ຄຳປາໄສຂອງສະຫາຍເລຂາທິການໃຫຍ່ ພັກກອມມູນິດຫວຽດນາມ ໃນພິທີອັດກອງປະຊຸມສູນກາງຄັ້ງທີ 9 ສະໄໝທີ XI
ສະຫາຍເລຂາທິການໃຫຍ່ ຫງວຽນຝູຈ້ອງ ກ່າວຄຳປາໄສອັດກອງປະຊຸມ (ພາບ: TTXVN)
1- ກອງປະຊຸມໄດ້ພິຈາລະນາຜົນການສະຫລຸບ ແລະ ເປັນເອກະພາບປະກາດໃຊ້ມະຕິຕົກລົງໃໝ່ວ່າດ້ວຍການກໍ່ສ້າງ ແລະຂະຫຍາຍວັດທະນະທຳ, ຄົນຫວຽດນາມ ເພື່ອຕອບສະໜອງຄວາມຮຽກຮ້ອງຕ້ອງການພັດທະນາປະເທດຊາດແບບຍືນຍົງ
ກອງປະຊຸມເປັນເອກະພາບໃຫ້ທັດສະນະວ່າ: ພາຍຫຼັງກວ່າ 15 ປີແຫ່ງການປະຕິບັດມະຕິສູນກາງພັກຄັ້ງທີ 5 ສະໄໝທີ VIII ວ່າດ້ວຍວັດທະນະທຳ, ຈິນຕະນາການທິດສະດີກ່ຽວກັບວັດທະນະທຳຂອງພວກເຮົາ ໄດ້ມີບາດກ້າວຂະຫຍາຍຕົວ; ລະບຽບກົດໝາຍກ່ຽວກັບວັດທະນະທຳໄດ້ຮັບການກໍ່ສ້າງ ແລະປັບປຸງບູລະນະເປັນແຕ່ລະກ້າວ; ຊີວິດວັດທະນະທຳນັບມື້ນັບອຸດົມສົມບູນ. ບັນດາຄຸນຄ່າວັດທະນະທຳອັນເປັນມູນເຊື້ອຂອງຊາດ ໄດ້ຮັບການສືບທອດ ແລະເສີມຂະຫຍາຍ; ມາດຕະຖານວັດທະນະທຳ ຄຸນສົມບັດໃໝ່ຫຼາຍຢ່າງ ໄດ້ເປັນຮູບເປັນຮ່າງຂຶ້ນ. ຜະລິດຕະພັນວັດທະນະທຳ ສິນລະປະ - ວັນນະຄະດີ ນັບມື້ນັບຫຼາຍຮູບຫຼາຍແບບ. ເຕັກໂນໂລຊີສື່ສານ, ເປັນຕົ້ນແມ່ນສື່ມວນຊົນ, ໄດ້ຂະຫຍາຍຕົວຢ່າງແຂງແຮງ. ຂະບວນການວັດທະນະທຳຫຼາຍຂະບວນການມີປະສິດທິຜົນຕົວຈິງ. ມູນເຊື້ອວັດທະນະທຳຄອບຄົວ ວົງຕະກູນ ຊຸມຊົນ… ໄດ້ຮັບການເສີມຂະຫຍາຍ. ການຫັນການເຄື່ອນໄຫວວັດທະນະທຳເປັນແບບສັງຄົມ ໄດ້ເປີດກວ້າງ, ປະກອບສ່ວນຫຼາຍພໍຄວນເຂົ້າໃນການສ້າງສະຖາບັນວັດທະນະທຳຕ່າງໆ. ມໍລະດົກວັດທະນະທຳທີ່ມີຮູບ ແລະອະຮູບຫຼາຍແຫ່ງຫຼາຍຢ່າງ ໄດ້ຮັບການພິທັກຮັກສາ ແລະປະຕິສັງຂອນ. ຮີດຄອງ ປະເພນີຫຼາຍຢ່າງ ຂອງຄົນຊົນເຜົ່າສ່ວນນ້ອຍ ໄດ້ຮັບການຄົ້ນຄວ້າ ເກັບກຳຮຽບຮຽງ ແລະຟື້ນຟູຄືນໃໝ່. ສິດເສລີພາບໃນການປະດິດຄິດແຕ່ງຂອງນັກປະພັນ ໄດ້ຮັບການເຄົາລົບນັບຖື; ສິດເສລີພາບໃນການເຊື່ອຖື ສາສະໜາ ແລະການດຳເນີນຊີວິດວັດທະນະທຳ ຂອງປະຊາຊົນໄດ້ຮັບການເຊີດຊູ. ການສັງສັນ, ການຮ່ວມມືສາກົນທາງດ້ານວັດທະນະທຳ ໄດ້ຮັບຄວາມເອົາໃຈໃສ່ ແລະເບ່ງບານດ້ວຍຫຼາຍສີສັນ.
ແຕ່ຫາກວ່າ, ເມື່ອທຽບກັບຜົນສຳເລັດໃນບັນດາຂົງເຂດການເມືອງ ເສດຖະກິດ ການປ້ອງກັນປະເທດ ປ້ອງກັນຄວາມສະຫງົບ ການຕ່າງປະເທດ, ກໍ່ເຫັນວ່າຜົນສຳເລັດໃນຂົງເຂດວັດທະນະທຳຍັງໜ້ອຍ, ບໍ່ທັນພໍເພື່ອກະທົບຢ່າງມີປະສິດທິຜົນໃສ່ການກໍ່ສ້າງຜູ້ຄົນ ແລະ ສິ່ງແວດລ້ອມວັດທະນະທຳທີ່ສົດໃສ. ສະພາບຄວາມເສື່ອມໂຊມທາງດ້ານແນວຄິດການເມືອງ ຄຸນສົມບັດສິນທຳ ແບບແຜນດຳລົງຊີວິດ ໃນພັກ ແລະໃນສັງຄົມມີທ່າອຽງເພີ່ມຂຶ້ນ. ຊີວິດວັດທະນະທຳຢູ່ຫຼາຍແຫ່ງຍັງຂາດເຂີນ ບໍ່ອຸດົມ; ຄວາມແຕກໂຕນກັນດ້ານການຊົມໃຊ້ວັດທະນະທຳ ລະຫວ່າງເຂດພູຜາຫ່າງໄກສອກຫຼີກ ກັບເຂດຕົວເມືອງ ແລະໃນບັນດາຊັ້ນວັນນະປະຊາຊົນ ໄດ້ຮັບການຮັດແຄບເຂົ້າຢ່າງຊັກຊ້າ. ສິ່ງແວດລ້ອມວັດທະນະທຳຂາດຄວາມສົດໃສ, ຖືກແຊກຊືມຈາກພາຍນອກ, ຝືນກັບຮີດຄອງປະເພນີອັນດີງາມ; ໄພສັງຄົມ ອາດຊະຍາກຳ ມີທ່າອຽງເພີ່ມຂຶ້ນ. ວັນນະກຳສິນລະປະ ວັນນະຄະດີທີ່ມີຄຸນຄ່າສູງທາງດ້ານແນວຄິດ ແລະສິນລະປະກຳ ແມ່ນມີໜ້ອຍທີ່ສຸດ. ການເຄື່ອນໄຫວທິດສະດີ ຕຳນິຕິຊົມວັດທະນະທຳ ວັນນະຄະດີກ້າວບໍ່ທັນກັບພຶດຕິກຳແຫ່ງການປະພັນ. ການພິທັກຮັກສາ, ເສີມຂະຫຍາຍຄຸນຄ່າຂອງມໍລະດົກວັດທະນະທຳ ມີປະສິດທິຜົນບໍ່ສູງ, ໄພແຫ່ງການເສື່ອນເສຍມໍລະດົກຍັງບໍ່ທັນຖືກສະກັດກັ້ນ. ລະບົບສື່ມວນຊົນບໍ່ມີແຜນກຳນົດຢ່າງວິທະຍາສາດ ຈຶ່ງກໍ່ໃຫ້ເກີດການຟຸມເຟືອຍດ້ານແຫຼ່ງພະລັງ; ບາງອົງການສື່ມວນຊົນມີປະກົດການຫ່າງເຫີນຈາກອຸດົມຄະຕິ ຈຸດປະສົງ, ແລ່ນຕາມລົດນິຍົມທຳມະດາສາມັນ. ການເຄື່ອນໄຫວຮ່ວມມື ແລກປ່ຽນວັດທະນະທຳ ກັບຕ່າງປະເທດຍັງຖືກຈຳກັດ; ຍັງມີສະພາບການຮັບເອົາຜະລິດຕະພັນວັດທະນະທຳຈາກພາຍນອກຢ່າງງ່າຍດາຍ ໂດຍບໍ່ມີການເລືອກເຟັ້ນ ອັນໄດ້ກະທົບແບບຫຍໍ້ທໍ້ເຖິງວັດທະນະທຳພາຍໃນປະເທດ.
