ສູ້ຊົນດ້ວຍຄວາມຕັດສິນໃຈການເມືອງສູງສຸກ ເພື່ອສຳເລັດໜ້າທີ່ທີ່ໄດ້ຮັບມອບໝາຍ ຢ່າງດີເດັ່ນ, ສົມກຽດກັບຄວາມຄອງຄອຍ ຂອງພັກ, ລັດ ແລະ ປະຊາຊົນ*
ຄຳນຳຂອງຄະນະບັນນາທິການ ວາລະສາຍກອມມູນິດ: ວັນທີ 26 ມີນາ 2016, ຢູ່ທີ່ນະຄອນ ຮ່າໂນ້ຍ, ຄະນະຈັດຕັ້ງສູນກາງໄດ້ຈັດຕັ້ງກອງປະຊຸມທົ່ວປະເທດ ຂອງຂະແໜງການຈັດຕັ້ງກໍ່ສ້າງພັກ ປີ 2016. ສະຫາຍ ຫງວຽນຝູຈ້ອງ, ເລຂາທິການໃຫຍ່ຄະນະບໍລິຫານງານສູນກາງ ພັກກອມມູນິດຫວຽດນາມ ໃຫ້ກຽດເຂົ້າຮ່ວມ ແລະ ກ່າວຄຳຊີ້ນຳກອງປະຊຸມ. ວາລະສາຍກອມມູນິດ ຂໍເປັນກຽດແນະນຳເນື້ອໃນຄຳປາໄສທີ່ສຳຄັນດັ່ງກ່າວ ຂອງສະຫາຍເລຂາທິການໃຫຍ່.
ສະຫາຍ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກ ກ່າວປາໄສທີ່ກອງປະຊຸມ. (ພາບ: cpv.org.vn)
ມື້ນີ້, ຂ້າພະເຈົ້າຮູ້ສຶກດີໃຈທີ່ສຸດທີ່ໄດ້ມາຮ່ວມກອງປະຊຸມສະຫລຸບສັງລວມວຽກງານປີ 2015 ແລະຜັນຂະຫຍາຍໜ້າທີ່ປີ 2016 ຂອງຂະແໜງການຈັດຕັ້ງກໍ່ສ້າງພັກ - ເຊິ່ງເປັນຂົງເຂດທີ່ສຳຄັນທີ່ສຸດຂອງວຽກງານກໍ່ສ້າງພັກເວົ້າໂດຍສະເພາະ ແລະ ໃນພາລະກິດການປະຕິວັດຂອງພວກເຮົາເວົ້າລວມ. ຕາງໜ້າສູນກາງ, ກົມການເມືອງ, ຄະນະເລຂາທິການ, ຂ້າພະເຈົ້າຂໍຝາກຄຳຢ້ຽມຢາມຖາມຂ່າວ ແລະ ຄຳອວຍພອນຊົມເຊີຍອັນປະເສີດມາຍັງບັນດາສະຫາຍ, ແລະຜ່ານບັນດາສະຫາຍ ຝາກຄຳຢ້ຽມຢາມຖາມຂ່າວ ແລະ ຄຳອວຍພອນຊົມເຊີຍອັນປະເສີດມາຍັງບັນດາອ້າຍນ້ອງ ທີ່ເຮັດວຽກງານຈັດຕັ້ງກໍ່ສ້າງພັກທັງໝົດ ໃນທົ່ວປະເທດ.
ຂ້າພະເຈົ້າໄດ້ຮູ້ວ່າ, ຕາມທຳມະດາ ກອງປະຊຸມສະຫລຸບສັງລວມນີ້ຕ້ອງໄດ້ຈັດຕັ້ງຂຶ້ນແຕ່ຕົ້ນປີ. ແຕ່ວ່າ ຕົ້ນປີ 2016 ນີ້ ພວກເຮົາຕ້ອງສຸມໃສ່ກະກຽມ ແລະ ດຳເນີນກອງປະຊຸມໃຫຍ່ຄັ້ງທີ XII ຂອງພັກ; ພາຍຫຼັງກອງປະຊຸມໃຫຍ່ ພວກເຮົາກໍຕ້ອງຮີບປັບປຸງບູລະນະການຈັດຕັ້ງ ກົງຈັກ, ແບ່ງງານ ຈັດວາງສັບຊ້ອນພະນັກງານຈຳນໜຶ່ງທັນທີທັນໃດ; ນຳພາການຈັດຕັ້ງຕ້ອນຮັບບຸນປີໃໝ່ປະຈຳຊາດ ພ້ອມນັ້ນກໍກະກຽມກອງປະຊຸມສູນກາງພັກຄັ້ງທີ 2 ສະໄໝທີ XII, ໃນນັ້ນມີການປັບປຸງບູລະນະບັນດາຕຳແໜ່ງການນຳຂອງອົງການລັດ ເພື່ອສະເໜີໃຫ້ສະພາແຫ່ງຊາດເລືອກຕັ້ງ ຫຼືໃຫ້ສັດຕະຍາບັນ ໃນກອງປະຊຸມສະໃໝສາມັນເທື່ອທີ 11 ສະພາແຫ່ງຊາດຊຸດທີ XIII. ເຖີງວ່າຊ້າແດ່ຈັກໜ່ອຍ, ແຕ່ມື້ນີ້ ພວກເຮົາຈັດຕັ້ງກອງປະຊຸມໄດ້ຄືແນວນີ້ ກໍເປັນຄວາມພະຍາຍາມຢ່າງໃຫຍ່ຫຼວງຂອງຄະນະຈັດຕັ້ງສູນກາງ. ບັນດາສະຫາຍໄດ້ກະກຽມກອງປະຊຸມຢ່າງຮອບຄອບ, ເປັນຕົ້ນແມ່ນກະກຽມບົດລາຍງານຢ່າງເຂັ້ມງວດ ແລະມີຄຸນນະພາບດີ. ໃນທີ່ກອງປະຊຸມ ຫຼາຍສະຫາຍໄດ້ປະກອບຄວາມຄິດຄວາມເຫັນຢ່າງສຸດອົກສຸດໃຈ, ມີຄວາມຮັບຜິດຊອບ, ແທດເໝາະກັບສະພາບຕົວຈິງ. ຂ້າພະເຈົ້າເຫັນດີເຫັນພ້ອມໂດຍພື້ນຖານ ກັບເນື້ອໃນບົດລາຍງານ ແລະ ຕີລາຄາສູງຕໍ່ຄວາມເຫັນຕ່າງໆໃນທີ່ກອງປະຊຸມ. ຂ້າພະເຈົ້າສະເໜີໃຫ້ຄະນະຈັດຕັ້ງສູນກາງຮັບເອົາຄວາມເຫັນຂອງບັນດາສະຫາຍທີ່ມາຮ່ວມກອງປະຊຸມ ເພື່ອເພີ່ມເຕີມ, ປັບປຸງບູລະນະລາຍງານ ແລະ ຜັນຂະຫຍາຍການປະຕິບັດ. ຂ້າພະເຈົ້າຂໍເນັ້ນ ແລະ ເວົ້າຕື່ມອີກບາງບັນຫາດັ່ງລຸ່ມນີ້:
ເບິ່ງຄືນສະພາບການປີ 2015 ໂດຍສັງເຂບ
ອາດຈະເຫັນໄດ້ວ່າ ປີນີ້ແມ່ນປີທີ່ປະເທດເຮົາຢືນຕໍ່ໜ້າຄວາມສະດວກອັນພື້ນຖານຕ່າງໆ ພ້ອມດ້ວຍຫຼາຍເຫດການທີ່ສຳຄັນ, ແຕ່ ຄວາມຫຍຸ້ງຍາກ ສິ່ງທ້າທາຍກໍຫຼາຍ; ມີຄວາມຫຍຸ້ງຍາກ ສິ່ງທ້າທາຍໃໝ່ທີ່ເກີດຂຶ້ນໂດຍບັງເອີນ, ສັບສົນທີ່ສຸດ. ໃນສະພາບການດັ່ງກ່າວນັ້ນ, ພາຍໃຕ້ການນຳພາຂອງສູນກາງ, ກົມການເມືອງ, ຄະນະເລຂາທິການ, ການເຂົ້າຮ່ວມຂອງລະບົບການເມືອງທັງໝົດ, ຂອງທົ່ວພັກ, ທົ່ວປວງຊົນ ແລະ ທົ່ວກອງທັບ, ອາດຈະຢືນຢັນວ່າ ພວກເຮົາໄດ້ຜ່ານປີໜຶ່ງທີ່ເຕັມໄປດ້ວຍສິ່ງປະທັບໃຈທີ່ດີງາມ.
