ສືບຕໍ່ຍົກສູງ ຄວາມຮັບຜິດຊອບຂອງຜູ້ແທນປະຊາຊົນ ຍິ່ງກວ່າອີກ
ວກ. ອອນໄລ - ທ່າມກາງບັນຍາກາດອັນເບີກບານມ່ວນຊື່ນຄຶກຄື້ນແຫ່ງການສົ່ງທ້າຍປີເກົ່າຕ້ອນຮັບປີໃໝ່ ປີຈໍ 2018 ແລະ ຄວາມສຳເລັດຂອງການຈັດຕັ້ງກອງປະຊຸມປະຈຳປີຄັ້ງທີ 26 ຂອງເວທີປາໄສລັດຖະສະພາ ອາຊີ - ປາຊີຟິກ (APPF-26) - ເຊິ່ງເລີ່ມຕົ້ນໃຫ້ແກ່ການເຄື່ອນໄຫວການພົວພັນຕ່າງປະເທດລັດຖະສະພາ ໃນປີ 2018 ໂດຍສະພາແຫ່ງຊາດຫວຽດນາມເປັນເຈົ້າພາບນັ້ນ, ທ່ານນາງ ຫງວຽນທິກີມເງິນ ກຳມະການກົມການເມືອງ, ປະທານສະພາແຫ່ງຊາດ ແຫ່ງ ສສ ຫວຽດນາມ ໄດ້ຕອບສຳພາດຂອງສຳນັກຂ່າວສານຫວຽດນາມ ກ່ຽວກັບໜ້າທີ່ຈຸດໜັກໃຈກາງຂອງສະພາແຫ່ງຊາດ ໃນເວລາຕໍ່ໄປ.
- ຮຽນປະທານສະພາແຫ່ງຊາດ, ຂໍໃຫ້ທ່ານແບ່ງປັນຄວາມຄິດເຫັນກ່ຽວກັບຜົນງານອັນພົ້ນເດັ່ນໃນປີທີສອງຂອງສະໄໝສະພາແຫ່ງຊາດ ຊຸດທີ XIV?
ປະທານສະພາແຫ່ງຊາດ ຫງວຽນທິກີມເງິນ: ປີໃໝ່ກໍ່ແມ່ນໂອກາດດີ ເພື່ອໃຫ້ພວກເຮົາພ້ອມກັນຫັນຄືນເບິ່ງບັນດາຜົນງານທີ່ບັນລຸໄດ້ໃນປີທີ່ຜ່ານມາ ແລະຖອດຖອນເອົາບົດຮຽນອັນລ້າຄ່າຕ່າງໆ.
ໃນຮູບພາບລວມຂອງປະເທດໃນປີ 2017, ທັງໝົດ 13 ຄາດໝາຍແຜນການພັດທະນາເສດຖະກິດ-ສັງຄົມ ທີ່ສະພາແຫ່ງຊາດວາງອອກມານັ້ນ ລ້ວນແຕ່ບັນລຸ ແລະບັນລຸເກີນລະດັບຄາດໝາຍ; ລວມຍອດຜະລິດຕະພັນທົ່ວປະເທດ (ຈີດີພີ) ປີ 2017 ບັນລຸລື່ນລະດັບຄາດໝາຍທີ່ວາງໄວ້, ເພີ່ມຂຶ້ນ6,81% ທຽບໃສ່ກັບປີ 2016 - ແມ່ນລະດັບສູງສຸດນັບແຕ່ປີ 2011 ມາຮອດປັັັັັັດຈຸບັນ. ບັນດາຜົນງານເຫຼົ່ານີ້ໄດ້ສ້າງທ່າ ແລະກຳລັງແຮງໃຫ້ແກ່ປີ 2018 ແລະຊຸມປີຕໍ່ໄປ.
ປີ 2017, ໃນການເຄື່ອນໄຫວດ້ານນິຕິບັນຍັດ, ໂດຍຜ່ານກອງປະຊຸມເທື່ອທີ 3 ແລະເທື່ອທີ 4, ສະພາແຫ່ງຊາດໄດ້ຮັບຮອງເອົາກົດໝາຍເປັນຈຳນວນ 18 ສະບັບ ແລະ ປະກອບຄຳຄິດເຫັນສຳລັບຮ່າງກົດໝາຍເປັນຈຳນວນ 15 ສະບັບ; ຈັດຕັ້ງເປັນຢ່າງດີການຊັກຖາມແລະຕອບຂໍ້ຊັກຖາມ ດ້ວຍຫຼາຍໝວດບັນຫາແທດຈິງ ຖືກເໝາະກັນພາກຕົວຈິງ.
ເປັນເທື່ອທຳອິດທີ່ສະພາແຫ່ງຊາດໄດ້ດຳເນີນການຕິດຕາມກວດກາຂັ້ນສູງສຸດ ຕໍ່ການປະຕິບັດນະໂຍບາຍ, ກົດໝາຍກ່ຽວກັບການຈັດຕັ້ງກົງຈັກບໍລິຫານແຫ່ງລັດ.
