ຄຳນຳຂອງຄະນະບັນນາທິການ: ໃນສອງວັນ ຄືວັນທີ 19 - 20 ເມສາ 2016, ຢູ່ທີ່ຮ່າໂນ້ຍ, ສູນກາງພັກກອມມູນິດ ຫວຽດນາມ ໄດ້ຈັດຕັ້ງ ກອງປະຊຸມພະນັກງານທົ່ວປະເທດ ເພື່ອຮ່ຳຮຽນ, ເຊື່ອມຊຶມ ມະຕິກອງປະຊຸມໃຫຍ່ ຄັ້ງທີ XII ຂອງພັກ. ສະຫາຍ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກ ໄດ້ມາຮ່ວມ ແລະ ກ່າວປາໄສຊີ້ນຳກອງປະຊຸມ. ວາລະສານກອມມູນິດ ຂໍເປັນກຽດໄດ້ແນະນຳ ເນື້ອໃນບົດປາໄສ ຂອງສະຫາຍເລຂາທິການໃຫຍ່.
ກ່ອນອື່ນໝົດ, ຂ້າພະເຈົ້າຂໍຕາງໜ້າກົມການເມືອງ, ຄະນະເລຂາທິການສູນກາງ ສະແດງຄວາມຊົມເຊີຍຢ່າງສຸດໃຈ ຕໍ່ບັນດາສະຫາຍທີ່ມາຮ່ວມກອງປະຊຸມພະນັກງານທົ່ວປະເທດ ເພື່ອຮ່ຳຮຽນ, ເຊື່ອມຊຶມມະຕິກອງປະຊຸມໃຫຍ່ຄັ້ງທີ XII ຂອງພັກ.
ຄືດັ່ງທີ່ບັນດາສະຫາຍໄດ້ຮູ້ແລ້ວ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ ໄດ້ຮັບຜົນສຳເລັດຢ່າງຈົບງາມ. ນີ້ແມ່ນເຫດການທີ່ມີຄວາມໝາຍສຳຄັນຍິ່ງ, ມັນກຳນົດທິດ, ຊຸກຍູ້ ແລະ ປຸກລະດົມໃຫ້ທົ່ວພັກ, ທົ່ວປວງຊົນ, ທົ່ວກອງທັບເຮົາ ເສີມຂະຫຍາຍຢ່າງສຸດຂີດ ນ້ຳໃຈຮັກຊາດ, ເຈດຈຳນົງອີງໃສ່ຕົນເອງສ້າງຕົນໃຫ້ເຂັ້ມແຂງ, ກຳລັງແຮງແຫ່ງມະຫາສາມັກຄີປວງຊົນທັງຊາດ, ສູ້ຊົນເພື່ອສ້າງປະເທດຫວຽດນາມໃຫ້ກາຍເປັນປະເທດອຸດສາຫະກຳຕາມທິດທັນສະໄໝໂດຍພື້ນຖານ ໂດຍໄວ.
ພາຍຫຼັງກອງປະຊຸມໃຫຍ່ຄັ້ງທີ XII ຂອງພັກ, ພວກເຮົາໄດ້ສຸມໃສ່ຊີ້ນຳ, ຈັດຕັ້ງໃຫ້ປະຊາຊົນຕ້ອນຮັບບຸນປີໃໝ່ປີວອກ ຢ່າງເບີກບານມ່ວນຊື່ນ ສົດໃສ ແລະ ປະຢັດ. ກົມການເມືອງ, ຄະນະເລຂາທິການສູນກາງ, ລັດຖະບານໄດ້ມີການຊີ້ນຳ ໃຫ້ປັບປຸງລະບຽບວິໄນ, ການອອກແຮງງານ ພາຍຫຼັງບຸນປີໃໝ່ປະຈຳຊາດ ແລະ ການເຄື່ອນໄຫວງານບຸນເທດສະການຕົ້ນປີ.
