ທ່ານປະທານໂຮ່ຈີມິນ (ພາບເອກະສານຂໍ້ມູນ)
ພິໄນກຳ ແລະບັນດາຄຸນຄ່າອະມະຕະ
ພິໄນກຳ ຂອງທ່ານປະທານໂຮ່ຈີມິນ ໄດ້ຂຽນໃນໄລຍະເວລາຍາວນານ, ແຕ່ປີ 1965 ຫາປີ 1969. ນັ້ນແມ່ນບົດສະຫລຸບທີ່ເລິກເຊິ່ງຮອບດ້ານ ກ່ຽວກັບບົດຮຽນ, ຂະບວນວິວັດການຊີ້ນຳນຳພາປະຕິວັດ, ປະສົບການຕົວຈິງ, ທິດທາງການພັດທະນາໃນອະນາຄົດຂອງຊາດ, ພ້ອມກັນນັ້ນກໍ່ສະແດງເຖິງເຫດຜົນແຫ່ງການດຳລົງຊີວິດໃນໂລກ ແລະຄວາມເປັນມະນຸດຂອງທ່ານປະທານ, ວິລະຊົນປົດປ່ອຍຊາດຫວຽດນາມ, ນັກວັດທະນະທຳທີ່ດີເດັ່ນ ໂຮ່ຈີມິນ. ດ້ວຍເຫດນັ້ນ, ພິໄນກຳ ບັນຈຸບັນດາຄຸນຄ່າທີ່ແຜ່ຫຼາຍທົ່ວໄປ, ກວມລວມທຸກດ້ານຂອງຊີວິດສັງຄົມ: ເສດຖະກິດ ການເມືອງ ສັງຄົມ ວັດທະນະທຳ ຄຸນສົມບັດສິນທຳ, ການພົວພັນແລະຫຼັກການປະພຶດລະຫວ່າງບັນດາຊາດ ບັນດາປະເທດ, ມັນບັນລຸເຖິງລວງເລິກວັດທະນະທຳ ມະນຸດສະທຳ.
ປີ 1985, ໃນເມື່ອປຸກລະດົມຂະບວນການ ທົດສະວັດພັດທະນາວັດທະນະທຳໃນທົ່ວໂລກ, ອົງການສຶກສາ ວິທະຍາສາດ ວັດທະນະທຳຂອງສະຫະປະຊາຊາດ (UNESCO) ໄດ້ນຳສະເໜີ ຄວາມສຳນຶກທີ່ຄົມຄາຍພິເສດກ່ຽວກັບວັດທະນະທຳ. ຕາມນັ້ນ, ວັດທະນະທຳເປັນເອກະພາບກັບ ການປະດິດສ້າງ, ການປະດິດອັນໃໝ່ອອກມາ, ລັກສະນະມະນຸດສະທຳ ແລະທິດທາງຄັດເລືອກຄຸນຄ່າຊີວິດຂອງແຕ່ລະຄົນ ແລະຂອງບັນດາຊຸມຊົນທີ່ຕ່າງກັນໃນໂລກ. ຄວາມສຳນຶກນີ້ເປັນລູກກະແຈທີ່ອະນຸຍາດໃຫ້ຄົ້ນເຜີຍຄວາມງາມທີ່ຢູ່ໃນຂັ້ນເລິກເຊິ່ງທີ່ສຸດ - ຄວາມງາມວັດທະນະທຳ - ຂອງ ພິໄນກຳ ຂອງທ່ານປະທານໂຮ່ຈີມິນ, ເຊິ່ງໃນນັ້ນມີຄວາມຄິດຂອງເພິ່ນກ່ຽວກັບບັນດາເນື້ອໃນແກ່ນສານຂອງວັດທະນະທຳກຳອຳນາດຂອງພັກກອມມູນິດ.
ພິໄນກຳ ຂອງທ່ານປະທານໂຮ່ຈີມິນ ແມ່ນ ຜະລິດຕະພັນວັດທະນະທຳໜຶ່ງ ທີ່ບັນລຸເຖິງຄວາມເລິກເຊິ່ງສຸດຊຶ້ງ ແລະຖືກຕ້ອງທີ່ສຸດກັບຄວາມໝາຍຂອງຄຳສັບນັ້ນ, ນັບທັງເນື້ອໃນ ແລະຮູບການ.
ພິໄນກຳ ແມ່ນສິລະປະກຳຊຸດໜຶ່ງທີ່ຍອດຍ້ຽມ ທາງດ້ານການປະກອບເນື້ອໃນ, ຕັກກະວິທີການຜັນຂະຫຍາຍວິທະຍາສາດ, ວິທີການສະແດງ ແລະສິລະປະການໃຊ້ຄຳສັບ; ມັນທ້ອນໂຮມອັນເລິກເຊິ່ງ, ອັນໜັກແໜ້ນ, ຄວາມໝາຍຢູ່ໃນວາຈາທີ່ປາກ ຂອງວັດທະນະທຳຝ່າຍຕາເວັນອອກ; ອັນລະອຽດ, ຕົວຈິງ ແຕ່ເຕັມໄປດ້ວຍພາບພົດ ຂອງແບບຈິນຕະນາການຝ່າຍຕາເວັນຕົກ, ແລະກວມລວມທັງໝົດແມ່ນຈິດໃຈປະຕິວັດ ວິທະຍາສາດ, ລວງເລິກມະນຸດສະທຳຂອງທິດສະດີ ມາກ - ເລນິນ. ນັ້ນແມ່ນນິພົນທີ່ສະແດງອອກຢ່າງຊັດເຈນເຖິງວິທີຈິນຕະນາການ, ສະຕິປັນຍາສຸຂຸມຮອບຄອບ, ພາສາງ່າຍດາຍ ໃກ້ຊິດກັບຊີວິດປະຈຳວັນ ແຕ່ມີຄວາມສາມາດປຸກຕື່ນແນວຄິດຈິດໃຈປະຊາຊົນ ຂອງທ່ານນັກປາດໂຮ່ຈີມິນຜູ້ຮອບຮູ້.
ເວົ້າສະເພາະແຕ່ການໃຊ້ພາສາ, ພິໄນກຳ ໄດ້ປະກອບສ່ວນເຮັດໃຫ້ພາສາຫວຽດນາມປອດໃສ ດ້ວຍຄວາມສາມາດສະແດງອອກເປັນຢ່າງດີຂອງມັນ. ແຕ່ລະໂຕໜັງສື ຄຳສັບ, ແຕ່ລະປະໂຫຍກ ວັກ ຕອນທີ່ຂຽນຢູ່ໃນນີ້ ແມ່ນໝາກຜົນແຫ່ງການຄົ້ນຄິດ ຄິດໄລ່ໄຕ່ຕອງ ປຽບທຽບ ກັ່ນຕອງ, ມັນໄດ້ບັນຈຸສ່ວນເລິກແຫ່ງແນວຄິດ ຈິດໃຈເວທະກຳ, ຄວາມຮັ່ງມີ ອຸດົມສົມບູນຂອງຈິດວິນຍານ, ບຸກຄະລິກລັກສະນະ, ສະຕິປັນຍາ ໂຮ່ຈີມິນ.
