ເສີມຂະຫຍາຍບົດບາດ ແລະ ຄວາມຮັບຜິດຊອບ ອັນໃຫຍ່ຫຼວງ ຂອງຊົນຊັ້ນກຳມະກອນ ແລະ ການຈັກຕັ້ງກຳມະບານ ໃນພາລະກິດການຫັນເປັນອຸດສາຫະກຳ ທັນສະໄໝ ໃນປະເທດ*
ວ.ກ - ຢູ່ກອງປະຊຸມໃຫຍ່ ຜູ້ແທນທົ່ວປະເທດຄັ້ງທີ XI ກຳມະບານຫວຽດນາມ ສະໄໝປີ 2013 - 2018, ສະຫາຍ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດ ຫວຽດນາມ ມີບົດປາໄສທີ່ສຳຄັນ. ວາລະສານກອມມູນິດ ຂໍເປັນກຽດສະເໜີຕໍ່ເພື່ອນຜູ້ອ່ານ ບົດປາໄສດັ່ງກ່າວ.
ສະຫາຍ ຫງວຽນຝູຈ້ອງ, ເລຂາທິການໃຫຍ່ ພັກກອມມູນິດຫວຽດນາມ, ກ່າວຄຳປາໄສ ທີ່ກອງປະຊຸມໃຫຍ່ຄັ້ງທີ XI ກຳມະບານຫວຽດນາມ
ໂດຍຕາງໜ້າຄະນະບໍລິຫານງານສູນກາງພັກ, ຂ້າພະເຈົ້າຂໍຊົນເຊີຍຢ່າງສຸດໃຈຕໍ່ກອງປະຊຸມໃຫຍ່, ຊົນເຊີຍບັນດາທ່ານແຂກຜູ້ມີກຽດ ພ້ອມດ້ວຍຜູ້ແທນເກືອບ 950 ທ່ານທີ່ເປັນຕົວແທນໃຫ້ແກ່ເຈດຈຳນົງ ຄວາມປາຖະໜາ ແລະ ສະຕິປັນຍາ ຂອງຊົນຊັ້ນກຳມະກອນ ຜູ້ອອກແຮງງານ ແລະ ການຈັດຕັ້ງກຳມະບານຂັ້ນຕ່າງໆ ທີ່ມາຮ່ວມກອງປະຊຸມໃຫຍ່…
ຊົນຊັ້ນກຳມະກອນຫວຽດນາມເຄີຍມີພ້ອມມູນເຊື້ອຮັກຊາດ ແລະ ປະຕິວັດ, ໄດ້ມີການປະກອບສ່ວນຫຼາຍໆຢ່າງທີ່ໃຫຍ່ຫຼວງທີ່ສຸດ ໃນພາລະກິດປະຕິວັດອັນສະຫງ່າງາມຂອງຊາດ. ຜ່ານໄລຍະເວລາກວ່າ 25 ປີແຫ່ງການປ່ຽນແປງໃໝ່, ພ້ອມກັນກັບວິວັດການຫັນເປັນອຸດສາຫະກຳ ທັນສະໄໝ, ຊົນຊັ້ນກຳມະກອນຫວຽດນາມ ນັບມື້ນັບຂະຫຍາຍຕົວ ເຕີບໃຫຍ່ ແລະ ພວມເສີມຂະຫຍາຍບົດບາດ ເປັນຊົນຊັ້ນນຳພາການປະຕິວັດ ໂດຍຜ່ານກອງກຳລັງນຳໜ້າຄືພັກກອມມູນິດຫວຽດນາມ, ເປັນພື້ນຖານການເມືອງ - ສັງຄົມທີ່ໝັ້ນຄົງໜັກແໜ້ນຂອງພັກ ແລະ ລັດຫວຽດນາມ …
ກຳມະບານໄດ້ຜ່ານຜ່າຄວາມຫຍຸ້ງຍາກສັບສົນຫຼາຍຢ່າງ, ສືບຕໍ່ປ່ຽນແປງໃໝ່ເນື້ອໃນແລະແບບວິທີການເຄື່ອນໄຫວ, ດຶງດູດ ເຕົ້າໂຮມກຳມະກອນ ລັດຖະກອນ ຜູ້ອອກແຮງງານນັບມື້ນັບຫຼວງຫຼາຍ; ຕັ້ງໜ້າໂຄສະນາ ເຜີຍແຜ່ ແລະ ປະຕິບັດແນວທາງຂອງພັກ, ນະໂຍບາຍ ກົດໝາຍຂອງລັດ; ເປັນພິເສດແມ່ນ ໄດ້ເປັນຜູ້ຕາງໜ້າ ປົກປັກຮັກສາຜົນປະໂຫຍດອັນຖືກກົດໝາຍ ສົມເຫດສົມຜົນຂອງກຳມະກອນ ຜູ້ອອກແຮງງານ. ມີຫຼາຍຂະບວນການແຂ່ງຂັນທີ່ກຳມະບານເປັນຜູ້ປຸກລະດົມ ຈັດຕັ້ງປະຕິບັດ ໄດ້ຮັບປະສິດທິຜົນດີ... ປະກົດມີຫຼາຍແບບຢ່າງທີ່ດີເດັ່ນ ກ້າວໜ້າ, ຫຼາຍໝູ່ຄະນະມີຜົນງານດີເດັ່ນພິເສດ ໄດ້ຮັບການຍົກຍ້ອງ ຍ້ອງຍໍໃຫ້ລາງວັນ. ກຳມະບານກໍ່ໄດ້ຕັ້ງໜ້າເຂົ້າຮ່ວມການກໍ່ສ້າງພັກ, ໄດ້ເພີ່ມເຕີມພະນັກງານທີ່ເຕີບໃຫຍ່ຈາກຂະບວນການກຳມະກອນ ແລະ ຈາກການເຄື່ອນໄຫວກຳມະບານ ຫຼາຍຄົນໃຫ້ພັກ. ການພົວພັນຮ່ວມມື ມິດຕະພາບ ລະຫວ່າງກຳມະບານຫວຽດນາມ ກັບບັນດາການຈັດຕັ້ງກຳມະບານສາກົນ, ກຳມະບານຂອງປະເທດຕ່າງໆ ກໍນັບມື້ນັບເປີດກວ້າງ…
ແຕ່ກໍຕ້ອງຮັບຮູ້ວ່າ, 5 ປີທີ່ຜ່ານມາ, ຂະບວນການກຳມະກອນ ແລະ ການເຄື່ອນໄຫວຂອງອົງການກຳມະບານ ກໍ່ມີຈຸດອ່ອນແລະຂໍ້ຈຳກັດບາງຢ່າງ... ຢູ່ໃນກອງປະຊຸມໄຫຍ່ນີ້, ບັນດາຜູ້ແທນຄວນແລກປ່ຽນ ສົນທະນາ ປະເມີນຄ່າສະພາບການ 5 ປີຜ່ານມາໃຫ້ຖືກຕ້ອງ; ກຳນົດແຈ້ງທິດທາງ ໜ້າທີ່ກໍ່ສ້າງຊົນຊັ້ນກຳມະກອນ ແລະ ຍູ້ແຮງການເຄື່ອນໄຫວຂອງການຈັດຕັ້ງກຳມະບານ ໃນສະໄໝແຫ່ງການຍູ້ແຮງການຫັນເປັນອຸດສາຫະກຳ ທັນສະໄໝ ແລະ ເຊື່ອມໂຍງເຂົ້າກັບສາກົນ.
ກອງປະຊຸມໃຫຍ່ຄັ້ງທີ XI ຂອງພັກໄດ້ວາງທິດທາງ ໜ້າທີ່ຂອງການປະຕິວັດປະເທດເຮົາໃນ 5 ປີ 2011 – 2015 ອອກມາແລ້ວ. ຕໍ່ກັບຊົນຊັ້ນກຳມະກອນ, ພັກເຮົາກຳນົດແຈ້ງ: ກໍ່ສ້າງຊົນຊັ້ນກຳມະກອນໃຫ້ເຕີບໃຫຍ່ເຂັ້ມແຂງ, ມີຄວາມຕື່ນຕົວຊົນຊັ້ນ ແລະ ຫຼັກໝັ້ນການເມືອງອັນໜັກແໜ້ນ; ມີສະຕິພົນລະເມືອງ, ຮັກຊາດ, ຮັກລັດທິສັງຄົມນິຍົມ, ເປັນຕົວແທນໃຫ້ແກ່ຍອດແຍວັດທະນະທຳແຫ່ງຊາດ; ຮູ້ສຶກໄວໄຫວພິບ ແລະ ໝັ້ນຄົງໜຽວແໜ້ນ ຕໍ່ໜ້າການຜັນປ່ຽນອັນສັບສົນຂອງສະພາບການໂລກ ແລະ ຕໍ່ການປ່ຽນແປງຂອງສະພາບການພາຍໃນປະເທດ; ມີຈິດໃຈຊາດ ແລະ ສາມັກຄີ ຮ່ວມມືກັບສາກົນ.
ຂ້າພະເຈົ້າເຫັນດີນຳທິດທາງ ໜ້າທີ່ຂອງສະໄໝ 2013 - 2018 ທີ່ຄະນະບໍລິຫານງານສະຫະພັນໃຫຍ່ແຮງງານຫວຽດນາມສະໄໝທີ X ສະເໜີຕໍ່ກອງປະຊຸມໃຫຍ່, ພິເສດແມ່ນ ກ່ຽວກັບຈຸດໝາຍ ໜ້າທີ່ຈຸດໜັກໃຈກາງ ບັນດາວິທີແກ້ໄຂໃຫຍ່. ພຽງແຕ່ຂໍເນັ້ນໜັກ ເຈາະຈີ້ມບາງບັນຫາເພື່ອໃຫ້ກອງປະຊຸມໃຫຍ່ສົນທະນາ ພິຈາລະນາ ແລະ ຕັດສິນຕົກລົງ.