ບັນດາຂະແໜງການ, ຂັ້ນຕ່າງໆ ໄດ້ຜັນຂະຫຍາຍວຽກງານຕ່າງໆ ຫຼາຍຢ່າງ, ເປັນຕົ້ນແມ່ນສຸມໃສ່ແກ້ໄຂຄວາມຫຍຸ້ງຍາກ, ພັດທະນາເສດຖະກິດ - ສັງຄົມ, ຮັບມືກັບການປ່ຽນແປງສະພາບພູມິອາກາດ, ໄພທຳມະຊາດ, ໂລກລະບາດ, ປະຕິບັດບັນດາໜ້າທີ່ກໍ່ສ້າງພັກ, ປ້ອງກັນປະເທດ, ປ້ອງກັນຄວາມສະຫງົບ, ການພົວພັນຕ່າງປະເທດ.
ກົມການເມືອງສູນກາງພັກ ໄດ້ຮີບກໍ່ສ້າງໂຄງການປະຕິບັດງານໃນສະໄໝປະຈຳການ ເພື່ອສະເໜີໃຫ້ກອງປະຊຸມສະໄໝສາມັນເທື່ອທີສອງ ຄະນະບໍລິຫານງານສູນກາງຊຸດທີ XII ຮັບຮອງຜ່ານ; ແບ່ງງານໃຫ້ບັນດາສະຫາຍໃນກົມການເມືອງ, ຄະນະເລຂາທິການສູນກາງ, ກະກຽມບຸກຄະລາກອນຂອງບັນດາອົງການລັດ ເພື່ອໃຫ້ກອງປະຊຸມສະໄໝສາມັນເທື່ອທີ 11 ຂອງສະພາແຫ່ງຊາດຊຸດທີ XIII ດຳເນີນການປ່ອນບັດເລືອກຕັ້ງ ຫຼືໃຫ້ສັດຕະຍາບັນ; ກະກຽມບຸກຄະລາກອນຂອງບັນດາອົງການການເມືອງ - ສັງຄົມ, ບຸກຄະລາກອນທີ່ອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ XIV.
ນັບແຕ່ພາຍຫຼັງກອງປະຊຸມໃຫຍ່ມາຮອດດຽວນີ້, ພະນັກງານ ສະມາຊິກພັກ ແລະ ປະຊາຊັນມີຄວາມເບີກບານມ່ວນຊື່ນທີ່ສຸດ, ໄດ້ຕີລາຄາສູງຜົນສຳເລັດຂອງກອງປະຊຸມໃຫຍ່ຄັ້ງທີ XII, ສະແດງຄວາມເຊື່ອໝັ້ນ, ຄວາມຫວັງດີ ຕໍ່ຖັນແຖວພະນັກງານການນຳຂອງພັກ ແລະ ລັດ; ເຫັນດີ ສະໜັບສະໜູນແຜນນະໂຍບາຍ, ນະໂຍບາຍຂອງພັກ ແລະ ລັດເຮົາ. ກົມການເມືອງໄດ້ປະກາດໃຊ້ ຄຳສັ່ງສະບັບເລກທີ 01-CT/TW, ລົງວັນທີ 22 ມີນາ 2016, ວ່າດ້ວຍການຮ່ຳຮຽນ, ເຊື່ອມຊຶມ, ໂຄສະນາເຜີນແຜ່, ຜັນຂະຫຍາຍການປະຕິບັດ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ.
ເພື່ອຜັນຂະຫຍາຍປະຕິບັດຄຳສັ່ງຂອງກົມການເມືອງ, ມື້ນີ້, ຄະນະເລຂາທິການສູນກາງພັກ ຈັດຕັ້ງກອງປະຊຸມພະນັກງານທົ່ວປະເທດ ຮ່ຳຮຽນ, ເຊື່ອມຊຶມມະຕິກອງປະຊຸມໃຫຍ່ຄັ້ງທີ XII ຂອງພັກ. ນີ້ເປັນຄັ້ງທຳອິດ ທີ່ພວກເຮົາຈັດຕັ້ງກອງປະຊຸມເຊື່ອມຊຶມມະຕິກອງປະຊຸມໃຫຍ່ຂອງພັກ ດ້ວຍຂະໜາດໃຫຍ່ໂຕ ແລະ ການເຂົ້າຮ່ວມຂອງຜູ້ແທນເກືອບ 1.400 ຄົນ ຊຶ່ງປະກອບມີ ບັນດາສະຫາຍກຳມະການຄະນະບໍລິຫານງານສູນກາງພັກ, ບັນດາສະຫາຍພະນັກງານຫຼັກແຫຼ່ງຂອງບັນດາທ້ອງຖິ່ນ, ຄະນະກຳມະການ, ກະຊວງ, ຂະແໜງການ, ສຳນັກງານອົງການສູນກາງ, ສິ່ງດັ່ງກ່າວສະແດງໃຫ້ເຫັນເຖິງຄວາມສຳຄັນ ແລະ ຄວາມໝາຍອັນໃຫຍ່ຫຼວງຂອງກອງປະຊຸມ.
