ຮ່ວມແຮງ ຮ່ວມໃຈກັນ ພ້ອມກັນພັດທະນາປະເທດຢ່າງໄວວາ ຍືນຍົງ
ວກ.ອອນໄລ - “ປີ 2018, ສະພາບການໃນໂລກ ແລະໃນປະເທດມີຄວາມສະດວກ, ໂອກາດດີ ພ້ອມທັງຄວາມຫຍຸ້ງຍາກ ແລະສິ່ງທ້າທາຍທີ່ແຊກຊ້ອນກັນ… ໃນສະຖານະພາບດັ່ງກ່າວນັ້ນ, ພວກເຮົາຕ້ອງເສີມຂະຫຍາຍສຸດຂີດ ກຳລັງແຮງແຫ່ງຈິດໃຈສາມັກຄີ, ເຈດຈຳນົງອີງໃສ່ຕົນເອງເພື່ອສ້າງຕົນໃຫ້ເຂັ້ມແຂງ, ຍາດແຍ່ງເອົາໂອກາດ, ຜ່ານຜ່າສິ່ງທ້າທາຍ ເພື່ອກ້າວຂຶ້ນຢ່າງໜັກແໜ້ນ” - ທ່ານປະທານປະເທດ ເຈິ່ນດ້າຍກວາງ ໄດ້ແບ່ງປັນຄວາມເຫັນຄືແນວນັ້ນຕໍ່ສື່ມວນຊົນ ໃນການສຳພາດເນື່ອງໃນໂອກາດຕ້ອນຮັບປີໃໝ່ 2018.
ດ້ວຍຄວາມພ້ອມຈິດພ້ອມໃຈຂອງທົ່ວພັກ ທົ່ວປວງຊົນ ແລະທົ່ວກອງທັບ, ພວກເຮົາໄດ້ສຳເລັດ ແລະສຳເລັດລື່ນຄາດໝາຍແຜນການພັດທະນາເສດຖະກິດ-ສັງຄົມທີ່ສຳຄັນຂອງປີ 2017. ທ່ານປະທານປະເທດຈົ່ງກ່າວໂດຍສັງເຂບກ່ຽວກັບບັນດາຜົນສຳເລັດທີ່ໂດດເດັ່ນຂອງປະເທດເຮົາໃນປີທີ່ແລ້ວ?
ປະທານປະເທດ ເຈິ່ນດ້າຍກວາງ: ອາດຈະຢືນຢັນໄດ້ວ່າ, ເປັນຄັ້ງທຳອິດພາຍຫຼັງຫຼາຍປີ, ປີນີ້ພວກເຮົາໄດ້ສຳເລັດແລະສຳເລັດລື່ນລະດັບຄາດໝາຍທັງໝົດ 13 ຄາດໝາຍຂອງແຜນການພັດທະນາເສດຖະກິດ-ສັງຄົມທີ່ສະພາແຫ່ງຊາດໄດ້ວາງໄວ້. ເສດຖະກິດມະຫາພາກມີຄວາມສະຖຽນລະພາບ, ອັດຕາເງິນເຟີ້ຖືກຄວບຄຸມ, ການເກັບລາຍຮັບງົບປະມານ ແລະ ບັນດາດຸນລະຍາທີ່ສຳຄັນຂອງພື້ນຖານເສດຖະກິດ ລ້ວນແຕ່ບັນລຸລະດັບຄາດໝາຍທີ່ວາງໄວ້.
ການເຕີບໂຕ ຈີດີພີ ບັນລຸ 6,81%, ຍອດມູນຄ່າສິນຄ້າສົ່ງອອກ-ນຳເຂົ້າບັນລຸ 425 ຕື້ໂດລາສະຫະລັດ, ສູງກວ່າທຸກໆປີທີ່ຜ່ານມາ; ການດຶງດູດການລົງທຶນຈາກຕ່າງປະເທດບັນລຸລະດັບສູງສຸດກວ່າ 33 ຕື້ໂດລາສະຫະລັດ... ການເຊື່ອມຕິດລະຫວ່າງການພັດທະນາເສດຖະກິດ ກັບການແກ້ໄຂບັນດາບັນຫາສັງຄົມ, ເປັນຕົ້ນແມ່ນການລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ເບິ່ງແຍງດູແລສຸຂະພາບຂອງປະຊາຊົນ, ໄດ້ຮັບຜົນສຳເລັດທີ່ໜ້າພຶງພໍໃຈ. ການປ້ອງກັນປະເທດ ປ້ອງກັນຄວາມສະຫງົບໄດ້ຮັບການເພີ່ມທະວີ, ຄວາມໝັ້ນຄົງທາງການເມືອງ ຄວາມເປັນລະບຽບແລະຄວາມປອດໄພທາງສັງຄົມໄດ້ຮັບການຮັກສາຢ່າງໝັ້ນຄົງ. ວຽກງານກໍ່ສ້າງພັກ, ກໍ່ສ້າງລະບົບການເມືອງໃຫ້ສະອາດປອດໃສ ໝັ້ນຄົງເຂັ້ມແຂງ ໄດ້ຮັບການຊີ້ນຳນຳພາຢ່າງເຈາະຈົງລວມສູນ ແລະໄດ້ບັນລຸຜົນສຳເລັດທີ່ສຳຄັນຫຼາຍຢ່າງ…
ຜົນສຳເລັດເຫຼົ່ານັ້ນແມ່ນຮອບດ້ານພໍຄວນໃນທຸກຂົງເຂດ ເຊິ່ງໄດ້ປະກອບສ່ວນປັບປຸງຄວາມໄວ້ວາງໃຈ, ສ້າງບັນຍາກາດເບີກບານມ່ວນຊື່ນໃນທົ່ວສັງຄົມ, ສ້າງທ່ວງທ່າຄວາມສະດວກໃຫ້ປະເທດສືບຕໍ່ການພັດທະນາທີ່ຍືນຍົງ, ໄດ້ຮັບການຍອມຮັບແລະຕີລາຄາສູງຈາກປະຊາຄົມໂລກ. ໃນປີ 2017, ສະຫະປະຊາຊາດໄດ້ຈັດອັນດັບດັດຊະນີການພັດທະນາທີ່ຍືນຍົງຂອງ 157 ປະເທດ ອານາເຂດໃນໂລກ, ຫວຽດນາມຢູ່ໃນອັນດັບທີ 68, ເພີ່ມຂຶ້ນ 20 ລະດັບທຽບກັບປີ 2016.
