທດ.
(1) ລາຍງານການເມືອງຂອງຄະນະບໍລິຫານງານສູນກາງພັກສະໃໝທີ X ຕໍ່ກອງປະຊຸມໃຫຍ່ຄັ້ງທີ XI, ພາກທີ VIII ກ່ຽວກັບການປ້ອງກັນປະເທດ ປ້ອງກັນຄວາມສະຫງົບ ໄດ້ລະບຸວ່າ: “ສືບຕໍ່ເປີດກວ້າງການພົວພັນຮ່ວມມືສາກົນໃນຂົງເຂດປ້ອງກັນປະເທດ ປ້ອງກັນຄວາມສະຫງົບ”
