ຄຳປາໄສຂອງສະຫາຍເລຂາທິການໃຫຍ່ ຫງວຽນຝູຈ້ອງ ສະຫລຸບກອງປະຊຸມ ທົ່ວປະເທດ ກ່ຽວກັບວຽກງານປ້ອງກັນ ຕ້ານການສໍ້ລາດບັງຫຼວງ
“ຮຽນທ່ານຜູ້ແທນທັງຫຼາຍ,
ຮຽນບັນດາສະຫາຍ,
ພາຍຫຼັງການເຮັດວຽກຢ່າງຮີບດ່ວນ ເຂັ້ມງວດ ແລະເຕັມໄປດ້ວຍຄວາມຮັບຜິດຊອບໃນມື້ໜຶ່ງ, ກອງປະຊຸມທົ່ວປະເທດ ກ່ຽວກັບວຽກງານປ້ອງກັນ ຕ້ານການສໍ້ລາດບັງຫຼວງ ໄດ້ສຳເລັດເນື້ອໃນ ແລະລະບຽບວາລະການປະຊຸມທີ່ໄດ້ວາງອອກ. ກອງປະຊຸມໄດ້ຮັບຟັງລາຍງານສະພາບການ ຜົນສຳເລັດຂອງວຽກງານປ້ອງກັນ ຕ້ານການສໍ້ລາດບັງຫຼວງ ແຕ່ຕົ້ນປີ 2013 ມາເຖິງດຽວນີ້; ທິດທາງ ໜ້າທີ່ວຽກງານໃນເວລາທີ່ຈະມາເຖິງ. ຄວາມເຫັນທີ່ປະກອບໃນກອງປະຊຸມຂອງບັນດາຜູ້ແທນ ເບິ່ງລວມລ້ວນແຕ່ສະແດງຄວາມເຫັນດີເປັນເອກະພາບສູງ ກັບເນື້ອໃນຂອງບົດລາຍງານ, ພ້ອມກັນນັ້ນກໍ່ເພີ່ມເຕີມ, ທຳຄວາມກະຈ່າງແຈ້ງຕື່ມອີກກ່ຽວກັບຫຼາຍບັນຫາໃນຂົງເຂດຕ່າງໆ; ຍົກໃຫ້ເຫັນແຈ້ງຕື່ມອີກເຖິງບາງບົດຮຽນປະສົບການດີ, ວິທີເຮັດທີ່ດີໃນການນຳພາ ຊີ້ນຳໃນເວລາທີ່ຜ່ານມາ ແລະ ສະເໜີຂໍ້ສະເໜີແນະໃໝ່, ເນັ້ນໜັກຕື່ມອີກບາງວິທີແກ້ ເພື່ອແນໃສ່ຍູ້ແຮງກວ່າອີກການຕໍ່ສູ້ປ້ອງກັນ ຕ້ານການສໍ້ລາດບັງຫຼວງ ໃນເວລາທີ່ຈະມາເຖິງ.
ເພື່ອສຳເລັດສິ້ນສຸດກອງປະຊຸມ, ຂ້າພະເຈົ້າມີຄວາມເຫັນບາງຢ່າງດັ່ງນີ້:
1- ກ່ຽວກັບການຕີລາຄາສະພາບການ, ຜົນສຳເລັດຂອງວຽກງານປ້ອງກັນ ຕ້ານການສໍ້ລາດບັງຫຼວງ
ຄວາມເຫັນລວມຂອງກອງປະຊຸມລ້ວນແຕ່ໃຫ້ທັດສະນະວ່າ, ເສີມຂະຫຍາຍບົດຮຽນຂອງຫຼາຍປີກ່ອນ, ແຕ່ປີ 2013 ມາຮອດດຽວນີ້, ພາຍໃຕ້ການນຳພາຂອງພັກ, ການຄຸ້ມຄອງບໍລິການຂອງລັດຖະບານ, ການຕິດຕາມກວດກາຂອງສະພາແຫ່ງຊາດ ຂອງແນວໂຮມປະເທດຊາດ ແລະບັນດາອົງຄະນະມະຫາຊົນ, ການເຂົ້າຮ່ວມປະຕິບັດຂອງຄະນະພັກ ການຈັດຕັ້ງພັກ ອຳນາດການປົກຄອງຂັ້ນຕ່າງໆ, ການສະໜັບສະໜູນຂອງປະຊາຊົນ, ວຽກງານປ້ອງກັນ ຕ້ານການສໍ້ລາດບັງຫຼວງ ໄດ້ຜັນຂະຫຍາຍຢ່າງຄົບຊຸດພໍຄວນ ແລະໄດ້ມີການຫັນປ່ຽນຢ່າງຕັ້ງໜ້າ ຈະແຈ້ງ. ລະບຽບກົດໝາຍກ່ຽວກັບການຄຸ້ມຄອງເສດຖະກິດ - ສັງຄົມ, ການຈັດຕັ້ງ ແລະ ກົນໄກນຳພາວຽກງານປ້ອງກັນ ຕ້ານການສໍ້ລາດບັງຫຼວງສືບຕໍ່ໄດ້ຮັບການປັບປຸງບູລະນະ. ວຽກງານກວດກາ ກວດການ ກວດສອບບັນຊີ ສືບສວນ ຟ້ອງສານ ພິພາກສາບັນດາກໍລະນີ ຄະດີສໍ້ລາດບັງຫຼວງ ໄດ້ຮັບການເພີ່ມທະວີ. ວຽກງານການປ້ອງກັນ ຄົ້ນເຜີຍ ແລະ ກຳຈັດແກ້ໄຂການກະທຳສໍ້ລາດບັງຫຼວງ ໄດ້ມີການຫັນປ່ຽນຢ່າງຕັ້ງໜ້າ; ຈຳນວນກໍລະນີ ຄະດີສບ້ລາດບັງຫຼວງ ຖືກຄົ້ນເຜີຍ ກຳຈັດແກ້ໄຂເພີ່ມຂຶ້ນຫຼາຍກວ່າກ່ອນໜ້ານີ້. ການເສີມຂະຫຍາຍບົດບາດຂອງບັນດາອົງການໂດຍປະຊາຊົນເລືອກຕັ້ງ, ອົງການສື່ມວນຊົນ ແລະປະຊາຊົນໃນວຽກງານປ້ອງກັນ ຕ້ານການສໍ້ລາດບັງຫຼວງ ໄດ້ຮັບການເອົາໃຈໃສ່ກວ່າແຕ່ກ່ອນ.
ໂດຍປະຕິບັດຂໍ້ສະຫລຸບຂອງກອງປະຊຸມສູນກາງພັກຄັ້ງທີ 5 ສະໄໝທີ XI, ພາຍຫຼັງການສ້າງຕັ້ງເປັນເວລາໜຶ່ງປີກວ່າ, ຄະນະຊີ້ນຳສູນກາງກ່ຽວກັບການປ້ອງກັນ ຕ້ານການສໍ້ລາດບັງຫຼວງໄດ້ມີຄວາມພະຍາຍາມຫຼາຍຢ່າງ ໃນການຜັນຂະຫຍາຍປະຕິບັດພາລະບົດບາດ ໜ້າທີ່; ເອົາໃຈໃສ່ເປັນສຳຄັນເຖິງການຊີ້ນຳຮອບດ້ານ ທັງປ້ອງກັນ ແລະຕ້ານ; ກໍ່ສ້າງ ປັບປຸງບູລະນະເປັນແຕ່ລະກ້າວລະບຽບກົດໝາຍກ່ຽວກັບການປ້ອງກັນ ຕ້ານການສໍ້ລາດບັງຫຼວງ; ຈັດຕັ້ງບັນດາຄະນະກວດກາ ຕິດຕາມກວດກາການປະຕິບັດກໍລະນີ ຄະດີຕ່າງໆ; ເລີ່ມຟ້ອງຮ້ອງ, ສືບສວນ, ຟ້ອງສານ, ພິຈາລະນາຕັດສິນຄະດີສໍ້ລາດບັງຫຼວງ; ປັບປຸງການຈັດຕັ້ງບັນດາຄະນະຮັບຜິດຊອບວຽກງານພາຍໃນຂອງຄະນະພັກແຂວງ ກຳແພງນະຄອນສັງກັດສູນກາງພັກ... ພ້ອມກັນນັ້ນ ກໍ່ໄດ້ເລືອກເອົາຂອດຄົງຄ້າງ ວຽກຫຍຸ້ງຍາກຈຳນວນໜຶ່ງ ເພື່ອສຸມໃສ່ຊີ້ນຳແກ້ໄຂ, ເຊັ່ນ: ຄົ້ນເຜີຍ, ຊຸກຍູ້ແກ້ໄຂບັນດາກໍລະນີ ຄະດີສໍ້ລາດບັງຫຼວງທີ່ຮ້າຍແຮງ ສັບສົນ; ປັບປຸງວຽກງານການປະເມີນດ້ານຍຸດຕິມຳ; ບັນຫາໃຫ້ຮັບການຜັດໂທດ; ຍົກສູງປະສິດທິຜົນຂອງວຽກງານສົມທົບລະຫວ່າງອົງການຕ່າງໆ ໃນການຕໍ່ສູ້ປ້ອງກັນ ຕ້ານການສໍ້ລາດບັງຫຼວງ. ປະຕິບັດຢ່າງຖືກຕ້ອງຕາມຫຼັກການທີ່ວ່າ ບັນດາຄະນະພັກ ການຈັດຕັ້ງພັກບໍ່ປ່ອຍປະລະເຫຼີງການນຳພາຂອງພັກ ແຕ່ກໍ່ບໍ່ອຸ້ມວຽກ ບໍ່ເຮັດຕາງເຮັດແທນ ຫຼືແຊກແຊງເຂົ້າໃນການເຄື່ອນໄຫວຂອງບັນດາອົງການພາລະບົດບາດ ໃນວຽກງານປ້ອງກັນ ຕ້ານການສໍ້ລາດບັງຫຼວງ; ສ້າງເງື່ອນໄຂ ໃຫ້ບັນດາອົງການພາລະບົດບາດເປັນເຈົ້າການປະຕິບັດໜ້າທີ່ ຖືກຕ້ອງຕາມການກຳນົດຂອງກົດໝາຍ.