ກອ່ນອື່ນ, ທາງດ້ານເສດຖະກິດ - ສັງຄົມ, ພວກເຮົາບໍ່ພຽງແຕ່ຜ່ານຜ່າຄວາມຫຍຸ້ງຍາກ ສິ່ງທ້າທາຍໄດ້ເທົ່ານັ້ນ, ຫາກຍັງສາມາດສຳເລັດເກືອບທັງໝົດທຸກເປົ້າໝາຍ, ໜ້າທີ່ທີ່ວາງອອກ. ໃນ 14 ເປົ້າໝາຍຕົ້ນຕໍ, ມີ 12 ເປົ້າໝາຍບັນລຸໄດ້ ແລະ ລື່ນຄາດໝາຍຂອງແຜນການ (2 ເປົ້າໝາຍບໍ່ບັນລຸໄດ້ ຄືອັດຕາສ່ວນປົກຫູ້ມຂອງປ່າໄມ້ ແລະ ລະດັບຄວາມເຕີບໂຕຂອງການຄ້າສົ່ງອອກ). ລະດັບຄວາມເຕີບໂຕເສດຖະກິດ (ຈີດີພີ) ບັນລຸ 6,68%, ສູງທີ່ສຸດນັບແຕ່ປີ 2008. ເສດຖະກິດມະຫາພາກມີຄວາມສະຖຽນລະພາບ; ດັດຊະນີລາຄາຄ່າຄອງຊີບ (ຊີພີໄອ) ຫລຸດລົງ ແຕ່ 18,3% ຂອງປີ 2011 ລົງເປັນ 0,6% ໃນປີ 2015, ຕ່ຳທີ່ສຸດນັບແຕ່ປີ 2001. ອັດຕາດອກເບ້ຍ, ອັດຕາສ່ວນໜີ້ເສຍໄດ້ຫລຸດລົງ; ອັດຕາແລກປ່ຽນໄດ້ຮັບການດັດສົມຢ່າງເປັນເຈົ້າການ, ໄຫວພິບ. ສະຫວັດດີການສັງຄົມໄດ້ຮັບປະກັນ, ຊີວິດຄວາມເປັນຢູ່ຂອງປະຊາຊົນສືບຕໍ່ໄດ້ຮັບການປົວແປງ; ອັດຕາສ່ວນຄອບຄົວທຸກຍາກໄດ້ຫລຸດລົງ ແຕ່ 14,2% ປີ 2010 ລົງເປັນເກືອບ 4,5% ປີ 2015. ໃນທົ່ວປະເທດ ມີ 15 ເມືອງ ແລະ 1.526 ຕາແສງ ບັນລຸມາດຕະຖານຊົນນະບົດແບບໃໝ່, ກວມເອົາ 17,1% ຂອງຈຳນວນຕາແສງທັງໝົດ.
ທີສອງ, ໃນສະພາບການໂລກມີຄວາມສັບສົນຫຼາຍ, ສະພາບການທະເລຕາເວັນອອກມີການຜັນປ່ຽນໃໝ່ ພາໃຫ້ເກີດໄພອັນຕະລາຍຕໍ່ຄວາມໝັ້ນຄົງໃນພາກພື້ນ, ນາບຂູ່ຕໍ່ເສລີພາບ ຄວາມໝັ້ນຄົງ ຄວາມປອດໄພໃນການເດີນທະເລ ເດີນອາກາດ, ແຕ່ພວກເຮົາກໍສາມາດປົກປັກຮັກສາຄວາມເປັນເອກະລາດ ອຳນາດອະທິປະໄຕໄວ້ໄດ້, ຮັກສາຄວາມໝັ້ນຄົງທາງການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມ, ຮັກສາສິ່ງແວດລ້ອມແຫ່ງສັນຕິພາບ ເພື່ອສ້າງສາພັດທະນາປະເທດຊາດ. ນັກທ່ອງທ່ຽວເຂົ້າປະເທດເຮົານັບມື້ນັບຫຼາຍ; ຊາວຫວຽດນນາມຢູ່ຕ່າງປະເທດກັບມາຢາບ້ານເກີດເມືອງນອນນັບມື້ນັບຫຼາຍ.
