ສ້າງບັນຍາກາດໃໝ່, ກຳລັງກະຕຸກ ຊຸກຍູ້ໃໝ່, ປະຕິບັດຈຸດໝາຍ ໜ້າທີ່ ທີ່ກອງປະຊຸມໃຫຍ່ ຄັ້ງທີ XI ຂອງພັກ ວາງອອກມາ ຢ່າງສຳເລັດມີໄຊ (*)
ຕອນແລງວັນທີ 12 ມັງກອນ 2015, ພາຍຫຼັງ 8 ວັນແຫ່ງການເຮັດວຽກ ຢ່າງຕໍ່ເນື່ອງ ເຂັ້ມງວດຮີບດ່ວນ ແລະ ຮອບຄອບຖີ່ຖ້ວນ, ກອງປະຊຸມຄະນະບໍລິຫານງານ ສູນກາງພັກ ຄັ້ງທີ 10 ສະໄໝທີ XI ໄດ້ອັດລົງ ດ້ວຍຜົນສຳເລັດອັນຈົບງາມ. ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ອ່ານບົດປາໄສ ທີ່ສຳຄັນໃນວາລະອັດກອງປະຊຸມ. ວາລະສານກອມມູນິດ ຂໍເປັນກຽດໄດ້ແນະນຳ ບົດປາໄສດັ່ງກ່າວ:
“ຮຽນບັນດາສະຫາຍກຳມະການສູນກາງ,
ຮຽນບັນດາສະຫາຍທີ່ເຂົ້າຮ່ວມກອງປະຊຸມ,
ພາຍຫຼັງ 8 ວັນແຫ່ງການເຮັດວຽກຢ່າງຕໍ່ເມື່ອງ ເຂັ້ມງວດຮີບດ່ວນ ແລະ ຮອບຄອບຖີ່ຖ້ວນ, ກອງປະຊຸມຄະນະບໍລິຫານງານສູນກາງພັກຄັ້ງທີ 10 ສະໄໝທີ XI ໄດ້ສຳເລັດເນື້ອໃນລະບຽບວາລະທັງໝົດທີ່ວາງອອກມາ. ບັນດາສະຫາຍກຳມະການສູນກາງ ແລະ ບັນດາສະຫາຍທີ່ເຂົ້າຮ່ວມກອງປະຊຸມ ໄດ້ສະແດງໃຫ້ເຫັນເຖິງຄວາມຮັບຜິດຊອບສູງ, ປຶກສາສົນທະນາຢ່າງປະຊາທິປະໄຕ ກົງໄປກົງມາ, ປະກອບຄວາມຄິດເຫັນຫຼາຍຢ່າງທີ່ມີສະຕິປັນຍາ ຖືກຕ້ອງເໝາະສົມເຂົ້າໃນບັນດາລາຍງານ ໂຄງການແຜນງານ ແລະ ສຳເລັດວຽກງານທີ່ສຳຄັນອື່ນອີກ. ກົມການເມືອງສູນການພັກໄດ້ຮັບເອົາຄວາມຄິດເຫັນຫຼາຍທີ່ສຸດ ແລະ ອະທິບາຍບັນດາບັນຫາທີ່ຍັງມີຄວາມເຫັນຕ່າງກັນ; ຄະນະບໍລິຫານງານສູນກາງພັກໄດ້ເຫັນດີເປັນເອກະພາບສູງ ຮັບຮອງຜ່ານມະຕິຂອງກອງປະຊຸມ.
ຕໍ່ໄປນີ້, ຂ້າພະເຈົ້າຂໍຕາງໜ້າກົມການເມືອງສູນກາງພັກອອກຄວາມເຫັນຈຳນວນໜຶ່ງ, ສັງລວມບັນດາຜົນສຳເລັດຕົ້ນຕໍຂອງກອງປະຊຸມ ເພື່ອເປັນເອກະພາບໃນການຊີ້ນຳນຳພາການປະຕິບັດໃນເວລາທີ່ຈະມາເຖິງນີ້.
1. ຄະນະບໍລິຫານງານສູນກາງພັກໄດ້ໃຊ້ເວລາຫຼາຍ ເພື່ອປຶກສາສົນທະນາຢ່າງລະອຽດ, ໃຫ້ຄວາມຄິດເຫັນທີ່ຖືກຕ້ອງເໝາະສົມຫຼາຍປະການ ແລະ ເປັນເອກະພາບສູງ ກ່ຽວກັບບັນດາບັນຫາທີ່ຄວນສືບຕໍ່ຊີ້ນຳການປັບປຸງບູລະນະບັນດາສະບັບຮ່າງເອກະສານກອງປະຊຸມໃຫຍ່ຄັ້ງທີ XII ເພື່ອຝາກໃຫ້ກອງປະຊຸມໃຫຍ່ຄະນະພັກຂັ້ນຕ່າງໆ ສົນທະນາປະກອບຄວາມຄິດເຫັນ.
ກອງປະຊຸມຮັບຮູ້, ຕີລາຄາສູງ ແລະ ຊົມເຊີຍຄວາມມານະພະຍາຍາມຂອງບັນດາອະນຸກຳມະການ ແລະ ຄະນະຊີ້ນຳ ທີ່ໄດ້ຄົ້ນຄວ້າ, ກໍ່ສ້າງບັນດາສະບັບຮ່າງບົດລາຍງານ ແລະ ໃບສະເໜີຢ່າງລະອຽດຮອບຄອບ, ເຂັ້ມງວດ, ມີຄວາມຮັບຜິດຊອບ.
ສູນກາງເຫັນດີໂດຍພື້ນຖານກັບບັນດາເນື້ອໃນ, ບັນຫາທີ່ຂຽນໃນສະບັບຮ່າງບົດລາຍງານ, ໃນໃບສະເໜີ ແລະ ໃຫ້ທັດສະນະວ່າ, ບັນດາສະບັບຮ່າງເອກະສານໄດ້ກັ່ນຕອງ, ສ່ອງແສງຖືກຕ້ອງເຖິງໝາກຜົນແຫ່ງການສະຫລຸບສັງລວມບາງບັນຫາທິດສະດີ - ພຶດຕິກຳ ຜ່ານ 30 ປີແຫ່ງການປ່ຽນແປງໃໝ່ ແລະ ການສຳຫຼວດທົບທວນ, ຕີລາຄາ 5 ປີແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ຕິດແທດກັບພາກຕົວຈິງ ແລະ ມີການຄົ້ນເຜີຍ ມີຂໍ້ສະເໜີແນະໃໝ່ຫຼາຍປະການ.
ພ້ອມກັນນັ້ນ, ສູນກາງກໍ່ປະກອບສ່ວນ, ເຈາະຈິ້ມ, ໃຫ້ຄວາມເຫັນທີ່ສຳຄັນຫຼາຍຢ່າງ, ເປັນຕັ້ນແມ່ນໃນບັນດາບັນຫາໃຫຍ່ ແລະ ບັນດາບັນຫາທີ່ຍັງມີຄວາມຄິດເຫັນແຕກຕ່າງກັນ.