ການຕິດຕາມກວດກາສະເພາະຂອງສະພາແຫ່ງຊາດໄດ້ຊີ້ແຈ້ງບັນດາສິ່ງກີດຂວາງຕໍ່ຂະບວນວິວັດການປະຕິຮູບ, ວາງອອກບັນດາມາດຕະການອັນຄົບຊຸດ ເພື່ອປະຕິຮູບກົງຈັກບໍລິຫານແຫ່ງລັດ ຢ່າງເດັດດ່ຽວກວ່າອີກ, ມີປະສິດທິຜົນກ່ວາອີກ ໃນໄລຍະຕໍ່ໄປ.
ບົນພື້ນຖານຜົນສຳເລັດຂອງການຕິດຕາມກວດກາ, ສະພາແຫ່ງຊາດໄດ້ມີການຮັບຮອງເອົາມະຕິ ວ່າດ້ວຍການສືບຕໍ່ປະຕິຮູບກົງຈັກບໍລິຫານແຫ່ງລັດ ໃຫ້ກະທັດລັດ ແລະເຄື່ອນໄຫວຢ່າງມີຄວາມສັກສິດ ມີປະສິດທິຜົນ.
ເນື້ອໃນຂອງມະຕິດັ່ງກ່າວເປັນການຫັນເປັນນິຕິກຳ ຕໍ່ມະຕິສະບັບທີ 18-NQ/TW ຂອງກອງປະຊຸມຄະນະບໍລິຫານງານສູນກາງພັກ ຄັ້ງທີ 6 ສະໄໝທີ XII ວ່າດ້ວຍບາງບັນຫາກ່ຽວກັບການສືບຕໍ່ປ່ຽນແປງໃໝ່, ຊັບຊ້ອນຈັດຕັ້ງກົງຈັກຂອງລະບົບການເມືອງ ໃຫ້ກະທັັັັັັດລັດ, ເຄື່ອນໄຫວໃຫ້ມີຄວາມສັກສິດ ມີປະສິດທິຜົນ, ສ້າງພື້ນຖານໃຫ້ແກ່ຂະບວນວິວັດການສືບຕໍ່ປ່ຽນແແປງໃໝ່ ແລະປະຕິຮູບການຈັດຕັ້ງກົງຈັກແຫ່ງລັດໃນເວລາສະເພາະໜ້າ.
ຄຽງຂ້າງນັ້ນ, ຫຼາຍຫົວຂໍ້ຕິດຕາມກວດກາສະເພາະ ຂອງສະພາແຫ່ງຊາດ, ຄະນະກຳມະການປະຈຳສະພາແຫ່ງຊາດ ໄດ້ປະຕິບັດໃນປີສຳລັບບັນດາບັນຫາທີ່ເກີດຂຶ້ນໃນສັງຄົມ ກໍ່ໄດ້ຮັບການຕີລາຄາສູງຈາກຜູ້ມີສິດເລືອກຕັ້ງ ແລະປະຊາຊົນໃນທົ່ວປະເທດ, ຄືການຕິດຕາມກວດກາກ່ຽວກັບ “ການປະຕິບັດນະໂຍບາຍ ກົດໝາຍກ່ຽວກັບຄວາມປອດໄພດ້ານສະບຽງອາຫານ ໄລຍະ 2011-2016”, “ການປະຕິບັດນະໂຍບາຍ ກົດໝາຍກ່ຽວກັບການລົງທຶນ ແລະຂຸດຄົ້ນບັນດາໂຄງການຄົມມະນາຄົມຕາມແບບສັນຍາກໍ່ສ້າງ-ທຸລະກິດ-ມອບໂອນ (BOT)”...
ໂດຍຜ່ານຜົນສຳເລັດຂອງການຕິດຕາມກວດກາ, ສະພາແຫ່ງຊາດ, ຄະນະກຳມະການປະຈຳສະພາແຫ່ງຊາດ ລ້ວນແຕ່ໄດ້ປະກາດໃຊ້ມະຕິ ເພື່ອສ້າງພື້ນຖານນິຕິທຳໃຫ້ແກ່ການແກ້ໄຂບັນດາຂໍ້ຈຳກັດ ສິ່ງຄົງຄ້າງ ຈຸດອອ່ນ, ຍູ້ແຮງການປະຕິບັດນະໂຍບາຍ ກົດໝາຍ ແລະ ກໍ່ເປັນພື້ນຖານອັນສຳຄັນເພື່ອໃຫ້ສະພາແຫ່ງຊາດ, ຄະນະກຳມະການປະຈຳສະພາແຫ່ງຊາດ ສືບຕໍ່ກວດກາຕິດຕາມເນື້ອໃນນີ້. ບັນດາເນື້ອໃນເຫຼົ່ານີ້ ໄດ້ການດຶງດູດຄວາມເອົາໃຈໃສ່ແບບພິເສດ ຂອງຜູ້ມີສິດເລືອກຕັ້ງໃນທົ່ວປະເທດ.
