ສະຫາຍ ຫງວຽນຝູຈ້ອງ ເລຂາທິການໃຫຍ່ ພັກກອມມູນິດຫວຽດນາມ, ຫົວໜ້າຄະນະຊີ້ນຳສູງກາງກ່ຽວກັບການປ້ອງກັນ ແລະຕ້ານການສໍ້ລາດບັງຫຼວງ ເປັນປະທານກອງປະຊຸມ (ພາບ: TTXVN)
ສະຫາຍເລຂາທິການໃຫຍ່ເນັ້ນໜັກເປັນພິເສດເຖິງການປັບປຸງຄວາມເຊື່ອຖືຂອງປະຊາຊົນ, ຕ້ອງເຂົ້າໃຈປະຊາຊົນ, ອີງໃສ່ປະຊາຊົນ ແລະ ໄດ້ຮັບຄວາມເຫັນດີເຫັນພ້ອມ ສະໜັບສະໜູນຈາກປະຊາຊົນ - ນີ້ແມ່ນແຫຼ່ງພະລັງຜັດດັນອັນໃຫຍ່ຫຼວງ ເພື່ອສືບຕໍ່ພາປະເທດຊາດກ້າວຂຶ້ນຢ່າງໜັກແໜ້ນ ແລະ ໃຫ້ພັກເຮົາ, ຊາດເຮົາຍືນຍົງຄົງຕົວຕະຫຼອດການ. ຕໍ່ໄປນີ້ແມ່ນເນື້ອໃນການສຳພາດ:
- ຮຽນສະຫາຍເລຂາທິການໃຫຍ່, ຮູບພາບ “ເຕົາໄຟ” ຮ້ອນ ໄດ້ຮັບການປຶກສາສົນທະນາຢ່າງຟົດເດືອດຈາກປະຊາຊົນ ເຊິ່ງເໝືອນກັບການຍອມຮັບ, ຄວາມເຫັນດີເຫັນພ້ອມ ສະໜັບສະໜູນຕໍ່ຄວາມມານະພະຍາຍາມ ຕັດສິນໃຈຂອງພັກ-ລັດ ແລະ ລະບົບການເມືອງທັງໝົດ ໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ຕ້ານຄວາມຫຍໍ້ທໍ້ ອະນາຈານ. ສະຫາຍເລຂາທິການໃຫຍ່ຕີລາຄາຄືແນວໃດກ່ຽວກັບບັນດາຜົນສຳເລັດທີ່ບັນລຸໄດ້ໃນປີທີ່ຜ່ານມາ?
ສະຫາຍເລຂາທິການໃຫຍ່ ຫງວຽນຝູຈ້ອງ: ການປ້ອງກັນແລະຕ້ານການສໍ້ລາດບັງຫຼວງແມ່ນວຽກງານໃຫຍ່, ສຳຄັນທີ່ສຸດ. ສູນກາງພັກໄດ້ອອກມະຕິຫຼາຍສະບັບ; ສະພາແຫ່ງຊາດໄດ້ປຶກສາພິຈາລະນາກ່ຽວກັບບັນຫານີ້ໃນທຸກກອງປະຊຸມ; ຜູ້ມີສິດເລືອກຕັ້ງໄດ້ເວົ້າເຖິງບັນຫານີ້ໃນທຸກການພົບປະກັບສະມາຊິກສະພາແຫ່ງຊາດ. ບໍ່ແມ່ນວ່າຮອດເວລານີ້ ວຽກງານປ້ອງກັນແລະຕ້ານການສໍ້ລາດບັງຫຼວງຈຶ່ງໄດ້ດຳເນີນໄປ, ມັນຖືກປະຕິບັດມາແຕ່ດົນແລ້ວ. ເບິ່ງຄືນປີທີ່ຜ່ານມາອາດຈະເຫັນວ່າ ວຽກງານປ້ອງກັນແລະຕ້ານການສໍ້ລາດບັງຫຼວງໄດ້ຮັບການຊີ້ນຳ, ດຳເນີນຢ່າງດຸເດືອດຂຸ້ນຂ້ຽວ, ຄົບຊຸດກວ່າ, ເປັນແບບສະບັບ ໜັກແໜ້ນ, ດ້ວຍຈິດໃຈເວົ້າໄປຄຽງຄູ່ກັບເຮັດ ແລະ ເຮັດໃຫ້ຈົນໄດ້, ດັ່ງນັ້ນຈຶ່ງມີການຫັນປ່ຽນຢ່າງຕັ້ງໜ້າໃນພາກຕົວຈິງ, ມີຜົນສຳເລັດທີ່ຈະແຈ້ງ, ປະຊາຊົນມີຄວາມເຊື່ອຖືແລະພາກພູມໃຈກວ່າແຕ່ກ່ອນ.
