ຄຳນຳຂອງຄະນະບັນນາທິການ: ຕອນເຊົ້າວັນທີ 2 ກຸມພາ 2015, ຢູ່ທີ່ນະຄອນຫຼວງຮ່າໂນ້ຍ ຄະນະບໍລິຫານງານສູນກາງພັກ ສະພາແຫ່ງຊາດ ປະທານປະເທດ ລັດຖະບານ ຄະນະກຳມະການສູນກາງ ແນວໂຮມປະເທດຊາດຫວຽດນາມ ແລະ ນະຄອນຮ່າໂນ້ຍ ໄດ້ຈັດຕັ້ງພິທີສະເຫຼີມສະຫຼອງ ວັນສ້າງຕັ້ງພັກກອມມູນິດຫວຽດນາມ ຄົບຮອບ 85 ປີ (03-02-1930 - 03-02-2015) ຢ່າງສົມກຽດ. ຕາງໜ້າຄະນະບໍລິຫານງານສູນກາງພັກ, ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ກ່າວສຸນທອນພົດ ອວຍພອນໄຊວັນສ້າງຕັ້ງພັກ. ວາລະສານກອມມູນິດ ຂໍເປັນກຽດແນະນຳ ເນື້ອໃນຂອງສຸນທອນພົດດັ່ງກ່າວ.
ສະຫາຍເລຂາທິການໃຫຍ່ ຫງວຽນຝູຈ້ອງ ຍົກໃຫ້ເຫັນແຈ້ງຄວາມໝາຍອັນສຳຄັນ ຂອງວັນສ້າງຕັ້ງພັກ ແລະ ບັນດາໜ້າທີ່ທີ່ທົ່ວພັກ ທົ່ວປວງຊົນ ທົ່ວກອງທັບເຮົາ ຕ້ອງສູ້ຊົນປະຕິບັດ ໃນໄລຍະໃໝ່ (ພາບ: VGP)
ໃນບັນຍາກາດປວງຊົນທັງຊາດມ່ວນຊື່ນຕ້ອນຮັບປີໃໝ່ 2015 ແລະ ກະກຽມຕ້ອນຮັບບຸນປີໃໝ່ປະຈຳຊາດ, ມື້ນນີ້, ພວກເຮົາຈັດຕັ້ງພິທີສະເຫຼີມສະຫຼອງວັນສ້າງຕັ້ງພັກກອມມູນິດຫວຽດນາມຄົບຮອບ 85 ປີຢ່າງສົມກຽດ - ພັກກອມມູນິດຫວຽດນາມໂດຍແມ່ນທ່ານປະທານໂຮ່ຈີມິນຜູ້ຍິ່ງໃຫຍ່ເປັນຜູ້ສ້າງຕັ້ງ ນຳພາ ແລະ ຝຶກຝົນຫຼໍ່ຫຼອມ; ພັກເປັນກອງກຳລັງນຳໜ້າຂອງຊົນຊັ້ນກຳມະກອນ, ພ້ອມກັນນັ້ນ ກໍ່ເປັນກອງກຳລັງນຳໜ້າຂອງປະຊາຊົນຜູ້ອອກແຮງງານ ແລະ ຂອງຊາດຫວຽດນາມ; ເປັນຕົວແທນທີ່ຈົງຮັກພັກດີຕໍ່ຜົນປະໂຫຍດຂອງຊົນຊັ້ນກຳມະກອນ, ຂອງປະຊາຊົນຜູ້ອອກແຮງງານ ແລະ ຂອງຊາດ. ຕາງໜ້າຄະນະບໍລິຫານງານສູນກາງພັກ, ຂ້າພະເຈົ້າຂໍຊົມເຊີຍຢ່າງສຸດໃຈ ແລະ ຂໍຝາກຄວາມຢ້ຽມຢາມຖາມຂ່າວອັນອົບອຸ່ນ ແລະ ຄຳອວຍພອນໄຊອັນປະເສີດ ມາຍັງບັນດາສະຫາຍການນຳ ອະດີດການນຳຂອງພັກ ລັດ ແນວໂຮມປະເທດຊາດຫວຽດນາມ, ບັນດານັກປະຕິວັດອະວຸໂສ, ບັນດາແມ່ຫວຽດນາມວິລະຊົນ, ບັນດາແຂກຜູ້ມີກຽດ ບັນດາສະຫາຍແລະພີ່ນ້ອງຮ່ວມຊາດໃນທົ່ວປະເທດ ພ້ອມດ້ວຍຊາວຫວຽດນາມຢູ່ຕ່າງປະເທດທຸກທ້ວນໜ້າ.
ພວກເຮົາລ້ວນແຕ່ຮູ້ແລ້ວວ່າ, ທ້າຍສະຕະວັດທີ XIX ແລະຕົ້ນສະຕະວັດທີ XX, ກ່ອນເມື່ອພັກກອມມູນິດຫວຽດນາມກຳເນີດເກີດຂຶ້ນ, ປະເທດເຮົາຖືກຕົກໃນຄວາມມືດມົນອົນທະການຍ້ອນການປົກຄອງຂອງພວກລ່າເມືອງຂຶ້ນ. ປະຊາຊົນຫວຽດນາມໄດ້ລຸກຮືຂຶ້ນຢ່າງລຽນຕິດເພື່ອຕ້ານແອກກົດຂີ່ຂູດຮີດຂອງພວກລ່າເມືອງຂຶ້ນ ແລະ ພວກສັກດິນາລູກມືຂອງພວກມັນ. ບັນດາຂະບວນການຕໍ່ສູ້ສະແດງອອກຢ່າງແຂງແຮງເຖິງຄວາມອົງອາດກ້າຫານ ແລະ ນ້ຳໃຈຮັກຊາດອັນແຮງກ້າ, ແຕ່ການຕໍ່ສູ້ເຫຼົ່ານັ້ນລ້ວນແຕ່ບໍ່ໄດ້ຮັບຜົນສຳເລັດ, ຍ້ອນບໍ່ມີແນວທາງທີ່ຖືກຕ້ອງ.
ໃນສະພາບການດັ່ງກ່າວ, ສະຫາຍຫງວຽນອາຍກວັກ ດ້ວຍນ້ຳໃຈຮັກຊາດອັນແຮງກ້າ ໄດ້ໄປທົ່ວໂລກເພື່ອຫາເສັ້ນທາງກູ້ຊາດ ກອບກູ້ປະຊາຊົນ, ແລະເພິ່ນກໍ່ຊອກຫາໄດ້ເສັ້ນທາງກູ້ຊາດ ປົດປ່ອຍຊາດ ປົດປ່ອຍຊົນຊັ້ນ ປົດປ່ອຍມະນຸດ ຢູ່ໃນລັດທະມາກ - ເລນິນ. ເພິ່ນຢືນຢັນ: “ຢາກກູ້ຊາດ ແລະປົດປ່ອຍຊາດໄດ້ຮັບຜົນສຳເລັດ ແມ່ນບໍ່ມີເສັ້ນທາງອື່ນໃດນອກຈາກເສັ້ນທາງປະຕິວັດກຳມາຊີບ”. ວັນທີ 3 ກຸມພາ 1930, ພາຍໃຕ້ການເປັນປະທານຂອງສະຫາຍຫງວຽນອາຍກວັກ, ອົງການຈັດຕັ້ງກອມມູນິດສາມອົງການຢູ່ຫວຽດນາມໃນເວລານັ້ນ (ພັກກອມມູນິດອິນດູຈີນ, ພັກກອມມູນິດອານນາມ ແລະ ສະຫະພັນກອມມູນິດອິນດູຈີນ) ໄດ້ເປີດກອງປະຊຸມໂຮມພັກເຂົ້າເປັນພັກໜຶ່ງ ໃສ່ຊື່ວ່າພັກກອມມູນິດຫວຽດນາມ. ກອງປະຊຸມໄດ້ປຶກສາພິຈາລະນາ ແລະ ຮັບຮອງຜ່ານ ໂຄງການການເມືອງໂດຍຫຍໍ້, ຍຸດໂທບາຍໂດຍຫຍໍ້, ແຜນງານໂດຍຫຍໍ້ ແລະ ກົດລະບຽບໂດຍຫຍໍ້ ຂອງພັກ ໂດຍສະຫາຍຫງວຽນອາຍກວັກເປັນຜູ້ຮ່າງຂຶ້ນ, ພ້ອມກັນນັ້ນ ກໍ່ວາງແຜນການສ້າງຕັ້ງຄະນະບໍລິຫານງານສູນກາງຊົ່ວຄາວ. ບັນດາເອກະສານເທິງນີ້ໄດ້ກຳນົດໜ້າທີ່ຂອງການປະຕິວັດຫວຽດນາມຄື ໂຄ່ນລົ້ມຈັກກະພັດແລະພວກສັກດິນາທີ່ເປັນລູກມືຂອງມັນ, ສ້າງຕັ້ງລັດຖະບານຂອງປະຊາຊົນຂຶ້ນ, ເຮັດໃຫ້ຫວຽດນາມເປັນເອກະລາດໂດຍສົມບູນ, ປະຊາຊົນໄດ້ມີຊີວິດຢູ່ຢ່າງອິດສະຫຼະເສລີ ແລະສົມບູນພູມສຸກ.
