ຫວຽດນາມປ່ຽນແປງໃໝ່ ເຊື່ອມໂຍງ ແລະ ພັດທະນາ
ວກ.ອອນໄລ - ເນື່ອງໃນໂອກາດປີໃໝ່ 2018, ສຳນັກຂ່າວສານຫວຽດນາມໄດ້ຈັດພິມຈຳໜ່າຍສະບັບພິເສດ “The Year Ahead 2018: Hope Against Rage” (ປີ 2018 ຂ້າງໜ້າ: ຄວາມຫວັງປະເຊີນໜ້າກັບຄວາມໂກດເຄືອງ) ຂອງກຸ່ມສື່ສານ Project Syndicate ເປັນພາສາຫວຽດນາມ. ນີ້ແມ່ນສິ່ງພິມພິເສດ ທີ່ລົງພິມບົດຄວາມຂອງນັກການເມືອງ, ນັກເສດຖະສາດ, ນັກຄົ້ນຄວ້າ ທີ່ມີຊື່ສຽງໃນໂລກ ເຊິ່ງຂຽນກ່ຽວກັບບັນດາບັນຫາການເມືອງ ການທູດ ເສດຖະກິດ ສິ່ງແວດລ້ອມ ທີ່ມີລັກສະນະທົ່ວໂລກ ແລະ ມີລັກສະນະຄາດຄະເນ ວິຊາການສູງ. ທ່ານ ຫງວຽນຊວັນຝຸກ ນາຍົກລັດຖະມົນຕີແຫ່ງ ສສ ຫວຽດນາມໄດ້ມີບົດຄວາມລົງພິມໃນສິ່ງພິມສະບັບພິເສດນີ້. ຂໍເປັນກຽດແນະນຳບົດຄວາມດັ່ງກ່າວຂອງທ່ານນາຍົກລັດຖະມົນຕີ.
ບັນດາປ່ຽງສຸດທ້າຍໃນພາບລວມຂອງເສດຖະກິດໂລກປີ 2017 ໄດ້ສຳເລັດສົມບູນ, ໄດ້ນຳມາຊຶ່ງສີສັນທີ່ສົດໃສກວ່າປີ 2016, ພ້ອມກັນນັ້ນກໍ່ສົ່ງສັນຍານ “ອົບອຸ່ນ” ສຳລັບການເລີ່ມຕົ້ນທີ່ເຊື່ອຖືໄດ້ຂອງປີ 2018. ເສດຖະກິດໂລກມີການຟື້ນຟູຢ່າງໝັ້ນຄົງພໍຄວນ ແລະ ບັນລຸການເຕີບໂຕສູງສຸດນັບແຕ່ປີ 2010. ເກືອບທຸກປະເທດທີ່ພັດທະນາແລ້ວ ແລະ ບັນດາພື້ນຖານເສດຖະກິດທີ່ພົ້ນເດັ່ນໃໝ່ ລ້ວນແຕ່ມີການເຕີບໂຕທີ່ດີ ແລະສະໝ່ຳສະເໝີພໍຄວນ. ທະວີບອາຊີສືບຕໍ່ເປັນແຮງຜັດດັນຕົ້ນຕໍ, ປະກອບສ່ວນທີ່ສຳຄັນເຂົ້າໃນການເຕີບໂຕຂອງເສດຖະກິດໂລກ.
ການຄ້າ, ການລົງທຶນທົ່ວໂລກຈະເລີນຂຶ້ນ; ລາຄາສິນຄ້າພື້ນຖານແລະລາຄານ້ຳມັນດິບໄດ້ຟື້ນຕົວຕາມທາງບວກ. ການຄ້າສິນຄ້າເອເລັກໂຕຣນິກເພີ່ມຂຶ້ນຢ່າງໄວວາ, ເປັນຕົ້ນແມ່ນຢູ່ອາຊີ. ການນຳເຂົ້າຂອງບັນດາປະເທດທີ່ພັດທະນາແລ້ວໄດ້ເພີ່ມຂຶ້ນ ຍ້ອນການປັບປຸງການລົງທຶນ ການບໍລິໂພກ ແລະກຳລັງຊື້. ການລົງທຶນໂດຍກົງຈາກຕ່າງປະເທດ (FDI) ໃນທົ່ວໂລກເພີ່ມຂຶ້ນຢ່າງໄວ, ເປັນຕົ້ນແມ່ນການລົງທຶນເຂົ້າໃນບັນດາປະເທດທີ່ພັດທະນາແລ້ວ. ບັນດາພວງພະນັງຄຸນຄ່າໂລກມີການເຄື່ອນຍ້າຍ ຍ້ອນຜົນກະທົບຂອງການປະຕິວັດອຸດສາຫະກຳຄັ້ງທີສີ່. ສະພາບການການເງິນ - ເງິນຕາໂລກມີສະຖຽນລະພາບໂດຍພື້ນຖານ. ອັດຕາແລກປ່ຽນລະຫວ່າງສະກູນເງິນທີ່ສຳຄັນບໍ່ຄ່ອຍປ່ຽນແປງ; ສະກູນເງິນ ເອີໂຣ ແລະສະກູນເງິນຂອງບັນດາພື້ນຖານເສດຖະກິດທີ່ກຳລັງພົ້ນເດັ່ນຂຶ້ນ ໄດ້ຟື້ນຕົວຄືນໃໝ່, ສ່ອງແສງເຖິງຄວາມເຊື່ອຖືຕໍ່ຕະຫຼາດການເງິນໂລກທີ່ພວມໄດ້ຮັບການປົວແປງ.