ເອກະສານກອງປະຊຸມໃຫຍ່ຄັ້ງທີ XII ຂອງພັກ ແມ່ນຜະລິດຕະພັນແຫ່ງສະຕິປັນຍາຂອງພະນັກງານ, ສະມາຊິກພັກ ແລະ ປະຊາຊົນຫວຽດນາມທັງໝົດ. ຮ່າງເອກະສານຕ່າງໆ ທີ່ນຳສະເໜີຕໍ່ກອງປະຊຸມໃຫຍ່ ໄດ້ຖືກກະກຽມຢ່າງເປັນເຈົ້າການແຕ່ກາງສະໄໝປະຈຳການທີ XI, ໄດ້ຮັບຄວາມເອົາໃຈໃສ່ເປັນພິເສດ ແລະ ການຊີ້ນຳຢ່າງໃກ້ຊິດ ຂອງຄະນະບໍລິຫານງານສູນກາງ, ກົມການເມືອງ, ຄະນະເລຂາທິການສູນກາງພັກ ຊຸດທີ XI; ຫຼາຍຂັ້ນ, ຂະແໜງການ ໄດ້ປະກອບຄວາມຄິດເຫັນທີ່ສຳຄັນ ດ້ວຍວິທີເຮັດຢ່າງເປັນແບບແຜນ, ວິທະຍາສາດ, ປະຊາທິປະໄຕ. ການຂໍຄວາມເຫັນປະກອບສ່ວນ ແລະ ການຮັບເອົາຄວາມຄິດເຫັນເພື່ອປະກອບເຂົ້າໃນຮ່າງເອກະສານຕ່າງໆ ທີ່ຈະສະເໜີຕໍ່ກອງປະຊຸມໃຫຍ່ຄັ້ງທີ່ XII ນັ້ນ ແມ່ນໄດ້ປະຕິບັດຢ່າງເຂັ້ມງວດ, ຖືກຕ້ອງຕາມແຜນນະໂຍບາຍຂອງຄະນະບໍລິຫານງານສູນກາງພັກ ຊຸດທີ XI.
ເນື້ອໃນຂອງເອກະສານກອງປະຊຸມໃຫຍ່ຄັ້ງນີ້ ໄດ້ກໍ່ສ້າງບົນພື້ນຖານການສະຫລຸບສັງລວມຢ່າງເລິກເຊິ່ງ ທິດສະດີ ແລະ ພຶດຕິກຳ 30 ປີແຫ່ງການປ່ຽນແປງໃໝ່, ໂດຍມີການສືບທອດ, ປັບປຸງເພີ່ມເຕີມ, ຂະຫຍາຍເນື້ອໃນຂອງເອກະສານກອງປະຊຸມໃຫຍ່ຄັ້ງທີ XI, ຂອງບັນດາກອງປະຊຸມສູນກາງພັກໃນສະໄໝປະຈຳການ ແລະ ແນວທາງ, ທັດສະນະຂອງພັກໃນສະໄໝປະຈຳການກ່ອນໜ້ານີ້.
