ເພື່ອເອກະລາດ ອິດສະຫລະພາບຂອງຊາດ, ເພື່ອຜືນແຜ່ນດິນອັນຄົບຖ້ວນ ທີ່ສັກກະລະບູຊາ ຂອງປະເທດຊາດ, ສົມກຽດກັບການມອບໝາຍ ແລະ ຄວາມໄວ້ເນື້ອເຊື່ອໃຈ ຂອງປະຊາຊົນ
ສະຫາຍເຈືອງເຕິນຊາງ, ກຳມະການກົມການເມືອງສູນກາງພັກ, ປະທານປະເທດ ສສ ຫວຽດນາມ. (ພາບ: TTXVN)
ກ່ອນໜ້ານີ້ 69 ປີ, ໃນລະດູຮ່ວງໂຮຍປີ 1945, ປະຊາຊົນຫວຽດນາມ, ພາຍໃຕ້ຄັນທຸງຂອງພັກກອມມູນິດ, ໄດ້ດຳເນີນການປະຕິວັດເດືອນສິງຫາທີ່ຍິ່ງໃຫຍ່ໃນປະວັດສາດຂອງຊາດເຮົາ: ທັບມ້າງໂສ້ຄາປົກຄອງຂອງລະບອບລ່າເມືອງຂຶ້ນ ສັກດິນາ; ຍາດເອົາເອກະລາດແຫ່ງຊາດຄືນມາໄດ້; ສະຖາປະນາປະເທດສາທາລະນະລັດປະຊາທິປະໄຕຫວຽດນາມຂຶ້ນ ຊຶ່ງແມ່ນລັດຂອງປະຊາຊົນ ແລະເພື່ອປະຊາຊົນ; ປະຊາຊົນເຮົາຈາກບ່ອນເປັນຂີ້ຂ້າໜ້າຂ້ອຍ ໄດ້ກາຍເປັນເຈົ້າຂອງປະເທດຊາດ ເປັນເຈົ້າຊາຕາກຳຂອງຕົນ. ວັນທີ 2 ກັນຍາ 1945, ທ່ານປະທານໂຮ່ຈີມິນ ໄດ້ປະກາດຢ່າງສະຫງ່າຜ່າເຜີຍຕໍ່ໂລກ ກ່ຽວກັບການກຳເນີດເກີດຂຶ້ນຂອງປະເທດຫວຽດນາມເອກະລາດ ອິດສະລະພາບ ແລະຢືນຢັນຊາດຫວຽດນາມທັງປວງຈະນຳໃຊ້ຈິດໃຈ ແລະ ກຳລັງ, ຊີວິດ ແລະ ຊັບສິນທັງໝົດຂອງຕົນ ເພື່ອປົກປັກຮັກສາຄວາມເປັນເອກະລາດ ອິດສະລະພາບນັ້ນ. ໃນເກືອບ 70 ປີທີ່ຜ່ານມາ, ປະຊາຊົນເຮົາໄດ້ຜ່ານຜ່າຄວາມຫຍຸ້ງຍາກ ສິ່ງທ້າທາຍບໍ່ຈັກວ່າເທົ່າໃດເພື່ອສ້າງສາ ພັດທະນາປະເທດ, ຍົກສູງຊີວິດການເປັນຢູ່ຂອງປະຊາຊົນ, ຄືກັບຄຳສັ່ງສອນຂອງທ່ານປະທານໂຮ່ຈີມິນ ທີ່ວ່າ: ປະເທດຊາດມີເອກະລາດ ຫາກປະຊາຊົນບໍ່ໄດ້ຮັບສິດເສລີ ບໍ່ມີຄວາມຜາສຸກ, ຄວາມເປັນເອກະລາດນັ້ນກໍ່ບໍ່ມີຄວາມໝາຍຫຍັງເລີຍ. ພ້ອມກັນນັ້ນ, ປະຊາຊົນເຮົາກໍ່ໄດ້ເສຍສະຫລະເລືອດເນື້ອເຫື່ອໄຄບໍ່ຈັກວ່າເທົ່າໃດ ໃນການຕີເອົາຊະນະພວກສັດຕູຜູ້ຮຸກຮານ ເພື່ອປົກປັກຮັກສາເອກະລາດ ອິດສະຫລະພາບ ອຳນາດອະທິປະໄຕ ເອກະພາບ ແລະຜືນແຜ່ນດິນອັນຄົບຖ້ວນຂອງປະເທດຊາດ.