ການຮ່ວມມື ແລະເຊື່ອມໂຍງເສດຖະກິດຍັງຄົງເປັນກະແສຕົ້ນຕໍໃນເສດຖະກິດໂລກ ແລະ ສືບຕໍ່ໄດ້ຮັບການຍູ້ແຮງ. ເກືອບໝົດທຸກປະເທດໄດ້ໃຫ້ຄວາມສຳຄັນຕໍ່ການຊຸກຍູ້ການຮ່ວມມື ແລະເຊື່ອມໂຍງເສດຖະກິດ ເພື່ອຮັບໃຊ້ບັນດາເປົ້າໝາຍ ຜົນປະໂຫຍດຍຸດທະສາດ, ຄວາມໝັ້ນຄົງ ແລະການພັດທະນາ. ການເປີດເສລີທາງການຄ້າ ແລະຕ້ານກັບການປົກປ້ອງການຄ້າພາຍໃນ ໄດ້ຮັບການຊຸກຍູ້ຢູ່ທີ່ບັນດາເວທີປາໄສພະຫຸພາຄີທີ່ສຳຄັນ (G20, G7, APEC, BRICS…); ສັນຍາຄູ່ຮ່ວມມືຮອບດ້ານແລະກ້າວໜ້າຂ້າມປາຊີຟິກ (CPTPP) ໄດ້ເປັນເອກະພາບກັນກ່ຽວກັບບັນດາພາກສ່ວນພື້ນຖານ, ຢືນຢັນຄວາມຕັດສິນໃຈຈະຊຸກຍູ້ການເຊື່ອມໂຍງເສດຖະກິດພາກພື້ນ, ຕ້ານກັບລັດທິປົກປ້ອງການຄ້າ.
ຄວາມຈິງແຫ່ງປະຫວັດສາດການພັດທະນາຂອງເສດຖະກິດໂລກໄດ້ໃຫ້ເຫັນວ່າ, ການໂລກາພິວັດ ແລະ ການເຊື່ອມໂຍງແມ່ນທ່າອຽງທີ່ຈຳເປັນຂາດບໍ່ໄດ້, ເຖິງວ່າຢູ່ບ່ອນໃດໜຶ່ງ ໃນເວລາໃດໜຶ່ງຈະມີທັດສະນະທີ່ແຕກຕ່າງກັນກໍ່ຕາມ. ໂລກາພິວັດບໍ່ພຽງແຕ່ເປັນຂະບວນວິວັດເສດຖະກິດເທົ່ານັ້ນ ຫາກຍັງສ່ອງແສງເຖງຄວາມປາຖະໜາບືນຕົວຂຶ້ນ ສະແຫວງຫາຄວາມສຸກ ແລະ ຜ່ານຜ່າສິ່ງທ້າທາຍຂອງມະນຸດ. ພ້ອມກັນກັບປະຊາຄົມສາກົນ, ຫວຽດນາມຕັດສິນໃຈກໍ່ສ້າງລັດຖະບານສ້າງສັນ, ຊື່ສັດທ່ຽງທຳ, ຂະຫຍັນຂັນເຄື່ອນ, ຮັບໃຊ້ປະຊາຊົນແລະວິສາຫະກິດ; ປະຕິບັດຢ່າງສະເໝີຕົ້ນສະເໝີປາຍແນວທາງປ່ຽນແປງໃໝ່ ແລະເຊື່ອມໂຍງ, ລະດົມແລະນຳໃຊ້ທຸກແຫຼ່ງພະລັງຢ່າງມີປະສິດທິຜົນ ເພື່ອຮັບໃຊ້ການສ້າງສາພັດທະນາປະເທດໃຫ້ຈະເລີນຮຸ່ງເຮືອງ. ເອົາໃຈໃສ່ເປັນສຳຄັນເຖິງການກໍ່ສ້າງ, ປ່ຽນແປງໃໝ່ກົນໄກຄຸ້ມຄອງບໍລິຫານ, ຮັບປະກັນລັກສະນະໄຫວພິບ, ຊ່ວຍໜູນການເຂົ້າເຖິງຕະຫຼາດຢ່າງໂປ່ງໃສ, ຮັກສາມາດຕະຖານແຮງງານທີ່ກ້າວໜ້າ, ປົກປ້ອງຜົນປະໂຫຍດອັນຊອບທຳຂອງວົງການທຸລະກິດ, ຊຸກຍູ້ການປ່ຽນແປງໃໝ່ປະດິດສ້າງຢ່າງບໍ່ຢຸດຢັ້ງ. ຫຼັກການທີ່ສອດຮ້ອຍຕະຫຼອດໃນການກຳນົດນະໂຍບາຍ ແມ່ນຕ້ອງເຂົ້າເປັນຈັງຫວະດຽວກັນກັບຄວາມຕ້ອງການຂອງຄວາມເປັນຈິງທີ່ມີຊີວິດຊີວາ, ສອດຄ່ອງກັບທ່າອຽງຂອງເຕັກໂນໂລຊີ ແລະການໂລກາພິວັດ, ຄ່ອງຕົວດີກັບຮູບແບບທຸລະກິດໃໝ່ ພາຍໃຕ້ຜົນກະທົບຂອງການປະຕິວັດອຸດສາຫະກຳຄັ້ງທີ 4.0, ປະກອບສ່ວນຊຸກຍູ້ແລະຍົກສູງຄວາມສາມາດແຂ່ງຂັນ, ທັງໃນລະດັບພາກພື້ນແລະລະດັບໂລກ.
