ວກ.ອອນ​ໄລ - ແບບ​ແຜນ, ວິທີ​ເຮັດ​ວຽກ​ແມ່ນ​ພາກສ່ວນ​ພື້ນຖານ​ໜຶ່ງ​ ທີ່​ປະກອບ​ເປັນ​ບຸກຄະ​ລິກກະພາບ​ຂອງ​ມະນຸດ, ​ແມ່ນ​ໜຶ່ງ​ໃນ​ບັນດາ​ອົງ​ປະກອບ​ສຳຄັນ​ທີ່ສ່ອງ​ແສງ​ຄຸນ​ນະພາ​ບຂອງ​ພະນັກງານ​ນຳພາ, ຄຸ້ທຄອງ. ​ເພາະສະ​ນັ້ນ, ກໍ່ສ້າງແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ, ມື​ອາຊີບ ຂອງ​ພະນັກງານ​ນຳພາ, ຄຸ້ມ​ຄອງ ​ແມ່ນ​ຄວາມ​ຮຽກຮ້ອງ​ຕ້ອງການ​ທີ່​ຮີບ​ດ່ວນ​ໃນ​ການ​ກໍ່ສ້າງ ປັບປຸງ​ພັກ.

ຄວາມ​ຮຽກຮ້ອງ​ຕ້ອງການ​ພາວະ​ວິ​ໄສ​ຕ້ອງ​ກໍ່ສ້າງແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ, ມື​ອາຊີບ ຂອງ​ຖັນ​ແຖວ​ພະນັກງານ​ນຳພາ, ຄຸ້ມ​ຄອງ​ໃນ​ເງື່ອນ​ໄຂ​ໃໝ່

ຄຸນ​ນະພາ​ບພະນັກງານ​ແມ່ນ​ການ​ສັງ​ລວມບັນດາ​ຄຸນ​ທາດ, ຄວາມ​ສາມາດ, ຄຸນຄ່າ, ສັບພະ​ຄຸນ​ທີ່​ບັນລຸ​ໄດ້​ຂອງ​ແຕ່ລະຄົນ ​ແລະ​ຂອງ​ທັງ​ຖັນ​ແຖວ​ພະນັກງານ, ​ໄດ້​ສະ​ແດງ​ອອກ​ໃນ​ລະດັບ​ສູງ​ຫຼື​ຕ່ຳ, ​ໃຕ້​ລະດັບ, ​ເທົ່າ​ກັບ​ລະດັບ ຫຼື ລື່ນ​ລະດັບ ທຽບ​ກັບຄວາມ​ຕ້ອງການ​ໜ້າ​ທີ່​ຂອງ​ການ​ປະຕິວັດ​ ທີ່​ວາງ​ອອກ​ມາ​ໃນ​ແຕ່ລະ​ເງື່ອນ​ໄຂ​ລະອຽດ. ແບບ​ແຜນ, ວິທີ​ເຮັດ​ວຽກ​ແມ່ນ​ພາກສ່ວນ​ໜຶ່ງ​ທີ່​ປະກອບ​ເປັນ​ຄຸນ​ນະພາ​ບຂອງ​ພະນັກງານ; ​ແມ່ນ​ຮູບ​ການ​ສ່ອງ​ແສງ​ເຖິງ​ຄຸນ​ທາດ​ການ​ເມືອງ​ແນວ​ຄິດ, ຄຸນສົມບັດ, ຄວາມ​ສາມາດ​ທີ່​ໄດ້​ຫັນປ່ຽນ​ເປັນ​ທັດສະ​ນະ​ຄະຕິ, ພຶດຕິ​ກຳ ​ແລະວິທີ​ປະຕິບັດ​ງານ​ຂອງ​ພະນັກງານ ​ແນ​ໃສ່​ບັນ​ລຸ​ປະສິດທິ​ຜົນ​ການ​ເຄື່ອນ​ໄຫວ​ດີ​ສຸດ. ​ເວົ້າ​ຢ່າງ​ອື່ນ, ແບບ​ແຜນ, ວິທີ​ເຮັດ​ວຽກ​ແມ່ນ​ຮູບ​ການສະ​ແດງ​ອອກ​ພາຍ​ນອກ​ຂອງ​ລວງ​ເລິກ​ແຫ່ງ​ແນວ​ຄິດ; ​ແມ່ນ​ເນື້ອ​ໃນ​ໜຶ່ງ​ຂອງ​ຈັນ​ຍາ​ບັນ​ການ​ງານ; ​ແມ່ນ​ເນື້ອ​ໃນ​ໜຶ່ງ​ຂອງ​ຄຸນສົມບັດ​ການ​ງານ; ​ແມ່ນ​ໄມ້​ຫຼາ​ວັດ​ແທກລະດັບ, ຄວາມ​ສາມາດ, ຄຸນ​ທາດ​ຂອງ​ພະນັກງານ​ໃນ​ການ​ເຄື່ອນ​ໄຫວ​ປະຈຳ​ວັນ. ບໍ່​ອາດ​ຈະ​ເວົ້າ​ວ່າ​ຜູ້​ໜຶ່ງ​ມີ​ແນວ​ຄິດ​ກ້າວ​ໜ້າ, ຄຸນສົມບັດດີ, ລະດັບ​ຄວາມ​ຮັບຮູ້ສູງ,... ຖ້າ​ຫາກທ່າ​ທີ່​ອອກ​ແຮງ​ງານ​ຂອງ​ຜູ້​ນັ້ນບໍ່​ດີ, ພຶດຕິ​ກຳ​ການ​ງານ​ຫຍໍ້​ທໍ້, ວິທີ​ເຮັດ​ວຽກ​ຫຼ້າ​ຫຼັງ.

​ແບບ​ແຜນ​ຂ​ອງພະນັກງານ ສະມາຊິກ​ພັກ​ມີ​ຄວາມ​ໝາຍ​ສ້າງ​ເປັນ​ວິທີ​ເຮັດ​ວຽກ​ຂອງອົງການ​ຈັດ​ຕັ້ງ, ​ແບບ​ວິທີ​ນຳພາ​ຂອງ​ພັກ, ຕັດສິນ​ສາຍ​ພົວພັນ​ລະຫວ່າງ​ພັກ​ກັບ​ປະຊາຊົນ ​ແລະ ປະສິດທິ​ຜົນ​ການ​ງານ​ໃນ​ພັກ... ​ເມື່ອ​ພະນັກງານ ສະມາຊິກ​ພັກອ່ອນ​ແອ​ທາງ​ດ້ານແບບ​ແຜນ, ວິທີ​ເຮັດ​ວຽກ ຈະ​ນຳ​ໄປ​ສູ່​ຜົນ​ກະທົບຫຼາຍ​ຢ່າງ, ມີ​ຄວາມ​ສ່ຽງ​ທີ່​ຈະ​ປ່ຽນ​ທາດ​ແທ້​ຂອງ​ພັກ, ຊ້ຳ​ບໍ່​ໜຳ ​ເປັນຜົນ​ກະທົບ​ເຖິງ​ການ​ດຳລົງ​ຄົງ​ຕົວ​ຂອງ​ພັກ​ແລະ​ຂອງ​ລະບອບ. ຄວາມ​ເປັນ​ຈິງ​ໃຫ້​ເຫັນ​ວ່າ, ພຽງ​ພະນັກງານ​ຄົນ​ໜຶ່ງ​ທີ່​ມີ​ທ່າທີ​ອາດຍາ​ສິດ, ກໍ່​ຄວາມ​ຫຍຸ້ງ​ເຫຍີງ, ໝິ່ນ​ປະ​ໝາດ​ມະຫານ​ຊົນ ກໍ່​ຈະ​ເປັນ​ຜົນ​ກະທົບ​ທາງ​ລົບ​ທັນທີ​ເຖິງກຽດ​ສັກ​ສີ​ຂອງ​ພັກ ​ແລະ​ອິດ​ທິພົນ​ຂອງ​ກົງ​ຈັກຄຸ້ມ​ຄອງ​ບໍລິຫານ​ລັດ, ​ເປັນ​ຕົ້ນ​ແມ່ນ​ໃນ​ເງື່ອນ​ໄຂສັງຄົມ​ຂໍ້​ມູນ​ຂ່າວສານ​ປະຈຸ​ບັນ. ດັ່ງ​ນັ້ນ, ການ​ກໍ່ສ້າງແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ, ມື​ອາຊີບ ​ບໍ່​ພຽງ​ແຕ່​ເປັນວິທີ​ແກ້​ໄຂ​ສະຖານະ​ການ​ເທົ່າ​ນັ້ນ ​ແຕ່​ຍັງ​ເປັນ​ກົດ​ເກນ​ພາວະ​ວິ​ໄສ​​ແຫ່ງ​ການ​ກໍ່ສ້າງ, ພັດ​ທະ​ນາ​ພັກ​ອີກ​ນຳ. ອາ​ໃສ​ສິ່ງ​ດັ່ງກ່າວນັ້ນ​ໄດ້​ເຮັດ​ໃຫ້​ພັກ​ນັບ​ມື້​ນັບ​ໝັ້ນ​ຄົງ​ເຂັ້ມ​ແຂງ, ສາ​ມາດ​ກີດ​ກັ້ນ​ຢ່າງ​ທັນ​ການ​ແລະ​ຍູ້​ຖອຍ​ຄວາມ​ສ່ຽງ, ໜໍ່​ແໜງ​ພະຍາດ​ທີ່​ອັນຕະລາຍ​ໃນ​ການຈັດ​ຕັ້ງ​ກົງຈັກ ​ແລະ​ໃນ​ຖັນ​ແຖວ​ພະນັກງານ.

ແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ ​ແລະ​ມື​ອາຊີບ​ ຕ້ອງການ​ທີ່​ສຸດສຳລັບ​ພະນັກງານທຸກ​ປະ​ເພດ, ທັງ​ພະນັກງານລະດັບ​ສູງ, ພະນັກງານ​ລະດັບ​ກາງ ​ແລະ ພະນັກງານຂັ້ນ​ຮາກ​ຖານ. ຢູ່​​ໃນ​ລະດັບ​ຍິ່ງສູງ, ຂອບ​ເຂດ​ກະທົບ​ຂອງ​ອຳນາດກໍ່​ຈະ​ຍິ່ງ​ກວ້າງ​ໃຫຍ່, ​ໃນ​ກໍລະນີ​ນັ້ນແບບ​ແຜນ, ວິທີ​ເຮັດ​ວຽກຂອງ​ພະນັກງານ​ບໍ່​ພຽງ​ແຕ່​ມີ​ຄວາມ​ໝາຍ​ຕໍ່​ແຕ່​ລະຄົນ ​ແຕ່​ຍັງ​ເປັນ​ຕົວ​ແທນ​ໃຫ້​ແກ່​ວັດທະນະທຳ​ນຳພາ​ຂອງອົງການ​ກຳ​ອຳນາດ. ຢູ່​ໃນ​ຂັ້ນ​ຮາກ​ຖານ, ຂອບ​ເຂດ​ກະທົບ​ຂອງ​ອຳນາດ​ເຖິງ​ວ່າ​ຖືກ​ຈຳກັດ​ໃນ​ພື້ນ​ທີ່​ລະອຽດ ​ແລະ​ໃນ​ວຽກ​ງານ​ທີ່​ແນ່ນ​ອນກໍ​ຕາມ, ​ແຕ່​ທຸກ​ການ​ເຄື່ອນ​ໄຫວ​ຂອງ​ພະນັກງານລ້ວນ​ແຕ່​ແຕະຕ້ອງ​ເຖິງ​ສິດຜົນປະ​ໂຫຍ​ດ, ຄວາມ​ຕ້ອງການ​ປະຈຳ​ວັນຂອງ​ປະຊາຊົນ, ສະ​ນັ້ນ​ຈຶ່ງ​ງ່າຍນທີ່​ຈະຖືກ​ການ​ກະທົບ​ຕອບ ​ແລະ​ເກີດ​ການ​ປະ​ທະ​ສັງຄົມ ຖ້າ​ຫາກ​ພະນັກງານມີ​ທ່າ​ທີ​ໂອ້​ອວດ​ທະ​ນົງ​ຕົວ, ອາດຍາ​ສິດ, ຂາດ​ຄວາມ​ນັບຖື​ປະຊາຊົນ, ​ໃຊ້​ວິທີ​ເຮັດ​ວຽກ​ຫຼ້າ​ຫຼັງ ມີ​ປະສິດທິ​ຜົນ​ຕ່ຳ. ກົງກັນຂ້າມ, ຖ້າ​ຫາກ​ພະນັກງານຮາກ​ຖານມີ​ທັດສະນະ​ຄະຕິ​ຖືກຕ້ອງ, ​ແບບ​ແຜນ​ປະຊາທິປະ​ໄຕ, ​ເຮັດ​ວຽກ​ຢ່າງ​ສຸດ​ອົກ​ສຸດ​ໃຈ ​ມີ​ຄວາມ​ຮັບຜິດຊອບ... ກໍ່​ງ່າຍ​ທີ່​ຈະ​ໄດ້​ຮັບ​ຄວາມ​ເຊື່ອ​ຖື ຮັກ​ແພງ​ຂອງ​ປະຊາຊົນ. ດັ່ງ​ນັ້ນ, ກໍ່ສ້າງແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ ​ແລະ​ມື​ອາຊີບ ​ແມ່ນໜ້າ​ທີ່​ສຳຄັນ​ໃນ​ການ​ກໍ່ສ້າງ​ຖັນ​ແຖວ​ພະນັກງານນຳພາ, ຄຸ້ມ​ຄອງ​ຂັ້ນ​ຕ່າງໆ​ຢູ່​ປະ​ເທດ​ເຮົາ​ໃນ​ປະຈຸ​ບັນ.