ແມ່ນຍ້ອນອາໃສສິ່ງດັ່ງກ່ານນັ້ນເອງ ໃນເວລາມໍ່ໆມານີ້ ວຽກງານຄົ້ນເຜີຍ ແກ້ໄຂກໍລະນີ ຄະດີສໍ້ລາດບັງຫຼວງ ຈຶ່ງໄດ້ຊຸກຍູ້, ສ້າງການຫັນປ່ຽນຈະແຈ້ງພໍຄວນ; ການສືບສວນ, ການຟ້ອງສານ, ການພິຈາລະນາຕັດສິນຄະດີສໍ້ລາດບັງຫຼວງທີ່ຮ້າຍແຮງ ສັບສົນຈຳນວນໜຶ່ງ ຈຶ່ງໄດ້ຍູ້ແຮງກວ່າເກົ່າ; ຄະດີສໍ້ລາດບັງຫຼວງໃຫຍ່ຫຼາຍຄະດີ ຖືກສານພິຈາລະນາຕັດສິນລົງໂທດ ຕາມການກຳນົດຂອງກົດໝາຍ, ພິເສດແມ່ນການເປີດເຜີຍ ນຳເອົາບັນດາຄະດີສໍ້ລາດບັງຫຼວງທີ່ຮ້າຍແຮງ ສັບສົນ ໄປພິພາກສາລົງໂທດຢ່າງເຂັ້ມງວດ ໃນເວລາທີ່ຜ່ານມາ ໄດ້ຮັບຄວາມເຫັນດີເຫັນພ້ອມ ສະໜັບສະໜູນຢ່າງກວ້າງຂວາງ ຂອງພະນັກງານ ສະມາຊິກພັກ ແລະປະຊາຊົນ, ມີຄຸນປະໂຫຍດສັ່ງສອນ ບອກເຕືອນ ກີດກັ້ນການກະທຳສໍ້ລາດບັງຫຼວງ, ປັບປຸງຄວາມເຊື່ອຖືຂອງປະຊາຊົນຕໍ່ກັບພັກ ແລະລັດ. ກົນໄກແກ້ໄຂ, ວຽກງານສົມທົບລະຫວ່າງບັນດາອົງການພາລະບົດບາດໃນການຄົ້ນເຜີຍ, ແກ້ໄຂກໍລະນີ ຄະດີສໍ້ລາດບັງຫຼວງ ໄດ້ຮັບການປະຕິບັດຢ່າງເປັນປະຈຳ ເປັນເຈົ້າການ ແລະມີປະສິດທິຜົນ.
ຄະນະຮັບຜິດຊອບວຽກງານພາຍໃນສູນກາງ - ອົງການປະຈຳການຂອງຄະນະຊີ້ນຳ, ພາຍຫຼັງການສ້າງຕັ້ງຄືນໃໝ່ເປັນເວລາໜຶ່ງປີກວ່າ, ໄດ້ປັບປຸງການຈັດຕັ້ງ ການເຄື່ອນໄຫວໃຫ້ເປັນປົກກະຕິໂດຍໄວ, ສຳເລັດໂດຍພື້ນຖານໜ້າທີ່ທີ່ໄດ້ຮັບມອບໝາຍ. ຜ່ານວຽກງານອັນລະອຽດ ແທດເໝາະ ແລະມີປະສິດທິຜົນໃນວຽກງານເປັນຜູ້ປຶກສາ ແລະຊ່ວຍວຽກໃຫ້ຄະນະຊີ້ນຳ, ຄະນະປະຈຳການຂອງຄະນະຊີ້ນຳ, ຖານະທີ່ຕັ້ງ ບົດບາດຂອງຄະນະຮັບຜິດຊອບວຽກງານພາຍໃນສູນກາງໄດ້ຮັບການຢັ້ງຢືນເປັນແຕ່ລະກ້າວ.
ສະພາແຫ່ງຊາດ, ລັດຖະບານ, ບັນດາກະຊວງ ຂະແໜງການ ທ້ອງຖິ່ນ ໄດ້ມີຄວາມມານະພະຍາຍາມຫຼາຍໃນການດັດແປງ ປັບປຸງເພີ່ມເຕີມ ປະກາດໃຊ້ໃໝ່ ເພື່ອບູລະນະເປັນແຕ່ລະກ້າວ ລະບຽບກົດໝາຍ ກົນໄກ ນະໂຍບາຍ ກົດໝາຍໃນຂົງເຂດຕ່າງໆ ຂອງຊີວິກເສດຖະກິດ ສັງຄົມ, ສ້າງພື້ນຖານນິຕິທຳນັບມື້ນັບຄົບຊຸດ ແລະແໜ້ນແຟ້ນກວ່າອີກ, ປະກອບສ່ວນອັນສຳຄັນເຂົ້າໃນວຽກງານປ້ອງກັນ ຕ້ານການສໍ້ລາດບັງຫຼວງ. ຄະນະພັກຕຳຫຼວດສູນກາງ, ຄະນະປະຕິບັດງານພັກໃນໄອຍະການປະຊາຊົນສູງສຸດ, ຄະນະປະຕິບັດງານພັກໃນສານປະຊາຊົນສູງສຸດ ໄດ້ຊີ້ນຳນຳພາວຽກງານປະສານສົມທົບຍູ້ແຮງການສືບສວນ ຟ້ອງສານ ແລະດຳເນີນການພິພາກສາ ບັນດາຄະດີສໍ້ລາດບັງຫຼວງທີ່ຮ້າຍແຮງ ສັບສົນ. ຄະນະພັກ ແລະອຳນາດການປົກຄອງທ້ອງຖິ່ນຫຼາຍແຫ່ງ ໄດ້ເອົາໃຈໃສ່ຊີ້ນຳນຳພາ ແລະໃນຂັ້ນຕົ້ນໄດ້ມີການຫັນປ່ຽນຢ່າງຕັ້ງໜ້າ.
ຄຽງຂ້າງຜົນສຳເລັດທີ່ບັນລຸໄດ້ນັ້ນ ພວກເຮົາກໍ່ຕ້ອງຮັບຮູ້ຢ່າງກົງໄປກົງມາວ່າ ວຽກງານປ້ອງກັນ ຄົ້ນເຜີຍ ແລະແກ້ໄຂການສໍ້ລາດບັງຫຼວງ ໃນເວລາທີ່ຜ່ານມາ ຍັງມີຂໍ້ຈຳກັດຫຼາຍ ທຽບກັບຄວາມຕ້ອງການ ແລະຄວາມປາຖະໜາຂອງປະຊາຊົນ. ວຽກງານປັບປຸງບູລະນະລະບຽບກົດໝາຍກ່ຽວກັບການປ້ອງກັນ ຕ້ານການສໍ້ລາດບັງຫຼວງຍັງຊັກຊ້າ; ວຽກງານໂຄສະນາ ເຜີຍແຜ່ ອົບຮົບສຶກສາກົດໝາຍຍັງບໍ່ທັນຕອບສະໜອງໄດ້ກັບຄວາມຕ້ອງການ; ພະນັກງານ ຂ້າລັດຖະການ ລັດຖະກອນ ປະຊາຊົນກ່າວໂທດການກະທຳສໍ້ລາດບັງຫຼວງຍັງໜ້ອຍ, ໃນເວລານັ້ນ ຍັງບໍ່ທັນມີກົນໄກອັນສັກສິດເພື່ອປົກປ້ອງ ແລະຍ້ອງຍໍຜູ້ກ່າວໂທດການສໍ້ລາດບັງຫຼວງ. ຄວາມຮັບຜິດຊອບ, ຄວາມສາມາດນຳພາ, ກຳລັງແຮງສູ້ຮົບຂອງຄະນະພັກຈຳນວນໜຶ່ງ, ລັກສະນະນຳໜ້າ ເປັນແບບຢ່າງຂອງພະນັກງານ ສະມາຊິກພັກພາກສ່ວນໜຶ່ງຍັງບໍ່ທັນສູງ. ມາດຕະການປ້ອງກັນການສໍ້ລາດບັງຫຼວງຫຼາຍມາຕະການຍັງມີລັກສະນະຮູບການ. ການຈັດຕັ້ງ ການເຄື່ອນໄຫວ ກຳລັງຄວາມສາມາດ ຂອງຫຼາຍກົມກອງແລະພະນັກງານພາກສ່ວນໜຶ່ງ ທີ່ຮັບຜິດຊອບສະເພາະວຽກງານຕ້ານການສໍ້ລາດບັງຫຼວງ ຍັງບໍ່ທັນຕອບສະໜອງໄດ້ກັບຄວາມຕ້ອງການ. ການພົວພັນປະສາມສົມທົບ ລະຫວ່າງບັນດາອົງການດຳເນີນການຟ້ອງຮ້ອງ ແລະລະຫວ່າງບັນດາອົງການດຳເນີນການຟ້ອງຮ້ອງ ກັບອົງການກວດການ, ອົງການກວດສອບບັນຊີ ໃນການຄົ້ນເຜີຍ ແກ້ໄຂບັນດາກໍລະນີ ຄະດີສໍ້ລາດບັງຫຼວງບາງທີຍັງບໍ່ທັນແໜ້ນແຟ້ນ. ວຽກງານຄົ້ນເຜີຍການສໍ້ລາດບັງຫຼວງຍັງອ່ອນແອ, ຈຳນວນກໍລະນີ ຄະດີສໍ້ລາດບັງຫຼວງທີ່ຖືກຄົ້ນເຜີຍ ແລະແກ້ໄຂຜ່ານການເຄື່ອນໄຫວຂອງອົງການກວດກາ ກວດສອບບັນຊີ ສືບສວນ ຍັງມີຈຳນວນໜ້ອຍ. ອັດຕາສ່ວນເກັບຄືນຊັບສິນສໍ້ລາດບັງຫຼວງ ຍັງຕ່ຳທີ່ສຸດ. ສະພາບການສໍ້ລາດບັງຫຼວງຍັງເກີດຂຶ້ນຢ່າງເຄັ່ງຮ້ອນຢູ່ຫຼາຍຂະແໜງການ ຫຼາຍຂັ້ນ ຫຼາຍຂົງເຂດ, ເປັນຕົ້ນແມ່ນໃນຂົງເຂດການເງິນ ທະນາຄານ, ໃນການຄຸ້ມຄອງ ນຳໃຊ້ທີ່ດິນ, ໃນການຄຸ້ມຄອງ ຂຸດຄົ້ນຊັບພະຍາກອນແຮ່ທາດ ແລະໃນການລົງທຶນພາກລັດ. ສະພາບການສໍ້ລາດບັງຫຼວງມະຍິກມະຍ່ອຍ ທີ່ສະແດງອອກໂດຍຜ່ານການກິນສິນບົນ, ໃນຂົງເຂດການບໍລິຫານ ບໍລິການສ່ວນລວມ, ການໃຫ້ຄ່າມື ວິ້ງເຕັ້ນເພື່ອໃຫ້ໄດ້ວຽກເມື່ອຕິດຕໍ່ກັບບັນດາອົງການອຳນາດລັດ ຍັງເຄັ່ງຮ້ອນຢູ່. ການຄົ້ນເຜີຍການສໍ້ລາດບັງຫຼວງຍັງອມ່ນຂອດທີ່ອ່ອນ. ການແກ້ໄຂກໍລະນີ ຄະດີສໍ້ລາດບັງຫຼວງຢູ່ບາງແຫ່ງ ຍັງມີປະກັດການຜ່ອນເບົາໃຫ້; ຍັງມີສະພາບການສວຍໃຊ້ການປະຕິບັດວິໄນ ແກ້ໄຂດ້ວຍການບໍລິຫານ ປ່ຽນແທນໃຫ້ແກ່ການຟ້ອງສານຄະດີອາຍາ ຟ້ອງສານຜູ້ຕ້ອງຫາຕາມກຳນົດຂອງກົດໝາຍ. ການເສີມຂະຫຍາຍບົດບາດ ຄວາມຮັບຜິດຊອບຂອງສັງຄົມ ແລະການຮ່ວມມືສາກົນໃນການປ້ອງກັນ ຕ້ານການສໍ້ລາດບັງຫຼວງຍັງຖືກຈຳກັດ. ການສໍ້ລາດບັງຫຼວງພວມເປັນສິ່ງທ້າທາຍ ແລະເປັນບັນຫາໜຶ່ງໃນບັນດາບັນຫາຮ້ອນເຄືອງທີ່ສຸດຂອງສັງຄົມປັດຈຸບັນ.
