ວຽກງານການຕ່າງປະເທດ ຕ້ອງເອົາຜົນປະໂຫຍດອັນພື້ນຖານ ຍາວນານຂອງຊາດ ເປັນຮາກຖານ*
ວ.ກ - ກອງປະຊຸມການທູດຄັ້ງທີ 28 ໃນຫົວຂໍ້ “ການທູດເປັນເຈົ້າການ ຕັ້ງໜ້າ ເຊື່ອມໂຍງເຂົ້າກັບສາກົນ” ໄດ້ດຳເນີນຢູ່ ນະຄອນຫຼວງຮ່າໂນ້ຍ ແຕ່ວັນທີ 16 ຫາວັນທີ 20 ທັນວາ 2013, ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ໃຫ້ກຽດມາຮ່ວມ ແລະ ມີບົດປາໄສອັນສຳຄັນ ເພື່ອຊີ້ນຳກອງປະຊຸມ. ວາລະສານກອມມູນິດ ຂໍເປັນກຽດໄດ້ແນະນຳ ເນື້ອໃນຂອງບົດດັ່ງກ່າວ.
ທຽບກັບກອງປະຊຸມການທູດຄັ້ງທີ 27 ກ່ອນໜ້ານີ້ສອງປີ, ກອງປະຊຸມຄັ້ງນີ້ຂອງພວກເຮົາ ດຳເນີນໃນສະພາບການໂລກ ພາກພື້ນ ແລະ ໃນປະເທດ ມີການຜັນປ່ຽນໃໝ່ຫຼາຍຢ່າງ. ທົ່ວພັກ ທົ່ວປວງຊົນເຮົາພວມຢືນຢູ່ຕໍ່ໜ້າ ບັນດາໜ້າທີ່ອັນໜັກໜ່ວງ ຂອງພາລະກິດການສ້າງສາ ແລະ ປົກປັກຮັກສາ ປະເທດຊາດ. ວຽກງານການຕ່າງປະເທດ, ດ້ວຍຖານະເປັນແນວຮົບທີ່ສຳຄັນໜຶ່ງ, ກໍ່ພວມຢືນຢູ່ຕໍ່ໜ້າສິ່ງທ້າທາຍຫຼາຍທີ່ສຸດ. ຖ້າວ່າ ກອງປະຊຸມຄັ້ງທີ 27 ມີໜ້າທີ່ຊາບຊືມທັດສະນະ ແຜນນະໂຍບາຍ ແນວທາງຂອງກອງປະຊຸມໃຫຍ່ຄັ້ງທີ XI ຂອງພັກ ເພື່ືອສ້າງໂຄງການການກະທຳອັນລະອຽດ ໃນຂົງເຂດການຕ່າງປະເທດ, ກອງປະຊຸມຄັ້ງນີ້ ພັດເປັນໂອກາດເພື່ອສຳຫຼວດ ຕີລາຄາການຜັນຂະຫຍາຍປະຕິບັດ ໃນສອງປີທີ່ຜ່ານມາ ແລະ ກໍເປັນເຄິ່ງສະໄໝກວ່າ ແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ XI, ພ້ອມນັ້ນ ກໍ່ນຳສະເໜີບັນດາໜ້າທີ່ການຕ່າງປະເທດຈຸດໜັກໃຈກາງ ໃນຊຸມປີທີ່ຈະມາເຖິງ, ເພື່ອແນໃສ່ສືບຕໍ່ປະຕິບັດມະຕິກອງປະຊຸມໃຫຍ່ຄັ້ງທີ XI. ນີ້ກໍ່ເປັນໂອກາດເພື່ອໃຫ້ພວກເຮົາລິເລີ່ມການແລກປ່ຽນ ເຈາະຈິ້ມການຄົ້ນຄວ້າບາງບັນຫາໃຫຍ່ ບັນຫາໃໝ່ ກ່ຽວກັບການຕ່າງປະເທດ, ກະກຽມໃຫ້ແກ່ກອງປະຊຸມຜູ້ແທນທົ່ວປະເທດຄັ້ງທີ XII ຂອງພັກ. ຂ້າພະເຈົ້າເຊື່ອໝັ້ນ ແລະຫວັງວ່າ ບັນດາສະຫາຍຈະເສີມຂະຫຍາຍສະຕິປັນຍາເຖິງລະດັບສູງ ເຮັດວຽກຢ່າງເຂັ້ມງວດ ມີຄວາມຮັບຜິດຊອບ ແລະ ປະດິດສ້າງ ເພື່ອຊອກຫາມາດຕະການ ແລະວິທີແກ້ອັນສອດຄ່ອງກັບບັນດາບັນຫາການຕ່າງປະເທດ ຂອງພວກເຮົາ.
ນັບແຕ່ພາຍຫຼັງກອງປະຊຸມໃຫຍ່ຄັ້ງທີ XI ຂອງພັກມາເຖິງປັດຈຸບັນ ສະພາບການໂລກ ແລະໃນປະເທດມີຄວາມສະດວກອັນພື້ນຖານ, ຄຽງຂ້າງນັ້ນກໍ່ມີຄວາມຫຍຸ້ງຍາກ ສິ່ງທ້າທາຍທີ່ໃຫຍ່ຫຼວງແລະສັບສົນຫຼາຍຢ່າງ, ແຕ່ດ້ວຍຄວາມມານະພະຍາຍາມຂອງທົ່ວພັກ ທົ່ວປວງຊົນ ທົ່ວກອງທັບ, ພວກເຮົາໄດ້ບັນລຸໝາກຜົນ ແລະຜົນສຳເລັດຫຼາຍຢ່າງທີ່ສຳຄັນໃນຂົງເຂດການຕ່າງປະເທດ ຊຶ່ງພົ້ນເດັ່ນຄື:
- ພວກເຮົາໄດ້ຮັກສາ ແລະປັບປຸງສິ່ງແວດລ້ອມສັນຕິພາບ ສະຖຽນລະພາບໄວ້ໄດ້ຢ່າງໝັ້ນຄົງ ທີ່ອຳນວຍຄວາມສະດວກໃຫ້ແກ່ພາລະກິດສ້າງສາ ແລະປົກປັກຮັກສາປະເທດຊາດ. ໃນສະພາບການພາກພື້ນ ແລະ ສາກົນມີການຫັນປ່ຽນສັບສົນຫຼາຍຢ່າງ ທີ່ຄາດຄະເນໄດ້ຍາກ, ເສດຖະກິດໂລກ ແລະເສດຖະກິດພາຍໃນປະເທດຍັງມີຄວາມຫຍຸ້ງຍາກຫຼາຍນັ້ນ, ການທີ່ພວກເຮົາສືບຕໍ່ຮັກສາສິ່ງແວດລ້ອມສັນຕິພາບ ສະຖຽນລະພາບໄວ້ໄດ້, ເສດຖະກິດມະຫາພາກມີຄວາມໝັ້ນທ່ຽງເປັນແຕ່ລະກ້າວ, ເສດຖະກິດເຕີບໂຕໄວພໍຄວນ, ຮັບປະກັນສະຫວັດດີການສັງຄົມ, ລະດົມບັນດາແຫຼ່ງຊ່ວຍເຫຼືອພັດທະນາເປັນທາງການ (ODA) ແລະທຶນທີ່ລົງທຶນໂດຍກົງຈາກຕ່າງປະເທດ (FDI) ໄດ້ຫຼາຍພໍຄວນ, ເປີດກວ້າງຕະຫຼາດໄດ້ຫຼາຍ, ເພີ່ມລວມຍອດມູນຄ່າການຄ້າຂາອອກ... ນັ້ນແມ່ນບັນດາຜົນງານທີ່ໜ້າຊົມເຊີຍ. ມັນຢືນຢັນ ແລະ ເຮັດໃຫ້ເຫັນແຈ້ງພາບພົດຂອງປະເທດຫວຽດນາມສັນຕິພາບ ສະຖຽນລະພາບ ແລະກຳລັງພັດທະຍາ - ຄູ່ຮ່ວມມືທີ່ໄວ້ວາງໃຈໄດ້ຂອງບັນດາປະເທດ ແລະວົງຄະນາຍາດໂລກ.