ດ້ວຍເຫດການປະຫວັດສາດທີ່ສຳຄັນຍິ່ງນີ້, ພັກກອມມູນິດຫວຽດນາມໄດ້ຮັບການສັ້ງຕັ້ງຂຶ້ນຢ່າງເປັນທາງການ. ຈາກນີ້ເປັນຕົ້ນໄປ ການປະຕິວັດຫວຽດນາມມີແນວທາງອັນຖືກຕ້ອງ. ພັກກອມມູນິດຫວຽດນາມກາຍເປັນຜູ້ນຳພາ ແລະ ຜູ້ຈັດຕັ້ງທີ່ແທ້ຈິງຕໍ່ທຸກໆໄຊຊະນະຂອງການປະຕິວັດຢູ່ປະເທດເຮົາ. ນີ້ແມ່ນການພັດທະນາທີ່ຈຳເປັນແນ່ນອນຂອງປະຫວັດສາດ, ແມ່ນໝາກຜົນແຫ່ງການຂະຫຍາຍຕົວຂອງຂະບວນການກຳມະກອນ ແລະ ຂະບວນການຮັກຊາດຫວຽດນາມ ທີ່ສົມທົບກັບລັດທິມາກ - ເລນິນ ຊຶ່ງໄດ້ເຜີຍແຜ່ເຂົ້າໃນຫວຽດນາມ.
ພັກກອມມູນິດຫວຽດນາມກຳເນີດເກີດຂຶ້ນແມ່ນບາດລ້ຽວອັນໃຫຍ່ຫຼວງໃນປະຫວັດການປະຕິວັດຢູ່ປະເທດເຮົາ, ຂີດໝາຍຫຼັກໝາຍຄຳອັນຮຸ່ງເຮືອງເຫຼືອງເຫຼື້ອມໃນເສັ້ນທາງແຫ່ງການພັດທະນາຂອງຊາດຫວຽດນາມ. ໃນ 85 ປີທີ່ຜ່ານມາ, ເຖິງວ່າເສັ້ນທາງກ້າວເດີນບາງເທື່ອຄົດລ້ຽວ ທຸລະກັນດານ ແລະ ສັບສົນ, ເຖິງວ່າ ບາງເທື່ອພັກກອມມູນິດຫວຽດນາມ ມີຂໍ້ຂາດຕົກບົກພ່ອງ ຜິດພາດກໍ່ຕາມ, ແຕ່ ຍ້ອນວ່າມີຄຸນສົມບັດການເມືອງອັນໜັກແໜ້ນ, ມີຄວາມສະຫງຽມຄ່ຽມຄົມ, ພັກໄດ້ຕິຊົມຕົນເອງຢ່າງເຂັ້ມງວດ ແລະ ແກ້ໄຂຂໍ້ຂາດຕົກບົກພ່ອງຂອງຕົນ, ໄດ້ຮັບຄວາມເຊື່ອຖືຮັກແພງ ສະໜັບສະໜູນຂອງປະຊາຊົນ, ດັ່ງນັ້ນ ພັກຈຶ່ງໄດ້ນຳພາການປະຕິວັດຫວຽດນາມຜ່ານຜ່າຄວາມຫຍຸ້ງຍາກ ສິ່ງທ້າທາຍຕ່າງໆນາໆ ແລະ ຍາດໄດ້ໄຊຊະນະຢ່າງຕໍ່ເມື່ອງ ຊຶ່ງບໍ່ມີອິດທິກຳລັງໄດອາດຈະກິດກັ້ນໄດ້. ພາຍໃຕ້ການນຳພາຂອງພັກ ປະຊາຊົນເຮົາຍາດໄດ້ໄຊຊະນະອັນມະຫັດສະຈັນໃນສະຕະວັດທີ XX ຊຶ່ງຍອດສູງແມ່ນໄຊຊະນະໃນການປະຕິວັດເດືອນສິງຫາປີ 1945, ໄຊຊະນະຂອງການຕໍ່ຕ້ານປົກປ່ອຍຊາດ ປົກປັກຮັກສາປະເທດຊາດ, ໄຊຊະນະຂອງການປ່ຽນແປງໃໝ່ ກ້າວຢ່າງໜັກແໜ້ນຂຶ້ນສູ່ສັງຄົມນິຍົມ.
ເພື່ອຍາດເອົາບັນດາຜົນສຳເລັດທີ່ຍິ່ງໃຫຍ່ດັ່ງກ່າວເທິງນີ້, ພັກກອມມູນິດຫວຽດນາມ ແລະ ປະຊາຊົນຫວຽດນາມຕ້ອງມານະພະຍາຍາມຢ່າງໃຫຍ່ຫຼວງ ແລະ ໄດ້ເສຍສະຫຼະເລືອດເນື້ອເຫື່ອໄຄບໍ່ຈັກວ່າເທົ່າໃດ. ຄິດສະເພາະການ “ປາບປາມຢ່າງກວ້າງຂວາງປ່າເຖື່ອນ” ຂອງພວກລ່າເມືອງຂຶ້ນຝຣັ່ງໃນຊຸມປີ 1931 - 1932, ສັດຕູໄດ້ຈັບກຸມຄຸມຂັງ ຂ້າຟັນລັນແທງພະນັກງານ ສະມາຊິກພັກເປັນຈຳນວນໝື່ນ; ພະນັກງານການນຳທີ່ດີເດັ່ນຂອງພັກຫຼາຍສະຫາຍຖືກປະຫານຊີວິດເຊັ່ນ ເຈິ່ນຝູ, ໂງຢາຕື້, ຫງວຽນດຶກແກ໋ງ, ເລໂຮ່ງຟອງ, ຮ່າຮູຍເຕິບ, ຫງວຽນວັນກື່, ຫວຽນທີ້ມິງຄາຍ... ຢູ່ໃນບັນດາເຮືອນຈຳທີ່ເຂັດຊື່ເຂັດສຽງຂອງສັດຕູເຊັ່ນ ໂກນດ໋າວ, ເຊີນລາ, ຮ໋ວາຫຼໍ່, ລາວບ໋າວ, ຝູ ກວັກ… ພວກມັນໄດ້ຄຸມຂັງ, ທໍລະມານຊາວພັກກອມມູນິດຢ່າງປ່າເຖື່ອນ; ສະເພາະຢູ່ເຮືອມຈຳ ໂກນດ໋າວ ມີ 793 ສະຫາຍເສຍຊີວິດ; ຢູ່ເຮືອນຈຳ ກອນຕຸມ ມີ 339 ສະຫາຍຖືກສັງຫານ. ໃນຊຸມປີ 1954 - 1959, ຢູ່ພາກໃຕ້ ພວກສັດຕູໄດ້ຈັບກຸມສະມາຊິກພັກ ແລະ ຜູ້ຮັກຊາດເປັນຈຳນວນ 466.000 ຄົນ, 400.000 ຄົນຖືກເນລະເທດ ແລະ 68.000 ຄົນຖືກສັງຫານ. ໃນການຕໍ່ຕ້ານທັງສອງຄັ້ງ ຕ້ານລ່າເມືອງຂຶ້ນຝຣັ່ງ ແລະ ຈັກກະພັດອາເມຣິກາ ສະມາຊິກພັກຖືກເສຍສະຫຼະຊີວິດເປັນຈຳນວນເກືອບ 160.000 ຄົນ...
ຫັນເບິ່ງຄືນເສັ້ນທາງຕໍ່ສູ້ອັນພິລະອາດຫານຂອງພັກກອມມູນິດຫວຽດນາມໃນ 85 ປີທີ່ຜ່ານມາ, ລື້ມຄືນຄວາມຫຍຸ້ງຍາກລຳບາກຕ່າງໆນາໆ, ຄວາມເສຍສະຫຼະອັນບໍ່ມີຂອບເຂດ ພ້ອມກັບບັນດາໄຊຊະນະອັນສະຫງ່າລາສີທີ່ປະຊາຊົນຫວຽດນາມຍາດມາໄດ້ພາຍໃຕ້ການນຳພາຂອງພັກ, ພວກເຮົາຍິ່ງນັບຖືອະດີດຕະການ ຖະນຸຖະໜອມຮັກສາບັນດາໝາກຜົນຂອງການປະຕິວັດ, ຍິ່ງຊາບຊຶ້ງແລະຮູ້ບຸນຄູນຢ່າງບໍ່ມີຂອບເຂດ ຕໍ່ຄຸນງາມຄວາມດີອັນຍິ່ງໃຫຍ່ ຂອງທ່ານປະທານໂຮ່ຈີມິນທີ່ແສນຮັກແສນເຄົາລົບ, ຍິ່ງເຂົ້າໃຈຢ່າງເລິກເຊິ່ງ ເຊື່ອຖືຮັກແພງ ແລະ ເອກອ້າງທະນົງໃຈ ກ່ຽວກັບຊາດຫວຽດນາມ - ຊຶ່ງເປັນຊາດທີ່ພິລະອາດຫານ ສະຫຼາດສ່ອງໃສ ແລະ ປະດິດສ້າງ, ເອກອ້າງທະນົງໃຈກ່ຽວກັບພັກຂອງພວກເຮົາ - ພັກກອມມູນິດຫວຽດນາມສະຫງ່າງາມ ທີ່ໄດ້ເດັດດ່ຽວຕໍ່ສູ້ ອົດທົນເສຍສະຫຼະເພື່ອເອກະລາດ ອິດສະຫຼະພາບຂອງປະເທດຊາດ ເພື່ອຄວາມສົມບູນພູມສຸກຂອງປະຊາຊົນ.
ພວກເຮົາຄິດຮອດຄິດເຖິງດ້ວຍຄວາມເຄົາລົບ ແລະ ຮູ້ບຸນຄູນຕໍ່ບັນດາຜູ້ນຳຂອງພັກ, ບັນດາວິລະຊົນນັກຮົບຜູ້ເສຍສະຫຼະຊີມິດ, ພີ່ນ້ອງຮ່ວມຊາດ ບັນດາສະຫາຍທີ່ໄດ້ສູ້ຮົບຢ່າງດັດດ່ຽວ ແລະໄດ້ເສຍສະຫຼະຢ່າງອາດຫານ ໃນພາລະກິດການຕໍ່ສູ້ອັນລຳບາກຍາວນານ ແຕ່ກໍ່ສະຫງ່າງາມທີ່ສຸດ ຂອງຊາດ ແລະ ຂອງພັກເຮົາ. ພວກເຮົາສະແດງຄວາມຮູ້ບຸນຄູນຢ່າງເລິກເຊິ່ງ ຕໍ່ບັນດາຄອບຄົວຂອງຜູ້ເສຍຊີວິດເພື່ອຊາດ, ບັນດາແມ່ຫວຽດນາມວິລະຊົນ, ບັນດາຄອບຄົວທີ່ມີຄຸນງາມຄວາມດີຕໍ່ຊາດ, ບັນດານັກຮົບຜູ້ເສຍອົງຄະ ຖືກພະຍາດບາດເຈັບ, ບັນດາສະຫາຍແລະພີ່ນ້ອງຮ່ວມຊາດທີ່ຖືກຄຸມຂັງໃນເຮືອນຈຳຂອງລະບອບຈັກກະພັດ ລ່າເມືອງຂຶ້ນ, ບັນດາສະຫາຍທີ່ໄດ້ສູ້ຮົບ ເສຍສະຫຼະຊີວິດຢູ່ແນວຮົບຕ່າງໆ ແລະ ປະຕິບັດພັນທະສາກົນອັນສູງສົ່ງ, ພ້ອມດ້ວຍບັນດາສະຫາຍແລະພີ່ນ້ອງຮ່ວມຊາດທົ່ວປະເທດ ທີ່ໄດ້ຕໍ່ສູ້ພາຍໃຕ້ຄັນທຸງທີ່ສະຫງ່າງາມຂອງພັກກອມມູນິດຫວຽດນາມ ເພື່ອຄວາມຍືນຍົງຄົງຕົວຕະຫຼອດການຂອງຊາດຫວຽດນາມ. ພວກເຮົາຂໍສະແດງຄວາມຂອບອົກຂອບໃຈຢ່າງຈິງໃຈ ຕໍ່ປະຊາຊົນ ແລະ ເພື່ອນມິດສາກົນ ທີ່ໄດ້ໃຫ້ການສະໜັບສະໜູນ ແລະຊ່ວຍເຫຼືອອັນລ້ຳຄ່າ ແກ່ພາລະກິດທີ່ເປັນທຳຂອງພວກເຮົາ.