ສູນກາງຮຽກຮ້ອງໃຫ້ທຸກຄົນຕ້ອງເຫັນແຈ້ງຄວາມໝາຍ, ຄວາມສຳຄັນຂອງກອງປະຊຸມໃຫຍ່ຄັ້ງທີ XII ຂອງພັກ - ຊຶ່ງແມ່ນກອງປະຊຸມທີ່ດຳເນີນໄປໃນຈຸດເວລາທີ່ທົ່ວພັກ ທົ່ວປວງຊົນ ແລະ ທົ່ວກອງທັບເຮົາປະຕິບັດຢ່າງສຳເລັດມີໄຊ ຫຼາຍແຜນນະໂຍບາຍ ຈຸດໝາຍ ແລະ ໜ້າທີ່ທີ່ໄດ້ກຳນົດໃນມະຕິກອງປະຊຸມໃຫຍ່ຄັ້ງທີ XI ຂອງພັກ; ຜ່ານ 30 ປີແຫ່ງການດຳເນີນການປ່ຽນແປງໃໝ່, 5 ປີແຫ່ງການປະຕິບັດໂຄງການການເມືອງກໍ່ສ້າງປະເທດຊາດໃນສະໄໝຂ້າມຜ່ານຂຶ້ນສູ່ສັງຄົມນິຍົມ (ສະບັບເພີ່ມເຕີມ, ຂະຫຍາຍຕື່ມປີ 2011) ແລະ ແຜນຍຸດທະສາດພັດທະນາເສດຖະກິດ - ສັງຄົມ 2011 - 2020, ສອງປີແຫ່ງການປະຕິບັດລັດຖະທຳມະນູນປີ 2013.
ປະເທດເຮົາມີໂອກາດດີ ມີຄວາມສະດວກອຳນວຍຫຼາຍປະການ, ແຕ່ກໍ່ຕ້ອງຢືນຢູ່ຕໍ່ໜ້າຄວາມຫຍຸ້ງຍາກ ສິ່ງທ້າທາຍບໍ່ໜ້ອຍ, ຮຽກຮ້ອງໃຫ້ພວກເຮົາຕ້ອງສືບຕໍ່ເພີ່ມທະວີວຽກງານກໍ່ສ້າງພັກ ແລະ ລະບົບການເມືອງຍິ່ງກວ່າອີກ, ເສີມຂະຫຍາຍກຳລັງແຮງຂອງປວງຊົນທັງຊາດ, ຍູ້ແຮງການປ່ຽນແປງໃໝ່ຢ່າງຮອບດ້ານ ແລະ ຄົບຊຸດກວ່າອີກ, ປົກປັກຮັກສາປະເທດຊາດສັງຄົມນິຍົມໄວ້ຢ່າງໝັ້ນຄົງ, ຮັກສາສິ່ງແວດລ້ອມສັນຕິພາບ ສະຖຽນລະພາບ, ກໍ່ສ້າງຮາກຖານເພື່ອເຮັດໃຫ້ປະເທດເຮົາກາຍເປັນປະເທດອຸດສາຫະກຳໂດຍພື້ນຖານໂດຍໄວ. ຕ້ອງກະກຽມຢ່າງຮອບຄອບຖີ່ຖ້ວນທາງດ້ານເອກະສານ ແລະ ບຸກຄະລາກອນ ເພື່ອໃຫ້ກອງປະຊຸມໃຫຍ່ຄັ້ງທີ XII ໄດ້ຮັບຜົນສຳເລັດຢ່າງຈົບງາມ, ໃຫ້ເປັນກອງປະຊຸມໃຫຍ່ແຫ່ງຄວາມສາມັກຄີ ປະຊາທີປະໄຕ ລະບຽບວິໄນ ແລະ ການປ່ຽນແປງໃໝ່.
ໃນການຕີລາຄາກ່ຽວກັບຜົນສຳເລັດຂອງ 30 ປີແຫ່ງການປ່ຽນແປງໃໝ່ (1986 - 2016) ກໍ່ຄືຂອງ 5 ປີແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ (2011 - 2015) ນັ້ນ, ສູນກາງຮຽກຮ້ອງໃຫ້ຕ້ອງເຮັດດ້ວຍຈິດໃຈພາວະວິໄສ ຄ່ຽມຄົມຢ່າງແທ້ຈິງ, ສັງເກດເບິ່ງຄວາມຈິງໂດຍກົງ, ບໍ່ດ້ານດຽວ, ບໍ່ຊ້າຍຈັດຂວາໂພດ.
ເຫັນແຈ້ງວ່າ, 30 ປີແຫ່ງການປ່ຽນແປງໃໝ່ແມ່ນໄລຍະປະຫວັດສາດອັນສຳຄັນໃນຂະບວນວິວັດການພັດທະນາຂອງປະເທດຊາດ, ຂີດໝາຍຄວາມເຕີບໂຕທາງດ້ານຕ່າງໆທຸກດ້ານ ຂອງພັກ, ລັດ ແລະ ປະຊາຊົນເຮົາ. ການປ່ຽນແປງໃໝ່ມີລະດັບປະຫວັດສາດ ແລະ ຄວາມໝາຍປະຕິວັດອັນໃຫຍ່ຫຼວງ, ແມ່ນຂະບວນວີວັດການດັດປ່ຽນຢ່າງເລິກເຊິ່ງ ຮອບດ້ານ ເຖິງຖອງ, ແມ່ນພາລະກິດການປະຕິວັດຂອງທົ່ວພັກ ທົ່ວປວງຊົນເຮົາ.
ເບິ່ງລວມ, ພາຍຫຼັງ 30 ປີແຫ່ງການປ່ຽນແປງໃໝ່, ປະເທດເຮົາບັນລຸໄດ້ບັນດາຜົນສຳເລັດອັນໃຫຍ່ຫຼວງ, ມີຄວາມໝາຍປະຫວັດສາດ, ສ້າງປະຖົມປັດໃຈອັນສຳຄັນເພື່ອໃຫ້ປະເທດເຮົາສືບຕໍ່ປ່ຽນແປງໃໝ່ ແລະ ພັດທະນາຢ່າງແຂງແຮງໃນໄລຍະເວລາຕໍ່ໄປ. ພ້ອມກັນນັ້ນ, ກໍ່ຕ້ອງເຫັນໄດ້ວ່າ ຍັງມີຫຼາຍບັນຫາໃຫຍ່ ສັບສົນ, ມີຂໍ້ຈຳກັດ ສິ່ງຄົງຄ້າງຫຼາຍຢ່າງທີ່ຕ້ອງສືບຕໍ່ຄົ້ນຄວ້າ, ສຸມໃສ່ແກ້ໄຂເພື່ອໃຫ້ປະເທດເຮົາພັດທະນາຢ່າງໄວ ແລະ ໝັ້ນທ່ຽງກວ່າອີກ.
ໃນຫ້າປີທີ່ຫາກໍ່ຜ່ານມານີ້, ສະພາບການໂລກແລະສະພາບການຫວຽດນາມໃນສະໄໝກອງປະຊຸມໃຫຍ່ຄັ້ງທີ XI ໄດ້ມີການຜັນປ່ຽນໃໝ່, ທົ່ວພັກ ທົ່ວປວງຊົນ ແລະ ທົ່ວກອງທັບເຮົາໄດ້ຕັ້ງໜ້າພະຍາຍາມສູ້ຊົນຜ່ານຜ່າຄວາມຫຍຸ້ງຍາກ ສິ່ງທ້າທາຍຫຼາຍຢ່າງ, ບັນລຸໄດ້ບັນດາຜົນສຳເລັດອັນສຳຄັນ; ແຕ່ກໍ່ຍັງມີຈຸດອ່ອນ ຂໍ້ຈຳກັດຫຼາຍຢ່າງ.