ປີ 2017 ໄດ້ຮັບຮູ້ບັນດາຜົນສຳເລັດທີ່ສຳຄັນ, ຮອບດ້ານພໍຄວນຂອງຫວຽດນາມ ໃນຫຼາຍຂົງເຂດ ດ້ວຍຜົນທີ່ດີເລີດຄື ການສ້າງຕັ້ງວິສາຫະກິດໃໝ່, ການດຶງດູດການລົງທຶນໂດຍກົງຈາກຕ່າງປະເທດ, ການສົ່ງອອກ ນຳເຂົ້າສິນຄ້າ, ການສຳຮອງເງິນຕາຕ່າງປະເທດ. ເສດຖະກິດມະຫາພາກມີສະຖຽນລະພາບ, ອັດຕາເງິນເຟີ້ຖືກຄວບຄຸມ, ຈີດີພີ ເຕີບໂຕ 6,81%, ສູງທີ່ສຸດໃນຮອບ 10 ປີທີ່ຜ່ານມາ. ອຸດສາຫະກຳການຜະລິດກຳລັງຟື້ນຕົວຢ່າງຊັດເຈນ, ກາຍເປັນແຮງຜັດດັນທີ່ສຳຄັນຂອງພື້ນຖານເສດຖະກິດ. ສະພາບການການເມືອງ, ສັງຄົມມີສະຖຽນລະພາບ. ສິ່ງແວດລ້ອມແຫ່ງການທຸລະກິດຂອງຫວຽດນາມໄດ້ຮັບການປົວແປງດີພໍຄວນ, ໄດ້ເພີ່ມຂຶ້ນ 14 ລະດັບ, ຈາກອັນດັບທີ 82 ຂຶ້ນເປັນ 68 ໃນຈຳນວນ 190 ປະເທດທີ່ໄດ້ຈັດອັນດັບ; ຄວາມສາມາດແຂ່ງຂັນເພີ່ມຂຶ້ນ 5 ລະດັບ, ຈາກອັນດັບທີ 60 ຂຶ້ນເປັນ 55 ໃນຈຳນວນ 137 ປະເທດທີ່ໄດ້ຈັດອັນດັບ. ອົງການຈັດອັນດັບ Moody’s ໄດ້ຍົກລະດັບການປະເມີນລະບົບທະນາຄານໃນຫວຽດນາມຈາກ “ຄົງທີ” ເປັນ “ບວກ”. ຄວາມຕັດສິນໃຈປ່ຽນແປງໃໝ່ຂອງຫວຽດນາມ ແລະບັນດາຜົນສຳເລັດທີ່ສຳຄັນທີ່ບັນລຸໄດ້ ໄດ້ສ້າງບັນຍາກາດເບີກບານມ່ວນຊື່ນໃນການລົງທຶນທຸລະກິດ ແລະໃນທົ່ວສັງຄົມ, ປັບປຸງຄວາມເຊື່ອຖືຂອງນັກລົງທຶນ ແລະຂອງວົງການວິສາຫະກິດ.
ຫວຽດນາມເປັນເຈົ້າການເຊື່ອມໂຍງສາກົນຢ່າງກວ້າງຂວາງເລິກເຊິ່ງໃນຫຼາຍຂັ້ນຊັ້ນ, ຫຼາກຫຼາຍທາງດ້ານຮູບການ, ສອດຄ່ອງກັບຫຼັກການ ແລະມາດຕະຖານຂອງຕະຫຼາດ; ໄດ້ສ້າງຕັ້ງການພົວພັນທາງການທູດກັບ 185 ປະເທດ, ສ້າງຂອບການພົວພັນຄູ່ຮ່ວມມືຍຸດທະສາດ ແລະຄູ່ຮ່ວມມືຮອບດ້ານກັບ 26 ປະເທດ, ໃນນັ້ນມີ 5 ປະເທດທີ່ເປັນກຳມະການຖາວອນຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ; ມີການພົວພັນທາງດ້ານເສດຖະກິດກັບ 224 ປະເທດ, ອານາເຂດ; ເຂົ້າຮ່ວມໃນ 16 ສັນຍາການຄ້າເສດລີ (FTA), ປະກອບດ້ວຍບັນດາສັນຍາທີ່ໄດ້ລົງນາມ, ຜັນຂະຫຍາຍປະຕິບັດ ແລະ ພວມເຈລະຈາ, ໃນນັ້ນມີບັນດາສັນຍາການຄ້າເສລີຮຸ່ນໃໝ່ (EVFTA, CPTPP, RCEP). ພາຍຫຼັງ 10 ປີແຫ່ງການເຂົ້າຮ່ວມໃນອົງການການຄ້າໂລກ (WTO), ຍອດມູນຄ່າການສົ່ງອອກແລະນຳເຂົ້າຂອງຫວຽດນາມເພີ່ມຂຶ້ນທົບ 4 ເທື່ອ, ບັນລຸເກືອບ 425 ຕື້ໂດລາສະຫະລັດ, ຫຼາຍກວ່າ ຈີດີພີ ທົບ 1,9 ເທື່ອ ເຊິ່ງສະແດງໃຫ້ເຫັນເຖິງການເປີດປະຕູຢ່າງກວ້າງຂວາງຂອງເສດຖະກິດຫວຽດນາມ. ໃນປີ 2017, ຈຳນວນເງິນລົງທຶນໂດຍກົງຈາກຕ່າງປະເທດ (FDI) ລົງທະບຽບໃໝ່ບັນລຸ 21,3 ຕື້ໂດລາສະຫະລັດ ແລະລົງທະບຽນເພີ່ມເຕີມແມ່ນ 8,4 ຕື້ໂດລາສະຫະລັດ. ຫຼາຍກຸ່ມບໍລິສັດຂະໜາດໃຫຍ່ໃນ 500 ກຸ່ມບໍລິສັດອັນດັບຕົ້ນຂອງໂລກ ໄດ້ເລືອກເອົາຫວຽດນາມເປັນບ່ອນລົງທຶນເພື່ອພັດທະນາການຜະລິດລະດັບພາກພື້ນ ແລະເຊື່ອມຕໍ່ໃນພວງພະນັງຄຸນຄ່າທົ່ວໂລກ.