ປີ 2017 ໄດ້ຈາລຶກຄວາມສຳເລັດຂອງຫວຽດນາມໃນແນວຮົບການຕ່າງປະເທດ, ທ່ານປະທານປະເທດຈົ່ງຕີລາຄາກ່ຽວກັບບັນດາຜົນສຳເລັດທີ່ໂດດເດັ່ນຂອງວຽກງານການຕ່າງປະເທດໃນປີທີ່ຜ່ານມາ?
ປະທານປະເທດ ເຈິ່ນດ້າຍກວາງ: ປີ 2017 ແມ່ນປີພິເສດໃນປະຫວັດສາດການທູດຂອງປະເທດເຮົາ. ໃນເວລາທີ່ສະຖານະການໂລກແລະພາກພື້ນມີການຜັນປ່ຽນຢ່າງໄວວາ ສັບສົນ ແລະ ຄາດຄະເນຍາກ, ແຕ່ພວກເຮົາກໍ່ໄດ້ດຳເນີນວຽກງານການຕ່າງປະເທດຢ່າງເປັນເຈົ້າການ ຕັ້ງໜ້າ ແລະ ໄດ້ຮັບຜົນສຳເລັດອັນໃຫຍ່ຫຼວງໃນການປະຕິບັດບັນດາເປົ້າໝາຍ ແລະ ຜົນປະໂຫຍດຍຸດທະສາດຂອງປະເທດ.
ກ່ອນອື່ນໝົດ, ນັ້ນແມ່ນຜົນສຳເລັດອັນໃຫຍ່ຫຼວງຂອງປີ ເອເປກ ຫວຽດນາມ 2017 ແລະ ກອງປະຊຸມຂັ້ນສຸດຍອດ ເອເປກ ຄັ້ງທີ 25 ດ້ວຍການສຳເລັດຢ່າງດີເດັ່ນບົດບາດຂອງປະເທດເຈົ້າພາບ, ສ້າງເຄື່ອງໝາຍປະຫວັດສາດໃນວິວັດການເຊື່ອມຕໍ່ເສດຖະກິດ-ການເມືອງໃນພາກພື້ນອາຊີ-ປາຊີຟິກ, ສະແດງໃຫ້ເຫັນເຖິງລະດັບສູງສົ່ງ ຄວາມກ້າຫານ ແລະ ສະຕິປັນຍາຫວຽດນາມ; ສະເໜີຂໍ້ຄິດລິເລີ່ມ ບຸລິມະສິດຫຼາຍປະການ, ກຳກັບດຳເນີນການປະຊຸມຢ່າງໄຫວພິບ ປະດິດສ້າງ, ຜ່ານຜ່າຄວາມແຕກຕ່າງ, ສ້າງຄວາມເປັນໃຈສັນທາມະຕິ, ບໍ່ພຽງແຕ່ຮັກສາທ່ວງທ່າຮ່ວມມື ແລະເຊື່ອມຕໍ່ ເອເປກ ເທົ່ານັ້ນ ຫາກຍັງປະກອບສ່ວນກໍ່ສ້າງວິໄສທັດຍຸດທະສາດຂອງເວທີປາໄສການຮ່ວມມືເສດຖະກິດອາຊີ-ປາຊີຟິກ ໃນບັນດາທົດສະວັດຕໍ່ໜ້າອີກນຳ.
ພວກເຮົາໄດ້ເພີ່ມທະວີການພົວພັນກັບບັນດາປະເທດເພື່ອນບ້ານໃກ້ຄຽງ, ປະເທດໃນພາກພື້ນ, ບັນດາປະເທດຄູ່ຮ່ວມມືໃຫຍ່, ບັນດາປະເທດເພື່ອນມິດທີ່ເປັນມູນເຊື້ອ. ຜູ້ນຳຂອງປະເທດເຮົາ ແລະຜູ້ນຳຂອງຫຼາຍປະເທດໄດ້ດຳເນີນການຢ້ຽມຢາມຊຶ່ງກັນແລະກັນ ແລະ ແລກປ່ຽນຄະນະຜູ້ແທນຂັ້ນສູງຫຼາຍຄະນະ. ພິເສດ, ໄດ້ມີການຢ້ຽມຢາມຂັ້ນສູງເປັນສິບໆຄັ້ງລະຫວ່າງປະເທດເຮົາ ແລະປະເທດທີ່ສຳຄັນຢູ່ໃນພາກພື້ນແລະໃນໂລກ. ບໍ່ເຄີຍພາຍໃນໜຶ່ງວັນ, ພວກເຮົາໄດ້ຕ້ອນຮັບຜູ້ນຳສູງສຸດຂອງຈີນ ແລະ ສະຫະລັດອາເມຣິກາ ມາຢ້ຽມຢາມລັດຖະກິດທີ່ປະເທດຫວຽດນາມ.
ວຽກງານການຕ່າງປະເທດໄດ້ປະກອບສ່ວນຍາດແຍ່ງເອົາບັນດາແຫຼ່ງພະລັງທີ່ສຳຄັນຈາກພາຍນອກມາໃຫ້ການສ້າງສາພັດທະນາປະເທດ. ໃນສະຖານະພາບເສດຖະກິດໂລກຟື້ນຕົວຢ່າງບໍ່ສະໝ່ຳສະເໝີກັນ ແລະຍັງບໍ່ທັນໝັ້ນຄົງ, ທ່າອຽງປົກປ້ອງການຄ້າພາຍໃນເພີ່ມຂຶ້ນນັ້ນ, ພວກເຮົາໄດ້ຊຸກຍູ້ການຮ່ວມມືດ້ານເສດຖະກິດ ການຄ້າ ການລົງທຶນຢ່າງແຂງແຮງ ກັບບັນດາປະເທດໃນໂລກ ນັບທັງທາງດ້ານສອງຝ່າຍແລະຫຼາຍຝ່າຍ, ພ້ອມກັນນັ້ນກໍ່ມີສ່ວນຮ່ວມອັນສຳຄັນເຂົ້າໃນການສ້າງຕັ້ງຮູບການເຊື່ອມຕໍ່ເສດຖະກິດ-ການຄ້າຢູ່ໃນພາກພື້ນ.