ທີສາມ, ຖານະບົດບາດ, ອິທິພົນຂອງປະເທດເຮົາສືບຕໍ່ໄດ້ຮັບການຍົກສູງຂຶ້ນໃນເວທີສາກົນ. ວຽກງານການຕ່າງປະເທດບັນລຸຜົນສຳເລັດອັນຕັ້ງໜ້າຫຼາຍປະການ, ທັງການພົວພັນສອງຝ່າຍ ແລະ ຫຼາຍຝ່າຍ, ກັບບັນດາປະເທດເພື່ອນບ້ານໄກ້ຄຽງ, ບັນດາເພື່ອນມິດທີ່ເປັນມູນເຊື້ອ, ກັບຄູ່ຮ່ວມມືໃຫຍ່ໃນໂລກ ແລະ ໃນພາກພື້ນ. ຄະນະຜູ້ແທນຂັ້ນສູງຕ່າງປະເທດຫຼາຍຄະນະໄດ້ມາຢາມຫວຽດນາມ (28 ຄະນະ); ຄະນະຜູ້ແທນຂັ້ນສູງຫວຽດນາມຫຼາຍຄະນະໄດ້ໄປຢາມຕ່າງປະເທດ ແລະໄດ້ຮັບຜົນສຳເລັດດີທີ່ສຸດ (26 ຄະນະ). ຖານະບົດບາດ, ອິດທິພົນຂອງຫວຽດນາມໄດ້ຮັບການຍົກສູງຂຶ້ນ; ບົດບາດຂອງພັກກອມມູນິດຫວຽດນາມໄດ້ຮັບການຢັ້ງຢືນ. ໂດຍບໍ່ເປັນຄວາມບັງເອີນ ທີ່ກອງປະຊຸມໃຫຍ່ຄັ້ງທີ XII ຂອງພັກກອມມູນິດຫວຽດນາມ ໄດ້ຮັບຈົດໝາຍ, ໂທລະເລກຊົມເຊີຍ 253 ສະບັບ ຈາກ 95 ປະເທດໃນໂລກ, ນີ້ແມ່ນຈຳນວນຈົດໝາຍ, ໂທລະເລກຊົມເຊີຍທີ່ຫຼາຍທີ່ສຸດ ນັບແຕ່ກ່ອນມາເຖິງປັດຈຸບັນ. ຂ້າພະເຈົ້າຂໍຍົກຕົວຢ່າງ, ຄືດັ່ງທີ່ບັນດາສະຫາຍໄດ້ຮູ້ແລ້ວ, ປີ 2015 ຂ້າພະເຈົ້າ ແລະ ຄະນະຜູ້ແທນຂັ້ນສູງຫວຽດນາມໄປຢາມປະເທດຈີນ, ສະຫະລັດອາເມຣິກາ ແລະ ຍີ່ປຸ່ນ. ເຂົາເຈົ້າໄດ້ໃຫ້ການຕ້ອນຮັບຄະນະຜູ້ແທນຫວຽດນາມຢ່າງສົມກຽດ, ການພົບປະ ເຈລະຈາ ຫາລືກັນໄດ້ດຳເນີນໄປດ້ວຍຄວາມຈິງໃຈ, ໄດ້ລົງນາມໃນເອກະສານ, ສັນຍາການຮ່ວມມືທີ່ສຳຄັນຫຼາຍສະບັບ. ພິເສດແມ່ນ ການໄປຢ້ຽມຢາມສະຫະລັດອາເມຣິກາ ໄດ້ຮັບການຕີລາຄາສູງຈາກຫາງສຽງໃນປະເທດແລະຕ່າງປະເທດ ວ່າເປັນການຢ້ຽມຢາມທີ່ມີຄວາມໝາຍປະຫວັດສາດ, ເປັນການເປີດໜ້າປະຫວັດສາດໃໝ່ແຫ່ງຄວາມພົວພັນລະຫວ່າງຫວຽດນາມ - ສະຫະລັດອາເມຣິກາ. ບັນດາສະຫາຍປະທານປະເທດ, ນາຍົກລັດຖະມົນຕີ, ປະທານສະພາແຫ່ງຊາດ ກໍໄດ້ໄປຢ້ຽມຢາມຫຼາຍປະເທດຢູ່ຫຼາຍທະວີບ ແລະ ໄດ້ຮັບຜົນສຳເລັດຢ່າງຈົບງາມ. ເປັນອັນຈະແຈ້ງວ່າ ບົດບາດຖານະຂອງຫວຽດນາມ, ຂອງພັກກອມມູນິດຫວຽດນາມ ໄດ້ຮັບການຍົງສູງແລະຖືເປັນສຳຄັນ.
ທີສີ່, ພັກກອມມູນິດຫວຽດນາມ ໄດ້ຈັດຕັ້ງກອງປະຊຸມໃຫຍ່ຄະນະພັກຂັ້ນຕ່າງໆ ແລະ ກອງປະຊຸມ ໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ ຢ່າງສຳເລັດຜົນ, ເຊິ່ງໄດ້ສ້າງຄວາມປະທັບໃຈອັນດີງາມໃຫ້ແກ່ສະຫາຍ, ພີ່ນ້ອງຮ່ວມຊາດໃນທົ່ວປະເທດ ແລະ ເພື່ອນມິດສາກົນ. ຄວາມໄວ້ເນື້ອເຊື່ອໃຈຂອງປະຊາຊົນຕໍ່ກັບພັກເຮົາ, ຕໍ່ລະບອບການເມືອງຂອງພວກເຮົາ ພວມໄດ້ຮັບການປັບປຸງ ແລະ ຍົກສູງຂຶ້ນ, ສ້າງບັນຍາກາດເບີກບານມ່ວນຊື່ນໃນສັງຄົມ.
ແມ່ນບໍ່ວ່າທີ່ອາດຈະສັງລວມຜົນງານຂອງປີ 2015 ເປັນ 4 ຈຸດພົ້ນເດັ່ນດັ່ງກ່າວເທິງນີ້ ຫຼືແນວໃດ (ເປັນທຳມະດາວ່າ ຄວາມຫຍຸ້ງຍາກ, ສິ່ງທ້າທາຍ, ຂໍ້ຂາດຕົກບົກພ່ອງຍັງມີຢູ່ບໍ່ໜ້ອຍ). ນັ້ນແມ່ນການປະກອບເຫື່ອແຮງຂອງທົ່ວພັກ, ທົ່ວປວງຊົນ, ຂອງລະບົບການເມືອງທັງໝົດ, ໃນນັ້ນມີສ່ວນປະກອບຂອງວຽກງານຈັດຕັ້ງກໍ່ສ້າງພັກ. ຍ້ອນການຈັດຕັ້ງເຂັ້ມແຂງ, ຄົນມີຄຸນສົມບັດດີ, ພະນັກງານເກັ່ງ ສະຫຼຽວສາຫຼາດ ປະດິດສ້າງ, ໄດ້ຮັບຄວາມເຫັນດີເຫັນພ້ອມ ສະໜັບສະໜູນຈາກປະຊາຊົນ ພວກເຮົາຈຶ່ງເຮັດໄດ້. ເວົ້າຢ່າງອື່ນ, ໃນຜົນງານຄວາມສຳເລັດລວມຂອງປະເທດ, ມີສ່ວນປະກອບສຳຄັນທີ່ສຸດຂອງວຽກງານຈັດຕັ້ງ ພະນັກງານ. ນີ້ແມ່ນຄວາມຈິງພາວະວິໄສ.