ບັນດາດ້ານອ່ອນ ຄວາມຈຳກັດເທິງນີ້ມີຫຼາຍສາເຫດ, ແຕ່ຕົ້ນຕໍແມ່ນຍ້ອນຄະນະພັກ ແລະອຳນາດການປົກຄອງຫຼາຍແຫ່ງ ຍັງບໍ່ທັນເອົາໃຈໃສ່ຢ່າງພຽງພໍເຖິງຂົງເຂດນີ້; ບໍ່ນຳພາ ຊີ້ນຳຢ່າງຈົດຈໍ່ໃກ້ຊິດ. ການຫັນມະຕິຕົກລົງເປັນອັນລະອຽດ ເປັນນິຕິກຳຍັງຊັກຊ້າ ແລະຂາດເງື່ອນໄຂຮັບປະກັນການປະຕິບັດ. ການຄຸ້ມຄອງລັດທາງດ້ານວັດທະນະທຳ ໄດ້ຮັບການປ່ຽນແປງໃໝ່ຢ່າງຊັກຊ້າ; ບາງທີ່ ບາງບ່ອນໄດ້ເບິ່ງເບົາ, ຊ້ຳບໍ່ໜຳຍັງປ່ອຍປະລະຫຼວມ; ລະບຽບວິໄນບໍ່ເຂັ້ມງວດ. ການລົງທຶນໃຫ້ວັດທະນະທຳບໍ່ສົມຄູ່ ແລະຍັງກະແຈກກະຈ່າຍ. ຍັງບໍ່ທັນເອົາໃຈໃສ່ກຳບັນຫາໃໝ່ທາງດ້ານວັດທະນະທຳ ໃຫ້ໄດ້ຢ່າງທັນການ ເພື່ອຈະລົງທຶນຖືກຕ້ອງຕາມທິດທາງ ແລະມີປະສິດທິຜົນ. ຍັງບໍ່ທັນເອົາໃຈໃສ່ຢ່າງຖືກຕ້ອງເໝາະສົມ ເຖິງວຽກງານອົບຮົມ ກໍ່ສ້າງຖັນແຖວພະນັກງານການນຳ ພະນັກງານຄຸ້ມຄອງວັດທະນະທຳຂັ້ນຕ່າງໆ...
ກ່ຽວກັບທິດທາງ ໜ້າທີ່ໃນໄລຍະເວລາທີ່ຈະມາເຖິງ, ສູນກາງຊີ້ແຈ້ງວ່າ, ຕ້ອງສືບຕໍ່ສືບທອດ ເພີ່ມເຕີມ ແລະ ຂະຫຍາຍບັນດາທັດສະນະຂອງພັກ ກ່ຽວກັບການກໍ່ສ້າງ ແລະພັດທະນາວັດທະນະທຳ ທີ່ໄດ້ລະບຸໄວ້ໃນມະຕິສູນກາງພັກຄັ້ງທີ 5 ສະໄໝທີ VIII; ພ້ອມກັນນັ້ນກໍ່ເນັ້ນໜັກແນວຄິດທີ່ວ່າ: ວັດທະນະທຳເປັນພື້ນຖານຈິດໃຈຂອງສັງຄົມ, ເປັນຈຸດໝາຍ ກຳລັງໝູນ ແລະ ແຫຼ່ງພະລັງພາຍໃນອັນສຳຄັນ ໃຫ້ແກ່ການພັດທະນາປະເທດຊາດແບບຍືນຍົງ; ວັດທະນະທຳຕ້ອງໄດ້ຕັ້ງໃນແຖວດຽວກັນກັບເສດຖະກິດ ການເມືອງ ສັງຄົມ; ການເຕີບໂຕເສດຖະກິດ ຕ້ອງໄປຄຽງຄູ່ກັບການພັດທະນາວັດທະນະທຳ, ປະຕິບັດຄວາມກ້າວໜ້າ ແລະສະເໝີພາບທາງສັງຄົມ. ໃນການກໍ່ສ້າງວັດທະນະທຳຕ້ອງເອົາການກໍ່ສ້າງ ພັດທະນາຜູ້ຄົນທີ່ມີມະນຸດສະທຳ ຄຸນສົມບັດສິນທຳ ມີແບບແຜນດຳລົງຊີວິດທີ່ດີງາມ ເປັນຈຸດໜັກໃຈກາງ; ກໍ່ສ້າງສິ່ງແວດລ້ອມວັດທະນະທຳ (ຄອບຄົວ ຊຸມຊົນ ແລະສັງຄົມ) ທີ່ສົດໃສເປັນແກ່ນສານ.
ພື້ນຖານວັດທະນະທຳທີ່ພວກເຮົາກໍ່ສ້າງ ເປັນພື້ນຖານວັດທະນະທຳທີ່ກ້າວໜ້າ ເຂັ້ມຂົ້ນໄປດ້ວຍສີສັນຂອງຊາດ, ເປັນເອກະພາບໃນຄວາມຫຼາກຫຼາຍຂອງວົງຄະນາຍາດແຫ່ງຊາດຫວຽດນາມ, ດ້ວຍບັນດາລັກສະນະພິເສດສະເພາະຄື ຊາດ ຄວາມເມດຕາ ປະຊາທິປະໄຕ ແລະວິທະຍາສາດ. ຖື້ນຖານວັດທະນະທຳຫວຽດນາມທີ່ກ້າວໜ້າ ແມ່ນວັດທະນະທຳຮັກຊາດ ແລະກ້າວໜ້າ ເຊິ່ງເນື້ອໃນແກ່ນສານຂອງມັນແມ່ນ ອຸດົມຄະຕິເອກະລາດແຫ່ງຊາດ ແລະສັງຄົມນິຍົມ ພາຍໃຕ້ແສງສະຫວ່າງຂອງລັດທິມາກ - ເລນິນ, ແນວຄິດໂຮ່ຈີມິນ ແລະ ຍອດແຍວັດທະນະທຳຂອງມະນຸດຊາດ ແນໃສ່ຈຸດໝາຍ ທຸກສິ່ງທຸກຢ່າງເພື່ອມະນຸດ, ທຸກສິ່ງທຸກຢ່າງເພື່ອອິດສະຫຼະເສລີ ຄວາມຜາສຸກ ແລະການພັດທະນາຢ່າງຮອບດ້ານ ອຸດົມສົມບູນຂອງທຸກໆຄົນ ໃນສາຍພົວພັນແບບກົມກຽວລະຫວ່າງບຸກຄົນ ແລະ ວົງຄະນາຍາດ, ລະຫວ່າງມະນຸດ ແລະໂລກທຳມະຊາດ. ສີສັນແຫ່ງຊາດຂອງວັດທະນະທຳຫວຽດນາມ ກວມດ້ວຍບັນດາຄຸນຄ່າທີ່ໝັ້ນຄົງ, ບັນດາຍອດແຍທີ່ໄດ້ຮັບການເພີ່ມພູນຄູນສ້າງຂຶ້ນມາ ໃນຫຼາຍພັນປີແຫ່ງການຕໍ່ສູ້ເພື່ອສ້າງຊາດ ແລະປົກປັກຮັກສາປະເທດຊາດ. ນັ້ນແມ່ນນ້ຳໃຈຮັກຊາດອັນແຮງກ້າ, ການຍົກຍໍຊາດ ແລະສ້າງຊາດໃຫ້ເຂັ້ມແຂງດ້ວຍຕົນເອງ, ນ້ຳໃຈຮ່ວມກັນສ້າງຄວາມສຳພັນປະສົມກົມກຽວລະຫວ່າງບຸກຄົນ - ຄອບຄົວ - ໝູ່ບ້ານ - ປະເທດຊາດ, ມີຄວາມເມດຕາກະລຸນາ ນິຍົມນັບຖືຍຸດຕິທຳ ມີທຳມະຄະຕິ, ຂະຫຍັນໝັ່ນພຽນ ແລະປະດິດສ້າງໃນການອອກແຮງງານ; ແມ່ນນ້ຳໃຈເສຍສະຫຼະອັນສູງສົ່ງ ທຸກສິ່ງທຸກຢ່າງເພື່ອເອກະລາດແຫ່ງຊາດ ເພື່ອຄວາມສຸກຂອງປະຊາຊົນ; ແມ່ນການປະພຶດຢ່າງສຸພາບ ສີວິໄລ, ດຳລົງຊີວິດແບບງ່າຍດາຍ ແລະໃສສະອາດ.