ໃນປີ 2017, ສະພາແຫ່ງຊາດກໍ່ໄດ້ມີການປຶກສາສົນທະນາ, ຊັ່ງຊາຢ່າງມີຄວາມລະມັດລະວັງ, ພິຈາລະນາຢ່າງພາວະວິໄສ ຮອບດ້ານ ເພື່ອຮັບຮອງເອົາຫຼາຍໂຄງການ ຂໍ້ຕົກລົງທີ່ສຳຄັນສຳລັບປະເທດ, ໃນນັ້ນມີບັນດານະໂຍບາຍບຸກທະລຸ, ທີ່ມີຜົນສະທ້ອນແຮງເຖິງການພັດທະນາເສດຖະກິດ-ສັງຄົມຂອງປະເທດ, ຄື ແຜນນະໂຍບາຍລົງທຶນໂຄງການກໍ່ສ້າງທາງດ່ວນບາງເສັ້ນ ໃນສາຍທາງເໜືອ - ໃຕ້ ຢູ່ທິດຕາເວັນອອກ ໃນຊຸມປີ 2017-2020; ບົດລາຍງານກ່ຽວກັບການຄົ້ນຄວ້າຄວາມສາມາດປະຕິບັດໂຄງການກູ້ຄືນທີ່ດິນ, ການຊົດເຊີຍ, ການຊ່ວຍເຫຼືອ ແລະການຕັ້ງຖິ່ນຖານໃໝ່ ຂອງສະໜາມບິນສາກົນ ລອງແທ່ງ; ທົດລອງກົນໄກ ນະໂຍບາຍສະເພາະກ່ຽວກັບການພັດທະນານະຄອນ ໂຮ່ຈີມິນ; ທົດລອງການແກ້ໄຂໜີ້ເສຍຂອງບັນດາອົງການຈັດຕັ້ງສິນເຊື່ອ... ນອກຈາກນີ້, ສະພາແຫ່ງຊາດ, ຄະນະກຳມະການປະຈຳສະພາແຫ່ງຊາດ ກໍ່ໄດ້ມີການພິຈາລະນາ, ຕົກລົງຫຼາຍເນື້ອໃນກ່ຽວກັບວຽກງານບຸກຄະລາກອນ, ຄື ອະນຸມັດການຍົກເລີກຫຼືແຕ່ງຕັ້ງສະມາຊິກຂອງລັດຖະບານ; ຕົກລົງປົດຕຳແໜ່ງ, ຢຸດຕິຊົ່ວຄາວການປະຕິບັດວຽກງານແລະອຳນາດ ຂອງສະມາຊິກສະພາແຫ່ງຊາດ ໃນບາງກໍລະນີທີ່ຈຳເປັນ...
ການປ່ຽນແປງໃໝ່ວິທີການປຶກສາສົນທະນາກ່ຽວກັບບັນດາຮ່າງກົດໝາຍ, ກ່ຽວກັບເສດຖະກິດ - ສັງຄົມ ແລະງົບປະມານແຫ່ງລັດ, ກ່ຽວກັບບົດລາຍງານຂອງອົົົງການຮັບຜິດຊອບຕ່າງໆ, ເພີ່ມເວລາດຳເນີນການປຶກສາສົນທະນາທີ່ຫ້ອງປະຊຸມ, ເພີ່ມທະວີລັກສະນະສົນທະນາແລະໂຕ້ວາທີ, ພ້ອມກັບການຈັດຕັ້ງກອງປະຊຸມຄົບຄະນະຂອງສະພາແຫ່ງຊາດທີ່ຫ້ອງປະຊຸມໃຫຍ່ ໂດຍມີການກະຈາຍສຽງແລະຖ່າຍທອດໂທລະພາບສົດຫຼາຍຄັ້ງໃນປີທີ່ຜ່ານມາ ກໍ່ໄດ້ຮັບການຕີລາສູງຈາກຜູ້ມີສິດເລືອກຕັ້ງແລະປະຊາຊົນທົ່ວປະເທດ.
ສິ່ງເຫຼົ່ານັ້ນໄດ້ສ້າງຄວາມສະໜິດຕິດພັນຢ່າງແໜ້ນແຟ້ນລະຫວ່າງການເຄື່ອນໄຫວຂອງສະພາແຫ່ງຊາດກັບຜູ້ມີສິດເລືອກຕັ້ງ, ສ້າງເງື່ອນໄຂໃຫ້ປະຊາຊົນທຸກຄົນຕິດຕາມແລະປະກອບຄຳຄິດເຫັນທີ່ຈິງໃຈ ມີຄວາມຮັບຜິດຊອບຕໍ່ສະພາແຫ່ງຊາດ.
ອາດຈະເຫັນໄດ້ວ່າ, ຜ່ານບັນດາກອງປະຊຸມຂອງສະພາແຫ່ງຊາດຊຸດທີ XIV, ມາຮອດປະຈຸບັນນີ້, ສະມາຊິກສະພາແຫ່ງຊາດແຕ່ລະຄົນໄດ້ເປັນເຈົ້າການໃນການເກັບກຳ ຊອກຮູ້ສະພາບຊີວິດການເປັນຢູ່ຂອງປະຊາຊົນ, ກໍ່ຄືຄວາມຄິດຈິດໃຈ ຄວາມມຸ່ງມາດປາຖະໜາຂອງຜູ້ມີສິດເລືອກຕັ້ງຫຼາຍກວ່າເກົ່າ, ຈາກນັ້ນເຮັດໃຫ້ເນື້ອໃນຄຸນນະພາບຂອງກອງປະຊຸມສະພາແຫ່ງຊາດໄດ້ຮັບການຍົກສູງຂຶ້ນຢ່າງຈະແຈ້ງ.