ບັນລຸຜົນສຳເລັດດັ່ງກ່າວນັ້ນ, ກ່ອນອື່ນໝົດແມ່ນຍ້ອນກົມການເມືອງ, ຄະນະເລຂາທິການສູນກາງພັກໄດ້ເອົາໃຈໃສ່ຢ່າງເປັນປະຈຳ ໄດ້ຊີ້ນຳຢ່າງເດັດດ່ຽວຂຸ້ນຂ້ຽວ, ຄະນະຊີ້ນຳສູງກາງກ່ຽວກັບການປ້ອງກັນແລະຕ້ານການສໍ້ລາດບັງຫຼວງ, ຄະນະກຳມະການກວດກາສູງກາງໄດ້ມີຄວາມຕັ້ງໜ້າໃນການປ່ຽນແປງໃໝ່ແບບວິທີການເຄື່ອນໄຫວ, ໃຫ້ຄວາມສຳຄັນແກ່ການຍົກສູງປະສິດທິຜົນຂອງວຽກງານ, ມີມາດຕະການອັນລະອຽດຫຼາຍຢ່າງ ເພື່ອແນໃສ່ແກ້ໄຂສິ່ງຄົງຄ້າງຕ່າງໆໃນພາກຕົວຈິງ, ແກ້ໄຂຢ່າງຂາດຕົວຕໍ່ຫຼາຍກໍລະນີ, ຄະດີທີ່ສັບສົນຮ້າຍແຮງ ເຊິ່ງຫາງສຽງສັງຄົມໄດ້ເອົາໃຈໃສ່ເປັນພິເສດ.
ດ້ວຍການລົງມືຢ່າງຄົບຊຸດ, ເຂົ້າແກັບເຂົ້າເກຍຂອງບັນດາອົງການຮັບຜິດຊອບ, ດັ່ງນັ້ນເກືອບທຸກເນື້ອໃນທີ່ສຳຄັນໃນແຜນງານຂອງຄະນະຊີ້ນຳສູນກາງຈຶ່ງໄດ້ຮັບການປະຕິບັດຢ່າງເຂັ້ມງວດ ແລະ ບັນລຸຜົນສຳເລັດຖືກຕ້ອງຕາມແຜນການ. ຫຼາຍກໍລະນີສໍ້ລາດບັງຫຼວງ, ກໍລະນີເສດຖະກິດທີ່ຮ້າຍແຮງພິເສດ ຖືກດຳເນີນການສືບສວນ, ຟ້ອງຮ້ອງ, ດຳເນີນຄະດີ ພິພາກສາຢ່າງທັນການ, ເຂັ້ມງວດຕາມກົດໝາຍ, ໃນນັ້ນມີພະນັກງານການນຳຂັ້ນສູງ, ພະນັກງານປະຈຳການ ແລະ ພະນັກງານບຳນານໄດ້ລະເມີດກົດໝາຍ.
ໃນຊຸມເດືອນຕົ້ນຂອງປີ 2018 ນີ້, ການທີ່ບັນດາອົງການບັງຄັບໃຊ້ກົດໝາຍຫວຽດນາມໄດ້ດຳເນີນການພິພາກສາຕໍ່ຄະດີໃຫຍ່ຕ່າງໆເຊັ່ນ ຄະດີຟ້າມກົງແຢັງແລະພວກຕ້ອງຫາ (ໄລຍະທີ II); ຄະດີດິງລາທັງ, ຈິ້ງຊວັນແທງ ແລະພວກຕ້ອງຫາ ທີ່ເກີດຂຶ້ນຢູ່ກຸ່ມນ້ຳມັນອາຍແກັດແຫ່ງຊາດຫວຽດນາມ (PVN), ສະຫະບໍລິສັດກໍ່ສ້າງພື້ນຖານນ້ຳມັນອາຍແກັດຫວຽດນາມ (PVC), ຢູ່ບໍລິສັດຫຸ້ນສ່ວນອະສັງຫາລິມະຊັບພະລັງໄຟຟ້ານ້ຳມັນອາຍແກັດຫວຽດນາມ (PVP Land); ຄະດີກຸ່ມນ້ຳມັນອາຍແກັດຫວຽດນາມ (PVN) ລົງທຶນ 800 ຕື້ດົ່ງເຂົ້າໃນທະນາຄານ OceanBank; ຫຼືຄະດີທີ່ພົວພັນເຖິງທ້າວຟານວັນແອັງຫວູ...ນັ້ນ ໄດ້ໃຫ້ເຫັນເຖິງການກະທຳຢ່າງເດັດດ່ຽວຂຸ້ນຂ້ຽວ, ເຮັດຈົນເຖິງທີ່ສຸດ, ເຮັດຢ່າງເຖິງຖອງ, ບໍ່ມີ “ເຂດຫ້າມ” ໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຕ້ານຄວາມຫຍໍ້ທໍ້ອະນາຈານ. ທັງໝົດລ້ວນແຕ່ສະເໝີພາບຕໍ່ໜ້າກົດໝາຍ, ຜົນງານ - ໂທດກຳ ແຕກຕ່າງກັນຢ່າງຈະແຈ້ງ, ກະທຳຜິດກົດໝາຍຮອດລະດັບໃດ ກໍ່ຈະຖືກຕັດສິນລົງໂທດຮອດລະດັບນັ້ນ.
ໃນປີທີ່ຜ່ານມາ, ສູນກາງໄດ້ສ້າງຕັ້ງຄະນະປະຕີບັດງານ 8 ຄະນະ, ໄປເຖິງ 20 ແຂວງ, ກຳແພງນະຄອນ ເພື່ອກວດກາ, ຕິດຕາມກວດກາການກວດລັດຖະການຕໍ່ບັນດາກໍລະນີຄະດີ, ການເລີ່ມຕົ້ນຄະດີ, ການສືບສວນ, ການຟ້ອງຮ້ອງ, ການພິພາກສາບັນດາຄະດີສໍ້ລາດບັງຫຼວງ, ຄະດີເສດຖະກິດທີ່ຮ້າຍແຮງ ສັບສົນ, ຜ່ານວຽກງານຕ່າງໆເຫຼົ່ານັ້ນໄດ້ຊຸກຍູ້ວຽກງານປ້ອງກັນແລະຕ້ານການສໍ້ລາດບັງຫຼວງຢູ່ທ້ອງຖິ່ນ, ແກ້ໄຂຜ່ານຜ່າໄດ້ໃນຂັ້ນຕົ້ນສະພາບການ “ຂັ້ນເທິງຮ້ອນ, ຂັ້ນລຸ່ມເຢັນ”.