ທີໜຶ່ງ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງກຳມະບານຫວຽດນາມ ດຳເນີນໄປໃນສະພາບການທີ່ທົ່ວພັກ ທົ່ວປວງຊົນ ແລະ ທົ່ວກອງທັບເຮົາພວມຕັ້ງໜ້າພະຍາຍາມປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ປະຕິບັດບັນດາມະຕິຕົກລົງຂອງຄະນະບໍລິຫານງານສູນກາງພັກ... ນີ້ແມ່ນໂອກາດດີເພື່ອໃຫ້ກອງປະຊຸມໃຫຍ່ປຶກສາພິຈາລະນາ ແລະ ຊອກຫາວິທີກໍ່ສ້າງຊົນຊັ້ນກຳມະກອນ ແລະ ການຈັດຕັ້ງກຳມະບານໃຫ້ໝັ້ນຄົງເຂັ້ມແຂງຍິ່ງຂຶ້ນ. ເພາະສະນັ້ນ, ຕ້ອງກຳແໜ້ນ ແລະ ຊາບຊືມຢ່າງເລິກເຊິ່ງ ບັນດາທັດສະນະ ແນວຄິດຊີ້ນຳຂອງມະຕິກອງປະຊຸມໃຫຍ່ຄັ້ງທີ XI ຂອງພັກ, ໂຄງການການເມືອງ ແລະ ແຜນຍຸດທະສາດພັດທະນາເສດຖະກິດ - ສັງຄົມໃນສະໄໝໃໝ່; ບັນດາມະຕິຂອງສູນກາງພັກ; ກຳແໜ້ນສະພາບການ ແລະ ຄວາມມຸ່ງມາດປາຖະໜາອັນສົມເຫດສົມຜົນຂອງກຳມະກອນ ເປັນເສນາທິການໃຫ້ແກ່ພັກ-ລັດ ໃນການວາງນະໂຍບາຍ ມາດຕະການອັນລະອຽດອອກມາ ເພື່ອນຳເອົາທັດສະນະ ແນວຄິດ ແຜນນະໂຍບາຍຂອງພັດເຂົ້າສູ່ຊີວິດການເປັນຢູ່.
ທີສອງ, ກຳມະບານຕ້ອງເອົາໃຈໃສ່ ເຮັດໃຫ້ໄດ້ດີກວ່າອີກໜ້າທີ່ກໍ່ສ້າງຊົນຊັ້ນກຳມະກອນ ສົມກຽດເປັນກຳລັງຫຼັກແຫຼ່ງແກ່ນສານ, ນຳໜ້າໃນພາລະກິດການປ່ຽນແປງໃໝ່, ການຫັນເປັນອຸດສາຫະກຳ ທັນສະໄໝ. ປັດຈຸບັນນີ້, ປະເທດຊາດພວມຫັນປ່ຽນຢ່າງແຂງແຮງ ໃນຂະບວນວິວັດການຫັນເປັນອຸດສາຫະກຳ ທັນສະໄໝ, ປະຕິບັດສອງໜ້າທີ່ຍຸດທະສາດສ້າງສາ ແລະ ປົກປັກຮັກສາປະເທດຊາດ. ມີຄວາມຮຽກຮ້ອງຕ້ອງການໃໝ່ ບັນຫາໃໝ່ຫຼາຍຢ່າງທີ່ສຸດທີ່ຕັ້ງອອກມາ, ມັນຮຽກຮ້ອງໃຫ້ຖັນແຖວກຳມະກອນ ຜູ້ອອກແຮງງານຕ້ອງບືນຕົວຂຶ້ນສູ່ລະດັບໃໝ່ - ລະດັບສູງຊຶ່ງບໍ່ພຽງແຕ່ການອອກແຮງງານທີ່ມີສະຕິປັນຍາ ແລະ ປະດິດສ້າງເທົ່ານັ້ນ, ຫາກມີທັງຄວາມຮັບຮູ້ກ່ຽວກັບບົດບາດ ທີ່ຕັ້ງການເມືອງອັນໃຫຍ່ຫຼວງຂອງຊົນຊັ້ນກຳມະກອນ - ຊົນຊັ້ນທີ່ເປັນເຈົ້າຊາຕາກຳຂອງປະເທດຊາດ, ຊຶ່ງພວມມີການຂະຫຍາຍຕົວທາງດ້ານປະລິມານ ແລະ ຄຸນນະພາບ ຕາມທິດທີ່ນັບມື້ນັບຫັນເປັນປັນຍາຊົນ. ພວກເຮົາຮັບຮູ້ຢ່າງເລິກເຊິ່ງວ່າ, ຊົນຊັ້ນກຳມະກອນຂອງປະເທດເຮົາເຖິງວ່າຍັງໜຸ່ມນ້ອຍກໍ່ຕາມ ແຕ່ຍ້ອນມີຄຸນນະພາບການເມືອງ ແລະ ມີມູນເຊື້ອປະຕິວັດອົງອາດກ້າແກ່ນ, ພັດຍັງມີກອງກຳລັງນຳໜ້າຂອງຕົນຄືພັກກອມມູນິດ, ດັ່ງນັ້ນຊົນຊັ້ນກຳມະກອນຍັງຄົງເປັນ ແລະ ສືບຕໍ່ເປັນຊົນຊັ້ນນຳພາການປະຕິວັດ. ປະຫວັດສາດກວ່າສາມສ່ວນສີ່ສະຕະວັດທີ່ຜ່ານມາ ຢັ້ງຢືນວ່າ ຊົນຊັ້ນກຳມະກອນຫວຽດນາມ ຍາມໃດກໍ່ຢືນຢູ່ໃຈກາງບັນດາເຫດການການເມືອງທີ່ສຳຄັນຂອງປະເທດ, ສືບທອດ ແລະ ເສີມສ້າງມູນເຊື້ອຂອງຊາດໃຫ້ສະຫງ່າງາມຍິ່ງຂຶ້ນ.