ບົນພື້ນຖານຕີລາຄາສະພາບການ ແລະ ບັນດາຜົນສຳເລັດທີ່ບັນລຸໄດ້ໃນເວລາທີ່ຜ່ານມາຢ່າງພາວະວິໄສ, ຄາດຄະເນສະພາບການພາຍປະເທດ ແລະ ໃນໂລກໃນເວລາທີ່ຈະມາເຖິງຢ່າງຖືກຕ້ອງ, ພວກເຮົາຈະມີເງື່ອນໄຂກຳນົດທິດທາງ ຈຸດໝາຍ ໜ້າທີ່ພັດທະນາປະເທດໃນສະໄໝ 2016 – 2020 ຢ່າງຖືກຕ້ອງ, ນັບທັງຈຸດໝາຍສັງລວມ ແລະ ບັນດາໜ້າທີ່ອັນລະອຽດ.
ສືບຕໍ່ກຳນົດບັນດາແຜນນະໂຍບາຍ, ວິທີແກ້ເພື່ອຍູ້ແຮງການຫັນເປັນອຸສາຫະກຳ ທັນສະໄໝ, ປ່ຽນແປງໃໝ່ຕົວແບບເຕີບໂຕເສດຖະກິດ ແລະ ຈັດວາງໂຄງປະກອບເສດຖະກິດຄືນໃໝ່; ປັບປຸງບູລະນະລະບຽບກົດໝາຍ, ພັດທະນາເສດຖະກິດຕະຫຼາດກຳນົດທິດສັງຄົມນິຍົມ; ພັດທະນາວັດທະນະທຳ, ກໍ່ສ້າງຜູ້ຄົນ; ປ່ຽນແປງໃໝ່ການຄຸ້ມຄອງພັດທະນະສັງຄົມ, ປະຕິບັດຄວາມກ້າວໜ້າ ແລະຍຸດຕິທຳສັງຄົມ; ເພີ່ມທະວີການປ້ອງກັນຊາດ ປ້ອງກັນຄວາມສະຫງົບ, ປົກປັກຮັກສາປະເທດຊາດຫວຽດນາມສັງຄົມນິຍົມ ຢ່າງໝັ້ນຄົງ; ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ, ເສີມຂະຫຍາຍປະຊາທິປະໄຕ, ປັບປຸງບູລະນະລັດແຫ່ງອຳນາດກົດໝາຍສັງຄົມນິຍົມ; ກໍ່ສ້າງໃຫ້ພັກນັບມື້ນັບປອດໃສຂາວສະອາດ ໝັ້ນຄົງເຂັ້ມແຂງ...
ພ້ອມກັນນັ້ນ, ຕ້ອງສືບຕໍ່ຕິດຕາມໃກ້ຊິດກັບພາກພຶດຕິກຳ, ລົງເລິກຄົ້ນຄວ້າ ສະຫລຸບສັງລວມ ປຶກສາສົນທະນາ, ສ້າງໃຫ້ມີຄວາມເປັນເອກະພາບສູງກວ່າອີກ ກ່ຽວກັບບາງບັນຫາໃໝ່ແລະຍາກ ຄື: ຄວາມສຳນຶກແລະຄຸນລັກສະນະພິເສດ ຂອງເສດຖະກິດຕະຫຼາດກຳນົດທິດສັງຄົມນິຍົມ ສອດຄ່ອງກັບລະດັບຂະຫຍາຍຕົວຂອງເສດຖະກິດປະເທດເຮົາໃນປັດຈຸບັນ; ຕົວແບບການເຕີບໂຕເສດຖະກິດ ແລະ ໂຄງປະກອບເສດຖະກິດທີ່ຕ້ອງກໍ່ສ້າງຂຶ້ນ, ຫັນໄປສູ່; ມາດຕະຖານປະເທດອຸດສາຫະກຳຕາມທິດທັນສະໄໝ ສອດຄ່ອງກັບບັນທັດຖານສາກົນ ແລະ ເງື່ອນໄຂຫວຽດນາມ; ຈຸດໝາຍ, ລະດັບຄາດໝາຍອັນລະອຽດ ແລະ ໜ້າທີ່ ວິທີແກ້ໄຂຕົ້ນຕໍ ກ່ຽວກັບເສດຖະກິດ - ສັງຄົມ ທີ່ຕ້ອງຜັນຂະຫຍາຍປະຕິບັດ ໃນສະໄໝປະຈຳການຂອງຄະນະບໍລິຫານງານສູນກາງພັກຊຸດທີ XII, ພິເສດແມ່ນໃນການຄຸ້ມຄອງກວດກາໜີ້ສິນຫຼວງ, ແກ້ໄຂໜີ້ສິນເຮິຮ້າຍ, ຮັກສາສະຖຽນລະພາບຂອງເສດຖະກິດມະຫາພາກ, ປົວແປງສິ່ງແວດລ້ອມແຫ່ງການທຸລະກິດ, ຍົກສູງປະສິດທິຜົນ ແລະ ກຳລັງແກ່ງແຍ້ງຂອງພື້ນຖານເສດຖະກິດ; ຈັດວາງຄືນໃໝ່ໂຄງປະກອບວິສາຫະກິດແຫ່ງລັດ, ລະບົບບັນດາການຈັດຕັ້ງສິນເຊື່ອ ແລະ ການລົງທຶນພາກລັດ; ຈັດວາງຄືນໃໝ່ໂຄງປະກອບກະສິກຳ ຕິດກັບການກໍ່ສ້າງຊົນນະບົດໃໝ່; ພັດທະນາເສດຖະກິດຮ່ວມມື, ເສດຖະກິດພູມພາກ ແລະ ບັນດາເຂດການບໍລິຫານ - ເສດຖະກິດພິເສດ; ພັດທະນາຕົວເມືອງ ແລະ ກໍ່ສ້າງລະບົບໂຄງສ້າງພື້ນຖານທີ່ຄົບຊຸດ; ກໍ່ສ້າງລະບົບຄຸນຄ່າວັດທະນະທຳແລະຄົນຫວຽດນາມ; ຮັບຮູ້ ແລະ ເສີມຂະຫຍາຍບັນດາກຳລັງຂັບເຄື່ອນເພື່ອສ້າງສາ ແລະ ປົກປັກຮັກສາປະເທດຊາດ.