ກ່ຽວກັບວຽກງານຈັດຕັ້ງກໍ່ສ້າງພັກປີ 2015
ເສີມຂະຫຍາຍຜົນສຳເລັດຂອງຊຸມປີກ່ອນ, ຂະແໜງການຈັດຕັ້ງກໍ່ສ້າງພັກ, ນັບແຕ່ຄະນະຈັດຕັ້ງສູນກາງ ຈົນເຖິງຄະນະຈັດຕັ້ງຂອງບັນດາອົງຄະນະພັກແຂວງ-ກຳແພງນະຄອນ ແລະ ບັນດາອົງການເຮັດວຽກງານຈັດຕັ້ງພະນັກງານ, ໄດ້ປະຕິບັດວຽກງານສຳເລັດເປັນຈຳນວນຫຼາຍທີ່ສຸດ ດ້ວນຄຸນນະພາບນັບມື້ນັບດີ, ຄືດັ່ງລາຍງານສະຫລຸບສັງລວມທີ່ກອງປະຊຸມມື້ນີ້ໄດ້ຍົກໃຫ້ເຫັນ. ຂ້າພະເຈົ້າຢາກເນັ້ນຕື່ມອີກວ່າ, ປີທີ່ຜ່ານມາ, ນອກຈາກບັນດາວຽກງານທີ່ຕ້ອງເຮັດຢ່າງເປັນປະຈຳແລ້ວ ຍັງມີວຽກງານໃໝ່, ວຽກຍາກຫຼາຍ ແຕ່ກໍໄດ້ດຳເນີນປະຕິບັດຢ່າງເປັນແບບແຜນ, ແໜ້ນແຟ້ນ, ມີປະສິດທິຜົນ. ອາດຈະເວົ້າໄດ້ວ່າ, ນີ້ກໍແມ່ນຈຸດພົ້ນເດັ່ນຂອງປີ 2015: ນັບແຕ່ວຽກງານຈັດຕັ້ງກະກຽມກອງປະຊຸມໃຫຍ່ຄະນະພັກຂັ້ນຕ່າງໆ ຈົນເຖິງກອງປະຊຸມໃຫຍ່ຜູ້ແທນທົ່ວປະເທດຂອງພັກ; ນັບແຕ່ການສັບຊ້ອນຈັດຕັ້ງກົງຈັກ ບັນຈຸພະນັກງານ ຈົນເຖິງວຽກງານພະນັກງານ, ກວມດ້ວຍການຕີລາຄາພະນັກງານ, ວາງແຜນກຳນົດພະນັກງານ, ພັດປ່ຽນພະນັກງານ, ກໍ່ສ້າງ ອົບຮົມພະນັກງານ, ປະຕິບັດນະໂຍບາຍຕໍ່ພະນັກງານ; ນັບແຕ່ການປັບປຸງຈັດຕັ້ງຮາກຖານພັກ ຈົນເຖິງວຽກງານສະມາຊິກພັກ; ວຽກງານປົກປັກຮັກສາການເມືອງພາຍໃນ; ກໍ່ສ້າງບັນດາກົດລະບຽບ, ລະບຽບການເຮັດວຽກ, ບັນດາເອກະສານແນະນຳການປະຕິບັດ; ປ່ຽນແປງໃໝ່ແບບວິທີການ, ແບບແຜນປະຕິບັດງານ, ລຳດັບດຳເນີນວຽກງານ. ກ່ຽວກັບວິທີການປະຕິບັດງານ, ວິທີເຮັດວຽກ: ມີການປ່ຽນແປງໃໝ່, ດັດປ່ຽນຫຼາຍ. ເກືອບທັງໝົດທຸກວຽກງານໃຫຍ່, ຫຍຸ້ງຍາກ ລ້ວນແຕ່ໄດ້ຮັບການກະກຽມຢ່າງລະອຽດຮອບຄອບ, ປຶກສາຫາລືຢ່າງຖີ່ຖ້ວນ, ສົມທົບຢ່າງເຂົ້າແກັບເຂົ້າເກຍກັນດີ, ອົດທົນພະຍາຍາມຮັບຟັງການປະກອບຄວາມເຫັນ, ສ້າງໃຫ້ມີຄວາມເຫັນດີເຫັນພ້ອມກັນໃນລະດັບສູງ, ລົງມືເຮັດຢ່າງພ້ອມພຽງກັນດີ, ທັງທາງຝ່າຍພັກ ທາງຝ່າຍລັດ, ບັນດາຂັ້ນ, ຂະແໜງການຕ່າງໆ... ວຽກງານກໍ່ສ້າງການຈັດຕັ້ງຮາກຖານພັກ ມີຄວາມກ້າວໜ້າ, ການຮັບເອົາຄົນໃໝ່ເຂົ້າເປັນສະມາຊິກພັກໄດ້ນັບມື້ນັບຫຼາຍ. ດຽວນີ້ພວກເຮົາມີສະມາຊິກພັກກວ່າ 4 ລ້ານ 6 ແສນຄົນ. ວຽກງານປົກປັກຮັກສາການເມືອງພາຍໃນ ໄດ້ຮັບຄວາມເອົາໃຈໃສ່ຫຼາຍກວ່າແຕ່ກ່ອນ. ວຽກງານຈັດວາງສັບປ່ຽນພະນັກງານໄດ້ດຳເນີນໄປຢ່າງເປັນແບບສະບັບ, ເປັນລະບຽບແບບແຜນທີ່ດີໃນຂັ້ນຕົ້ນ.
ອາດຈະຢືນຢັນໄດ້ວ່າ, ຈຸດດີ ຈຸດພົ້ນເດັ່ນຂອງວຽກງານຈັດຕັ້ງກໍ່ສ້າງພັກປີ 2015 ແລະ ຫຼາຍປີທີ່ຜ່ານມາແມ່ນ, ຄະນະຈັດຕັ້ງສູນກາງ, ຄະນະຈັດຕັ້ງຂອງແຂວງ-ກຳແພງນະຄອນ, ບັນດາອົງການເຮັດວຽກງານຈັດຕັ້ງພະນັກງານ ໄດ້ສົມທົບຢ່າງແໜ້ນແຟ້ນກັບບັນດາອົງການທີ່ກ່ຽວຂ້ອງ ໃນການເປັນເສນາທິການກະກຽມ ແລະ ຈັດຕັ້ງກອງປະຊຸມໃຫຍ່ຄະນະພັກຂັ້ນຕ່າງໆ ແລະ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກຢ່າງສຳເລັດຜົນ, ໄດ້ຮັບການຕີລາຄາສູງແລະຊົມເຊີຍຈາກທົ່ວພັກ ທົ່ວປວງຊົນ. ໂດຍບໍ່ເປັນຄວາມບັງເອີນ ທີ່ກອງປະຊຸມໃຫຍ່ຂອງພັກໄດ້ດຳເນີນໄປຢ່າງລຸລ່ວງ ແລະ ບັນລຸຜົນສຳເລັດດີງາມຄືແນວນັ້ນ. ນັ້ນແມ່ນຜົນສຳເລັດຂອງວິວັດການກະກຽມຢ່າງຮອບຄອບ, ເຂັ້ມງວດ ແລະມີລະບຽບແບບແຜນ; ແມ່ນຜົນສຳເລັດຂອງວຽກງານຕ່າງໆ ທີ່ໄດ້ເຮັດຢ່າງຖືກຕ້ອງ ຕັ້ງໜ້າ, ເຊັ່ນປະຕິບັດມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ກ່ຽວກັບການກໍ່ສ້າງພັກ, ດຳເນີນການຕິຊົມຕົນເອງ ແລະ ຕິຊົມ; ເອົາຄະແນນສຽງໄວ້ວາງໃຈ; ກໍ່ສ້າງແຜນກຳນົດພະນັກງານຂັ້ນຍຸດທະສາດ; ຈັດຕັ້ງບັນດາຊຸດອົບຮົມພະນັກງານທີ່ເປັນແຫຼ່ງສືບທອດ; ຈັດວາງສັບປ່ຽນພະນັກງານ; ປະກາດໃຊ້ຄຳສັ່ງສະບັບທີ 36-CT/TW, ວັນທີ 30 ພຶດສະພາ 2014, ຂອງກົມການເມືອງ ກ່ຽວກັບກອງປະຊຸມໃຫຍ່ຄະນະພັກຂັ້ນຕ່າງໆ ກ້າວເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ, ກົດລະບຽບການເລືອກຕັ້ງໃນພັກ; ປ່ຽນແປງໃໝ່ວຽກງານກະກຽມບຸກຄະລາກອນຂອງກອງປະຊຸມໃຫຍ່,... ທັງເສີມຂະຫຍາຍປະຊາທິປະໄຕໄດ້, ທັງເພີ່ມທະວີລະບຽບວິໄນ. ຢູ່ນີ້, ມີສ່ວນປະກອບໃຫຍ່ຫຼວງທີ່ສຸດຂອງຂະແໜງການຈັດຕັ້ງກໍ່ສ້າງພັກ, ຂອງຖັນແຖວພະນັກງານເຮັດວຽກງານຈັດຕັ້ງກໍ່ສ້າງພັກ. ຕາງໜ້າກົມການເມືອງ, ຄະນະເລຂາທິການ, ຂ້າພະເຈົ້າສະແດງຄວາມຊົມເຊີຍ ອວຍພອນ ແລະ ສັນລະເສີນຢ່າງສຸດໃຈຕໍ່ຂະແໜງການຈັດຕັ້ງກໍ່ສ້າງພັກຂອງພວກເຮົາໃນປີ 2015 ແລະ ໃນສະໄໝປະຈຳການທີ່ຜ່ານມາ ທີ່ໄດ້ຮັບຜົນສຳເລັດອັນດີງານຫຼາຍຢ່າງ.