ຫວຽດນາມເປັນເພື່ອນກັບທຸກປະເທດຢູ່ສະເໝີ, ເປັນຄູ່ຮ່ວມມືທີ່ເຊື່ອຖືໄດ້ ແລະ ເປັນສະມາຊິກທີ່ມີຄວາມຮັບຜິດຊອບໃນການພົວພັນກັບບັນດາປະເທດແລະບັນດາຄູ່ຮ່ວມມື ບົນພື້ນຖານເຄົາລົບ ປະຕິບັດຕາມ ກົດບັດສະຫະປະຊາຊາດ ແລະ ກົດໝາຍສາກົນ, ປະກອບເຫື່ອແຮງພ້ອມກັບປະຊາຄົມສາກົນເພື່ອແກ້ໄຂບັນດາສິ່ງທ້າທາຍລະດັບພາກພື້ນ, ໂລກ ແລະ ຜັນປ່ຽນໂອກາດດີຕ່າງໆເປັນແຮງຜັດດັນການພັດທະນາຢ່າງແຂງແຮງ. ປະກອບສ່ວນອັນຕັ້ງໜ້າ, ມີຄວາມຮັບຜິດຊອບເຂົ້າໃນການກໍ່ສ້າງປະຊາຄົມອາຊຽນ, ສ້າງຕະຫຼາດທີ່ເປັນເອກະພາບຂອງປະຊາກອນເກືອບ 630 ຄົນທີ່ມີ ຈີດີພີ ເກືອບ 3.000 ຕື້ໂດລາສະຫະລັດ ແລະ ລາຍໄດ້ຂອງປະຊາຊົນນັບມື້ນັບເພີ່ມຂຶ້ນ; ເສີມຂະຫຍາຍບົດບາດເປັນໃຈກາງ ແລະຖານະທີ່ຕັ້ງຂອງ ອາຊຽນ ຢູ່ໃນພາກພື້ນແລະສາກົນ ບົນພື້ນຖານຄວາມສາມັກຄີພາຍໃນກຸ່ມ, ເປັນເອກະພາບ, ຊ່ວຍເຫຼືອເຊິ່ງກັນແລະກັນ, ເປັນເອກະລາດແລະມີຄວາມເຂັ້ມແຂງຕໍ່ສິ່ງທ້າທາຍແລະແຮງກົດດັນຕ່າງໆ, ເພື່ອສັນຕິພາບ ສະຖຽນລະພາບ ການຮ່ວມມືພັດທະນາ ແລະ ຄວາມວັດທະນາຖາວອນຢູ່ໃນພາກພື້ນ ແລະໃນໂລກ.
ໂດຍເປັນປະເທດເຈົ້າພາບຂອງກອງປະຊຸມສຸດຍອດເວທີປາໄສການຮ່ວມມືເສດຖະກິດອາຊີ-ປາຊີຟິກ (APEC 2017), ຫວຽດນາມໄດ້ວາງຫົວຂໍ້ “ສ້າງແຮງຜັດດັນໃໝ່, ພ້ອມກັນເພີ່ມພູນຄູນສ້າງອະນາຄົດຮ່ວມກັນ”, ຕັ້ງໜ້າກໍ່ສ້າງໂຄງການປະຕິບັດງານເພື່ອເປົ້າໝາຍເຊື່ອມຕໍ່ບັນດາພື້ນຖານເສດຖະກິດສະມາຊິດ ເອເປກ ແນໃສ່ສະໜັບສະໜູນລະບົບການຄ້າພະຫຸພາຄີ ທີ່ອີງໃສ່ຫຼັກການ ເສລີພາບ ຍຸຕິທຳ ເປີດກວ້າງ ໂປ່ງໄສ ແລະ ກວມລວມ. ພິເສດ, ສັບປະດາຂັ້ນສຸດຍອດ ເອເປກ 2017 ທີ່ມີການເຂົ້າຮ່ວມຂອງຜູ້ນຳຂອງ 21 ພື້ນຖານເສດຖະກິດອາຊີ-ປາຊີຟີກ ໄດ້ສິ້ນສຸດລົງຢ່າງສຳເລັດຜົນ, ຢືນຢັນບົດບາດ, ຖານະທີ່ຕັ້ງສາກົນໃໝ່ຂອງຫວຽດນາມ. ຂໍ້ຄວາມທີ່ແຂງແຮງໃນຖະແຫຼງການລະດັບສູງດານັ້ງ ກ່ຽວກັບການຊຸກຍູ້ການຄ້າ ການລົງທຶນຢ່າງເສລີແລະເປີດກວ້າງ ແມ່ນພາລະກຳຂອງບັນດາພື້ນຖານເສດຖະກິດ ເອເປກ, ສະໜັບສະໜູນລະບົບການຄ້າພະຫຸພາຄີ ແລະ ຢືນຢັນອີກຄັ້ງກ່ຽວກັບບົດບາດເປັນແຮງຜັດດັນການພັດທະນາຂອງ ເອເປກ - ກົນໄກຮ່ວມມືທາງເສດຖະກິດທີ່ສຳຄັນໃນພາກພື້ນ, ຕົ້ນກຳເນີດຂອງການລິເລີ່ມການເຊື່ອມໂຍງເສດຖະກິດ. ໃນສັບປະດານີ້, 11 ປະເທດສະມາຊິກໄດ້ເປັນເອກະພາບກັນອອກຖະແຫຼງການຮ່ວມ ຢືນຢັນບັນດາບັນຫາຫຼັກ, ກ້າວໄປເຖິງການລົງນາມ ຜັນຂະຫຍາຍສັນຍາຄູ່ຮ່ວມມືຮອບດ້ານແລະກ້າວໜ້າຂ້າມປະຊີຟິກ (CPTPP).