ສືບຕໍ່ລົງເລິກຄົ້ນຄວ້າໄຈ້ແຍກ ທຳຄວາມກະຈ່າງແຈ້ງກວ່າອີກ ກ່ຽວກັບຂໍ້ສະເໜີແນະທີ່ພົວພັນກັບບັນຫາ “ປ່ຽນແປງໃໝ່ຢ່າງຄົບຊຸດກວ່າອີກ ລະຫວ່າງການເມືອງ ແລະ ເສດຖະກິດ”. ຕ້ອງກຳແໜ້ນແລະ ຢືນຢັນວ່າ: ປ່ຽນແປງໃໝ່ການເມືອງບໍ່ແມ່ນເຮັດໃຫ້ລະບອບການເມືອງປ່ຽນແປງໄປ, ບໍ່ປ່ຽນແປງທາດແທ້ຂອງພັກເຮົາ ລັດເຮົາ, ຫາກແມ່ນປ່ຽນແປງໃໝ່ກົນໄກ ນະໂຍບາຍ ການຈັດຕັ້ງກົງຈັກ, ປັບປຸງບູລະນະຍົກສູງຄຸນນະພາບຖັນແຖວພະນັກງານ, ປ່ຽນແປງໃໝ່ແບບວິທີປະຕິບັດງານ, ແບບແຜນເຮັດວຽກ, ປະຕິຮູບການບໍລິຫານ, ຕ້ານການສໍ້ລາດບັງຫຼວງ ຄວາມຟຸມເຟືອຍ, ຕ້ານພະຍາດອາດຍາສິດທີ່ກໍ່ຄວາມລຳຄານຫຍຸ້ງຍາກໃຫ້ປະຊາຊົນ, ຍົກສູງຄວາມສັກສິດ ແລະ ປະສິດທິຜົນຂອງບັນດາອົງການໃນລະບົບການເມືອງ, ຕອບສະໜອງຄວາມຕ້ອງການພັດທະນາເສດຖະກິດ - ສັງຄົມ, ເພີ່ມທະວີການປ້ອງກັນຊາດ ປ້ອງກັນຄວາມສະຫງົບ, ຮັກສາເອກະລາດ ອຳນາດອະທິປະໄຕຂອງຊາດຢ່າງໝັ້ນຄົງ.
ສູນກາງເນັ້ນໜັກເປັນພິເສດວ່າຕ້ອງຍູ້ແຮງວຽກງານກໍ່ສ້າງພັກກວ່າອີກ, ເປັນຕົ້ນແມ່ນ ສືບຕໍ່ປະຕິບັດມະຕິກອງປະຊຸມສູນກາງພັກຄັ້ງທີ 4 ຢ່າງເດັດດ່ຽວໜຽວແໜ້ນກວ່າອີກ ເພື່ອກໍ່ສ້າງພັກ, ກີດກັ້ນແລະຍູ້ຖອຍ ສະພາບຄວາມເສື່ອນໄຊມທາງດ້ານແນວຄິດການເມືອງ ຄຸນສົມບັດສິນທຳໃນພັກ ແລະ ໃນສັງຄົມ; ຮັກສາ ຢຶດໝັ້ນທາດແທ້ປະຕິວັດ ແລະ ບົດບາດນຳໜ້າເປັນແບບຢ່າງຂອງພັກ, ຂອງຖັນແຖວພະນັກງານ ສະມາຊິກພັກ; ປະຕິບັດບັນດາຫຼັກການການຈັດຕັ້ງກໍ່ສ້າງພັກ ຢ່າງເຂັ້ມງວດ; ເພີ່ມທະວີສາຍພົວພັນແບບເລືອດເນື້ອລະຫວ່າງພັກ ກັບປະຊາຊົນ, ປັບປຸງຄວາມເຊື່ອຖືຂອງປະຊາຊົນຕໍ່ກັບພັກ ແລະ ລັດ.
ປ່ຽນແປງໃໝ່ ຍົກສູງຄຸນນະພາບວຽກງານກໍ່ສ້າງ ປະກາດໃຊ້ ແລະ ຈັດຕັ້ງປະຕິບັດ ບັນດາມະຕິຂອງພັກ, ກົດໝາຍ ນະໂຍບາຍຂອງລັດ. ເພີ່ມທະວີວຽກງານການຈັດຕັ້ງ ແລະ ພະນັກງານ; ກໍ່ສ້າງການຈັດຕັ້ງຮາກຖານພັກໃຫ້ປອດໃສຂາວສະອາດ ໝັ້ນຄົງເຂັ້ມແຂງ; ເສີມຂະຫຍາຍລັກສະນະນຳໜ້າ ເປັນແບບຢ່າງ ໃກ້ຊິດຕິດແທດກັບປະຊາຊົນ ຂອງພະນັກງານ ສະມາຊິກພັກ; ມີກົນໄກ ນະໂຍບາຍເພື່ອຄົ້ນເຜີຍ ດຶງດູດ ນຳໃຊ້ຜູ້ເກັ່ງກ້າສາມາດ; ແກ້ໄຂປະຕິບັດວິໄນຢ່າງເຂັ້ມງວດຕໍ່ກັບການລະເມີດກົດລະບຽບພັກ. ຍົກສູງປະສິດທິຜົນວຽກງານແນວຄິດ ວຽກງານໂຄສະນາອົບຮົມ, ສ້າງໃຫ້ມີຄວາມເປັນເອກະພາບສູງຢູ່ໃນພັກ, ຄວາມເຫັນດີເຫັນພ້ອມໃນສັງຄົມ; ປະຕິຮູບການບໍລິຫານໃນພັກ; ປ່ຽນແປງໃໝ່ແບບວິທີການນຳພາຂອງພັກ.
ຄະນະບໍລິຫານງານສູນກາງມອບໃຫ້ກົມການເມືອງສູນກາງຊີ້ນຳບັນດາອະນຸກຳມະການ ສົມທົບກັບຄະນະຊີ້ນຳການສະຫລຸບສັງລວມ 30 ປີແຫ່ງການປ່ຽນແປງໃໝ່ ເພື່ອຈັດຕັ້ງການເກັບກຳຮັບເອົາຄວາມຄິດເຫັນຂອງສູນກາງຢ່າງຮີບດ່ວນ ເຂັ້ມງວດ, ສືບຕໍ່ປັບປຸງບູລະນະບັນດາເອກະສານສະບັບຮ່າງ ເພື່ອຝາກໃຫ້ກອງປະຊຸມໃຫຍ່ຄະນະພັກຂັ້ນຕ່າງໆ ສົນທະນາປະກອບຄວາມຄິດເຫັນ; ຈັດຕັ້ງເປັນຢ່າງດີການສັງລວມ, ຮັບເອົາຄວາມຄິດເຫັນຂອງກອງປະຊຸມໃຫຍ່ຄະນະພັກຂັ້ນຕ່າງໆ ເພື່ອບູລະນະ ຍົກສູງຄຸນນະພາບຂອງບັນດາສະບັບຮ່າງເອກະສານ, ຫຼັງຈາກນັ້ນກໍ່ຂໍຄວາມຄິດເຫັນຂອງປະຊາຊົນ ກ່ອນເມື່ອຍື່ນສະເໜີໃຫ້ກອງປະຊຸມໃຫຍ່ຄັ້ງທີ XII ຂອງພັກ. ສະເໜີໃຫ້ບັນດາສະຫາຍກຳມະການສູນກາງ ແລະ ບັນດາສະຫາຍທີ່ເຂັ້າຮ່ວມກອງປະຊຸມ ຈົງສືບຕໍ່ຄົ້ນຄິດ ແລະ ມີການປະກອບສ່ວນແທດຈິງ, ຍົກສູງຄຸນນະພາບຂອງບັນດາສະບັບຮ່າງ, ພ້ອມກັນນັ້ນ ຊີ້ນຳການຈັດຕັ້ງກອງປະຊຸມໃຫຍ່ຄະນະພັກຂັ້ນຕ່າງໆ ໃຫ້ໄດ້ເປັນຢ່າງດີ.
2. ຄະນະບໍລິຫານງານສູນກາງພັກໄດ້ປຶກສາສົນທະນາຢ່າງຟົດຟື້ນ, ປະກອບຫຼາຍຄວາມເຫັນທີ່ສຳຄັນ ເພື່ອໃຫ້ກົມການເມືອງສູນກາງສືບຕໍ່ຊີ້ນຳການຮັບເອົາຄວາມຄິດເຫັນ ແລະ ບູລະນະບັນດາລາຍງານ, ໂຄງການ ເພື່ອສະເໜີທີ່ກອງປະຊຸມ.