ເພື່ອກໍ່ສ້າງຊົນຊັ້ນກຳມະກອນໃຫ້ນັບມື້ນັບເຂັ້ມແຂງ, ກ່ອນອື່ນໝົດຕ້ອງເອົາໃຈໃສ່ຍົກສູງຄວາມຮັບຮູ້ ຫຼັກໝັ້ນການເມືອງ ແລະ ລະດັບດ້ານຕ່າງໆຂອງຊົນຊັ້ນກຳມະກອນ, ກໍ່ສ້າງພະນັກງານທີ່ມີຕົ້ນກຳເນີດຈາກກຳມະກອນ, ເບິ່ງແຍງດູແລຜົນປະໂຫຍດແທດຕົວຂອງຖັນແຖວກຳມະກອນ ຜູ້ອອກແຮງງານ, ເປັນຕົ້ນແມ່ນແກ້ໄຂວຽກເຮັດງານທຳ ເຮືອນຢູ່ ລາຍຮັບລາຍໄດ້ ເງື່ອນໄຂອອກແຮງງານ ປະກັນໄພສັງຄົມ ປະກັນໄພສາທາລະນະສຸກ ແລະ ບັນດານະໂຍບາຍສັງຄົມອື່ນໆ. ເປັນເຈົ້າການສົມທົບກັບອຳນາດການປົກຄອງຂັ້ນຕ່າງໆ ໃນການເອົາໃຈໃສ່ອົບຮົມກໍ່ສ້າງ ກໍ່ສ້າງຄືນໃໝ່ ເພື່ອໃຫ້ກຳມະກອນ ຜູ້ອອກແຮງງານ ອາດສາມາດເຂົ້າເຖິງບັນດາຄວາມກ້າວໜ້າດ້ານວິທະຍາສາດເຕັກນິກ ແລະ ປັນຍາຄວາມຮູ້ໃໝ່. ສ້າງໃຫ້ມີຂະບວນການຮ່ຳຮຽນຢ່າງຟົດຟື້ນ ແທດກັບຕົວຈິງ ແລະ ມີປະສິດທິຜົນໃນກຳມະກອນ ຜູ້ອອກແຮງງານ, ເປັນຕົ້ນແມ່ນໃນໄວໜຸ່ມ; ຮ່ຳຮຽນຕິດແໜ້ນກັບການອອກແຮງງານທຳການຜະລິດ, ໝູນໃຊ້ວິດທະຍາສາດ ເຕັກໂນໂລຊີໃໝ່, ສ້າງໃຫ້ມີສະມັດຕະພາບ ຄຸນນະພາບ ປະສິດທິຜົນສູງກວ່າເກົ່າ.
ກຳມະບານຂັ້ນຕ່າງໆ ຕ້ອງເອົາໃຈໃສ່ວຽກງານໂຄສະນາອົບຮົມ ສຶກສາ, ຊ່ວຍໃຫ້ກຳມະກອນ ລັດຖະກອນ ຜູ້ອອກແຮງງານຍົກສູງຄວາມຮັບຮູ້ກ່ຽວກັບຊົນຊັ້ນ ກ່ຽວກັບພັກ ກ່ຽວກັບການຈັດຕັ້ງກຳມະບານ, ເສີມຂະຫຍາຍນ້ຳໃຈຮັກຊາດ ຮັກລັດທິສັງຄົມນິຍົມ, ອອກແຮງງານຢ່າງຂະຫຍັນໝັ່ນພຽນ ປະດິດສ້າງ, ຕັດສິນໃຈເອົາຊະນະຄວາມອຶດຫີວທຸກຍາກ ຄວາມຫຼ້າຫຼັງ, ຕອບສະໜອງໄດ້ກັບຄວາມຕ້ອງການຂອງການປ່ຽນແປງໃໝ່, ເປັນແກ່ນສານໃນການກໍ່ສ້າງພັນທະພາບກຳມະກອນ - ຊາວນາ - ປັນຍາຊົນ ແລະ ກຸ່ມກ້ອນມະຫາສາມັກຄີແຫ່ງຊາດ. ໃນພື້ນຖານເສດຖະກິດຕະຫຼາດຕາມທິດສັງຄົມນິຍົມ, ກຳມະບານຍິ່ງຕ້ອງເຮັດໃຫ້ໄດ້ດີ ບົດບາດຂອງຜູ້ເປັນຕົວແທນ ແລະ ປົກປັກຮັກສາ ສິດແລະຜົນປະໂຫຍດອັນຊອບທຳ ຂອງກຳມະກອນ ຜູ້ອອກແຮງງານ. ເປັນເຈົ້າການເຂົ້າຮ່ວມໃນການເຈລະຈາກັບເຈົ້າຂອງຜູ້ໃຊ້ແຮງງານ ແລະ ຈັດຕັ້ງໃຫ້ໄດ້ດີການເຊັນສັນຍາ ປະຕິບັດສັນຍາແຮງງານລວມໝູ່, ແກ້ໄຂໃຫ້ໄດ້ດີການແກ່ງແຍ້ງດ້ານແຮງງານຕ່າງໆ, ເຂົ້າຮ່ວມໃນການວາງແຜນສັບຊ້ອນຄືນໃໝ່ການຜະລິດ ທຸລະກິດ, ປ່ຽນແປງໃໝ່ການຈັດຕັ້ງ ແລະ ເຄື່ອນໄຫວຂອງບັນດາວິສາຫະກິດ, ກ່ອນອື່ນໝົດແມ່ນວິສາຫະກິດຂອງລັດ ຕາມແຜນນະໂຍບາຍຂອງພັກ ແລະ ລັດ, ເຂົ້າຮ່ວມໃນການສຳຫຼວດກວດຄືນ ແລະ ກໍ່ສ້າງກຳນົດໝາຍແຮງງານ, ເປັນຕົ້ນແມ່ນ ຢູ່ບັນດາຫົວໜ່ວຍຫັນເປັນຫຸ້ນສ່ວຍ, ຫົວໜ່ວຍທີ່ຖືກສັບຊ້ອນຄືນໃໝ່ ຫຼືຖືກຍຸບເລີກ. ເອົາໃຈໃສ່ເຂົ້າຮ່ວມໃນການກໍ່ສ້າງ ແລະ ຈັດຕັ້ງປະຕິບັດໃຫ້ໄດ້ດີ ກົດລະບຽບປະຊາທິປະໄຕຢູ່ຮາກຖານ; ຍູ້ແຮງການເຄື່ອນໄຫວສັງຄົມຕ່າງໆ, ສ້າງເງື່ອນໄຂອຳນວຍຄວາມສະດວກໃຫ້ກຳມະກອນ ຜູ້ອອກແຮງງານ ສາມາດປະຕິບັດສິດເປັນເຈົ້າຂອງຕົນໄດ້.
ທີສາມ, ກຳມະບານຕ້ອງເປັນເຈົ້າການສົມທົບກັບອຳນາດການປົກຄອງ ໃນການປຸກລະດົມບັນດາຂະບວນການກະທຳປະຕິວັດ ຢ່າງກວ້າງຂວາງເລິກເຊິ່ງ ແລະ ຈັດຕັ້ງຂະບວນການເຫຼົ່ານັ້ນໃນກຳມະກອນ ຜູ້ອອກແຮງງານ. ລະດົມສົ່ງເສີມກຳມະກອນ ຜູ້ອອກແຮງງານ ເສີມຂະຫຍາຍສິດເປັນເຈົ້າຂອງປະເທດຊາດ, ນຳໜ້າໃນບັນດາຂະບວນການແຂ່ງຂັນກັນສ້າງສາພັດທະນາເສດຖະກິດ - ສັງຄົມ. ຕ້ອງປ່ຽນແປງໃໝ່ຢ່າງເປັນປະຈຳເນື້ອໃນ ແລະ ຮູບການຈັດຕັ້ງຂະບວນການແຂ່ງຂັນ ໃຫ້ສອດຄ່ອງກັບຈຸດພິເສດຂອງຂະແໜງການ ທ້ອງຖິ່ນ ແລະ ຮາກຖານ, ຫັນຂະບວນການແຂ່ງຂັນເຂົ້າສູ່ຈຸດໝາຍ “ສະມັດຕະພາບ - ຄຸນນະພາບ - ປະສິດທະຜົນ”, “ວຽກເຮັດງານທຳ - ຊີວິດການເປັນຢູ່ - ປະຊາທິປະໄຕ ແລະ ຍຸດຕິທຳທາງສັງຄົມ”, ສ້າງວຽກເຮັດງານທຳຕື່ມອີກ ແລະ ເພີ່ມລາຍຮັບລາຍໄດ້, ປົວແປງຊີວິດການເປັນຢູ່ຂອງກຳມະກອນ ຜູ້ອອກແຮງງານ, ປະກອບສ່ວນເຂົ້າໃນການຈະເລີນເຕີບໂຕເສດຖະກິດ, ສຳເລັດໜ້າທີ່ການເມືອງຂອງຂະແໜງການ ແລະ ຂອງທ້ອງຖິ່ນ.