ພຶດຕິກຳອັນອຸດົມສົມບູນຂອງການປະຕິວັດຫວຽດນາມໃນຕະຫຼອດ 85 ປີທີ່ຜ່ານມາໄດ້ພິສູດໃຫ້ເຫັນວ່າ, ການນຳພາທີ່ຖືກຕ້ອງ ແລະ ສະຫຼາດສ່ອງໃສຂອງພັກແມ່ນປັດໃຈອັນດັບໜຶ່ງທີ່ຕັດສິນທຸກໄຊຊະນະແຫ່ງການປະຕິວັດຂອງປະເທດເຮົາ; ພ້ອມກັນນັ້ນ ໃນກະໂຕວິວັດການນຳພາປະຕິວັດ, ພັກກອມມູນິດຫວຽດນາມກໍ່ໄດ້ຮັບການຝຶກຝົນຫຼໍ່ຫຼອມ ທົດສອບ ແລະ ເຕີບໃຫຍ່ເຂັ້ມແຂງ ກ້າແກ່ນຂຶ້ນຕື່ມ ເພື່ອນັບມື້ນັບສົມກຽດກັບບົດບາດ ແລະ ພາລະກຳນຳພາການປະຕິວັດ, ສົມກັບຄວາມໄວ້ວາງໃຈຂອງປະຊາຊົນ. ຢູ່ຫວຽດນາມບໍ່ມີກຳລັງການເມືອງອື່ນໃດ, ນອກຈາກພັກກອມມູນິດຫວຽດນາມ, ທີ່ມີຄຸນສົມບັດຫຼັກໝັ້ນການເມືອງ ສະຕິປັນຍາ ບົດຮຽນປະສົບການ ອິດທິພົນ ແລະ ຄວາມສາມາດຢ່າງພຽງພໍ ເພື່ອນຳພາປະເທດຊາດບ້ານເມືອງຜ່ານຜ່າຄວາມຫຍຸ້ງຍາກລຳບາກ ສິ່ງທ້າທາຍຮ້າຍເຮັ່ງ ແລະ ພາປະເທດຊາດໄປເຖິງຈຸດໝາຍອັນຮຸ່ງເຮືອງເຫຼືອນເຫຼື້ອມ. ແລະໃນຂະບວນວິວັດດັ່ງກ່າວນັ້ນເອງ, ພັກກອມມູນິດຫວຽດນາມໄດ້ສະສົມ ແລະ ຖອດຖອນບົດຮຽນປະສົບການອັນລ້ຳຄ່າຫຼາຍຢ່າງ, ໄດ້ຫຼໍ່ຫຼອມສ້າງບັນດາມູນເຊື້ອອັນສະຫງ່າງາມ ຊຶ່ງໃນປັດຈຸບັນ ພວກເຮົາມີໜ້າທີ່ຕ້້ອງອອກແຮງຮັກສາ ແລະ ເສີມຂະຫຍາຍ:
ນັ້ນຄື ມູນເຊື້ອຈົງຮັກພັກດີຢ່າງບໍ່ມີຂອບເຂດຕໍ່ກັບຜົນປະໂຫຍດຂອງຊາດແລະຂອງຊົນຊັ້ນ, ຕັ້ງໝັ້ນໃນຈຸດໝາຍ ອຸດົມການເອກະລາດແຫ່ງຊາດ ຕິດແໜ້ນກັບລັດທິສັງຄົມນິຍົມ ບົນພື້ນຖານລັດທະມາກ - ເລນິນ ແລະ ແນວຄິດໂຮ່ຈີມິນ. ມີແຕ່ໄປຕາມເສັ້ນທາງປະຕິວັດທີ່ພັກກອມມູນິດຫວຽດນາມ ແລະ ລຸງໂຮ່ໄດ້ເລືອກເອົາເທົ່ານັ້ນ ການປະຕິວັດຫວຽດນາມຈຶ່ງຍາດໄດ້ໄຊຊະນະສົມບູນ, ປະເທດເຮົາຈຶ່ງເປັນເອກະລາດຢ່າງແທ້ຈິງ, ຊາດເຮົາຈຶ່ງເປັນອິດສະຫຼະເສລີຢ່າງແທ້ຈິງ, ປະຊາຊົນຫວຽດນາມຈຶ່ງມີຊີວິດການເປັນຢູ່ທີ່ນັບມື້ນັບອິ່ມໜຳສຳລານ ແລະ ສົມບູນພູມສຸກ.
ນັ້ນແມ່ນ ມູນເຊື້ອຮັກສາຄວາມເປັນເອກະລາດ ເປັນເຈົ້າຕົນເອງທາງດ້ານແນວທາງໄວ້ຢ່າງໝັ້ນຄົງ, ກຳແໜ້ນ ໝູນໃຊ້ ແລະ ຜັນຂະຫຍາຍລັດທິມາກ - ເລນິນຢ່າງປະດິດສ້າງ, ທາບທາມບົດຮຽນຂອງສາກົນເພື່ອວາງແນວທາງອັນຖືກຕ້ອງ ແລະ ຈັດຕັ້ງປະຕິບັດໜ້າທີ່ການປະຕິວັດຢ່າງມີປະສິດທິຜົນ. ໃນແຕ່ລະໄລຍະ, ພັກກອມມູນິດຫວຽດນາມຍາມໃດກໍ່ຊາບຊືມທັດສະນະທີ່ວ່າ ສັດຈະທຳແມ່ນລະອຽດ ປະຕິວັດແມ່ນປະດິດສ້າງ, ເລິ່ມຈາກສະພາບຕົວຈິງຂອງຫວຽດນາມເພື່ອກຳນົດທິດທາງ ໜ້າທີ່ ວິທີການຂອງການປະຕິວັດຫວຽດນາມ.
ນັ້ນແມ່ນ ມູນເຊື້ອແຫ່ງການພົວພັນສະໜິດແໜ້ນແບບເລືອດເນື້ອລະຫວ່າງພັກ ແລະ ປະຊາຊົນ, ຍາມໃດກໍ່ເອົາການຮັບໃຊ້ປະຊາຊົນເປັນວິຖີຊີວິດ ແລະ ຈຸດໝາຍແຫ່ງການສູ້ຊົນຂອງຕົນ. ປະຊາຊົນຫວຽດນາມໄດ້ລ້ຽງເກືອ ແລະ ປົກປັກຮັກສາພັກນັບແຕ່ເມື່ອຫາກໍ່ກຳເນີດ, ຮັກແພງພັກຢ່າງສຸດອົກສຸດໃຈ, ສະໜັບສະໜູນແລະອອກແຮງສູ້ຊົນປະຕິບັດແນວທາງ ແຜນນະໂຍບາຍຂອງພັກ. ກຳລັງແຮງອັນບໍ່ມີສິ້ນສຸດຂອງປະຊາຊົນສ້າງເປັນກຳລັງແຮງຊະນະເລິດຂອງພັກ; ບໍ່ເກີດກຳລັງແຮງຂອງພັກແມ່ນຢູ່ທີ່ຄວາມພົວພັນແບບເລືອດເນື້ອກັບປະຊາຊົນ, ເສິມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ.
ນັ້ນແມ່ນ ມູນເຊື້ອສະມັກຄີເປັນເອກະພາບ, ມີການຈັດຕັ້ງ ແລະ ມີລະບຽບວິໄນຢ່າງແໜ້ນແຟ້ນ ບົນຫຼັນການລວມສູນປະຊາທິປະໄຕ, ຕິຊົມຕົນເອງ ຕິຊົມ ແລະ ນ້ຳໃຈຮັກແພງສະຫາຍ. ຜ່ານບັນດາການທົດສອບທີ່ຂ້ຽວເຂັນສາຫັດໃນເຮືອນຈຳຂອງຈັກກະພັດ, ຕໍ່ໜ້າດາບປາຍປືນ ແລະ ປາກກະບອກປືນຂອງສັດຕູ ຫຼືຢູ່ໃນສະໜາມຮົບທີ່ເຕັມໄປດ້ວຍໄຟແລະລະເບີດ, ຊາວກອມມູນິດຫວຽດນາມໄດ້ເປັນແບບຢ່າງອັນໃສແຈ້ງ ກ່ຽວກັບນ້ຳໃຈສາມັກຄີສະໜິດແໜ້ນ ຮັກແພງຫຸ້ມຫໍ່ກັນ, ກ່ຽວກັບນ້ຳໃຈສະຫາຍ ໝູ່ຄູ່ຮ່ວມງານຮ່ວມກົມກອງ. ແມ່ນກະໂຕນ້ຳໃຈມິດສະຫາຍກອມມູນິດນັ້ນເອງ ທີ່ໄດ້ຜູກພັນບັນດານັກປະຕິວັດຫວຽດນາມເຂົ້າເປັນກອງກຳລັງນຳໜ້າທີ່ແຂງກ້າ ຊຶ່ງໄດ້ຮັບຄວາມຮັກແພງເຊື່ອໝັ້ນ ຂອງປະຊາຊົນ, ຄວາມນິຍົມຊົມຊອບຈາກເພື່ອນມິດ ແລະ ເຮັດໃຫ້ສັດຕູຢ້ານກົວ; ສ້າງເປັນກຳລັງແຮງເພື່ອໃຫ້ພັກກອມມູນິດຫວຽດນາມຜ່ານຜ່າສິ່ງທ້າທາຍ ຄວາມເສຍສະຫຼະທຸກຢ່າງ, ຕັ້ງໝັ້ນຄວາມສັດທາ ແລະ ເຊີດຊູຄັນທຸງນຳພາ.