ຄົນຫວຽດນາມແມ່ນຜົນແຫ່ງການກັ່ນຕອງຍອດແຍຂອງວັດທະນະທຳຫວຽດນາມ. ເພາະສະນັ້ນ, ຂະບວນວິວັດການກໍ່ສ້າງ ແລະພັດທະນາວັດທະນະທຳຫວຽດນາມ ກໍ່ແມ່ນຂະບວນວິວັດແຫ່ງການປະຕິບັດແຜນຍຸດທະສາດພັດທະນາຊັບພະຍາກອນມະນຸດ, ກໍ່ສ້າງ ແລະເສີມຂະຫຍາຍແຫຼ່ງບຸກຄະລາກອນ, ເປັນຕົ້ນແມ່ນແຫຼ່ງບຸກຄະລາກອນຄຸນນະພາບສູງ. ນີ້ແມ່ນຂອດຈຸດໜັກໃຈກາງຂອງພາລະກິດກໍ່ສ້າງຮາກຖານຈິດໃຈ ກຳລັງບົ່ມຊ້ອນວັດທະນະທຳ ແລະລະບອບສັງຄົມນິຍົມຂອງພວກເຮົາ. ພວກເຮົາຫັນການເຄື່ອນໄຫວວັດທະນະທຳຕ່າງໆ ເຂົ້າໃສ່ການກໍ່ສ້າງຄົນຫວຽດນາມທີ່ຂະຫຍາຍຕົວຢ່າງຮອບດ້ານ: ສະຕິປັນຍາ ຄຸນສົມບັດສິນທຳ ຮ່າງກາຍແຂງແຮງ ຄວາມສາມາດປະດິດສ້າງ ສະຕິພົນລະເມືອງ ສະຕິປະຕິບັດຕາມກົດໝາຍ, ເຮັດໃຫ້ວັດທະນະທຳກາຍເປັນປັດໃຈຊຸກຍູ້ໃຫ້ທຸກຄົນປັບປຸງບູລະນະບຸກຄະລິກລັກສະນະດ້ວຍຕົນເອງ. ຫຼໍ່ຫຼອມລວບລວມ ແລະກໍ່ສ້າງລະບົບຄຸນຄ່າຫຼັກຂອງຄົນຫວຽດນາມ ໃນສະໄໝແຫ່ງການຫັນເປັນອຸດສາຫະກຳ ທັນສະໄໝ ແລະເຊື່ອມໂຍງສາກົນ. ນຳເອົາເນື້ອໃນອົບຮົມສຶກສາຄຸນສົມບັດມະນຸດສະທຳ ຄຸນສົມບັດພົນລະເມືອງ ເຂົ້າໃນການເຄື່ອມໄຫວອົບຮົມສຶກສາຕ່າງໆ ຂອງສັງຄົມ. ເຊີດຊູຄວາມຮັບຜິດຊອບສ່ວນຕົວຕໍ່ຕົນເອງ ຕໍ່ຄອບຄົວ ແລະສັງຄົມ. ສົ່ງເສີມ ອຸປະຖຳຄ້ຳຊູ ທະວີຄູນອັນດີງາມ ອັນຕັ້ງໜ້າ ອັນຖືກອັນແມ່ນ; ປົກປັກຮັກສາບັນດາຄ່າມະນຸດໃນຊີວິດສັງຄົມ. ຕໍ່ສູ້ຍູ້ຖອຍອັນຊົ່ວຮ້າຍອັບປີ ຄວາມຫຼ້າຫຼັງ; ຕ້ານບັນດາທັດສະນະຜິດພາດ ທີ່ເປັນຜົນສະທ້ອນບໍ່ດີເຖິງການກໍ່ສ້າງວັດທະນະທຳ ແລະຄວາມໝັ້ນຄົງທາງສັງຄົມ.
ພວກເຮົາຕ້ອງສືບຕໍ່ກໍ່ສ້າງສິ່ງແວດລ້ອມວັດທະນະທຳທີ່ສົກໃສ, ເສີມຂະຫຍາຍບັນດາຄຸນຄ່າຄອບຄົວ ຊຸມຊົນ ແລະຊາດຫວຽດນາມ. ປະຕິບັດແຜນຍຸດທະສາດກ່ຽວກັບຄອບຄົວຫວຽດນາມ. ໂຮງຮຽນແຕ່ລະຫຼັງຕ້ອງເປັນໃຈກາງວັດທະນະທຳທີ່ແທ້ຈິງ ໃນການອົບຮົມສຶກສາ ຝຶກຝົນຫຼໍ່ຫຼອມທາງດ້ານອຸດົມຄະຕິ ຄຸນສົມບັດສິນທຳ ແບບແຜນດຳລົງຊີວິດ; ອົບຮົມສຶກສາມູນເຊື້ອວັດທະນະທຳໃຫ້ຊາວໜຸ່ມ. ກໍ່ສ້າງຊີວິດວັດທະນະທຳຢູ່ເຂດຊຸມຊົນ ຢູ່ໂຮງຮຽນ ສຳນັກງານອົງການ ກົມກອງ ພື້ນຖານຜະລິດທຸລະກິດ; ປະຕິບັດເປັນຢ່າງດີຂໍ້ກຳນົດກົດລະບຽບປະຊາທິປະໄຕຢູ່ຮາກຖານ. ສ້າງໃຫ້ມີການຫັນປ່ຽນຢ່າງແຂງແຮງໃນການກໍ່ສ້າງແບບດຳລົງຊີວິດສີວິໄລ, ເປັນຕົ້ນແມ່ນໃນການແຕ່ງດອງ ການງານບຸນງານກຸສົນ ການເຮັກພິທີງັນສົບ. ສຸມໃສ່ປ່ຽນແປງໃໝ່, ຍົກສູງຄວາມສັກສິດ ປະສິດທິຜົນ ຂອງການຄຸ້ມຄອງລັດທາງດ້ານວັດທະນະທຳ ໃນເງື່ອນໄຂພັດທະນາເສດຖະກິດຕະຫຼາດ, ເຊື່ອມໂຍງສາກົນ ແລະການພັດທະນາແບບກ້າວກະໂດດຂອງເຕັກໂນໂລຊີສື່ສານ ໂທລະຄົມມະນາຄົມ. ຍູ້ແຮງການຫັນທັດສະນະ ແນວທາງຂອງພັກກ່ຽວກັບວັດທະນະທຳ ເປັນລະອຽດ ເປັນນິຕິກຳ ແລະ ມີກົດຂໍ້ບັງຄັບລົງໂທດຢ່າງເຂັ້ມງວດເພື່ອຈັດຕັ້ງປະຕິບັດມະຕິ, ກີດກັ້ນການກະທຳຜິດພາດຕ່າງໆໃນເວລາເຄື່ອນໄຫວວັດທະນະທຳ. ເປັນເຈົ້າການຕໍ່ສູ້ ປ້ອງກັນແລະຕ້ານ ປະກົດການເສື່ອມໂຊມປ່ຽນທາດທາງດ້ານແນວຄິດ ຄຸນສົມບັດສິນທຳ, “ການຫັນປ່ຽນໂດຍຕົນເອງ” “ການປ່ຽນແປງໂດຍຕົນເອງ” ໃນຂົງເຂດວັດທະນະທຳ. ຄຸ້ມຄອງການນຳໃຊ້ການບໍລິການອິນເຕີແນັດ ແລະສື່ຂ່າວເອເລັກໂທນິກໃນອີນເຕີແນັດ ໃຫ້ດີກວ່າອີກ. ກີດກັ້ນຢ່າງມີປະສິດທິຜົນ ຕໍ່ກັບສະພາບການເຄື່ອນໄຫວບໍ່ຖືກຕ້ອງຕາມຈຸດປະສົງຄະຕິທຳ ຂອງບາງອົງການສື່ຂ່າວ ພິມຈຳໜ່າຍ ອົງການວັດທະນະທຳ ວັນນະຄະດີ, ກໍ່ຄືກີດກັ້ນສະພາບໝູບມົ້ນວົນໃນຂ່າວສານ ຜະລິດຕະພັນທີ່ຜິດເຂວ ຕານລົດນິຍົມທຳມະດາສາມັນ. ຕັ້ງໜ້າຕໍ່ສູ້ຕ້ານປະກົດການຊອດກະຈ້າ, ບັນດາຜະລິດຕະພັນທີ່ເປັນພິດຮ້າຍ, ບັນດາການກະທຳໄຮ້ວັດທະນະທຳ ຝືນວັດທະນະທຳ, ປະກອບສ່ວນປົກປ້ອງ ຮັກສາ ແລະເສີມຂະຫຍາຍບັນດາຄຸນຄ່າອັນດີງາມ ສີສັນວັດທະນະທຳຂອງຊາດ ແລະລັກສະນະເປັນເອກະພາບໃນຄວາມຫຼາກຫຼາຍ ຂອງວັດທະນະທຳຫວຽດນາມ.