ໄປຫຼາຍບ່ອນ, ຕິດຕໍ່ແລກປ່ຽນຜ່ານຊ່ອງສາຍຕ່າງໆ, ເຂົ້າໃຈແຈ້ງຄວາມຮູ້ສຶກນຶກຄິດຂອງປະຊາຊົນ ຂ້າພະເຈົ້າດີໃຈຫຼາຍ, ຍ້ອນວ່າປະຊາຊົນມີຄວາມສັນທາມະຕິສູງ, ຍາມໃດກໍ່ໃຫ້ຄວາມສະໜັບສະໜູນ, ໄປພ້ອມກັນກັບພັກແລະລັດໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຕ້ານຄວາມຫຍໍ້ທໍ້ອະນາຈານ. “ເຕົາໄຟ” ຮ້ອນຂຶ້ນຍ້ອນທຸກຄົນໄດ້ລົງມືປະຕິບັດງານ, ພ້ອມກັນຕັດສິນໃຈ “ດັງໄຟ” ເພື່ອຍູ້ຖອຍການສໍ້ລາດບັງຫຼວງ.
- ຮຽນສະຫາຍເລຂາທິການໃຫຍ່, ຜ່ານວຽກງານກວດກາ, ອົງຄະນະພັກ ອົງການຈັດຕັ້ງພັກຫຼາຍແຫ່ງ, ພະນັກງານສະມາຊິກພັກຫຼາຍຄົນທີ່ມີຄວາມຜິດພາດ ໄດ້ຖືກຄົ້ນເຜີຍແລະຖືກປະຕິບັດວິໄນລົງໂທດຢ່າງເຂັ້ມງວດ, ໄດ້ຮັບຄວາມເຫັນດີເຫັນພ້ອມແລະຕີລາຄາສູງຈາກປະຊາຊົນ. ແຕ່ກໍ່ມີຄວາມເຫັນທີ່ກັງວົນໃຈວ່າ, ເບື້ອງຫຼັງຄວາມຜິດພາດ ການລະເມີດກົດໝາຍນັ້ນ, ຈະມີ “ຊ່ອງຫວ່າງ” ໃນວຽກງານພະນັກງານທີ່ຈະຕ້ອງກຳຈັດດັດແກ້ໂດຍໄວ ຫຼືບໍ່?
ສະຫາຍເລຂາທິການໃຫຍ່ ຫງວຽນຝູຈ້ອງ: ແມ່ນແທ້, ໃນປີທີ່ຜ່ານມາ ສູນກາງ ກົມການເມືອງ ຄະນະເລຂາທິການ ຄະນະກຳມະການກວດກາສູນກາງ ໄດ້ພິຈາລະນາແລະປະຕິບັດວິໄນຕໍ່ອົງຄະນະພັກ ອົງການຈັດຕັ້ງພັກຫຼາຍແຫ່ງ, ພະນັກງານສະມາຊິກພັກຫຼາຍຄົນທີ່ລະເມີດວິໄນກົດໝາຍ, ນັບທັງພະນັກງານຂັ້ນສູງ.
ຜ່ານການກວດກາໄດ້ຄົ້ນເຜີຍຫຼາຍກໍລະນີທີ່ລະເມີດຂໍ້ກຳນົດ ກົດລະບຽບຂອງພັກ, ຂາດຄວາມຮັບຜິດຊອບ, ປ່ອຍປະລະເຫຼີງການຊີ້ນຳນຳພາ, ກວດກາ ຕິດຕາມກວດກາ, ພາໃຫ້ເກີດຄວາມຜິດພາດໃນການຄຸ້ມຄອງ ນຳໃຊ້ຊັບພະຍາກອນ ທີ່ດິນ ເງິນທຶນ ຊັບສິນຂອງລັດ, ລະເມີດຂໍ້ກຳນົດໃນວຽກງານພະນັກງານ, ລາຍງານໄລ່ລຽງສິນຊັບ ລາຍໄດ້ຢ່າງບໍ່ຊື່ສັດ, ຈັດຕັ້ງປະຕິບັດໂຄງການລົງທຶນ ໂຄງການຈຸດໜັກບໍ່ມີປະສິດທິຜົນ, ກໍ່ຄວາມຟຸມເຟືອຍ ເສຍຫາຍຢ່າງຫຼວງຫຼາຍໃຫ້ແກ່ງົບປະມານແຫ່ງລັດ, ກໍ່ຄວາມແຕກແຍກຄວາມສາມັກຄີພາຍໃນ, ກໍ່ຄວາມຮ້ອນເຄືອງໃນປະຊາຊົນ, ເປັນຜົນກະທົບບໍ່ດີເຖິງອິດທິພົນຂອງພັກ...