ໃນໂອກາດສັບປະດາຂັ້ນສຸດຍອດ ເອເປກ, ຫວຽດນາມໄດ້ຖືບົດບາດຕັ້ງໜ້າໃນການຮັກສາ ແລະ ຊຸກຍູ້ວິວັດການເຈລະຈາສັນຍາຄູ່ຮ່ວມມືຂ້າມປາຊີຟິກທີ່ຮອບດ້ານແລະກ້າວໜ້າ. ການເຄື່ອນໄຫວການຄ້າແລະດຶງດູດການລົງທຶນຈາກຕ່າງປະເທດໃນປີນີ້ໄດ້ຮັບຜົນສຳເລັດສູງກວ່າທຽບກັບຄາດໝາຍ.
ການເຄື່ອນໄຫວພົວພັນຕ່າງປະເທດ, ເຊື່ອມໂຍງແລະຮ່ວມມືສາກົນໃນບັນດາຂົງເຂດການທູດ ການປ້ອງກັນຊາດ ປ້ອງກັນຄວາມສະຫງົບ, ທັງແບບທະວິພາຄີ ແລະແບບພະຫຸພາຄີ, ໄດ້ປະກອບສ່ວນປົກປັກຮັກສາອະທິປະໄຕ ຄວາມເປັນເອກະພາບແຫ່ງຊາດ ຜືນແຜ່ນດິນອັນຄົບຖ້ວນຂອງປະເທດໄວ້ຢ່າງໝັ້ນຄົງ, ຮັບປະກັນຄວາມໝັ້ນຄົງແຫ່ງຊາດ, ຄວາມເປັນລະບຽບປອດໄພທາງສັງຄົມ ແລະ ບັນດາຜົນປະໂຫຍດຍຸດທະສາດຂອງປະເທດຊາດ. ໃນ ອາຊຽນ, ຫວຽດນາມໄດ້ປະກອບສ່ວນສຳຄັນທີ່ສຸດເຂົ້າໃນການປັບປຸງຄວາມສາມັກຄີ, ຄວາມເປັນນ້ຳໜຶ່ງໃຈດຽວ ແລະ ສຸລະສຽງລວມໃນບັນດາບັນຫາຍຸດທະສາດຢູ່ໃນພາກພື້ນ. ບັນດາກົນໄກສົນທະນາ ແລະການຮ່ວມມືທາງດ້ານການປ້ອງກັນຄວາມສະຫງົບ-ປ້ອງກັນຊາດ ກັບບັນດາປະເທດເພື່ອນບ້ານໃກ້ຄຽງ ປະເທດໃນພາກພື້ນ ແລະ ບັນດາປະເທດຄູ່ຮ່ວມມືທີ່ສຳຄັນ, ການເຂົ້າຮ່ວມຢ່າງຕັ້ງໜ້າຂອງຫວຽດນາມໃນບັນດາເວທີປາໄສພະຫຸພາຄີກ່ຽວກັບຄວາມໝັ້ນຄົງ-ການປ້ອງກັນຊາດ ກໍ່ຄືການເຄື່ອນໄຫວຮັກສາສັນຕິພາບຂອງສະຫະປະຊາຊາດ ໄດ້ເພີ່ມທະວີຄວາມໄວ້ວາງໃຈທາງດ້ານການເມືອງລະຫວ່າງຫວຽດນາມ ກັບບັນດາປະເທດທີ່ກ່ຽວ, ປະກອບສ່ວນຍົກສູງຖານະບົດບາດ ແລະອິດທິພົນຂອງປະເທດຫວຽດນາມໃນເວທີສາກົນ.
ປີ ເອເປກ 2017 ແມ່ນຈຸດໂດດເດັ່ນຂອງຫວຽດນາມໃນປີທີ່ແລ້ວ, ຢືນຢັນທ່າແລະກຳລັງຂອງປະເທດຫວຽດນາມ ໃນການທູດພະຫຸພາຄີ. ໃນຖານະປະທານກອງປະຊຸມສຸດຍອດ ເອເປກ ຄັ້ງທີ 25, ທ່ານປະທານປະເທດຈົ່ງໃຫ້ຮູ້ຄວາມໝາຍ ຄວາມສຳຄັນຂອງເຫດການພົວພັນຕ່າງປະເທດພະຫຸພາຄີທີ່ໃຫຍ່ທີ່ສຸດນີ້?
ປະທານປະເທດ ເຈິ່ນດ້າຍກວາງ: ປີ ເອເປກ ຫວຽດນາມ 2017, ຈຸດໜັກແມ່ນ ສັບປະດາຂັ້ນສຸດຍອດ ເອເປກ ຄັ້ງທີ 25, ທີ່ຈັດຂຶ້ນຢູ່ນະຄອນ ດານັ້ງ ໃນລະຫວ່າງວັນທີ 6 - 11 ພະຈິກ 2017 ໄດ້ສຳເລັດຜົນຢ່າງຈົບງາມ. ນີ້ແມ່ນຜົນສຳເລັດຂອງວຽກງານການຕ່າງປະເທດທີ່ໂດດເດັ່ນຂອງທົ່ວພັກ ທົ່ວປວງຊົນ ແລະທົ່ວກອງທັບເຮົາ, ປະກອບສ່ວນຍົກສູງບົດບາດຂອງ ເອເປກ ທີ່ເປັນກົນໄກການຮ່ວມມືເສດຖະກິດຊັ້ນນຳຂອງພາກພື້ນ ໃນໂລກທີ່ພວມມີການປ່ຽນແປງຢ່າງໄວວາ ມີລັກສະນະບາດລ້ຽວທີ່ສຳຄັນ. ຜົນສຳເລັດດັ່ງກ່າວເປັນຈຸດໝາຍໃໝ່ໃນຂະບວນການເຊື່ອມໂຍງສາກົນ ແລະຜັນຂະຫຍາຍການພົວພັນຕ່າງປະເທດພະຫຸພາຄີ, ປະກອບສ່ວນປັບປຸງທ່າອຽງສັນຕິພາບ, ການຮ່ວມມື, ການພັດທະນາ ແລະ ຍົກສູງອິດທິພົນ ຖານະບົດບາດຂອງປະເທດໃນເວທີສາກົນ.