ນັ້ນແມ່ນ ມູນເຊື້ອສາມັກຄີສາກົນຊື່ສັດສຸດຈະລິດ ບໍລິສຸດຜຸດຜ່ອງ ທີ່ອີງໃສ່ບັນດາຫຼັກການ ແລະ ຈຸດໝາຍອັນສູງສົ່ງ. ນີ້ແມ່ນພື້ນຖານອັນໜັກແໜ້ນ ເພື່ອໃຫ້ພັກກອມມູນິດຫວຽດນາມ ວາງແລະປະຕິບັດຢ່າງສຳເລັດຜົນ ແນວທາງການຕ່າງປະເທດທີ່ຖືກຕ້ອງ ຜ່ານສະໄໝຕ່າງໆ, ເສີມຂະຫຍາຍເຖິງລະດັບສູງ ການສົມທົບກຳລັງແຮງຂອງຊາດກັບກຳລັງແຮງຂອງຍຸກສະໄໝ, ພາໃຫ້ການປະຕິວັດຫວຽດນາມຂະຫຍາຍຕົວຢ່າງບໍ່ຢຸດຢັ້ງ.
ປັດຈຸບັນນີ້, ທົ່ວພັກ ທົ່ວປວງຊົນ ແລະ ທົ່ວກອງທັບເຮົາ ພວມອອກແຮງສູ້ຊົນປະຕິບັດໂຄງການການເມືອງຂອງພັກ, ລັດຖະທຳມະນູນຂອງລັດ, ຍູ້ແຮງພາລະກິດການປ່ຽນແປງໃໝ່ ຫັນເປັນອຸດສາຫະກຳທັນສະໄໝຢ່າງຮອບດ້ານ ແລະ ຄົບຊຸດ, ພັດທະນາເສດຖະກິດຕະຫຼາດກຳນົດທິດສັງຄົມນິຍົມ, ເປີດປະຕູປະເທດເຊື່ອມໂຍງກັບສາກົນ, ປະຕິບັດສອງໜ້າທີ່ຍຸດທະສາດຄື ສ້າງສາ ແລະ ປົກປັກຮັກສາປະເທດຊາດສັງຄົມນິຍົມ, ເພື່ອຈຸດໝາຍປະຊາຊົນຮັ່ງມີ ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ສີວິໄລ. ນີ້ແມ່ນພາລະກິດປະຕິວັດທີ່ໃຫຍ່ໂຕ ຍິ່ງໃຫຍ່ທີ່ສຸດ, ແມ່ນ “ການສູ້ຮົບທີ່ໃຫຍ່ໂຕມະໂຫຖານ” ຄືດັ່ງຄຳເວົ້າຂອງລຸງໂຮ່, ແຕ່ກໍ່ຫຍຸ້ງຍາກ ສັບສົນທີ່ສຸດ. ສະພາບສາກົນ ແລະ ໃນປະເທດມີດ້ານສະດວກ ມີໂອກາດດີ ແຕ່ຄຽງຂ້າງນັ້ນກໍ່ມີຄວາມຫຍຸ້ງຍາກ ສິ່ງທ້າທາຍຫຼາຍຢ່າງແຊກຊ້ອນຢູ່. ພວກເຮົາພວມຢູ່ຕໍ່ໜ້າບັນຫາໃໝ່ຫຼາຍຢ່າງທີ່ຕ້ອງແກ້ໄຂ, ມີຫຼາຍວຽກສັບສົນທີ່ສຸດທີ່ຕ້ອງເຮັດ. ສະພາບການດັ່ງກ່າວ, ຍິ່ງກວ່າເວລາໃດໝົດ, ມັນຮຽກຮ້ອງໃຫ້ທົ່ວພັກ ທົ່ວປວງຊົນ ທົ່ວກອງທັບ ຕ້ອງເສີມຂະຫຍາຍ ມູນເຊື້ອຮັກຊາດແລະປະຕິວັດ, ນ້ຳໃຈສາມັກຄີແລະຄວາມຮັບຜິດຊອບ ຂຶ້ນເຖິງລະດັບສູງ, ຕ້ອງມານະພະຍາຍາມຜ່ານຜ່າຄວາມຫຍຸ້ງຍາກ ສິ່ງທ້າທາຍທຸກຢ່າງ ເພື່ອກໍ່ສ້າງປະເທດເຮົາໃຫຍ່ໂຕໂອ້ຖົງກວ່າ ສວຍງາມກວ່າ. ຄວາມສູ້ຊົນເດັດດ່ຽວ ປະດິດສ້າງຂອງທົ່ວປວງຊົນ, ຂອງບັນດາຂະແໜງການ ບັນດາທ້ອງຖິ່ນ ບັນດາພາກສ່ວນເສດຖະກິດ ແມ່ນປັດໄຈທີ່ສຳຄັນທີ່ສຸດຕໍ່ກັບຄວາມຈະເລີນພັດທະນາຂອງປະເທດເຮົາ. ພັກກອມມູນິດຫວຽດນາມ ຕ້ອງອອກແຮງຊຸກຍູ້ການກໍ່ສ້າງ ປັບປຸງພັກ, ເຮັດໃຫ້ພັກນັບມື້ນັບປອດໃສຂາວສະອາດ ໝັ້ນຄົງເຂັ້ມແຂງ, ເຮັດຫຼ້ອນໜ້າທີ່ຮັບຜິດຊອບເປັນກອງກຳລັງນຳໜ້ານຳພາການປະຕິວັດໃນໄລຍະໃໝ່.
ໃນເວລາທີ່ຜ່ານມາ, ພັກກອມມູນິດຫວຽດນາມໄດ້ໃຊ້ເວລາ ແລະ ກຳລັງວັງຊາບໍ່ໜ້ອຍເພື່ອເຮັດວຽກງານກໍ່ສ້າງພັກ, ຖືວ່າການກໍ່ສ້າງພັກແມ່ນໜ້າທີ່ສຳຄັນຕົ້ນຕໍ. ທີ່ຜ່ານມາມໍ່ນີ້, ທົ່ວພັກໄດ້ດຳເນີນການຂົນຂວາຍກໍ່ສ້າງ ປັບປຸງພັກ ຕາມຈິດໃຈມະຕິກອງປະຊຸມສູນກາງຄັ້ງທີ 4 ສະໄໝທີ XI ຊຶ່ງໄດ້ຮັບຜົນສຳເລັດ ແລະບົດຮຽນເບື້ອງຕົ້ນທີ່ສຳຄັນ, ປະກອບສ່ວນກີດກັ້ນ ຍູ້ຖອຍຄວາມຫຍໍ້ທໍ້ເປັນກ້າວໜຶ່ງ, ຍົກສູງຄວາມສາມາດນຳພາ ແລະກຳລັງສູ້ຮົບຂອງພັກ. ແຕ່ວ່າ, ວຽກງານກໍ່ສ້າງພັກກໍ່ຍັງມີຫຼາຍວຽກທີ່ສຸດທີ່ຕ້ອງເຮັດ, ເປັນຕົ້ນແມ່ນການຕໍ່ສູ້ຕ້ານຄວາມເສື່ອມໂຊມທາງດ້ານແນວຄິດການເມືອງ ຄຸນສົມບັດ ແບບແຜນດຳລົງຊີວິດ, ບັນດາປະກົດການ “ຜັນປ່ຽນດ້ວຍຕົນເອງ” “ປ່ຽນແປງດ້ວຍຕົນເອງ”, ພະຍາດສໍ້ລາດບັງຫຼວງ, ຄວາມຟຸມເຟືອຍ, ພະຍາດອາດຍາສິດ ຫ່າງເຫີນປະຊາຊົນ... ບັນດາອິດທິກຳລັງສັດຕູພວນຫາທຸກວິທີເພື່ອທຳລາຍພາລະກິດປະຕິວັດຂອງປະຊາຊົນເຮົາ; ພວກມັນອອກແຮງເສກສັນປັ້ນແຕ່ງ ໃສ່ຮ້າຍປ້າຍສີພັກ ລັດຫວຽດນາມ, ໂຈມຕີໂດຍກົງໃສ່ລະບົດແນວຄິດ ໂຄງການການເມືອງ ແນວທາງການເມືອງຂອງພັກ, ຍຸຍົງສົ່ງເສີມການຄັດຄ້ານຕ້ານຢັນ ແບ່ງແຍກພາຍໃນພັກ, ແບ່ງແຍກພັກ ລັດ ກັບປະຊາຊົນ, ຫວັງເຮັດໃຫ້ພັກເຮົາ ລະບອບຂອງພວກເຮົາຖືກແຕກທະລາຍເລິ່ມແຕ່ກົກຮາກ ແຕ່ພາຍໃນ ຊຶ່ງເປັນກົນອຸບາຍທີ່ເລິກແລບແນບນຽນ ແລະ ອັນຕະລາຍທີ່ສຸດ. ໃນສະພາບດັ່ງກ່າວນັ້ນ, ພວກເຮົາຍິ່ງຕ້ອງເອົາໃຈໃສ່ເຮັດວຽກງານກໍ່ສ້າງພັກໃຫ້ດີກວ່າອີກ.
ທິດທາງລວມຂອງການກໍ່ສ້າງ ປັບປຸງພັກໃນປັດຈຸບັນແມ່ນ ຕ້ອງສືບຕໍ່ເສີມຂະຫຍາຍມູນເຊື້ອອັນດີງາມ, ຮັກສາ ແລະ ເພີ່ມທະວີທາດແທ້ປະຕິວັດ ແລະ ລັກສະນະນຳໜ້າຂອງພັກ, ກໍ່ສ້າງພັກໃຫ້ປອດໃສຂາວສະອາດ ໝັ້ນຄົງເຂັ້ມແຂງຢ່າງແທ້ຈິງທາງດ້ານການເມືອງ ແນວຄິດ ຄຸນສົມບັດສິນທຳ ການຈັດຕັ້ງ ແລະ ພະນັກງານ, ປ່ຽນແປງໃໝ່ແບບວິທີນຳພາ, ເພີ່ມທະວີສາຍພົວພັນລະຫວ່າງພັກ ແລະ ປະຊາຊົນ, ຮັບປະກັນໃຫ້ພັກມີກຳລັງພຽງພໍເພື່ອນຳພາປະເທດຊາດພັດທະນາຢ່າງບໍ່ຢຸດຢັ້ງ.
ໃນເງື່ອນໄຂພັກກອມມູນິດຫວຽດນາມເປັນພັກກຳອຳນາດ, ເຄື່ອນໄຫວໃນສະພາບແວດລ້ອມແຫ່ງການພັດທະນາເສດຖະກິດຕະຫຼາດ ເປີດປະຕູປະເທດເຊື່ອມໂຍງເຂົ້າກັບສາກົນ; ພະນັກງານ ສະມາຊິກພັກດຳລົງຖານະຕຳແໜ່ງທີ່ສຳຄັນ, ພົວພັນແຕະຕ້ອງກັບສິນຄ້າແລະເງິນຕາຢ່າງເປັນປະຈຳ, ຕິດແໜ້ນກັບຜົນປະໂຫຍດສ່ວນຕົວ, ຕ້ອງປະເຊີນໜ້າກັບດ້ານປິ້ນຂອງກົນໄກຕະຫຼາດ ກັບສິ່ງຈອບອອຍຊວນໃຈບໍ່ຈັກວ່າເທົ່າໃດ, ດັ່ງນັ້ນພວກເຮົາຍິ່ງຕ້ອງເບິ່ງແຍງດູແລຮັກສາທາດແທ້ປະຕິວັດ ແລະ ລັກສະນະນຳໜ້າຂອງພັກ. ຖ້າຫາກບໍ່ຮັບຮູ້ເລື່ອງນີ້ຢ່າງເລິກເຊິ່ງ, ຖ້າຫາກພະນັກງານ ສະມາຊິກພັກບໍ່ຕັ້ງໜ້າພະຍາຍາມຝຶກຝົນຫຼໍ່ຫຼອມ ກໍ່ຈະຖືກເສື່ອມໂຊມປ່ຽນທາດໂດຍງ່າຍ. ສຳລັບພັກກອມມູນິດ, ພັກປະຕິວັດແທ້ຈິງ ທີ່ເຄື່ອນໄຫວເພື່ອພາລະກິດຂອງຊົນຊັ້ນກຳມະກອນ ຂອງຊາດ, ເພື່ອຜົນປະໂຫຍດຂອງປະຊາຊົນນັ້ນ ບັນຫາຮັກສາທາດແທ້ຂອງພັກແມ່ນບັນຫາພື້ນຖານ ແລະ ສຳຄັນທີ່ສຸດ.
ມະຕິກອງປະຊຸມສູນກາງຄັ້ງທີ 4 ສະໄໝທີ XI ກ່ຽວກັບການກໍ່ສ້າງພັກ ໄດ້ຢືນຢັນວ່າຕ້ອງດຳເນີນການກໍ່ສ້າງ ປັບປຸງພັກດ້ວຍຈິດໃຈຕັ້ງໜ້າ ເດັດດ່ຽວ ແລະ ແຂງແຮງ ແນໃສ່ສ້າງໃຫ້ມີບາດກ້າວຫັນປ່ຽນຢ່າງຈະແຈ້ງໃນທຸກດ້ານ, ກີດກັ້ນ ແລະ ຍູ້ຖອຍສະພາບການເຊື່ອມໂຊມ, ປັບປຸງຫຼັກໝັ້ນກ່ຽວກັບຈຸດໝາຍ ອຸດົມການປະຕິວັດ; ເພີ່ມທະວີຄວາມເປັນເອກະພາບທາງດ້ານເຈດຈຳນົງ ແລະ ການກະທຳ; ປັບປຸງການຈັດຕັ້ງໃຫ້ແໜ້ນແຟ້ນ; ເພີ່ມທະວີສາຍພົວພັນສະໜິດແໜ້ນກັບປະຊາຊົນ; ຍົກສູງຄວາມສາມາດນຳພາ ແລະ ກຳລັງສູ້ຮົບຂອງພັກ, ຖືວ່າອັນນີ້ແມ່ນບັນຫາເປັນຕາຍຂອງພັກ ຂອງລະບອບຂອງພວກເຮົາ. ພັກໃດທີ່ເປັນພັກປະຕິວັດແທ້ຈິງ ມີແນວທາງຖືກຕ້ອງ, ມີການຈັດຕັ້ງຢ່າງແໜ້ນແຟ້ນ, ມີຖັນແຖວພະນັກງານ ສະມາຊິກທີ່ປອດໃສ ເປັນແບບຢ່າງ ຕັ້ງອັກຕັ້ງໃຈຕໍ່ໜ້າທີ່ ໃກ້ຊິດຕິດແທດກັບປະຊາຊົນ ໄດ້ຮັບຄວາມສະໜັບສະໜູນຂອງປະຊາຊົນ, ແມ່ນພັກນັ້ນຈະມີກຳລັງແຮງຊະນະເລີດ, ບໍ່ມີອິດທິກຳລັງໃດທີ່ຈະສາມາດກີດຂວາງເສັ້ນທາງນຳພາປະເທດຊາດກ້າວສູ່ຄວາມຈະເລີນພັດທະນາໄດ້.