ກຳ​ເນີ​ດ​ໃນ​ສັງຄົມ​ກະສິກຳ​ນ້ອຍ, ບໍ່​ໄດ້​ຜ່ານ​ການຝຶກ​ຝົນ​ຫຼໍ່​ຫຼອມ​ໃນ​ສັງຄົມ​ອຸດສາຫະກຳ ​ແລະພື້ນຖານ​ບໍລິການ​ລະດັບ​ມື​ອາຊີບ, ຊ້ຳຍັງ​ຖືກ​ຜົນ​ກະທົບ​ຢ່າງ​ໜັກໜ່ວງ​ຂອງ​ກົນ​ໄກ​ເກື້ອກູນ​ລວມສູນ​ອາດຍາ​ສິດ, ດັ່ງ​ນັ້ນ ພະນັກງານ​ນຳພາ ຄຸ້ມ​ຄອງ​ພາກສ່ວນ​ໜຶ່ງ​ທີ່​ບໍ່​ໜ້ອຍ​ຂອງ​ປະ​ເທດ​ເຮົາ ຈຶ່ງ​ບໍ່​ຄຸ້ນເຄີຍ​ກັບແບບ​ແຜນ, ວິທີ​ເຮັດ​ວຽກ​ແບບ​ທັນ​ສະ​ໄໝ, ​ວິທະຍາສາດ, ປະຊາທິປະ​ໄຕ, ​ມື​ອາຊີບ. ຂໍ້​ຈຳກັດ​ລວມ​ໃນ​ແບບ​ແຜນ, ວິທີ​ການ​ນຳພາ ຄຸ້ມ​ຄອງຂອງພະນັກງານນຳພາ ຄຸ້ມ​ຄອງ​ພາກສ່ວນ​ໜຶ່ງ​ທີ່​ບໍ່​ນ້ອຍ​ຂອງ​ປະ​ເທດ​​ເຮົາ​ແມ່ນ​ດັ່ງ​ນີ້:

- ລັກສະນະ​ຜີວ​ເຜີນ, ​ໂດຍທົ່ວ​ໄປ, ນິຍົມບົດຮຽນປະສົບການ, ຂາດຈິນຕະນາການລະບົບ, ເຮັດວຽກບໍ່ມີການວາງແຜນແບບວິທະຍາສາດ, ບໍ່ຄ່ອຍເອົາໃຈໃສ່ເຖິງການກວດກາ, ກວດສອບ ​ເພື່ອຮັບປະກັນ​ໃຫ້​ແຜນການ​ໄດ້​ດຳ​ເນີນ​ໄປ​ເປັນ​ຢ່າງ​ດີ, ​ເພີ່ມປະສິທິພາບ​ການ​ເຮັດ​ວຽກຕາມ​ເປົ້າ​ໝາຍ​ທີ່​ຄາດ​ໄວ້; ​ເບິ່ງ​ເບົາ​ການ​ສະຫຼຸບ​ເບື້ອງ​ຕົ້ນ-ສະຫຼຸບ​ສັງ​ລວມ, ຫຼື​ດຳ​ເນີນ​ການ​ແບບ​ພໍ​ແລ້ວ​ມື. ຍ້ອນ​ຂາດ​ຈິນຕະນາການ​ລະບົບ ດັ່ງ​ນັ້ນ​ຈຶ່ງຄັດ​ເລືອກ​​ບັນຫາ​ຈຸດ​ໜັກ​ໃຈກາງ​ບໍ່​​ໄດ້ ​ເພື່ອ​ສຸມ​ໃສ່​ຊີ້​ນຳ​ສ້າງ​ການ​ບຸກທະລຸ, ຊຶ່ງມັກ​ຈະ​ແຜ່​ກະ​ຈ່າຍ​ບັນຫາ “ພ້ອມ​ກັນ​ກ້າວ​ໄປ​ຂ້າງ​ໜ້າ” ​ເຮັດ​ໃຫ້​ແຫຼ່ງພະລັງ​ຖືກ​ກະ​ແຈກ​ກະ​ຈ່າຍ, ບໍ່​ບັນລຸ​ຜົນ​ທີ່​ຕ້ອງການ, ກໍ່​ໃຫ້​ເກີດ​ການ​ຟຸມ​ເຟືອຍ​ເສຍ​ຫາຍ​ທັງ​ການ​ເງິນ, ​ເວລາ ​ແລະກຳລັງ​ຄົນ. ດ້ານ​ອື່ນ, ​ເມື່ອ​ມີ​ຄວາມ​ເຫັນ​ຂັດ​ແຍ້​ງ​ໃນ​ຄະນະ​ນຳ ກໍ່​ບໍ່​ຄ່ອຍຈະໄດ້ປຶກສາ​ພິຈາລະນາ​ເຖິງ​ຮາກ​​ເຫງົ້າ​ຂອງ​ບັນ​ຫາ, ຊຶ່ງ​ຢູ່​ບ່ອນ​ນີ້​ຫຼື​ບ່ອນ​ອື່ນ​ເຄີຍ​ມີ​ການ​ເຮັດ​ແບບ ​ເຄິ່ງໆ​ກາງໆ, ປະສົມ​ກົມກຽວ​ຄວາມ​ເຫັນ​ຕ່າງໆ ​ເພື່ອ​ໃຫ້​ມີ “ຄວາມ​ເປັນ​ເອກະ​ພາບ” ທາງ​ດ້ານ​ຮູບ​ນອກ ​ແຕ່​ແກ້​ໄຂ​ທາດ​ແທ້​ຂອງ​ບັນຫາ​ບໍ່​ໄດ້.

- ​ເຮັດ​ວຽກແບບ "ຕາມໃຈ", ຖືຄວາມສຳພັນທາງອາລົມ, ຄວາມຄຸ້ນເຄີຍສູງກວ່າຫຼັກການ, ລະບຽບວິໄນ. ບໍ່​ເຮັດ​ຫຼ້ອນ​ຄວາມ​ຮັບຜິດຊອບ​ຂອງ​ຕົນ, ​ເຮັດ​ແຕ່ວຽກ​ງ່າຍ, ປະ​ວຽກ​ຍາກ, ​ແຕ່​ມັກຈະ​ລ່ວງ​ເກີນ​ອຳນາດ​ຂອງ​ຜູ້​ອື່ນ ຂອງ​ໜ່ວຍ​ງານ​ອື່ນ​ເມື່ອ​ເຫັນ​ມີ​ຜົນ​ປະ​ໂຫຍ​ດ. ບົດຮຽນ​ຈາກ​ຄະດີ​ໃຫຍ່ ນ້ອຍ​ທີ່​ຜ່ານ​ມາ​ມໍ່​ນີ້ລ້ວນ​ແຕ່​ໃຫ້​ເຫັນ​ເຖິງຜົນ​ກະທົບ​ຂອງການ​ປ່ອຍປະ​ລະ​ຫຼວມລະບຽບ​ວິ​ໄນ​ໃນ​ການ​ນຳພາ ຄຸ້ມ​ຄອງ ຫຼື​ການ​ເຮັດ​ວຽກ​ແບບ “ຕາມ​ໃຈ”, ປະ​ໃຫ້​ຄວາມ​ສຳພັນ​ທາງ​ອາລົມຄວາມ​ຄຸ້ນ​ເຄີຍ ​ມ້າງ​ເພ​ຫຼັກການ, ລະບຽບ​ວິ​ໄນ​ຂອງ​ການຈັດ​ຕັ້ງ.

- ການວາງ​ມາດ​ຕະການ​ນຳພາ​ຄຸ້ມ​ຄອງ​ບໍ່​ຄ່ອຍ​ອີງ​ໃສ່ຂໍ້​ມູນ, ຫຼັກຖານວິທະຍາສາດ, ຄຳປຶກສາວິຈານຂອງຜູ້ຊ່ຽວຊານ ແລະການປະກອບຄວາມເຫັນຂອງປະຊາຊົນ ເພື່ອເລືອກວິທີທີ່ດີທີ່ສຸດ. ​ເມື່ອ​ຜັນ​ຂະຫຍາຍ​ປະຕິບັດ​ກໍ່​ບໍ່​ກຳນົດ​ແຈ້ງ​ແຫຼ່ງພະລັງ​ທີ່​ຕ້ອງການ​ແລະ​ພຽງພໍ, ​ແຫຼ່ງພະລັງ​ພື້ນຖານ​ແລະ​ແຫຼ່ງພະລັງ​ສຳຮອງ (ການ​ເງິນ, ວັດ​ຖຸອຸປະກອນ, ກຳລັງ​ຄົນ, ຂໍ້​ມູນ​ຂ່າວ​ສານ, ​ເວລາ), ພາກສ່ວນ​ຮັບຜິດຊອບ​ຕົ້ນຕໍ, ກຳລັງປະສານ​ງານ, ກົນ​ໄກ​ແລະ​ແບບ​ວິທີ​ການຈັດ​ຕັ້ງ, ຄາດ​ຄະ​ເນ​ກ່ຽວ​ກັບ​ສິ່ງ​ທ້າ​ທາຍ​ທີ່​ຕ້ອງ​ຜ່ານ​ຜ່າ, ​ໂອ​ກາດ​ທີ່​ຕ້ອງ​ສວຍ​ໃຊ້. ຂາດ​ຈິດ​ສຳນຶກ​ກ່ຽວ​ກັບ​ການ​ປະຢັດ, ຍາດ​ແຍ່ງສວຍ​ໃຊ້​ເວລາ, ດັ່ງ​ນັ້ນ​ຈຶ່ງ​ເຄີຍ​ປະລະ​ໂອກາດ​ການ​ພັດທະນາ, ​ໃຊ້​ເວລາ​ຫຼາຍ​ເກີນ​ໄປ​ໃຫ້​ແກ່​ວຽກ​ງານ​ລະຫວ່າງ​ກາງ, ບໍ່​ລວມສູນ​ເວລາ​ໃຫ້​ແກ່​ໜ້າ​ທີ່ສຳຄັນ​ຕົ້ນຕໍ.