ໃນໂລກປັດຈຸບັນ, ຂະບວນການໂລກາພິວັດພວມເກີດຂຶ້ນຢ່າງແຂງແຮງ, ມີການພົວພັນຫລາຍສາຍທີ່ແຊກຊ້ອນກັນຢ່າງສັບສົນ, ທັງຮ່ວມມື ທັງແກ່ງແຍ້ງກັນ ຕໍ່ສູ້ກັນຢ່າງເຄັ່ງຮ້ອນ ລະຫວ່າງບັນດາປະເທດ, ລະຫວ່າງບັນດາພື້ນຖານການເມືອງ ເສດຖະກິດ ວັດທະນະທຳທີ່ຕ່າງກັນ, ດັ່ງນັ້ນ ຄວາມຈະເລີນຮຸ່ງເຮືອງ ຫຼືຄວາມເປັນຕາຍຂອງແຕ່ລະຊາດ ແຕ່ລະປະເທດ ບໍ່ເປັນພຽງເລື່ອງສະເພາະສ່ວນຕົວຂອງແຕ່ລະຊາດ ຫຼືແຕ່ລະປະເທດເທົ່ານັ້ນ. ສິ່ງດັ່ງກ່າວນັ້ນ ໄດ້ສ້າງໃຫ້ມີທັງໂອກາດ ແລະສິ່ງທ້າທາຍໃຫ້ທຸກໆ ປະເທດ, ເປັນຕົ້ນແມ່ນຕໍ່ກັບນັນດາປະເທດນ້ອຍ ໃນການປົກປັກຮັກສາຜົນປະໂຫຍດ, ປົກປັກຮັກສາເອກະລາດ ອຳນາດອະທິປະໄຕ ເອກະພາບ ແລະຜືນແຜ່ນດິນອັນຄົບຖ້ວນຂອງປະເທດຕົນ. ໃນສະພາບດັ່ງກ່າວ, ພິເສດແມ່ນຕໍ່ໜ້າການຜັນປ່ຽນຢ່າງສັບສົນຂອງສະພາບການໃນພາກພື້ນ ແລະໃນໂລກ ໃນຊຸມປີມໍ່ໆມານີ້, ຍິ່ງກວ່າເວລາໃດໝົດ ມັນຮຽກຮ້ອງໃຫ້ປະເທດເຮົາຕ້ອງສ້າງສາພັດທະນາຢ່າງໄວວາ ໝັ້ນຖ່ຽງ, ຍົກສູງກຳລັງແຮງສັງລວມ ກຳລັງແຮງພາຍໃນຂອງປະເທດຊາດໃນທຸກດ້ານ; ພ້ອນກັນນັ້ນກໍ່ຕ້ອງຍົກສູງສະຕິລະວັງຕົວຢ່າງເປັນປະຈຳ, ຕັດສິນໃຈປົກປັກຮັກສາເອກະລາດ ອຳນາດອະທິປະໄຕ ເອກະພາບ ແລະຜືນແຜ່ນດິນອັນຄົບຖ້ວນຂອງປະເທດຊາດໄວ້ຢ່າງໝັ້ນຄົງ ໃນບໍ່ວ່າສະພາບແວດລ້ອມໃດໆ. ນີ້ແມ່ນພາລະໜ້າທີ່ອັນສັກກະລະບູຊາ ແລະສູງສົ່ງຂອງພວກເຮົາໃນປັດຈຸບັນ ຕໍ່ໜ້າບັນພະບຸລຸດ ແລະຢູ່ຍ່າຕາຍາຍຂອງພວກເຮົາ, ຄືດັ່ງຄຳສັ່ງສອນຂອງທ່ານປະທານໂຮ່ຈີມິນ: “ບັນດາເຈົ້າຊີວິດຮຸ່ງເວືອງໄດ້ມີຄຸນງາມຄວາມດີໃນການສະຖາປະນາປະເທດ, ລຸງແລະພວກຫຼານຕ້ອງພ້ອມກັນປົກປັກຮັກສາປະເທດຊາດໄວ້”, ແລະຕໍ່ກັບເຊັ່ນລູກເຊັ່ນຫຼານໃນພາຍໜ້າ.
ປະເທດຫວຽດນາມເຮົາໄດ້ເປັນເອກະລາດ! ສຸວັນນະດິນແດນຫວຽດນາມເຮົາໄດ້ເປັນເອກະພາບ ແລະຄົບຖ້ວນສົມບູນ ນັບແຕ່ພູພຽງໂດ່ງວັນ ຈົນເຖິງແຫຼມກ່າເມົາ, ແຕ່ສາຍພູຫຼວງອັນໃຫຍ່ໂຕມະໂຫຖານ ຈົນເຖິງບັນດາໝູ່ເກາະຮວ່າງຊາ ເຈື່ອງຊາທີ່ສະຫງ່າຜ່າເຜີຍຕໍ່ຟອງແຮງລົມພັດໃນທະເລຕາເວັນອອກ! ປະເທດຊາດບ້ານເມືອງຫວຽດນາມທີ່ປູ່ຍ່າຕາຍາຍປະໄວ້ໃຫ້ ອັນມີເຂດດິນຟ້າອາກາດສາມພາກຕິດຕໍ່ກັນແຕ່ເໜືອຕະຫລອດຮອດໃຕ້ ເປັນດິນແດນທີ່ສວຍສົດງົດງາມທີ່ສຸດ ແລະສັກກະລະບູຊາ ລ້ຳຄ່າທີ່ສຸດ. ປະຊາຊົນຫວຽດນາມເຮົາ ເຖິງວ່າຈະຢູ່ເຂດທົ່ງພຽງຫຼືຢູ່ເຂດພູຜາປ່າດົງ, ພວມຢູ່ໃນປະເທດຫຼືຢູ່ຕ່າງປະເທດ ລ້ວນແຕ່ແມ່ນລູກຫຼານຂອງບັນພະບຸລຸດຫລາກໂຮ່ງ, ຮ່ວມແຮງຮ່ວມໃຈກັນກໍ່ສ້າງປະເທດຫວຽດນາມໃຫ້ມີສັນຕິພາບ ວັດທະນາຖາວອນ ແລະປົກປັກຮັກສາດິນແດນອັນແສນຮັກຂອງປະເທດຊາດໄວ້ຢ່າງໝັ້ນຄົງ.