ຂະຫຍາຍພາລະກິດວັດທະນະທຳ ສິນລະປະກຳ, ອຳນວຍຄວາມສະດວກທຸກຢ່າງໃຫ້ແກ່ການຄົ້ນຄວ້າ ປະດິດສ້າງຂອງນັກປະພັນ ສິນລະປິນ ເພື່ອໃຫ້ມີຫຼາຍບົດປະພັນທີ່ມີຄຸນຄ່າສູງທາງດ້ານແນວຄິດ ແລະດ້ານສິນລະປະ, ສ່ອງແສງຢ່າງຖືກຕ້ອງ ເລິກເຊິ່ງ ມີຊີວິດຊີວາເຖິງຊີວິດການເປັນຢູ່ ປະຫວັດສາດຂອງຊາດ ແລະການປ່ຽນແປງໃໝ່ປະເທດຊາດ. ເສີນຂະຫຍາຍບັນດາຄຸນຄ່າ ປັດໃຈຕັ້ງໜ້າ ໃນຄຸນສົມບັດ ວັດທະນະທຳ ສາສະໜາ; ສົ່ງເສີມບັນດາການເຄື່ອນໄຫວສາສະໜາສ້າງບຸນກຸສົນ ສ້າງຄວາມສີວິໄລ ຄວາມກ້າວໜ້າ ເພື່ອມະນຸດສະທຳ “ຊີວິດທີ່ດີ, ສາສະໜາທີ່ງາມ”; ກີດກັ້ນ ແລະຕຳໜິຕິຊົມ ບັນດາປະກົດການເຊື່ອຖືງົມງວາຍ ຊື້ຂາຍເທວະດາຟ້າແຖນ ກໍ່ຄືການກະທຳສວຍໃຊ້ສາສະໜາ ປອມຕົວສາສະໜາເພື່ອເຄື່ອນໄຫວຜິດກົດໝາຍ ຕ້ານຢັນທຳລາຍລະບອບການເມືອງ.
ກໍ່ສ້າງແຜນຍຸດທະສາດພັດທະນາຖັນແຖວພະນັກງານເຮັດວຽກງານວັດທະນະທຳ. ເພີ່ມທະວີແຫຼ່ງພະລັງໃຫ້ວັດທະນະທຳ. ຮັບເອົາຍອດແຍວັດທະນະທຳ ແລະບົດຮຽນໃນການພັດທະນາ ຄຸ້ມຄອງວັດທະນະທຳຂອງບັນດາປະເທດໃນໂລກ.
2- ກອງປະຊຸມເປັນເອກະພາບກ່ຽວກັບແນວຄິດຊີ້ນຳ, ກຳນົດທິດບູລະນະແຜນຮ່າງ ແລະກໍ່ສ້າງສະບັບຮ່າງຂອງເອກະສານຕ່າງໆ ທີ່ຈະນຳສະເໜີຕໍ່ກອງປະຊຸມຜູ້ແທນທົ່ວປະເທດຄັ້ງທີ XII ຂອງພັກ
ໂດຍຕີລາຄາສູງຕໍ່ການກະກຽມຂອງອະນຸກຳມະການເອກະສານ ແລະ ອະນຸກຳມະການເສດຖະກິດ-ສັງຄົມ, ສູນກາງເຫັນດີໂດຍພື້ນຖານກັບຮ່າງລາຍງານການເມືອງ ແລະຮ່າງລາຍງານທິດທາງ ໜ້າທີ່ພັດທະນາເສດຖະກິດ-ສັງຄົມ 5 ປີ (2016 - 2020). ພ້ອມກັນນັ້ນກໍ່ເນັ້ນໜັກຄວາມໝາຍ ຄວາມສຳຄັນຂອງກອງປະຊຸມໃຫຍ່ຄັ້ງທີ XII ໃນການສືບຕໍ່ປະຕິບັດໂຄງການການເມືອງຂອງພັກ (ສະບັບປັບປຸງເພີ່ມເຕີມ ຂະຫຍາຍຕື່ມປີ 2011), ລັດຖະທຳມະນູນປີ 2013 ແລະແຜນຍຸດທະສາດພັດທະນາເສດຖະກິດ-ສັງຄົມ 10 ປີ (2011 - 2020), ຈາກນັ້ນກໍ່ໄດ້ກຳນົດທິດໃຫ້ສອງອະນຸກຳມະການ ແລະບັນດາອົງການທີ່ກ່ຽວ ໃນການສືບຕໍ່ຄົ້ນຄ້ວາ ປັບປຸງບູລະນະໂຄງຮ່າງ ແລະສ້າງສະບັບຮ່າງຂອງບັນດາເອກະສານກອງປະຊຸມໃຫຍ່ ເພື່ອຈະນຳສະເໜີໃຫ້ກອງປະຊຸມສູນກາງພັກຄັ້ງທີ 10 ພິຈາລະນາ, ຕັດສິນຕົກລົງໃນທ້າຍປີນີ້.
ສູນກາງກຳນົດວ່າ ການກະກຽມບັນດາເອກະສານທີ່ຈະນຳສະເໜີໃຫ້ກອງປະຊຸມໃຫຍ່ຄັ້ງທີ XII ຕ້ອງສະແດງເຖິງຈິດໃຈ ສືບຕໍ່ເອົາໃຈໃສ່ວຽກງານກໍ່ສ້າງພັກ, ຍົກສູງຄວາມສາມາດນຳພາ ແລະກຳລັງສູ້ຮົບຂອງພັກ, ຍົກສູງຄວາມສັກສິດ ປະສິດທິຜົນການເຄື່ອນໄຫວຂອງບັນດາອົງການລັດ ແລະຂອງລະບົບການເມືອງທັງໝົດ; ເສີມຂະຫຍາຍກຳລັງແຮງແຫ່ງຄວາມມະຫາສາມັກຄີປວງຊົນທັງຊາດ, ຂຸດຄົ້ນທຸກໆແຫຼ່ງພະລັງ ວັດຖຸແລະຈິດໃຈ ໃນປະເທດແລະຕ່າງປະເທດ ເພື່ອຮັບໃຊ້ໃຫ້ແກ່ພາລະກິດປ່ຽນແປງໃໝ່ ຫັນເປັນອຸດສາຫະກຳ ແລະທັນສະໄໝ, ພັດທະນາປະເທດຢ່າງໄວ ແລະໝັ້ນຄົງຍືນຍົງ. ເອົາໃຈໃສ່ແກ້ໄຂບັນດາການພົວພັນໃຫຍ່ໃຫ້ດີ: ການພົວພັນລະຫວ່າງການປ່ຽນແປງໃໝ່ ຮັກສາຄວາມໝັ້ນທ່ຽງ ແລະການພັດທະນາ; ລະຫວ່າງປ່ຽນແປງໃໝ່ເສດຖະກິດ ແລະປ່ຽນແປງໃໝ່ການເມືອງ; ລະຫວ່າງເສດຖະກິດຕະຫຼາດ ແລະກຳນົດທິດສັງຄົມນິຍົມ; ລະຫວ່າງຂະຫຍາຍກຳລັງການພະລິດ ແລະກໍ່ສ້າງ ບູລະນະເປັນແຕ່ລະກ້າວການພົວພັນການຜະລິດສັງຄົມນິຍົມ; ລະຫວ່າງເພີ່ມຄວາມເຕີບໂຕເສດຖະກິດ ແລະພັດທະນາວັດທະນະທຳ ປະຕິບັດຄວາມກ້າວໜ້າແລະຍຸຕິທຳສັງຄົມ; ລະຫວ່າງການສ້າງສາ ແລະປົກປັກຮັກສາປະເທດຊາດສັງຄົມນິຍົມ; ລະຫວ່າງຄວາມເປັນເອກະລາດ ເປັນເຈົ້າຕົນເອງ ແລະການເຊື່ອມໂຍງສາກົນ; ລະຫວ່າງພັກນຳພາ ລັດຄຸມຄອງ ແລະປະຊາຊົນເປັນເຈົ້າ.