- ຈິດ​ໃຈ​ຮ່ວມ​ມື, ປະສານ​ງານ, ​ເຮັດ​ວຽກ​ເປັນ​ທີ​ມງານ​ຍັງ​ອ່ອນ; ບໍ່ເອົາໃຈໃສ່ເຖິງການນຳໃຊ້ຜູ້ຊ່ຽວຊານ ເພື່ອຮັບຄຳປຶກສາກ່ຽວກັບບັນຫາວິຊາສະເພາະ ຫຼືຕ້ອງມີການຈິນຕະນາການສັງເຄາະ. ​ເມື່ອ​ເຮັດ​ວຽກ​ຕາມ ​”ທີ​ມງານ" ມັກ​ບັນຊາ​ຕາມ​ແບບ ​ເອກິບ ງ່າຍດາຍ, ຖື​ເປັນ​ກັນ​ເອງ, ບໍ່​ສົດ​​ໃສ, ບໍ່​ເບິ່ງ​ໂດ​ຍກົງ​ໃສ່ບັນຫາ​ທີ່​ມີ​ຄວາມ​ຂັດ​ແຍ່ງ​ທາງ​ທັດສະນະ, ວິທີ​ເຂົ້າ​ເຖິງ, ວິທີ​ແກ້​ໄຂ. ​ໃນ​ຂະນະ​ນັ້ນ, ການ​ເຮັດ​ວຽກ​ຕາມ​ທີ​ມງານ, ການ​ເພີ່ມ​ທະ​ວີ​ຄວາມ​ຮ່ວມ​ມື, ​ເຊື່ອ​ມຕໍ່ ​ແລະ​ນຳ​ໃຊ້​ຜູ້​ຊ່ຽວຊານ​ ແມ່ນ​ແບບ​ແຜນ​ທີ່​ຕ້ອງ​ມີ​ສຳລັບຜູ້ນຳ​ລະດັບ​ມື​ອາຊີບ​ໃນ​ສັງຄົມສະ​ໄໝ​ໃໝ່, ຊ່ວຍ​​ໃຫ້​ເກັບ​ກຳ​ແລະປະ​ເມີນ​ຜົນ​ຂໍ້​ມູນ​ຫຼາຍ​ດ້ານ, ສັບສົນ, ຈັດການ​ແກ້​ໄຂ​ສະຖານະ​ການ​ທີ່​ຍາກ​ລຳບາກ.

- ບໍ່​ຄ່ອຍ​ມີ​ນິ​​ໄສ​ໃນ​ການປຶກສາ​ຫາລື​ກັບຜູ້​ທີ່​ມີ​ຄວາມ​ເຫັນ​ແຕກ​ຕ່າງ​ກັບ​ຄວາມ​ຄິດ​ເຫັນ​ຂອງ​ຕົນ​ເອງ, ຊ້ຳຍັງມີປະກົດການບັງຄັບໃຫ້ຍອມຮັບ, ອະຄະຕິ. ນັ້ນ​ແມ່ນ​ປະກົດ​ການ “​ຜູກຂາດ​ຄວາມ​ຈິງ”, ບັງຄັບ​ໃຫ້​ຜູ້​ອື່ນຕ້ອງ​ເຊື່ອ​ຟັງ ​ໂດຍ​ບໍ່​ໃຊ້ການ​ຂົນຂວາຍ​ຊວນ​ເຊື່ອ​ໃຫ້​​ເຂົາ​ປະຕິບັດ​ມະຕິ​ຢ່າງ​ຕື່ນ​ຕົວ​ສະ​ໝັກ​ໃຈ. ຈຸດ​ອ່ອນ​ຂອງ​ແບບ​ແຜນ​ນຳພາ​ຄຸ້ມ​ຄອງ​ນີ້​ແມ່ນ ມັນ​ຈຳກັດ​ການ​ເກັບ​ກຳ​ຂໍ້​ມູນ​ຂ່າວສານ; ຍາກ​ທີ່​ຈະ​ສາມັກຄີ, ​ເຕົ້າ​ໂຮມ​ກຳລັງ​ອັນ​ກວ້າງຂວາງ​ ເພື່ອປະຕິບັດ​ບັນດາ​ເປົ້າ​ໝາຍທີ່​ໄດ້​ວາງ​ໄວ້; ຊ້ຳ​ຍັງ​ອາດ​ຈະຊຸກ​ດັນ​ພາກສ່ວນ​ໜຶ່ງ​ເຂົ້າ​ໃນ​ສະພາບການ​ຕ້ານ​ຢັນ ຫຼື “ຢຸດ​ງານ” ບໍ່​ປະຕິບັດຕານການຕັດສິນ​ຂອງ​ຜູ້ນຳ. ນຳພາ​ໃນ​ລະດັບ​ຍິ່ງ​ສູງ​ແມ່ນ​ເປົ້າ​ໝາຍ​ຂອງ​ການ​ນຳພາ​ຍິ່ງ​ອຸດົມສົມບູນ, ຄວາມ​ແຕກ​ຕ່າງ​ໃນ​ຄວາມ​ຄິດ​ເຫັນ​ໃນສັງຄົມຍິ່ງມີ​ຫຼາຍ​ຮູບ​ຫຼາຍ​ແບບ, ບໍ່​ພຽງ​ແຕ່​ຍ້ອນຜົນ​ປະ​ໂຫຍ​ດ​ແຊກ​ຄຸມ​ເທົ່າ​ນັ້ນ ຫາກ​ຍັງ​ກວມ​ທັງ​ຄຸນຄ່າ​ທີ່​ສະ​ແຫວ​ງຫາ. ​ເພາະສະ​ນັ້ນ, ກໍ່ສ້າງ​ແບບ​ແຜນ​ສົນທະນາ, ​ເຄົາລົບ​ຄວາມ​ເຫັນ​ທີ່​ແຕກ​ຕ່າງ​ ແມ່ນ​ບັນຫາ​ພື້ນຖານ​ທີ່​ສຸດ​ຂອງ​ວັດທະນະທຳ​ການ​ນຳພາ​ຄຸ້ມ​ຄອງ.

- ໜັກ​ໄປ​ທາງ​ແບບ​ແຜນ​ອາດຍາ​ສິດ, ຫ້ອງການເຈ້ຍສໍ, ຫ່າງເຫີນຈາກຄວາມເປັນຈິງ, ຂາດປະຊາທິປະໄຕ, ​ແຫຼ່ງ “ສົ້ນ​ເຂົ້າ” ​ໃຫ້​ແກ່​ການ​ປະກາດ​ໃຊ້​ມະຕິ​ຕົກລົງ​ການ​ບໍລິຫານ​ແມ່ນ​ເຈດ​ຈຳນົງ​ອັດຕະວິ​ໄສ. ປະທານ​ໂຮ່ຈີ​ມິນ​ໄດ້ຊີ້​ໃຫ້​ເຫັນ​ວ່າ, ພວກ​ຄົນ​ເຫຼົ່າ​ນີ້​ຮູ້​ພຽງ​ແຕ່ “​ເປີດ​ງານ​ບຸນ”, ຂຽນ​ມະຕິ, ອອກ​ຄຳ​ສັ່ງ, ບໍ່​ຄ່ອຍ​ເອົາ​ໃຈ​ໃສ່​ເຖິງ​ຄວາມ​ເຫັນ​ຂອງ​ໝູ່​ຄະນະ, ຄວາມ​ຕ້ອງການ ປະລະ​ຄວາມ​ປາຖະໜາ​ຂອງປະຊາຊົນ, ບໍ່​ໄດ້​ສືບສວນ​ຄົ້ນຄວ້າ​ຢ່າງຮອບ​ຄອບ, ບໍ່​ເອົາ​ໃຈ​ໃສ່​ເຖິງປະຕິກິລິຍາ​ຂອງ​ປະຊາຊົນ ຂອງຜູ້​ທີ່​ຖືກ​ຜົນ​ກະທົບ​ຈາກມະຕິ​ຕົກລົງ​ການ​ເມືອງ ການ​ບໍລິຫານ. ​ເມື່ອ​ອອກ​ມະຕິ​ຕົກລົງ​ແລ້ວ​ກໍ່​ມີ​ແຕ່​ໂຄສາ​ນາ​ໂຮ່ຮ້ອງ​ເທົ່າ​ນັ້ນ ​ໂດຍ​ບໍ່ມີ​ການ​ຊຸກຍູ້ ກວດກາ, ບໍ່​ອະທິບາຍ​ໃຫ້​ປະຊາຊົນ​ເຂົ້າ​ໃຈ, ບໍ່​ເອົາ​ໃຈ​ໃສ່​ເຖິງ​ລັກສະນະ​ເປັນ​ໄປ​ໄດ້​ຂອງ​ມະຕິ​ຕົກລົງ​ໃນພາກ​ຕົວ​ຈິງ. ​ເມື່ອພົບ​ຄວາມ​ຫຍຸ້ງຍາກ​ໃນ​ພຶກ​ຕິ​ກຳ​ກໍ່​ບໍ່​ຊອກ​ຫາ​ສາ​ເຫດ​ເພື່ອດັດ​ປັບ​ແຜນການ, ຊ້ຳ​ບໍ່​ໜຳ​ຍັງ​ພະຍາຍາມ​ລວມສູນ​ແຫຼ່ງພະລັງ​ແບບ “ພະຍາຍາມ​ເຮັດ​ໃຫ້​ຈົນ​ໄດ້”, ​ເຮັດ​ໃຫ້​ເກີດ​ຄວາມ​ເສຍ​ຫາຍຢ່າງ​ໃຫຍ່​ຫຼວງ. ​ເມື່ອ​ລົ້ມ​ເຫຼວກໍ່​ບໍ່​ກ້າເບິ່ງ​ໂດຍ​ກົງ​ໃສ່​ຄວາມ​ຈິງ​ເພື່ອ​ສຳ​ຫຼວດ ຕີ​ລາຄາ​ຢ່າງ​ເຂັ້ມ​ງວດ ​ແລະຖອດ​ຖອນ​ບົດຮຽນ ​ແຕ່​ມັກ “​ໂຕ້​ອ້າງ​ຕໍ່​ວ່າ” ຍືດ​ເຍືອ​ຄົດ​ໂຄ້ງ, ຫາ​ວິທີ​ຖິ້ມ​ໂທດ​ໃຫ້​ສະພາບ​ການ​ພາວະ​ວິ​ໄສ.