- ພວກເຮົາສືບຕໍ່ຮັກສາເອກະລາດ ອຳນາດອະທິປະໄຕ ແລະຜືນແຜ່ນດິນອັນຄົບຖ້ວນ ຂອງປະເທດໄວ້ໄດ້ຢ່າງໝັ້ນຄົງ, ໄດ້ແກ້ໄຂບັນດາບັນຫາທີ່ເກີດຂຶ້ນຢູ່ເທິງທະເລ ຢ່າງເໝາະສົມທັນການ. ໄດ້ສຳເລັດວຽກງານແບ່ງເຂດຊາຍແດນ ປັກຫຼັກໝາຍໃນພື້ນທີ່ທັງໝົດ ລະຫວ່າງ ສສ ຫວຽດນາມ ກັບ ສປປ ລາວ ແລະໄດ້ປະມານ 75% ກັບກຳປູເຈຍ; ຕັ້ງໜ້າເຈລະຈາກັບຈີນ ກ່ຽວກັບການແບ່ງເຂດປາກອ່າວ ແລະ ຮ່ວມມືໃນຂົງເຂດທີ່ມີການກະທົບກະເທືອນໜ້ອຍ ແລະ ເຈລະຈາກັບອິນໂດເນເຊຍ ກ່ຽວກັບເຂດເສດຖະກິດພິເສດໃນທະເລ. ໄດ້ແກ້ໄຂຢ່າງສຳເລັດຜົນ ຫຼາຍບັນຫາທີ່ຍັງຄົງຄ້າງກັບບັນດາປະເທດເພື່ອນບ້ານ ບົນພື້ນຖານກົດໝາຍສາກົນ ແລະຕ່າງຝ່າຍຕ່າງຮັບຮູ້, ຄ່ອຍໆເຮັດໃຫ້ເສັ້ນຊາຍແດນລວມ ຂອງປະເທດເຮົາແລະປະເທດເພື່ອນບ້ານ ກາຍເປັນຊາຍແດນແຫ່ງສັນຕິພາບ ມິດຕະພາບ ແລະການຮ່ວມມື. ຄວາມແຕກຕ່າງຕ່າງໆ ໃນການພິພາດກັນຢູ່ທະເລຕາເວັນອອກຍັງເປັນອຸປະສັກຢູ່ກໍ່ຕາມ ແຕ່ກໍ່ພວມມີທ່າອຽງລົດໜ້ອຍລົງ ແລະ ກ້າວເຂົ້າສູ່ການປຶກສາເຈລະຈາ ທັງໃນຂອບເຂດສອງຝ່າຍ ແລະ ຫຼາຍຝ່າຍ.
- ຍາດແຍ່ງໄດ້ຄວາມເຫັນດີເຫັນພ້ອມ ແລະສະໜັບສະໜູນຢ່າງກວ້າງຂວາງຂອງເພື່ອນມິດສາກົນ. ການພົວພັນທະວິພາຄີ ແລະພະຫຸພາຄີ ນັບມື້ນັບໄດ້ຮັບການປັບປຸງ ຂະຫຍາຍກວ້າງ ແລະຄ່ອຍໆເຂົ້າສູ່ລວງເລິກ. ບັນດາສາຍພົວພັນແບບຄູ່ຮ່ວມຍຸດທະສາດ ຄູ່ຮ່ວມຮອບດ້ານ ລະຫວ່າງຫວຽດນາມກັບປະເທດຈຳນວນໜຶ່ງ, ເປັນຕົ້ນແມ່ນກັບບັນດາປະເທດໃຫຍ່, ໄດ້ສ້າງບາດກ້າວຫັນປ່ຽນໃໝ່ ທາງດ້ານຄຸນນະພາບ ຂອງວຽກງານການຕ່າງປະເທດ, ອຳນວຍຄວາມສະດວກ ໃຫ້ແກ່ໜ້າທີ່ເຊື່ອມໂຍງເຂົ້າກັບສາກົນ ຂອງປະເທດເຮົາໃນໄລຍະໃໝ່. ອາດຈະເວົ້າໄດ້ວ່າ, ບໍ່ມີເວລາໄດທີ່ພວກເຮົາມີເພື່ອນມິດ ແລະຄຸ່ຮ່ວມມືຫຼາຍຄືປັດຈຸບັນນີ້; ຫົວຂໍ້ສະໜັບສະໜູນຫວຽດນາມໄດ້ຮັບຄວາມເຫັນດີເຫັນພ້ອມສູງພໍຄວນ ຈາກເວທີປາໄສທີ່ສຳຄັນຫຼາຍແຫ່ງ, ນັບທັງສະພາແຫ່ງຊາດຂອງບາງປະເທດ.
- ຫວຽດນາມໄດ້ເສີມຂະຫຍາຍບົດບາດເປັນສະມາຊິກທີ່ຕັ້ງໜ້າ ຂອງບັນດາອົງການຈັດຕັ້ງພາກພື້ນ ແລະອົງການຈັດຕັ້ງໂລກ. ປະເທດເຮົາໄດ້ເຂົ້າຮ່ວມນັບມື້ນັບກວ້າງຂວາງເລິກເຊິ່ງ ເຂົ້າໃນຂະບວນວິວັດການເຊື່ອມໂຍງພາກພື້ນອາຊີຕາເວັນອອກສຽງໃຕ້ ແລະ ອາຊີ-ປາຊີຟິກ ໂດຍຜ່ານບັນດາການຈັດຕັ້ງ ແລະເວທີປາໄສ: ອາຊຽນ, (ASEAN), ເວທີປາໄສການປ້ອງກັນຄວາມສະຫງົບພາກພື້ນ (ARF), ປະຊາຄົມເສດຖະກິດອາຊີ-ປາຊີຟິກ (APEC), ເວທີປາໄສຂັ້ນສຸດຍອດອາຊີຕາເວັນອອກ (EAS); ໄດ້ເຂົ້າຮ່ວມໃນ 8 ສັນຍາການຄ້າເສລີທະວິພາຄີ ແລະພາກພື້ນ ແລະ ພວນເຈລະຈາເພື່ອເຊັນອີກ 6 ສັນຍາໃໝ່, ໃນນັ້ນມີ 2 ສັນຍາມີຂອບເຂດກວ້າງຂວາງຢ່າງບໍ່ເຄີຍມີມາກ່ອນ ນັ້ນຄື ສັນຍາຄູ່ຮ່ວມເສດຖະກິດຍຸດທະສາດຂ້າມປາຊີຟິກ (TPP) ແລະ ສັນຍາຄູ່ຮ່ວມເສດຖະກິດພາກພື້ນ (RCEP). ຫວຽດນາມໄດ້ພ້ອມກັບບັນດາປະເທດສະມາຊິກ ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາຄົມອາຊຽນ ແລະ ມີບົດບາດທີ່ຕັ້ງ ອິດທິພົນນັບມື້ນັບສູງໃນວົງຄະນາຍາດພາກພື້ນ. ເປັນຄັ້ງທີສອງ ທີ່ຫວຽດນາມໄດ້ອອກສະໝັກຮັບເລືອກຕັ້ງ ເປັນສະມາຊິກບໍ່ປະຈຳການ ຂອງຄະນະມົນຕີຄວາມໝັ້ນຄົງ ແຫ່ງສະຫະປະຊາຊາດ (ສະໄໝປີ 2020 - 2021); ຮັບຜິດຊອບຈັດຕັ້ງສະມັດຊາໃຫຍ່ ສະຫະພັນລັດຖະສະພາໂລກ (IPU) ຄັ້ງທີ 132 (ປີ 2015); ແລະກໍ່ເປັນຄັ້ງທີສອງທີີ່ຫວຽດນາມຮັບຜິດຊອບຈັດຕັ້ງກອງປະຊຸມຂັ້ນສຸດຍອດ APEC (ປີ 2017). ໃນມໍ່ໆມານີ້ ປະເທດເຮົາຖືກເລືອກຕັ້ງເຂົ້າໃນ ຄະນະຜູ້ອຳນວຍການ ອົງການພະລັງງານປະລະມານູສາກົນ (IAEA), ຄະນະກຳມະການມໍລະດົກໂລກຂອງ UNESCO ແລະ ເປັນຄັ້ງທຳອິດ ທີ່ໄດ້ຖືກເລືອກຕັ້ງເຂົ້າໃນ ຄະນະມົນຕີສິດທິມະນຸດ ແຫ່ງສະຫະປະຊາຊາດ (ສະໄໝປີ 2014 - 2016) ດ້ວຍຄະແນນສຽງສູງທີ່ສຸດ. ຜົນສຳເລັດເທິງນີ້ ສະແດງໃຫ້ເຫັນເຖິງອິດທິພົນສາກົນຂອງປະເທດເຮົາ ແລະ ຄວາມໄວ້ວາງໃຈຂອງວົງຄະນາຍາດສາກົນທີ່ມີຕໍ່ຫວຽດນາມ.
- ໄດ້ມີການຫັນປ່ຽນຢ່າງຈະແຈ້ງໃນວຽກງານຂົນຂວາຍຊາວຫວຽດນາມຢູ່ຕ່າງປະເທດຕາມຈິດໃຈມະຕິສະບັບທີ 36 ຂອງກົມການເມືອງສູນກາງພັກ. ຊາວຫວຽດນາມຢູ່ຕ່າງປະເທດນັບມື້ນັບຫັນມາສູ່ບ້ານເກີດເມືອງນອນ, ສະໜິດຕິດພັນກັບບ້ານເກີດ ແລະ ມີການປະກອບສ່ວນຕົວຈິງຫຼາຍຢ່າງ ເຂົ້າໃນພາລະກິດສ້າງສາ ແລະປົກປັກຮັກສາປະເທດຊາດ. ບັນດາອົງການຜູ້ຕາງໜ້າຫວຽດນາມຢູ່ຕ່າງປະເທດ ໄດ້ແລະພວນເຮັດເປັນຢ່າງດີໜ້າທີ່ປ້ອງກັນພົນລະເມືອງ, ກາຍເປັນບ່ອນອີງທີ່ໄວ້ເນື້ອເຊື່ອໃຈ ຂອງຊາວຫວຽດນາມທີ່ດຳລົງຊີວິດ ແລະ ເຮັດວຽກຢູ່ຕ່າງປະເທດ.