ກ່ຽວກັບໂຄງການຫລຸດຜ່ອນການບັນຈຸບຸກຄະລາກອນໃຫ້ຮັດກຸມ ແລະ ຈັດວາງຄືນໃໝ່ໂຄງປະກອບຖັນແຖວພະນັກງານ ຂ້າລັດຖະການນັ້ນ, ສຸນການເນັ້ນວ່າ: ຕ້ອງຊາບຊືມ, ປະຕິບັດຖືກຕ້ອງຕາມຈຸດໝາຍ ທັດສະນະ ແນວຄິດຊີ້ນຳ ແລະ ໜ້າທີ່ ວິທີແກ້ໄຂ ຊຶ່ງກອງປະຊຸມໃຫຍ່ຄັ້ງທີ XI ແລະ ບົດສະຫລຸບຂອງກອງປະຊຸມສູນກາງຄັ້ງທີ 7 ສະໄໝທີ XI ໄດ້ກຳນົດໄວ້. ສູ້ຊົນສ້າງໃຫ້ມີການຫັນປ່ຽນຢ່າງຈະແຈ້ງໃນການຫລຸດຜ່ອນການບັນຈຸບຸກຄະລາກອນ ແລະ ການຈັດວາງຄືນໃໝ່ໂຄງປະກອບຖັນແຖວພະນັກງານ ຂ້າລັດຖະການ; ດຶງດູດຜູ້ມີຄຸນສົມບັດ ມີຄວາມເກັ່ງກ້າສາມາດ ໃຫ້ເຂົ້າເຮັດວຽກໃນບັນດາສຳນັກງານ ອົງການ ແລະ ກົມກອງຂອງພັກ, ລັດ ແລະ ບັນດາການຈັດຕັ້ງການເມືອງ - ສັງຄົມ.
ຮັບປະກັນການນຳພາ ແລະ ການຄຸ້ມຄອງເປັນເອກະພາບຂອງພັກ ຕໍ່ກັບການບັນຈຸບຸກຄະລະກອນຂອງລະບົບການເມືອງມັງໝົດ; ເສີມຂະຫຍາຍບົດບາດຕິດຕາມກວດກາຂອງບັນດາອົງການໂດຍປະຊາຊົນເລືອກຕັ້ງ, ຂອງແນວໂຮມປະເທດຊາດຫວຽດນາມ ແລະ ຂອງປະຊາຊົນ ໃນວິວັດການປະຕິບັດ. ເປັນເອກະພາບທາງດ້ານຄວາມຮັບຮູ້ ແລະ ການກະທຳ ໃນບັນດາສຳນັກງານ ອົງການ ກົມກອງ ຫົວໜ່ວຍພາລະກິດສາທາລະນະ ທີ່ຂຶ້ນກັບລະບົບການເມືອງ. ມີກົນໄກ ນະໂຍບາຍບຸກທະລຸເພື່ອປ່ຽນແປງໃໝ່ ຍົກສູງຄຸນນະພາບການຈັດຕັ້ງ ແລະ ການເຄື່ອນໄຫວຂອງບັນດາຫົວໜ່ວຍພາລະກິດໃນຂົງເຂດບໍລິການສາທາລະນະ.
ຜັນຂະຫຍາຍການຫລຸດຜ່ອນການບັນຈຸບຸກຄະລະກອນຢ່າງຄົບຊຸດ ຕິດກັບການປະຕິຮູບການບໍລິຫານ, ປະຕິຮູບລະບອບການງານ, ຂ້າລັດຖະການ, ເປັນຕົ້ນແມ່ນກຳນົດທີ່ຕັ້ງວຽກງານ, ໂຄງປະກອບພະນັກງານ ຂ້າລັດຖະການທີ່ສົມເຫດສົມຜົນ, ດ້ວຍຈຳນວນເໝາະສົມ. ອັດຕາສ່ວນຫລຸດຜ່ອນການບັນຈຸບຸກຄະລາກອນຕ້ອງໄດ້ກຳນົດຢ່າງລະອຽດ ຕາມແຕ່ລະສຳນັກງານ ອົງການ ກົມກອງ, ສອດຄ່ອງກັບພາລະບົດບາດ ໜ້າທີ່ ແລະ ປະລິມານ ຄຸນນະພາບຕົວຈິງ ຂອງຖັນແຖວພະນັກງານ ຂ້າລັດຖະການ.
ເດັດຂາດຕ້ອງຫລຸດຜ່ອນການບັນຈຸບຸກຄະລາກອນໃຫ້ຮັດກຸມ, ບໍ່ເພີ່ມການບັນຈຸ, ບໍ່ສ້າງຕັ້ງການຈັດຕັ້ງໃໝ່ຂຶ້ນ (ຍົກເວັ້ນກໍລະນີພິເສດ), ແຕ່ຕ້ອງຮັບປະກັນສຳເລັດໜ້າທີ່, ບໍ່ສົ່ງຜົນກະທົບເຖິງການເຄື່ອນໄຫວຂອງບັນດາສຳນັກງານ ການຈັດຕັ້ງ ແລະ ກົມກອງ.
ເຊີດຊູຄວາມຮັບຜິດຊອບຂອງຜູ້ເປັນຫົວໜ້າ ໃນການຈັດວາງຄືນໃໝ່ຖັນແຖວພະນັກງານ ຂ້າລັດຖະການ, ຮັບປະກັນໂຄງປະກອບທີ່ສົມເຫດສົມຜົນທາງດ້ານໄວອາຍຸ, ເພດ, ເຜົ່າ.
ພ້ອມກັນນັ້ນ, ຜັນຂະຫຍາຍປະຕິບັດຢ່າງຄົບຊຸດບັນດາໜ້າທີ່ ແລະ ວິທີແກ້ໄຂ ກ່ຽວກັບເພີ່ມທະວີວຽກງານອົບຮົມສຶກສາການເມືອງ ແນວຄິດ; ປ່ຽນແປງໃໝ່ ຍົກສູງປະສິດທິຜົນວຽກງານຄຸ້ມຄອງການບັນຈຸພະນັກງານ ຂ້າລັດຖະການຕາມທິດລວມສູນ ເປັນເອກະພາບ; ຍູ້ແຮງການສຳຫຼວດກວດຄືນ, ຈັດວາງສັບຊ້ອນ, ປັບປຸງບູລະນະການຈັດຕັ້ງກົງຈັກ ແລະ ຫລຸດຜ່ອນການບັນຈຸໃຫ້ຮັດກຸມ ຢູ່ບັນດາສຳນັກງານ ອົງການ ກົມກອງໃນທົ່ວລະບົບການເມືອງ; ກໍ່ສ້າງໂຄງປະກອບຖັນແຖວພະນັກງານ ຂ້າລັດຖະການ ຕາມຊັ້ນຕຳແໜ່ງອາຊີບ, ທີ່ຕັ້ງວຽກງານ, ສອດຄ່ອງກັບພາລະບົດບາດ ໜ້າທີ່...