​ໂດຍຮັບ​ຮູ້​ແຈ້ງກ່ຽວ​ກັບບັນດາ​ເຫດການ​ປະຫວັດສາດ ທີ່ຍັງ​ສົ່ງ​ຜົນ​ກະທົບ​ຢ່າງ​ໜັກໜ່ວງ​ເຖິງຖັນ​ແຖວ​ພະນັກງານ, ພາຍຫຼັງ​ການ​ປະຕິວັດ​ເດືອນ​ສິງຫາປີ 1945, ປະທານ​ໂຮ່ຈີ​ມິນ​ໄດ້​ຕຳ​ໜິວິພາກ ​ແລະ​ຮຽກຮ້ອງ​ໃຫ້ປ່ຽນ​ແປງ​ແບບ​ແຜນ ວິທີ​ຫຼ້າ​ຫຼັງ​ທີ່​ບໍ່ສອດຄ່ອງ​ເໝາະ​ສົມ​ກັບ​ທາດ​ແທ້​ຂອງ​ອຳນາດ​ການ​ປົກຄອງ​ປະຕິວັດ, ​ເຊັ່ນ​ພະຍາດ​ອາດຍາ​ສິດ ​ຫ້ອງການເຈ້ຍ​ສໍ, ຫ່າງ​ເຫີ​ນຈາກ​ຄວາມ​ເປັນ​ຈິງ, ບົດຮຽນ​ນິຍົມ, ຜິວ​ເຜີນລວມໆ, ​ເບິ່ງ​ເບົາ​ຄວາມ​ປາຖະໜາ​ຂອງ​ປະຊາຊົນ ​ແລະ​ຄວາ​ມເຫັນ​ຂອງ​ຂັ້ນ​ລຸ່ມ, ຖື​ຕົນ​ສູງ​ກວ່າ​ອົງການ​ຈັດ​ຕັ້ງ... ​ເມື່ອ​ກ້າວ​ເຂົ້າ​ສູ່​ການ​ຕໍ່ສູ້​ຕ້ານ​ລ່າ​ເມືອງ​ຂຶ້ນ​ຝຣັ່ງທີ່​ເຕັມ​ໄປ​ດ້ວຍ​ຄວາມ​ຫຍຸ້ງຍາກ​ລຳບາກ, ຢູ່​ເຂດ​ພູຜາ​ປ່າ​ໄມ້​ຫວຽດບັກ, ​ເດືອນ​ຕຸລາ 1947, ​ປະທານໂຮ່ຈີ​ມິນ​ໄດ້​ຂຽນສຳ​ເລັດ​ນິພົນ​ທີ່​ລື​ຊື່ “ປ່ຽນ​ແປງ​ໃໝ່​ວິທີ​ເຮັດ​ວຽກ” ດ້ວຍ​ນາມ​ປາກກາ X.Y.Z ຊຶ່ງ​ໃນ​ນັ້ນ​ໄດ້​ຊີ້​ແຈ້ງວ່າ “ຕ້ອງ​ປ່ຽນ​ແປງ​ໃໝ່​ວິທີ​ເຮັດ​ວຽກ​ຂອງ​ພັກ”. ​ເພິ່ນ​ໄດ້​ເນັ້ນ​ໜັກ​ວ່າ, ຖ້າ​ຫາກ​ພະນັກງານ, ສະມາຊິກ​ພັກ​ແຕ່ລະຄົນ​ເຮັດ​ວຽກ ຖືກຕ້ອງ​ກວ່າອີກ, ຄ່ອງ​ແຄ້ວ​ກວ່າອີກ, ​ແມ່ນ​ຜົນສຳ​ເລັກ​ຂອງ​ພັກ​ຈະ​ໃຫຍ່​ຫຼວງ​ກວ່າ​ອີກ. ພະນັກງານ​ແລະ​ສະມາຊິກ​ພັກ​ເຮັດ​ບໍ່​ຖືກຕ້ອງ, ບໍ່​ຄ່ອງ​ແຄ້ວ, ກໍ່​ຈະ​ມີ​ຂໍ້​ບົກພ່ອງ​ຫຼາຍ. ຂໍ້​ບົກພ່ອງ​ຫຼາຍ, ຜົນສຳ​ເລັດ​ຈະ​ໜ້ອຍ. ຂໍ້​ບົກພ່ອງ​ໜ້ອຍ, ຜົນສຳ​ເລັດ​ຈະ​ຫຼາຍ (1). ​ເພິ່ນ​ໄດ້​ຊີ້​ໃຫ້​ເຫັນ 12 ພະຍາດ​ຂອງແບບ​ແຜນ, ວິທີ​ທີ່​ຫຼ້າຫຼັງ: ສະຫາວ, ພະຍາດທ້ອງຖິ່ນ, ພະຍາດມັກຊື່ສຽງຍົດສັກ, ພະຍາດຂາດລະບຽບວິໄນ, ພະຍາດລຸກລົນຊະຊາຍ, ພະຍາດຫ່າງເຫີນມະຫາຊົນ, ພະຍາດອັດຕະວິໄສ, ພະຍາດຮູບນອກ, ພະຍາດຂີ້ຖີ່, ພະຍາດຫຼິ້ນແສ້ພານສາວ, ພະຍາດບໍ່ເປັນລະບຽບຮຽບຮ້ອຍ, ພະຍາດຂີ້ຄ້ານ (2). ພ້ອມ​ກັນ​ນັ້ນ, ​ເພິ່ນ​ກໍ່​ໄດ້​ຊີ້​ແຈ້ງ​ບັນດາ​ວິທີ​ການ, ມາດ​ຕະການ​ເພື່ອ​ປົວ​ພະຍາດ​ເຫຼົ່າ​ນັ້ນຢ່າງ​ລະອຽດ​ແທດ​ຈິງ​ທີ່​ສຸດ.

ກ້າວ​ເຂົ້າ​ສູ່​ໄລຍະ​ແຫ່ງ​ການ​ປ່ຽນ​ແປງ​ໃໝ່, ພັກ​ກອມ​ມູນິດ​ຫວຽດນາມ​ໄດ້​ມີ​ຄວາມຮັບ​ຮູ້​ຢ່າງ​ເລິກ​ເຊິ່ງວ່າ, ກິດຈະການ​ປ່ຽນ​ແປງ​ໃໝ່​ຈະ​​ໄດ້​ຮັບຜົນສຳ​ເລັດກໍ່​ຕໍ່​ເມື່ອ​ຖັນ​ແຖວ​ພະນັກງານ​ໄດ້​ຮັບ​ການ​ກໍ່ສ້າງ​ໃຫ້​ໝັ້ນຄົງ​ເຂັ້ມ​ແຂງ, ສະອາດ​ປອດ​ໃສ. ຢາກ​ໄດ້​ຄື​ແນວ​ນັ້ນ, ພ້ອມ​ກັນ​ກັບ​ການປ່ຽນ​ແປງ​ໃໝ່​ຈິນຕະນາການ ​ແມ່ນ​ຕ້ອງ​ແກ້​ໄຂ, ປັບປຸງແບບ​ແຜນ, ວິທີ ​ເຮັດ​ວຽກ, ພິ​ເສດ​ແມ່ນ​ບັນດາ​ແບບ​ແຜນ​ເກົ່າ​ແກ່ ທີ່​ໄດ້​ຊຶມ​ເລິກ​ຢູ່​ໃນຖັນ​ແຖວ​ພະນັກງານ,​ ສະມາ​ຊິດ​ພັກພາຍ​ໃຕ້​ກົນ​ໄກ​ລວມສູນ​ອາດຍາ​ສິດ​ເກື້ອກູນ ຊຶ່ງ​ພວມ​ເປັນ​ອຸປະ​ສັດທີ່​ກີດຂວາງ​ພາລະກິດ​ປ່ຽນ​ແປງ​ໃໝ່​ປະ​ເທດ​ຊາດ. ກອງ​ປະຊຸມ​ໃຫຍ່​ຄັ້ງ​ທີ VI ຂອງ​ພັກ​ໄດ້​ຮຽກຮ້ອງ​ໃຫ້ “​ແກ້​ໄຂ​ປ່ຽນ​ແປງ​ແບບ​ແຜນ​ເຮັດ​ວຽກ, ລົງ​ເລິກ, ​ໃກ້ຊິດ​ພາກ​ຕົວ​ຈິງ” (3); ​ເຊີດ​ຊູ​ວິທີ​ເຮັດ​ວຽກ​ແບບ​ປະຕິບັດ​ຕາມ​ຫຼັກການ, ລະບຽບ​ວິ​ໄນ​ຂອງ​ພັກ; ​ເປີດ​ກວ້າງ​ການ​ດຳ​ເນີນ​ຊີວິດ​ປະຊາທິປະ​ໄຕ; ຄົ້ນຄວ້າ​ບັນດາ​ບົດຮຽນ​ປະດິດ​ສ້າງ​ຂອງ​ພື້ນຖານ ​ແລະ​ທ້ອງ​ຖິ່ນ, ຮັບ​ຟັງ​ຄວາມ​ຄິດ​ເຫັນ​ຂອງ​ມະຫາຊົນ, ຂອງ​ຜູ້​ຊ່ຽວຊານ​ແລະ​ນັກວິທະຍາສາດ; ກໍ່ສ້າງ​ກົດ​ລະບຽບ​ການ​ເຮັດ​ວຽກ ​ແລະ​ລະບອບ​ການ​ງານ, ການ​ດຳ​ເນີນ​ຊີວິດ ​ເພື່ອ​ເຮັດ​ວຽກ​ຕາມ​ກົດ​ລະບຽບ (4). ບັນດາ​ກອງ​ປະຊຸມ​ໃຫຍ່​ຂອງ​ພັກ​ໃນ​ສະ​ໄໝ​ແຫ່ງ​ການ​ປ່ຽນ​ແປງ​ໃໝ່ ລ້ວນ​ແຕ່​ເນັ້ນ​ເຖິງ​ຄວາມ​ຕ້ອງການຕ້ອງ​ເອົາ​ໃຈ​ໃສ່​ຢ່າງ​ເປັນ​ປະຈຳ​ເຖິງ​ການ​ກໍ່ສ້າງແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ​ໃຫ້​ພະນັກງານ ສະມາຊິກ​ພັກ. ກອງ​ປະຊຸມ​ໃຫຍ່​ຄັ້ງທີ XII ຂອງ​ພັກ​ໄດ້ກຳນົດ​ວ່າ ​ຕ້ອງ​ກໍ່ສ້າງ​ແລະ​ປະຕິບັດ​ຂໍ້​ກຳນົດເປັນ​ຢ່າງ​ດີ ​ເພື່ອ​ເສີມ​ຂະຫຍາຍ​ບົດບາດ​ເປັນ​ແບບຢ່າງ​ໃນ​ການ​ຝຶກ​ຝົນ​ຫຼໍ່​ຫຼອ​ມຄຸນສົມບັດ, ​ແບບ​ແຜນ​ດຳລົງ​ຊີວິດ, ​ແບ​ບແຜນ​ແລະ​ວິທີ​ເຮັດ​ວຽກ​ຂອງ​ພະນັກງານ ສະມາຊິກ​ພັກ, ​ໂດຍ​ສະ​ເພາະ​ພະນັກງານ​ນຳພາ​ຂັ້ນ​ຕ່າງໆ, ຜູ້​ເປັນ​ຫົວໜ້າ​ສຳນັກງານ​ອົງການ ກົມ​ກອງ (5). ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ​ໄດ້​ຊີ້​ໃຫ້​ເຫັນ​ປະກົດ​ການ​ຕ່າງໆ​ຂອງ​ຄວາມ​ເຊື່ອມ​ໂຊມ​ທາງ​ດ້ານແບບ​ແຜນ, ວິທີ​ເຮັດ​ວຽກ, ​ເຊັ່ນ ປະຕິບັດ​ບັນດາ​ຫຼັກການ​ຈັດ​ຕັ້ງ​ຂອງ​ພັກ​ບໍ່​ເຂັ້ມ​ງວດ; ​ເຈດຈຳນົງສູ້​ຊົນ​ຖືກຕົກ​ຕ່ຳ, ບໍ່​ເປັນ​ແບບຢ່າງ​ໃນ​ການ​ງານ; ຫຼີກ​ລ່ຽງຄວາມ​ຮັບຜິດຊອບ, ຂາດ​ຄວາມ​ຮັບຜິດຊອບ, ນິຍົມສະ​ເລ່ຍປານ​ກາງ, ​ເຮັດ​ວຽກ​ແບບ​ຜິວ​ເຜີນ ພໍ​ແລ້ວ​ມື; ບໍ່​ເຮັດ​ຫຼ້ອນ​ພາລະ​ໜ້າ​ທີ່​ທີ່​ໄດ້​ຮັບ​ມອບ​ໝາຍ; ​ເວົ້າ​ບໍ່​ໄປ​ຄຽງ​ຄູ່​ກັບ​ເຮັດ; ​ໃຫ້​ຄຳ​ໝັ້ນ​ສັນຍາ​ຫຼາຍ​ແຕ່​ເຮັດ​ໜ້ອຍ; ​ເວົ້າ​ຢ່າງ​ໜຶ່ງ, ​ເຮັດ​ໄປ​ອີກ​ທາງ​ໜຶ່ງ; ​ເຈດ​ຈຳນົງນິຍົມ, ບັງຄັບ​​ໃຊ້, ອະນຸລັກ​ນິຍົມ, ພຽງ​ແຕ່​ເຮັດ​ຕາມ​ຄວາມ​ມັກ​ຢາກ​ຂອງ​ຕົນ​ເອງ; ບໍ່​ຍອມ​ຮ່ຳຮຽນ, ຮັບ​ຟັງ, ຮັບ​ເອົາ​ຄວາມ​ຄິດ​ເຫັນ​ທີ່​ສົມ​ເຫດ​ສົມ​ຜົນ​ຂອງ​ຜູ້​ອື່ນ; ທ່າ​ທີອາດຍາ​ສິດ ​ຫ່າງ​ເຫີ​ນມະຫາຊົນ, ບໍ່​ໃກ້ຊິດຕິດ​ແທດ​ກັບ​ຮາກ​ຖານ, ຂາດ​ການກວດກາ, ຊຸກຍູ້, ບໍ່​ກຳ​ແໜ້ນ​ສະພາບ​ການ​ຂອງ​ທ້ອງ​ຖິ່ນ, ຂອງ​ສຳນັກງານອົງການ ກົມ​ກອງ; ​ເມີນ​ເສີຍ, ບໍ່​ສົນ​ໃຈ, ຂາດ​ຄວາມ​ຮັບຜິດຊອບ​ຕໍ່​ຄວາມ​ຫຍຸ້ງຍາກ, ຄວາມ​ຮ້ອນ​ເຄືອງ ​ແລະ​ຄວາມ​ຮຽກຮ້ອງ​ຕ້ອງການທີ່​ຖືກຕ້ອງ​ຂອງ​ປະຊາຊົນ...(6). ຄວາມ​ເສື່ອ​ມ​ໂຊມ​ທາງ​ດ້ານ​ແບບ​ແຜນ ວິທີ​ເຮັດ​ວຽກ ຖືກ​ຖື​ວ່າ​ເປັນ​ພາກສ່ວນ​ໜຶ່ງ​ຂອງ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ​ຄຸນສົມບັດ, ​ແບບ​ແຜນ​ດຳລົງ​ຊີວິດ ​ແລະ​ຕ້ອງ​ສຸມ​ໃສ່​ຈັດການ​ແກ້​ໄຂ, ຜ່ານ​ຜ່າ.