ແຕ່, ພວກເຮົາກໍບໍ່ພຶງພໍໃຈເຕັມສ່ວນ ຕໍ່ຜົນງານທີ່ບັນລຸໄດ້, ຍ້ອນວ່າຍັງມີຄວາມຈຳກັດ ຂໍ້ຂາດຕົກບົກພ່ອງບໍ່ໜ້ອຍ, ມີວຽກງານຫຼາຍຢ່າງຍັງບໍ່ທັນແລ້ວ, ຫາງສຽງສັງຄົມຍັງມີຄວາມຮ້ອນເຄືອງຢູ່, ປະຊາຊົນຍັງບໍ່ທັນອຸ່ນອຽນໃຈ. ອີກປະການໜຶ່ງ, ວຽກງານຈັດຕັ້ງກໍ່ສ້າງພັກເປັນຂົງເຂດສຳຄັນ ແຕ່ສັບສົນ ຫຍຸ້ງຍາກທີ່ສຸດ, ຍ້ອນມັນແຕະຕ້ອງເຖິງຄົນ, ເປັນວຽກງານຕໍ່ກັບຄົນ, ມັນພົວພັນເຖິງແນວຄິດຈິດໃຈ ແລະ ຜົນປະໂຫຍດຂອງຄົນ. ຈະສັງເກດ ຕີລາຄາພະນັກງານຄືແນວໃດ? ຈັດວາງສັບຊ້ອນເຂົ້າບ່ອນໃດ? ລະບອບ, ນະໂຍບາຍຄືແນວໃດ?... ສະຫາຍໃດໄດ້ຮັບຄວາມສະດວກ, ຫຼືໄດ້ຮັບການສັບຊ້ອນສອດຄ່ອງກັບຄວາມປາຖະໜາຂອງຕົນກໍເບີກບານໃຈ; ສະຫາຍໃດໄດ້ຮັບການສັບຊ້ອນແຕ່ຍັງບໍ່ສອດຄ່ອງກັບຄວາມປາຖະໜາຂອງຕົນກໍບໍ່ດີໃຈ, ບາງທີເກີດຄວາມຄິດເບື່ອໜ່າຍ ອຸກອັ່ງໃຈ. ຫຼາຍຄົນເຄີຍເວົ້າວ່າ “ຂະແໜງຂອງພວກເຮົາມີບຸນບາບຫຼາຍ; ພໍໃຈ, ຖືກຕາມຄວາມປະສົງກໍເບີກບານມ່ວນຊື່ນ; ຂັດໃຈ, ຝືນກັບຄວາມປະສົງກໍເກີດເລື່ອງ, ຊ້ຳບໍ່ໜຳ ບາງເທື່ອຍັງຂັດເຄືອງ”. ພວກເຮົາບໍ່ອາດອັດຕະວິໄສໄດ້. ປັດຈຸບັນ, ໃນຫາງສຽງສັງຄົມຍັງຊ່າລືເລື່ອງວິ້ງເຕັ້ນຫາຖານະຕຳແໜ່ງ, ຍົດສັກ, ວິ້ງເຕັ້ນເອົາສັນນິຍະບັດ, ວິ້ງເຕັ້ນເອົານະໂຍບາຍ, ວິ້ງເຕັ້ນໃຫ້ໄດ້ຮັບການສັບປ່ຽນຕຳແໜ່ງ,... ໃນກອງປະຊຸມຄັ້ງນີ້, ຂ້າພະເຈົ້າສະເໜີໃຫ້ບັນດາສະຫາຍປຶກສາສົນທະນາຢ່າງກົງໄປກົງມາເບິ່ງວ່າມີເລື່ອງເຫຼົ່ານັ້ນຫຼືບໍ່, ລະດັບຂອງມັນຄືແນວໃດ, ເບິ່ງວ່າໃຜເປັນຜູ້ວິ້ງເຕັ້ນ, ວິ້ງເຕັ້ນໄປຫາໃຜ? ຖ້າຫາກມີ ແມ່ນໃຜຕ້ອງແກ້, ຕ້ອງຖອດຖອນບົດຮຽນ, ຕ້ອງແກ້ໄຂຜ່ານຜ່າເລື່ອງນີ້ໃຫ້ຈົນໄດ້. ຖ້າຫາກບໍ່ມີ ກໍຕ້ອງຕອບອະທິບາຍຢ່າງຈະແຈ້ງ ໂປ່ງໄສ. ຕ້ອງແກ້ໄຂ ຜ່ອນຄາຍຄວາມຄິດໜັກໃຈ, ມະໂນພາບນັ້ນ. ຢາກໄດ້ຄືແນວນັ້ນ, ຕ້ອງປະຕິບັດດ້ວຍກົດໝາຍ, ດ້ວຍກົດລະບຽບ ຂໍ້ກຳນົດ, ແລ້ວກໍກວດກາ, ຊຸກຍູ້ຢ່າງຮີບເຮັ່ງ. ແລະ ກ່ອນອື່ນໝົດ, ບັນດາຜູ້ທີ່ເຮັດວຽກງານພະນັກງານຕ້ອງຊື່ສັດ ທ່ຽງທຳ ສຸດຈະລິດໃຈ ເຫັນແກ່ສ່ວນລວມ.
ກ່ຽວກັບທິດທາງ, ໜ້າທີ່ປີ 2016
ຂ້າພະເຈົ້າເຫັນດີໂດຍພື້ນຖານກັບບັນດາໜ້າທີ່ຈຸດໜັກໃຈກາງ ແລະ ວິທີແກ້ ທີ່ລາຍງານຂອງຄະນະຈັດຕັ້ງສູນກາງໄດ້ລະບຸໄວ້. ຂໍເນັ້ນພຽງບາງຈຸດເທົ່ານັ້ນ. ກອງປະຊຸມສູນກາງພັກຄັ້ງທີ 2 ສະໄໝທີ XII ໄດ້ຢັ້ງຢືນ: ປີ 2016 ເປັນປີທີ່ສຳຄັນທີ່ສຸດສຳລັບວຽກງານທັງໝົດຂອງພວກເຮົາ, ຍ້ອນມັນເປັນປີທຳອິດແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ, ປີຈັດຕັ້ງເລືອກຕັ້ງສະມາຊິກສະພາແຫ່ງຊາດຊຸດທີ XIV ແລະເລືອກຕັ້ງສະພາປະຊາຊົນຂັ້ນຕ່າງໆ ສະໄໝ 2016 - 2021. ກອງປະຊຸມໄດ້ສະເໜີ 5 ໜ້າທີ່ຈຸກໜັກໃຈກາງ, ຂ້າພະເຈົ້າຈະບໍ່ເວົ້າຄືນອີກ.