ກ່ຽວກັບໂຄງການພັດທະນາ ແລະ ຄຸ້ມຄອງສື່ສິ່ງພິມ, ກອງປະຊຸມຢືນຢັນວ່າ: ສື່ສິ່ງພິມແມ່ນພາຫະນະສື່ຂ່າວ ເຄື່ອງມືໂຄສະນາການ ອາວຸດແນວຄິດທີ່ສຳຄັນ ຂອງພັກ ແລະ ລັດ, ເປັນເວທີປາໄສຂອງປະຊາຊົນ, ພາຍໃຕ້ການນຳພາຂອງພັກ ການຄຸ້ມຄອງຂອງລັດ, ເຄື່ອນໄຫວໃນຂອບລັດຖະທຳມະນູນ ແລະ ກົດໝາຍ. ໃນເວລາທີ່ຜ່ານມາ, ສື່ສິ່ງພິມຂອງປະເທດເຮົາໄດ້ຂະຫຍາຍຕົວຢ່າງໄວວາ ແລະ ໄດ້ມີສ່ວນປະກອບອັນຕັ້ງໜ້າ ສຳຄັນເຂົ້າໃນພາລະກິດປ່ຽນແປງໃໝ່, ໃນການສ້າງສາ ແລະ ປົກປັກຮັກສາປະເທດຊາດ. ແຕ່, ການເຄື່ອນໄຫວຂອງສື່ສິ່ງພິມ ກໍ່ຄືວຽກງານຄຸ້ມຄອງສື່ສິ່ງພິມ ກໍ່ຍັງມີຂໍ້ຂາດຕົກບົກພ່ອງ, ຂໍ້ຈຳກັດຫຼາຍຢ່າງ.
ບົນພື້ນຖານການໄຈ້ແຍກ ຕີລາຄາຢ່າງເລິກເຊິ່ງ ກ່ຽວກັບສະພາບການຂະຫຍາຍຕົວ ແລະ ການຄຸ້ມຄອງສື່ສິ່ງພິມ ທີ່ມີຜົນສຳເລັດ, ຈຸດອ່ອນ, ຂໍ້ຈຳກັດ ແລະ ສາເຫດອັນລະອຽດ; ເຫັນແຈ້ງທ່າອຽງແຫ່ງການພັດທະນາການສື່ຂ່າວ ໂທລະຄົມມະນາຄົມໃນໂລກ, ສູນກາງຢືນຢັນຄວາມຕ້ອງການຕ້ອງປະກາດໃຊ້ໂດຍໄວ ແລະ ຈັດຕັ້ງປະຕິບັດ ແຜນແມ່ບົດການພັດທະນາ ແລະ ຄຸ້ມຄອງສື່ສິ່ງພິມຮອດປີ 2025.
ໃນຂະບວນວິວັດການກໍ່ສ້າງ ແລະ ປະຕິບັດແຜນແມ່ບົດ, ຕ້ອງຊາບຊືມທັດສະນະ ພັດທະນາໄປຄຽງຄູ່ກັບຄຸ້ມຄອງໃຫ້ດີ. ພັດທະນາສື່ສິ່ງພິມຕາມທິດປະຕິວັດ, ວິຊາອາຊີບຊຳນິຊຳນານ, ທັນສະໄໝ, ຄຸນນະພາບ, ມີປະສິດທິຜົນ, ຕອບສະໜອງໄດ້ກັບຄວາມຕ້ອງການສື່ຂ່າວຂອງປະຊາຊົນ, ໂຄສະນາເຜີຍແຜ່ແນວທາງຂອງພັກ, ນະໂຍບາຍ ກົດໝາຍຂອງລັດ, ເພື່ອສາມັກຄີ ເຕົ້າໂຮມມະຫາຊົນ, ສ້າງຄວາມເຫັນດີເຫັນພ້ອມໃນສັງຄົມ, ກຳນົດທິດແນວຄິດ ແລະ ສຸນທະລີຍະພາບ, ປະກອບສ່ວນຍົກສູງປັນຍາຄວາມຮູ້ຂອງປະຊາຊົນ, ພັດທະນາວັດທະນະທຳ ແລະ ຊັບພະຍາກອນມະນຸດຫວຽດນາມ.
ລັດມີກົນໄກ ນະໂຍບາຍການເງິນ, ກໍ່ສ້າງຖັນແຖວພະນັກງານ ເພື່ອສ້າງເງື່ອນໄຂອັນຈຳເປັນໃຫ້ສື່ສິ່ງພິມສຳເລັດໜ້າທີ່ການເມືອງ, ພ້ອມກັນນັ້ນ ກໍ່ສົ່ງເສີມບັນດາອົງການສື່ສິ່ງພິມ ເພີ່ມທະວີການລະດົມບັນດາແຫຼ່ງພະລັງພັດທະນາ ບົນພື້ນຖານຮັບປະກັນຖືກຕ້ອງຕາມຈຸດປະສົງຄະຕິທຳ, ບໍ່ແລ່ນຫາຜົນກຳໄລດຽວລ້ວນ, ບໍ່ໃຫ້ເອກະຊົນກຳມະສິດສື່ສິ່ງພິມ, ບໍ່ໃຫ້ກຸ່ມຜົນປະໂຫຍດພາກສ່ວນຄອບງຳສື່ສິ່ງພິມ. ພັດທະນາສື່ສິ່ງພິມສອດຄ່ອງກັບທ່າອຽງພັດທະນາວິທະຍາສາດ - ເຕັກໂນໂລຢີ ແລະ ທ່າອຽງຂະຫຍາຍຕົວຂອງການສື່ຂ່າວ ໂທລະຄົມມະນາຄົມໃນໂລກ. ສົມທົບຢ່າງແໜ້ນແຟ້ນບັນດາຮູບແບບສື່ສິ່ງພິມ, ພ້ອມກັນນັ້ນ ກໍ່ເສີມຂະຫຍາຍທ່າດີຂອງບັນດາພາຫະນະ, ການບໍລິການໃນເຄືອຂ່າຍ ອິນເຕີເນັດ ແນໃສ່ສະໜອງຂ່າວເປັນທາງການ ທີ່ມີການກຳນົດທິດ, ເພີ່ມຄວາມປົກຫຸ້ມໃນປະເທດ ແລະ ສາກົນ; ຈຳກັດຜົນກະທົບຫຍໍ້ທໍ້ ແລະ ຮັບປະກັນຄວາມປອດໄພ ຄວາມສະຫງົບຂອງການສື່ຂ່າວຕາມເຄືອຂ່າຍ.
ຈຸດໝາຍຂອງແຜນແມ່ບົດນີ້ແມ່ນ ຈັດວາງສັບຊ້ອນລະບົບສື່ສິ່ງພິມຕິດແໜ້ນກັບປ່ຽນແປງໃໝ່ຕົວແບບ, ຍົກສູງຄວາມສັກສິດ ປະສິດທິຜົນການນຳພາ ຄຸ້ມຄອງສື່ສິ່ງພິມ ເພື່ອພັດທະນາລະບົບສື່ສິ່ງພິມຕາມທິດຄຸນນະພາບ ປະສິດທິຜົນ, ຕອບສະໜອງຄວາມຮຽກຮ້ອງຕ້ອງການສື່ຂ່າວຫຼາຍຮູບຫຼາຍແບບຂອງປະຊາຊົນ, ສອດຄ່ອງກັບແຕ່ລະເປົ້າໝາຍ ແຕ່ລະເຂດ ພາກ. ກໍ່ສ້າງບາງອົງການສື່ຂ່າວຫຼັກແຫຼ່ງ, ພະຫຸພາຫະນະ ໃຫ້ເປັນແກນກາງ ມີບົດບາດກຳນົດທິດການສື່ຂ່າວໜັງສືພິມ ແລະ ສື່ຂ່າວອິນເຕີເນັດ.