ກໍ່ສ້າງແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ, ​ມື​ອາຊີບ ສຳລັບ​ພະນັກງານ​ນຳພາ ຄຸ້ມ​ຄອງ​ໃນ​ໄລຍະ​ໃໝ່

​ເພື່ອກໍ່ສ້າງແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ, ​ມື​ອາຊີບ ສຳລັບ​ພະນັກງານ​ນຳພາ ຄຸ້ມ​ຄອງນັ້ນ, ຄຽງ​ຄູ່​ກັບບັນດາ​ວິທີ​ແກ້​ໄຂ​ລວມ​ເຊັ່ນ ປະຕິບັດ​ຫຼັກການ​ລວມສູນ​ປະຊາທິປະ​ໄຕ, ຍູ້​ແຮງການ​ຮ່ຳຮຽນ ​ແລະ​ປະຕິບັດ​ຕາມ​ແນວ​ຄິດ, ຄຸນສົມບັດ, ​ແບບ​ແຜນ​ໂຮ່ຈີ​ມິນ, ​ເພີ່ມ​ທະວີ​ການ​ຕິ​ຊົມ​ຕົນ​ເອງ​ແລະ​ຕິ​ຊົມ,... ຂໍ​ເນັ້ນ​ໜັກບາງ​ວິທີ​ແກ້​ໄຂ ທີ່​ລະອຽດລຸ່ມ​ນີ້:

ທີ​ໜຶ່ງ, ​ເປັນ​ເອກະ​ພາບ​ຄວາມ​ຮັບ​ຮູ້​ໃນ​ທົ່ວ​ພັກ​ແລະ​ລະບົບ​ການ​ເມືອງ, ທົ່ວ​ສັງຄົມ, ທຸກ​ສຳນັກງານ​ອົງການ ກົມ​ກອງ ​ກ່ຽວ​ກັບຄວາມ​ຕ້ອງ​ການ​ອັນ​ຮີບ​ດ່ວນ​ທີ່​ຕ້ອງປ່ຽນແປງໃໝ່, ປັບປຸງແບບແຜນ, ວິທີ​ເຮັດ​ວຽກຂອງ​ພະນັກງານ, ສະມາຊິກ​ພັກ. ຕ້ອງ​ເບິ່ງ​ວຽກ​ງານ​ນີ້​ເປັນ​ການ​ບູລະນະ​ບຸກຄະ​ລິ​ກະພາບຂອງ​ແຕ່ລະຄົນ ​ແລະ​ຍັງເປັນ​ມາດ​ຕະການ​ອັນ​ພື້ນຖານ​ ເພື່ອ​ກໍ່ສ້າງ​ອົງການຈັດ​ຕັ້ງ, ສຳນັກງານອົງການ, ກົມ​ກອງ​ໃຫ້​ໝັ້ນຄົງ​ເຂັ້ມ​ແຂງ. ​ເພາະວ່າ, ​ແບບ​ແຜນ ວິທີ​ເຮັດ​ວຽກ​ຂອງ​ແຕ່ລະຄົນ​ເປັນ​ການສະ​ແດງ​ອອກ​ຢ່າງ​ລະອຽດ​ແລະມີ​ຊີວິດ​ຊີວາ​ເຖິງ​ວິທີ​ເຮັດ​ວຽກ​ຂອງໝູ່​ຄະນະ, ມັນ​ຕັດສິນ​ປະສິດທິ​ຜົນ​ການ​ນຳພາ​ຂອງ​ພັກ ການ​ຄຸ້ມ​ຄອງ​ຂອງ​ລັດ, ​ເປັນ​ການສະ​ແດງ​ອອກ​ເຖິງ​ຄຸນນະພາບ​ພະນັກງານ ຊຶ່ງ​ປະຊາຊົນ​ອາດ​ຈະ​ວັດ​ແທກ​ເປັນ​ປະຈຳ​ທຸກ​ວັນ ດ້ວຍ​ຄວາມ​​ເພີງພໍ​ໃຈ​ຫຼື​ບໍ່ພໍ​ໃຈ, ​ເຫັນ​ດີ​ຕອບ​ສະໜອງ​ຫຼື​ຂັດຂ້ອງ, ຄັດຄ້ານ. ປ່ຽນ​ແປງ​ໃໝ່ແບບ​ແຜນ, ວິທີ​ເຮັດ​ວຽກບໍ່​ໝາຍ​ຄວາມ​ວ່າ​ພຽງ​ແຕ່​ສຸມ​ໃສ່​ແກ້​ໄຂ​ຂໍ້​ບົກພ່ອງ, ​ແຕ່​ມັນ​ແມ່ນ​ຂະ​ບວນວິວັດ​ທີ່​ພະນັກງານ​ຕ້ອງປ່ຽນ​ໃໝ່​ຕົນ​ເອງ​ເລື້ອຍໆ, ປົວ​ແປງ​ບຸກຄະ​ລິກກະ​ພາບໃຫ້ສົມບູນ. ບັນດາ​ພະນັກງານ​ທີ່​ມີ​ທ່າ​ທີ່​ການ​ງານ​ບໍ່​ຖືກຕ້ອງ, ມີກິລິ​ຍາ​ທ່າ​ທາງແລະ​ແບບ​ແຜນ​ອາດຍາ​ສິດ, ມີ​ວິທີ​ເຮັດ​ວຽກ​ທີ່​ຂາດ​ປະຊາທິປະ​ໄຕນັ້ນ ຕ້ອງ​ຖື​ວ່າ​ນີ້​ເປັນ​ໂອກາດ​ເພື່ອປັບປຸງ​ດ້ວຍ​ຕົນ​ເອງ, ​ແກ້​ໄຂ​ຂໍ້​ບົກພ່ອງຂອງ​ຕົນ, ນຳພາ​ບ​ໃໝ່​ສູ່ສາທາລະນະ​ຊົນ, ຝຶກ​ຝົນ​ຫຼໍ່​ຫຼອມ​ບຸກ​ຄະ​ລິກກະພາບ ​ແລະ​ເພີ່ມ​ສະມັດ​ຕະພາບ​ຂອງ​ວຽກ​ງານ. ບັນດາ​ພະນັກງານ​ທີ່​ມີແບບ​ແຜນ, ວິທີ​ເຮັດ​ວຽກທີ່​ເໝາະ​ສົມ, ​ໄດ້​ຮັບ​ຄວາມ​ນັບຖື​ຈາກ​ໝູ່​ຄະນະ ​ເພື່ອ​ນຮ່ວມອາຊີບ ​ແລະ​ປະຊາຊົນ, ບໍ່​ໄດ້​ພໍ​ໃຈ​ໃນ​ຕົວ​ເອງ, ຍັງ​ຕ້ອງ​ມີ​ຄວາມ​ຮັບຜິດ​ຊອບບູລະນະ, ຫັນ​ເປັນ​ທັນ​ສະ​ໄໝ ອັບ​ເດດ​ທ່າ​ອຽງ​ໃໝ່​ຂອງ​ຍຸກ​ສະ​ໄໝ, ກາຍ​ເປັນ​ພາກສ່ວນ​ກ້າວໜ້າ​ນຳພາ​ບັນດາ​ພາກສ່ວນ​ອື່ນ, ສ້າງ​ການ​ກະທົບ​ແຜ່​ກວ້າງ​ໃນ​ສັງຄົມ. ຄະນະ​ພັກ, ໜ່ວຍ​ງານ​ແຕ່ລະ​ໜ່ວຍ​ຕ້ອງ​ສົມທົບ​ລະຫວ່າງ​ການຍູ້​ແຮງ​ການອົບຮົມ​ສຶກສາ ກັບ​ເພີ່ມ​ທະວີ​ການ​ກວດກາ, ຕິດຕາມ​ກວດກາ, ດັດ​ແກ້, ຈັດການ​ແກ້​ໄຂ​ຢ່າງ​ທັນ​ການ ​ຕໍ່ບັນດາ​ປະກົດ​ການ​ຜິດ​ເຂ​ວທາງ​ດ້ານແບບ​ແຜນ, ວິທີ​ເຮັດ​ວຽກ ທີ່​ພວມ​ເປັນ​ຜົນ​ສະທ້ອນ​ບໍ່​ດີ​ເຖິງ​ຮູບ​ພາບ​ແລະ​ຄວາມ​ເຊື່ອ​ຖື​ຂອງ​ປະຊາຊົນ. ສູງ​ກວ່າ​ອີກ​ແມ່ນ​ຕ້ອງກຳນົດ​ໄດ້​ວັດທະນະທຳ​ນຳພາ, ວັດທະນະທຳ​ຄຸ້ມ​ຄອງ, ວັດທະນະທຳກຳອຳນາດ, ຊຶ່ງ​ຢູ່​ໃນ​ນັ້ນ ແບບ​ແຜນ, ວິທີ​ນຳພາ, ຄຸ້ມ​ຄອງ ​ເປັນ​ພາກສ່ວນ​ໜຶ່ງ​ທີ່​ພື້ນຖານ​ທີ່​ສຸດ, ​ໄດ້​ຮັບ​ຄວາມ​ເອົາ​ໃຈ​ໃສ່​ກໍ່ສ້າງ ປ່ຽນ​ແປງ​ໃໝ່​ ຈາກ​ທຸກ​ອົງການ​ຈັດ​ຕັ້ງ​ແລະ​ບຸກຄົນ ດ້ວຍ​ຄວາມຮູ້ສຶກ​ຕື່ນ​ຕົວ ຄວາມ​ຮັບຜິດຊອບ​ສູງ ​ເພື່ອ​ຢືນຢັນ​ບຸກຄະ​ລິກກະພາບ​ວັດທະນະທຳ, ເຫດຜົນແຫ່ງການດຳລົງຊີວິດ ແລະຄວາມປາຖະໜາຢາກອຸທິດ ຮັບໃຊ້ ​ໃນ​ລະບອບ​ປະຊາທິປະ​ໄຕ ​ແລະ​ສັງຄົມ​ສີວິ​ໄລ.