ສຳລັບຂົງເຂດການຈັດຕັ້ງກໍ່ສ້າງພັກຂອງພວກເຮົານີ້ມັນມີຄວາມສຳຄັນຍິ່ງ. ພວກເຮົາຢືນຕໍ່ໜ້າຄວາມຮຽກຮ້ອງຕ້ອງການໃໝ່, ໜ້າທີ່ໃໝ່ທີ່ໃຫຍ່ໂຕ, ໜັກໜ່ວງ, ຫຍຸ້ງຍາກ. ສະພາບການຜັນປ່ຽນອ້ອມຂ້າງພວກເຮົານີ້ຍັງສັບສົນ, ຄາດຄະເນຍາກ. ພິເສດ, ບັນດາອິດທິກຳລັງທີ່ບໍ່ດີ, ອິດທິກຳລັງສັດຕູ ພວມຫາທຸກວິທີເພື່ອຕ້ານທຳລາຍພວກເຮົາຢ່າງດຸເດືອດ, ໂຈມຕີພັກເຮົາ. ຈັ່ງຊັ້ນ ທ່າທີຂອງພວກເຮົາຕ້ອງຄືແນວໃດ? ບັນດາສະຫາຍຈະຮູ້ວ່າພະນັກງານ, ສະມາຊິກພັກ, ປະຊາຊົນ ພວມມີຄວາມນຶກຄິດຈິດໃຈຫຍັງບໍ່? ຄວາມກັງວົນໃຈ, ບໍ່ຮູ້ວ່າພັກຂອງພວກເຮົາຈະສາມາດຜ່ານຜ່າສິ່ງທ້າທາຍ ໄດ້ຫຼືບໍ່, ຈະຮັກສາໄດ້ທາດແທ້ຊົນຊັ້ນ ແລະ ລັກສະນະນຳໜ້າ, ທາດແທ້ປະຕິວັດ ໄດ້ຫຼືບໍ່? ປະເທດເຮົາຈະໄປທາງໃດ, ໄປໃສ, ເປັນຕົ້ນແມ່ນໃນເງື່ອນໄຂແຫ່ງການຂະຫຍາຍເສດຖະກິດຕະຫຼາດ, ເປີດປະຕູ, ເຊື່ອມໂຍງສາກົນຢ່າງກວ້າງຂວາງເລິກເຊິ່ງ ຄືແນວນີ້? ພວກຜູ້ບໍ່ດີສວຍໃຊ້ໂອກາດຕ້ານຢັນທຳລາຍພວກເຮົາ ແລະ ໃນພາກຕົວຈີງ ມີພະນັກງານ ສະມາຊິກພັກພາກສ່ວນໜຶ່ງ ຖືກເສື່ອມໂຊມປ່ຽນທາດ... ພວກເຮົາຕ້ອງສືບຕໍ່ປ່ຽນແປງໃໝ່, ປ່ຽນແປງໃໝ່ຢ່າງແຂງແຮງ ຮອບດ້ານ ແລະ ຄົບຊຸດ, ແຕ່ປ່ຽນແປງໃໝ່ຕ້ອງຖືກທິດທາງ, ບໍ່ໃຫ້ຫຼົງທາງ, ຈາກຂົ້ວນີ້ເຕັ້ນໄປສູ່ຂົ້ວອື່ນ. ບັນດາອິດທິກຳລັງທີ່ບໍ່ດີ, ອິດທິກຳລັງສັດຕູ ພວມຢາກໃຫ້ພວກເຮົາປ່ຽນແປງລະບອບການເມືອງ. ຢູ່ກອງປະຊຸມສູນກາງ ແລະ ກອງປະຊຸມກົມການເມືອງຈຳນວນໜຶ່ງ ພວກເຮົາໄດ້ຢັ້ງຢືນ: ປ່ຽນແປງໃໝ່ການເມືອງບໍ່ໄດ້ໝາຍຄວາມວ່າປ່ຽນແປງລະບອບການເມືອງ, ບໍ່ໝາຍຄວາມວ່າ ເຮັດໃຫ້ທາດແທ້ຂອງພັກ ລັດເຮົາປ່ຽນແປງໄປ. ແນວທາງຕ້ອງໄປຖືກຕ້ອງຕາມທິດທາງຂອງໂຄງການການເມືອງ ແລະ ລັດຖະທຳມະນູນໃໝ່ ທີ່ຫາກໍໄດ້ຮັບຮອງຜ່ານ. ສືບຕໍ່ເສີມຂະຫຍາຍປະຊາທິປະໄຕແຕ່ຕ້ອງມີລະບຽບ ວິໄນ.
ຍ້ອນເຫດນັ້ນ ພວກເຮົາຈຶ່ງຕ້ອງເດັດດ່ຽວ, ຕັ້ງໝັ້ນຍູ້ແຮງການປະຕິບັດມະຕິກອງປະຊຸມສູນກາງພັກ ຄັ້ງທີ 4 ສະໄໝທີ XI ກ່ຽວກັບການກໍ່ສ້າງພັກ ຕິດກັບການຮ່ຳຮຽນ ແລະ ເຮັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ; ສ້າງໃຫ້ມີການຫັນປ່ຽນຢ່າງຈະແຈ້ງໃນວຽກງານກໍ່ສ້າງພັກ, ກີດກັ້ນ, ຍູ້ຖອຍສະພາບຄວາມຊຸດໂຊມທາງດ້ານແນວຄິດການເມືອງ, ຄຸນສົມບັດ, ແບບດຳລົງຊີວິດ ແລະ ບັນດາປະກົດການ “ຜັນປ່ຽນດ້ວຍຕົນເອງ”, “ປ່ຽນແປງດ້ວນຕົນເອງ” ຢູ່ພາຍໃນ; ເອົາໃຈໃສ່ນຳພາ, ຊີ້ນຳການປ່ຽນແປງໃໝ່ຍົກສູງຄຸນນະພາບ ແລະ ລັກສະນະເນື້ອແທ້ ຂອງວຽກງານຈັດຕັ້ງພະນັກງານ ເຊິ່ງຈຸດໜັກແມ່ນຕີລາຄາພະນັກງານ; ຍົກສູງຄຸນນະພາບຂອງການຈັດຕັ້ງຮາກຖານພັກ ແລະ ສະມາຊິກພັກ; ຮັກສາລະບຽບວິໄນຢ່າງເຂັ້ມງວດ, ເປັນແບບຢ່າງ, ເວົ້າໄປຄຽງຄູ່ກັບເຮັດ, ຍົກສູງປະສິດທິຜົນຂອງວຽກງານແນວຄິດ, ໂຄສະນາຂົນຂວາຍ; ເພີ່ມທະວີການນຳພາ, ຊີ້ນຳ ແລະ ຄຸ້ມຄອງການສື່ຂ່າວ, ເປັນຕົ້ນແມ່ນບັນດາພາຫະນະສື່ຂ່າວອິນເທີເນັດ. ຍົກສູງຄຸນນະພາບ ແລະ ຄວາມສັກສິດຂອງວຽກງານກວດກາ, ຕິດຕາມກວດກາ ແລະ ປະຕິບັດວິໄນຂອງພັກ. ຍົກສູງຄຸນນະພາບ ແລະ ປະສິດທິຜົນວຽກງານ ຂອງບັນດາອົງການເສນາທິການຂອງສູນກາງພັກ, ໃນນັ້ນມີຄວາມຮັບຜິດຊອບຂອງຂະແໜງການຈັດຕັ້ງກໍ່ສ້າງພັກ.