ຄວາມເປັນຈິງຢູ່ຫຼາຍທ້ອງຖິ່ນ, ສຳນັກງານອົງການກໍ່ໃຫ້ເຫັນວ່າ ວຽກງານພະນັກງານຍັງມີຫຼາຍວຽກທີ່ສຸດທີ່ຕ້ອງເຮັດ. ຕົວຢ່າງເຊັ່ນ ການວາງແຜນກຳນົດ, ການບຳລຸງກໍ່ສ້າງ ຝຶກອົບຮົມພະນັກງານແມ່ນຈຳເປັນຕ້ອງການທີ່ສຸດ, ແຕ່ບໍ່ແມ່ນເພື່ອໃຫ້ມີ “ຍີ່ຫໍ້” ຊຸດຮຽນຂອງແຫຼ່ງພະນັກງານທີ່ຈະເຂົ້າສູນກາງພັກ, ເຂົ້າອົງຄະນະພັກ… ຫຼືວ່າການໄປຜັດປ່ຽນໜ້າທີ່ແມ່ນເພື່ອຝຶກຝົນຫຼໍ່ຫຼອມໃຫ້ມີຄວາມເຕີບໃຫຍ່ເຂັ້ມແຂງ, ໂດຍບໍ່ແມ່ນໄປຜັດປ່ຽນໜ້າທີ່ແລ້ວຈະໄດ້ຂຶ້ນຕຳແໜ່ງສູງກວ່າ, ເມື່ອໄດ້ “ເຄືອບ” ດ້ວຍພຶດຕິກຳແລ້ວເວລາກັບມາກໍ່ຈະໄດ້ແຕ່ງຕັ້ງໃຫ້ດຳລົງຕຳແໜ່ງນີ້, ຕຳແໜ່ງນັ້ນ. ເວລາໄປຜັດປ່ຽນໜ້າທີ່ບໍ່ດົນນານ, ຍັງບໍ່ທັນສະແດງໃຫ້ເຫັນຄວາມສາມາດຂອງຕົນ, ສ່ວນປະກອບໃຫ້ຮາກຖານກໍ່ບໍ່ຫຼາຍ ແຕ່ກໍ່ຢາກຂໍກັບຄືນສຳນັກງານອົງການເກົ່າແລ້ວ.... ແລະວຽກງານຕີລາຄາພະນັກງານ, ເອົາຄະແນນສຽງໄວ້ວາງໃຈ ຈັດວາງສັບຊ້ອນ ນຳໃຊ້ພະນັກງານ, ລ້ວນແຕ່ຕ້ອງເຮັດຢ່າງຍຸດຕິທຳ ພາວະວິໄສ, ຫຼີກລ່ຽງການເຮັດແບບຮູບນອກ. ການວາງກຳນົດຂັ້ນຕອນ, ລະບຽບການແມ່ນວິທີໜຶ່ງເພື່ອຈຳກັດຄວາມຫຍໍ້ທໍ້, ເສີມຂະຫຍາຍອັນດີ, ອັນຖືກ, ດັ່ງນັ້ນຕ້ອງເຄັ່ງຄັດ, ປະຕິບັດຢ່າງເຂັ້ມງວດ, ຫຼີກລ່ຽງສະພາບການທີ່ວ່າມີຂັ້ນຕອນ ລະບຽບການຖືກຕ້ອງ ແຕ່ພະນັກງານໄດ້ຮັບການແຕ່ງຕັ້ງພັດບໍ່ຖືກ...
ຜ່ານການກວດກາ, ອົງການຈັດຕັ້ງແລະບຸກຄົນທີ່ກະທຳຜິດທັງໝົດລ້ວນແຕ່ຖືກລົງໂທດຢ່າງເຂັ້ມງວດ; ບັນດາສິ່ງຄົງຄ້າງ, ຂໍ້ບົກພ່ອງໄດ້ຖືກຊີ້ອອກຢ່າງຈະແຈ້ງເພື່ອແກ້ໄຂ, ດັດແປງຢ່າງທັນການ. ແຕ່ສິ່ງທີ່ສຳຄັນກວ່ານັ້ນແມ່ນ ຕ້ອງກີດກັ້ນຄວາມຜິດ, ຂໍ້ບົກພ່ອງຕັ້ງແຕ່ຫົວທີຢ່າງພື້ນຖານ ເປັນແບບສະບັບ, ດ້ວຍບັນດາຂໍ້ກຳນົດ, ກົດລະບຽບ, ກົດໝາຍ, ນະໂຍບາຍ; ຕ້ອງ “ຂັງ” ອຳນາດຢູ່ໃນ “ກົງ” ແຫ່ງກົນໄກ. ບົນພື້ນຖານຖອດຖອນບົດຮຽນຈາກພຶດຕິກຳ, ໃນເວລາທີ່ຜ່ານມາມໍ່ນີ້ ກົມການເມືອງສູງກາງພັກໄດ້ປະກາດໃຊ້ຂໍ້ກຳນົດຕ່າງໆກ່ຽວກັບມາດຕະຖານ, ເງື່ອນໄຂຕີລາຄາພະນັກງານ; ກ່ຽວກັບຂັ້ນຕອນ 5 ບາດກ້າວໃນການເລື່ອນຊັ້ນຕຳແໜ່ງ, ແຕ່ງຕັ້ງພະນັກງານ; ກ່ຽວກັບການຜັດປ່ຽນພະນັກງານ; ກ່ຽວກັບການກວດກາ, ຕິດຕາມກວດກາການລາຍງານໄລ່ລຽງຊັບສິນຂອງພະນັກງານ... ການຄັດເລືອກ ຈັດວາງສັບຊ້ອນ ຍົກຍ້າຍ ຜັດປ່ຽນພະນັກງານ, ການແບ່ງຂັ້ນຄຸ້ມຄອງພະນັກງານ, ການວາງແຜນກຳນົດ ຝຶກອົບຮົມ ບຳລຸງສ້າງພະນັກງານ, ການປະຕິບັດລະບອບເງິນເດືອນ ນະໂຍບາຍເກື້ອກູນອຸດໜູນພະນັກງານ, ກໍ່ໄດ້ຮັບການກຳນົດຢ່າງແໜ້ນຟ້ນ ຄົບຊຸດແລະຮອບດ້ານກວ່າແຕ່ກ່ອນ ແລະ ມີການປ່ຽນແປງໃໝ່ ດັດແປງຫຼາຍຢ່າງ ແນໃສ່ຈຳກັດຊ່ອງວ່າງ ຂໍ້ບົກພ່ອງ.