ບັນດາຜົນສຳເລັດ ແລະ ໝາກຜົນດັ່ງກ່າວເທິງນີ້ ເປັນການພິສູດຢັ້ງຢືນຢ່າງມີຊີວິດຊີວາ ຕໍ່ກັບແນວທາງການຕ່າງປະເທດທີ່ຖືກຕ້ອງ ຂອງພັກເຮົາ, ພ້ອມກັນນັ້ນ ກໍ່ສະແດງໃຫ້ເຫັນເຖິງການໝູນໃຊ້ຢ່າງປະດິດສ້າງ ແລະມີປະສິດທິຜົນ ກ່ຽວກັບບັນດາບົດຮຽນປະສົບການ ຂອງສະໄໝປ່ຽນແປງໃໝ່. ພວກເຮົາຍາມໃດກໍ່ຊາບຊືມແນວຄິດ ຕັ້ງຜົນປະໂຫຍດຂອງຊາດ ຂອງປະເທດຂຶ້ນໃນແຖວໜ້າ ດ້ວຍຈຸດໝາຍທີ່ສອດຮ້ອຍຕະຫຼອດຄື ຮັກສາເອກະລາດແຫ່ງຊາດ ອຳນາດອະທິປະໄຕ ຜືນແຜ່ນດິນອັນຄົບຖ້ວນ ໄວ້ຢ່າງໝັ້ນຄົງ, ຮັກສາລະບອບການເມືອງສັງຄົມນິຍົມໄວ້ຢ່າງໝັ້ນຄົງ, ສົມທົບຢ່າງແໜ້ນແຟ້ນກັບໜ້າທີ່ສ້າງສິ່ງແວດລ້ອມສາກົນ ທີ່ອຳນວຍຄວາມສະດວກທີ່ສຸດ ໃຫ້ແກ່ການພັດທະນາເສດຖະກິດ - ສັງຄົມ ເພື່ອກໍ່ສ້າງປະເທດຫວຽດນາມທີ່ມີ “ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸດຕິທຳ, ສີວີໄລ”. ພວກເຮົາກໍ່ໄດ້ໝູນໃຊ້ຢ່າງປະດິດສ້າງ ບັນດາບົດຮຽນກ່ຽວກັບການ ສົມທົບກຳລັງແຮງຂອງຊາດ ກັບກຳງລັງແຮງຂອງຍຸກສະໄໝ, ຮັກສາຄວາມເປັນເອກະລາດ ເປັນເຈົ້າຕົນເອງ ໄປຄຽງຄູ່ກັບການເຊື່ອມໂຍງເຂົ້າກັບສາກົນ; ຢຶດໝັ້ນທາງດ້ານຫຼັກການ ແຕ່ກໍ່ໄຫວພິບທາງດ້ານຍຸດໂທບາຍ; ຜັນຂະຫຍາຍບັນດາການເຄື່ອນໄຫວການຕ່າງປະເທດຢ່າງຄົບຊຸດ ແລະຮອບດ້ານ.
ຢູ່ນີ້, ມີຄຳຖາມໜຶ່ງຄື: ສິ່ງໃດທີ່ໄດ້ສ້າງໝາກຜົນ ຜົນສຳເລັດເຫຼົ່ານັ້ນຂຶ້ນມາ ໃນສະພາບການສາກົນ ແລະພາກພື້ນມີຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງ ? ຕາມຂ້າພະເຈົ້າ, ປັດໃຈທີ່ມີຄວາມໝາຍຕັດສິນແມ່ນ ພວກເຮົາໄດ້ປະຕິບັດຢ່າງສະເໝີຕົ້ນສະເໝີປາຍ ແນວທາງການຕ່າງປະເທດທີ່ເປັນເອກະລາດ ເປັນເຈົ້າຕົນເອງ ສັນຕິພາບ ຮ່ວມມື ແລະພັດທະນາ; ຫັນການພົວພັນເປັນຫຼາຍກ້ຳຫຼາຍຝ່າຍ ຫຼາຍຮູບຫຼາຍແບບ, ເປັນເຈົ້າການ ແລະຕັ້ງໜ້າເຊື່ອມໂຍງເຂົ້າກັບສາກົນ, ເພື່ອຜົນປະໂຫຍດຂອງຊາດ ຂອງປະເທດ. ບົນພື້ນຖານດັ່ງກ່າວນັ້ນ, ພັກເຮົາໄດ້ທຸ່ນທ່ຽງ ສະຫຼາດສ່ອງໃສຕີລາຄາສະພາບການ, ໄຈ້ແຍກສະຖານະການໂລກ ແລະພາກພື້ນຢ່າງວິທະຍາສາດ ສັດຈະວິພາກ, ຄົ້ນເຜີຍໂອກາດຕ່າງໆ ເພື່ອຂຸດຄົ້ນ, ເຫັນແຈ້ງສິ່ງທ້າທາຍຕ່າງໆ ເພື່ອແກ້ໄຂ. ພ້ອມກັນນັ້ນ, ຍາມໃດກໍ່ເອົາໃຈໃສ່ໝູນໃຊ້ຫຼາຍບົດຮຽນອັນສຳຄັນ ທີ່ຖອດຖອນມາຈາກຕະຫຼອດລວງຍາວແຫ່ງປະຫວັດສາດຂອງຊາດ, ແກ້ໄຂສາຍພົວພັນຕ່າງໆໄດ້ຢ່າງເໝາະສົມ ສັດຈະວິພາກ.
ໃນກໍລະນີ ສະພາບການສັບສົນ, ພວກເຮົາໄດ້ສົມທົບຢ່າງກົນກຽວພໍຄວນ ລະຫວ່າງຄວາມຕ້ອງການປົກປັກຮັກສາເອກະລາດ ອຳນາດອະທິປະໄຕ ຜືນແຜ່ນດິນອັນຄົບຖ້ວນ ກັບຄວາມຕ້ອງການປົກປັກຮັກສາລະບອບສັງຄົມນິຍົມ, ຮັກສາສິ່ງແວດລ້ອມສາກົນທີ່ອຳນວຍຄວາມສະດວກ ເພື່ອສ້າງສາ ແລະພັດທະນາປະເທດ. ພວກເຮົາຍາມໃດກໍ່ໄດ້ຕັ້ງໝັ້ນໃນແຜນນະໂຍບາຍ ຍູ້ແຮງການຮ່ວມມືບົນຫຼັກການເຄົາລົບຊຶ່ງກັນແລະກັນ, ຕ່າງຝ່າຍຕ່າງມີຜົນປະໂຫຍດ, ພ້ອມກັນນັ້ນກໍ່ຕໍ່ສູ້ກັບບັນດາປະກົດການລ່ວງລະເມີດຜົນປະໂຫຍດຂອງຊາດ ຂອງປະເທດ, ປະກອບສ່ວຍເຂົ້າໃນພາລະກິດສັນຕິພາບ ເອກະລາດແຫ່ງຊາດ ປະຊາທິປະໄຕ ຄວາມກ້າວໜ້າສັງຄົມໃນໂລກ.
ເພື່ອສືບຕໍ່ມູນເຊື້ອສ້າງກຳລັງແຮງສັງລວມ, ພວກເຮົາໄດ້ດຳເນີນການເຄື່ອນໄຫວການທູດການເມືອງ ສົມທົບກັບການທູດເສດຖະກິດ ການທູດວັດທະນະທຳ ການທູດປ້ອງກັນປະເທດ-ປ້ອງກັນຄວາມສະຫງົບ ຢ່າງເຂົ້າແກັບເຂົ້າເກຍກັນດີ; ສົມທົບການເຄ່ືອນໄຫວການຕ່າງປະເທດຂອງພັກ ກັບການທູດຂອງລັດ ແລະການທູດປະຊາຊົນ; ສົມທົບການເຄື່ອນໄຫວຢູ່ສູນກາງ ແລະຢູ່ທ້ອງຖິ່ນຕ່າງໆຢ່າງກົມກຽວ; ຕິດແໜ້ນການທູດທະວິພາຄີ ແລະການທູດພະຫຸພາຄີ...
ບັນດາຜົນສຳເລັດທີ່ສຳຄັນເທິງນີ້ ແມ່ນໝາກຜົນຂອງກຳລັງແຮງສັງລວມຂອງທົ່ວພັກ ທົ່ວປວງຊົນ ແລະ ທົ່ວກອງທັບ, ໃນນັ້ນມີການປະກອບສ່ວນອັນໃຫຍ່ຫຼວງຂອງບັນດາຮຸ້ນພະນັກງານ ສະມາຊິກພັກ ຂ້າລັດຖະການຂະແໜງການທູດ ຊຶ່ງໃນຖານະເປັນອົງການເສນາທິການ ແລະ ຕໍ່ສູ້ໂດຍກົງໃນແນວຮົບການຕ່າງປະເທດ. ໂດຍຕາງໜ້າພັກ ແລະລັດ, ຂ້າພະເຈົ້າຂໍຊົມເຊີຍ ອວຍພອນອັນປະເສີດ ແລະຍ້ອງຍໍຢ່າງສຸດອົກສຸດໃຈ ຕໍ່ຄວາມມານະພະຍາຍາມອັນໃຫຍ່ຫຼວງ ແລະ ການປະກອບສ່ວນອັນແທດຈິງຂອງບັນດາສະຫາຍ.