ສິ່ງດັ່ງກ່າວໄດ້ສະແດງໃນກອງປະຊຸມສະໄໝສາມັນເທື່ອທີ່ 3, ເທື່ອທີ່ 4, ບັນດາສະມາຊິກສະພາແຫ່ງຊາດໄດ້ມີການປຶກສາສົນທະນາຢ່າງຟົດຟື້ນ, ວິໄຈໄຈ້ແຍກຢ່າງລອບຄອບ ແລະປັບປຸງຄວາມຄິດເຫັນທີ່ເໝາະສົມຫຼາຍຢ່າງ ເຂົ້າໃນບັນດາບົດລາຍງານຕີລາຄາຜົນສຳເລັດກ່ຽວກັບວຽກງານປີ 2017 ຂອງລັດຖະບານແລະບັນດາອົງການ, ກໍ່ຄືບັນດາບົດລາຍງານກ່ຽວກັບຜົນສຳເລັດການຕິດຕາມກວດກາຂອງສະພາແຫ່ງຊາດ ແລະການສະເໜີມາດຕະການຕ່າງໆ ກ່ອນການຮັບຮອງເອົາບັນດາມະຕິຂອງສະພາແຫ່ງຊາດ.
ໃນປີ 2017, ສະພາບການເສດຖະກິດ-ສັງຄົມຂອງປະເທດເຮົາ ຄຽງຄູ່ກັບຜົນສຳດລັດທີ່ບັນລຸໄດ້ ກໍ່ຍັງມີຄວາມຫຍຸ້ງຍາກ ສິ່ງທ້ານທາຍຫຼາຍຢ່າງ, ພິເສດແມ່ນຜົນສະທ້ອນຂອງການປ່ຽນແປງດິນຟ້າອາກາດທີ່ນັບມື້ນັບຮ້າຍແຮງ, ໄພນ້ຳຖ້ວມເກີດຂຶ້ນເລື້ອຍ ແລະແກ່ຍາວຮອດທ້າຍປີ...
ໃນຂະບວນວິວັດແຫ່ງການກະກຽມກອງປະຊຸມສະພາແຫ່ງຊາດ, ບັນດາສະມາຊິກສະພາແຫ່ງຊາດໄດ້ໄປພົບປະກັບຜູ້ມີສິດເລືອກຕັ້ງ ແລະຮັບຟັງ ເກັບກຳເອົາຄວາມຄິດເຫັນອັນລ້ຳຄ່າຂອງຜູ້ມີສິດເລືອກຕັ້ງແລະປະຊາຊົນ. ສະມາຊິກສະພາແຫ່ງຊາດບໍ່ພຽງແຕ່ພົບປະກັບຜູ້ມີສິດເລືອກຕັ້ງ ປະຊາຊົນຢູ່ພາຍໃນປະເທດເທົ່ານັ້ນ, ຫາກບາງທ່ານ ໃນເວລາໄປເຮັດວຽກຢູ່ຕ່າງປະເທດ ຍັງໄດ້ຍາດແຍ່ງເວລາເພື່ອໂອ້ລົມ, ຮັບຟັງ ຈົດກ່າຍຄວາມຄິດເຫັນ, ຄວາມມຸ່ງມາດປາດຖະໜາ, ຂໍ້ສະເໜີຂອງຊຸມຊົນຊາວຫວຽດນາມຢູ່ຕ່າງປະເທດ.
ຄວາມຄິດເຫັນ, ຂໍ້ສະເໜີຂອງພໍ່ແມ່ປະຊາຊົນເປັນພາກຕົວຈິງທີ່ຊີວິດຊີວານັ້ນ ໄດ້ປະກອບສ່ວນຊ່ວຍໃຫ້ສະມາຊິກສະພາແຫ່ງຊາດ ໃນການເຄື່ອນໄຫວຂອງຕົນເອງ, ໃນເວລາພິຈາລະນາຮັບຮອງເອົາກົດໝາຍ ຫຼືຕົກລົງບັນດາບັນຫາສຳຄັນ ເຊິ່ງຈະມີຂໍ້ມູນຂ່າວສານຈຳນວນຫຼາຍເພື່ອພິຈາລະນາຮັບປະກັນຄຸນນະພາບ ແລະຄວາມສາມາດປະຕິບັດໄດ້ສູງກວ່າ...
ພາກຕົວຈິງໄດ້ໃຫ້ເຫັນວ່າ, ປະຊາຊົນເປັນກຳລັງແຮງແລະແຮງຜັດດັນເພື່ອໃຫ້ສະພາແຫ່ງຊາດເຄື່ອນໄຫວນັບມື້ນັບມີປະສິດທິຜົນ. ນັ້ນກໍ່ແມ່ນພື້ນຖານເພື່ອໃຫ້ສະພາແຫ່ງຊາດສືບຕໍ່ຍົກສູງຄຸນນະພາບ, ປະສິດທິຜົນຂອງວຽກງານນິຕິບັນຍັດ ຕິດຕາມກວດກາ ແລະ ຕົກລົງບັນດາບັນຫາທີ່ສຳຄັນຂອງປະເທດ.