ໃນວິວັດການກະກຽມບັນດາເອກະສານ ຕ້ອງອີງໃສ່ມະຕິກອງປະຊຸມໃຫຍ່ຄັ້ງທີ XI, ບັນດາມະຕິຂອງສູນກາງພັກ ແລະຜົນຂອງການສະຫລຸບສັງລວມ 30 ປີແຫ່ງການປ່ຽນແປງໃໝ່, ພ້ອມກັນນັ້ນກໍ່ຕິດແໜ້ນນຳພຶດຕິກຳຂອງປະເທດຊາດບ້ານເມືອງ ເພື່ອຕີລາຄາບັນຫາຕ່າງໆຢ່າງພາວະວິໄສ ວິທະຍາສາດ; ໄຈ້ແຍກສາເຫດຕ່າງໆຢ່າງເລິກເຊິ່ງ; ຄາດຄະເນຢ່າງມີພື້ນຖານວິທະຍາສາດ ກ່ຽວກັບແງ່ຫວັງຂອງສະພາບການໃນປະເທດກໍ່ຄືຕ່າງປະເທດ ແລະຈາກນັ້ນເພື່ອວາງກຳນົດທິດທາງ ໜ້າທີ່ ແລະວິທີແກ້ໄຂຕົ້ນຕໍ ໃຫ້ແກ່ສະໄໝປະຈຳການໃໝ່ ອອກມາຢ່າງຖືກຕ້ອງ .
ພິເສດແມ່ນ ຕ້ອງລົງເລິກພິຈາລະນາໄຈ້ແຍກ ຕີລາຄາການຜັນຂະຫຍາຍປະຕິບັດບັນດາລະດັບຄາດໝາຍ ໜ້າທີ່ 5 ປີ 2010 - 2015; ຄາດຄະເນຄວາມສາມາດປະຕິບັດເປົ້າໝາຍຍຸດທະສາດພັດທະນາເສດຖະກິດ - ສັງຄົມ 10 ປີ (2010 - 2020), ເປັນຕົ້ນແມ່ນຄວາມສາມາດປະຕິບັດເປົ້າໝາຍສ້າງພື້ນຖານເພື່ອຮອດປີ 2020 ປະເທດເຮົາໂດຍພື້ນຖານກາຍເປັນປະເທດອຸດສາຫະກຳຕາມທິດທັນສະໄໝ. ເອົາໃຈໃສ່ທຳຄວາມກະຈ່າງແຈ້ງກ່ຽວກັບບາງບັນຫາໃຫຍ່ທີ່ສຳຄັນເຊັ່ນ:
ໃນຂົງເຂດເສດຖະກິດ: ສະພາບການປະຕິບັດແຜນນະໂຍບາຍພັດທະນາເສດຖະກິດ ສັງຄົມ ແລະສິ່ງແວດລ້ອມຢ່າງຍືນຍົງ ທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກມາ; ການດັດສົມລະດັບຄາດໝາຍ ແລະຊີ້ນຳການປະຕິບັດ ໂດຍຫັນມາໃຫ້ບຸລິມະສິດການຄວບຄຸມຈຳກັດເງິນເຟີ້, ຮັກສາສະຖຽນລະພາບຂອງເສດຖະກິດມະຫາພາກ, ໜ່ວງໜ່ຽວຄວາມເຕີບໂຕເສດຖະກິດໃນລະດັບສົມເຫດສົມຜົນ, ຮັບປະກັນສະຫວັດດິການສັງຄົມ; ການປະຕິບັດແຜນນະໂຍບາຍປ່ຽນແປງໃໝ່ຕົວແບບເຕີບໂຕເສດຖະກິດ, ຈັດວາງໂຄງປະກອບເສດຖະກິດຄືນໃໝ່, ປະຕິບັດ 3 ຂອດບຸກທະລຸຍຸດທະສາດ...; ກຳນົດບັນດາແຫຼ່ງພະລັງ ແລະກຳລັງໝູນໃໝ່ໃຫ້ແກ່ການພັດທະນາປະເທດຊາດ.
ໃນຂົງເຂດສັງຄົມ: ພ້ອມກັບບັນດາບັນຫາກ່ຽວກັບແຮງງານ, ວຽກເຮັດງານທຳ, ຊີວິດດ້ານວັດຖຸແລະຈິດໃຈຂອງປະຊາຊົນ, ຮັບປະກັນສະຫວັດດິການ ລະບຽບຄວາມສະຫງົບ ຄວາມປອດໄພສັງຄົມ,... ກໍ່ຕ້ອງໄຈ້ແຍກ ຕີລາຄາກ່ຽວກັບການປ່ຽນແປງໂຄງປະກອບສັງຄົມ, ການຜັນແຍກຮັ່ງມີທຸກຍາກ, ການແບ່ງຊັ້ນສັງຄົມຢູ່ປະເທດເຮົາໃນປັດຈຸບັນ; ຄວາມຮັບຮູ້ ແລະແກ້ໄຂບັນດາສາຍພົວພັນສັງຄົມ ພົວພັນຜົນປະໂຫຍດ, ຄວບຄຸມເຄາະບັງເອີນ ໄພສັງຄົມ ຄວາມຫຍໍ້ທໍ້ ຄວາມຂັດແຍ່ງ ການປະທະກັນໃນສັງຄົມ; ຄວາມຮັບຮູ້ ແລະປະຕິບັດບັນດານະໂຍບາຍສັງຄົມ; ປະຕິບັດຄວາມກ້າວໜ້າ ແລະຍຸດຕິທຳສັງຄົມ ໃນແຕ່ລະບາດກ້າວ ແລະແຕ່ລະນະໂຍບາຍການພັດທະນາ; ສະພາບແນວຄິດ ຈິດຕະພາບສັງຄົມ,...
ທາງດ້ານການປ້ອງກັນປະເທດ ປ້ອງກັນຄວາມສະຫງົບ ແລະການຕ່າງປະເທດ: ຕໍ່ໜ້າບັນດາການຜັນປ່ຽນສັບສົນ ທີ່ຄາດຄະເນຍາກ ຢູ່ໃນໂລກ ໃນພາກພື້ນ, ເປັນຕົ້ນແມ່ນສະພາບການຢູ່ທະເລຕາເວັນອອກໃນປັດຈຸບັນ, ຕ້ອງເອົາໃຈໃສ່ເປັນພິເສດເຖິງການປະຕິບັດໜ້າທີ່ປ້ອງກັນປະເທດ ປ້ອງກັນຄວາມສະຫງົບ ແລະການຕ່າງປະເທດ. ກຳນົດແຈ້ງຄວາມສະດວກ ຄວາມຫຍຸ້ງຍາກ ສິ່ງທ້າທາຍທີ່ພວມຕັ້ງອອກມາ ແລະແຜນນະໂຍບາຍ ນະໂຍບາຍ ມາດຕະການທີ່ຕ້ອງນຳໃຊ້ເພື່ອປົກປັກຮັກສາເອກະລາດ ອຳນາດອະທິປະໄຕ ຄວາມສະຫງົບແຫ່ງຊາດ ຜືນແຜ່ນດິນອັນຄົບຖ້ວນ ແລະສິ່ງແວດລ້ອມສັນຕິພາບ ສະຖຽນລະພາບໃຫ້ແກ່ການພັດທະນາ. ສັງເກດ ຕີລາຄາຢ່າງຖືກຕ້ອງເໝາະສົມ ກ່ຽວກັບໝາກຜົນຂອງການຕໍ່ສູ້ ຍູ້ຖອຍໄພອັນຕະລາຍ 4 ປະການທີ່ພັກເຮົາໄດ້ກ່າວເຕື່ອນ ເພື່ອມີນະໂຍບາຍ ມາດຕະການທີ່ສອດຄ່ອງ, ຮັບປະກັນການປະຕິບັດຢ່າງສຳເລັດຜົນແຜນຍຸດທະສາດປົກປັກຮັກສາປະເທດຊາດ ທີ່ກອງປະຊຸມສູນກາງພັກຄັ້ງທີ 8 ສະໄໝທີ XI ໄດ້ປະກາດໃຊ້ໃນມໍ່ໆນີ້.
ກ່ຽວກັບການກໍ່ສ້າງພັກ ແລະລະບົບການເມືອງ: ຕ້ອງໄຈ້ແຍກ ຕີລາຄາສະພາບຄວາມເປັນຈິງຢ່າງຖືກຕ້ອງ ແລະວາງບັນດາວິທີແກ້ອັນລະອຽດອອກມາ ເພ່ືອສືບຕໍ່ກໍ່ສ້າງພັກ ແລະລະບົບການເມືອງປະເທດເຮົາ ໃຫ້ນັບມື້ນັບປອດໃສ ໝັ້ນຄົງເຂັ້ມແຂງ ທັງດ້ານການເມືອງ ແນວຄິດ ການຈັດຕັ້ງ ພະນັກງານ ແລະ ແບບວິທີນຳພາ ຄຸ້ມຄອງ. ເອົາໃຈໃສ່ເປັນພິເສດເຖິງວຽກງານອົບຮົມສຶກສາການເມືອງ ແນວຄິດ, ປ້ອງກັນແລະຕ້ານການເສື່ອມໂຊມປ່ຽນທາດ “ການຫັນປ່ຽນໂດຍຕົນເອງ” “ການປ່ຽນແປງໂດຍຕົນເອງ”; ວຽກງານປົກປັກຮັກສາການເມືອງພາຍໃນ; ບັນຫາປະຕິບັດປະຊາທິປະໄຕ ແລະລະບຽບວິໄນ, ສາມັກຄີ ເປັນເອກະພາບໃນພັກ; ບັນຫາຄຸນນະພາບການນຳພາຂອງອົງການຈັດຕັ້ງຮາກຖາມພັກ; ກໍ່ສ້າງ ປະຕິບັດແຜນຍຸດທະສາດພະນັກງານ ແລະວຽກງານພະນັກງານ; ເນື້ອໃນ ຕົວແບບ ແບບວິທີກຳອຳນາດຂອງພັກ; ແບບວິທີນຳພາ ແລະລະບຽບການປະຕິບັດງານຂອງພັກ; ບັນຫາປະຕິບັດປະຊາທິປະໄຕຕິດກັບລະບຽບກົດໝາຍ ໃນການເຄື່ອນໄຫວຂອງລັດ; ຄວາມສັກສິດ ປະສິດທິຜົນຂອງການຄຸ້ມຄອງລັດ; ການແບ່ງງານ ປະສານສົມທົບ ແລະ ກວດກາອຳນາດ ຂອງບັນດາອົງການລັດ; ປ່ຽນແປງໃໝ່ເນື້ອໃນ ແລະແບບວິທີການເຄື່ອນໄຫວຂອງແນວໂຮມ ຂອງບັນດາອົງຄະນະການເມືອງ-ສັງຄົມ; ກໍ່ສ້າງພື້ນຖານປະຊາທິປະໄຕສັງຄົມນິຍົມ, ຮັບປະກັນປະຕິບັດສິດເປັນເຈົ້າຂອງປະຊາຊົນ, ເປັນຕົ້ນແມ່ນໃນການກວດກາ ຕິດຕາມກວດກາອຳນາດລັດ, ສ້າງຄວາມເຫັນດີເຫັນພ້ອມສັງຄົມ...
ຕາມທິດທາງຕ່າງໆເທິງນີ້, ບັນດາອະນຸກຳມະການ ແລະ ໜ່ວຍບັນນາທິການ ຕ້ອງເສີມຂະຫຍາຍສະຕິປັນຍາລວມໝູ່ເຖິງລະດັບສູງ, ດຶງດູດເອົາການປະກອບຄວາມຄິດຄວາມເຫັນຂອງທົ່ວພັກ ທົ່ວປະຊາຊົນ, ສຸມກຳລັງສ້າງເອກະສານສະບັບຮ່າງຕ່າງໆ ທີ່ເໝາະສົມກັບກອງປະຊຸມໃຫຍ່ຜູ້ແທນທົ່ວປະເທດຂອງພັກ, ຮັບປະກັນໃຫ້ລາຍງານການເມືອງເປັນເອກະສານໃຈກາງຢ່າງແທ້ຈິງຂອງກອງປະຊຸມໃຫຍ່ຄັ້ງທີ່ XII ເພື່ອນຳພາທົ່ວພັກ ທົ່ວປວງຊົນ ທົ່ວກອງທັບກໍ່ສ້າງ ແລະ ປົກປັກຮັກສາປະເທດຊາດໃນຊຸມປີ 2016 - 2021; ລາຍງານເສດຖະກິດ-ສັງຄົມ ແມ່ນລາຍງານສະເພາະທີ່ເລິກເຊິ່ງ ກ່ຽວກັບການປະຕິບັດໜ້າທີ່ພັດທະນາເສດຖະກິດ-ສັງຄົມໃນ 5 ປີທີ່ຈະມາເຖິງ.
3- ກອງປະຊຸມໄດ້ປຶກສາສົນທະນາຢ່າງປະຊາທິປະໄຕ, ພິຈາລະນາຢ່າງຮອບຄອບ ແລະ ເປັນເອກະພາບສະຫລຸບຄວາມ ໃຫ້ຄຳເຫັນຊີ້ນຳຕໍ່ບາງບັນຫາອື່ນທີ່ສຳຄັນ
ທີໜຶ່ງ, ກ່ຽວກັບການກະກຽມກອງປະຊຸມໃຫຍ່ຄະນະພັກຂັ້ນຕ່າງໆ ກ້າວເຖິງກອງປະຊຸມໃຫຍ່ຄັ້ງທີ XII ຂອງພັກ, ສູນກາງໄດ້ປະກອບຄຳຄິດຄຳເຫັນທີ່ລະອຽດ ເໝາະສົມຕ່າງໆຫຼາຍຢ່າງ ເຂົ້າໃນໃບສະເໜີ ແລະຮ່າງຄຳສັ່ງຂອງກົມການເມືອງ. ພ້ອມກັນນັ້ນກໍ່ເນັ້ນໜັກວ່າ ນີ້ແມ່ນວຽກງານຈຸດໜັກໃຈກາງ, ຕ້ອງໄດ້ຜັນຂະຫຍາຍປະຕິບັດໂດຍໄວ ດ້ວຍຈິດໃຈສືບຕໍ່ປ່ຽນແປງໃໝ່ຕາມທິດແທດຈິງ ມີປະສິດທິຜົນ, ເສີມຂະຫຍາຍປະຊາທິປະໄຕ ໄປຄຽງຄູ່ກັບຮັກສາຫຼັກການ ລະບຽບວິໄນຂອງພັກ; ຮັບປະກັນເພີ່ມທະວີຄວາມສາມັກຄີ ຍົກສູງຄວາມສາມາດນຳພາ ແລະກຳລັງສູ້ຮົບ ຂອງບັນດາອົງການຈັດຕັ້ງພັກ. ບັນດາຄະນະພັກຕ້ອງເອົາໃຈໃສ່ຊີ້ນຳນຳພາການປຶກສາສົນທະນາ ບັນດາເອກະສານສະບັບຮ່າງ ຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ແລະກອງປະຊຸມໃຫຍ່ຄະນະພັກຂັ້ນເທິງ; ພ້ອມກັນນັ້ນກໍ່ກະກຽມໃຫ້ດີທີ່ສຸດ ລາຍງາຍຕ່າງໆຂອງຄະນະບໍລິງານພັກຂອງຕົນ. ລາຍງານຂອງຄະນະບໍລິຫານງານພັກ ຕ້ອງຕີລາຄາສະພາບການປະຕິບັດມະຕິຂອງສະໄໝທີ່ຜ່ານມາ ຢ່າງຖືກຕ້ອງ; ຊີ້ແຈ້ງໝາກຜົນ ຜົນສຳເລັດຕ່າງໆທີ່ໄດ້ຮັບ, ບັນດາຈຸດອ່ອນ ຂໍ້ຈຳກັດຄົງຄ້າງ ແລະສາເຫດ, ບົດຮຽນປະສົບການ; ຈາກນັ້ນ ວາງທິດທາງ ຈຸດໝາຍ ໜ້າທີ່ ແລະວິທີແກ້ໃຫ້ສະໄໝທີ່ຈະມາເຖິງ. ວຽກງານກະກຽມບຸກຄະລາກອນ ແລະ ເລືອກຕັ້ງຄະນະບໍລິຫານງານພັກ ຕ້ອງປະຕິບັດຖືກຕ້ອງຕາມກົດລະບຽບ ຂໍ້ກຳນົດຂອງພັກ, ເພື່ອຄັດເລືອກ ແນະນຳ ແລະເລືອກຕັ້ງໄດ້ຜູ້ທີ່ເໝາະສົມ ມີຄຸນສົມບັດມາດຕະຖານພຽງພໍ ໃຫ້ເຂົ້າໃນຄະນະບໍລິຫານງານພັກ; ເອົາໃຈໃສ່ຄົ້ນເຜີຍ ແນະນຳບັນດາປັດໃຈໃໝ່ທີ່ມີແງ່ຫວັງດີ, ຮັບປະກັນອັດຕາສ່ວນພະນັກງານໜຸ່ມ ພະນັກງານຍິງ ພະນັກງານຄົນຊົນເຜົ່າ.