ການເຂົ້າຮ່ວມຂອງກຳມະບານ ຂອງກຳມະກອນ ແລະ ຜູ້ອອກແຮງງານ ເຂົ້າໃນການພັດທະນາເສດຖະກິດ-ສັງຄົມ, ຄຸ້ມຄອງລັດ, ຄຸ້ມຄອງສັງຄົມ ແມ່ນຄວາມຮຽກຮ້ອງຕ້ອງການພາວະວິໄສຂອງການພັດທະນາສັງຄົມ, ແມ່ນເນື້ອໃນໜຶ່ງໃນບັນດາເນື້ອໃນ ທີ່ສະແດງໃຫ້ເຫັນເຖິງທາດແທ້ອັນຈົບງາມ ຂອງລະບອບສັງຄົມຂອງພວກເຮົາ. ກຳມະບານຕ້ອງເປັນເຈົ້າການໃນການເຂົ້າຮ່ວມ ແລະ ປົກປັກຮັກສາ, ສ້າງເງື່ອນໄຂອັນສະດວກດີທຸກປະການໃຫ້ກຳມະກອນ, ຜູ້ອອກແຮງງານ ມີສິດເປັນເຈົ້າການ ປະດິດສ້າງໃນການຜະລິດ ທຸລະກິດ ແລະ ໄດ້ຮັບຜົນປະໂຫຍດທີ່ສົມກຽດກັບການປະກອບສ່ວນຂອງຕົນ ໃນເມື່ອເຂົ້າຮ່ວມວຽກງານຕ່າງໆຂອງວິສາຫະກິດ…
ກຳມະກອນ ຜູ້ອອກແຮງງານທັງໝົດ ເຖິງວ່າຈະເຮັດວຽກຢູ່ໃນວິສາຫະກິດປະເພດໃດໆກໍ່ຕາມ ກໍ່ລ້ວນແຕ່ເຮັດດ້ວຍກິລິຍາທ່າທາງ ແລະ ຖານະນາມຂອງຜູ້ເປັນເຈົ້າຂອງປະເທດຊາດ ເຈົ້າຂອງສັງຄົມ, ປະຕິບັດຕາມກົດໝາຍ ແລະ ມີສິດແລະພັນທະອັນຄົບຖ້ວນຂອງພົນລະເມືອງ, ໄດ້ຮັບການປົກປ້ອງຈາກກົດໝາຍ. ບັນດາອົງການຈັດຕັ້ງກຳມະບານຕ້ອງຮັບຮູ້ບັນຫານີ້ຢ່າງເລິກເຊິ່ງ ເພື່ອໂຄສະນາອົບຮົມສຶກສາໃຫ້ຖັນແຖວກຳມະກອນ ຜູ້ອອກແຮງງານ.
ທີສີ່, ສະຫະພັນໃຫຍ່ແຮງງານຫວຽດນາມ ແລະ ກຳມະບານຂັ້ນຕ່າງໆ ຕ້ອງຍູ້ແຮງການກໍ່ສ້າງການຈັດຕັ້ງ, ປັບປຸງຖັນແຖວພະນັກງານໃຫ້ສົມບູນ ແລະ ດັດແປງແບບວິທີການເຄື່ອນໄຫວ ໃຫ້ສອງຄ່ອງກັບຄວາມຮຽກຮ້ອງຕ້ອງການໃໝ່. ເບິ່ງແຍງດູແລການກໍ່ສ້າງ ປັບປຸງການຈັດຕັ້ງກຳມະບານ, ເຮັດໃຫ້ກຳມະບານເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ, ກາຍເປັນການຈັດຕັ້ງການເມືອງ - ສັງຄົມອັນແທ້ຈິງ, ເປັນການຈັດຕັ້ງມະຫາຊົນອັນກວ້າງຂວາງ ຂອງກຳມະກອນແລະຜູ້ອອກແຮງງານ, ເປັນຕົວແທນໃຫ້ແກ່ກຳລັງແຮງ ຄວາມເກັ່ງກ້າສາມາດ ສະຕິປັນຍາ ແລະ ຜົນປະໂຫຍດຂອງກຳມະກອນ ຜູ້ອອກແຮງງານ. ຕ້ອງນຳໃຊ້ຫຼາຍໆຮູບການເຕົ້າໂຮມມະຫາຊົນ ແລະ ເພີ່ມທະວີການເຄື່ອນໄຫວສັງຄົມ ເພື່ອລະດົມ ເຕົ້າໂຮມໃຫ້ໄດ້ກຳມະກອນ ຜູ້ອອກແຮງງານຢ່າງຫຼວງຫຼາຍໃນບັນດາພາກສ່ວນເສກຖະກິດ. ປ່ຽນແປງໃໝ່ເນື້ອໃນ ແລະ ແບບວິທີການເຄື່ອນໄຫວ ຂອງກຳມະບານຂັ້ນຕ່າງໆ, ເປັນພິເສດແມ່ນກຳມະບານຂັ້ນຮາກຖານ, ຕາມທິດນຳ “ເພື່ອສິດ ຜົນປະໂຫຍດອັນຖືກກົດໝາຍ ສົມເຫດສົມຜົນຂອງສະມາຊິກກຳມະບານ ແລະ ຜູ້ອອກແຮງງານ, ເພື່ອການພັດທະນາແບບຍືນຍົງຂອງປະເທດຊາດ”. ແກ້ໄຂຜ່ານຜ່າສະພາບການແຂງກະດ້າງ ບໍລິຫານອາດຍາສິດ ໃນການເຄື່ອນໄຫວກຳມະບານ. ຍູ້ແຮງການສ້າງຕັ້ງອົງການກຳມະບານຢູ່ໃນຂົງເຂດເສດຖະກິດເອກະຊົນ ເສດຖະກິດຮ່ວມທຸລະກິດ ແລະ ໃນຂົງເຂດເສດຖະກິດມີການລົງທຶນຈາກຕ່າງປະເທດ, ປະຕິບັດເປັນຢ່າງດີພາລະບົດບາດປົກປັກຮັກສາສິດ ແລະ ຜົນປະໂຫຍດອັນຖືກຕ້ອງຕາມກົດໝາຍ ສົມເຫດສົມຜົນຂອງກຳມະກອນ ຜູ້ອອກແຮງງານ, ພ້ອມກັນນັ້ນກໍ່ເປັນບ່ອນອີງທີ່ໄວ້ວາງໃຈໄດ້ ເພື່ອເສີມຂະຫຍາຍບົດບາດເປັນເຈົ້າຂອງກຳມະກອນ ຜູ້ອອກແຮງງານ…