ໂດຍຢືນຢັນຄວາມເຊື່ອໝັ້ນຕໍ່ໄຊຊະນະອັນແນ່ນອນ ຂອງການຕໍ່ສູ້ກູ້ຊາດຕ້ານອາເມລິກາ ຂອງຊາດຫວຽດນາມ, ທ່ານປະທານໂຮ່ຈີມິນໄດ້ມີການຂີດຂຽນທີ່ເປັນແບບຢ່າງ, ລວບລັດ, ຄົບຖ້ວນ ຊຶ່ງຜູ້ອື່ນບໍ່ອາດຂຽນດີກວ່ານັ້ນໄດ້: “ເຖິງຈະຫຍຸ້ງຍາກລຳບາກພຽງໃດ, ປະຊາຊົນເຮົາຕ້ອງໄດ້ຮັບຊະນະສົມບູນຢ່າງແນ່ນອນ. ຈັກກະພັດອາເມລິກາຕ້ອງໜີອອກຈາກປະເທດເຮົາຢ່າງແນ່ນອນ. ປະເທດຊາດເຮົາຕ້ອງເປັນເອກະພາບຢ່າງແນ່ນອນ. ພີ່ນ້ອງຮ່ວມຊາດພາກໃຕ້ ພາກເໜືອຕ້ອງໄດ້ຕູ້ມຕ້ອມຢູ່ໃນຄອບຄົວດຽວກັນຢ່າງແນ່ນອນ”(1). ນີ້ບໍ່ພຽງແຕ່ເປັນຄຳສັບສຳນວນລ້ວນໆເທົ່ານັ້ນ ຫາກແມ່ນຄວາມເຊື່ອໝັ້ນ, ຄວາມມຸ່ງມາດປາຖະໜາອັນແຮງກ້າ, ຈິດໃຈອັນສັກກະລະບູຊາ ແລະຄວາມມຸ່ງໝາຍສູ້ຊົນຂອງທົ່ວທັງຊາດ. ພາຍໃຕ້ປາກກາຂອງທ່ານປະທານໂຮ່ຈີມິນ, ສັບສຳນວນກາຍເປັນເຈດຈຳນົງ ແລະ ເວທະກຳ; ໄດ້ເວົ້າກັບພີ່ນ້ອງຮ່ວມຊາດຂອງຕົນດ້ວຍຖ້ອຍຄຳແຫ່ງສະຕິປັນຍາ ແລະ ໝາກຫົວໃຈ, ເພື່ອໃຫ້ພີ່ນ້ອງຮ່ວມຊາດກໍ່ຮັບເອົາຖ້ອຍຄຳເຫຼົ່ານັ້ນດ້ວຍສະຕິປັນຍາ ແລະມະໂນທຳແຫ່ງຄວາມເປັນມະນຸດ. ດັ່ງນັ້ນ, ຄຳເວົ້າຂອງເພິ່ນກາຍເປັນຄຳຮຽກຮ້ອງ, ຊຸກຍູ້ໃຫ້ທຸກຄົນຂຶ້ນເດີນທາງປະຕິບັດໜ້າທີ່, ມັນແຜ່ກະຈາຍ ແລະເຊື່ອມຕໍ່ໝາກຫົວໃຈເປັນຈຳນວນລ້ານໃຫ້ເຕັ້ນໃນຈັງຫວະດຽວກັນ. ຄຳສັບ “ຢ່າງແນ່ນອນ” ໄດ້ຊ້ຳຄືນສີ່ເທື່ອ ແຕ່ບໍ່ມີເສດເຫຼືອ ແລະກໍ່ບໍ່ອາດຂີດຂ້າຄຳໃດໄດ້; ຄຳສັບແຕ່ລະຄຳມີບົດບາດ ທີ່ຕັ້ງສະເພາະຂອງມັນ; ຄຳ “ຕ້ອງ” ແລະ ຄຳ “ຈະ” ຖືກເພິ່ນໃຊ້ຢ່າງຖືກຕ້ອງຊັດເຈນທີ່ສຸດ, ຊີ້ບອກເຖິງອະນາຄົດຕະການຂອງສອງເປົ້າໝາຍ ແຕ່ລ້ວນແຕ່ໄປເຖິງຜົນສຸດທ້າຍອັນໜຶ່ງອັນດຽວຄື ໄຊຊະນະສຸດທ້າຍແມ່ນຂອງປະຊາຊົນຫວຽດນາມ.
ກ່ຽວກັບຖານະນາມຂອງພັກກຳອຳນາດ, ທ່ານປະທານໂຮ່ຈີມິນຂຽນວ່າ: “ພັກເຮົາເປັນພັກກຳອຳນາດ. ສະມາຊິກພັກ ແລະພະນັກງານແຕ່ລະຄົນຕ້ອງຊາບຊືນ ຄຸນສົມບັດປະຕິວັດ ຢ່າງແທ້ຈິງ, ຕ້ອງດຸໝັ່ນ ປະຢັດ ເຫັນແກ່ສ່ວນລວມ ບໍ່ເຫັນແກ່ຕົວ ຊື່ສັດ ທ່ຽງທຳຢ່າງແທ້ຈິງ. ຕ້ອງຮັກສາໃຫ້ພັກເຮົາປອດໃສຂາວສະອາດ, ຕ້ອງໃຫ້ສົມກັບເປັນຜູ້ນຳ, ເປັນຜູ້ຮັບໃຊ້ທີ່ຈົ່ງຮັກພັກດີຂອງປະຊາຊົນ”(2). ຄຳສັບ “ຢ່າງແທ້ຈິງ” ໄດ້ເວົ້າຊ້ຳຫຼາຍເທື່ອ ເໝືອນດັ່ງຄຳຝາກຝັງທີ່ມີລັກສະນະກົດເກນ ແຜ່ຫຼາຍທົ່ວໄປ ຊຶ່ງຕ້ອງເຮັດຢ່າງເປັນປະຈຳ ລຽນຕິດ, ຖ້າບໍ່ດັ່ງນັ້ນ ພັກເຮົາຈະພົບຄວາມຫຍຸ້ງຍາກ ໃນການຮັກສາທີ່ຕັ້ງ ບົດບາດກຳອຳນາດຂອງຕົນ.
