ວ.ກ - ວັນທີ 26 ກັນຍາ 2014, ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ VIII ແນວໂຮມປະເທດຊາດ ຫວຽດນາມ ໄດ້ໄຂຂຶ້ນ ທີ່ນະຄອນຫຼວງຮ່າໂນ້ຍ, ສະຫາຍຫງວຽນຝູຈ້ອງ, ເລຂາທິການໃຫຍ່ ຄະນະບໍລິຫານງານສູູກາງ ພັກກອມມູນິດຫວຽດນາມ ໄດ້ໃຫ້ກຽດມາຮ່ວມ ແລະກ່າວຄຳປາໄສຊີ້ນຳ. ວາລະສານ ກອມມູນິດ ຂໍເປັນກຽດໄດ້ແນະນຳ ບົດປາໄສທີ່ສຳຄັນນີ້.
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ VIII ແນວໂຮມປະເທດຊາດຫວຽດນາມ ເປັນເຫດການທີ່ສຳຄັນຍິ່ງໃນຊີວິດການເມືອງ ຂອງປະຊາຊົນເຮົາໃນທົ່ວປະເທດ. ຕາງໜ້າຄະນະບໍລິຫານງານສູູກາງພັກ, ຂ້າພະເຈົ້າຂໍຊົມເຊີຍກອງປະຊຸມໃຫຍ່ຢ່າງສຸດອົກສຸດໃຈ, ຊົມເຊີຍບັນດາທ່ານແຂກຜູ້ມີກຽດ, ຊົນເຊີຍບັນດາທ່ານຜູ້ແທນພັວກວ່າຄົນທີ່ມາຈາກທົ່ວປະເທດ ເພື່ອຮ່ວມກອງປະຊຸມໃຫຍ່ ຢູ່ນະຄອນຫຼວງທີ່ສີວິໄລແຫ່ງນີ້. ຜ່ານບັນດາທ່ານຜູ້ແທນ ບັນດາທ່ານຜູ້ອາວຸໂສ ແລະ ບັນດາສະຫາຍ, ຂ້າພະເຈົ້າຂໍຝາກຄວາມຮັກແພງແລະຄຳອວຍໄຊໃຫ້ພອນອັນປະເສີດຂອງຄະນະບໍລິຫານງານສູນກາງພັກກອມມູນິດຫວຽດນາມ ມາຍັງພີ່ນ້ອງຮ່ວມຊາດໃນທົ່ວປະເທດ ແລະ ພີ່ນ້ອງຊາວຫວຽດນາມຢູ່ຕ່າງປະເທດທຸກຖ້ວນໜ້າ.
ໃນບັນຍາກາດມ່ວນຊື່ນຂອງງານມະໂຫລານວັນນີ້, ພວກເຮົາສະທົກສະເທືອນໃຈຄິດຮອດຄິດເຖິງທ່ານປະທານໂຮ່ຈີມິນທີ່ເຄົາລົບຮັກດ້ວຍຄວາມຮູ້ບຸນຄຸນຢ່າງເລິກເຊິ່ງ - ຜູ້ທີ່ໄດ້ສືບທອດ ແລະ ເສີມຂະຫຍາຍມູນເຊື້ອສາມັກຄີ - ບໍ່ເກີດແຫ່ງກຳລັງແຮງອັນໃຫຍ່ຫຼວງຂອງຊາດ. ທ່ານປະທານໂຮ່ຈີມິນ ແມ່ນນັກແນວຄິດໃຫຍ່, ນັກຍຸດທະສາດທີ່ອັດສະລິຍະ, ນັກຈັດຕັ້ງທີ່ຍິ່ງໃຫຍ່, ເປັນຜູ້ກໍ່ຕັ້ງ ແລະ ເປັນຍອດຫົວໃຈຂອງແນວໂຮມແຫ່ງຊາດເປັນເອກະພາບຫວຽດນາມ.
ພັກກອມມູນິດຫວຽດນາມຍາມໃດກໍ່ຕີລາຄາສູງບົດບາດຂອງແນວໂຮມປະເທດຊາດຫວຽດນາມ ແລະ ຮູ້ສຶກດີອົກດີໃຈທີ່ສຸດຕໍ່ການຂະຫຍາຍຕົວ ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງຂອງແນວໂຮມ - ຮູບພາບຂອງກຸ່ມກ້ອນມະຫາສາມັກຄີປວງຊົນທັງຊາດ ຊຶ່ງເປັນປັດໃຈຕັດສິນໄຊຊະນະຂອງການປະຕິວັດຫວຽດນາມ.
ໃນຫ້າປີທີ່ຜ່ານມາ, ເພື່ອສືບຕໍ່ເສີມຂະຫຍາຍມູນເຊື້ອອັນສະຫງ່າງາມ ແລະບັນດາບົດຮຽນອັນລ້ຳຄ່າຂອງແນວໂຮມແຫ່ງຊາດເປັນເອກະພາບຫວຽດນາມໃນຕະຫຼອດເວລາ 80 ກວ່າປີ, ຜ່ານບັນດາສະໄໝການປະຕິວັດ, ແນວໂຮມປະເທດຊາດຫວຽດນາມ ໄດ້ຜັນຂະຫຍາຍປະຕິບັດມະຕິກອງປະຊຸມໃຫຍ່ທົ່ວປະເທດຄັ້ງທີ VII ຂອງແນວໂຮມຢ່າງມີປະສິດທິຜົນ ແລະ ໄດ້ປະກອບສ່ວນອັນໃຫຍ່ຫຼວງຫຼາຍຢ່າງເຂົ້າໃນພາລະກິດປະຕິວັດຂອງຊາດ. ສ່ວນປະກອບທີ່ສຳຄັນທີ່ສຸດຂອງແນວໂຮມແມ່ນ ໄດ້ອອກແຮງເຄື່ອນໄຫວປະກອບສ່ວນເປີດກວ້າງ ປັບປຸງກຸ່ມກ້ອນມະຫາສາມັກຄີປວງຊົນທັງຊາດ ອ້ອມຂ້າງພັກກອມມູນິດຫວຽດນາມ, ສ້າງເປັນກຳລັງແຮງອັນໃຫຍ່ຫຼວງໃຫ້ແກ່ການພັດທະນາຂອງປະເທດຊາດ. ແນວໂຮມໄດ້ສາມັກຄີ ເຕົ້າໂຮມກຳລັງ ແລະ ກໍ່ສ້າງກຸ່ມກ້ອນສາມັກຄີທົ່ວປວງຊົນ ຊຶ່ງບໍ່ພຽງແຕ່ດ້ວຍວຽກງານໂຄສະນາ ຂະຫຍາຍການຈັດຕັ້ງເທົ່ານັ້ນ ຫາກຍັງໄດ້ຜ່ານບັນດາຂະບວນການຮັກຊາດອັນກວ້າງຂວາງ ແລະການຂົນຂວາຍຕົວຈິງຫຼາຍຂະບວນການ ທີ່ມີແຮງດຶງດູດເຕົ້າໂຮມບັນດາຊັ້ນວັນນະປະຊາຊົນເຂົ້າສູ່ການປະຕິບັດບັນດາໜ້າທີ່ການເມືອງໃຫ້ສຳເລັດມີໄຊ ແລະ ເບິ່ງແຍງປົວແປງຊີວິດການເປັນຢູ່ຂອງປະຊາຊົນ. ຂະບວນການທີ່ພົ້ນເດັ່ນແມ່ນບັນດາບັ້ນຂົນຂວາຍ: “ທົ່ວປວງຊົນສາມັກຄີກໍ່ສ້າງຊີວິດວັດທະນະທຳຢູ່ຄຸ້ມຊຸມຊົນ”, “ເພື່ອຜູ້ທຸກຍາກ”, “ຄົນຫວຽດນາມນິຍົມໃຊ້ສິນຄ້າຫວຽດນາມ”,...
ແນວໂຮມໄດ້ຕັ້ງໜ້າຂົນຂວາຍປະຊາຊົນໃຫ້ເຂົ້າຮ່ວມໃນການກໍ່ສ້າງ ແລະ ປະຕິບັດກົດລະບຽບປະຊາທິປະໄຕຢູ່ຮາກຖານ, ເສີມຂະຫຍາຍສິດເປັນເຈົ້າໂດຍກົງໃນວຽກງານຕ່າງໆຢູ່ທ້ອງຖິ່ນ, ພ້ອມກັນນັ້ນກໍປະກອບຄວາມຄິດເຫັນເພື່ອກໍ່ສ້າງພັກ ກໍ່ສ້າງອຳນາດການປົກຄອງ ຊຶ່ງກວມທັງການເຂົ້າຮ່ວມກໍ່ສ້າງແຜນນະໂຍບາຍ ນະໂຍບາຍຂອງພັກ ແລະລັດ, ຕິດຕາມກວດກາ ຕິຊົມຄະນະພັກ, ພະນັກງານ ສະມາຊິກພັກ. ພິເສດ, ແນວໂຮມໄດ້ເຮັດເປັນຢ່າງດີວຽກງານການຂົນຂວາຍ ຈັດຕັ້ງປະຊາຊົນປະຕິບັດການເລືອກຕັ້ງສະມາຊິກສະພາແຫ່ງຊາດຊຸດທີ XIII ແລະ ການເລືອກຕັ້ງສະມາຊິກສະພາປະຊາຊົນຂັ້ນຕ່າງໆ ສະໄໝ 2011 – 2016 ຢ່າງສຳເລັດມີໄຊ. ແນວໂຮມແລະບັນດາອົງການພາກສ່ວນໄດ້ຕັ້ງໜ້າພະຍາຍາມໂຄສະນາ ຂົນຂວາຍປະຕິບັດແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ; ພ້ອມກັນນັ້ນກໍ່ໄດ້ຮັບຟັງ ລວບລວມຄຳເໜີແນະ ແລະ ຄວາມປາຖະໜາຂອງປະຊາຊົນ ເພື່ອສ່ອງແສງໃຫ້ພັກ ແລະລັດ, ເປັນຕົ້ນແມ່ນບັນດາບັນຫາສຳຄັນ ກ່ຽວກັບການເສີມຂະຫຍາຍປະຊາທິປະໄຕ, ພັດທະນາເສດຖະກິດ ວັດທະນະທຳ, ເບິ່ງແຍງດູແລຊີວິດການເປັນຢູ່ຂອງປະຊາຊົນ,... ປະກອບສ່ວນອັນສຳຄັນເຂົ້າໃນການສ້າງຄວາມເຫັນດີເຫັນພ້ອມສັງຄົມ ແລະ ປັບປຸງກຸ່ມກ້ອນມະຫາສາມັກຄີທົ່ວປວງຊົນ.
ແນວໂຮມປະເທດຊາດກໍໄດ້ເອົາໃຈໃສ່ເຖິງການປ່ຽນແປງໃໝ່ແບບວິທີການເຄື່ອນໄຫວ, ຫັນລົງສູ່ພື້ນຖານຢ່າງແຂງແຮງ. ບັນດາຄະນະປະຕິບັດງານແນວໂຮມຢູ່ຄຸ້ມບ້ານ ເປັນກຳລັງຫຼັກແຫຼ່ງໃນວຽກງານຂົນຂວາຍປະຊາຊົນ ແລະ ເປັນຂອດເຊື່ອມສຳພັນຢ່າງມີປະສິດທິຜົນໃນລະບົບການເມືອງຢູ່ຮາກຖານ. ບົດບາດເປັນເຈົ້າການຂອງແນວໂຮມໃນການກໍ່ສ້າງລະບຽບການ, ສ້າງໂຄງການປະສານສົມທົບກັບອຳນາດການປົກຄອງ ແລະ ບັນດາອົງການພາກສ່ວນນັ້ນ ໄດ້ຊ່ວຍໃຫ້ຄະນະພັກແລະອຳນາດການປົກຄອງຂັ້ນຕ່າງໆ ຖອດຖອນໄດ້ບົດຮຽນທີ່ດີຫຼາຍບົດໃນການຊີ້ນຳນຳພາ. ບັນດາອົງການພາກສ່ວນຂອງແນວໂຮມໄດ້ປຸກລະດົມ ແລະ ເສີມຂະຫຍາຍລັກສະນະປະດິດສ້າງຂອງສະມາຊິກ ໃນການກໍ່ສ້າງບັນດາຕົວແບບປະຊາຊົນຄຸ້ມຄອງດ້ວຍຕົນເອງ, ຮັກສາຄວາມສະຫງົບເປັນລະບຽບ, ປົກປັກຮັກສາສິ່ງແວດລ້ອມ, ຂະຫຍາຍວັດທະນະທຳ, ສົ່ງເສີມການສຶກສາ, ເບິ່ງແຍງດູແລຜູ້ຕົກທຸກໄດ້ຍາກ,... ແນວໂຮມປະເທດຊາດຫວຽດນາມ ໄດ້ກາຍເປັນຫຼັງຄາເຮືອນຮ່ວມທີ່ແທ້ຈິງ ເພື່ອໃຫ້ປະຊາຊົນທຸກຊັ້ນວັນນະ, ທຸກຊົນເຜົ່າ, ທຸກສາສະໜາ, ທຸກໄວຮຸ້ນ ແລະ ພີ່ນ້ອງຊາວຫວຽດນາມຢູ່ຕ່າງປະເທດ ເສີມຂະຫຍາຍນ້ຳໃຈຮັກຊາດ ມານະຈິດ ສະຕິປັນຍາ ແລະ ຄວາມສາມາດຂອງຕົນເພື່ອສ້າງສາ ປົກປັກຮັກສາປະເທດຊາດ, ເບິ່ງແຍງດູແລຊີວິດການເປັນຢູ່ຂອງປະຊາຊົນ, ເຂົ້າຮ່ວມການກໍ່ສ້າງໃຫ້ພັກແລະອຳນາດການປົກຄອງໝັ້ນຄົງເຂັ້ມແຂງ, ເພີ່ມທະວີສາຍພົວພັນມິດຕະພາບ ແລະ ການຮ່ວມມືກັບບັນດາປະເທດໃນໂລກ.
ດ້ວຍບັນດາຜົນສຳເລັດທີ່ບັນລຸໄດ້ໃນເວລາທີ່ຜ່ານມາ, ແນວໂຮມປະເທດຊາດສືບຕໍ່ສົມກັບເປັນຜູ້ຕາງໜ້າຂອງປະຊາຊົນ, ເປັນພື້ນຖານການເມືອງຂອງອຳນາດການປົກຄອງ, ເປັນອົງການຈັດຕັ້ງຫຼັກແຫຼ່ງໃນລະບົບການເມືອງຢູ່ປະເທດເຮົາ; ແລະແນວໂຮມປະເທດຊາດກໍ່ສົມກຽດໄດ້ຮັບຫຼຽນໄຊດາວຄຳ (ຄັ້ງທີສອງ) ໂດຍພັກແລະລັດປະດັບໃຫ້ໃນໂອກາດສະເຫຼີມສະຫຼອງວັນສ້າງຕັ້ງແນວໂຮມປະເທດຊາດຄົບຮອບ 80 ປີ (1930-2010).
ຕາງໜ້າຄະນະບໍລິຫານງານສູນກາງພັກ, ຂ້າພະເຈົ້າສະແດງຄວາມຂອບໃຈ ແລະ ຊົມເຊີນຢ່າງສຸດອົກສຸດໃຈຕໍ່ຜົນສຳເລັດຕ່າງໆ ທີ່ແນວໂຮມປະເທດຊາດຂັ້ນຕ່າງໆຍາດມາໄດ້; ສະແດງຄວາມນັບຖືຂອບໃຈຢ່າງສູງຕໍ່ປະຊາຊົນທົ່ວປະເທດ ທີ່ໄດ້ເຊີດຊູນ້ຳໃຈຮັກຊາດ, ສາມັກຄີກັນ, ຕອບສະໜອງສະໜັບສະໜູນ ແລະ ພະຍາຍາມປະຕິບັດບັນດາແຜນນະໂຍບາຍ, ນະໂຍບາຍ ຂອງພັກແລະລັດ, ປະກອບສ່ວນເຂົ້າໃນຜົນສຳເລັດອັນສຳຄັນຕ່າງໆ ຂອງປະເທດເຮົາໃນຊຸມປີທີ່ຜ່ານມາ.
ແຕ່ກໍ່ຕ້ອງຮັບຮູ້ຢ່າງຈິງໃຈວ່າ, ວຽກງານແນວໂຮມກໍ່ຍັງມີຂໍ້ຈຳກັດ, ມີດ້ານບໍ່ຕອບສະໜອງໄດ້ກັບຄວາມຕ້ອງການ. ແບບວິທີການຂົນຂວາຍ ເຕົ້າໂຮມ ກໍ່ສ້າງກຸ່ມກ້ອມສາມັກຄີທົ່ວປວງຊົນຍັງບໍ່ທັນກັບຄວາມຕ້ອງການໃໝ່; ແນວໂຮມຍັງບໍ່ທັນສົມທົບຢ່າງເປັນປະຈຳ ແລະ ຂາດກົນໄກສົມທົບກັບບັນດາອົງການພາກສ່ວນ ໃນການເກັບກຳ ແລະສ່ອງແສງແນວຄິດຈິດໃຈ ຄວາມປາຖະໜາຂອງປະຊາຊົນ; ບັ້ນຂົນຂວາຍ, ຂະບວນການແຂ່ງຂັນຢູ່ບາງແຫ່ງຍັງມີລັກສະນະຮູບການ, ບໍ່ມີປະສິດທິຜົນ; ບົດບາດເປັນຜູ້ຕາງໜ້າ, ປົກປັກຮັກສາຜົນປະໂຫຍດອັນຊອບທຳຂອງປະຊາຊົນ ແລະ ຕິດຕາມກວດກາ, ຕິຊົມສັງຄົມຂອງແນວໂຮມຍັງຖືກຈຳກັດ. ການຈັດຕັ້ງກົງຈັກຂອງຄະນະກຳມະການແນວໂຮມຂັ້ນຕ່າງໆ ໄດ້ຮັບການປັບປຸງບູລະນະຊ້າເກີນຄວນ; ການປ່ຽນແປງໃໝ່ກົນໄກເຄື່ອນໄຫວກໍ່ພົບຄວາມຫຍຸ້ຍາກ; ການແກ້ໄຂຜ່ານຜ່າສະພາບການບໍລິຫານອາດຍາສິດກໍ່ຍັງບໍ່ໄດ້ຮັບຜົນ.
ກອງປະຊຸມໃຫຍ່ຄັ້ງທີ XI ຂອງພັກໄດ້ວາງທິດທາງ ໜ້າທີ່ຂອງການປະຕິວັດຂອງປະເທດເຮົາໃນເວລາຕໍ່ໜ້າຄືດັ່ງນີ້: “ສືບຕໍ່ຍົກສູງຄວາມສາມາດນຳພາ ແລະກຳລັງແຮງສູ້ຮົບຂອງພັກ, ຍູ້ແຮງການປ່ຽນແປງໃໝ່ຢ່າງຮອບດ້ານ; ກໍ່ສ້າງໃຫ້ລະບົບການເມືອງປອດໃສຂາວສະອາດ, ໝັ້ນຄົງເຂັ້ມແຂງ; ເສີມຂະຫຍາຍປະຊາທິປະໄຕ ແລະກຳລັງແຮງແຫ່ງມະຫາສາມັກຄີປວງຊົນທັງຊາດ; ພັດທະນາເສດຖະກິດຢ່າງໄວວາ ໝັ້ນທ່ຽງ; ຍົກສູງຊີວິດດ້ານວັດຖຸແລະຈິດໃຈຂອງປະຊາຊົນ; ຮັກສາສະຖຽນລະພາບດ້ານການເມືອງ - ສັງຄົມ; ເພີ່ມທະວີການເຄື່ອນໄຫວດ້ານການຕ່າງປະເທດ; ປົກປັກຮັກສາເອກະລາດ, ອຳນາດອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ; ສ້າງພື້ນຖານເພື່ອເຖິງປີ 2020 ປະເທດເຮົາກາຍເປັນປະເທດອຸດສາຫະກຳຕາມທິດທັນສະໄໝໂດຍພື້ນຖານ”. ຕໍ່ກັບແນວໂຮມ, ພັກເຮົາກຳນົດວ່າ, ແນວໂຮມປະເທດຊາດຫວຽດນາມເປັນພື້ນຖານການເມືອງຂອງອຳນາດການປົກຄອງປະຊາຊົນ; ເປັນຜູ້ຕາງໜ້າ ປົກປັກຮັກສາສິດ ແລະ ຜົນປະໂຫຍດທີ່ຖືກກົດໝາຍ ຊອບທຳຂອງປະຊາຊົນ; ເຕົ້າໂຮມ, ເສີມຂະຫຍາຍກຳລັງແຮງແຫ່ງຄວາມສາມັກຄີປວງຊົນທັງຊາດ, ປະຕິບັດປະຊາທິປະໄຕ, ເພີ່ມທະວີຄວາມເຫັນດິເຫັນພ້ອມສັງຄົມ; ຕິດຕາມກວດກາ, ຕິຊົມສັງຄົມ, ເຂົ້າຮ່ວມການກໍ່ສ້າງພັກ-ລັດ, ການເຄື່ອນໄຫວການຕ່າງປະເທດປະຊາຊົນ, ປະກອບສ່ວນກໍ່ສ້າງ ແລະ ປົກປັກຮັກສາປະເທດຊາດ.
ລາຍງານການເມືອງຂອງຄະນະກຳມະການສູນກາງແນວໂຮມປະເທດຊາດຫວຽດນາມ ຕໍ່ກອງປະຊຸມໃຫຍ່ຄັ້ງນີ້ ໄດ້ຊາບຊືມຢ່າງເລິກເຊິ່ງບັນດາແນວຄິດ, ທັດສະນະທິ່ລະບຸໄວ້ໃນເອກະສານກອງປະຊຸມໃຫຍ່ຄັ້ງທີ XI ຂອງພັກ, ໃນບັນດາມະຕິຂອງສູນກາງພັກ ແລະ ໄດ້ຕິດແໜ້ນກັບພາກພຶດຕິກຳຄວາມເປັນຈິງຂອງປະເທດ ເພື່ອຕີລາຄາສະພາບການຢ່າງຖືກຕ້ອງ, ວາງທິດທາງ ໜ້າທີ່ ແລະ ວິທີແກ້ໄຂທີ່ແທດເໝາະຕົວຈິງ ໃຫ້ແກ່ສະໄໝ 2014 - 2019. ຂ້າພະເຈົ້າຂໍເນັ້ນໜັກຕື່ມອີກບາງບັນຫາເພື່ອໃຫ້ກອງປະຊຸມໃຫຍ່ປຶກສາພິຈາລະນາ, ຕັດສິນຕົກລົງ.
1- ຕາມຂ້າພະເຈົ້າ, ໜຶ່ງໃນບັນດາໜ້າທີ່ທີ່ປົກຄຸມ ສຳຄັນອັນດັບໜຶ່ງຂອງແນວໂຮມປະເທດຊາດໃນຊຸມປີຕໍ່ໜ້າແມ່ນ ສືບຕໍ່ກໍ່ສ້າງແລະເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນ, ເຕົ້າໂຮມປະຊາຊົນທຸກຊັ້ນຄົນຢ່າງກວ້າງຂວາງ, ຮັບປະກັນຄວາມເປັນເອກະພາບຢ່າງສູງ ທາງດ້ານແນວຄິດ ແລະ ການກະທຳ, ສູ້ຊົນປະຕິບັດບັນດາແຜນນະໂຍບາຍ ແນວທາງຂອງພັກ, ນະໂຍບາຍ ກົດໝາຍຂອງລັດໃຫ້ໄດ້ຮັບຜົນສຳເລັດ, ຫັນໄປສູ່ຈຸດໝາຍລວມຄື ຮັກສາເອກະລາດ ອຳນາດອະທິປະໄຕແຫ່ງຊາດໄວ້ຢ່າງໝັ້ນຄົງ, ຮັກສາສະຖຽນລະພາບດ້ານການເມືອງ - ສັງຄົມ, ກໍ່ສ້າງໃຫ້ປະເທດຊາດນັບມື້ນັບຮັ່ງມີເຂັ້ມແຂງແລະສີວິໄລ; ໃຫ້ປະຊາຊົນມີຊີວິດການເປັນຢູ່ອິ່ມໜຳສຳລານ ສົມບູນພູມສຸກ.
ພຶດຕິກຳໄດ້ອະນຸຍາດໃຫ້ພວກເຮົາຖອດຖອນບົດຮຽນອັນເລິກເຊິ່ງທີ່ມີລັກສະນະກົດເກນອອກມາ ນັ້ນຄື: ບໍ່ວ່າວຽກງານໃດ, ເຖິງວ່າໃຫຍ່ຫຼືນ້ອຍ, ຢາກປະຕິບັດມັນໄດ້ຢ່າງສຳເລັດຜົນ, ຈຳເປັນຕ້ອງມີຄວາມສາມັກຄີ, ຕ້ອງມີຄວາມຮ່ວມແຮງຮ່ວມໃຈກັນ, ພາຍໃນເປັນເອກະສັນກັນ, ສັງຄົມເຫັນດີເພັນພ້ອມກັນ; ການປະຕິວັດຢາກກ້າວຂຶ້ນໄດ້ຍິ່ງຕ້ອງກໍ່ສ້າງຄວາມສາມັກຄີອັນໝັ້ນຄົງໜັກແໜ້ນ. ໃນເວລານີ້, ພວກເຮົາກຳລັງຍູ້ແຮງການປ່ຽນແປງໃໝ່, ຫັນເປັນອຸດສາຫະກຳ ທັນສະໄໝ, ສ້າງສາ ແລະ ປົກປັກຮັກສາປະເທດຊາດ ໃນສະພາບແວດລ້ອມທີ່ມີຄວາມສະດວກດີຫຼາຍປະການ, ແຕ່ກໍ່ມີຄວາມຫຍຸ້ງຍາກ ສິ່ງທ້າທາຍບໍ່ໜ້ອຍ ຍ້ອນວ່ານີ້ແມ່ນພາລະກິດໃໝ່ ທີ່ບໍ່ເຄີຍມີມາແຕ່ກ່ອນ, ເຮັດໃຫ້ມີການປ່ຽນປິ້ນໃນຄວາມຄິດ ແບບດຳລົງຊີວິດແລະໃນວິທີດຳເນີນງານ, ຊ້ຳພັດຍັງຖືກກະທົບຍ້ອນການຕ້ານຢັນທຳລາຍຢ່າງຂຸ້ນຂ້ຽວຂອງບັນດາອິດທິກຳລັງສັດຕູ. ເພາະສະນັ້ນ, ກວ່າເວລາໃດໝົດ, ພວກເຮົາຍິ່ງຕ້ອງເພີ່ມທະວີຄວາມສາມັກຄີເປັນເອກະສັນ, ເສີມຂະຫຍາຍກຳລັງແຮງຂອງປວງຊົນທັງຊາດຕາມແນວຄິດໂຮ່ຈີມິນ, ພາຍໃຕ້ການນຳພາຂອງພັກ.
ແນວໂຮມປະເທດຊາດແມ່ນຮູບພາບອັນມີຊີວິດຊີວາຂອງກຸ່ມກ້ອນມະຫາສາມັກຄີທົ່ວປວງຊົນ. ແນວໂຮມຕ້ອງປຸກລະດົມ ເສີມຂະຫຍາຍບົດບາດນຳໜ້າຂອງຊົນຊັ້ນກຳມະກອນ, ກຳລັງບົ່ມຊ້ອນອັນໃຫຍ່ຫຼວງຂອງຊົນຊັ້ນຊາວນາ ຖັນແຖວປັນຍາຊົນ ແລະ ວົງການນັກທຸລະກິດ ໃຫ້ໄດ້ດີກວ່າອີກ, ເພີ່ມທະວີກຸ່ມສຳພັນທະພາບກຳມະກອນ - ຊາວນາ - ປັນຍາຊົນຢ່າງບໍ່ຢຸດຢັ້ງ ເພື່ອເປັນຮາກຖານໃຫ້ແກ່ກຸ່ມກ້ອນມະຫາສາມັກຄີທ່ົວປວງຊົນ. ພ້ອມກັນນັ້ນ, ຍົກສູງບົດບາດຂອງບັນດາບຸກຄົນຜູ້ດີເດັ່ນໃນບັນດາວົງການ, ໃນບັນດາຊົນເຜົ່າ ສາສະໜາ, ໃນຊາວຫວຽດນາມຢູ່ຕ່າງປະເທດ; ເອົາໃຈໃສ່ເຖິງແນວຄິດຈິດໃຈ ຄວາມປາຖະໜາ ແລະ ຜົນປະໂຫຍດຕົວຈິງຂອງແຕ່ລະຊັ້ນຄົນປະຊາຊົນ, ສ້າງເງື່ອນໄຂອຳນວຍຄວາມສະດວກໃຫ້ປະຊາຊົນເສີມຂະຫຍາຍຄວາມສາມາດປະດິດສ້າງ, ປະກອບສ່ວນອັນຕັ້ງໜ້າເຂົ້າໃນພາລະກິດລວມ. ແນວໂຮມຄວນເສີມຂະຫຍາຍປະຊາທິປະໄຕ, ແລກປ່ຽນປຶກສາຫາລືກັນດ້ວຍຄວາມຮັກແພງ, ຮັບປະກັນຄວາມສະເໝີພາບ ເຄົາລົບນັບຖືກັນ ເຂົ້າໃຈຊຶ່ງກັນແລະກັນ; ລົບລ້າງຄວາມອະຄະຕິ ແນວຄິດຕາຍຕົວກ່ຽວກັບອະດີດຕະການ ແລະ ພາກສ່ວນຊົນຊັ້ນ; ຍອມຮັບຄວາມແຕກຕ່າງກັນຕ່າງໆທີ່ບໍ່ຝືນກັບຜົນປະໂຫຍດລວມຂອງຊາດ; ເຮັດຄືແນວໃດໃຫ້ແນວໂຮມຂັ້ນຕ່າງໆກາຍເປັນໃຈກາງທີ່ແທ້ຈິງຂອງຄວາມສາມັກຄີ ເຕົ້າໂຮມທຸກກຳລັງສັງຄົມ, ເປັນບ່ອນທີ່ທຸກຄົນອາດຈະເວົ້າຄຳເວົ້າ ຄວາມຄິດ ຄວາມປາຖະໜາຂອງຕົນ, ປະກອບສະຕິປັນຍາ ເຫື່ອແຮງຂອງຕົນໃຫ້ແກ່ພາລະກິດສ້າງສາ ແລະປົກປັກຮັກສາປະເທດຊາດ.
2- ພວກເຮົາລ້ວນແຕ່ຮູ້ວ່າ ພັດທະນາເສດຖະກິດ - ສັງຄົມແມ່ນໜ້າທີ່ຈຸດໜັກໃຈກາງທີ່ສຳຄັນທີ່ສຸດ. ແນວໂຮມປະເທດຊາດ ຄວນສືບຕໍ່ຖືບົດບາດເປັນແກ່ນສານໃນການຂົນຂວາຍ ຈັດຕັ້ງປະຕິບັດໜ້າທີ່ນີ້ຢ່າງກວ້າງຂວາງ ແລະມີປະສິດທິຜົນ. ສືບຕໍ່ດຳເນີນປະຕິບັດເປັນຢ່າງດີບັນດາບັ້ນຂົນຂວາຍ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳຢູ່ຄຸ້ມຊຸມຊົນ”, “ກໍ່ສ້າງຊົນນະບົດໃໝ່” ແລະບັນດາຂະບວນການແຂ່ງຂັນຮັກຊາດ, ສົ່ງເສີມໃຫ້ທຸກຄົນ ທຸກພາກສ່ວນເສດຖະກິດຕັ້ງໜ້າປະກອບສະຕິປັນຍາ ຊັບສິນເງິນທອງ ເຫື່ອແຮງ ເພື່ອພັດທະນາເສດຖະກິດ, ສ້າງຄວາມຮັ່ງມີອັນຊອບທຳໃຫ້ແກ່ຕົນເອງແລະຄອບຄົວ, ພ້ອມນັ້ນກໍ່ເຊີດຊູລັກສະນະປະຊາຄົມ ແລະມູນເຊື້ອແຫ່ງຄວາມເມດຕາ, ເຂົ້າຮ່ວມການຫລຸດຜ່ອນຄວາມທຸກຍາກ, ເບິ່ງແຍງດູແລຊີວິດຂອງຜູ້ທີ່ມີຄຸນງາມຄວາມດີຕໍ່ຊາດ, ເຮັດການກຸສົນ ຊ່ວຍເຫຼືອບັນດາຄອບຄົວທຸກຍາກ ຄອບຄົວແລະບຸກຄົນທີ່ພົບຄວາມຫຍຸ້ງຍາກ, ຊ່ວຍເຫຼືອກັນຍົກສູງຄຸນນະພາບຊີວິດ. ຂົນຂວາຍປະຊາຊົນປະຕິບັດການປະຢັດ, ສ້າງແຫຼ່ງພະລັງຕື່ມອີກເພື່ອລົງທຶນກໍ່ສ້າງກິດຈະການຕ່າງໆ ເປີດກວ້າງແລະພັດທະນາການຜະລິດ ທຸລະກິດ, ປະຕິບັດແຜນນະໂຍບາຍເຕີບໂຕເສດຖະກິດໃຫ້ສຳເລັດຜົນ ໄປຄຽງຄູ່ກັບພັດທະນາວັດທະນະທຳ, ຮັບປະກັນຄວາມກ້າວໜ້າ ແລະ ຍຸດຕິທຳສັງຄົມ.
ປະຕິບັດມະຕິກອງປະຊຸມສູນກາງພັກຄັ້ງທີ 9 ສະໄມໝທີ XI ວ່າດ້ວຍການກໍ່ສ້າງ ແລະ ພັດທະນາວັດທະນະທຳ, ຄົນຫວຽດນາມ ຢ່າງມີປະສິດທິຜົນ; ໃນນັ້ນມີວຽກທີ່ສຳຄັນທີ່ສຸດຄື ຕ້ອງສ້າງໃຫ້ມີການຫັນປ່ຽນຢ່າງແຂງແຮງໃນການກໍ່ສ້າງຄົນຫວຽດນາມ ໃຫ້ເປັນຄົນທີ່ພັດທະນາຮອບດ້ານ ມີຄຸນສົມບັດ ມີບຸກຄະລິກລັກສະນະດີ; ກໍ່ສ້າງສິ່ງແວດລ້ອມວັດທະນະທຳທີ່ສົດໃສ. ຮັກສາແລະເສີມຂະກຍາຍບັນດາຄຸນຄ່າວັດທະນະທຳມູນເຊື້ອ, ລົບລ້າງຄວາມຊິນເຄີຍແລະປະເພນີທີ່ຫຼ້າຫຼັງ; ກໍ່ສ້າງ, ເພີ່ມພູນຄູນສ້າງບັນດາຄຸນຄ່າວັດທະນະທຳໃໝ່ທີ່ກ້າວໜ້າ ທັນສະໄໝ, ສອດຄ່ອງກັບສິສັນແຫ່ງຊາດ. ຂ້າພະເຈົ້າຂໍສະເໜີໃຫ້ແນວໂຮມປະເທດຊາດສົມທົບຢ່າງແໜ້ນແຟ້ນກັບບັນດາຂະແໜງການ ແລະບັນດາອົງການພາລະບົດບາດ ຍູ້ແຮງການຂົນຂວາຍກໍ່ສ້າງສັງຄົມຮ່ຳຮຽນ, ຄອບຄົວວັດທະນະທຳ, ແບບແຜນດຳລົງຊີວິດອາລະຍະທຳ, ເຮັດໃຫ້ແບບດຳລົງຊີວິດມີວັດທະນະທຳ ຊືມເລິກເຂົ້າໄປໃນແຕ່ລະເຂດຊຸມຊົນ ແຕ່ລະຄອບຄົວ, ໃນປະຊາຊົນແຕ່ລະຄົນ, ເປັນຕົ້ນແມ່ນຊາວໜຸ່ມ ເຍົາວະຊົນ, ແລະ ໄດ້ສະແດງອອກຢູ່ທົ່ວທຸກແຫ່ງ ໃນທຸກເວລາ. ໃຫ້ຄວາມສຳຄັນຕໍ່ການກໍ່ສ້າງສະຕິປະຕິບັດຕາມກົດໝາຍ ລະບຽບວິໄນ, ຮັກສາຄວາມເປັນລະບຽບຮຽບຮ້ອຍສາທາລະນະ, ຮັກສາອະນາໄມສິ່ງແວດລ້ອນ, ກໍ່ສ້າງແບບແຜນສີວິໄລໃນການແຕ່ງດອງ, ງານບຸນ, ງານສົບ. ເດັດດ່ຽວຕຳໜິວິຈານ, ກ່າວປະນາມຕໍ່ສິ່ງລາມົກອະນາຈານ, ໄພສັງຄົມ, ການດຳລົງຊີວິດແບບຊອດກະຈາ, ເອົາຕາມແບບຕ່າງປະເທດໂດຍບໍ່ມີການຄັດເລືອກ; ຕໍ່ສູ້ກັບບັນດາການກະທຳທີ່ໄຮ້ວັດທະນະທຳ ຝືນວັດທະນະທຳ.
3- ດ້ວຍບົດບາດເປັນສຳພັນທະພາບດ້ານການເມືອງ, ເປັນອົງການຈັດຕັ້ງທີ່ກວ້າງຂວາງຂອງປະຊາຊົນ, ເປັນພື້ນຖານການເມືອງ ຂອງອຳນາດການປົກຄອງ, ແນວໂຮມປະເທດຊາດຄວນສືບຕໍ່ຂົນຂວາຍໃຫ້ປະຊາຊົນເຂົ້າຮ່ວມໃນການກໍ່ສ້າງພັກ, ກໍ່ສ້າງອຳນາດການປົກຄອງ, ປັບປຸງໃຫ້ລະບົບການເມືອງນັບມື້ນັບໝັ້ນຄົງເຂັ້ມແຂງ. ປະຕິບັດພາລະບົດບາດຂອງຕົນໃຫ້ດີກວ່າອີກ ໃນການຕິດຕາມກວດກາແລະຕິຊົມສັງຄົມ ຕໍ່ກັບບັນດາອົງການຈັດຕັ້ງພັກ ແລະ ອົງການອຳນາດການປົກຄອງ, ກວມທັງການຕິດຕາມກວດກາພະນັກງານ ສະມາຊິກພັກ, ສະມາຊິກຜູ້ແທນທີ່ປະຊາຊົນເລືອກຕັ້ງຂຶ້ນ, ຂ້າລັດຖະການ ລັດຖະກອນຂອງອົງການລັດຂັ້ນຕ່າງໆ; ຕັ້ງໜ້າເຂົ້າຮ່ວມການຕ້ານພະຍາດອາດຍາສິດ ການສໍ້ລາດບັງຫຼວງ ແລະຄວາມຟຸມເຟືອຍ, ເຮັດໃຫ້ການຈັດຕັ້ງພັກ ແລະກົງຈັກອຳນາການປົກຄອງຂັ້ນຕ່າງໆ ມີຄວາມປອດໃສຂາວສະອາດ ໝັ້ນຄົງເຂັ້ມແຂງຢ່າງແທ້ຈິງ, ເປັນຂອງປະຊາຊົນ ແລະເພື່ອປະຊາຊົນຢ່າງແທ້ຈິງ. ເປັນເຈົ້າການປະກອບຄວາມຄິດຄວາມເຫັນກັບພັກ ແລະ ລັດ ໃນການວາງກຳນົດກົນໄກ ນະໂຍບາຍ, ເປັນຜູ້ຕິຊົມສັງຄົມທີ່ຫຼັກແຫຼມ ຈິງໃຈ ເພື່ອຊ່ວຍໃຫ້ພັກແລະອຳນາດການປົກຄອງ ດັດສົມດ້ວຍຕົນເອງ, ປັບປຸງບູລະນະດ້ວຍຕົນເອງ ເພື່ອຊີ້ນຳນຳພາໄດ້ດີກວ່າອີກ. ໃນປີທີ່ຜ່ານມາ, ເດືອນທັນວາ 2013, ກົມການເມືອງສູນກາງພັກໄດ້ປະກາດໃຊ້ ກົດລະບຽບວ່າດ້ວຍການຕິດຕາມກວດກາ ແລະ ຕິຊົມສັງຄົມ ຂອງແນວໂຮມປະເທດຊາດຫວຽດນາມ ແລະ ບັນດານອົງຄະນະການເມືອງ - ສັງຄົມ ແລະ ຂໍ້ກຳນົດວ່າດ້ວຍການທີ່ແນວໂຮມປະເທດຊາດຫວຽດນາມ, ບັນດາອົງຄະນະການເມືອງ - ສັງຄົມ ແລະປະຊາຊົນ ເຂົ້າຮ່ວມປະກອບຄວາມຄິດຄວາມມເຫັນກໍ່ສ້າງພັກ, ອຳນາດການປົກຄອງ. ນີ້ແມ່ນບັນດາຂໍ້ກຳນົດອັນພື້ນຖານ ທີ່ສ້າງເງື່ອນໄຂໃຫ້ແນວໂຮມຜັນຂະຫຍາຍການເຄື່ອນໄຫວຕິດຕາມກວດກາໃນໄລຍະເວລາຕໍ່ໜ້າ. ຂ້າພະເຈົ້າຫວັງທີ່ສຸດ ແລະ ເຊື່ອໝັ້ນວ່າແນວໂຮມປະເທດຊາດຈະເຮັດວຽກງານນີ້ໄດ້ເປັນຢ່າງດີ.
4- ແນວໂຮມປະເທດຊາດຫວຽດນາມຄວນສືບຕໍ່ປ່ຽນແປງໃໝ່ເນື້ອໃນ ແລະ ແບບວິທີການເຄື່ອນໄຫວຕາມທິດໃກ້ຊິດຕິດແທດກັບປະຊາຊົນ, ຫັນລົງສູ່ຮາກຖານ, ແທດເໝາະຕົວຈິງ ມີປະສິດທິຜົນແທ້ໆ, ຫຼີກລ່ຽງການເຮັດແບບບໍລິຫານຮູບການ. ຂະບວນການຕ່າງໆຄວນເອົາໃຈໃສ່ຕອບສະໜອງຖືກຕ້ອງຕາມຄວາມປາຖະໜາ ແລະ ຜົນປະໂຫຍດອັນຊອບທຳຂອງປະຊາຊົນ, ແກ້ໄຂບັນດາບັນຫາອັນຮີບດ່ວນຂອງປະຊາຊົນ; ສາມັກຄີ ເຕົ້າໂຮມປະຊາຊົນເຂົ້າໃນການປະຕິບັດບັນດາແຜນນະໂຍບາຍ ນະໂຍບາຍຂອງພັກແລະລັດ, ເຂົ້າຮ່ວມການກໍ່ສ້າງ ຕິດຕາມກວດກາ ແລະ ປົກປັກຮັກສາພັກ-ລັດ; ເຂົ້າຮ່ວມການຄຸ້ມຄອງສັງຄົມ, ປະກອບສ່ວນເພີ່ມທະວີສາຍພົວພັນອັນສະໜິດແໜ້ນລະຫວ່າງປະຊາຊົນ ກັບພັກແລະລັດ. ຖືເປັນສຳຄັນການເປີດກວ້າງແບບຢ່າງທີ່ດີເດັ່ນ, ຕຳໜິວິຈານວຽກເຮັດທີ່ບໍ່ດີ, ແກ້ໄຂຜ່ານຜ່າລັກສະນະຮູບການ. ຢາກໄດ້ຄືແນວນັ້ນ, ຕ້ອງຍົກສູງຄຸນນະພາບຂອງຖັນແຖວພະນັກງານ, ກ່ອນອື່ນໝົດແມ່ນພະນັກງານທີ່ເຄື່ອນໄຫວສະເພາະກິດຢູ່ຂັ້ນຕ່າງໆ; ເອົາໃຈໃສ່ເປັນສຳຄັນເຖິງການສົມທົບກັບອຳນາດການປົກຄອງ ແລະ ອົງການຈັດຕັ້ງພາກສ່ວນຕ່າງໆ ຕາມບັນດາກົດລະບຽບ ໂຄງການ ແຜນການອັນລະອຽດ ເພື່ອສ້າງເປັນກຳລັງແຮງຂອງທັງລະບົບການເມືອງໃນການປະຕິບັດໜ້າທີ່ລວມ. ວຽກງານຂົນຂວາຍປະຊາຊົນ ແມ່ນພາລະກິດຂອງທົ່ວພັກ ທົ່ວປວງຊົນ, ຂອງທົ່ວທັງລະບົບການເມືອງ, ແຕ່ແນວໂຮມຖືບົດບາດເປັນແກ່ນສານ.