ພະນັກງານກຳມະບານແມ່ນພານັກງານການເມືອງທີ່ເຄື່ອນໄຫວສັງຄົມ ເຮັດວຽກງານຂົນຂວາຍມະຫາຊົນ, ທີ່ເກີດມາຈາກຂະບວນການມະຫາຊົນ, ໄດ້ຮັບການບຳລຸງ ແລະ ເຕີບໃຫຍ່ຂຶ້ນມາຈາດພາກຕົວຈິງແຫ່ງການອອກແຮງງານ ການຜະລິດ ແລະ ທຸລະກິດ. ຕໍ່ໜ້າຄວາມຮຽກຮ້ອງຕ້ອງການໃໝ່, ຕ້ອງຖືເປັນສຳຄັນພິເສດ ວຽກງານກໍ່ສ້າງ ບຳລຸງ ຍົກສູງກຳລັງຄວາມສາມາດ ແລະ ລະດັບຂອງຖັນແຖວພະນັກງານກຳມະບານຂັ້ນຕ່າງໆ, ຊ່ວຍໃຫ້ເຂົາເຈົ້າບໍ່ພຽງແຕ່ມີຫຼັກໝັ້ນການເມືອງອັນໜັກແໜ້ນ ມີຄວາມຕັ້ງຕໍ່ວຽກງານ, ຫາກຍັງມີທັງຄວາມຮູ້ກ່ຽວກັບວັດທະນະທຳ ວິດທະຍາສາດ ແລະ ມີຄວາມສາມາດດ້ານວິຊາສະເພາະ, ມີແບບແຜນມະຫາຊົນ ມີຄວາມຮູ້ແລະວິທີຂົນຂວາຍມະຫາຊົນ, ຕອບສະໜອງໄດ້ກັບຄວາມຕ້ອງການເຄື່ອນໄຫວກຳມະບານ ໃນພື້ນຖານເສດຖະກິດຕະຫຼາດຕາມທິດສັງຄົມນິຍົມ.
ທີຫ້າ, ກຳມະບານຕ້ອງເຮັດໃຫ້ໄດ້ດີວຽກງານກໍ່ສ້າງພັກ ຢູ່ໃນສຳນັກງານ ອົງການຈັດຕັ້ງຂອງຕົນ; ພ້ອມກັນນັ້ນກໍຕັ້ງໜ້າເຂົ້າຮ່ວມ ໃນການກໍ່ສ້າງພັກເວົ້າລວມ ທາງດ້ານການເມືອງ ແນວຄິດ ແລະ ການຈັດຕັ້ງ. ເພາະວ່າ ຂະບວນການກຳມະກອນ ແລະ ການຈັດຕັ້ງ ເຄື່ອນໄຫວຂອງກຳມະບານ ຍາມໃດກໍ່ພົວພັນສະໜິດແໜ້ນ ແບບກາຍອິນຊີກັບການກໍ່ສ້າງພັກ ໃຫ້ນັບມື້ນັບໃສສະອາດ ໝັ້ນຄົງເຂັ້ມແຂງ. ພິເສດ, ຕ້ອງເອົາໃຈໃສ່ເປັນສຳຄັນເຖິງການ ສົມທົບລະຫວ່າງບັນດາອົງການຄົ້ນຄວ້າວິທະຍາສາດຂອງພັກ ແລະ ລັດ, ຍູ້ແຮງການຄົ້ນຄວ້າທິດສະດີ ສະຫລຸບສັງລວມພຶດຕິກຳ ກ່ຽວກັບຊົນຊັ້ນກຳມະກອນ ແລະ ການເຄື່ອນໄຫວຂອງກຳມະບານ ໃນເງື່ອນໄຂພັດທະນາເສດຖະກິດຕະຫຼາດ ຕາມທິດສັງຄົມນິຍົມ, ຫັນເປັນອຸດສາຫະກຳ ທັນສະໄໝ ແລະ ເຊື່ອມໂຍງເຂົ້າກັບສາກົນ, ຊ່ວຍໃຫ້ພັກ ແລະ ລັດ ມີຫຼັກຖານວິທະຍາສາດຢ່າງຄົບຖ້ວນ ໃນການວາງກຳນົດແນວທາງ ແຜນນະໂຍບາຍ ນະໂຍບາຍອັນຖືກຕ້ອງ ສອດຄ່ອງອອກມາ. ເອົາໃຈໃສ່ຫຼາຍກວ່າອີກເຖິງວຽກງານຕໍ່ສູ້ ປ້ອງກັນແລະຕ້ານອາດຍາສິດ ການສໍ້ລາດບັງຫຼວງ ຟຸ່ມເຟືອຍ, ຮັກສາຄວາມໃສສະອາດ ແລະ ທາດແທ້ປະຕິວັດຂອງພັກ. ຍູ້ແຮງການບຳລຸງ ຂະຫຍາຍສະມາຊິກພັກ ໃນກຳມະກອນ ຜູ້ອອກແຮງງານ; ແນະນຳໃຫ້ພັກພິຈາລະນາ ຮັບເຂົ້າພັກ ຕໍ່ບັນດາສະມາຊິກທີ່ດີເດັ່ນຂອງກຳມະບານ ແລະ ເອົາພະນັກງານທີ່ດີເດັ່ນ ເຕີບໃຫຍ່ໃນຂະບວນການກຳມະກອນ ແລະ ການເຄື່ອນໄຫວກຳມະບານ ມາເພີ່ມເຕີມໃຫ້ພັກ, ແນໃສ່ປະກອບສ່ວນເພີ່ມທະວີທາດແທ້ຊົນຊັ້ນກຳມະກອນຂອງພັກ. ຜັນຂະຫຍາຍປະຕິບັດຢ່າງເຂັ້ມງວດ ມະຕິກອງປະຊຸມສູນກາງພັກຄັ້ງທີ 7 ສະໄໝທີ XI ວ່າດ້ວຍການເພີ່ມທະວີ ແລະ ປ່ຽນແປງໃໝ່ການນຳພາຂອງພັກຕໍ່ກັບວຽກງານຂົນຂວາຍປະຊາຊົນໃນສະພາບການໃໝ່.