ພິໄນກຳ ຂອງທ່ານປະທານໂຮ່ຈີມິນໄດ້ບັນຈຸ ແລະກວມລວມຈິດໃຈປ່ຽນແປງໃໝ່, ຂະຫຍາຍຕົວ ເໝືອນດັ່ງແກ່ນສານຂອງວິທີການກະທຳແບບສັດຈະວິພາກ ແລະກໍ່ເປັນຈຸດພິເສດສະເພາະໃນແບບແຜນຈິນຕະນາການຂອງເພິ່ນ. ທ່ານປະທານໂຮ່ຈີມິນຮັບຮູ້ຢ່າງຈະແຈ້ງທີ່ສຸດວ່າ: ການປະຕິວັດແມ່ນຂະບວນວິວັດໜຶ່ງທີ່ຍາມໃດກໍ່ປ່ຽນແປງໃໝ່. ກະໂຕພຶດຕິກຳປະຕິວັດ, ຊີວິດການອອກແຮງງານ, ການຜະລິດ ແລະສູ້ຮົບຂອງປະຊາຊົນ ກໍ່ປ່ຽນແປງໃໝ່ ແລະຂະຫຍາຍຕົວຢ່າງບໍ່ຢຸດຢັ້ງ; ຈິນຕະນາການ ແລະ ການກະທຳຂອງມະນຸດ, ເປັນຕົ້ນແມ່ນຂອງຊັ້ນຄົນຜູ້ນຳພາຕ້ອງມີຄຸນສົມບັດສອງຢ່າງຄື: ປ່ຽນແປງໃໝ່ ແລະ ການພັດທະນາ. ແຕ່ວ່າ, ເພິ່ນກໍ່ໄດ້ຊີ້ແຈ້ງວ່າ ກິດຈະການຮຳບາດແຜສົງຄາມ, ດັດແປງສັງຄົມເກົ່າ, ກໍ່ສ້າງສັງຄົມໃໝ່ທີ່ດີງາມ ແມ່ນວຽກງານ “ທີ່ໃຫຍ່ຫຼວງ ໜັກໜ່ວງ ແລະສັບສົນທີ່ສຸດ, ແຕ່ກໍ່ສະຫງ່າງາມທີ່ສຸດ. ນີ້ແມ່ນການຕໍ່ສູ້ຕ້ານສິ່ງຕ່າງໆທີ່ເກົ່າແກ່ ເປເພແລ້ວ, ເພື່ອສ້າງອັນໃໝ່ ອັນດີງາມຂຶ້ນ. ເພື່ອຍາດເອົາໄຊຊະນະໃນການຕໍ່ສູ້ອັນໃຫຍ່ໂຕນີ້ ແມ່ນຕ້ອງປຸກລະດົມທົ່ວປວງຊົນ, ຈັດຕັ້ງ ແລະອົບຮົມສຶກສາທົ່ວປວງຊົນ, ອີງໃສ່ກຳລັງອັນຍິ່ງໃຫຍ່ຂອງທົ່ວປວງຊົນ”(3).
ຈິດໃຈທັງໝົດຂອງ ພິໄນກຳ ໄດ້ສອດຮ້ອຍຄວາມຮັບຮູ້ ແລະການກະທຳປ່ຽນແປງໃໝ່ ໃນການແກ້ໄຂບັນດາສາຍພົວພັນ, ແກ້ໄຂບັນດາບັນຫາສັບສົນ ຫຍຸ້ງຍາກທັງໝົດ. ເພາະສະນັ້ນ, ພິໄນກຳ ພ້ອມກັບນິພົນ ຊີວິດໃໝ່ (ປີ 1947), ປ່ຽນແປງວິທີເຮັດວຽກ (ປີ 1947), ຂົນຂວາຍປະຊາຊົນ (ປີ 1949) ແມ່ນບັນດານິພົນຂອງທ່ານປະທານໂຮ່ຈີມິນ ທີ່ໄດ້ວາງຮາກຖານໃຫ້ແກ່ຈິນຕະນາການປ່ຽນແປງໃໝ່ຂອງພັກກອມມູນິດຫວຽດນາມ ໃນປີ 1986. ພິຈາລະນາທາງດ້ານທິດສະດີ, ການປ່ຽນແປງໃໝ່ຢູ່ຫວຽດນາມ ໂດຍແມ່ນພັກກອມມູນິດລິເລີ່ມ ແລະນຳພານັ້ນ ມັນບໍ່ແມ່ນຄວາມບັງເອີນ, ຫາກມັນໄດ້ຮັບການກະກຽມ ແລະເລິ່ມມາຈາກບັນດາປະຖົມປັດໃຈດ້ານແນວຄິດກ່ອນໜ້ານັ້ນ, ເປັນການສືບຕໍ່ທີ່ສອດຄ່ອງກັບໂລຊິກແຫ່ງກະແສແນວຄິດອັນບໍ່ຂາດສາຍຂອງໂຮ່ຈີມິນ, ແນວຄິດຂອງວິວັດທະນາການປ່ຽນແປງໃໝ່ທັງໝົດ.
ບັນດາທັດສະນະກ່ຽວກັບການກໍ່ສ້າງວັດທະນະທຳກຳອຳນາດນອງພັກຢູ່ໃນພິໄນກຳ
ພິໄນກຳ ຂອງທ່ານປະທານໂຮ່ຈີມິນ ແມ່ນນະວັດຕະກຳທິດສະດີໜຶ່ງທີ່ມີ ບັນດາຂໍ້ຄິດທິດສະດີທີ່ພິເສດສະເພາະ, ປະດິດສ້າງ ແລະໃນລະດັບຕັກກະຖານ. ພິເສດ, ພິໄນກຳ ໄດ້ສະຫລຸບຫຍໍ້ໃນລະດັບຕັກກະກຳມະກ່ຽວກັບບັນດາຈຸດພິເສດສະເພາະ, ຄຸນຄ່າຕົ້ນຕໍໃນວັດທະນະທຳກຳອຳນາດຂອງພັກກອມມູນິດ.
ທ່ານປະທານໂຮ່ຈີມິນໄດ້ປະດິດສ້າງທັດສະນະອັນຄົມຄາຍພິເສດ ກ່ຽວກັບພັກກຳອຳນາດ ແລະການກໍ່ສ້າງພັກກຳອຳນາດໃຫ້ຂາວສະອາດ, ໝັ້ນຄົງເຂັ້ມແຂງ. ພິໄນກຳ ເປັນນິພົນອັນໜຶ່ງອັນດຽວ ຊຶ່ງໃນນັ້ນ ທ່ານປະທານໂຮ່ຈີມິນ ໄດ້ໃຊ້ຄວາມສຳນຶກ “ພັກກຳອຳນາດ” ຢ່າງເປັນທາງການ ດ້ວຍບັນດາມາດຕະຖານອັນລະອຽດທີ່ສຸດ ເໝືອນດັ່ງບັນດາຄຸນສົມບັດອັນເປັນຕາຍຂອງພັກ: ສາມັກຄີ ເປັນເອກະພາບ; ເພື່ອປະຊາຊົນ, ຮັບໃຊ້ຊົນຊັ້ນ ຮັບໃຊ້ປະຊາຊົນ ຮັບໃຊ້ປະເທດຊາດຢ່າງສຸດອົກສຸດໃຈ ສຸດກຳລັງຄວາມສາມດ; ປະຕິບັດປະຊາທິປະໄຕຢ່າງກວ້າງຂວາງ; ຕິຊົມຕົນເອງ ແລະຕິຊົມຢ່າງເຂັ້ມງວດ; ຄຸນສົມບັດປະຕິວັດດຸໝັ່ນ ປະຢັດ ຊື່ສັດ ທ່ຽງທຳ ເຫັນແກ່ສ່ວນລວມ ບໍ່ເຫັນແກ່ຕົວ; ມີນ້ຳໃຈສະຫາຍ ຮັກແພງຊຶ່ງກັນແລະກັນ... ຄຸນສົມບັດເຫຼົ່ານີ້ສ້າງເປັນທາດແທ້ພິເສດສະເພາະ, ລັກສະນະດີເດັ່ນ, ກຳລັງແຮງ ແລະອຳນາດອິດທິພົນ, ອິດທິພົນຂອງພັກໃນປະຊາຊົນ, ຮັບປະກັນໃຫ້ພັກຍົກສູງຄວາມສາມາດນຳພາແລະກຳລັງສູ້ຮົບ, ຮັກສາທີ່ຕັ້ງແລະບົດບາດກຳອຳນາດໃນວິວັດທະນາການປະຕິວັດຫວຽດນາມທັງໝົດ.