- ຮຽນສະຫາຍເລຂາທິການໃຫຍ່, ວຽກງານກໍ່ສ້າງ ປັບປຸງພັກ, ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ຕ້ານຄວາມຫຍໍ້ທໍ້ອະນາຈານ ໄດ້ມີການປ່ຽນແປງທາງບວກທີ່ຈະແຈ້ງໃນພາກຕົວຈິງ, ໄດ້ຮັບຄວາມເຫັນດີເຫັນພ້ອມ ສະໜັບສະໜູນຂອງປະຊາຊົນ. ແຕ່ວ່າ, ຍັງມີບາງຄົນໃຫ້ທັດສະນະວ່າ, ຖ້າຫາກລວມສູນເກີນຄວນໃສ່ການປ້ອງກັນແລະຕ້ານການສໍ້ລາດບັງຫຼວງ, ໃສ່ການກໍ່ສ້າງ ປັບປຸງພັກ, ຈະເຮັດໃຫ້ການພັດທະນາຖືກ “ຫົດຖອຍ”, “ຊັກຊ້າ”?
ສະຫາຍເລຂາທິການໃຫຍ່ ຫງວຽນຝູຈ້ອງ: ຄວາມເປັນຈິງໄດ້ໃຫ້ຄຳຕອບແລ້ວ. ຄວາມສຳເລັດຕ່າງໆທາງດ້ານເສດຖະກິດ ວັດທະນະທຳ ສັງຄົມ, ທາງດ້ານການຕ່າງປະເທດ ການປ້ອງກັນຊາດ ປ້ອງກັນຄວາມສະຫງົບ, ພ້ອມກັນກັບການປ່ຽນແປງທາງບວກຕ່າງໆໃນການກໍ່ສ້າງພັກ ກໍ່ສ້າງລະບົບການເມືອງ ທັງໝົດໄດ້ປະກອບເປັນຜົນສຳເລັດທີ່ສຳຄັນ, ໜ້າເອກອ້າງທະນົງໃຈຂອງທົ່ວພັກ, ທົ່ວປວງຊົນ, ທົ່ວກອງທັບເຮົາ ໃນປີທີ່ຜ່ານມາ. ບັນຍາກາດເບີກບານມ່ວນຊື່ນ, ເຊື່ອຖືພວມແຜ່ລາມໃນທົ່ວປະເທດ.
ເປັນຄັ້ງທຳອິດພາຍຫຼັງຫຼາຍປີ, ປີ 2017 ເຖິງວ່າມີຄວາມຫຍຸ້ງຍາກສິ່ງທ້າທາຍຫຼາຍຢ່າງ, ພວກເຮົາໄດ້ສຳເລັດແລະສຳເລັດລື່ນລະດັບຄາດໝາຍທັງໝົດ 13 ຄາດໝາຍແຜນການທີ່ວາງໄວ້. ເສດຖະກິດມະຫາພາກສືບຕໍ່ມີສະຖຽນລະພາບ, ອັດຕາເງິນເຟີ້ຖືກຄວບຄຸມ, ລາຍຮັບງົບປະມານ ແລະບັນດາດຸນລະຍາທີ່ສຳຄັນຂອງພື້ນຖານເສດຖະກິດລ້ວນແຕ່ບັນລຸຄວາມຕ້ອງການແລະລື່ນລະດັບຄາດໝາຍທີ່ວາງໄວ້. ການເຕີບໂຕ ຈີດີພີ ບັນລຸ 6,81%, ຍອດມູນຄ່າສິນຄ້າສົ່ງອອກບັນລຸ 200 ກວ່າຕື້ໂດລາສະຫະລັດ, ການດຶງດູດເງິນລົງທຶນໂດຍກົງຈາກຕ່າງປະເທດໄດ້ເກືອບ 30 ຕື້ໂດລາສະຫະລັດ. ການທ່ອງທ່ຽວຫວຽດນາມໄດ້ຕ້ອນຮັບນັກທ່ອງທ່ຽວຕ່າງປະເທດເກືອບ 13 ລ້ານຄົນ, ຈຳນວນວິສາຫະກິດສ້າງໃໝ່ໃນປີກໍ່ບັນລຸເກືອບ 127.000 ວິສາຫະກິດ...