ສະພາບການດັ່ງກ່າວເທິງນີ້ມີຫຼາຍສາເຫດ, ແຕ່ສາເຫດຕົ້ນຕໍ່ແມ່ນ: ກົນໄກ ນະໂຍບາຍ ກົດໝາຍຍັງບໍ່ທັນບໍລິບູນ ບໍ່ຄົບຊຸດ; ຂໍ້ກຳນົດຫຼາຍຂໍ້ຍັງຢຽບໃສ່ກັນ, ຂັດແຍ່ງກັນ, ມີຈຸດອ່ອນຫຼາຍ ຖືກສວຍໃຊ້ງ່າຍ. ກົງຈັກບໍລິຫານຍັງພະລຸງພະລັງ; ການແບ່ງງານ ແບ່ງຂັ້ນຍັງບໍ່ທັນຈະແຈ້ງ ຊັດເຈນແທ້ເທື່ອ; ການປະຕິຮູບການບໍລິຫານຍັງບໍ່ທັນດີ. ກຳນົດກ່ຽວກັບຄວາມຮັບຜິດຊອບຂອງຜູ້ນຳໜ້າ ຍັງບໍ່ລະອຽດ, ຍັງບໍ່ທັນສົ່ງເສີມໃຫ້ເຂົາຕັ້ງໜ້າພະຍາຍາມ ເປັນເຈົ້າການໃນການຄົ້ນເຜີຍ ແກ້ໄຂການສໍ້ລາດບັງຫຼວງທີ່ເກີດຂຶ້ນຢູ່ໃນສຳນັກງານອົງການ ກົມກອງ ທ້ອງຖິ່ນທີ່ຕົນຄຸ້ມຄອງ. ຫຼາຍຄະນະພັກ ການຈັດຕັ້ງພັກ ອຳນາດການປົກຄອງ ແລະຜູ້ນຳໜ້າຫຼາຍຄົນ ຮັບຮູ້ຍັງບໍ່ທັນຄົບຖ້ວນ ເລິກເຊິ່ງກ່ຽວກັບລັກສະນະຮ້າຍແຮງ ຄວາມອັນຕະລາຍຂອງການສໍ້ລາດບັງຫຼວງ; ເສີມຂະຫຍາຍຍັງບໍ່ທັນໝົດກຳລັງແຮງສັງລວມຂອງລະບົບການເມືອງ ຂອງປະຊາຊົນໃນວຽກງານຕໍ່ສູ້ປ້ອງກັນ ຕ້ານການສໍ້ລາດບັງຫຼວງ. ການຄຸ້ມຄອງ ສຶກສາອົບຮົມພະນັກງານ ສະມາຊິກພັກ ຂ້າລັດຖະການຍັງມີຈຸດອ່ອນຫຼາຍ. ບາງຄະນະພັກ, ຫົວໜ້າສຳນັກງານອົງການ ກົມກອງບາງແຫ່ງ ຍັງບໍ່ທັນເອົາໃຈໃສ່ເຖິງການປະຕິບັດມາດຕະການແກ້ໄຂການປ້ອງກັນ ຕ້ານການສໍ້ລາດບັງຫຼວງ ຫຼືໄດ້ຜັນຂະຫຍາຍແຕ່ເຮັດແບບຮູບການ. ພະນັກງານຫຼັກແຫຼ່ງຈຳນວນໜຶ່ງຂອງຂັ້ນ ຂະແໜງການຕ່າງໆ, ນັບທັງພະນັກງານການນຳຂັ້ນສູງ ບໍ່ເປັນແບບຢ່າງໃນການຮັກສາຄຸນສົມບັດສິນທຳ ແບບແຜນດຳລົງຊີວິດ; ຍັງບໍ່ທັນນຳໜ້າ ແລະເປັນແບບຢ່າງໃນການຕໍ່ສູ້ປ້ອງກັນ ຕ້ານການສໍ້ລາດບັງຫຼວງ. ບົດບາດຂອງບັນດາອົງການໂດຍປະຊາຊົນເລືອກຕັ້ງ, ອົງການສື່ມວນຊົນ ແລະປະຊາຊົນໃນການປ້ອງກັນ ຕ້ານການສໍ້ລາດບັງຫຼວງ ຍັງບໍ່ທັນໄດ້ເສີມຂະຫຍາຍຢ່າງພຽງພໍ.
2- ກ່ຽວກັບທິດທາງ ໜ້າທີ່ໃນເວລາທີ່ຈະມາເຖິງ
ກອງປະຊຸມໃຫຍ່ຄັ້ງທີ່ XI ຂອງພັກ, ມະຕິສູນກາງພັກຄັ້ງທີ 4 ແລະຂໍ້ສະຫລຸບຂອງສູນກາງພັກຄັ້ງທີ 5 ສະໄໝທີ XI ກໍ່ຄືເອກະສານອື່ນຫຼາຍສະບັບຂອງພັກ ແລະລັດຫວຽດນາມ ລ້ວນແຕ່ຢັ້ງຢືນວ່າ ການປ້ອງກັນ ຕ້ານການສໍ້ລາດບັງຫຼວງ ແລະການຟຸມເຟືອຍແມ່ນໜ້າທີ່ສຳຄັນທີ່ສຸດ, ທັງຮີບດ່ວນ ທັງຍາວນານ. ພະນັກງານ ສະມາຊິກພັກທຸກຄົນ ກ່ອນອື່ນໝົດແມ່ນຜູ້ເປັນຫົວໜ້າ ຕ້ອງເປັນແບບຢ່າງໃນການຕໍ່ສູ້ປ້ອງກັນ ຕ້ານການສໍ້ລາດບັງຫຼວງ.
ເພື່ອໃຫ້ການຕໍ່ສູ້ປ້ອງກັນ ຕ້ານການສໍ້ລາດບັງຫຼວງມີການຫັນປ່ຽນຢ່າງຈະແຈ້ງໃນເວລາທີ່ຈະມາເຖິງ, ກອງປະຊຸມທົ່ວປະເທດກ່ຽວກັບວຽກງານປ້ອງກັນ ຕ້ານການສໍ້ລາດບັງຫຼວງ ໄດ້ເປັນເອກະພາບຢັ້ງຢືນວ່າ ຕ້ອງສືບຕໍ່ປະຕິບັດຈຸດໝາຍ ທັດສະນະ ແລະບັນດາວິທີແກ້ ທີ່ໄດ້ລະບຸໄວ້ໃນມະຕິສູນກາງພັກຄັ້ງທີ 3 ສະໄໝທີ X, ປະຕິບັດບັນດາກຸ່ມໜ້າທີ່ຈຸດໜັກໃຈກາງ ທີ່ວາງອອກໃນຂໍ້ສະຫລຸບຂອງກອງປະຊຸມສູນກາງພັກຄັ້ງທີ 5 ສະໄໝທີ XI, ແລະ 8 ເນື້ອໃນວຽກງານປ້ອງກັນ ຕ້ານການສໍ້ລາດບັງຫຼວງ ທີຍົກຂຶ້ນໃນລາຍງານຂອງຄະນະຊີ້ນຳສູນກາງກ່ຽວກັບການປ້ອງກັນ ຕ້ານການສໍ້ລາດບັງຫຼວງ ໃນກອງປະຊຸມຄັ້ງນີ້ຢ່າງເຂັ້ງງວດ ແຂງແຮງ ແລະຄົບຊຸດກວ່າອີກ. ເອົາໃຈໃສ່ທັງການປ້ອງກັນ ແລະ ການຕ້ານ, ດ້ວຍຈິດໃຈເດັດດ່ຽວ ໜຽວແໜ້ນ ລຽນຕິດ ຖືກຕ້ອງຕາມກົດໝາຍ, ແນໃສ່ສ້າງໃຫ້ມີການຫັນປ່ຽນຈະແຈ້ງກວ່າອີກໃນວຽກງານປ້ອງກັນ ຕ້ານການສໍ້ລາດບັງຫຼວງ, ປັບປຸງຄວາມເຊື່ອຖືຂອງປະຊາຊົນ.