- ຮຽນທ່ານປະທານສະພາແຫ່ງຊາດ, ພ້ອມກັບບັນດາໜ້າທີ່ຈຸດໜັກໃຈກາງທີ່ໄດ້ວາງໄວ້, ສະພາແຫ່ງຊາດຈະເສີມຂະຫຍາຍບັນດາຜົນງານທີ່ບັນລຸໄດ້ໃນປີທີ່ຜ່ານມາຄືແນວໃດ?
ປະທານສະພາແຫ່ງຊາດ ຫງວຽນທິກີມເງິນ: ປີ 2018 ເປັນປີສືບຕໍ່ຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັັກກອມມູນິດຫວຽດນາມ ແລະ ໂຄງການຂອງສະພາແຫ່ງຊາດຊຸດທີ XIV. ທົ່ວພັກ ທົ່ວປວງຊົນ ທົ່ວກອງທັບ ພ້ອມກັບລະບົບການເມືອງທັງໝົດກຳລັງເຂົ້າຍຮ່ວມດ້ວຍຄວາມຕັດສິນໃຈການເມືອງສູງທີ່ສຸດ, ແນໃສ່ພັດທະນາເສດຖະກິດ-ສັງຄົມ, ປັບປຸງ ເພີ່ມທະວີການປ້ອງກັນຊາດ, ປ້ອງກັນຄວາມສະຫງົບ, ການພົວພັນຕ່າງປະເທດ ແລະ ປ້ອງກັນແລະຕ້ານການສໍ້ລາດບັງຫຼວງ ຕ້ານຄວາມຫຍໍ້ທໍ້ອະນາຈານ.
ກ່ຽວກັບຕົນເອງ, ບົນຈິດໃຈປ່ຽນແປງໃໝ່, ປະດິດສ້າງ ແລະ ປະຕິບັດເປັນປະຈຳເພື່ອຜົນປະໂຫຍດຂອງປະຊາຊົນ ຂອງຊາດ, ສະພາແຫ່ງຊາດໄດ້ ພວມ ແລະ ຈະສືບຕໍ່ນາມະພະຍາຍາມກວ່າອີກ, ສູ້ຊົນສຳເລັດເປັນຢ່າງດີບັນດາໜ້າທີ່ ເປົ້າໝາຍທີ່ໄດ້ວາງໄວ້ໃນປີ 2018; ໃນນັ້ນເອົາໃຈໃສ່ປະຕິບັດໃຫ້ໄດ້ເປັນຢ່າງດີ ໂຄງການກໍ່ສ້າງກົດໝາຍ ກົດດຳລັດ, ໂຄງການຕິດຕາມກວດກາ ປີ 2018 ແລະ ກໍ່ສ້າງບັນດາໂຄງການປີ 2019 ທີ່ຕິດແທດກັບພາກຕົວຈິງ, ຮັບປະກັນຄວາມຊັດເຈັນ ແລະ ຖືກກັບບັນດາບັນຫາທີ່ຊີວິດວາງອອກ; ຈັດຕັ້ງການເອົາຄະແນນສຽງໄວ້ວາງໃຈຕໍ່ບັນດາຕຳແໜ່ງ ໂດຍສະພາແຫ່ງຊາດແຕ່ງຕັ້ງ, ໃຫ້ສັດຕະຍາບັນຕາມກຳນົດ.
ໜ້າທີ່ໂດຍລວມແມ່ນແນວນັ້ນ, ດັ່ງນັ້ນ ສະມາຊິກສະພາແຫ່ງຊາດແຕ່ລະທ່ານ ບົນພື້ນຖານໜ້າທີ່ຂອງຕົນ, ພ້ອມກັນທົບທວນຄືນບັນດາດ້ານຕັ້ງໜ້າເພື່ອເສີມຂະຫຍາຍ ແລະ ຈຳກັດແກ້ໄຂຂໍ້ບົກພ່ອງ ເພື່ອກຳນົດທິດເຄື່ອນໄຫວທີ່ມີປະສິດທິຜົນກວ່າອີກ.
ອາດຈະເຫັນໄດ້ວ່າ, ໃນບັນດາກອງປະຊຸມສະພາແຫ່ງຊາດ, ຫຼາຍບັນຫາຂອງຊີວິດສັງຄົມເວົ້າລວມ, ຫຼືຈຸດພິເສດຂອງແຕ່ລະພາກເຂດເວົ້າສະເພາະ, ເມື່ອທີ່ໄດ້ຍົກຂຶ້ນມາກໍ່ລ້ວນແຕ່ໄດ້ຮັບການພິຈາລະນາ, ປຶກສາຫາລືຢ່າງລະອຽດ.
ດັ່ງນັ້ນ, ສະມາຊິກສະພາແຫ່ງຊາດແຕ່ລະຄົນຕ້ອງຍູ້ແຮງການພົວພັນຢ່າງແໜ້ນແຟ້ນກັບຜູ້ມີສິດເລືອກຕັ້ງ ແລະປະຊາຊົນ. ບັນດາສະມາຊິກສະພາແຫ່ງຊາດ, ບັນດາອົງການຂອງສະພາແຫ່ງຊາດຕ້ອງສືບຕໍ່ເສີມຂະຫຍາຍສະຕິບັນຍາ, ຮັບຟັງຄວາມຄິດເຫັນຂອງຜູ້ມີສິດເລືອກຕັ້ງ, ຂອງຜູ້ຊ່ຽວຊານ ແລະ ປະຊາຊົນທຸກຊົນຊັ້ນ ເພື່ອໃຫ້ການພິຈາລະນາ, ສົນທະນາຮັບຮອງເອົາຮ່າງກົດໝາຍ ໄດ້ຮັບຄຸນນະພາບສູງ ແລະຮັບປະກັນປະຕິບັດໄດ້.