ກ້າວເຂົ້າສູ່ປີ 2018, ສະພາບການໂລກ, ພາກພື້ນສືນຕໍ່ມີຄວາມສະດວກແລະຄວາມຫຍຸ້ງຍາກ ສິ່ງທ້າທາຍທີ່ແຊກຊ້ອນກັນ. ສັນຕິພາບ ການຮ່ວມມືພັດທະນາຍັງຄົງແມ່ນທ່າອຽງຕົ້ນຕໍ, ແຕ່ຄວາມເຄັ່ງຕຶງທາງດ້ານພູມສາດ-ການເມືອງ, ລັດທິກໍ່ການຮ້າຍ, ການປະທະກັນຍັງເກີດຂຶ້ນຢູ່ຫຼາຍແຫ່ງ. ເສດຖະກິດໂລກຈະເຕີບໂຕໄວກວ່າປີ 2017 ແຕ່ຍັງມີຄວາມສ່ຽງຫຼາຍຢ່າງ. ລັດທິປົກປ້ອງການຄ້າອາດຈະເພີ່ມຂຶ້ນຢູ່ບາງປະເທດ, ບາງເຂດ. ການເຊື່ອມໂຍງເສດຖະກິດ, ການຄ້າ, ການລົງທຶນ ສືບຕໍ່ໄດ້ຮັບການຍູ້ແຮງ ແຕ່ກໍ່ຍັງມີສິ່ງກີດຂວາມ, ຄວາມແຕກຕ່າງ. ພາກພື້ນອາຊີ-ປາຊີຟິກ, ໃນນັ້ນມີອາຊີຕາເວັນອອກສຽງໃຕ້ ສືບຕໍ່ເປັນໃຈກາງແຫ່ງການພັດທະນາຢ່າງຂະຫຍັນຂັນເຄື່ອນ ແຕ່ກໍ່ເປັນໜຶ່ງໃນບັນດາຈຸດໜັກແຫ່ງການແຂ່ງຂັນທາງພູມສາດຍຸດທະສາທີ່ເຄັ່ງຮ້ອນ. ບັນດາສິ່ງທ້າທາຍດ້ານຄວາມປອດໄພທີ່ບໍ່ເປັນແບບດັ້ງເດີມ, ເປັນຕົ້ນແມ່ນການປ່ຽນແປງສະພາບອາກາດ, ໄພທຳມະຊາດ, ໂລຄາພະຍາດ ສືບຕໍ່ວາງບັນຫາຕ່າງໆອອກມາ ເຊິ່ງບັນດາປະເທດຕ້ອງແກ້ໄຂ. ວິທະຍາສາດ-ເຕັກໂນໂລຊີຂະຫຍາຍຕົວຢ່າງແຂງແຮງພາຍໃຕ້ກະແສຟອງປະຕິວັດອຸດສາຫະກຳ 4.0 ຈະສົ່ງຜົນກະທົບນັບມື້ນັບເລິກເຊິ່ງ, ຫຼາຍດ້ານຕໍ່ທຸກປະເທດ, ທັງສ້າງແຮງຜັດດັນໃໝ່ໃຫ້ແກ່ການພັດທະນາເສດຖະກິດ, ຍົກສູງຄວາມສາມາດແຂ່ງຂັນ ແຕ່ກໍ່ວາງສິ່ງທ້າທາຍແລະບັນຫາຕ່າງໆຫຼາຍຢ່າງທີ່ຕ້ອງແກ້ໄຂ ທາງດ້ານການເມືອງ ເສດຖະກິດ ແຮງງານ ວັດທະນະທຳ ສັງຄົມ ສິ່ງແວດລ້ອມ ແລະ ການປ້ອງກັນຊາດ ປ້ອງກັນຄວາມສະຫງົບ.
ໃນສະພາບການດັ່ງກ່າວນັ້ນ, ພ້ອມກັບບັນດາປະເທດແລະຄູ່ຮ່ວມມືສາກົນ, ຫວຽດນາມມີຄວາມປະສົງແລະຫວັງວ່າ ປີ 2018 ສັນຕິພາບ ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງຈະມາໃນໂລກນີ້ - ບ້ານເຮືອນຮ່ວມກັນຂອງພວກເຮົາທຸກຄົນ. ເພື່ອບັນລຸສິ່ງດັ່ງກ່າວນັ້ນ, ແຕ່ລະສະມາຊິກໃນປະຊາຄົມໂລກຕ້ອງສະແດງໃຫ້ເຫັນແຈ້ງເຖິງເຈດຕະນາດີໃນການຮ່ວມມື, ມີສະຕິຮັບຜິດຊອບ, ຮ່ວມແຮງຮ່ວມມືກັນເຄື່ອນໄຫວ, ແບ່ງປັນຜົນປະໂຫຍດຮ່ວມກັນໃນການກໍ່ສ້າງໂລກ - ບ້ານເຮືອນຮ່ວມຫຼັງນີ້ ບົນພື້ນຖານກົດບັດສະຫະປະຊາຊາດ ແລະ ບັນດາຫຼັກການພື້ນຖານຂອງກົດໝາຍສາກົນ, ເຊິ່ງເປັນບ່ອນທີ່ຄວາມນັບຖືກົດໝາຍໄດ້ຮັບການສົ່ງເສີມແລະຊຸກຍູ້ໂດຍທຸກປະເທດໃຫຍ່ແລະນ້ອຍ.