ຂ້າພະເຈົ້າຢາກເນັ້ນໜັກໃຫ້ເອົາໃຈໃສ່ຕື່ມອີກບາງບັນຫາອັນລະອຽດດັ່ງລຸ່ມນີ້:
ທີໜຶ່ງ, ຕ້ອງສຸມໃສ່ຊີ້ນຳການກໍ່ສ້າງ ປັບປຸງບູລະນະລະບົບບັນດາຂໍ້ກຳນົດຂອງພັກກ່ຽວກັບວຽກງານປ້ອງກັນ ຕ້ານການສໍ້ລາດບັງຫຼວງ; ເພີ່ມເຕີມ ປັບປຸງ ບູລະນະບັນດາກົນໄດ ກົດໝາຍກ່ຽວກັບການຄຸ້ມຄອງເສດຖະກິດ - ສັງຄົມເພື່ອປ້ອງກັນ ຕ້ານການສໍ້ລາດບັງຫຼວງ.
ອີງໃສ່ກົດລະບຽບ ແລະບັນດາມະຕິຂອງພັກ, ຕ້ອງຫັນເປັນລະອຽດ ກໍ່ສ້າງບັນດາກົດຂໍ້ກຳນົດພາຍໃນຂອງພັກ ເພື່ອກໍ່ຮ່າງສ້າງຮູບເທື່ອລະກ້າວເປັນລະບົບບັນດາຂໍ້ກຳນົດທີ່ມີວິທະຍາສາດ ແໜ້ນແຟ້ນ ຄົບຊຸດ ກ່ຽວກັບການປ້ອງກັນ ຕ້ານການສໍ້ລາດບັງຫຼວງ; ລະບົບບັນດາຫຼັກການ ແລະ ຫຼັກຄຸນສົມບັດ ຈັນຍາບັນ ທີ່ນຳໃຊ້ຕໍ່ພະນັກງານ ສະມາຊິກພັກ, ເປັນຕົ້ນແມ່ນຕໍ່ກັບຜູ້ເປັນຫົວໜ້າ, ໃນການຮັກສາຄຸນສົມບັດສິນທຳ, ຊື່ຕົງບໍລິສຸດ ໃສສະອາດ ເປັນແບບຢ່າງນຳໜ້າໃນວຽກງານປ້ອງກັນ ຕ້ານການສໍ້ລາດບັງຫຼວງ ການຟຸມເຟືອຍ.
ປີ 2014 ແລະຊຸມປີຕໍ່ໄປຕ້ອງຍູ້ແຮງການກໍ່ສ້າງ ປັບປຸງບູລະນະກົນໄກ ນະໂຍບາຍ ກົດໝາຍ, ແກ້ໄຂຄວາມຫຼົມແຫຼວຈຸດອ່ອນຕ່າງໆໃນການຄຸ້ມຄອງເສດຖະກີດ - ສັງຄົມ, ເປັນຕົ້ນແມ່ນ ໃນຂົງເຂດທີ່ເກີດການສໍ້ລາດບັງຫຼວງງ່າຍ. ສະເໜີໃຫ້ສະພາແຫ່ງຊາດ ລັດຖະບານສຸມໃສ່ຊີ້ນຳການສືບຕໍ່ດັດແປງ ປັບປຸງເພີ່ມເຕີມ ບູລະນະກົດໝາຍ ກົນໄກ ນະໂຍບາຍທີ່ກ່ຽວພັນເຖິງການປ້ອງກັນ ຕ້ານການສໍ້ລາດບັງຫຼວງ, ພິເສດແມ່ນ ພາຍຫຼັງທີ່ລັດຖະທຳມະນູນປີ 2013 ແລະກົດໝາຍບາງສະບັບ ໄດ້ຮັບການຮັບຮອງຜ່ານໂດຍສະພາແຫ່ງຊາດ. ສືບຕໍ່ຄົ້ນຄວ້າດັດແປງ ປັບປຸງບູລະນະຂໍ້ກຳນົດກ່ຽວກັບມາດຕະການປ້ອງກັນການສໍ້ລາດບັງຫຼວງ ທີ່ພວມໄດ້ປະຕິບັດ ແຕ່ປະສິດທິຜົນຕ່ຳ. ເອົາໃຈໃສ່ເປັນສຳຄັນເຖິງບັນດາຂໍ້ກຳນົດກ່ຽວກັບການກວດກາຊັບສິນ ລາຍຮັບລາຍໄດ້ຂອງພະນັກງານ ຂ້າລັດຖະການ ລັດຖະກອນ, ເປັນຕົ້ນແມ່ນບັນດາຜູ້ທີ່ຢູ່ໃນທີ່ຕັ້ງ ແລະຂົງເຂດວຽກງານທີ່ອາດຈະຖືກຄະດີສໍ້ລາດບັງຫຼວງໃນລະດັບສູງ. ກຳນົດການແລກປ່ຽນຊື້ຂາຍທີ່ມີຄຸນຄ່າສູງຂອງພະນັກງານ ຂ້າລັດຖະການ ລັດຖະກອນ ຜູ້ມີຖານະຕຳແໜ່ງ ຜູ້ມີສິດອຳນາດ ຕ້ອງໄດ້ປະຕິບັດໂດຍຜ່ານທະນາຄານ ເພື່ອກວດກາ ກີດກັ້ນການແລກປ່ຽນຜິດກົດໝາຍ ການຟອກເງິນ ການສໍ້ລາດບັງຫຼວງ. ການກຳນົດກ່ຽວກັບຍ້ອງຍໍບຸກຄົນທີ່ມີຜົນງານດີເດັ່ນໃນການກ່າວໂທດ ຄົ້ນເຜີຍການສໍ້ລາດບັງຫຼວງ. ເດັດດ່ຽວ ຕັ້ງໜ້າພະຍາຍາມກໍ່ສ້າງໃຫ້ໄດ້ກົນໄກປ້ອງກັນເພື່ອບໍ່ອາດສໍ້ລາດບັງຫຼວງ; ກົນໄກປາບປາມ ກ່າວເຕືອນເພື່ອບໍ່ກ້າສໍ້ລາດບັງຫຼວງ; ແລະກົນໄກຮັບປະກັນເພື່ອບໍ່ຕ້ອງການສໍ້ລາດບັງຫຼວງ.
ສານປະຊາຊົນສູງສຸດ, ໄອຍະການປະຊາຊົນສູງສຸດຕ້ອງແນະນຳການນຳໃຊ້ບັນດາກົດໝາຍກ່ຽວກັບການສະເໜີໃຫ້ປະເມີນ ແລະຕີລາຄາ, ການນຳໃຊ້ບົດສະຫລຸບຂອງການປະເມີນຕຸລາການ ໃນລະບົບສານປະຊາຊົນ ໄອຍະການປະຊາຊົນ. ຫຼີກລ່ຽງສະພາບການຫຼົບຫຼີກການປະເມີນ, ປະຕິບັດການປະເມີນຢ່າງຊັກຊ້າ ຫຼືສວຍໃຊ້ການສະເໜີໃຫ້ປະເມີນ, ເອົາຜົນຂອງການປະເມີນ ປ່ຽນແທນໃຫ້ແກ່ບົດສະຫລຸບການສືບສວນ, ຖືວ່າຜົນຂອງການປະເມີນສຳຄັນກວ່າບົດສະຫລຸບການສືບສວນ, ກໍ່ຄວາມຫຍຸ້ງຍາກໃຫ້ແກ່ວຽກງານສືບສວນ ຟ້ອງສານ ພິຈາລະນາຕັດສິນຄະດີ.
ທີສອງ, ສືບຕໍ່ຍູ້ແຮງວຽກງານໂຄສະນາ ອົບຮົມສຶກສາ ເພື່ອແນໃສ່ຍົກສູງຄວາມຮັບຮູ້ ສະຕິສຳນຶກ ຄວາມຮັບຜິດຊອບຂອງຂັ້ນ ຂະແໜງການຕ່າງໆ, ຂອງພະນັກງານ ສະມາຊິກພັກ ແລະປະຊາຊົນ ກ່ຽວກັບວຽກງານປ້ອງກັນ ຕ້ານການສໍ້ລາດບັງຫຼວງ, ສ້າງຄວາມເຫັນດີເປັນເອກະພາບ ຄວາມຕື່ນຕົວສະໝັກໃຈ ຄວາມຕັດສິນໃຈສູງໃນການກະທຳ.
ນີ້ແມ່ນໜ້າທີ່ທີ່ບໍ່ໃໝ່ ແຕ່ສຳຄັນທີ່ສຸດ. ຍ້ອນອົບຮົມສຶກສາແມ່ນມາດຕະການອັນພື້ນຖານເພື່ອບຳລູງຄູນສ້າງຄຸນສົມບັດ ຍົກສູງຄວາມຊື່ສັດບໍລິສຸດ; ຕ້ານການເສື່ອມໂຊມ ປ່ຽນທາດ. ຄະນະໂຄສະນາອົບຮົມສຶກສາສູນກາງເປັນເຈົ້າພາບສົມທົບກັບ ບັນດາອົງການທີ່ກ່ຽວຂ້ອງ ຄົ້ນຄວ້າ ເປັນທີ່ປຶກສາຊ່ວຍພັກ-ລັດ ແນວໂຮມປະເທດຊາດ ມີແຜນການໂຄສະນາຢ່າງກວ້າງຂວາງເລິກເຊິ່ງ ໃນທົ່ວພັກ ທົ່ວກອງທັບ ແລະທົ່ວປວງປະຊາຊົນ ກ່ຽວກັບການເຂົ້າຮ່ວມຄົ້ນເຜີຍ ແລະກ່າວໂທດການສໍ້ລາດບັງຫຼວງ ໂດຍຕິດແໜ້ນກັບການຍ້ອງຍໍຊົມເຊີຍ ຍົກຍ້ອງກຽດສັກສີ ແລະໃຫ້ລາງວັນຢ່າງເໝາະສົມ ທັນການ ໃຫ້ຜູ້ກ່າວໂທດ ຜູ້ຄົ້ນເຜີຍການສໍ້ລາດບັງຫຼວງ; ຍ້ອງຍໍຊົມເຊີຍບັນດາບົດຮຽນທີ່ດີ ແບບຢ່າງດີເດັ່ນ, ພ້ອມກັນນັ້ນກໍ່ກ່າວປະນາມໂທດຢ່າງແຂງແຮງຕໍ່ການກະທຳຫຍໍ້ທໍ້ ການສໍ້ລາດບັງຫຼວງ. ພະນັກງານ ສະມາຊິກພັກ, ພິເສດແມ່ນພະນັກງານ ສະມາຊິກພັກທີ່ເປັນຫົວໜ້າສຳນັກງານອົງການ ການຈັດຕັ້ງ ກົມກອງ, ຕ້ອງນຳໜ້າໃນການຕໍ່ສູ້ປ້ອງກັນ ຕ້ານການສໍ້ລາດບັງຫຼວງ. ຝຶກຝົນຫຼໍ່ຫຼອມຄວາມຊື່ສັດສຸດຈະລິດຂອງຜູ້ເປັນພະນັກງານ ຂ້າລັດຖະການ, ກໍ່ສ້າງ ແລະປະຕິບັດຢ່າງເຂັ້ມງວດຕາມຂໍ້ກຳນົດການປະພຶດ ຈັນຍາບັນ ຄຸນສົມບັດຂ້າລັດຖະການ. ຕ້ອງປຸກລຸກຫາງສຽງສັງຄົມໃຫ້ຕຳໜິຕິຊົມຢ່າງເຄັ່ງຄັດ ຕໍ່ການກະທຳສໍ້ລາດບັງຫຼວງ, ອົບຮົມສຶກສາຈິດໃຈຮູ້ເຄົາລົບນັບຖືກຽດສັກສີ, ຮູ້ລະອາຍໃຈ ເຈັບໃຈຍ້ອນການສໍ້ລາດບັງຫຼວງ.
