ສືບຕໍ່ປ່ຽນແປງໃໝ່ວຽກງານພະນັກງານ, ກະກຽມວຽກງານບຸກຄະລາກອນ ກອງປະຊຸມໃຫຍ່ອົງຄະນະພັກຂັ້ນຕ່າງໆ ເປັນຢ່າງດີ, ຮັບປະກັນຄວາມສຳເລັດ ຂອງກອງປະຊຸມໃຫຍ່ຄັ້ງທີ XII ຂອງພັກ
1- ວຽກງານພະນັກງານກວມດ້ວຍຫຼາຍຂອດ, ແຕ່ຄົ້ນເຜີຍ, ຄັດເລືອກ, ສັງເກດ, ຕີລາຄາ, ຈົນເຖິງວາງແຜນກຳນົດ, ບຳລຸງກໍ່ສ້າງ, ຈັດວາງສັບຊ້ອນ ຜັດປ່ຽນ, ແຕ່ງຕັ້ງ, ນຳໃຊ້ ແລະ ປະຕິບັດນະໂຍບາຍຕໍ່ກັບພະນັກງານ. ບັນດາຂອດຂອງວຽກງານພະນັກງານ ເປັນອົງປະກອບທີ່ເປັນເອກະພາບ ມີຄວາມພົວພັນແໜ້ນແຟ້ນນຳກັນ, ກະທົບ ຊຸກຍູ້ເຊິ່ງກັນແລະກັນ; ເມື່ອປະຕິບັດຂອດນີ້ໄດ້ດີ ຈະເປັນປະຖົມປັດໃຈແລະພື້ນຖານເພື່ອປະຕິບັດຂອດຕໍ່ໄປໄດ້ຮັບຜົນດີ ແລະ ກົງຂ້າມ, ຖ້າປະຕິບັດຂອດໃດໜຶ່ງບໍ່ດີ ບໍ່ຖືກຕ້ອງຕາມຫຼັກດຳເນີນງານ ກໍ່ຈະເປັນຜົນກະທົບໂດຍກົງເຖິງບັນດາຂອດອື່ນ ແລະ ເຖິງຜົນສຳເລັດລວມຂອງວຽກງານພະນັກງານ. ເພາະສະນັ້ນ, ໃນວຽກງານພະນັກງານ ຕ້ອງສົມທົບຢ່າງແໜ້ນແຟ້ນ ແລະ ປະຕິບັດຂອດຕ່າງໆທຸກຂອດຢ່າງຄົບຊຸດ, ບໍ່ເບິ່ງເບົາຫຼືປະຂ້າມຂອດໜຶ່ງຂອດໃດ.
ໃນຊຸມປີທີ່ຜ່ານມານີ້, ຄະນະບໍລິຫານງານສູນກາງພັກ ກົມການເມືອງ ຄະນະເລຂາທິການ ໄດ້ມີແຜນນະໂຍບາຍ ມະຕິ ຄຳສັ່ງ ຄຳສະຫລຸບ ຂໍ້ກຳນົດ ກົດລະບຽບ,... ຫຼາຍສະບັບກ່ຽວກັບວຽກງານພະນັກງານ, ເຊັ່ນ ຄະນະບໍລິຫານງານສູນກາງພັກ ສະໄໝທີ VIII ມີມະຕິສະບັບທີ 03-NQ/TW ວ່າດ້ວຍ “ແຜນຍຸດທະສາດພະນັກງານ ໃນສະໄໝແຫ່ງການຍູ້ແຮງ ການຫັນປະເທດເປັນອຸດສາຫະກຳ ທັນສະໄໝ”; ກົມການເມືອງສູນກາງພັກສະໄໝທີ IX ມີມະຕິສະບັບທີ 11-NQ/TW ວ່າດ້ວຍ “ການຜັດປ່ຽນພະນັກງານນຳພາ ຄຸ້ມຄອງຂັ້ນຕ່າງໆ” ແລະ ມີມະຕິສະບັບທີ 42-NQ/TW ວ່າດ້ວຍ “ວຽກງານວາງແຜນກຳນົດພະນັກງານນຳພາ ຄຸ້ມຄອງບໍລິຫານ ໃນສະໄໝແຫ່ງການຍູ້ແຮງການຫັນປະເທດເປັນອຸດສາຫະກຳ ທັນສະໄໝ”; ຄະນະບໍລິຫານງານສູນກາງພັກສະໄໝທີ X ມີຄຳສະຫລຸບສະບັບທີ 37-KL/TW ວ່າດ້ວຍ “ສືບຕໍ່ຍູ້ແຮງຍຸດທະສາດພະນັດງານ ໃນສະໄໝແຫ່ງການຫັນປະເທດເປັນອຸດສາຫະກຳ ທັນສະໄໝ”; ຄະນະບໍລິຫານງານສູນກາງພັກສະໄໝທີ XI ມີມະຕິສະບັບທີ 12-NQ/TW ວ່າດ້ວຍ “ບາງບັນຫາອັນຮີບດ່ວນກ່ຽວກັບການກໍ່ສ້າງພັກໃນປັດຈຸບັນ”; ມະຕິຕົກລົງສະບັບທີ 244-QĐ/TW ກ່ຽວກັບການປະກາດໃຊ້ “ກົດລະບຽບການເລືອກຕັ້ງໃນພັກ”; ກົມການເມືອງສູນກາງພັກສະໄໝທີ XI ມີຄຳສະຫລຸບສະບັບທີ 24-KL/TW ວ່າດ້ວຍ “ສືບຕໍ່ຍູ້ແຮງວຽກງານວາງແຜນກຳນົດ ແລະ ຜັດປ່ຽນພະນັກງານນຳພາ ຄຸ້ມຄອງບໍລິຫານ ຮອດປີ 2020 ແລະ ຊຸມປີຕໍ່ໄປ” ແລະ ຄຳສັ່ງສະບັບທີ 36-CT/TW ວ່າດ້ວຍ “ກອງປະຊຸມໃຫຍ່ອົງຄະນະພັກຂັ້ນຕ່າງໆ ກ້າວເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ”,...