ພ້ອມກັນນັ້ນ, ສະມາຊິກສະພາແຫ່ງຊາດແຕ່ລະຄົນກໍ່ຕ້ອງສະແດງທັດສະນະການເມືອງ, ເວົ້າເຖິງເຈດຈຳນົງ ຄວາມມຸ່ງມາດປາຖະໜາຂອງຜູ້ມີສິດເລືອກຕັ້ງຢູ່ທ້ອງຖິ່ນທີ່ເປັນຜູ້ເລືອກຕັ້ງຕົນເອງ ແລະ ປະຊາຊົນທົ່ວປະເທດ, ຊາວຫວຽດນາມຢູ່ຕ່າງປະເທດ.
ໃນຄວາມເປັນຈິງ, ການຊັກຖາມແມ່ນການເຄື່ອນໄຫວຕິດຕາມກວດກາໂດຍກົງທີ່ສຳຄັນພິເສດ, ສະແດງໃຫ້ເຫັນເຖິງສິດອຳນາດຂອງອົງການໂດຍປະຊາຊົນເລືອກຕັ້ງ ແລະ ຄວາມຮັບຜິດຊອບຂອງບັນດາຜູ້ແທນໂດຍປະຊາຊົນເລືອກຕັ້ງທີ່ມີຕໍ່ຜູ້ມີສິດເລືອກຕັ້ງຂອງຕົນເອງ, ພ້ອມກັນນັ້ນກໍ່ກຳນົດຢ່າງຈະແຈ້ງຄວາມຮັບຜິດຊອບຂອງຜູ້ເປັນຫົວໜ້າອົງການປະຕິບັດແລະບັງຄັບໃຊ້ກົດໝາຍ. ນີ້ແມ່ນສິດທັງເປັນຄວາມຮັບຜິດຊອບຂອງສະມາຊິກສະພາແຫ່ງຊາດແຕ່ລະຄົນ ຕໍ່ຜູ້ມີສິດດເລືອກຕັ້ງແລະປະຊາຊົນ.
ຈາກການສ່ອງແສງຂອງສື່ມວນຊົນໃຫ້ເຫັນວ່າ, ຜູ້ມີສິດເລືອກຕັ້ງຫຼາຍຄົນມີຄວາມສົນໃຈທີ່ສຸດກັບການເຄື່ອນໄຫວຊັກຖາມຂອງສະພາແຫ່ງຊາດ ແລະ ໃຫ້ທັດສະນະວ່າ, ໃນການຊັກຖາມຂອງສະມາຊິກສະພາແຫ່ງຊາດໄດ້ຍົກບັນຫາຢ່າງລະອຽດກົງໄປກົງມາ, ເວົ້າເຖິງບັນດາບັນຫາເຄັ່ງຮ້ອນຂອງປະເທດ, ຕິດແທດກັບຊີວິດການເປັນຢູ່ຂອງປະຊາຊົນ. ສະພາແຫ່ງຊາດໄດ້ວາງມາດຕະການແລະທິດແກ້ໄຂຢ່າງລະອຽດຄົບຖ້ຽນ.
ດັ່ງນັ້ນ, ການເຄື່ອນໄຫວນີ້ຈະສືບຕໍ່ໄດ້ຮັບການພິຈາລະນາເພື່ອມີການປ່ຽນແປງໃໝ່ຍິ່ງກວ່າອີກ ເພື່ອສະແດງຄວາມຮັບຜິດຊອບຂອງສະທາຊິກສະພາແຫ່ງຊາດ, ຕອບສະໜອງຄວາມມຸ່ງມາດປາຖະໜາຂອງຜູ້ມີສິດເລືອກຕັ້ງ ແລະປະຊາຊົນທົ່ວປະເທດ, ປະກອບສ່ວນເຂົ້າໃນການເພີ່ມທະວີຄວາມເຊື່ອໝັ້ນຂອງປະຊາຊົນ.
-ປະທານສະພາແຫ່ງຊາດອາດຈະແບ່ງປັນກ່ຽວກັບວຽກງານພົວພັນຕ່າງປະເທດຂອງສະພາແຫ່ງຊາດໃນເວລາທີ່ຈະມາເຖິງ?
ປະທານສະພາແຫ່ງຊາດ ຫງວຽນທິກີມເງິນ: ປີ 2017 ໄດ້ຂີດໝາຍບັນດາຜົນສຳລັດທີ່ພົ້ນເດັ່ນໃນວຽກງານການຕ່າງປະເທດລັດຖະສະພາ, ທັງທາງດ້ານສອງຝ່າຍ ແລະ ຫຼາຍຝ່າຍ.