ໃນ ພິໄນກຳ, ທ່ານປະທານໂຮ່ຈີມິນໄດ້ນຳສະເໜີ ແລະລິເລີ່ມວິທີແກ້ໄຂບັນຫາໜຶ່ງທີ່ສັບສົນທີ່ສຸດ: ແບບວິທີກຳອຳນາດຂອງພັກການເມືອງໜຶ່ງ ຊຶ່ງອາໃສ່ສິ່ງດັ່ງກ່າວເພື່ອເຮັດໃຫ້ບັນດາຄຸນຄ່າກຳລັງອຳນາດເຊື່ອມຊືມເຂົ້າໃນການພົວພັນສັງຄົມຕ່າງໆ ຕາມທິດທາງຕົ້ນຕໍຄື: ປະຊາຊົນແມ່ນເຈົ້າຂອງ ແລະເປັນເຈົ້າກຳລັງອຳນາດການເມືອງ.
ຜ່ານການສະຫລຸບສັງລວມພຶດຕິກຳແຫ່ງການຂະຫຍາຍປະຫວັດສາດມະນຸດຊາດ, ບັນດານັກທິດສະດີໄດ້ຊີ້ໃຫ້ເຫັນສາມປະເພດການກຳອຳນາດທີ່ເປັນແບບຢ່າງຄື: ກຳອຳນາດດ້ວຍທີ່ຕັ້ງກຳລັງອຳນາດທີ່ມີມາແຕ່ເດີມ; ກຳອຳນາດດ້ວຍສະຕິປັນຍາ ແລະຄວາມຮູ້; ກຳອຳນາດດ້ວຍຄຸນສົມບັດສິນທຳ ແລະບຸກຄະລິກລັກສະນະວັດທະນະທຳ.
ໃນ ພິໄນກຳ , ທ່ານປະທານໂຮ່ຈີມິນໄດ້ວາງແຜນ ແລະລິເລິ່ມແບບວິທີກຳອຳນາດທີ່ໜັກແໜ້ນທີ່ສຸດ ແຕ່ກໍ່ຫຍຸ້ງຍາກທີ່ສຸດ: ກຳອຳນາດດ້ວຍບຸກຄະລິກລັກສະມະ ຄຸນສັມບັດຂອງພັກ. ເພາະວ່າ, ໃນຈິນຕະນາການຂອງເພິ່ນ, ຄຸນສົມບັດສິນທຳເປັນກົກຮາກ, ເປັນພື້ນຖານ; ອີງໃສ່ນັ້ນ ຈຶ່ງມີຄົນບໍ່ໂລພາເງິນຄຳ, ບໍ່ຢ້ານລຳບາກ, ບໍ່ຢ້ານກົວກຳລັງອຳນາດ; ຖ້າຫາກບໍ່ມີຄຸນສັມບັດສິນທຳ ເຖິງວ່າຈະເກ່ງກ້າສາມາດປານໃດກໍ່ບໍ່ອາດນຳພາປະຊາຊົນໄດ້. ຄຸນສົມບັດຂອງພັກສະແດງອອກຢ່າງມີຊີວິດຊີວາ ຢູ່ໃນສະມາຊິກພັກແຕ່ລະຄົນທີ່ລະອຽດ. ຕົວແບບບຸກຄະລິກລັກສະນະຂອງຜູ້ນຳພາ, ກຳອຳນາດຕາມແບບບຸກຄະລິກລັກສະນະວັດທະນະທຳຂອງໂຮ່ຈີມິນ ຕ້ອງລວມມີຄົບບັນດາຄຸນສົມບັດ ດຸໝັ່ນ ປະຢັດ ຊື່ສັດ ທ່ຽງທຳ ເຫັນແກ່ສ່ວນລວມ ບໍ່ເຫັນແກ່ຕົວ.
ບັນດາຄຸນສົມບັດຂອງພັກກອມມູນິດຫວຽດນາມຜູ້ກຳອຳນາດ “ບໍ່ໄດ້ຫຼົ່ນລົງມາຈາກຟ້າ, ບໍ່ເກີດເອງໂດຍທຳມະຊາດ”; ມັນໄດ້ເປັນຮູບເປັນຮ່າງຂຶ້ນ, ເປັນແຕ່ລະກ້າວ, ໄດ້ປັບປຸງແລະປະກອບເປັນເນື້ອໃນວັດທະນະທຳຂອງພັກ ໃນພຶດຕິກຳແຫ່ງການເຄື່ອນໄຫວປະຕິວັດທີ່ອຸດົມສົມບູນ ຫຍຸ້ງຍາກທີ່ສຸດ, ແຕ່ກໍ່ພິລະອາດຫານ ສະຫງ່າງາມທີ່ສຸດ, ໂດຍຜ່ານວຽກງານເປັນປະຈຳຄື: ກໍ່ສ້າງພັກດ້ວຍຕົນເອງ, ປັບປຸງພັກດ້ວຍຕົນເອງ. ກໍ່ສ້າງດ້ວຍຕົນເອງ, ປັບປຸງດ້ວຍຕົນເອງ ເຮັດໃຫ້ພັກຂາວສະອາດ ໝັ້ນຄົງເຂັ້ມແຂງ ແມ່ນກົດເກນແຫ່ງການຄົງຕົວ ແລະຂະຫຍາຍຕົວຂອງພັກກອມມູນິດຫວຽດນາມ. ໃນ ພິໄນກຳ, ທ່ານປະທານໂຮ່ຈີມິນເປັນຫ່ວງເປັນໄຍຕໍ່ອະນາຄົດ ແງ່ຫວັງພາຍໜ້າຂອງຊາດ, ຕໍ່ຄວາມເສື່ອມໂຊມປ່ຽນທາດຂອງພາກສ່ວນພະນັກງານ ສະມາຊິກພັກເມື່ອໄດ້ມີຍົດສັກ ຖານະຕຳແໜ່ງ. ເພາະສະນັ້ນ, ເພິ່ນໄດ້ຊີ້ບອກວ່າ: “ວຽກງານທີ່ຕ້ອງເຮັດກ່ອນອື່ນໝົດ ແມ່ນປັບປຸງພັກຄືນໃໝ່, ເຮັດໃຫ້ສະມາຊິກພັກແຕ່ລະຄົນ, ສະມາຊິກຊາວໜຸ່ມແຕ່ລະຄົນ, ໜ່ວຍພັກແຕ່ລະໜ່ວຍລ້ວນແຕ່ອອກແຮງເຮັດຫຼ້ອນໜ້າທີ່ທີ່ພັກມອບໝາຍໃຫ້, ຕັ້ງໜ້າຮັບໃຊ້ປະຊາຊົນຢ່າງສຸດອົກສຸດໃຈ. ເຮັດໄດ້ຄືແນວນັ້ນ, ເຖິງວ່າວຽກງານຈະໃຫຍ່ຫຼວງປານໃດ ຫຍຸ້ງຍາກປານໃດ ພວກເຮົາກໍ່ໄດ້ຮັບໄຊຊະນະຢ່າງແນ່ນອນ”(4).