ດ້ວຍທິດນຳ “ລະບຽບວິໄນ, ຄວາມຊື່ສັດທ່ຽງທຳ, ການປະຕິບັດ, ຄວາມຄິດປະດິດສ້າງ, ປະສິດທິຜົນ”, ຫວຽດນາມຕັດສິນໃຈຮັກສາສິ່ງແວດລ້ອມມະຫາພາກ, ການເມືອງ-ສັງຄົມ ໃຫ້ມີສະຖຽນລະພາບ, ເສີມຂະຫຍາຍປະຊາທິປະໄຕ, ຍູ້ແຮງການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຕ້ານຜົນປະໂຫຍດໝູ່ພວກ, ສູ້ຊົນປະຕິບັດບັນດາເປົ້າໝາຍພັດທະນາແບບຍືນຍົງຮອດປີ 2030 ຂອງສະຫະປະຊາຊາດ ຢ່າງສຳເລັດຜົນ. ສຸມໃສ່ປະຕິບັນຢ່າງຂ້ຽວຂາດ, ຄົບຊຸດ ບັນດາການບຸກທະລຸຍຸດທະສາດກ່ຽວກັບລະບຽບກົດໝາຍ, ແຫຼ່ງບຸກຄະລາກອນ ແລະ ລະບົບໂຄງສ້າງພື້ນຖານດ້ານເສດຖະກິດ-ສັງຄົມ. ສ້າງໃຫ້ມີການຜັນປ່ຽນຢ່າງຈະແຈ້ງ, ເນື້ອແທ້ໃນການປັບປຸງໂຄງປະກອບເສດຖະກິດ ຕິດກັບການປ່ຽນແປງໃໝ່ຮູບແບບການເຕີບໂຕ ຕາມທິດຍົກສູງສະມັດຕະພາບ ຄຸນນະພາບ ປະສິດທິຜົນ ແລະ ກຳລັງແຂ່ງຂັນ. ຍູ້ແຮງການປັບປຸງໂຄງປະກອບຂອງຂົງເຂດວິສາຫະກິດແຫ່ງລັດ, ລະບົບການເງິນທະນາຄານ, ແກ້ໄຂໜີ້ເສຍ, ປະຕິຮູບລະບົບການເງິນສາທາລະນະ ແລະ ຄວບຄຸມໜີ້ສິນສາທາລະນະ ຢ່າງມີປະສິດທິຜົນ ຕາມຈິດໃຈລົດຄ່າໃຊ້ຈ່າຍ, ອຳນວຍຄວາມສະດວກຊຸກຍູ້ການຜະລິດທຸລະກິດໃຫ້ພັດທະນາ.
ສືບຕໍ່ນຳໃຊ້ບັນດາເຄື່ອງມືທາງການເງິນແລະເງິນຕາຢ່າງໄຫວພິບ ເພື່ອຊ່ວຍຊູໃຫ້ພື້ນຖານເສດຖະກິດ, ສ້າງວຽກເຮັດງານທຳໃຫ້ໄດ້ຫຼາຍ ແລະປົວແປງລາຍຮັບຂອງປະຊາຊົນ. ບຸລິມະສິດການລົງທຶນພັດທະນາໂຄງສ້າງພື້ນຖານ, ລວມສູນການກໍ່ສ້າງ ພັດທະນາເສດຖະກິດດິຈິຕອນ ແລະ ອຸດສາຫະກຳອັດສະລິຍະ, ຊ່ວຍສ້າງການເຊື່ອມຕໍ່ອັດສະລິຍະ, ມີປະສິດທິຜົນ, ລົດຄ່າໃຊ້ຈ່າຍການທຸລະກິດ, ຍົກສູງລັກສະນະແຂ່ງຂັນຂອງວິສາຫະກິດ, ນັກລົງທຶນ ແລະ ຂອງພື້ນຖານເສດຖະກິດ, ແນໃສ່ໄດ້ຮັບການຈັດອັນດັບສູງໃນກຸ່ມປະເທດນຳໜ້າອາຊຽນ ແລະຢູ່ໃນມາດຕະຖານສູງຂອງອົງການເພື່ອການຮ່ວມມືແລະການພັດທະນາທາງເສດຖະກິດ (OECD). ລົງທຶນຢ່າງແຂງແຮງໃຫ້ແກ່ການສຶກສາ ແລະວິທະຍາສາດເຕັກໂນໂລຊີ; ສົ່ງເສີມການລິເລີ່ມທຸລະກິດ, ປ່ຽນແປງໃໝ່ປະດິດສ້າງ. ພັດທະນາເສດຖະກິດເອກະຊົນໃຫ້ກາຍເປັນແຮງຜັດດັນທີ່ສຳຄັນຂອງພື້ນຖານເສດຖະກິດ; ສູ້ຊົນປະຕິບັດເປົ້າໝາຍໜຶ່ງລ້ານວິສາຫະກິດ ໃຫ້ປະກົດເປັນຈິງໃນປີ 2020; ເຮັດໃຫ້ເສດຖະກິດເອກະຊົນຫວຽດນາມພ້ອມກັບບັນດາພວກສ່ວນເສດຖະກິດອື່ນ ພັດທະນາຂຶ້ນສູ່ລະດັບສູງໃໝ່, ມີກຳລັງແຮງແຂ່ງຂັນ ແລະ ຄວາມສາມາດເຊື່ອມໂຍງກັບພາກພື້ນແລະໂລກ.
ປັບປຸງຄຸນນະພາບຂອງລະບຽບກົດໝາຍໃຫ້ດີກວ່າອີກ, ບູລະນະນະໂຍບາຍກົດໝາຍຕາມທິດໂປ່ງໃສ, ສົດໃສ, ປອດໄພ ແລະມີປະສິດທິຜົນກວ່າອີກ, ຊຸກຍູ້ອຳນາດກົດໝາຍ, ຍົກສູງຄວາມສາມາດຄຸ້ມຄອງບໍລິຫານລັດ ແລະຄຸ້ມຄອງເສດຖະກິດມະຫະພາກ ແນໃສ່ຮັກສາການເຕີບໂຕ, ຮັບປະກັນຄວາມກ້າວໜ້າສັງຄົມຢ່າງບໍ່ຢຸດຢັ້ງ, ແກ່ດຶງຊັ້ນຄົນທີ່ມີລາຍໄດ້ຕ່ຳຂຶ້ນ ໃຫ້ທັນກັບກຸ່ມທີ່ມີລາຍໄດ້ປານກາງແລະດີ. ຄວາມກ້າວໜ້າທາງສັງຄົມເປັນກຸນແຈເພື່ອຮັກສາການເຄື່ອນໄຫວຂອງການໝູນວຽນຊຸກຍູ້ເຊິ່ງກັນແລະກັນລະຫວ່າງການເພີ່ມຂຶ້ຂອງຊົນຊັ້ນກາງ ແລະການເຕີບໂຕເສດຖະກິດ. ຕາມລາຍງານຫວຽດນາມປີ 2035 ຂອງທະນາຄານໂລກ ແລະ ກະຊວງແຜນການແລະການລົງທຶນຫວຽດນາມ, ປະຈຸບັນປະຊາກອນຫວຽດນາມປະມານ 10% ຂຶ້ນກັບກຸ່ມຊົນຊັ້ນກາງ, ຄາດວ່າປີ 2035 ອັດຕາສ່ວນນີ້ຈະເທົ່າກັບ 50%.