ຄະນະບໍລິຫານງານສູນກາງມອບໃຫ້ກົມການເມືອງ, ພາຍຫຼັງກອງປະຊຸມນີ້, ຮີບດ່ວນຊີ້ນຳ, ບູລະນະ ແລະປະກາດໃຊ້ ຄຳສັ່ງຂອງກົມການເມືອງໂດຍໄວ ເພື່ອກຳນົດທິດໃຫ້ທົ່ວພັກໃນການກະກຽມ ແລະດຳເນີນກອງປະຊຸມໃຫຍ່ຂັ້ນຕ່າງໆຢ່າງສຳເລັດຜົນ, ປະກອບສ່ວນເຂົ້າໃນຜົນສຳເລັດຂອງກອງປະຊຸມໃຫຍ່ຄັ້ງທີ XII ຂອງພັກ.
ທີສອງ, ກ່ຽວກັບລະບຽບການເລືອກຕັ້ງໃນພັກ, ສູນກາງໄດ້ປຶກສາພິຈາລະນາຢ່າງລະອຽດທີ່ສຸດ ແລະເປັນເອກະພາບປະກາດໃຊ້ ລະບຽບການເລືອກຕັ້ງໃໝ່ ຂອງຄະນະບໍລິຫານງານສູນກາງ ບົນພື້ນຖານສືບທອດບັນດາລະບຽບການເລືອກຕັ້ງໃນພັກ ທີ່ກົມການເມືອງສະໄໝກ່ອນປະກາດໃຊ້, ພ້ອມກັນນັ້ນກໍ່ປ່ຽນແປງ ເພີ່ມເຕີມບາງຂໍ້ກຳນົດໃໝ່ທີ່ສຳຄັນ, ເຊັ່ນ: ກ່ຽວກັບເປົ້າໝາຍ ແລະຂອບເຂດດັດສົມ; ກ່ຽວກັບການອອກສະໝັກຮັບເລືອກຕັ້ງ, ສະເໜີຕົວຜູ້ຮັບເລືອກຕັ້ງ ຂອງກຳມະການ, ກຳມະການຄະນະປະຈຳການ, ກຳມະການກົມການເມືອງ, ກຳມະການຄະນະເລຂາທິການ; ກ່ຽວກັບຈຳນວນເຫຼືອໃນບັນຊີລາຍຊື່ຜູ້ຮັບເລືອກຕັ້ງ; ກ່ຽວກັບການຂຶ້ນບັນຊີລາຍຊື່ຜູ້ຮັບເລືອກຕັ້ງ; ກ່ຽວກັບລຳດັບດຳເນີນ, ລະບຽບວິທີເລືອກຕັ້ງ...
ຄະນະບໍລິຫານງານສູນກາງຮຽກຮ້ອງບັນດາຄະນະພັກ ອົງການຈັດຕັ້ງພັກ ແລະສະມາຊິກພັກຕ້ອງເຂັ້ມງວດໃນການຊາບຊືມ, ຈັດຕັ້ງປະຕິບັດລະບຽບການເລືອກຕັ້ງນີ້ຢ່າງຖືກຕ້ອງ ຄົບຖ້ວນ, ປະກອບສ່ວນຮັບປະກັນປະຕິບັດກົດລະບຽບພັກຢ່າງຖືກຕ້ອງ, ປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ ແລະຮັກສາລະບຽບວິໄນຂອງພັກ, ສ້າງກຳລັງແຮງ ຄວາມສາມັກຄີ ເປັນເອກະພາບສູງໃນທົ່ວພັກ.
ທີສາມ, ກ່ຽວກັບການຕີລາຄາ ຖອດຖອນບົດຮຽນໃນການປະຕິບັດຂໍ້ກຳນົດສະບັບທີ 165 ຂອງກົມການເມືອງ ກ່ຽວກັບການເອົາຄະແນນສຽງໄວ້ວາງໃຈ, ຄະນະບໍລິຫານງານສູນກາງເປັນເອກະພາບສູງກັບໃບສະເໜີ ຂອງກົມການເມືອງ ແລະຢືນຢັນແຜນນະໂຍບາຍເອົາຄະແນນສຽງໄວ້ວາງໃຈນັ້ນແມ່ນຈຳເປັນ ຖືກຕ້ອງໂດຍສົມບູນ. ວຽກງານຊີ້ນຳຜັນຂະຫຍາຍປະຕິບັດ ການເອົາຄະແນນສຽງໄວ້ວາງໃຈ ໃນເວລາທີ່ຜ່ານມາ, ເບິ່ງລວມແມ່ນໄດ້ດຳເນີນຢ່າງເຂັ້ມງວດ ແໜ້ນແຟ້ນ, ຖືກຕ້ອງຕາມຈິດໃຈຂອງມະຕິສູນກາງພັກຄັ້ງທີ 4, ຖືກຕ້ອງຕາມຂໍ້ກຳນົດຂອງພັກ ແລະກົດໝາຍຂອງລັດ, ໄດ້ຮັບຄວາມເຫັນດີເຫັນພ້ອມ ສະໜັບສະໜູນຂອງພະນັກງານ ສະມາຊິກພັກ ແລະປະຊາຊົນສ່ວນຫຼວງຫຼາຍ. ການເອົາຄະແນນສຽງໄວ້ວາງໃຈ ແມ່ນການສື່ຂ່າວຕີລາຄາພະນັກງານຊ່ອງໜຶ່ງ ທີ່ມີຄຸນປະໂຫຍດຕັກເຕືອນຢ່າງທັນການ ເພື່ອໃຫ້ພະນັກງານແຍງເບິ່ງຕົນດ້ວຍຕົນເອງ, ເສີມຂະຫຍາຍຈຸດດີ ແກ້ໄຂຂໍ້ຂາດຕົກບົກພ່ອງເອົາເອງ, ປະກອບສ່ວນກີດກັ້ນຄວາມເສື່ອມໂຊມປ່ຽນທາດ, ປ້ອງກັນແລະຕ້ານການສໍ້ລາດບັງຫຼວງ ຄວາມຟຸມເຟືອຍ; ພ້ອມກັນນັ້ນກໍ່ເປັນມາດຕະການທີ່ດີ ເພື່ອຄຸ້ມຄອງ ແລະປົກປັກຮັກສາພະນັກງານ.
ແຕ່ວ່າ, ຍ້ອນວ່ານີ້ແມ່ນວຽກງານໃໝ່ ບໍ່ເຄີຍເຮັດມາກ່ອນ ດັ່ງນັ້ນຈຶ່ງມີຂໍ້ຂາດຕົກບົກພ່ອງ ເຊິ່ງຕ້ອງຖອດຖອນບົດຮຽນ ປັບປຸງເພີ່ມເຕີນ ແລະດັດສົມຢ່າງທັນການ. ສູນກາງຊົມເຊີຍຈິດໃຈເຂັ້ມງວດ ສະຫງຽມຄ່ຽມຄົມ ຈົງໃຈຮັບຟັງຂອງກົມການເມືອງ, ແລະເປັນເອກະພາບສູງກັບກົມການເມືອງ ກ່ຽວກັບຄວາມຕ້ອງການດັດແປງບາງຈຸດໃນຂໍ້ກຳນົດສະບັບທີ 165 ເພື່ອສືບຕໍ່ຜັນຂະຫຍາຍປະຕິບັດ, ຄືດັ່ງທີ່ກົມການເມືອງໄດ້ສະເໜີ.
