ໄຊຊະນະອັນຍິ່ງໃຫຍ່ຂອງພາລະກິດ ຕໍ່ສູ້ກູ້ຊາດ ຕ້ານອາເມລິກາ ແມ່ນໄຊຊະນະແຫ່ງແນວທາງ ແລະ ສິລະປະການທະຫານ ຫວຽດນາມ ພາຍໃຕ້ການນຳພາອັນຖືກຕ້ອງ ປະດິດສ້າງ ຂອງພັກກອມມູນິດ ຫວຽດນາມ
ວກ - ຄຳສະເໜີຂອງຄະນະບັນນາທິການ: ເນື່ອງໃນໂອກາດສະເຫຼີມສະຫຼອງ ວັນປົດປ່ອຍພາກໃຕ້, ໂຮມປະເທດຫວຽດນາມ ເຂົ້າເປັນເອກະພາບ ຄົບຮອບ 40 ປີ (30 ເມສາ 1975 – 30 ເມສາ 2015), ສະຫາຍຫງວຽນຝູຈ້ອງ, ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ, ເລຂາທິການ ຄະນະພັກການທະຫານສູນກາງ ໄດ້ຂຽນບົດຄວາມທີ່ສຳຄັນ ກ່ຽວກັບໄຊຊະນະອັນຍິ່ງໃຫຍ່ດັ່ງກ່າວນີ້. ວາລະສານກອມມູນິດຂໍເປັນກຽດໄດ້ແນະນຳ ເນື້ອໃນບົດຂຽນຂອງສະຫາຍເລຂາທິການໃຫຍ່.
ລົດຕັງຂອງກອງທັບປົດປ່ອຍບຸກເຂົ້າຢຶດ ທຳນຽບເອກະລາດ ໃນຕອນທ່ຽງວັນທີ 30 ເມສາ 1975. (ພາບ: TTXVN)
ການບຸກໂຈມຕີແລະລຸກຮືຂຶ້ນຂະໜາດໃຫຍ່ ໃນລະດູບານໃໝ່ປີ 1975 ໄດ້ສຳເລັດສິ້ນສຸດລົງດ້ວຍໄຊຊະນະອັນສົມບູນ ຂອງການຕໍ່ສູ້ຕ້ານອາເມລິກາເພື່ອກູ້ຊາດອັນຍິ່ງໃຫຍ່ ຂອງກອງທັບແລະປະຊາຊົນເຮົາ, ອັນໄດ້ສ້າງເປັນບາດລ້ຽວໃນປະຫວັດສາດຂອງຊາດ, ໄຂສັງກາດໃໝ່ໃຫ້ປະເທດຫວຽດນາມ - ສັງກາດແຫ່ງຄວາມເປັນເອກະລາດ ເອກະພາບ, ທົ່ວປະເທດກ້າວຂຶ້ນສູ່ສັງຄົມນິຍົມ. ໄຊຊະນະຂອງການຕໍ່ສູ້ກູ້ຊາດຕ້ານອາເມລິກາໄດ້ສະແດງໃຫ້ເຫັນຢ່າງເລິກເຊິ່ງເຖິງ ກຳລັງແຮງຂອງລັດທິວິລະຊົນປະຕິວັດ, ຫຼັກໝັ້ນອັນກ້າແກ່ນ ແລະ ສະຕິປັນຍາຫວຽດນາມໃນຍຸກສະໄໝໂຮ່ຈີມິນ. ນັ້ນກໍແມ່ນເຫດການທີ່ມີຂະໜາດສາກົນອັນໃຫຍ່ຫຼວງ ແລະ ມີລັກສະນະຍຸກສະໄໝທີ່ເລິກເຊິ່ງ. ໄຊຊະນະດັ່ງກ່າວເກີດມາຈາກຫຼາຍປັດໄຈ, ໃນນັ້ນປັດໄຈທີ່ຕັດສິນກວ່າໝູ່ໝົດແມ່ນ ຍ້ອນມີການນຳພາອັນຖືກຕ້ອງ ປະດິດສ້າງຂອງພັກ, ເສີມຂະຫຍາຍສິນລະປະການທະຫານອັນພິເສດສະເພາະຂອງຫວຽດນາມຂຶ້ນເຖິງລະດັດສູງ.
ການຕໍ່ສູ້ຕ້ານອາເມລິກາເພື່ອກູ້ຊາດຂອງປະຊາຊົນເຮົາ (1954 - 1975) ແມ່ນການສືບຕໍ່ການປະຕິວັດຊາດ ປະຊາທິປະໄຕປະຊາຊົນ. ໃນເງື່ອນໄຂທີ່ປະເທດຊາດຖືກຕັກແບ່ງໂດຍຊົ່ວຄາວອອກເປັນສອງພາກເໜືອ-ໃຕ້ນັ້ນ, ພັກກອມມູນິດຫວຽດນາມ ແລະ ທ່ານປະທານໂຮ່ຈີມິນ ໄດ້ອີງໃສ່ສະພາບການສາກົນ, ສະພາບການໃນປະເທດ, ການຊັ່ງຊາທ່າແລະກຳລັງ ລະຫວ່າງເຮົາກັບສັດຕູ, ກຳແໜ້ນວິທີວິທະຍາຂອງລັດທິມາກ - ເລນິນ, ວາງແນວທາງຕໍ່ຕ້ານທີ່ເປັນເອກະລາດ ເປັນເຈົ້າຕົນເອງ ຖືກຕ້ອງ ປະດິດສ້າງອອກມາ ແລະ ຈັດຕັ້ງການປະຕິບັດແນວທາງດັ່ງກ່າວຢ່າງສອດຄ່ອງເໝາະສົມກັບເງື່ອນໄຂອັນລະອຽດ ແລະ ຄວາມຂະຫຍາຍຕົວຂອງການປະຕິວັດຫວຽດນາມໃນໄລຍະໃໝ່.
ຈຸດພິເສດໃຫຍ່ທີ່ສຸດ ແລະກໍແມ່ນຈຸດທີ່ເປັນເອກະລັກຂອງການປະຕິວັດຫວຽດນາມ ແຕ່ເດືອນກໍລະກົດປີ 1954 ເຖິງເດືອນພຶດສະພາປີ 1975, ນັ້ນແມ່ນພັກກອມມູນິດຫວຽດນາມ ໄດ້ປະຕິບັດແນວທາງການເມືອງ, ແນວທາງການທະຫານທີ່ເປັນເອກະລາດ ເປັນເຈົ້າຕົນເອງ, ເຊີດຊູຄັນທຸງເອກະລາດແຫ່ງຊາດ ແລະ ລັດທິສັງຄົມນິຍົມ, ດຳເນີນສອງຍຸດທະສາດການປະຕິວັດໄປພ້ອມໆກັນ ຄືການປະຕິວັດຊາດ ປະຊາທິປະໄຕຢູ່ພາກໃຕ້ ແລະ ການປະຕິວັດສັງຄົມນິຍົມຢູ່ພາກເໜືອ, ເພື່ອແນໃສ່ຈຸດໝາຍລວມອັນໜຶ່ງຄື ສຳເລັດການຍາດເອົາເອກະລາດແຫ່ງຊາດ ແລະ ເຕົ້າໂຮມປະເທດຊາດເຂົ້າເປັນເອກະພາບ, ນຳເອົາທົ່ວປະເທດຂຶ້ນສູ່ສັງຄົມນິຍົມ.