ກໍ່ສ້າງພັກກອມມູນິດຫວຽດນາມຜູ້ກຳອຳນາດ, ຕາມທ່ານປະທານໂຮ່ຈີມິນ, ຕ້ອງດຳເນີນທັງສີ່ເນື້ອໃນຢ່າງຄົບຊຸດ ຮອບດ້ານຄື: ແນວຄິດ, ການເມືອງ, ການຈັດຕັ້ງ - ພະນັກງານ ແລະ ຄຸນສົມບັດສິນທຳ.
ຕາມທັດສະນະຂອງອົງການ UNESCO, ຖ້າວັດທະນະທຳມີທາດແທ້ມະນຸດສະທຳ, ເປັນລະບົບບັນດາຄຸນຄ່າວັດຖຸ ແລະຈິດໃຈ ທີ່ສ່ອງແສງລະດັບມະນຸດສະຊາດ ຂອງບັນດາການພົວພັນສັງຄົມ ກໍ່ອາດເຂົ້າໃຈວ່າ ບົດບາດທີ່ຕັ້ງ, ກຳລັງຄວາມສາມາດ, ແບບວິທີກຳອຳນາດຂອງພັກກອມມູນິດ ທີ່ໄດ້ສະແດງອອກໃນ ພິໄນກຳ ຂອງທ່ານປະທານໂຮ່ຈີມິນນັ້ນ ມັນບັນຈຸບັນດາຄຸນຄ່າວັດທະນະທຳອັນເລິກເຊິ່ງ ປະກອບເປັນລັດທິມະນຸດສະທຳທີ່ເຄື່ອນໄຫວ ຖຶກຕ້ອງຕາມຄວາມໝາຍຂອງມັນ.
ບັນດາຄຸນຄ່າມະນຸດສະທຳເທິງນີ້ ໃນຄວາມສຳນຶກກ່ຽວກັບວັດທະນະທຳກຳອຳນາດຂອງພັກກອມມູນິດແມ່ນຄວາມງາມ, ກຳລັງຊີວິດ ແລະ ແຮງດຶງດູດຈັບໃຈອັນຍືນຍາວຂອງ ພິໄນກຳ - ນະວັດຕະກຳອັນຍອດຍ້ຽມຂອງທ່ານປະທານໂຮ່ຈີມິນ; ນິພົນສະບັບນີ້ເປັນຊັບສົມບັດວັດທະນະທຳຈິດໃຈອັນລ້ຳຄ່າຂອງຊາດຫວຽດນາມຕະຫຼອດການ, ມັນຍາມໃດກໍ່ເຍື່ອງສ່ອງເສັ້ນທາງກ້າວເດີນ ແລະຮ່ວມທາງພ້ອມກັບຊາດຫວຽດນາມ ບົນເສັ້ນທາງແຫ່ງການພັດທະນາ.
ຕັ້ງໜ້າກໍ່ສ້າງ ແລະປັບປຸງພັກ, ປະຕິບັດຄວາມປະສົງຂອງທ່ານປະທານໂຮ່ຈີມິນ
ປະຕິບັດ ພິໄນກຳ ຂອງທ່ານປະທານໂຮ່ຈີມິນ, ຈາລຶກໄວ້ໃນໃຈຄຳປະຕິຍານ 5 ປະການ ທີ່ສະຫາຍເລຂາທິການໃຫຍ່ ເລຢວນ ຕາງໜ້າຄະນະບໍລິຫານງານສູນກາງພັກ ອ່ານຖະແຫຼງໃນພິທີໄວ້ອາໄລແລະງານຊາປະນະກິດທ່ານປະທານໂຮ່ຈີມິນ, 45 ປີທີ່ຜ່ານມາ, ປະຊາຊົນຫວຽດນາມຜູ້ພິລະອາດຫານ ພາຍໃຕ້ການນຳພາຂອງພັກກອມມູນິດຫວຽດນາມ, ໄດ້ສາມັກຄີເປັນຈິດໜຶ່ງໃຈດຽວ, ສຸມກຳລັງວັງຊາ ຈິດໃຈແລະສະຕິປັນຍາທັງໝົດ, ຜ່ານຜ່າຄວາມຫຍຸ້ງຍາກ ສິ່ງທ້າທາຍ, ຍາດເອົາຜົນສຳເລັດອັນໃຫຍ່ຫຼວງໃນຂົງເຂດຕ່າງໆມາໄດ້ຢ່າງຫຼວງຫຼາຍ ຊຶ່ງຈະແຈ້ງທີ່ສຸດແມ່ນໃນວຽກງານກໍ່ສ້າງ ປັບປຸງພັກ.