ທີສີ່, ກ່ຽວກັບການສະຫລຸບສັງລວມການທົດລອງບໍ່ຈັດຕັ້ງສະພາປະຊາຊົນເມືອງ ຕາແສງໃນນະຄອນ, ຄະນະບໍລິຫານງານສູນກາງຮັບຮູ້ ຍ້ອງຍໍຊົມເຊີຍຄວາມຕັ້ງໜ້າພະຍາຍາມຂອງຄະນະພັກ ອຳນາດການປົກຄອງຂັ້ນຕ່າງໆ ແລະ ປະຊາຊົນບັນດາແຂວງ ກຳແພງນະຄອນທີ່ຖືກເລືອກເຮັດທົດລອງບໍ່ຈັດຕັ້ງສະພາປະຊາຊົນເມືອງ ຕາແສງໃນນະຄອນ ຕາມມະຕິສູນກາງພັກຄັ້ງທີ 5 ສະໄໝທີ X ແລະມະຕິສະບັບທີ 26 ຂອງສະພາແຫ່ງຊາດຊຸດທີ XII. ສູນກາງເຫັນດີເປັນເອກະພາບໂດຍພື້ນຖານກັບການສັງເກດ ຕີລາຄາສະພາບການ ແລະຄຳສະເໜີຂອງຄະນະກຳກັບວຽກງານພັກລັດຖະບານ, ຮຽກຮ້ອງໃຫ້ລັດຖະບານເຂັ້ມງວດໃນການຮັບເອົາຄວາມຄິດເຫັນຂອງສູນກາງ, ປັບປຸງບູລະນະແຜນຮ່າງ ສະເໜີໃຫ້ສະພາແຫ່ງຊາດພິຈາລະນາ ໃນຂະບວນວິວັດການກະກຽມສ້າງ ກົດໝາຍວ່າດ້ວຍການຈັດຕັ້ງອຳນາດການປົກຄອງທ້ອງຖິ່ນ, ເພື່ອແນໃສ່ສືບຕໍ່ປ່ຽນແປງໃໝ່ ຍົກສູງຄວາມສັກສິດ ປະສິດທິຜົນການເຄື່ອນໄຫວຂອງອຳນາດການປົກຄອງທ້ອງຖິ່ນ, ຖືກຕ້ອງຕາມຂໍ້ກຳນົດຂອງລັດຖະທຳມະນູນສະບັບ ປີ 2013. ໃນເວລາແຕ່ນີ້ຮອດເມື່ອກົດໝາຍວ່າດ້ວຍການຈັດຕັ້ງອຳນາດການປົກຄອງທ້ອງຖິ່ນ ໄດ້ຮັບການຜ່ານອະນຸມັດ ແລະ ມີຜົນສັກສິດ, ພວກເຮົາສືບຕໍ່ຮັກສາໜ້າທີ່ ສິດຂອບເຂດ ແລະ ການຈັດຕັ້ງເຄື່ອນໄຫວ ຂອງອຳນາດການປົກຄອງບັນດາທ້ອງຖິ່ນ ທີ່ຖືກເລືອກເຮັດທົດລອງບໍ່ຈັດຕັ້ງສະພາປະຊາຊົນ ໄວ້ຄືເກົ່າ.
ທີຫ້າ, ຕໍ່ກັບໂຄງການຈັດຕັ້ງຄະນະພັກຢູ່ຕ່າງປະເທດ, ຄະນະບໍລິຫານງານສູນກາງໄດ້ພິຈາລະນາແລະຕັດສິນຕົກລົງ: ຄະນະພັກຢູ່ຕ່າງປະເທດຂຶ້ນກັບສູນກາງພັກ, ຍອມຮັບການຊີ້ນຳນຳພາໂດຍກົງ ແລະເປັນປະຈຳຂອງຄະນະເລຂາທິການ; ມອບໃຫ້ກົມການເມືອງພິຈາລະນາ ຕັດສີນຕົກລົງກ່ຽວກັບພາລະບົດບາດ ໜ້າທີ່ ການຈັດຕັ້ງກົງຈັກ ຂອງຄະນະພັກຢູ່ຕ່າງປະເທດ ຕາມລະບຽບການດຳເນີນງານ.
ກອງປະຊຸມຄັ້ງທີເກົ້າ ຄະນະບໍລິຫານງານສູນກາງພັກໄດ້ສຳເລັດຜົນຢ່າງດີງາມ; ໜ້າທີ່ທີ່ວາງອອກມາໃຫ້ພວກເຮົາແຕ່ນີ້ຮອດທ້າຍສະໄໝທີ XI ແມ່ນຈະແຈ້ງທີ່ສຸດ ແຕ່ກໍ່ໜັກໜ່ວງທີ່ສຸດ. ເສດຖະກິດ - ສັງຄົມເຖິງວ່າໄດ້ມີການຫັນປ່ຽນຢ່າງຕັ້ງໜ້າ ຖືກທິດທາງກໍ່ຕາມ ແຕ່ກໍ່ຍັງຕ້ອງປະເຊີນໜ້າກັບຄວາມຫຍຸ້ງຍາກ ສິ່ງທ້າທາຍຕ່າງໆຫຼາຍຢ່າງ, ເປັນພິເສດແມ່ນ ບາງລະດັບຄາດໝາຍບັນລຸໄດ້ໃນລະດັບຕ່ຳທີ່ສຸດ ທຽບກັບຈຸດໝາຍ ໜ້າທີ່ ທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກ. ວຽກງານກໍ່ສ້າງພັກ ກໍ່ສ້າງລະບົບການເມືອງ, ການປະຕິບັດມະຕິສູນກາງພັກຄັ້ງທີ 4 ສະໄໝທີ XI, ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ໄດ້ຮັບຜົນສຳເລັດສຳຄັນເບື້ອງຕົ້ນ, ແຕ່ກໍ່ຍັງມີຈຸດອ່ອນ ຂໍ້ຈຳກັດບໍ່ໜ້ອຍ. ວັດທະນະທຳ - ພື້ນຖານຈິດໃຈຂອງສັງຄົມ, ກໍ່ມີປະກົດການຊຸດໂຊມ ຫຍໍ້ທໍ້ຫຼາຍຢ່າງ ເຊິ່ງຕ້ອງໄດ້ກຳຈັດດັດແກ້ ຄືດັ່ງທີ່ພວກເຮົາໄດ້ປຶກສາພິຈາລະນາໃນ 7 ວັນທີ່ຜ່ານມາ. ພິເສດແມ່ນ, ສະພາບການຢູ່ທະເລຕາເວັນອອກພວນຜັນແປຢ່າງສັບສົນ ເຄັ່ງຮ້ອນທີ່ສຸດ, ມັນຮຽກຮ້ອງໃຫ້ທົ່ວພັກ ທົ່ວປວງຊົນ ທົ່ວກອງທັບເຮົາຕ້ອງທຸ່ນທ່ຽງ ສະຫຼາດສ່ອງໃສທີ່ສຸດ, ເພີ່ມທະວີຄວາມສາມັກຄີ ທົ່ວປະເທດເປັນຈິດໜຶ່ງໃຈດຽວກັນ ເດັດດ່ຽວປົກປັກຮັກສາເອກະລາດ ອຳນາດອະທິປະໄຕ ແລະຜືນແຜ່ນດີນອັນຄົບຖ້ວນ ຂອງປະເທດຊາດ; ພ້ອມກັນນັ້ນກໍ່ຮັກສາສິ່ງແວດລ້ອມສັນຕິພາບ ສະຖຽນລະພາບ ເພື່ອສ້າງສາ ແລະພັດທະນາປະເທດຊາດ.
ຂ້າພະເຈົ້າຂໍສະເໜີໃຫ້ກຳມະການສູນກາງພັກແຕ່ລະສະຫາຍ ຈົ່ງຮັບຮູ້ຢ່າງຄົບຖ້ວນ ແລະຍົກສູງກວ່າອີກ ຄວາມຮັບຜິດຊອບອັນສັກກະລະບູຊາ ແລະໜັກໜ່ວງຂອງຕົນ, ຕັ້ງໜ້າພະຍາຍາມສູ້ຊົນສຳເລັດຢ່າງດີເດັ່ນ ໜ້າທີ່ຕຳແໜ່ງວຽກງານທີ່ໄດ້ຮັບມອບໝາຍ, ປະກອບສ່ວນນຳພາການຈັດຕັ້ງປະຕິບັດຢ່າງສຳເລັດຜົນ ມະຕິກອງປະຊຸມໃຫຍ່ຄັ້ງທີ XI, ບັນດາມະຕິຂອງສູນກາງ, ມະຕິຂອງກອງປະຊຸມຄັ້ງນີ້, ພ້ອມກັນນັ້ນກໍ່ກະກຽມໃຫ້ດີທີ່ສຸດ ກອງປະຊຸມໃຫຍ່ຄະນະພັກຂັ້ນຕ່າງໆ ແລະກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ./.
ຂຽນໂດຍ ຫງວຽນຝູຈ້ອງ
ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ
