ການນຳພາຂອງພັກ ແມ່ນປັດໄຈຕັດສີນ ທຸກໄຊຊະນະ ແລະ ຄວາມເຕີບໃຫຍ່ ຂະຫຍາຍຕົວ ຂອງກອງທັບປະຊາຊົນ ຫວຽດນາມ
“ໃນຕະຫຼອດ 70 ປີແຫ່ງການກໍ່ຕັ້ງ ສູ້ຮົບ ແລະ ເຕີບໃຫຍ່ເຂັ້ມແຂງ ພາຍໃຕ້ການນຳພາຂອງພັກກອມມູນິດຫວຽດນາມ, ກອງທັບປະຊາຊົນຫວຽດນາມ ຍາມໃດກໍ່ສະແດງເຖິງຄວາມຈົງຮັກພັກດີເດັດຖານ ຕໍ່ກັບພາລະກິດປະຕິວັດຂອງພັກ ຂອງຊາດ; ສາມັດຄີ, ຜູກພັນສະໜິດແໜ້ນ, ສູ້ຮົບຢ່າງກ້າຫານ ປະດິດສ້າງ, ພ້ອມກັນກັບທົ່ວພັກ ທົ່ວປວງຊົນສ້າງຜົນງານການສູ້ຮົບອັນສະຫງ່າລາສີ ໃນພາລະກິດປົດປ່ອຍຊາດ, ສ້າງສາ ແລະ ປົກປັກຮັກສາປະເທດຊາດ. ນັ້ນແມ່ນຜົນສຳເລັດສັງລວມ ຊຶ່ງໄດ້ສ້າງຂຶ້ນມາຍ້ອນຫຼາຍປັດໄຈ, ໃນນັ້ນມີການນຳພາຂອງພັກຕໍ່ກັບກອງທັບ ຊຶ່ງເປັນປັດໄຈມີຄວາມໝາຍຕັກສີນ.
ການນຳພາຂອງພັກຕໍ່ກັບກອງທັບ ຖືກພັກກອມມູນິດຫວຽດນາມກຳນົດຕັ້ງແຕ່ຫົວທີ ແລະ ໄດ້ຮັບການເພີ່ມເຕີມ ປັບປຸງບູລະນະຢ່າງບໍ່ຢຸດຢັ້ງ. ນັ້ນແມ່ນການນຳພາຢ່າງຮອບດ້ານ ເດັດຖານ ທາງດ້ານການເມືອງ ແນວຄິດ ການຈັດຕັ້ງ ພະນັກງານ... ດ້ວຍກົນໄກ ແບບວິທີທີ່ແໜ້ນແຟ້ນ ສອດຄ່ອງ. ໃນໂຄງການການເມືອງສະບັບທຳອິດ (ປີ 1930), ພັກຊີ້ແຈ້ງວ່າ ຕ້ອງ “ຈັດຕັ້ງກອງທັບກຳມະກອນຊາວນາຂຶ້ນ” ໂດຍໄວ. ໃນມະຕິກ່ຽວກັບກອງກຳລັງປ້ອງກັນຕົວເອງ (ປີ 1935), ພັກກຳນົດແຈ້ງ: “ຍາມໃດກໍ່ຕ້ອງຮັກສາສິດບັນຊາການຢ່າງເຄັ່ງຄັດຂອງພັກ ຕໍ່ກຳລັງປ້ອງກັນຕົວປະຈຳການ”, “ບັນດາຫົວໜ້າກອງ ແລະ ຜູ້ຕາງໜ້າພັກຕ້ອງຮ່ວມມືກັນເພື່ອບັນຊາ”.
ໃນການນຳພາກໍ່ສ້າງ ຂະຫຍາຍກຳລັງເພື່ອລຸກຮືຂຶ້ນດ້ວຍກຳລັງອາວຸດຍາດອຳນາດການປົກຄອງ, ພັກກຳນົດວ່າ ຕ້ອງເຮັດໃຫ້ບັນດາໜ່ວຍກອງຫຼອນໄປຖືກຕ້ອງຕາມ “ເສັ້ນທາງການເມືອງ” ຂອງພັກ... ຕົ້ນປີ 1944, ຕໍ່ໜ້າຄວາມຕ້ອງການສ້າງຕັ້ງກອງທະຫານຫຼວງແຫ່ງຊາດ, ທ່ານຜູ້ນຳ ຫງວຽນອ້າຍກວັກ ໄດ້ຕັກເຕືອງສະຫາຍ ຫວໍ ງວຽນຢາບ ວ່າ: “ການຈັດຕັ້ງຂອງກົມກອງຕ້ອງເອົາໜ່ວຍພັກເປັນແກ່ນກາງນຳພາ”. ປະຕິບັດຖືກຕ້ອງຕາມຄຳສັ່ງຂອງລຸງໂຮ່, ໜ່ວຍພັກຂອງກອງທະຫານໂຄສະນາປົດປ່ອຍຫວຽດນາມ ໄດ້ຮັບການຈ້າງຕັ້ງຂຶ້ນ, ນຳພາກອງທະຫານປະຕິບັດໜ້າທີ່ຕ່າງໆ ຢ່າງເດັດຂາດ ໂດຍກົງ ກ່ຽວກັບທຸກດ້ານ.
ໃນໄລຍະຕົ້ນຂອງການຕໍ່ສູ້ຕ້ານພວກລ່າເມືອງຂຶ້ນຜູ້ຮຸກຮານ, ກອງທັບໄດ້ຂະຫຍາຍຕົວຢ່າງໄວວາທາງດ້ານກຳລັງ. ເພື່ອຮັກສາກຳແໜ້ນການນຳພາ, ພັກສືບຕໍ່ຄົ້ນຄວ້າກຳນົດ ແລະ ຜັນຂະຫຍາຍກົນໄກນຳພາກອງທັບ: ສ້າງຕັ້ງສູນກາງຄະນະພັກການທະຫານ (ເດືອນມັງກອນ 1946); ສ້າງຕັ້ງຄະນະພັກຂັ້ນຕ່າງໆ ແຕ່ຂັ້ນຄະນະພັກເຂດທະຫານ ເຖິງຄະນະພັກໜ່ວຍ; ຕັ້ງລະບອບສອງຫົວໜ້າ (ການທະຫານ, ການເມືອງ) ເພື່ອບັນຊາແຕ່ຂັ້ນເຂດທະຫານ ເຖິງໝວດທະຫານ; ຕັ້ງລະບອບກຳມະການການເມືອງຕາງໜ້າພັກຮັບຜິດຊອບໃນກອງທັບ (ເດືອນຕຸລາ 1948).
ພຶດຕິກຳແຫ່ງການຈັດຕັ້ງນຳພາຂອງພັກຕໍ່ກັບກອງທັບ ໃນການຕໍ່ສູ້ຕ້ານຝຣັ່ງ, ຄະນະບໍລິຫານງານສູນກາງພັກສະໄໝທີ II ໄດ້ປະກາດໃຊ້ມະຕິສະບັບເລກທີ 07, ວັນທີ 20 ພຶດສະພາ 1952, ກ່ຽວກັບການປະຕິບັດລະບອບໝູ່ຄະນະພັກນຳພາຮອບດ້ານ, ຫົວໜ້າການທະຫານ ແລະ ຫົວໜ້າການເມືອງແບ່ງງານກັນປະຕິບັດຕາມໜ້າທີ່ການ ເພື່ອແນໃສ່ປະຕິບັດການນຳພາລວມໝູ່ ເປັນເອກະພາບຂອງພັກ ກ່ຽວກັບວຽກງານທຸກດ້ານ.
ໃນການຕໍ່ສູກູ້ຊາດຕ້ານອາເມລິກາ, ກົນໄກທີ່ກ່າວມາເທິງນີ້ສືບຕໍ່ໄດ້ຮັບການປະຕິບັດ; ອາໃສສິ່ງດັ່ງກ່າວ, ການນຳພາຂອງພັກຕໍ່ກັບກອງທັບໄດ້ຮັກສາ ເພີ່ມທະວີ ແລະ ມັນໄດ້ເສີມຂະຫຍາຍກຳລັງແຮງສູ້ຮົບ “ຍິ່ງຕີ ຍິ່ງແຂງແຮງ, ຍິ່ງມີໄຊ”. ບັນດາກົມກອງໃນທົ່ວກອງທັບລ້ວນແຕ່ຮັບຮູ້ຫຼັກການລວມສູນປະຊາທິປະໄຕຢ່າງຄົບຖ້ວນ ແລະ ປະຕິບັດຫຼັກການນີ້ຢ່າງເຂັ້ມງວດ ເຖິງຖອງ, ເສີມຂະຫຍາຍກຳລັງແຮງແຫ່ງການນຳພາຂອງພັກ, ພ້ອມກັນນັ້ນ ກໍ່ເສີມຂະຫຍາຍສະຕິປັນຍາ ແລະ ຄວາມປະດິດສ້າງຂອງຫົວໜ້າການເມືອງ ໃນການຈັດຕັ້ງປະຕິບັດ. ການນຳພາຂອງພັກໄດ້ປະກອບສ່ວນອັນຕັດສີນເຂົ້າໃນໄຊຊະນະຂອງກອງທັບເຮົາ ໃນການຕໍ່ສູ້ກູ້ຊາດຕ້ານອາເມລິກາ; ພ້ອມກັນນັ້ນກໍ່ກາຍເປັນມູນເຊື້ອ, ບົດຮຽນອັນປະເສີດຂອງກອງທັບເຮົາ.
ນັບແຕ່ປີ 1975 ມາເຖິງປັດຈຸບັນ, ພັກເຮົາໄດ້ມີການປ່ຽນແປງໃໝ່ ປັບປຸງເພີ່ມເຕີນ ບູລະນະກົນໄກນຳພາຂອງພັກຕໍ່ກັບກອງທັບ ເປັນສາມຄັ້ງ. ແຕ່ປີ 1975 ຫາປີ 1982, ກອງທັບຍັງຄົງປະຕິບັດກົນໄກນຳພາຂອງພັກ ຄືກັນກັບໃນສະໄໝຕໍ່ສູ້ຕ້ານອາເມລິກາເພື່ອກູ້ຊາດ. ວັນທີ 15 ທັນວາ 1982, ກົມການເມືອງສູນກາງພັກສະໄໝທີ V ໄດ້ອອກມະຕິສະບັບເລກທີ 07 “ກ່ຽວກັບການປ່ຽນແປງໃໝ່ ປັບປຸງບູລະນະກົນໄກນຳພາຂອງພັກຕໍ່ກັບກອງທັບປະຊາຊົນຫວຽດນາມ, ພາລະກິດປ້ອງກັນຊາດ ແລະ ປະຕິບັດລະບອບຜູ້ບັນຊາການຜູ້ດຽວໃນກອງທັບ”. ພາຍຫຼັງສອງປີກວ່າແຫ່ງການປະຕິບັດກົນໄກ 07, ພັກໄດ້ຄົ້ນພົບຂໍ້ຂາດຕົກບົກພ່ອງຈຳນວນໜຶ່ງ, ເພາະສະນັ້ນ, ວັນທີ 4 ກໍລະກົດ 1985, ກົມການເມືອງສູນກາງພັກສະໄໝທີ V ໄດ້ອອກມະຕິສະບັບເລກທີ 27 ກ່ຽວກັບ “ສືບຕໍ່ປັບປຸງບູລະນະກົນໄກນຳພາຂອງພັກຕໍ່ກັບກອງທັບປະຊາຊົນຫວຽດນາມ ແລະ ພາລະກິດປ້ອງກັບຊາດ”.
ມະຕິສະບັບເລກທີ 27 ຂອງກົມການເມືອງສູນກາງພັກ ຕົກລົງຟື້ນຟູລະບົບຈັດຕັ້ງຂອງພັກໃນກອງທັບ. ທົ່ວກອງທັບມີຄະນະພັກການທະຫານສູນກາງ ໂດຍແມ່ນກົມການເມືອງ, ຄະນະເລຂາທິການສູນກາງພັກນຳພາໂດຍກົງ. ຄະນະພັກຂັ້ນຕ່າງໆມີໜ້າທີ່ຮັບຜິດຊອບນຳພາຮອບດ້ານ ຕໍ່ບັນດາກົມກອງທີ່ຂຶ້ນກັບສິດຂອງຕົນ, ຕາມຂອບເຂດພາລະບົດບາດ ແລະ ເນື້ອໃນທີ່ໄດ້ກຳນົດໃຫ້ແຕ່ລະຂັ້ນ. ໃນເກືອບ 20 ປີແຫ່ງການປະຕິບັດມະຕິສະບັບເລກທີ 27 (1985 - 2005) ໄດ້ມີການຫັນປ່ຽນຢ່າງຕັ້ງໜ້າທາງດ້ານຄວາມຮັບຮູ້ແນວຄິດ ແລະ ການກະທຳໃນທົ່ວກອງທັບ ກ່ຽວກັບໜ້າທີ່ກໍ່ສ້າງກອງທັບ, ປັບປຸງການປ້ອງກັນຊາດ, ກຽມພ້ອມສູ້ຮົບ ແລະ ສູ້ຮົບປົກປັກຮັກສາປະເທດຊາດ.
ຕໍ່ໜ້າຄວາມຮຽກຮ້ອງຕ້ອງການກຳແໜ້ນ ແລະ ເພີ່ມທະວີການນຳພາຂອງພັກຕໍ່ກັບໜ້າທີ່ປັບປຸງການປ້ອງກັນຊາດ ປົກປັກຮັກສາປະເທດຊາດ ກໍ່ສ້າງກອງທັບໃນສະໄໝໃໝ່, ວັນທີ 20 ກໍລະກົດ 2005, ກົມການເມືອງສູນກາງພັກສະໄໝທີ IX ປະກາດໃຊ້ມະຕິສະບັບເລກທີ 51 ກ່ຽວກັບ “ສືບຕໍ່ປັບປຸງບູລະນະກົນໄກນຳພາຂອງພັກ, ປະຕິບັດລະບອບຜູ້ບັນຊາການຜູ້ດຽວ ຕິດກັບການປະຕິບັດລະບອບຜູ້ບັນຊາການເມືອງ, ນາຍທະຫານການເມືອງໃນກອງທັບປະຊາຊົນຫວຽດນາມ”.
ມະຕິຊີ້ແຈ້ງວ່າ: “ໜ້າທີ່ສ້າງສາ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມໃນສະໄໝໃໝ່ ວາງຄວາມຮຽກຮ້ອງຕ້ອງການອອກມາ ຊຶ່ງຕ້ອງຍົກສູງຄຸນນະພາບການກໍ່ສ້າງກອງທັບ, ພິເສດແມ່ນຍົກສຸງຄຸນນະພາບ ປະສິດທິຜົນຂອງວຽກງານພັກ, ວຽກງານການເມືອງ, ກຳແໜ້ນແລະເພີ່ມທະວີການນຳພາເດັດຂາດ ໂດຍກົງກ່ຽວກັບທຸກດ້ານຂອງພັກຕໍ່ກັບກອງທັບ, ຮັບປະກັນໃຫ້ກອງທັບຍາມໃດກໍ່ໝັ້ນຄົງເຂັ້ມແຂງທາງດ້ານການເມືອງ ແນວຄິດ ແລະ ການຈັດຕັ້ງ, ເປັນກຳລັງການເມືອງ ກຳລັງສູ້ຮົບທີ່ຈົງຮັກພັກດີ ແລະ ໄວ້ວາງໃຈໄດ້ຂອງພັກ ລັດສັງຄົມນິຍົມ ແລະ ຂອງປະຊາຊົນ, ສຳເລັດເປັນຢ່າງດີທຸກໜ້າທີ່ທີ່ໄດ້ຮັບມອບໝາຍ ໃນທຸກກໍລະນີ”.
ກົນໄກນຳພາຕາມມະຕິສະບັບເລກທີ 51 ກຳນົດແຈ້ງບັນດາເນື້ອໃນອັນພື້ນຖານ ເພື່ອກຳນົດທິດ, ຊີ້ນຳ, ຈັດຕັ້ງການເຄື່ອນໄຫວນຳພາ ຂອງອົງການຈັດຕັ້ງພັກ, ການເຄື່ອນໄຫວວຽກງານພັກ ວຽກງານການເມືອງ, ການເຄື່ອນໄຫວຂອງພະນັກງານບັງຄັບບັນຊາ, ຜູ້ບັນຊາການເມືອງ, ນາຍທະຫານການເມືອງ, ອົງການການເມືອງໃນບັນດາກົມກອງທະຫານ. ກົມການເມືອງ ຄະນະເລຂາທິການສູນກາງພັກສະໄໝທີ XI ໄດ້ປະກາດໃຊ້ກົດລະບຽບກ່ຽວກັບການຈັດຕັ້ງພັກຢູ່ໃນກອງທັບປະຊາຊົນຫຽດນາມ ແລະ ແລະ ກົດລະບຽບກ່ຽວກັບການຈັດຕັ້ງອົງການການເມືອງຢູ່ໃນກອງທັບ.
ບັນດາເອກະສາສຳຄັນຂອງພັກໄດ້ຢືນຢັນ: ພັກກອມມູນິດຫວຽດນາມ ຊຶ່ງອົງການປະຈຳ ແລະ ໂດຍກົງແມ່ນ ກົມການມືອງ ຄະນະເລຂາທິການສູນກາງເປັນຜູ້ນຳພາເດັດຂາດ ໂດຍກົງກ່ຽວກັບທຸກດ້ານຕໍ່ກັບກອງທັບ. ການນຳພາດັ່ງກ່າວໄດ້ຮັບການປະຕິບັດໂດຍຜ່ານລະບົບການຈັດຕັ້ງພັກ, ລະບົບການຈັດຕັ້ງບັງຄັບບັນຊາການ, ລະບົບອົງການການເມືອງ ພະນັກງານການເມືອງຂັ້ນຕ່າງໆ ແລະ ອົງການຈັດຕັ້ງມະຫາຊົນຢູ່ກົມກອງຮາກຖານ.
ລະບົບການຈັດຕັ້ງພັກໃນກອງທັບກວມດ້ວຍ ຄະນະພັກການທະຫານສູນກາງ ແລະ ຄະນະພັກການທະຫານຂັ້ນຕ່າງໆ. ເລຂາທິການໃຫຍ່ຄະນະບໍລິຫານງານສູນກາງພັກ ເປັນເລຂາທິການຄະນະພັກການທະຫານສູນກາງ, ລັດຖະມົນຕີວ່າການກະຊວງປ້ອງກັນປະເທດ ເປັນຮອງເລຂາທິການຄະນະພັກການທະຫານສູນກາງ, ບັນດາສະຫາຍກຳມະການຄະນະພັກການທະຫານສູນກາງ ໂດຍແມ່ນກົມການເມືອງແຕ່ງຕັ້ງ. ບັນດາຄະນະພັກແຕ່ຂັ້ນຂຶ້ນກັບຄະນະພັກການທະຫານສູນກາງ ເຖິງຂັ້ນຮາກຖານ ໂດຍແມ່ນກອງປະຊຸມໃຫຍ່ຄະນະພັກຂັ້ນດຽວກັບເລືອກຕັ້ງ.
ຄະນະພັກການທະຫານສູນກາງຄົ້ນຄວ້ານຳສະເໜີໃຫ້ຄະນະບໍລິຫານງານສູນກາງພັກ ກ່ຽວກັບບັນຫາສຳຄັນຕ່າງໆຄື ແນວທາງ ໜ້າທີ່ການທະຫານ ແລະ ການປ້ອງກັນປະເທດ; ແຜນການປ້ອງປັກຮັກສາປະເທດ; ທິດທາງ ແລະ ມາດຕະການກໍ່ສ້າງລະບົບປ້ອງກັນຊາດທົ່ວປວງຊົນ; ກົນໄກນຳພາຂອງພັກຕໍ່ກັບກອງທັບ. ຄະນະພັກການທະຫານສູນກາງມີໜ້າທີ່ຮັບຜິດຊອບປະສານສົມທົບ ແລະ ແນະນຳບັນດາຄະນະພັກຂຶ້ນກັບສູນກາງ ປະຕິບັດບັນດາມະຕິ ຄຳສັ່ງຂອງພັກກ່ຽວກັບການທະຫານ ການປ້ອງກັນປະເທດ; ນຳພາໂດຍກົງຕໍ່ການກໍ່ສ້າງໃຫ້ກອງທັບໝັ້ນຄົງເຂັ້ມແຂງຮອບດ້ານ, ກໍ່ສ້າງໃຫ້ບັນດາການຈັດຕັ້ງພັກຢູ່ໃນກອງທັບມີຄວາມປອດໃສຂາວສະອາດ ໝັ້ນຄົງເຂັ້ມແຂງ. ຜ່າມບັນດາມາດຕະການຍົກສູງຄຸນນະພາບ ປະສິດທິຜົນວຽກງານພັກ ວຽກງານການເມືອງ, ຄະນະພັກການທະຫານສູນກາງຮັບປະກັນກຳແໜ້ນ ແລະ ເພີ່ມທະວີການນຳພາຂອງພັກຕໍ່ກັບກອງທັບ.
ຄະນະພັກການທະຫານສູນກາງປະຕິບັດລະບອບຕັດສີນຕົກລົງລວມໝູ່ ຕໍ່ກັບບັນຫາໃຫຍ່ເຊັ່ນ ແຜນນະໂຍບາຍ ໂຄງການ ແຜນການປະຕິບັດບັນດາມະຕິ ຄຳສັ່ງຂອງພັກ, ບັນດາມາດຕະການກໍ່ສ້າງກອງທັບ... ຄະນະພັກການທະຫານສູນກາງຊີ້ນຳກົມໃຫຍ່ການເມືອງ ແລະ ຜ່ານກົມໃຫຍ່ການເມືອງຊີ້ນຳບັນດາຄະນະພັກ ແລະ ລະບົບຜູ້ບັນຊາການເມືອງ, ນາຍທະຫານການເມືອງ, ອົງການການເມືອງຂັ້ນຕ່າງໆ ດຳເນີນວຽກງານພັກ ວຽກງານການເມືອງ ເພື່ອແນໃສ່ກໍ່ສ້າງໃຫ້ກອງທັບໝັ້ນຄົງເຂັ້ມແຂງຮອບດ້ານ, ມີຄວາມສາມາດພຽງພໍເພື່ອສຳເລັດທຸກໜ້າທີ່ທີ່ໄດ້ຮັບມອບໝາຍ.
ເປັນອັນວ່າ, ໃນຕະຫຼອດ 70 ປີທີ່ຜ່ານມາ, ຍ້ອນໄດ້ປັບປຸງເພີ່ມເຕີມ ບູລະນະແບບວິທີ ກົນໄກນຳພາຢ່າງບໍ່ຢຸດຢັ້ງ, ດັ່ງນັ້ນ ພັກກອມມູນິດຫວຽດນາມ ຈຶ່ງກຳແໜ້ນບົດບາດນຳພາກອງທັບ ໃນທຸກກໍລະນີ ທຸກໄລຍະປະຫວັດສາດ. ນັ້ນກໍ່ແມ່ນປັດໄຈຕັດສີນຄວາມເຕີບໃຫຍ່ຂະຫຍາຍຕົວ, ການສູ້ຮົບ ແລະ ສູ້ຮົບມີໄຊຂອງກອງທັບເຮົາ. 70 ປີທີ່ຜ່ານມາ, ກອງທັບຍາມໃດກໍ່ສົມກັບເປັນເຄື່ອງມືກຳລັງຮຸນແຮງປະຕິວັດທີ່ແຫຼມຄົມ, ກຳລັງການເມືອງທີ່ຈົງຮັກພັກດີຂອງພັກ ຂອງປະເທດຊາດ ແລະ ປະຊາຊົນ; ຮັກສາທາດແທ້ນຊົນຊັ້ນກຳມະກອນ, ເປັນກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນ; ສ້າງມູນເຊື້ອຕັດສີນໃຈສູ້ຮົບ ເດັດຂາດມີໄຊ ດ້ວຍໄຊຊະນະອັນສະຫງ່າລາສີທີ່ສຸດ, ໄດ້ຕີເອົາຊະນະສັດຕູຜູ້ຮຸກຮານທຸກໂຕ, ສົມກັບເປັນກອງທັບທີ່ພິລະອາດຫານຂອງຊາດຫວຽດນາມຜູ້ພີລະອາດຫານ.
ໃນເງື່ອນໄຂປະຕິວັດໃໝ່, ຕໍ່ໜ້າສະພາບການໂລກ ພາກພື້ນ ແລະ ໃນປະເທດ ມີຄວາມສະດວກອັນພື້ນຖານຫຼາຍຢ່າງ ແລະ ກໍ່ມີການຫັນປ່ຽນສັບສົນຕ່າງໆນາໆ, ຄະນະພັກການທະຫານສູນກາງ, ກະຊວງປ້ອງກັນປະເທດ, ຄະນະພັກ ຜູ້ບັນຊາການຂັ້ນຕ່າງໆ ໄດ້ປະຕິບັດຢ່າງເຂັ້ມງວດການນຳພາ ຊີ້ນຳຂອງພັກ ລັດ; ສຸມໃສ່ນຳພາ ຊີ້ນຳຮອບດ້ານ, ມີຈຸດໜັກ ໃຈກາງ ແລະ ສຳເລັດເປັນຢ່າງດີບັນດາຈຸດໝາຍ ໜ້າທີ່ທີ່ວາງອອກມາ.
ຜົນສຳເລັດພົ້ນເດັ່ນແມ່ນ: ໄດ້ເປັນເຈົ້າການໃຫ້ຄຳປຶກສາແກ່ພັກແລະລັດ ໃນການວາງກຳນົດແນວທາງ ແຜນຍຸດທະສາດການທະຫານປ້ອງກັນຊາດ ປົກປັກຮັກສາປະເທດຊາດ; ຕີລາຄາ ຄາດຄະເນ ແກ້ໄຂກໍລະນີຕ່າງໆ ຢ່າງຖືກຕ້ອງ, ບໍ່ໃຫ້ຖືກຕົກໃສ່ທ່າຮັບ ທ່າບັງເອີນ, ເປັນຕົ້ນແມ່ນໃນການຕໍ່ສູ້ປົກປັກຮັກສາອຳນາດອະທິປະໄຕໃນເຂດທະເລ, ປົກປັກຮັກສາເອກະລາດ ອຳນາດອະທິປະໄຕ ຜືນແຜ່ນດິນອັນຄົບຖ້ວນຂອງປະເທດຊາດໄວ້ໄດ້ຢ່າງໝັ້ນຄົງ; ປະຕິບັດເປັນຢ່າງດີວຽກງານການຕ່າງປະເທດປ້ອງກັນຊາດ, ປະກອບສ່ວນຮັກສາສະຖຽນລະພາບດ້ານການເມືອງ ແລະ ສິ່ງແວດລ້ອມສັນຕິພາບ ເພື່ອສ້າງສາພັດທະນາປະເທດ. ນຳພາການກໍ່ສ້າງໃຫ້ກອງທັບໝັ້ນຄົງເຂັ້ມແຂງທາງດ້ານການເມືອງ; ຄຸນນະພາບສັງລວມ, ກຳລັງແຮງສູ້ຮົບໄດ້ຮັບການຍົກສູງຂຶ້ນ.
ກອງທັບຍາມໃດກໍ່ຕັ້ງໜ້າເຂົ້າຮ່ວມການຊ່ວຍເຫຼືອປະຊາຊົນຫລຸດຜ່ອນຄວາມທຸກຍາກ, ແກ້ໄຂຜ່ານຜ່າຜົນຮ້າຍຈາກສົງຄາມ ແລະ ໄພທຳມະຊາດ, ກໍ່ສ້າງຮາກຖານການເມືອງທ້ອງຖິ່ນໝັ້ນຄົງເຂັ້ນແຂງ, ກໍ່ສ້າງທ່າສະໜາມໃນໃຈປະຊາຊົນໃຫ້ໜັກແໜ້ນ, ໄດ້ຮັບຄວາມເຊື່ອຖືຈາກພັກ ລັດ ແລະປະຊາຊນ. ວຽກງານກໍ່ສ້າງຄະນະພັກກອງທັບມີການຜັນປ່ຽນສຳຄັນທາງດ້ານຄວາມສາມາດນຳພາ, ກຳລັງສູ້ຮົບ; ພະນັກງານ ສະມາຊິກພັກມີຫຼັກໝັ້ນການເມືອງກ້າແກ່ນ, ຈົງຮັກພັກດີຢ່າງເດັດຂາດຕໍ່ກັບພັກ ປະເທດຊາດ ແລະ ປະຊາຊົນ, ກຽມຄວາມພ້ອມຮັບໜ້າທີ່ ແລະ ສຳເລັດເປັນຢ່າງດີທຸກໜ້າທີ່ທີ່ໄດ້ຮັບມອບໝາຍ. ກອງທັບຍາມໃດກໍ່ຢືນຢັນວ່າເປັນກຳລັງທີ່ໄດ້ຮັບຄວາມເຊື່ອຖືໃນແນວຄິດຈິດໃຈຂອງປະຊາຊົນ. ຮູບພາບທະຫານລູງໂຮ່ໄດ້ຮັບການຮັກສາໄວ້ຢ່າງໝັ້ນຄົງ ແລະ ສ່ອງແສງສະຫວ່າງ.
ໃນສະພາບການປັດຈຸບັນ, ເພື່ອສືບຕໍ່ຮັກສາແລະເພີ່ມທະວີການນຳພາຂອງພັກຕໍ່ກັບກອງທັບ, ຮັບປະກັນໃຫ້ກອງທັບຍາມໃດກໍ່ຮັກສາໄດ້ທາດແທ້ປະຕິວັດ, ຈຸດໝາຍ ອຸດົມການສູ້ຮົບ, ສຳເລັດເປັນຢ່າງດີໜ້າທີ່ສ້າງສາ ແລະ ປົກປັກຮັກສາປະເທດຊາດ, ແມ່ນຕ້ອງໃຫ້ຄວາມສຳຄັນແກ່ບາງບັນຫາອັນພື້ນຖານດັ່ງຕໍ່ໄປນີ້:
ກ່ອນອື່ນໝົດ, ຕ້ອງເປັນເອກະພາບໃນຄວາມຮັບຮູ້ວ່າ ໃນບໍ່ວ່າສະພາບການໃດ ເງື່ອນໄຂໃດກໍ່ຕ້ອງຢຶດໝັ້ນຫຼັກການ ພັກກອມມູນິດຫວຽດນາມນຳພາກອງທັບປະຊາຊົນຫວຽດນາມຢ່າງເດັດຂາດ ໂດຍກົງກ່ຽວກັບທຸກດ້ານ; ການປັບປຸງບູລະນະ ຍົກສູງຄຸນນະພາບການນຳພາຂອງພັກແມ່ນປັດໃຈຕັດສີນ ເພື່ອໃຫ້ພັກກຳແໜ້ນກອງທັບໃນທຸກກໍລະນີ. ພັກບໍ່ພຽງແຕ່ວາງແນວທາງການທະຫານ, ກຳນົດທິດທາງພັດທະນາກຳລັງຄວາມສາມາດບົ່ມຊ້ອນດ້ານການທະຫານ ການປ້ອງກັນຊາດຂອງປະເທດ, ກຳນົດຈຸດໝາຍ ອຸດົມການສູ້ຮົບ ແລະ ບັນດາແຜນນະໂຍບາຍ ວິທີແກ້ໄຂການຍົກສູງກຳລັງສູ້ຮົບຂອງຄະນະພັກກອງທັບເທົ່ານັ້ນ ຫາກພັກຍັງນຳພາການຈັດຕັ້ງປະຕິບັດທັດສະນະ ແນວທາງກໍ່ສ້າງກອງທັບປະຕິວັດ ລະບຽບບຫຼວງ ຍອດຍ້ຽມ ທັນສະໄໝເທື່ອລະກ້າວ ໃຫ້ປະກົດເປັນຈິງ.
ພັກກອມມູນິດຫວຽດນາມ ຊຶ່ງໂດຍກົງ ເປັນປະຈຳແມ່ນກົມການເມືອງ ຄະນະເລຂາທິການສູນກາງພັກ ເປັນຜູ້ຕັດສີນບັນດາບັນຫາອັນພື້ນຖານ ກ່ຽວກັບການກໍ່ສ້າງໃຫ້ກອງທັບໝັ້ນຄົງເຂັ້ມແຂງທາງດ້ານການເມືອງ ແນວຄິດ ແລະ ການຈັດຕັ້ງ; ກໍ່ສ້າງໃຫ້ກອງທັບຍາມໃດກໍ່ເປັນກຳລັງທີ່ຈົງຮັກພັກດີຢ່າງເດັດຂາດຕໍ່ກັບພັກ ກັບປະເທດຊາດ, ຮັບໃຊ້ປະຊາຊົນຢ່າງສຸດອົກສຸດໃຈ ສຸດຄວາມສາມາດ, ເປັນກຳລັງຫຼັກແຫຼ່ງແກ່ນສານ ພ້ອມກັບທົ່ວປວງຊົນປົກປັກຮັກສາປະເທດຊາດຫວຽດນາມສັງຄົມນິຍົມ ແລະ ເຂົ້າຮ່ວມການກໍ່ສ້າງປະເທດ. ລັດຄຸ້ມຄອງເປັນເອກະພາບຕໍ່ກັບກອງທັບ ຕາມຂໍ້ກຳນົດຂອງລັດຖະທຳມະນູນ ແລະ ກົດໝາຍ.
ຄະນະພັກກອງທັບ, ຄະນະພັກການທະຫານສູນກາງ ແລະ ການຈັດຕັ້ງພັກຂັ້ນຕ່າງໆໃນກອງທັບ ຕ້ອງຊາບຊືມຢ່າງເລິກເຊິ່ງ ແລະ ປະຕິບັດຢ່າງເຂັ້ມງວດ ທັດສະນະ ແນວທາງການທະຫານ ການປ້ອງກັນຊາດ ປົກປັກຮັກສາປະເທດຊາດຂອງພັກ; ພ້ອມກັນນັ້ກກໍ່ຕ້ອງປະຕິບັດເປັນຢ່າງດີ ພາລະບົດບາດເປັນເສນາທິການໃຫ້ພັກແລະລັດ ໃນຂົງເຂດການທະຫານ ການປ້ອງກັນຊາດ; ປະຕິບັດຢ່າງມີປະສິດທິຜົນ ມະຕິ ຄຳສັ່ງຂອງພັກ ຂອງລັດ ກ່ຽວກັບການກໍ່ສ້າງກຳລັງປະກອບອາວຸດປະຊາຊົນ, ກໍ່ສ້າງລະບົບປ້ອງກັນຊາດທົ່ວປວງຊົນ ທ່າສະໜາມຮົບປ້ອງກັນຊາດທົ່ວປວງຊົນ ຕິດແໜ້ນກັບທ່າສະໜາມຮົບປ້ອງກັນຄວາມສະຫງົບທົ່ວປວງຊົນ; ຍົກສູງຄຸນນະພາບສັງລວມ ແລະ ກຳລັງແຮງສູ້ຮົບຂອງກອງທັບ. ພ້ອມກັນນັ້ນ ກໍ່ຮັກສາ ແລະ ປະຕິບັດເປັນຢ່າງດີ ຫຼັກການນຳພາເດັດຂາດ ໂດຍກົງກ່ຽວກັບທຸກດ້ານ, ຮັບປະກັນໃຫ້ສິດນຳພາກອງທັບທຸກສິດຍາມໃດກໍ່ຂຶ້ນກັບພັກ.
ມີແຕ່ພັກກອມມູນິດຫວຽດນາມ ແມ່ນການຈັດຕັ້ງອັນໜຶ່ງອັນດຽວເທົ່ານັ້ນ ທີ່ນຳພາກອງທັບປະຊາຊົນຫວຽດນາມ. ການນຳພາກອງທັບບໍ່ອາດຈະແບ່ງປັນໃຫ້ບຸກຄົນໃດໜຶ່ງ ຫຼືກຳລັງການເມືອງອື່ນໃດໄດ້. ລັດຄຸ້ມຄອງກອງທັບຢ່າງເປັນເອກະພາບ ແໜ້ນແຟ້ນ ບົນພື້ນຖານຫຼັກການລວມສູນປະຊາທິປະໄຕ, ຕັ້ງຢູ່ພາຍໃຕ້ການນຳພາຂອງພັກ ແລະ ປະຕິບັດການຄຸ້ມຄອງສັງຄົມດ້ວຍກົດໝາຍ. ເພາະສະນັ້ນ, ເພີ່ມທະວີການຄຸ້ມຄອງຂອງລັດຕໍ່ກັບກອງທັບ ຕັ້ງຢູ່ພາຍໃນສາຍພົວພັນສະໜິດແໜ້ນແບບກາຍະອິນຊີ ກັບເພີ່ມທະວີການນຳພາຂອງພັກກ່ຽວກັບທຸກດ້ານຕໍ່ກັບກອງທັບ.
ຄະນະພັກກອງທັບຕ້ອງສືບຕໍ່ຊາບຊືມ, ປະຕິບັດຢ່າງມີປະສິດທິຜົນ ມະຕິສະບັບເລກທີ 51 ຂອງກົມການເມືອງສູນກາງພັກສະໄໝທີ IX, ກົດຂໍ້ກຳນົດສະບັບເລກທີ 49 ຂອງກົມການເມືອງສູນກາງພັກສະໄໝທີ XI, ກົດຂໍ້ກຳນົດສະບັບເລກທີ 50 ຂອງຄະນະເລຂາທິການສູນກາງພັກສະໄໝທີ XI, ມະຕິສະບັບເລກທີ 513 ຂອງຄະນະພັກການທະຫານສູນກາງ. ຂະນະພັກຂັ້ນຕ່າງໆຕ້ອງປະຕິບັດຕາມການຊີ້ນຳ ຂອງຄະນະພັກການທະຫານສູນກາງ ຢ່າງເຂັ້ມງວດ, ພ້ອມກັນນັ້ນກໍ່ຄົ້ນຄວ້າ ໝູນໃຊ້ບັນດາບົດຮຽນທີ່ຖອດຖອມມາໄດ້ຈາກຂະບວນວິວັດການປະຕິບັດມະຕິສະບັບເລກທີ 51 ຂອງກົມການເມືອງສູນກາງພັກ, ຮັບປະກັນໃຫ້ກົນໄກພັກນຳພາກອງທັບໄດ້ຮັບການປະຕິບັດຢ່າງລ່ຽນໄຫຼ, ບັນລຸປະສິດທິຜົນສູງ.
ທີສອງ, ຍົກສູງກຳລັງຄວາມສາມາດນຳພາຮອບດ້ານ ກຳລັງສູ້ຮົບຂອງຄະນະພັກກອງທັບຢ່າງບໍ່ຢຸດຢັ້ງ ແລະ ຍົກສູງຜົນສັກສິດຂອງວຽກງານພັກ ວຽກງານການເມືອງ. ກ່ອນອື່ນໝົດ ຕ້ອງສືບຕໍ່ປ່ຽນແປງໃໝ່ ຍົກສູງລັກສະນະສູ້ຮົບ, ລັກສະນະປະສິດທິຜົນຂອງວຽກງານແນວຄິດ, ປັບປຸງສະໜາມຮົບແນວຄິດຂອງພັກຢູ່ໃນກອງທັບ, ຮັບປະກັນໃຫ້ກອງທັບຍາມໃດກໍ່ຈົງຮັບພັກດີຕໍ່ພັກ ປະເທດຊາດ ແລະ ປະຊາຊົນ; ຢຶດໝັ້ນຈຸດໝາຍ ອຸດົມການຂອງພັກ, ຕັ້ງໝັ້ນໃນພາລະກິດປ່ຽນແປງໃໝ່ກໍ່ສ້າງສັງຄົມນິຍົມ ແລະ ຕັດສີນໃຈຜ່ານຜ່າຄວາມຫຍຸ້ງຍາກ ສິ່ງທ້າທາຍທຸກຢ່າງ; ພ້ອມກັນນັ້ນກໍ່ເປັນກຳລັງແກ່ນສານໃນການຕໍ່ສູ້ຕ້ານທັດສະນະແນວຄິດອັນຜິດພາດ ເພື່ອປົກປັກຮັກສາລັດທິ ມາກ-ເລນີນ, ແນວຄິດໂຮ່ຈີມິນ, ແນວທາງ ແຜນນະໂຍບາຍຂອງພັກ, ນະໂຍບາຍແລະກົດໝາຍຂອງລັດ.
ສຸມໃສ່ປັບປຸງບູລະນະລະບົບການຈັດຕັ້ງ, ຍົກສູງລະດັບ ຄວາມສາມາດນຳພາຮອບດ້ານຂອງບັນດາການຈັດຕັ້ງພັກ, ຍົກສູງກຳລັງສູ້ຮົບ ແລະ ລັກສະນະຂະຫຍັນຂັນເຄື່ອນຂອງບັນດາການຈັດຕັ້ງພັກ, ພິເສດແມ່ນການຈັດຕັ້ງຮາກຖານຂອງພັກ ແລະ ຄຸນນະພາບຂອງຖັນແຖວພະນັກງານ ສະມາຊິກພັກ. ບັນດາຄະນະພັກປະຕິບັດເປັນຢ່າງດີຫຼັກການລວມສູນປະຊາທິປະໄຕ, ນຳພາເປັນໝູ່ຄະນະໂດຍຕິດກັບການແບ່ງງານໃຫ້ບຸກຄົນຮັບຜິດຊອບ; ໃຫ້ຄວາມສຳຄັນຕໍ່ການກໍ່ສ້າງ ແລະ ຜັນຂະຫຍາຍກົດລະບຽບການປະຕິບັດງານ, ກົດລະບຽບການນຳພາວຽກງານສຳຄັນດ້ານຕ່າງໆ; ຕັ້ງໜ້າປ່ຽນແປງໃໝ່ ຍົກສູງຄຸນະພາບການດຳເນີນຊີວິດພັກ, ຍົກສູງລັກສະນະສູ້ຮົບ, ເພີ່ມທະວີຄວາມສາມັກຄີ ເປັນເອກະພາບໃນແຕ່ລະການຈັດຕັ້ງພັກ ແລະ ກົມກອງ; ເປັນເຈົ້າການຜັນຂະຫຍາຍປະຕິບັດແຜນການກວດກາ ຕິດຕາມກວດກາໃນແຕ່ລະສະໄໝ ໃຫ້ແທດກັບຄວາມຮຽກຮ້ອງຕ້ອງການໜ້າທີ່ ແລະ ສະພາບຕົວຈິງຂອງແຕ່ລະອົງການຈັດຕັ້ງ. ເພີ່ມທະວີວຽກງານພະນັກງານ, ກໍ່ສ້າງຖັນແຖວພະນັກງານຕາມທິດ ປະລິມານຕິດແໜ້ນກັບໂຄງປະກອບ, ຈັດວາງສັບຊ້ອນພະນັກງານຢ່າງສົມເຫດສົມຜົນ, ຍົກສູງຄຸນນະພາບຖັນແຖວພະນັກງານ.
ທີສາມ, ຕ້ອງເພີ່ມທະວີ ແລະ ຍົກສູງຄວາມສັກສິດໃນການຄຸ້ມຄອງຂອງລັດຕໍ່ກັບກອງທັບ. ລັດຄຸ້ມຄອງກອງທັບບົນພື້ນຖານການຫັນເປັນນິຕິກຳ ໃຫ້ແນວທາງ ມະຕິຂອງພັກ (ກ່ຽວກັບການທະຫານ, ການປ້ອງກັນຊາດ, ປົກປັກຮັກສາປະເທດຊາດ, ກໍ່ສ້າງກຳລັງປະກອບອາວຸດ) ກາຍເປັນກົດໝາຍ, ນະໂຍບາຍ, ແຜນການ; ພ້ອມກັນນັ້ນກໍ່ຕ້ອງດັດແປງການຈັດຕັ້ງແລະການເຄື່ອນໄຫວ ຂອງກົງຈັດບໍລິຫານແຫ່ງລັດ ແຕ່ສູນກາງຮອດທ້ອງຖິ່ນ ໃຫ້ດີຂຶ້ນເລື່ອຍໆ. ດັດແປງພາລະບົດບາດ ໜ້າທີ່ ສິດຂອບເຂດ ຂອງລັດຖະບານ ກະຊວງປ້ອງກັນຊາດ ບັນດາກະຊວງແລະອົງການທຽບເທົ່າ ອົງການຂຶ້ນສັງກັດລັດຖະບານ ແລະ ທ້ອງຖິ່ນ ໃຫ້ສອດຄ່ອງກັບຄວາມຮຽກຮ້ອງຕ້ອງການຄຸ້ມຄອງລັດຕໍ່ກັບກອງທັບ. ປົວແປງແບບວິທີ ລະບຽບແບບແຜນເຮັດວຽກຂອງບັນດາອົງການ ກົມກອງຂອງກອງທັບ, ກຳນົດແຈ້ງຫຼັກການເຮັດວຽກ ແລະ ກົດລະບຽບການປະສານສົມທົບເຄື່ອນໄຫວຂອງກົງຈັກນຳພາ ຄຸ້ມຄອງ ບັນຊາການຂອງກົມກອງໃນກອງທັບ.
ເພີ່ມທະວີການນຳພາເດັດຂາດ ໂດຍກົງກ່ຽວກັບທຸກດ້ານຂອງພັກ, ຕິດແໜ້ນກັບເພີ່ມທະວີການຄຸ້ມຄອງເປັນເອກະພາບຂອງລັດຕໍ່ກັບກອງທັບ ແມ່ນສອງບັນຫາກຸນແຈ ທີ່ພົວພັນແໜ້ນແຟ້ນນຳກັນ, ມີຄວາມໝາຍຕັດສີນໃນການກໍ່ສ້າງກອງທັບຕາມທິດ “ປະຕິວັດ, ລະບຽບຫຼວງ, ຍອດຍ້ຽມ, ທັບສະໄໝເປັນແຕ່ລະກ້າວ”. ພັກ ລັດ ຕ້ອງເພີ່ມເຕີມ, ຂະຫຍາຍ, ປັບປຸງບູລະນະແນວທາງການນຳພາ ກົນໄກ ນະໂຍບາຍຄຸ້ມຄອງຕໍ່ກັບກອງທັບ, ເບິ່ງແຍງດູແລການກໍ່ສ້າງລະບົບການຈັດຕັ້ງພັກໃນກອງທັບ ໃຫ້ປອດໃສຂາວສະອາດ ແລະ ໝັ້ນຄົງເຂັ້ມແຂງ ໂດຍຕິດກັບການກໍ່ສ້າງ ປັບປຸງລະບົບບັນຊາການຂັ້ນຕ່າງໆ ກົມກອງຕ່າງໆໃນກອງທັບໃຫ້ໝັ້ນຄົງເຂັ້ມແຂງຮອບດ້ານ, ຕອບສະໜອງໄດ້ກັບຄວາມຮຽກຮ້ອງຕ້ອງການນຳພາ ຊີ້ນຳ ຄຸ້ມຄອງວຽກງານການທະຫານ ການປ້ອງກັນຊາດ; ກໍ່ສ້າງກອງທັບ, ປົກປັກຮັກສາປະເທດຊາດໃນສະພາບການໃໝ່.
ທີສີ່, ຕ້ອງຍູ້ແຮງການຕໍ່ສູ້ ເຮັດໃຫ້ກົນອຸບາຍແລະການເຄື່ອນໄຫວຂອງບັນດາອິດທິກຳລັງສັດຕູ ປະລາໄຊລົງ, ທັບມ້າງກົນອຸບາຍ “ຫັນປ່ຽນໂດຍສັນຕິ” ແລະ ອຸບາຍ “ຫັນກອງທັບເປັນໄຮ້ການເມືອງ” ຂອງພວກມັນ. ຕາມຈິງແລ້ວ, ການ “ຫັນກອງທັບເປັນໄຮ້ການເມືອງ” ແມ່ນກົນອຸບາຍທີ່ເລິກແລບແນບນຽນທີ່ສຸດ ຂອງບັນດາອິດທິກຳລັງສັດຕູ ເພື່ອແນໃສ່ທຳລາຍການປະຕິວັດປະເທດເຮົາ, ແຍກກອງທັບອອກຈາກການນຳພາຂອງພັກກອມມູນິດຫວຽດນາມ, ເຮັດໃຫ້ກອງທັບບໍ່ເປັນເຄື່ອງມືກຳລັງຮຸນແຮງອັນແຫຼມຄົມ, ເປັນກຳລັງການເມືອງທີ່ໄວ້ວາງໃຈໄດ້ຂອງພັກ ແລະ ລັດອີກຕໍ່ໄປ. ບົດຮຽນປະສົບການຈາກສະຫະພາບໂຊວຽດ ແລະ ບັນດາປະເທດເອີຣົບຕາເວັນອອກ ໃນຊຸມປີທົດສະວັດທີ 9 ສະຕະວັດທີ XX ມາເຖິງປັດຈຸບັນຍັງມີຄຸນຄ່າຢູ່ສຳລັບພວກເຮົາ.
ພະນັກງານ ສະມາຊິກພັກ ນັກຮົບກອງທັບທຸກຄົນ ຕ້ອງຮັບຮູ້ຢ່າງຄົບຖ້ວນແລະເລິກເຊິ່ງວ່າ ກອງທັບເຮົາແມ່ນກອງທັບປະຕິວັດ ກອງທັບຂອງປະຊາຊົນ, ເກີດມາຈາກປະຊາຊົນ, ສູ້ຮົບເພື່ອຮັບໃຊ້ປະຊາຊົນ, ພາຍໃຕ້ການນຳພາຢ່າງແໜ້ນແຟ້ນຂອງພັກ. ຈຸດໝາຍສູ້ຮົບຂອງກອງທັບນັ້ນແມ່ນຈຸດໝາຍ ອຸດົມການຂອງພັກກອມມູນິດຫວຽດນາມ - ເພື່ອເອກະລາດແຫ່ງຊາດ ແລະ ສັງຄົມນິຍົມ, ເພື່ອຊີວິດການເປັນຢູ່ສົມບູນພູມສຸກ ອິດສະຫຼະເສລີຂອງປະຊາຊົນ. ບົນພື້ນຖານດັ່ງກ່າວນັ້ນ, ນາຍແລະພົນທະຫານທຸກຄົນ ເຊີດຊູສະຕິລະວັງຕົວ ນ້ຳໃຈເປັນເຈົ້າການ ສຳຜັດໄວຫຼັກແຫຼມແກ່ນກ້າ ແລະ ເດັດດ່ຽວຕໍ່ສູ້ ເຮັດໃຫ້ກົນອຸບາຍຫຼ່ຽມລາຍຂອງອິດທິກຳລັງສັດຕູປະລາໄຊລົງ ທັບມ້າງອຸບາຍ “ຫັນກອງທັບເປັນໄຮ້ການເມືອງ” ຂອງພວກມັນ; ເຊີດຊູສະຕິສ່ອງໃສທຸ່ນທ່ຽງ ແກ້ໄຂກໍລະນີເຫດການສັບສົນທີ່ເກີດຂຶ້ນໃນການເຄື່ອນໄຫວພຶດຕິກຳ ໃຫ້ໄດ້ຢ່າງຖືກຕ້ອງຕາມທັດສະນະ ແນວທາງຂອງພັກ, ນະໂຍບາຍ ກົດໝາຍຂອງລັດ, ບໍ່ໃຫ້ພວກສັດຕູສວຍໃຊ້ເພື່ອທຳລາຍ.
ບັນຫາກຸນແຈເພື່ອເພີ່ມທະວີການນຳພາຂອງພັກຕໍ່ກັບກອງທັບໃນປັດຈຸບັນແມ່ນຕ້ອງກໍ່ສ້າງໃຫ້ຄະນະພັກກອງທັບປອດໃສຂາວສະອາດ, ໝັ້ນຄົງເຂັ້ມແຂງທາງດ້ານການເມືອງ ແນວຄິດ ແລະ ການຈັດຕັ້ງ, ຍົກສູງກຳລັງຄວາມສາມາດນຳພາ ແລະ ກຳລັງສູ້ຮົບຂຶ້ນໃຫ້ທຽບເທົ່າກັບຄວາມຕ້ອງການຂອງໜ້າທີ່. ພິເສດ, ຕ້ອງເດັດດ່ຽວ ໜວຍແໜ້ນໃນການປະຕິບັດມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ວ່າດ້ວຍ “ບາງບັນຫາອັນຮີບດ່ວນກ່ຽວກັບການກໍ່ສ້າງພັກໃນປັດຈຸບັນ” ໃຫ້ໄດ້ເປັນຢ່າງດີ ໂດຍຕິດແໜ້ນກັບການຮ່ຳຮຽນ ແລະ ປະຕິບັດຕາມແວ່ນແຍງຄຸນສົມບັດ ໂຮ່ຈີມິນ; ເດັດດ່ຽວຕໍ່ສູ້ຕ້ານບັນດາປະກົດການອົນລະເວງເອນອຽງ, ຫລຸດຜ່ອນຄວາມເຊື່ອຖື, ລະເມີເພີ້ຝັນ, ເສຍສະຕິລະວັງຕົວ, ເສື່ອມໂຊມປ່ຽນທາດທາງດ້ານແນວຄິດການເມືອງ ຄຸນສົມບັດ ແບບແຜນດຳລົງຊີວິດ, ສວຍໂອກາດ ເຫັນແຕ່ຜົນປະໂຫຍດສ່ວນຕົວ ລັດທິອັດຕະບຸກຄົນ, ລະເມີດກົດໝາຍຂອງລັດ ກົດລະບຽບວິໄນກອງທັບ.
ປ່ຽນແປງໃໝ່ ແລະ ເພີ່ມທະວີວຽກງານຂົນຂວາຍປະຊາຊົນ, ປະກອບສ່ວນປັບປຸງກຸ່ມກ້ອນມະຫາສາມັກຄີປວງຊົນທັງຊາດ ແລະ ສາຍພົວພັນແບບເລືອດເນື້ອ ລະຫວ່າງພັກ ກອງທັບ ແລະ ປະຊາຊົນ, ປັບປຸງ “ທ່າສະໜາມຮົບໃນໃຈປະຊາຊົນ”, ເພີ່ມຄວາມເຊື່ອຖືຂອງປະຊາຊົນຕໍ່ກັບພັກ ລັກ ແລະ ກອງທັບ. ສຸມໃສ່ຍົກສູງຄຸນນະພາບການຈັດຕັ້ງ ແລະ ການເຄື່ອນໄຫວຂອງລະບົບອົງການການເມືອງ, ພະນັກງານການເມືອງ, ເປັນຕົ້ນແມ່ນຖັນແຖວຜູ້ບັນຊາການເມືອງ ນາຍທະຫານການເມືອງໃນກອງທັບ, ປະຕິບັດບົດບາດຊີ້ນຳນຳພາ ໃຫ້ຄຳປຶກສາ ແນະນຳວຽກງານພັກ ວຽກງານການເມືອງໃຫ້ໄດ້ເປັນຢ່າງດີ.
ປະຕິບັດວຽກງານອົບຮົມສຶກສາວຽກງານການເມືອງ ແນວຄິດໃຫ້ໄດ້ເປັນຢ່າງດີ; ກໍ່ສ້າງສິ່ງແວດລ້ອມວັດທະນະທຳທີ່ສົດໃສ, ກີດກັ້ນບໍ່ໃຫ້ຄວາມຫຍໍ້ທໍ້ ໄພສັງຄົມແຊກຊືມ ກະທົບເຂົ້າພາຍໃນ; ຈັດຕັ້ງການເຄື່ອນໄຫວວັດທະນະທຳ ສິລະປະວັນນະຄະດີ ກິລາກາຍະບໍລິຫານໃຫ້ເປັນຂະບວນການຟົດຟື້ນ ເພື່ອສ້າງໃຫ້ມີການຫັນປ່ຽນຢ່າງຕັ້ງໜ້າໃນຊີວິດວັດທະນະທຳຈິດໃຈ, ຜ່ານຜ່າປະກົດການຫຍໍ້ທໍ້ທາງດ້ານຄຸນສົມບັດ ແບບແຜນດຳລົງຊີວິດ, ປະກອບສ່ວນຮັກສາຄຸນທາດອັນຈົບງາມຂອງ “ທະຫານລຸງໂຮ່”. ເສີມຂະຫຍາຍບົດບາດຂອງວຽກງານໂຄສະນະອົບຮົມ ຖະແຫຼງຂ່າວ ສື່ສິ່ງພິມ; ຕິດແໜ້ນກັບໜ້າທີ່ປະຕິວັດຂອງກອງທັບ, ຮັກສາຖືກຕ້ອງຕາມກຳນົດທິດການເມືອງ ທັດສະນະ ແນວທາງຂອງພັກ; ຕັ້ງໜ້າຕໍ່ສູ້ກັບບັນດາທັດສະນະຜິດເຂວຂອງບັນດາອິດທິກຳລັງສັດຕູ.
ໂດຍເອກອ້າງທະນົງໃຈຕໍ່ກັບມູນເຊື້ອ 70 ປີ ອັນສະຫງ່າງາມຂອງກອງທັບປະຊາຊົນຫວຽດນາມຜູ້ພິລະອາດຫານ, ພັກ ລັດ ແລະ ປະຊາຊົນເຮົາຍາມໃດກໍ່ເຊື່ອໝັ້ນ ແລະ ມຸ່ງຫວັງວ່າກອງທັບເຮົາຈະສືບຕໍ່ເສີມຂະຫຍາຍຄຸນທາດອັນຈົບງາມຂອງ “ທະຫານລຸງໂຮ່”, ອອກແຮງສູ້ຊົນ ຝຶກຝົນຫຼໍ່ຫຼອມ ກໍ່ສ້າງກອງທັບປະຊາຊົນຫວຽດນາມ “ປະຕິວັດ, ລະບຽບຫຼວງ, ຍອດຍ້ຽມ, ທັນສະໄໝເປັນແຕ່ລະກ້າວ, ປະກອບສ່ວນປະຕິບັດພາລະກິດສ້າງສາ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ ຢ່າງສຳເລັດມີໄຊ, ສົມກັບເປັນບ່ອນອີງທີ່ໄວ້ວາງໃຈໄດ້ຂອງພັກ ລັດ ແລະ ປະຊາຊົນ”./.
ຂຽນໂດຍ: ຫງວຽນຝູຈ້ອງ,
ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