ບັນດາເອກະສານນັ້ນສືບຕໍ່ຢັ້ງຢືນການບູລະນະທັດສະນະ, ແນວທາງການປ່ຽນແປງໃໝ່ຂອງພັກເຮົາ ບົນພື້ນຖານໝູນໃຊ້ລັດທິ ມາກ-ເລນີນ, ແນວຄິດໂຮ່ຈິມິນ ຢ່າງປະດິດສ້າງ ແລະ ຮັບເອົາບົດຮຽນສາກົນທີ່ສອດຄ່ອງກັບເງື່ອນໄຂຂອງປະເທດເຮົາ.
ເອກະສານກອງປະຊຸມໃຫຍ່ຄັ້ງນີ້ ມີຈຸດໃໝ່ຫຼາຍໆຈຸດ ເຊິ່ງສະແດງໃຫ້ເຫັນເຖິງລະດັບພັດທະນາຈິນຕະນາການທິດສະດີ ຂອງພັກເຮົາໃນດ້ານຕ່າງໆ ຄືການເມືອງ, ເສດຖະກິດ, ວັດທະນະທຳ, ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ການພົວພັນຕ່າງປະເທດ, ກໍ່ສ້າງພັກ ແລະ ລະບົບການເມືອງ. ຈຸດພົ້ນເດັ່ນໃນເນື້ອໃນຂອງເອກະສານກອງປະຊຸມໃຫຍ່ຄັ້ງທີ XII ຂອງພັກ ແມ່ນສະແດງໃຫ້ເຫັນເຖິງ ບັນດາທັດສະນະທີ່ສອດຮ້ອຍຕະຫຼອດ, ບັນດາບັນຫາພື້ນຖານ ຫຼັກແຫຼ່ງທີ່ສຸດ ຂອງການປະຕິວັດຫວຽດນາມ, ບັນດາຫຼັກການໃນການເຄື່ອນໄຫວຂອງພັກ, ພ້ອມນັ້ນ ຊີວິດຕົວຈິງກໍ່ໄດ້ພາໃຫ້ເກີດມີບັນດາໜ້າທີ່ອັນລະອຽດ, ບັນດາບັນຫາໃໝ່ ຮີບດ່ວນທີ່ຈະຕ້ອງແກ້ໄຂ.
ມະຕິ ແລະ ບັນດາເອກະສານກອງປະຊຸມໃຫຍ່ ຂອງພັກໄດ້ມີແລ້ວ. ສິ່ງສຳຄັນໃນເວລານີ້ແມ່ນ ນຳເອົາມະຕິຂອງພັກເຂົ້າສູ່ຊີວິດຄວາມເປັນຢູ່, ແມ່ນຈັດຕັ້ງຜັນຂະຫຍາຍປະຕິບັດມະຕິໃຫ້ມີປະສິດທິຜົນ. ເຮັດຄືແນວໃດເພື່ອແກ້ໄຂຜ່ານຜ່າສະພາບການ ມະຕິແມ່ນຖືກຕ້ອງ ດີ ແຕ່ເຂົ້າສູ່ຊີວິດຕົວຈິງຢ່າງຊັກຊ້າ; ຊ້ຳພັດ ບາງກໍລະນີ ເວົ້າບໍ່ໄປຄຽງຄູ່ກັບເຮັດ, ເວົ້າຫຼາຍເຮັດໜ້ອຍ.
ພວກເຮົາຕ້ອງເຊື່ອມຊຶມຢ່າງເລິກເຊິ່ງ, ການຮ່ຳຮຽນ, ຜັນຂະຫຍາຍມະຕິຂອງກອງປະຊຸມໃຫຍ່ຄັ້ງທີ XII ຂອງພັກຄັ້ງນີ້ ເປັນການດຳເນີນຊີວິດການເມືອງຢ່າງກວ້າງຂວາງເລິກເຊິ່ງ, ມັນມີຄວາມໝາຍສຳຄັນເປັນພິເສດ, ແນໃສ່ສ້າງໃຫ້ມີການຫັນປ່ຽນທາງດ້ານຄວາມຮັບຮູ້, ເປັນເອກະພາບທາງດ້ານເຈດຈຳນົງ ແລະການກະທຳໃນທົ່ວພັກ, ທົ່ວປວງຊົນ, ທົ່ວກອງທັບ ເຊິ່ງກ່ອນອື່ນໝົດແມ່ນຖັນແຖວພະນັກງານຫຼັກແຫຼ່ງຂອງຂະແໜງການ, ຂັ້ນຕ່າງໆ.