ສັບປະດາຂັ້ນສຸດຍອດ ເອເປກ ຄັ້ງທີ 25 ໄດ້ພາໃຫ້ຫວຽດນາມກາຍເປັນຈຸດສຸມແຫ່ງຄວາມສົນໃຈຂອງທົ່ວໂລກ. ການເຂົ້າຮ່ວມຢ່າງຄົບໜ້າຄົບຕາຂອງບັນດາຜູ້ນຳທາງເສດຖະກິດ ເອເປກ ແລະ ຜູ້ນຳສານປະເທດທີ່ເປັນແຂກຖືກເຊີນຄື ລາວ, ກຳປູເຈຍ ແລະມີອານມາ ໃນສັບປະດາຂັ້ນສຸດຍອດ ເອເປກ; ຂອງຜູ້ເຂົ້າຮ່ວມການເຄື່ອນໄຫວໃນປີ ເອເປກ 2017 ເປັນຈຳນວຍຫຼາຍກວ່າ 21.000 ຄົນ ແລະ ຜູ້ເຂົ້າຮ່ວມສັບປະດາຂັ້ນສຸດຍອດ ເອເປກ ເປັນຈຳນວນຫຼາຍກວ່າ 11.000 ຄົນນັ້ນ ໄດ້ປະກອບເປັນຈຳນວນຜູ້ເຂົ້າຮ່ວມຫຼາຍທີ່ສຸດໃນປະຫວັດສາດຂອງ ເອເປກ. ສິ່ງດັ່ງກ່າວສະແດງໃຫ້ເຫັນທີ່ຕັ້ງຍຸດທະສາດ, ບົດບາດອັນໃຫຍ່ຫຼວງຂອງຫວຽດນາມໃນພາກພື້ນ, ຄຳໝັ້ນສັນຍາຂອງບັນດາພື້ນຖານເສດຖະກິດສະມາຊິກຕໍ່ຂະບວນວິວັດການຮ່ວມມືເສດຖະກິດ, ກໍ່ຄືຄວາມເອົາໃຈໃສ່ຂອງປະຊາຄົມສາກົນຕໍ່ກັບ ເອເປກ ແລະຫວຽດນາມ. ບັນດາຜູ້ນຳທາງເສດຖະກິດຂອງ ເອເປກ ລ້ວນແຕ່ໄດ້ຕີລາຄາສູງຕໍ່ບົດບາດປະເທດເຈົ້າພາບຂອງພວກເຮົາ ໃນການພາທາງ, ສະເໜີຄວາມຄິດ ການປະດິດສ້າງ ເພື່ອພາ ເອເປກ ໄປເຖິງຄວາມເຫັນດີເຫັນພ້ອມກ່ຽວກັບຫຼາຍບັນຫາ ແລະ ໄປສູ່ການກໍ່ສ້າງອະນາຄົດຮ່ວມກັນ.
ຈຳນວນນັກທຸລະກິດກວ່າ 4.000 ຄົນເຂົ້າຮ່ວມບັນດາເຫດການຂອງສັບປະດາຂັ້ນສຸດຍອດ ເອເປກ ຄັ້ງທີ 25 ໄດ້ສະແດງໃຫ້ເຫັນເຖິງຈິດໃຈທຸລະກິດ ແລະການລິເລີ່ມທຸລະກິດ ປະດິດສ້າງຂອງ ເອເປກ, ຢືນຢັນວ່າ ເອເປກ ເປັນເວທີປາໄສເພື່ອຜົນປະໂຫຍດຂອງປະຊາຊົນ ແລະວິສາຫະກິດ, ພ້ອມກັນນັ້ນກໍ່ເປີດແງ່ຫວັງໃໝ່ກ່ຽວກັບການເຕີບໂຕຂອງການລົງທຶນ ການຄ້າ ແລະການທຸລະກິດຢູ່ໃນພາກພື້ນອາຊີ-ປາຊີຟິກ ແລະ ຢູ່ປະເທດຫວຽດນາມ.
ພິເສດ, ປີ ເອເປກ 2017 ກໍ່ເປັນໂອກາດເພື່ອໃຫ້ຫວຽດນາມດຳເນີນການເຄື່ອນໄຫວສະເຫຼີມສະຫຼອງບັນດາເຫດການທີ່ເປັນຫຼັກໝາຍປະຫວັດສາດໃນເສັ້ນທາງພົວພັນຕ່າງປະເທດພະຫຸພາຄີ, ເປັນຕົ້ນແມ່ນສະເຫຼີມສະຫຼອງ 40 ປີແຫ່ງການເຂົ້າຮ່ວມສະຫະປະຊາຊາດ (1977 - 2017) ແລະຕໍ່ຈາກນັ້ນແມ່ນສະເຫຼີມສະຫຼອງ 20 ປີແຫ່ງການເຂົ້າຮ່ວມ ເອເປກ (1998 - 2018). ບັນດາຜົນສຳເລັດທີ່ບັນລຸໄດ້ໃນປີ ເອເປກ 2017 ຈະສ້າງທ່ວງທ່າໃຫ້ຫວຽດນາມຮັບພາລະທີ່ສຳຄັນຂອງສາກົນໃນຊຸມປີສະເພາະໜ້າ, ໃນນັ້ນມີການສະໝັກຮັບເລືອກຕັ້ງເຂົ້າໃນຕຳແໜ່ງ ກຳມະການບໍ່ຖາວອນຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ວາລະປີ 2020 - 2021 ແລະ ປະທານ ອາຊຽນ ປີ 2020.
ໄຊຊະນະຂອງປີ ເອເປກ 2017 ຍັງຕັ້ງຮາກຖານເພື່ອຍົກລະດັບການພົວພັນສອງຝ່າຍລະຫວ່າງປະເທດເຮົາກັບບັນດາປະເທດຄູ່ຮ່ວມມື. ໃນໂອກາດສັບປະດາຂັ້ນສຸດຍອດ ໄດ້ມີການຢ້ຽມຢາມສອງຝ່າຍທີ່ມີລັກສະນະປະຫວັດສາດ ດ້ວຍການພົບປະເຈລະຈາ ຕິດຕໍ່ສອງຝ່າຍເປັນສິບຄັ້ງ. ພິເສດ, ທ່ານ ສີ ຈິ້ນຜິງ ເລຂາທີການໃຫຍ່ ປະທານປະເທດແຫ່ງ ສປ ຈີນ ໄດ້ມາຢ້ຽມຢາມລັດຖະກິດທີ່ປະເທດຫວຽດນາມ ພາຍຫຼັງກອງປະຊຸມໃຫຍ່ຄັ້ງທີ XIX ຂອງພັກກອມມູນິດຈີນ; ເປັນຄັ້ງທຳອິດທີ່ປະທານາທິບໍດີສະຫະລັດອາເມຣິກາ - ປະທານາທິບໍດີ ໂດນັນ ທຣັມ - ມາຢ້ຽມຢາມລັດຖະກິດທີ່ປະເທດຫວຽດນາມໃນປີທຳອິດຂອງໄລຍະປະຈຳຕຳແໜ່ງປະທານາທິບໍດີ.