ແຕ່ວ່າ, ພວກເຮົາບໍ່ອາດອັດຕະວິໄສ ເພິ່ງພໍໃຈນຳສິ່ງທີ່ໄດ້ຮັບ, ຍ້ອນສະພາບການຍັງມີຄວາມສັບສົນຫຼາຍ, ໜ້າທີ່ສະເພາະໜ້າໜັກໜ່ວງທີ່ສຸດ, ມີຫຼາຍວຽກພວກເຮົາເຮັດຍັງບໍ່ທັນໄດ້. ຂ້າພະເຈົ້າຫວັງວ່າ ບັນດາສະຫາຍທີ່ຮ່ວມກອງປະຊຸມນີ້ ຈະພິຈາລະນາສຳຫຼວດຄືນຢ່າງເຂັ້ມງວດ ແລະຊື່ຕົງ ເບິ່ງວ່າວຽກໃດເຮັດໄດ້ດີແລ້ວ, ວຽກໃດເຮັດຍັງບໍ່ທັນດີ, ໃນນັ້ນມີ 8 ວຽກ ທີ່ຂ້າພະເຈົ້າໄດ້ເຈາະຈິ້ມໃຫ້ບັນດາສະຫາຍ ໃນກອງປະຊຸມຄັ້ງກ່ອນ ຊຶ່ງກ່ຽວພັນເຖິງວຽກງານຄົ້ນຄວ້າຄາດຄະເນຍຸດທະສາດ, ເຊື່ອມໂຍງເຂົ້າກັບສາກົນ, ເສີມຂະຫຍາຍບົດບາດເປັນສະມາຊິກທີ່ຕັ້ງໜ້າ ຂອງວົງຄະນາຍາດສາກົນ, ເພີ່ມທະວີການຮ່ວມມືທາງດ້ານການປ້ອງກັນປະເທດ - ປ້ອງກັນຄວາມສະຫງົບ, ປະກອບສ່ວນພັດທະນາເສດຖະກິດ, ປົກປັກຮັກສາອຳນາດອະທິປະໄຕ ຜືນແຜ່ນດິນອັນຄົບຖ້ວນ, ປະຕິບັດມະຕິຂອງກົມການເມືອງສູນກາງພັກ ກ່ຽວກັບວຽກງານຕໍ່ກັບຊາວຫວຽດນາມຢູ່ຕ່າງປະເທດ, ຍູ້ແຮງວຽກງານຖະແຫຼງຂ່າວໂຄສະນາການ ແລະກໍ່ສ້າງຂະແໜງການທູດ, ເປັນຕົ້ນແມ່ນບຳລຸງກໍ່ສ້າງ ຝຶກຝົນຫຼໍ່ຫຼອມຄວາມເດັດດຽວສະຫຼຽວສະຫຼາດ ແລະຄຸນສົມບັດສິນທຳຂອງພະນັກງານ.
ແຕ່ນີ້ຮອບໝົດສະໄໝກອງປະຊຸມໃຫຍ່ຄັ້ງທີ XI ແລະ ຊຸມປີຕໍ່ໄປ, ສະພາບການໂລກ ແລະພາກພື້ນຍັງຈະສືບຕໍ່ຜັນປ່ຽນຢ່າງສັບສົນ. ລັກສະນະທັງຮ່ວມມື ທັງຕໍ່ສູ້ ໃນການພົວພັນສາກົນຈະສະແດງອອກເປັນຫຼາຍຮູບຫຼາຍແບບທີ່ສຸດ. ສະພາບການພາກພື້ນ ແລະສະພາບການໂລກປ່ຽນແປງຢ່າງໄວວາ ທັງສ້າງເປັນໂອກາດດີ ທັງເປັນສິ່ງທ້າທາຍ ທີ່ຕ້ອງໄດ້ຮັບການຕີລາຄາຢ່າງລະອຽດ.
ມະຕິກອງປະຊຸມໃຫຍ່ຄັ້ງທີ XI ຂອງພັກເຮົາໄດ້ຊີ້ແຈ້ງທິດທາງ ໜ້າທີ່ການຕ່າງປະເທດ: ຮັກສາສິ່ງແວດລ້ອມສັນຕິພາບ ສະດວກດີ ເພື່ອພັດທະນາ; ປົກປັກຮັກສາເອກະລາດ ອຳນາດອະທິປະໄຕ ເອກະພາບ ແລະຜືນແຜ່ນດິນອັນຄົບຖ້ວນຂອງປະເທດຊາດ; ປົກປັກຮັກສາລະບອບສັງຄົມນິຍົມ; ຍົກສູງບົດບາດທີ່ຕັ້ງຂອງປະເທດ; ປະກອບສ່ວນຢ່າງຕັ້ງໜ້າເຂົ້າໃນການຕໍ່ສູ້ເພື່ອສັນຕິພາບ ເອກະລາດແຫ່ງຊາດ ປະຊາທິປະໄຕ ແລະຄວາມກ້າວໜ້າສັງຄົມໃນໂລກ. ບັນດາໜ້າທີ່ເຫຼົ່ານີ້ ພົວພັນແໜ້ນແຟ້ນນຳກັນ, ກະທົບຊຶ່ງກັນແລະກັນ ແລະເພີ່ມເຕີມໃຫ້ແກ່ກັນ. ຫວ່າງແລ້ວນີ້, ຄະນະບໍລິຫານງານສູນກາງພັກຊຸດທີ XI ໄດ້ປະກາດໃຊ້ມະຕິສະບັບທີ 28 ກ່ຽວກັບແຜນຍຸດທະສາດປົກປັກຮັກສາປະເທດຊາດ ໃນສະພາບການໃໝ່; ກົມການເມືອງສູນກາງພັກກໍ່ປະກາດໃຊ້ ມະຕິສະບັບທີ 22 ກ່ຽວກັບການເຊື່ອມໂຍງເຂົ້າກັບສາກົນ ເພື່ອສືບຕໍ່ຫັນເປັນລະອຽດຕໍ່ກັບມະຕິກອງປະຊຸມໃຫຍ່ຄັ້ງທີ XI ກ່ຽວກັບຂົງເຂດນີ້.
ໜ້າທີ່ແຖວໜ້າຂອງຂະແໜງການທູດແມ່ນຕ້ອງສືບຕໍ່ຊາບຊືມທັດສະນະ ແລະແນວຄິດຊີ້ນຳຂອງພັກຢ່າງເລິກເຊິ່ງ ແລະ ປະຕິບັດບັນດາທັດສະນະ ແນວຄິດຊີ້ນຳນັ້ນຢ່າງເຂັ້ມງວດ ມີປະສິດທິຜົນ, ເປັນເຈົ້າການ ແລະຕັ້ງໜ້າຂົນຂວາຍ, ກໍ່ສ້າງ ແລະຍາດແຍ່ງບັນດາໂອກາດໃໝ່ ເພື່ອສ້າງສາ ແລະປົກປັກຮັກສາປະເທດຊາດ. ລະອຽດແມ່ນຕ້ອງເຮັດບັນດາວຽກງານລຸ່ມນີ້ໃຫ້ດີ:
ທີໜຶ່ງ, ສືບຕໍ່ຖືບົດບາດນຳໜ້າໃນການຮັບປະກັນສິ່ງແວດລ້ອມສັນຕິພາບ ສະດວກດີໃຫ້ພາລະກິດສ້າງສາ ແລະປົກປັກຮັກສາປະເທດຊາດ, ປະຕິບັດການຫັນປັນອຸດສາຫະກຳ ທັນສະໄໝ ແລະບັນດາໜ້າທີ່ຍຸດທະສາດກ່ຽວກັບການພັດທະນາເສດຖະກິດ - ສັງຄົມ ຮອດປີ 2020 ປະເທດເຮົາກາຍປັນປະເທດອຸດສາຫະກຳຕາມທິດທັນສະໄໝໂດຍພື້ນຖານ. ໃນສະໄໝສົງຄາມ, ທະຫານຕ້ອງນຳໜ້າໃນການສູ້ຮົບ, ປົກປັກຮັກສາປະເທດ. ໃນຍາມສັນຕິພາບ, ພະນັກງານການທູດຕ້ອງນຳໜ້າໃນການສ້າງສັນສັນຕິພາບ, ປົກປັກຮັກສາປະເທດຊາດ ແລະດຶງດູດເອົາແຫຼ່ງພະລັງ ໃຫ້ແກ່ການພັດທະນາເສດຖະກິດສັງຄົມ. ພວກເຮົາຕ້ອງກຳແໜ້ນ ແລະໝູນໃຊ້ຢ່າງກົມກຽວ ບົດຮຽນຂອງບັນພະບຸລຸດຂອງພວກເຮົາຄື: “ສ້າງປະເທດໄປຄຽງຄູ່ກັບປົກປັກຮັກສາປະເທດ”, “ປົກປັກຮັກສາປະເທດນັບແຕ່ເມື່ອປະເທດຍັງບໍ່ທັນພົບອັນຕະລາຍ”, ມີແຜນການກີດກັ້ນ ກຳຈັດປັດເຂັ່ຍໄພສົງຄາມແຕ່ກ່ອນ ແຕ່ໄກເມື່ອມັນຍັງບໍ່ທັນລະເບີດຂຶ້ນ. ໝາຍຄວາມວ່າ ຕ້ອງເຮັດຄືແນວໃດໃຫ້ເສດຖະກິດຈະເລີນພັດທະນາ, ການປ້ອງກັນຊາດເຂັ້ມແຂງ, ຈິດໃຈຂອງປະຊາຊົນອຸ່ນອຽນ, ການເມືອງ-ສັງຄົມມີສະຖຽນລະພາບ, ປວງຊົນທັງຊາດເປັນກຸ່ມກ້ອນໜຶ່ງທີ່ສາມັກຄີເປັນເອກະພາບ.