ກ່ຽວກັບການເຄື່ອນໄຫວພົວພັນທາງການທູດລັດຖະສະພາສອງຝ່າຍ, ພວກເຮົາໄດ້ຕ້ອນຮັບຄະນະການນຳຂັ້ນສູງຂອງສະພາແຫ່ງຊາດ/ລັດຖະສະພາບັນດາປະເທດ ເປັນຫຼາຍຄະນະທີ່ສຸດນັບແຕ່ເມື່ອກ່ອນມາຮອດປັດຈຸບັນ; ພ້ອມນັ້ນ ຄະນະຜູ້ແທນຂັ້ນສູງສະພາແຫ່ງຊາດຫວຽດນາມແລະຂັ້ນຕ່າງໆ ກໍ່ໄດ້ໄປຢ້ຽມຢາມຢ່າງເປັນທາງການ, ຢ້ຽມຢາມເຮັດວຽກ... ທີ່ປະເທດຈຳນວນໜຶ່ງໃນໂລກ.
ອາດຈະເຫັນໄດ້ວ່າ, ໃນບັນດາການພົບປະສອງຝ່າຍ, ສະພາແຫ່ງຊາດຫວຽດນາມໄດ້ຮັບການຕີລາຄາສູງຈາກຜູ້ນຳຂອງອົງການນິຕິບັນຍັດຂອງປະເທດຕ່າງໆ.
ເນື້ອໃນການເຮັດວຽກລ້ວນແຕ່ມີຄວາມຖືກຕ້ອງເປັນຈິງ, ໃນນັ້ນມີກາຕີລາຄາດ້ານດີ ແລະດ້ານອ່ອນ, ພ້ອມກັບບັນດາບັນຫາທີ່ຕ້ອງສືບຕໍ່ສົນທະນາເພື່ອຊຸກຍູ້ການຮ່ວມມື. ການຢ້ຽມຢາມໄດ້ເປີດໂອກາດຮ່ວມມືໃໝ່ລະຫວ່າງຫວຽດນາມກັບບັນດາປະເທດໃນເວລາຕໍ່ໄປ.
ສິ່ງທີ່ພົ້ນເດັ່ນໃນການເຄື່ອນໄຫວພົວພັນທາງການທູດລັດຖະສະພາຫຼາຍຝ່າຍ ແມ່ນສະພາແຫ່ງຊາດຫວຽດນາມໄດ້ເຂົ້າຮ່ວມສະມັດຊາໃຫຍ່ສະຫະພັນລັດຖະສະພາໂລກຄັ້ງທີ 137 (IPU-137) ທີ່ນະຄອນ ເຊນປີເຕີສະເບິກ, ສະຫະພາບລັດເຊຍ; ໄດ້ສົມທົບກັບສະຫະພັນລັດຖະສະພາໂລກ (IPU) ຈັດຕັ້ງກອງປະຊຸມສະເພາະຂອງນັກກົດໝາຍໃນອາຊີ - ປາຊີຟິກ ທີ່ນະຄອນໂຮ່ຈິມິນ ພາຍໃຕ້ຫົວຂໍ້ກ່ຽວກັບການຈຳກັດຜົນກະທົບຂອງການປ່ຽນແປງດິນຟ້າອາກາດ.
ຈາກການເຄື່ອນໄຫວເຫຼົ່ານີ້, ປະທານ IPU ແລະເພື່ອນມິດສາກົນ ໄດ້ມີການສັງເກດຕີລາຄາສູງ ຕໍ່ສະພາແຫ່ງຊາດຫວຽດນາມ ເຊິ່ງຍາມໃດກໍ່ເປັນສະມາຊິດທີ່ຕັ້ງໜ້າ, ມີຄວາມຮັບຜິດຊອບ, ປະກອບສ່ວນຕົວຈິງທີ່ສຳຄັນໃຫ້ແກ່ສະຫະພັນລັດຖະສະພາໂລກ ແລະ ມີຜົນສະທ້ອນແຜ່ລາມ.
ສືບຕໍ່ຜົນສຳເລັດໃນປີ 2017, ແຕ່ວັນທີ 18 ຫາ 21 ມັງກອນ 2018, ສະພາແຫ່ງຊາດຫວຽດນາມໄດ້ຈັດຕັ້ງກອງປະຊຸມປະຈຳປີຄັ້ງທີ 26 ເວທີປາໄສລັດຖະສະພາອາຊີ - ປາຊີຟິກ (APPF-26) ພາຍໃຕ້ຫົວຂໍ້ “ການພົວພັນຄູ່ຮ່ວມມືລັດຖະສະພາເພື່ອສັນຕິພາບ ປະດິດສ້າງ ແລະ ພັດທະນາແບບຍືນຍົງ” ເຊິ່ງໄດ້ການຕີລາຄາສູງຈາກບັນດາສະມາຊິກລັດຖະສະພາປະເທດຕ່າງໆ
ກອງປະຊຸມມີຄວາມໝາຍສຳຄັນ, ເປັນການກະທຳຕົວຈິງຂອງລັດຖະສະພາ, ສະມາຊິກລັດຖະສະພາປະເທດຕ່າງໆ ທີ່ສະໜັບສະໜູນຖະແຫຼງການ ດ່າໜັງ ກ່ຽວກັບ “ສ້າງແຮງຜັດດັນໃໝ່, ພ້ອມກັນເພີ່ມພູນຄູນສ້າງອະນາຄົດຮ່ວມກັນ” ເຊິ່ງກອງປະຊຸມຂັ້ນສຸດຍອດອາຊີ-ປາຊີຟິກ ຄັ້ງທີ 25 ໄດ້ຮັບຮອງເອົາ.