ຄວາມສຳເລັດຂອງປີ ເອເປກ 2017 ແລະ ສັບປະດາຂັ້ນສຸດຍອດ ເອເປກ ຄັ້ງທີ 25 ໄດ້ຢືນຢັນອີກຄັ້ງກ່ຽວກັບບົດບາດ ແລະສ່ວນປະກອບທີ່ສຳຄັນ ຂອງການພົວພັນຕ່າງປະເທດຫຼາຍຝ່າຍ ໃນຕະຫຼອດເສັ້ນທາງແຫ່ງການກໍ່ຕັ້ງປະເທດ ແລະ ປົກປັກຮັກສາປະເທດຂອງຊາດຫວຽດນາມເຮົາ. ໃນສະຖານະການສາກົນທີ່ມີການຜັນປ່ຽນໃໝ່ຫຼາຍຢ່າງຄືປະຈຸບັນນີ້, ບົນພື້ນຖານບັນດາຜົນສຳເລັດຂອງປີ ເອເປກ 2017 ພ້ອມກັບການເຄື່ອນໄຫວພົວພັນຕ່າງປະເທດຫຼາຍຝ່າຍທີ່ປະເທດເຮົາໄດ້ຜັນຂະຫຍາຍແລະພວມຜັນຂະຫຍາຍນັ້ນ, ພວກເຮົາຈະສືບຕໍ່ຍາດແຍ່ງເອົາການສະໜັບສະໜູນທີ່ກ້ວາງຂວາງ ແລະ ລະດົມເອົາບັນດາແຫຼ່ງພະລັງເພື່ອຮັບໃຊ້ໃຫ້ແກ່ການປ່ຽນແປງໃໝ່ຢ່າງຮອບດ້ານແລະຄົບຊຸດ; ຕັ້ງຮາກຖານເພື່ອຍົກລະດັບແລະເຮັດໃຫ້ການພົວພັນສອງຝ່າຍເລິກເຊິ່ງຕື່ມອີກ; ສ້າງເງື່ອນໄຂເພື່ອຍົກສູງຄວາມສາມາດເຊື່ອມໂຍງສາກົນໃຫ້ບັນດາກະຊວງ ຄະນະ ຂະແໜງການ ທ້ອງຖິ່ນ ແລະວິສາຫະກິດໃນທົ່ວປະເທດ, ປະກອບສ່ວນທີ່ສຳຄັນເຂົ້າໃນການຮັບປະກັນສິ່ງແວດລ້ອມແຫ່ງສັນຕະພາບ ສະຖຽນລະພາບ, ປົກປັກຮັກສາເອກະລາດ ອະທິປະໄຕ ຄວາມເປັນເອກະພາບ ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ ແລະ ຍົກສູງຖານະບົດບາດ ທີ່ຕັ້ງສາກົນຂອງປະເທດ. ນີ້ແມ່ນພື້ນຖານທີ່ສຳຄັນເພື່ອໃຫ້ພວກເຮົາສືບຕໍ່ປະຕິບັດບັນດາເປົ້າໝາຍແລະໜ້າທີ່ທີ່ກອງປະຊຸມໃຫຍ່ຄັ້ງທີ XII ຂອງພັກວາງອອກມາ ຢ່າງສຳເລັດມີໄຊ.
ພ້ອມກັນກັບບັນດາຜົນສຳເລັດທາງດ້ານວຽກງານພາຍໃນແລະວຽກງານການຕ່າງປະເທດທີ່ຍາດມາໄດ້ນັ້ນ, ພວກເຮົາກໍ່ເຫັນວ່າຍັງມີຂໍ້ຈຳກັດຈຳນວນໜຶ່ງທີ່ຕ້ອງແກ້ໄຂຜ່ານຜ່າ. ໃນຖານະປະມຸກແຫ່ງລັດ, ທ່ານປະທານປະເທດມີຄວາມເປັນຫ່ວງເປັນໄຍກ່ຽວກັບບັນຫາໃດແດ່?
ປະທານປະເທດ ເຈິ່ນດ້າຍກວາງ: ພວກເຮົາດີໃຈ, ທະນົງໃຈຕໍ່ບັນດາຜົນສຳເລັດທີ່ໃຫຍ່ຫຼວງຂອງປະເທດ, ພ້ອມກັນນັ້ນກໍ່ຕ້ອງມີຄວາມເຂັ້ມງວດແລະກົງໄປກົງມາໃນການຍອມຮັບຂໍ້ຈຳກັດຕ່າງໆ.
ຄຸນນະພາບຂອງການເຕີບໂຕຍັງບໍ່ທັນສູງ, ການເຕີບໂຕຂອງບາງຂະແໜງການ, ຂົງເຂດຍັງຊ້າ; ຫຼາຍກົນໄກ ນະໂຍບາຍ ແລະຂໍ້ກຳນົດກົດໝາຍ ຍັງບໍ່ໄດ້ຕາມຄວາມຕ້ອງການ, ຂັ້ນຕອນການບໍລິຫານໃນບາງຂົງເຂດຍັງຫຍຸ້ງເຫຍິງ; ການສໍ້ລາດບັງຫຼວງ ການຟຸມເຟືອຍ ຄວາມຫຍໍ້ທໍ້ອະນາຈານ ຍັງເກີດຂຶ້ນຢູ່ຫຼາຍແຫ່ງ, ຫຼາຍກໍລະນີຮ້ອງທຸກ ກ່າວຫາຍັງບໍ່ໄດ້ຮັບການແກ້ໄຂໃຫ້ແລ້ວຢ່າງຂາດຕົວ; ຫຼາຍໂຄງການລົງທຶນຖືກຫຼ້າຊ້າ, ປະສິດທິຜົນຕ່ຳ, ຂາດທຶນ, ໃຊ້ຈ່າຍຟຸມເຟືອຍເສຍທຶນ; ຂະບວນວິວັດການປັບປຸງໂຄງປະກອບຂະແໜງການກະສິກຳ, ອຸສາຫະກຳ, ບໍລິການຢູ່ບາງເຂດ ບາງທ້ອງຖິ່ນໄດ້ຮັບການຜັນຂະຫຍາຍຢ່າງຊັກຊ້າ, ປະສິດທິຜົນບໍ່ສູງ; ການຂຸດຄົ້ນຊັບພະຍາກອນຍັງຟຸມເຟືອຍ; ຍັງບໍ່ທັນມີມາດຕະການທີ່ສັກສິດເພື່ອແກ້ໄຂສະພາບການມົນພິດສິ່ງແວດລ້ອມຢູ່ເຂດຊົນນະບົດ, ໝູ່ບ້ານຫັດຖະກຳອາຊີບ.