ເພື່ອປະຕິບັດບັນດາມະຕິ ຄຳສັ່ງ ຄຳສະຫລຸບ ຂໍ້ກຳນົດ ກົດລະບຽບ ຂໍ້ຕົກລົງ ຂອງຄະນະບໍລິຫານງານສູນກາງພັກ, ກົມການເມືອງ, ຄະນະເລຂາທິການ ກ່ຽວກັບວຽກງານພະນັກງານ ໃຫ້ປະກົດເປັນຈິງ, ຄະນະຈັດຕັ້ງສູນກາງໄດ້ປະກາດໃຊ້ຄຳແນະນຳຫຼາຍສະບັບ ເພື່ອປະຕິບັດຢ່າງເປັນເອກະພາບໃນທົ່ວພັກ, ໃນນັ້ນມີຄຳແນະນຳສະບັບທີ 15-HD/BTCTW, ວັນທີ 5 ພະຈິກ 2012, ກ່ຽວກັບ “ວຽກງານວາງແຜນກຳນົດພະນັກງານນຳພາ ຄຸ້ມຄອງບໍລິຫານ ໃນສະໄໝແຫ່ງການຫັນປະເທດເປັນອຸດສາຫະກຳ ທັນສະໄໝ” ແລະ ຄຳແນະນຳສະບັບທີ 26-HD/BTCTW, ວັນທີ 18 ສິງຫາ 2014, ກ່ຽວກັບ “ວຽກງານບຸກຄະລາກອນກອງປະຊຸມໃຫຍ່ອົງຄະນະພັກຂັ້ນຕ່າງໆ ກ້າວເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ”,...
ຍ້ອນໄດ້ຊາບຊືມການຊີ້ນຳນຳພາ ແນະນຳຂອງສູນກາງ ດັ່ງນັ້ນ ຫຼາຍແຜນນະໂຍບາຍ ຫຼັກການ ທັດສະນະ ແລະ ວິທີແກ້ໄຂໃຫຍ່ ກ່ຽວກັບວຽກງານພະນັກງານ ຈຶ່ງໄດ້ຫັນເປັນຂໍ້ກຳນົດ ກົດລະບຽບ ເປັນລຳດັບດຳເນີນງານ ແລະ ຄຳແນະນຳອັນລະອຽດ ເພື່ອປະຕິບັດໃນພາກຕົວຈິງ. ວຽກງານພະນັກງານ ແລະ ການກໍ່ສ້າງຖັນແຖວພະນັກງານ ສາມາດກຳຈັດດັດແກ້ຈຸດອ່ອນ ຂໍ້ຈຳກັດຈຳນວນໜຶ່ງໄດ້ ແລະ ເຂົ້າສູ່ຄວາມເປັນລະບຽບເທື່ອລະກ້າວ, ຮັບປະກັນປະຊາທິປະໄຕ ພາວະວິໄສ ເປີດເຜີຍ ແລະ ແໜ້ນແຟ້ນກວ່າແຕ່ກ່ອນ. ຄຸນນະພາບຂອງຖັນແຖວພະນັກງານ ລັດຖະກອນໃນລະບົບການເມືອງ ໄດ້ຮັບການຍົກສູງຂຶ້ນ, ຕອບສະໜອງໄດ້ເປັນແຕ່ລະກ້າວກັບຄວາມຕ້ອງການ ໜ້າທີ່ຂອງສະໄໝແຫ່ງການຍູ້ແຮງການຫັນປະເທດເປັນອຸດສາຫະກຳ ທັນສະໄໝ ໃນເງື່ອນໄຂຍູ້ແຮງການກໍ່ສ້າງ ລະບົບເສດຖະກິດຕະຫຼາດຕາມທິດສັງຄົມນິຍົມ ແລະ ຕັ້ງໜ້າ ເປັນເຈົ້າການເຊື່ອມໂຍງເຂົ້າກັບສາກົນ. ວຽກງານວາງແຜນກຳນົດພະນັກງານຂັ້ນຍຸດທະສາດ ໄດ້ຮັບຄວາມເອົາໃຈໃສ່ຊີ້ນຳ ຜັນຂະຫຍາຍຢ່າງຕັ້ງໜ້າ ແລະ ບັນລຸຜົນເບື້ອງຕົ້ນ. ວຽກງານປົກປັກຮັກສາການເມືອງພາຍໃນ ໄດ້ຮັບຄວາມເອົາໃຈໃສ່ຊີ້ນຳ ຈັດຕັ້ງປະຕິບັດຂອງບັນດາຄະນະພັກ ອົງການຈັດຕັ້ງພັກ ດັ່ງນັ້ນຈຶ່ງບັນລຸໝາກຜົນອັນຕັ້ງໜ້າຫຼາຍຢ່າງ. ວຽກງານຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຄວາມຟຸມເຟືອຍ ໄດ້ຮັບການເພີ່ມທະວີ ແລະ ບັນລຸຜົນເບື້ອງຕົ້ນຈຳນວນໜຶ່ງ. ຫຼາຍກໍລະນີ ຄະດີສໍ້ລາດບັງຫຼວງທີ່ຮ້າຍແຮງ ສັບສົນແກ່ຍາວ ຖືກຄົ້ນເຜີຍ ສືບສວນ ແລະ ຕັດສິນລົງໂທດຢ່າງເຂັ້ມງວດ, ໄດ້ຮັບຄວາມຊົມເຊີຍ ສະໜັບສະໜູນ ຂອງພະນັກງານສະມາຊິກພັກ ແລະ ຫາງສຽງສັງຄົມ.