ປີທີ່ຜ່ານມາກໍ່ເປັນປີທີ່ວຽກງານການຕ່າງປະເທດໄດ້ບັນລຸຜົນສຳເລັດທີ່ພົ້ນເດັ່ນ ເຊິ່ງໄດ້ເປັນເຈົ້າພາບຈັດຕັ້ງປີ ເອເປກ 2017 ຢ່າງສຳເລັດຜົນ, ດຳເນີນການຢ້ຽມຢາມຂັ້ນສູງ 18 ຄັ້ງຢູ່ 19 ປະເທດ, ເຂົ້າຮ່ວມກອງປະຊຸມສາກົນ 8 ຄັ້ງ, ພ້ອມກັນນັ້ນກໍ່ຕ້ອນຮັບປະມຸກແຫ່ງຊາດ, ນາຍົກລັດຖະມົນຕີຂອງບັນດາປະເທດທີ່ມາຢ້ຽມຢາມຫວຽດນາມເປັນຈຳນວນ 36 ຄັ້ງ, ການເຄື່ອນໄຫວເຫຼົ່ານັ້ນໄດ້ເພີ່ມທະວີການພົວພັນລະຫວ່າງຫວຽດນາມກັບບັນດາປະເທດຄູ່ຮ່ວມມື ໃຫ້ເຂົ້າສູ່ລວງເລິກແລະມີປະສິດທິຜົນ; ເປັນເຈົ້າການ ຕັ້ງໜ້າເຊື່ອມໂຍງສາກົນ, ຍົກສູງບົດບາດທີ່ຕັ້ງ ແລະອິດທິພົນຂອງຫວຽດນາມໃນເວທີສາກົນ.
ພ້ອມກັນນັ້ນ, ພວກເຮົາກໍ່ໄດ້ຕັ້ງໝັ້ນ, ເດັດດ່ຽວໃນການປົກປັກຮັກສາເອກະລາດ ອະທິປະໄຕ ແລະຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ, ຮັກສາສະພາບແວດລ້ອມສັນຕິພາບ, ອຳນວຍຄວາມສະດວກໃຫ້ແກ່ການສ້າງສາແລະປົກປັກຮັກສາປະເທດຊາດ.
ພັກເຮົາໄດ້ກຳນົດວ່າພັດທະນາເສດຖະກິດແມ່ນໜ້າທີ່ຈຸດໜັກໃຈກາງ, ກໍ່ສ້າງພັກແມ່ນໜ້າທີ່ຫຼັກແຫຼ່ງ. ສອງໜ້າທີ່ນີ້ຍາມໃດກໍ່ຄຽງຄູ່ກັນ, ຊ່ວຍໜູນເພີ່ມເຕີມໃຫ້ແກ່ກັນ. ຄວາມເປັນຈິງໃຫ້ເຫັນວ່າ, ບັນດາການຜັນປ່ຽນທີ່ຕັ້ງໜ້າ ໃນວຽກງານກໍ່ສ້າງ ປັບປຸງພັກ, ໃນການຕໍ່ສູ້ປ້ອງກັນ ແລະຕ້ານການສໍ້ລາດບັງຫຼວງ, ຕ້ານຄວາມຫຍໍ້ທໍ້ ອະນາຈານ ໄດ້ປະກອບສ່ວນອັນສຳຄັນເຂົ້າໃນການປັບປຸງຄວາມໄວ້ວາງໃຈ, ສ້າງຄວາມເປັນໃຈເຫັນດີເຫັນພ້ອມ, ຄວາມພາກພູມໃຈໃນປະຊາຊົນ. ແລະນີ້ກໍ່ເປັນກຳລັງຜັດດັນອັນໃຫຍ່ຫຼວງ ເພື່ອໃຫ້ພວກເຮົາສຳເລັດເປັນຢ່າງດີ ທຸກໜ້າທີ່ທີ່ໄດ້ວາງອອກມາ, ສືບຕໍ່ພັດທະນາປະເທດຢ່າງໄວວາ ຍືນຍົງ, ຫາກບໍ່ແມ່ນກົງກັນຂ້າມ.
- ທັດສະນະໃຫຍ່ໜຶ່ງທີ່ສະຫາຍເລຂາທິການໃຫຍ່ໄດ້ເນັ້ນໜັກເມື່ອມາຮ່ວມຄັ້ງທຳອິດ ແລະກ່າວປາໄສທີ່ກອງປະຊຸມລະຫວ່າງລັດຖະບານແລະບັນດາທ້ອງຖິ່ນເພື່ອຜັນຂະຫຍາຍໜ້າທີ່ປີ 2018, ນັ້ນແມ່ນ “ພັດທະນາຢ່າງໄວແລະຍືນຍົງກວ່າອີກເພື່ອບໍ່ຖືກຖອຍຫຼັງ, ກ້າວແຕ່ລະກ້າວໃຫ້ທັນກັບບັນດາປະເທດທີ່ກ້າວໜ້າໃນພາກພື້ນ ແລະໃນໂລກ”. ເພື່ອປະຕິບັດໃຫ້ຖືກຕ້ອງຕາມຈິດໃຈຊີ້ນຳນັ້ນ, ຕ້ອງສຸມໃສ່ເນື້ອໃນສຳຄັນຕົ້ນຕໍໃດແດ່, ຮຽນສະຫາຍເລຂາທິການໃຫຍ່?