ທີ​ສອງ, ບູລະນະ​ລະບົບ​ລະບຽບ​ກົດໝາຍ, ຂໍ້​ກຳນົດ​ມາດຕະຖານ​ກ່ຽວ​ກັບແບບ​ແຜນ, ວິທີ​ເຮັດ​ວຽກຂອງ​ພະນັກງານ​ນຳພາ ຄຸ້ມ​ຄອງ​ແຕ່ລະ​ຂັ້ນ, ​ແຕ່ລະ​ຂະ​ແໜງ​ການ, ​ແຕ່​ລະ​ສຳນັກງານ​ອົງການ... ​ເປັນ​ພື້ນຖານ​ໃຫ້​ແກ່​ການ​ປະ​ເມີນ, ຕິດຕາມ​ກວດກາ, ຄຸ້ມ​ຄອງ​ພະນັກງານ. ກົມ​ການ​ເມືອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ XII ​ໄດ້​ມີ​ຄວາມ​ພະຍາຍ​າມຫຼາຍ​ຢ່າງ​ໃນ​ການ​ປະກາດ​ໃຊ້ມະຕິ​ຕົກລົງ, ຂໍ້​ກຳ​ນົດກ່ຽວ​ກັບ​ບັນຫາ​ນີ້, ພິ​ເສດ​ແມ່ນ ຂໍ້​ກຳນົດ​ກ່ຽວ​ກັບ​ຂອບ​ມາດຕະຖານ​ຕຳ​ແໜ່ງ, ກຳນົດຂອບເກນການປະເມີນພະນັກງານນຳພາ ຄຸ້ມຄອງຂັ້ນຕ່າງໆ (ຂໍ້​ກຳນົດ​ເລກທີ 89-QĐ/TW ລົງ​ວັນ​ທີ 4 ສິງຫາ 2017) ​ໄດ້​ທຳ​ຄວາມ​ກະຈ່າງ​ແຈ້ງ​ກ່ຽວກັບມາດຕະຖານ​ຂອງແບບ​ແຜນ, ວິທີ​ເຮັດ​ວຽກ: ທີ​ໜຶ່ງ, ມີ​ຄວາມ​ຮັບຜິດຊອບ​ຕໍ່​ວຽກ​ງານ; ຂະຫຍັນ​ຂັນ​​ເຄື່ອນ, ມີ​ຫົວຄິດປະດິດ​ສ້າງ, ກ້າ​ຄິດ, ກ້າ​ເຮັດ, ​ໄຫວ​ພິບ​ໃນ​ການ​ປະຕິບັດ​ໜ້າ​ທີ່. ທີສອງ, ​ເຮັດ​ວຽກ​ຢ່າງ​ມີ​ວິທະຍາສາດ, ປະຊາທິປະ​ໄຕ, ຖືກ​ຫຼັກການ. ທີ​ສາມ, ຮ່ວມ​ມື, ​ແນະນຳ, ຊ່ວຍ​ເຫຼືອສະຫາຍ​ແລະ​ເພື່ອນ​ຮ່ວມ​ງານ. ຕ້ອງ​ສືບ​ຕໍ່​ຫັນ​ເປັນ​ລະອຽດ​ເພື່ອ​ສາມາດ​ວັດ​ແທກ​ໄດ້ແບບ​ແຜນ, ວິທີ​​ເຮັດວຽກ​ຂອງພະນັກງານ​ນຳພາ ​ຄຸ້ມ​ຄອງ​ແຕ່ລະຄົນ ຢູ່​ແຕ່ລະ​ຂັ້ນ, ​ແຕ່ລະ​ຂະ​ແໜງ​ການ, ​ແຕ່​ລະໜ່ວຍງານ​ຢ່າງ​ເໝາະ​ສົມ, ​ເປັນ​ພື້ນຖານ​ໃຫ້​ແກ່​ການ​ຕີ​ລາຄາ, ​ແບ່ງ​ປະ​ເພດ ​ແລະ​ຕິດຕາມ​ກວດກາ​ພະນັກງານ. ລະບົບ​ລະບຽບ​ກົດໝາຍ​ຕ້ອງ​ໄດ້​ຫັນ​ເປັນ​ລະອຽດ​ຢ່າງຈະ​ແຈ້ງ ອີງ​ບົນ​ບັນດາ​ຫຼັກການລວມສູນ​ປະຊາທິປະ​ໄຕ, ໜູ່ຄະນະ​ນຳພາ ບຸກຄົນ​ຮັບຜິດຊອບ; ບັນດາ​ກົນ​ໄກ​ແບ່ງ​ອຳນາດ, ມອບ​ອຳນາດ, ມອບ​ສິດ, ກະຈາຍ​ອຳນາດ,... ສອດ​ຄ່ອງ​ກັບ​ແຕ່ລະ​ຂັ້ນ, ​ແຕ່ລະ​ຂະ​ແໜງ​ການ, ​ແຕ່ລະ​ຮູບ​ແບບ​ການ​ເຄື່ອນ​ໄຫວ​ນຳພາ ຄຸ້ມ​ຄອງ. ກຳນົດ​ແຈ້ງສິດ​ອຳນາດ, ຄວາມ​ຮັບຜິດຊອບ​ລະຫວ່າງ​ໜູ່ຄະນະ ​ແລະ​ບຸກຄົນ, ຂັ້ນ​ເທິງ​ແລະ​ຂັ້ນ​ລຸ່ມ, ຜູ້​ເປັນ​ປະທານ​ແລະ​ຜູ້​ປະສານ​ງານ, ຜູ້​ຮັບຜິດຊອບ​ຕົ້ນຕໍ​ແລະ​ຜູ້​ຮ່ວມງານ, ລຳດັບ ຂັ້ນ​ຕອນ ​ເວລາ... ​ເມື່ອ​ແກ້​ໄຂ​ວຽກ​ງານ​ລະອຽດ​ໜຶ່ງ, ພິ​ເສດ​ແມ່ນ​ວຽກ​ງານ​ທີ່​ຮຽກຮ້ອງ​ໃຫ້​ມີ​ການ​ປະສານ​ສົມທົບ​ຂອງຫຼາຍ​ຄົນ, ຫຼາຍ​ໜ່ວຍ​ງານ​ທີ່​ເຂົ້າ​ຮ່ວມ. ລະບົບ​ລະບຽບ​ກົດໝາຍ​ນັ້ນ ຕ້ອງ​ຮັບປະກັນ​ຄວາມ​ຄົບ​ຊຸດ, ຕໍ່​ເນື່ອງ​ລະຫວ່າງ​ຂໍ້​ກຳນົດ​ຂອງ​ພັກ​ແລະ​ກົດໝາຍ​ຂອງ​ລັດ.