ບັນດາຄະນະພັກ ແລະ ການຈັດຕັ້ງພັກຕ້ອງຮັບຮູ້ຢ່າງຄົບຖ້ວນເຖິງຄວາມຮັບຜິດຊອບຂອງຕົນ, ເອົາໃຈໃສ່ຢ່າງເປັນປະຈຳ ເຖິງການນຳພາຂະບວນການກຳມະກອນ ແລະ ການເຄື່ອນໄຫວຂອງກຳມະບານ. ຕາມກຳນົດເວລາ ຄະນະພັກຕ້ອງຮັບຟັງລາຍງານ ກ່ຽວກັບສະພາບການວຽກງານ ຂອງບັນດາການຈັດຕັ້ງກຳມະບານ ແລະ ຄວາມປາຖະໜາຂອງກຳມະກອນ ຜູ້ອອກແຮງງານ, ເພື່ອມີຄວາມເຫັນຊີ້ນຳຢ່າງທັນການ; ພ້ອມກັນນັ້ນ ການນຳຂອງອຳນາດການປົກຄອງ ບັນດາຂະແໜງການວິຊາສະເພາະ ແນວໂຮມປະເທດຊາດ ແລະ ບັນດາອົງຄະນະມະຫາຊົນອື່ນ ສົມທົບຢ່າງແໜ້ນແຟ້ນກັບກຳມະບານໃນວຽກງານດ້ານຕ່າງໆ ແລະ ສ້າງເງື່ອນໄຂອຳນວຍຄວາມສະດວກໃຫ້ອົງການກຳມະບານເຄື່ອນໄຫວຢ່າງມີປະສິດທິຜົນ.
ດ້ວຍທາດແທ້ ແລະ ມູນເຊື້ອອັນສະຫງ່າງາມຂອງຊົນຊັ້ນກຳມະກອນ ແລະ ການຈັດຕັ້ງກຳມະບານ, ດ້ວຍນ້ຳໃຈສາມັກຄີ ສະຕິປັນຍາ ຄວາມເປັນປະຊາທິປະໄຕ ປ່ຽນແປງໃໝ່, ພວກເຮົາມີພື້ນຖານເພື່ອເຊື່ອໝັ້ນວ່າ ສະໄໝປະຈຳການ 2013 - 2018 ຂອງກຳມະບານປະເທດເຮົາຈະມີບາດກ້າວຂະຫຍາຍຕົວໃໝ່ ແຂງແຮງກວ່າເກົ່າ, ປະກອບສ່ວນອັນສຳຄັນພ້ອມກັບທົ່ວພັກ ທົ່ວປວງຊົນ ທົ່ວກອງທັບຜ່ານຜ່າຄວາມຫຍຸ້ງຍາກ ສິ່ງທ້າທາຍ, ສືບຕໍ່ຍູ້ແຮງຢ່າງຮອບດ້ານກິດຈະການປ່ຽນແປງໃໝ່, ປະຕິບັດຢ່າງສຳເລັດມີໄຊພາລະກິດຫັນເປັນອຸດສາຫະກຳ ທັນສະໄໝ ເພື່ອຈຸດໝາຍກໍ່ສ້າງປະເທດຫວຽດນາມທີ່ປະຊາຊົນຮັ່ງມີ ປະເທດຊາດເຂັ້ມແຂງ ມີປະຊາທີປະໄຕ ຍຸດຕິທຳ ອາລະຍະທຳ, ກ້າວຢ່າງໜັກແໜ້ນຂຶ້ນສູ່ສັງຄົມນິຍົມ./.
* ຄັດແປຈາກບົດທີ່ລົງໃນວາລະສານກອມມູນິດ ສະບັບທີ 850 (ເດືອນສິງຫາ 2013)