ສະໄໝໃດກໍ່ເຊັ່ນດຽວກັນ, ປະຊາຊົນເຮົາບໍ່ໃຫ້ອະໄພຕໍ່ບໍ່ວ່າຜູ້ໃດ ບໍ່ວ່າການກະທຳໃດທີ່ທຳຮ້າຍຜົນປະໂຫຍດຂອງປະຊາຊົນ ຜົນປະໂຫຍດຂອງປະເທດຊາດ. ນັ້ນແມ່ນຫຼັກສິນທຳອັນສັກກະລະບູຊາທີ່ສຸດ ແລະແມ່ນນິຕິທຳທີ່ທ່ຽງທຳສ່ອງໃສທີ່ສຸດ ! ຜູ້ໃດລະເມີດສິ່ງດັ່ງກ່າວ ຫຼືບິດເບືອນມັນ, ຜູ້ນັ້ນຈະບໍ່ສົມກຽດເປັນລູກຫຼານຂອງດິນແດນຫວຽດນາມ. ສິ່ງທີ່ປະຊາຊົນເຮົາຕ້ອງການ ແລະເຄົາລົບນັບຖື ແມ່ນບັນດາຜູ້ຮັກຊາດທີ່ແທ້ຈິງ, ພ້ອມແລ້ວທີ່ຈະເສຍສະຫຼະຜົນປະໂຫຍດສ່ວນຕົວຂອງຕົນ ເພື່ອຜົນປະໂຫຍດລວມຂອງປະເທດຊາດ, ສະແດງໃຫ້ເຫັນເຖິງນ້ຳໃຈຮັກຊາດດ້ວຍການກະທຳລະອຽດ ຕົວຈິງ ທີ່ເປັນຜົນປະໂຫຍດໃຫ້ແກ່ປະຊາຊົນ ແລະປະເທດຊາດບ້ານເມືອງ ຄືກັບຄຳສັ່ງສອນຂອງລູງໂຮ່: ສິ່ງໃດທີ່ມີຜົນປະໂຫຍດໃຫ້ແກ່ປະຊາຊົນ ໃຫ້ປະເທດຊາດ ແມ່ນຕ້ອງພະຍາຍາມເຮັດຈົນສຸດກຳລັງ, ສິ່ງໃດທີ່ເປັນຜົນຮ້າຍໃຫ້ປະຊາຊົນ ໃຫ້ປະເທດຊາດ ແມ່ນຕ້ອງພະຍາຍາມຫຼີກຫຼ່ຽງບໍ່ເຮັດ. ເພາະສະນັ້ນ, ເພື່ອປະກອບສ່ວນຮັກສາເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນຂອງປະເທດຊາດໄວ້ຢ່າງໝັ້ນຄົງ, ພວກເຮົາແຕ່ລະຄົນ, ເຖິງວ່າຈະເຮັດຫຍັງ ຢູ່ໃນທີ່ຕັ້ງວຽກງານ ຖານະຕຳແໜ່ງການງານໃດ, ກໍ່ຕ້ອງເຮັດຈົນສຸດກຳລັງຂອງຕົນ ເພື່ອສຳເລັດພາລະໜ້າທີ່ຂອງຕົນຢ່າງດີທີ່ສຸດ, ຕັ້ງໜ້າຕໍ່ສູ້ເພື່ອສະກັດກັ້ນ ຍູ້ຖອຍຄວາມຫຍໍ້ທໍ້, ພະຍາດອາດຍາສິດ ການສໍ້ລາດບັງຫຼວງ, ຄວາມຟຸມເຟືອຍ ແລະ ສະພາບຂາດຄວາມຮັບຜິດຊອບ. ພວກເຮົາບໍ່ອາດຈະຮັບຮູ້ຕໍ່ຜູ້ທີ່ທາງປາກເວົ້າຄຳຮັກຊາດ ແຕ່ໃນພາກຕົວຈິງພັດເລິ່ມຈາກຜົນປະໂຫຍດສ່ວນຕົວ “ຜົນປະໂຫຍດຈຸຫຍ່ອມ” ແລ້ວສໍ້ລາດບັງຫຼວງ ຟຸມເຟືອຍ, ກໍ່ຄວາມເສຍຫາຍໃຫ້ແກ່ຜົນປະໂຍດຂອງຊາດ, ເຮັດໃຫ້ປະເທດຊາດທຸກຍາກ ອ່ອນເພຍຊຸດໂຊມລົງ. ນີ້ແມ່ນ “ສັດຕູທີ່ບຸກລຸກພາຍໃນ”, ແມ່ນ “ຝີບວມ” ໃນຮ່າງກາຍຂອງປະເທດທີ່ຕ້ອງຕັດຖິ້ມ.
ເພື່ອປົກປັກຮັກສາເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນຂອງປະເທດຊາດ ຕ້ອງມີສາຍຕາເບິ່ງກວ້າງມອງໄກ, ມີຫຼັກໝັ້ນກ້າແກ່ນ, ຢຶດໝັ້ນທາງດ້ານຫຼັກການ ແຕ່ຕ້ອງສ່ອງໃສທຸ່ນທ່ຽງ ໄຫວພິບ ຄ່ອງແຄ່ວທາງດ້ານຍຸດໂທບາຍ, “ເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”. ບັນດາບົດຮຽນປະສົບການປົກປັກຮັກສາປະເທດຊາດໃນປະຫວັດສາດ ທີ່ປູ່ຍ່າຕາຍາຍປະໄວ້ໃຫ້ນັ້ນ ແມ່ນລ້ຳຄ່າທີ່ສຸດສຳລັບພວກເຮົາໃນປັດຈຸບັນ. ຄຳກ່າວເຕື່ອນຂອງທ່ານນັກປາດ ເລ ກວີໂດນ ກ່ຽວກັບໄພອັນຕະລາຍຕ່າງໆທີ່ພາໃຫ້ປະເທດຊາດຕ້ອງຫາຍະນະ: “ໜຶ່ງ, ຜູ້ໜຸ່ມນ້ອຍບໍ່ເຄົາລົບນັບຖືຜູ້ເຖົ້າຜູ້ແກ່; ສອງ, ນັກຮຽນບໍ່ນັບຖືນາຍຄູ; ສາມ, ທະຫານອວດອົ່ງທະນົງຕົວ ແມ່ທັບເສື່ອມໂຊມປ່ຽນທາດ; ສີ່, ການສໍ້ລາດບັງຫຼວງແຜ່ກວ້າງ; ຫ້າ, ຜູ້ຊົງຄຸນວຸດທິອ່ວານໜ້າໄປທາງອື່ນ” ຊຶ່ງຮຽກຮ້ອງໃຫ້ພວກເຮົາຕ້ອງຄິດຫງຳຄຳກ່າວເຕື່ອນດັ່ງກ່າວຢ່າງເລິກເຊິ່ງ; ຫຼືຄຳໂອວາດຕ່າງໆ ຂອງສົມເດັດເຈົ້າພະຍາ ເຈົ້າຈອມທັບ ເຈິ່ນກວັກຕວົນ: ຕ້ອງຮູ້ເປັນເຈົ້າການ “ຖອນຟືນໃຕ້ໜໍ້”, “ຕ້ອງຫຼີກລ່ຽງແກງຮ້ອນ ເພື່ອເປົ່າພັດຜັກເຢັນ” ໃນການແກ້ໄຂສາຍພົວພັນກັບສັດຕູ; “ເຈົ້າຊີວິດແລະບ່າວໄພ່ພ້ອມຈິດພ້ອມໃຈກັນ, ອ້າຍນ້ອງຮັກແພງຖືກຕ້ອງປອງດອງກັນ, ທົ່ວປະເທດປະກອບເຫື່ອແຮງ, ສັດຕູຕ້ອງຖືກຈັບ”, ກໍ່ສ້າງ “ກອງທັບເປັນນ້ຳໜຶ່ງໃຈດຽວກັນຄືກັນກັບພໍ່ແລະລູກ ຈຶ່ງໃຊ້ການໄດ້”, “ໃນສະໄໝສັນຕິຕ້ອງເບິ່ງແຍງບຳລຸງກຳລັງຂອງປະຊາຊົນເພື່ອເປັນແຜນກົກຮາກອັນໜັກແໜ້ນ ນັ້ນແມ່ນແຜນການທີ່ດີເລີດເພື່ອຮັກສາປະເທດຊາດ”... ຍັງມີຄຸນຄ່າເໝືອນເດີມສຳລັບພວກເຮົາໃນສະໄໝນີ້.