ໂດຍຮັບຮູ້ໄດ້ຄວາມໝາຍອັນສຳຄັນຂອງວຽກງານປັບປຸງພັກ, ແນໃສ່ຍົກສູງນ້ຳໃຈສາມັກຄີ ເປັນເອກະພາບໃນພັກ, ເພີ່ມທະວີກຳລັງແຮງ ກຳລັງຄວາມສາມາດນຳພາຂອງພັກ, ປະຕິບັດແນວຄິດຂອງທ່ານປະທານໂຮ່ຈີມິນ ກ່ຽວກັບການກໍ່ສ້າງພັກກຳອຳນາດ, ໃນ 45 ປີທີ່ຜ່ານມາ, ພັກກອມມູນິດຫວຽດນາມ ໄດ້ໃຫ້ຄວາມສຳຄັນ ແລະ ຍາມໃດກໍ່ຢືນຢັນການກໍ່ສ້າງພັກເປັນໜ້າທີ່ຫຼັກແຫຼ່ງ, ເປັນເງື່ອນໄຂທີ່ມີລັກສະນະຕັດສິນ ເພື່ອຮັບປະກັນໄຊຊະນະຂອງພາລະກິດການປະຕິວັດ. ຄະນະບໍລິຫານງານສູນກາງພັກສະໄໝຕ່າງໆ ໄດ້ລົງມະຕິຫຼາຍສະບັບກ່ຽວກັບການກໍ່ສ້າງ ປັບປຸງພັກ; ຈັດຕັ້ງຊີ້ນຳວຽກງານຮ່ຳຮຽນ ຊາບຊືມບັນດາເອກະສານຂອງພັກ, ສ້າງຄວາມເປັນເອກະພາບສູງໃນທົ່ວພັກ ກ່ຽວກັບທັດສະນະ ແນວທາງ; ກໍ່ສ້າງໂຄງການການເມືອງ, ກົດລະບຽບພັກສະບັບປັບປຸງ, ບັນດາແຜນນະໂຍບາຍ ນະໂຍບາຍໃຫຍ່. ກອງປະຊຸມສູນກາງພັກຄັ້ງທີ 6 (ຄັ້ງ 2) ສະໄໝທີ VIII ແລະບັນດາມະຕິຕົກລົງ ຄຳສັ່ງຂອງສູນກາງພັກກ່ຽວກັບວຽກງານກໍ່ສ້າງ ປັບປຸງພັກ, ບັນດາເອກະສານກອງປະຊຸມໃຫຍ່ຂອງພັກ ສະໄໝທີ IX, X, XI, ແລະໃນມໍ່ໆນີ້ແມ່ນ ມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ວ່າດ້ວຍ “ບາງບັນຫາຮີບດ່ວນກ່ຽວກັບການກໍ່ສ້າງພັກໃນປັດຈຸບັນ”, ສືບຕໍ່ກຳນົດໜ້າທີ່ກໍ່ສ້າງພັກເປັນໜ້າທີ່ແຖວໜ້າ, ເປັນໜ້າທີ່ຫຼັກແຫຼ່ງ ຄຽງຂ້າງໜ້າທີ່ພັດທະນາເສດຖະກິດ, ກໍ່ສ້າງ ພັດທະນາວັດທະນະທຳໃຫ້ເປັນຮາກຖານຈິດໃຈຂອງສັງຄົມ. ບັນດາຜົນສຳເລັດເບື້ອງຕົ້ນອັນສຳຄັນ ທີ່ຍາດມາໄດ້ໃນວຽກງານກໍ່ສ້າງ ແລະປັບປຸງພັກ ໄດ້ປະກອບສ່ວນຍົກສູງຄວາມສາມາດນຳພາ ກຳລັງສູ້ຮົບຂອງພັກ. ບັນດາຜົນສຳເລັດທີ່ບັນລຸໄດ້ນັ້ນ ສະແດງອອກຢ່າງຈະແຈ້ງ ຢູ່ທີ່ການເປີດກວ້າງປະຊາທິປະໄຕໃນພັກ ແລະປະຊາທິປະໄຕໃນສັງຄົມ, ສ້າງເປັນກະແສກຳລັງຊີວິດໃໝ່, ຊຸກຍູ້ການພັດທະນາເສດຖະກິດ, ວັດທະນະທຳ ແລະສັງຄົມ, ເຊີດຊູລັກສະນະຕັ້ງໜ້າຂອງປັດໃຈມະນຸດ. ການຕໍ່ສູ້ຕ້ານພະຍາດອາດຍາສິດ, ສໍ້ລາດບັງຫຼວງ, ການຟຸມເຟືອຍແລະຫຍໍ້ທໍ້ ຢູ່ໃນພັກ ແລະໃນສັງຄົມ ໄດ້ມີຄຸນປະໄຫຍດໃນການບອກສອນຕັກເຕືອນ, ກຳຈັດດັດແກ້ປະກົດການຫຍໍ້ທໍ້, ເສື່ອມໂຊມປ່ຽນທາດ.
ຕອບສະໜອງຄຳຮຽກຮ້ອງການຂົນຂວາຍກໍ່ສ້າງ ແລະປັບປຸງພັກ, ຫຼາຍປີທີ່ຜ່ານມາ, ການເຄື່ອນໄຫວຕິຊົມຕົນເອງແລະຕິຊົມຢູ່ໃນພັກ, ແຕ່ສູນກາງລົງຮອດໜ່ວຍພັກ, ໄດ້ມີການຫັນປ່ຽນທີ່ແນ່ນອນ. ກຳລັງສູ້ຮົບຂອງຫຼາຍໜ່ວຍພັກ, ຄະນະພັກ ແລະສະມາຊິກພັກໄດ້ຮັບການເພີ່ມທະວີ ຊຶ່ງສະແດງອອກໃນຈິດໃນຕໍ່ສູ້ຢ່າງບໍ່ປະນີປະນອມ ກັບບັນດາປະກົດການແນວຄິດທີ່ຜິດເຂວ ປະຕິການ ເປັນພິດໄພ, ປົກປັກຮັກສາຮາກຖານແນວຄິດການເມືອງຂອງພັກ, ປົກປັກຮັກສາລະບອບການເມືອງສັງຄົມນິຍົມ. ຕໍ່ໜ້າການວິກິດ ພັງທະລາຍລົງຂອງລະບົບສັງຄົມນິຍົມ, ຕໍ່ໜ້າຄວາມຮຽກຮ້ອງຕ້ອງການປ່ຽນແປງໃໝ່ປະເທດ, ພັກໄດ້ຊີ້ນຳເພີ່ມທະວີວຽກງານແນວຄິດ ທິດສະດີ ເພື່ອແນໃສ່ຢືນຢັນບັນດາບັນຫາທີ່ມີລັກສະນະຫຼັກການຂອງລັດທິມາກ - ເລນິນ, ແນວຄິດໂຮ່ຈີມິນ; ຍູ້ແຮງການໂຄສະນາ ອົບຮົມສຶກສາບັນດາທັດສະນະ ແນວທາງ ນະໂຍບາຍຂອງພັກ. ຜ່ານບັນດາຜົນສຳເລັດ ແລະນັບທັງບັນດາບົດຮຽນປະສົບການຕົວຈິງ ຂອງພາລະກິດການປ່ຽນແປງໃໝ່ ແລ້ວເພີ່ມເຕີນ ດັດສົມບາດກ້າວເດີນໃຫ້ສອດຄ່ອງກັບການພັດທະນາ, ນັ້ນແມ່ນພື້ນຖານການເມືອງທີ່ສຳຄັນທີ່ສຸດເພື່ອຮັບປະກັນຄວາມເປັນເອກະພາບທາງດ້ານແນວຄິດພາຍໃນພັກ ແລະຄວາມເຫັນດີເຫັນພ້ອມຂອງສັງຄົມ.