ຫວຽດນາສືບຕໍ່ປະຕິບັດແຜນນະໂຍບາຍເຊື່ອມໂຍງຢ່າງຮອບດ້ານ ໃນນັ້ນຈຸດໜັດໃຈກາງແມ່ນເຊື່ອມໂຍງເສດຖະກິດສາກົນ. ຕິດແໜ້ນການປະຕິບັດຄຳໝັ້ນສັນຍາເຊື່ອມໂຍງ ກັບຂະບວນວິວັດການປະຕິຮູບ, ປັບປຸງບູລະນະລະບຽບກົດໝາຍ, ຈັດວາງໂຄງປະກອບເສດຖະກິດຄືນໃໝ່, ປ່ຽນແປງໃໝ່ຮູບແບບການເຕີບໂຕ, ຍົກສູງກຳລັງແຮງແຂ່ງຂັນ; ວາງກຳນົດນະໂຍບາຍ, ກົນໄກທີ່ສອດຄ່ອງ ເພື່ອສ້າງສິ່ງແວດລ້ອມແຫ່ງການລົງທຶນແລະທຸລະກິດທີ່ສະດວກດີໃຫ້ແກ່ວິສາຫະກິດໃນປະເທດແລະຂອງຕ່າງປະເທດ. ພ້ອມກັນກັບບັນດາປະເທດສະມາຊິກ, ສູ້ຊົນເພື່ອລົງນາມໂດຍໄວໃນສັນຍາ EVFTA ກັບສະຫະພາບເອີຣົບ (EU), ສັນຍາຄູ່ຮ່ວມມືຮອບດ້ານແລະກ້າວໜ້າຂ້າມປາຊີຟິກ (CPTPP); ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP)…; ຜ່ານສິ່ງດັ່ງກ່າວນັ້ນຈະສ້າງໂອກາດໃໝ່ໃຫ້ແກ່ວົງການທຸລະກິດ, ສ້າງພື້ນທີ່ເທສະການພັດທະນາທີ່ກວ້າງຂວາງໃຫ້ແກ່ພື້ນຖານເສດຖະກິດ, ເຂົ້າຮ່ວມໃນເຄືອຂ່າຍການຜະລິດ ແລະບັນດາພວງພະນັງຄຸນຄ່າຂອງບັນດາພື້ນຖານເສດຖະກິດສະມາຊິກ.
ຫວຽດນາມຊົມເຊີຍຕ້ອນຮັບ ແລະອຳນວຍຄວາມສະດວກໃຫ້ນັກລົງທຶນ ວິສາຫະກິດສາກົນ ແລະ ວິສາຫະກິດໃນປະເທດໄດ້ເປີດກວ້າງການຜະລິດທຸລະກິດ ແລະລິເລີ່ມປະກອບການຢູ່ຫວຽດນາມ, ແຕ່ກໍ່ບໍ່ຊົມເຊີຍການເຄື່ອນໄຫວທຸລະກິດຜິດກົດໝາຍ. ຈະແກ້ໄຂລົງໂທດຢ່າງເຂັ້ມງວດຕາມກົດໝາຍຕໍ່ບັນດາວິສາຫະກິດທີ່ປ່ອຍສານມົນພິດ ທຳລາຍສິ່ງແວດລ້ອມທຳມະຊາດ; ສົ່ງຜົນກະທົບທາງລົບເຖິງບັນດາຄຸນຄ່າມູນເຊື້ອວັດທະນະທຳ ສັງຄົມ; ນຳໃຊ້ເດັກນ້ອຍ ແຮງງານຢ່າງຜິດກົດໝາຍ; ຈຳແນກການປະພຶດ; ບໍ່ເອົາໃຈໃສ່ເຖິງສິດຜົນປະໂຫຍດຂອງຜູ້ອອກແຮງງານ; ຜະລິດສິນຄ້າປອມ ສິນຄ້າຄຸນນະພາບຕ່ຳທີ່ເປັນຜົນສະທ້ອນເຖິງສຸຂະພາບຂອງປະຊາຊົນ; ການກະທຳຫຼີກລ່ຽງພາສີ ການຄ້າຂອງເຖື່ອນ ການສໍ້ໂກງທາງການຄ້າ.