ສະຫາຍເລຂາທິການໃຫຍ່ ຫງວຽນຝູຈ້ອງ: ກຳແໜ້ນມະຕິກອງປະຊຸມໃຫຍ່ຄັ້ງທີ XII ຂອງພັກ ແລະບັນດາມະຕິ, ຄຳສະຫຼຸບຂອງສູນກາງພັກ, ໃນເວລາຕໍ່ໄປນີ້ ພວມເຮົາຕ້ອງສືບຕໍ່ບຸລິມະສິດສຸມໃສ່ບູລະນະລະບຽບກົດໝາຍເສດຖະກິດຕະຫຼາດກຳນົດທິດສັງຄົມນິຍົມ; ເຄົາລົບບັນດາກົດເກນພາວະວິໄສຂອງເສດຖະກິດຕະຫຼາດ, ບັນດາຫຼັກການທົ່ວໄປຂອງສາກົນ ແລະ ໝູນໃຊ້ມັນຢ່າງຖືກຕ້ອງ, ຮັບປະກັນການກຳນົດທິດສັງຄົມນິຍົມ, ສອດຄ່ອງກັບເງື່ອນໄຂການພັດທະນາຂອງປະເທດຊາດ; ເຊື່ອມຕໍ່ຢ່າງກົມກຽວລະຫວ່າງການເຕີບໂຕເສດຖະກິດ ກັບການປະຕິບັດຄວາມກ້າວໜ້າແລະຍຸດຕິທຳທາງສັງຄົມ, ພັດທະນາວັດທະນະທຳ, ປົກປັກຮັກສາສິ່ງແວດລ້ອມ, ຮັບປະກັນການປ້ອງກັນປະເທດແລະປ້ອງກັນຄວາມສະຫງົບ; ສ້າງເງື່ອນໄຂໃຫ້ທຸກເຈົ້າພາບໃນບັນດາພາກສ່ວນເສດຖະກິດ ມີຄວາມສະເໝີພາບ, ຮ່ວມມື, ແຂ່ງຂັນກັນເພື່ອພ້ອມກັນພັດທະນາຕາມການກຳນົດຂອງກົດໝາຍ.
ຕ້ອງສ້າງໃຫ້ມີການປ່ຽນແປງຢ່າງແຂງແຮງກວ່າອີກໃນການຈັດວາງໂຄງປະກອບພື້ນຖານເສດຖະກິດຄືນໃໝ່ ຕິດກັບການປ່ຽນແປງໃໝ່ຕົວແບບການເຕີບໂຕ, ຍົກສູງປະສິດທິພາບຂອງແຮງງານ ແລະຄວາມສາມາດແຂ່ງຂັນຂອງພື້ນຖານເສດຖະກິດ; ລະດົມ, ຈັດແບ່ງ ແລະ ນຳໃຊ້ບັນດາແຫຼ່ງພະລັງຢ່າງມີປະສິດທິຜົນ, ປະກອບດ້ວຍແຫຼ່ງພະລັງວັດຖຸແລະແຫຼ່ງພະລັງຈິດໃຈ; ເສີມຂະຫຍາຍຄວາມສາມາດບົ່ມຊ້ອນ, ທ່າໄດ້ປຽບຂອງແຕ່ລະຂະແໜງການ, ແຕ່ລະຂົງເຂດ ທ້ອງຖິ່ນ ແລະ ຂອງທົ່ວປະເທດ, ອຳນວຍຄວາມສະດວກໃຫ້ປະຊາຊົນທຸກຄົນມີໂອກາດເຂົ້າຮ່ວມການພັດທະນາເສດຖະກິດ ແລະ ພ້ອມກັນຊົມໃຊ້ຜົນປະໂຫຍດຈາກການເຕີບໂຕເສດຖະກິດ; ບໍ່ໄດ້ເອົາໃຈໃສ່ແຕ່ການເຕີບໂຕເສດຖະກິດ, ເບິ່ງເບົາການແກ້ໄຂບັນຫາທີ່ມີລັກສະນະພື້ນຖານ, ຍາວນາມ; ບໍ່ໄດ້ແລ່ນຫາແຕ່ປະລິມານການເຕີບໂຕ, ປະຂ້າມຄຸນະພາບຂອງການເຕີບໂຕ.
ພ້ອມໆກັບການພັດທະນາເສດຖະກິດ, ຕ້ອງເອົາໃຈໃສ່ຫຼາຍກວ່າອີກເຖິງການພັດທະນາວັດທະນະທຳ ສັງຄົມ, ເບິ່ງແຍງດູແລປົວແປງຊີວິດການເປັນຢູ່ຂອງປະຊາຊົນ; ເອົາໃຈໃສ່ກໍ່ສ້າງຜູ້ຄົນທີ່ມີຄຸນສົມບັດ, ມີແບບແຜນດຳລົງຊີວິດທີ່ດີງາມ, ກໍ່ສ້າງສິ່ງແວດລ້ອມວັດທະນະທຳທີ່ສົດໃສ ຄົບຊຸດ; ເອົາໃຈໃສ່ຮັກສາເອກະລັກ ແບບແຜນວັດທະນະທຳຫວຽດນາມ, ເສີມຂະຫຍາຍບົດບາດຂອງຄອບຄົວແລະຊຸມຊົນ. ຍູ້ແຮງການປ່ຽນແປງໃໝ່ການສຶກສາ-ຝຶກອົບຮົມຢ່າງພື້ນຖານແລະຮອບດ້ານ, ພັດທະນາຊັບພະຍາກອນມະນຸດ, ແຫຼ່ງບຸກຄະລາກອນຄຸນນະພາບສູງ, ເພີ່ມທະວີກຳລັງຊ້ອນແຝງທາງດ້ານວິທະຍາສາດເຕັກໂນໂລຊີ ແລະ ຍູ້ແຮງການປະຢຸກວິທະຍາສາດເຕັກໂນໂລຊີ ເພື່ອອາດສາມາດຜ່ານຜ່າສິ່ງທ້າທາຍ, ກຳເອົາໂອກາດດີຕ່າງໆ, ສ້າງສາພັດທະນາປະເທດຢ່າງໄວວາແລະຍືນຍົງ.