ແຕ່ວ່າ, ວຽກງານພະນັກງານເວົ້າລວມ ແລະ ແຕ່ລະຂອດຂອງວຽກງານພະນັກງານເວົ້າໂດຍສະເພາະ ຍັງມີຂໍ້ຈຳກັດ ສິ່ງຄົງຄ້າງຫຼາຍຢ່າງ, ຍັງບໍ່ທັນລັນລຸເປົ້າໝາຍທີ່ໄດ້ວາງໄວ້ ແລະ ບໍ່ທັນຕອບສະໜອງໄດ້ກັບຄວາມຕ້ອງການ ກໍ່ຄືໜ້າທີ່ຂອງສະພາບການໃໝ່. ລະອຽດຄື: ການສັງເກດ ຕີລາຄາພະນັກງານຍັງເປັນຂອດອ່ອນ ແຕ່ພັດຊັກຊ້າໃນການແກ້ໄຂຜ່ານຜ່າ; ຍັງບໍ່ທັນເອົາຜົນສຳເລັດໃນການປະຕິບັດບັນດາໜ້າທີ່ທີ່ໄດ້ຮັບມອບໝາຍ ເປັນບັນທັດຖານຕົ້ນຕໍ່ເພື່ອຕີລາຄາພະນັກງານ. ຄຸນນະພາບຂອງວຽກງານສ້າງແລະປະຕິບັດແຜນກຳນົດພະນັກງານ ຍັງບໍ່ທັນສະໝ່ຳສະເໝີກັນ, ຍັງບໍ່ທັນມີວິໄສທັດກວ້າງໄກ ແລະ ຍັງບໍ່ທັນຮັບປະກັນໂຄງປະກອບ 3 ໄວອາຍຸ; ການວາງແຜນກຳນົດພະນັກງານຍັງບໍ່ທັນຕິດແໜ້ນກັບການບຳລຸງກໍ່ສ້າງ, ສັບຊ້ອນ ແລະ ນຳໃຊ້ພະນັກງານ; ຍັງບໍ່ທັນມີຄວາມທະລຸລ່ວງຕໍ່ເນື່ອງລະຫວ່າງຂັ້ນລຸ່ມກັບຂັ້ນເທິງ, ລະຫວ່າງທ້ອງຖິ່ນກັບສູນກາງ ແລະ ລະຫວ່າງບັນດາຂະແໜງ ບັນດາຂົງເຂດວຽກງານນຳກັນ. ການຄັດເລືອກບໍລິເວນ ຕຳແໜ່ງເພື່ອຜັດປ່ຽນພະນັກງານ ບາງກໍລະນີຍັງບໍ່ທັນສົມເຫດສົມຜົນ, ຊ້ຳບໍ່ໜຳ ຍັງຂັດກັບຂະແໜງວິຊາສະເພາະຂອງພະນັກງານ ເຊິ່ງບໍ່ຕອບສະໜອງໄດ້ກັບຄວາມຕ້ອງການກໍ່ສ້າງ ທັງຈຳກັດການປະກອບສ່ວນຂອງພະນັກງານທີ່ໄດ້ຜັດປ່ຽນ. ກົນໄກຄຸ້ມຄອງ ຕິດຕາມກວດກາ ແລະ ລະບອບນະໂຍບາຍຕໍ່ກັບພະນັກງານທີ່ໄດ້ຜັດປ່ຽນ ກໍ່ຍັງບໍ່ທັນໄດ້ກຳນົດຢ່າງລະອຽດ ພາໃຫ້ການຕີລະຄາ ສັບຊ້ອນ ນຳໃຊ້ພະນັກງານພາຍຫຼັງການຜັດປ່ຽນ ມີກໍລະນີຖືດຕິດຂັດ ບໍ່ຊັດເຈນ…
2- ເພື່ອແກ້ໄຂຂໍ້ຈຳກັດ ຈຸດອ່ອນຂອງວຽກງານພະນັກງານປັດຈຸບັນ ແລະ ສືບຕໍ່ປ່ຽນແປງໃໝ່ວຽກງານພະນັກງານຢ່າງແຂງແຮງ ຮອບດ້ານ ແລະ ຄົບຊຸດ ໃນຊຸມປີສະເພາໜ້ານີ້ ບັນດາຄະນະພັກ ອົງການຈັດຕັ້ງພັກຕ້ອງສຸມໃສ່ຊີ້ນຳນຳພາ ປະຕິບັດບັນດາເນື້ອໃນຕົ້ນຕໍ່ລຸ່ມນີ້ໃຫ້ໄດ້ເປັນຢ່າງດີ:
ທີໜຶ່ງ, ສືບຕໍ່ປ່ຽນແປງໃໝ່ບັນດາຂອດຂອງວຽກງານພະນັກງານຢ່າງແຂງແຮງ ຄົບຊຸດ, ກ່ອນອື່ນແມ່ນປ່ຽນແປງໃໝ່ວຽກງານຕີລາຄາພະນັກງານ. ດຳເນີນການສ້າງມາດຕະຖານຕຳແໜ່ງພະນັກງານ ແລະ ບັນທັດຖານຕີລາຄາພະນັກງານຕາມມາດຕະຖານຕຳແໜ່ງ, ຕາມປະສິດທິຜົນຂອງການປະຕິບັດງານ ແລະ ຄວາມໄວ້ວາງໃຈຂອງພະນັກງານ ສະມາຊິກພັກ ປະຊາຊົນ. ເປີດເຜີຍຂົງເຂດວຽກງານ ໜ້າທີ່ທີ່ໄດ້ຮັບມອບໝາຍ ແລະ ຜົນງານການປະຕິບັດໜ້າທີ່ຂອງພະນັກງານ ເພື່ອໃຫ້ສະມາຂິກພັກ ແລະ ປະຊາຊົນຕິດຕາມກວດກາ, ປະກອບຄວາມຄິດຄວາມເຫັນ, ສະແດງຄວາມເຊື່ອຖື ແລະ ຜ່ານສິ່ງດັ່ງກ່າວນັ້ນເພື່ອສັງເກດ ຕີລາຄາພະນັກງານ. ຕີລາຄາ ຄັດເລືອກພະນັກງານ ຜ່ານກົນໄກສອບເສັງ ກວດສອບປະຈຳປີ ສຳລັບພະນັກງານແຕ່ຂັ້ນທະບວງ ກົມ ແລະ ທຽບເທົ່າ ລົງເຖິງຂັ້ນລຸ່ມ. ສ້າງແບບວິທີຕີລາຄາພະນັກງານໃນສາຍພົວພັນພາວະວິໄສ ລະຫວ່າງຜົນຂອງການສອບເສັງ ກວດສອບ ແລະ ຄວາມສາມາດ ຜົນງານການປະຕິບັດໜ້າທີ່ ອິດທິພົນ ຄວາມເຊື່ອຖືຂອງພະນັກງານ ສະມາຊິກພັກ ແລະ ປະຊາຊົນ. ຕິດແໜ້ນການຕີລາຄາພະນັກງານ ແລະ ການເອົາຄະແນນສຽງໄວ້ວາງໃຈຕາມກຳນົດ ກັບການສຳຫຼວດ ຕິຊົມຕົນເອງແລະຕິຊົມປະຈຳປີ ຕາມຈິດໃຈຂອງມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ກ່ຽວກັບການກໍ່ສ້າງພັກ.
ທີສອງ, ປ່ຽນແປງໃໝ່ວຽກງານສ້າງແຫຼ່ງພະນັກງານ ຕາມທິດຄັດເລືອກເອົານັກສຶກສາມະຫາວິທະຍາໄລທີ່ຮຽນຈົບລະດັບເກັ່ງ ຈາກບັນດາມະຫາວິທະຍາໄລທີ່ມີຄຸນນະພາບດີ ແລ້ວສັບຊ້ອນໃຫ້ໄປເຮັດວຽກຢູ່ພື້ນຖານ (ຢູ່ບ່ອນຫຍຸ້ງຍາກ ທີ່ມີຄວາມຕ້ອງການ) ເພື່ອກໍ່ສ້າງໃນພາກຕົວຈິງ, ຈາກນັ້ນຄັດເລືອກເປັນແຫຼ່ງເພື່ອວາງແຜນກຳນົດພະນັກງານຍາວນານ. ກໍ່ສ້າງ ປະຕິບັດກົນໄກແນະນຳພະນັກງານເຂົ້າໃນຕຳແໜ່ງ; ກົນໄກຫົວໜ້າເປັນຜູ້ສະເໜີ ກະກຽມຜູ້ຢູ່ໃນແຜນກຳນົດທີ່ຈະເຂົ້າແທນຕົນ, ຫົວໜ້າເປັນຜູ້ຄັດເລືອກ ແນະນຳ ເພື່ອເລືອກຕັ້ງ ແຕ່ງຕັ້ງຜູ້ຮອງ; ທົດລອງການມອບສິດໃຫ້ເລຂາຄະນະພັກ ເປັນຜູ້ແນະນຳເພື່ອເລືອກຕັ້ງກຳມະການຄະນະປະຈຳການຂອງຄະນະພັກ.
ທີສາມ, ປ່ຽນແປງໃໝ່ເນື້ອໃນ ວິທີ ຮູບການບຳລຸງກໍ່ສ້າງພະນັກງານໃນແຜນກຳນົດຕາມຕຳແໜ່ງພະນັກງານ, ຕິດແໜ້ນລະຫວ່າງທິດສະດີກັບການປະຕິບັດ ແລະ ທັກສະຈັດການແກ້ໄຂກໍລະນີທີ່ເກີດຂຶ້ນໃນພາກຕົວຈິງ ສຳລັບແຕ່ລະຕຳແໜ່ງ, ຢູ່ແຕ່ລະຂັ້ນ ຂະແໜງການ ຂົງເຂດວຽກງານ. ເພີ່ມທະວີການອົບຮົມບຳລຸງຄວາມຮູ້ກ່ຽວກັບວິທີຈິນຕະນາການ ແລະ ວິໄສທັດຍຸດທະສາດ; ຍົກສູງຄວາມຮູ້ ແລະ ວິທີການປະພຶດ ປ້ອງກັນ ແກ້ໄຂບັນດາບັນຫາທີ່ຫາກໍ່ເກີດຂຶ້ນຂອງຊາດ ແລະ ສາກົນ ໃຫ້ບັນດາເປົ້າໝາຍພະນັກງານທີ່ຢູ່ໃນແຫຼ່ງພະນັກງານຊັ້ນສູງ. ກໍ່ສ້າງ ແລະ ປະຕິບັດລະບອບຝຶກຫັດການນຳພາ ຄຸ້ມຄອງບໍລິຫານ; ພະນັກງານຫຼັກແຫຼ່ງຂັ້ນເທິງເວົ້າລວມ ຕ້ອງຜ່ານຕຳແໜ່ງນຳພາຫຼັກແຫຼ່ງຢູ່ຂັ້ນລຸ່ມ ຜ່ານນັ້ນເພື່ອບຳລຸງກໍ່ສ້າງ ທົດສອບພະນັກງານ. ຍູ້ແຮງການບຳລຸງອົບຮົມຄວາມຮູ້ໃໝ່ ໃຫ້ພະນັກງານໃນແຜນກຳນົດຕຳແໜ່ງນຳພາ ຄຸ້ມຄອງບໍລິຫານ ຂັ້ນຕ່າງໆ, ນັບທັງບັນດາສະຫາຍກຳມະການຄະນະບໍລິຫານງານສູນກາງພັກ. ດັດແປງເນື້ອໃນ ວິທີ ລຳດັບການກວດກາ ສອບເສັງ ກວດສອບ, ຮັບປະກັນລັກສະນະເປີດເຜີຍ ໂປ່ງໃສ ຍຸຕິທຳ; ແກ້ໄຂຜ່ານຜ່າສະພາບການແລ່ນຕາມສັນນິຍະບັດ ແລະ ຖືສັນນິຍະບັດເປັນເດັດຖານ ຂອງບັນດາອົງການເຮັດວຽກງານຈັດຕັ້ງພະນັກງານ ແລະ ອົງການທີ່ໃຊ້ພະນັກງານ.
ທີສີ່, ປະຕິບັດຢ່າງເຂັ້ມງວດໂຄງປະກອບ 3 ໄວອາຍຸ ໃນແຜນກຳນົດຄະນະພັກ ແລະ ຖັນແຖວພະນັກງານນຳພາ ຄຸ້ມຄອງບໍລິຫານ ຂັ້ນຕ່າງໆ. ຂັ້ນທີມີ່ສິດຕັດສິນ ພຽງແຕ່ອະນຸມັດຜ່ານ ຮັບຮອງແຜນກຳນົດ ຫຼືຜ່ານແຜນການບຸກຄະລາກອນຄະນະພັກ ເມື່ອແຜນກະນົດ ຫຼືແຜນການບຸກຄະລາກອນນັ້ນຕອບສະໜອງຄວາມຮຽກຮ້ອງຕ້ອງການນີ້ໄດ້. ການເພີ່ມເຕີມຄະນະບໍລິຫານງານ, ຄະນະປະຈຳການຂອງຄະນະພັກແຂວງໃນສະໄໝປະຈຳການ ແມ່ນຕ້ອງເພີ່ມເຕີມພະນັກງານໜຸ່ມ ພະນັກງານຍິງເປັນຕົ້ນຕໍ່ ທີ່ມີອາຍຸພໍເພື່ອເຂົ້າຮ່ວມໃນ 2 ສະໄໝຂຶ້ນໄປ ເພື່ອແນໃສ່ບຳລຸງກໍ່ສ້າງ ແລະ ກະກຽມບຸກຄະລາກອນໃຫ້ແກ່ສະໄໝຕໍ່ໆໄປ. ການແຕ່ງຕັ້ງພະນັກງານນຳພາ ຄຸ້ມຄອງບໍລິຫານ ຕ້ອງຮັບປະກັນມີ 3 ໄວອາຍຸໃນການນຳຢູ່ແຕ່ລະຂັ້ນ; ສຳລັບຂັ້ນເມືອງ ແລະ ທຽບເທົ່າຂຶ້ນໄປ ຈຳເປັນຕ້ອງມີພະນັກງານຍິງໃນໂຄງປະກອບການນຳ. ບົນພື້ນຖານແຜນກຳນົດພະນັກງານ, ບັນດາຄະນະພັກ ການຈັດຕັ້ງພັກ ການນຳສຳນັກງານອົງການຕ້ອງກໍ່ສ້າງແຜນການບຳລຸງກໍ່ສ້າງ, ຜັດປ່ຽນ ຕໍ່ກັບພະນັກງານໃນແຜນກຳນົດ; ຂັ້ນທີ່ມີສິດຕັດສິນ ໃນເມື່ອອະນຸມັດ ຫຼືຮັບຮອງແຜນກຳນົດພະນັກງານ ກໍ່ຕ້ອງອະນຸມັດ ຮັບຮອງ ແຜນການຜັດປ່ຽນ ບຳລຸງກໍ່ສ້າງພະນັກງານໃນແຜນກຳນົດຂອງຂັ້ນລຸ່ມ ໄປພ້ອມນຳ.
ທີ່ຫ້າ, ຍູ້ແຮງການຜັດປ່ຽນພະນັກງານເພື່ອບຳລຸງກໍ່ສ້າງ ຝຶກຝົນຫຼໍ່ຫຼອມ ທົດສອບພະນັກງານໃນພາກຕົວຈິງ. ສືບຕໍ່ປະຕິບັດການສັບຊ້ອນພະນັກງານທີ່ບໍ່ແມ່ນຄົນທ້ອງຖິ່ນໃຫ້ດຳລົງຕຳແໜ່ງນຳພາ ຄຸ້ມຄອງບໍລິຫານຢູ່ຂັ້ນແຂວງ ເມືອງ, ແລະ ຄົ້ນຄວ້າເພື່ອປະຕິບັດຢູ່ຂັ້ນຕາແສງ. ປະຕິບັດການແບ່ງງານໃຫ້ພະນັກງານໃນແຜນກຳນົດຕຳແໜ່ງຂັ້ນຍຸດທະສາດ ໄປຮັບຕຳແໜ່ງໜ້າທີ່ການນຳຫຼັກແຫຼ່ງ ຢູ່ບໍລິເວນ ຂົງເຂດທີ່ສຳຄັນ, ຢູ່ເຂດທີ່ມີຄວາມຫຍຸ້ງຍາກຫຼາຍ ເພື່ອບຳລຸງກໍ່ສ້າງ ທົດສອບພະນັກງານ ໃຫ້ພະນັກງານມີບົດຮຽນປະສົບການກ່ຽວກັບການນຳພາ ຄຸ້ມຄອງບໍລິຫານ. ສືບຕໍ່ປະຕິບັດແຜນນະໂຍບາຍເພີ່ມຕຳແໜ່ງການນຳ ຂອງຄະນະພັກ ອຳນາດການປົກຄອງຢູ່ທ້ອງຖິ່ນທີ່ມີຄວາມຫຍຸ້ງຍາກຫຼາຍ ຫຼືຢູ່ບ່ອນທີ່ຂາດພະນັກງານ ແນໃສ່ສົມທົບລະຫວ່າງການຜັດປ່ຽນເພື່ອບຳລຸງກໍ່ສ້າງພະນັກງານ ທັງເພີ່ມພະນັກງານຕື່ມອີກ, ປະກອບສ່ວນຊຸກຍູ້ການພັດທະນາເສດຖະກິດ - ສັງຄົມ, ຮັບປະກັນການປ້ອງກັນຊາດ ຮັກສາຄວາມສະຫງົບ ແລະ ກໍ່ສ້າງ ປັບປຸງລະບົບການເມືອງຢູ່ທ້ອງຖິ່ນຕ່າງໆ.
3- ປັດຈຸບັນ, ບັນດາອົງຄະນະພັກຂຶ້ນກັບສູນກາງ ໄດ້ສຳເລັດກອງປະຊຸມໃຫຍ່ອົງຄະນະພັກຂັ້ນຮາກຖານ ແລະ ຂັ້ນເມືອງ, ພວມຊີ້ນຳດຳເນີນກອງປະຊຸມໃຫຍ່ຂັ້ນແຂວງຕາມຄຳສັ່ງສະບັບທີ 36-CT/TW, ວັນທີ 30 ພຶດສະພາ 2014, ຂອງກົມການເມືອງສູນກາງພັກ, ວ່າດ້ວຍກອງປະຊຸມໃຫຍ່ຂັ້ນຕ່າງໆ ກ້າວເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ. ກອງປະຊຸມໃຫຍ່ອົງຄະນະພັກຢູ່ແຕ່ລະຂັ້ນເຖິງວ່າມີເນື້ອໃນອັນລະອຽດ ແລະ ຂອບເຂດຕ່າງກັນ, ແຕ່ກອງປະຊຸມໃຫຍ່ຢູ່ຂັ້ນໃດກໍ່ມີສອງເນື້ອໃນສຳຄັນທີ່ສຸດຄື: ສະຫລຸບການປະຕິບັດມະຕິກອງປະຊຸມໃຫຍ່ຄັ້ງກ່ອນ, ກຳນົດເປົ້າໝາຍ ທິດທາງ ໜ້າທີ ຂອງອົງຄະນະພັກໃນສະໄໝທີ່ຈະມາເຖິງ ແລະ ເລືອກຕັ້ງຄະນະບໍລິຫານງານພັກຊຸດໃໝ່ ເພື່ອປະຕິບັດມະຕິທີ່ກອງປະຊຸມໃຫຍ່ວາງອອກມາໃຫ້ສຳເລັດມີໄຊ. ໃນສອງເນື້ອໃນສຳຄັນນັ້ນ, ການກະກຽມ ແລະ ເລືອກຕັ້ງຄະນະບໍລິຫານງານພັກຊຸດໃໝ່ ແມ່ນໜ້າທີ່ສຳຄັນອັນດັບໜຶ່ງ. ພາກຕົວຈິງໃຫ້ເຫັນວ່າ, ຖ້າການກຳນົດເປົ້າໝາຍ ທິດທາງ ໜ້າທີ່ການເມືອງຂອງອົງຄະນະພັກໃນໄລຍະຕໍ່ໄປ ຫາກຍັງບໍ່ທັນຄົບຖ້ວນ ບໍ່ທັນສອດຄ່ອງແທ້ເທື່ອ ຄະນະບໍລິຫານງານພັກຊຸດໃໝ່ຈະສືບຕໍ່ເພີ່ມເຕີມ ບູລະນະ; ແຕ່, ຫາກການກະກຽມ ແລະ ເລືອກຕັ້ງຄະນະບໍລິຫານງານພັກຊຸດໃໝ່ ມີຂໍ້ບົກພ່ອງ ບໍ່ຮັບປະກັນມາດຕະຖານ ຈະເຮັດໃຫ້ການເພີ່ມເຕີມ ປ່ຽນແທນຫຍຸ້ງຍາກ ສັບສົນກວ່າຕັ້ງຫຼາຍ ແລະ ຈະເປັນຜົນທາງລົບຕາມມາທີ່ໜັກໜ່ວງ.
ເພື່ອກະກຽມວຽກງານບຸກຄະລາກອນກອງປະຊຸມໃຫຍ່ອົງຄະນະພັກຂັ້ນຕ່າງໆ (ນັບທັງບຸກຄະລາກອນຄະນະພັກ ແລະ ບຸກຄະລາກອນຄະນະຜູ້ແທນໄປຮ່ວມກອງປະຊຸມໃຫຍ່ຂັ້ນເທິງ) ໃຫ້ໄດ້ເປັນຢ່າງດີ, ເປັນຕົ້ນແມ່ນຂັ້ນແຂວງ, ບັນດາຄະນະພັກ ການຈັດຕັ້ງພັກ ຕ້ອງສຸມໃສ່ຊີ້ນຳນຳພາ ແລະ ປະຕິບັດບາງເນື້ອໃນຕົ້ນຕໍ່ລຸ່ມນີ້ໃຫ້ໄດ້ເປັນຢ່າງດີ:
ທີໜຶ່ງ, ການຄັດເລືອກ ແນະນຳບຸກຄະລາກອນທີ່ເຂົ້າຮ່ວມຄະນະບໍລິຫານງານພັກສະໄໝທີ່ຈະມາເຖິງນັ້ນ ຕ້ອງໃຫ້ຄວາມສຳຄັນເປັນພິເສດກ່ຽວກັບມາດຕະຖານ, ກ່ອນອື່ນແມ່ນອີງໃສ່ແຜນກຳນົດຄະນະພັກ, ຕິດກັບແຜນກຳນົດບັນດາຕຳແໜ່ງການນຳຫຼັກແຫຼ່ງຂອງສະພາປະຊາຊົນ ຄະນະກຳມະການປະຊາຊົນຂັ້ນດຽວກັນ ໃນສະໄໝທີ່ຈະມາເຖິງ. ເອົາໃຈໃສ່ການຄົ້ນເຜີຍ, ແນະນຳບຸກຄົນໃໝ່ ທີ່ມີຄຸນສົມບັດ ມີຄວາມສາມາດ ມີແງ່ຫວັງຂະຫຍາຍຕົວ, ເປັນຕົ້ນແມ່ນພະນັກງານໜຸ່ມນ້ອຍ ພະນັກງານຍິງ ພະນັກງານຄົນຊົນເຜົ່າສ່ວນນ້ອຍ ເພື່ອຮັບປະກັນລັກສະນະສືບທອດ ຂະຫຍາຍຕົວ ຢ່າງຕໍ່ເນື່ອງຂອງຖັນແຖວຄະນະພັກ. ກຳມະການຄະນະພັກຕ້ອງເປັນຜູ້ຈົງຮັກພັກດີເດັດຖານຕໍ່ອຸດົມການປະຕິວັດຂອງພັກ, ຕັ້ງໝັ້ນໃນຈຸດໝາຍເອກະລາດແຫ່ງຊາດ ແລະ ສັງຄົມນິຍົມ; ດຸໝັ່ນ ປະຢັດ ຊື່ສັດ ທ່ຽງທຳ ເຫັນແກ່ສ່ວນລວມບໍ່ເຫັນແກ່ສ່ວນຕົວ; ບໍ່ສໍ້ລາດບັງຫຼວງ ແລະ ເດັດດ່ຽວຕໍ່ສູ້ຕ້ານພະຍາດອາດຍາສິດ ຕ້ານການສໍ້ລາດບັງຫຼວງແລະຟຸ່ມເຟືອຍ; ມີສະຕິຕໍ່ການຈັດຕັ້ງ ລະບຽບວິໄນ, ພົວພັນສະໜິດແໜ້ນກັບປະຊາຊົນ ແລະ ໄດ້ຮັບຄວາມເຊື່ອຖືຈາກພະນັກງານ ສະມາຊິກພັກ ປະຊາຊົນ; ມີລະດັບຄວາມຮູ້ກ່ຽວກັບທິດສະດີການເມືອງ, ຊາບຊືມທັດສະນະ ແນວທາງຂອງພັກ ແລະ ນະໂຍບາຍ ກົດໝາຍຂອງລັດ; ມີລະດັບຄວາມຮູ້ ວິຊາສະເພາະ ວິຊາຊີບທີ່ຕ້ອງການ ແລະ ມີສຸຂະພາບເພື່ອປະຕິບັດໜ້າທີ່ທີ່ໄດ້ຮັບມອບໝາຍ.
ທີສອງ, ໃນເມື່ອພິຈາລະນາມາດຕະຖານຂອງກຳມະການຄະນະພັກ, ຕ້ອງເອົາໃຈໃສ່ເປັນພິເສດເຖິງຫຼັກໝັ້ນແນວຄິດການເມືອງ; ປະສິດທິຜົນການປະຕິບັດບັນດາໜ້າທີ່ທີ່ໄດ້ຮັບມອບໝາຍ; ມີຈິນຕະນາການປ່ຽນແປງໃໝ່, ຂະຫຍັນຂັນເຄື່ອນ, ປະດິດສ້າງ, ສາມາດເກັບກຳ ຈັດການແກ້ໄຂບັນຫາໃໝ່ທີ່ຫາກໍ່ເກີດຂຶ້ນ ຢ່າງທັນການ ແລະ ມີປະສິດທິຜົນ; ມີແບບແຜນເຮັດວຽກຢ່າງວິທະຍາສາດ ປະຊາທິປະໄຕ ຕິດແທດຕົວຈິງ, ກ້າຄິດ ກ້າເຮັດ ກ້າຮັບຜິດຊອບ; ມີທ່າທີເຂັ້ມງວດໃນການດັດແປງແກ້ໄຂຜ່ານຜ່າຂໍ້ຂາດຕົກບົກພ່ອງທີ່ໄດ້ສະຫລຸບ ພາຍຫຼັງການສຳຫຼວດ ຕິຊົມຕົນເອງແລະຕິຊົມ ຕາມມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ວ່າດ້ວຍການກໍ່ສ້າງພັກ. ເດັດດ່ຽວບໍ່ໃຫ້ຜູ້ທີ່ບໍ່ຮັບປະກັນມາດຕະຖານດັ່ງຕໍ່ໄປນີ້ເລັດລອດເຂົ້າໃນຄະນະພັກເປັນອັນຂາດ: ຜູ້ທີ່ຫຼັກໝັ້ນການເມືອງຖືກຄອນແຄນ ມີປະກົດການສວຍໂອກາດການເມືອງ ມີຄວາມທະເຍີທະຍາມສິດອຳນາດ; ຂາດຄຸນສົມບັດສິນທຳ ແບບແຜນດຳລົງຊີວິດບໍ່ໃສສະອາດ; ລະເມີດຫຼັກການລວມສູນປະຊາທິປະໄຕ; ອາດຍາສິດ ສໍ້ລາດບັງຫຼວງ ຟຸ່ມເຟືອຍ ພາກສ່ວນພັກພວກ ເສຍຄວາມສາມັກຄີພາຍໃນ, “ຜົນປະໂຫຍດໝູ່ພວກ”; ຕົນເອງຫຼືເມຍ (ຜົວ) ລູກ ລະເມີດຂໍ້ກຳນົດຕ່າງໆຂອງພັກ, ນະໂຍບາຍ ກົດໝາຍຂອງລັດ, ກໍ່ຄວາມເສຍຫາຍໃຫ້ແກ່ອິດທິພົນຂອງສຳນັກງານອົງການ ແລະ ຂອງກະໂຕພະນັກງານຜູ້ນັ້ນ; ບັນດາສະມາຊິກພັກທີ່ລະເມີດຕໍ່ຂໍ້ກຳນົດຂອງຄະນະບໍລິຫານງານສູນກາງພັກ ວ່າດ້ວຍມາດຕະຖານການເມືອງ ແລະ ສິ່ງຕ່າງໆທີ່ຫ້ານບໍ່ໃຫ້ສະມາຊິກພັກ ພະນັກງານ ລັດຖະກອນ,... ເຮັດ.
ທີສາມ, ບົນພື້ນຖານຮັບປະກັນມາດຕະຖານ, ບັນດາຄະນະພັກຕ້ອງມີໂຄງປະກອບທີ່ສົມເຫດສົມຜົນ ເພື່ອຮັບປະກັນການນຳພາຮອບດ້ານຂອງຄະນະພັກ, ແຕ່ບໍ່ໄດ້ອ້າງອີງໃສ່ໂຄງປະກອບ ເພື່ອຫລຸດມາດຕະຖານກຳມະການຄະນະພັກໃຫ້ຕ່ຳລົງ. ຄະນະພັກຕ້ອງມີ 3 ໄວອາຍຸ, ສູ້ຊົນເພື່ອໃຫ້ຄະນະປະຈຳການຄະນະພັກມີ 3 ໄວອາຍຸ; ສູ້ຊົນເພື່ອບັນລຸອັດຕາສ່ວນກຳມະການຍິງບໍ່ຕ່ຳກວ່າ 15% ແລະ ຕ້ອງມີຜູ້ຍິງໃນຄະນະປະຈຳການ; ອັດຕາສ່ວນພະນັກງານໜຸ່ມນ້ອຍ (ອາຍຸຕ່ຳກວ່າ 40 ປີສຳລັບກຳມະການຄະນະພັກແຂວງ ແລະ ຕ່ຳກວ່າ 35 ປີສຳລັບກຳມະການຄະນະພັກເມືອງ) ບໍ່ຕ່ຳກວ່າ 10% ຂອງຈຳນວນກຳມະການຄະນະພັກ; ອັດຕາສ່ວນກຳມະການຄະນະພັກທີ່ເປັນຄົນຊົນເຜົ່າສ່ວນນ້ອຍ ສອດຄອງກັບໂຄງປະກອບຊົນເຜົ່າຂອງແຕ່ລະທ້ອງຖິ່ນ ແລະ ຕ້ອງເທົ່າກັບ ຫຼືສູງກວ່າສະໄໝປັດຈຸບັນ. ຖ້າຫາກຢູ່ຕົ້ນສຳໄໝ, ບ່ອນໃດທີ່ກະກຽມໂຄງປະກອບດັ່ງກ່າວເທິງນີ້ຍັງບໍ່ທັນສຳເລັດ ກໍ່ໃຫ້ເລືອກຕັ້ງກຳມະການຄະນະພັກໜ້ອຍກວ່າຈຳນວນທີ່ໄດ້ກຳນົດ, ຈຳນວນທີ່ຍັງເຫຼືອຈະໄດ້ສືບຕໍ່ກະກຽມ ແລະ ເພີ່ມເຕີມໃນສະໄໝໃໝ່. ບັນດາຄະນະພັກຕ້ອງໄດ້ປ່ຽນແປງໃໝ່ບໍ່ຕ່ຳກວ່າ 1/3 ທຽບກັບຈຳນວນກຳມະການຄະນະພັກຕົ້ນສະໄໝ 2010 - 2015; ໃນກໍລະນີຈຳນວນກຳມະການຄະນະພັກເຖິງອາຍຸຮັບເລືອກຕັ້ງຄືນໃໝ່ຫຼາຍກວ່າ, ການຄັດເລືອກກຳມະການຄະນະພັກໃຫ້ຮັບເລືອກຕັ້ງຄືນໃໝ່ນັ້ນຕ້ອງອີງໃສ່ລະດັບຄວາມຮູ້, ຄວາມສາມາດປະຕິບັດງານພາກຕົວຈິງ, ຜົນສຳເລັດການປະຕິບັດໜ້າທີ່ທີ່ໄດ້ຮັບມອບໝາຍ, ຄວາມຕ້ອງການຈັດວາງສັບຊ້ອນກຳມະການຄະນະພັກ ແລະ ຄວາມເຊື່ອຖືຕໍ່ພະນັກງານຜູ້ນັ້ນ ໂດຍຜ່ານການລົງຄະແນນສຽງໄວ້ວາງໃຈຂອງຄະນະພັກແຕ່ສູງລົງຕ່ຳ.
ທີສີ່, ພາຍຫຼັງກອງປະຊຸມໃຫຍ່ອົງຄະນະພັກຂັ້ນຕ່າງໆ, ບັນດາຄະນະພັກຕ້ອງເອົາໃຈໃສ່ເຖິງວຽກງານແນວຄິດ ແລະ ເຮັດການແບ່ງງານມອບໜ້າທີ່ໃຫ້ບັນດາກຳມະການຄະນະພັກໃຫ້ໄດ້ເປັນຜ່າງດີ. ເວົ້າລວມ, ບັນດາສະຫາຍທີ່ບໍ່ເຂົ້າຮ່ວມຄະນະພັກ ກໍ່ເຊົາບໍ່ຮັບຕຳແໜ່ງບໍລິຫານການປົກຄອງອີກ ເຊິ່ງຕຳແໜ່ງນັ້ນຕ້ອງການໃຫ້ກຳມະການຄະນະພັກຮັບຜິດຊອບ. ສຳລັບພະນັກງານຢູ່ຂັ້ນແຂວງ ແລະ ເມືອງ, ບັນດາສະຫາຍທີ່ຍັງມີເວລາເຮັດວຽກອີກສອງປີ (24 ເດືອນ) ຂຶ້ນໄປຈຶ່ງໝົດກະສຽນອາຍຸລັດຖະການ, ທີ່ມີຄຸນສົມບັດດີ ມີຄວາມສາມາດ ແລະ ໄດ້ຮັບຄວາມເຊື່ອຖື, ມີສຸຂະພາບແຂງແຮງ ແລະ ມີຄວາມປະສົງຢາກສືບຕໍ່ເຮັດວຽກ ກໍ່ໃຫ້ພິຈາລະນາ ສັບຊ້ອນວຽກງານທີ່ເໝາະສົມ. ບັນດາສະຫາຍທີ່ຍັງມີເວລາເຮັດວຽກຕ່ຳກວ່າສອງປີ, ຖ້າຫາກສັບຊ້ອນວຽກງານທີ່ສອດຄ່ອງເໝາະສົມບໍ່ໄດ້ ກໍ່ໃຫ້ພັກເຊົາບໍ່ມອບໜ້າທີ່ວຽກງານອີກ ແຕ່ໃຫ້ຮັບເງິນເດືອນແລະເບ້ຍລ້ຽງຈຳນວນໜຶ່ງ ຈົນເຖິງໝົດກະສຽນອາຍຸອອກກິນເບ້ຍບຳນານ. ບັນດາກໍລະອາຍຸສູງບໍ່ມີເວລາພໍເພື່ອຮັບເລືອກຕັ້ງຄືນໃໝ່ ແຕ່ມີຄວາມປະສົງຢາກອອກກິນເບ້ຍບຳນານກ່ອນກະສຽນອາຍຸລັດຖະການ ກໍ່ໃຫ້ອອກກິນເບ້ຍບຳນານກ່ອນກຳນົດ ແລະ ປະຕິບັດລະບອບ ນະໂຍບາຍຕາມດຳລັດສະບັບທີ 26/2015/NĐ-CP ລົງວັນທີ 9 ມີນາ 2015 ຂອງລັດຖະບານ./.
ຂຽນໂດຍ ເຈິ່ນລຶວຫາຍ
ກຳມະການສູນກາງພັກ,
ຮອງຫົວໜ້າຜູ້ປະຈຳການຄະນະຈັດຕັ້ງສູງກາງ
------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 874 (ເດືອນສິງຫາ 2015)