ກຳຈັດດັດແກ້ສະພາບການຊ້ຳຊ້ອນກັນ, ລົງທຶນແບບກະແຈກກະຈາຍ, ປ່ອຍປະລະເລີຍການຄຸ້ມຄອງ, ເຄື່ອນໄຫວຫ່າງເຫີນຈາກຈຸດປະສົງຄະຕິທຳ, ສົ່ງຂ່າວຜິດກັບຄວາມຈິງ. ກຳນົດແຈ້ງຄວາມຮັບຜິດຊອບນຳພາ ຄຸ້ມຄອງສື່ສິ່ງພິມຂອງບັນດາຄະນະພັກ, ອຳນາດການປົກຄອງ, ອົງການເຈົ້າຄຸ້ມຄອງ, ເປັນຕົ້ນແມ່ນຜູ້ນຳໜ້າອົງກາເຈົ້າຄຸ້ມຄອງ ແລະ ອົງການສື່ສິ່ງພິມ. ກໍ່ສ້າງຖັນແຖວພະນັກງານຄຸ້ມຄອງ, ນັກຂ່າວ, ຜູ້ບັນນາທິການ ມີຄຸນສົມບັດສິນທຳ ແລະ ຄວາມສາມາດວິຊາຊີບຢ່າງພຽງພໍ, ຕອບສະໜອງໄດ້ກັບຄວາມຕ້ອງການພັດທະນາສື່ສິ່ງພິມໃນສະພາບການໃໝ່.
ແຜນແມ່ບົດການພັດທະນາ ແລະ ຄຸ້ມຄອງສື່ສິ່ງພິມຕ້ອງກຳນົດຢ່າງຈະແຈ້ງ ລະອຽດ ກ່ຽວກັບກຳນົດທິດ ຈຸດໝາຍ ໜ້າທີ່ ແລະ ວິທີແກ້ໄຂການພັດທະນາ ແລະ ຄຸ້ມຄອງ ຕໍ່ກັບແຕ່ລະຮູບແບບສື່ສິ່ງພິມ, ກວມດ້ວຍໜັງສືພິມ ສື່ເອເລັກໂທຣນິກ ກະຈາຍສຽງ ໂທລະພາບຕາມລຳດັບດຳເນີນງານ, ບາດກ້າວທີ່ສອດຄ່ອງ.
3. ກອງປະຊຸມກໍ່ໄດ້ພິຈາລະນາ, ຕັດສີນຫຼາຍບັນຫາສຳຄັນອື່ນອີກ.
ຄະນະບໍລິຫານງານສູນກາງພັກໄດ້ຄົ້ນຄວ້າພິຈາລະນາ, ສືບຕໍ່ແນະນຳເພີ່ມເຕີມແຜນແມ່ບົດກ່ຽວກັບພະນັກງານຂັ້ນຍຸດທະສາດ; ເອົາຄະແນນສຽງໄວ້ວາງໃຈຂອງສູນກາງພັກຕໍ່ກັບບັນດາສະຫາຍກຳມະການກົມການເມືອງ, ກຳມະການຄະນະເລຂາທິການ; ເລືອກຕັ້ງເພີ່ມເຕີມກຳມະການຄະນະກຳມະການກວດກາສູນກາງພັກ; ພິຈາລະນາ, ແກ້ໄຂຄຳຮ້ອງຟ້ອງກ່ຽວກັບວີໄນພັກ; ດຳເນີນການຊັກຖາມ ແລະ ຕອບຄຳຊັກຖາມຢູ່ໃນກອງປະຊຸມ,...
ດ້ວຍຈິດໃຈຮັບຜີດຊອບສູງຕໍ່ພັກ, ຕໍ່ປະຊາຊົນ ແລະ ປະເທດຊາດ, ບັນດາສະຫາຍກຳມະການສູງກາງພັກໄດ້ດຳເນີນວຽກງານເຫຼົ່ານີ້ຢ່າງເຂັ້ມງວດທີ່ສຸດ, ຖືກຕ້ອງຕາມຂໍ້ກຳນົດຂອງພັກ, ບັນລຸໄດ້ຈຸດປະສົງ ລະດັບຄາດໝາຍທີ່ໄດ້ວາງອອກມາ, ໃນບັນຍາກາດປະຊາທິປະໄຕ ສາມັກຄີ ເປັນເອກະພາບຢ່າງແທ້ຈິງ.
ຮຽນບັນດາສະຫາຍ,
ດ້ວຍບັນດາຜົນສຳເລັດທີ່ກ່າວມາເທິງນີ້, ພວກເຮົາມີພື້ນຖານເພື່ອຢືນຢັນວ່າ ກອງປະຊຸມຄັ້ງທີສິບ ຄະນະບໍລິຫານງານສູນກາງພັກສະໄໝທີ XI ໄດ້ສຳເລັດຜົນຢ່າງຈົບງາມ. ຜົນສຳເລັດນີ້ກໍ່ໄດ້ປະກອບສ່ວນສຳເລັດສິ້ນສຸດປີ 2014 ຢ່າງຈົບງາມ, ຊຶ່ງເປັນປີທີ່ຫວຽດນາມຕ້ອງຜ່ານຜ່າຄວາມຫຍຸ້ງຍາກ ສິ່ງທ້າທາຍຫຼາຍປະການ, ໄດ້ຍາດເອົາຜົນງານອັນສຳຄັນ ແລະ ບົດຮຽນປະສົບການອັນລ້ຳຄ່າຫຼາຍຢ່າງ ເພື່ອກ້າວເຂົ້າສູ່ການຜັນຂະຫຍາຍປະຕິບັດແຜນການປີ 2015 ດ້ວຍບັນຍາກາດໃໝ່ ແລະ ຄວາມຕັດສີນໃຈສູງ.
ປີ 2015 ແມ່ນປີສຸດທ້າຍແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນການພັດທະນາເສດຖະກິດ - ສັງຄົມ 5 ປີ 2011 - 2015, ປີກາງສະໄໝແຫ່ງການປະຕິບັດແຜນຍຸດທະສາດພັດທະນາເສຖະກິດ - ສັງຄົມ 10 ປີ; ປີຈັດຕັ້ງກອງປະຊຸມໃຫຍ່ຄະນະພັກຂັ້ນຕ່າງໆ ກ້າວໄປເຖິງກອງປະຊຸມໃຫຍ່ຄັ້ງທີ XII ຂອງພັກ; ແມ່ນປີທີ່ມີງານບຸນມະໂຫລານຕ່າງໆ ຂອງຊາດ, ກໍ່ແມ່ນປີທີ່ປະຊາຄົມອາຊຽນເປັນຮູບເປັນຮ່າງຂຶ້ນ, ຫວຽດນາມປະຕິບັດສັນຍາເຂົ້າຮ່ວມໃນເຂດການຄ້າເສລີອາຊຽນ (AFTA), ລົບລ້າງໂດຍພື້ນຖານພາສີສຸນລະກາກອນຕໍ່ກັບສິນຄ້ານຳເຂົ້າຈາກອາຊຽນ, ເປີດປະຕູຕະຫຼາດຂາຍຍ່ອຍໂດຍສົມບູນ ຕາມຄຳໝັ້ນສັນຍາກັບອົງການການຄ້າໂລກ, ລົງນາມ ແລະ ປະຕິບັດບາງສັນຍາສອງຝ່າຍກ່ຽວກັບການຄ້າເສລີ; ເສດຖະກິດຫວຽດນາມສືບຕໍ່ເຊື່ອມໂຍງກັບເສດຖະກິດໂລກຢ່າງກວ້າງຂວາງເລິກເຊິ່ງ ໃນສະພາບການແກ່ງແຍ້ງແຂ່ງຂັນກັນຢ່າງເຄັ່ງຮ້ອນ.