ຄຽງຂ້າງນັ້ນຍັງມີການລ່ວງລະເມີດເດັກ, ໃຊ້ຄວາມຮຸນແຮງໃນຄອບຄົວ, ບັນດາປະກົດການຫຍໍ້ທໍ້ອະນາຈານ, ການເສື່ອມໂຊມທາງຄຸນສົມບັດ ແບບດຳລົງຊີວິດເຮັດໃຫ້ເກີດຄວາມຮ້ອງເຄືອງໃນຫາງສຽງສັງຄົມ; ໄພທຳມະຊາດ ພາຍຸລົມແດງ ນ້ຳມາກນ້ຳຖ້ວມເຮັດໃຫ້ເກີດຄວາມເສຍຫາຍຢ່າງຫຼວງຫຼາຍທາງດ້ານຜູ້ຄົນແລະຊັບສິນ, ເປັນຜົນກະທົບຢ່າງໜັກໜ່ວງຕໍ່ການຜະລິດແລະຊີວິດຂອງປະຊາຊົນ; ຊີວິດການເປັນຢູ່ຂອງປະຊາຊົນຊົນຢູ່ເຂດຊົນເຜົ່າສ່ວຍນ້ອຍ ເຂດຫ່າງໄກສອກຫຼີກ ເຂດຖືກໄພທຳມະຊາດ, ຜູ້ທຸກຍາກ ຍັງພົບຄວາມຫຍຸ້ງຍາກຫຼາຍ.
ຂໍ້ຈຳກັດຕ່າງໆທີ່ກ່າວມາເທິງນີ້ພວມເປັນສິ່ງກີດຂວາງໃນເສັ້ນທາງພັດທະນາຂອງປະເທດຊາດ. ສິ່ງທີ່ສຳຄັນແມ່ນພວກເຮົາກ້າທີ່ຈະເບິ່ງໂດຍກົງທີ່ຄວາມຈິງ, ເປັນເຈົ້າການໃນການວາງບັນດາວິທີແກ້ເພື່ອແກ້ໄຂຜ່ານຜ່າຂໍ້ຈຳກັດ.
ປີ 2018 ເປັນປີຫົວລ້ຽວຫົວຕໍ່ຂອງແຜນການພັດທະນາເສດຖະກິດ - ສັງຄົມ 5 ປີ 2016 - 2020, ທ່ານປະທານປະເທດຈົ່ງໃຫ້ຄວາມເຫັນຕີລາຄາກ່ຽວກັບຄວາມສະດວກແລະຄວາມຫຍຸ້ງຍາກຂອງປະເທດເຮົາ?
ປະທານປະເທດ ເຈິ່ນດ້າຍກວາງ: ສະພາແຫ່ງຊາດໄດ້ຮັບຮອງຜ່ານບັນດາຄາດໝາຍຕົ້ນຕໍຂອງແຜນການພັດທະນາເສດຖະກິດ - ສັງຄົມ ປີ 2018, ໃນນັ້ນ ຈີດີພີ ເຕີບໂຕປະມານ 6,5 - 6,7%; ສືບຕໍ່ຮັບປະກັນສະຖຽນລະພາບຂອງເສດຖະກິດມະຫາພາກ, ຄວບຄວມອັດຕາເງິນເຟີ້; ສ້າງໃຫ້ມີການຫັນປ່ຽນຢ່າງຈະແຈ້ງໃນການປະຕິບັດສາມການບຸກທະລຸຍຸດທະສາດ, ປ່ຽນແປງໃໝ່ຕົວແບບການເຕີບໂຕຕິດກັບການປັບປຸງໂຄງປະກອບພື້ນຖານເສດຖະກິດ, ຍົກສູງຄຸນນະພາບຂອງການເຕີບໂຕ, ສະມັດຕະພາບຂອງງານ ແລະ ກຳລັງແຮງແຂ່ງຂັນຂອງພື້ນຖານເສດຖະກິດ...
ພວກເຮົາມີຄວາມສະດວກທີ່ເປັນພື້ນຖານທີ່ສຸດຄື: ການເມືອງ-ສັງຄົມມີສະຖຽມລະພາບ, ອິດທິພົນຂອງຫວຽດນາມໃນເວທີສາກົນນັບມື້ນັບສູງ, ຄວາມເຊື່ອໝັ້ນໃນໂອກາດຂອງການພັດທະນາປະເທດໄດ້ຮັບການປັບປຸງ; ປະເທດມີຊັບພະຍາກອນເພື່ອການພັດທະນາ ແລະ ເປັນຕົ້ນແມ່ນພວກເຮົາໄດ້ຮັບຜົນສຳເລັດອັນໃຫຍ່ຫຼວງທີ່ມີຄວາມໝາຍປະຫວັດສາດ ແລະໄດ້ຖອດຖອນບົດຮຽນປະສົບການອັນລ້ຳຄ່າ ຜ່ານ 30 ກວ່າປີແຫ່ງການປ່ຽນແປງໃໝ່...