ປີນີ້ພວກເຮົາສະເຫຼີມສະຫຼອງວັນກໍ່ຕັ້ງພັກໃນກາລະເວລາທີ່ປະເທດເຮົາໄດ້ຜ່ານການປ່ຽນແປງໃໝ່ເກືອບ 30 ປີ. ນັ້ນແມ່ນໄລຍະທາງປະຫວັດສາດອັນສຳຄັນໃນພາລະກິດການພັດທະນາຂອງປະເທດເຮົາ, ຂີດໝາຍຄວາມເຕີບໃຫຍ່ເຂັ້ມແຂງໃນທຸກດ້ານຂອງພັກ ລັດ ແລະ ປະຊາຊົນເຮົາ. ການປ່ຽນແປງໃໝ່ມີຂະໜາດໃຫຍ່ໂຕ ແລະມີຄວາມໝາຍປະຕິວັດ, ແມ່ນຂະບວນວິວັດການດັດປ່ຽນຢ່າງເລິກເຊິ່ງ ຮອບດ້ານ ເຖິງຖອງ, ແມ່ນພາລະກິດອັນໃຫຍ່ຫຼວງຂອງທົ່ວພັກ ທົ່ວປວງຊົນ. ເບິ່ງລວມ, ພາຍຫຼັງ 30 ປີແຫ່ງການປ່ຽນແປງໃໝ່, ປະເທດເຮົາບັນລຸບັນດາຜົນສຳເລັດອັນໃຫຍ່ຫຼວງ ມີຄວາມໝາຍປະຫວັດສາດ.
ຈາກປະເທດທຸກຍາກ ຫຼ້າຫຼັງ, ຖືກຜົນກະທົບຢ່າງໜັກໜ່ວງຈາກສົງຄາມແກ່ຍາວໃນຫຼາຍປີ, ຖືກພວກຈັກກະພັດປິດລ້ອມ ຄວ້ຳບາດ, ຫວຽດນາມໄດ້ບືນຕົວຂຶ້ນ ພັດທະນາເສດຖະກິດໄວພໍຄວນ ຕາມທິດທາງຫັນເປັນອຸສາຫະກຳທັນສະໄໝ, ກໍ່ສ້າງເສດຖະກິດຕະຫຼາດ ກຳນົດທິດສັງຄົມນິຍົມ ອັນມີຫຼາຍພາກສ່ວນເສດຖະກິດ ຫຼາຍຮູບການກຳມະສິດ ແລະ ຕັ້ງໜ້າ ເປັນເຈົ້າການເຊື່ອມໂຍງເຂົ້າກັບສາກົນ. ປະເທດເຮົາບໍ່ພຽງແຕ່ໄດ້ພົ້ນອອກຈາກວິກິດການເສດຖະກິດ - ສັງຄົມ, ໄດ້ມ້າງການປິດລ້ອມ ຄວ້ຳບາດຂອງສັດຕູ, ຜ່ານຜ່າການກະທົບຫຍໍ້ທໍ້ຂອງການວິກິດດ້ານການເງິນເງິນຕາຢູ່ພາກພື້ນ ແລະ ໃນໂລກ ໃນຊຸມປີ 1997 - 1998 ແລະ ການວິກິດດ້ານການເງິນ ຄວາມຊຸດໂຊມຂອງເສດຖະກິດໂລກໃນຊຸມປີຜ່ານມາເທົ່ານັ້ນ ຫາກຍັງຮັກສາສະຖຽນລະພາບຂອງເສດຖະກິດມະຫາພາກໄວ້ໄດ້, ຄວາມເຕີບໂຕ ຈີດີພີ ສະເຫຼ່ຍ 6% - 7%/ຕໍ່ປີ. ແຕ່ປີ 2008 ໄດ້ບັນລຸລະດັບລາຍໄດ້ສະເຫຼ່ຍຫົວຄົນ 1.000 ກວ່າໂດລາສະຫະລັດ, ລື່ນກາຍລະດັບປະເທດດ້ອຍພັດທະນາ, ກາຍເປັນປະເທດກຳລັງພັດທະນາທີ່ມີລາຍໄດ້ປານກາງ; ຊີວິດການເປັນຢູ່ດ້ານວັດຖຸ ແລະ ຈິດໃຈ ຂອງບັນດາຊັ້ນຄົນປະຊາຊົນໄດ້ຮັບການປົວແປງຢ່າງຈະແຈ້ງ. ປີ 2014, ລາຍໄດ້ສະເຫຼ່ຍຫົວຄົນບັນລຸປະມານ 2.000 ໂດລາສະຫະລັດ. ອັດຕາສ່ວນຄອບຄົວທຸກຍາກໄດ້ລົດລົງ ຈາກ 58% ປີ 1993 ລົງເປັນ 8% ປີ 2014. ລະບົບການເມືອງ ແລະ ກຸ່ມກ້ອນມະຫາສາມັກຄີປວງຊົນໄດ້ຮັບການປັບປຸງ ແລະ ເພີ່ມທະວີ; ການເມືອງ - ສັງຄົມມີຄວາມສະຫງົບປອດໄພ; ເອກະລາດ ອຳນາດອະທິປະໄຕຂອງຊາດໄດ້ຮັບການປົກປັກຮັກສາຢ່າງໝັ້ນຄົງ; ການພົວພັນຕ່າງປະເທດນັບມື້ນັບເປີດກວ້າງ, ຖານະບົດບາດຂອງຫວຽດນາມໃນເວທີສາກົນໄດ້ຍົກສູງຂຶ້ນເລື້ອຍໆ. ກຳລັງແຮງສັງລວມຂອງປະເທດໄດ້ເພີ່ມຂຶ້ນຫຼາຍ ອັນໄດ້ສ້າງໃຫ້ມີທ່າ ແລະ ກຳລັງໃໝ່ໃຫ້ປະເທດຊາດກ້າວຂຶ້ນດ້ວຍແງ່ຫວັງອັນດີງາມໃນຕໍ່ໜ້າ.
ສິ່ງທີ່ມີຄວາມໝາຍພິເສດແມ່ນ, ໃນຂະບວນວິວັດດຳເນີນການປ່ຽນແປງໃໝ່, ພັກກອມມູນິດຫວຽດນາມໄດ້ເອົາໃຈໃສ່ຢ່າງເປັນປະຈຳເຖິງການສະຫລຸບສັງລວມພຶດຕິກຳ, ເພີ່ມເຕີນ ຂະຫຍາຍ ບູລະນະແນວທາງປ່ຽນແປງໃໝ່ໃຫ້ສົມບູນເທື່ອລະກ້າວ, ທຳຄວາມກະຈ່າງແຈ້ງຕື່ມອີກກ່ຽວກັບເສັ້ນທາງກ້າວຂຶ້ນສູ່ສັງຄົມນິຍົມ ຢູ່ຫວຽດນາມ. ນີ້ແມ່ນຜົນສຳເລັດແຫ່ງຂະບວນວິວັດການຄົ້ນຄວ້າ ປ່ຽນແປງໃໝ່ຈິນຕະນາການທິດສະດີ ເປີດກວ້າງປະຊາທິປະໄຕ ເສີມຂະຫຍາຍສະຕິປັນຍາຂອງທົ່ວພັກ ທົ່ວປວງຊົນ, ເກັບກຳບັນດາບັນຫາທີ່ເກີດຂຶ້ນຈາກຊີວິດໄດ້ຢ່າງທັນການ. ໃນເວລາຢຶດໝັ້ນຈຸດໝາຍ ອຸດົມການປະຕິວັດ, ຢຶດໝັ້ນບັນດາບັນຫາທີ່ມີລັກສະນະຫຼັກການນັ້ນ ພັກຍາມໃດກໍ່ມີສະຕິປ່ຽນແປງໃໝ່ ປະດິດສ້າງດ້ວຍຕົນເອງ, ເດັດຂາດປະຖິ້ມອັນເກົ່າແກ່ຕ່າງໆທີ່ບໍ່ເໝາະກັບກາລະສະໄໝ, ນັບທັງໃນຂົງເຂດເສດຖະກິດ ກໍ່ຄືໃນຂົງເຂດວັດທະນະທຳ ສັງຄົມ, ນັບທັງຕໍ່ພາຍໃນ ແລະ ຕໍ່ການຕ່າງປະເທດ; ແກ້ໄຂສາຍພົວພັນລະຫວ່າງການປ່ຽນແປງໃໝ່ ຄວາມສະຫງົບ ແລະ ການພັດທະນາໄດ້ເປັນຢ່າງດີ; ເປີດກວ້າງກ້ອນກຳລັງສາມັກຄີປວງຊົນທັງຊາດ ສາມັກຄີສາກົນ, ເຕົ້າໂຮມກຳລັງໃຫ້ແກ່ການສ້າງສາ ແລະ ປົກປັກຮັກສາປະເທດຊາດ. ປ່ຽນແປງໃໝ່ແຕ່ບໍ່ຫ່າງເຫີນຫຼັກການ, ບໍ່ດ້ານດຽວ ຈັດໂພດ, ຫຼືຈາກຂົ້ວນີ້ເຕັ້ນໄປສູ່ຂົ້ວອື່ນແບບງ່າຍດາຍ.
ປີ 2015 ເປັນປີສຸດທ້າຍແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ - ສັງຄົມ 5 ປີ 2011 - 2015; ປີກາງສະໄໝແຫ່ງການປະຕິບັດແຜນຍຸດທະສາດພັດທະນາເສດຖະກິດ - ສັງຄົມ 10 ປີ; ປີຈັດຕັ້ງກອງປະຊຸມໃຫຍ່ຄະນະພັກຂັ້ນຕ່າງໆ ກ້າວເຖິງກອງປະຊຸມໃຫຍ່ຄັ້ງທີ XII ຂອງພັກ; ເປັນປີທີ່ມີຫຼາຍວັນບຸນມະໂຫລານຂອງຊາດ... ສະພາບການສາກົນແລະໃນປະເທດສ້າງໃຫ້ມີໂອກາດ ຄວາມສະດວກດີຫຼາຍຢ່າງ ແຕ່ກໍ່ກໍ່ໃຫ້ເກີດມີຄວາມຫຍຸ້ງຍາກ ສິ່ງທ້າທາຍບໍ່ໜ້ອຍ ຊຶ່ງຮຽກຮ້ອງຕ້ອງການໃຫ້ທົ່ວພັກ ທົ່ວປວງຊົນ ແລະ ທົ່ວກອງທັບເຮົາຕ້ອງມີຄວາມມານະພະຍາຍາມສູງທີ່ສຸດ ແລະ ຕ້ອງມີຄວາມຕັດສິນໃຈສູງ ເພື່ອປະຕິບັດໜ້າທີ່ຂອງປີ 2015 ຢ່າງສຳເລັດມີໄຊ ຊຶ່ງຈຸດໜັກຄື ສູ້ຊົນປະຕິບັດບັນດາໜ້າທີ່ພັດທະນາເສດຖະກິດ - ສັງຄົມໃຫ້ສຳເລັດຜົນໃນລະດັບສູງສຸດ; ເພີ່ມທະວີຄວາມໝັ້ນທ່ຽງຂອງເສດຖະກິດມະຫາພາກ, ຍູ້ແຮງການປະຕິບັດບັນດາການບຸກທະລຸຍຸດທະສາດ, ຈັດວາງໂຄງປະກອບເສດຖະກິດຄືນໃໝ່ໂດຍຕິດກັບປ່ຽນແປງໃໝ່ຕົວແບບເຕີບໂຕເສດຖະກິດ, ຮັບປະກັນຄວາມປອດໄພສັງຄົມ ແລະ ສະຫວັດດີການສັງຄົມ, ປົວແປງຊີວິດການເປັນຢູ່ຂອງປະຊາຊົນໃຫ້ດີຂຶ້ນເລື້ອຍໆ. ຮັກສາເອກະລາດ ອຳນາດອະທິປະໄຕ ແລະ ສິ່ງແວດລ້ອມສັນຕິພາບ ສະຖຽນລະພາບ ເພື່ອສ້າງສາພັດທະນາປະເທດ, ຍູ້ແຮງການພົວພັນຕ່າງປະເທດ. ສຸມໃສ່ຈັດຕັ້ງໃຫ້ສຳເລັດກອງປະຊຸມໃຫຍ່ຄະນະພັກຂັ້ນຕ່າງໆ ສະໄໝ 2015 - 2020, ກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ, ຕິດແໜ້ນກັບການສືບຕໍ່ປະຕິບັດມະຕິກອງປະຊຸມສູນກາງພັກຄັ້ງທີ 4 ວ່າດ້ວຍການກໍ່ສ້າງພັກ, ຄຳສັ່ງສະບັບທີ 03 ຂອງກົມການເມືອງສູນກາງພັກ ວ່າດ້ວຍສືບຕໍ່ຍູ້ແຮງການຮ່ຳຮຽນ ແລະ ເຮັດຕາມແວ່ນແຍງຄຸນສົມບັດຂອງທ່ານປະທານໂຮ່ຈີມິນ, ສ້າງໃຫ້ມີການຫັນປ່ຽນແຂງແຮງກວ່າອີກໃນວຽກງານກໍ່ສ້າງ ປັບປຸງພັກ.
ດ້ວຍຄວາມເບີກບານມ່ວນຊື່ນ ຄວາມເອກອ້າງທະນົງໃຈ, ພວກເຮົາເຊື່ອໝັ້ນວ່າ, ພັກກອມມູນິດຫວຽດນາມຈະສຳເລັດພາລະໜ້າທີ່ຂອງຕົນຢ່າງດີເດັ່ນ. ທົ່ວພັກ ທົ່ວປວງຊົນ ທົ່ວກອງທັບເຮົາຮ່ວມແຮງຮ່ວມໃຈກັນຕັ້ງໜ້າພະຍາຍາມສູ້ຊົນກໍ່ສ້າງປະເທດຫວຽດນາມໃຫ້ເປັນປະເທດສັນຕິພາບ ເອກະລາດ ເອກະພາບ ປະຊາທິປະໄຕ ຮັ່ງມີເຂັ້ມແຂງ ກ້າວຂຶ້ນສັງຄົມນິຍົມ ຢ່າງໜັກແໜ້ນ./.
ໂດຍ ຫງວຽນຝູຈ້ອງ
ເລຂາທິການໃຫຍ່ຄະນະບໍລິຫານງານສູນກາງ
ພັກກອມມູນິດຫວຽດນາມ
* ຫົວຂໍ້ໂດຍວາລະສານກອມມູນິດເປັນຜູ້ແຕ່ງ