ໜ້າທີ່ຂອງວຽກງານຈັດຕັ້ງກໍ່ສ້າງພັກ, ກໍ່ສ້າງລະບົບການເມືອງໃນປີ 2016 ແລະໃນຊຸມປີຕໍ່ໜ້າ ແມ່ນໜັກໜ່ວງທີ່ສຸດ, ມັນຮຽກຮ້ອງຄວາມຮັບຜິດຊອບທີ່ສູງທີ່ສຸດ ຂອງຂະແໜງການຈັດຕັ້ງກໍ່ສ້າງພັກທັງໝົດ; ຕ້ອງມານະພະຍາຍາມສູ້ຊົນດ້ວນຄວາມຕັດສິນໃຈທີ່ສູງທີ່ສຸດ ເພື່ອປະຕິບັດໜ້າທີ່ຈຸດໜັກໃຈກາງໃຫ້ໄດ້ເປັນຢ່າງດີ ຄືທີ່ໄດ້ລະບຸໄວ້ໃນລາຍງານຂອງກອງປະຊຸມນີ້. ລະອຽດຄື:
ທີໜຶ່ງ, ບັນດາອົງການ ແລະ ພະນັກງານເຮັດວຽກງານຈັດຕັ້ງກໍ່ສ້າງພັກ ຕ້ອງຄົ້ນຄວ້າ, ຊາບຊືມຢ່າງເລິກເຊິ່ງ ແລະ ວາງແຜນການ, ໂຄງການການກະທຳຢ່າງລະອຽດສຳລັບປີ 2016 ແລະ ໃນຕະຫຼອດສະໄໝປະຈຳການ ເພື່ອຢັ້ງຢືນບົດບາດເປັນເສນາທິການຊ່ວຍວຽກໂດຍກົງໃຫ້ຄະນະພັກຂັ້ນຕ່າງໆ ໃນການປະຕິບັດຢ່າງສຳເລັດຜົນບັນດາໜ້າທີ່ໃນຂົງເຂດຈັດຕັ້ງກໍ່ສ້າງພັກ, ກໍ່ສ້າງລະບົບການເມືອງ ເຊິ່ງໄດ້ລະບຸໄວ້ໃນມະຕິກອງປະຊຸມໃຫຍ່ຄັ້ງທີ XII ຂອງພັກ ແລະ ມະຕິກອງປະຊຸມໃຫຍ່ຂັ້ນຕ່າງໆ. ໃນສະເພາະໜ້າ, ບັນດາສະຫາຍຕ້ອງສຸມໃສ່ວຽກງານຊີ້ນຳ, ນຳພາ, ສົມທົບການກະກຽມ ແລະ ຈັດຕັ້ງການເລືອກຕັ້ງສະມາຊິກສະພາແຫ່ງຊາດຊຸດທີ່ XIV ແລະ ເລືອກຕັ້ງສະພາປະຊາຊົນຂັ້ນຕ່າງໆ ໃຫ້ໄດ້ຮັບຜົນສຳເລັດ.
ທີສອງ, ເພີ່ມທະວີຍິ່ງກວ່າອີກວຽກງານກວດກາ, ຕິດຕາມກວດກາການປະຕິບັດບັນດາແຜນນະໂຍບາຍ, ມະຕິ, ຄວາມສະຫລຸບຂອງສູນກາງ, ຂອງຄະນະພັກຂັ້ນຕ່າງໆ ຕໍ່ຂົງເຂດຈັດຕັ້ງກໍ່ສ້າງພັກ; ໃຫ້ຄຳປຶກສາກ່ຽວກັບການສະຫລຸບເບື້ອງຕົ້ນ, ສະຫລຸບສັງລວມພຶດຕິກຳ, ເປັນຕົ້ນແມ່ນບັນດາຕົວແບບ, ບັນດາວິທີປະຕິບັດງານໃໝ່, ການປະດິດສ້າງທີ່ມີປະສິດທິຜົນຢູ່ຂັ້ນຕ່າງໆ; ຈາກນັ້ນ ປະກອບສ່ວນຄົ້ນຄວ້າ, ສະໜອງຫຼັກຖານວິທະຍາສາດ, ພຶດຕິກຳ ຮັບໃຊ້ໃຫ້ແກ່ການກໍ່ສ້າງຮ່າງໂຄງການ ເພື່ອສະເໜີຕໍ່ສູນກາງ, ກົມການເມືອງ ແລະ ຄະນະພັກຂັ້ນຕ່າງໆ. ໃນນັ້ນ ເອົາໃຈໃສ່ເຖິງບັນດາໂຄງການທີ່ຄະນະບໍລິຫານງານສູນກາງໄດ້ມອບໃຫ້ຂະແໜງການຈັດຕັ້ງກໍ່ສ້າງພັກ: 1- ກ່ຽວກັບການເພີ່ມທະວີການກໍ່ສ້າງ, ປັບປຸງພັກ; ກີດກັ້ນ, ຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, ປະກົດການ “ຜັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ” ຢູ່ພາຍໃນ. 2- ສືບຕໍ່ປ່ຽນແປງໃໝ່ແບບວິທີການນຳພາ, ກໍ່ສ້າງການຈັດຕັ້ງ, ກົງຈັກຂອງລະບົບການເມືອງ ໃຫ້ກະທັດລັດ, ເຄື່ອນໄຫວດີມີຄວາມສັດສິດ, ມີປະສິດທິຜົນ. 3- ກ່ຽວກັກການກໍ່ສ້າງຖັນແຖວພະນັກງານຂັ້ນຕ່າງໆ, ເປັນຕົ້ນແມ່ນຖັນແຖວພະນັກງານຂັ້ນຍຸດທະສາດ ທີ່ມີຄວາມສາມາດ ມີຄຸນທາດ ແລະອິດທິພົນຢ່າງພຽງພໍ, ເທົ່າທຽມກັບລະດັບໜ້າທີ່.
ທີສາມ, ຄົ້ນຄວ້າ, ຍົກສູງກວ່າອີກ ບົດບາດ ແລະ ປະສິດທິຜົນຂອງວຽກງານເສນາທິການຂອງຂະແໜງການຈັດຕັ້ງກໍ່ສ້າງພັກ ກ່ຽວກັບລຳດັບດຳເນີນວຽກງານພະນັກງານ, ນັບແຕ່ການຄົ້ນເຜີຍ ຕີລາຄາ ຈົນເຖິງການວາງແຜນ, ກໍ່ສ້າງ, ອົບຮົມ, ຜັດປ່ຽນ, ຍົກຍ້າຍ, ສັບຊ້ອນ, ແຕ່ງຕັ້ງ, ນຳໃຊ້ ແລະ ປະຕິບັດນະໂຍບາຍຕໍ່ກັບພະນັກງານ. ເພີ່ມທະວີຍິ່ງກວ່າອີກວຽກງານປົກປັກຮັກສາການເມືອງພາຍໃນ, ແກ້ໄຂບັນຫາປະຫວັດສາການເມືອງໃຫ້ດີ, ຍູ້ແຮງການພິຈາລະນາ, ແກ້ໄຂບັນຫາການເມືອງປັດຈຸບັນ.