ການຮ່ຳຮຽນ, ເຊື່ອມຊຶມມະຕິຕ້ອງປະກອບສ່ວນເຂົ້າໃນການເພີ່ມທະວີການກໍ່ສ້າງພັກທາງດ້ານການເມືອງ ແນວຄິດ, ກີດກັ້ນ ແລະ ຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, ແກ້ໄຂປະກົດການ “ຫັນປ່ຽນດ້ວຍຕົນເອງ”, “ຜັນປ່ຽນດ້ວຍຕົນເອງ” ຢູ່ພາຍໃນ; ແກ້ໄຂຄວາມຮັບຮູ້ທີ່ຜິດພາດ; ຕໍ່ສູ້ຕ້ານກັບທັດສະນະຜິດພາບ ທີ່ເປັນສັດຕູ ໄດ້ຢ່າງມີປະສິດທິຜົນ.
ດ້ວຍຈິດໃຈດັ່ງກ່າວນັ້ນ, ຂ້າພະເຈົ້າຂໍສະເໜີໃຫ້ບັນດາສະຫາຍ ໃນວິວັດການຈັດຕັ້ງຮ່ຳຮຽນ ເຊື່ອມຊຶມ ໂຄສະນາເຜີນແຜ່ ຜັນຂະຫຍາຍປະຕິບັດມະຕິນັ້ນ ຕ້ອງກຳແໜ້ນຈຸດປະສົງ ລະດັບຄາດໝາຍ ໜ້າທີ່ ທີ່ໄດ້ລະບຸໃນຄຳສັ່ງຂອງກົມການເມືອງ ແລະ ບົດແນະນຳຂອງສູນກາງ.
ລະອຽດຄື:
ທີໜຶ່ງ, ບັນດາສະຫາຍຄວນສຸມໃສ່ຄົ້ນຄວ້າ, ກຳແໜ້ນບັນດາທັດສະນະອັນພື້ນຖານ, ແນວຄິດຊີ້ນຳ, ບັນດາເນື້ອໃນຫຼັກແຫຼ່ງ ແລະ ບັນຫາໃໝ່ ຢູ່ໃນບັນດາເອກະສານກອງປະຊຸມໃຫຍ່ຄັ້ງທີ XII; ປຽບທຽບກັບບັນດາເນື້ອໃນຂອງກອງປະຊຸມໃຫຍ່ຄັ້ງທີ XI ແລະ ບັນດາກອງປະຊຸມໃຫຍ່ຄັ້ງກ່ອນໆ ຂອງພັກ ເພື່ອຮັບຮູ້ຈະແຈ້ງກ່ຽວກັບການສືບທອດ, ການປັບປຸງເພີ່ມເຕີມ, ຂະຫຍາຍຈິນຕະນາການ ທິດສະດີຂອງພັກ ໃນບັນດາດ້ານໃຫຍ່ ແລະ ບັນດາຂົງເຂດລະອຽດ, ກໍ່ຄືໃນການເຄື່ອນໄຫວຊີ້ນຳ ນຳພາພາກຕົວຈິງຂອງພັກ. ກຳແໜ້ນເປົ້າໝາຍກວມລວມ ແລະ ໜ້າທີ່ກວມລວມ, ບັນດາລະດັດຄາດໝາຍຕົ້ນຕໍ ກ່ຽວກັບການພັດທະນາປະເທດໃນ 5 ປີຕໍ່ໜ້າ. ເຂົ້າໃຈຢ່າງຖືກຕ້ອງ ກ່ຽວກັບບັນດາເນື້ອໃນຕົ້ນຕໍ ຂອງບັນດາຂົງເຂດອັນລະອຽດ ທີ່ໄດ້ສະເໜີຢູ່ໃນເອກະສານຕ່າງໆ, ເປັນຕົ້ນແມ່ນທິດທາງ ໜ້າທີ່, ເພື່ອຊີ້ນຳການກໍ່ສ້າງໂຄງການ ແຜນການ, ກວດຄືນ ປັບປຸງ ເພີ່ມເຕີມກົນໄກ, ນະໂຍບາຍ ເພື່ອແນໃສ່ເສີມຂະຫຍາຍຜົນງານຕ່າງໆ ທີ່ບັນລຸໄດ້, ແກ້ໄຂຜ່ານຜ່າຄວາມຈຳກັດ, ຂໍ້ຂາດຕົກບົກພ່ອງໃນຂົງເຂດຕ່າງໆ.