ເພື່ອແນໃສ່ຈຸດປະສົງດັ່ງກ່າວນັ້ນ, ຕ້ອງກໍ່ສ້າງໃຫ້ໄດ້ບັນດາສາຍພົວພັນທະວິພາຄີ ແລະພະຫຸພາຄີທີ່ໝັ້ນຄົງ; ຊອກຫາຄູ່ຮ່ວມມືໄດ້ຫຼາຍ, ເປີດກວ້າງຕະຫຼາດໄດ້ຫຼາຍແຫ່ງຫຼາຍປະເພດ. ຄວາມຮຽກຮ້ອງຕ້ອງການນີ້ຍິ່ງຮີບດ່ວນ ເມື່ອການແຂ່ງຂັນກັນດ້ານເສດຖະກິດ ການແກ່ງແຍ້ງກັນດ້ານຄູ່ຮ່ວມມື ແລະຕະຫຼາດ ພວມສະແດງອອກຢ່າງດຸເດືອດ; ໄພອັນຕະລາຍແຫ່ງການຖອຍຫຼັງໄກກວ່າອີກທາງດ້ານເສດຖະກິດ ຍັງແມ່ນໄພອັນຕະລາຍທີ່ເກີດຂຶ້ນງ່າຍ ຕໍ່ກັບປະເທດທີ່ກຳລັງພັດທະນາ ຄືປະເທດຫວຽດນາມເຮົານີ້.
ທີ່ສອງ, ຢຶດໝັ້ນແນວທາງປ່ຽນແປງໃໝ່, ຫັນການພົວພັນສາກົນເປັນຫຼາຍກ້ຳຫຼາຍຝ່າຍ ຫຼາຍຮູບຫຼາຍແບບ; ນຳເອົາການພົວພັນເພື່ອນບ້ານໃກ້ຄຽງ ສະໜິດສະໜົມ ມິດຕະພາບ, ການພົວພັນຄູ່ຮ່ວມຍຸດທະສາດ ຄູ່ຮ່ວມຮອບດ້ານ ເຂົ້າສູ່ລວງເລິກເນື້ອແທ້, ສ້າງຄວາມສະໜິດຕິດແທດແບບກາຍອິນຊີ ທາງດ້ານຜົນປະໂຫຍດຄວາມສະຫງົບ ແລະ ການພັດທະນາ ລະຫວ່າງປະເທດເຮົາກັບບັນດາຄູ່ຮ່ວມມື. ປັດຈຸບັນ, ຄຽງຄູ່ກັບການຮັກສາແລະປັບປຸງ ສາຍພົວພັນມິດຕະພາບກັບບັນດາປະເທດເພື່ອນບ້ານໄກ້ຄຽງ ຢ່າງບໍ່ຢຸດຢັ້ງ, ປະເທດເຮົາໄດ້ມີການພົວພັນຄູ່ຮ່ວມຍຸດທະສາດ ແລະ ຄູ່ຮ່ວມຮອບດ້ານກັບ 20 ກວ່າປະເທດ, ໃນນັ້ນທີບັນດາປະເທດໃຫຍ່ທັງໝົດ, ບັນດາປະເທດກຳມະການປະຈຳ ຄະນະມົນຕີຄວາມໝັ້ນຄົງ ແຫ່ງສະຫະປະຊາຊາດ. ບັນດາສາຍພົວພັນເຫຼົ່ານີ້ ພວມສ້າງໃຫ້ມີບາດກ້າວຫັນປ່ຽນດ້ານຄຸນນະພາບ ໃນການເຄື່ອນໄຫວການຕ່າງປະເທດ, ຕ້ອງໄດ້ຮັບການເສີມຂະຫຍາຍຍິ່ງຂຶ້ນ ແລະ ເຮັດໃຫ້ເລິກເຊິ່ງກວ່າອີກ ເພື່ອແນໃສ່ສ້າງຄວາມສະດວກຕື່ມອີກ ໃຫ້ແກ່ການເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນຂອງປະເທດຊາດໃນໄລຍະໃໝ່. ພ້ອມກັນນັ້ນ, ພວກເຮົາກໍ່ຕັ້ງໝັ້ນໃນຫຼັກການ ບໍ່ເຂົ້າຮ່ວມໃນບັນດາສຳພັນທະພາບດ້ານການທະຫານ, ບໍ່ອະນຸຍາດໃຫ້ປະເທດອື່ນສ້າງຖານທັບທະຫານຢູ່ໃນຜືນແຜ່ນດິນຫວຽດນາມ, ບໍ່ໄປນຳປະເທດນີ້ ເພື່ອຕ້ານກັບປະເທດນັ້ນ.
ທີສາມ, ສ້າງເສັ້ນທາງປະຕິບັດ ແລະ ບາດກ້າວປະຕິບັດທີ່ສອດຄ່ອງ ເພື່ອນຳເອົາມະຕິສະບັບທີ 22 ຂອງກົມການເມືອງສູນກາງພັກ ກ່ຽວກັບການເຊື່ອມໂຍງເຂົ້າກັບສາກົນ ເຂົ້າສູ່ຊີວິດຕົວຈິງ. ຕັ້ງໜ້າ ແລະ ເປັນເຈົ້າການເຂົ້າຮ່ວມໃນບັນດາກົນໄກຮ່ວມມືຫຼາຍຝ່າຍຢູ່ພາກພື້ນ ແລະ ສາກົນ ທີ່ພວກເຮົາມີຜົນປະໂຫຍດແທດຈິງ, ແນໃສ່ປະກອບສ່ວນ ເຂົ້າໃນວິວັດການເປັນຮູບເປັນຮ່າງ ຂອງສະຖານະການຍຸດທະສາດໃໝ່ ດ້ານພູມສາດການເມືອງ, ພູມສາດເສດຖະກິດຢູ່ອາຊີ - ປາຊີຟິກ, ກຳນົດໄດ້ຖານະທີ່ຕັ້ງດີສຸດໃຫ້ປະເທດໃນສະຖານະການໃໝ່. ໃນການວາງກຳນົດ ແລະຜັນຂະຫຍາຍນະໂຍບາຍເຊື່ອມໂຍງເຂົ້າກັບສາກົນ ຕ້ອງຮັບຮູ້ໃຫ້ໄດ້ຢ່າງຄົນຖ້ວນທັງສອງດ້ານ ຄວາມສະດວກ ແລະຄວາມຫຍຸ້ງຍາກ, ໂອກາດ ແລະສິ່ງທ້າທາຍ ທີ່ຍາມໃດກໍ່ສັບແຊກກັນ; ຕ້ອງຫຼີກລ່ຽງແນວຄິດງ່າຍດາຍ, ດ້ານດຽວ, ມີແຕ່ເນັ້ນໜັກເຖິງໂອກາດ, ບໍ່ເຫັນສິ່ງທ້າທາຍ, ຫຼືກົງກັນຂ້າມ.
ໃນຂະບວນວິວັດການເຊື່ອມໂຍງເຂົ້າກັບສາກົນ, ໂອກາດຮ່ວມມືກັບບັນດາປະເທດ, ແຮງດຶງດູດຂອງຕະຫຼາດປະເທດເຮົາ ພຽງແຕ່ເພີ່ມຂຶ້ນເມື່ອຫວຽດນາມມີສັງຄົມການເມືອງສະຖຽນໝັ້ນ, ເສດຖະກິດພັດທະນາຢ່າງຂະຫຍັນຂັນເຄື່ອນ ແລະ ເປັນຄູ່ຮ່ວມທີ່ໄວ້ວາງໃຈໄດ້ໃນບັນດາສາຍພົວພັນຮ່ວມມື ແລະ ຕິດຕໍ່ແລກປ່ຽນສາກົນ. ໝາຍຄວາມວ່າ ກຳລັງແຮງຂອງຕົນເອງເປັນສິ່ງຕັດສິນ, ກຳລັງພາຍໃນຍັງຄົງເປັນປັດໃຈສຳຄັນກວ່າໝູ່. ໝາກຜົນຂອງການເຊື່ອມໂຍງເຂົ້າກັບສາກົນ ກໍ່ຂຶ້ນກັບການແກ້ໄຂເປັນຢ່າງດີ ບັນດາສາຍພົວພັນໃຫຍ່, ໃນນັ້ນມີສາຍພົວພັນລະຫວ່າງການຮັກສາເອກະລາດແຫ່ງຊາດ ເປັນເຈົ້າຕົນເອງ ແລະ ເຊື່ອມໂຍງເຂົ້າກັບສາກົນ, ສົມທົບກຳລັງແຮງແຫ່ງຊາດ ກັບກຳລັງແຮງຂອງຍຸກສະໄໝ...