ປັກຈຸບັນ, ສືບທອດ ແລະເສີມຂະຫຍາຍມູນເຊື້ອຮັກຊາດ ເດັດດ່ຽວໜຽວແໜ້ນບໍ່ຍອມຈຳນົນ ອົງອາດກ້າແກ່ນຂອງຊາດ, ບັນດາບົດຮຽນໃນການປົກປັກຮັກສາປະເທດຂອງປູ່ຍ່າຕາຍາຍ, ດ້ວຍຄວາມມານະພະຍາຍາມສູ້ຊົນສ້າງສາພັດທະນາເສດຖະກິດ - ສັງຄົມຢ່າງບໍ່ຢຸດຢັ້ງ, ກໍ່ສ້າງພື້ນຖານເສດຖະກິດທີ່ເປັນເອກະລາດ ເປັນເຈົ້າຕົນເອງ, ຍົກສູງກຳລັງແຮງສັງລວມ ແລະບົດບາດອິດທິພົນສາກົນຂອງປະເທດຊາດ, ເສີມຂະຫຍາຍກຳລັງແຮງແຫ່ງຄວາມສາມັກຄີປວງຊົນທັງຊາດ ສົມທົບກັບກຳລັງແຮງສາກົນ, ຖືເອົາຜົນປະໂຫຍດຂອງຊາດ ຂອງປະເທດເປັນຈຸດໝາຍສູງສຸດ, ແນ່ນອນວ່າປະຊາຊົນຫວຽດນາມເຮົາຈະຜ່ານຜ່າຄວາມຫຍຸ້ງຍາກ ສິ່ງທ້າທາຍທຸກຢ່າງ, ຮັກສາສິ່ງແວດລ້ອມສັນຕິພາບ ສະຖຽນລະພາບໄວ້ໄດ້ຢ່າງໜັກແໜ້ນ ແລະ ປົກປັກຮັກສາປະເທດຊາດຫວຽດນາມທີ່ແສນຮັກແສນປະເສີດຂອງພວກເຮົາໄວ້ ເພື່ອມອບໂອນໃຫ້ເຊັ່ນລູກຫຼານຕະຫຼອດການພາຍໜ້າ.
*
* *
ບັນດາຜົນສຳເລັດອັນໃຫຍ່ຫຼວງ ແລະມີຄວາມໝາຍປະຫວັດສາດ ຂອງເກືອບ 30 ປີແຫ່ງການປ່ຽນແປງໃໝ່ທີ່ປະຊາຊົນເຮົາຍາດມາໄດ້ນັ້ນ ໄດ້ພາໃຫ້ພວກເຮົາເປັນກຽດ ແລະເອກອ້າງທະນົງໃຈ, ເພື່ອນມິດສາກົນນິຍົມຊົມເຊີຍ. ແຕ່ພວກເຮົາຍາມໃດກໍ່ຕຶກຕອງໝອງຄິດ ຍ້ອນເສດຖະກິດຂອງປະເທດເຮົາຍັງຫຼ້າຫຼັງ, ຊີວິດການເປັນຢູ່ຂອງພີ່ນ້ອງຮ່ວມຊາດເຮົາຢູ່ຫຼາຍເຂດ ຫຼາຍພາກສ່ວນຍັງພົບຄວາມຫຍຸ້ງຍາກທີ່ສຸດ; ຍັງມີຄວາມຫຍໍ້ທໍ້ ສໍ້ລາດບັງຫຼວງ ຟຸມເຟືອຍ, ພະຍາດອາດຍາສິດ ຂາດຄວາມຮັບຜິດຊອບ ໂອ້ອວດຈອງຫອງຕໍ່ກັບປະຊາຊົນ, ສະພາບການບັງຄັບຂົ່ມເຫັງປະຊາຊົນຄົນຜູ້ດີ, ກໍ່ຄວາມຂັດຂ້ອງຂຸ່ນເຄືອງໃຈ ຄວາມຄຽດຂົມຈົ່ມວ່າບໍ່ຈັກວ່າເທົ່າໃດໃນປະຊາຊົນ. ພວກເຮົາຍັງຕ້ອງເປັນຫ່ວງເປັນໄຍ ແລະເຈັບໃຈເມື່ອໄດ້ຟັງຄຳຊ່າລືໃນປະຊາຊົນ ທີ່ວ່າ: “ທີໜຶ່ງເຊັ່ນລູກ, ທີສອງເງິນຄຳ, ທີສາມສາຍພົວພັນ, ທີສີ່ສະຕິປັນຍາ...” ໃນວຽກງານພະນັກງານ ແລະຄຳສັງເກດຕ່າງໆກ່ຽວກັບປະເພດ “ຄຸນສົມບັດສີ່ດ້ານ” (ຕໍ່ໜ້າ, ຂ້າງຫຼັງ, ຕໍ່ຂັ້ນເທິງ ແລະຕໍ່ພີ່ນ້ອງຮ່ວມຊາດຂອງຕົນ) ຊຶ່ງພວມແມ່ນວິທີປະພຶດຂອງພະນັກງານ ສະມາຊິກພັກຈຳນວນໜຶ່ງ, ກໍ່ຄືຕໍ່ໜ້າສະພາບການພະນັກງານຈຳນວນໜຶ່ງ “ທີ່ມີການກະທຳຜິດ” ຖືກຫາງສຽງສັງຄົມກ່າວປະນາມ ຫຼືໄດ້ແລະພວມຖືກຟ້ອງສານ ພິພາກສາ. ນີ້ເປັນສິ່ງທີ່ໄດ້ທຳລາຍເຮັດໃຫ້ຄວາມເຊື່ອຖືຂອງປະຊາຊົນຕໍ່ກັບພັກ-ລັດ ແລະລະບອບຂອງເຮົາ ຕົກຕ່ຳລົງ, ແມ່ນໜໍ່ແໜງໄພອັນຕະລາຍຕໍ່ກັບເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນຂອງປະເທດຊາດ.
ຄົນບູຮານເຄີຍເວົ້າວ່າ: ບໍ່ຮູ້ລະອາຍໃຈກໍ່ຈະບໍ່ເປັນຄົນດີໄດ້ ! ນັ້ນແມ່ນຄວາມສັດທ່ຽງໃນຊີວິດຄົນເຮົາ ! ບໍ່ຍົກເວັ້ນຜູ້ໃດເລີຍ, ເຖິງວ່າຈະເປັນພະນັກງານນຳພາ, ເປັນຜູ້ນຳໜ້າສຳນັກງານອົງການ ກົມກອງ ຫຼືເປັນພົນລະເມືອງທຳມະດາ ກໍ່ຕ້ອງຮູ້ແຈ້ງກ່ຽວກັບພາລະໜ້າທີ່ ແລະຄວາມຮັບຜິດຊອບຂອງຕົນ, ຍາມໃດກໍ່ຕ້ອງມີສະຕິຮູ້ສຶກໃນຄວາມຖືກຄວາມຜິດ ຮູ້ທຳມະຄະຕິແຫ່ງການເປັນມະນຸດ ! ບໍ່ວ່າພະນັກງານຜູ້ໃດ, ຢູ່ໃນບໍ່ວ່າຖານະຕຳແໜ່ງໃດ, ມີການກະທຳກໍ່ຄວາມເສຍຫາຍໃຫ້ແກ່ປະເທດຊາດບ້ານເມືອງ, ເຮັກໃຫ້ປະຊາຊົນຂຸ່ນເຄືອງບໍ່ພໍໃຈ, ຖ້າຫາກ ຫິລິໂອດຕັບປະແລະມະໂນທຳ ບໍ່ພໍເພື່ອກ່າວເຕື່ອນ ປຸກຕື່ນ ກໍ່ຕ້ອງນຳໃຊ້ນິຕິທຳຢ່າງເດັດຂາດເຖິງຖອງ. ຜູ້ໃດລະເມີດແມ່ນຕ້ອງສັ່ງສອນຕັກເຕື່ອນ, ຖ້າຫາກບໍ່ຕື່ນຕົວ ແມ່ນຈຳເປັນຕ້ອງລົງໂທດຢ່າງເຄັ່ງຄັດ, “ສ້າງ” ຕ້ອງໄປຄຽງຄູ່ກັບ “ຕ້ານ”, ເພື່ອຮັກສາ ປັບປຸງຄວາມເຊື່ອຖືຂອງປະຊາຊົນ, ປັບປຸງ ແລະເພີ່ມທະວີກ້ອນສາມັກຄີປວງຊົນທັງຊາດ. ເພາະວ່າ “ປະຊາຊົນແມ່ນກົດຮາກ”; ທ່ານປະທານໂຮ່ຈີມິນ ເຄີຍເວົ້າວ່າ: “ກົກຮາກໝັ້ນຄົງຕົ້ນໄມ້ຈຶ່ງຍືນຍົງຢູ່ໄດ້. ກໍ່ສ້າງຫໍປາສາດພິໄຊບົນພື້ນຖານປະຊາຊົນ”, ຄືດັ່ງທີ່ທ່ານຫງວຽນຈ໊າຍ ວິລະຊົນແຫ່ງຊາດ ບູລຸດວັດທະນະທຳແຫ່ງຊາດແລະໂລກ ເຄີຍໄດ້ຂຽນໄວ້ວ່າ: “ເຮັດໃຫ້ເຮືອຂວ້ຳຈົມລົງ ຈຶ່ງຮູ້ວ່າກຳລັງຂອງປະຊາຊົນແຂງແຮງຄືກັນກັບນ້ຳ”. ເພາະສະນັ້ນ, ຢາກມີກຳລັງແຮງພຽງພໍ ເພື່ອຜ່ານຜ່າອຸປະສັກ ຄວາມຫຍຸ້ງຍາກລຳບາກບົນເສັ້ນທາງແຫ່ງການປົກປັກຮັກສາເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນຂອງປະເທດຊາດ, ແມ່ນຕ້ອງເອົາໃຈໃສ່ປັບປຸງສາຍພົວພັນແບບເລືອດເນື້ອ ເປັນຕາຍ ລະຫວ່າງພັກກັບປະຊາຊົນ, ຍົກສູງສາຍພົວພັນດັ່ງກ່າວຂຶ້ນສູ່ລະດັບໃໝ່ ດ້ວຍຄຸນນະພາບໃໝ່. ພວກເຮົາບໍ່ຢ້ານອິດທິກຳລັງໃດ ເຖິງວ່າມັນຈະດຸຮ້າຍເຖິງປານໃມກໍ່ຕາມ. ພວກເຮົາພຽງແຕ່ຢ້ານວ່າປະຊາຊົນເສຍຄວາມໄວ້ວາງໃຈຕໍ່ພັກ-ລັດ ແລະລະບອບເຮົາ. ກ້ອນສາມັກຄີເປັນເອກະພາບ ເປັນນ້ຳໜຶ່ງໃຈດຽວ ຮ່ວມແຮງຮ່ວມໃຈກັນ ຂອງພີ່ນ້ອງຮ່ວມຊາດຢູ່ໃນແລະຕ່າງປະເທດກວ່າ 90 ລ້ານຄົນ ຈະເປັນກຳລັງແຮງອັນຊະນະເລີດ ເພື່ອປົກປັກຮັກສາປະເທດຊາດຫວຽດນາມໃຫ້ຍືນຍົງຄົງຕົວຕະຫລອດການ.