ຮັບຮູ້ຢ່າງຖືກຕ້ອງກ່ຽວກັບຄວາມຮັບຜິດຊອບໃນການຄົ້ນເຜີຍ ແກ້ໄຂບັນດາກໍລະນີ ຄະດີສໍ້ລາດບັງຫຼວງແມ່ນຕ້ອງເລີ່ມຕົ້ນໃນແຕ່ລະຄະນະພັກ ແຕ່ລະສຳນັກງານ ອົງການ ກົມກອງ, ໃນແຕ່ລະພະນັກງານ ສະມາຊິກພັກ. ຮັບຮູ້ຢ່າງຈະແຈ້ງ ແລະເຂົ້າໃຈຢ່າງເລິກເຊິ່ງກ່ຽວກັບຈຸດປະສົງ ຄວາມໝາຍ ເນື້ອໃນບັນດາຂໍ້ກຳນົດຂອງພັກ ແລະລັດກ່ຽວກັບວຽກງານປ້ອງກັນ ຕ້ານການສໍ້ລາດບັງຫຼວງ, ໃນນັ້ນເອົາການປ້ອງກັນເປັນຕົ້ນຕໍ, ແຕ່ວ່າ ໃນສະພາບການປັດຈຸບັນ, ການຄົ້ນເຜີຍ ແລະກຳຈັດແກ້ໄຂການສໍ້ລາດບັງຫຼວງຢ່າງເຂັ້ມງວດ ກໍ່ມີຄຸນປະໂຫຍດອັນຕັ້ງໜ້າ ເພື່ອກ່າວເຕື່ອນ ປ້ອງກັນການສໍ້ລາດບັງຫຼວງ.
ບັນດາອົງການສຶ່ຂ່າວຕ້ອງສົ່ງຂ່າວ ລົງພິມບົດຄວາມກຳນົດທິດທີ່ຖືກຕ້ອງໃຫ້ແກ່ຫາງສຽງສັງຄົມ ເພື່ອໃຫ້ທຸກຄົນເຫັນແຈ້ງຜົນສຳເລັດອັນຕັ້ງໜ້າຕ່າງໆ ຂອງວຽກງານຕໍ່ສູ້ປ້ອງກັນ ຕ້ານການສໍ້ລາດບັງຫຼວງ, ກໍ່ຄືຂໍ້ຈຳກັດ ຈຸດອ່ອນ ຄວາມຫຍຸ້ງຍາກ ຄວາມສັບສົນຕ່າງໆ; ຢັ້ງຢືນຄວາມຕັດສິນໃຈຂອງພັກ ລັດ, ຂອງລະບົບການເມືອງທັງໝົດໃນການກີດກັ້ນ ຍູ້ຖອຍການສໍ້ລາດບັງຫຼວງ. ກຳຈັດແກ້ໄຂສະພາບການສື່ຂ່າວດ້ານດຽວ, ສື່ຂ່າວບໍ່ຊັດເຈນ, ມີລັກສະນະກະທົບກະເທືອນ, ກໍ່ຄວາມອົນລະເວງຫວາດຫວັ່ນ ຫຼືຍັດຍຽດປະເພດໂທດ ລະດັບໂທດໃຫ້ຜູ້ຕ້ອງຫາກ່ອນການພິພາກສາຂອງສານ. ປົກປ້ອງ, ຍ້ອງຍໍ, ປຸກລະດົມກຳລັງໃຈຕໍ່ນັກຂ່າວທີ່ຕັ້ງໜ້າ ກ້າຕໍ່ສູ້ຕ້ານການສໍ້ລາດບັງຫຼວງ; ກຳຈັດດັດແກ້ຢ່າງເຂັ້ມງວດ ຕໍ່ການສົ່ງຂ່າວຜິດກັບຄວາມຈິງ ການໃສ່ຮ້າຍປ້າຍສີ ເສກສັນປັ້ນແຕ່ງສົ່ງຜົນກະທົບໃນທາງຮ້າຍ. ຄະນະຊີ້ນຳສູນກາງກ່ຽວກັບການປ້ອງກັນ ຕ້ານການສໍ້ລາດບັງຫຼວງ ແລະບັນດາອັງການພາລະບົດບາດ ຕ້ອງດປັນເຈົ້າການສະໜອງຂໍ້ມູນຂ່າວສານຕ່າງໆ ທີ່ມີການພົວພັນເຖິງການສໍ້ລາດບັງຫຼວງ ໃຫ້ບັນດາອົງການສື່ມວນຊົນຢ່າງທັນການ ຖືກຕ້ອງຕາມກົດໝາຍ.
ທີສາມ, ເຊີດຊູຄວາມຮັບຜິດຊອບຂອງບັນດາຄະນະພັກ, ຍົກສູງຄວາມສາມາດນຳພາ ກຳລັງສູ້ຮົບ ລັກສະນະນຳໜ້າ ເປັນແບບຢ່າງຂອງອົງການຈັດຕັ້ງພັກ ແລະພະນັກງານ ສະມາຊິກພັກ ໃນວຽກງານປ້ອງກັນ ຕ້ານການສໍ້ລາດບັງຫຼວງ.
ການຕໍ່ສູ້ປ້ອງກັນ ຕ້ານການສໍ້ລາດບັງຫຼວງ ແມ່ນການຕໍ່ສູ້ໃນກະໂຕແຕ່ລະອົງການ ການຈັດຕັ້ງ ກົມກອງ, ການຕໍ່ສູ້ໃນກະໂຕແຕ່ລະຄົນ. ເພາະສະນັ້ນ, ຕ້ອງຍົກສູງຄວາມສາມາດນຳພາ ແລະກຳລັງສູ້ຮົບຂອງການຈັດຕັ້ງພັກ, ເປັນຕົ້ນແມ່ນການຈັດຕັ້ງຮາກຖານພັກ, ຍົກສູງຄວາມຮັບຜິດຊອບ ລັກສະນະນຳໜ້າ ເປັນແບບຢ່າງຂອງຜູ້ນຳໜ້າອົງການ ການຈັດຕັ້ງ ກົມກອງ. ຕ້ອງຕິດແໜ້ນວຽກງານປ້ອງກັນ ຕ້ານການສໍ້ລາດບັງຫຼວງ ກັບການຮ່ຳຮຽນ ແລະເຮັດຕາມແບບຢ່າງຄຸນສົມບັດຂອງທ່ານປະທານໂຮ່ຈິີມິນ ແລະປະຕິບັດມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ກ່ຽວກັບການກໍ່ສ້າງພັກ.
ພິເສດ, ບັນດາຄະນະພັກ ການຈັດຕັ້ງພັກ ແລະຜູ້ນຳໜ້າຕ້ອງມີຄວາມຕັດສິນໃຈການເມືອງສູງ, ສຸມການຊີ້ນຳນຳພາຢ່າງເປັນປະຈຳ ລຽນຕິດ, ສ້າງການປະສານສົມທົບຢ່າງແໜ້ນແຟ້ນ, ລະດົມກຳລັງແຮງສັງລວມຂອງລະບົບການເມືອງ ແລະທົ່ວສັງຄົມໃນວຽກງານປ້ອງກັນ ຕ້ານການສໍ້ລາດບັງຫຼວງ. ນີ້ແມ່ນປັດໄຈອັນດັບໜຶ່ງທີ່ຮັບປະກັນການປະຕິບັດວຽກງານປ້ອງກັນ ຕ້ານການສໍ້ລາດບັງຫຼວງ ຢ່າງມີປະສິດທິຜົນ. ຄວາມຕັດສິນໃຈການເມືອງແມ່ນຄຳໝັ້ນສັນຍາສູ້ຮົບຕ້ານການສໍ້ລາດບັງຫຼວງ, ມັນຕ້ອງໄດ້ສະແດງອອກດ້ວຍການກະທຳອັນລະອຽດຕ່າງໆ ແລະໄດ້ປະກາດເປີດເຜີຍໃຫ້ປະຊາຊົນຮູ້, ໃຫ້ປະຊາຊົນຊ່ວຍເຫຼືອ ແລະຕິດຕາມກວດກາ. ດ້ານໜຶ່ງ, ຕົນເອງຕ້ອງເປັນແບບຢ່າງປະຕິບັດ, ປະຕິບັດຕາມຢ່າງເຂັ້ມງວດຂໍ້ກຳນົດຕ່າງໆກ່ຽວກັບຄວາມຊື່ສັດສຸດຈະລິດ ແລະລະບຽບວິໄນ, ປະຕິບັດການປະຢັດ, ບໍ່ຟຸ່ມເຟືອຍ, ບໍ່ເຫັນແກ່ສິດຜົນປະໂຫຍດສ່ວນຕົວ, ຕື່ນຕົວປະຕິບັດຂໍ້ກຳນົດຕ່າງໆຂອງພັກ, ກົດໝາຍຂອງ, ພົວພັນໃກ້ຊິດຕິດແທດກັບມະຫາຊົນ. ດ້ານອື່ນ, ຕ້ອງມີຄວາມຮັບຜິດຊອບສະແດງໃຫ້ສັງຄົມ ໃຫ້ມວນຊົນເຫັນ ທ່າທີອັນຈະແຈ້ງ ແລະຄວາມຕັດສິນໃຈເດັດດ່ຽວຕ້ານການສໍ້ລາດບັງຫຼວງ ຄວາມຫຍໍ້ທໍ້ ເຊິ່ງບໍ່ພຽງແຕ່ດ້ວຍຄຳເວົ້າ ດ້ວຍໜັງສືເປັນລາຍລັກອັກສອນ ດ້ວຍການຮ້ອງປ່າວລວມໆເທົ່ານັ້ນ ຫາກຕ້ອງດ້ວຍການກະທຳອັນລະອຽດ ແທດຈິງທີ່ສຸດ ແລະມີປະສິດທິຜົນທີ່ເຫັນໄດ້ໃນພາກຕົວຈິງ.