ສະພາບການຢູ່ໃນປະເທດແລະຕ່າງປະເທດມີຄວາມສະດວກ ໂອກາດດີ ພ້ອມທັງຄວາມຫຍຸ້ງຍາກ ສິ່ງທ້າທາຍທີ່ແຊກຊ້ອນກັນ; ເຊິ່ງວາງອອກຫຼາຍບັນຫາໃໝ່, ຄວາມຕ້ອງການໃໝ່ທີ່ໃຫຍ່ກວ່າ ສັບສົນກວ່າໃຫ້ແກ່ພາລະກິດການປ່ຽນແປງໃໝ່, ພັດທະນາປະເທດ ແລະ ປົກປັກຮັກສາເອກະລາດ ອະທິປະໄຕ ຄວາມເປັນເອກະພາບ ຜືນແຜ່ນດິນອັນຄົບຖ້ວຍຂອງປະເທດຊາດ. ໃນນັ້ນ, ທ່າໄດ້ປຽບທາງດ້າແຮງງານພວມຖືກສູນຫາຍໄປຢ່າງໄວວາ ຍ້ອນຜົນກະທົບຂອງການປະຕິວັດອຸດສາຫະກຳຄັ້ງທີສີ່; ພື້ນຖານເສດຖະກິດຫວຽດນາມໄດ້ເປີດປະຕູກວ້າງ ດັ່ງນັ້ນຈະຖືກຜົນກະທົບຫຼາຍຈາກສະພາບເສດຖະກິດໂລກ...
ໃນສະຖານະການດັ່ງກ່າວເທິງນີ້, ພວກເຮົາຕ້ອງເສີມຂະຫຍາຍສຸດຂີດກຳລັງແຮງແຫ່ງຈິດໃຈສາມັກຄີ, ເຈດຈຳນົງອີງໃສ່ຕົນເອງເພື່ອສ້າງຕົນໃຫ້ເຂັ້ມແຂງ, ຍາດແຍ່ງໂອກາດ, ຜ່ານຜ່າສິ່ງທ້າທາຍເພື່ອກ້າວຂຶ້ນຢ່າງໜັກແໜ້ນ.
ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຕ້ານການຟຸມເຟືອນ ໄດ້ຮັບຄວາມສົນໃຈຢ່າງເປັນປະຈຳຂອງປະຊາຊົນໃນທົ່ວປະເທດ. ທ່ານປະທານປະເທດຕີລາຄາຄືແນວໃດກ່ຽວກັບວຽກງານປ້ອງກັນແລະຕ້ານການສໍ້ລາດບັງຫຼວງ, ຕ້ານການຟຸມເຟືອນໃນປີທີ່ຜ່ານມາ?
ປະທານປະເທດ ເຈິ່ນດ້າຍກວາງ: ເວລາທີ່ຜ່ານມາດ, ດ້ວຍການຊີ້ນຳນຳພາຢ່າງລວມສູນ ເດັດດ່ຽວຂຸ້ນຂ້ຽວຂອງສູນກາງພັກ, ກົມການເມືອງ, ຄະນະຊີ້ນຳສູນກາງກ່ຽວກັບການປ້ອງກັນແລະຕ້ານການສໍ້ລາດບັງຫຼວງ, ດ້ວຍຄວາມມານະພະຍາຍາມຂອງບັນດາອົງການພາລະໜ້າທີ່ ແລະ ການສະໜັບສະໜູນ ຊ່ວຍເຫຼືອຂອງປະຊາຊົນ, ວຽກງານຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຕ້ານການຟຸມເຟືອຍໄດ້ບັນລຸຜົນສຳເລັດທີ່ສຳຄັນທີ່ສຸດ, ໄດ້ຮັບຄວາມເຫັນດີເຫັນພ້ອມ ສະໜັບສະໜູນ ແລະ ຊົມເຊີຍຈາກປະຊາຊົນ. ຫຼາຍຄະດີໃຫຍ່ທີ່ກໍ່ຄວາມເສຍຫາຍໜັກໜ່ວງໃຫ້ແກ່ຊັບສິນຂອງລັດແລະຂອງປະຊາຊົນ ໄດ້ຖືກສືບສວນ ຟ້ອງສານ ພິພາກສາ; ຊັບສິນທີ່ເສຍຫາຍຍ້ອນການສໍ້ລາດບັງຫຼວງໄດ້ຮັບການເກັບກູ້ຄືນເປັນຈຳນວນຫຼາຍ; ພວກຜູ້ຄົນສໍ້ລາດບັງຫຼວງໄດ້ຖືກຕັດສິນລົງໂທດຢ່າງເຂັ້ມງວດຕາມກົດໝາຍ.
ແຕ່ວ່າ, ການສໍ້ລາດບັງຫຼວງ, ການຟຸມເຟືອຍຍັງເປັນໜຶ່ງໃນສີ່ໄພຂົ່ມຂູ່ຕໍ່ການຍືນຍົງຄົງຕົວຂອງພັກແລະລະບອບການເມືອງຂອງພວກເຮົາ. ເພາະສະນັ້ນ ພັກແລະລັດໄດ້ຢືນຢັນຄວາມຕັດສິນໃຈ ຈະສືບຕໍ່ການຊີ້ນຳນຳພາຢ່າງເປັນປະຈຳ ຕໍ່ເນື່ອງ ຕໍ່ວຽກງານຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ຕ້ານການຟຸມເຟືອຍ, ລະດົມກຳລັງແຮງຂອງປວງຊົນເຂົ້າໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ຕ້ານການຟຸມເຟືອຍ, ຖືວ່ານີ້ເປັນໜຶ່ງໃນບັນດາໜ້າທີ່ຈຸດໜັກໃຈກາງຂອງປີ 2018 ແລະຊຸມປີຕໍ່ໄປ.