ພັກກອມມູນິດຫວຽດນາມເປັນຜູ້ນຳພາ, ພ້ອມກັນນັ້ນກໍ່ເປັນພາກສ່ວນທີ່ສຳຄັນຂອງແນວໂຮມປະເທດຊາດຫວຽດນາມ. ພັກມີໜ້າທີ່ຮັບຜິດຊອບປະກອບສ່ວນອັນຕັ້ງໜ້າເພື່ອໃຫ້ແນວໂຮມເຮັດຫຼ້ອນພາລະໜ້າທີ່ຂອງຕົນ. ໃນຊຸມປີທີ່ຜ່ານມາ, ບັນດາຄະນະພັກ, ການຈັດຕັ້ງພັກໄດ້ມີຄວາມພະຍາຍາມຫຼາຍຢ່າງ ໃນການນຳພາແນວໂຮມປະຕິບັດໜ້າທີ່ຂອງພັກ ແລະຂອງຊາດ. ແຕ່ວ່າ, ຢູ່ບາງບ່ອນ, ຄະນະພັກ, ພະນັກງານ ສະມາຊິກພັກ ຮັບຮູ້ຍັງບໍ່ທັນຄົບຖ້ວນແລະເລິກເຊິ່ງກ່ຽວກັບບົດບາດຂອງແນວໂຮມປະເທດຊາດ, ກ່ຽວກັບຄວາມສຳຄັນຂອງວຽກງານແນວໂຮມ, ກ່ຽວກັບໜ້າທີ່ກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນ, ດັ່ງນັ້ນ ວຽກງານແນວໂຮມຈຶ່ງບໍ່ໄດ້ຮັບການເອົາໃຈໃສ່ໃຫ້ຖືກລະດັບ. ບາງບັນຫາກ່ຽວກັບກົນໄກ ນະໂຍບາຍຕໍ່ກັບແນວໂຮມກໍ່ຍັງບໍ່ທັນໄດ້ຮັບການແກ້ໄຂໃຫ້ເໝາະສົມ, ດັ່ງນັ້ນ ການເຄື່ອນໄຫວຂອງແນວໂຮມຈຶ່ງພົບຄວາມຫຍຸ້ງຍາກຫຼາຍຢ່າງ.
ໂດຍຊາບຊືມຈິດໃຈມະຕິກອງປະຊຸມໃຫຍ່ຄັ້ງທີ XI ແລະບັນດາມະຕິຂອງຄະນະບໍລິຫານງານສູນກາງພັກ, ຂ້າພະເຈົ້າສະເໜີໃຫ້ບັນດາຄະນະພັກ ແລະ ອົງການອຳນາດການປົກຄອງ ຈົ່ງສືບຕໍ່ເອົາໃຈໃສ່ຊີ້ນຳ ແລະສົມທົບຢ່າງແໜ້ນແຟ້ນກວ່າອີກກັບແນວໂຮມ, ບູລະນະກົນໄກເຄື່ອນໄຫວ ແລະນະໂຍບາຍຕໍ່ກັບວຽກງານແນວໂຮມ ເພື່ອແນໃສ່ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນ ແລະ ຍົກສູງຄຸນນະພາບວຽກງານແນວໂຮມໃນສະພາບການໃໝ່. ບັນດາຄະນະພັກແລະການຈັດຕັ້ງພັກ, ບັນດາອົງການອຳນາດການປົກຄອງ, ພະນັກງານ ສະມາຊິກພັກ, ຂ້າລັດຖະການ ຈົ່ງຍົກສູງຄວາມຮັບຜິດຊອບເພື່ອປະຕິບັດໜ້າທີ່ທີ່ໄດ້ວາງໄວ້ໃຫ້ໄດ້ເປັນຢ່າງດີ; ພ້ອມກັນນັ້ນກໍ່ຕ້ອງຮັບຟັງ, ຮ່ຳຮຽນ, ຮັບເອົາ, ແກ້ໄຂຄວາມຫຍຸ້ງຍາກ ຂໍ້ຄົງຄ້າງຂອງປະຊາຊົນໂດຍກົງ, ເຮັດວຽກງານຂົນຂວາຍປະຊາຊົນໃຫ້ດີ.
ດ້ວຍຄວາມຕັດສິນໃຈໃໝ່, ບັນຍາກາດໃໝ່ຂອງກອງປະຊຸມໃຫຍ່ຄັ້ງທີ VIII ແນວໂຮມປະເທດຊາດຫວຽດນາມ, ພວກເຮົາເຊື່ອໝັ້ນວ່າ ໃນຊຸມປີສະເພາະໜ້າ, ແນວໂຮມປະເທດຊາດຂັ້ນຕ່າງໆ ຈະສືບຕໍ່ເຄື່ອນໄຫວຢ່າງຂະຫຍັນຂັນເຄື່ອນ, ປະດິດສ້າງ, ປ່ຽນແປງໃໝ່, ມີປະສິດທິຜົນ, ປະກອບສ່ວນເຕົ້າໂຮມບັນດາຊັ້ນວັນນະປະຊາຊົນນັບມື້ນັບກວ້າງຂວາງ ໃນກຸ່ມກ້ອນມະຫາສາມັກຄີປວງຊົນທັງຊາດ, ເພີ່ມທະວີການພົວພັນຕິດແທດແບບເລືອດເນື້ອລະຫວ່າງປະຊາຊົນ ກັບພັກ ແລະ ອຳນາດການປົກຄອງ, ສ້າງເປັນກຳລັງແຮງອັນໃຫຍ່ຫຼວງເພື່ອສ້າງສາ ແລະ ປົກປັກຮັກສາປະເທດຊາດ.
ສາມັກຄີ, ສາມັກຄີ, ມະຫາສາມັກຄີ,
ສຳເລັດຜົນ, ສຳເລັດຜົນ, ສຳເລັດຜົນຢ່າງໃຫຍ່ຫຼວງ!./.
ຂຽນໂດຍ: ຫງວຽນຝູຈ້ອງ
ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ
--------------------------------
* ຫົວຂໍ້ໂດຍວາລະສານກອມມູນິດແຕ່ງ.
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 864 (ເດືອນຕຸລາ 2014)