ບັນດາຄະນະພັກ ການຈັດຕັ້ງພັກຕ້ອງມີຈິດໃຈສູ້ຮົບສູງ, ເປັນເຈົ້າການປ້ອງກັນກີດກັ້ນ ຄົ້ນເຜີຍ ແລະແກ້ໄຂຢ່າງເຂັ້ມງວດດ້ວຍຕົນເອງ ຕໍ່ການກະທຳສໍ້ລາດບັງຫຼວງ. ຕໍ່ຄະດີສໍ້ລາດບັງຫຼວງທີ່ຮ້າຍແຮງ ສັບສົນ, ຄະນະພັກ ຜູ້ນຳໜ້າຄະນະພັກ ຕ້ອງເປັນເຈົ້າການສະເໜີໃຫ້ບັນດາອົງການທີ່ກ່ຽວຂ້ອງລາຍງານ ເພື່ອມີແຜນນະໂຍບາຍແກ້ໄຂ, ຮັບປະກັນຄວາມຮີບດ່ວນ, ຖືກຕ້ອງຕາມຂໍ້ກຳນົດກົດໝາຍ. ຕ້ອງກຳນົດການປ້ອງກັນ ຕ້ານການສໍ້ລາດບັງຫຼວງ ແມ່ນວຽກງານຈຸດໜັກໃຈກາງ, ແມ່ນບັນທັດຖານໜຶ່ງເພື່ອຕີລາຄາພະນັກງານ ສະມາຊິກພັກ, ກະກຽມບຸກຄະລາກອນໃຫ້ແກ່ກອງປະຊຸມໃຫຍ່ຂັ້ນຕ່າງໆ ກ້າວເຖິງກອງປະຊຸມໃຫຍ່ທົ່ວປະເທດຄັ້ງທີ XII. ຕີລາຄາສູງບັນດາອົງການ ການຈັດຕັ້ງ ກົມກອງທີ່ຄົ້ນເຜີຍການສໍ້ລາດບັງຫຼວງດ້ວຍຕົນເອງ; ແກ້ໄຂຢ່າງເຂັ້ມງວດບັນດາອົງການ ການຈັດຕັ້ງ ກົມກອງທີ່ຫຼົບຫຼີກ ປົກປິດ ປ່ອຍມືໃຫ້ການສໍ້ລາດບັງຫຼວງ. ຕ້ອງເຫັນໄດ້ວ່າ, ເຖິງວ່າບັນດາອົງການພາລະບົດບາດ ຈະມີຄວາມຕັດສິນໃຈ ເງື່ອນໄຂ ແລະພາຫະນະພຽງພໍເຖິງລະດັບໃດກໍ່ຕາມ ກໍ່ຍາກທີ່ຈະຄົ້ນເຜີຍ ແລະແກ້ໄຂຢ່າງທັນການ ເຖິງຖອງຕໍ່ການກະທຳສໍ້ລາດບັງຫຼວງ ຖ້າຫາກຜູ້ຕ້ອງຫາໄດ້ຮັບການປິດບັງ ອະນຸໂລມຈາກພາຍໃນ.
ແຕ່ລະຄະນະພັກ, ແຕ່ລະຂະແໜງ ຂັ້ນ ຕ້ອງກຳນົດຂົງເຂດ ບໍລິເວນຈຸດໜັກໃຈກາງເພື່ອລວມສູນການຊີ້ນຳ; ເອົາໃຈໃສ່ເຖິງບັນດາຂົງເຂດຈຸດໜັກທີ່ເຄີຍເກີດການສໍ້ລາດບັງຫຼວງ ເຊັ່ນ: ການຄຸ້ມຄອງ ແລະນຳໃຊ້ທີ່ດິນ; ກາກໍ່ສ້າງພື້ນຖານ; ການຮັບ ຈ່າຍງົບປະມານ, ການນຳໃຊ້ຊັບສິນເງິນທອງຂອງຫຼວງ; ຊັບພະຍາກອນ ສິ່ງແວດລ້ອມ; ການຫັນເປັນຫຸ້ນສ່ວນ ແລະການເງິນໃນວິສາຫະກິດ; ປະຕິບັດນະໂຍບາຍສະຫວັດດີການສັງຄົມ; ວຽກງານການຈັດຕັ້ງພະນັກງານ...
ທີສີ່, ຍົກສູງກຳລັງຄວາມສາມາດ, ການປະສານສົມທົບລະຫວ່າງບັນດາອົງການ ກົມກອງສະເພາະກິດກ່ຽວກັບການປ້ອງກັນ ຕ້ານການສໍ້ລາດບັງຫຼວງ; ເພີ່ມທະວີການຕິດຕາມກວດກາ ແລະຕ້ານການສໍ້ລາດບັງຫຼວງ ໃນບັນດາອົງການປົກປັກຮັກສາກົດໝາຍ; ສຸມໃສ່ຊີ້ນຳນຳພາວຽກງານຄົ້ນເຜີຍ ສືບສວນ ແລະແກ້ໄຂກໍລະນີ ຄະດີສໍ້ລາດບັງຫຼວງໃຫຍ່ ຢ່າງເຂັ້ມງວດ ທັນການ.
ລະບົບບັນດາອົງການ ກົມກອງສະເພາກິດກ່ຽວກັບການປ້ອງກັນ ຕ້ານການສໍ້ລາດບັງຫຼວງ ຕ້ອງໄດ້ຮັບການປັບປຸງບູລະນະທາງດ້ານການຈັດຕັ້ງ ພາລະບົດບາດ ໜ້າທີ່. ບັນດາອົງການເຫຼົ່ານີ້ຕ້ອງມີມາດຕະການເພື່ອກຳຈັດດັດແກ້ໂດຍໄວ ຂໍ້ບົກພ່ອງຈຸດອ່ອນຕ່າງໆໃນການປະຕິບັດພາລະບົດບາດ ໜ້າທີ່ຂອງຕົນ, ຍົກສູງປະສິດທິຜົນໃນການຄົ້ນເຜີຍ ແລະແກ້ໄຂບັນດາການກະທຳສໍ້ລາດບັງຫຼວງ, ສຸມໃສ່ບັນດາຄະດີສໍ້ລາດບັງຫຼວງໃຫຍ່. ຕ້ອງຍົກສູງຄຸນສົມບັດ ແລະຄວາມສາມາດຂອງຖັນແຖວພະນັກງານ ຂ້າລັດຖະການຂະແໜງຕຸລາການເວົ້າລວມ, ພິເສດແມ່ນຖັນແຖວພະນັກງານສືບສວນ ໄອຍະການ ຜູ້ພິພາກສາທີ່ເຮັດການດຳເນີນຄະດີແກ້ໄຂບັນດາຄະດີສໍ້ລາດບັງຫຼວງ. ກໍ່ສ້າງ ແລະຈັດຕັ້ງປະຕິບັດຂໍ້ກຳນົດກົດລະບຽບຕ່າງໆຢ່າງມີປະສິດທິຜົນ ແນໃສ່ສ້າງໃຫ້ມີການປະສານສົມທົບຢ່າງຄົບຊຸດຂອງບັນດາອົງການພາລະບົດບາດໃນວຽກງານປ້ອງກັນ ຕ້ານການສໍ້ລາດບັງຫຼວງ.
ວຽກງານຕໍ່ສູ້ປ້ອງກັນ ຕ້ານການສໍ້ລາດບັງຫຼວງ ຕ້ອງປະເຊີນໜ້າຢ່າງເປັນປະຈຳກັບສິ່ງທ້າທາຍ ຄວາມຫຍໍ້ທໍ້ຕ່າງໆ ໃນສັງຄົມ, ໃນສິ່ງແວດລ້ອມທີ່ກະທົບກະເທືອນໄວ, ພາໃຫ້ຄົນເຮົາຖືກເສຍຕົວໂດຍງ່າຍ ຖ້າຫາກບໍ່ມີຄຸນສົມບັດ ມີຫຼັກໝັ້ນການເມືອງອັນໜັ້ກແໜ້ນ ແລະມີຈະລິຍະທຳ ຈັນຍາບັນອັນຜ່ອງໃສ. ເພາະສະນັ້ນ ບັນດາອົງການ ກົມກອງສະເພາະກິດກ່ຽວກັບວຽກງານຕ້ານການສໍ້ລາດບັງຫຼວງ ຕ້ອງດຳເນີນການສຳຫຼວດກວດຄືນ ແລະສະເໜີນຳຂັ້ນທີ່ມີສິດຕັດສິນ ໃຫ້ດັດແປງຢ່າງທັນການບັນດາຂໍ້ກຳນົດທີ່ຍັງບໍ່ທັນສອດຄ່ອງ ຫຼືຂໍ້ກຳນົດທີ່ມີຊ່ອງຫວ່າງອາດຈະຖືກສວຍໃຊ້, ແກ້ໄຂຂໍ້ຄ້າງຄາຕ່າງໆໃນວິວັດການເຄື່ອນໄຫວ. ຢາກຕ້ານການສໍ້ລາດບັງຫຼວງໄດ້ຮັບປະສິທິຜົນ ກ່ອນອື່ນໝົດແມ່ນຕ້ອງຕ້ານການສໍ້ລາດບັງຫຼວງ ຢູ່ໃນກະໂຕບັນດາອົງການຕ້ານການສໍ້ລາດບັງຫຼວງ. ຈັດວາງບັນດາພະນັກງານທີ່ມີຄຸນສົມບັດສິນທຳ ຕັ້ງຕໍ່ບໍລິສຸດ ຊື່ສັດສຸດຈະລິດ, ມີຄວາມສາມາດດ້ານວິຊາສະເພາະ, ມີຄວາມກ້າຫານ ກ້າປະເຊີນໜ້າຕໍ່ອັນຕະລາຍ ຄວາມຫຍຸ້ງຍາກເພື່ອເຮັດວຽກງານປ້ອງກັນ ຕ້ານການສໍ້ລາດບັງຫຼວງ.