ທີສີ່, ປັບປຸງ, ບູລະນະກົງຈັກບັນດາອົງການເຮັດວຽກງານຈັດຕັ້ງກໍ່ສ້າງພັກໃຫ້ໄດ້ຢ່າງສອດຄ່ອງ; ກຳນົດແຈ້ງຄວາມຮັບຜິດຊອບ, ໜ້າທີ່, ສິດຂອບເຂດ ຂອງແຕ່ລະອົງການຈັດຕັ້ງ, ແຕ່ລະສຳນັກງານ, ກຳນົດແຈ້ງທີ່ຕັ້ງ, ໜ້າວຽກ, ກໍ່ສ້າງມາດຕະຖານ, ບັນທັດຖານນາມມະຍົດ ຂອງຂະແໜງການຈັດຕັ້ງກໍ່ສ້າງພັກ; ສິ່ງໃດທີ່ບໍ່ສອດຄ່ອງກໍຕ້ອງປ່ຽນແປງ, ດັດແປງໃຫ້ເໝາະສົມ. ເອົາໃຈໃສ່ຍົກສູງຄຸນະພາບຂອງຖັນແຖວພະນັກງານ ແລະ ເບິ່ງແຍງປົວແປງຊີວິດຄວາມເປັນຢູ່ດ້ານວັດຖຸ, ຈິດໃຈຂອງຖັນແຖວພະນັກງານເຮັດວຽກງານຈັດຕັ້ງກໍ່ສ້າງພັກ. ເນື່ອງໃນໂອກາດນີ້, ຂ້າພະເຈົ້າສະເໜີໃຫ້ບັນດາຄະນະພັກ ແລະ ການຈັດຕັ້ງພັກ, ກ່ອນອື່ນແມ່ນສະຫາຍເລຂາຄະນະພັກ, ເລຂາຄະນະກຳມະການພັກ, ຫົວໜ້າອົງການຕ່າງໆ ຈົ່ງເອົາໃຈໃສ່, ສ້າງເງື່ອນໄຂອຳນວຍຄວາມສະດວກ ຊ່ວຍໃຫ້ບັນດາອົງການເຮັດວຽກງານຈັດຕັ້ງກໍ່ສ້າງພັກ ປະຕິບັດໜ້າທີ່ທີ່ໄດ້ຮັບມອບໝາຍຢ່າງສຳເລັດຜົນ.
ທີຫ້າ, ເພື່ອເຮັດຫຼ້ອນໜ້າທີ່ຕ່າງໆ ທີ່ກ່າວມາເທິງນີ້ ຖັນແຖວພະນັກງານຂະແໜງການຈັດຕັ້ງກໍ່ສ້າງພັກຕ້ອງສູ້ຊົນບືນຕົວຂຶ້ນຢ່າງບໍ່ຢຸດຢັ້ງ, ອອກແຮງຝຶກຝົນຫຼໍ່ຫຼອມຢ່າງເປັນປະຈຳ, ຍົກສູງລະດັບທຸກດ້ານ, ປ່ຽນແປງໃໝ່ວິທີ ແລະ ແບບແຜນເຮັດວຽກ, ໃກ້ຊິດກັບພາກຕົວຈິງ, ຢຶດໝັ້ນຫຼັກການ, ພະຍາຍາມຮັບຟັງຄວາມຄິດເຫັນ. ບັນດາຜູ້ທີ່ແບກຫາບພາລະກຳອັນສຳຄັນ, ຫຍຸ້ງຍາກ, ສັບສົນນີ້ ມີກຽດອັນສະຫງ່າ ແຕ່ຄວາມຮັບຜິດຊອບກໍ່ໜັກໜ່ວງທີ່ສຸດ, ເຊິ່ງບໍ່ພຽງແຕ່ຕ້ອງມີຄວາມຮູ້ຂະແໜງວິຊາສະເພາະເທົ່ານັ້ນ ຫາກຍັງຕ້ອງມີຄວາມຮູ້ຮອບດ້ານພໍຄວນ, ກຳແໜ້ນກົດລະບຽບຂອງພັກ, ກຳແໜ້ນບັນດາຫຼັກການ, ຂໍ້ກຳນົດ, ເອກະສານທີ່ກ່ຽວຂ້ອງ, ຕ້ອງໝູນໃຊ້ຢ່າງຊຳນິຊຳນານ. ພິເສດແມ່ນ ຕ້ອງມີຈິດໃຈມະນຸດອະລິຍະທຳ, ຊື່ສັດສຸຈະລິດ, ຜ່ອງໃສ, ພາວະວິໄສ, ສຸດອົກສຸດໃຈຕໍ່ວຽກງານ; ບໍ່ອ່ອນຍອມຕໍ່ບໍ່ວ່າການກະທົບໃດ ແຮງໜີບທີ່ບໍ່ສົດໃສໃດໆ. ພວກເຮົາຕ້ອງມີນ້ຳໃຈເຂັ້ມແຂງ, ກ້າກີດກັ້ນການປະພຶດທີ່ບໍ່ຖືກຕ້ອງ, ຕໍ່ສູ້ຕ້ານໃຫ້ຈົນໄດ້ຕໍ່ພະຍາດພັກພວກ, ພາກສ່ວນ, ເອກະຊົນນິຍົມ, ຜົນປະໂຫຍດໝູ່ພວກ ແລະ ກໍບໍ່ຍອມໃຫ້ຖືກຊື້ຈ້າງຈອບອອຍ, ບໍ່ຍອມໃຫ້ຖືກແຊກຄຸມຍ້ອນຄວາມພົວພັນສ່ວນຕົວ, ລຶ້ງເຄີຍທີ່ບໍ່ຜ່ອງໃສ. ຂ້າພະເຈົ້າຢາກໂອ້ລົມ ແລະ ກ່າວເນັ້ນຄືແນວນັ້ນ ເພື່ອໃຫ້ຂະແໜງການຂອງພວກເຮົາເປັນຂະແໜງການແບບຢ່າງ, ມີກຽດອັນສະຫງ່າ, ປະຕິບັດໜ້າທີ່ການເມືອງທີ່ໄດ້ຮັບມອບໝາຍຢ່າງສຳເລັດຜົນ. ຫວັງວ່າ ຜ່ານກອງປະຊຸມນີ້ ບັນດາສະຫາຍຈະຖອດຖອນບົດຮຽນໄດ້ຫຼາຍ, ມີຄວາມຕັດສິນໃຈໃໝ່, ບັນຍາກາດທ່ວງທ່າໃໝ່ ເພື່ອສຳເລັດໜ້າທີ່ທີ່ໄດ້ຮັບມອບໝາຍຢ່າງດີເດັ່ນ, ສົມກຽດກັບຄວາມຄອງຄອຍຂອງພັກ, ລັດ ແລະ ປະຊາຊົນ./.
ໂດຍ ຫງວຽນຝູຈ້ອງ
ເລຂາທິການໃຫຍ່
ຄະນະບໍລິຫານງານສູນກາງພັກກອມມູນິດຫວຽດນາມ
-------------------------
* ຫົວຂໍ້ໂດຍວາລະສານກອມມູນິດເປັນຜູ້ແຕ່ງ