*
* *
ປົກປັກຮັກສາເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນຂອງປະເທດຊາດ ໄວ້ຢ່າງໝັ້ນຄົງ ແມ່ນໜ້າທີ່ເປັນປົກກະຕິ ປະຈຳວັນ ໃນທຸກເວລານາທີ ບໍ່ໄດ້ປ່ອຍປະລະເລີຍເປັນອັນຂາດ, ແຕ່ກໍ່ເປັນການຕໍ່ສູ້ທີ່ຫຍຸ້ງຍາກສັບສົນ ລຳບາກຍາວນານທີ່ສຸດ ແລະເດັດດ່ຽວໜຽວແໜ້ນທີ່ສຸດ. ນີ້ແມ່ນພາລະກິດຂອງທົ່ວປວງຊົນ, ຂອງຊາວຫວຽດນາມທຸກຄົນ, ແຕ່ພັກ-ລັດເຮົາ, ຜູ້ນຳພາແລະຄຸ້ມຄອງປະເທດ, ມີບົດບາດ ແລະໜ້າທີ່ຮັບຜິດຊອບຢ່າງໃຫຍ່ຫຼວງ. ມາຮອດເດືອນກັນຍາປີນີ້ ແມ່ນຄົບຮອບ 45 ປີ ທີ່ທົ່ວພັກ ທົ່ວປວງຊົນ ແລະທົ່ວກອງທັບເຮົາ ປະຕິບັດພິໄນກຳອັນສັກກະລະບູຊາ ຂອງທ່ານປະທານໂຮ່ຈີມິນ. ພວກເຮົາຕ້ອງສືບຕໍ່ຮ່ຳຮຽນ ແລະປະຕິບັດຕາມຄຳສັ່ງສອນໃນພິໄນກຳຂອງລູງໂຮ່: “ສິ່ງທີ່ຕ້ອງເຮັດກ່ອນອື່ນໝົດແມ່ນປັບປຸງພັກ, ເຮັດໃຫ້ສະມາຊິກພັກແຕ່ລະຄົນ ໜ່ວຍພັກແຕ່ລະໜ່ວຍ ລ້ວນແຕ່ເຮັດຫຼ້ອນໜ້າທີ່ທີ່ພັກມອບໝາຍໃຫ້ຕົນ, ຕັ້ງອົກຕັ້ງໃຈຮັບໃຊ້ປະຊາຊົນ”, “ຕ້ອງຮັກສາໃຫ້ພັກເຮົາປອດໃສຂາວສະອາດ, ຕ້ອງສົມກຽດເປັນຜູ້ນຳພາ ເປັນຄົນໃຊ້ຂອງປະຊາຊົນ”, “ສະມາຊິກພັກ ແລະພະນັກງານແຕ່ລະຄົນ ຕ້ອງເຊື່ອມຊືມຄຸນສົມບັດປະຕິວັດຢ່າງແທ້ຈິງ, ຕ້ອງດຸໝັ້ນ ປະຢັດ ຊື່ສັດ ທ່ຽງທຳ ບໍ່ເຫັນແກ່ຕົວ”; ຕ້ອງປົກປັກຮັກສາຄວາມສາມັກຄີເປັນເອກະພາບຂອງພັກ ຄືກັບ “ປົກປັກຮັກສາແກ້ວຕາຂອງຕົນ”; ສາມັກຄີບົນພື້ນຖານໂຄງການການເມືອງ, ກົດລະບຽບ, ທັດສະນະ ແນວທາງ ຫຼັກການຈັດຕັ້ງແລະການເຄື່ອນໄຫວ ຂອງພັກ, ບົນພື້ນຖານປົກປັກຮັກສາຜົນປະໂຫຍດຂອງປະເທດຊາດ, ເພື່ອຄວາມອິ່ມໜຳສຳລານ ແລະສົມບູນພູມສຸກຂອງປະຊາຊົນ. ບົນຈິດໃຈດັ່ງກ່າວນັ້ນ, ບັນດາຄະນະພັກ ການຈັດຕັ້ງພັກ ແລະພະນັກງານ ສະມາຊິກພັກທຸກຄົນ ຕ້ອງສືບຕໍ່ປະຕິບັດເປັນຢ່າງດີ ມະຕິຂອງກອງປະຊຸມສູນກາງພັກຄັ້ງທີ 4 ສະໄໝທີ XI ວ່າດ້ວຍ “ບາງບັນຫາອັນຮີບດ່ວນກ່ຽວກັບການກໍ່ສ້າງພັກໃນປັດຈຸບັນ” ໂດຍຕິດແໜ້ນກັບການປະຕິບັດຄຳສັ່ງ ສະບັບທີ 03-CT/TW ລົງວັນທີ 14 ພຶດສະພາ 2011 ຂອງກົມການເມືອງສູນກາງພັກ ວ່າດ້ວຍການສືບຕໍ່ຍູ້ແຮງການຮ່ຳຮຽນ ແລະເຮັດຕາມແວ່ນແຍງຄຸນສົມບັດຂອງທ່ານປະທານໂຮ່ຈີມິນ; ເດັດດ່ຽວຈຳກັດປັດເປົ່າຄວາມຊຸດໂຊມທາງດ້ານແນວຄິດການເມືອງ ຄຸນສົມບັດ ແບບດຳລົງຊີວິດ, ຕ້ານພະຍາດອາດຍາສິດ ການສໍ້ລາດບັງຫຼວງ ການຟຸມເຟືອຍ “ການຫັນປ່ຽນດ້ວຍຕົນເອງ” “ການຜັນແປດ້ວຍຕົນເອງ” ໃນພະນັກງານ ສະມາຊິກພັກ ລັດຖະກອນຈຳນວນໜຶ່ງທີ່ບໍ່ໜ້ອຍ; ຕ້ອງອີງໃສ່ປະຊາຊົນເພື່ອກໍ່ສ້າງພັກ, ເພື່ອຕິດຕາມກວດກາຄະນະພັກ ການຈັດຕັ້ງພັກ, ເພື່ອຕີລາຄາພະນັກງານ ສະມາຊິດພັກ. ບົນພື້ນຖານດັ່ງກ່າວ, ຜັນຂະຫຍາຍປະຕິບັດລັດຖະທຳມະນູນສະບັບປັບປຸງ ທີ່ຫາກໍ່ໄດ້ສະພາແຫ່ງຊາດຮັບຮອງຜ່ານ, ກໍ່ສ້າງ ປັບປຸງບູລະນະລັດເຮົາໃຫ້ກາຍເປັນລັດຂອງປະຊາຊົນ ໂດຍປະຊາຊົນ ແລະເພື່ອປະຊາຊົນຢ່າງແທ້ຈິງ ທີ່ໄດ້ຮັບຄວາມໄວ້ເນື້ອເຊື່ອໃຈ ແລະການສະໜັບສະໜູນຂອງປະຊາຊົນທັງຊາດ. ເຮັດໄດ້ຄືແນວນັ້ນ ພວກເຮົາຈະມີຄວາມສາມາດປະຕິບັດໄດ້ທຸກໆວຽກງານ ເຖິງວ່າຈະເປັນວຽກງານທີ່ໃຫຍ່ຫຼວງທີ່ສຸດ ຫຍຸ້ງຍາກທີ່ສຸດກໍ່ຈະສຳເລັດມີໄຊຢ່າງແນ່ນອນ.
ເສີມຂະຫຍາຍຈິດໃຈ ແລະມູນເຊື້ອອັນສະຫງ່າງາມ ຂອງການປະຕິວັດເດືອນສິງຫາທີ່ຍິ່ງໃຫຍ່, ສືບຕໍ່ຮ່ຳຮຽນ ແລະປະຕິບັດວິໄນກຳທີ່ສັກກະລະບູຊາຂອງທ່ານປະທານໂຮ່ຈີມິນ, ທົ່ວພັກ ທົ່ວປວງຊົນ ທົ່ວກອງທັບເຮົາສາມັກຄີຮ່ວມແຮງຮ່ວມໃຈກັນສ້າງເປັນກຸ່ມກ້ອນໜຶ່ງທີ່ໝັ້ນຄົງເຂັ້ມແຂງ ພ້ອມກັນຕັ້ງໜ້າສູ້ຊົນ, ແນ່ນອນວ່າພວກເຮົາຈະຜ່ານຜ່າຄວາມຫຍຸ້ງຍາກ ສິ່ງທ້າທາຍທຸກຢ່າງໄດ້, ກໍ່ສ້າງໃຫ້ປະເທດເຮົາ “ໃຫຍ່ໂຕໂອ້ຖົງກວ່າ, ສວຍງານກວ່າ”, ສົມຄູ່ກັບບັນດາປະເທດມະຫາອຳນາດໃນຫ້າທະວີບ ແລະ ປົກປັກຮັກສາເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນຂອງປະເທດຊາດໄວ້ຢ່າງໝັ້ນຄົງ, ເພື່ອໃຫ້ຊາດເຮົາ ປະເທດເຮົາຈະເລີນພັດທະນາ ແລະຍືນຍົງຄົງຕົວຕະຫຼອດການ. ນັ້ນກໍ່ແມ່ນໄມ້ຫຼາວັດແທກນ້ຳໃຈຮັກຊາດຂອງພວກເຮົາແຕ່ລະຄົນໃນເວລານີ້./.
ຂຽນໂດຍ: ເຈືອງເຕິນຊາງ,
ກຳມະການກົມການເມືອງສູນກາງພັກ, ປະທານປະເທດ ສສ ຫວຽດນາມ