ເມື່ອການສໍ້ລາດບັງຫຼວງເກີດຂຶ້ນແລ້ວ ແມ່ນຈຳເປັນຕ້ອງເດັດດ່ຽວແກ້ໄຂ, ແກ້ໄຂຢ່າງເຂັ້ມງວດ ຖືກຕ້ອງຕາມການກຳນົດຂອງກົດໝາຍ, ບໍ່ມີເຂດຫ້າມ. ພວກເຮົາຕ້ອງປະຕິບັດຕາມຄວາມສະເໝີພາບຕໍ່ໜ້າກົດໝາຍຢ່າງເຂັ້ມງວດ ໂດຍບໍ່ມີອະພິສິດ ບໍ່ມີການຍົກເວັ້ນ. ດ້ານໜຶ່ງ, ຕ້ອງປາບປາມຢ່າງເຄັ່ງຄັດຕໍ່ພວກສໍ້ລາດບັງຫຼວງ ແຕ່ດ້ານອື່ນກໍ່ຕ້ອງມີນະໂຍບາຍຜ່ອນຜັນອະໄພໂທດ ໃຫ້ຜູ້ທີ່ມີການກະທຳສໍ້ລາດບັງຫຼວງ ແຕ່ໄດ້ເປັນເຈົ້າການໃຫ້ການ ແກ້ໄຂຜົນຮ້າຍກ່ອນເວລາຖືກເຜີຍຟ້ອງ, ສ້າງສິ່ງແວດລ້ອມສັງຄົມອັນຕັ້ງໜ້າເພື່ອແນໃສ່ກີດກັ້ນການສໍ້ລາດບັງຫຼວງ.
ກ່ອນອື່ນໝົດ, ຕ້ອງຍູ້ແຮງການແກ້ໄຂບັນດາກໍລະນີ ຄະດີສໍ້ລາດບັງຫຼວງທີ່ຮ້ອຍແຮງແລະສັບສົນ ຖືກຕ້ອງຕາມການກຳນົດຂອງກົດໝາຍ. ຕ້ອງດຳເນີນຢ່າງມີຈຸດໜັກໃຈກາງ, ສຸມໃສ່ແກ້ໄຂບັນດາຄະດີສໍ້ລາດບັງຫຼວງທີ່ມີລັກສະນະໝູ່ຄະນະ ມີການຈັດຕັ້ງ. ເດັດດ່ຽວແກ້ໄຂຄະດີພະນັກງານສໍ້ລາດບັງຫຼວງຢ່າງທັນການ ເປີດເຜີຍ; ຮິບຮື້ເອົາຊັບສິນສໍ້ລາດບັງຫຼວງ ຊັບສິນທີ່ມີບໍ່ເກີດຈາກການສໍ້ລາດບັງຫຼວງ ມາເປັນຂອງຫຼວງ. ຊາບຊືມ ແລະປະຕິບັດຢ່າງເຂັ້ມງວດຫຼັກການ: ເມື່ອມີກໍລະນີ ຄະດີແມ່ນຕ້ອງໄດ້ພິສູດຄວາມຈິງ ທຳຄວາມກະຈ່າງແຈ້ງ; ມີປະກົດການຕ້ອງໂທດແມ່ນຕ້ອງໄດ້ດຳເນີນການສືບສວນ; ມີບົດສະຫລຸບຜົນການສືບສວນແມ່ນຕ້ອງພິຈາລະນາຟ້ອງສານ; ມີບົດກ່າວຫາແມ່ນຕ້ອງໄດ້ຄົ້ນຄວ້າພິພາກສາຢ່າງເຂັ້ມງວດ ທັນການ.
ເພີ່ມທະວີການຊີ້ນຳນຳພາວຽກງານປ້ອງກັນ ຕ້ານການສໍ້ລາດບັງຫຼວງຢູ່ທ້ອງຖິ່ນ, ເອົາໃຈໃສ່ເຖິງການປັບປຸງບູລະນະການຈັດຕັ້ງ, ຍົກສູງຄຸນນະພາບ ປະສິດທິຜົນການເຄື່ອນໄຫວຂອງບັນດາຄະນະຮັບຜິດຊອບວຽກງານພາຍໃນຂອງພັກແຂວງ ພັກກຳແພງນະຄອນ ເພື່ອເຮັດໃຫ້ດີໜ້າທີ່ເປັນເສນາທິການ ໃຫ້ຄະນະພັກທ້ອງຖິ່ນໃນວຽກງານປ້ອງກັນ ຕ້ານການສໍ້ລາດບັງຫຼວງ. ສະຫາຍເລຂາຄະຂະພັກຕ້ອງຮັບຜິດຊອບວຽກງານປ້ອງກັນ ຕ້ານການສໍ້ລາດບັງຫຼວງໂດຍກົງ.
ທີຫ້າ, ເພີ່ມທະວີຍິ່ງກວ່າອີກວຽກງານກວດກາ ຕິດຕາມກວດກາຂອງຄະນະພັກ, ຂອງລະບົບການເມືອງ ແລະທົ່ວສັງຄົມ; ນຳເອົາເນື້ອໃນວຽກງານປ້ອງກັນ ຕ້ານການສໍ້ລາດບັງຫຼວງເຂົ້າໃນໂຄງການກວດກາ ຕິດຕາມກວດກາປະຈຳປີ.
ຄະນະກຳມະການກວດກາຂັ້ນຕ່າງໆຂອງພັກຕ້ອງດຳເນີນການກວດກາ
ແກ້ໄຂຢ່າງທັນການຕໍ່ສະມາຊິກພັກທີ່ມີປະກົດການສໍ້ລາດບັງຫຼວງ;
ມີຮູບການປະຕິບັດວິໄນຕໍ່ກັບບັນດາອົງການຈັກຕັ້ງພັກ ແລະສະມາຊິກພັກທີ່ບໍ່ປະຕິບັດຢ່າງເຂັ້ມງວດຕາມຂໍ້ກຳນົດຕ່າງຂອງພັກແລະລັດ
ກ່ຽວກັບວຽກງານປ້ອງກັນ ຕ້ານການສໍ້ລາດບັງຫຼວງ ເຊັ່ນ: ລະເມີດກຳນົດເວລາ
ຫຼືບໍ່ປະຕິບັດການລາຍງານໄລ່ລຽງຊັບສົມບັດ, ເປີດເຜີຍ, ໂປ່ງໃສ, ຍົກຍ້າຍຕຳແໜ່ງທີ່ຕັ້ງເຮັດວຽກ...
ແລ້ວແຕ່ລັກສະນະຂອງການລະເມີດ ຈະມີຮູບການປະຕິບັດວິໄນທີ່ສອດຄ່ອງ. ເອົາວຽກງານປ້ອງກັນ
ຕ້ານການສໍ້ລາດບັງຫຼວງເປັນໜຶ່ງໃນບັນດາຈຸດໜັກຂອງວຽກງານ, ເປັນເນື້ອໃນອັນສຳຄັນໜຶ່ງ
ເພື່ອສຳຫຼວດກວດກາຕາມກຳນົດເວລາ ຂອງຄະນະພັກຂັ້ນຕ່າງໆ. ອົງການກວດກາ,
ອົງການຮັບຜິດຊອບວຽກງານພາຍໃນຂອງພັກ ຕ້ອງປະສານສົມທົບຢ່າງແໜ້ນແຟ້ນກວ່າອີກ
ກັບບັນດາອົງການພາລະບົດບາດປ້ອງກັນ ຕ້ານການສໍ້ລາດບັງຫຼວງຂອງລັດ
ເພື່ອກວດກາ ຕິດຕາມກວດກາ ຄົ້ນເຜີຍ
ແກ້ໄຂຢ່າງທັນການ ແລະເປີດເຜີຍຜົນງານການແກ້ໄຂບັນດາອົງການຈັດຕັ້ງ
ພະນັກງານ ສະມາຊິກພັກທີ່ກະທຳຜິດ. ດຳເນີນການກວດກາ
ສຳຫຼວດກວດຄືນຢ່າງເປັນປະຈຳ ເພື່ອຕີລາຄາບົດບາດ ຄວາມຮັບຜິດຊອບຂອງບັນດາຄະນະພັກ
ອົງການການຈັດຕັ້ງພັກ ອຳນາດການປົກຄອງ ແລະຜູ້ນຳໜ້າສຳນັກງານອົງການ ກົມກອງຕ່າງໆ
ໃນວຽກງານປ້ອງກັນ ຕ້ານການສໍ້ລາດບັງຫຼວງ.
ໃນປີ 2014, ສືບຕໍ່ຈັດຕັ້ງບັນດາຄະນະປະຕິບັດງານກວດກາ ຕິດຕາມກວດກາ ຕໍ່ການກວດການກໍລະນີ ຄະດີຕ່າງໆ; ເລີ່ມຟ້ອງຮ້ອງ, ສືບສວນ, ຟ້ອງສານ, ພິຈາລະນາຕັດສິນຄະດີສໍ້ລາດບັງຫຼວງທີ່ເກີດຂຶ້ນຢູ່ບາງຂະແໜງການ ທ້ອງຖິ່ນ. ຄະນະຮັບຜິດຊອບວຽກງານພາຍໃນສູນກາງເປັນເຈົ້າພາບ ສົມທົບກັບບັນດາອົງການພາລະບົດບາດຂອງສູນກາງ, ບັນດາຄະນະພັກແຂວງ ກຳແພງນະຄອນ ປະຕິບັດການສຳຫຼວດກວດຄືນຢ່າງເປັນປະຈຳ ຕໍ່ບັນຊີລາຍຊື່ບັນດາກໍລະນີ ຄະດີສໍ້ລາດບັງຫຼວງທີ່ຮ້າຍແຮງ ສັບສົນ, ລາຍງານຕໍ່ຄະນະຊີ້ນຳສູນກາງ ເພື່ອຈະມີມາດຕະການຊີ້ນຳລວມສູນແກ້ໄຂຢ່າງຂາດຂັ້ນ, ບໍ່ໃຫ້ແກ່ຍາວ.