ທີ​ສາມ, ປ່ຽນ​ແປງ​ໃໝ່​ບັນດາ​ຂອດ​ຂອງ​ວຽກ​ງານ​ພະນັກງານ ຫັນ​ສູ່ການ​ບູລະນະແບບ​ແຜນ, ວິທີ​ເຮັດ​ວຽກຂອງ​ພະນັກງານ, ພິ​ເສດ​ແມ່ນ​ກໍ່ສ້າງ​ແບບ​ແຜນ​ເຮັດ​ວຽກ​ທີ່​ມີ​ວິທະຍາສາດ, ປະຊາທິປະ​ໄຕ, ​ມື​ອາຊີບ. ​ແຕ່ລະ​ຂອດ​ທີ່​ຕ່າງ​ກັນ​ຂອງ​ວຽກ​ງານ​ພະນັກງານ ລ້ວນ​ແຕ່​ເຂົ້າ​ຮ່ວມ​ໂດຍ​ກົງ​ຫຼື​ໂດຍ​ທາງ​ອ້ອມ​ເຂົ້າ​ໃນການ​ກໍ່ສ້າງ​ແລະດັດ​ແປງ​ວິທີ​ເຮັດ​ວຽກ, ​ແບບ​ແຜນ​ນຳພາ ຄຸ້ມ​ຄອງຂອງ​ພະນັກງານ. ຢູ່​ຂອດ​ຮັບ​ສະໝັກ​ພະນັກງານ, ບັນຫາ​ແມ່ນ ​ບໍ່​ພຽງ​ແຕ່​ເພື່ອ​ກວດ​ສອບ​ລະດັບ​ຄວາມ​ຮູ້ ຄວາມ​ສາມາດ, ທັກ​ສະ​ໃນ​ການ​ແກ້​ໄຂ​ວຽກ​ງານ​ວິຊາ​ສະ​ເພາະ​ເທົ່າ​ນັ້ນ ຫາກ​ຍັງ​ຕ້ອງ​ເອົາ​ໃຈ​ໃສ່​ເປັນ​ສຳຄັນ​ທັງ​ແບບ​ການ​ເຮັດ​ວຽກ, ວິທີ​ກໍ່ສ້າງ​ແລະ​ຈັດ​ຕັ້ງປະຕິບັດ​ໜ້າ​ທີ່, ຄວາມ​ສາມາດ​ວາງ​ແຜນ​ແລະ​ປະຕິບັດ​ຂັ້ນຕອນ​ແກ້​ໄຂ​ວຽກ​ງານ, ຄວາມ​ສາມາດ​ເຮັດ​ວຽກ​ເປັນ​ທີ​ມ​ແລະ​ຮ່ວມ​ມື, ຄວາມ​ສາມາດລະດົມ​ແລະ​ຈັດ​ແບ່ງ​ແຫຼ່ງພະລັງ (ການ​ເງິນ, ວັດຖຸ​ອຸປະກອນ, ກຳລັງ​ຄົນ, ຂໍ້​ມູນ​ຂ່າວສານ, ​ເວລາ) ​ໃຫ້​ແກ່​ການຈັດ​ຕັ້ງ​ປະຕິບັດ, ຄວາມ​ສາມາດ​ສົນທະນາ​ກັບ​ຜູ້​ທີ່​ມີ​ຄວາມ​ເຫັນ​ແຕກ​ຕ່າງ... ຢູ່​ຂອດ​ຕີ​ລາຄາ​ພະນັກງານ, ຕ້ອງ​ມີ​ການ​ສົມ​ທຽບ​ກິລິຍາ​ທ່າ​ທີ, ການ​ກະທຳ, ວິທີ​ການ​ງານ​ຕົວ​ຈິງ​ປະຈຳ​ວັນ ກັບ​ບັນດາ​ມາດຕະຖານ​ທີ່​​ໄດ້ສ້າງຂຶ້ນ​ບົນ​ຂອບ​ທິດ​ສະ​ດີ ທີ່​ເປັນ​ເຄື່ອງມື​ວັດ​ແທກ ​ເພື່ອ​ແບ່ງ​ປະ​ເພດ​ພະນັກງານ​ໃຫ້​ຖືກຕ້ອງ​ແທດ​ເໝາະ. ຜ່ານ​ກິລິຍາ​ທ່າ​ທີ, ການ​ກະທຳ, ​ແບບ​ແຜນ, ວິທີ​ເຮັດ​ວຽກ​ຈຶ່ງ​ສະ​ແດງ​ອອກ​ຢ່າງ​ຈະ​ແຈ້ງ​ເຖິງຄຸນ​ນະພາ​ບພະນັກງານ, ພິສູ​ຄວາມ​ຖືກຕ້ອງ​ລະຫວ່າງ​ແນວ​ຄິດ​ແລະ​ການ​ກະທຳ, ຄຳ​ເວົ້າ​ແລະ​ການ​ກະທຳ, ຮູບ​ການ​ແລະ​ເນື້ອ​ໃນ,... ອາ​ໃສ​ສິ່ງ​ດັ່ງກ່າວ​ຈຶ່ງ​ແກ້​ໄຂ​ຜ່ານຜ່າ​ໄດ້​ສະພາບ​ການຕີ​ລາຄາ “​ຕາມ​ລັກສະນະ” ນາມ​ມະ​ທຳ ​ຕໍ່​ບັນດາ​ມາດຕະຖານກ່ຽວ​ກັບ​ຄຸນ​ທາດ​ການ​ເມືອງ​ແນວ​ຄິດ. ດັດ​ແປງ​ວຽກ​ງານ​ຕ້ອນຮັບ​ປະຊາຊົນ, ພົບ​ປະ​ກັບ​ຜູ້​ມີ​ສິດ​ເລືອກ​ຕັ້ງ​ຂອງຜູ້​ແທນ​ປະຊາຊົນ ຮັບປະກັນ​ຄວາມ​ແທດ​ຈິງ​ແລະມີ​ປະ​ສິດທິ​ຜົນ, ມີ​ກົນ​ໄກ​ຜູກ​ມັດ​ຄວາມ​ຮັບຜິດຊອບຂອງ​ຜູ້​ແທນ​ປະຊາຊົນ​ໃນ​ການ “​ໄປ​ພ້ອມ​ກັນ” ກັບ​ບັນດາ​ຄຳ​ສະ​ເໜີ​ແນະທີ່​ຖືກຕ້ອງຂອງ​ປະຊາຊົນ ໃນ​ການພົບ​ປະ​ກັບ​ຜູ້​ມີ​ສິດ​ເລືອກ​ຕັ້ງ. ປ່ຽນ​ແປງ​ໃໝ່​ວຽກ​ງານ​ເລືອກ​ຕັ້ງ ​ແລະ​ເປີດ​ກວ້າງ​ຮູບ​ການສອບ​ເສັງ​ເຂົ້າ​ເປັນ​ພະນັກງານ​ນຳພາ ພະນັກງານ​ຄຸ້ມ​ຄອງ, ຊຶ່ງ​ຢູ່​ນັ້ນ ​ແຜນການ​ດຳ​ເນີນ​ງານ​ແມ່ນບັນຫາ​ໃຈກາງ​ຂອງ​ກົນ​ໄກການ​ສອບ​ເສັງ, ສະ​ແດງ​ໃຫ້​ເຫັນ​ໄດ້​​ເຖິງຄຳ​ໝັ້ນ​ສັນຍາ​ການ​ເມືອງ​ກ່ຽວ​ກັບ​ແບບ​ແຜນ, ວິທີ​ເຮັດ​ວຽກຂອງ​ຜູ້​ສະໝັກ​ຮັບ​ເລືອກ​. ​ເປີດ​ເຜີຍແຜນການ​ດຳ​ເນີນ​ງານ​ ແມ່ນ​ຮູບ​ການກວດ​ສອບ​ໜຶ່ງ​ ກ່ຽວ​ກັບ​ວິ​ໄສ​ທັດ, ​ເປົ້າ​ໝາຍ, ​ເນື້ອ​ໃນ ​ແລະ​ທັງ​ເປັນ​ແຜນການ, ທິດ​ນຳ​ໃນ​ການບູລະນະ​ບຸກຄະ​ລິກກະພາບ, ແບບດຳລົງຊີວິດ, ແບບແຜນ ຂອງ​ຜູ້​ສະໝັກ​ຮັບ​ເລືອກ ​ເພື່ອມີ​ຄວາມ​ສາມາດ​ທີ່​ສຸດ​ໃນ​ການປະຕິບັດ​ບັນດາ​ເປົ້າ​ໝາຍ​ເມື່ອ​​ໄດ້​ຮັບ​ການ​ເລືອກຕັ້ງ. ແຜນການ​ດຳ​ເນີນ​ງານຂອງ​ຜູ້​ສະໝັກ​ຮັບ​ເລືອກ​ຕັ້ງ​ຍັງ​ເປັນພື້ນ​ຖານສຳລັບ​ການ​ຕິດຕາມ​ກວດກາຂອງ​ອົງການ​ຈັດ​ຕັ້ງ​ພັກ ​ແລະ​ສັງຄົມ ຕໍ່​ພະນັກງານ​ໃນ​ໄລຍະ “ຫຼັງ​​ເລືອກ​ຕັ້ງ” ​ແລະ “ຫຼັງ​ການ​ສອບ​ເສັງ​”. ​ໃຫ້​ຄວາມ​ສຳຄັນ​ແກ່​ການ​ຕິດຕາມ​ກວດກາ​ພະນັກງານ​ນຳພາ-ຄຸ້ມ​ຄອງ, ​ໃນ​ນັ້ນ​ກວມ​ທັງ​ການ​ຕິດຕາມ​ກວດກາແບບ​ແຜນ, ວິທີ​ເຮັດ​ວຽກ, ພິ​ເສດ​ແມ່ນ​ການ​ພົວພັນ​ກັບ​ປະຊາຊົນ, ກັບ​ຂັ້ນ​ລຸ່ມ, ກັບ​ຜູ້​ຮ່ວມ​ງານ​ຂັ້ນ​ດຽວ​ກັນ, ກັບ​ວຽກ​ງານ, ກັບ​ກະ​ໂຕ​ພະນັກງານ ກ່ຽວ​ກັບຄຳ​ໝັ້ນ​ສັນຍາ​ການ​ເມືອງ​ກ່ອນ​ໜ້າ​ນີ້.

ທີ​ສີ່, ບູລະນະ​ຮູບ​ແບບ​ການ​ຝຶກ​ອົບຮົມ ຫັນ​ໄປ​ສູ່​ການ​ກໍ່ສ້າງ​ແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ, ​ມື​ອາຊີບ ສຳລັບ​ພະນັກງານ​ນຳພາ ຄຸ້ມ​ຄອງ. ແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ, ​ມື​ອາຊີບ ​ໄດ້​ເປັນ​ຮູບ​ເປັນ​ຮ່າງ​ຂຶ້ນ​ໂດຍ​ອາ​ໄສ​ລະບຽບ​ກົດໝາຍ​ແລະ​ສະພາບ​ແວດ​ລ້ອມການ​ງານ, ​ແລະ​ສ່ວນ​ທີ່​ສຳຄັນ​ແມ່ນ​ຜ່ານ​ຮູບ​ແບບ​ການ​ຝຶກ​ອົບຮົມທີ່​ມີວິທະຍາສາດ ​ເພື່ອກະທົບ​ຢ່າງ​ມີ​ປະສິດທິ​ຜົນ​ໃສ່​ການ​ດັດປັບ​ການ​ກະທຳ, ບຸກຄະ​ລິກກະພາບ, ກິລິຍາ​ທ່າ​ທີ່, ກຽດ​ສັກ​ສີ​ຄວາມ​ເປັນ​ມະນຸດ. ​ເພາະສະ​ນັ້ນ, ຕ້ອງຮີບປ່ຽນ​ແປງ​ໃໝ່​ຢ່າງ​ພື້ນຖານ​ ຮູບ​ແບບ​ການ​ຝຶກ​ອົບຮົມ​ພະນັກງານນຳພາ-ຄຸ້ມ​ຄອງ, ກວມ​ທັງ​ການ​ອົບຮົມ​ສຶກສາ​ຢູ່​ໃນ​ໂຮງຮຽນ ​ແລະການ​ອົບຮົມ​ສຶກສາ​ຢູ່​ນອກ​ໂຮງຮຽນ, ການ​ຝຶກ​ອົບຮົມ​ຢູ່​ບ່ອນ​ເຮັດ​ວຽກ ​ແລະ​ການ​ຝຶກ​ອົບຮົມ​ຢູ່​ນອກ​ບ່ອນ​ເຮັດ​ວຽກ. ຫຼັກສູດ, ​ເນື້ອ​ໃນຝຶກ​ອົບຮົມຕ້ອງ​ສຸມ​ໃສ່​ການ​ສ້າງ​ກິລິຍາ​ທ່າ​ທີ່, ​ແບບ​ແຜນ, ພຶດຕິ​ກຳມາ​ດຕະຖານ​ໃນ​ບັນດາ​ການ​ພົວພັນ​ພື້ນຖານ​ຂອງ​ການ​ນຳພາ ຄຸ້ມ​ຄອງ; ສ້າງ​ວີິທີ​ເຮັດ​ວຽກ​ແບບ​ວິທະຍາສາດ; ຝຶກ​ທັກ​ສະການ​ນຳພາ ຄຸ້ມ​ຄອງ​ທັນ​ສະ​ໄໝ... ​ເພື່ອ​ໝູນ​ໃຊ້​ໃຫ້​ແຕ່​ລະ​ຕຳ​ແໜ່​ງການ​ນຳພາ ຄຸ້ມ​ຄອງ, ​ແກ້​ໄຂ​ຜ່ານ​ຜ່າ​ສະພາບ​ການ​ທິດ​ສະ​ດີ​ຫ່າງ​ເຫີ​ນຈາກ​ພຶດຕິ​ກຳ. ຄວນ​ໃຫ້​ຄວາມ​ສຳຄັນ​ແກ່​ວິທີຝຶກ​ອົບຮົມພາກ​ສະໜາມ, ຝຶກອົບຮົມກັບທີ່, ຝຶກອົບຮົມຕາມຫຼັກຖານ, ຝຶກອົບຮົມຕິດແໜ້ນກັບ ການຈັດການແກ້ໄຂ ສະຖານະການຕົວຈິງທີ່ຮ້ອນເຄືອງ ຊຶ່ງ​ຊີວິດ​ພວມ​ຮຽກຮ້ອງ. ພ້ອມ​ກັນ​ກັບ​ການ​ປ່ຽນ​ແປງ​ໃໝ່ຮູບ​ແບບ​ຝຶກ​ອົບຮົມ​ນອກ​ໂຮງຮຽນ, ພິ​ເສດ​ແມ່ນ​ການ​ຝຶກ​ອົບຮົມ​ໂດຍ​ຜ່ານ​ການ​ຜັດປ່ຽນ​ບ່ອນ​ເຮັດ​ວຽກ, ຝຶກ​ຝົນ​ໃນ​ພາກ​ພຶດຕິ​ກຳ​ການ​ງານ​ປະຈຳ​ວັນ, ​ເຊັ່ນ​ຈັດການ​ແກ້​ໄຂ​ສະຖານະ​ການ​ທີ່​ພົວພັນ​ເຖິງ​ການ​ສ້າງ​ທ່າ​ທີ່, ກິ​ລິ​ຍາ​ທ່າ​ທາງ​ທີ່​ຖືກຕ້ອງຕໍ່​ປະຊາຊົນ​ແລະ​ວຽກ​ງານ, ຝຶກ​ຝົນ​ແບບ​ແຜນ​ເຮັດ​ວຽກ​ປະຊາທິປະ​ໄຕ, ສ້າງ​ວິທີ​ເຮັດ​ວຽກ​ແບບ​ວິທະຍາສາດ ​ແລະຈັດການ​ແກ້​ໄຂ​ບັນດາ​ບັນຫານຳພາ​ສາທາລະນະຢ່າງ​ມື​ອາຊີບ. ​ໃນ​ນັ້ນ, ມີ​ແບບ​ແຜນ​ເຮັດ​ວຽກ​ຕ້ອງ​ໄດ້ຮັບ​ການ​ຝຶກ​ຝົນ​​ໃນແບບ​ຝຶກ​ຫັດ, ​ເຊັ່ນ ວິທີ​ການ​ນຳພາ​ວຽກ​ງານ​ຮັບປະກັນ​ລັກສະນະ​ປະຊາທິປະ​ໄຕ, ມື​ອາຊີບ; ຈິດ​ໃຈ​ຮ່ວມ​ມື ຊ່ວຍ​ເຫຼືອ​ຊຶ່ງ​ກັນ​ແລະ​ກັນ; ການ​ປະຊາສຳພັນ, ພິ​ເສດ​ແມ່ນທ່າ​ທີ່​ປະພຶດ​ຕໍ່​ສື່​ມວນ​ຊົນ, ຕໍ່​ການ​ສື່ສານ; ​ແບບ​ແຜນ​ເຮັດ​ວຽກ​ໃນ​ສະພາບ​ແວດ​ລ້ອມ​ແຫ່ງ​ການ​ເຊື່ອມ​ໂຍງ​ສາກົນ ​ແລະວັດທະນະທຳ​ຫຼາກ​ຫຼາຍ.