ທີສີ່, ຕັ້ງໝັ້ນແກ້ໄຂຢ່າງຖືກຕ້ອງບັນຫາຊາຍແດນ ດິນແດນ, ກ່ອມອື່ນໝົດແມ່ນການພິພາດຢູ່ທະເລຕາເວັນອອກ. ນີ້ແມ່ນໜຶ່ງໃນບັນດາບັນຫາແກ່ນສານທີ່ສຸດ ທີ່ຮັບປະກັນໃຫ້ມີສິ່ງແວດລ້ອມສັນຕິພາບ ສະຖຽນລະພາບຂອງປະເທດຊາດ, ໃນສະເພາະໜ້າກໍ່ຄືຍາວນານ. ຊາຍແດນ ດິນແດນ ແມ່ນບັນຫາທີ່ມີຄວາມໝາຍສຳຄັນທີ່ສຸດສຳລັບທຸກໆປະເທດ. ຊາດເຮົາໄດ້ສູ້ຮົບ, ຍອມເສຍສະຫຼະ ເສຍຫາຍຫຼາຍຢ່າງເພື່ອຮັກສາເອກະລາດ ອຳນາດອະທິປະໄຕ ແລະຜືນແຜ່ນດີນອັນຄົບຖ້ວນໄວ້ຢ່າງໝັ້ນຄົງ, ດັ່ງນັ້ນ ບັນຫາເອກະລາດ ອຳນາດອະທິປະໄຕ ຊາຍແດນ ແລະດິນແດນ ຍິ່ງເປັນສິ່ງສັກກາລະບູຊາ. ໃນເວລາທີ່ຜ່ານມາ, ດ້ວຍຄວາມພະຍາຍາມອັນໃຫຍ່ຫຼວງ ໝັ້ນໜຽວຂອງປະເທດເຮົາ ແລະບັນດາປະເທດ, ພວກເຮົາໄດ້ແກ້ໄຂຫຼາຍບັນຫາທີ່ພົວພັນເຖິງຊາຍແດນ ດິນແດນ. ແຕ່ບັນດາບັນຫາທີ່ຍັງຄົງຄ້າງພັດແມ່ນບັນດາບັນຫາສັບສົນທີ່ສຸດ ທາງດ້ານນິຕິທຳ ກໍ່ຄືທາງດ້ານປະຫວັດສາດ ແລະ ພຶດຕິກຳ. ພວກເຮົາຕັ້ງໝັ້ນແກ້ໄຂບັນດາບັນຫານີ້ດ້ວຍສັນຕິວິທີ ບົນພື້ນຖານກົດໝາຍສາກົນ ແລະຈິດໃຈມິດຕະພາບ ແລະຮ່ວມມື. ກ່ຽວກັບບັນຫາທະເລຕາເວັນອອກ, ໃນເວລາທີ່ຍັງບໍ່ທັນບັນລຸໄດ້ວິທີແກ້ໄຂອັນພື້ນຖານ ແລະຍາວນານ, ພວກເຮົາຍາມໃດກໍ່ສະເໝີຕົ້ນສະເໝີປາຍ, ພ້ອມກັນກັບບັນດາປະເທດປະຕິບັດຕາມກົດໝາຍສາກົນຢ່າງເຖິງຖອງ, ເປັນຕົ້ນແມ່ນອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982, ເຄົາລົບນັບຖື ຖະແຫຼງການລະຫວ່າງອາຊຽນ ແລະ ຈີນ ກ່ຽວກັບວິທີການປະພຶດຂອງບັນດາຝ່າຍ ຢູ່ທະເລຕາເວັນອອກ (DOC), ມານະພະຍາຍາມພ້ອມກັບບັນດາປະເທດອາຊຽນ ແລະ ຈີນ ກໍ່ສ້າງປະມວນຂໍ້ກຳນົດກ່ຽວກັບການປະພຶດ ຂອງບັນດາຝ່າຍຢູ່ທະເລຕາເວັນອອກ (COC) ໃຫ້ມີຜົນສັກສິດຢ່າງແທ້ຈິງ ໃນການຄຸ້ມຄອງການພິພາດ ແລະ ກີດກັ້ນການປະທະກັນຢູ່ທະເລຕາເວັນອອກ.
ທີຫ້າ, ສືບຕໍ່ຍູ້ແຮງການທູດວັດທະນະທຳ ສື່ຂ່າວການຕ່າງປະເທດ, ເພີ່ມທະວີການເຜີຍແຜ່ ແລະ ເຊີດຊູບັນດາຄຸນຄ່າວັດທະນະທຳຂອງຊາດ, ປະກອບສ່ວນຍົກສູງບົດບາດ ອິດທິພົນ ແລະພາບພົດຂອງຫວຽດນາມໃນເວທີໂລກ. ສືບຕໍ່ປະຕິບັດຢ່າງສຳເລັດມີໄຊ ມະຕິສະບັບທີ 36 ຂອງກົມການເມືອງສູນກາງພັກ ກ່ຽວກັບວຽກງານຂົນຂວາຍຊາວຫວຽດນາມຢູ່ຕ່າງປະເທດ... ສ້າງ ແລະ ໂຄສະນາເຜີຍແຜ່ ຮູບພາບຂອງປະເທດແລະຄົນຫວຽດນາມ, ນະໂຍບາຍການຕ່າງປະເທດສັນຕິພາບ ມິດຕະພາບ ແລະຮ່ວມມືສະໜິດສະໜົມຂອງຫວຽດນາມ; ຍາດແຍ່ງເອົາສັນທາຄະຕິ ແລະ ຄວາມສະໜັບສະໜູນຂອງວົງຄະນາຍາດສາກົນ ຕໍ່ກັບປະເທດຫວຽດນາມສັນຕິພາບ ສະຖຽນລະພາບ ແລະຈະເລີນພັດທະນາ, ສ້າງເງື່ອນໄຂອຳນວຍຄວາມສະດວກໃຫ້ແກ່ການຜັນຂະຫຍາຍ ບັນດາການເຄື່ອນໄຫວວຽກງານການຕ່າງປະເທດ. ຄວາມຊື່ສັດສຸດຈະລິດ ຄວາມຜູກພັນຮັກໄຄ່ ສະເໝີຕົ້ນສະເໝີປາຍ ເຄົາລົບສິນທຳ ແມ່ນຄຸນລັກສະນະຂອງການທູດຫວຽດນາມ. ຫວຽດນາມຢາກເປັນເພື່ອນມິດ, ປັນຄູ່ຮ່ວມມືທີ່ໄວ້ວາງໃຈ ຂອງບັນດາປະເທດໃນວົງຄະນະຍາດໂລກ ເພື່ອສັນຕິພາບ ການຮ່ວມມື ແລະພັດທະນາ; ແລະກໍ່ຫວັງວ່າ ທຸກໆປະເທດລ້ວນແຕ່ເປັນເພື່ອນ ເປັນຄູ່ຮ່ວມມືທີ່ມີຈິດໃຈກໍ່ສ້າງຂອງຫວຽດນາມ.
ທີຫົກ, ສືບຕໍ່ຍູ້ແຮງວຽກງານຄົ້ນຄວ້າພື້ນຖານ ແລະ ຄາດຄະເນຍຸດທະສາດ. ສະພາບການພາກພື້ນ ແລະໂລກມີການຫັນປ່ຽນຢ່າງໄວວາ; ສະພາບການພາຍໃນ ແລະ ນະໂຍບາຍການຕ່າງປະເທດຂອງບັນດາຄູ່ຮ່ວມໃຫຍ່, ບັນດາຄູ່ຮ່ວມຫຼັກແຫຼ່ງຂອງພວກເຮົາ ກໍ່ຜັນປ່ຽນຢ່າງບໍ່ຢຸດຢັ້ງ. ດັ່ງນັ້ນ, ຕ້ອງເອົາໃຈໃສ່ເປັນພິເສດເຖິງວຽກງານຄົ້ນຄວ້າ ແລະ ຄາດຄະເນຍຸດທະສາດ ເພື່ອກຳທ່າອຽງແຫ່ງການພັດທະນາຂອງສະພາບການໃຫ້ໄດ້ຢ່າງທັນການ, ປະກອບສ່ວນສ້າງທ່າເປັນເຈົ້າການໃຫ້ປະເທດ, ບໍ່ໃຫ້ຕົກໃສ່ທ່າຮັບ ສະພາບກະທັນຫັນບໍ່ທັນຮູ້ຕົວ. ທ່ານປະທານໂຮ່ຈີມິນ ໄດ້ສະຫລຸບແລ້ວວ່າ: “ຖ້າເດີນຫຼົງທາງ ໝາກກື (ເຮືອ) ສອງຕົວກໍ່ຕ້ອງປະໃຫ້ເສຍລ້າ, ຫາກພົບກາລະໂອກາດດີ ໝາກຈຸກ (ເບ້ຍ) ຕົວໜຶ່ງກໍ່ຊະນະ” 1. ຄາດຄະເນກາລະໂອກາດໄດ້ ເພື່ອພ້ອມແລ້ວທີ່ຈະກຳເອົາ, ກຳທ່າອຽງໄດ້ເພື່ອວາງແຜນນະໂຍບາຍ ແລະນະໂຍບາຍອັນສອດຄ່ອງ ແມ່ນມູນຫຼັກແຜ່ຫຼາຍທົ່ວໄປ, ແຕ່ການປະຕິບັດໃນພາກຕົວຈິງ ຍາມໃດກໍ່ຕັ້ງບັນດາບົດເລກທີ່ຍາກອອກມາ, ຈະສາມາດແກ້ໄຂໄດ້ ກໍ່ຕໍ່ເມື່ອພວກເຮົາມີການໄຈ້ແຍກ ຄາດຄະເນຍຸດທະສາດໄດ້ຢ່າງຊັດເຈນ.