ເສດຖະກິດໂລກຕາມການຄາດຄະເນແມ່ນສືບຕໍ່ຟື້ນຕົວ, ແຕ່ຍັງຊ້າ, ສະພາບການການເມືອງໂລກສືບຕໍ່ຜັນປ່ຽນຢ່າງສັບສົນ ຄະເນໄດ້ຍາກ; ຄວາມວຸ້ນວາຍດ້ານການເມືອງ, ການຍາດຊີງເຂດແດນ, ການປະທະກັນດ້ວຍອາວຸດຍັງເກີດຂຶ້ນຢູ່ຫຼາຍບ່ອນ...
ສະພາບການສາກົນ ແລະ ໃນປະເທດໄດ້ສ້າງໃຫ້ມີຄວາມສະດວກ ໂອກາດອຳນວຍຫຼາຍຢ່າງ, ແຕ່ກໍ່ມີຄວາມຫຍຸ້ງຍາກ ສິ່ງທ້າທາຍບໍ່ໜ້ອຍ ຊຶ່ງຮຽກຮ້ອງໃຫ້ທົ່ວພັກ ທົ່ວປວງຊົນ ແລະ ທົ່ວກອງທັບເຮົາ ຕ້ອງມີຄວາມມານະພະຍາຍາມ ແລະ ຕັດສີນໃຈສູງທີ່ສຸດ ເພື່ອປະຕິບັດບັນດາໜ້າທີ່ຂອງປີ 2015 ຢ່າງສຳເລັດມີໄຊ ຊຶ່ງຈຸດໜັກໃຈກາງແມ່ນ: ສູ້ຊົນເພື່ອສຳເລັດໃນລະດັບສູງສຸດບັນດາໜ້າທີ່ພັດທະນາເສດຖະກິດ - ສັງຄົມ; ເພີ່ມທະວີຄວາມໝັ້ນທ່ຽງຂອງເສດຖະກິດມະຫາພາກ, ຍູ້ແຮງການປະຕິບັດບັນດາການບຸກທະລຸຍຸດທະສາດ, ຈັດວາງໂຄງປະກອບເສດຖະກິດຄືນໃໝ່ ຕິດແໜ້ນກັບປ່ຽນແປງໃໝ່ຕົວແບບເຕີບໂຕເສດຖະກິດ, ຮັບປະກັນຄວາມປອດໄພ ແລະ ສະຫວັດດີການສັງຄົມ, ປົວແປງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.
ຮັກສາເອກະລາດ ອຳນາດອະທິປະໄຕ ແລະ ສິ່ງແວດລ້ອມສັນຕິພາບ ສະຖຽນລະພາບ ເພື່ອສ້າງສາພັດທະນາປະເທດ; ຍູ້ແຮງການພົວພັນຕ່າງປະເທດ. ສຸມໃສ່ຈັດຕັ້ງກອງປະຊຸມໃຫຍ່ຄະນະພັກຂັ້ນຕ່າງໆ ສະໄໝ 2015 – 2020 ໃຫ້ສຳເລັດຜົນເປັນຢ່າງດີ, ກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ, ຕິດກັບການສືບຕໍ່ປະຕິບັດມະຕິສູນກາງພັກຄັ້ງທີ 4 ກ່ຽວກັບການກໍ່ສ້າງພັກ, ຄຳສັ່ງສະບັບເລກທີ 03 ຂອງກົມການເມືອງສູນກາງພັກ ກ່ຽວກັບຍູ້ແຮງການຮ່ຳຮຽນ ແລະ ປະຕິບັດຕາມແວ່ນແຍງຄຸນສົມບັດໂຮ່ຈີມິນ, ສ້າງໃຫ້ວຽກງານກໍ່ສ້າງ ປັບປຸງພັກ ມີການຫັນປ່ຽນຢ່າງແຂງແຮງກວ່າອີກ.
ສະເໜີໃຫ້ບັນດາສະຫາຍກຳມະການສູນກາງ, ບັນດາສະຫາຍເຂົ້າຮ່ວມກອງປະຊຸມ ແລະ ພີ່ນ້ອງຮ່ວມຊາດ, ບັນດາສະຫາຍ ນັກຮົບໃນທົ່ວປະເທດ ຈົງຮ່ວມແຮງຮ່ວມໃຈກັນ ເສີມຂະຫຍາຍບັນດາໝາກຜົນ ຜົນງານທີ່ບັນລຸໄດ້ໃນປີ 2014 ແລະ ມູນເຊື້ອສາມັກຄີ ຮັກຊາດຂອງຊາດເຮົາ, ປະຕິບັດບັນດາມະຕິຂອງສູງກາງພັກ ແລະ ມະຕິກອງປະຊຸມສູນກາງຄັ້ງນີ້ ໃຫ້ໄດ້ເປັນຢ່າງດີ, ສ້າງບັນຍາກາດໃໝ່, ກຳລັງກະຕຸກຊຸກຍູ້ໃໝ່ເພື່ອປະຕິບັດຈຸດໝາຍ ໜ້າທີ່ທີ່ກອງປະຊຸມໃຫຍ່ຄັ້ງທີ XI ວາງອອກມາ ຢ່າງສຳເລັດມີໄຊ.
ໃນໂອກາດປີໃໝ່ 2015 ແລະ ກະກຽມຕ້ອນຮັບບຸນປີໃໝ່ປະຈຳຊາດ ປີມະແມ ທີ່ຈະມາເຖິງນີ້, ຂ້າພະເຈົ້າຂໍຝາກຄຳອວຍພອນປີໃໝ່ອັນຈົບງາມມາຍັງພີ່ນ້ອງຮ່ວມຊາດ ບັນດາສະຫາຍ ນັກຮົບໃນທົ່ວປະເທດ ພ້ອມດ້ວຍຊາວຫວຽດນາມຢູ່ຕ່າງປະເທດທຸກຖ້ວນໜ້າ. ອວຍພອນໃຫ້ບັນດາສະຫາຍກຳມະການສູນກາງ ບັນດາສະຫາຍທີ່ເຂົ້າຮ່ວກອງປະຊຸມນີ້ ຈົງມີສຸຂະພາບເຂັ້ມແຂງ ມີຄວາມສຸກຄວາມສະບາຍ, ສຳເລັດພາລະສຳຄັນຕໍ່ພັກ ຕໍ່ປະຊາຊົນ ແລະ ປະເທດຊາດ.
ຂ້າພະເຈົ້າຂໍປະກາດອັດກອງປະຊຸມຄັ້ງທີ 10 ຄະນະບໍລິຫານງານສູນກາງພັກສະໄໝທີ XI.
ຂໍຂອບໃຈດ້ວຍຄວາມນັບຖືຢ່າງສູງ./.
ໂດຍ: ຫງວຽນຝູຈ້ອງ
ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ
(*) ຫົວຂໍ້ໂດຍວາລະສານກອມມູນິດເອເລັກໂທຣນິກເປັນຜູ້ແຕ່ງ