ພ້ອມໆກັບການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ຕ້ານການຟຸມເຟືອຍຢ່າງຕັ້ງໜ້ານັ້ນ, ຕ້ອງສືບຕໍ່ປະຕິບັດບັນດາມະຕິຂອງສູນກາງຢ່າງມີປະສິດທິຜົນ, ເປັນຕົ້ນແມ່ນບັນດາມະຕິກອງປະຊຸມຄັ້ງທີສີ່ຂອງຄະນະບໍລິຫານງານສູນກາງພັກ (ສະໄໝທີ XI ແລະທີ XII) ວ່າດ້ວຍການເພີ່ມທະວີການກໍ່ສ້າງ, ປັບປຸງພັກ. ພະນັກງານ ສະມາຊິກພັກແຕ່ລະຄົນຕ້ອງເປັນແບບຢ່າງ ຊື່ສັດທ່ຽງທຳ, ນຳໜ້າໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ຕ້ານການຟຸມເຟືອຍ. ພະນັກງານທີ່ມີຕຳແໜ່ງສູງຍິ່ງຕ້ອງເປັນແບບຢ່າງ, ເປັນຫຼັກແຫຼ່ງໃນການຄົ້ນເຜີຍຜູ້ກະທຳຜິດ ແລະຕໍ່ສູ້ຕ້ານອາຊະຍາກຳປະເພດຕ່າງໆ, ໃນນັ້ນມີອາຊະຍາກຳເສດຖະກິດ, ອາຊະຍາກຳສໍ້ລາດບັງຫຼວງ, ຈາກນັ້ນປະກອບສ່ວນກໍ່ສ້າງພັກ, ກໍ່ສ້າງກົງຈັກແຫ່ງລັດ, ລະບົບການເມືອງໃຫ້ສະອາດປອດໃສ, ໝັ້ນຄົງເຂັ້ມແຂງຢ່າງບໍ່ຢຸດຢັ້ງ. ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງຕ້ອງເດັດດ່ຽວ, ບໍ່ມີເຂດຫ້າມ ແລະ ຕ້ອງເກັບກູ້ຄືນຊັບສິນທີ່ພວກສໍ້ລາດບັງຫຼວງໄດ້ຍຶດເອົາໄວ້.
ເພື່ອກີດກັ້ນແລະຍູ້ຖອຍເທື່ອລະກ້າວການສໍ້ລາດບັງຫຼວງ ການຟຸມເຟືອຍ, ບັນດາຂັ້ນ ຂະແໜງການ, ສຳນັກງານອົງການ, ກົມກອງຕ່າງໆ ຕ້ອງຖືວຽກງານນີ້ເປັນໜຶ່ງໃນບັນດາໜ້າທີ່ຈຸດໜັກໃຈກາງ ເປັນປະຈຳທີ່ຈະຕ້ອງສຸມໃສ່ຊີ້ນຳນຳພາ, ມີແຜນການປະຕິບັກງານຢ່າງລະອຽດຕົວຈິງ. ແນວໂຮມປະເທດຊາດພ້ອມກັນກັບບັນດາຄະນະ, ຂະແໜງການ, ອົງຄະນະມະຫາຊົນ ແລະ ບັນດາອົງການສື່ມວນຊົນ ຕ້ອງເພີ່ມທະວີການຕິດຕາມກວດກາ, ຄົ້ນເຜີຍ, ສົມທົບການຕໍ່ສູ້, ສ້າງເງື່ອນໄຂໃຫ້ປະຊາຊົນເຂົ້າຮ່ວມວຽກງານນີ້ຢ່າງຕັ້ງໜ້າ.
ໃນໂອກາດປີໃໝ່, ທ່ານປະທານປະເທດຢາກຝາກຝັງຫຍັງແດ່ ເຖິງພີ່ນ້ອງຮ່ວມຊາດ, ນັກຮົບໃນທົ່ວປະເທດ ແລະ ພີ່ນ້ອງຫວຽດນາມຢູ່ຕ່າງປະເທດ?
ປະທານປະເທດ ເຈິ່ນດ້າຍກວາງ: ປະເທດເຮົາຍັງມີຄວາມຫຍຸ້ງຍາກຫຼາຍ, ແຕ່ດ້ວຍບັນດາຜົນສຳເລັດອັນໃຫຍ່ຫຼວງທີ່ຍາດມາໄດ້, ດ້ວຍທ່າແລະພະລັງ, ກຳລັງແຮງສັງລວມ, ອິດທິພົນສາກົນຂອງປະເທດທີ່ນັບມື້ນັບໄດ້ຍົກສູງ, ສ້າງເປັນບັນດາປະຖົມປັດໃຈທີ່ສຳຄັນ ເພື່ອສືບຕໍ່ປະຕິບັດບັນດາເປົ້າໝາຍແລະໜ້າທີ່ທີ່ກອງປະຊຸມໃຫຍ່ຄັ້ງທີ XII ຂອງພັກວາງອອກ ໃຫ້ສຳເລັດມີໄຊ.
ຂ້າພະເຈົ້າເຊື່ອໝັ້ນວ່າ, ດ້ວຍບັນຍາກາດໃໝ່, ພີ່ນ້ອງຮ່ວມຊາດຢູ່ເຂດທົ່ງພຽງກໍ່ຄືຢູ່ເຂດພູດອຍ, ຢູ່ໃນປະເທດແລະຕ່າງປະເທດ ຈົ່ງເສີມຂະຫຍາຍສຸດຂີດຈິດໃຈຮັກຊາດ, ເຈດຈຳນົງອີງໃສ່ຕົນເອງເພື່ອສ້າງຕົນໃຫ້ເຂັ້ມແຂງ, ກຳລັງແຮງແຫ່ງຄວາມສາມັກຄີປວງຊົນທັງຊາດ, ຮ່ວມແຮງຮ່ວມໃຈກັນ, ມານະພະຍາຍາມສູ້ຊົນເພື່ອເຮັດໃຫ້ປະເທດເຮົາພັດທະນາຢ່າງໄວວາ ຍືນຍົງ, ປົກປັກຮັກສາປະເທດຫວຽດນາມສັງຄົມນິຍົມໄວ້ຢ່າງໝັ້ນຄົງ.
ໃນໂອກາດປີໃໝ່ 2018 ແລະກະກຽມຕ້ອນຮັບບຸນປີໃໝ່ ປີຈໍ ທີ່ເປັນມູນເຊື້ອຂອງຊາດ, ຂ້າພະເຈົ້າຂໍອວຍພອນພີ່ນ້ອງຮ່ວມຊາດ, ນັກຮົບທົ່ວປະເທດ, ຊາວຫວຽດນາມຢູ່ຕ່າງປະເທດ ຈົ່ງມີສຸຂະພາບເຂັ້ມແຂງ ສົມບູນພູມສຸກ ແລະ ມີໄຊ.
ຂໍເປັນກຽດສະແດງຄວາມຂອບໃຈຕໍ່ທ່ານປະທານປະເທດ!
ແຫຼ່ງຂ່າວ: ສຳນັກຂ່າວສານຫວຽດນາມ