ທີເຈັດ, ຢຶດໝັ້ນຫຼັກການ ພັກນຳພາການເຄື່ອນໄຫວການຕ່າງປະເທດຢ່າງເດັດຂາດ ແລະຄຸ້ມຄອງການເຄື່ອນໄຫວດັ່ງກ່າວ ຢ່າງເປັນເອກະພາບ. ຄຸ້ມຄອງການຕ່າງປະເທດຢ່າງເປັນເອກະພາບ ທັງດ້ານການເມືອງ ເສດຖະກິດ ວັດທະນະທຳ ການປ້ອງກັນປະເທດ ປ້ອງກັນຄວາມສະຫງົບ... ແມ່ນຄວາມຮຽກຮ້ອງຕ້ອງການ ທັງຍາວນາມ ພື້ນຖານ, ທັງມີລັກສະນະຮີບດ່ວນ. ຕາມຈິດໃຈດັ່ງກ່າວ, ການຕັດສິນຕົກລົງ ແລະ ການເຄື່ອນໄຫວການຕ່າງປະເທດທຸກຢ່າງ, ເປັນຕົ້ນແມ່ນ ບັນດາບັນຫາທີ່ມີຄວາມກ່ຽວພັນເຖິງ ຄວາມສະຖຽນໝັ້ນ ແລະ ການພັດທະນາຂອງປະເທດຊາດ, ເຖິງເອກະລາດ ອຳນາອະທິປະໄຕ ຜືນແຜ່ນດິນອັນຄົບຖ້ວນ ຄວາມສະຫງົບປອດໄພ ແລະກຽດສັກສີຂອງຊາດ, ລ້ວນແຕ່ຕ້ອງລວນສູນໃສ່ຂອດໜຶ່ງ ພາຍໃຕ້ການຊີ້ນຳຂອງກົມການເມືອງ ແລະຄະນະເລຂາທິການສູນກາງພັກ. ການເຄື່ອນໄຫວການຕ່າງປະເທດທຸກຢ່າງ ລ້ວນແຕ່ຕ້ອງໄດ້ຮັບການພິຈາລະນາຕາມທັດສະນະກວມລວມ, ເອົາຜົນປະໂຫຍດອັນພື້ນຖານ ແລະຍາວນານຂອງປະເທດຊາດເປັນຮາກຖານ; ຫຼີກລ່ຽງການເຫັນແກ່ຜົນປະໂຫຍດພາກສ່ວນຂອງທ້ອງຖິ່ນ ຂອງຂະແໜງການ ແລ້ວກໍ່ຄວາມເສຍຫາຍໃຫ້ແກ່ຜົນປະໂຫຍດລວມ. ຄວນຕ້ອງຄິດໄລ່ເຖິງ ການກະທົບຊຶ່ງກັນແລະກັນ ລະຫວ່າງການເມືອງ ເສດຖະກິດ ການປ້ອງກັນປະເທດ ການປ້ອງກັນຄວາມສະຫງົບ ວັດທະນະທຳ ວິທະຍາສາດ ເຕັກນິກ; ລະຫວ່າງຜົນປະໂຫຍດແຫ່ງຊາດ ແລະ ຄວາມສາມັກຄີສາກົນ; ລະຫວ່າງການຕ່າງປະເທດຂອງພັກ ຂອງລັດ ແລະການທູດປະຊາຊົນ; ລະຫວ່າງສູນກາງ ແລະທ້ອງຖິ່ນ, ເຮັດຄືແນວໃດໃຫ້ມັນປະສົມກົມກຽວກັນ ຊ່ວຍໜູນຊຶ່ງກັນແລະກັນ. ການເຄື່ອນໄຫວການຕ່າງປະເທດທຸກຢ່າງລ້ວນແຕ່ຕ້ອງປະຕິບັດຕາມໂຄງການ ແຜນການ ທີ່ໄດ້ຮັບການກວດຜ່ານຈາກຂັ້ນນຳພາທີ່ມີສິດຕັດສິນ, ໃນກົນໄກ ແລະລະບຽບລຳດັບດຳເນີນງານທີ່ລະອຽດແໜ້ນແຟ້ນ, ຫຼີກລ່ຽງການຊ້ຳຊ້ອນກັນ ເພື່ອຮັບປະກັນຄວາມປັນເອກະພາບໃນຄວາມຮັບຮູ້ ແລະການກະທຳ ລະຫວ່າງບັນດາອົງການພາລະບົດບາດ.
ວຽກງານຄຸ້ມຄອງການຕ່າງປະເທດຕ້ອງໄດ້ດຳເນີນບົນພື້ນຖານກຳນົດແຈ້ງພາລະບົດບາດ ໜ້າທີ່ກ່ຽວກັບການຕ່າງປະເທດ ລະຫວ່າງບັນດາອົງການພັກ ລັດ ລັດຖະບານ; ລະຫວ່າງສູນກາງ ແລະທ້ອງຖິ່ນ. ພ້ອມກັນນັ້ນ ຕ້ອງມີຄວາມເປັນເອກະພາບສູງ ກ່ຽວກັບຍຸດທະສາດ ບາດກ້າວປະຕິບັດງານ, ຮັບປະກັນການປະສານສົມທົບຢ່າງເຂົ້າແກັບເຂົ້າເກຍ, ຫຼີກລ່ຽງການຟຸມເຟືອຍແຫຼ່ງພະລັງ ແລະລະດົມໄດ້ກຳລັງແຮງສັງລວມຂອງທົ່ວປະເທດ. ການຈັດຕັ້ງການຄື່ອນໄຫວການຕ່າງປະເທດ ຕ້ອງສືບຕໍ່ໄດ້ຮັບການປ່ຽນແປງໃໝ່ຕາມທິດມີແບບແຜນ ແລະຢ່າງພື້ນຖານກວ່າເກົ່າ; ມີແຜນຍຸດທະສາດ ໂຄງການ ແຜນການຢ່າງແໜ້ນແຟ້ນ ຈະແຈ້ງກວ່າເກົ່າ; ລະອຽດ ແທດຈິງ ແລະມີປະສິດທິຜົນສູງກວ່າເກົ່າ.
ທີແປດ, ປັບປຸງບູລະນະກົງຈັກການຈັດຕັ້ງ ແລະກໍ່ສ້າງຖັນແຖວພະນັກງານການຕ່າງປະເທດ ທີ່ຕອບສະໜອງໄດ້ກັບຄວາມຕ້ອງການ ທີ່ນັບມື້ນັບສູງຂອງການປະຕິວັດປະເທດເຮົາ. ທ່ານປະທານໂຮ່ຈີມິນໄດ້ຕັກເຕືອນຫຼາຍເທື່ອແລ້ວວ່າ: “ພະນັກງານແມ່ນກົດຮາກຂອງທຸກວຽກງານ”; “ທຸກວຽກງານທີ່ສຳເລັດຜົນ ຫຼືປະລາໄຊລ້ວນແຕ່ຍ້ອນພະນັກງານດີ ຫຼືບໍ່ດີ”. ຢູ່ທີ່ກອງປະຊຸມການທູດກ່ອນໜ້ານີ້ 50 ປີ, ທ່ານປະທານໂຮ່ຈີມິນໄດ້ບອກສອນພະນັກງານການທູດວ່າ: “ທີໜຶ່ງແມ່ນຕ້ອງມີທັດສະນະ ແລະຫຼັກໝັ້ນຂອງພັກເປັນເຂັມທິດຊີ້ທາງ. ທີສອງແມ່ນຕ້ອງມີຄຸນສົມບັດສິນທຳດີ, ບໍ່ໃຫ້ເອກະຊົນຂຶ້ນເທິງຜົນປະໂຫຍດລວມ. ທີສາມແມ່ນ ກ່ຽວກັບວິທີປະຕິບັດງານຕ້ອງລອບຄອບ ລະມັດລະວັງ ແລະ ຮັກສາຄວາມລັບຂອງລັດ. ທີສີ່ແມ່ນຕ້ອງມີຈິດໃຈຮ່ຳຮຽນຫາຄວາມຮູ້ ແລະ ມານະພະຍາຍາມໂດຍອາໃສກຳລັງຄວາມສາມາດຂອງຕົນເອງ, ປະຢັດ. ທີຫ້າແມ່ນຕ້ອງຮຽນພາສາຕ່າງປະເທດ”. ຄຳສັ່ງສອນເຫຼົ່ານັ້ນຂອງທ່ານປະທານໂຮ່ຈີມິນ, ຜູ້ກໍ່ຕັ້ງຂະແໜງການທູດຫວຽດນາມ, ແມ່ນການກຳນົດທິດທີ່ສອດຮ້ອຍຕະຫຼອດ ເພື່ອໃຫ້ພະນັກງານການທູດພວກເຮົາສູ້ຊົນ ຝຶກຝົນຫຼໍ່ຫຼອມ ສຳເລັດຢ່າງດີເດັ່ນໜ້າທີ່ທີ່ພັກແລະລັດມອບໝາຍໃຫ້. ຖັນແຖວພະນັກງານເຮັດວຽກງານການຕ່າງປະເທດ, ກ່ອນອື່ນໝົດແມ່ນພະນັກງານການທູດ ແມ່ນຖັນແຖວພິເສດ: ໄດ້ຮັບຄວາມເຊື່ອຖືເປັນພິເສດທາງດ້ານຄຸນທາດ, ສຳພັດໄວເປັນພິເສດຕໍ່ສະຖານະການ, ສະຫຼາດຄ່ອງແຄວ່ ໄຫວພິບເປັນພິເສດໃນການເຈລະຈາ ແລະສຸພາບຫຼັກແຫຼມໃນການປະພຶດ. ຖັນແຖວພະນັກງານເຮັດວຽກງານການຕ່າງປະເທດ ຕ້ອງຝຶກຝົນແບບແຜນ: ນຶກຄິດລະອຽດຖີ່ຖ້ວນ, ກະທຳຢ່າງເດັດດ່ຽວໄຫວພິບຕາມເຫດການເກີດຂຶ້ນ, ຄວາມຊຳນິຊຳນານໃນວິຊາຊີບ; ທາງດ້ານຄວາມສາມາດຕ້ອງມີລະດັບວິຊາສະເພາະ ວິຊາຊີບ ແລະພາສາຕ່າງປະເທດ. ພິເສດ, ພະນັກງານການທູດຕ້ອງບໍ່ລົດລະໃນການຝຶກຝົນຫຼໍ່ຫຼອມຄຸນສົມບັດການເມືອງ ແລະ ແນວຄິດໃຫ້ກ້າແກ່ນ, ເດັດດ່ຽວຕໍ່ສູ້ກັບບັນດາປະກົດການ “ປ່ຽນແປງດ້ວຍຕົນເອງ”, “ຜັນປ່ຽນດ້ວຍຕົນເອງ”, ຮູ້ປ້ອງກັນຕົວເອງ ແລະປ້ອງກັນອົງການຈັດຕັ້ງພັກ. ພະນັກງານການທູດແຕ່ລະຄົນຕ້ອງຮູ້ໂຄສະນາເຊີດຊູກຽດສັກສີຂອງຄົນ ແລະປະເທດຫວຽດນາມ.