ແຕ່ວ່າ, ຕໍ່ໜ້າການຜັນປ່ຽນຢ່າງໄວວາ ແລະສັບສົນຂອງສະພາບການພາຍໃນປະເທດ ແລະໃນໂລກ, ການກະທົບຈາກດ້ານລົບຂອງກົນໄກຕະຫຼາດ, ມີພະນັກງານ ສະມາຊິກພັກພາກສ່ວນໜຶ່ງທີ່ບໍ່ໜ້ອຍ ຖືກເຊື່ອມໂຊມປ່ຽນທາດທາງດ້ານແນວຄິດການເມືອງ ແລະຄຸນສົມບັດສິນທຳ ແບບແຜນດຳລົງຊີວິດ, ລະເຫຼີງເຫີນຫ່າງອຸດົມຄະຕິ ພາໄປເຖິງການ “ຫັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ”, ເປັນຕົ້ນແມ່ນໃນລັດທິ ແລະໃນມາດຕະຖານຄຸນຄ່າການພັດທະນາກ້າວໜ້າ; ເສຍສະຕິລະວັງຕົວ, ຫລຸດຜ່ອນນ້ຳໃຈສູ້ຮົບ, ຂາດສະຕິຕໍ່ການຈັດຕັ້ງລະບຽບວິໄນ, ເສື່ອມເສຍບຸກຄະລິກ; ຕິດພະຍາດອາດຍາສິດ ຫ່າງເຫີນປະຊາຊົນ. ພະນັກງານ ສະມາຊິກພັກຫຼາຍຄົນຍັງປະຕິບັດປະຊາທິປະໄຕແບບຮູບການ, ການເຄື່ອນໄຫວຕິຊົມຕົນເອງ ແລະຕິຊົມຍັງມີຄວາມຜິດເຂວ. ສະພາບການ “ຖືຄວາມຖືກຕ້ອງປອງດອງກັນເປັນເລີດໂດຍບໍ່ຈຳແນກແຈ້ງຜິດຖືກ” ຍັງແຜ່ຫຼາຍພໍຄວນຢູ່ໃນພັກ. ພະນັກງາ ສະມາຊິກພັກຈຳນວນໜຶ່ງຍັງປະໃຫ້ລັດທິອັດຕະບຸກຄົນຄອບງຳ, ການສໍ້ລາດບັງຫຼວງ, ຫາຄວາມລ້ຳລວຍຕາມ “ຜົນປະໂຫຍດຈຸຫຍ່ອມ”, ສວຍໃຊ້ການຕິຊົມເພື່ອໃສ່ຮ້າຍປ້າຍສີກັນ, ເຮັດໃຫ້ພາຍໃນເສຍຄວາມສາມັກຄີ, ເຮັດໃຫ້ຄວາມໄວ້ເນື້ອເຊື່ອໃຈຂອງປະຊາຊົນຕໍ່ກັບພັກຫລຸດຜ່ອນລົງ. ນີ້ແມ່ນໄພອັນຕະລາຍຊ້ອນແຝງຕໍ່ກັບພັກກຳອຳນາດ, ຕ້ອງລົບລ້າງມັນຢ່າງໄວ.
ສະພາບການເທິງນີ້ໄດ້ວາງຫຼາຍບັນຫາໃໝ່ອອກມາໃຫ້ແກ່ວຽກງານກໍ່ສ້າງພັກ, ນັບທັງບັນຫາທິດສະດີ ແລະພຶດຕິກຳ, ມັນຮຽກຮ້ອງໃຫ້ສືບຕໍ່ການປ່ຽນແປງໃໝ່ ແລະເອົາໃຈໃສ່ເປັນສຳຄັນກວ່າອີກ, ເພື່ອສ້າງໃຫ້ມີການຫັນປ່ຽນທີ່ມີປະສິດທິຜົນອັນຕັ້ງໜ້າ, ເຮັດໃຫ້ພັກກອມມູນິດຫວຽດນາມນັບມື້ນັບເຕີບໃຫຍ່ ເຂັ້ງແຂງໃນທຸກດ້ານ, ໃຫ້ໄດ້ຖືກຕ້ອງຕາມຄວາມປະສົງໃນ ພິໄນກຳ ຂອງທ່ານປະທານໂຮ່ຈີມິນ.
ທາງດ້ານການຈັກຕັ້ງພັກ, ຕ້ອງອອກແຮງເພີ່ມທະວີການອົບຮົມສຶກສາໃຫ້ທົ່ວພັກ ກ່ຽວກັບອຸດົມຄະຕິລັດທິກອມມູນິດນິຍົນ ແນວທາງ ນະໂຍບາຍຂອງພັກ, ກ່ຽວກັບໜ້າທີ່ ຄຸນສົມບັດສິນທຳຂອງຜູ້ເປັນສະມາຊິກພັກ; ປະຕິບັນການຕິຊົມຕົນເອງ ແລະຕິຊົມຢ່າງເຂັ້ມງວດຢູ່ໃນພັກ; ຊົມເຊີຍ ສົ່ງເສີມມະຫາຊົນຕິຊົມພະນັກງານ ສະມາຊິດພັກ; ປ່ຽນແປງໃໝ່ລະບອບດຳເນີນຊີວິດຂອງໜ່ວຍພັກ, ຮັບປະກັນຄວາມເຂັ້ມງວດ ແລະຍົກສູງຄຸນນະພາບການດຳເນີນຊີວິດພັກ; ຫຼັກການ ລະບຽບວິໄນຂອງພັກຕ້ອງໄດ້ປະຕິບັດຢ່າງເຂັ້ມງວດ; ວຽກງານກວດກາ ຕິດຕາມກວດກາຂອງພັກຕ້ອງໄດ້ປະຕິບັດຢ່າງເປັນປະຈຳ ແໜ້ນແຟ້ນ ແລະມີປະສິດທິຜົນ.
ຕໍ່ກັບພະນັກງານ ສະມາຊິກພັກແຕ່ລະຄົນ, ໃນຄວາມຮັບຮູ້ ແລະການກະທຳ, ຍາມໃດກໍ່ຕ້ອງຕັ້ງຜົນປະໂຫຍດຂອງພັກ ຂອງການປະຕິວັດ ຂອງປະຊາຊົນຂຶ້ນເໜືອສຸດ, ກ່ອນອື່ນໝົດ; ຕ້ອງຝຶກຝົນຫຼໍ່ຫຼອມ ບຳລຸງແນວຄິດລວມໝູ່ ນ້ຳໃຈສາມັກຄິ ສະຕິຕໍ່ການຈັດຕັ້ງແລະລະບຽບວິໄນ ຢ່າງເປັນປະຈຳ; ຕ້ອງລົງເລິກຕິດແໜ້ນກັບພຶດຕິກຳ, ໃກ້ຊິດຕິດແທດກັບປະຊາຊົນ, ເຄົາລົບນັບຖືປະຊາຊົນ ແລະເສີມຂະຫຍາຍສິດເປັນເຈົ້າຂອງປະຊາຊົນ; ພະຍາຍາມຮ່ຳຮຽນຍົກສູງລະດັບຄວາມຮູ້ຮອບດ້ານ ເພື່ອສາມາດສຳເລັດທຸກໜ້າທີ່ທີ່ໄດ້ຮັບມອບໝາຍຢ່າງດີທີ່ສຸດ.