ເສີມຂະຫຍາຍບົດບາດຂອງບັນດາອົງການໂດຍປະຊາຊົນເລືອກຕັ້ງ, ແນວໂຮມປະເທດຊາດ ແລະບັນດາອົງຄະນະມະຫາຊົນຂັ້ນຕ່າງໆ ໃນວຽກງານປ້ອງກັນ ຕ້ານການສໍ້ລາດບັງຫຼວງ. ຄະນະກຳມາທິການຍຸຕິທຳຂອງສະພາແຫ່ງຊາດ ຕ້ອງມີແຜນການຕິດຕາມກວດກາ ຕໍ່ກັບການດຳເນີນແກ້ໄຂບາງຄະດີ ກໍລະນີສໍ້ລາດບັງຫຼວງ, ເປັນຕົ້ນແມ່ນບັນດາກໍລະນີ ຄະດີຮ້າຍແຮງ ສັບສົນ; ເພີ່ມທະວີການລາຍງານ ຊີ້ແຈ້ງອະທິບາຍກ່ຽວກັບການຄົ້ນເຜີຍ ແລະແກ້ໄຂການສໍ້ລາດບັງຫຼວງ. ປະຕິບັດກົນໄກຕິດຕາມກວດກາຂອງມະຫາຊົນ ແລະຫາງສຽງສັງຄົມ. ຄົ້ນຄວ້າສ້າງບັນດາຮູບການສອດຄ່ອງ ເພື່ອເປີດກວ້າງຂອບເຂດເຂົ້າຮ່ວມຂອງມະຫາຊົນໃນວຽກງານປ້ອງກັນ ຕ້ານການສໍ້ລາດບັງຫຼວງ, ເພີ່ມທະວີການຕິດຕາມກວດກາຂອງມະຫາຊົນຕໍ່ກັບການປະຕິບັດສິດອຳນາດຂອງບັນດາອົງການປົກປັກຮັກສາກົດໝາຍ. ມີວິທີແກ້ອັນສອດຄ່ອງເພື່ອໃຫ້ປະຊາຊົນກ່າວໂທດ ສ່ອງແສງການສໍ້ລາດບັງຫຼວງ ໃຫ້ອົງການລັດ, ເຊັ່ນ: ຈັດຕັ້ງການຮັບຕ້ອນປະຊາຊົນໃຫ້ດີ, ເປີດຕູ້ໄປຊະນີເອເລັກໂຕຼນິກ ໂທລະສັບສາຍດ່ວນ... ສ້າງໃຫ້ຈົນໄດ້ກົນໄກຕິດຕາມກວດກາ ກວດສອບອຳນາດທີ່ມີຄວາມສັກສິດ ມີປະສິດທິຜົນຢ່າງແທ້ຈິງ, ຫຼີກລ່ຽງບໍ່ໃຫ້ອຳນາດໃຫຍ່ໂພດ ລວມສູນໂພດ ແລະບໍ່ຖືກຕິດຕາມກວດກາ ເຊິ່ງຈະພາໃຫ້ເກີດພະຍາດອາດຍາສິດ, ສວຍໃຊ້ອຳນາດເກີນຄວນ, ຕົກໃສ່ຄວາມຜິດພາດຢ່າງຮ້າງແຮງ. ຖ້າຫາກບໍ່ອີງໃສ່ປະຊາຊົນ ການຕໍ່ສູ້ຕ້ານການສໍ້ລາດບັງຫຼວງກໍ່ຍາກທີ່ຈະໄດ້ຮັບຜົນສຳເລັດ.
ເສີມຂະຫຍາຍບົດບາດຂອງສື່ສິ່ງພິມ ແລະຄວາມເຫັນຂອງສາທາລະນະຊົນໃນວຽກງານປ້ອງກັນ ຕ້ານການສໍ້ລາດບັງຫຼວງ. ສື່ສິ່ງພິມແມ່ນໜຶ່ງໃນບັນດາເຄື່ອງມືທີ່ໄດ້ການໄດ້ງານ ແລະມີປະສິດທິຜົນໃນການສະກັດກັ້ນ ແລະເຜີຍແບການສໍ້ລາດບັງຫຼວງ. ກໍ່ສ້າງ ແລະປະຕິບັດກົນໄກນິຕິທຳອັນສັກສິດ ເພື່ອປົກປ້ອງຜູ້ກ່າວໂທດ ແລະຕໍ່ສູ້ຕ້ານການສໍ້ລາດບັງຫຼວງ. ພ້ອມກັນນັ້ນກໍ່ປາບປາມຢ່າງເຄັ່ງຄັດ ຕໍ່ຜູ້ສວຍໃຊ້ການຕ້ານການສໍ້ລາດບັງຫຼວງເພື່ອເສກສັນປັ້ນແຕ່ງ ຫຼືກ່າວໂທດຜິດ ຕູ່ຫາ ທຳຮ້າຍຜູ້ອື່ນຍ້ອນສິ່ລຊຸກຍູ້ອະກຸສົນ.
ຮຽນບັນດາສະຫາຍ,
ການຕໍ່ສູ້ປ້ອງກັນ ຕ້ານການສໍ້ລາດບັງຫຼວງ ແມ່ນວຽກງານທີ່ສຳຄັນທີ່ສຸດ, ມັນພົວພັນເຖິງການພັດທະນາແບບຍືນຍົງຂອງປະເທດຊາດ ຂອງລະບອບການເມືອງ, ແຕ່ກໍ່ຫຍຸ້ງຍາກ ສັບສົນທີ່ສຸດ. ຍ້ອນ ການສໍ້ລາດບັງຫຼວງແມ່ນ “ຂໍ້ບົກພ່ອງທີ່ມີມາແຕ່ກຳເນີດ” ຂອງອຳນາດ, ມັນສະແດງອອກຢູ່ພາຍໃນພວກເຮົາ, ພົວພັນເຖິງຜົນປະໂຫຍດວັດຖຸ ເງິນຄຳ ກຽດສັກສີຂອງອົງການຈັດຕັ້ງ ແລະບຸກຄົນມະນຸດ; ແຕະຕ້ອງເຖິງຜູ້ມີຕຳແໜ່ງ ມີສິດອຳນາດ. ພັກແລະລັດເຮົາໄດ້ຮູ້ເຫັນແຕ່ກ່ອນການ ແລະໄດ້ຊີ້ນຳແກ້ໄຂຫຼາຍເທື່ອ, ໄດ້ແກ້ໄຂເລື່ອງນີ້ຢ່າງຂ້ຽວຂາດ ດັ່ງນັ້ນຈຶ່ງໄດ້ຄືທຸກວັນນີ້. ແຕ່ເປັນອັນຈະແຈ້ງວ່າ, ຍັງມີຫຼາຍວຽກທີ່ຕ້ອງເຮັດ ແລະຈະຕ້ອງເຮັດຍາວນານ ເດັດດ່ຽວກວ່າອີກ, ດ້ວຍຄວາມຕັດສິນໃຈສູງກວ່າອີກ, ທົນທານ, ໜຽວແໜ້ນ, ບໍ່ອາດຟ້າວຟັ່ງຮ້ອນຮົນໄດ້. ກໍ່ຕ້ອງມີສະຕິລະວັງຕົວ ຕໍ່ກັບກົນອຸບາຍຂອງບັນດາອິດທິກຳລັງສັດຕູ, ພວກຄົນຜູ້ຮ້າຍ ທີ່ຢາກສວຍໃຊ້ການຕໍ່ສູ້ຕ້ານການສໍ້ລາດບັງຫຼວງ ເພື່ອເວົ້າໂຢກດ້ານບໍ່ດີ, ປ້າຍສີ ທຳລາຍພັກກອມມູນິດຫວຽດນາມ ລັດຫວຽດນາມ ແລະລະບອບ ສັງຄົມນິຍົມ.
ຈາກບັນດາຜົນສຳເລັດ ບົດຮຽນປະສົບການຂອງເວລາທີ່ຜ່ານມາ, ດ້ວຍມານະຈິດຕັດສິນໃຈຂອງທົ່ວພັກ ທົ່ວປວງຊົນ ແລະທົ່ວທັງລະບົບການເມືອງ, ພວກເຮົາເຊື່ອໝັ້ນວ່າ ວຽກງານປ້ອງກັນ ຕ້ານການສໍ້ລາດບັງຫຼວງ ໃນເວລາທີ່ຈະມາເຖິງ ຈະສືບຕໍ່ມີການຫັນປ່ຽນຢ່າງຕັ້ງໜ້າ ຈະແຈ້ງກວ່າອີກ; ແນ່ນອນວ່າ ການສໍ້ລາດບັງຫຼວງຈະຖືກກີດກັ້ນ ແລະຖືກຍູ້ຖອຍເປັນແຕ່ລະກ້າວ; ກໍ່ສ້າງພັກ-ລັດເຮົາໃຫ້ນັບມື້ນັບໃສສະອາດ ໝັ້ນຄົງເຂັ້ມແຂງ, ຕອບສະໜອງໄດ້ກັບຄວາມຮຽກຮ້ອງຕ້ອງການຂອງພາລະກິດປະຕິວັດ ແລະຄວາມມຸ່ງມາດປາຖະໜາຂອງປະຊາຊົນ./.
ຂຽນໂດຍ:
ສະຫາຍເລຂາທິການໃຫຍ່ ຫງວຽນຝູຈ້ອງ
ຫົວໜ້າຄະນະຊີ້ນຳສູນກາງ ກ່ຽວກັບການປ້ອງກັນ
ຕ້ານການສໍ້ລາດບັງຫຼວງ