ເຮັດວຽກງານກໍ່ສ້າງພັກແລະລະບົບການເມືອງໃຫ້ດີກວ່າອີກ, ກີດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດແບບແຜນດຳລົງຊີວິດ, ບັນດາປະກົດການ “ຫັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ” ຢູ່ພາຍໃນ. ສືບຕໍ່ປ່ຽນແປງໃໝ່ ຈັດວາງການຈັດຕັ້ງກົງຈັກໃຫ້ກະທັດລັດ ມີຄວາມສັກສິດ ມີປະສິດທິຜົນ, ເອົາໃຈໃສ່ວຽກງານພະນັກງານເພື່ອຄັດເລືອກ, ສັບຊ້ອນພະນັກງານທີ່ມີຄວາມສາມາດ ມີຄຸນສົມບັດ ຊື່ສັດທ່ຽງທຳ ສຸດອົກສຸດໃຈຕໍ່ພັກ ຕໍ່ປະຊາຊົນ ໃຫ້ດຳລົງຕຳແໜ່ງການນຳໃນກົງຈັກຂອງລັດ; ຮັດແໜ້ນລະບຽບວິໄນ, ຍົກສູງຄຸນສົມບັດ ລະດັບວັດທະນະທຳ ລະດັບວິຊາສະເພາະຂອງພະນັກງານ ລັດຖະກອນ; ເພີ່ມທະວີການປ້ອງກັນ, ການຕໍ່ສູ້ຕ້ານ, ການຄົ້ນເຜີຍ, ແກ້ໄຂລົງໂທດຢ່າງເຂັ້ມງວດຕໍ່ການສໍ້ລາດບັງຫຼວງ, ຄວາມຫຍໍ້ທໍ້ອະນາຈານ, ການລະເມີດກົດໝາຍ.
ຕັ້ງໝັ້ນ, ເດັດດ່ຽວຕໍ່ສູ້ເພື່ອຮັກສາເອກະລາດ ອະທິປະໄຕ ເອກະພາບ ແລະຜືນແຜ່ງດິນອັນຄົບຖ້ວນຂອງປະເທດຊາດໄວ້ຢ່າງໝັ້ນຄົງ; ຮັບປະກັນສະຖຽນລະພາບທາງການເມືອງ, ຄວາມເປັນລະບຽບຮຽບຮ້ອຍແລະຄວາມປອດໄພທາງສັງຄົມ; ຕັ້ງໜ້າແລະເປັນເຈົ້າການປະຕິບັດວຽກງານການຕ່າງປະເທດແລະເຊື່ອມໂຍງສາກົນຢ່າງມີປະສິດທິຜົນ.
- ລະດູບານໃໝ່ກຳລັງຈະມາເຖິງອີກຄັ້ງ, ທຸກຄົນລ້ວນແຕ່ມີຄວາມປາຖະໜາ ມີຄວາມຫວັງກ່ຽວກັບປີໃໝ່ທີ່ເຕັມໄປດ້ວຍຄວາມມ່ວນ, ຄວາມສຸກ ແລະ ປະສົບຄວາມສຳເລັດຫຼາຍກວ່າອີກ. ສະຫາຍເລຂາທິການໃຫຍ່ຈົ່ງແບ່ງປັນຄວາມຮູ້ສຶກໃນໂອກາດລະດູບານໃໝ່ ປີຈໍ 2018?
ສະຫາຍເລຂາທິການໃຫຍ່ ຫງວຽນຝູຈ້ອງ: ປີ 2018 ແມ່ນປີຫົວລ້ຽວຫົວຕໍ່, ມີຄວາມໝາຍຕັດສິນຕໍ່ໄຊຊະນະໃນການປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ; ພວກເຮົາມີວຽກງານຫຼາຍທີ່ຈະຕ້ອງເຮັດໃນເວລາສະເພາະໜ້າ.
ເນື່ອງໃນໂອກາດຕ້ອນຮັບປີໃໝ່, ຂ້າພະເຈົ້າຂໍອວຍພອນພີ່ນ້ອງຮ່ວມຊາດທັງໝົດ, ນັກຮົບໃນທົ່ວປະເທດ, ພີ່ນ້ອງຫວຽດນາມຢູ່ຕ່າງປະເທດ ຈົ່ງມີສຸຂະພາບເຂັ້ມແຂງ ມີຄວາມສົມບູນພູມສຸກ, ສືບຕໍ່ເສີມຂະຫຍາຍບັນດາຜົນສຳເລັດແລະບົດຮຽນທີ່ບັນລຸໄດ້, ຮ່ວມແຮງຮ່ວມໃຈກັນ, ຕັດສິນໃຈປະຕິບັດບັນດາເປົ້າໝາຍ ໜ້າທີ່ທີ່ວາງໄວ້ໃຫ້ສຳເລັດມີໄຊ, ເຮັດໃຫ້ປະເທດຊາດທີ່ຮັກແພງຂອງພວກເຮົາຈະເລີນພັດທະນາຢ່າງບໍ່ຢຸດຢັ້ງ ແລະ ກ້າວຂຶ້ນຢ່າງແຂງແຮງໜັກແໜ້ນກວ່າອີກ.
- ຂໍຂອບໃຈສະຫາຍເລຂາທິການໃຫຍ່ !
ແຫຼ່ງຂ່າວ: ສຳນັກຂ່າວສານຫວຽດນາມ