ອາດຈະເວົ້າໄດ້ວ່າ, ປັດຈຸບັນພວກເຮົາໄດ້ມີຖັນແຖວພະນັກງານການທູດຮຸ້ນໃໝ່ ທີ່ສະຫຼຽວສະຫຼາດ ມີຄວາມຮູ້ ແລະມັກຮ່ຳຮຽນ, ມີແບບແຜນເຮັດວຽກທີ່ຊຳນານໃນວິຊາຊີບພໍຄວນ. ແຕ່ອາດຈະແມ່ນ ຢູ່ໃນແລະນອກປະເທດ, ຢູ່ບ່ອນນີ້ຫຼືບ່ອນນັ້ນ ຍັງມີສະພາບເຮັກວຽກແບບບໍ່ເອົາຈິງເອົາຈັງ, ຂີ້ຄ້ານອ່ານໜັງສື, ຂີ້ຄ້ານລົງເລິກຄົ້ນຄວ້າ, ພະນັກງານຈຳນວນໜຶ່ງບໍ່ມີລະດັບເທົ່າທຽມກັບລະດັບລວມຂອງພາກພື້ນ ທາງດ້ານພາສາຕ່າງປະເທດ ວິຊາຊີບ. ຍັງມີປະກົດການອັດຕະວິໄສ, ເສຍສະຕິລະວັງຕົວ, ລະເຫຼີງເຫີນຫ່າງອຸດົມຄະຕິ. ຂ້າພະເຈົ້າສະເໜີໃຫ້ຄະນະກຳກັບວຽກງານພັກກະຊວງການຕ່າງປະເທດ, ບັນດາຄະນະພັກໃນຂະແໜງການຕ່າງປະເທດ ຕ້ອງເອົາໃຈໃສ່ທີ່ສຸດເຖິງວຽກງານກໍ່ສ້າງຖັນແຖວ, ສົມທົບກັບການຊີ້ນຳປະຕິບັດວຽກງານກໍ່ສ້າງ ປັບປຸງພັກໃຫ້ໄດ້ດີ ຕາມຈິດໃຈມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ແລະຄຳສັ່ງສະບັບທີ 03 ຂອງກົມການເມືອງສູນກາງພັກກ່ຽວກັບການສືບຕໍ່ຍູ້ແຮງການຮ່ຳຮຽນ ແລະ ປະຕິບັດຕາມແວ່ນແຍງຄຸນສົມບັດຂອງປະທານໂຮ່ຈີມິນ.
ໃນປະຫວັດສາດຫຼາຍພັນປີແຫ່ງການສ້າງສາ ແລະປົກປັກຮັກສາປະເທດຂອງຊາດເຮົາ, ເປັນຕົ້ນແມ່ນໃນເວລາເຄິ່ງກວ່າສະຕະວັດທີ່ຜ່ານມາ, ພື້ນຖານການທູດຫວຽດນາມໄດ້ເປັນຮູບເປັນຮ່າງຂຶ້ນ ດ້ວຍມູນເຊື້ອ ແລະລັກສະນະສີສັນສະເພາະ ໂດຍຕິດແໜ້ນກັບແນວຄິດການທູດໂຮ່ຈີມິນ. ອາດຈະເວົ້າວ່າ, ການທູດທັນສະໄໝຂອງຫວຽດນາມສັງຄົມນິຍົມ ໄດ້ສືບທອດ ແລະ ໝູນໃຊ້ຢ່າງປະດິດສ້າງ ບັນດາສິ່ງທີ່ດີງາມໃນການທູດຂອງປູ່ຍ່າຕາຍາຍ, ສົມທົບລະຫວ່າງມູນເຊື້ອຂອງໂລກຕາເວັນອອກ ກັບບົດຮຽນທີ່ໄດ້ກັ່ນຕອງໃນການທູດ ຂອງໂລກຕາເວັນຕົກ, ສ້າງເປັນລັກສະນະສີສັນສະເພາະຂອງຕົນ.
ຂ້າພະເຈົ້າເຊື່ອໝັ້ນວ່າ, ບັນດາຜົນງານໃນການເຄື່ອນໄຫວການຕ່າງປະເທດທີ່ໜ້າຊົມເຊີຍສົ່ງເສີມ ຂອງຂະແໜງການທູດເວົ້າສະເພາະ ແລະຂອງບັນດາເຫຼົ່າທັບການຕ່າງປະເທດທີ່ປະກອບເຂົ້າເວົ້າລວມ ຈະເປັນກຳລັງໝູນອັນໃຫຍ່ຫຼວງ, ຊຸກຍູ້ຢ່າງແຂງແຮງຕໍ່ຂະບວນວິວັດການປ່ຽນແປງໃໝ່ ແລະເຊື່ອມໂຍງເຂົ້າກັບສາກົນ, ນຳເອົາມະຕິສະບັບທີ 28 ຂອງສູນກາງ ແລະມະຕິສະບັບທີ 22 ຂອງກົມການເມືອງສູນກາງພັກເຂົ້າສູ່ຊີວິດຕົວຈິງ. ບັນຫາຕ່າງໆທີກອງປະຊຸມຄັ້ງນີ້ປຶກສາສົນທະນາ ຊາບຊືມ, ພິເສດແມ່ນຂໍ້ສະເໜີຕ່າງໆ ກ່ຽວກັບນະໂຍບາຍ, ຕ້ອງແທດເໝາະຕົວຈິງ, ປະກອບສ່ວນແກ້ໄຂບັນດາບັນຫາທີ່ພວມວາງອອກມາຕໍ່ປະເທດ, ນຳເອົາພາລະກິດການປ່ຽນແປງໃໝ່ຂອງພວກເຮົາໄປເຖິງຍອດສູງແຫ່ງໄຊຊະນະໃໝ່ ຄືດັ່ງມານະຈິດຂອງທົ່ວພັກ ແລະຄວາມມຸ່ງມາດປາຖະໜາຂອງປວງຊົນທັງຊາດ.
ເນື່ອງໃນໂອກາດປີໃໝ່ 2014 ແລະລະດູບານໃໝ່ປີມະເມຍ ທີ່ຈະມາເຖິງ, ຕາງໜ້າການນຳພັກ ແລະລັດ, ຂ້າພະເຈົ້າຂໍຝາກຄວາມຮັກແພງ ແລະຄຳອວຍພອນອັນປະເສີດມາຍັງດາສະຫາຍ ຂໍໃຫ້ບັນດາສະຫາຍຈົ່ງມີສຸຂະພາບເຂັ້ມແຂງ ຜາສຸກ ແລະ ສຳເລັດຜົນ. ອວຍພອນໃຫ້ກອງປະຊຸມຂອງພວກເຮົາບັນລຸຜົນສຳເລັດອັນດີງາມ./.
ຂຽນໂດຍ: ຫງວຽນຝູຈ້ອງ
ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ
* ບົດນີ້ໄດ້ລົງພິມໃນວາລະສານກອມມູນິດ, ສະບັບທີ 855 (ເດືອນມັງກອນ ປີ 2014)
1 ຕາມກົນລະຍຸດ ໝາກລຸກ ຈີນ