ການເຄື່ອນໄຫວພົວພັນການຕ່າງປະເທດຂອງສະພາແຫ່ງຊາດພ້ອມກັບການເຄື່ອນໄຫວພົວພັນການຕ່າງປະເທດຂອງພັກ, ລັດ ແລະການພົວພັນຕ່າງປະເທດປະຊາຊົນ ໄດ້ສ້າງທ່າຂາຕັ້ງທີ່ໝັ້ນຄົງ, ປະກອບສ່ວນເຂົ້າໃນການສ້າງສະພາບແວດລ້ອມສາກົນທີ່ສະດວກດີໃຫ້ແກ່ການພັດທະນາຂອງປະເທດ, ປົກປັກຮັກສາຄວາມເປັນເອກະລາດ ອຳນາດອະທິປະໄຕ ແລະ ຜືນແຜ່ນດີນອັນຄົບຖ້ວນຂອງປະເທດຊາດ, ປັບປຸງຮູບພາບ ແລະຖານະບົດບາດສາກົນຂອງຫວຽດນາມ.
ດ້ວຍຄວາມຮັບຜິດຊອບຂອງສະມາຊິກສະພາແຫ່ງຊາດທີ່ເປັນຜູ້ແທນໂດຍປະຊາຊົນເປັນຜູ້ເລືອກຕັ້ງ, ຕາງໜ້າໃຫ້ເຈດຈຳນົງ ແລະຄວາມມຸ່ງມາດປາຖະໜາຂອງປະຊາຊົນ, ດັ່ງນັ້ນຕ້ອງຮັບຟັງ, ຕອບຄວາມຄິດຈິດໃຈ ຄວາມມຸ່ງມາດປາຖະໜາຂອງປະຊາຊົນ ແລະ ເວົ້າສຽງຂອງປະຊາຊົນ. ສິ່ງເຫຼົ່ານີ້ຖືກຖືເປັນພື້ນຖານ, ເຂັມທິດເຍືອງທາງໃນການເຄື່ອນໄຫວ ຂອງສະມາຊິກສະພາແຫ່ງຊາດແຕ່ລະຄົນເວົ້າສະເພາະ ແລະ ຂອງສະພາແຫ່ງຊາດເວົ້າລວມ ແລະ ເປັນໜ້າທີ່ສຳຄັນຍິ່ງ, ເປັນດ້າຍສີແດງສອດຫ້ອຍໃນຕະຫຼອດສະໄໝສະພາແຫ່ງຊາດ.
ປີ 2018 ເປັນປີທີສາມໃນສະໄໝສະພາແຫ່ງຊາດຊຸດທີ XIV, ພ້ອມກັນກັບບັນດາອົງການໃນກົງຈັກແຫ່ງລັດ, ສະພາແຫ່ງຊາດຈະສືບຕໍ່ປະຕິບັດການປ່ຽນແປງໃໝ່, ຍົກສູງຄຸນນະພາບການເຄື່ອນໄຫວ, ສູ້ຊົນກໍ່ສ້າງສະພາແຫ່ງຊາດໃຫ້ເປັນອົງການທີ່ມີຄວາມສາມັກຄີ ມີຫົວຄິດປະດິດສ້າງ ແລະ ຂະຫຍັນຂັນເຄື່ອນປະຕິບັດໜ້າທີ່ເພື່ອຜົນປະໂຫຍດຂອງປະຊາຊົນ.
ໃກ້ຈະເຂົ້າສູ່ປີໃໝ່, ຂ້າພະເຈົ້າສະແດງຄວາມຫວັງວ່າ ປະຊາຊົນ, ຜູ້ມີສິດເລືອກຕັ້ງທົ່ວປະເທດ ແລະ ພີ່ນ້ອງຮ່ວມຊາດເຮົາຢູ່ຕ່າງປະເທດ ຍາມໃດກໍ່ສາມັກຄີກັນ, ຮ່ວມແຮງຮ່ວມໃຈກັນປະກອບສ່ວນເຂົ້າໃນການກໍ່ສ້າງແລະພັດທະນາປະເທດ.
ລະດູບານໃໝ່ກຳລັງມາ, ຂ້າພະເຈົ້າຂໍຝາກຄຳອວຍພອນປີໃໝ່ເຖິງທຸກຄອບຄົວ, ປະຊາຊົນຫວຽດນາມທຸກຄົນຢູ່ໃນປະເທດ ແລະ ຊາວຫວຽດນາມຢູ່ຕ່າງປະເທດ ຂໍໃຫ້ທຸກຄົນຈົ່ງມີສຸຂະພາບເຂັ້ມແຂງ, ມີຄວາມສຸກ ແລະ ປະສົບຜົນສຳເລັດໃນທຸກໆຂົງເຂດຂອງຊີວິດ.
- ຂໍຂອບໃຈປະທານສະພາແຫ່ງຊາດ ຫງວຽນທິກີມເງິນ!
ແຫຼ່ງຂ່າວ: ສຳນັກຂ່າວສານຫວຽດນາມ