ໃນ 6 ໜ້າທີ່ຈຸດໝັກໃຈກາງທີ່ກອງປະຊຸມໃຫຍ່ຄັ້ງທີ XII ໄດ້ກຳນົດນັ້ນ, ຄວນຄົ້ນຄວ້າແຕ່ລະໜ້າທີ່ ຢ່າງລະອຽດ, ສົມທຽບກັບຄວາມຮຽກຮ້ອງຕ້ອງການ ເງື່ອນໄຂອັນລະອຽດຢູ່ທ້ອງຖິ່ນ, ສຳນັກງານອົງການ, ກົມກອງຂອງຕົນ ເພື່ອຄັດເລືອກ ກຳນົດ ແລະ ຊີ້ນຳປະຕິບັດ ບັນດາໜ້າທີ່ດັ່ງກ່າວນັ້ນໃນສະໄໝ 2016 - 2020 ຢ່າງມີປະສິດທິຜົນ.
ທີສອງ, ຕາມຄວາມຮັບຜິດຊອບ ແລະ ໜ້າທີ່ທີ່ໄດ້ຮັບມອບໝາຍ, ບັນດາຄະນະພັກຂັ້ນຕ່າງໆ, ບັນດາການຈັດຕັ້ງພັກ, ກ່ອນອື່ນແມ່ນຜູ້ນຳໜ້າ, ຕ້ອງຮັບຜິດຊອບຊີ້ນຳການກໍ່ສ້າງແຜນການຜັນຂະຫຍາຍປະຕິບັດໃນທັນທີທັນໃດ ຄຳສັ່ງຂອງກົມການເມືອງ ແລະ ບົດແນະນຳຂອງສູນກາງ ກ່ຽວກັບຈັດຕັ້ງການຮ່ຳຮຽນ, ເຊື່ອມຊືມ, ໂຄສະນາເຜີຍແຜ່, ຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ XII ໃຫ້ພະນັກງານ ສະມາຊິກພັກ ແລະ ປະຊາຊົນ. ການຊີ້ນຳການຮ່ຳຮຽນ, ເຊື່ອມຊືມ, ໂຄສະນາເຜີຍແຜ່, ຜັນຂະຫຍາຍປະຕິບັດມະຕິກອງປະຊຸມໃຫຍ່ ຕ້ອງສົມທົບກັບການກໍ່ສ້າງໂຄງການ ແຜນງານການກະທຳເຄື່ອນໄຫວທີ່ແທດກັບຕົວຈິງ.
ກຳຈັດດັດແກ້ພະຍາດຮູບການ, ຮຽນພໍເປັນຮີດໃຫ້ມັນແລ້ວ. ປ່ຽນແປງໃໝ່ແບບວິທີການຄຸ້ມຄອງ, ຕີລາຄາຄຸນນະພາບການຮ່ຳຮຽນ, ລົງເລິກຕີລາຄາລະດັບຄວາມຮັບຮູ້ຂອງຜູ້ຮຽນ ກ່ຽວກັບບັນດາເນື້ອໃນອັນພື້ນຖານ, ບັນດາຈຸດໃໝ່ຂອງມະຕິ ແລະ ຄວາມສາມາດຂອງພະນັກງານ ສະມາຊິກພັກ ໃນການໝູນໃຊ້ມະຕິເຂົ້າໃນທ້ອງຖິ່ນ, ສຳນັກງານອົງການ, ກົມກອງຂອງຕົນ. ໃນການສົນທະນາ ແລະ ຂຽນບົດເກັບກຳຜົນການຮຽນ, ຄວນສະເໜີວິທີແກ້ໄຂທີ່ລະອຽດ ເພື່ອແນໃສ່ແກ້ໄຂຄວາມຫຍຸ້ງຍາກ, ສິ່ງຄົງຄ້າງທີ່ພວມພົ້ນເດັ່ນຂຶ້ນຢູ່ທ້ອງຖິ່ນ, ສຳນັກງານອົງການ, ກົມກອງ.