ທີ​ຫ້າ, ​ເສີມ​ຂະຫຍາຍ​ບົດບາດ​ຂອງ​ປະຊາຊົນ, ສື່​ມວນ​ຊົນ ​ແລະ​ເພີ່ມ​ທະວີ​ການ​ປະ​ຢຸກ​ໃຊ້​ຜົນສຳ​ເລັດ​ຂອງ​ວິທະຍາສາດ-​ເຕັກ​ໂນ​ໂລ​ຊີ​ເຂົ້າ​ໃນ​ການ​ນຳພາ ຄຸ້ມ​ຄອງ, ຫັນ​ແບບ​ແຜນ ວິທີ​ເຮັດ​ວຽກຂອງ​ພະນັກງານ​ເປັນ​ທັນ​ສະ​ໄໝ. ລະດົມ​ປະຊາຊົນ​​ໃຫ້ເຂົ້າຮ່ວມ​ໃນ​ການ​ກໍ່ສ້າງ​ຖັນ​ແຖວພະນັກງານ ​ແລະ​ປ່ຽນ​ແປງ​ໃໝ່​ວຽກ​ງານ​ພະນັກງານ; ​ເກັບ​ກຳ​ຄວາມ​ເຫັນປະກອບສ່ວນ​ຂອງ​ມະຫາຊົນກ່ຽວ​ກັບ​ຂອດ​ຕ່າງໆ​ຂອງ​ວຽກ​ງານ​ພະນັກງານ​ເຊັ່ນ ການ​ຮັບ​ສະໝັກ, ການວາງ​ແຜນ​ກຳນົດ, ການ​ແຕ່ງ​ຕັ້ງ, ການ​ຕີ​ລາຄາ, ​ການແບ່ງ​ປະ​ເພດ​ພະນັກງານ; ສົ່ງ​ເສີມ​ປະຊາຊົນ​ຢ່າງ​ກວ້າງຂວາງ​ໃຫ້​ເຂົ້າ​ຮ່ວມ​ໃນ​ການ​ຕິດຕາ​າມກວດກາແບບ​ແຜນ, ວິທີ​​ເຮັດ​ວຽກ​ຂອງ​ພະນັກງານ​ນຳພາ ຄຸ້ມ​ຄອງ​ຂັ້ນ​ຕ່າງໆ. ກຳນົດ​ທິດ​ໃຫ້​ຊື່​ມວນ​ຊົນ​ເຂົ້າ​ຮ່ວມ​​ໃນ​ການສະຫຼຸບ​ສັງ​ລວມຮູບ​ແບບ​ບຸກຄະລິກກະພາບ, ​ແບບຢ່າງ​ດີ​ເດັ່ນ​ທີ່​ມີແບບ​ແຜນ, ວິທີ​ເຮັດ​ວຽກທີ່​ວິທະຍາສາດ, ປະຊາທິປະ​ໄຕ, ມື​ອາຊີບ ​ເພື່ອລະດົມ​ກຳລັງ​ໃຈ, ​ເຜີຍ​ແຜ່, ຂະຫຍາຍ​ກວ້າງ​ອອກ. ພ້ອມ​ກັນ​ນັ້ນ, ສື່​ມວນ​ຊົນ​ມີ​ຄວາມ​ຮັບຜິດຊອບ​ໃນ​ການ​ຕຳ​ໜິ ວິຈານ​ສັງຄົມ​ຕໍ່ປະ​ເພນີ ​ຄວາມ​ຊິນ​ເຄີຍ​ຫຼ້າ​ຫຼັງ, ​ແບບ​ແຜ​ນອາດຍາ​ສິດ, ​ໂອ້​ອວດ​ທະ​ນົງ​ຕົວ​ ທີ່​ກົງ​ກັນ​ຂ້າມ​ກັບ​ຜົນ​ປະ​ໂຫຍ​ດຂອງ​ປະຊາຊົນ​ແລະກີດຂວາງ​ຄວາມ​ກ້າວໜ້າ​ທາງ​ສັງຄົມ. ພ້ອມ​ກັນ​ກັບ​ການ​ເສີມ​ຂະຫຍາຍ​ບົດບາດ​ຂອງ​ສື່​ມວນ​ຊົນ ຕ້ອງ​ໝູນ​​ໃຊ້​ຜົນສຳ​ເລັດ​ວິທະຍາສາດ-​ເຕັກ​ໂນ​ໂລ​ຊີ​ ເຂົ້າ​ໃນ​ການ​ນຳພາ ຄຸ້ມ​ຄອງ, ພິ​ເສດ​ແມ່ນ​ນຳ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ​ເພື່ອຊີ້​ແຈງທັດສະນະ​ຄະຕິ​ແລະ​ພຶດຕິ​ກຳ​ການ​ງານ​ຂອງ​ພະນັກງານ ລັດຖະກອນ ​ເມື່ອ​ປະຕິບັດ​ຂັ້ນ​ຕອນ​ແກ້​ໄຂ​ວຽກ​ງານ, ອາ​ໄສ​ສິ່ງ​ດັ່ງກ່າວ​ນັ້ນ​ເພື່ອ​ໃຫ້​ປະຊາຊົນ​ມີ​ເງື່ອນ​ໄຂ​ຕິດຕາມ​ກວດກາ​ຕົວ​ຈິງ. ການ​ນຳ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ໃນ​ການ​ຄຸ້ມ​ຄອງຍັງ​ຊ່ວຍ​ໃຫ້​ພະນັກງານ ລັດຖະກອນ​ມີ​ເງື່ອນ​ໄຂຕິດ​ຕໍ່​ພົວພັນ, ​ເກັບ​ກຳ​ຂໍ້​ມູນ ຂໍ້​ສະ​ເໜີ​ແນະ​ຈາກ​ປະຊາຊົນ​ໄດ້​ເປັນ​ຢ່າງ​ດີ, ບົນ​ພື້ນຖານ​ນັ້ນຈະ​ມີ​ການ​ປັບ​ຕົວ​ເອງ, ປັບ​ປ່ຽນ​ກິລິຍາ​ທ່າ​ທາງ ​ແບບ​ແຜນ​ນຳພາ ຄຸ້ມ​ຄອງ. ​ເຕັກ​ໂນ​ໂລ​ຊີຂໍ້​ມູນ​ຂ່າວສານ​ທີ່​ນຳ​ໃຊ້​ເຂົ້າ​ໃນ​ການ​ນຳພາ ຄຸ້ມ​ຄອງຍັງ​ຊ່ວຍ​ໃຫ້​ຄວບ​ຄຸມ​ເວລາ, ​ແຜນການປະຕິບັດ​ງານ​ໄດ້​ດີກ​ວ່າ, ດັ່ງ​ນັ້ນ​ຈຶ່ງດຳ​ເນີນງານ​ຢ່າງ​ທັນ​ການ, ​ໄວວາ ​ແລະ​ມີ​ວິທະຍາສາດ. ​ໃນ​ສະພາບ​ສື່​ຂ່າວ​ດິຈິ​ຕອນ​ຂະຫຍາຍຕົວ​ຢ່າງ​ໄວວາ, ພະນັກງານ​ນຳພາ​ຍັງ​ຕ້ອງ​ຮູ້ວິທີ​ໃຊ້​ເຄືອ​ຂ່າວ​ສັງຄົມຢ່າງຊຳນິ​ຊຳນານ​ ເພື່ອ​ໂຄສະນາ​ເຜີຍ​ແຜ່​ແນວທາງ​ຂອງ​ພັກ, ກົດໝາຍ​ຂອງ​ລັດ, ​ເກັບ​ກຳ​ຄວາມ​ເຫັນຄຳ​ສະ​ເໜີ​ແນະສ້າງສັນ​ສັງຄົມ ​ແລະ​ຕໍ່ສູ້ກັບ​ຄວາມ​ເຫັນ​ທີ່​ຜິດພາດ, ກັບ​ຖ້ອນ​ທຳນອງ​ເສກ​ສັນ​ປັ້ນ​ແຕ່ງ, ປະຕິ​ການ.

ກໍ່ສ້າງແບບ​ແຜນ, ວິທີ​ເຮັດ​ວຽກທີ່​ມີ​ວິທະຍາສາດ, ປະຊາທິປະ​ໄຕ, ​ມື​ອາຊີບ ສຳລັບ​ພະນັກງານ​ນຳພາ ຄຸ້ມ​ຄອງ ​ແມ່ນໜ້າ​ທີ່​ທີ່​ຫຍຸ້ງຍາກ ສັບສົນ, ຊຶ່ງ​ສ່ວນ​ເລິກ​ແມ່ນປ່ຽນ​ແບບ​ຈິນຕະນາການ, ປະ​ເພນີ, ຄວາມ​ຊິນ​ເຄີຍ ​ແລະ​ພຶດຕິ​ກຳ​ຫຼ້າ​ຫຼັງທີ່​ຝັງແໜ້ນ​ໃນ​ພະນັກງານ ລັດຖະກອນ. ມັນ​ຮຽກຮ້ອງ​ໃຫ້​ມີ​ຄວາມ​ຕັດສິນ​ໃຈ​ການ​ເມືອງສູງ​ທີ່​ສຸດ​ຂອງລະບົບ​ການ​ເມືອງ​ແລະ​ທົ່ວ​ສັງຄົມ, ​ແຕ່​ສິ່ງ​ສຳຄັນ​ແມ່ນ​ຕ້ອງ ປຸກລຸກ​ຄວາມ​ຮູ້ສຶກ​ຕື່ນ​ຕົວ​ສະໝັກ​ໃຈ, ຄວາມ​ນັບຖື​ຕົນ​ເອງ, ຄວາມທະນົງໃຈໃນກຽດສັກສີ ຂອງ​ພະນັກງານ​ແຕ່ລະຄົນ ​ເພື່ອບູລະນະ​ບຸກຄະ​ລິກກະພາບ, ສົມ​ກັບ​ເປັນຜູ້ນຳ​ສາທາລະນະ​ມື​ອາຊີບ ​ໃນ​ສັງຄົມ​ສີວິ​ໄລ./.

ຮສ. ປອ. ດວ່າ​ນມິ​ງຫວນ

ກຳມະການ​ສຳຮອງ​ສູນ​ກາງ​ພັກ,
ບັນນາທິການ​ໃຫຍ່ວາລະສານ​ກອມ​ມູນິດ

-------------------

(1), (2) ​ໂຮ່ຈີ​ມິນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ-ຊື້​ເທິ​ດ, ຮ່າ​ໂນ້ຍ, 2011, ​ເຫຼັ້ມ 5, ໜ້າ 272-273, 307.

(3), (4) ​ເອກະສານ​ຄົບ​ຊຸດ​ຂອງ​ພັກ, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2006, ​ເຫຼັ້ມ 47 (1986), ໜ້າ 472, 470-473.

(5) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII (​ເອກະສານ​ພາຍ​ໃນ), ຫ້ອງ​ວ່າການ​ສູນ​ກາງ​ພັກ, ຮ່າ​​ໂນ້ຍ, 2016, ໜ້າ 202 – 203.

(6) ກອງ​ປະຊຸມ​ຄັ້ງ​ທີ 4 ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ XII (​ເອກະສານ​ພາຍ​ໃນ), ຫ້ອງ​ວ່າການ​ສູນ​ກາງ​ພັກ, ຮ່າ​​ໂນ້ຍ, 2016, ໜ້າ 28–32.

- ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ​ສະບັບ​ທີ 909 (​ເດືອນ​ກໍລະກົດ 2018).