ພ້ອມກັນກັບຄວາມມານະພະຍາຍາມຜ່ານຜ່າຄວາມຫຍຸ້ງຍາກສິ່ງທ້າທາຍ, ເສີມຂະຫຍາຍພະລັງພາຍໃນ, ກຳລັງແຮງປະດິດສ້າງຂອງຕົນເອງ, ຫວຽດນາມໄດ້ຮຽກຮ້ອງ ແລະ ຊົມເຊີຍການສະໜັບສະໜູນແລະຮ່ວມມືຂອງບັນດາປະເທດຄູ່ຮ່ວມມື ແລະ ປະຊາຄົມສາກົນ ໃນທຸກດ້ານ, ນັບແຕ່ການພັດທະນາເສດຖະກິດ ຈົນເຖິງບັນດາຂົງເຂດວັດທະນະທຳ ສັງຄົມ ສິ່ງແວດລ້ອມ ການປ່ຽນແປງສະພາບອາກາດ ແລະ ການປ້ອງກັນຊາດ ປ້ອງກັນຄວາມສະຫງົບ. ພວກຂ້າພະເຈົ້າສະແດງຄວາມຂອບໃຈຕໍ່ການສະໜັບສະໜູນຊ່ວຍເຫຼືອທີ່ລ້ຳຄ່ານັ້ນ ແລະ ຫວັງວ່າຈະສືບຕໍ່ໄດ້ຮັບການຊ່ວຍເຫຼືອ ແລະ ຄຳປຶກສາຈາກບັນດາປະເທດຄູ່ຮ່ວມມືທີ່ພັດທະນາ, ຈາກວົງການວິສາຫະກິດ ບັນດາຜູ້ຊ່ຽວຊານໃນປະເທດແລະຕ່າງປະເທດ ໃນການກໍ່ສ້າງຍຸດທະສາດການພັດທະນ, ຊອກຫາວິທີແກ້ໄຂ ກົນໄກນະໂຍບາຍທີ່ສອດຄ່ອງ, ປະຕິບັດການຫັນປະເທດເປັນອຸດສາຫະກຳ ທັນສະໄໝຢ່າງສຳເລັດຜົນ ໃນສະພາບການເຊື່ອມໂຍງນັບມື້ນັບກວ້າງຂວາງເລິກເຊິ່ງ.
ໃນໂລກທີ່ເຕັມໄປດ້ວຍການຜັນຜວນໃນປະຈຸບັນ, ພວກເຮົາບໍ່ສາມາດປະຕິບັດບັນດາເປົ້າໝາຍທີ່ສູງສົ່ງທາງດ້ານການຮ່ວມມື, ພັດທະນາຢ່າງສຳເລັດຜົນໄດ້ ຖ້າຫາກບໍ່ມີສັນຕິພາບ ຄວາມໝັ້ນຄົງ. ເລື່ອງນີ້ມີຄວາມໝາຍສຳຄັນພິເສດສຳລັບອາຊີ-ປາຊີຟິກ ເຊິ່ງເປັນບ່ອນທີ່ມີບັນດາຈຸດຮ້ອນທີ່ຂົ່ມຂູ່ສັນຕິພາບ ຄວາມໝັ້ນຄົງຂອງພາກພື້ນແລະທົ່ວໂລກ. ຫວຽດນາມມີຄວາມປາຖະໜາຢາກຈະພ້ອມກັນກັບປະຊາຄົມສາກົນເພີ່ມທະວີການຮ່ວມມື, ສາມັກຄີ, ເສີມຂະຫຍາຍທຸກຄວາມສາມາດ, ການປະດິດສ້າງ ແລະ ຂໍ້ຄິດປະດິດຂອງທຸກປະເທດ ເພື່ອຜ່ານຜ່າສິ່ງທ້າທາຍ, ກີດກັ້ນແລະຊຸກຍູ້ການແກ້ໄຂຂໍ້ຂັດແຍ້ງການປະທະກັນ ດ້ວຍສັນຕິວິທີ, ບົນພື້ນຖານເຄົາລົບກົດບັດສະຫະປະຊາຊາດ ແລະກົດໝາຍສາກົນ, ຊຸກຍູ້ການພັດທະນາແບບຍືນຍົງ, ນຳເອົາຄວາມວັດທະນາຖາວອນ ແລະຄວາມສຸກມາໃຫ້ທຸກຄົນ, ບໍ່ປະໃຫ້ຜູ້ໃດຖືກຕົກຢູ່ຂ້າງຫຼັງ. ສຳລັບຕົນເອງ, ຫວຽດນາມຈະພະຍາຍາມພ້ອມກັບບັນດາປະເທດອື່ນເພື່ອຄົ້ນຄວ້າ ປະກອບສ່ວນ ຊອກຫາວິທີແກ້ໄຂ ເພື່ອຮັກສາສິ່ງແວດລ້ອມແຫ່ງສັນຕິພາບ ສະຖຽນລະພາບ ມິດຕະພາບ ການຮ່ວມມື ແລະ ການພັດທະນາ; ຮັບມືຢ່າງມີປະສິດທິຜົນກັບບັນດາປັດໄຈທີ່ກີດກັ້ນຂະບວນວີວັດການເຊື່ອມໂຍງສາກົນເຊັ່ນ ລັດທິປົກປ້ອງການຄ້າ, ການຫຼີກລ່ຽງພາສີ, ການໂອນລາຄາ, ເຕັກໂນໂລຊີຫຼ້າຫຼັງ, ມົນພິດສິ່ງແວດລ້ອມ, ບັນດາບັນຫາກ່ຽວກັບການກໍ່ການຮ້າຍ, ການແບ່ງແຍກເຊື້ອຊາດ, ສາສະໜາ…; ພ້ອມກັນນັ້ນ ກໍ່ຜັນຂະຢ່າງມີເນື້ອແທ້ ມີປະສິດທິຜົນບັນດາຂໍ້ຕົກລົງພາກພື້ນແລະທົ່ວໂລກກ່ຽວກັບການພັດທະນາແບບຍືນຍົງ, ຮັບມືກັບການປ່ຽນແປງສະພາບອາກາດ, ປະກອບສ່ວນຕົວຈິງເຂົ້າໃນການກໍ່ສ້າງແລະກຳນົດບັນດາກົນໄກຮ່ວມມືແລະພັດທະນາຫຼາຍຝ່າຍ, ສອງຝ່າຍ. ພວກເຮົາທຸກຄົນຈົ່ງມີການກະທຳຕົວຈິງ ມີປະສິດທິຜົນ, ພ້ອມກັນຮ່ວມມືຮ່ວມແຮງເພື່ອໃຫ້ໂລກມີສັນຕິພາບ ຄວາມສຸກ ແລະ ພັດທະນາຈະເລີນຮຸ່ງເຮືອງ./.
ແຫຼ່ງຂ່າວ: ສຳນັກຂ່າວສານຫວຽດນາມ