ທີສາມ, ບັນດາອົງການທີ່ເຮັດການຄົ້ນຄວ້າ, ສິດສອນທິດສະດີການເມືອງ ຄວນອີງໃສ່ເນື້ອໃນຂອງມະຕິ ເພື່ອກໍ່ສ້າງໂຄງການ, ຫົວຂໍ້ຄົ້ນຄວ້າທິດສະດີ, ສະຫລຸບສັງລວມພຶດຕິກຳການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຕ້ອງຮີບເພີ່ມເຕີມຂໍ້ມູນໃໝ່, ບູລະນະໂຄງການ ຫຼັກສູດການສິດສອນທິດສະດີການເມືອງ ໃຫ້ແທດເໝາະກັບແຕ່ລະເປົ້າໝາຍທີ່ລະອຽດ.
ທີສີ່, ວຽກງານໂຄສະນາເຜີຍແຜ່ ມະຕິກອງປະຊຸມໃຫຍ່ຄັ້ງທີ XII ຂອງພັກ ຕ້ອງໄດ້ດຳເນີນຢ່າງກວ້າງຂວາງເລິກເຊິ່ງ, ເປັນປະຈຳ, ດ້ວຍຫຼາຍຮູບການທີ່ອຸດົມສົມບູນ, ຈັບໃຈ ແລະ ສອດຄ່ອງກັບແຕ່ລະເປົ້າໝາຍ, ຮັບປະກັນການໂຄສະນາ ເຜີຍແຜ່ມະຕິກອງປະຊຸມໃຫຍ່ ຢ່າງກວ້າງຂວາງ ທົ່ວເຖິງ ເຖິງປະຊາຊົນໃນປະເທດ ແລະ ພີ່ນ້ອງຮ່ວມຊາດຢູ່ຕ່າງປະເທດ.
ຂ້າພະເຈົ້າເຊື່ອໝັ້ນວ່າ, ດ້ວຍຈິດໃຈເຂັ້ມງວດ ແລະ ຄວາມຮັບຜິດຊອບສູງ, ກອງປະຊຸມຮ່ຳຮຽນ, ເຊື່ອມຊືມມະຕິກອງປະຊຸມໃຫຍ່ຄັ້ງທີ XII ຂອງພວກເຮົາຈະບັນລຸຜົນສຳເລັດອັນດີງາມ, ເປັນພື້ນຖານເພື່ອປະກອບສ່ວນເຮັດໃຫ້ການຜັນຂະຫຍາຍຮ່ຳຮຽນ, ເຊື່ອມຊືມ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ ຢູ່ບັນດາທ້ອງຖິ່ນ, ສຳນັກງານອົງການ, ກົມກອງ ໄດ້ຮັບຜົນສຳເລັດອັນດີງາມ.
ດ້ວຍຈິດໃຈດັ່ງກ່າວນັ້ນ, ຂ້າພະເຈົ້າຂໍປະກາດປິດກອງປະຊຸມພະນັກງານທົ່ວປະເທດ ຮ່ຳຮຽນ, ເຊື່ອມຊຶມມະຕິກອງປະຊຸມໃຫຍ່ຄັ້ງທີ XII ຂອງພັກ./.
ໂດຍ ຫງວຽນຝູຈ້ອງ,
ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ
----------------------------------
* ຫົວຂໍ້ໂດຍແມ່ນວາລະສານກອມມູນິດເປັນຜູ້ແຕ່ງ.
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 883 (ເດືອນພຶດສະພາ 2016)