ນັ້ນແມ່ນບັນດາວຽກງານອັນລະອຽດ ຕົວຈິງໃນເງື່ອນໄຂປັດຈຸບັນ ເພື່ອແນໃສ່ສືບທອດມູນເຊື້ອປະຕິວັດອັນສະຫງ່າງາມ, ເພີ່ມພູນຄູນສ້າງ ແລະເຮັດໃຫ້ຄຸນຄ່າວັດທະນະທຳກຳອຳນາດ ຂອງພັກກອມມູນິດຫວຽດນາມ ອຸດົມມັ່ງຄັ່ງຂຶ້ນຕື່ມ.
ສືບຕໍ່ຮ່ຳຮຽນ ແລະປະຕິບັດ ພິໄນກຳ ອັນສັກກະລະບູຊາຂອງທ່ານປະທານໂຮ່ຈີມິນ ເພື່ອ “ກໍ່ສ້າງປະເທດຫວຽດນາມໃຫ້ໃຫຍ່ໂຕໂອ້ຖົງກວ່າ, ສວຍງານກວ່າ”, ໜ້າທີ່ສະເພາະໜ້າໃນການກໍ່ສ້າງວັດທະນະທຳພັກກຳອຳນາດແມ່ນສືບຕໍ່ຍູ້ແຮງການຮ່ຳຮຽນ ແລະປະຕິບັດຕາມແວ່ນແຍງຄຸນສົມບັດຂອງທ່ານປະທານໂຮ່ຈີມິນ, ຕາມມະຕິສະບັບທີ 03-CT/TW, ລົງວັນທີ 14 ພຶດສະພາ 2011, ຂອງກົມການເມືອງສູນການພັກ. ຕາມຫົວຂໍ້ຕົ້ນຕໍທີ່ສອດຮ້ອຍຕະຫຼອດມະຕິສະບັບທີ 03-CT/TW: “ຮ່ຳຮຽນ ແລະປະຕິບັດຕາມແວ່ນແຍງຄຸນສົມບັດຂອງທ່ານປະທານໂຮ່ຈີມິນ ຕະຫຼອຊີວິດສູ້ຊົນ ດຸໝັ່ນ ປະຢັດ ຊື່ສັດ ທ່ຽງທຳ ເຫັນແກ່ສ່ວນລວມ ບໍ່ເຫັນແກ່ຕົວ; ເປັນຜູ້ຮັບໃຊ້ທີ່ຕັ້ງຕໍ່ບໍລິສຸດ ຈົງຮັກພັກດີຂອງປະຊາຊົນ; ມີຊີວິດສ່ວນຕົວຢ່າງໃສສະອາດ ງ່າຍດາຍ”, ພະນັກງານ ສະມາຊິກພັກແຕ່ລະຄົນ, ເປັນຕົ້ນແມ່ນພະນັກງານນຳພາຫຼັກແຫຼ່ງຂັ້ນຕ່າງໆ ຕ້ອງຍົກສູງຄວາມຮັບຮູ້, ກໍ່ສ້າງຄຸນສົມບັດກ້າຄິດ ກ້າເວົ້າ ກ້າເຮັດ, ສຳເລັດໜ້າທີ່ເປັນຢ່າງດີ, ຫັນຄວາມຕັດສິນໃຈເປັນການກະທຳ, ເປັນຄຸນນະພາບ ແລະປະສິດທິຜົນຂອງວຽກງານ, ປະກອບສ່ວນອັນເລັກນ້ອຍຂອງຕົນເຂົ້າໃນພາລະກິດປົກປັກຮັກສາປະເທດຊາດ, ກໍ່ສ້າງ ສະຖາປະນາ ແລະ ພັດທະນາປະເທດໃຫ້ໝັ້ນຄົງຍືນຍົງ. ນີ້ແມ່ນແບບວິທີທີ່ສຳຄັນເພື່ອແນໃສ່ປັບປຸງ ເຊີດຊູ ແລະເສີມຂະຫຍາຍ ບັນດາຄຸນຄ່າບຸກຄະລິກວັດທະນະທຳຂອງສະມາຊິກພັກ ຂອງພັກກຳອຳນາດ.
ຄຳຕັກເຕືອນ ແລະມຸ່ງຫວັງຂອງທ່ານປະທານໂຮ່ຈີມິນ ກ່ຽວກັບການກໍ່ສ້າງວັດທະນະທຳກຳອຳນາດຂອງພັກກອມມູນິດທີ່ສະແດງອອກໃນ ພິໄນກຳ ນັ້ນ ຈັ່ງແມ່ນງ່າຍດາຍ ປະເສີດເລີດລ້ຳ ແລະສັກກະລະບູຊາແທ້. ເພາະສະນັ້ນ, ໃນວຽກງານກໍ່ສ້າງພັກປະຕິວັດທີ່ແທ້ຈິງ, ພິໄນກຳ ຂອງເພິ່ນໄດ້ກາຍເປັນນິພົນອະມະຕະ, ສ່ວນກະໂຕເພິ່ນເອງ, ດ້ວຍພຽງແຕ່ນິພົນສະບັບນີ້ເທົ່ານັ້ນ ເພິ່ນກໍ່ອາດຈະກາຍເປັນນັກແນວຄິດໃຫຍ່ຂອງຍຸກສະໄໝ. ແນວຄິດໂຮ່ຈີມິນ, ພິໄນກຳ ຂອງທ່ານປະທານໂຮ່ຈີມິນ ຈະຍືນຍົງຄົງຕົວຕະຫຼອດການຢູ່ໃນຈິດວິນຍານ ແລະສະຕິປັນຍາຂອງຊາດຫວຽດນາມ ແລະຢູ່ໃນຄວາມນິຍົມຊົມຊອບ ເຄົາລົບນັບຖືຂອງປະຊາຊົນໂລກ./.
ຂຽນໂດຍ: ຮສ.ດຣ. ຟ້າມງອກແອງ,
ຮອງຫົວໜ້າຮັບຜິດຊອບສະຖາບັນໂຮ່ຈີມິນ ແລະບັນດາຜູ້ນຳຂອງພັກ,
ສະຖາບັນການເມືອງແຫ່ງຊາດໂຮ່ຈີມິນ
--------------------------
* ບົດທີ່ໄດ້ລົງພິມໃນວາລະສານກອມມູນິດ - ສະບັບທີ 863 (ເດືອນກັນຍາ 2014)
(1), (2), (3), (4) ໂຮ່ຈີມິນ: ນິພົນຄົບຊຸດ, ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ. 2000, ເຫຼັ້ມທີ 12, ໜ້າທີ 498 - 499, 498, 505, 503.