ພັກກອມມູນິດຫວຽດນາມກຳນົດແຈ້ງ: ພາກເໜືອເປັນແນວຫຼັງໃຫຍ່, ພາລະກິດການປະຕິວັດສັງຄົມນິຍົມຢູ່ພາກເໜືອ ມີບົດບາດຕັດສິນກວ່າໝູ່ໝົດຕໍ່ພາລະກິດການປະຕິວັດຂອງທົ່ວປະເທດ; ພາກໃຕ້ແມ່ນແນວໜ້າໃຫຍ່, ການປະຕິວັດຢູ່ພາກໃຕ້ມີຄຸນປະໂຫຍດຕັດສິນໂດຍກົງຕໍ່ການປົດປ່ອຍພາກໃຕ້. ສາຍພົວພັນລະຫວ່າງສອງຍຸດທະສາດການປະຕິວັດຢູ່ສອງພາກເໜືອ - ໃຕ້ ແມ່ນສາຍພົວພັນແບບອົງຄະທາດ, ຕິດພັນແໜ້ນແຟ້ນນຳກັນ, ຊຸກຍູ້ ແລະ ຊ່ວຍເຫຼືອຊຶ່ງກັນແລະກັນ ເພື່ອພ້ອມກັນຂະຫຍາຍຕົວ. ນັ້ນແມ່ນຈຸດພິເສດສະເພາະທີ່ບໍ່ເຄີຍມີມາກ່ອນໃນປະຫວັດສາດ ແລະ ແມ່ນຜົນສຳເລັດອັນໃຫຍ່ຫຼວງຂອງພັກກອມມູນິດຫວຽດນາມ; ພ້ອມກັນນັ້ນ, ມັນກໍແມ່ນສາເຫດຕົ້ນຕໍ, ປັດໄຈຕັດສິນໄຊຊະນະຂອງພາລະກິດຕໍ່ສູ້ຕ້ານອາເມລິກາເພື່ອກູ້ຊາດອັນຍາວນານ, ຫຍຸ້ງຍາກສັບສົນ, ທໍລະຫົດດຸເດືອດຂອງປະຊາຊົນຫວຽດນາມ.
ການກຳນົດແນວທາງການປະຕິວັດຢ່າງເປັນເອກະລາດ ເປັນເຈົ້າຕົນເອງ ຖືກຕ້ອງ ແລະ ປະດິດສ້າງນັ້ນ ແມ່ນໄດ້ສະແດງໃຫ້ເຫັນເຖິງສາຍຕາເບິ່ງກວ້າງມອງໄກ, ຈິນຕະນາການຍຸດທະສາດ ແລະ ຄວາມສາມາດສູ້ຮົບເກັ່ງຂອງພັກ, ເປັນຕົ້ນແມ່ນໃນເວລານາທີທີ່ມີລັກສະນະບາດລ້ຽວຂອງການຕໍ່ຕ້ານ. ຕໍ່ໜ້າສະພາບການທີ່ອຳນາດການປົກຄອງ ໂງດິ່ງຢ້ຽມ ທີ່ເປັນລູກມືຂອງອາເມລິກາ ປະຕິບັດນະໂຍບາຍ “ກ່າວປະນາມກອມມູນິດ”, “ດັບສູນກອມມູນິດ”, ລາກຈັກຕັດຄໍຄົນໄປທົ່ວພາກໃຕ້, ປາບປາມບັນດານັກຮົບປະຕິວັດ ແລະມະຫາຊົນຢ່າງປ່າເຖື່ອນ, ພາໃຫ້ຂະບວນການປະຕິວັດພົບຄວາມຫຍຸ້ງຍາກ ບໍ່ຂະຫຍາຍຕົວໄດ້ນັ້ນ ໃນເດືອນມັງກອນປີ 1959, ຄະນະບໍລິຫານງານສູນກາງພັກໄດ້ຈັດຕັ້ງກອງປະຊຸມຄັ້ງທີ 15 (ກອງປະຊຸມເປີດກວ້າງ), ພາຍໃຕ້ການເປັນປະທານຂອງທ່ານປະທານໂຮຈີມິນ ຊຶ່ງກອງປະຊຸມໄດ້ກຳນົດເສັ້ນທາງກ້າວຂຶ້ນຂອງການປະຕິວັດພາກໃຕ້, ກຳນົດແຈ້ງຈຸດໝາຍ ແລະ ວິທີການປະຕິວັດ, ສາຍພົວພັນລະຫວ່າງສອງຍຸດທະສາດປະຕິວັດຢູ່ສອງພາກເໜືອ - ໃຕ້, ລະຫວ່າງການປະຕິວັດຫວຽດນາມ ແລະ ການປະຕິວັດໂລກ ເພື່ອແນໃສ່ປົດປ່ອຍພາກໃຕ້, ປົກປັກຮັກສາພາກເໜືອ, ໂຮມປະເທດຊາດເຂົ້າເປັນອັນໜຶ່ງອັນດຽວ.
ມະຕິກອງປະຊຸມສູນກາງພັກຄັ້ງທີ 15 ໄດ້ຊີ້ແຈ້ງເສັ້ນທາງແຫ່ງການຂະຫຍາຍຕົວອັນພື້ນຖານຂອງການປະຕິວັດຫວຽດນາມຢູ່ພາກໃຕ້ແມ່ນ ລຸກຮືຂຶ້ນຍາດອຳນາດການປົກຄອງມາມືປະຊາຊົນ; ນອກຈາກນັ້ນ ບໍ່ມີເສັ້ນທາງອື່ນໃດເລີຍ. ແຜນນະໂຍບາຍອັນຖືກຕ້ອງນັ້ນຂອງພັກໄດ້ສ້າງໃຫ້ມີ “ກະແສລົມໃໝ່”, ບັນຍາກາດໃໝ່, ກາຍເປັນກຳລັງໝູນຊຸກດັນໃຫ້ການປະຕິວັດພາກໃຕ້ກ້າວຂຶ້ນຢ່າງໜັກແໜ້ນ.
ເລີ່ມຕົ້ນແມ່ນຂະບວນການໂດ່ງເຂີຍ (ຂະບວນການລຸກຮືຂຶ້ນພ້ອມບາດດຽວ) ໃນທ້າຍປີ 1959, ຫຼັງຈາກນັ້ນ ກໍ່ຂະຫຍາຍຕົວຢ່າງໄວ ຂຶ້ນເປັນຂະບວນການໂດ່ງເຂີຍຂະໜາດໃຫຍ່ໃນທົ່ວພາກໃຕ້. ໄຊຊະນະຂອງຂະບວນການໂດ່ງເຂີຍຂະໜາດໃຫຍ່ ໄດ້ສ້າງໃຫ້ມີບາດລ້ຽວໃໝ່ ພາໃຫ້ການປະຕິວັດພາກໃຕ້ຫັນປ່ຽນຈາກທ່າຮັກສາກຳລັງ ໄປເປັນທ່າບຸກໂຈມຕີ. ນີ້ແມ່ນການເລີ່ມຕົ້ນຂອງການຕໍ່ສູ້ຕ້າອາເມລິກາເພື່ອກູ້ຊາດ ທີ່ເປັນເອກະລັກພິເສດສະເພາະ ແລະ ປະດິດສ້າງທີ່ສຸດ; ພ້ອມກັນນັ້ນ ກໍ່ເປັນພື້ນຖານເພື່ອໃຫ້ພັກເຮົາສືບຕໍ່ຂະຫຍາຍການສົງຄາມທົ່ວປວງຊົນ ຮອບດ້ານ ແລະ ຕີເອົາຊະນະບັນດາຍຸດທະສາດສົງຄາມຂອງສັດຕູ: “ສົງຄາມພິເສດ” (1961 - 1965), “ສົງຄາມພາກສ່ວນ” (1965 - 1968), “ການຫັນສົງຄາມເປັນຂອງຫວຽດນາມ” (1969 - 1973) ຂອງຈັກກະພັດອາເມລິກາ, “ຕີໃຫ້ອາເມລິກາຕ້ອງປົບໜີ”, ກ້າວເຖິງຂັ້ນ “ຕີໃຫ້ພວກຫຸ່ນຕ້ອງລົ້ມທະລາຍ”, ປົດປ່ອຍພາກໃຕ້ໂດຍສົມບູນ, ໂຮມປະເທດຊາດເຂົ້າເປັນອັນໜຶ່ງອັນດຽວ.
ພ້ອມໆກັນກັບການວາງແນວທາງການເມືອງ, ແນວທາງການທະຫານທີ່ຖືກຕ້ອງ ປະດິດສ້າງອອກມານັ້ນ, ພັກກອມມູນິດຫວຽດນາມໄດ້ຢຶດໝັ້ນວິທີການປະຕິວັດດ້ວຍຄວາມຮຸນແຮງສັງລວມ ຊຶ່ງປະກອບດ້ວຍສອງກຳລັງຕົ້ນຕໍຄື ກຳລັງການເມືອງຂອງມະຫາຊົນ ແລະກຳລັງປະກອບອາວຸດປະຊາຊົນ, ສົມທົບຢ່າງແໜ້ນແຟ້ນການຕໍ່ສູ້ດ້ານການເມືອງ ກັບຕໍ່ສູ້ດ້ວຍກຳລັງປະກອບອາວຸດ ໃນຕະຫຼອດການຕໍ່ສູ້ຕ້ານອາເມລິກາເພື່ອກູ້ຊາດ. ພ້ອມກັນນັ້ນ ກໍພະຍາຍາມປະຕິບັດແນວຄິດຍຸດທະສາດບຸກ. ແນວຄິດດັ່ງກ່າວບໍ່ພຽງແຕ່ໄດ້ປະຕິບັດໃນເວລາທີ່ສັດຕູ “ລົງຂັ້ນໃດ” ເທົ່ານັ້ນ ຫາກຍັງໄດ້ປະຕິບັດໃນເວລາທີ່ພວກມັນ “ໄຕ່ຂັ້ນໃດ” ສົງຄາມອີກນຳ; ແລະ ບໍ່ພຽງແຕ່ຕໍ່ສົງຄາມປະຕິວັດຢູ່ພາກໃຕ້, ຫາກຍັງໄດ້ໃຊ້ໃນການສູ້ຮົບປົກປັກຮັກສາພາກເໜືອສັງຄົມນິຍົມອີກນຳ.
ຍຸດທະສາດບຸກໂຈມຕີໄດ້ຮັບການປະຕິບັດໃນທຸກຈຸດເວລາ, ໃນທຸກເງື່ອນໄຂ ສະພາວະການ, ດ້ວຍທິດນຳ: “ຕີໃຫ້ສັດຕູຖອຍເປັນແຕ່ລະກ້າວ, ຕີໃຫ້ມັນພັງທະລາຍລົງເປັນແຕ່ລະພາກສ່ວນ, ດຶງສັດຕູລົງຂັ້ນໃດແຕ່ລະຂັ້ນ, ກ້າວເຖິງຂັ້ນຕີໃຫ້ສັດຕູປະລາໄຊຢ່າງຮາບຄາບ, ຍາດເອົາໄຊຊະນະອັນຕັດສິນໃນການຕໍ່ສູ້ກູ້ຊາດ ຕ້ານອາເມລິກາ”.
ພາຍຫຼັງທີ່ສັນຍາປາຣີໄດ້ຮັບການລົງນາມ (ວັນທີ 27 ມັງກອນ 1973), ກອງທະຫານສົ່ງນອກອາເມລິກາຈຳເປັນຕ້ອງພັບມ້ຽນທຸງ ຖອນຕົວອອກຈາກພາກໃຕ້ຫວຽດນາມ (ວັນທີ 29 ມີນາ 1973), ສະຖານະການສົງຄາມຫັນປ່ຽນຢ່າງມີປະໂຫຍດໃຫ້ແກ່ພວກເຮົາ. ກຳແໜ້ນກາລະໂອການຍຸດທະສາດທີ່ໄດ້ໄຂອອກມາພາຍຫຼັງເກືອບສອງປີແຫ່ງການສູ້ຮົບ, ກອງປະຊຸມສູນກາງພັກຄັ້ງທີ 21 ສະໄໝທີ III ຊຶ່ງປະຊຸມເປັນສອງບັ້ນ (ບັ້ນທີ I ແຕວັນທີ 19 ມິຖຸນາ ຮອດວັນທີ 6 ກໍລະກົດ 1973, ບັ້ນທີ II ແຕ່ວັນທີ 1 ຕຸລາ ຮອດວັນທີ 4 ຕຸລາ 1973) ໄດ້ຢືນຢັນ ແລະປັບປຸງຄວາມຕັດສິນໃຈປົກປ່ອຍພາກໃຕ້, ໂຮມປະເທດຊາດເຂົ້າເປັນອັນໜຶ່ງອັນດຽວໃນເວລາໄວທີ່ສຸດເທົ່າທີຈະໄວໄດ້.
ປີ 1974, ກອງທັບ ແລະ ປະຊາຊົນເຮົາໄດ້ເປີດການບຸກໂຈມຕີເພື່ອສ້າງທ່າດີໃນທຸກໆສະໜາມຮົບພາກໃຕ້, ເຮັດໃຫ້ສັດຕູຕ້ອງຮັບມື ຖືກຕົກໃນທ່າຮັບ. ພາຍຫຼັງໄຊຊະນະຢູ່ ເທື້ອງດຶກ ດົງຊວ່າຍ, ເປັນຕົ້ນແມ່ນໄຊຊະນະຂອງຍຸດທະການທາງເລກທີ 14 - ເຝືອກລອງ, ໄດ້ສ້າງພື້ນຖານເພື່ອໃຫ້ກົມການເມືອງຄະນະບໍລິຫານງານສູນກາງພັກ ຕັດສິນໃຈປະຕິບັດແຜນຍຸດທະສາດປົດປ່ອຍພາກໃຕ້ ໃນສອງປີ 1975 - 1976, ພ້ອມກັນນັ້ນກໍໄດ້ວາງແຜນສຳລອງໄວ້ ຖ້າຫາກໂອກາດອຳນວຍກໍ່ຈະປົດປ່ອຍພາກໃຕ້ໃນປີ 1975, ຊ້ຳບໍ່ໜຳ ຈະປົດປ່ອຍພາກໃຕ້ກ່ອນລະດູຝົນປີ 1975.
ໃນການຕໍ່ສູ້ກູ້ຊາດ ຕ້ານອາເມລິກາ, ພາຍໃຕ້ການນຳພາຂອງພັກ, ສິນລະປະການທະຫານ ແລະ ສົງຄາມປະຊາຊົນຫວຽດນາມ ໄດ້ຂະຫຍາຍຕົວຂຶ້ນເຖິງຍອດສູງ. ປັດໄຈທີ່ຮັບປະກັນໃຫ້ສົງຄາມປະຊາຊົນຂະຫຍາຍຕົວຢ່າງບໍ່ຢຸດຢັ້ງນັ້ນ ແມ່ນກຳລັງປະກອບອາວຸດປະຊາຊົນ ທີ່ປະກອບດ້ວຍທະຫານສານປະເພດ: ທະຫານຫຼວງ, ທະຫານທ້ອງຖິ່ນ ແລະ ທະຫານລາດກອງຫຼອນ ຊຶ່ງໄດ້ຮັບການກໍ່ສ້າງໃຫ້ໝັ້ນຄົງເຂັ້ມແຂງ, ໄດ້ຈັດວາງຢ່າງກວ້າງຂວາງທົ່ວເຖິງ; ໃນນັ້ນບັນດາເຫຼົ່າທະຫານຫຼວງຮັກສາບົດບາດເປັນຫຼັກແຫຼ່ງໃນບັນດາຍຸດທະການ, ປະຕິບັດການສູ້ຮົບແບບປະສານເຫຼົ່າພົນເຫຼົ່າທັບຂະໜາດໃຫຍ່.
ກຳແໜ້ນກົດເກນສົງຄາມ, ໝູນໃຊ້ ແລະ ປະຕິບັດສິລະປະການທະຫານຂອງສົງຄາມປະຊາຊົນຢ່າງປະດິດສ້າງ, ພວກເຮົາໄດ້ເຮັດໃຫ້ສະພາບການສະໜາມຮົບປ່ຽນແປງເທື່ອລະກ້າວ ຕາມທິດທີ່ມີຜົນດີໃຫ້ແກ່ຕົນ, ຍາມໃດກໍ່ຕີສັດຕູດ້ວຍທ່າແຮງ, ທ່າເປັນເຈົ້າການ, ທ່າບັງເອີນກະທັນຫັນ.
ຈຸດທີ່ເປັນເອກະລັກພິເສດສະເພາະຂອງສົງຄາມປະຊາຊົນຍັງໄດ້ສະແດງອອກຢູ່ທີ່ ໄດ້ສົມທົບຢ່າງແໜ້ນແຟ້ນບັນດາປັດໄຈ “ທ່າ, ພະລັງ, ກາລະໂອກາດ, ອຸບາຍ” ໃນແຕ່ລະບັ້ນຮົບ, ແຕ່ລະຍຸດທະການຢ່າງໄຫວພິບ, ເຮັດໃຫ້ສັດຕູບໍ່ສາມາດຮູ້ໄດ້ທິດທາງ, ປາຍແຫຼມ, ກຳລັງ ແລະ ກຳລັງແຮງບຸກໂຈມຕີຂອງເຮົາ. ນັ້ນແມ່ນພື້ນຖານເພື່ອໃຫ້ພັກກອມມູນິດຫວຽດນາມ ຕັ້ງໝັ້ນໃນການປະຕິບັດທິດນຳຍຸດທະສາດ: ຕີໃຫ້ທະຫານສັດຕູພັງທະລາຍລົງເປັນແຕ່ລະພາກສ່ວນ, ຍາດເອົາໄຊຊະນະເທື່ອລະກ້າວ, ກ້າວເຖິງຂັ້ນຕີໃຫ້ສັດຕູປະລາໄຊຢ່າງຮາບຄາບ, ຍາດເອົາໄຊຊະນະສຸດທ້າຍ ດ້ວຍການບຸກໂຈມຕີແລະລຸກຮືຂຶ້ນຂະໜາດໃຫຍ່ ໃນລະດູບານໃໝ່ປີ 1975.
ພັກກອມມູນິດຫວຽດນາມໄດ້ໃຫ້ຄວາມສຳຄັນເປັນພິເສດ ແລະ ເສີມຂະຫຍາຍປະສິດທິຜົນຂອງວຽກງານພັກ ວຽກງານການເມືອງຢູ່ໃນກອງທັບ, ໃນບັນດາຍຸດທະການ. ໂດຍສືບຕໍ່ບົດຮຽນປະສົບການໃນວຽກງານພັກ ວຽກງານການເມືອງ ຊຶ່ງໄດ້ດຳເນີນແຕ່ເມື່ອກອງທັບຫວຽດນາມຫາກໍ່ໄດ້ສ້າງຕັ້ງຂຶ້ນ ແລະ ໃນການຕໍ່ສູ້ຕ້ານພວກລ່າເມືອງຂຶ້ນຝຣັ່ງນັ້ນ, ວຽກງານພັກ ວຽກງານການເມືອງໃນການຕໍ່ສູ້ກູ້ຊາດ ຕ້ານອາເມລິກາໄດ້ຂະຫຍາຍຕົວຂຶ້ນສູ່ບາດກ້າວໃໝ່ ແລະ ອຸດົມສົມບູນໄປດ້ວຍດ້ານຕ່າງໆຫຼາຍດ້ານ, ໄດ້ເປັນ “ວິນຍານ, ສາຍຊີວິດ” ອັນແທ້ຈິງຂອງກອງທັບຫວຽດນາມ.
ອີງໃສ່ສະພາບຕົວຈິງຢູ່ສະໜາມຮົບ, ວຽກງານພັກ ວຽກງານການເມືອງ ໄດ້ເຕົ້າໂຮມລວມສູນໃສ່ການສ້າງຄວາມຕັດສີນໃຈສູ້ຮົບ, ເຮັດໃຫ້ທົ່ວກອງທັບເຫັນດີເປັນເອກະພາບຢ່າງສູງກັບແນວທາງ ແຜນນະໂຍບາຍຂອງພັກ, ນັບທັງກ່ຽວກັບຈຸດໝາຍຍຸດທະສາດ, ກາລະໂອກາດຍຸດທະສາດ, ທິດນຳຊີ້ນຳຍຸທະສາດ, ແບບວິທີສູ້ຮົບເພື່ອຍາດເອົາໄຊຊະນະ. ເປັນເຈົ້າການຊີ້ນຳເພື່ອເຮັດເປັນຢ່າງດີພາລະບົດບາດ “ກອງກຳລັງປະຕິບັດງານ” ຢູ່ເຂດປົດປ່ອຍໃໝ່, ເສີມຂະຫຍາຍບົດບາດຂອງກຳລັງປະກອບອາວຸດທ້ອງຖິ່ນ, ຂອງປະຊາຊົນໃນພື້ນທີ່ທີ່ມີຍຸດທະການ.
ວຽກງານພັກ ວຽກງານການເມືອງໄດ້ກຳນົດທິດແນວຄິດຂອງທະຫານໂດຍກົງ, ໄດ້ປຸກຕື່ນ ແລະ ເສີມຂະຫຍາຍມູນເຊື້ອຮັກຊາດ, ກຳລັງແຮງຂອງລະບອບສັງຄົມນິຍົມທີ່ດີເດັ່ນຢູ່ພາກເໜືອ, ນ້ຳໃຈຕໍ່ສູ້ຢ່າງເດັດດ່ຽວ ບໍ່ຍອມຈຳນົນຂອງພີ່ນ້ອງຮ່ວມຊາດພາກໃຕ້ “ທີ່ເປັນກຳແພງເພັດຂອງຊາດ”. ຜ່ານສິ່ງດັ່ງກ່າວນັ້ນ ສ້າງກຳລັງໝູນທາງດ້ານການເມືອງ - ຈິດໃຈອັນໃຫຍ່ຫຼວງໃຫ້ພີ່ນ້ອງຮ່ວມຊາດ ແລະ ນັກຮົບໃນທົ່ວປະເທດ ໃນການລອງແຮງຕໍ່ສູ້ຢ່າງດຸເດືອດທີ່ສຸດກັບສັດຕູຜູ້ຮຸກຮານ. ການເຄື່ອນໄຫວວຽກງານພັກ ວຽກງານການເມືອງຍັງໄດ້ປະກອບສ່ວນເຂົ້າໃນການກໍ່ສ້າງໃຫ້ພະນັກງານ ນັກຮົບມີວິທີຈິນຕະນາການການທະຫານປະຕິວັດ ວິທະຍາສາດ; ແກ້ໄຂຢ່າງຖືກຕ້ອງສາຍພົວພັນລະຫວ່າງຄົນ ແລະ ອາວຸດ, ລະຫວ່າງການເມືອງ ແລະ ການທະຫານ, ລະຫວ່າງປະຊາທິປະໄຕ ລະບຽບວິໄນ ແລະ ຄວາມສາມັກຄີ.
ກ່ຽວກັບການຈັດຕັ້ງ ກໍ່ສ້າງພັກ ແມ່ນໄດ້ສຸມໃສ່ການກໍ່ສ້າງ “ໜ່ວຍພັກເຮັດວຽກງານດີ 4 ປະການ” ໂດຍສົມທົບກັບການກໍ່ສ້າງບັນດາກອງພັນໃຫຍ່, ກອງພົນທີ່ໝັ້ນຄົງເຂັ້ມແຂງ; ເພີ່ມທະວີການຝຶກຝົນຫຼໍ່ຫຼອມສະມາຊິກພັກ ໂດຍຕິດກັບຝຶກຝົນຫຼໍ່ຫຼອມພະນັກງານ; ຮັກສາການດຳເນີນຊີວິດພັກ ແລະ ການເຄື່ອນໄຫວເປັນປົກກະຕິຂອງບັນດາອົງການພັກໃນເງື່ອນໄຂສົງຄາມ; ເອົາໃຈໃສ່ປະຕິບັດນະໂຍບາຍເບິ່ງແຍງດູແລຊ່ວຍເຫຼືອທະຫານ ແລະ ແນວຫຼັງຂອງກອງທັບ. ຖັນແຖວພະນັກງານການເມືອງຂັ້ນຕ່າງໆໄດ້ຮັບການປັບປຸງບູລະນະ, ບຳລຸງທາງດ້ານຄຸນສົມບັດສິນທຳ ແລະ ຄວາມສາມາດ ດັ່ງນັ້ນຈຶ່ງມີຄວາມຂະຫຍາຍຕົວຢ່າງໄວວາ ແລະ ຢັ້ງຢືນບົດບາດສຳຄັນຂອງຕົນໃນການສູ້ຮົບຕົວຈິງ.
ພິເສດ, ພັກກອມມູນິດຫວຽດນາມໄດ້ເອົາໃຈໃສ່ທີ່ສຸດເຖິງການກໍ່ສ້າງຖັນແຖວພະນັກງານຂັ້ນຍຸດທະການ, ຍຸດທະສາດທີ່ມີ “ຈິດໃຈ” ພຽງພໍ, ມີ “ລະດັບຄວາມສາມາດ” ແລະ ບົດຮຽນພຽງພໍ ໃນການຊີ້ນຳການສູ້ຮົບ. ຮູບພາບຂອງຜູ້ບັງຄັບບັນຊາການ, ຜູ້ຮັບຜິດຊອບການເມືອງບັນດາກອງພົນທະຫານຫຼວງ ທີ່ເປັນແບບຢ່າງ, ບຸກບືນກ້າແກ່ນ, ຕົກລົງຊີ້ຂາດ, ສຸດອົກສຸດໃຈຕໍ່ພາລະກິດປົດປ່ອຍພາກໃຕ້, ໂຮມປະເທດຊາດເຂົ້າເປັນອັນໜຶ່ງອັນດຽວນັ້ນ ແມ່ນສົມກຽດທີ່ສຸດເພື່ອໃຫ້ພວກເຮົາເຄົາລົບນັບຖື ແລະ ຮ່ຳຮຽນປະຕິບັດຕາມ.
ການເຄື່ອນໄຫວຢ່າງມີປະສິດທິຜົນຂອງວຽກງານພັກ ວຽກງານການເມືອງ ພ້ອມກັບວຽກງານດ້ານອື່ນໆ ໄດ້ເຮັດໃຫ້ແນວທາງອັນຖືກຕ້ອງ ປະດິດສ້າງຂອງພັກລົງເລິດເຂົ້າໃນພຶດຕິກຳ ແຫ່ງການສູ້ຮົບຂອງກອງທັບ ແລະ ປະຊາຊົນເຮົາ, ມັນໄດ້ສ້າງໃຫ້ມີກຳລັງແຮງດ້ານການເມືອງ - ຈິດໃຈອັນໃຫຍ່ຫຼວງ, ເປັນຕົ້ນແມ່ນໃນຈຸດເວລາຫົວລ້ຽວຫົວຕໍ່, ມີລັກສະນະຕັດສິນ.
ມະຫາໄຊໃນລະດູບານໃໝ່ປີ 1975 ແມ່ນຜົນງານອັນຍິ່ງໃຫຍ່ຂອງປະຊາຊົນເຮົາ, ສະແດງໃຫ້ເຫັນເຖິງເຈດຈຳນົງ ຄວາມປາຖະໜາອັນແຮງກ້າຕໍ່ຄວາມເປັນເອກະລາດ ແລະເອກະພາບແຫ່ງຊາດ ຂອງປະຊາຊົນເຮົາໃນຍຸກສະໄໝໂຮ່ຈີມິນ. ດ້ວຍແນວທາງຕໍ່ຕ້ານທີ່ເປັນເອກະລາດ ເປັນເຈົ້າຕົນເອງ, ພັກກອມມູນິດຫວຽດນາມສາມາດລະດົມກຳລັງແຮງຂອງທົ່ວປະເທດໄດ້ໃນລະດັບສູງທີ່ສຸດ, ອັນປະກອບດ້ວຍກຳລັງແຮງວັດຖຸ ແລະ ກຳລັງແຮງດ້ານການເມືອງ - ຈິດໃຈ, ກຳລັງແຮງແຫ່ງມູນເຊື້ອຮັກຊາດອັນແຮງກ້າ ຂອງປະເທດທີ່ຜ່ານຫຼາຍພັນປີແຫ່ງອາລະຍະທຳ ເພື່ອໃຊ້ໃຫ້ແກ່ການຕໍ່ສູ້ຕ້ານຈັກກະພັດອາເມລິກາທີ່ຫຍຸ້ງຍາກຍາວນານ ແລະທໍລະຫົດດຸເດືອດ.
ຍົກສູງຄັນທຸງເອກະລາດແຫ່ງຊາດ ແລະ ລັດທິສັງຄົມນິຍົມ, ດ້ວຍທັດສະນະສາມັກຄີສາກົນອັນຜ່ອງໃສ ບໍລິສຸດໃຈ, ພັກກອມມູນິດຫວຽດນາມ ໄດ້ເສີມຂະຫຍາຍປະສິດທິຜົນຂອງກຳລັງແຮງແຫ່ງຊາດ ສົມທົບກັບກຳລັງແຮງແຫ່ງຍຸກສະໄໝ. ພັກ ລັດ ກອງທັບ ແລະ ປະຊາຊົນຫວຽດນາມ ຍາມໃດກໍ່ຮູ້ບຸນຄຸນໂດຍບໍ່ມີວັນລືມກ່ຽວກັບການຊ່ວຍເຫຼືອຢ່າງສຸດອົກສຸດໃຈ ຂອງປະຊາຊົນຜູ້ກ້າວໜ້າໃນທົ່ວໂລກ, ຂອງບັນດາປະເທດສັງຄົມນິຍົມອ້າຍນ້ອງ ເປັນຕົ້ນແມ່ນສະຫະພາບໂຊວຽດ ຈີນ ຊຶ່ງໄດ້ໃຫ້ການຊ່ວຍເຫຼືອແກ່ການຕໍ່ສູ້ທີ່ຖືກສິນທຳຂອງຊາດເຮົາ; ພິເສດແມ່ນຄວາມສາມັກຄີ ສຳພັນທະພາບພ້ອມກັນສູ້ຮົບຕ້ານສັດຕູລວມ ຂອງປະຊາຊົນສາມປະເທດຫວຽດນາມ - ລາວ - ກຳປູເຈຍ. ຄວາມສະໜັບສະໜູນອັນໃຫຍ່ຫຼວງທາງດ້ານວັດຖຸ ແລະ ຈິດໃຈຂອງວົງຄະນະຍາດສາກົນ ແມ່ນປັດໃຈສຳຄັນທີ່ສຸດທີ່ປະກອບເປັນໄຊຊະນະຂອງການຕໍ່ສູ້ຕ້ານອາເມລິກາເພື່ອກູ້ຊາດຂອງຫວຽດນາມ.
*
* *
ປັດຈຸບັນນີ້, ສະພາບການໂລກ ແລະ ພາກພື້ນມີດ້ານສະດວກດີ ແຕ່ຄຽງຂ້ານນັ້ນກໍ່ມີຄວາມຫຍຸ້ງຍາກ ສັບສົນທີ່ຄາດຄະເນໄດ້ຍາກ. ການແກ່ງແຍ້ງຍຸດທະສາດລະຫວ່າງບັນດາປະເທດມະຫາອຳນາດ ກຳລັງເກີດຂຶ້ນຢ່າງເຄັ່ງຮ້ອນທີ່ສຸດ ຊຶ່ງເຊື່ອງຊ້ອນບັນດາປັດໃຈປັ່ນປ່ວນວຸ້ນວາຍ; ສົງຄາມພາກສ່ວນ, ການປະທະກັນດ້ວຍອາວຸດ, ການແກ່ງແຍ້ງຊ່ວງຊິງກັນດ້ານຊັບພະຍາກອນ ດ້ານອຳນາດອະທິປະໄຕໃນອານາເຂດ ເຂດທະເລໝູ່ເກາະ, ການປະທະກັນດ້ານຊົນເຜົ່າ ສາສະໜາ, ການເຄື່ອນໄຫວແຊກແຊງ ໂຄ່ນລົ້ມ ກໍ່ການຮ້າຍ ແຍກຕົວອອກ ແລະ ບັນດາປັດໄຈນາບຂູ່ຄວາມສະຫງົບທີ່ບໍ່ເປັນແບບດັ້ງເດີມ ນັບມື້ນັບມີທ່າອຽງເພີ່ມຂຶ້ນ ຊຶ່ງໄດ້ສ້າງເປັນສິ່ງທ້າທາຍຕໍ່ກັບຫຼາຍປະເທດ. ຢູ່ໃນປະເທດ, ພາຍຫຼັງ 30 ປີແຫ່ງການປ່ຽນແປງໃໝ່ ພວກເຮົາໄດ້ຮັບຜົນສຳເລັດອັນສຳຄັນໃນຫຼາຍຂົງເຂດ; ກຳລັງຄວາມສາມາດທຸກດ້ານຂອງປະເທດໄດ້ຮັບການເພີ່ມທະວີ, ອິດທິພົນ ບົດບາດຖານະຂອງປະເທດເຮົານັບມື້ຍິ່ງໄດ້ຮັບການຍົກສູງ, ແຕ່ປະເທດເຮົາກໍ່ຍັງມີຄວາມຫຍຸ້ງຍາກ ສິ່ງທ້າທາຍຫຼາຍຢ່າງ.
ບັນດາອິດທິກຳລັງສັດຕູຍັງຄົງຍູ້ແຮງຍຸດທະສາດ “ຫັນປ່ຽນໂດຍສັນຕິ”, ຊຸກຍູ້ “ການຜັນປ່ຽນດ້ວຍຕົນເອງ”, “ການຫັນປ່ຽນໂດຍໂຕເອງ”, “ການຫັນປ່ຽນກອງທັບເປັນໄຮ້ການເມືອງ”. ສະພາບການຢູ່ທະເລຕາເວັນອອກກຳລັງສະແດງອອກຢ່າງສັບສົນ, ການຕໍ່ສູ້ປົກປັກຮັກສາອຳນາດອະທິປະໄຕໃນເຂດທະເລໝູ່ເກາະຍັງຍາວນານ ແລະ ມີຄວາມຫຍຸ້ງຍາກບໍ່ໜ້ອຍ. ໃນສະພາບດັ່ງກ່າວນັ້ນ, ໜ້າທີ່ປົກປັກຮັກສາປະເທດຊາດຂອງທົ່ວພັກ ທົ່ວປວງຊົນ ແລະທົ່ວກອງທັບເຮົາ ແມ່ນໜັກໜ່ວງທີ່ສຸດ, ມັນມີທັງຄວາມສະດວກ ແລະຄວາມຫຍຸ້ງຍາກ, ມີໂອກາດດີ ແລະສິ່ງທ້າທາຍທີ່ແຊກຊ້ອນກັນ. ເພື່ອປະຕິບັດໜ້າທີ່ຍຸດທະສາດນີ້ໃຫ້ສຳເລັດມີໄຊ, ພວກເຮົາຕ້ອງເພີ່ມທະວີການນຳພາຂອງພັກ ການບໍລິຫານຄຸ້ມຄອງຂອງລັດຍິ່ງກວ່າອີກ, ເສີມຂະຫຍາຍບົດບາດ ຄວາມຮັບຜິດຊອບຂອງລະບົບການເມືອງທັງໝົດ ຂອງບັນດາຂັ້ນ ບັນດາຂະແໜງການ ບັນດາກຳລັງ, ໃນນັ້ນກຳລັງປະກອບອາວຸດເປັນຫຼັກແຫຼ່ງແກ່ນສານ.
ປີນີ້, ພວກເຮົາສະເຫຼີມສະຫຼອງວັນປົດປ່ອຍພາກໃຕ້ ໂຮມປະເທດຊາດເຂົ້າເປັນເອກະພາບ ຄົບຮອບ 40 ປີ ຖືກເໝາະກັບຈຸດເວລາທີ່ພັກເຮົາດຳເນີນກອງປະຊຸມໃຫຍ່ຄະນະພັກຂັ້ນຕ່າງໆ ເພື່ອກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ. ນີ້ແມ່ນເຫດການທີ່ສຳຄັນທີ່ສຸດສຳລັບພັກກອມມູນິດຫວຽດນາມ ແລະ ຊາດຫວຽດນາມ; ພ້ອມກັນນັ້ນ, ມັນກໍ່ແມ່ນໂອກາດເພື່ອໃຫ້ພັກກອມມູນິດຫວຽດນາມຍົກສູງຄວາມສາມາດນຳພາ ແລະ ກຳລັງສູ້ຮົບຍິ່ງກວ່າອີກ, ເສີມຂະຫຍາຍສະຕິປັນຍາຂອງທົ່ວພັກ, ບູລະນະແນວທາງປ່ຽນແປງໃໝ່, ປະຕິບັດພາລະກິດການສ້າງສາ ແລະ ປົກປັກຮັກສາປະເທດຊາດໃນໄລຍະໃໝ່ຢ່າງສຳເລັດມີໄຊ.
ບົດຮຽນສຳເລັດຜົນກ່ຽວກັບການນຳພາຂອງພັກໃນການຕໍ່ສູ້ກູ້ຊາດຕ້ານອາເມລິການັ້ນ ຕ້ອງໄດ້ຮັບການສືບຖອດ ເສີມຂະຫຍາຍໃນສະພາບການໃໝ່. ນັ້ນແມ່ນບົດຮຽນກ່ຽວກັນການຢຶດໝັ້ນແນວທາງ ຈຸດໝາຍເອກະລາດແຫ່ງຊາດ ຕິດແໜ້ນກັບລັດທິສັງຄົມນິຍົມ; ຕັ້ງໝັ້ນ ແລະ ໝູນໃຊ້ລັດທະມາກ - ເລນິນ, ແນວຄິດໂຮ່ຈີມິນຢ່າງປະດິດສ້າງ; ຮັກສາທາດແທ້ຊົນຊັ້ນກຳມະກອນ ແລະ ປັບປຸງຮາກຖານແນວຄິດຂອງພັກໃຫ້ໄດ້ຢ່າງໜັກແໜ້ນ. ບົນພື້ນຖານນັ້ນ, ກຳນົດແນວທາງ ແຜນນະໂຍບາຍ ວິທີນຳພາໃຫ້ຖືກຕ້ອງ, ແທດເໝາະກັບຄວາມຕ້ອງການຂະຫຍາຍຕົວຂອງການປະຕິວັດ; ຕັ້ງໜ້າປ່ຽນແປງໃໝ່ແບບວິທີນຳພາ ຄົ້ນຄວ້າທິດສະດີ, ສະຫລຸບສັງລວມພຶດຕິກຳ, ຊອກຫາໃຫ້ໄດ້ກົດເກນພາວະວິໄສ ເພື່ອຮັບປະກັນໃຫ້ການນຳພາຂອງພັກມີປະສິດທິຜົນ ແລະ ມີຜົນສັກສິດໃນພາກຕົວຈິງ.
ເພື່ອກໍ່ສ້າງໃຫ້ພັກກອມມູນິດຫວຽດນາມນັບມື້ນັບມີຄວາມປອດໃສຂາວສະອາດ ແລະ ໝັ້ນຄົງເຂັ້ມແຂງ, “ແມ່ນຄຸນສົມບັດສິນທຳ, ແມ່ນອາລາຍະທຳ” ຢ່າງແທ້ຈິງ ຄືດັ່ງຄວາມມຸ່ງຫວັງຂອງລຸງໂຮ່, ທົ່ວພັກຕ້ອງຕັດສິນໃຈ ເດັດດ່ຽວປະຕິບັດມະຕິຂອງກອງປະຊຸມສູນກາງພັກຄັ້ງທີ 4 ສະໄໝທີ XI ວ່າດ້ວຍການກໍ່ສ້າງພັກ ໂດຍຕິດກັບການສືບຕໍ່ຍູ້ແຮງການຮ່ຳຮຽນ ແລະ ປະຕິບັດຕາມແວ່ນແຍງຄຸນສົມບັດ ໂຮ່ຈີມິນ; ເພີ່ມທະວີວຽກງານປ້ອງກັນ ຕ້ານການສໍ້ລາດບັງຫຼວງ ການຟຸ່ມເຟືອຍ ແລະ ບັນດາປະກົດການເສື່ອມໂຊມປ່ຽນທາດທາງດ້ານແນວຄິດການເມືອງ ຄຸນສົມບັດສິນທຳ ແບບແຜນດຳລົງຊີວິດໃນຖັນແຖວພະນັກງານ ສະມາຊິກພັກ.
ບັນດາອົງການຈັດຕັ້ງພັກແຕ່ສູນກາງລົງຮອດຮາກຖານ ຕ້ອງເຮັດວຽກງານກໍ່ສ້າງພັກໃຫ້ໄດ້ດີກວ່າອີກ; ພະນັກງານຂອງພັກຕ້ອງເປັນຜູ້ຮັບໃຊ້ທີ່ແທ້ຈິງຂອງປະຊາຊົນ, ເອົາໃຈໃສ່ເຖິງຄວາມປາຖະໜາ ແລະ ຜົນປະໂຫຍດອັນຊອບທຳຂອງປະຊາຊົນ; ແກ້ໄຂຜ່ານຜ່າທຸກປະກົດການອາດຍາສິດ ຫ່າງເຫີນປະຊາຊົນ, “ຜົນປະໂຫຍດໝູ່ພວກ”, ຄວາມແຕກແຍກສາມັກຄີພາຍໃນ,... ພ້ອມກັນນັ້ນ ກໍ່ເພີ່ມທະວີວຽກງານປົກປັກຮັກສາການເມືອງພາຍໃນ, ຕັ້ງໜ້າຕໍ່ສູ້ຕ້ານກົນອຸບາຍ ການເຄື່ອນໄຫວມ້າງເພທຳລາຍຂອງບັນດາອິດທິກຳລັງສັດຕູ ເຮັດໃຫ້ມັນປະລາໄຊລົງ, ຮັກສາການນຳພາຂອງພັກ ແລະ ລະບອບສັງຄົມນິຍົມໄວ້ຢ່າງໝັ້ນຄົງ.
ກອງທັບປະຊາຊົນດ້ວຍບົດບາດເປັນກຳລັງຫຼັກແຫຼ່ງໃນການປະຕິບັດໜ້າທີ່ປົກປັກຮັກສາປະເທດຊາດ, ເປັນກຳລັງການເມືອງທີ່ຈົງຮັກພັກດີຢ່າງເດັດຖານຕໍ່ພັກແລະປະຊາຊົນ ແລະ ໄດ້ຮັບຄວາມໄວ້ວາງໃຈຂອງພັກ ປະເທດຊາດ ປະຊາຊົນ, ຕ້ອງສືບຕໍ່ຍູ້ແຮງການກໍ່ສ້າງກອງທັບຕາມທິດ “ປະຕິວັດ, ລະບຽບຫຼວງ, ຍອດຍ້ຽມ, ທັນສະໄໝເປັນແຕ່ລະກ້າວ”.
ກອງທັບຕ້ອງເປັນເຈົ້າການກຳແໜ້ນສະພາບການ, ຄາດຄະເນຢ່າງຖືກຕ້ອງຊັດເຈນກ່ຽວກັບທ່າອຽງແຫ່ງການພັດທະນາ, ເປັນຕົ້ນແມ່ນບັນດາບັນຫາທີ່ກ່ຽວພັນເຖິງການປ້ອງກັນຊາດ ຄວາມສະຫງົບຂອງປະເທດ; ບົນພື້ນຖານນັ້ນ, ສົມທົບຢ່າງແໜ້ນແຟ້ນກັບບັນດາກຳລັງປ້ອງກັນຄວາມສະຫງົບ, ການຕ່າງປະເທດ ເພື່ອເປັນທີ່ປຶກສາ ປະກອບຄຳຄິດເຫັນໃຫ້ພັກ ລັດ ໃນການວາງແນວທາງ ແຜນຍຸດທະສາດປົກປັກຮັກສາປະເທດຊາດ ແລະ ມີນະໂຍບາຍ ວິທີແກ້ໄຂສະພາບການຢ່າງຖືກຕ້ອງ, ບໍ່ໃຫ້ຖືກຕົກໃນທ່າຮັບ ຕົກຫລຸມພາງ, ປະກອບສ່ວນສ້າງສິ່ງແວດລ້ອມສັນຕິພາບ ສະຖຽນລະພາບເພື່ອສ້າງສາພັດທະນາປະເທດ. ກອງທັບຫວຽດນາມແມ່ນກອງທັບປະຕິວັດ ທີ່ເກີດມາຈາກປະຊາຊົນ ແລະ ສູ້ຮົບເພື່ອປະຊາຊົນ, ດັ່ງນັ້ນຕ້ອງສືບຕໍ່ປະຕິບັດໃຫ້ສຳເລັດເປັນຢ່າງດີບົດບາດຂອງກອງກຳລັງສູ້ຮົບ ກອງກຳລັງປະຕິບັດງານ ແລະ ກອງກຳລັງອອກແຮງງານ ທຳການຜະລິດ, ສົມກຽດກັບຄວາມໄວ້ວາງໃຈຂອງພັກ ລັດ ແລະ ປະຊາຊົນ, ອັນເປັນການແຕ້ມແຕ່ງມູນເຊື້ອຄຸນທາດ “ທະຫານຂອງລຸງໂຮ່” ໃຫ້ສວຍສົດງົດງາມຕື່ມອີກ.
ເພື່ອເຮັດສິ່ງດັ່ງກ່າວນັ້ນໄດ້, ຕ້ອງເພີ່ມທະວີການນຳພາຢ່າງເດັດຂາດ ໂດຍກົງໃນທຸກດ້ານຂອງພັກ ຕໍ່ກັບກອງທັບ; ສຸມໃສ່ການກໍ່ສ້າງໃຫ້ຄະນະພັກກອງທັບໝັ້ນຄົງເຂັ້ມແຂງທາງດ້ານການເມືອງ ແນວຄິດ ແລະ ການຈັດຕັ້ງ, ມີຄວາມສາມາດນຳພາຮອບດ້ານ, ມີກຳລັງສູ້ຮົບສູງ; ເດັດດ່ຽວຕໍ່ສູ້ຕ້ານກົນອຸບາຍຫຼ່ຽມລາຍ “ຫັນກອງທັບເປັນໄຮ້ການເມືອງ” ຂອງບັນດາອິດທິກຳລັງສັດຕູ. ຄະນະພັກການທະຫານສູນກາງ ແລະ ກະຊວງການປ້ອງກັນປະເທດ ຕ້ອງຄົ້ນຄວ້າ ຈັດຕັ້ງປະຕິບັດມະຕິກອງປະຊຸມສູນກາງພັກຄັ້ງທີ 8 ສະໄໝທີ XI ວ່າດ້ວຍແຜນຍຸດທະສາດປົກປັກຮັກສາປະເທດຊາດໃນສະພາບການໃໝ່ ໃຫ້ໄດ້ຮັບຜົນສຳເລັດ; ໃນນັ້ນ ຈຸດໜັກໃຈກາງແມ່ນກໍ່ສ້າງພື້ນຖານການປ້ອງກັນຊາດທົ່ວປວງຊົນ, ກໍ່ສ້າງທ່າສະໜາມຮົບປ້ອງກັນຊາດທົ່ວປວງຊົນ ຕິດແໜ້ນກັບທ່າສະໜາມຮົບປ້ອງກັນຄວາມສະຫງົບປະຊາຊົນ, ກໍ່ສ້າງເຂດປ້ອງກັນ ແລະ ບັນດາໂຄງການ ແຜນການປ້ອງກັນປະເທດຊາດ. ເອົາໃຈໃສ່ຢ່າງເປັນປະຈຳເຖິງການກໍ່ສ້າງກອງທັບປະຊາຊົນໃຫ້ໝັ້ນຄົງເຂັ້ມແຂງທາງດ້ານການເມືອງ, ຕັ້ງໜ້າປ່ຽນແປງໃໝ່ ຍົກສູງຄຸນນະພາບຂອງການເຄື່ອນໄຫວວຽກງານພັກ ວຽກງານການເມືອງ ໃນທົ່ວກອງທັບ ແລະ ໃນກຳລັງທະຫານລາດກອງຫຼອນ.
ປະຫວັດສາດ 85 ປີແຫ່ງການກຳເນີດເກີດຂຶ້ນ ແລະ ຂະຫຍາຍຕົວຂອງພັກກອມມູນິດຫວຽດນາມ ໃຫ້ເຫັນວ່າ, ໃນຈຸດເວລາທີ່ມີຄວາມຫຍຸ້ງຍາກສັບສົນຫຼາຍເທົ່າໃດ ແມ່ນຫຼັກໝັ້ນ ສະຕິປັນຍາ ຄຸນສົມບັດສິນທຳ ຄວາມສາມາດນຳພາຂອງພັກ ຍິ່ງໄດ້ຮັບຄວາມຢັ້ງຢືນທໍ່ນັ້ນ. ພວກເຮົາເຊື່ອໝັ້ນວ່າ, ບົດຮຽນສຳເລັດຜົນກ່ຽວກັບການນຳພາຂອງພັກ ໃນມະຫາໄຊເມື່ອລະດູບານໃໝ່ປີ 1975, ກໍ່ຄືພາລະກິດຕໍ່ສູ້ກູ້ຊາດຕ້ານອາເມລິກາທັງໝົດ ຈະໄດ້ເສີມຂະຫາຍຕໍ່ໄປໃນສະພາບການໃໝ່./.
ຂຽນໂດຍ ຫງວຽນຝູຈ້ອງ
ເລຂາທິການໃຫຍ່ຄະນະບໍລິຫານງານສູນກາງ
ພັກກອມມູນິດຫວຽດນາມ
